ដោយ: គង់ លាងហួរ
អន្តរជាតិ: ទំហំប្រាក់ចំណូលពីការលក់ដីធ្លីរបស់ប្រទេសចិនបានដាំក្បាលចុះដល់កម្រិតទាបបំផុតក្នុងរយៈពេលមួយទសវត្សរ៍ ដោយជំរុញឱ្យមានឱនភាពថវិកាជាតិ ខណៈពេលដែលរដ្ឋាភិបាលចិនកំពុងចាក់បញ្ចូលមូលនិធិកាន់តែច្រើនដើម្បីជំរុញសន្ទុះសេដ្ឋកិច្ច។

ទំហំប្រាក់ចំណូលសរុបពីការលក់ដីធ្លីបានដាំក្បាលចុះ១៤,៦ភាគរយធៀបនឹងឆ្នាំមុនមកនៅត្រឹម១៩៤,១ពាន់លានយ័ន (ប្រមាណពាន់លានដុល្លារ)កាលពីខែឧសភា ឆ្នាំ២០២៥។ តួលេខនេះជាកម្រិតទាបបំផុតគិតចាប់តាំងពីខែឧសភា ឆ្នាំ២០១៥។

ការ​ណ៍នេះបាន​ធ្វើឱ្យ​ទំហំប្រាក់​ចំណូល​សរុប​ជារួមរបស់​រដ្ឋាភិបាល​ចិនធ្លាក់ចុះ មកនៅត្រឹមចំនួន១១,២ទ្រីលានយ័នក្នុងរយៈពេល៥ខែដំបូងដើមឆ្នាំ២០២៥។

ទន្ទឹមនឹងនេះ ការចំណាយថវិកាជាតិសរុបរបស់រដ្ឋាភិបាលចិនបានកើនឡើងដល់ចំនួន១៤,៥ទ្រីលានយ័ន ខណៈអាជ្ញាធរបានបង្កើនការចាក់បញ្ចូលមូលនិធិ ក្នុងគោលដៅជំរុញកំណើនសេដ្ឋកិច្ច។ ដូច្នេះ ទំហំឱនភាពថវិកាជាតិបានហក់ឡើងដល់៣,៣ទ្រីលានយ័ន។

ការ​ធ្លាក់​ចុះ​នៃ​ការ​លក់​ដី​ធ្លីបាន​គូស​បញ្ជាក់​ពី​បញ្ហាប្រឈម​ជា​បន្ត​បន្ទាប់​ក្នុង​ទីផ្សារ​អចលន​ទ្រព្យចិន ខណៈសេដ្ឋកិច្ចចិនកំពុងប្រឈមមុខនឹងហានិភ័យ ដោយសារគោលនយោបាយរបស់រដ្ឋបាលប្រធានាធិបតីអាមេរិកលោក ដូណាល់ ត្រាំ ដូចជាបញ្ហាពន្ធគយ។

លោក Lisheng Wang សេដ្ឋវិទូនៅធនាគារវិនិយោគ Goldman Sachs បានលើកឡើងថា “យើងបន្តព្យាករណ៍ថា ប្រាក់ចំណូលពីការលក់ដីធ្លីរបស់រដ្ឋាភិបាលចិនអាចនឹងធ្លាក់ចុះចន្លោះពី៥ភាគរយទៅ១០ភាគរយ បន្ថែមទៀតនៅឆ្នាំនេះ”។

លោក Wang នៅតែជឿជាក់ថា ការសាងសង់ និងការវិនិយោគលើអចលនទ្រព្យនៅក្នុងប្រទេសមហាអំណាចសេដ្ឋកិច្ចលេខ២ លើពិភពលោក មិនទាន់ដាំក្បាលចុះដល់កម្រិតបាតនៅឡើយទេ៕

ដោយ: គង់ លាងហួរ
អន្តរជាតិ: គម្រោងផ្លូវដែកល្បឿនលឿនពីទីក្រុង Mumbai ឆ្ពោះទៅកាន់ទីក្រុង Ahmedabad របស់ប្រទេសឥណ្ឌាបានសម្រេចនូវវឌ្ឍនភាពដ៏សំខាន់មួយ ដោយបានបញ្ចប់ការសាងសង់ផ្លូវដែកលើអាកាសប្រវែងជាង៣០០គីឡូម៉ែត្រ។

គម្រោងផ្លូវដែកល្បឿនលឿនប្រកបដោយមហិច្ឆិតានេះលាតសន្ធឹងប្រវែង៥០៨គីឡូម៉ែត្រ ដោយប្រើប្រាស់រថភ្លើងប្រភេទ Shinkansen ពីប្រទេសជប៉ុន ក្រោមភាពជាដៃគូរវាងប្រទេសទាំងពីរ។

នេះជាគម្រោងហេដ្ឋារចនាសម្ព័ន្ធដឹកជញ្ជូនដ៏ធំបំផុតរបស់ប្រទេសឥណ្ឌា ក្នុងគោលបំណងកាត់បន្ថយពេលវេលាធ្វើដំណើរពី៧ម៉ោងមកនៅសល់ត្រឹមតែ២ម៉ោងរវាងទីក្រុងបុមបៃ និងទីក្រុង Ahmedabad ដែលជាមជ្ឈមណ្ឌលសេដ្ឋកិច្ចដ៏សំខាន់បំផុតទាំង២របស់ឥណ្ឌា។

នៅពេលសាងសង់បញ្ចប់ ភាពជោគជ័យរបស់ឥណ្ឌានៃគម្រោងផ្លូវដែកល្បឿនលឿននេះអាចបង្ហាញអំពីសមត្ថភាពរបស់ប្រទេសឥណ្ឌាក្នុងការប្រកួតប្រជែង និងការចាប់យកបច្ចេកវិទ្យាបៃតង ដូចបណ្តាប្រទេស ដែលមានសេដ្ឋកិច្ចជឿនលឿននៅលើពិភពលោក។

គិតត្រឹមខែមិថុនា ឆ្នាំ២០២៥នេះ ការសាងសង់ផ្លូវដែកលើអាកាសចម្ងាយជាង៣០០គីឡូម៉ែត្រសម្រាប់បណ្តាញរថភ្លើង Mumbai-Ahmedabad ត្រូវបានបញ្ចប់ ដោយប្រើប្រាស់វិធីសាស្រ្តសាងសង់ទំនើបបំផុត។

ស្ពានឆ្លងទន្លេចំនួន១៤ ស្ពានដែកចំនួន៧ និងស្ពានបេតុងចំនួន៥ បានបញ្ចប់ការសាងសង់ផងដែរ។ បច្ចុប្បន្ន គម្រោងនេះបានឈានចូលដល់ដំណាក់កាលតេស្តសាកល្បងដ៏សំខាន់មួយ ដោយប្រទេសជប៉ុនចាប់ផ្តើមសាកល្បងរថភ្លើងប្រភេទ Shinkansen ទំនើបចុងក្រោយបង្អស់ ដែលត្រូវបានផលិតឡើងជាពិសេសសម្រាប់ប្រទេសឥណ្ឌា។

នាពេលបច្ចុប្បន្ន រថភ្លើងផលិតនៅប្រទេសឥណ្ឌា ក្រោមគំនិតផ្តួចផ្តើម“Make in India”កំពុងដំណើរការតេស្តសាកល្បងដំបូងក្នុងល្បឿន២៨០គីឡូម៉ែត្រក្នុងមួយម៉ោង។ ប៉ុន្តែ ល្បឿនគោលដៅត្រូវបានកំណត់ក្នុងរង្វង់៣២០គីឡូម៉ែត្រក្នុងមួយម៉ោង។

គម្រោងរថភ្លើង Mumbai-Ahmedabad ត្រូវបានគេរំពឹងថា នឹងចាប់ផ្តើមដាក់ឱ្យប្រើប្រាស់ផ្នែកកំណាត់មួយចំនួននៅឆ្នាំ២០២៦ និងចាប់ផ្តើមសេវាកម្មដឹកអ្នកដំណើរដំបូងគេនៅរដ្ឋ Gujarat នៅឆ្នាំ២០២៨ មុនពេលតភ្ជាប់ពេញលេញទៅកាន់ទីក្រុងបុមបៃនៅឆ្នាំ២០៣០។

នៅពេលបញ្ចប់រួចរាល់ទាំងស្រុង ផ្លូវរថភ្លើងនេះត្រូវបានគេរំពឹងថា នឹងចូលរួមចំណែកដល់គោលដៅអាកាសធាតុរបស់ប្រទេសឥណ្ឌា ដោយផ្តល់នូវសមត្ថភាពដឹកជញ្ជូនសាធារណៈទ្រង់ទ្រាយធំ ដោយមិនបំភាយឧស្ម័ន៕

ដោយៈ គង់ សូរិយា

    ឧត្តរមានជ័យៈ សម្ដេចតេជោ នាយកឧត្តមសេនីយ៍ផុតលេខផ្កាយមាស៥ ហ៊ុន សែន  បានប្រកាសទទួលយកតាមសំណើរបស់មេបញ្ជាការទាំងឡាយ នូវភារកិច្ចជាអគ្គភ័ស្ដុភារជាន់ខ្ពស់ សម្រាប់កងកម្លាំងប្រដាប់អាវុធ។

សម្ដេចអគ្គមហាសេនាបតីតេជោ នាយកឧត្តមសេនីយ៍ផុតលេខផ្កាយមាស៥ ហ៊ុន សែន  ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រកម្ពុជា បានប្រកាសដូច្នេះក្នុងឱកាសអញ្ជើ​ញជួបប្រជុំជាមួយ មេបញ្ជាការអង្គភាពចំណុះទិសទី២ និងទិសទី៣ នៅទីបញ្ជាការស្រាលទិសទី៣ ក្រុងសំរោង ខេត្តឧត្តរមានជ័យ នាព្រឹកថ្ងៃទី២៦ ខែមិថុនា ឆ្នាំ២០២៥។

លោកជា ធីរិទ្ធ អ្នកនាំពាក្យសម្ដេចតេជោ ហ៊ុន សែន ប្រធានព្រឹទ្ធសភា បានប្រាប់អ្នកយកព័ត៌មានឱ្យដឹងថា នៅក្នុងកិច្ចប្រជុំនេះ សម្ដេចតេជោ ហ៊ុន សែន បានប្រកាសទទួលយកតាមសំណើរបស់មេបញ្ជាការទាំងឡាយ នូវភារកិច្ចជាអគ្គភ័ស្ដុភារជាន់ខ្ពស់ សម្រាប់កងកម្លាំងប្រដាប់អាវុធរបស់យើង ដែលជាការបញ្ជាក់យ៉ាងច្បាស់ពីសម្ដេចនៅក្នុងការជួយដល់កងទ័ពរបស់យើង ជាពិសេស គឺជាការធានានូវការផ្គត់ផ្គង់ដល់កងកម្លាំងរបស់យើង ដែលកំពុងតែប្រឈមមុខជាមួយនឹងសត្រូវ។

នៅក្នុងឱកាសនេះ សម្ដេចតេជោ នាយកឧត្តមសេនីយ៍ផុតលេខផ្កាយមាស៥ ហ៊ុន សែន បានបញ្ជាក់យ៉ាងច្បាស់ថា “សូមកងទ័ពទាំងឡាយកុំខ្លាច នៅក្នុងការវាយប្រហារជាមួយសត្រូវ ដែលឈ្លាន​ពានយើង”។

សម្តេចតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន ប្រធានព្រឹទ្ធសភាកម្ពុជា បានអញ្ជើញដល់ក្រុមសំរោង ខេត្តឧត្តរមានជ័យនាព្រឹកថ្ងៃទី២៦ ខែមិថុនា ឆ្នាំ២០២៥ ដើម្បីចុះសួរសុខទុក្ខ និងពិនិត្យស្ថានភាពកងទ័ពកម្ពុជា ដែលកំពុងឈរជើងដ៏អង់អាចក្លា​ហានបំផុតការពារទឹកដីជាប់ព្រំដែនថៃ។

សម្តេចតេជោ ហ៊ុន សែន ជាអគ្គមេបញ្ជាការកំពូល ដែលបានយកចិត្តទុក្ខដាក់ខ្ពស់បំផុតចំពោះយោធា ហើយក៏ជាអគ្គមេបញ្ជាការដែលពោរពេញដោយយុទ្ធសាស្ត្រសង្គ្រាម វាយយកឈ្នះលើសមរភូមិសង្គ្រាម។

កងទ័ព និងសព្វាវុធដ៏ទំនើបៗរបស់កម្ពុជា ត្រូវបានចល័តចេញពីបន្ទាយឆ្ពោះមកកាន់ខេត្តជាប់ព្រំដែនថៃ ទិសខេត្តឧត្តរមានជ័យ និងព្រះវិហារ បន្ទាប់ពីទាហានថៃ លបលួចបាញ់ប្រហារទាហានខ្មែរលើដីខ្មែរ កាលពីថ្ងៃទី២៨ ខែឧសភា ឆ្នាំ២០២៥កន្លងទៅនេះ។ មកដល់ពេលនេះ ទាំងទាហាន និងសព្វាវុធរបស់កម្ពុជាត្រូវបានត្រៀមបម្រុងជាប់ប្រចាំ ដើម្បីការពារទឹកដី ក្នុងករណីមានការឈ្លានពានណាមួយពីកងទ័ពថៃ៕

ដោយ: គង់ លាងហួរ
អន្តរជាតិ: យោងតាមកាសែត Jakarta Globe បានរាយការណ៍ថា រដ្ឋាភិបាលរបស់ប្រទេសឥណ្ឌូនេស៊ីគ្រោងនឹងផ្តល់កញ្ចប់ហិរញ្ញប្បទានចំនួន១៣០ទ្រីលានរូពៀ(ប្រមាណ៨ពាន់លានដុល្លារអាមេរិក) ក្នុងទម្រង់ជាប្រាក់កម្ចីដល់អ្នកទិញផ្ទះ។

រដ្ឋាភិបាលឥណ្ឌូនេស៊ីអនុញ្ញាតឱ្យសមាគមធនាគាររដ្ឋ Himbara អាចប្រើប្រាស់មូលនិធិខ្នាតយក្ស Danantara ជាដើមទុនដើម្បីផ្តល់ប្រាក់កម្ចីដល់អ្នកទិញផ្ទះ។

ប្រធានាធិបតីឥណ្ឌូនេសុីលោក Prabowo Subianto មានគោលបំណងសាងសង់ផ្ទះចំនួន២លានយូនីតនៅតំបន់ជនបទ និង១លានយូនីតបន្ថែមទៀតនៅក្នុងទីក្រុងជារៀងរាល់ឆ្នាំ ដោយសារប្រទេសនេះជួបបញ្ហាកង្វះលំនៅដ្ឋាន។

ជាមួយគ្នានោះ លោក Rosan Roeslani នាយកប្រតិបត្តិរបស់មូលនិធិ Danantara ក៏បានគូសបញ្ជាក់ផងដែរអំពីការគាំទ្រយ៉ាងពេញទំហឹងចំពោះគម្រោងផ្តល់ហិរញ្ញប្បទានចំនួន៨ពាន់លានដុល្លារអាមេរិកនេះ។

សមាសភាពក្រុមការងារទទួលបន្ទុករៀបចំផ្តល់កញ្ចប់ហិរញ្ញប្បទាន រួមមានតំណាងមកពីក្រសួងលំនៅដ្ឋាន មូលនិធិ Danantara ទីភ្នាក់ងារ BP Tapera និងសមាគមធនាគាររដ្ឋ Himbara។

លោក Rosan បានមានប្រសាសន៍ឱ្យដឹងបន្ថែមថា យើងប៉ាន់ប្រមាណថា នៅចុងឆ្នាំ២០២៥នេះ យើងនឹងអាចបញ្ចេញកញ្ចប់ហិរញ្ញប្បទានក្នុងទំហំទឹកប្រាក់ចំនួន១៣០ទ្រីលានរូពៀ។

លោក​បាន​បញ្ជាក់ទៀតថា ធនាគារ​របស់​រដ្ឋ​ទាំង​អស់បាន​ឯកភាព​ចូល​រួមចំណែក​ក្នុង​គំនិត​ផ្តួច​ផ្តើម​នេះ។ លោក Rosan បានអះអាងថា រដ្ឋាភិបាលនឹងផ្តល់ការធានាលើប្រាក់កម្ចី និងអត្រាការប្រាក់ទាប ដើម្បីជាការលើកទឹកចិត្ត៕

ដោយៈ ចំណាន

    ភ្នំពេញៈ រដ្ឋមន្ត្រីក្រសួងសាធារណៈការ និងដឹកជញ្ជូនលោកប៉េង ពោធ៍នា បានបើកកិច្ចប្រជុំលើកទី៤ របស់គណៈកម្មាធិការបច្ចេកទេសអន្តរក្រសួង ដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្ត្រជាតិសម្រាប់គ្រប់គ្រង និងអភិវឌ្ឍយានយន្តអគ្គិសនី (គ.ល.គ.យ.អ.)។

កិច្ចប្រជុំនេះ ធ្វើឡើងក្នុងគោលបំណងដើម្បីពិនិត្យតាមដាន និងវាយតម្លៃវឌ្ឍនភាព នៃការអនុវត្ត “គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០” ដោយផ្អែកលើរបាយការណ៍ និងផែនការអនុវត្តរបស់ក្រសួង- សា្ថប័នសាមី លើបញ្ហាប្រឈម និងកាលានុវត្តភាព ដែលបានជួបប្រទះក្នុងការអនុវត្តគោលនយោបាយ ស្វែងរកដំណោះស្រាយរួម និងផ្តល់ទិសដៅសម្រាប់រយៈពេល៦ខែខាងមុខ ដើម្បីបន្តជំរុញការអនុវត្ត ផែនការសកម្មភាពនៃគោ​លនយោបាយឱ្យកាន់តែមានប្រសិទ្ធភាព។

គ.ល.គ.យ.អ. ទទួលបានការអនុញ្ញាតដ៏ខ្ពង់ខ្ពស់ពីប្រមុខរាជរដ្ឋាភិបាលកម្ពុជា ក្នុងការងាររៀបចំតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្ត្រជាតិ សម្រាប់គ្រប់គ្រង និងអភិវឌ្ឍយានយន្តអគ្គិសនី ក្នុងទិសដៅគាំទ្រលើកទឹកចិត្ត ឱ្យបងប្អូនប្រជាពលរដ្ឋ ងាកមកប្រើប្រាស់យានយន្តអគ្គិសនី ឱ្យបានទូលំទូលាយ និងទាក់ទាញការវិនិយោគក្នុងវិស័យនេះ ឱ្យបានកាន់តែប្រសើរ និងច្រើនឡើងនៅកម្ពុជា ដើម្បីពង្រឹងកិច្ចការពារបរិស្ថាន និងថាមពលបៃតងស្របតាម “យុទ្ធសាស្ត្ររយៈពេលវែងរបស់កម្ពុជាស្តីពីអព្យាក្រឹតកាបូន” ដែលបានដាក់ជូន “អនុសញ្ញាក្របខ័ណ្ឌសហប្រជាជាតិ ស្តីពីការប្រែប្រួលអាកាសធាតុ” (United Nations Framework Convention on Climate Change – UNFCCC) កាលពីខែធ្នូ ឆ្នាំ២០២១ ដោយមានបញ្ចូលការប្តេជ្ញាចិត្តសម្រេចឱ្យបាននូវការប្រើប្រាស់រថយន្តគ្រួសារ និងរថយន្តក្រុងអគ្គិសនី៤០% និងទោចក្រយានយន្តអគ្គិសនី ៧០% ត្រឹមឆ្នាំ២០៥០៕