ដោយ:លាងហួរ

បាងកក: ក្រុមប្រឹក្សាវិនិយោគរបស់ប្រទេសថៃ (BOI) បានអនុម័តលើក្របខណ្ឌ នៃយុទ្ធសាស្រ្តជំរុញការវិនិយោគថ្មីរបស់ខ្លួន សម្រាប់រយៈពេល៥ឆ្នាំខាងមុខ ដែលនឹងផ្តោតលើការឈានចូលយុគសម័យសេដ្ឋកិច្ចថ្មី។

យុទ្ធសាស្រ្តនេះពាក់ព័ន្ធនឹងការលើកទឹកចិត្ត ដល់ការរីកចម្រើនផ្នែកបច្ចេកវិទ្យា ការផ្លាស់ប្តូរទៅជាឧស្សាហកម្មបៃតង និងឆ្លាតវៃ ទេពកោសល្យ ការអភិវឌ្ឍន៍ ក៏ដូចជាការច្នៃប្រឌិត ដើម្បីពង្រឹងឋានៈរបស់ប្រទេសនេះជាមជ្ឈមណ្ឌលក្នុងតំបន់សម្រាប់ធុរកិច្ច ពាណិជ្ជកម្ម និងភស្តុភារ។

យុទ្ធសាស្ត្រជំរុញការវិនិយោគថ្មីឆ្នាំ២០២៣ -២០២៧មានគោលបំណងជំរុញការវិនិយោគ ដើម្បីរៀបចំរចនាសម្ព័ន្ធសេដ្ឋកិច្ច របស់ប្រទេសឡើងវិញជុំវិញគោលគំនិតស្នូលចំនួនបី ការច្នៃប្រឌិត បច្ចេកវិទ្យា និងគំនិតច្នៃប្រឌិត។

ដោយ​មើល​ឃើញ​ពី​បរិយាកាស​ពិភពលោក​ ដែល​កំពុងមាន​ការ​ប្រឈម​ នឹងភាព​ប្រែប្រួល​ និង​មាន​ការ​ប្រកួត​ប្រជែង​ខ្ពស់​ BOI នឹង​បន្ត​នាំមុខ​ការ​ផ្លាស់​ប្តូរ​ និង​បន្ត​ជំរុញ​ការ​វិនិយោគ ​ក្នុង​វិធី​ដែល​សម្រេច​បាន​លទ្ធផល​ជាក់ស្តែង​ ដោយ​ជួយ​ដឹកនាំ​ប្រទេស​ថៃ​ឱ្យ​ចូល​ទៅ​ក្នុង​ប្រទេសសេដ្ឋកិច្ចថ្មី។ នេះបើយោងតាមប្រសាសន៍របស់ លោក Narit Therdsteerasukdi បានប្រាប់អ្នកសារព័ត៌មាន ក្នុងអំឡុងសន្និសីទសារព័ត៌មានលើកដំបូងរបស់លោក ចាប់តាំងពីលោកចូលកាន់តំណែងជាអគ្គលេខាធិការ BOI កាលពីថ្ងៃទី៣ខែតុលា។

ដើម្បីសម្រេចបាននូវគោលបំណងនោះBOI នឹងពង្រីកតួនាទីរបស់ខ្លួនពីអ្នកផ្សព្វផ្សាយ ដែលផ្តល់អត្ថប្រយោជន៍ពន្ធ និងមិនមែនសារពើពន្ធ ដើម្បីផ្តោតលើការក្លាយជាអ្នករួមបញ្ចូល នៃឧបករណ៍គាំទ្រការវិនិយោគ ‘អ្នកសម្របសម្រួល’ ការផ្តល់សេវា និងតំណភ្ជាប់ ដែលតភ្ជាប់ឧស្សាហកម្ម ដើម្បីបង្កើតឱកាសអាជីវកម្មកាន់តែច្រើន៕

ដោយៈ សុខុម

ហុងកុង: ទោះបីជាសេដ្ឋកិច្ចរបស់មហាយក្សចិន ត្រូវបានហ៊ុមព័ទ្ធដោយបញ្ហាជាច្រើន រាប់ចាប់ពីវិបត្តិអចលនទ្រព្យ រហូតដល់ភាពអត់ការងារធ្វើរបស់យុវជន។

យ៉ាងណាក្ដី ក៏លោកប្រធានាធិបតីស៊ី ជីនភីង មិនបានផ្តល់នូវគំនិតដ៏សំខាន់គួរឱ្យស្ញប់ស្ញែងណាមួយ ដើម្បីស្ដារសេដ្ឋកិច្ចប្រទេសនេះឡើងវិញឡើយ អំឡុងសុន្ទរកថាបើករយៈពេល២ម៉ោងរបស់លោក ក្នុងសមាជបក្សកុម្មុយនីស្តចិន កាលពីថ្ងៃអាទិត្យ ទី១៦ ខែតុលា។

តាមការរំពឹងទុកថា មេដឹកនាំចិនរូបនេះ នឹងបន្តកាន់តំណាចអាណត្តិទី៣ មិនធ្លាប់មានក្នុងប្រវត្តិសាស្ត្រ នៅឯសមាជបក្សរយៈពេលមួយសប្ដាហ៍​។ បញ្ហាអាទិភាពនានាដែលត្រូវបានធ្វើបទបង្ហាញ ក្នុងសមាជដែលមានសមាជិកគណបក្សជាង២.០០០នាក់ចូលរួមនេះ ក៏នឹងកំណត់មាគ៌ារបស់ប្រ​ទេសចិន សម្រាប់រយៈពេល៥ឆ្នាំខាងមុខ ឬយូរជាងនេះផងដែរ។

នៅក្នុងសុន្ទរកថារបស់លោក កាលពីថ្ងៃអាទិត្យ ទី១៦ ខែតុលា លោក ស៊ី ជីនភីង បានលើកឡើងដោយទំនុកចិត្តខ្ពស់ ដោយលោកបានសង្កត់ធ្ងន់ពីភាពខ្លាំងក្លា និងឥទ្ធិពលកើនឡើងយ៉ាងសម្បើម របស់មហាយក្សចិន ក្រោ​មការដឹកនាំរបស់លោកក្នុងពេល១ទសវត្សរ៍មកនេះ។

ទន្ទឹមនេះលោកក៏បានគូសបញ្ជាក់ម្តងហើយ ម្តងទៀតផងដែរអំពីហានិភ័យ និងបញ្ហាប្រឈមដែលប្រទេសចិន ដែលត្រូវប្រឈមមុខ ដោយក្នុងនោះរួមមានទាំងវិបត្តិកូវីដ-១៩ បញ្ហាក្រុងហុងកុង និងបញ្ហាកោះតៃវ៉ាន់ ដែលលោកអះអាងថា ប្រទេសចិន បានទទួលជ័យជម្នះផងដែរ។

ទោះជាយ៉ាងណា អ្នកជំនាញមានការព្រួយបារម្ភ ដែលលោក ស៊ី ជីនភីង មិនបានផ្តល់សញ្ញាណាមួយបង្ហាញ ពីការងាកចេញពីគោលនយោ​បាយសូន្យកូវីដ-១៩ ដ៏តឹងរឹងរបស់ប្រទេសនេះ ឬជំហរគ្រប់គ្រងដ៏តឹងរឹងរបស់ខ្លួនលើអាជីវកម្មនានា ដែលចំណុចទាំង២នេះ បានរារាំងដល់កំណើនសេដ្ឋកិច្ចរបស់ប្រទេសនេះ ដែលជាសេដ្ឋកិច្ចធំបំផុតទី២របស់ពិភពលោក។

មហាយក្សចិន គឺជាសេដ្ឋកិច្ចដ៏ធំចុងក្រោយរបស់ពិភពលោក ដែលនៅតែអនុវត្តវិធានការសូន្យកូវីដ-១៩ ដ៏តឹងរ៉ឹងដែលមានគោលបំណងលុបបំបាត់ប្រភពចម្លង តាមរយៈការរឹតបន្តឹងតាមព្រំដែន ការធ្វើតេស្តកូវីដទ្រង់​ទ្រាយធំ ការធ្វើចត្តាឡីស័កយ៉ាងទូលំទូលាយ និងការបិទខ្ទប់ដែលមិនមានការសម្របសម្រួលបាន៕  CNN៕

ដោយៈ សុខុម

ហុងកុង: លោក John Lee Ka-chiu មេដឹកនាំថ្មីនៃក្រុងហុងកុង ត្រូវបានរំពឹងថា នឹងប្រកាសចាប់ផ្ដើមគម្រោង ហេដ្ឋារចនាសម្ព័ន្ធធំៗអំឡុងសុន្ទរកថារបស់លោកស្ដីពី គោលនយោបាយក្នុងពេលដ៏ខ្លីខាងមុខនេះ ក្នុងគោលបំណងស្តារសេដ្ឋកិច្ចឡើងវិញ និងបង្កើតការងារថ្មីៗរាប់សែនកន្លែង។

សារព័ត៌មាន South China Morning Post បានចុះផ្សាយកាលពីថ្ងៃច័ន្ទ ទី១៧ ខែតុលា ដោយដកស្រង់ប្រភពថា លោក John Lee Ka-chiu នឹងប្រកាសគម្រោងធំៗចំនួន៦ ដោយក្នុងនោះ៣ជាគម្រោងផ្លូវដែក ហើយ៣ទៀតជាគម្រោងផ្លូវហាយវ៉េ។

គម្រោងទាំងនោះ រួមមាន ទាំងគម្រោងផ្លូវដែកប៉ែកខាងលិចហុងក្រុង-ស៊ឹនជិន (Hong Kong-Shenzhen West Rail Link) ដែលតភ្ជាប់តំបន់ Hung Shui Kiu និង Qianhai ដែលជាតំបន់សេដ្ឋកិច្ចនៅទីក្រុងស៊ឹនជិន (Shenzhen) ផងដែរ។

រដ្ឋាភិបាលក្រុងប៉េកាំង មានមហិច្ឆតាប្រែក្លាយតំបន់ Qianhai ទៅជាមជ្ឈមណ្ឌលពាណិជ្ជកម្មលំដាប់ពិភពលោក នៅត្រឹមឆ្នាំ២០៣៥ ជាមួយនឹងផែនការពង្រីកតំបន់សេដ្ឋកិច្ចពីនេះ ពីទំហំ១៤,៩គីឡូម៉ែត្រការ៉េ (៣.៧០៦ហិកតា) ទៅ១២០,៦គីឡូម៉ែត្រការ៉េ។

ក្រុមមន្ត្រីចិនដីគោកនិយាយថា ផែនការនេះបានផ្តល់ក្ដីសង្ឃឹមថ្មីដល់ក្រុងហុងកុង ក្នុងការស្ដារសេដ្ឋកិច្ចរបស់ខ្លួនឡើងវិញ និងបង្កើតឱកាសថ្មីៗសម្រាប់យុវជន។

ប្រភពមួយបានទម្លាយប្រាប់សារព័ត៌មាន South China Morning Post ថា គម្រោងផ្លូវដែកឆ្លងកាត់ព្រំដែននេះ គឺជាការបណ្តាក់ទុនរួមគ្នារវាងរដ្ឋាភិបាលហុងកុង និងក្រុងស៊ឹនជិន ដោយភាគីទាំង២ទទួលបន្ទុកចំណា​យលើការសាងសង់នៅខាងទឹកដីរបស់ខ្លួនរៀងៗខ្លួន។

ប្រភពដដែលបានបន្ថែមថា “គម្រោងនេះ នឹងត្រូវដាក់ជូនប្រឹក្សានីតិ   ប្បញ្ញត្តិក្នុងពេលឆាប់ៗនេះ មុននឹងឈានដល់ការហៅក្រុមហ៊ុនមកដេញ    ថ្លៃ”។

គម្រោងសំខាន់មួយទៀត គឺផ្លូវដែក Central Railway ដែលជាផ្លូវកាត់រវាងតំបន់ New Territories East និងតំបន់ New Territories West។

គំនិតផ្តួចផ្តើមផ្សេងៗទៀត ដែលលោក John Lee Ka-chiu អាចនឹងប្រកាសក្នុងពេលជាមួយគ្នាដែរ គឺការសាងសង់ពង្រីកបន្ថែមនូវខ្សែផ្លូវដែក Tseung Kwan O Line ដែលគេរំពឹងថា នឹងចាប់ផ្ដើមនៅចុងឆ្នាំនេះ៕ South China Morning Post៕

ដោយៈ គង់ ម៉ាលីនណា

       ភ្នំពេញៈ ស្របពេលសេដ្ឋកិច្ចកម្ពុជាកំពុងបង្ហាញសញ្ញាវិជ្ជមាន បន្ទាប់ពីការបើកដំណើរការសេដ្ឋកិច្ច សង្គមកាលពីចុងឆ្នាំមុនរបស់រដ្ឋាភិបាល បានធ្វើឲ្យសកម្មភាពសេដ្ឋកិច្ច និងអាជីវកម្មនៅកម្ពុជាបានដំណើរការដោយរលូន។

អ្នកជំនាញសេដ្ឋកិច្ច និងអចលនទ្រព្យ ពិសេសអ្នកធ្វើការងារក្នុងភាពជាភ្នាក់ងារក្នុងវិស័យអចលនទ្រព្យបានឲ្យដឹងថា និន្នាការស្វែងរកជួលហាងបើកអាជីវកម្មនានា បានកើនឡើងតាំងពីត្រីមាសទី២ដើមឆ្នាំនេះ។

យោងតាមរបាយការណ៍របស់ក្រុមហ៊ុន CBRE Cambodia ចេញផ្សាយនៅដើមខែតុលា ឆ្នាំនេះ បានបង្ហាញថា ក្នុងរយៈពេលពេញមួយត្រីមាសទី៣ ឆ្នាំ២០២២ មានម៉ាកផលិតផលល្បីៗ ទាំងក្នុងស្រុកនិងក្រៅស្រុកចំនួន១០ បានចូលមកក្នុងទីផ្សារលក់រាយ នៅក្នុងក្រុងភ្នំពេញ ខណៈពេលដែលស្លាកយីហោចំនួន៦២ ផ្សេងទៀតបានពង្រីកសាខាបន្ថែមទៀត ដូចជា H&M Cambodia The Pizza Company Adidas Starbucks Krispy Kreme ជាដើម។

អ្នកស្រីតាំង ហួរអគ្គនាយិកាក្រុមហ៊ុនAmatak Property Serviceបានមានប្រសាសន៍ឲ្យដឹងថា ចំនួនប្រជាពលរដ្ឋ និងម្ចាស់អាជីវកម្មនានាស្វែងរកជួលផ្ទះដើម្បីបើកហាង ឬអាជីវកម្មរបស់ពួកគេមានកំនើនខ្ពស់ និងល្អប្រសើរឡើងវិញ តាំងពីពេលរដ្ឋាភិបាលបើកដំណើរការ សកម្មភាពសេដ្ឋកិច្ច​សង្គម ពិសេសវិស័យទេសចរណ៍ឡើងវិញ។

អ្នកស្រីបានបន្តថា “អ្នកស្វែងរកផ្ទះ ដើម្បីបើកហាងឬអាជីវកម្មនានា ហាក់មានភាពស្រេកឃ្លានក្នុងទីផ្សារ ពួកគាត់ហាក់ផ្តោតនិងបង្ហាញសកម្ម​ភាពគួរឲ្យរីករាយ និងសកម្ម”៕

ដោយ៖ វឌ្ឍនៈ

ភ្នំពេញ ៖ ទោះស្ថិតក្នុងស្ថានភាពមិនទាន់ច្បាស់លាស់នៃសេដ្ឋកិច្ចសកល ប្រទេសកម្ពុជាទទួលបានគម្រោងវិនិយោគជាបន្តបន្ទាប់ ជាពិសេសការវិនិយោគឧស្សាហកម្ម។ ជាក់ស្ដែង នៅក្នុងសប្ដាហ៍ទី២នៃខែតុលា ឆ្នាំ២០២២នេះ ក្រុមប្រឹក្សាអភិវឌ្ឍន៍កម្ពុជាបានចេញវិញ្ញាបនបត្រចុះបញ្ជីជូនក្រុមហ៊ុនវិនិយោគចំនួន៧ ដែលមានទឹកប្រាក់ជាង៤០លានដុល្លារអាមេរិក។

យោងតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជា ដែលបានចេញផ្សាយ ជាបន្តបន្ទាប់ ក្នុងសប្ដាហ៍ទី២ នៃខែតុលានេះ មានគម្រោងចំនួន៧ ដែលក្រុមប្រឹក្សាអភិវឌ្ឍន៍កម្ពុជា សម្រេចចុះបញ្ជីអនុញ្ញាតឱ្យវិនិយោគជាផ្លូវការ ក្នុងចំណោមគម្រោងទាំងនោះ ភាគច្រើនជាគម្រោងរោងចក្រឧស្សាហកម្ម។

សេចក្ដីប្រកាសព័ត៌មានដដែលនេះឱ្យដឹងថា ខេត្តស្វាយរៀងទទួលបានគម្រោងវិនិយោគចំនួន៣ ដែលមានទឹកប្រាក់ជិត២០លានដុល្លារអាមេរិក ខេត្តតាកែវមាន១គម្រោង មានទឹកប្រាក់៥,២លានដុល្លារអាមេរិក ខេត្តកណ្ដាលមាន១គម្រោង មានទឹកប្រាក់៥,៥លានដុល្លារ ខេត្តកំពង់ស្ពឺមាន១គម្រោង មានទឹកប្រាក់៥,៨លានដុល្លារនិងរាជធានីភ្នំពេញ មានទឹកប្រាក់៥,១លានដុល្លារអាមេរិក។

ការអនុម័តគម្រោងរោងចក្រ ជាបន្តបន្ទាប់នេះ បានជំរុញឱ្យតម្រូវការដីធ្លី នៅក្នុងប្រទេសកម្ពុជាសម្រាប់ប្រើប្រាស់ក្នុងវិស័យឧស្សាហកម្មរោងចក្រ មានកំណើនកាន់តែច្រើនឡើង និងធ្វើឱ្យតម្លៃដីធ្លីមានការកើនឡើងទៅតាមតម្រូវការនោះដែរ។

លោក ថា ថេង ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តស្វាយរៀងឱ្យដឹងនៅថ្ងៃទី១៧ ខែតុលានេះថា ចាប់តាំងពីរាជរដ្ឋាភិបាលមានគម្រោងសាងសង់ផ្លូវល្បឿនលឿនភ្នំពេញ-បាវិត ឃើញថា វិនិយោគិនចាប់ផ្ដើមសម្លឹងមើលលើការវិនិយោគក្នុងខេត្តស្វាយរៀងច្រើន ជាពិសេស នៅក្នុងក្រុងបាវិត។

លោកបន្តថា ក្នុងរយៈពេលចុងក្រោយនេះ គម្រោងសាងសង់ ដែលបានជាប់គាំងនៅខេត្តស្វាយរៀង មានការចាប់ផ្ដើមសាងសង់ឡើងវិញជាបន្តបន្ទាប់ផងដែរ ដែលជាសញ្ញាវិជ្ជមានសម្រាប់គម្រោងនានា  និងការទាក់ទាញការវិនិយោគថ្មីៗទៀតផង។

លោកក៏រំពឹងថា តំបន់សេដ្ឋកិច្ចពិសេស នៅក្នុងខេត្តស្វាយរៀង នឹងទទួលបានគម្រោងវិនិយោគបន្តទៀត និងអាចផ្ដល់ឱកាសការងារដល់បងប្អូនប្រជាពលរដ្ឋ ក្នុងខេត្តស្វាយរៀង និងបណ្ដាខេត្តជាប់នឹងខេត្តស្វាយរៀងផងដែរ៕