ដោយ: លាងហួរ

ប្រទេសថៃ: អ្នកអភិវឌ្ឍន៍អចលនទ្រព្យ បានអះអាងថា ការស្ទុះងើបឡើងវិញនៃសេដ្ឋកិច្ច ការងើបឡើងវិញនៃអំណាចទិញ និងតម្លៃលំនៅឋានដែលមិនផ្លាស់ប្តូរ នឹងជំរុញឱ្យមានកំណើនទីផ្សារលំនៅឋានក្នុងប្រទេសថៃ នៅក្នុងត្រីមាសទី៤ ចំពេលប្រឈមវិបត្តិអតិផរណា និងអត្រាការប្រាក់កើនឡើង។

លោក Peerapong Jaroon-ek ប្រធានសមាគមខុនដូថៃ បាននិយាយថា ការដំឡើងអត្រាការប្រាក់មិនមែនជាក្តីបារម្ភទេ ដោយសារមានកត្តាវិជ្ជមានជាច្រើន ដែលនឹងជំរុញទីផ្សារអចលនទ្រព្យ នៅប៉ុន្មានខែចុងក្រោយ សម្រាប់ឆ្នាំ២០២២នេះ។

លោក​បាន​បន្ត​ថា​ សេដ្ឋកិច្ច​ថៃកំពុង​កើនឡើង ហើយ​អំណាច​ទិញ​បាន​បន្តលើកឡើង ​បន្ទាប់​ពី​ការងារ​បាន​ប្រសើរ​ឡើង​ ហើយឥទ្ធិពលនៃកត្តាវិជ្ជមានទាំងនេះ គឺខ្លាំងជាងឥទ្ធិពលនៃកត្តាអវិជ្ជមាន។

លោក​បាន​ឱ្យដឹងទៀត​ថា ទីផ្សារ​ខុនដូ​ក៏​នឹង​ងើប​ឡើង​វិញ​ដែរ ខណៈ​ប្រជាជន​ចាប់​ផ្តើម​មាន​អារម្មណ៍​ថា​ មាន​ផល​ប៉ះ​ពាល់​នៃ​ការ​ឡើង​ថ្លៃ​ធ្វើ​ដំណើរ។ អ្នក​ទិញ​ផ្ទះ​ខ្លះ​ក៏​មិន​មាន​លទ្ធភាព​ទិញ​ផ្ទះ​ទាប​ៗដែរ ព្រោះ​តម្លៃ​របស់​ពួក​គេ​បន្ត​ឡើង​ថ្លៃ​ដោយ សារ​តម្លៃ​ដី​កើនឡើង។

យោងតាមប្រធានសមាគមរូបនេះ តម្លៃដីសម្រាប់ការអភិវឌ្ឍន៍លំនៅដ្ឋានទាបៗបានកើនឡើង ប្រហែល២០ភាគរយ ក្នុងមួយឆ្នាំ នៅឆ្នាំ២០២០-២០២១។ ការកើនឡើងនេះបានជំរុញឱ្យតម្លៃផ្ទះទាបៗកើនឡើងពី៨ ទៅ១០ភាគរយ ក្នុងមួយឆ្នាំ។

លោក Wasan Kiangsiri ប្រធានសមាគមអាជីវកម្មលំនៅដ្ឋាន បាននិយាយថា ត្រីមាសទី៤នឹងក្លាយជាពេលវេលាដ៏ល្អបំផុត សម្រាប់អ្នកទិញផ្ទះ ដើម្បីពន្លឿនការសម្រេចចិត្ត ដោយសារតម្លៃអចលនទ្រព្យបានកើនឡើង ជារៀងរាល់ឆ្នាំ ដែលជំរុញដោយតម្លៃដីធ្លីកើនឡើង៕

ដោយ៖ គង់ សូរិយា

ភ្នំពេញៈ ក្នុងគោលដៅលើកទឹកចិត្តអតិថិជន បុរី GB Residence បានសម្រេចផ្តល់នូវលក្ខខណ្ឌបង់ប្រាក់ពិសេស សម្រាប់អ្នកទិញលំនៅដ្ឋានក្នុងបុរីនេះ។

កញ្ញាកាំង តារាវត្តី នាយកផ្នែកទីផ្សារ នៃបុរី GB Residence បានមានប្រសាសន៍ឲ្យដឹងនាព្រឹកថ្ងៃទី៧ ខែតុលានេះថា ជាមួយហ្នឹងកញ្ចប់លើកទឹកចិត្តដល់អតិថិជន បុរីបានហ្នឹងកំពុងផ្តល់លក្ខខណ្ឌបង់ប្រាក់ត្រឹម ១ភាគរយ ដោយឥតការប្រាក់ហើយមានរយៈពេល២៤ខែ។ កញ្ញាបន្តថា លើសពីនេះ យើងលើកទឹកចិត្តអតិថិជន នូវការបញ្ចុះតម្លៃបន្ថែមទៀត សម្រាប់ការបង់ប្រាក់ផ្សេងៗក្នុងជម្រើសផ្សេងៗគ្នា។

កញ្ញាបន្តថា “ទោះជាប្រឈមហ្នឹងវិបត្តិកូវីដ១៩ និងបញ្ហាសង្រ្គាមរវាងរុស្ស៊ី និងអ៊ុយក្រែនក្តី ប៉ុន្តែបុរី GB Residence នៅតែលក់ដាច់ច្រើន និងទទួលបានការគាំទ្រជាបន្តបន្ទាប់ពីអតិថិជន” 

 បុរី GB Residence ស្ថិតនៅកៀកហ្នឹងផ្លូវក្រវ៉ាត់ក្រុងទី៣ ក្បែររង្វង់មូលកួរស្រូវ ដែលអតិថិជននឹងទទួលបានផលចំណេញខ្ពស់នាពេលអនាគតឆាប់ៗនេះ ។ ដោយសារបុរីនេះមានផ្លូវភ្លោះទំហំ៥០ម៉ែត្រ ដែលសម្រួលដល់អ្នកដំណើរជាតិ អន្តរជាតិរាប់ពាន់នាក់ចេញពីព្រលានយន្តហោះអន្តរជាតិតេជោ ដោយការធ្វើដំណើរឆ្លងកាត់បុរីនេះ ជាហេតុបង្កឲ្យអ្នកទិញលំនៅដ្ឋានក្នុងបុរីនេះអាចប្រកបអាជីវកម្មបាន និងតម្លៃលំនៅដ្ឋានហក់ឡើងកាន់តែខ្ពស់នាពេលអនាគត។

ជាមួយគ្នានេះលោក តាំង កៅគៀត នាយកប្រតិបត្តិ បុរី GB Residence បានមានប្រសាសន៍ឲ្យដឹងផងដែរថា បុរីនេះបានរៀបចំសាងសង់ឡើងតាមបទដ្ឋានអន្តរជាតិ ដោយស្ថាបត្យករឌីហ្សាញលំនៅដ្ឋានក្នុងបុរីធ្លាប់បានជាប់ពាន់រង្វាន់លេខ១នៅទីក្រុងឌូបៃប្រទេសអារ៉ាប់រួម ដែលធ្វើឲ្យសោភ័ណ្ឌភាពរបស់បុរីស្អាត ហើយផ្ទះនីមួយៗមានខ្យល់ និងពន្លឺចេញចូលគ្រប់គ្រាន់។

លោកបន្តថា “លើសពីនេះ ក្រុមហ៊ុនបានចំណាយដីយ៉ាងច្រើន ដើម្បីរៀបចំហេដ្ឋារចនាសម្ព័ន្ឋ ពិសេសសួនច្បារ ដែលអនុញ្ញាត្តឲ្យអ្នករស់នៅក្នុងបុរីនេះបានកំសាន្ត ដើរហាត់ប្រាណ ញាំកាហ្វេជជែកគ្នាក្រោយសំរាកពីការងារ ពិសេសពួកគេអាចបង្កើតសកម្មភាពអាជីវកម្មក្នុងបុរីនេះផងដែរ”៕

ដោយ៖ វឌ្ឍនៈ

ភ្នំពេញ ៖ ទីផ្សារខុនដូនៅក្នុងប្រទេសកម្ពុជានៅឆ្នាំ២០២២នេះ នៅតែមិនទាន់មានភាពច្បាស់លាស់នៅឡើយ ស្របពេលអ្នកវិនិយោគបរទេស នៅតែមិនទាន់ចូលមកប្រទេសកម្ពុជា ទូលំទូលាយនៅឡើយ។

របាយការណ៍របស់ក្រុមហ៊ុនអន្តរជាតិមួយបានបង្ហាញថា ក្នុងត្រីមាសទី៣នៃឆ្នាំ២០២២នេះ ទីផ្សារខុនដូមិនមានការផ្គត់ផ្គង់ថ្មីៗនោះទេ។ យ៉ាងណាក្ដី ក្នុងឆ្នាំ២០២២នេះ ការផ្គត់ផ្គង់ខុនដូនៅលើទីផ្សារត្រូវបានរំពឹងថា នឹងកើនឡើងដល់ជិត៥ម៉ឺនយូនីត និងឆ្នាំ២០២៣រំពឹងថា កើនឡើងដល់ជិត៧ម៉ឺនយូនីត។

របាយការណ៍របស់ក្រុមហ៊ុនCBRE Cambodia ចេញផ្សាយ សម្រាប់ត្រីមាសទី៣ ឆ្នាំ២០២២បានបង្ហាញឱ្យដឹងថា ក្នុងរយៈពេល៣ខែចុងក្រោយនេះ កម្ពុជាមិនមានគម្រោងខុនដូថ្មីៗសាងសង់ឬផ្គត់ផ្គង់នៅលើទីផ្សារនោះទេ។ ក្នុងនោះ ខុនដូចំនួនជាង៩០០យូនីត បានបន្តការអភិវឌ្ឍ ឬផ្គតផ្គង់នៅលើទីផ្សារ ក្នុងប្រទេសកម្ពុជា ក្រោយផ្អាកដំណើរការ កាលពីមុន។

អ្នកនាង គឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុនCBRE Cambodia បានលើកឡើងថាគម្រោងខុនដូ ដែលចាប់ផ្ដើមដំណើរការសាងសង់នាពេលបច្ចុប្បន្ននេះ គឺជាគម្រោងដែលបានផ្អាក ឬពន្យារ កាលពីអំឡុងកូវីដ១៩។

អ្នកនាងបន្តទៀតថា “ការអភិវឌ្ឍខុនដូថ្មីៗ ក្នុងឆ្នាំ២០២២នេះ មិនសូវមានច្រើននោះទេ ពីព្រោះ ទីផ្សារខុនដូកម្ពុជាបានពឹងផ្ដោតទៅលើបរទេស ហើយបើសិនជាជនបរទេសមិនទាន់អាចចូលមកកម្ពុជាបាននោះ ការអភិវឌ្ឍនខុនដូក៏មានតិចតួចដែរ”។

លោក ខន គង្គារ អគ្គនាយកក្រុមហ៊ុនERA Cambodia បានមានប្រសាសន៍ថាតាមពិតទៅ ខុនដូ ដែលផ្ដោតលើអតិថិជនក្នុងស្រុក មិនសូវជាមានបញ្ហានោះទេ តែសម្រាប់ខុនដូ ដែលផ្ដោតលើទីផ្សារបរទេស ឬសម្រាប់ជនបរទេស វាពិតជាមានបញ្ហាសម្រាប់ទីផ្សារ នាពេលបច្ចុប្បន្ននេះ ពីព្រោះយើងបានសង្កេតឃើញថា បច្ចុប្បន្ននេះ ជនបរទេសមិនទាន់ត្រូវបានចូលមកក្នុងប្រទេសកម្ពុជាច្រើន ដូចកាលពីឆ្នាំមុនវិបត្តិកូវីដ១៩នៅឡើយ ។

លោកបន្តថា យ៉ាងណាក៏ដោយ មានក្រុមហ៊ុនអភិវឌ្ឍន៍ខុនដូ និងក្រុមហ៊ុនភ្នាក់ងារលក់ខុនដូមួយចំនួន នៅតែមានការគាំទ្រពីអតិថិជនរបស់ខ្លួន និងមានការទិញលក់ជាហូរហែរ ក្នុងឆ្នាំ២០២២ ហើយបើធៀបនឹងឆ្នាំ២០២១កន្លងទៅ ឃើញថាមានភាពល្អប្រសើរជាងមុន៕

 ដោយៈ
មជ្ឈមណ្ឌលពាណិជ្ជកម្មលំដាប់អន្តរជាតិ របស់ក្រុមហ៊ុនសុខាគ្រុបរបស់អ្នកឧកញ៉ាសុខ គង់បានសម្រេចលុបចោលហើយ។

       មជ្ឈមណ្ឌលពាណិជ្ជកម្ម ដែលមានអាគារកប់ពពកជាច្រើន និងបានប្រលងប្រជែងផ្នែកស្ថាបត្យកម្មលំដាប់ជាតិ និងអន្តរជាតិនេះបានបង្ហាញនូវទស្សនទានអភិវឌ្ឍន៍ដ៏គួរឲ្យចាប់អារម្មណ៍ ប៉ុន្តែរហូតមកទល់ពេលនេះ គំរោងនេះមិនបានលេចរូបរាងឡើយ ហើយត្រូវបានថ្នាក់ដឹកនាំក្រុមហ៊ុនសុខាគ្រុបបញ្ជាក់ថា “លុបចោលហើយ”។

       អ្នកឧកញ៉ាសុខ គង់ប្រធានក្រុមហ៊ុនសុខាគ្រុបបានមានប្រសាសន៍ឲ្យដឹងកាលពីពេលថ្មីៗនេះថា គំរោងនេះ ក្រុមហ៊ុនសម្រេចលុបចោលហើយ ដោយក្រុមហ៊ុនទុកលុយ ដើម្បីរៀបចំកសាងនិងអភិវឌ្ឍន៍ ទីក្រុងបូកគោជំនួសវិញ។

អ្នកឧកញ៉ាបានបន្តថា “ទីក្រុងបូកគោមានទំហំផ្ទៃដីជាង៣០,០០០ហិកតា ជាគម្រោងដ៏ធំដែលនឹងរួចចំណែកអភិវឌ្ឍន៍ សេដ្ឋកិច្ចកម្ពុជាយ៉ាងច្រើន ប៉ុន្តែយើងត្រូវការទុនរហូតដល់ចន្លោះពី២០ ទៅ៣០ពាន់លានដុល្លារទើបអាចកសាងបានចប់តាមផែនការ”។

អ្នកឧកញ៉ាសុខ គង់បានបន្តថា រហូតមកទល់ពេលនេះ ក្រុមហ៊ុនបានចំណាយទុនចន្លោះពី៤០០ ទៅ៥០០លានដុល្លាររួចហើយ ដើម្បីកសាងទីក្រុងនេះ”។ អ្នកឧកញ៉ាបានបន្ថែមថា “ប្រសិនជាខ្ញុំចង់ដើរកំសាន្ត ខ្ញុំមានលុយដើរ ប៉ុន្តែខ្ញុំសុខចិត្តហត់ ដើម្បីកសាងទីក្រុងនេះ ដើម្បីលើកកំពស់សេដ្ឋកិច្ច និងទាក់ទាញទេសចរណ៍ ដើម្បីជម្រុះកំនើនសេដ្ឋកិច្ចជាតិ”៕

ដោយ៖ សុផារី

កណ្តាល៖ ទន្ទឹមនឹងការរីកចម្រើន និងការពង្រីកវិសាលភាពក្រុងភ្នំពេញ ដោយកាត់ដីចេញពីផ្នែកខ្លះនៃខេត្តកណ្តាល ប្រមុខរាជរដ្ឋភិបាលបានប្រកាសពីគម្រោងនៃការបង្កើតក្រុងថ្មីមួយទៀត នៅក្នុងខេត្តកណ្តាល គឺក្រុងល្វាឯម ដោយមិនកាត់ចូលចំណុះរាជធានីភ្នំពេញទៀតឡើយ។

ថ្នាក់ដឹកនាំមូលដ្ឋាន និងអ្នកជំនាញបានបង្ហាញការសាទរ និងសុទិដ្ឋិនិយមលើគម្រោងបង្កើតក្រុងថ្មីមួយនេះ ថានឹងផ្តល់ក្តីសង្ឃឹមដល់ការអភិវឌ្ឍសេដ្ឋកិច្ច ជាពិសេសទីផ្សារអចលនទ្រព្យនឹងកាន់តែមានវឌ្ឍនភាពខ្លាំងផងដែរ។

លោក កន សុខកាយ អភិបាលនៃគណៈអភិបាលស្រុកល្វាឯម បានមានប្រសាសន៍ប្រាប់ Property Area Asia នៅថ្ងៃទី០៧ ខែតុលា ឆ្នាំ២០២២នេះថា គម្រោងរៀបចំបង្កើតក្រុងល្វាឯមថ្មីនេះនឹងផ្តល់ប្រយោជន៍សេដ្ឋកិច្ចគ្រប់ផ្នែក ជាពិសេសនឹងជំរុញការអភិវឌ្ឍទីផ្សារអចលនទ្រព្យ នៅក្នុងតំបន់ទីក្រុងថ្មីនេះ ដោយតម្លៃដីធ្លីនៅក្នុងតំបន់នោះនឹងមានការហក់ឡើងខ្ពស់ ដោយសារក្រុងជាកន្លែងដែលត្រូវអភិវឌ្ឍន៍មុន។

គម្រោងបង្កើតក្រុងថ្មីមួយនេះ អាចនឹងត្រូវកាត់ផ្នែក ឬតំបន់សំខាន់ៗមួយចំនួននៃស្រុកល្វាឯម ហើយនឹងត្រូវចំណុះក្រោមរដ្ឋបាលនៃខេត្តកណ្តាល។

លោកអភិបាលស្រុកបានបញ្ជាក់ថា “ការអភិវឌ្ឍមាននាំមកនូវផ្លូវថ្នល់ ប្រព័ន្ធទឹកភ្លើង នោះដីនៅក្នុងព្រៃនឹងប្រែក្លាយជាលំនៅឋាន តម្លៃដីក៏នឹងឡើងថ្លៃ ថែមទាំងផ្តល់ចំណូលដល់រដ្ឋបាលខេត្ត នឹងបង្កើនចំណូលដល់ប្រជាពលរដ្ឋនៅក្នុងមូលដ្ឋានផងដែរ”។

លោកបានបន្ថែមទៀតថា គម្រោងនេះ ក៏នឹងជំរុញសក្តានុពលដីធ្លី និងអចលនទ្រព្យសំរាប់ស្រុកជិតៗផងដែរ ដូចជា ស្រុកល្វាឯម ស្រុកខ្សាច់កណ្តាលជាដើម។

លោកអភិបាលបានឱ្យដឹងថា មានចំនួន១៥ឃុំ ៤៣ភូមិ និងមានប្រជាពលរដ្ឋរស់នៅសរុបចំនួនជាង៨ម៉ឺន៣នាក់ ក្នុងនោះឃុំដែលមានប្រជាពលរដ្ឋរស់នៅច្រើនជាងគេ រួមមានឃុំអរិយក្សត្រ សារិកាកែវ និងឃុំពាមឧកញ៉ាអុង ដែលក្នុងមួយឃុំៗ មានប្រជាពលរដ្ឋជាមធ្យមប្រមាណ១ម៉ឺននាក់។

លោក ច្រឹក សុខនីម ​ប្រធាន​សមាគម​អ្នកវាយតម្លៃ និ​ងភ្នាក់ងារ​អចលនវត្ថុកម្ពុជា ​បាន​មាន​ប្រសាសន៍​ថា​ ការប្រកាស​របស់​ប្រមុខ​រដ្ឋាភិបាល​ក្នុងការ​បង្កើត​ក្រុង​ល្វាឯម ​ជា​សញ្ញា​វិជ្ជមាន​មួយ​ សម្រាប់​អ្នក​វិនិយោគប្រមើល​មើល​ពី​ឱកាស ​ក្នុង​ការរកស៊ី​ជួញដូរ​នៅ​ម្ដុំ​នោះ​។

លោក​ថ្លែង​ថា​ “សម្រាប់​ការអនុវត្ត​ជាក់ស្ដែង ​ទាល់តែ​យើង​ដឹង​ពី​ពេលវេលា​ជាក់លាក់​ថា​ តើ​គម្រោង​ទាំង​អស់​ហ្នឹង​ចាប់ផ្ដើម​អនុវត្ត​នៅ​ពេលណា​? តែ​ទោះជា​យ៉ាងណាក៏ដោយ នៅតែ​ជា​សញ្ញា​មួយ​ក្នុង​ការបង្ហាញ​ទំនុកចិត្ត​របស់​វិនិយោគិន​ថា យើង​នឹង​មាន​គម្រោង​ហ្នឹង​ណាមួយ​ក្នុង​ក្រុង​ល្វាឯម​ពេល​អនាគត​”។

ស្រុកល្វាឯម មានឃុំចំនួន១៥ រួមមាន ឃុំអរិយក្សត្រ ឃុំបារុង ឃុំបឹងគ្រំ ឃុំកោះកែវ ឃុំកោះរះ ឃុំល្វាសរ ឃុំពាមឧកញ៉ាអុង ឃុំភូមិធំ ឃុំព្រែកក្មេង ឃុំព្រែករៃ ឃុំព្រែកឫស្សី ឃុំសំបួរ ឃុំសារិកាកែវ ឃុំថ្មគរ ឃុំទឹកឃ្លាំង។

នាពេលអនាគតខាងមុខនេះ តាមរយៈប្រសាសន៍ដ៏ខ្ពង់ខ្ពស់របស់សម្តេចតេជោ ខេត្តកណ្តាលនឹងមានក្រុងចំនួន២ គឺក្រុងតាខ្មៅ និងក្រុងល្វាឯម និងស្រុកចំនួន៩ ពោលគឺស្រុកលើកដែក កៀនស្វាយ កណ្ដាលស្ទឹង ស្អាង កោះធំ ពញាឮ អង្គស្នួល មុខកំពូល និងស្រុកខ្សាច់កណ្តាល៕

 ដោយៈ វឌ្ឍនៈ

ភ្នំពេញៈ ចូលដល់ឆ្នាំ២០២២នេះហើយ ការអភិវឌ្ឍន៍លំនៅឋាននៅតែជួបបញ្ហាដោយអន្លើ ក្នុងនោះដែរការអភិវឌ្ឍលំនៅឋានក្នុងបុរី ក៏នៅតែទទួលផលប៉ះពាល់ ជាពិសេសសម្រាប់អ្នកអភិវឌ្ឍន៍ ដែលមានដើមទុនតិចតួច ឬដើមទុនមិនគ្រប់គ្រាន់។

លោកឧកញ៉ាបណ្ឌិតគីម ហ៊ាងប្រធានក្រុមហ៊ុន KW Khmer Real Estate បានមានប្រសាសន៍ឱ្យដឹងកាលពីសប្តាហ៍មុនថា ក្នុងរយៈពេល៩ខែនៃឆ្នាំ២០២២នេះ ការសាងសង់បុរីនៅក្នុងប្រទេសកម្ពុជាឃើញថា នៅមានបញ្ហាខ្លះៗ មិនទាន់រលូនដូចកាលឆ្នាំមុនវិបត្តិកូវីដ១៩នោះទេ។

លោក​បន្តថា “ម្ចាស់បុរីដែលមានលុយគ្រប់គ្រាន់ គឺមិនមានជាបញ្ហានោះទេក្នុងដំណាក់កាលនេះ ឬដំណាក់កាលកូវីដ១៩ឆ្នាំ២០២០ ឆ្នាំ ២០២១ ប៉ុន្តែសម្រាប់គម្រោងបុរី ដែលម្ចាស់អភិវឌ្ឍន៍មិនមានទុនគ្រប់គ្រាន់ ឬខ្ចីលុយគេមកសាងសង់នៅតែជួបបញ្ហាដដែល”។

លោកឧកញ៉ាបន្តថា មានមតិមួយចំនួនបានលើកឡើងថា ដោយសារតែវិបត្តិកូវីដ១៩ផង វិបត្តិនៃសង្គ្រាមរវាងរុស្ស៊ីនិងអ៊ុយក្រែនផង ធ្វើឱ្យការសាងសង់បុរី នៅក្នុងប្រទេសកម្ពុជាយើងមានបញ្ហា ប៉ុន្តែលោកគីមហ៊ាងបានមើលឃើញថា សម្រាប់ម្ចាស់បុរីជើងចាស់ ឬបុរីមានកេរ្តិ៍និងបុរីធំៗនៅតែបន្តសាងសង់ និងលក់បានជាហូរហែក្នុងរយៈពេល៩ខែដើមឆ្នាំ ២០២២នេះ តែសម្រាប់បុរីមានដើមទុនតិចតួច ឬក៏អ្នកអភិវឌ្ឍន៍ខ្នាតតូចៗគឺជៀសមិនផុសពីប៉ះពាល់នោះឡើយ ។

លោកបន្ថែមថា “ដំណាក់កាលនេះ ជាដំណាក់កាលដែលបញ្ជាក់ថា អ្នកណាខ្លាំងអ្នកណាខ្សោយ ។ ដំណាក់កាលនេះអ្នកណាខ្លាំង អាចឈរជើងបានយូរ អ្នកណាខ្សោយអាចនឹងហានិភ័យ”។ លោកឧកញ៉ា “វិបត្តិកូវីដ១៩ បានធ្វើឱ្យប៉ះពាល់ដល់អ្នកមានប្រាក់ចំណូលមធ្យម និងក្រោមមធ្យម ហើយក្នុងប្រទេសកម្ពុជាយើង ប្រជាពលរដ្ឋដែលមានប្រាក់ចំណូលមធ្យមនិងក្រោមមធ្យមមានច្រើន ដូច្នេះហើយវាក៏បានធ្វើឱ្យប៉ះពាល់ ដល់ការទិញអចលនទ្រព្យ សម្រាប់អ្នកមានចំណូលមធ្យមនិងក្រោមមធ្យមនេះដែរ”។

យ៉ាងណាក្ដីមានអ្នកជំនាញមួយចំនួន បានផ្ដល់ជាយោបល់ដល់អ្នកមានប្រាក់ចំណូលមធ្យម និងក្រោមមធ្យម មិនគួរវិនិយោគលើលំនៅឋានឡើយ។

ក្នុងស្ថានភាពដែលសេដ្ឋកិច្ច មិនទាន់ច្បាស់លាស់នៅឡើយនោះ អ្នកមានប្រាក់ចំណូលមធ្យម ឬក្រោមមធ្យម បើសិនជាចង់វិនិយោគគួររកទិញដីធ្លីតែជាដីធ្លីនៅឆ្ងាយពីទីក្រុង និងមានតម្លៃទាប ដើម្បីចំណេញនៅពេលពីរបីឆ្នាំឬនៅពេលស្ថានភាពបានល្អប្រសើរឡើងវិញ។

លោកផូន សុអុនដែនប្រធានផ្នែកទីផ្សារនៃក្រុមហ៊ុន KH Land បានលើកឡើងផងដែរថា សម្រាប់គម្រោងដែលអភិវឌ្ឍន៍ដីឡូត៏ និងលំនៅឋាននៅតំបន់ផ្លូវ៥១ នៅតែបន្តអភិវឌ្ឍន៍ទៅតាមផែនការ ទោះបីជាអំឡុងកូវីដ១៩ឬមកដល់ពេលនេះក្ដី ។ ក្រុមហ៊ុនបានអភិវឌ្ឍន៍ហេដ្ឋារចនាសម្ព័ន្ធ ក្នុងគម្រោង មានដូចជាផ្លូវ ភ្លើង និងប្រព័ន្ធលូជាដើម ដើម្បីជាការផ្ដល់ទំនុកចិត្តដល់អតិថិជន ដែលបានទិញគម្រោងរបស់ខ្លួនរួចហើយ។

លោកបន្តថា “អ្នកទិញផ្ទះមិនថាទិញដើម្បីវិនិយោគ ឬទិញដើម្បីស្នាក់នៅទេ ក្នុងដំណាក់កាលនេះ គាត់មានការប្រយ័ត្នប្រយែង និងឆ្លាតវៃជាងមុនៗឆ្ងាយណាស់”។ លោកបន្តថា “ពីមុនគាត់ទិញផ្ទះទិញដីមិនសូវពិនិត្យមើលច្រើនទេ គាត់មើលតែទីតាំងល្អ អាចរកស៊ីអាចមានឱកាសចំណេញគាត់ចាប់ផ្ដើមកក់លុយទិញយកតែម្ដង ប៉ុន្តែពេលនេះគាត់បានពិនិត្យមើលច្រើនទាំងគុណភាព ទាំងអ្នកអភិវឌ្ឍន៍ និងដំណើរការអភិវឌ្ឍជាដើម”៕