ដោយ៖ វឌ្ឍនៈ

ភ្នំពេញ ៖ ក្នុងរយៈពេល៦ខែកន្លងមកនេះ ទីផ្សារខុនដូនៅក្នុងប្រទេសកម្ពុជាត្រូវបានអ្នកជំនាញលើទីផ្សារនេះបង្ហាញថា បានផ្លាស់ប្តូរជាវិជ្ជមាន ដែលជាសញ្ញាល្អសម្រាប់ទីផ្សារមួយនេះ ហើយក៏រំពឹងថានឹងទទួលបានអ្នកវិនិយោគលើខុនដូនេះ កាន់តែច្រើនឡើងបន្ថែមទៀត នាពេលខាងមុខនេះ។

លោកកាំង នីន នាយកប្រតិបត្តិនៃក្រុមហ៊ុន GC Realty បានមានប្រសាសន៍ឱ្យដឹងថា រយៈពេល៦ខែដើមឆ្នាំនេះ ទីផ្សារខុនដូនៅក្នុងប្រទេសកម្ពុជា ពិតជាមានការផ្លាស់ប្តូរ ហើយការផ្លាស់ប្តូរមិនមែនផ្លាស់ពីល្អទៅអាក្រក់ទេ តែវាបានផ្លាស់ពីអាក្រក់ទៅល្អ។ ទោះបីកម្ពុជានិងពិភពលោកបានជួបនឹងវិបត្តិកូវីដ ១៩ ដែលធ្វើឱ្យប៉ះពាល់ដល់សេដ្ឋកិច្ច និងវិស័យអចលនទ្រព្យធ្ងន់ធ្ងរ ប៉ុន្តែក្នុងរយៈពេល៦ខែចុងក្រោយនេះ វិស័យអចលនទ្រព្យ ជាពិសេសទីផ្សារខុនដូបានកើនឡើងវិញ ដោយមានការទិញលក់ខុនដូ ច្រើនជាងរយៈពេល២ឆ្នាំមុន។

លោកបន្តថា កត្តាមួយចំនួន ដែលលោកបានមើលឃើញថា មានការផ្លាស់ប្តូរនៃទីផ្សារខុនដូ នៅកម្ពុជានោះ ទី១. កម្ពុជាបើកទទួលអ្នកដំណើរមកពីបរទេសឡើងវិញ និងបានបន្ធូបន្ថយលក្ខខណ្ឌ និងធ្វើឱ្យអ្នកពីក្រៅប្រទេសចូលមក ហើយស្វែងរកខុនដូសម្រាប់ការស្នាក់នៅ និងវិនិយោគ។ ទី២. ក្រោយពីសេដ្ឋកិច្ចកម្ពុជាចាប់ផ្ដើមមានសញ្ញាវិជ្ជាមានឡើងវិញ ធ្វើឱ្យវិនិយោគិនទាំងក្នុងស្រុក និងក្រៅប្រទេសមានជំនឿជាក់ ហើយក៏បានបញ្ចេញថវិកាសម្រាប់វិនិយោគ លើវិស័យអចលនទ្រព្យ និងមានការវិនិយោគលើខុនដូដូចគ្នាដែរ។

លោកបន្ថែមថា កម្ពុជាបានចុះហត្ថលេខាលើកម្មវិធី កម្ពុជាផ្ទះទី២របស់ខ្ញុំ ដែលកម្មវិធីនេះ នឹងរំពឹងថាអាចនាំវិនិយោគិនបរទេសចូលមកម្ពុជាបន្ថែមទៀត ដើម្បីស្វែងរកការវិនិយោគនានាឡើងវិញក្នុងនោះ ខុនដូក៏រំពឹងថានឹងទទួលបានការវិនិយោគច្រើន និងពេញនិយមផងដែរ។

អ្នកនាងគឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុនអចលនទ្រព្យ CBRE Cambodia បានឱ្យដឹងផងដែរថា នៅក្នុងឆមាសទី១នៃឆ្នាំ២០២២នេះ សកម្មភាពនៃការសាងសង់គម្រោងខុនដូនៅក្នុងប្រទេសកម្ពុជា ចាប់ផ្ដើមដំណើរការឡើងវិញ ក្រោយពីគម្រោងមួយចំនួនបានផ្អាកអស់រយៈពេល២ឆ្នាំកន្លងមក តែសម្រាប់គម្រោងថ្មីៗមិនសូវជាមានច្រើនទេ ដោយគម្រោងដំណើរការសាងសង់ពេលនេះជាគម្រោងចាស់ៗ។

អ្នកនាងបន្តថា ក្នុងឆ្នាំ២០២២ និងឆ្នាំ២០២៣ខាងមុខនេះ យើងរំពឹងថា គម្រោងវិនិយោគលើខុនដូ ក៏ដូចជាគម្រោងផ្សេងទៀត នឹងអាចមានសន្ទុះឡើងវិញ ជាមួយនឹងកំណើនជនបរទេស និងកំណើនវិនិយោគិនក្នុងស្រុក ស្របពេលប្រជាពលរដ្ឋកម្ពុជាជាច្រើនក៏ចាប់ផ្ដើមផ្លាស់ប្តូរនិន្នាការ ពីការរស់នៅផ្ទះល្វែងផ្ទះជាប់ដី ទៅរស់នៅក្នុងខុនដូជាបន្តបន្ទាប់៕

ដោយសហការី

ភ្នំពេញ ៖  នៅព្រឹកថ្ងៃទី ០៩ ខែ កក្កដា ឆ្នាំ ២០២២ នេះ ក្រុមហ៊ុន GC Realty បានប្រារព្ធពិធីចុះហត្ថលេខាលើកិច្ចព្រមព្រៀងដៃគូលក់ Master Agency ជាមួយក្រុមហ៊ុន L Tower Loft Condo នៅការិយាល័យលក់របស់គម្រោង L Tower Loft Condo។

ការចុះកិច្ចព្រមព្រៀងនេះត្រូវបានធ្វើឡើងក្រោមការអញ្ជើញចូលរួមពីសំណាក់ លោក កាំង នីន នាយក និង ដៃគូអាជីវកម្មនៃក្រុមហ៊ុន GC Realty និង លោកស្រី ហេង មួយលាង នាយកប្រតិបត្តិ នៃ ក្រុមហ៊ុន L Village Co.,Ltd។ ដែលពិធីចុះហត្ថលេខានេះ ធ្វើឡើងក្នុងគោលបំណង ជម្រុញការលក់ និងការធ្វើទីផ្សារ ទៅដល់គម្រោង 

L Tower Loft Condo អោយកាន់តែមានសក្តានុពល និងផ្តល់ទំនុកចិត្តដល់អតិថិជន កាន់តែខ្លាំងថែមទៀត។

នៅក្នុងពិធីចុះហត្ថលេខាលោកស្រីហេង មួយលាង នាយិកាប្រតិបត្តិនៃក្រុមហ៊ុន L Village Co.,Ltd បានមានប្រសាសន៍ថា គម្រោងL Tower Loft Condo ជាគម្រោងថ្មីទាន់សម័យដែលមាន២ជាន់ក្នុងមួយយូនីត សាកសមបំផុតសម្រាប់ការរស់នៅតាមបែបសម័យបច្ចុប្បន្ន ព្រមទាំងសំណង់មានគុណភាព តម្លៃសមរម្យ ស្ថិតនៅទីតាំងមានសក្ដានុពលខ្ពស់ សាកសមនឹងតម្រូវការអតិថិជនគ្រប់រូប ។ 

លោកស្រីបន្តថា ការចុះហត្ថលេខាជាមួយក្រុមហ៊ុន GC Realty នឹងជំរុញឱ្យការលក់របស់គម្រោងខុនដូ L Tower នឹងសម្រេចបានតាមផែនការគឺនឹងលក់អស់នៅក្នុងឆ្នាំនេះស្របពេលបច្ចុប្បន្ននេះ គម្រោង L Tower ក៏ទទួលបានការគាំទ្រពីអតិថិជនជាប្រជាពលរដ្ឋកម្ពុជាច្រើនផងដែរ ។

លោកស្រីបន្ថែមថា បន្ទាប់ពីគម្រោងមួយនេះទទួលបានជោគជ័យ ក្រុមហ៊ុននឹងសម្លឹងមើលការអភិវឌ្ឍខុនដូ នៅក្នុងប្រទេសកម្ពុជាបន្ថែមទៀតជាពិសេសនៅរាជធានីភ្នំពេញ ស្របពេលនិន្នាការប្រជាពលរដ្ឋកម្ពុជាងាកទៅស្នាក់នៅក្នុងខុនដូក៏មានកំណើនខ្ពសជាពិសេសនៅក្នុងរយៈពេលប៉ុន្មានឆ្នាំចុងក្រោយនេះ ដោយពលរដ្ឋកម្ពុជាកាន់តែច្រើនបានទិញខុនដូសម្រាប់ស្នាក់នៅ ។

លោកកាំង នីន នាយកនិងជាដៃគូអាជីវកម្ម នៃក្រុមហ៊ុន GC Realty បានលើកឡើងផងដែរថា ក្រុមហ៊ុន GC Realty គឺជាក្រុមហ៊ុនឈានមុខគេនៅក្នុងវិស័យអចលនទ្រព្យ និងមានបទពិសោធន៍ជាច្រើនឆ្នាំ ក្នុងការប្រឹក្សាយោបល់ផ្នែកទិញលក់អចលនទ្រព្យគ្រប់ប្រភេទ ព្រមទាំងមានភ្នាក់ងារលក់ជាច្រើននាក់ ដែលសុទ្ធតែមានបទសោធន៍និងមានជំនាញវិជ្ជាជីវៈក្នុងវិស័យអចលនទ្រព្យ ដែលអាចជួយដល់អតិថិជនក្នុងការជ្រើសរើសគម្រោងអចលនទ្រព្យទៅតាមតម្រូវការ ជាពិសេសជួយសម្រួលក្នុងការទិញលក់សម្រាប់ភាគម្ចាស់គម្រោងនិងអតិថិជន ដើម្បីផ្ដល់ភាពងាយស្រួលដល់ភាគទាំងសងខាង ។ 

លោកបន្តថា ក្រោយពីចុះហត្ថលេខាលើកិច្ចព្រមព្រៀងនេះហើយ ក្រុមហ៊ុន GC Realty នឹងជំរុញការផ្សព្វផ្សាយពីគម្រោងរបស់ L Towerដើម្បីឱ្យដឹងដល់អតិថិជននិងអាចសួរនាំក្នុងការទិញគម្រោងខុនដូមួយនេះខណៈគម្រោងនេះលោកមើលឃើញថាជាគម្រោងប្លែកពីគេហើយរំពឹងថានឹងទទួលបានការគាំទ្រកាន់តែខ្លាំងពីប្រជាពលរដ្ឋកម្ពុជា ៕

។

ដោយ:លាងហួរ

ប៉េកាំង: ប្រទេសចិនបានដាក់ចេញការវិនិយោគហេដ្ឋារចនាសម្ព័ន្ធជាអាទិភាពគោលនយោបាយដើម្បីស្តារសេដ្ឋកិច្ចឡើងវិញ។

យោងតាមការិយាល័យស្ថិតិជាតិ បានឱ្យដឹងថា ការវិនិយោគរបស់ប្រទេសចិន ក្នុងវិស័យហេដ្ឋារចនាសម្ព័ន្ធបានកើនឡើង៦,៧ភាគរយ ពីមួយឆ្នាំទៅមួយឆ្នាំ ក្នុងអំឡុងពេល៥ខែដំបូងនៃឆ្នាំនេះ។

ចំណែកការវិនិយោគ ដែលបានគ្រោងទុកសរុប នៅក្នុងគម្រោង ដែលបានចាប់ផ្តើមថ្មី ក្នុងអំឡុងពេលនេះ បានកើនឡើង២៣,៣ភាគរយពីមួយឆ្នាំទៅមួយឆ្នាំ។

ប្រទេសចិនបានសន្យានូវវិធីសាស្រ្តសកម្មកម្រិតមធ្យម ក្នុងការជំរុញការវិនិយោគហេដ្ឋារចនាសម្ព័ន្ធ នៅក្នុងសន្និសិទការងារសេដ្ឋកិច្ចកណ្តាល កាលពីឆ្នាំមុន ក៏ដូចជារបាយការណ៍ការងាររបស់រដ្ឋាភិបាលនៅឆ្នាំនេះ ស្របតាមការដាក់ចេញយុទ្ធសាស្ត្រសំខាន់ៗ និងផែនការប្រាំឆ្នាំលើកទី១៤។

ការអំពាវនាវជាថ្មីរបស់ប្រទេសចិនសម្រាប់ការវិនិយោគហេដ្ឋារចនាសម្ព័ន្ធគឺ បានបញ្ជាក់ជាថ្មីនៅក្នុងកិច្ចប្រជុំប្រតិបត្តិក្រុមប្រឹក្សារដ្ឋនាពេលថ្មីៗនេះ ដែលបានសម្រេចបង្កើនរហូតដល់៣០០ពាន់លានយ័ន (ប្រហែល៤៤,៧១ពាន់លានដុល្លារអាមេរិក) តាមរយៈការចេញមូលបត្របំណុលសម្រាប់ការបំពេញដើមទុននៃគម្រោងធំៗ ក្នុងចំណោមវិធានការផ្សេងទៀត។

នៅចុងខែឧសភា មូលបត្របំណុលសរុបចំនួន២,០៣ពាន់ពាន់លានយន់ត្រូវបានចេញលក់ ដែលស្មើនឹង៥៩ភាគរយនៃកូតាសរុប ពោលគឺកើនឡើង១,៤ពាន់ពាន់លានយ័នធៀបនឹងរយៈពេលដូចគ្នាកាលពីឆ្នាំមុន៕

ដោយ: លាងហួរ

ហុងកុង: ទីផ្សារជួលផ្ទះប្រណិតនៅក្នុងទីក្រុងហុងកុង មានកំណើនតិចតួច នៅក្នុងត្រីមាសទី២ក្រោយពេលរលកទី៥ នៃជំងឺកូវីដ១៩មានភាពធូរស្បើយ។

យោងតាមទីភ្នាក់ងារអចលនទ្រព្យSavillsបានឱ្យដឹងថា ការជួលផ្ទះប្រណិតនៅលើកោះហុងកុង បានកត់ត្រាកំណើនតិចតួចត្រឹម១ភាគរយ ខណៈដែលការជួល នៅទីក្រុងKowloon និងNew Territories បានកើនឡើង ២,៥និង០,៥ភាគរយរៀងគ្នា។

ទីផ្សារជួលផ្ទះនៅហុងកុង កំពុងត្រូវបានជំរុញដោយក្រុមហ៊ុនដីគោក និង ប្រជាជនហុងកុងថ្មី ដែលជាជនជាតិដីគោក ដែលបានរស់នៅក្នុងទីក្រុងហុងកុង ក្នុងរយៈពេល៧ឆ្នាំជាប់ៗគ្នា ហើយថ្មីៗនេះបានក្លាយជាអ្នករស់នៅអចិន្ត្រៃយ៍។

ប្រជាជនហុងកុងថ្មី បានធ្វើដំណើរមកពីចិនដីគោក កាលពី៧ឆ្នាំមុន ក្រោមគម្រោងThe one-way permit scheme ដោយមានកូតាប្រចាំថ្ងៃ១៥០នាក់រឺតាមរយៈគម្រោង Admission Scheme for Mainland Talents and Professionals (ASMTP) ។

ការបិទទីក្រុងសៀងហៃ និងទីក្រុងជាច្រើនក្នុងប្រទេសចិន បាននាំឱ្យប្រជាជនដីគោកជាច្រើន កំពុងចង់មករស់នៅទីក្រុងហុងកុង រឺនៅក្រៅប្រទេសបន្ថែមទៀត ដែលជំរុញឱ្យតម្រូវការផ្ទះនៅទីក្រុងហុងកុង បានងើបឡើងវិញ ក្រោមគម្រោង ធ្វើ ដំណើរ ចំនួនពីរ ដែល បាន ដាក់ ឱ្យ ដំណើរការ ដោយ រដ្ឋាភិបាល ហុងកុង កាលពី ឆ្នាំ មុន គឺ Come2hk និង Return2hk បានអនុញ្ញាតឱ្យជនជាតិចិនដីគោក (មកពីខេត្តក្វាងទុង រឺម៉ាកាវ) និង ប្រជាជនហុងកុងថ្មី (ត្រឡប់ពីដីគោក រឺម៉ាកាវ) អាចធ្វើដំណើរទៅហុងកុងដោយគ្មានការដាក់ឱ្យនៅដាច់ដោយឡែកពីគេ៕

ដោយ៖ សុផារី

ភ្នំពេញ៖ ដីធ្លី​គឺជាប្រភេទអចលនទ្រព្យ ដែលទទួលបានការ​ពេញនិយម​វិនិយោគ​ខ្លាំង ដោយសន្ទុះនៃវិស័យមួយនេះមានការរីកចម្រើន និងមានភាពរឹងមាំខ្លាំង ទោះបីប្រឈមនឹងវិបត្តិ ក្នុងរយៈពេលប៉ុន្មានឆ្នាំចុងក្រោយនេះ។

លោកឧកញ៉ាបណ្ឌិត គីម ហ៊ាង ប្រធាន KW Cambodia បានមានប្រសាសន៍ថា វិស័យដីធ្លីនៅក្នុងប្រទេសកម្ពុជាមានការរីកចម្រើនខ្ពស់ ដោយសារការជំរុញពីកត្តាសំខាន់ចំនួន៤ រួមមាន ដង់ស៊ីតេប្រជាជន កំណើនសេដ្ឋកិច្ច ស្ថានភាពនយោបាយ និងលំហូរវិនិយោគិនបរទេស។

អ្នកជំនាញជើងចាស់រូបនេះបានមានប្រសាសន៍ថា កត្តាទី១ គឺ ដង់ស៊ីតេប្រជាជនកម្ពុជា ក្នុងចំណោមប្រជាជនកម្ពុជា១៧លាននាក់ មានប្រជាជនវ័យក្មេងជាង៤៤ឆ្នាំ ចំនួន៦៨ទៅ៧០ភាគរយទៅហើយ ដែលជំរុញឱ្យមានតម្រូវការនៃការសាងសង់។

លោកបណ្ឌិតបញ្ជាក់ថា “ប្រជាជនវ័យក្រោម៤៤ឆ្នាំ ជាវ័យមួយ ដែលរៀបការ មានប្តី មានប្រពន្ធ និងមានតម្រូវការលំនៅឋាន ត្រូវការដីសាងសង់ផ្ទះ”។

កត្តាទី២ គឺ មូលដ្ឋានសេដ្ឋកិច្ចកម្ពុជា ដែលមានភាពរឹងមាំ រីកចម្រើន និងបានកែប្រែកម្រិតជីវភាពរបស់ប្រជាជនកម្ពុជា ហើយបានជំរុញឱ្យដីធ្លីមានការកើនឡើងខ្ពស់។

លោកបណ្ឌិតថា “សេដ្ឋកិច្ចរបស់កម្ពុជា រយៈពេល២០ឆ្នាំជាងហើយស្ថិតនៅកម្រិត៧ភាគរយ។ នៅពេលសេដ្ឋកិច្ចរីកចម្រើន កែប្រែកម្ពុជាជាប្រទេសតតិយលោក ហើយយើងនឹងក្លាយជាប្រទេសចំណូលកម្រិតមធ្យម និងប្រទេសអ្នកមានឆាប់ៗនេះ”។

កត្តាទី៣ គឺកត្តានយោបាយ ដែលមានស្ថិរភាពនិងសន្តិសុខ នឹងជំរុញឱ្យស្ថានភាពសេដ្ឋកិច្ចមានការរីកចម្រើនផងដែរ ហើយក៏ទាញឱ្យវិស័យដីធ្លីរីកចម្រើន។

លោកបណ្ឌិតបន្តថា “យើងត្រូវទទួលស្គាល់ការពិតថា នយោបាយកម្ពុជាមានលំនឹងណាស់។ […] នៅពេលមួយ ដែលប្រទេសមានសង្គ្រាម មិនដឹងរកស៊ីអ្វីទេ។ នៅពេលយើងមានសន្តិភាព សុវត្ថិភាព នោះហើយធ្វើឲ្យដីធ្លី និងសេដ្ឋកិច្ចរីកចម្រើន”។

កត្តាទី៤ គឺលំហូរចូលនៃវិនិយោគិនបរទេស ដែលអំណោយផលដោយដង់ស៊ីតេប្រជាជនកម្ពុជា ភាពរួសរាយរាក់ទាក់ ការប្រើប្រាស់ភាសាបរទេស កត្តាអំណោយផលអាកាសធាតុ ជាដើម។

លោកបណ្ឌិតមានប្រសាសន៍ថា “ហេតុផលដែលបរទេសមកច្រើន ដោយសារដង់ស៊ីតេប្រជាជន សេដ្ឋកិច្ចរីកចម្រើនខ្លាំង ស្ថានភាពនយោបាយ ហើយប្រជាជនកម្ពុជាបើកបេះដូងចំហរ រួសរាន់រាក់ទាក់ ជួយយកអាសា រៀនភាសាគេគ្រប់យ៉ាង យើងមិនដែលមានគ្រោះធម្មជាតិធំទេ”៕