ដោយ៖ លាងហួរ

ចិន៖ ប្រទេសចិននិងអូស្ត្រាលី បានព្រមព្រៀងគ្នា ក្នុងការទម្លុះនូវឧបសគ្គ និងស្តារទំនាក់ទំនងទ្វេភាគីឡើងវិញនៅលើផ្លូវត្រឹមត្រូវ ដោយរដ្ឋាភិបាលអូស្ត្រាលីថ្មីបានសន្យាថានឹងបន្តគោរពគោលនយោបាយចិនតែមួយ។

ការព្រមព្រៀងគ្នានេះបានធ្វើឡើងខណៈពេលលោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន និងលោកស្រី Penny Wong សមភាគីអូស្ត្រាលីបានជួបគ្នានៅខាងក្រៅកិច្ចប្រជុំរដ្ឋមន្ត្រីការបរទេសនៃក្រុមប្រទេស G20 ដែលធ្វើឡើងនៅកោះបាលី ប្រទេសឥណ្ឌូនេស៊ី។

លោក វ៉ាង យី បានមានប្រសាសន៍ថា ទំនាក់ទំនងចិន-អូស្ត្រាលី កំពុងប្រឈមមុខនឹងបញ្ហានានា ឱកាស និងការអភិវឌ្ឍ ប្រកបដោយភាពល្អប្រសើរ សាកសមនឹងផលប្រយោជន៍រួមរបស់ប្រជាជនទាំងពីរ និងជួយការពារសន្តិភាព និងស្ថិរភាពក្នុងតំបន់អាស៊ីប៉ាស៊ីហ្វិក។

លោក វ៉ាង យី បានបន្តថា ក្នុងទំនាក់ទំនងការទូតរវាងប្រទេសទាំងពីរ ភាគីចិនមានឆន្ទៈក្នុងការពិនិត្យមើលឡើងវិញ និងធ្វើឱ្យមានទំនាក់ទំនងទ្វេភាគីឡើងវិញ ដោយផ្អែកលើការគោរពគ្នាទៅវិញទៅមក និងខិតខំប្រឹងប្រែង ដើម្បីនាំទំនាក់ទំនងចិន និងអូស្ត្រាលីត្រឡប់មកវិញនៅលើផ្លូវត្រូវ។

ចំណែកលោកស្រី Wong បាននិយាយថា អូស្ត្រាលី និងចិន គឺជាដៃគូយុទ្ធសាស្ត្រគ្រប់ជ្រុងជ្រោយ និងការផ្លាស់ប្តូរសេដ្ឋកិច្ច និងពាណិជ្ជកម្មញឹកញាប់ ដែលបានផ្តល់ផលប្រយោជន៍ដល់ប្រជាជននៃប្រទេសទាំងពីរ។

លោកស្រីបន្ថែមថា រដ្ឋាភិបាលអូស្ត្រាលីថ្មី នឹងបន្តគោរពគោលនយោបាយចិនតែមួយ និងសង្ឃឹមថាអាចទាញយកអត្ថប្រយោជន៍ពីខួបលើកទី៥០នៃទំនាក់ទំនងការទូតទ្វេភាគី ដើម្បីធ្វើឱ្យទំនាក់ទំនងអូស្ត្រាលី-ចិនកាន់តែមានស្ថិរភាព និងផ្តល់ផលប្រយោជន៍ឱ្យគ្នាទៅវិញទៅមក៕

ដោយ៖ លាងហួរ

គៀវ៖ សហរដ្ឋអាមេរិកបានជំរុញ និងបញ្ជុះបញ្ជូលឱ្យប្រទេសចិន ចូលដៃជាមួយលោកខាងលិចក្នុងការប្រឆាំងនឹងការឈ្លានពានរបស់រុស្ស៊ីលើអ៊ុយក្រែន ក្រោយពីកិច្ចប្រជុំ G20 មានភាពមិនល្អប្រសើរ។

ខណៈពេលនេះក្រុមមន្ត្រីជំនាញ បាននិយាយថា ក្រុមទាហានការពារអ៊ុយក្រែនបានប្រយុទ្ធគ្នា នៅថ្ងៃសៅរ៍យ៉ាងខ្លាំងក្លា ដើម្បីទប់ស្កាត់កងកម្លាំងរុស្ស៊ីនៅតាមបណ្តោយជួរមុខជាច្រើន។

អភិបាលក្រុង បាននិយាយថា ការវាយប្រហារដោយកាំជ្រួច លើទីក្រុង Kharkiv ភាគឦសានបានធ្វើឱ្យជនស៊ីវិលបីនាក់រងរបួស ទោះបីជាការវាយប្រហារចម្បងរបស់រុស្ស៊ីបានផ្តោតទៅលើភាគអាគ្នេយ៍ក្នុងទីក្រុង Luhansk និង Donetsk ក៏ដោយ។

មន្ត្រីអ៊ុយក្រែនបានរាយការណ៍ថា មានការវាយប្រហារទាំងពីរកាលពីថ្ងៃសៅរ៍ ខណៈដែលក្រសួងការពារជាតិអង់គ្លេសបាននិយាយថា ទីក្រុងម៉ូស្គូកំពុងប្រមូលផ្តុំកងកម្លាំងបម្រុងមកពីទូទាំងប្រទេសរុស្ស៊ីនៅជិតអ៊ុយក្រែន។

អភិបាលតំបន់ដូណេត (Donetsk) លោក Pavlo Kyrylenko បាននិយាយតាមបណ្តាញតេឡេក្រាមរបស់លោកថា កាំជ្រួចរុស្ស៊ីបានវាយប្រហារលើទីក្រុង Druzhkivka ដែលជាទីប្រជុំជននៅពីក្រោយជួរមុខ និងបានបាញ់ផ្លោងទៅលើមជ្ឈមណ្ឌលប្រជាជនផ្សេងទៀត។

អភិបាលក្រុងលូហាន (Luhansk) លោក Serhiy Gaidai បាននិយាយនៅលើបណ្តាញតេឡេក្រាមរបស់លោកថា កងកម្លាំងរុស្ស៊ីកំពុង បាញ់នៅតាមជួរមុខទាំងមូល ទោះបីជាការវាយប្រហារតបតរបស់អ៊ុយក្រែនជាបន្តបន្ទាប់បានវាយប្រហារកន្លែងស្តុកអាវុធ និងគ្រាប់រំសេវ ដើម្បីបង្ខំឱ្យទីក្រុងម៉ូស្គូបញ្ឈប់ការវាយលុករបស់ខ្លួនក៏ដោយ។

រុស្ស៊ីដែលបានអះអាងគ្រប់គ្រងលើខេត្ត Luhansk ទាំងស្រុង កាលពីចុងសប្តាហ៍មុន បានបដិសេធមិនកំណត់គោលដៅលើជនស៊ីវិលនោះទេ៕

ដោយ៖ សុផារី

ភ្នំពេញ៖ រយៈពេល៦ខែ ឆ្នាំ២០២២នេះ កម្ពុជាបានអនុម័តគម្រោងសាងសង់ចំនួន ១.៩៨៤គម្រោង ក្រោមទុនវិនិយោគជាង១ពាន់លានដុល្លារ។

យោងតាមទិន្នន័យសំណង់របស់ក្រសួងរៀបចំ ដែនដីនគរូបនីយកម្ម និងសំណង់ បង្ហាញថា នៅរយៈពេលពាក់កណ្តាល នៃឆ្នាំ២០២២ ក្រសួងបានផ្ដល់លិខិតអនុញ្ញាតសាងសង់មាន១.៩៨៤គម្រោង និងទុនវិនិយោគ មាន១.០៤១លានដុល្លារអាមេរិក។

លោក ឆារស៍ វ៉ាន់ តំណាងអ្នកឧកញ៉ាបណ្ឌិត ពុង ឃាវសែ ប្រធានសមាគមអ្នកសាងសង់កម្ពុជា បានមានប្រសាសន៍ ក្នុងកម្មវិធីជួបជុំសំណេះសំណាល និងទំនាក់ទំនងធុរកិច្ចសំណង់ លើកទី១២ នាថ្ងៃទី០៨ ខែកក្កដា ឆ្នាំ២០២២ថា នៅឆ្នាំ២០២១ ក្រសួងបានផ្ដល់លិខិតអនុញ្ញាតសាងសង់ មានចំនួន៤.៣០៣គម្រោង មានទុនវិនិយោគជាង៥.៣៣៣លានដុល្លារអាមេរិក និងក្នុងឆ្នាំ២០២០ មានចំនួន៤.៨៤១គម្រោង ដែលប៉ាន់ស្មានទុនវិនិយោគ មានជាង៧.៧៥៣លានដុល្លារអាមេរិក។

លោកបានបញ្ជាក់ថា តាមប្រភពនៃការព្យាករណ៍ របស់ក្រសួងសេដ្ឋកិច្ច និងហិរញ្ញវត្ថុ បានបង្ហាញឲ្យឃើញថា វិស័យសំណង់ និងអចលនវត្ថុ នឹងមានការកើនឡើង បន្ទាប់ពីវិបត្តិជំងឺកូវីដ-១៩ បានធូរស្រាល គឺនៅឆ្នាំ២០២២ បានព្យាករណ៍ថា វិស័យសំណង់ នឹងមានការកើនឡើង៥.៤% រីឯវិស័យអចលនទ្រព្យកើន៤.១% ហើយវិស័យទាំង២នេះ នឹងកើនឡើងជាបន្តបន្ទាប់បន្ថែមទៀត។

លោកគិតថា ការវិនិយោគលើវិស័យសំណង់ និងអចលនទ្រព្យ នឹងមានកំណើនឡើងវិញ ហើយក៏នឹងអាចផ្ដល់ការងារ ឲ្យប្រជាពលរដ្ឋមានការងារធ្វើ រហូតដល់រាប់សិបម៉ឺននាក់ផងដែរ។ ទាំងនេះ គឺជាការចូលរួមចំណែក ជាមួយរាជរដ្ឋាភិបាលក្នុងការស្តារសេដ្ឋកិច្ចជាតិ ឲ្យមានចរន្តការឡើងវិញ បន្ទាប់ពីមានវិបត្តិកូវីដ-១៩។

យោងតាមសារាចរណែនាំស្តីពី “ការរៀបចំសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣” ឱ្យដឹងថា វិស័យសំណង់ ត្រូវបានព្យាករថា នឹងបន្តងើបឡើងវិញក្នុងអត្រា៧,២ភាគរយ ក្នុងឆ្នាំ២០២៣ ដោយសារការរំពឹងទុកនូវការងើបឡើងវិញ នៃរំហូរវិនិយោគទុនពីបរទេស សម្រាប់សំណង់បម្រើឱ្យវិស័យទេសចរណ៍ និងពាណិជ្ជកម្ម។

សំណង់លំនៅឋានថ្លៃទាប និងមធ្យម ត្រូវបានរំពឹងថា នៅបន្តរក្សាកំណើនល្អប្រសើរ ដោយសារការកើនឡើង នៃតម្រូវការជាក់ស្តែងរបស់ប្រជាពលរដ្ឋក្នុងការរៀបចំគ្រួសារ ស្របគ្នានឹងនិន្នាការនៃការកើនឡើងការវិនិយោគក្នុងស្រុក។

ចំណែកវិស័យអចលនទ្រព្យវិញ ត្រូវបានព្យាករថា នឹងបន្តងើបឡើងក្នុងអត្រា៥,២ភាគរយ ក្នុងឆ្នាំ២០២៣ ដោយសារការរំពឹងទុកនូវការងើបឡើងវិញ នៃសកម្មភាពទិញ-លក់ និងជួលអចលនទ្រព្យថ្លៃខ្ពស់ ខុនដូ និងអាផាតមិន ស្របពេលការវិនិយោគ និងតម្រូវការក្នុងស្រុកលើអចលនទ្រព្យ ផ្នែកលំនៅឋានថ្លៃទាបនិងមធ្យម ត្រូវបានរំពឹងទុកថាបន្តរក្សាកំណើនល្អ៕

ដោយមករា

ភ្នំពេញ៖ រយៈពេល៦ខែ ឆ្នាំ២០២២នេះ ពោលចាប់ពីខែមករា ដល់ខែមិថុនា ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគ សរុបចំនួន៨៧គម្រោង ក្រោមទុនវិនិយោគប្រមាណ ជាង២៧០០លានដុល្លារ។ នេះបើតាមរបាយការណ៍ របស់ក្រុមប្រឹក្សាអភិវឌ្ឍន៍កម្ពុជា។

របាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា កម្ពុជាបានអនុម័តគម្រោងវិនិយោគ ប្រមាណជាង២៧០០លានដុល្លារ លើវិស័យជាច្រើនមុខ នឹងអាចបង្កើតការងារ ជូនប្រជាពលរដ្ឋជាច្រើនម៉ឺនកន្លែង។

គម្រោងវិនិយោគទាំង៨៧គម្រោងនេះ ភាគច្រើនរួមមាន៖ គម្រោងបង្កើតរោងចក្រ កាត់ដេរសម្លៀកបំពាក់ ស្បែកជើង កាបូប សម្ភារធ្វើដំណើរ គម្រោងបង្កើតរោងចក្រកែច្នៃវេចខ្ចប់ផ្លែឈើ គម្រោងផលិតសំបកកង់យានយន្ត រោងចក្រផលិតសម្ភារៈបរិក្ខារប្រើប្រាស់ខ្សែភ្លើង និងផលិតផលផ្លាស្ទិក គម្រោងបង្កើតរោងចក្រដំឡើងរថយន្ដ និងគម្រោងលើវិស័យដទៃៗជាច្រើនទៀត។

ក្នុងឱកាសចូលរួមក្នុង “កម្មវិធីកិច្ចសន្ទនាកម្រិតខ្ពស់ ស្តីពីទំនាក់ទំនងសេដ្ឋកិច្ចអាស៊ាន និងអ៊ីតាលី” លើកទី៦ នៅទីក្រុងគូឡាឡាំពួ ប្រទេសម៉ាឡេស៊ី នាពេលថ្មីៗនេះ លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការ CDC បានលើកទឹកចិត្តឱ្យវិនិយោគិន ក្នុងបណ្តាប្រទេសអាស៊ាន ជាពិសេសវិនិយោគិនមកពីអ៊ីតាលី និងប្រទេសផ្សេងៗទៀត ស្វែងយល់បន្ថែមពីសក្ដានុពល និងកាលានុវត្តភាពវិនិយោគនៅកម្ពុជា ក្នុងការសម្រេចចិត្តបណ្ដាក់ទុនវិនិយោគនៅកម្ពុជា ដើម្បីទាញយកអត្ថប្រយោជន៍ ពីកិច្ចព្រមព្រៀងជាច្រើន ដែលកម្ពុជាបានចុះហត្ថលេខា ជាពិសេសកិច្ចព្រមព្រៀងភាពជាដៃគូសេដ្ឋកិច្ច គ្រប់ជ្រុងជ្រោយក្នុងតំបន់ (RCEP) ដែលបានចូលជាធរមានចាប់ពីដើមឆ្នាំ ២០២២នេះ។

ក្នុងជំនួបជាមួយសមាគមផ្គត់ផ្គង់ការលក់រាយម៉ាឡេស៊ី និងសាជីវកម្មសហគ្រាសធុនតូច និងមធ្យមម៉ាឡេស៊ី លោក សុខ ចិន្តាសោភា បានលើកឡើងថា ក្រុមប្រឹក្សាអភិវឌ្ឍន៍កម្ពុជា ក្នុងនាមជាស្ថាប័នជំរុញវិនិយោគ ត្រៀមខ្លួនរួចជាស្រេចក្នុងការផ្តល់សេវាថែទាំ និងសម្រួលដល់វិនិយោគិនម៉ាឡេស៊ី និងវិនិយោគិនគ្រប់ជាតិសាសន៍ ហើយច្បាប់ស្តីពីវិនិយោគថ្មី ដែលបានចូលជាធរមានកាលពីចុងឆ្នាំ២០២១ ទៀតសោត ក៏ជាក្របខណ្ឌគតិយុត្តិមួយដ៏រឹងមាំ ដែលបានផ្តល់ការលើកទឹកចិត្តជាច្រើនដល់ការវិនិយោគក្នុងប្រទេសកម្ពុជា៕