ដោយ៖ សុផារី

ភ្នំពេញ៖ ផលប៉ះពាល់ពីវិបត្តិជំងឺ និងវិបត្តិសកល បានធ្វើឱ្យជះឥទ្ធិពលដល់ជីវភាពប្រចាំថ្ងៃរបស់ប្រជាពលរដ្ឋ។ ក្នុងស្ថានភាពបែបនេះ អ្នកជំនាញបានអះអាងថា ការវិនិយោគលើលំនៅឋាននាពេលបច្ចុប្បន្ននេះហាក់មិនសូវហុចផលចំណេញច្រើនឡើយ។

លោកឧកញ៉ា នួន រិទ្ធី អគ្គនាយកនៃក្រុមហ៊ុនអចលនទ្រព្យ KFA បានលើកឡើងថា ការពិតក្នុងស្ថានភាពសេដ្ឋកិច្ចបែបនេះ ការវិនិយោគលើលំនៅដ្ឋាន មិនសូវផ្តល់ផលចំណេញនោះទេ ដោយសារតែតម្រូវការនៃទិញដូរ មិនសូវមានការគាំទ្រច្រើនពីស្ថាប័នធនាគារ។

លោកឧកញ៉ាបានឱ្យដឹងទៀតថា “កន្លងទៅអ្នកទិញលំនៅដ្ឋាន ដែលទិញវិនិយោគដើម្បីចំណេញបាន ដោយសារតែពួកគេអាចខ្ចីពីធនាគារ ដោយមានលុយទិញផ្ទះមួយទៅកក់បានផ្ទះ៥ រួចបង់រំលោះតាមក្រោយ ហើយពេលនោះចំពេលចរន្ដសេដ្ឋកិច្ចល្អ”។

យ៉ាងណាក្តី លោកឧកញ៉ាបញ្ជាក់ថា នៅក្នុងដំណាក់កាលសេដ្ឋកិច្ចកម្ពុជារយៈពេល៣ឆ្នាំនេះ ភាពមិនប្រាកដប្រជា ដែលនឹងអូសបន្លាយទៅមុខ ដោយសារជំងឺកូវីដ-១៩ និងវិបត្តិសង្គ្រាម ព្រមទាំងការចែកប្លុកនៃប្រទេសមហាអំណាច បានធ្វើឲ្យប៉ះពាល់ដល់សេដ្ឋកិច្ចទាំងមូល និងប៉ះពាល់ដល់លំហូរសេដ្ឋកិច្ចកម្ពុជាផងដែរ​។

លោកគូសបញ្ជាក់ថា “លំនៅដ្ឋានជាជម្រើសមួយ ហើយមុននឹងគិតពីលំនៅដ្ឋាន ត្រូវគិតអំពីការហូបចុក ការសិក្សាកូនចៅ។ ក្នុងដំណាក់កាលនេះ ឃើញហើយថា អ្នកសាងសង់ ក៏លក់ពុំមិនសូវបាន ហើយមានចំនួនតិចណាស់ដែលលក់បាន។ បើលក់បានដោយសារតែមានតម្រូវការចាំបាច់ ក្នុងការទិញលំនៅដ្ឋាន”។

លោកបន្តថា “ដោយឡែក លំនៅដ្ឋានតម្លៃមធ្យម និងទាប ឃើញថា ក៏មិនមានទីតាំងនៅទីប្រជុំជន ទីក្រុងផងដែរ ដែលភាគច្រើននៅតំបន់ជាយក្រុង ឬក្រវាត់ក្រុងជាដើម ដូច្នេះអ្នកខ្លះក៏មិនសូវចង់បាន។ តម្រូវការមិនដូចនៅពេលមានសេដ្ឋកិច្ចល្អ ដែលម្នាក់ៗគិតថា នៅកន្លែងណាក៏បាន ព្រោះគិតថាងាយស្រួលលក់”៕

 ដោយៈ គង់ សូរិយា

       ភ្នំពេញៈ ការវិនិយោគលំនៅដ្ឋានសម្រាប់ស្នាក់នៅ ឬទុកដើម្បីស្វែងរកផលចំណេញ ជាការវិនិយោគឆ្លាតវៃមួយដែលអតិថិជន គួរសម្លឹងមើលទីតាំង និងសក្តានុពលតំបន់។

ក្រុមប្រឹក្សាភិបាល និងជាអគ្គនាយកនៃគណៈកម្មការទីផ្សារបុរីបុស្បា លោកអ៉ី ពិសិដ្ឋបានមានប្រសាសន៍ឲ្យដឹងតាមទូរស័ព្ទ កាលពីពេលថ្មីៗនេះថា ជាមួយទស្សនទាននៃការអភិវឌ្ឍលំនៅដ្ឋាន ផ្សារភ្ជាប់ជាមួយធម្មជាតិ និងសម្របតាមការប្រែប្រួលអាកាសធាតុ បានធ្វើឲ្យបុរីបុស្បាលក់បានលឿនតាមផែនការ ស្របពេលសំណង់បាន និងកំពុងសម្រេចវឌ្ឍនភាពយ៉ាងល្អប្រសើរ។

លោកបន្តថា “ដោយសារសិក្សាទីផ្សារច្បាស់លាស់ លំនៅដ្ឋានរបស់បុរីបុស្បា មានតម្លៃទាបជាងទីផ្សារ២០ ទៅ៣០ភាគរយ ដែលផ្តល់ឲ្យអ្នកទិញសម្រាប់ស្នាក់នៅ និងទិញរកផលចំណេញទទួលបាន ផលចំណេញខ្ពស់”។ លោកបន្តថា “បុរីបុស្បាបាននិងកំពុងកសាង នូវគុណតម្លៃពិសេស ដោយអតិថិជននឹងរស់នៅជាមួយធម្មជាតិ មានសួនច្បារហាត់ប្រាណ និងសេវាកម្មជាច្រើនទៀត ពិសេសលំនៅដ្ឋានប្រភេទវីឡា ធ្វើឲ្យអ្នកស្នាក់នៅ​មានភាពមនោរម្យ ដោយសារលំនៅដ្ឋានប្រភេទវីឡា មានអាងទឹកនៅក្នុងអគារ”។

លោកអ៉ី ពិសិដ្ឋបានបន្តថា ជាមួយនឹងការសិក្សាទីតាំងច្បាស់លាស់ ទើបធ្វើឲ្យយើងសម្រេចចិត្ត វិនិយោគនៅទីតាំងបច្ចុប្បន្ន ដែលស្ថិតក្នុងសង្កាត់ព្រៃវែង ខ័ណ្ឌដង្កោ រាជធានីភ្នំពេញ ជាទីតាំងដែលងាយធ្វើដំណើរជាមួយផ្លូវក្រវ៉ាត់ក្រុងទី២ ផ្លូវជាតិលេខ៣ ព្រលានយន្តហោះអន្តរជាតិតេជោក្រុងតាខ្មៅ ផ្សារទំនើបAEON Mall3ជាដើម។

លោកបន្តថា“ការវិនិយោគដែលឆ្លាតវៃ ជាការវិនិយោគដោយគិតដល់​​អតិថិជន និងអ្នកស្នាក់នៅ និងកសាងសហគមន៍មួយដែលប្រកប​ដោយភាពសុខដុមរមនា”។

អតិថិជនចាប់អារម្មណ៍សូមទាក់ទង តាមរយៈលេខទូរស័ព្ទ០៨១ ២៣៨ ៧៨៩, ០៦៧ ២៣០ ៧៨៩, ០៩៩ ២៣០ ៧៨៩៕

ដោយ: លាងហួរ

ហាណូយ: យោងតាមអ្នកជំនាញបានឱ្យដឹងថា ការសម្រេចចិត្តរបស់ធនាគាររដ្ឋវៀតណាម ក្នុងការបង្កើនគោលដៅកំណើនឥណទាន ត្រូវបានគេរំពឹងថា នឹងបង្កើតលក្ខខណ្ឌអំណោយផល សម្រាប់អាជីវកម្មក្នុងការផ្តល់កម្ចីដើមទុន រួមទាំងក្រុមហ៊ុនអចលនទ្រព្យផងដែរ។

នៅក្នុងឆមាសទីមួយនៃឆ្នាំ២០២២ លំហូរដើមទុនដែលហូរចូលទៅកាន់ទីផ្សារអចលនទ្រព្យបានធ្លាក់ចុះ ដោយសារតែការគ្រប់គ្រងតឹងរ៉ឹងនៃប្រភពឥណទាន និងការធ្លាក់ចុះនៃទីផ្សារមូលបត្របំណុល។

លោកSử Ngọc Khương នាយកជាន់ខ្ពស់នៃការវិនិយោគ Savills វៀតណាមបានលើកឡើងថា  ការរឹតបន្តឹងឥណទាន មានគោលបំណងជួយរដ្ឋ ផ្តល់អាទិភាពដើមទុនដល់សហគ្រាស និងគម្រោងនានាឱ្យមានប្រតិបត្តិការល្អ។

បច្ចុប្បន្ន វៀតណាមគឺជាប្រទេសមួយ ក្នុងចំណោមប្រទេសដែលមានកំណើនសេដ្ឋកិច្ច និងស្ទុះងើបលឿនបំផុតក្នុងពិភពលោក ក្នុងរយៈពេលក្រោយជំងឺរាតត្បាត ដែលកំពុងជួយឱ្យប្រទេសនេះ ទាក់ទាញការចាប់អារម្មណ៍ច្រើន និងការវិនិយោគពីបរទេស។

បន្ទាប់ពីរដ្ឋាភិបា លបើកជើងហោះហើរអន្តរជាតិឡើងវិញ វិស័យសេដ្ឋកិច្ចបានទទួលផលប្រយោជន៍ ជាពិសេសទេសចរណ៍ និងសណ្ឋាគារ។ កត្តានេះ បានបង្កើតលក្ខខណ្ឌអំណោយផល សម្រាប់សហគ្រាសបរទេសចូលមកទីផ្សារវៀតណាម។

ទោះជាយ៉ាងណាក៏ដោយ ឧបសគ្គផ្លូវច្បាប់នៅក្នុងគម្រោងអចលនទ្រព្យជាច្រើន ក្នុងប្រទេសវៀតណាម នៅតែបង្កឱ្យមានការស្ទាក់ស្ទើរសម្រា​ប់សហគ្រាស និងអ្នកវិនិយោគក្នុងស្រុក និងបរទេស។

លោក Nguyễn Văn Đính អនុប្រធានសមាគមអចលនទ្រព្យវៀតណាមបានមានប្រសាសន៍ថា ទីផ្សារអចលនទ្រព្យ កំពុងឆ្លងកាត់ដំណាក់កាល នៃការរៀបចំរចនាសម្ព័ន្ធឡើងវិញជាលទ្ធផល ហើយតម្លៃផ្ទះនឹងកើនឡើងដោយសារតែថ្លៃដើមកើនឡើង។ ដូច្នេះសាច់ប្រាក់ងាយស្រួលនឹងថយចុះ៕

ដោយៈ សុខុម

ប៉េកាំង: កាលពី៩ឆ្នាំមុន ប្រធានាធិបតីចិន លោក ស៊ី ជីនពីង បានស្នើបង្កើត “ខ្សែក្រវាត់សេដ្ឋកិច្ចផ្លូវសូត្រ” (Silk Road Economic Belt) និង “ផ្លូវសូត្រសមុទ្រប្រចាំសតវត្សរ៍ទី២១” (21st Century Maritime Silk Road) ជាបន្តបន្ទាប់នៅប្រទេសកាហ្សាក់ស្ថាន និងឥណ្ឌូនេស៊ី។

ពេលនោះហើយជាចំណុចដែលគំនិតផ្ដួចផ្ដើម “ខ្សែក្រវាត់ និងផ្លូវ” (Belt and Road Initiative (BRI)) ជាមួយនឹងគោលបំណងកសាងបណ្តាញពាណិជ្ជកម្ម ការវិនិយោគ និងហេដ្ឋារចនាសម្ព័ន្ធតភ្ជាប់តំបន់ផ្សេងៗគ្នា នៅតាមបណ្ដោយផ្លូវពាណិជ្ជកម្មបុរាណទាំងនេះ បានលេចចេញជារូបរាង។

រយៈពេល៩ឆ្នាំមកនេះ គំនិតផ្ដួចផ្ដើម “ខ្សែក្រវាត់ និងផ្លូវ” សម្រេចបានសមិទ្ធផលយ៉ាងធំធេងលើសពីការតភ្ជាប់។

កិច្ចសហប្រតិបត្តិការ “ខ្សែក្រវាត់ និងផ្លូវ” ដែលអនុវត្តតាមគោលការណ៍ណែនាំ នៃការពិគ្រោះយោបល់ទូលំទូលាយ ការចូលរួមចំណែក និងអត្ថប្រយោជន៍រួមគ្នា បានរីកចម្រើនយ៉ាងខ្លាំង រហូតក្លាយជាវេទិកាសកល (Global Platform) ដែលប្រទេសនានា ស្ថិតនៅតាមបណ្តោយផ្លូវទាំងនេះ ធ្វើការរួមគ្នា ដើម្បីលើកកម្ពស់សុខុមាលភាពរបស់ប្រជាជន និងផ្តល់ការជំរុញបន្ថែមទៀត ដល់ការអភិវឌ្ឍសកល ចំពេលមានបញ្ហាប្រឈមនានាដ៏គួរឱ្យភ័យខ្លាច។

បន្ទាប់ពីកិច្ចសហប្រតិបត្តិការ “ខ្សែក្រវាត់ និងផ្លូវ” ជាច្រើនឆ្នាំមកនេះ ក្របខណ្ឌតភ្ជាប់ទូទៅមួយ ដែលមានច្រករបៀងចំនួន៦ ផ្លូវតភ្ជាប់ចំនួន៦ និងកំពង់ផែ នៅក្នុងប្រទេសជាច្រើន ត្រូវបានដាក់ឱ្យដំណើរការ។

សមិទ្ធផលសំខាន់ៗរួមមានដូចជា ផ្លូវដែក Mombasa-Nairobi Standard Gauge Railway ក្នុងទ្វីបអាហ្រ្វិក ផ្លូវដែកចិន-ឡាវ (China-Laos Railway) នៅអាស៊ី កំពង់ផែ Haifa ថ្មីក្នុងប្រទេសអ៊ីស្រាអែល ច្រករបៀងសេដ្ឋកិច្ចចិន-ប៉ាគីស្ថាន (China-Pakistan Economic Corridor) ជាដើម។

ក្រៅពីគម្រោងហេដ្ឋារចនាសម្ព័ន្ធ បណ្តាញភ័ស្តុភារថ្មីមួយរវាងអាស៊ី និងអឺរ៉ុប ត្រូវបានបង្កើតឡើង តាមរយៈសេវាកម្មរថភ្លើងដឹកទំនិញចិន -អឺរ៉ុប។ ជាមួយនឹងផ្លូវចំនួន៨២ខ្សែ ពេលនេះរថភ្លើងទាំងនេះ ទៅដល់ទីក្រុងចំនួន២០០ ក្នុងប្រទេសចំនួន២៤នៅអឺរ៉ុប ដោយបង្កើតបានជាបណ្តាញដឹកជញ្ជូនមួយដែលគ្របដណ្តប់ទូទាំងទ្វីបអឺរ៉ុប។

ការតភ្ជាប់កាត់បន្ថយឧបសគ្គបានយ៉ាងច្រើន មិនថាទាក់ទិនការសម្រ​បសម្រួលគោលនយោបាយ ការធ្វើដំណើរតាមផ្លូវ ពាណិជ្ជកម្ម រំហូរហិរញ្ញវត្ថុ។ សេវារថភ្លើងដឹកទំនិញចិន-អឺរ៉ុប បានដើរតួនាទីជា “ច្រកនៃជីវិត” (Passage of Life)  នៅពេលការដឹកជញ្ជូនតាមផ្លូវសមុទ្រ និងផ្លូវអាកាសត្រូវបានរងផលប៉ះពាល់យ៉ាងខ្លាំងអំឡុងវិបត្តិកូវីដ-១៩។

ជាមួយនឹងការតភ្ជាប់បែបនេះ កិច្ចសហប្រតិបត្តិការ “ខ្សែក្រវាត់ និងផ្លូវ” បានជំរុញកំណើន ទោះបីជាពិភពលោកជួបវិបត្តិសេដ្ឋកិច្ច ធ្លាក់ចុះយ៉ាងណាក្ដី។ ចាប់ពីឆ្នាំ២០១៣ ដល់ឆ្នាំ២០២១ ទំហំជួញដូរទំនិញសរុបរវាងប្រទេសចិន និងបណ្ដាប្រទេសនៅតាមបណ្តោយផ្លូវ “ខ្សែក្រវាត់ និងផ្លូវ” មានចំនួនជិត១១ទ្រីលានដុល្លារអាមេរិក ខណៈការវិនិយោគទាំងសងខាង មានទំហំលើសពី២៣០ពាន់លានដុល្លារអាមេរិក។ នេះបើយោងតាមទិន្នន័យរបស់ក្រសួងពាណិជ្ជកម្មចិន។

នៅអាស៊ីកណ្តាល ដោយសារមានផ្លូវហាយវ៉េចិន- កៀហ្ស៊ីស៊ីស្ថាន-អ៊ូសបេគីស្ថាន (China-Kyrgyzstan-Uzbekistan Highway) និងផ្លូវល្បឿនលឿនចិន-តាហ្ស៊ីគីស្ថាន (China-Tajikistan Expressway) ការដឹកជញ្ជូនតាមផ្លូវគោក ត្រូវបានកែលម្អយ៉ាងទូលំទូលាយ។ បណ្តាប្រទេសនៅអាស៊ីកណ្តាល ត្រូវបានរំពឹងថានឹងបញ្ចេញសក្តានុពល ដឹកជញ្ជូនកាន់តែច្រើនជាងមុន តាមរយៈគម្រោងផ្លូវដែកចិន- កៀហ្ស៊ីស៊ីស្ថាន-អ៊ូសបេគីស្ថាន (China-Kyrgyzstan-Uzbekistan Railway) នាពេលខាងមុខ។

គំនិតផ្ដួចផ្ដើម “ខ្សែក្រវាត់ និងផ្លូវ” ផ្តល់ឱ្យតំបន់អាស៊ីកណ្តាល នូវឱកាសបំពេញកិច្ចការជាយុទ្ធសាស្ត្រ នោះគឺការចូលទៅកាន់កំពង់ផែសមុទ្រនានាដោយផ្ទាល់ និងប្រែក្លាយតំបន់នេះ ទៅជាមជ្ឈមណ្ឌលដឹកជញ្ជូននៃផ្លូវហាយវ៉េ ឆ្លងទ្វីបពីប៉ែកបូព៌ាទៅប៉ែកខាងលិច និងពីប៉ែកខាងជើងទៅប៉ែកខាងត្បូង៕ Xinhua៕

ដោយ: លាងហួរ

ប៉េកាំង: ទិន្នន័យពីការិយាល័យស្ថិតិជាតិ បានបង្ហាញនៅថ្ងៃសុក្រ ទី១៦ ខែកញ្ញាថា ការវិនិយោគទ្រព្យសកម្មថេរ របស់ប្រទេសចិនបានកើនឡើង៥,៨ភាគរយ ពីមួយឆ្នាំទៅមួយឆ្នាំ ក្នុងរយៈពេល៨ខែដំបូងនៃឆ្នាំនេះ។

ការិយាល័យនេះបានរាយការណ៍ឱ្យដឹង នៅក្នុងសេចក្តីថ្លែងការណ៍មួយថា ការវិនិយោគទ្រព្យសកម្មថេរ ចាប់ពីខែមករា ដល់ខែសីហាមានចំនួនសរុប៣៦,៧១ពាន់ពាន់លានយ័ន (ប្រហែល៥,៣ពាន់ពាន់លានដុល្លារ)។

កំណើននេះបានកើនលឿន ដែលបានប្រកាសក្នុងរយៈពេល៧ខែដំបូង។ ចាប់ពីខែមករាដល់ខែសីហា ការវិនិយោគទ្រព្យសកម្មថេរពីវិស័យឯកជនបានកើនឡើង២,៣ភាគរយ ធៀបនឹងឆ្នាំមុនដល់២០,៣១ពាន់ពាន់លានយ័ន។

ការវិនិយោគលើហេដ្ឋារចនាសម្ព័ន្ធ និងការផលិតបានកើនឡើង៨,៣ភាគរយ និង១០ភាគរយពីមួយឆ្នាំ ទៅមួយឆ្នាំក្នុងអំឡុងពេលនេះរៀងគ្នា។

ការវិនិយោគលើការអភិវឌ្ឍន៍អចលនទ្រព្យ បានធ្លាក់ចុះ៧,៤ភាគរយពីមួយឆ្នាំទៅមួយឆ្នាំ ក្នុងរយៈពេល៨ខែដំបូង។ ការវិនិយោគទៅក្នុងឧស្សា​ហកម្មបច្ចេកវិទ្យាជាន់ខ្ពស់ មានការរីកចម្រើនក្នុងរយៈពេលដូចគ្នា ដោយក្នុងនោះ នៅក្នុងវិស័យផលិតកម្មបច្ចេកវិទ្យាជាន់ខ្ពស់ និងសេវាកម្មកើនឡើង២៣ភាគរយ និង១៤,២ភាគរយរៀងគ្នាពីមួយឆ្នាំទៅមួយឆ្នាំ។

ប្រទេសចិនបានធ្វើការផ្លាស់ប្តូរជាបន្តបន្ទាប់ ដែលគាំទ្រការវិនិយោគនៅឆ្នាំនេះ។  ជាឧទាហរណ៍ រដ្ឋបាលក្នុងតំបន់ទូទាំងប្រទេស បានពន្លឿនការប្រើប្រាស់ប័ណ្ណបំណុលពិសេស ដើម្បីជំរុញការវិនិយោគ៕

ដោយៈ គង់ ម៉ាលីនណា

ភ្នំពេញៈ សមាគមអ្នកវាយតម្លៃ និងភ្នាក់ងារអចលនវត្ថុ បានចុះអនុស្សរណៈនៃការយោគយល់គ្នា ជាមួយនិយ័តករមូលបត្រកម្ពុជា និងនិយ័តករបរធនបាលកិច្ច ដើម្បីសហការគ្នាក្នុងការលើកកំពស់ ចំណេះដឹងរវាងស្ថាប័នទាំាំងពីរ។

គោលដៅនៃការចុះអនុស្សរណៈយោគយល់គ្នានេះ មានគោលបំណងដូចជា ទី១-ការលើកកម្ពស់ការយល់ដឹងជាសាធារណៈ និងជំរុញការចូលរួមក្នុងវិស័យមូលបត្រ រវាងនិយ័តករមូលបត្រកម្ពុជា និងសមាគមអ្នកវាយតម្លៃ និងភ្នាក់ងារអចលនវត្ថុ ទី២-ការលើកកម្ពស់ការយល់ដឹងជាសាធារណៈ និងជំរុញការចូលរួមក្នុងវិស័យបរធនបាលកិច្ច រវាងនិយ័តករបរធនបាលកិច្ច និងសមាគមអ្នកវាយតម្លៃ និងភ្នាក់ងារអចលនវត្ថុ។

ពិធីនេះ មានការអញ្ជើញចូលរួមចុះហត្ថលេខា ដោយលោកស៊ូ សុជាតិ ប្រតិភូរដ្ឋាភិបាលទទួលបន្ទុកជាអគ្គនាយក នៃនិយ័តករមូលបត្រកម្ពុជា លោកសុខ ដារ៉ា អគ្គនាយកនៃនិយ័តករបរធនបាលកិច្ច និងលោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ព្រមទាំងសមាជិកសមាគម CVEA និងមន្រ្តីរដ្ឋាភិបាលជាច្រើនរូប៕