ដោយៈ គង់ ម៉ាលីនណា

ភ្នំពេញៈ ក្រសួងទេសចរណ៍ សហការជាមួយក្រសួងអប់រំ យុវជន និងកីឡា ប្រកាសដាក់ឱ្យប្រើប្រាស់ជាផ្លូវការ សៀវភៅមុខវិជ្ជា ទេសចរណ៍ សម្រាប់រៀនថ្នាក់ទី១១។

ក្រោមកិច្ចសហការដ៏ល្អរវាងក្រសួងអប់រំ យុវជន និងកីឡា និងក្រសួងទេសចរណ៍ ក្នុងការជំរុញការដាក់បញ្ចូលកម្មវិធីសិក្សាទេសចរណ៍ ទៅក្នុងកម្មវិធីសិក្សាអប់រំវិជ្ជាជីវៈ ជម្រើសក្នុងសាលាចំណេះទូទៅ ដើម្បីជាការតម្រង់ទិស និងការទាក់ទាញដល់យុវជន និងសិស្សានុសិស្សឱ្យឃើញពីសារៈសំខាន់នៃវិស័យទេសចរណ៍ ក្រសួងអប់រំ និងក្រសួងទេសចរណ៍ នាព្រឹកថ្ងៃទី៣០ ខែមិថុនា ឆ្នាំ២០២២នេះ បានសហការគ្នាផ្សព្វផ្សាយ និងប្រកាសដាក់ឱ្យប្រើប្រាស់ជាផ្លូវការសៀវភៅទេសចរណ៍ ជាមុខវិជ្ជាមួយរៀននៅថ្នាក់ទី១១ សម្រាប់សាលាចំណេះដឹងទូទៅរបស់ក្រសួង។

ពិធីប្រកាសនេះ បានធ្វើឡើងក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងលោកបណ្ឌិត អ៊ឹម កុច រដ្ឋលេខាធិការ ក្រសួងអប់រំ យុវជន និងកីឡា។

លោកថោង ខុន ក៏បានថ្លែងអំណរគុណដល់ លោកបណ្ឌិតសភាចារ្យហង់ ជួនណារ៉ុន រដ្ឋមន្ត្រី និង ថ្នាក់ដឹកនាំក្រសួងអប់រំ យុវជន និងកីឡា ដែលបានតែងតែផ្តល់ការគាំទ្រ និងកិច្ចសហការយ៉ាងល្អ លើការដាក់បញ្ចូលកម្មវិធីសិក្សាទេសចរណ៍ ទៅក្នុងកម្រិតសិក្សាចំណេះដឹងទូទៅ ដែលរួមមានទាំងការរៀបចំសៀវភៅ ទេសចរណ៍ថ្នាក់ទី១១ និងទី១២ ដើម្បីបញ្ចូលក្នុងកម្មវិធីសិក្សាចំណេះដឹងទូទៅ និងការរៀបចំកម្មវិធីបណ្តុះបណ្តាលជំនាញទេសចរណ៍ សម្រាប់ដាក់ឲ្យប្រើប្រាស់ តាមវិទ្យាល័យចំណេះទូទៅ និងបច្ចេកទេស (ថ្នាក់ទី១០ ទី១១ និងទី១២) ។

លោកបញ្ជាក់ថា “ការដាក់បញ្ចូលកម្មវិធីសិក្សា ទេសចរណ៍ទៅក្នុងកម្រិតសិក្សាចំណេះដឹងទូទៅនេះ គឺជាទិសដៅយុទ្ធសាស្រ្តនៃផែនការអភិវឌ្ឍធនធានមនុស្ស ក្នុងវិស័យទេសចរណ៍ ដើម្បីចូលរួមជំរុញការបណ្តុះបណ្តាល និងលើកកម្ពស់ធនធានអ្នកជំនាញទេសចរណ៍ ឱ្យឆ្លើយតបទាំងបរិមាណ និងគុណភាពស្របតាមតម្រូវកា រអភិវឌ្ឍន៍ក្នុងវិស័យទេសចរណ៍ ដែលវិស័យនេះ ត្រូវបានចាត់ទុកជាវិស័យអាទិភាពមួយដើរតួជា “មាសបៃតង” រួមចំណែកដល់ការអភិវឌ្ឍសេដ្ឋកិច្ចសង្គម និងការការពារបរិស្ថាន ចូលរួមដល់ការកសាងសេដ្ឋកិច្ចបៃតងនៅកម្ពុជា ដែលជាផ្នែកគាំទ្រដល់ការសម្រេចបាននូវគោលដៅអភិវឌ្ឍ ប្រកបដោយចីរភាព (SDGs) ឆ្នាំ២០៣០ របស់អង្គការសហប្រជាជាតិ (UN)។

ជាមួយគ្នានោះ ដើម្បីចូលរួមជំរុញការប្រើប្រាស់ សៀវភៅទេសចរណ៍ នៅក្នុងកម្រិតសិក្សាចំណេះដឹងទូទៅ ឱ្យកាន់តែមានប្រសិទ្ធភាព លោករដ្ឋមន្ត្រី ថោង ខុន ក៏បានស្នើ ៣ចំណុចដូចជា ទី១ ស្នើសុំដល់ក្រសួងអប់រំ យុវជន និងកីឡា បន្តជំរុញការផ្សព្វផ្សាយ និងណែនាំពីការប្រើប្រាស់សៀវភៅថ្នាក់ទី១១នេះ ដល់សាលាចំណេះដឹងទូទៅ នៅក្រោមឱវាទ របស់ក្រសួងអប់រំ យុវជន និងកីឡាទាំងអស់ ព្រមទាំងបន្តផ្តល់ការគាំទ្រ និងសហការលើការចងក្រង និងរៀបចំសៀវភៅទេសចរណ៍ថ្នាក់ទី១២ និងការរៀបចំ កម្មវិធីសិក្សា ជំនាញទេសចរណ៍ សម្រាប់ដល់បញ្ចូលក្នុងកម្រិតសិក្សាចំណេះដឹងទូទៅផ្សេងៗទៀតផងដែរ។

ទី២ ស្នើសុំដល់គ្រឹះស្ថានអប់រំ និងបណ្តុះបណ្តាលក្រោមឱវាទក្រសួងអប់រំទាំងអស់ ជួយបន្តជំរុញបណ្តុះបណ្តាល លើជំនាញទេសចរណ៍ និងបដិសណ្ឋារកិច្ចឱ្យបានច្រើន ទាំងកម្រិតជំនាញ និងគ្រប់គ្រងផ្នែកទេសចរណ៍ និងបដិសណ្ឋារកិច្ច ជាពិសេសសម្រាប់គ្រឹះស្ថានអប់រំ និងបណ្តុះបណ្តាល ដែលមិនទាន់មានការបណ្តុះបណ្តាល ជំនាញទេសចរណ៍ សូមរៀបចំឱ្យមានថ្នាក់សិក្សាលើជំនាញទេសចរណ៍ ជាពិសេសនៅតាមគោលដៅទេស​ចរណ៍ ដែលមិនមានសាលាបណ្តុះបណ្តាលជំនាញ ទេសចរណ៍។

ទី៣ ស្នើសុំដល់មន្ទីរទេសចរណ៍ និងមន្ទីរអប់រំ យុវជន និងកីឡារាជធានី ខេត្តទាំងអស់សហការជាមួយគ្រឹះស្ថានអប់រំ និងបណ្តុះបណ្តាលនៅក្នុងគោលដៅរាជធានី ខេត្តរបស់ខ្លួន ជំរុញរៀបចំការបណ្តុះបណ្តាលជំនាញទេសចរណ៍ឱ្យបានកាន់តែច្រើនផងដែរ។

ជាមួយគ្នានេះ អ៉ឹម កុច ក៏បានបញ្ជាក់ដែរថា ដើម្បីចូលរួមលើកកម្ពស់ការយល់ដឹងរបស់សិស្សានុសិស្ស លើវិស័យទេសចរណ៍ ចំពោះសិស្សដែលបានរៀនចប់ត្រឹមថ្នាក់ទី៩ នឹងបន្តចូលរៀននៅតាមសាលាអប់រំ បច្ចេកទេស រាប់ទាំងជំនាញទេសចរណ៍រយៈពេល៣ឆ្នាំ ក្រោយពេលប្រឡងបានជោគ​ជ័យ និងទទួលបានសញ្ញាបត្រមួយ ដែលមានតម្លៃស្មើនឹងសញ្ញាបត្របាក់ឌុបផងដែរ ដែលបេក្ខជនអាចស្នើសុំសញ្ញាបត្រនេះ ដែលមានការបោះត្រា និងចុះហត្ថលេខាដោយ ក្រសួងអប់រំ យុវជន និងកីឡាផងដែរ៕

ដោយៈ គង់ ម៉ាលីនណា

ភ្នំពេញៈ ក្រុមហ៊ុនអាកាសចរណ៍ជាតិកម្ពុជា Cambodia Angkor Air នឹងភ្ជាប់ជើងហើរឡើងពីខេត្តសៀមរាប ទៅខេត្តព្រះសីហនុ និងខេត្តដាណាងប្រទេសវៀតណាម ចាប់ពីដើម ខែកក្កដាតទៅ ដើម្បីផ្សារភ្ជាប់ភ្ញៀវទេសចរគ្នាទៅវិញ ទៅមករវាងតំបន់ទាំងបី បន្ទាប់ពីអាក់ខានអស់រយៈពេល២ឆ្នាំ ដោយការរាតត្បាតនៃជំងឺកូវីដ១៩។

ជើងហោះហើររវាងខេត្តសៀមរាប និងខេត្តដាណាង ប្រទេសវៀតណាម នឹងចាប់ផ្តើមតភ្ជាប់ឡើងវិញ ចាប់ពីថ្ងៃទី១ ខែកក្កដា ឆ្នាំ២០២២ តាមរយៈជើងហោះហើរដំបូងលេខ K៦៨៤០ ដោយចាកចេញពីខេត្តសៀមរាបនាវេលាម៉ោង១៥និង៣៥នាទី ដែលចំណាយពេល ២ ម៉ោងដើម្បីទៅដល់ ខេត្តដាណាង។

ក្នុងការបើកឡើងវិញនេះ ក្រុមហ៊ុនធ្វើការហោះហើរបីលើក ក្នុងមួយសប្ដាហ៍ ហើយនឹងបង្កើនរហូតដល់ ប្រាំជើងក្នុងមួយសប្ដាហ៍ចាប់ពីខែកញ្ញា ឆ្នាំ ២០២២ និង បន្ថែមរហូតដល់រៀងរាល់ថ្ងៃនាពេលដ៍ខ្លីខាងមុខនេះ។

លោកលៀវ មិញជុង អគ្គនាយកក្រុមហ៊ុនអាកាសចរណ៍ជាតិកម្ពុជាអង្គរ អ៊ែរ មានប្រសាសន៍ថា ក្រុមហ៊ុនកម្ពុជាអង្ករអ៊ែ ជាអាកាសចរជាតិ និងអាកាសចរតែមួយគត់ នៅក្នុងប្រទេសកម្ពុជា ដែលទទួលបានវិញ្ញាបនប័ត្របញ្ញាក់សុវត្ថិភាព ពីស្ថាប័នអន្តរជាតិហៅកាត់ អាយអូសា (IOSA) យើងមានក្តីសោមន្សសរីករាយបំផុត ក្នុងការធ្វើជាស្ពានតភ្ជាប់ក្នុងការផ្លាស់ប្តូរ វប្បធម៌ សេដ្ឋកិច្ច និងទេសចររវាងប្រទេសកម្ពុជា និង ប្រទេសវៀតណាម ។

បច្ចុប្បន្ននេះក្រុមហ៊ុនមានមោទនភាពយ៉ាងខ្លាំង ដែលបានផ្តល់សេវាកម្មយ៉ាងច្រើន រវាងប្រទេសទាំងពីររហូតដល់ជាង៣០ជើងហោះហើរ ក្នុងមួយសប្ដាហ៍ មានដូចជា ពីទីក្រុងភ្នំពេញ ទៅទីក្រុងហូជីមិញ និងទីក្រុងហាណូយ ពីខេត្តសៀមរាប ទៅទីក្រុងហូជីមិញ និងខេត្តដាណាង ពីខេត្តព្រះសីហនុ ទៅទីក្រុងហូជីមិញ។

ខេត្តសៀមរាប និងខេត្តដាណាង គឺជាគោលដៅទេសចរណ៍ដ៏ល្បីល្បាញក្នុងតំបន់ឥណ្ឌូចិន ដែលត្រូវបានយាយី ដោយសារជំងឺឆ្លងកូវីដ១៩ រយះពេល២ឆ្នាំ។

ចំណែកជើងហោះហើររវាង ខេត្តសៀមរាប និងក្រុងព្រះសីហនុ នឹងចាប់ផ្តើមពីថ្ងៃទី២ ខែកក្កដា ដោជើងហោះហើរដំបូងលេខK៦១៣១ ហោះចេញខេត្តសៀមរាបវេលាម៉ោង១៥ និង១០នាទីទៅក្រុងព្រះសីហនុ ដោយចំណាយពេល១ម៉ោង។

ការតភ្ជាប់ជើងហើរជាថ្មីនេះ ពិតជាមានសារៈសំខាន់ណាស់ ក្នុងការស្តារ និងជំរុញឡើងវិញ នូវសហប្រតិបត្តិការណ៍សេដ្ឋកិច្ច និងការអភិវឌ្ឍវិស័យទេសចរណ៍សម្រាប់ខេត្តទាំងពីរ។

បច្ចុប្បន្ននេះ មានតែក្រុមហ៊ុន អង្គរអ៊ែរតែមួយគត់ ដែលផ្តល់សេវាកម្មដឹកជញ្ជូនផ្លូវអាកាស សម្រាប់ជើងហោះហើរក្នុងស្រុក ដោយហោះហើររៀងរាល់ថ្ងៃរវាងទីក្រុងភ្នំពេញ និងសៀមរាប តាំងពីខែកុម្ភៈ ឆ្នាំ២០២២។
សម្រាប់ការហោះហើរ រវាងខេត្តសៀមរាប និងខេត្តព្រះសីហនុមានជើងហើរហោះបីជើងក្នុងមួយសប្តាហ៍។

លោកលៀវ មិញជុងបានលើកឡើងថា ក្រុមហ៊ុននឹងបង្កើនចំនួនជើងហោះហើរបន្ថែមទៀត សម្រាប់ផ្លូវហោះហើរទាំងពីរនេះ ជាពិសេសនឹងបន្ថែមឱ្យមានការហោះហើរ រៀងរាល់ថ្ងៃរវាងខេត្តសៀមរាប និងខេត្តព្រះសីហនុ ចាប់ពីខែសីហា ឆ្នាំ២០២២៕