ដោយៈ វឌ្ឍនៈ

ភ្នំពេញៈ មុនវិបត្តិកូវីដ១៩ អត្រានៃជនបរទេសទិញខុនដូស្នាក់ និងវិនិយោគនៅកម្ពុជាមានចំនួនច្រើន ធៀបនឹងប្រជាជនក្នុងស្រុក តែមកដល់ឆ្នាំ២០២២នេះ អត្រានៃប្រជាជនកម្ពុជាទិញខុនដូស្នាក់នៅ និងវិនិយោគមានចំនួនច្រើនជាងជនបរទេសទាំងវិញ ដែលធ្វើឱ្យអ្នកអភិវឌ្ឍន៍ខុនដូត្រូវបង្វែរការអភិវឌ្ឍតម្រូវនឹងប្រជាជនក្នុងស្រុកវិញម្ដង។

លោកខន គង្គា អគ្គនាយកក្រុមហ៊ុនអចលនទ្រព្យ ERA Cambodia បានមានប្រសាសន៍ឲ្យដឹងនាព្រឹកថ្ងៃទី៦ មិថុនាថា សម្រាប់ការលក់ខុនដូក្នុងក្រុមហ៊ុនរបស់លោកផ្ទាល់ឃើញថា ប្រជាជនក្នុងស្រុកមានចំនួនច្រើនជាងប្រជាជនបរទេសដែលទិញខុនដូ ក្នុងនោះរយៈពេលប៉ុន្មានខែដើមឆ្នាំ២០២២នេះ ប្រជាជនក្នុងស្រុកដែលទិញខុនដូ តាមរយៈក្រុមហ៊ុនរបស់លោកមានអត្រា រហូតដល់៩៧ភាគរយឯណោះ ដែលអត្រានេះគឺខ្ពស់មែនទែន ។

លោកបន្តថា “ប្រជាជនកម្ពុជាដែលចាប់អារម្មណ៍ និងទិញខុនដូស្នាក់នៅ ក៏ដូចជាវិនិយោគភាគច្រើនជាយុវជន ដែលធ្លាប់ទៅសិក្សានិងរស់នៅក្រៅប្រទេស ឬអ្នកធ្លាប់ចេញចូលក្រៅប្រទេសញឹកញាប់”។លោកបន្តថា “ពួកគាត់បានមើលឃើញ ពីការរស់នៅក្នុងខុនដូនៃប្រទេសគេ គាប់ជួនប្រទេសកម្ពុជា ចាប់ផ្ដើមមានការអភិវឌ្ឍខុនដូច្រើនផងដែរនោះ ទើបធ្វើឱ្យពួកគេបានទិញខុនដូ និងខ្លះទិញសម្រាប់ទុកវិនិយោគ កាន់តែមានចំនួនច្រើនឡើងៗ”។

លោកខន គង្គាបានឱ្យដឹងទៀតថា កត្តាដែលប្រជាជនជាពិសេសយុវវ័យដែលទើបរៀបការថ្មីថ្មោង ជ្រើសរើសយកខុនដូសម្រាប់ការស្នាក់នៅរបស់ខ្លួននោះ គឺដោយសារតែតម្លៃដី និងផ្ទះនៅកណ្ដាលក្រុងកាន់តែមានតម្លៃខ្ពស់ ហើយបើចង់រស់នៅផ្ទះជាប់ដី ត្រូវទៅរកនៅតំបន់ជាយក្រុងនិងត្រូវធ្វើដំណើរមកកាន់កន្លែងធ្វើការយូរ ។ ម្យ៉ាងទៀតស្ថានភាពចរាចរណ៍នៅរាជធានីភ្នំពេញ កាន់តែស្ទះជារៀងរាល់ថ្ងៃ ។

លោកបន្តថា “អ្វីដែលពិសេសនោះ គឺការរស់នៅក្នុងខុនដូគឺមានអ្វីៗគ្រប់យ៉ាងរួចទៅហើយ រួមមានផ្សារទំនើប កន្លែងហាត់ប្រាណសួនកម្សាន្ត មន្ទីរពេទ្យ និងជាកន្លែងស្នាក់នៅបែបឯកជន ស្ងប់ស្ងាត់អត់មានអ្នករំខានច្រើន”។

ជាមួយគ្នានេះ អ្នកនាងគឹម គិនកេសា អ្នកគ្រប់គ្រងជាន់ខ្ពស់នៃក្រុមហ៊ុនCBRE Cambodia ក៏បានលើកឡើងផងដែរថា ថ្វីត្បិតតែស្ថានភាពកូវីដ១៩នៅក្នុងប្រទេសកម្ពុជា យើងមានភាពល្អប្រសើរ តែស្ថានភាពនៃប្រទេសដទៃទៀត ជាពិសេសប្រភពវិនិយោគិន ពីប្រទេសចិននៅតែបន្តបិទនិងរឹតបន្តឹងធ្វើឱ្យការទិញខុនដូ ពីសំណាក់វិនិយោគិនបរទេស នៅមានចំនួនតិចតួចនៅឡើយ។

អ្នកនាងបន្តថា “ដូច្នេះហើយក្នុងឆ្នាំ២០២២នេះ ទីផ្សារខុនដូក្នុងប្រទេសកម្ពុជានៅបន្តពឹងផ្អែកលើទីផ្សារក្នុងស្រុកដដែល”។

យ៉ាងណាក្ដីអ្នកជំនាញនៃវិស័យអចលនទ្រព្យ នៅតែរំពឹងថាជនបរទេស នឹងត្រលប់មកចូលមកកម្ពុជា និងស្វែងរកការវិនិយោគនៅកម្ពុជាឡើងវិញ ដែលអាចជំរុញឱ្យទីផ្សារខុនដូ សម្រាប់ជនបរទេសនឹងមានភាព ប្រសើរឡើងវិញផងដែរ៕

ដោយៈ ​លាងហួរ

ប៉េកាំងៈ យោងតាមរបាយការណ៍របស់វិទ្យាស្ថានស្រាវជ្រាវ Beike បានឱ្យដឹងថា ទីផ្សារលក់លំនៅឋានប្រភេទទី២ នៅប្រទេសចិនហាក់មានសន្ទុះឡើងវិញ ខណៈដែលប្រទេសនេះបានបន្ធូរបន្ថយ ការផ្តល់ហិរញ្ញប្បទាន និងការរឹតបន្តឹងចំពោះអ្នកទិញផ្ទះ។

នៅក្នុងខែឧសភា ទំហំនៃការលក់ផ្ទះនៅក្នុងទីក្រុងចំនួន៥០ ក្នុងប្រទេសចិន បានកើនឡើងប្រហែល១៤ភាគរយ ធៀបនឹងខែមេសា នេះបើយោងតាមរបាយការណ៍ពីវិទ្យាស្ថានស្រាវជ្រាវBeike។

យោងតាមរបាយការណ៍ ដែលអ្នកស្រាវជ្រាវបានស្ទង់មតិនៅក្នុងទីក្រុងជាង៨០ភាគរយ គេបានកត់សម្គាល់ឃើញថា ទំហំនៃការលក់ផ្ទះពីម្ចាស់ទី១ ទៅកាន់អ្នកទិញបន្តមានការកើនឡើង ពីមួយខែទៅមួយខែ ខណៈពេលដែលទំហំនៃការលក់ផ្ទះ នៅទីក្រុងមួយចំនួននៅភាគឦសាននៃប្រទេសចិន និងតំបន់ដីសណ្ដទន្លេ Yangtzeមានការកើនឡើងជាទ្វេដង។

ទោះជាយ៉ាងណាក៏ដោយ តម្លៃផ្ទះដែលកាន់កាប់ជាមុនបានធ្លាក់ចុះ០.៩ភាគរយពីខែមេសា នៅក្នុងទីក្រុងចំនួន៥០ ដែលការធ្លាក់ចុះកាលពីខែមុនមាន០.៣ភាគរយ។

របាយការណ៍អ្នកស្រាវជ្រាវនេះបានប៉ាន់ប្រមាណថា​ ទំហំនៃការលក់ផ្ទះទី២ នឹងមានការកើនឡើងបន្តទៀត ដែលរក្សាអោយមានស្ថិរភាពនៃការលក់ផ្ទះនៅឆមាសទីពីរនៃឆ្នាំ២០២២នេះ៕

ដោយ: សុផារី

ភ្នំពេញ: ក្រោយប្រព័ន្ធហេដ្ឋារចនាសម្ព័ន្ធ ខ្វាត់ខ្វែងត្រូវបានដាក់សម្ពាធ ការអភិវឌ្ឍអចលនទ្រព្យខេត្តសៀមរាប ហាក់មានសកម្មភាពកម្រើកមួយកម្រិត។

ទោះបីជាយ៉ាងនេះក្តី អ្នកជំនាញមូលដ្ឋានមើលឃើញថា ការកម្រើកនេះនៅមានកម្រិតតិចតួច ព្រោះអតិថិជនហាក់នៅព្រួយបារម្ភ ពីបញ្ហាសេដ្ឋកិច្ចនៅឡើយ។

លោក កែវ សុធារ៉ា នាយកប្រតិបត្តិ KW Siem Reapបានមានប្រសាសន៍ប្រាប់ Property Area Asia តាមប្រព័ន្ធតេឡេក្រាមនៅថ្ងៃទី០៤ ខែមិថុនានេះថា ក្រោយប្រព័ន្ធហេដ្ឋារចនាសម្ព័ន្ធផ្លូវ៣៨ខ្សែ ដាក់ឱ្យប្រើប្រាស់រួចរាល់ ឃើញថាសកម្មភាពសេដ្ឋកិច្ច និងអចលនទ្រព្យក្នុងខេត្តសៀមរាប ហាក់មានភាពល្អប្រសើរឡើងវិញបន្តិច តែនៅមិនទាន់មានសក​ម្មភាពច្រើនទេ។

លោកសុធារ៉ាបានបញ្ជាក់ថា វិបត្តិជំងឺកូវីដ១៩ និងវិបត្តិសេដ្ឋកិច្ចសកល ដែលបណ្តាលមកពីសង្គ្រាមរវាងប្រទេសរុស្ស៊ី និងអ៊ុយក្រែន បានបង្កជាភាពមិនប្រាកដប្រជា លើវិស័យសេដ្ឋកិច្ច ក៏ដូចជាអចលនទ្រព្យនៅកម្ពុជា។ កត្តានេះហើយបណ្តាលឱ្យអតិថិជន ដែលមានបំណងវិនិយោគនៅក្នុងខេត្តសៀមរាប ហាក់នៅមិនទាន់ជឿជាក់ខ្លាំងនៅឡើយ។

លោកមានប្រសាសន៍ថា “អតិថិជន និង អ្នកវិនិយោគហាក់មិនទាន់ជឿជាក់ ជាមួយស្ថានភាពមិនប្រាកដប្រជា នៃការត្រឡប់មកវិញនៅទេស​ចរណ៍ និងបញ្ហាវិបត្តិពិភពលោក ជាក់ស្តែងរឿងសង្គ្រាមរុស្សី និងអ៊ុយក្រែន”។

ទោះបីជាយ៉ាងនេះក្តី ស្របពេលជាមួយគ្នានេះ អ្នកជំនាញរូបនេះស ង្កេតឃើញថា សកម្មភាពទេសចរណ៍ ចាប់ផ្តើមត្រលប់មកវិញបណ្តើរៗ ការទិញ លក់ ជួលទីតាំងប្រកបអាជីវកម្ម មានការកើនឡើងខ្លះៗដែរ។

លោកបន្តថា “មានអាជីវកម្មជាច្រើន បានបើកដំណើរការឡើងវិញ បន្ទាប់ពីបិទទ្វារអស់ជាច្រើនឆ្នាំ និងមានទីតាំងថ្មីៗជាច្រើនគួរសម ត្រូវបានជួល ឬលក់”។

អ្នកជំនាញអចលនទ្រព្យជាច្រើនរូប បានបង្ហាញពីក្តីបារម្ភថា វិស័យអចលនទ្រព្យកម្ពុជា អាចនឹងត្រូវការពេលបន្ថែមទៀត ដើម្បីត្រលប់មករកប្រក្រតីភាពដូចមុនកូវីដ១៩។ ភាពមិនប្រាកដប្រជា នៃវិបត្តិសកលទាំងពីរ បានធ្វើឱ្យសន្ទុះការងើបឡើងវិញ ហាក់មានល្បឿនយឺតខ្លាំង ហើយមានភាពលំបាកក្នុងការព្យាករណ៍៕

ដោយ : សហការី

ភ្នំពេញ៖ ថ្ងៃទី ០៣ ខែមិថុនា ឆ្នាំ២០២២ ពិតជាពិសេសខ្លាំងណាស់ បុរី មេគង្គ លែនបានប្រារព្ធពិធីប្រគល់សោរផ្ទះជូនអតិថិជន នៅគម្រោងធំទី២ ហ្គោលឌិន អាវិននូ ដោយការរៀបចំនេះត្រូវបានអញ្ចើញភ្ញៀវកិត្តិយសជាច្រើនរូប ដែលពួកគាត់សុទ្ធសឹងដែលជាអតិថិជនដែលបានទិញផ្ទះនៅគម្រោងនេះដោយផ្ទាល់ផងដែរ ។
គួបញ្ជាក់ផងដែរថា ការប្រារព្ធពិធីនេះគឺដើម្បីជាការអគុណ និងការទទួលស្វាគមន៍យ៉ាងកក់ក្តៅស ម្រាប់អតិថិជនដែលស្រលាញ់ពេញចិត្ត ហើយក៏បានទិញផ្ទះ និងបានចូលមករស់នៅក្នុងគម្រោងធំទី២នេះ។ អ្វីទាំងអស់នេះបានបញ្ចាក់អោយឃើញថា បុរី មេគង្គ លែនពិតជាមានការយកចិត្តទុកដាក់ទៅលើអតិថិជនជាខ្លាំង មិនថាជាអតិថិជនចាស់ឬថ្មីនោះទេ សុទ្ធសឹងតែទទួលបាននូការការមើលថែ ទាំងមុនពេលចូលរស់នៅ និងក្រោយការចូលរស់នៅក្នុងគំរោងនីមួយៗ ។

បើនិយាយពី គម្រោងធំទី២នេះ គឺជាគម្រោងដែលត្រូវបានរចនាឡើងផ្អែកលើស្ថាបត្យកម្មបែបទំនើប ស័ក្តិសមបំផុតសម្រាប់ការរស់នៅ និងការធ្វើអាជីវកម្ម ដែលមានទីតាំងស្ថិតនៅ ស្ថិតតាមបណ្តោយផ្លូវ 𝟐𝟎𝟏𝟏 ដែលជាតំបន់ដ៏អ៊ូអរ សំរាប់ការប្រកបអាជីវកម្មគ្រប់ប្រភេទ ហើយមានចំងាយត្រឹមតែ១៥នាទីប៉ុណ្ណោះពីផ្សាអ៊ីអន២ និង ផ្សារម៉ាក្រូ។

បច្ចុប្បន្ននេះ បុរី មេគង្គ លែន បានរីកសាយភាយសឹងនិងគ្រប់ទីកន្លែង នៅរាជធានីភ្នំពេញ ដែលនេះជាការបញ្ជាក់អំពីការចូលរួមនៅក្នុងការអភិវឌ្ឍន៏ដ៏ខ្លាំងក្លា លើវិស័យលំនៅដ្ឋាន នៅក្នុងព្រះរាជាណាចក្រកម្ពុជា។

គួរជម្រាបដែរថា ក្រុមហ៊ុន មេគង្គ លែន គឺជាក្រុមហ៊ុនអភិវឌ្ឍន៍លំនៅឋានដែលមានម៉ូតផ្ទះស្អាតដាច់គេ និងគុណភាពសំណង់រឹងមាំឈានមុខគេមួយក្នុងវិស័យអចលនទ្រព្យនៃព្រះរាជាណាចក្រកម្ពុជា សព្វថ្ងៃក្រុមហ៊ុនកំពុងអភិវឌ្ឍន៍គម្រោងធំៗចំនួនពីរ នោះគឺគម្រោង ហ្គោលឌិន អាវិននូ ដែលមានទីតាំងស្ថិតនៅលើផ្លូវ២០១១ និង គម្រោង មេគង្គ ស៊ីធី ស្ថិតលើផ្លូវជាតិ៦អា ៕

សម្រាប់ព័ត៌មានបន្ថែម សូមទំនាក់ទំនង នៅទីតាំងផ្ទាល់ ឬមកកាន់លេខទូរស័ព្ទ៖ 𝟎𝟔𝟏 𝟗𝟓𝟓 𝟗𝟗𝟗។

ដោយៈ វិវត្តន៍

ភ្នំពេញៈ ការឈានជើងចូលទីផ្សារ របស់ក្រុមហ៊ុនអចលនទ្រព្យលំដា​ប់ពិភពលោក បាននិងកំពុងធ្វើឲ្យទីផ្សារ និងវិស័យអចលនទ្រព្យកម្ពុជាកាន់តែទទួលបានទំនុកចិត្តបន្ថែមទៀត។

ជាក់ស្តែងវត្តមាន ក្រុមហ៊ុនផ្តល់សេវាកម្មគ្រប់គ្រងអចលនទ្រព្យអន្តរជាតិ Chestertons ដែលមានមូលដ្ឋាននៅចក្រភពអង់គ្លេស បានប្រកាសបើកដំណើរការនៅកម្ពុជាកាលពីពេលថ្មីៗនេះ បានបញ្ជាក់ថា “កម្ពុជាជាទីផ្សារ”គន្លឹះរីកចម្រើនខ្លាំង” ស្របតាមយុទ្ធសាស្រ្តពង្រីកខ្លួននៅតំបន់អាស៊ី។

ក្រុមហ៊ុនលំដាប់អន្តរជាតិ ដែលមានអាយុកាល២១៦ឆ្នាំនេះ បានឈានចូលក្នុងប្រតិបត្តិការទីផ្សារនៅកម្ពុជា ទៅក្នុងបណ្តាញកម្រិតអន្តរជាតិជាង១០០ការិយាល័យរបស់ខ្លួន តាមរយៈការទិញយកប្រតិបត្តិការក្រុមហ៊ុន Focus Property Co., Ltd ដែលមានមូលដ្ឋាននៅទីក្រុងភ្នំពេញ។

ក្រុមហ៊ុន Chestertons Cambodia នឹងដំណើរការដោយមានក្រុមការងារច្រើនជាង​៥០នាក់ សម្រាប់ជំហានដំបូង ហើយត្រូវដឹកនាំដោយលោកជី មាត និងកញ្ញាសាម ចាន់ធូ ដើម្បីផ្តល់សេវាកម្មទាក់ទងនឹងអចល​នទ្រព្យលំនៅដ្ឋាននិងពាណិជ្ជកម្ម ដោយផ្តោតឯកទេសខាងផ្នែកសេវាគ្រប់គ្រងអចលនទ្រព្យ ដូចជា​ សេវាកម្មគ្រប់គ្រងអចលនទ្រព្យ​ សេវាកម្មគ្រប់គ្រងសម្ភារៈ​បរិក្ខារ​ និង​សេវាកម្មបរិក្ខារ​ផ្សេងៗ។

លោក Salah Mussa ប្រធានក្រុមហ៊ុនChestertonsនៅចក្រភព អង់គ្លេសបានបញ្ជាក់ថា យើងមានសេចក្តីសោមនស្ស ក្នុងការដំណើរការក្រុមហ៊ុន Chestertons Cambodia និងស្វាគមន៍យ៉ាងកក់ក្តៅក្រុមហ៊ុន Focus Property មកកាន់គ្រួសារ Chestertons ដែលជាក្រុមហ៊ុនមានការរីកធំធាត់ជាដរាប។ ក្រុមហ៊ុន Chestertons Cambodia ដែលជាក្រុមហ៊ុនថ្មីជាងគេ នៃសមាជិក Franchiseរបស់យើង នឹងទទួលបានប្រយោជន៍ជាច្រើន ពីបណ្តាញដ៏ទូលំទូលាយ និងប្រកបដោយជំនាញរបស់យើង រួមទាំងប្រយោជន៍ពីម៉ាកយីហោក្រុមហ៊ុន Chestertons ដែលល្បីល្បាញកម្រិតអន្តរជាតិ។

លោក Salah Mussa អះអាងថា “ការផ្តោតជាសំខាន់របស់ក្រុមការងារលើសេវាកម្ម គ្រប់គ្រងអចលនទ្រព្យបង្ហាញពីជំនាញ និងធនធានសម្បូរបែបរបស់យើង”។លោកបន្តថា “ការដាក់គោលដៅខ្ពស់ប្រកបដោយក្រមសីលធម៌ និងវិជ្ជាជីវៈក្នុងការងារ គឺជាគុណសម្បត្តិដ៏ល្អ ដើម្បីឲ្យយើងបំពេញការងារបានយ៉ាងប្រសើរ”។
លោកSalah Mussa បញ្ជាក់ថា នៅជាង១២ខែចុងក្រោយនេះ យើងបានបង្ហាញខ្លួន ដោយបើកដំណើរការទីផ្សារថ្មីចំនួន៧ ដែលគិតមកទល់ពេលនេះ យើងបើកដំណើរការចំនួន១៥ ប្រទេសជុំវិញពិភពលោក។ យើងនឹងមិនសម្រាកត្រឹមប៉ុនហ្នឹងទេ យើងសង្ឃឹមថានឹងបន្តដំណើរដ៏អស្ចា រ្យនេះដោយពង្រីកខ្លួនបន្តទៀត ទៅកាន់ពិភពលោកនៅឆ្នាំ ២០២២ និងឆ្នាំក្រោយៗទៀត។
យោងតាមសេចក្តីប្រកាសព័ត៌មាន ក្រុមហ៊ុនអចលនទ្រព្យ Chestertons បានបង្ហាញពីផែនការបន្ទាប់នៃការពង្រីកខ្លួន ដោយដាក់ការិយាល័យថ្មីៗ បន្ថែមទៀតនៅតំបន់អាស៊ី និងពង្រឹងប្រតិបត្តិការសេវាអចលនទ្រព្យលំនៅដ្ឋាននិងពាណិជ្ជកម្ម ដែលមានស្រាប់នៅទីក្រុងឌូបៃ ដែលជាទីក្រុងពាណិជ្ជកម្មនៅប្រទេសអេមីរ៉ាត់អារ៉ាប់រួម។
ក្រុម​ហ៊ុន Chestertons មាន​ប្រតិបត្តិការជាសកលនៅក្នុងទ្វីបចំនួន៥ មកពីចក្រភពអង់គ្លេស អឺរ៉ុប ការាបៀន អាហ្រ្វិក និងអាស៊ី។ ដោយ​សារ​តែ​ការ​រីក​ចម្រើន​យ៉ាង​ឆាប់​រហ័ស​ នៃ​វិស័យ​អចលនទ្រព្យ Chestertons បាន​ពង្រីក​សេវា​គ្រប់​គ្រង​អចលន​ទ្រព្យ​របស់​ខ្លួន ​នៅ​ក្នុង​ទីផ្សារ​កម្ពុជា៕