ដោយសុខុម

អន្តរជាតិ: ញ៉ាំអាហារពេលព្រឹកនៅទីក្រុងប៉ារីស ប្រទេសបារាំង រួចទៅញ៉ាំអាហារថ្ងៃត្រង់នៅទីក្រុងហ្វ្រែងហ្វឺត (Frankfurt) ប្រទេសអាល្លឺម៉ង់ ហើយបន្តដំណើរទៅញ៉ាំអាហារពេលល្ងាចនៅទីក្រុងវីយែន (Vienna) ប្រទេសអូទ្រីស លែងជាបញ្ហាទៀតហើយ និងដោយមិនចាំបាច់ជិះយន្តហោះគួរឱ្យធុញទ្រាន់។

សាកស្រមៃទៅមើលថា តើវាអស្ចារ្យខ្លាំងប៉ុនណា ប្រសិនបើមានបណ្តាញរថភ្លើងទំនើប ល្បឿនលឿន និងប្រកបដោយផាសុកភាព ដែលអ្នកអាចធ្វើដំណើរទៅមករវាងទីក្រុងធំៗទាំងអស់ក្នុងសហភាពអឺរ៉ុប យ៉ាងឆាប់រហ័ស ប្រកបដោយទំនុកចិត្ត ផាសុកភាព និងប្រកបដោយនិរន្តរភាព ជំនួសឱ្យការធ្វើដំណើរការផ្លូវអាកាស។

នោះគឺជាចក្ខុវិស័យដែលអ្នកឈានមុខគេក្នុងឧស្សាហកម្មផ្លូវដែកនៅទីក្រុងលីយ៉ុង (Lyon) ប្រទេសបារាំង បានគូសបញ្ជាក់កាលពីថ្ងៃទី២៩ ខែមិថុនា ស្របពេលអឺរ៉ុប មានផែនការបង្កើនការប្រើប្រាស់ផ្លូវដែកល្បឿនលឿនទ្វេដងនៅត្រឹមឆ្នាំ២០៣០ ដោយកើនឡើងពីកម្រិតបច្ចុប្បន្នគុណនឹង៣ដងនៅត្រឹមឆ្នាំ២០៥០។

មានតែការពង្រីកបណ្តាញល្បឿនលឿនប៉ុណ្ណោះ ដែលអាចសម្រេចបាននូវគោលដៅមហិច្ឆតាដ៏ធំធេងទាំងនេះ ប៉ុន្តែតើគំនិតនេះវាជាក់ស្តែងទេ និងមានលទ្ធភាពអាចទៅរួចដែរឬទេ?

ចម្លើយគឺពិតជាអាចទៅរួច ព្រោះអឺរ៉ុប ខុសពីផ្នែកជាច្រើនផ្សេងទៀតនៃពិភពលោក ដោយមានផ្លូវរថភ្លើងល្បឿនលឿនប្រវែងរាប់ម៉ឺនគីឡូម៉ែត្ររួចទៅហើយ។

ក្រុមហ៊ុនផ្លូវដែក TGVs ដ៏ល្បីល្បាញលើពិភពលោករបស់ប្រទេសបារាំង ក្រុមហ៊ុនផ្លូវដែក ICE របស់អាល្លឺម៉ង់ និងក្រុមហ៊ុនផ្លូវដែក AVE របស់អេស្ប៉ាញ បាននាំមកនូវការផ្លាស់ប្តូរសម្រាប់ការធ្វើដំណើរតាមផ្លូវដែកក្នុងរយៈពេល៤០ឆ្នាំចុងក្រោយនេះ ប៉ុន្តែភាគច្រើនក្រុមហ៊ុនទាំងនោះនៅតែផ្តោតលើទីផ្សារក្នុងស្រុក។

វាគ្មានអ្វីគួរឱ្យភ្ញាក់ផ្អើលនោះទេ នៅពេលប្រទេសនានាកំពុងវិនិយោគរាប់ពាន់លានដុល្លារលើហេដ្ឋារចនាសម្ព័ន្ធថ្មី សម្ពាធនយោបាយដើម្បីទាញយកអត្ថប្រយោជន៍អតិបរមាសម្រាប់អ្នកបង់ពន្ធជារឿងជៀសមិនផុត។

ការកសាងផ្លូវរថភ្លើងឆ្លងកាត់ព្រំដែនអន្តរជាតិ សូម្បីតែនៅក្នុងសហភាពអឺរ៉ុប នឹងនាំឱ្យមានភាពតានតឹង និងការសួរដេញដោលគ្នាថា តើនរណាជាអ្នករ៉ាប់រងចេញថ្លៃចំណាយ តើបែងចែកកិច្ចសន្យាតាមវិធីណា ការប្រឆាំងស្តង់ដារ និងបទប្បញ្ញត្តិជាតិ និងឧបសគ្គជាច្រើនផ្សេងទៀត។

អស់រយៈពេលជាច្រើនទស្សវត្សរ៍មកហើយដែលអឺរ៉ុប ខ្ជិលចាប់ផ្ដើមគម្រោងដែលពិបាកៗ លុះត្រាតែមានបញ្ហាទើបខំប្រឹងស្ទុះស្ទា៕ CNN៕

ដោយសុខុម

បាងកក: រដ្ឋាភិបាលថៃ និយាយថា ខ្លួននឹងបញ្ចប់ការស្ថាបនាប្រព័ន្ធរថភ្លើងល្បឿនលឿនដែលតភ្ជាប់ប្រទេសថៃ ទៅកាន់ប្រទេសចិន កាត់តាមប្រទេសឡាវ នៅត្រឹមឆ្នាំ២០២៨ ដែលនឹងផ្ដល់អត្ថប្រយោជន៍យ៉ាងធំធេងដល់ពាណិជ្ជកម្មទ្វេភាគី និងការអភិវឌ្ឍសេដ្ឋកិច្ច។

ក្រុមមន្ត្រីថៃ បានសន្យាថាបញ្ចប់ការស្ថាបនាដំណាក់កាលដំបូងនៃគម្រោងផ្លូវដែកខ្នាតយក្សក្រោមទុនវិនិយោគរហូតដល់ទៅ១២ពាន់លានដុល្លារអាមេរិក ដែលមាន២ដំណាក់កាលនេះនៅត្រឹមឆ្នាំ២០២៦។

ក្រុមមន្ត្រីបានលើកឡើងក្នុងសន្និសីទសារព័ត៌មានមួយកាលពីថ្ងៃពុធ ទី៦ ខែកក្កដា ថា ផ្លូវដែកល្បឿនលឿនរបស់ប្រទេសថៃ នេះនឹងមានប្រវែង៦០៩គីឡូម៉ែត្រចេញពីក្រុងបាងកក ទៅកាន់ខេត្តព្រំដែនភាគឦសានក្នុងខេត្តណង ខៃ (Nong Khai) ជាចំណុចដែលស្ពានមួយនឹងត្រូវសាងសង់កាត់ទន្លេមេគង្គ ដើម្បីតភ្ជាប់ជាមួយផ្លូវដែកចិន-ឡាវ។

ការប្តេជ្ញាចិត្តជាថ្មីរបស់រដ្ឋាភិបាលថៃ ចំពោះគម្រោងនេះដែលបានបង្កើតឡើងជាលើកដំបូងក្នុងឆ្នាំ២០១៤ ក្រោមគំនិតផ្តួចផ្តើម “ខ្សែក្រវាត់ និងផ្លូវ” ដ៏មានមហិច្ឆតារបស់ប្រទេសចិន ធ្វើឡើងបន្ទាប់ពីកិច្ចប្រជុំរវាងនាយករដ្ឋមន្ត្រី ប្រាយុទ្ធ ចាន់អូចា និងរដ្ឋមន្ត្រីការបរទេសចិន លោក Wang Yi កាលពីថ្ងៃអង្គារ ទី៥ ខែកក្កដា។

ប្រទេសឡាវ បានសម្ពោធដាក់ឱ្យដំណើរការផ្លូវដែកមួយខ្សែតម្លៃរហូតដល់ទៅជិត៦ពាន់លានដុល្លារអាមេរិក តភ្ជាប់ប្រទេសចិន កាលពីខែធ្នូ ចុងឆ្នាំ២០២១៕ Bangkok Post៕

ដោយ សុផារី

ភ្នំពេញ: រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) រាជធានីភ្នំពេញ បានប្រកាសបើកដំណើរការសេវាដឹកជញ្ជូនថ្មីមួយ គឺតាក់ស៊ីទូក ដែលមានលក្ខណៈពិសេសដូចគ្នានឹងឡានក្រុងដែរ តែចរាចរណ៍ផ្លូវទឹក ដើម្បីសម្រួលចរាចរណ៍ក្នុងក្រុងភ្នំពេញ។

តាមរយៈសេចក្ដីជូនដំណឹងរបស់រដ្ឋាករស្វយ័តដឹកជញ្ជូនសាធារណៈរថយន្តក្រុង នៅថ្ងៃទី០៦ ខែកក្កដាឆ្នាំ២០២២នេះ បានឱ្យដឹងថា សេវាដឹកជញ្ជូនតាមផ្លូវទឹកតាមរយៈ Taxi Boat ពីស្ថានីយចំណតសួនឬស្សីកែវ ដល់ស្ថានីយចំណតក្រុងតាខ្មៅ ដោយមានស្ថានីយចំណតទាំង ០៥ រួមមាន

១. ស្ថានីយចំណតផែឫស្សីកែវ
២. ស្ថានីយចំណតផែផ្សារចាស់
៣. ស្ថានីយចំណតផែចតុមុខ
៤. ស្ថានីយចំណតផែច្បារអំពៅ
៥. ស្ថានីយចំណតផែតាខ្មៅ។

សេចក្តីជូនដំណឹងដដែលបញ្ជាក់ថា តំលៃសំបុត្រត្រឹមតែ ២០០០៛ ប៉ុណ្ណោះ ក្នុងមួយលើក លើកលែងមិនបង់ប្រាក់ចំពោះព្រះសង្ឈ ជនពិការ សិស្សនិស្សិត មនុស្សចាស់ (អាយុ៧០ឆ្នាំឡើង) កុមារ (កម្ពស់ក្រោម១ម៉ែត្រ) កម្មករ កម្មការិនីរោងចក្រ គ្រូបង្រៀន កីឡាករ កីឡាការិនី។

ការដាក់ឱ្យដំណើរការប្រព័ន្ធដឹកជញ្ជូនសាធារណៈតាមផ្លូវទឹកថ្មីមួយនេះ ជួយឲ្យចំណាយតិច មិនស្ទះចរាចរណ៍ កាត់បន្ថយគ្រោះថ្នាក់ក្នុងការធ្វើដំណើរ ដោយប្រើរយៈពេលត្រឹមតែ1ម៉ោងក្នុងចំងាយ20Km។

ជាពិសេស សេវាកម្មសាធារណៈនេះ មានបុគ្គលិកបម្រើសេវាកម្ម ប្រកបដោយសីលធម៌ខ្ពស់ មានផាសុកភាព មានបន្ទប់ទឹក កៅអីអង្គុយ និងថែរក្សាអនាម័យ ៣កុំ ៣ការពារគ្រប់វិនាទីចំពោះអតិថិជន៕

ដោយសុខុម

អាមេរិក: យោងតាមទិន្នន័យ និងប្រភពឱ្យដឹងថា ប្រេងជាង៥លានបារ៉ែលដែលជាផ្នែកមួយ នៃការបញ្ចេញប្រេងបម្រុងគ្រាអាសន្នជាប្រវត្តិសាស្ត្ររបស់អាមេរិក ដើម្បីបញ្ចុះតម្លៃប្រេងឥន្ធនៈក្នុងស្រុក ត្រូវបាននាំចេញទៅអឺរ៉ុប និងមកអាស៊ី កាលពីខែមុន សូម្បីពេលតម្លៃប្រេងសាំង និងម៉ាស៊ុតក្នុងស្រុកហក់ឡើងខ្ពស់មិនធ្លាប់មាន។

ការនាំចេញប្រេងឆៅ និងឥន្ធនៈនេះកំពុងធ្វើឱ្យប៉ះពាល់ដល់ចំណាត់ការរបស់ប្រធានាធិបតីអាមេរិក លោក ចូ បៃឌិន ដើម្បីបញ្ចុះតម្លៃប្រេងដែលហក់ឡើងខ្ពស់មិនធ្លាប់មាន។ នេះបើយោងតាមទីភ្នាក់ងារព័ត៌មាន Reuters ចុះផ្សាយនៅថ្ងៃពុធ ទី៦ ខែកក្កដា នេះ។

លោក ចូ បៃឌិន កាលពីថ្ងៃសៅរ៍ សប្ដាហ៍មុនបានបន្តការអំពាវនាវឱ្យបណ្ដាអ្នកផ្គត់ផ្គង់ប្រេងសាំងបញ្ចុះតម្លៃ ដែលនាំឱ្យមានការរិះគន់ពីលោក Jeff Bezos ស្ថាបនិកក្រុមហ៊ុន Amazon។

ប្រេងប្រមាណ១លានបារ៉ែលក្នុងមួយថ្ងៃកំពុងត្រូវបានបញ្ចេញពីប្រេងបម្រុងជាយុទ្ធសាស្ត្រ (SPR) រហូតដល់ខែតុលា ឆ្នាំ២០២២ នេះ។ ការបញ្ចេញយ៉ាងច្រើនសន្ធឹកសន្ធាប់នវកំពុងធ្វើឱ្យប្រេងបម្រុងជាយុទ្ធសាស្ត្រ (SPR) រីងស្ងួត ដែលកាលពីខែមុនបានធ្លាក់ចុះដល់កម្រិតទាបបំផុតមិនធ្លាប់មានចាប់តាំងពីឆ្នាំ១៩៨៦ មក។

ការជួញដូរប្រេងឆៅរបស់សហរដ្ឋអាមេរិក គឺលើសពី១០០ដុល្លារក្នុងមួយបារ៉ែល ហើយប្រេងសាំង និងប្រេងម៉ាស៊ូតមានតម្លៃលើសពី៥ដុល្លារក្នុងមួយហ្គាឡុង (៣,៧៨លីត្រ)។ ក្រុមមន្ត្រីអាមេរិក និយាយថា តម្លៃប្រេងអាចខ្ពស់ជាងនេះ ប្រសិនបើប្រេងបម្រុងជាយុទ្ធសាស្ត្រ (SPR) មិនត្រូវបានបញ្ចេញទេនោះ។

អ្នកនាំពាក្យក្រសួងថាមពលអាមេរិក លើកឡើងថា “SPR នៅតែជាឧបករណ៍សន្តិសុខថាមពលដ៏មានសារៈសំខាន់ដើម្បីដោះស្រាយការអាក់ខាននូវការផ្គត់ផ្គង់ប្រេងពិភពលោក”។ អ្នកនាំពាក្យដដែលបានបន្ថែមទៀតថា ការបញ្ចេញប្រេងបម្រុងគ្រាអាសន្នបានជួយធានាស្ថិរភាពនៃការផ្គត់ផ្គង់ប្រេងឆៅ៕ Reuters៕

ដោយ៖ លាងហួរ

ចិន៖ ក្រុមហ៊ុនអចលនទ្រព្យ Powerlong របស់ចិនសុំពន្យារពេលទូទាត់សងមូលបត្របំណុល ក្នុងទឹកប្រាក់៨៩លានដុល្លារអាមេរិក ដល់ថ្ងៃទី១៥ខែកក្កដា និងពន្យារសងប្រាក់ដើមក្នុងរយៈពេលមួយឆ្នាំ។

យោងតាមសារពត៌មាន Reuters បានឱ្យដឹងថា នៅក្នុងសំណើទៅកាន់ម្ចាស់មូលបត្ររបស់ខ្លួន ក្រុមហ៊ុន Powerlong ចុះបញ្ជីនៅហុងកុង មានបំណងបង់៥ភាគរយ នៃប្រាក់ដើម នៅថ្ងៃផុតកំណត់នៃសញ្ញាប័ណ្ណ និងបង់១៥ភាគរយនៃប្រាក់ដើម បន្ទាប់ពីប្រាំមួយខែ និងបង់៨០ភាគរយ ដែលនៅសល់បន្ទាប់ពី១២ខែ។

យោងតាមប្រភពមួយ ដែលបានរាយការណ៍តែសុំមិនបង្ហាញអត្តសញ្ញាណ បានឱ្យដឹងថា ក្រុមហ៊ុន Powerlong ក៏គ្រោងនឹងបន្តការទូទាត់សងមូលបត្របំណុលចំនួនពីរដែលមានតម្លៃ១ពាន់លានយ័ន ដែលនឹងដល់កំណត់ក្នុងខែសីហា។

ក្រុមហ៊ុន Powerlong មិនបានឆ្លើយតបនឹងសំណើសុំការអត្ថាធិប្បាយរបស់សារពត៌មាន Reuters ទេ។

ចំណែកលំហូរសាច់ប្រាក់របស់ក្រុមហ៊ុនអចលនទ្រព្យចិន​ ដែលជំពាក់បំណុល មានការគាំងស្ទះ ដោយសារ ការទប់ស្កាត់បទប្បញ្ញត្តិលើការខ្ចីប្រាក់ថ្មី និងការលក់អចលនវត្ថុរបស់ខ្លួនមិនដាច់។

ការខកខានទូទាត់សងមូលបត្របំណុលនៅក្រៅប្រទេស ដោយក្រុមហ៊ុន China Evergrande Group និងក្រុមហ៊ុនផ្សេងទៀតនៅឆ្នាំ២០២២នេះ បានធ្វើឱ្យមានការព្រួយបារម្ភកាន់តែខ្លាំងឡើងអំពីវិស័យអចលនទ្រព្យ ដែលជាប់គាំង៕

ដោយ៖ សហការី

ភ្នំពេញ ៖ នៅព្រឹកថ្ងៃទី6 ខែកក្កដា ឆ្នាំ២០២២ ក្រុមហ៊ុន អឺបេន លីវីង សឺលូសិន (Urban Living Solutions ហៅកាត់ថា ULS) ដែលជាក្រុមហ៊ុនអភិវឌ្ឍន៍អចលនទ្រព្យនិងបរិយាបទក្នុងការរស់នៅមួយ និងនៅពីក្រោយគម្រោងច្នៃប្រឌិតដ៏អស្ចារ្យជាច្រើននៅកម្ពុជា បានប្រារព្ធពីធីបើកសម្ពោធជាផ្លូវការនៃការិយាល័យលក់ និងផ្ទះគំរូរបស់គម្រោង Odom ដែលជាគម្រោងដ៏ល្អប្រណិតមួយឈានមុខគេ។

Odom ស្ថិតនៅលើមហាវិថីនរោត្តម ចំកណ្ដាលទីក្រុងភ្នំពេញ ដែលជាអគារខ្ពស់មួយមានមុខងារចម្រុះ ហើយលេចចេញជាអគារពីរជាប់គ្នា ភ្ជាប់ដោយទីធ្លាជួបជុំប្រាំជាន់ និងការរួមបញ្ចូលជាមួយលំនៅឋាន អគារពាណិជ្ជកម្ម និងការិយាល័យ​សហកម្មសិទ្ធ ដែលត្រូវបានរចនាដោយក្រុមហ៊ុនស្ថាបត្យកម្ម Kite Studio នៅប្រទេសសិង្ហបុរី។ បន្ទាប់ពី ULS បានសម្រេចគម្រោង ហើយបានទទួលពានរង្វាន់ដូចជា Factory Phnom Penh ភូមិបាគង និង Rose Apple Square ដែល ULS បានកំណត់ឡើងវិញនៅស្តង់ដារជីវិតការងារសម្រាប់ប្រជាជនសម័យទំនើប។

ស្ថិតនៅលើទំហំផ្ទៃដីសរុប៥,៨២៥ម៉ែត្រការ៉េ នៃតំបន់អចលនទ្រព្យនៅលើមហាវិថីនរោត្តម ជាអគារបញ្ឈរ៤៥ជាន់ Odom Tower មានទំហំសរុបដល់ទៅ៤៣,០០០ម៉ែត្រការ៉េ នៃការិយាល័យសហកម្មសិទ្ធិដ៏ប្រណិត (Strata-title offices) និងមានប្រជុំទៅដោយការិយាល័យអាជីវកម្ម សម្រាប់ខ្នាតតូចក្នុងស្រុក និងអាជីវកម្មបរទេសថែមទៀតផង។

លើសពីនេះទៀត Odom ក៏មានជណ្តើរយន្តស្តង់ដារចុងក្រោយ និងចុះឈ្មោះជាបេក្ខភាពអាគារបៃតង LEED® ការរចនាដោយផ្តោតលើការសន្សំសំចៃថាមពល ព្រមទាំងមានភូមិអាកាស និងជាន់ដំបូលសម្រាប់តែសមាជិក Odom Club តែប៉ុណ្ណោះ។ Odom Tower នឹងផ្តល់នូវកិត្យានុភាព កេរ្ដិ៍តំណែល ភាពមើលឃើញ និងភ្ជាប់ទំនាក់ទំនងគ្រប់ច្រក។

ជាប់គ្នាជាមួយ Odom Tower និងមានកន្លែងទំហំសរុបដល់ទៅ១៩.០០០ម៉ែត្រការ៉េ ដែលមានរហូតដល់ទៅ២២ជាន់នោះ គឺ Odom Living ដែលមានការរចនាសម្រាប់គ្រួសារសហសម័យ និងអ្នកជំនាញនៅកម្ពុជា។ Odom Living មានលំនៅឋានប្រភេទ ១បន្ទប់គេង រហូតដល់ ៤បន្ទប់គេង ចាប់ពីទំហំ៧២ម៉ែត្រការ៉េ រហូតដល់២៦២ម៉ែត្រការ៉េ។ គ្រប់ខុនដូរទាំងអស់សុទ្ធតែទទួលបាននូវទេសភាពពន្លឺនៃទីក្រុង ដែលក្នុងនោះមាន រានហាល២បង្អួចកញ្ចក់ពីការ៉ូរហូតដល់ពិដាន ពន្លឺធម្មជាតិចេញចូល បន្ទប់ទឹករចនា និងបំពាក់ដោយក្រុមហ៊ុន Kohler និងសម្ភារះផ្ទះបាយដ៏ទំនើបបំពាក់ដោយ Maison De Dietrich ។ លើសពីនេះទៀត សម្ភារៈទំនើបជាច្រើន ដូចជា សោរទ្វារទំនើបពី Samsung សន្តិសុខ ២៤h សួនធម្មជាតិនៅរានហាលដំបូល ក្លិបហាត់ប្រាណ អាងហែលទឹក និងស្ពានអាកាស៦០ម៉ែត្រឆ្លងកាត់ពីអាគារលំនៅឋាន Odom Living ទៅកាន់អាគារពាណិជ្ជកម្ម Odom Tower។

ការភ្ជាប់គ្នាពីជាន់ផ្ទាល់ដីទៅជាន់ទី៥ នៃអាគារទាំងពីរនោះគឺ Odom Square ដែលជាអាគារពាណិជ្ជកម្មដែលហ៊ុមព័ទ្ធ ដោយសួនបៃតង និងអាជីវកម្មផ្សេងៗ។ ក្នុងនោះរួមបញ្ចូល ទាំងហាងទំនិញ ម្ហូបអាហារភេសៈ និងអមជាមួយទីធ្លាបៃតងថែមទៀតផង។ បរិវេណចាប់ពីទំហំ 1,000 ម៉ែត្រការ៉េរបស់ហាងលក់ទំនិញ និងបរិវេណរួមបានឲ្យអាគារទាំង២ មានភាពងាយស្រួលក្នុងការចូលទៅកាន់ហាងទាំងនោះ ដែលនេះជាការគិតគូរយ៉ាងល្អិតល្អន់របស់ការរចនា ដោយមានច្រកចេញចូលធំទូលាយ ហើយបង្កើតបានជាលក្ខណៈថ្មី បរិយាបទថ្មី ក្នុងការចំណាយពេលវេលា សម្រាប់ការទិញទំនិញ និងកំសាន្ត។

Odom បានបង្កើតដោយមានការសន្និដ្ឋានយ៉ាងច្បាស់ អំពីតម្រូវការការិយាល័យ ដែលមានការរចនា បែបបទ និងបរិក្ខារសម្រាប់បុគ្គលិក។ យើងចង់ផ្តល់ឲ្យសហគ្រិនជំនាន់ថ្មីមានឱកាសជាម្ចាស់កម្មសិទ្ធិ និងបង្កើតការិយាល័យមួយ ដែលជាតម្រូវការរបស់គេ។ យើងក៏ចង់សាងសង់លំនៅឋាន ដែលនៅចំកណ្ដាលទីក្រុង សម្រាប់ម្ចាស់អាជីវកម្ម ដែលចង់ជៀសវាងពីការធ្វើដំណើរឆ្ងាយពីកន្លែងធ្វើការរបស់គេផងដែរ។

អំពី ULS

Urban Living Solutions ដែលហៅកាត់ថា ULS គឺជាក្រុមហ៊ុនអភិវឌ្ឍន៏អចលនទ្រព្យ និងបរិយាបទក្នុងការរស់នៅដែលបង្កើតផ្តោតទៅលើសហគមន៍ដើម្បី ផ្សារភ្ជាប់ជាមួយភាពជឿនលឿនរបស់កម្ពុជា។ ULS ត្រូវបានបង្កើតឡើងដោយលោក គាន គឹមលាង នៅឆ្នាំ2016 ដែលគម្រោងមានដូចជា Urban Loft Factory Phnom Penh Urban Village (ដំណាក់កាលទ 1) សួន Odom Rose Apple Square និងភូមិបាគង។ ស្ថិតនៅក្នុងក្រុងភ្នំពេញផ្ទាល់ ULS បង្កើតការរស់នៅបែបថ្មី ដែលតភ្ជាប់ជាមួយទំនាក់ទំនង ការបំផុសគំនិត និងថែរក្សាសហគមន៍ ដើម្បីជាប្រយោជន៏រួមក្នុងការរស់នៅ និងធ្វើការនៅកម្ពុជា។

ទស្សនាការិយាល័យសហកម្មសិទ្ធិ និងខុនដូរប្រណិត 1-3 បន្ទប់គេង សូមធ្វើការណាត់ជួបដោយទាក់ទងមកលេខទូរស័ព្ទ +855 99 231 168 ។