ដោយៈ ម៉ាល័យ

    កណ្តាលៈ ក្រសួងសាធារណៈការ និងដឹកជញ្ជូនបានឲ្យដឹងថា ផ្លូវជាតិលេខ២១ ជាសរសៃឈាមសេដ្ឋកិច្ចដ៏សំខាន់ តភ្ជាប់រវាងកម្ពុជា-វៀតណាម ពិសេសលើការដឹកជញ្ជូនទំនិញផ្សេងៗឆ្លងកាត់ព្រំដែនទៅវិញទៅមករវាងប្រទេសទាំង២។

ក្រសូងបញ្ជាក់ថា ផ្លូវជាតិលេខ២១ គឺជាខ្សែផ្លូវយុទ្ធសាស្រ្តតភ្ជាប់រាជធានីភ្នំពេញ ជាមួយបណ្តាញផ្លូវគមនាគមន៍មួយចំនួនដូចជា ផ្លូវជាតិលេខ២ (ត្រង់រង្វង់មូលក្រុងតាខ្មៅ) ផ្លូវក្រវាត់ក្រុងទី២ ផ្លូវក្រវាត់ក្រុងទី៣ ផ្លូវជាតិលេខ២១A និងផ្លូវជាតិលេខ២១B ដោយឆ្លងកាត់ក្រុងតាខ្មៅ ស្រុកស្អាង និងស្រុកកោះធំ ឆ្ពោះទៅច្រកព្រំដែនកម្ពុជា-វៀតណាម (ជ្រៃធំ-ឡុងប៊ិញ)។

ផ្លូវជាតិលេខ២១ ក្រាលបេតុងផ្លូវកៅស៊ូប្រភេទAC មានប្រវែង ៦៣,៦គីឡូម៉ែត្រ ពីរង្វង់មូលក្រុងតាខ្មៅ ឆ្ពោះទៅស្ពានជ្រៃធំ (ព្រំប្រទល់កម្ពុជា-វៀតណាម) ត្រូវបានសម្ពោធបើកឱ្យប្រើប្រាស់ជាផ្លូវការ នាថ្ងៃទី២៣មីនា ឆ្នាំ២០២២។

ខ្សែផ្លូវនេះបាន និងកំពុងដើរតួនាទីយ៉ាងសំខាន់ ក្នុងការជួយ សម្រួលការដឹកជញ្ជូនគ្រប់ប្រភេទ ជាពិសេសទំនិញ និងកសិផលសម្រា​ប់ការដោះដូរពាណិជ្ជកម្ម រវាងកម្ពុជា-វៀតណាមព្រមទាំងបានជំរុញ និងប្រែក្លាយតំបន់នៅតាមព្រំដែន ឱ្យក្លាយជាតំបន់អភិវឌ្ឍន៍ និងរីកចម្រើន៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនៅព្រឹកថ្ងៃពុធនេះ ក្រោយពេលតម្លៃមាសប្រភេទ Spot Gold បានងើបឡើងថ្លៃដល់ទំហំទឹកប្រាក់ចំនួន៣៤៣១,១២ដុល្លារអាមេរិកក្នុងមួយអោនគិតត្រឹមពេលបិទការជួញដូរកាលពីថ្ងៃអង្គារម្សិលមិញ។

តួយ៉ាង តម្លៃមាស Spot Gold បានធ្លាក់ចុះ០,១១ភាគរយដល់៣៤២៧,១៧ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,១៤ភាគរយដល់៣៤៣៨,៨ដុល្លារក្នុងមួយអោនគិតត្រឹមម៉ោង១០:២៦នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៤,៨ភាគរយ ដែលធនាគារកណ្តាលអាមេរិក (Fed) នឹងរក្សាទុកអត្រាការប្រាក់ឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី៣០ ខែកក្កដាខាងមុខ។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៧,៤៤ពិន្ទុនៅព្រឹកថ្ងៃពុធនេះ បន្ទាប់ពីបានបិទការជួញដូរត្រឹម៩៧,៣៩ពិន្ទុកាលពីថ្ងៃអង្គារម្សិលមិញ៕

ដោយៈ គង់ សូរិយា

    កោះកុងៈ គម្រោងអភិវឌ្ឍន៍មជ្ឈមណ្ឌលពាណិជ្ជកម្មលំដាប់អន្តរជាតិមួយឈ្មោះ Qixinghai Cambodia-China Comprehensive គ្រោងនឹងលេចឡើងនៅក្នុងខេត្តកោះកុង។

គំរោងនេះ នឹងអភិវឌ្ឍន៍ដោយក្រុមហ៊ុន Cambodia Youhaina Investment Co., Ltd. វិនិយោគក្នុងទឹកប្រាក់ប្រមាណ២.៥ពាន់លានដុល្លារអាម៉េរិក។

គម្រោង Qixinghai Cambodia-China Comprehensive សាងសង់គ្របដណ្តប់លើផ្ទៃដី៣៦០គីឡូម៉ែត្រការ៉េ គឺជាគម្រោងសាងសង់ទីក្រុងដ៏ធំមួយ នៅក្នុងខេត្តកោះកុង ដែលជាគំនិតផ្តួចផ្តើម “ខ្សែក្រវ៉ាត់ និងផ្លូវមួយ” ជាគម្រោងចម្រុះ រួមបញ្ចូលដូចជាសណ្ឋាគារថ្នាក់ផ្កាយ៥ អគារមជ្ឈមណ្ឌលពាណិជ្ជកម្ម មជ្ឈមណ្ឌលហ្គេម កាស៊ីណូ កន្លែងកម្សាន្ត វីឡាលំហែកាយ កន្លែងជិះទូកកម្សាន្ត សួនកុមារ ផ្សារទំនើប ភោជនីយដ្ឋានជាដើម។

ទោះជាយ៉ាងណា រហូតមកទល់ពេលនេះ គម្រោងនេះមិនទាន់លេចចេញរូបរាងនៅឡើយទេ។

សហស្ថាបនិក និងជាអគ្គនាយកគេហទំព័រPropertyarea.asia ដែលបានតាមដាន ដំណើរវិវត្តន៍នៃវិស័យអចលនទ្រព្យ និងសេដ្ឋកិច្ចកម្ពុជាបានលើកឡើងកាលពីល្ងាចថ្ងៃទី២២ កក្កដាថា ប្រសិនជាផែនកា​រនេះបានអភិវឌ្ឍន៍តាមការគ្រោងទុក ខេត្តកោះកុងនឹងផ្លាស់ប្តូរមុខមាត់កាន់តែត្រដែតថែមទៀត ដែលរួមចំណែកលើកកំពស់សេដ្ឋកិច្ច និងសង្គមកម្ពុជាឆ្ពោះទៅមុខកាន់តែលឿនថែមទៀត។

លោកបន្តថា “ទោះជាយ៉ាងណា វិបត្តិអចលនទ្រព្យនៅប្រទេសចិន និងភាពមិនច្បាស់លាស់នៃសេដ្ឋកិច្ចសកល អាចធ្វើឲ្យគំរោងនេះពន្យាពេលសាងសង់”។ លោកបន្ថែមថា “ជាក់ស្តែងគំរោងអភិវឌ្ឍន៍ធំៗជាច្រើននៅកម្ពុជា បានពន្យាពេលដោយសារបញ្ហាសេដ្ឋកិច្ច អំ​ណា​ចនៃការទិញក្នុងទីផ្សារ និងតម្រូវការនៅមានកម្រិត ក៏ធ្វើឲ្យអ្នកអភិវឌ្ឍន៍ពន្យាពេលផងដែរ”៕

ដោយៈ គង់​ សូរិយា

    ភ្នំពេញៈ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានអនុញ្ញាតឱ្យ លោក Fahd Al Dosari ប្រធានផ្នែកទំនាក់ទំនង និងជាទីប្រឹក្សាពិសេសនៃ Sheikh Mansour bin Jabor Al Thani និងគណៈប្រតិភូនៃក្រុមហ៊ុន AI Mansour Asia របស់ប្រទេសកាតា ចូលជួបសម្តែងការគួរសម នៅវិមានព្រឹទ្ធសភា រាជធានីភ្នំពេញ។

ក្នុងជំនួបនោះ សម្ដេចតេជោ ហ៊ុន សែន បានស្វាគមន៍យ៉ាងកក់ក្តៅចំពោះវត្តមានគណៈប្រតិភូនៃក្រុមហ៊ុន AI Mansour Asia ក្នុងដំណើរទស្សនកិច្ច ស្វែងរកឱកាសវិនិយោគ នៅកម្ពុជានាពេលនេះ។ សម្តចតេជោ បានគូសរំលេចអំពីលទ្ធផលជាផ្លែផ្កា នៃដំណើរទស្សនកិច្ចសម្តេចនៅមជ្ឈឹមបូព៌ា ជាពិសេសជំនួបពិភាក្សាការងារសម្តេចជាមួយប្រធានសភា នាយករដ្ឋមន្រ្តី និងថ្នាក់ដឹកនាំ កាតាផ្សេងៗទៀត ដើម្បីជំរុញកិច្ចសហប្រតិបត្តិការសេដ្ឋកិច្ច លើវិស័យសក្តានុពលរវាងប្រទេសទាំង២ កាលពីឆ្នាំកន្លងទៅ។

នាឱកាសនោះលោក Fahd AI Dosari បានសម្តែងនូវអំណរអរគុណយ៉ាងជ្រាលជ្រៅចំពោះសម្តេចតេជោ ដែលបានផ្តល់កិត្តិយស និងអនុញ្ញាតឱ្យគណៈប្រតិភូនៃក្រុមហ៊ុន ចូលជួបសម្តែងការគួរសមនាពេលនេះ។

លោកបន្តថា តាងនាមឱ្យគ្រួសាររាជវង្សនៃកាតា និងក្រុមហ៊ុន AI Mansour Asia, លោក Fahd AI Dosari បានសម្តែងនូវក្តីសោមនស្សរីករាយ ក្នុងការបន្តពង្រឹងទំនាក់ទំនងរបស់ប្រទេសទាំងពីរបន្ថែមទៀត ជាពិសេសលើការវិនិយោគក្នុងវិស័យសាធារណៈ និងឯកជន។

លោកបានបញ្ជាក់ថា ក្រុមហ៊ុន AI Mansour Asia បានដាក់ទិសដៅវិនិយោគនៅអាស៊ីអាគ្នេយ៍ ដោយចាប់ផ្តើមការវិនិយោគនៅកម្ពុជា និងមានលោក Jay Han ជានាយកប្រតិបត្តិប្រចាំនៅកម្ពុជា។

ជាកិច្ចឆ្លើយតបសម្តេចតេជោ ហ៊ុន សែន បានស្វាគមន៍ចំពោះការលើកឡើងរបស់លោក Fahd AI Dosari។ សម្តេចតេជោ បានផ្តល់អនុសាសន៍ដល់ ក្រុមហ៊ុនឱ្យពិនិត្យលទ្ធភាពវិនិយោគ លើការកែច្នែស្បៀង និងវត្ថុធាតុដើមកសិកម្មនៅកម្ពុជា។

សម្តេចតេជោ បានបន្តចង្អុលបង្ហាញ អំពីកាលានុវត្តភាពសម្រាប់ការកែច្នៃស្រូវ ក្នុងខណៈដែលកម្ពុជា ជាប្រទេសមានអទិរេកស្រូវ ស្របពេលដែលកាតា គឺជាប្រទេសត្រូវការស្បៀង។ តាមរយៈការរៀប​ចំប្រមូលទិញ ស្តុក និងបង្កើតម៉ាស៊ិនកិនស្រូវនេះ កម្ពុជា-កាតា អាចពង្រីកការផ្គត់ផ្គង់ស្បៀង ទៅកាន់ប្រទេសនានានៅមជ្ឈឹមបូព៌ា ដែលត្រូវការស្បៀងផងដែរ។

សម្តេចតេជោ ក៏បានកត់សម្គាល់អំពីសក្តានុពល នៃស្វាយចន្ទីកម្ពុជា ដែលបច្ចុប្បន្ន កម្ពុជាជាប្រទេសផលិត គ្រាប់ស្វាយចន្ទីច្រើនជាងគេលើពិភពលោក និងបាននាំចេញប្រមាណ៦០ម៉ឺនតោន រួចទៅហើយក្នុងមួយឆមាសដើមឆ្នាំ២០២៥នេះ។

ផ្អែកតាមតួលេខនេះសម្តេចតេជោ បានគូសបញ្ជាក់ថា កម្ពុជា នឹងអាចបន្តនាំចេញ គ្រាប់ស្វាយចន្ទីប្រមាណ១លានតោន ក្នុងឆ្នាំនេះ ហើយការវិនិយោគរបស់ក្រុមហ៊ុន ក្នុងការបង្កើតរោងចក្រកែច្នៃគ្រាប់ស្វាយចន្ទី គឺជាពេលវេលាដ៏សមស្រប។

សម្តេចតេជោ បានបន្តថា កម្ពុជា ក៏នៅមានដំឡូងមី និងជ័រកៅស៊ូ ដែលយើងមិនទាន់បានកែច្នៃ ឱ្យអស់សក្តានុពលនៅឡើយ ហើយទីផ្សារនៅកម្ពុជា រួមទាំងតំបន់ ក៏នៅមានលម្ហក្នុងការផ្គត់ផ្គង់ ដែលគួរក្រុមហ៊ុនសិក្សាចាប់យកឱកាសវិនិយោគនេះ។

លោក Fahd AI Dosari បានថ្លែងអរគុណសម្តេចតេជោ ចំពោះអនុសាសន៍ណែនាំ និងបង្ហាញការចាប់អារម្មណ៍លើវិស័យកសិ​កម្ម កម្មន្តសាល ក៏ដូចជា គម្រោងហេដ្ឋារចនាសម្ព័ន្ធគាំទ្រវិស័យទេស​ចរណ៍ ដូចជា សណ្ឋាគារ ការអភិវឌ្ឍកោះ ទីកន្លែងកំសាន្ត និងព្រលានយន្តហោះផងដែរ។

លោកបានសង្កត់ធ្ងន់ថា ក្រុមហ៊ុនរបស់លោក មើលឃើញយ៉ាងច្បាស់អំពីសុខសន្តិភាព សុវត្ថិភាព និងស្ថិរភាពរបស់កម្ពុជា ដូច្នេះហើយទើប ក្រុមហ៊ុនចាប់ផ្តើមការវិនិយោគ នៅអាស៊ីអាគ្នេយ៍ដោយផ្តើមចេញពីការវិនិយោគនៅកម្ពុជា។

សម្តេចតេជោ ហ៊ុន សែន បានថ្លែងអំណរគុណ លោក Fahd AI Dosari ចំពោះការទុកចិត្ត និងមើលឃើញសន្តិភាព និងស្ថិរភាពនៅកម្ពុជា និងគម្រោងវិនិយោគទាំងអស់ រួមទាំង វិស័យទេសចរណ៍ និងហេដ្ឋារចនាសម្ព័ន្ធ និងបានជូនពរលោក ព្រមទាំងគណៈប្រតិភូនៃក្រុមហ៊ុន AI Mansour Asia ទទួលបានជោគជ័យក្នុងដំណើរទស្សនកិច្ចនាពេលនេះផងដែរ៕