លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានឱ្យដឹងនាព្រឹកថ្ងៃទី២៦ ខែកុម្ភៈ ឆ្នាំ២០២២នេះថា មានអតីតនិស្សិតខ្មែរដែលបានទៅសិក្សាក្នុងជំនាន់អតីតសហភាពសូវៀត ក្នុងរង្វង់ទស្សវត្សទី៨០ និងដើមទស្សវត្សទី៩០ ចំនួន ២៣នាក់ ដែលកំពុងរស់នៅលើទឹកដីប្រទេសអ៊ុយក្រែន ជាមួយគ្រួសាររបស់ពួកគេ។

លោក ជុំ សុន្ទរី អ្នកនាំពាក្យ បានបញ្ជាក់បន្ថែមបែបនេះ បន្ទាប់ពីព័ត៌មានបឋមពីថ្ងៃម្សិលមិញ ថាមិនមានពលរដ្ឋ ឬនិស្សិតកំពុងនៅប្រទេសអ៊ុយក្រែននោះទេ។
លោកបានបន្ថែមថា ក្រសួងការបរទេស និង សហប្រតិបត្តិការអន្តរជាតិ និងស្ថានទូតកម្ពុជា ប្រចាំនៅរុស្សី កំពុងខិតខំទំនាក់ទំនងជាមួយពលរដ្ឋខ្មែរទាំងអស់នោះដើម្បីទទួលបានព័ត៌មានអំពីស្ថានភាពរបស់ពួកគាត់។

សូមរម្លឹកថា បន្ទាប់ពីរុស្ស៊ីបានបើកការវាយប្រហារលើអ៊ុយក្រែន កាលពីថ្ងៃទី២៤ ខែកុម្ភៈ កន្លងមកនេះ បណ្តាប្រទេសនានាបានសម្តែងនូវការព្រួយបារម្ភអំពីសុវត្ថិភាពប្រជាពលរដ្ឋរបស់ខ្លួនដែលកំពុងស្ថិតនៅក្នុងប្រទេសអ៊ុយក្រែន ខណៈសម្តេចតេជោនាយករដ្ឋមន្ត្រី ហ៊ុន សែន កាលពីពេលថ្មីៗនេះ បានអំពាវនាវឱ្យមានកិច្ចសន្ទនា និងស្វែងរកដំណោះស្រាយដោយសន្តិវិធីរវាងប្រទេសទាំងពីរ៕

ដោយ៖ សុខុម

សៀងហៃ: ភោជនីយដ្ឋានមួយនៅក្រុងសៀងហៃ ប្រទេសចិន បានបំបែកកំណត់ត្រាពិភពលោកហ្គីណេស (Guinness World Records) ដោយក្លាយជាភោជនីយដ្ឋានដែលខ្ពស់ជាងគេបំផុតក្នុងពិភពលោក ក្រោយមានការទទួលស្គាល់ជាផ្លូវការពីស្ថាប័ននេះនៅខែកុម្ភៈ នេះ។

យោងតាមសារព័ត៌មាន CNN ចុះផ្សាយកាលពីថ្ងៃសុក្រ ទី២៥ កុម្ភៈ ឱ្យដឹងថា ដោយស្ថិតនៅជាន់ទី១២០ នៃអគារកប់ពពក Shanghai Tower ភោជនីយដ្ឋានជាន់ខ្ពស់ Heavenly Jin នៅក្នុងសណ្ឋាគារប្រណីត J Hotel មានកម្ពស់ពីដី៥៥៦,៣៦ម៉ែត្រ។ សណ្ឋាគារ J Hotel កាន់កាប់ជាន់កំពូលនៃអគារ Shanghai Tower កម្ពស់៦៣២ម៉ែត្រដែលជាអគារខ្ពស់បំផុតនៅក្នុងប្រទេសចិន និងខ្ពស់បំផុតទី៣ ក្នុងពិភពលោក។

ក្រៅពីផ្ដល់ផ្ទាំងទស្សនីយភាពទេសភាពដ៏ល្អឆើយឆាយនៃជើងមេឃក្រុងសៀងហៃ ភោជនីយដ្ឋានជាន់ខ្ពស់នេះក៏ផ្ដល់នូវបញ្ជីមុខម្ហូបពិសេសៗ និងប្រណីតៗផងដែរ ជាពិសេសមុខម្ហូបបែបប្រពៃណីអឺរ៉ុប ជប៉ុន និងចិន។

និយាយពីការដេគ័រ ឬ ការតុបតែងលម្អវិញ ភ្ញៀវដែលចូលទៅនឹងបានឃើញផ្ទាំងគំនូរផ្គុំអ៊ីតាលី ដ៏ធំមួយផ្ទាំងដែលមានប្រវែង៣០ម៉ែត្រ ចំណែកឯតុអាហារត្រូវបានរៀបដាក់ពីក្រោមអំពូលភ្លើងគ្រីស្តាល់ចែងចាំងដែលមានសណ្ឋានដូចទឹករលកយ៉ាងប្រណីតអស្ចារ្យ។ ភោជនីយដ្ឋាននេះមានតុអាហារចំនួន២៥៦តុ និងមានបន្ទប់ស្រស់ស្រូបអាហារលក្ខណៈផ្ទាល់ខ្លួនចំនួន៥។

ចំណុចពិសេសមួយទៀតគឺ ផ្ទះបាយក្នុងភោជនីយដ្ឋាននេះបើកចំហ ដោយអនុញ្ញាតឱ្យភ្ញៀវចូលទស្សនាសកម្មភាព និងដំណើរការចម្អិនអាហារដោយផ្ទាល់។

*ក្រុងឌូបៃ បាត់បង់ជើងឯកកំណត់ត្រា

ភោជនីយដ្ឋាន Heavenly Jin បានផ្ដួលសណ្ឋាគារ At.mosphere នៅក្រុងឌូបៃ នៃប្រទេសអារ៉ាប់រួមអេមីរ៉ាត ដែលជាម្ចាស់កំណត់ត្រាចាស់។ ស្ថិតនៅកម្ពស់៤៤១,៣ម៉ែត្រ វាមានទីតាំងស្ថិតនៅជាន់ទី១២២ នៃអគារខ្ពស់បំផុតក្នុងពិភពលោក Burj Khalifa ហើយបានបើកដំណើរការក្នុងឆ្នាំ២០១១៕ CNN៕

ដោយ: ម៉ាលីស

ត្បូងឃ្មុំ: លោកបណ្ឌិតជាម ច័ន្ទសោភ័ណ អភិបាលខេត្ត ត្បូងឃ្មុំ បានថ្លែងការកោតសរសើរដល់ការខិតខំប្រឹងប្រែងរបស់ថ្នាក់ដឹកនាំ មន្ត្រីរាជការមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ ដែលជំរុញឱ្យមានកំនើនគ្រប់មុខផលិតកម្មកសិកម្ម ដែលតម្លៃផលិតកម្មកសិកម្មទាំងមូល ក្នុងខេត្តមានរហូតដល់៤៩០លានដុល្លាអាមេរិក នៅឆ្នាំ២០២១កន្លងមកនេះ។

លោកមានប្រសាសន៍បែបនេះ ក្នុងឱកាសលោកបណ្ឌិតជាម ច័ន្ទ​សោភ័ណ និងលោកស៊ាក ឡេង ប្រធានក្រុមប្រឹក្សាខេត្ត អញ្ជើញជាអធិបតីភាពបើកកិច្ចប្រជុំបូកសរុបការងារកសិកម្ម រុក្ខាប្រមាញ់ និងនេសាទខេត្តត្បូងឃ្មុំឆ្នាំ២០២១ និងទិសដៅអនុវត្តឆ្នាំ២០២២ របស់មន្ទីរកសិកម្មខេត្តកាលពីពេលថ្មីៗនេះ។

លោកបញ្ជាក់ថា “សមិទ្ធផលជាច្រើន នៃវិស័យកសិកម្មក្នុងខេត្តត្បូង​ឃ្មុំ បានចូលរួមជួយកំណើនសេដ្ឋកិច្ច សម្រាប់ខេត្តក្នុងឆ្នាំ២០២១កន្លងទៅនេះ គឺមិនអាចខ្វះបានពីការចូលរួមសហការ គាំទ្រចូលរួមពីរដ្ឋបាលក្រុង ស្រុក ឃុំ សង្កាត់ មន្ទីរ អង្គភាពពាក់ព័ន្ធ វិស័យឯកជន សហគមន៍កសិកម្ម ជាពិសេសបងប្អូនប្រជាកសិករនោះទេ”។

លោកបានជំរុញឱ្យមន្ទីរកសិកម្មខេត្ត រួមទាំងអ្នកពាក់ព័ន្ធទាំងអស់ បន្តសហការគាំទ្រទាំងស្មារតី ថវិកា សម្ភារៈ និងការចូលរួមគ្រប់រូបភាពទាំងអស់ជួយសម្រួលបងប្អូនប្រជាកសិករ បន្តលើកកម្ពស់វិស័យកសិកម្មក្នុងខេត្ត ឱ្យកាន់តែមានកំណើនបន្ថែម ក្នុងគោលដៅបង្កើនការដាំដុះ និងផលិ​តកម្មសត្វក្នុងស្រុក ដើម្បីជួយសម្រួលជីវភាពប្រជាពលរដ្ឋ ឱ្យកាន់តែប្រសើរឡើង។

នៅឆ្នាំ២០២១ ផលិតកម្មកសិកម្មនៃខេត្តមួយនេះ រួមមាន៖-អនុវិស័យដំណាំផ្តល់បរិមាណផលជាង១,៥លានតោន មានតម្លៃផលិតកម្មទំហំ ២៧៥លានដុល្លាអាម៉េរិក។ -អនុវិស័យកៅស៊ូ ផ្តល់បរិមាណផល(ជ័រស្ងួត) ៨១ ៦០០តោន មានតម្លៃផលិតកម្មទំហំ១២២លានដុល្លារអាម៉េរិក។-អនុវិស័យផលិតកម្មសត្វ ផ្តល់បរិមាណផល១៩,៧៦០តោន មានតម្លៃផលិតកម្មទំហំ ៥៨លានដុល្លារអាម៉េរិក។

-អនុវិស័យជលផល ផ្តល់បរិមាណផល១៦,៦០០តោន មានតម្លៃផលិ តកម្មទំហំ៣៤លានដុល្លារអាមេរិក។ -អនុវិស័យផលិតកម្មសត្វ មានសត្វសរុបប្រមាណ ២,៧៣១,៦០០ក្បាល ដែលផ្តល់បរិមាណផលប្រមា ណ១៩,៧៦៣តោន មានតម្លៃផលិតកម្មទំហំប្រមាណ៥៧,១៥លានដុល្លារអាម៉េរិក៕

ដោយៈសុខុម

អន្តរជាតិ: គេមើលឃើញថា ការកាត់ផ្ដាច់ប្រទេសរុស្ស៊ី ចេញពីប្រព័ន្ធផ្ទេរប្រាក់អន្តរជាតិ SWIFT ដើម្បីឆ្លើយតបទៅនឹងទង្វើឈ្លានពានចូលប្រទេសអ៊ុយក្រែន គឺជាទណ្ឌកម្មធ្ងន់ធ្ងរបំផុត និងមានប្រសិទ្ធភាពបំផុតដែលធ្វើឱ្យរុស្ស៊ីភ័យខ្លាច ប៉ុន្តែសហរដ្ឋអាមេរិកមិនធ្វើដូច្នេះឡើយ។

តើអាមេរិកមានហេតុផលអ្វី នៅពីក្រោយរឿងដ៏សំខាន់មួយនេះ និងមិនហ៊ានទាត់រុស្ស៊ីចេញពីប្រព័ន្ឋមួយនេះ?។
មូលហេតុចម្បងដែលសហរដ្ឋអាមេរិក មិនកាត់ផ្ដាច់ប្រទេសរុស្ស៊ី ចេញពីប្រព័ន្ធផ្ទេរប្រាក់អន្តរជាតិ SWIFT គឺដោយសារវាមានភាពស្មុគស្មា​ញខ្លាំងពេក ព្រមទាំងមានការជំទាស់ពីប្រទេសមួយចំនួន ដែលពឹងផ្អែកលើការនាំចេញថាមពលទៅកាន់អឺរ៉ុបផងដែរ។ នេះបើយោងតាមការចុះផ្សាយរបស់កាសែតអាមេរិក The New York Times ចុះផ្សាយកាលពីថ្ងៃសុក្រ ទី២៥ កុម្ភៈ។

ប្រធានាធិបតីអាមេរិក លោកចូ បៃឌិន បានប្រកាសកាលពីថ្ងៃព្រហ​ស្បតិ៍ ទី២៤ កុម្ភៈ ថា សហរដ្ឋអាមេរិក និងអឺរ៉ុប បានរួមកម្លាំងគ្នាដើម្បីប្រឈមតតាំង នឹងការឈ្លានពានពីសំណាក់រុស្ស៊ី ចូលក្នុងប្រទេសអ៊ុយក្រែន តាមរយៈការដាក់ទណ្ឌកម្មធ្ងន់ធ្ងរនានា។

ទោះជាយ៉ាងណា មានវិស័យដ៏រសើបមួយ ដែលលោកលើកឡើងថាមានការខ្វែងគំនិតគ្នា ជុំវិញការប្រើប្រាស់ជាទម្រង់នៃការទណ្ឌកម្ម នោះគឺប្រព័ន្ធផ្ទេរប្រាក់អន្តរជាតិ SWIFT។

បច្ចុប្បន្នប្រព័ន្ធផ្ទេរប្រាក់អន្តរជាតិ SWIFT តភ្ជាប់បណ្ដាញស្ថាប័នហិរញ្ញវត្ថុជាង១១.០០០ស្ថាប័នជុំវិញពិភពលោក។
ក្រៅពីអាវុធនុយក្លេអ៊ែរ គេមើលឃើញថា ប្រព័ន្ធផ្ទេរប្រាក់អន្តរជាតិ SWIFT គឺជាទម្រង់ទណ្ឌកម្មធ្ងន់ធ្ងរ និងមានប្រសិទ្ធភាពបំផុត ពីព្រោះថា ប្រសិនបើប្រទេសរុស្ស៊ី ត្រូវបានកាត់ផ្ដាច់ចេញពីប្រព័ន្ធ ផ្ទេរប្រាក់អន្តរជាតិ SWIFT នោះប្រទេសនេះ នឹងត្រូវកាត់ផ្តាច់ចេញពីប្រព័ន្ធហិរញ្ញវត្ថុភាគច្រើនពិភពលោក ហើយជាលទ្ធផលនឹងធ្វើឱ្យប្រទេសរុស្ស៊ី ជួបវិបត្តិសេដ្ឋកិច្ចធ្ងន់ធ្ងរ។

ប៉ុន្តែការធ្វើដូច្នេះ គឺមានភាពស្មុគស្មាញខ្លាំងណាស់ និងមានការជំទា​ស់ពីប្រទេសជាច្រើន ពោលគឺមិនងាយស្រួលដូចគិតនោះឡើយ។ ការកាត់ផ្ដាច់ប្រទេសរុស្ស៊ី ចេញពីប្រព័ន្ធ SWIFT មិនមែនប៉ះពាល់តែប្រទេសរុស្ស៊ី មួយនោះទេ ប៉ុន្តែគឺប៉ះពាល់ដល់ប្រទេសជាច្រើន ដែលពឹងផ្អែកប្រទេសរុ ស្ស៊ី លើថាមពល ស្រូវសាលី និងទំនិញផ្សេងៗទៀត។
នោះហើយជាមូលហេតុ ដែលធ្វើឱ្យប្រទេសមួយចំនួនភ័យខ្លាច ហើ​យជំទាស់នឹងការប្រើប្រាស់ប្រព័ន្ធ SWIFT ជាទម្រង់នៃការដាក់ទណ្ឌកម្ម។

ច្បាស់ណាស់ថា ការកាត់ផ្ដាច់ប្រទេសរុស្ស៊ី ចេញពីប្រព័ន្ធ SWIFT នឹងរារាំងសមត្ថភាពរបស់រុស្ស៊ី នៅក្នុងការធ្វើប្រតិបត្តិការហិរញ្ញវត្ថុជាអន្តរជាតិ។ ទោះជាយ៉ាងណា ក្រុមអ្នកវិភាគបានលើកឡើងថា ដោយសារតែអឺរ៉ុប ពឹងផ្អែកខ្លាំង​ លើការនាំចេញថាមពលរបស់រុស្ស៊ី ទើបមេដឹកនាំមួយចំនួននៅតំបន់អឺរ៉ុប ហាក់ភ័យខ្លាច និងមានការស្ទាក់ស្ទើរ។

*ស្វែងយល់ស៊ីជម្រៅអំពីប្រព័ន្ធ SWIFT
ប្រព័ន្ធ SWIFT ជាអក្សរកាត់ដែលចេញ ពីពាក្យពេញថា Society of Worldwide Interbank Financial Telecommunication (បណ្ដាញទូរគមនាគមន៍ហិរញ្ញវត្ថុ នៃធនាគារទូទាំងពិភពលោក)។ វាជាប្រព័ន្ធស្ដង់ដារមួយ ដែលមានសុវត្ថិភាពខ្ពស់បំផុតនៅក្នុងការផ្ទេរ ឬទទួលប្រាក់ប្រាក់ពីធនាគារ ក្នុងប្រទេសជាង២០០ជុំវិញពិភពលោក។

តើការផ្ទេរប្រាក់ជាអន្តរជាតិតាមប្រព័ន្ធ SWIFT ត្រូវការពេលយូរប៉ុណ្ណា?
ជាទូទៅការផ្ទេរប្រាក់ ឬការទូទាត់តាមប្រព័ន្ធ SWIFT ត្រូវការពេលចន្លោះពី១ទៅ៤ថ្ងៃ នៃថ្ងៃធ្វើការអាស្រ័យលើគោលដៅ តំបន់ និងនីតិវិធីធនាគារខុសៗគ្នា។

ដើម្បីធានាសុវត្ថិភាពខ្ពស់ ការផ្ទេរប្រាក់តាមប្រព័ន្ធ SWIFT មិនអាចធ្វើបានភ្លាមៗនោះឡើយ។ មុនពេលប្រាក់របស់អ្នកផ្ញើធ្លាក់ដល់អ្នកទទួលប្រាក់ផ្ទេរទាំងនោះ នឹងត្រូវឆ្លងកាត់ការត្រួតពិនិត្យយ៉ាងល្អិតល្អន់ ដើម្បីប្រ​ឆាំងការលួចបន្លំ និងការលាងលុយកខ្វក់ ដែលត្រូវការពេលវេលាយូរបន្តិច។

ធនាគារខ្លះ ប្រហែលជាត្រូវបញ្ជូនប្រាក់របស់អ្នកផ្ញើ តាមរយៈធនាគារអន្តរការីទៀតផង ប្រសិនបើគ្មានទំនាក់ទំនងផ្ទាល់ រវាងគណនីនៃធនាគាររបស់អ្នកផ្ញើ និងធនាគារគោលដៅទេនោះ។ កត្តានេះ ក៏រួមចំណែកធ្វើការផ្ទេរប្រាក់តាមប្រព័ន្ធ SWIFT មានការយឺតយ៉ាវផងដែរ ប៉ុន្តែវាមានសុវត្ថិភាពខ្ពស់។

*តើព័ត៌មានអ្វីខ្លះដែលអ្នកត្រូវការសម្រាប់ការផ្ទេរប្រាក់តាមប្រព័ន្ធ SWIFT?
ដើម្បីផ្ទេរប្រាក់ទៅក្រៅប្រទេស ដោយប្រើប្រព័ន្ធ SWIFT អ្នកត្រូវការព័ត៌មានដូចខាងក្រោម៖
១- ឈ្មោះរបស់អ្នកទទួលប្រាក់
២- អាសយដ្ឋានរបស់អ្នកទទួលប្រាក់
៣- ឈ្មោះ និងអាសយដ្ឋាននៃធនាគារទទួលប្រាក់
៤- លេខកូដ SWIFT នៃធនាគារអ្នកទទួល
៥- លេខគណនីរបស់អ្នកទទួល

*បញ្ជាក់! លេខកូដ SWIFT គ្រាន់តែបញ្ជាក់អត្តសញ្ញាណធនាគាររបស់អ្នកទទួលប៉ុណ្ណោះ ចំណែកឯលេខគណនីធនាគារអន្តរជាតិ ដែលគេស្គាល់ថា IBANវែងជាង និងបញ្ជាក់អត្តសញ្ញាណគណនី ធនាគារជាក់លាក់ណាមួយ៕

ដោយ: ម៉ាលីស

ត្បូងឃ្មុំ: នាដើមខែមីនា ឆ្នាំ២០២២ខាងមុខនេះ នឹងមានរៀបចំប្រារព្ធពិធីសម្ពោធដាក់ឲ្យប្រើប្រាស់ជាផ្លូវការ មន្ទីរពេទ្យមិត្តភាពកម្ពុជា-ចិនត្បូងឃ្មុំ មានតម្លៃប្រមាណ៥០លានដុល្លា និងសាលាបឋមសិក្សា-វិទ្យាល័យតេជោសែនត្បូងឃ្មុំ ដែលនឹងប្រព្រឹត្តទៅ ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

នេះបើតាមការប្រកាសរបស់រដ្ឋបាលខេត្តត្បូងឃ្មុំ នៅថ្ងៃទី២៥ ខែកុម្ភៈ ឆ្នាំ២០២២នេះ ខណៈលោក យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី រួមដំណើរដោយ លោកបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បានអញ្ជើញចុះពិនិត្យទីតាំង និងបើកកិច្ចប្រជុំត្រៀមដើម្បីរៀបចំប្រារព្ធពិធីសម្ពោធដាក់ឲ្យប្រើប្រាស់ជាផ្លូវការ មន្ទីរពេទ្យមិត្តភាពកម្ពុជា-ចិនត្បូងឃ្មុំ និងសាលាបឋមសិក្សា-វិទ្យាល័យតេជោសែនត្បូងឃ្មុំ។

ក្នុងនោះមានការអញ្ជើញចូលរួមពីសំណាក់រដ្ឋលេខាធិការក្រសួងសុខាភិបាល ប្រតិភូក្រសួង-ស្ថាប័នពាក់ព័ន្ធ អភិបាលរងខេត្ត ប្រធាន-អនុប្រធានមន្ទីរអង្គភាពពាក់ព័ន្ធជុំវិញខេត្ត ព្រមទាំងថ្នាក់ដឹកនាំ និងក្រុមគ្រូពេទ្យនៃមន្ទីរពេទ្យមិត្តភាពកម្ពុជា-ចិនត្បូងឃ្មុំ ស្ថិតក្នុងឃុំស្រឡប់ ស្រុកត្បូងឃ្មុំ ទីរួមខេត្តត្បូងឃ្មុំ។

មន្ទីរពេទ្យនេះបើកការដ្ឋានសាងសង់ កាលពីថ្ងៃទី០១ ខែមីនា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់សម្តេចតេជោហ៊ុនសែន នាយករដ្ឋមន្ត្រីនៃកម្ពុជា និងបញ្ចប់ការសាងសង់នាថ្ងៃទី២៧ ខែតុលា ឆ្នាំ២០២១ ដោយចំណាយថវិកាអស់ប្រមាណ ៥០លានដុល្លាអាមេរិក ក្រោមជំនួយឥតសំណងរបស់រដ្ឋាភិបាលនៃសាធារណរដ្ឋប្រជាមានិតចិន។

ផ្ទៃក្រឡាមន្ទីរពេទ្យ មានទំហំ៥៥,៨១៤ ម៉ែត្រការ៉េ និងក្រឡាផ្ទៃអគារ មានទំហំ២៤,៣០០ ម៉ែត្រការ៉េ មានកំពស់២៤ម៉ែត្រ ចែកចេញជា០៥ជាន់។

មន្ទីរពេទ្យនេះ បំពាក់នូវឧបករណ៍ទំនើបៗ និងមានគ្រែសរុបចំនួន៣០០គ្រែ រួមទាំងមានទទួលព្យាបាល វះកាត់ ពិគ្រោះយោបល់ជំងឺទូទៅ ដែលមានក្រុមគ្រូពេទ្យជំនាញប្រមាណជាង៤០០នាក់ ដែលជាមន្ទីរពេទ្យប្រចាំតំបន់ភូមិភាគ គ្រប់ដណ្តប់ប្រជាជនមួយចំនួននៃខេត្តក្រចេះ រតនគិរី ស្ទឹងត្រែង និងមណ្ឌលគិរី។

ចំណែកសាលាបឋមសិក្សា-វិទ្យាល័យតេជោសែនត្បូងឃ្មុំ ដែល ទាំងថ្នាក់បឋមសិក្សា និងថ្នាក់វិទ្យាល័យ ដោយមានអគារសិក្សាចំនួន២ខ្នង កំពស់០៣ជាន់ មាន៣៦បន្ទប់ អគារទីចាត់ការចំនួន០២ខ្នង ១០បន្ទប់ អគារស្នាក់នៅគ្រូបង្រៀន២ខ្នង ៤០បន្ទប់៕