ដោយៈវឌ្ឍនៈ

ភ្នំពេញៈ ផែនការរបស់រាជរដ្ឋាភិបាល ដើម្បីអភិវឌ្ឍន៍ព្រលានយន្តហោះអន្តរជាតិមណ្ឌលគីរី នឹងត្រូវចាប់ផ្ដើមនៅដើមឆ្នាំ២០២២នេះ ប៉ុន្តែដោយសារតែស្ថានភាពកូវីដ១៩ បានអូសបន្លាយធ្វើឱ្យគម្រោងផែនការនេះមានការប្រែប្រួល និងពន្យារពេលអភិវឌ្ឍន៍ ដោយមិនទាន់កំណត់ពេលវេលាច្បាស់លាស់នៅឡើយ។

លោកស៊ិន ចាន់សេរីវុត្ថា អ្នកនាំពាក្យរដ្ឋលេខាធិការអាកាសចរស៊ីវិលនៅរសៀលថ្ងៃទី១៥ កុម្ភៈ ២០២២កន្លងមកថា គម្រោងអភិវឌ្ឍន៍ព្រលានយន្តហោះអន្តរជាតិមណ្ឌលគីរី នៅតែមានផែនការអភិវឌ្ឍន៍ដដែល ដោយមិនមានការលុបចោលនោះទេ គ្រាន់តែគម្រោងនេះ ត្រូវពន្យារពេលមួយរយៈធំ ដោយមិនទាន់កំណត់ពេលវេលាច្បាស់លាស់ថា នឹងចាប់ផ្ដើមអនុវត្តន៍នៅពេលណានោះទេ។

លោកបន្តថា “បញ្ហាកូវីដ១៩ បានធ្វើឱ្យគម្រោងនេះត្រូវពន្យា ហើយការពន្យារនេះ យើងក៏មិនអាចបញ្ជាក់បានថា វានឹងអាចចាប់ផ្ដើមបាននៅពេលណានោះទេ”។

លោកស៊ិន ចាន់សិរីវុត្ថាបានបន្តថា ក្នុងស្ថានភាពនេះ អ្នកជំនាញការណ៍មកពីចិនដែលត្រូវចុះ មកកវាយតម្លៃផលប៉ះពាល់ និងការចំណាយមិនអាចចុះមកកម្ពុជាបាននោះទេ ដូចយើងបានដឹងស្រាប់ហើយថា បច្ចុប្ប​ន្ននេះកូវីដ១៩ប្រភេទ អូមីក្រុងកំពុងមានការរាលដាល នៅលើពិភពលោករួមទាំងកម្ពុជាផងដែរ។ មេរោគនេះដែរ ក៏បានបង្កផលប៉ះពាល់ដល់វិស័យអាកាសចរកម្ពុជាជាថ្មី។ រាប់ចាប់តាំងពីខែវិច្ឆិកា គឺគ្រាដែលរដ្ឋាភិបាលចាប់ផ្ដើមបើកទូលាយលើវិស័យអាកាសចរ ឃើញថាអ្នកដំណើរបរទេសចូលមកច្រើន និងមានសន្ទុះមួយប្រាវ តែក្រោយពេលរកឃើញមេរោគកូវីដ១៩ប្រភេ​ទអូមីក្រុង អ្នកដំណើរចូលមកបានធ្លាក់ចុះបន្តិច ហើយក៏បាននៅទ្រឹងមកទល់ពេលនេះ ។

លោកបន្ថែម ថ្វីត្បិតតែគម្រោងអភិវឌ្ឍន៍ ព្រលានយន្តហោះមណ្ឌលគីរីបានពន្យារក្ដី សម្រាប់គម្រោងព្រលានយន្តហោះពីរផ្សេងទៀត ដែលកំពុងសាងសង់ គឺព្រលានយន្តហោះអន្តរជាតិសៀមរាប និងព្រលានយន្តហោះ អន្តរជាតិតេជោ ក្រុងតាខ្មៅ នៅតែបន្តសកម្មភាព ដោយមិនមានការផ្អាកឬពន្យារពេលឡើយ ក្នុងគោលដៅបញ្ចប់ការសាងសង់ នៅឆ្នាំ២០២៣ខាងមុខនេះ។

លោកវុត្ថាបានបន្តថា យ៉ាងណាយើងក៏ព្រួយបារម្ភ ចំពោះ​ការឆ្លងមេរោគនេះ ចូលទៅក្នុងការដ្ឋានសំណង់ផងដែរ បើសិនជាឆ្លងគឺមានទ្រង់ទ្រា​យធំ នឹងអាចធ្វើឱ្យប៉ះពាល់ដល់ការសម្រេចបានទៅតាមផែនការ។

រដ្ឋាភិបាលបានបង្កើតគណកម្មការអន្តរក្រសួងរួចហើយ ដើម្បីសហការធ្វើការងារជាមួយក្រុមហ៊ុន China Power Group ដែលគ្រោងបោះទុន១០០លានដុល្លារអាមេរិក សាងសង់ព្រលានយន្តហោះនេះ។

ការប្រកាសពីគម្រោងសាងសង់ ព្រលានយន្តហោះអន្តរជាតិមណ្ឌលគីរី បានជំរុញឱ្យវិស័យដីធ្លីមានសន្ទុះមួយកម្រិតបន្ថែមទៀត ដោយមានការចុះស្វែងរកដីធ្លី សម្រាប់អភិវឌ្ឍន៍ ហើយក៏ធ្វើឱ្យតម្លៃដីធ្លីនៅទីនោះ បានហក់ឡើងមួយកម្រិតផងដែរ ប៉ុន្តែមកដល់ពេលនេះ បើតាមអ្នកជំនាញប្រចាំខេត្តនេះថា តម្លៃហាក់នៅទ្រឹង មិនមានការឡើងបន្តឬក៏ធ្លាក់ចុះវិញនោះទេ៕

ដោយៈគង់ សូរិយា

ភ្នំពេញៈ បើទោះជាវិស័យទេសចរណ៍ នៅតែជួបភាពមិនប្រាកដប្រជាក្តី ប៉ុន្តែសណ្ឋាគារថ្មីៗបាននិងកំពុងត្រៀមខ្លួន បើកដំណើរការនៅរាជធានីភ្នំពេញក្នុងខែមិនាពេលខាងមុខនេះ។

ជាក់ស្តែងក្រុមហ៊ុនសណ្ឋាគារល្បីឈ្មោះ Ascott នឹងបើកដំណើរការបណ្តាញសណ្ឋាគាររបស់ខ្លួន Citadines Flatiron Phnom Penh នៅរាជធានីភ្នំពេញនៅថ្ងៃទី១៥ ខែមីនា ឆ្នាំ ២០២២ ផ្តល់ជូននូវសេវាកម្មទាំងបន្ទប់អាផាតមិនជួល និងសណ្ឋាគារ។

អគារ Citadines Flatiron មាន៣១៥យូនីត ហើយមានទីតាំងនៅក្នុងអគារ Flatiron by Meridian ដែលជាគម្រោងអភិវឌ្ឍចម្រុះកម្ពស់៤១ជាន់ នៅនៅក្នុងមជ្ឈមណ្ឌលភ្នំពេញ ឬ Phnom Penh City Center ឬតំបន់បឹងកក់។

មជ្ឈមណ្ឌល Citadines Flatiron ផ្តល់ជូននូវជម្រើសបន្ទប់ និងអាផាតមិនជាច្រើនពីយូនីតសណ្ឋាគារ បន្ទប់ប្រភេទស្ទូឌីយ៉ូ១បន្ទប់គេង ២បន្ទប់គេង និង៣បន្ទប់គេងជាដើម។

ការបើកសម្ពោធ Citadines Flatiron Phnom Penh គឺជាការបោះជំហានទី៣របស់ The Ascott Limited មកកាន់ប្រទេសកម្ពុជា បន្ទាប់ពី CASA Meridian Residences និង Somerset Norodom Phnom Penh៕

ដោយៈ សុផារី

ភ្នំពេញៈ ស្របពេលដែលការសាងសង់ផ្លូវក្រវាត់ក្រុងទី៣ សម្រេចបានជាង៦៦ភាគរយ អ្នកជំនាញនៃវិស័យអចលនទ្រព្យបានឱ្យដឹងថា តម្លៃដីធ្លីនៅតាមបណ្តោយផ្លូវនេះ មានការកើនឡើងច្រើន បើប្រៀបធៀបនឹងមុនពេលសាងសង់ ហើយនឹងកាន់តែមានកំណើនខ្ពស់ ក្រោយបញ្ចប់ការសាងសង់នាពេលខាងមុខ។

លោកឧកញ៉ា នួន រឹទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisals (KFA) បានមានប្រសាសន៍កាលពីថ្ងៃទី១៥ ខែកុម្ភៈនេះថា បើប្រៀបធៀបនឹងមុនពេលសាងសង់ តម្លៃដីនៃតំបន់នេះ ទីតាំងខ្លះលើផ្លូវក្រវ៉ាត់ក្រុងទី៣ មានការកើនឡើង៤ទៅ៥ដង។

លោកបានបញ្ជាក់ថា ”តម្លៃដីទាបបំផុតលើផ្លូវក្រវ៉ាត់ក្រុងទី៣ ចាប់ផ្តើមពី៦០ ទៅ៨០ដុល្លាអាមេរិកក្នុងមួយម៉ែត្រការ៉េ ហើយមានតំបន់ទីប្រជុំជនឬតំបន់ក្បែររាជធានីភ្នំពេញខ្លះ តម្លៃបានឡើងខ្ពស់រហូតដល់ ៣០០ទៅ ៤០០ដុល្លាអាមេរិកក្នុងមួយម៉ែត្រការ៉េ”។

បើតាមលោកឧកញ៉ា កំណើនខ្ពស់នៃតម្លៃដីធ្លីនៅតាមបណ្តោយផ្លូវនេះ ជំរុញដោយកត្តាសំខាន់ៗមួយចំនួន ដូចជា កត្តា GDP របស់សេដ្ឋកិច្ចរបស់ប្រទេសមួយកើនឡើង នាំឱ្យតម្លៃដីធ្លីមានការកើនឡើង ទៅតាមនិន្នាការនេះផងដែរ។

កត្តាមួយទៀតគឺ Block Market Price ផ្អែកលើគម្រោងយុទ្ធសាស្រ្តរបស់រាជរដ្ឋាភិបាលកម្ពុជា ដោយកាលណាគម្រោងចាប់ផ្តើម អនុវត្តន៍បានបន្ទិច តម្លៃដីធ្លីនឹងគុណនឹង២ ក្រោយគម្រោងបានអនុវត្ត នោះតម្លៃនឹងកើនឡើងគុណនឹង៣ ហើយក្រោយគម្រោងបានអនុវត្តន៍រួចរាល់ហើយ នោះតម្លៃដីធ្លីអាចនឹងកើនឡើងរហូតដល់១០ដងក៏មានដែរ។

លោកឧកញ៉ាបានបញ្ជាក់ថា “នៅចុងឆ្នាំ២០២១ និងដើមឆ្នាំ២០២២នេះ មានគម្រោងអភិវឌ្ឍន៍លំនៅឋានមួយចំនួន នៅក្នុងស្រុកកៀនស្វាយ ខេត្តកណ្តាល បានចាប់ផ្តើមប្រកាសហើយ តែគម្រោងផ្សេងទៀតនៅមិនទាន់មានការប្រកាសនៅឡើយទេ”។

លោកឧកញ៉ានួន រិទ្ឋីបានព្យាករណ៍ថា ក្រោយពីផ្លូវនេះមានបញ្ចប់ការកសាងរួចរាល់ហើយ តម្លៃដីធ្លីនៅក្នុងតំបន់ផ្លូវក្រវាត់ក្រុងទី៣ នេះអាចមានការកើនឡើងរហូតដល់២០ ទៅ៣០ភាគរយធៀបនឹងពេលបច្ចុប្បន្ន។ លោកបន្តថា យ៉ាងណាក្តី វាអាស្រ័យនឹងគោលនយោបាយ លើកទឹកចិត្តរបស់រាជរដ្ឋាភិបាលកម្ពុជា។

ឧទាហរណ៍ គោលនយោបាយឃ្លាំង ដែលត្រូវលើកចេញពីក្រុងនឹងធ្វើឱ្យផ្លូវក្រវាត់ក្រុងទី៣ មានតួនាទីសំខាន់ខ្លាំងណាស់ ក្នុងការផ្តល់ចរាចរណ៍កាត់និងវាងក្រុងភ្នំពេញ ដែលអាចកាត់បន្ថយរយៈពេលការដឹកជញ្ជូន។

ផ្លូវក្រវាត់ក្រុង ដែលចំណាយទំហំទឹកប្រាក់ ចំនួន៣០០លានដុល្លារមានប្រវែងសរុប៥២,៩៨៣គីឡូម៉ែត្រ ចាប់ផ្តើមពីចំណុចផ្លូវជាតិលេខ៤ ក្នុង ខណ្ឌពោធិ៍សែនជ័យ រាជធានីភ្នំពេញ ឆ្លងកាត់ផ្លូវជាតិលេខ៣ ផ្លូវជាតិលេខ២ ឆ្ពោះទៅផ្លូវជាតិលេខ១ ក្នុងស្រុកកៀនស្វាយ ខេត្តកណ្ដាល តភ្ជាប់ទៅកាន់ចំណតផែកុងតឺន័រថ្មី របស់កំពង់ផែស្វ័យតភ្នំពេញ។

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន កាលពីចុងខែមករា ឆ្នាំ២០២២កន្លងមកថា គម្រោងផ្លូវក្រវ៉ាត់ក្រុងទី៣ ធ្វើឡើងតាមផែនការមេ និងចក្ខុវិស័យរបស់ក្រសួងសាធារណការ និងដឹកជញ្ជូន តាមការចង្អុលបង្ហាញ ពីរាជរដ្ឋាភិបាលកម្ពុជា ដើម្បីសម្រួលដល់ការធ្វើដំណើរ ការដឹកជញ្ជូនផលិតផលនានា រួមចំណែកកាត់បន្ថយបញ្ហាកកស្ទះដោយយានយន្ដធំៗ ដែលដឹកជញ្ជូនទំនិញចេញ-ចូលរាជធានីភ្នំពេញ។

ផ្លូវក្រវ៉ាត់ក្រុងទី៣ ក៏ជាផ្លូវតភ្ជាប់ផ្ទៃក្នុង និងសមាហរណកម្មតំបន់ រួមមានផ្លូវអាស៊ានហាយវ៉េ និងផ្លូវរបៀងសេដ្ឋកិច្ច របស់មហាអនុតំបន់ទន្លេមេគង្គ ដែលរួមចំណែកសម្រួល ការដឹកជញ្ជូនឆ្លងកាត់ព្រំដែន ជំរុញពាណិជ្ជកម្មអន្តរជាតិ និងភស្ដុភារកម្មតំបន់៕

ដោយៈ វិវត្តន៍

ក្រចេះ៖ សម្តេចតេជោហ៊ុន សែន នាយករដ្ឋមន្ត្រីកម្ពុជា នឹងជាអធិបតី ជាមួយលោក មិកាមិ ម៉ាសាហ៉ីរុ ឯកអគ្គរដ្ឋទូតជប៉ុនប្រចាំនៅកម្ពុជា សម្ពោធដាក់ឱ្យប្រើប្រាស់ស្ពាន៧កន្លែង ស្ថិតនៅក្នុងខេត្តក្រចេះ និងព្រៃវែង ជាជំនួយរបស់រដ្ឋាភិបាលជប៉ុន តម្លៃប្រមាណ៣៥លានដុល្លារអាមេរិក។

លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា ស្ពានទាំង៧កន្លែងនេះ គឺជាគម្រោងសាងសង់ស្ពានឡើងវិញបន្ទាន់ នៅតំបន់ប្រឈមនឹងទឹកជំនន់ ស្ថិតនៅទីតាំងភូមិសា​ស្រ្តខេត្តក្រចេះ និងខេត្តព្រៃវែង ដែលស្ពានមានប្រវែងសរុប៦៧០ម៉ែត្រ និងផ្លូវតភ្ជាប់ស្ពានមានប្រវែងសរុប៣,៤២៤ម៉ែត្រ។

ស្ពានសំខាន់ៗទាំង៧ទីតាំងនេះ រួមមានដូចជា​ ស្ពានចំនួន៥កន្លែង ស្ថិតនៅក្នុងខេត្តក្រចេះ តាមបណ្តោយផ្លូវជាតិលេខ៧៣ រួមមាន៖ ស្ពានព្រែកសណ្តាន់ ប្រវែង៣៥ម៉ែត្រ ស្ពានព្រែកឬស្ស ប្រវែង៦២ម៉ែត្រ ស្ពានអន្លង់ឃ្លេ ប្រវែង៤៨ម៉ែត្រ ស្ពានព្រែកឆ្លូង ប្រវែង១៤០ម៉ែត្រ និងស្ពានពាមទេរប្រវែង១៧៥ម៉ែត្រ។

ស្ពានចំនួន២កន្លែងទៀត ស្ថិតនៅក្នុងខេត្តព្រៃវែង តាមបណ្តោយផ្លូវជាតិលេខ១១ រួមមាន ស្ពានបាបោងលេខ១ ប្រវែង១០៥ម៉ែត្រ និងស្ពានបាបោងលេខ២ ប្រវែង១០៥ម៉ែត្រ។

លោកទេសរដ្ឋមន្ត្រី បានឱ្យដឹងថា គម្រោងខាងលើនេះ បានស្ថាបនាច្រាំងការពារការហូរច្រោះទឹកជំនន់ និងត្រូវបានស្ថាបនាជាប្រភេទស្ពានបេតុងក្រាលកៅស៊ូ AC កម្រាស់១០សង់ទីម៉ែត្រ។ គម្រោងសាងសង់ស្ពានទាំង ៧កន្លែងនេះ គឺជាហិរញ្ញប្បទានឥតសំណង ពីរដ្ឋាភិបាលនៃប្រទេសជប៉ុន ជូនដល់រាជរដ្ឋាភិបាលកម្ពុជា។

លោកទេសរដ្ឋមន្ត្រី ស៊ុន ចាន់ថុល បានឱ្យដឹងថា “សមិទ្ធផលថ្មីនេះ គឺជាចំណងដៃដ៏ថ្លៃថ្លា មិនអាចកាត់ថ្លៃបាន ដែលកើតចេញពីចំណងមិត្តភាព និងកិច្ចសហប្រតិបត្តិការរវាង រាជរដ្ឋាភិបាលកម្ពុជា និងរាជរដ្ឋាភិបាលនៃប្រទេសជប៉ុន ជូនដល់បងប្អូនប្រជាពលរដ្ឋខេត្តក្រចេះ ខេត្តព្រៃវែង ព្រមទាំងបងប្អូន ប្រជាពលរដ្ឋនៅទូទាំងប្រទេស ដើម្បីប្រើប្រាស់ជាប្រយោជន៍ទូទៅ និងយូរអង្វែង”។

លោកបន្តថា ការសម្រេចបាននូវការអភិវឌ្ឍ និងតភ្ជាប់ហេដ្ឋារចនាសម្ព័ន្ធខ្វាត់ខ្វែង ប្រទាក់ក្រឡាពាសពេញផ្ទៃប្រទេស ដូចនាពេលបច្ចុប្បន្ននេះ គឺកើតឡើងដោយសារសុខសន្តិភាព និងស្ថិរភាពនយោបាយ ដែលជាកត្តាសារវន្តមិនអាចខ្វះបាន ក្រោមការដឹកនាំដ៏ឈ្លាសវៃ និងប៉ិនប្រសព្វរបស់ សម្តេចតេជោនាយករដ្ឋមន្រ្តី ដែលបានចាត់ទុកការស្ដារ និងអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន ជាវិស័យអាទិភាពរបស់ជាតិ ហើយសម្ដេចតេជោ តែងតែពុះពារស្វះ ស្វែងរកប្រភពធនធានពីគ្រប់មជ្ឈដ្ឋាន ដើម្បីអនុវត្តគម្រោ​ងសាងសង់ហេដ្ឋារចនាសម្ព័ន្ធដឹកជញ្ជូន នៅទូទាំងប្រទេសឱ្យកាន់តែមានភាពល្អប្រសើរឡើង។

លោកបន្តថា​ “កត្តាសុខសន្តិភាព ដ៏ពេញលេញនេះហើយ បានបង្កភាពងាយស្រួលឱ្យប្រជាជនកម្ពុជា អាចធ្វើដំណើរទៅទីជិតឆ្ងាយនៅទូទាំងប្រទេស តាមរយៈហេដ្ឋារចនាសម្ព័ន្ធ ដែលបានសាងសង់រួចរាល់ពាសពេញផ្ទៃប្រទេស”។

លោកបន្តថា​ “សុខសន្តិភាព ពិតជាបានប្រែក្លាយកម្ពុជាទៅជាសង្គមជឿនលឿន និងមានការរីកចម្រើនលើគ្រប់វិស័យ ដែលបានផ្តល់ឱកាសឱ្យបងប្អូន ប្រជាពលរដ្ឋទាំងអស់មានមុខរបរ មានការងារធ្វើ មានប្រាក់ចំណូល មានជីវភាពរស់នៅប្រសើរជាងមុន រស់នៅក្នុងភាពសុខដុមរមនាគ្រប់ជាតិសាសន៍ ដោយគ្មានការរើសអើង រួមទាំងការទទួលបាននូវការសិក្សាអប់រំ អាហារូបត្ថម្ភ ការប្រើប្រាស់ទឹកស្អាត និងអនាម័យ បរិស្ថានរស់នៅល្អ សេវាថែទាំសុខភាពផ្សេងៗ ទាំងនៅតាមទីប្រជុំជន និងជនបទ និងមានបណ្តាញអគ្គិសនី បណ្តាញទូរគមនាគមន៍ ទូរស័ព្ទ អ៊ីនធឺណែត និងប្រព័ន្ធបច្ចេកវិទ្យាទំនើបប្រើប្រាស់យ៉ាងទូលំទូលាយ”៕