ដោយៈគង់ សិរីជេស៊ីកា

ភ្នំពេញៈ ជាមួយនឹងផែនការចក្ខុវិស័យច្បាស់់លាស់ អ្នកវិនិយោគក្នុងស្រុកមួយក្រុមបាន និងកំពុងវិនិយោគបុរីក្រែកស៊ីធីហ្កាឌិន ដែលការសាងសង់នៅតែបន្ត ទោះបីជាត្រូវឆ្លងកាត់វិបត្តិកូវីដ១៩ក្តី។

ប្រធានក្រុមប្រឹក្សាភិបាលនៃបុរីក្រែកស៊ីធី លោកបណ្ឌិតតេង រិទ្ឋីបានមានប្រសា​សន៍ឲ្យដឹងតាមទូរស័ព្ទនាព្រឹកថ្ងៃទី២២ ធ្នូកន្លងមកថា ការបោះទុនវិនិយោគបុរី នៅទីប្រជុំជនស្រុកពញ្ញាក្រែកនេះ ដោយសារតំបន់នេះមានសក្តានុពលជាច្រើន ដែលប្រជាពលរដ្ឋនៅមូលដ្ឋានមានជីវភាពធូរធារ និងទីតាំងគំរោងនេះមានចម្ងាយត្រឹម១៦គីឡូម៉ែត្រ ពីច្រកទ្វារអន្តរជាតិត្រពាំងផ្លុង ដែលជាតំបន់សេដ្ឋកិច្ច និងដោះដូរពាណិជ្ជកម្មដ៏សំខាន់មួយ ពិសេ​សបុរីនេះ ព័ទ្ឋជុំវិញដោយរោងចក្រ សហគ្រាស ស្ថាប័នគយ ពិសេសជាតំបន់មានប្រជាពលរដ្ឋរស់នៅច្រើន។

លោកបន្តថា “គោលដៅនៃការអភិវឌ្ឍរបស់យើង ដោយសារនៅទីរួមខេត្តថ្មី មានប្រជាពលរដ្ឋរស់នៅរាជធានីភ្នំពេញ ទិញដីច្រើននៅតំបន់នេះ ពិសេសយើងចង់ផ្តល់នូវការអភិវឌ្ឍប្រកបដោយនិរន្តរភាពនៅមូលដ្ឋាន”។

បុររីក្រែកស៊ីធី កំពុងផ្តល់នូវទស្សនទានអភិវឌ្ឍន៍ថ្មីនៅមូលដ្ឋាន តាមរយៈការផ្តល់នូវជម្រើសលំនៅដ្ឋាន ដូចជា ផ្ទះអាជីវកម្ម(Shop house) ផ្ទះវីឡាទោល វីឡាភ្លោះ ដែលមានតម្លៃត្រឹម៣៩,០០០ដុល្លារអាមេរិកឡើងទៅ ពិសេសគំរោងនេះមានផ្សារបែបពាក់កណ្តាលទំនើប ដែលមានស្តង់ចំនួន៤០០ស្តង់ ពិសេសផ្សារនិងបុរីនេះមានសួនច្បារ ចំណតរថយន្តធំទូលាយសំរាប់ទទួលភ្ញៀវទេសចរណ៍ជាតិ អន្តរជាតិ ដែលបានធ្វើដំណើរឆ្លងកាត់ពីប្រទេសវៀតណាម ចូលមកកាន់កម្ពុជា។

លោកបណ្ឌិតតេង រិទ្ឋីបានបន្តថា “អ្វីដែលក្រុមហ៊ុនផ្តល់ជូនអតិថិជន គឺជម្រើសនៃការបង់ប្រាក់ដ៏ទាក់ទាញ ជាមួយនឹងគំរោង ដែលផ្តោតលើប្រ​ណី​តភាព គុណភាព និងបរិយាកាសរស់នៅប្រកបដោយផាសុខភាព”។​លោកបន្តថា “យើងក៏បានគិតដល់ការធ្វើដំណើរជុំវិញបុរីនេះផងដែរ ដែលអ្នករស់នៅក្នុងបុរីនេះ អាចធ្វើដំណើរចេញចូលបុរីនេះបានយ៉ាងងាយស្រួល ដោយសារយើងបានរៀបចំផ្លូវតភ្ជាប់ និងព័ទ្ឋជុំវិញបុរីនេះទាំងអស់ ដើម្បីលើកកំពស់ស្តង់ដានៃការរស់នៅ និងបែបផែនជីវិតសម័យថ្មី”៕

ដោយៈគង់ សូរិយា

 ភ្នំពេញៈ រាជរដ្ឋាភិបាលកម្ពុជាបានធ្វើអនុបយោគ លើដីផ្ទៃបឹងតាមោក១៤០ហិកតា ពីសម្បត្តិសាធារណៈរបស់រដ្ឋ ឱ្យក្លាយទៅជាសម្បត្តិឯកជនរបស់រដ្ឋ និងប្រគល់ជូនទៅក្រសួងយុត្តិធម៌។

ការផ្តល់ផ្ទៃបឹងតាមោក១៤០ហិកតា ជូនទៅក្រសួងយុត្តិធម៌ ធ្វើឡើងតាមរយៈអនុក្រឹត្យរបស់សម្តេចតេជោនាយករដ្ឋមន្រ្តី ហ៊ុន សែន ដែលចេញតាំងពីខែតុលា ឆ្នាំ២០២១ ប៉ុន្តែទើបតែត្រូវផ្សព្វផ្សាយថ្មីៗនេះ ដែលនេះជាលើកទី២ ហើយ ដែលរដ្ឋាភិបាលសម្រេចផ្តល់ដី នៅតំបន់បឹងតាមោក ឱ្យទៅក្រសួងយុត្តិធម៌។

កាលពីខែកញ្ញា ឆ្នាំ២០២០កន្លងមកនេះ រាជរដ្ឋាភិបាល បានចេញអនុក្រឹត្យផ្តល់ផ្ទៃបឹងតាមោក៨ហិកតា ជូនទៅក្រសួងយុត្តិធម៌ម្តងរួចម្ដងមកហើយ។

បឹងតាមោក ឬបឹងកប់ស្រូវ ស្ថិតនៅក្នុងភូមិសាស្ត្ររាជធានីភ្នំពេញ ត្រូវបានគ្រប់គ្រងដោយអនុក្រឹត្យលេខ២០ អនក្របក ចុះថ្ងៃទី២០ ខែកុម្ភៈ ឆ្នាំ២០១៦ ដែលកំណត់ផ្ទៃបឹងមានជាង៣ពាន់ហិកតា ជាសម្បត្តិសាធារណៈរបស់រដ្ឋ។

ចាប់ពីពេលនោះមក រដ្ឋាភិបាលកម្ពុជា បានសម្រេចកាត់ដីបឹងតាមោកជាច្រើនលើកឱ្យទៅជាកម្មសិទ្ធិឯកជន និងស្ថាប័នរដ្ឋមួយចំនួន ហើយ​ក៏មានករណីជាច្រើនត្រូវបានទុកជាមោយៈផងដែរ។

បើគិតរហូតមកទល់ពេលនេះ ផ្ទៃបឹងតាមោកយ៉ាងហោច១ពាន់ហិកតាហើយ ដែលត្រូវរដ្ឋាភិបាលកាត់ឱ្យទៅស្ថាប័នរដ្ឋ និងវិស័យឯកជន៕

ដោយៈគង់ សូរិយា

ភ្នំពេញៈ បណ្តាគ្រឹះស្ថានធនាគារ និងមីក្រូហិរញ្ញវត្ថុបានទម្លាក់ទឹកប្រាក់ជិត៤៥ពាន់លានដុល្លារ ក្នុងសកម្មភាពអាជីវកម្មនានា ដែលជាផ្នែក​មួយដ៏សំខាន់ ក្នុងការជម្រុញកំនើនសេដ្ឋកិច្ចជាតិ។

យោងតាមរបាយការណ៍របស់ធនាគារជាតិ នៃកម្ពុជាបានឲ្យដឹងថា គិតត្រឹមត្រីមាសទី៣ ឆ្នាំ២០២១នេះ គ្រឹះស្ថានធនាគារ និងហិរញ្ញវត្ថុរបស់កម្ពុជា បានផ្តល់ឥណទានសរុប១៨៥,១ទ្រីលានរៀល ស្មើនឹងប្រមាណជាង ៤៤,៩ប៊ីលានដុល្លារអាមេរិក កើនឡើង២៣ភាគរយ ធៀបនឹងគ្រាដូចគ្នាឆ្នាំមុន។

ឥណទានដ៏ច្រើនសន្ឋឹកសន្ឋាប់នេះ បានគ្របដណ្តប់លើវិស័យកសិ​កម្ម សំណង់ កម្មន្តសាល សេវាកម្ម ការជួញដូរដុំនិងរាយ និងអង្គភាពគ្រួសារជាដើម។

ដោយ៖ សុផារី

ភ្នំពេញ÷ក្នុងបរិបទជំងឺកូវីដ១៩ កម្ពុជារក្សាបាននូវស្ថិរភាពម៉ាក្រូសេដ្ឋកិច្ច អនុម័តគម្រោងវិនិយោគមានលក្ខណៈសម្បត្តិគ្រប់គ្រាន់ថ្មីចំនួន១៩៥គម្រោង និងគម្រោងពង្រីកផលិតកម្មចំនួន៤៣គម្រោង ដែលអាចបង្កើតការងារបានប្រមាណ១៥១ ០០០កន្លែង។

នេះបើតាមការថ្លែងរបស់លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវ: ក្នុងកិច្ចប្រជុំលើកទី៦ របស់គណៈកម្មការអន្តរ ក្រសួងសម្រាប់ដឹកនាំ ត្រួតពិនិត្យ និងវាយតម្លៃលើការអនុវត្តគោលនយោបាយជាតិស្ដីពីមុខរបរ និងការងារឆ្នាំ២០១៥-២០២៥ តាមប្រព័ន្ធវីដេអូ (Zoom) នាព្រឹកថ្ងៃទី២២ ខែធ្នូ ឆ្នាំ២០២១។

លោកបានមានប្រសាសន៍ថា រាជរដ្ឋាភិបាល ក៏ដូចជាក្រសួង ស្ថាប័នពាក់ព័ន្ធបានសម្រេចនូវសមិទ្ធផលជាច្រើន ជាពិសេសក្នុងការបង្ការទប់ស្កាត់ការរីករាល ដាលជំងឺកូវីដ-១៩ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឆ្លើយតបនឹងវិបត្តិនេះ ដោយភាពស្វាហាប់ និងយុទ្ធសាស្ត្រគ្រប់ជ្រុង ជ្រោយ ប្រកបដោយស្មារតីបុរេសកម្មសំដៅកាត់បន្ថយផលប៉ះពាល់ និងគាំទ្រដល់សកម្មភាពសង្គម-សេដ្ឋកិច្ច ដោយរក្សាបាននូវការងារ លំនឹងជីវភាពប្រជាជន និងធុរកិច្ច។

លោកក៏បានស្នើសុំភាគីពាក់ព័ន្ធ បង្កើនការយកចិត្តទុកដាក់បន្ថែមទៀត ដើម្បីធ្វើការផ្លាស់ប្តូរ និងលើកស្ទួយរចនាសម្ព័នឧស្សាហកម្ម ពីឧស្សាហកម្មអតិពលកម្ម ទៅជាឧស្សាហកម្មពលកម្មផ្អែកលើជំនាញនៅឆ្នាំ២០២៥ ក៏ដូចជាការលើកកម្ពស់ការប្រកួតប្រជែង និងផលិតភាព សំដៅប្រែក្លាយពីឧស្សាហកម្មមានតម្លៃបន្ថែមទាប ទៅជាឧស្សាហកម្មដែលមានតម្លៃបន្ថែមខ្ពស់ ស្របតាមគោល នយោបាយជាតិអភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥។

លោកក៏បានបញ្ជាក់ថា ទោះបីជាប្រទេសយើងបានរងការគម្រាមកំហែងយ៉ាងធ្ងន់ធ្ងរពីវិបត្តិនៃជំងឺកូវីដ-១៩ ដែលប៉ះពាល់ដល់សេដ្ឋកិច្ច និងសង្គម និងជាឧបសគ្គរារាំងក្នុងការអនុវត្តសកម្មភាពលើគ្រប់វិស័យក៏ដោយ ក្រសួង ស្ថាប័នពាក់ព័ន្ធនៅតែខិតខំបំពេញតួនាទីរបស់ខ្លួនប្រកប ដោយស្មារតីទទួលខុសត្រូវដើម្បីសម្រេចបាននូវគោល បំណងជាសសរស្តម្ភទាំងបីនៃគោលនយោបាយ (១) ការបង្កើនឱកាសការងារសមរម្យ និងមានផលិតភាពការងារខ្ពស់ (២) ការលើក កម្ពស់ការអភិវឌ្ឍជំនាញ និងធនធានមនុស្ស និង (៣) ការពង្រឹងអភិបាលកិច្ចទីផ្សារការងារផងដែរ៕

ដោយ៖ វឌ្ឍនៈ

ភ្នំពេញ ៖ បន្ទាប់ពីប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសដាក់ចេញនូវវិធានការបន្ធូរបន្ថយដល់អ្នកដំណើរបរទេសចូលមកកម្ពុជា ដុំណើរការហោះហើររបស់បរទេសចូលមកកម្ពុជាតាមផ្លូវអាកាសចាប់ផ្ដើមកើនឡើងវិញជាបន្តបន្ទាប់។ នេះបើតាមលោកស៊ីន ចាន់សេរីវុត្ថា អ្នកនាំពាក្យរដ្ឋលេខាធិការអាកាសចរណ៍ស៊ីវិល ថ្លែងប្រាប់នៅរសៀលថ្ងៃទី២២ ខែធ្នូនេះ។

លោកមានប្រសាសន៍ថា ក្រោយពេលរដ្ឋាភិបាលបានប្រកាសបើកបន្ធូរបន្ថយវិធានការចំពោះអ្នកដំណើរបរទេសចូលមកកម្ពុជា កំណើនភ្ញៀវទេសចរចូលមកកម្ពុជាបានកើនឡើង ពី៣០០នាក់ក្នុងមួយថ្ងៃ ទៅដល់៨០០នាក់ក្នុងមួយថ្ងៃ និងចំនួនជើងហោះហើរក៏បានកើនឡើង៦ជើងក្នុងមួយសប្ដាហ៍។ នេះសម្រាប់អាកាសយានដ្ឋានអន្តរជាតិភ្នំពេញ ហើយសម្រាប់អាកាសយានដ្ឋានអន្តរជាតិខេត្តសៀមរាបវិញក៏បានកើនឡើងដល់៦០នាក់ជាមធ្យមក្នុងមួយថ្ងៃ ខណៈពីមុនខេត្តនេះមិនមានទេសចរឆ្លងកាត់សោះឡើយ។

លោកបន្តថា កំណើនភ្ញៀវចូលមកនេះគឺរាប់ចាប់តាំងពីរដ្ឋាភិបាលប្រកាសបន្ធូរបន្ថយ មិនមែនរាប់តែទេសចរចាក់វ៉ាក់សាំងនោះទេ ហើយអាចនឹងកើនឡើងបន្ថែមទៀត បើសិនជាស្ថានភាពកូវីដ១៩នៅបណ្ដាប្រទេសនានាបានធូរស្រាលឡើងវិញ។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ក៏បានលើកឡើងផងដែរថា ការបើកឱ្យអ្នកដំណើរបរទេសចូលមកកម្ពុជាដោយមិនធ្វើចត្តាឡីស័ករបស់រដ្ឋាភិបាល នឹងជំរុញឱ្យវិស័យទេសចរណ៍មានសកម្មភាពកម្រើកឡើងវិញ ក្រោយពីបានដេកលង់លក់អស់រយៈពេលជិត២ឆ្នាំកន្លងមក។

លោកស្រីបន្តថា ក្រោយពេលរដ្ឋាភិបាលប្រកាសបើកប្រទេសភ្លាម សកម្មភាពទេសចរណ៍ក្នុងស្រុក ជាពិសេសអាជីវកម្មទេសចរណ៍តូចតាចបានកម្រើកឡើងភ្លាមៗ ហើយអាជីវកម្មធំៗក៏បាននិងកំពុងត្រៀមខ្លួនក្នុងការស្វាគមន៍និងចាំបម្រើដល់ភ្ញៀវទេសចរបរទេសនឹងចូលមកនៅពេលបន្តបន្ទាប់។

របាយការណ៍របស់ក្រសួងទេសចរណ៍កម្ពុជា ចេញផ្សាយកន្លងមកនេះ ក៏បានឱ្យដឹងថារយៈពេល១០ខែដំបូងនៃឆ្នាំ២០២១ កម្ពុជាទទួលបានអ្នកដំណើរបរទេសចូលតាមផ្លូវអាកាសចំនួនជិត៧ម៉ឺននាក់ប៉ុណ្ណោះ ក្នុងនោះព្រលានយន្តហោះអន្តរជាតិភ្នំពេញមានចំនួន៦ម៉ឺន១ពាន់នាក់ អាកាសយានដ្ឋានអន្តរជាតិកងកេងខេត្តព្រះសីហនុមានចំនួន៨ពាន់នាក់ និងអាកាសយានដ្ឋានអន្តរជាតិខេត្តសៀមរាបមានចំនួនតែ៤នាក់ប៉ុណ្ណោះ៕