ប៊្រែនដ៏ល្បីThe Habit Burger Grill ពង្រីកសាខាថ្មីនៅកម្ពុជា

ដោយៈសុខុម

ភ្នំពេញ: កាលពីជាង៥០ឆ្នាំមុន ភោជនីយដ្ឋានអាហារសម្រន់ ឬអាហា​ររហ័ស The Habit Burger Grill បានបើកដំណើរការជាផ្លូវការនៅក្រុង Santa Barbara នៃរដ្ឋកាលីហ្វ័រញ៉ា សហរដ្ឋអាមេរិក និងបានសាងកេរ្តិ៍ឈ្មោះល្បីរន្ទឺ ហើយគ្រោងនឹងបើកដំណើរការសាខាថ្មី បំផុតរបស់ខ្លួននៅកម្ពុជាឆាប់ៗនេះ។

យោងតាមសារព័ត៌មាន PR Newswire ចុះផ្សាយកាលពីថ្ងៃទី៣១ មករា ឱ្យដឹងថា ប៊្រែនភោជនីយដ្ឋានអាហារសម្រន់ ឬ អាហាររហ័សនេះនឹងបើកដំណើរការ ទីតាំងអន្តរជាតិថ្មីបំផុតរបស់ខ្លួន នៅក្បាលថ្នល់ ស្ថិតនៅតាមបណ្ដោយមហាវិថីព្រះនរោត្តម ស្ថិតក្នុងខណ្ឌចំការមន រាជធានីភ្នំពេញ នៅថ្ងៃទី៧ ខែកុម្ភៈ ដ៏ខ្លីខាងមុខនេះ។

លោក Iwona Alter នាយកផ្នែកម៉ាកយីហោ ឬ ប៊្រែនប្រចាំក្រុមហ៊ុន The Habit Burger Grill មានប្រសាសន៍ថា “វាជាកិត្តិយសណាស់ដែលយើងបើកដំណើរការ ទីតាំងភោជនីយដ្ឋាន The Habit Burger Grill ទី៥ របស់យើងនៅកម្ពុជា ដោយចាប់ដៃគូសហការ ជាមួយក្រុមហ៊ុនកម្ពុជាតេលា (Kampuchea Tela Company, LTD)”។ លោកបន្តថា “យើងទន្ទឹងរង់ចាំបម្រើសហគមន៍ ពលរដ្ឋនៅរាជធានីភ្នំពេញ ជាមួយនឹងអាហារដែលសម្រិតសម្រាំងដ៏មានឱជារស និងស្រស់ៗមកពីកាលីហ្វ័រញ៉ា ជាមួយនឹងសេវាបដិសណ្ឋារកិច្ចល្អឥតខ្ចោះ”។

ជាមួយរូបមន្តអាហារដ៏មានឱជារស ដែលរក្សាអាថ៌កំបាំងបានល្អបំផុត ភោជនីយដ្ឋាន The Habit Burger Grill បានឈ្នះពានរង្វាន់ចំណីហារជាច្រើននៅសហរដ្ឋអាមេរិក។ អាហារពិសេសប្រចាំហាងគឺ ឆាបឺកហ្គើ (Charburger)។ Charburger នេះថែមទាំងត្រូវបានគេប្រសិទ្ធនាមថា “បឺកហ្គើឆ្ងាញ់បំផុតនៅអាមេរិក” (Best Tasting Burger in America) ទៀតផងនៅខែកក្កដា ឆ្នាំ២០១៤ ហើយ The Habit Burger Grill បានបម្រើអាហារពិសេសបែបនេះ ចាប់តាំងពីឆ្នាំ១៩៦៩ មកម៉្លេះ។

ភោជនីយដ្ឋាន The Habit Burger Grill បានបើកដំណើរការសាខាទី១ របស់ខ្លួនក្នុងប្រទេសកម្ពុជា កាលពីខែតុលា ឆ្នាំ២០២០។ ហើយទីតាំងទី៥ នេះគឺជាការពង្រីកសាខាដំបូង របស់ប៊្រែននេះនៅកម្ពុជា សម្រាប់ឆ្នាំ២០២២ ជាមួយនឹងបើកសាខាបន្ថែមទៀតនៅក្នុងឆ្នាំនេះ៕ PR Newswire៕

ក្រសួងសាធារណការ គ្រោងដាក់ឱ្យដំណើរការកម្មវិធីកាត់ពិន្ទុលើបណ្ណបើកបរអ្នកល្មើសចរាចរណ៍

ដោយៈ សុផារី

ភ្នំពេញៈ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ថា ក្រសួងកំពុងសាកល្បងអនុវត្តន៍កម្មវិធី កាត់ពិន្ទុលើបណ្ណបើកបរ អ្នកល្មើសចរាចរណ៍ ដើម្បីឈានទៅអនុវត្តជាផ្លូវការនាពេលខាងមុខនេះ។

ថ្លែងក្នុងពិធីសំណេះសំណាល ជាមួយមន្ត្រីរាជការ ដែលជាអ្នកជិះម៉ូតូ នៃក្រសួងសាធារណការ និងដឹកជញ្ជូន នៅព្រឹកថ្ងៃទី ២ ខែកុម្ភៈនេះ លោកទេសរដ្ឋមន្ត្រីបានបន្តថា ការសាកល្បងនេះ កំពុងទទួលបានជោគជ័យ១០០ភាគរយ ទៅលើការដកពិន្ទុលើបណ្ណបើកបរ ចំពោះអ្នកប្រព្រឹត្តបទល្មើសចរាចរណ៍។ ការអនុវត្តពេញលេញ នឹងចាប់ផ្តើមក្នុងពេលឆាប់ៗនេះហើយ ដើម្បីពង្រឹងការអនុវត្តច្បាប់ចររាចរណ៍ផ្លូវគោក សំដៅឈានទៅកាត់បន្ថយអត្រាគ្រោះថ្នាក់ចរាចរណ៍នៅទាបបំផុត។

លោកបន្តទៀតថា “ក្រុមការងារជំនាញ កំពុងសាកល្បងលើម៉ាស៊ីនកម្មវិធីកាត់ពិន្ទុលើបណ្ណបើកបរចំនួន៥០គ្រឿង ខណៈគ្រោងទិញបន្ថែម២៥០គ្រឿងទៀត ដើម្បីផ្តល់ដល់មន្ត្រីនគរបាលចរាចរណ៍ បន្ទាប់ពីកម្មវិធីកាត់ពិន្ទុតាមរយៈកម្មវិធីទូរស័ព្ទដៃស្មាតហ្វូន បានតម្លើងរួចរាល់ដែលក្រសួងបានសហការ ជាមួយអគ្គស្នងការនគរបាលជាតិ”។

លោកទេសរដ្ឋមន្ត្រី បានបញ្ជាក់ថា កម្មវិធីនេះល្អណាស់ ពេលមានល្មើសច្បាប់ចរាចរណ៍ ប៉ូលីសស្នើសុំប័ណ្ណបើកបរ ហើយយកម៉ាស៊ីនទៅស្កេន និងឃើញព័ត៌មានទាំងអស់ ទាក់ទងប័ណ្ណបើកបរដូចជាប័ណ្ណបើកបរក្លែងក្លាយ ឬត្រឹមត្រូវនិងពិន្ទុ១២នៃប័ណ្ណបើកបរនីមួយៗ។ ក្នុងករណីអ្នកបើកបរល្មើសនឹងចរាចរណ៍ នឹងត្រូវបានដកអស់១២ពិន្ទុនោះ ត្រូវកែប្រែការបើកបរឡើងវិញ។

កម្មវិធីដកពិន្ទុបណ្ណបើកបរ និងពិន័យបទល្មើសចរាចរណ៍ផ្លូវគោក អាចចាប់យករូបភាពយានយន្ត ដែលបើកបរល្មើសនឹងច្បាប់ ដោយការស្កេនលើបណ្ណបើកបរ ដើម្បីកាត់បន្ថយពិន្ទុ ចំពោះអ្នកបើកបរយានយន្តខុសច្បាប់ ទៅតាមស្ថាននៃបទល្មើស ដូចជា មិនពាក់ខ្សែក្រវាត់សុវត្ថិភាព បើកបរលើសល្បឿនកំណត់ បើកបរក្នុងស្ថានភាពស្រវឹង ផ្ទុកមនុស្សលើសកំណ​ត់ ឬល្មើសភ្លើងសញ្ញាជាដើម៕

ក្រុមហ៊ុនតូយ៉ូតាខេមបូឌានាំចូលរថយន្តជាង៥០០គ្រឿងតាមនាវាធុនធំមិនធ្លាប់មានក្នុងប្រវត្តិសាស្ត្រ

ដោយៈ សុផារី

ក្រុងព្រះសីហនុៈ ក្រុមហ៊ុនរថយន្ត Toyota (Cambodia) Co. Ltd បាននាំចូលរថយន្តថ្មី មកកាន់ប្រទេសកម្ពុជា តាមរយៈនាវាដឹករថយន្តប្រភេទPORO រហូតដល់ទៅ៥២៧គ្រឿង ក្នុងរយៈពេលពីរថ្ងៃតែប៉ុណ្ណោះ ដែលនេះមិនធ្លាប់មានពីមុនមកក្នុងប្រវត្តិ នៃការដឹកជញ្ជូនរងយន្តតាមនាវាមកកាន់កម្ពុជា។

ប្រភពពីកំពង់ផែស្វយ័តក្រុងព្រះសីហនុ កាលពីថ្ងៃទី២៦ ខែមករា ឆ្នាំ២០២២ នាវាដឹករថយន្តប្រភេទ RORO ឈ្មោះWorld Spirit បានដឹកជញ្ជូនរថយន្តថ្មីរបស់ក្រុមហ៊ុន Toyota (Cambodia) Co. Ltd មកតាមមាត់ច្រកកំពង់ផែស្វយ័ត ក្រុងព្រះសីហនុ មានចំនួន២៦៩គ្រឿង។

ក្រោយមក នៅថ្ងៃទី៣១ ខែមករា ឆ្នាំ២០២២ នាវាដឹករថយន្តប្រភេទ RORO ឈ្មោះ Astra Ace ដែលជាប្រវត្តិសាស្រ្តថ្មី និងលើកទី២ ក្នុងការនាំចូលរថយន្តថ្មីរបស់ក្រុមហ៊ុន Toyota (Cambodia) Co. Ltd មានចំនួនច្រើនរហូតដល់ ២៥៨គ្រឿង ចូលចតតាមមាត់ច្រកកំពង់ផែអន្តរជាតិ ក្រុងព្រះសីហនុដដែល។

លោកថៃ ឬទ្ធី អគ្គនាយករងទទួលបន្ទុកអាជីវកម្ម កំពង់ផែស្វយ័តក្រុងព្រះសីហនុ និងសហការី ដែលបានចុះទទួលស្វាគមន៍ នៃការចូលចតនេះ បានមានប្រសាសន៍ថា នេះជាប្រវត្តិសាស្រ្ត និងលើកដំបូងក្នុងការដឹកជញ្ជូននាំចូលរថយន្តថ្មីរបស់ក្រុមហ៊ុនតូយ៉ូតា ក្នុងចំនួនច្រើនមកកាន់កម្ពុជាតាមរយៈមាត់ច្រកកំពង់ផែនេះ។

កាលពីថ្ងៃទី២៨ ខែធ្នូ ឆ្នាំ២០២១កន្លងទៅ លោកMasahiro Mikami ឯកអគ្គរាជទូតជប៉ុនប្រចាំកម្ពុជា បានថ្លែងប្រាប់សម្តេចតេជោ ហ៊ុន សែន ក្នុងជំនួបពិភាក្សាថា ក្រុមហ៊ុនToyota របស់ប្រទេសជប៉ុនកំពុងតែរៀបចំ ស្នើសុំបង្កើតរោងចក្រគ្រឿងបង្គុំរថយន្តនៅកម្ពុជា ហើយក៏មានក្រុមហ៊ុនជប៉ុនដទៃទៀត កំពុងតែស្នើសុំបង្កើតរោងចក្រផលិតអគ្គិសនី ដើរដោយឧស្ម័នធម្មជាតិ និងពន្លឺព្រះអាទិត្យនៅកម្ពុជាផងដែរ។

គិតត្រឹមខែមករា ឆ្នាំ២០២២នេះ មានក្រុមហ៊ុនចំនួន៤បាននិងកំពុងបើកដំណើរការរោងចក្រដំឡើងរថយន្ត នៅក្នុងប្រទេសកម្ពុជារួចមកហើយ។ ក្រុមហ៊ុនទាំងនោះរួមមាន ទី១ ក្រុមហ៊ុន Hyundai កាលពីឆ្នាំ២០១១ នៅសេដ្ឋកិច្ចពិសេសក្នុងទឹកដីខេត្តកោះកុង ជាការវិនិយោគរួមគ្នារវាងក្រុមហ៊ុន KH Motors និងក្រុមហ៊ុនលីយ៉ុងផាត់ ដែលអាចផ្គុំដំឡើងរថយន្តបានចំនួន ៣ពាន់គ្រឿងក្នុងមួយឆ្នាំ។

ទី២ ក្រុមហ៊ុន Daehan កាលពីឆ្នាំ២០១៨ នៅក្រុងបាវិត ខេត្តស្វាយរៀង ដែលអាចដំឡើងរថយន្តខ្ទង់២ម៉ឺនគ្រឿងក្នុងមួយឆ្នាំ។ ទី៣ ក្រុមហ៊ុន International VCV Industry CO,.ltd កាលពីឆ្នាំ២០១៨ ក្រុមហ៊ុនបានបង្កើតរោងចក្រផ្គុំ និងដំឡើងរថយន្ត ក្នុងទំហំទឹប្រាក់ជាង៤លានដុល្លាអាមេរិក។

ក្នុងខែកញ្ញាឆ្នាំ ២០២១ ក្រុមហ៊ុនRMA Cambodia រោងចក្រដំឡើងរថយន្ត Ford បានបោះទុនវិនិយោគប្រមាណ២១លានដុល្លារអាមេរិក នៅក្នុងខេត្តពោធិ៍សាត់ ដែលគ្រោងនឹងបញ្ចប់ការសាងសង់ នៅឆ្នាំ២០២២ខាងមុខនេះ៕

បរិច្ចាគឥលូវនេះ! ដើម្បីកុមារកម្ពុជា! តាមរយៈធនាគារហត្ថា

ដោយៈសហការី

ភ្នំពេញៈ ដើម្បីគាំទ្រដល់កុមារកម្ពុជា ទទួលបានការសម្រាកព្យាបាលជំងឺ និងសេវាថែរទាំសុខភាព ប្រកបដោយភាពកក់ក្តៅ ធនាគារហត្ថា និងមន្ទីរពេទ្យកុមារអង្គរ បាននឹងកំពុងសហការបង្កើតកម្មវិធីសប្បុរសធម៌មួយ ដែលមានឈ្មោះថា “បរិច្ចាគឥលូវនេះ! ដើម្បីកុមារកម្ពុជា”។

ក្នុងនោះផងដែរ គណនីសប្បុរសធម៌ ត្រូវបានបង្កើតសម្រាប់ឱ្យសប្បុរ​សជន​ទាំង​អស់ ងាយស្រួលធ្វើការ​បរិច្ចាគជូនមន្ទីរពេទ្យកុមារអង្គរ តាមរយៈ Hattha Mobile App​  ប្រព័ន្ធបាគង ឬ នៅតាម​បញ្ជរបេឡាសាខា របស់ ធនាគារ ហត្ថា គ្រប់ខេត្ត-ក្រុងដោយ​ឥតគិតថ្លៃ។  សប្បុរសជន ឣាចបរិច្ចាគជាមួយ​លេខ​គណនី 168000000225 (សម្រាប់ប្រាក់​រៀល) និង 168000000224 (សម្រាប់ប្រាក់​ដុល្លារ) ដែលមានឈ្មោះថា Hattha Bank Charity to Angkor Hospital for Children។

លោកដួង ច័ន្ទសុវិជ្ជា  អគ្គនាយកអភិវឌ្ឍន៍អាជីវកម្មនៃធនាគារហត្ថា បានមានប្រសាសន៍ថា “ជាការពិតណាស់កុមារ គឺជាសសរទ្រូង ទំពាំងស្នងឬស្សី និងធនធានដ៏សំខាន់នៃប្រទេសជាតិយើង។ ហើយក្នុងនាមខ្ញុំជាឪពុកមួយរូប អ្វីដែលខ្ញុំសង្ឃឹម និងចង់ឃើញនោះ គឺកូនៗមានសុខភាពល្អ ប្រាជ្ញាវាងវៃ ជាពិសេសទទួលបានការអប់រំមួយដ៏ល្អ ដើម្បីក្លាយខ្លួនទៅជាយុវជន​-យុវតីគំរូ ដែលមានសមត្ថភាពពេញលេញ ក្នុងការអភិវឌ្ឍន៍ប្រទេសជាតិឆ្ពោះទៅរកភាពរុងរឿង និងរីកចម្រើនតទៅមុខ”។

លោកបានបន្តទៀតថា “ស្របពេលជាមួយគ្នានេះដែរ ធនាគារហត្ថា ពិតជាយល់ច្បាស់អំពីចក្ខុវិស័យ ​​បេសកកម្ម និងការខិតខំប្រឹងប្រែងរបស់មន្ទីរពេទ្យកុមារអង្គរ ដែលកំពុងផ្តោតសំខាន់លើសុខភាព និងសុខមាលភាពរបស់កុមារកម្ពុជា ក៏ដូចជាការព្យាបាលកុមារទាំងនោះបានយ៉ាងល្អប្រៀបបានដូចជាកូនបង្កើតរបស់ខ្លួន”។ លោកបន្តថា “ដូច្នេះហើយបានជា ធនាគារ ហត្ថា បានបង្កើតកម្មវិធីសប្បុរសធម៌មួយនេះឡើង ដែលមានការចូលរួម និងគាំទ្រយ៉ាងខ្លាំងពីថ្នាក់គ្រប់គ្រង បុគ្គលិកនៃធនាគារ ហត្ថាទាំងអស់ ព្រមទាំងបើកឱកាសឱ្យសប្បុរសជននានាចូលរួម បរិច្ចាគថវិកាផ្ទាល់ខ្លួន ដើម្បីជួយដល់មន្ទីរពេទ្យ ឱ្យបន្តនូវកិច្ចប្រតិបត្តិការបស់ខ្លួនឱ្យបានយូរអង្វែង ជាពិសេសរួមចំណែកបណ្តុះ និងកសាងនូវទំពាំងស្នងឬស្សី និងអ្នកជំនាន់ក្រោយដ៏រឹងមាំ សម្រាប់ប្រទេសជាតិយើងនាពេលអនាគត”។

លោកដួង ច័ន្ទសុវិជ្ជា បានបន្តទៀតថា “តាមរយៈកម្មវិធីសប្បុរសធម៌មួយនេះ ខ្ញុំបាទសង្ឃឹមយ៉ាងមុតមាំថា នឹងមានការចូលរួមបរិច្ចាគ និងគាំទ្រពីសំណាក់អតិថិជន និងសប្បុរជននានា ដើម្បីឱ្យមន្ទីពេទ្យបន្តដំណើរដ៏វែងឆ្ងាយនេះ ក្នុងការផ្តល់នូវការព្យាបាលជំងឺ ដល់កុមារប្រកបដោយផាសុកភាព និងប្រសិទ្ធភាពខ្ពស់”។

លោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បានមានប្រសាសន៍ថា៖ “ក្នុងនាមជាថ្នាក់ដឹកនាំនៃមន្ទីរពេទ្យកុមារអង្គរ ខ្ញុំបាទពិតជាមានសេចក្តីសោមនស្សរីករាយ នូវរាល់សកម្មភាពមនុស្សធម៌ ដែលសមស្រ​បទៅនឹងទស្សនវិស័យ និងបេសកកម្មរបស់មន្ទីរពេទ្យ។ ជាក់ស្តែង ធនាគារ ហត្ថា គឺជាម្ចាស់ជំនួយដ៏ល្អមួយ ដែលបានគិតគូរដល់ការជួយសង្គ្រោះជីវិតកុមារកម្ពុជា។ តាមរយៈជំនួយដែលទទួលបាន ពីសកម្មភាពសប្បុរសធម៌នេះ មន្ទីរពេទ្យកុមារអង្គរនឹងយកទៅប្រើប្រាស់ ដើម្បីពិនិត្យព្យាបាលប្រកបដោយក្តីមេត្តា ករុណា និងគុណភាពខ្ពស់ជូនដល់កុមារ និងទារករាប់រយនាក់ក្នុងមួយថ្ងៃៗ ដែលកំពុងតែត្រូវការការព្យាបាលជាចាំបាច់បំផុត។

លោកបន្តថា “​ខ្ញុំបាទផ្ទាល់ ព្រមទាំងបុគ្គលិកគ្រប់លំដាប់ថ្នាក់ កុមារ និងអាណាព្យាបាលកុមារទាំងអស់ សូមសម្តែងនូវការថ្លែងអំណរអរគុណ  យ៉ាងជ្រាលជ្រៅដល់ធនាគារ ហត្ថា ព្រមទាំងស្ថាប័ន ជាច្រើនទៀតដែលតែងតែយកចិត្តទុកដាក់ មកលើកិច្ចការ​​មនុស្សធម៌ ជាពិសេស  ការព្យាបាលថែទាំរបស់មន្ទីរពេទ្យកុមារអង្គរ”៕

ដំណឹងល្អៈក្រុមហ៊ុនអាកាសចរណ៍ Cambodia Angkor Air ចាប់ផ្តើមហោះហើរឡើងវិញ

ដោយៈគង់ សូរិយា

ភ្នំពេញៈ ក្រុមហ៊ុន​អាកាសចរណ៍​កម្ពុជាបានឲ្យដឹងថា ក្រុមហ៊ុនអា​កា​សចរណ៍ Cambodia Angkor Air បានចាប់ផ្តើមជើងហោះហើរក្នុងស្រុកឡើងវិញ។

ក្រុមហ៊ុនអាកាសចរណ៍នេះ នឹងចាប់ផ្តើមជើងហោះហើរត្រង់ រវាងភ្នំពេញ-សៀមរាប និងភ្នំពេញ-ខេត្តព្រះសីហនុ ចាប់ពីថ្ងៃទី៤ ខែកុម្ភៈ ឆ្នាំ ២០២២ តាមកាលវិភាគជារៀងរាល់ថ្ងៃសុក្រ និងថ្ងៃអាទិត្យ។

ដោយឡែក កាលពីថ្ងៃទី២៦ ខែមករា ក្រុមហ៊ុន AirAsia បានចាប់ផ្តើមជើងហោះហើររវាងទីក្រុងភ្នំពេញ និងទីក្រុងកូឡាឡាំពួរឡើងវិញផងដែរ។ ទន្ទឹមគ្នានេះដែរ ក្នុងខែមករាដើមឆ្នាំ២០២២នេះ ក្រុមហ៊ុនអាកាសចរណ៍ Vietnam Airlines ក៏បានបន្ថែមជើងហោះហើររវាង ទីក្រុងភ្នំពេញ (PNH) និងទីក្រុងហូជីមិញ (HCM)។

ក្រុមហ៊ុនអាកាសចរណ៍ Vietnam Airlines​ បានចាប់ផ្តើមជើងហោះហើររបស់ពួកគេ មកកាន់ទីក្រុងភ្នំពេញ ហើយបានកំណត់ការហោះហើរ៤លើកក្នុងមួយសប្តាហ៍។ ឥឡូវនេះ ក្រុមហ៊ុនអាកាសចរណ៍នេះបានបន្ថែមជើងហោះហើរចំនួន៦ ទៀត សរុបគឺ១០ជើងក្នុងមួយសប្តាហ៍។

លោកស៊ិន ចាន់​សេរី​វុត្ថា អ្នកនាំពាក្យ​រដ្ឋលេខាធិការដ្ឋាន​អាកាសចរ​ស៊ីវិល​ បាន​ប្រាប់កាសែតក្នុងស្រុកថា កាលវិភាគ​ហោះហើរ ​នៅ​អាកាសយានដ្ឋាន​អន្តរជាតិ​ទាំង៣ របស់​កម្ពុជាបានបង្ហាញថា គិត​ត្រឹម​ចុងខែ​មករា​ឆ្នាំ​ ២០២២ មាន​ក្រុមហ៊ុន​អាកាសចរណ៍​ក្នុងស្រុក និង​ក្រៅ​ស្រុក​ប្រមាណ១០ កំពុង​ធ្វើ​ប្រតិបត្តិការ​ហោះហើរ​នៅ​កម្ពុជា ដោយមាន​ក្រុមហ៊ុន​ខ្លះ​ហោះហើរ​ចន្លោះ​ពី៣ ទៅ៤លើកក្នុង​១​សប្តាហ៍​។

លោក​បន្ថែមថា “ការហោះហើរ​ឡើងវិញ ជា​សញ្ញាណ​ល្អ​សម្រាប់​វិស័យ​អាកាសចរណ៍​កម្ពុជា​ ដែល​នឹង​ធ្វើឱ្យ​ការហោះហើរ​មមាញឹក​ ជា​បណ្តើរៗ​ ហើយ​អាច​នឹង​ឈានទៅ​ភាពប្រក្រតី​វិញ ​នាពេល​អនាគត​ដ៏​ខ្លី​ខាងមុខ​”៕

លំហូរ FDI បានហូរចូលប្រទេសថៃរហូតដល់៨២ពាន់លានដុល្លារ

ដោយ:ស្រីលិះ

បាងកក: ក្រសួងពាណិជ្ជកម្មថៃបានប្រកាសកាលពី ថ្ងៃចន្ទថា ប្រទេ​សថៃ ទទួលបានការវិនិយោគបរទេសសរុបចំនួន ៨២,៥០១ ពាន់លានបាតកាលពីឆ្នាំមុន ដោយបង្កើតការងារចំនួន ៥,៤៥ ដល់ប្រជាជនថៃ។

ប្រទេសជប៉ុន នៅតែជាវិនិយោគិនបរទេសខ្ពស់បំផុត ដោយឈរនៅលំដាប់កំពូលជាមួយនឹង ២៣,២៦០ ពាន់លានបាត ឬ ២៨,៦ ភាគរយនៃការវិនិយោគសរុប។

សហរដ្ឋអាមេរិកជាប់ចំណាត់ថ្នាក់លេខពីរ ដោយមានប្រាក់ចំនួន ៥,៩៤៨ ពាន់លានបាត (១៥,៤ ភាគរយ) និងប្រទេសសិង្ហបុរីជាប់ចំណាត់ថ្នាក់លេខ៣ មានទំហំទុនវិនិយោគកើនដល់១០,៥៣០ ពាន់លានបាត (១៥,១ ភាគរយ)។

ភាគច្រើននៃអាជីវកម្មបរទេសចំនួន៥៧០ ដែលបានផ្តល់អាជ្ញាប័ណ្ណក្នុងឆ្នាំ ២០២១ គឺទាក់ទងទៅនឹងឧស្សាហកម្មថ្មី ឬ S-Curve ។ រដ្ឋាភិបាលកំពុងស្វែងរកការទាក់ទាញអាជីវកម្ម S-Curve ជាមួយនឹងការផ្សព្វផ្សាយការវិនិយោគ ក្នុងគោលបំណងជំរុញការអភិវឌ្ឍន៍សេដ្ឋកិច្ច។

ការវិនិយោគបរទេសត្រូវបានគេរំពឹងថា នឹងពង្រីកនៅឆ្នាំនេះចំពេលមានសញ្ញាថាតម្រូវការក្នុងស្រុក និងអន្តរជាតិបានចាប់ផ្តើមងើបឡើងវិញ។

លោក Sinit បាននិយាយថានិន្នាការ នៃការវិនិយោគក្នុងការបណ្តាក់ទុនរួមគ្នាជាមួយក្រុមហ៊ុនថៃ ដើម្បីទទួលបានការលើកទឹកចិត្ត ពីក្រុមប្រឹក្សាវិនិយោគ នឹងជួយដល់ការងើបឡើងវិញនៃសេដ្ឋកិច្ចក្នុងស្រុក៕

Home prices set to surge in 2022

Higher inflation, a labour shortage and the rising prices of fuel and construction materials will drive new home prices higher this year after the housing price index kept declining since the first quarter of 2020.

Phanid Maneerattanaporn, director of construction and business development of homebuilder Landy Home (Thailand), said costs of housing construction this year will definitely rise.

“It will be a challenging year for homebuilders as the demand side is strong but the supply side or construction costs are worrying,” he said. “We need to manage costs the best to finish the units at the price we agreed with customers earlier.”

He said a higher consumer price index affects living costs and wages.

Prices of several construction materials like cement and steel rose, while fuel prices soared 50% after economic activities worldwide resumed.

According to the Bureau of Trade and Economic Indices, the Ministry of Commerce, the construction materials price index last year rose 8% from 2020, the highest increase since 2008 which saw a jump of 17.2% from 2007. In 2020, the index had declined by 1.8% from 2019.

Since July 2008, when the index hit a historic high at 125.7, the monthly index was the second highest in November last year at 116.

Source: Bangkok Post

Elon Musk មេធំរបស់ Tesla និងមេ Amazon រងការខាតបង់ធ្ងន់ធ្ងរបំផុត នៅដើមឆ្នាំនេះ

ដោយៈសុខុម

គូឡាឡាំពួ: កំពូលមហាសេដ្ឋីមានទ្រព្យ ច្រើនបំផុតទាំង៥រូបនៅលើភពផែនដី បានជួបគ្រោះបង់ខាតធ្ងន់ធ្ងរបំផុតក្នុងខែមករា ដើមឆ្នាំ២០២២ ដោយខាតបង់ប្រាក់សរុប រហូតដល់ទៅ១០៨,៩ពាន់លានដុល្លារអាមេរិក។

យោងតាមសារព័ត៌មាន The Edge Markets ចុះផ្សាយកាលពីថ្ងៃអង្គារ ទី០១ កុម្ភៈ ឱ្យដឹងថា ក្នុងខែមករា កន្លងទៅថ្មីៗនេះឱ្យដឹងថា ក្រុមមហាសេដ្ឋីប្រាក់ពាន់លាន (Billionaire) បានទទួលរងការខាតបង់ធ្ងន់ធ្ងរហៅមិនឮ នៅពេលអ្វីៗរាប់ចាប់ពីពាណិជ្ជកម្ម តាមប្រព័ន្ធអេឡិចត្រូនិក (E-commerce) រហូតដល់រូបិយប័ណ្ណឌីជីថល ព្រមទាំងហ្គេមអនឡាញបានដាំក្បាលយ៉ាងគំហុក។

ខែទី១ ដើមឆ្នាំ២០២២ ជាខែដែលមានហានិភ័យខ្ពស់ និងប្រែប្រួលខ្លាំងមិនអាចព្យាករដឹងមុន នៅពេលបណ្ដាវិនិយោគជ្រួលច្របល់ រឿងធនា​គារកណ្ដាលអាមេរិក (Federal Reserve) ដំឡើងអត្រាការប្រាក់អំឡុងពេលមានអតិថរណាខ្ពស់ ការរីករាលដាលវីរុសកូវីដ-១៩ ការកើនឡើងភាពតានតឹងកាន់តែខ្លាំងឡើង ផ្នែកភូមិសាស្ត្រនយោបាយ និងផលប៉ះពាល់ រយៈពេលវែង ដែលកំពុងបន្តកើតមានពីវិបត្តិ ក្នុងខ្សែសង្វាក់ផ្គត់ផ្គង់ទូទាំងពិភពលោក។

យោងតាមសន្ទស្សន៍មហាសេដ្ឋីប្រាក់ពាន់លាន Bloomberg Billionaires Index បង្ហាញថា ស្ដេចបច្ចេកវិទ្យា Elon Musk ដែលជាសហស្ថាបនិក ក្រុមហ៊ុនផលិតរថយន្តអគ្គិសនី Tesla បានខាតបង់ប្រាក់រហូតដល់ទៅ ៥០ពាន់លានដុល្លារអាមមេរិក។ ទោះជាយ៉ាងណា លោកនៅតែអាចរក្សាបានតំណែងកំពូលរបស់ខ្លួន ជាមួយនឹងទ្រព្យសម្បត្តិសរុបដែលនៅសេសសល់ចំនួន២២០ពាន់លានដុល្លារអាមេរិក។

ចំណាត់ថ្នាក់លេខ២ បានទៅលើលោក Jeff Bezos មេក្រុមហ៊ុន Amazon ជាមួយនឹងការកាន់កាប់ទ្រព្យសម្បត្តិ សរុប១៦៩ពាន់លានដុល្លារអាមេរិក ក្រោយខាតបង់២៣,៤ពាន់លានដុល្លារអាមេរិក ក្នុងខែមករាកន្លងទៅ។

សន្ទស្សន៍មហាសេដ្ឋីពាន់លាន Bloomberg Billionaires Index គឺជាការដាក់ចំណាត់ថ្នាក់ប្រចាំថ្ងៃ នូវកំពូលមហាសេដ្ឋីទាំង៥០០រូបរបស់ពិភពលោក។ តួលេខទាំងនេះ ត្រូវបានធ្វើបច្ចុប្បន្នភាព ដោយផ្អែកលើលទ្ធផលនៃការបិទការជួញដូរប្រចាំថ្ងៃ នៅក្នុងញូវយ៉ក សហរដ្ឋអាមេរិក៕ The Edge Markets៕

អ្នកវិនិយោគចិននៅតែជាអតិថិជនឈានមុខគេក្នុងការបញ្ជាទិញអចលនទ្រព្យច្រើនជាងគេនៅប្រទេសថៃ

ដោយៈស្រីលីស

ប្រទេសថៃៈ លោក Wichai Wirattaphan នាយកស្តីទីនៃមជ្ឈ​មណ្ឌលព័ត៌មានអចលនទ្រព្យ បាននិយាយកាលពីពេលថ្មីៗនេះថា ជិត៦០ ភាគរយនៃខុនដូ ដែលបានលក់ក្នុងរយៈពេលប្រាំបួនខែ ដំបូងកាលពីឆ្នាំ ២០២១ ត្រូវបានទិញដោយជនជាតិចិន។

យោងតាមស្ថិតិដែលចេញផ្សាយដោយ REIC ជនជាតិមកពីប្រទេសចំនួន ៥ គឺជាអ្នកទិញអចលនៈទ្រព្យដ៏ធំបំផុតនៅក្នុងប្រទេសថៃ រួមមានៈ

• ចិន៖ ១៧,៨ ពាន់លានបាត (៥៩,៩ ភាគរយ)
• វ៉ានូអាទូ៖ ១,០១ ពាន់លានបាត (៣,៤ ភាគរយ)
• សហរដ្ឋអាមេរិក៖ ៨៦៤ លានបាត (២,៩ ភាគរយ)
• ចក្រភពអង់គ្លេស៖ ៧៣២ លានបាត (២,៥ ភាគរយ)
• បារាំង៖ ៧១១ លានបាត (២,៤ ភាគរយ)

លោក Wichai បាននិយាយថា ជនជាតិ Vanuatu ទិញបានតែ ២៣យូនីតប៉ុណ្ណោះ ប៉ុន្តែវាបានធ្វើឱ្យមានការចាប់អារម្មណ៍បំផុត នៅក្នុងទីផ្សារអចលនទ្រព្យ ដោយសារតែយូនីតនីមួយៗ មានតម្លៃជាមធ្យម៤៤ លានបាត។

ក្នុងរយៈពេលប្រាំបួនខែដំបូង នៃឆ្នាំ២០២១ ទំហំមធ្យមនៃយូនីតដែលបានទិញ ភាគច្រើនមានទំហំ៤៣ម៉ែត្រការ៉េ ដែលមានតម្លៃជាមធ្យម ៤.៩ លានបាត ឬ ១១៤,០០០ បាតក្នុងមួយម៉ែត្រការ៉េ។

ជនជាតិអាមេរិក បានទិញយូនីតធំជាងជាមធ្យម៥៤.៨ ម៉ែត្រការ៉េ ខណៈដែលយូនីតថ្លៃបំផុត ឬ៥.១ លានបាតជាមធ្យម ត្រូវបានទិញដោយជនជាតិសិង្ហបុរី។

រាជធានី ខេត្តចំនួនប្រាំដែលពេញនិយម ក្នុងចំណោមអ្នកទិញអចលន ទ្រព្យរទេសក្នុងប្រទេសថៃរួមមាន ទីក្រុង បាងកក ខេត្តឈុនបុរី ភូកេត ឈៀងម៉ៃ និងខេត្តប្រាជុបបុរី៕

លោកបណ្ឌិតគីម ហ៊ាងបង្ហើបពីគំរោងខុនដូដែលនឹងមានតម្រូវការទីផ្សារខ្ពស់

ដោយៈគង់ សូរិយា

ភ្នំពេញៈ ស្របពេលតម្រូវការលំនៅដ្ឋាន បែបសហកម្មសិទ្ធ (ខុនដូ)កើនឡើងពីប្រជាពលរដ្ឋខ្មែរ និន្នាការទីផ្សារនេះ កំពុងវិវត្តន៍ទៅរកតម្រូវការប្រជាពលរដ្ឋក្នុងស្រុក។

លោកឧកញ៉ាបណ្ឌិតគីម ហ៊ាង ប្រធាន KW Cambodia បានមានប្រសាសន៍ឲ្យដឹងនាពេលថ្មីៗនេះថា តម្រូវការខុនដូនឹងកើនឡើងខ្ពស់នៅក្នុងប៉ុន្មានឆ្នាំខាងមុខនេះ ដោយសារទីក្រុងកាន់តែមានការកកស្ទះចរាចរ ណ៍ ព្រោះប្រជាជនចូលមករស់នៅរាជធានីភ្នំពេញមានចំនួនច្រើន។

លោកបន្តថា “ហេតុនេះទីផ្សារខុនដូដែលមានតម្លៃមធ្យម ដែលមានចាប់ពី១០០០ ទៅ១៥០០ដុល្លារក្នុងមួយម៉ែត្រការ៉េ គឺជាទីផ្សារដែលមានភាពស្រេកឃ្លាន”។លោកបន្តថា “តំបន់បឹងរាំង ខ័ណ្ឌដូនពេញនិងតំបន់ទីក្រុងដទៃទៀត នឹងមានការវាយផ្ទញល្វែងចោល ហើយសាងសង់ខុនដូជំនួសវិញនាពេលអនាគត”។

លោកបណ្ឌិតបន្តថា ការសាងសង់ខុនដូតម្លៃមធ្យម នៅតំបន់ទាំងនេះ ដូចជា ខ័ណ្ឌដូនពេញ​ ៧មករា ខ័ណ្ឌចំការមនជាដើម នឹងមានទីផ្សារខ្ពស់ ព្រោះវាជាតំបន់ដែលងាយស្រួលក្នុងការរស់នៅ មានសេវាកម្មស្បូរបែបទាំងសាលារៀន ភោជនីយដ្ឋាន ហាងកាហ្វេជាដើម។

យោងតាមការសិក្សារបស់ក្រុមហ៊ុន Urban Living Solution បានបង្ហាញថា រាជធានីភ្នំពេញនឹងមានមនុស្សរស់នៅ កើនដល់ចន្លោះ៤,៥ ទៅ៥លាននាក់នៅឆ្នាំ២០៣០ខាងមុខ។ កំនើនប្រជាសាស្រ្តនេះ នឹងធ្វើឲ្យប្រជាពលរដ្ឋ ងាកមករស់នៅតាមខុនដូកាន់តែច្រើន ដោយសារទី១ ការកកស្ទះចរាចរណ៍ពិបាកធ្វើដំណើរ និងចំណាយពេលយូរ ទី២ ការកើនឡើងតម្លៃអចលនទ្រព្យខ្ពស់នៅក្នុងទីក្រុង និងទី៣ ការរីកចម្រើនបច្ចេកវិទ្យានឹងជំរុញធ្វើឲ្យគុណភាពជីវិតប្រសើរឡើង៕