ហាង Burger របស់អាមេរិកដ៏ល្បីបន្តពង្រីកការិនិយោគខ្លួននៅកម្ពុជា ទោះស្ថិត ក្នុងពេលមានវិបត្តិ

ដោយៈ ប៊ី

ភ្នំពេញៈ ក្រុមហ៊ុនThe Habit Burger Grill ដែលមានបទពិសោធន៍ជាង៥០ឆ្នាំ លើប៊ឺហ្គឺររសជាតិឆ្ងាញ់បំផុតរបស់អាមេរិក ប្រកាសបើកសាខាថ្មីបន្ថែមនៅអូឡាំពិក ភ្នំពេញនៅថ្ងៃទី១៤ ខែឧសភានេះ បើទោះបីជាពិភពលោកកំពុងជួបវិបត្តិ។

ក្រុមហ៊ុនភោជនីយដ្ឋាន ដែលមានមូលដ្ឋាននៅរដ្ឋកាលីហ្វ័រញ៉ាល្បីឈ្មោះនេះ បានប្រកាសថា បើកដំណើរការភោជនីយដ្ឋានទី៤របស់ខ្លួន នៅអូឡាំពិក ដោយបានសហការជាមួយនឹងក្រុមហ៊ុនកម្ពុជាតេលា។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុននៅថ្ងៃទី១៤ ខែឧសភា ឆ្នាំ២០២១។

លោក Iwona Alter ប្រធានក្រុមហ៊ុន The Habit Burger Grill បានថ្លែងថា “យើងរីករាយ នឹងបន្តការពង្រីកវត្តមាននៅទីផ្សារអន្ដរជាតិ ដោយចូលរួមសហការជាមួយដៃគូថ្មីរបស់យើងគឺក្រុមហ៊ុន Kampuchea TelaCompany ដើម្បីពង្រីកទីតាំងរបស់យើងនៅកម្ពុជា”។

លោកបានបន្តថា “យើងទន្ទឹងរង់ចាំបង្កើតអ្នកគាំទ្រ Habit ថ្មីដោយអញ្ជើញពួកគេឱ្យរីករាយ នឹងម្ហូបដែលធ្វើដោយដៃរបស់យើង និងទទួលបានបដិសណ្ឋារកិច្ចល្អបំផុត ហើយ និងប្រកបដោយបរិយាកាសស្វាគមន៍ ដូចនៅកាលីហ្វ័រញ៉ាខាងត្បូង”។

The Habit បាននិងកំពុងចាប់ដៃគូជាមួយក្រុមហ៊ុន Kampuchea Tela Company ដើម្បីអភិវឌ្ឍ និងដំណើរការភោជនីយដ្ឋាននៅទូទាំងព្រះរាជាណាចក្រកម្ពុជា៕

ថ្លៃឈ្នួលផ្ទះនៅតំបន់ The Peak ក្នុងទីក្រុងហុងកុងបានហក់ឡើងកប់ពពកឡើងវិញ

ដោយៈសុខុម

ហុងកុង: ថ្លៃឈ្នួលផ្ទះប្រណីតនៅតំបន់ The Peak ដែលជាតំបន់អចលនទ្រព្យមានហាងឆេងខ្ពស់បំផុតប្រចាំក្រុងហុងកុង កំពុងតែហក់ឡើងខ្ពស់មិនធ្លាប់មានជាប្រវត្តិសាស្ត្រ។

យោងតាមសារព័ត៌មាន South China Morning Post ចុះផ្សាយនៅថ្ងៃទី១៤ ឧសភា នេះឱ្យដឹងថា ផ្ទះវីឡាដាច់ពីគេមួយ ដែលមានផ្ទៃក្រឡាសរុប៦៥២ម៉ែត្រការ៉េ នៅតាមបណ្ដោយផ្លូវភ្នំ73 Mount Kellett Road ត្រូវបានគេជួលកាលពីពេលថ្មីៗនេះ ក្នុងតម្លៃខ្ពស់កប់ពពករហូតដល់ទៅ១,៦លានដុល្លារហុងកុង (២០៦,០០០ដុល្លារអាមេរិក) ក្នុងមួយខែ ដោយធ្វើឱ្យវាក្លាយជាផ្ទះ ដែលមានថ្លៃឈ្នួលខ្ពស់បំផុតនៅក្រុងហុងកុង ប្រចាំឆ្នាំ២០២១។

យោងតាមភ្នាក់ងារអចលនទ្រព្យក្នុងស្រុកឱ្យដឹងថា ផ្ទះវីឡាប្រណីតដែលស្ថិតនៅតាមបណ្ដោយផ្លូវភ្នំ73 Mount Kellett Road ត្រូវបានជួលក្នុងតម្លៃប្រមាណ១,៦លានដុល្លារហុងកុង។ ទោះជាយ៉ាងណា អត្តសញ្ញាណរបស់អ្នកជួល មិនត្រូវបានទម្លាយឱ្យដឹងនោះទេ ព្រោះវាជាការសម្ងាត់។ ផ្ទះវីឡានេះកម្មសិទ្ធិរបស់ក្រុមហ៊ុនវិនិយោគ Giant Expert Investments ដែលនាយកក្រុមហ៊ុននេះមានឈ្មោះថា Yau Ka-cheung។

លោកEric Lee នាយកផ្នែកលក់ប្រចាំទីភ្នាក់ងារអចលនទ្រព្យ Centaline Property Agency បានលើកឡើងថា “ផ្ទះនេះប្រសិនបើដាក់លក់លើទីផ្សារ អាចនឹងលក់បានថ្លៃ១ពាន់លានដុល្លារហុងកុង (ជិត១២៩លានដុល្លារអាមេរិក)”។

លោកបានគូសបញ្ជាក់ថា ផ្ទះដែលអាចចតរថយន្តបានពីចន្លោះពី២០ ទៅ៣០គ្រឿង និងស័ក្ដិសមសម្រាប់ថៅកែក្រុមហ៊ុនធំៗ ដែលចូលចិត្តទទួលភ្ញៀវបែបនេះ ពិតជាកម្ររកបានណាស់។

លោកបានបន្ថែមទៀតថា “លុយ១លានទៅ២លានដុល្លារហុងកុង គ្រាន់តែជាកាកលុយប៉ុណ្ណោះសម្រាប់ពួកគេ”។

កាលពីមុន ផ្ទះដែលមានបន្ទប់គេងចំនួន៥ និងមានសួនច្បារមួយនេះត្រូវបានជួលក្នុងតម្លៃ១លានដុល្លារហុងកុង (ជិត១៣០.០០០ដុល្លារអាមេរិក) កាលពីខែធ្នូ ឆ្នាំ២០១៨។ ម្ចាស់បច្ចុប្បន្នបានទិញផ្ទះនេះក្នុងតម្លៃ៤៥៤,៨លានដុល្លារហុងកុង (ជាង៥៨លានដុល្លារអាមេរិក) ក្នុងឆ្នាំ២០១០។

ទោះជាយ៉ាងណា ទាំងក្រុមហ៊ុន Giant Expert Investments និងលោក Yau Ka-cheung មិនអាចទាក់ទងសុំការបំភ្លឺបានទេជុំវិញផ្ទះនេះ៕

វិធីសាស្រ្តវិនិយោគអចលនទ្រព្យដ៏មានឥទ្ឋិពលរបស់មហាសេដ្ឋី លោក Warren Buffett

ដោយគង់ ម៉ាលីន

ភ្នំពេញៈ លោកWarren Buffettជាកំពូលមហាសេដ្ឋីលើលោកមួយរូប ដែលទទួលបានជោគជ័យក្នុងការវិនិយោគលើវិស័យអចលនទ្រព្យ និងវិស័យផ្សេងៗទៀតជាច្រើន លោកបានប្រើប្រាស់វិធីសាស្រ្តជាច្រើន ដើម្បីទទួលបានផលពីការវិនិយោគរបស់ខ្លួន។

ជាទូទៅមហាសេដ្ឋីរូបនេះ តែងតែប្រើប្រាស់វិធីសាស្រ្តចំនួន៤ ហើយជាទូទៅលោក Warren Buffett វិនិយោគតែលើក្រុមហ៊ុន ដែលមានតម្លៃស្នូល (Intrinsic value) អាចបង្កើតកំរិតផលចំណេញបានជាទីគាប់ចិត្ត។

វិធីសាស្រ្តទី១ របស់លោក គឺមិនផ្តោតការវិនិយោគភាគហ៊ុនរបស់ក្រុមហ៊ុន ហើយដេកចាំលក់ចេញនៅពេលតម្លៃហ៊ុនឡើងថ្លៃនោះទេ។ ដូចគ្នានេះដែរ អ្នកគួរវិនិយោគលើប្រភេទអចលនទ្រព្យដែលមានតម្លៃផ្នែកសេដ្ឋកិច្ច ពោលគឺអាចរកចំណូលបាន ដូចជា ការជួលដី ឃ្លាំង។ល។ ធ្វើដូច្នេះ អ្នកមិនមែនទិញអចនទ្រព្យទុកកប់លុយចោល ហើយរង់ចាំពេលលក់យកចំណេញនោះទេ។

ទី២ ចាត់ទុកការវិនិយោគលើផ្សារហ៊ុនជាមុខរបរ ៖ លោក Warren Buffett បានចាត់ទុកការវិនិយោគជាមុខរបរ មិនមែនគ្រាន់តែទិញលក់យកចំណេញតែមួយគ្រាៗនោះទេ។ ធ្វើដូច្នេះទើបលោកអាចគ្រប់គ្រងចាត់ចែងផលបត្រ័ (Portfolio) វិនិយោគបានល្អព្រោះលោកនៅជាប់ជាមួយនឹងទីផ្សារ ហើយក្តាប់ព័ត៌មានបានច្បាស់ល្អ។

ការណ៍នេះ ផ្ទុយទាំងស្រុងពីអ្នកវិនិយោគលើផ្សារហ៊ុនទូទៅ ដោយគ្រាន់តែទិញ-លក់យកចំណេញក្នុងរយៈពេលខ្លី ហើយក្តាប់ព័ត៌មានមិនបានល្អ ដែលជាបច្ច័យនាំអោយមានការសំរេចចិត្តខុស។ ដូចគ្នានេះដែរ អ្នកវិនិយោគលើវិស័យអចលនទ្រព្យ គួរចាត់ទុកថា ការវិនិយោគរបស់ខ្លួនជាមុខរបរ ហើយកសាងសមត្ថភាពអោយខ្លាំង ជាជាងការវិនិយោគតាមបែបទឹកជោរទឹកនាចដូចមនុស្សទូទៅ។

ទី៣ វិនិយោគលើអ្វីដែលអ្នកស្គាល់ច្បាស់ៈ លោកមិនវិនិយោគលើវិស័យណា ដែលលោកមិនយល់ច្បាស់នោះទេ ព្រោះជៀសវាងកំហុសឆ្គងនៅក្នុងការសំរេចចិត្ត។ ដូចគ្នានេះដែរ ប្រសិនបើអ្នកចង់ឲ្យការវិនិយោគលើអចលនទ្រព្យ ទទួលបានភាពជោគជ័យខ្ពស់ អ្នកគួរផ្តោតតែទៅលើប្រភេទអចលនទ្រព្យ ដែលអ្នកយល់ដឹងច្បាស់។

ឧទាហរណ៍ ដូចជាការផ្តោតលើការវិនិយោគលើដីជាយក្រុង នៅតំបន់ភ្នំប្រសិទ្ធិ ឬតំបន់អរិយ្យក្សត្រ។ល។ អ្នកនឹងមិនអាចជោគជ័យខ្លាំងនោះទេ ប្រសិនបើអ្នកធ្វើខុនដូលក់ផង និងវិនិយោគលើដីធ្លីនៅជាយក្រុងផងនោះ។

ទី៤ មានវិន័យ និងវិនិយោគសំរាប់រយៈពេលវែងៈ លោកមិនស្លន់ស្លោរ រួចលក់ហ៊ុនចេញនៅពេលដែលស្ថានភាពសេដ្ឋកិច្ច មិនសូវអំណោយផលនោះទេ។ ជាទូទៅលោកវិនិយោគរយៈពេលវែង បើស្ថានភាពសេដ្ឋកិច្ចមិនសូវល្អហើយតម្លៃហ៊ុនធ្លាក់ចុះ លោកផ្តោតលើការទិញហ៊ុនបន្ថែមក្នុងតម្លៃទាប។

ការប្រព្រឹត្តរបស់លោកផ្ទុយពីឥរិយាបទ នៃអ្នកវិនិយោគទូទៅ។ ដោយឡែកការវិនិយោគលើអចលទ្រព្យ ក៏គួរយកគំរូតាមលោក Warren Buffett ត្រង់ចំណុចវិន័យ និងចក្ខុវិស័យរយៈពេលវែងនេះដែរ។

អញ្ចឹងហើយយុទ្ធសាស្រ្តធនាគារដីធ្លី Land Banking ជាយុទ្ធសាស្រ្តសមស្របបំផុត ជាពិសេសសំរាប់អនុវត្តនៅប្រទេស ដែលសេដ្ឋកិច្ចមានការរីកលូតលាស់លឿនដូចប្រទេសកម្ពុជា៕

សិក្សាវិធីសាស្រ្តចំនួនបីនេះដើម្បីទិញដីបានតម្លៃល្អក្នុងកំឡុងវិបត្តិ

ដោយៈគង់ សូរិយា

ភ្នំពេញៈ វិបត្តិជំងឺកូវីដ១៩ កំពុងធ្វើឲ្យមានការបារម្ភ តម្លៃដីធ្លីក៏នៅទ្រឹង ការទិញលក់ស្ងប់ស្ងាត់ ហេតុនេះ ការជ្រើសរើសវិនិយោគដីធ្លី ដែលមានវិធីសាស្រ្តត្រឹមត្រូវ នឹងធ្វើឲ្យយើងទិញដីបានល្អ តម្លៃល្អ និងអាចមានផលចំណេញលឿន ពិសេសអាចបញ្ចៀសហានិភ័យបាន។

អ្នកជំនាញអន្តរជាតិបានលើកជារូបមន្តមួយចំនួន ដើម្បីធ្វើឲ្យការវិនិយោគដីធ្លីទទួលបានផលចំណេញ ដោយក្បួនមួយចំនួនដូចជា ៖

សិក្សាលើសក្តានុពលទីតាំង

នៅពេលនិយាយពីអចលនទ្រព្យ គឺនិយាយពីទីតាំង ទីតាំង និងទីតាំង ព្រោះទីតាំងមានសារៈសំខាន់ណាស់ សំរាប់កំណត់ភាពជោគជ័យរបស់គម្រោងណាមួយ ព្រោះតម្លៃអចលទ្រព្យពិសេសដីធ្លី ដែលមានតម្លៃឡើងថ្លៃលឿន។ ទីតាំងដែលគួរវិនិយោគគួរធ្វើនៅតំបន់ ដែលស្ថិតក្នុងផែនការអភិវឌ្ឍន៍របស់រដ្ឋាភិបាល តំបន់ព្រំដែន តំបន់ជាយក្រុង តំបន់ដែលមានការសាងសង់ហេដ្ឋារចនាសម្ព័ន្ឋរបស់រដ្ឋាភិបាលជាដើម។

ប័ណ្ណកម្មសិទ្ឋ

ប័ណ្ណកម្មសិទ្ឋច្បាស់លាស់នៅកម្ពុជា ហាក់ដូចជាមានបញ្ហាស្មុគ្រស្មាញមួយ ដោយសារមន្រ្តីមូលដ្ឋាន និងមានសមត្ថកិច្ចបានលួចេញប្លង់ត្រួតលើគ្នា ដើម្បីផលប្រយោជន៍ទោះបីពួកគេដឹងថាខុសច្បាប់ក៏ដោយ។ ហេតុនេះ ការសិក្សាលំអិតម្តងហើយម្តងទៀត ពីប័ណ្ណកម្មសិទ្ឋដីធ្លីឬអចលនទ្រព្យ វានឹងអាចបញ្ចៀសហានិភ័យ ដែលធ្វើឲ្យការវិនិយោគរបស់លោក អ្នកមានសុវត្ថិភាព និងមានឳកាសចំណេញខ្ពស់។

ប្រើរូបមន្តពិសេស

តាមធម្មតាដីតែងមានការដាក់លក់ច្រើន ហេតុនេះមុនសម្រេចជ្រើសរើសយកទីតាំងណាមួយ អ្នកវិនិយោគអន្តរជាតិបានផ្តល់ជាយោបល់ថា គួរជ្រើសរើសដី៥០ទៅ១០០ទីតាំង ហើយជ្រើសរើសយក១០ក្បាលដីឬទីតាំង ដើម្បីយកមកវិភាគពីតម្លៃ ពីសក្តានុពលទីតាំង ដើម្បីប្រាកដថាដីដែលខ្លួនបានជ្រើសរើសពិតជាល្អ។

បន្ទាប់មកគេជ្រើសរើសយកដី៣ទៅ៤ទីតាំង ដើម្បីសម្រេចចិត្តចុងក្រោយថាគួរជ្រើសរើសដីណាមួយ ដែលមានសក្តានុពល ដែលអ្នកវិនិយោគអាចដឹងថា ដីដែលខ្លួនបានជ្រើសរើសពិតជាល្អ មានទីតាំងល្អ មានប័ណ្ណកម្មសិទ្ឋត្រឹមត្រូវ និងមានឳកាសចំណេញខ្ពស់៕

គម្រោងលំនៅដ្ឋាននតម្លៃសមរម្យតម្លៃ១០០លានដុល្លារនឹងនឹងបញ្ចប់ការសាងសង់ទាំងស្រុងនៅចុងឆ្នាំនេះ

ដោយៈ សាវុធ

ភ្នំពេញៈ គម្រោងអភិវឌ្ឍន៍លំនៅដ្ឋាននតម្លៃសមរម្យ “ទីក្រុងរណបសិរីមង្គល” ក្រោមទុនវិនិយោគប្រមាណ១០០លានដុល្លាររបស់ក្រុមហ៊ុន Worldbridge Homes Co., Ltd នឹងបញ្ចប់ការសាងសង់គម្រោងទាំងស្រុងនៅចុងឆ្នាំ២០២១នេះ។

លោកយក់ សុធីរិទ្ធប្រធានគ្រប់គ្រងទូទៅក្រុមហ៊ុន Worldbridge Home Co., Ltd បានថ្លែងប្រាប់កាសែតអន្តរជាតិមួយកាលពីថ្មីៗនេះថា បើទោះបីមានកម្មករមួយចំនួនមិនអាចមកធ្វើការបាន ដោយសាររស់នៅក្នុងតំបន់បិទខ្ទប់ក៏ដោយ ការដ្ឋាន “ទីក្រុងរណបសិរីមង្គល” នឹងត្រូវបញ្ចប់១០០ភាគរយ នៅក្នុងឆ្នាំ២០២១ នេះ ខណៈការសាងសង់កំពុងមានដំណើរការទៅមុខជាប្រចាំ។

លោកបានថ្លែងថា សកម្មភាពក្នុងការដ្ឋានរបស់យើងនឹងឈានទៅបិទបញ្ចប់ក្នុងពេលឆាប់ៗនេះ ខណៈការលក់នៅពេលនេះសម្រេចបានជាង៩៥ ភាគរយ។ នៅក្នុងអំឡុងពេលបិទខ្ទប់នេះ នៅការដ្ឋានមានកម្មករធ្វើការចន្លោះពី៤០០-៥០០នាក់រៀងរាល់ថ្ងៃ។

លោកបានបន្តថា គិតមកដល់ពេលនេះក្រុមហ៊ុនបានប្រគល់ផ្ទះឱ្យអតិថិជនចំនួន៨២៣ខ្នងរួចមកហើយ ខណៈផ្ទះនៅសល់១.៦៣៤ ខ្នងទៀតនឹងត្រូវប្រគល់ក្នុងឆ្នាំ ២០២១។ លំនៅឋានក្នុងគម្រោងនេះមានតម្លៃចាប់ពី២៥.០០០-៣០.០០០ ដុល្លារ។

“ទីក្រុងរណបសិរីមង្គល” គឺជាគម្រោងអភិវឌ្ឍន៍លំនៅដ្ឋាននតម្លៃសមរម្យដំបូងគេនៅកម្ពុជា ដែលបានបើកការដ្ឋានសាងសង់ជាផ្លូវការនាដើមឆ្នាំ២០១៨ លើផ្ទៃដី៤៥ហិកតា ដោយមានខ្នងផ្ទះសរុប២៤៥។ គម្រោងនេះស្ថិតក្នុងសង្កាត់រកាខ្ពស់ ក្រុងតាខ្មៅ ចម្ងាយប្រមាណ១៤គីឡូម៉ែត្រពីរាជធានីភ្នំពេញ (ស្ពានព្រះមុនីវង្ស)។

Worldbridge Home Co., Ltd គឺជាក្រុមហ៊ុនបុត្រសម្ព័ន្ធរបស់ Worldbridge Group ដែលកំពុងអភិវឌ្ឍន៍គម្រោងធំៗនៅក្នុងរាជធានីភ្នំពេញមានដូចជា The Bridge និង The Peak។

យោងតាមក្រសួងក្រសួងរៀបចំដែនដី នគរូបនីយកម្ម និងសំណង់ គិតត្រឹមចុងឆ្នាំ២០២០ នៅកម្ពុជាមានគម្រោង អភិវឌ្ឍន៍លំនៅឋានតម្លៃសមរម្យចំនួន៥ ដែលស្មើនឹងបន្ទប់ស្នាក់នៅសរុប៨.៣៣១ ខ្នងផ្ទះ និងចំនួន៧.២៥៦យូនីត។

កាលពីឆ្នាំ២០១៤ កម្ពុជាបានអនុម័តគោលនយោបាយ លំនៅឋានថ្នាក់ជាតិ ដើម្បីជំរុញការអភិវឌ្ឍលំនៅឋានឱ្យបានកាន់តែច្រើនជូនប្រជាពលរដ្ឋ។ យោងតាមគោលនយោបាយនេះ កម្ពុជានឹងត្រូវការផ្ទះបន្ថែមប្រមាណ៥ម៉ឺនខ្នងក្នុង១ឆ្នាំ រហូតដល់ឆ្នាំ ២០៣០៕

គម្រោងផ្លូវថ្មើរជើងក្រោមដី២កន្លែងនៅខេត្តព្រះសីហនុនឹងដាក់ដំណើរការឆាប់ៗខាងមុខនេះ

ដោយៈ ប៊ី

ភ្នំពេញៈ គម្រោងផ្លូវថ្មើរជើងក្រោមដី២កន្លែងនៅខេត្តព្រះសីហនុ សម្រេចការសាងសង់បាន៨៥ភាគរយ ដោយគ្រោងនឹងបញ្ចប់ការសាងសង់នៅចុងខែឧសភានេះ ខណៈផ្លូវថ្មើរជើងនេះនឹងបង្កភាពងាយស្រួល ក្នុងការឆ្លងផ្លូវរបស់ប្រជាពលរដ្ឋ បញ្ចៀសការកកស្ទះ និងគ្រោះថ្នាក់ចរាចរណ៍។

លោកវង្ស សំអាតអគ្គមេបញ្ជាការរងកងវិស្វកម្មតេជោ ហ៊ុន សែន សៀមរាប និងជាអ្នកដឹកនាំគម្រោងសាងសង់នេះ បានថ្លែងប្រាប់អ្នកសារព័ត៌មានកាលពីម្សិលមិញថា ផ្លូវថ្មើរជើងក្រោមដីជាលើកដំបូងនៅខេត្តព្រះសីហនុនេះ នឹងបញ្ចប់ការសាងសង់នៅចុងខែឧសភានេះ ខណៈតាមផែនការគឺគម្រោងត្រូវបញ្ចប់នៅខែសីហាឯណោះ។ ក្រុមការងារបានខិតខំបំពេញ ការងារយ៉ាងសកម្ម ទើបធ្វើឲ្យគម្រោងសាងសង់លឿនជាងផែនការរហូតដល់២ខែ។

លោកបានបន្តថា ផ្លូវថ្មើរជើងក្រោមដីទំាង២ខ្សែនេះ គឺនៅត្រង់ចំណុច រោងចក្រកាត់ដេរញ៉ូវស្តារ និងក្បែរវិទ្យាល័យឃ្លាំងលើ ដើម្បីបង្កលក្ខណៈងាយស្រួល ដល់សិស្សានុសិស្ស កម្មករ កម្មការិនី បានឆ្លងកាត់ផ្លូវប្រកដោយសុវត្ថិភាព ខណៈទីតំាងនេះមានស្ថានភាពចរាចរណ៍មមាញឹកខ្លំាង ងាយគ្រោះថ្នាក់និងស្ទះចរាចរណ៍ជាញឹកញាប់។

លោកបានថ្លែងទៀត “ផលប្រយោជន៍វាច្រើនសម្រាប់ប្រជាពលរដ្ឋ សម្រាប់សិស្សានុសិស្ស ប្រសិនបើយើងទាំងអស់គ្នារួមចំណែកផ្តល់ផលប្រយោជន៍ឲ្យវា ទទួលយកផលពីវា តែបើសង់ហើយយើងទាំងអស់គ្នាប្រជាជន ប្រជាពលរដ្ឋ ក៏ដូចជាសិស្សានុសិស្សមិនឲ្យតម្លៃទៅលើវាក៏គ្មានតម្លៃដែរ អ្វីដែលបានធ្វើឡើងគឺស្ថាបត្យករយើងគេបានគិតគូរ គូសវាសរួចអស់ហើយមុននឹងសម្រេចចិត្តចំណាយ ពេលវេលា និងថវិកាសម្រាប់សាងសង់ផ្លូវក្រោមដីនេះ តែអ្វីដែលចង់និយាយនោះខ្លាចក្រែងប្រជាជនមិនទម្លាប់ ដែលធ្វើឲ្យពួកគាត់មិនចាប់អារម្មណ៍ឆ្លងផ្លូវក្រោមដី គិតតែឆ្លងថ្នល់ដោយរត់កាត់ថ្នល់ដដែល ដែលជាបញ្ហាមួយគួរឲ្យព្រួយបារម្ភ”។

លោកបានបញ្ជាក់ថា ថ្មើរជើងក្រោមដីនេះ ក្រៅពីសម្រាប់ដើរហើយនោះ ក៏មានផ្លូវដែលសម្រាប់ឲ្យប្រជាពលរដ្ឋអាចបណ្តើរកង់និងម៉ូតូឆ្លងកាត់បានផងដែរ។ លោកបានបន្តថា ការសាងសង់ផ្លូវថ្មើរជើងក្រោមដី បានផ្តល់ប្រយោជន៍ជាច្រើន ដែលរក្សាបាននូវភាពឆ្លងថ្នល់កុំឲ្យស្ទះចរាចរណ៍ រក្សាបាននូវជីវិតនិងសុវត្ថិភាពរបស់ប្រជាជន និងជាមុខមាត់របស់ប្រទេសជាតិ ដែលជាការអភិវឌ្ឍន៍ខេត្តជាប់ឆ្នេរសមុទ្រមួយនេះ ។

លោកបានបានបញ្ជាក់ថា អ្វីដែល មិនទាន់រួចរាល់នោះគឺការបំពាក់គ្រឿងលម្អ ការលាបថ្នាំ បំពាក់ប្រព័ន្ធម៉ូទ័រអូតូសម្រាប់បូមទឹកខ្លាំងនិងម៉ូទ័រសម្រាប់បូមទឹកខ្សោយ កង្ហារសម្រាប់ស្រូបខ្យល់អាកាសដែលមិនល្អចេញនិងខ្យល់ល្អចូល ភ្លើងបំភ្លឺនិងបង្កាន់ដៃ ជាដើម។

គម្រោងសាងសង់ផ្លូវថ្មើរជើងក្រោមដីនេះ បានចាប់ផ្តើមការសាងសង់កាលពីដើមខែវិច្ឆិកា ។ ផ្លូវនេះមានប្រវែង២៩ម៉ែត្រ ទទឹង ៧ម៉ែត្រ និងកម្ពស់ប្រហែលជាង៣ម៉ែត្រ ដែលមានជណ្តើរឡើង មានប្រព័ន្ធបូមទឹកចេញ មានកង្ហារសម្រាប់បញ្ជូនខ្យល់ចូលនិងមានប្រព័ន្ធភ្លើងបំភ្លឺផងដែរ៕

លោកឧកញ៉ាគីម ហ៊ាងបង្ហាញយុទ្ធសាស្ត្រពីភ្នាក់ងារអចលនទ្រព្យទៅជាអ្នកអភិវឌ្ឍន៍បុរី

ដោយៈលក្ខិណា

ភ្នំពេញៈ បើនិយាយពីឈ្មោះលោកឧកញ៉ាគីម ហ៊ាង អ្នកនៅក្នុងវិស័យអចលនទ្រព្យ ប្រាកដជាបានស្គាល់គ្រប់គ្នា ដោយសារលោកឧកញ៉ាធ្លាប់ ជាប្រធានសមាគមអ្នកវាយតម្លៃនិងភ្នាក់ងារអចលនទ្រព្យ និងជាអ្នកប្រកបអាជីពលើវិស័យដីធ្លី និងអចលនទ្រព្យជិត២០ឆ្នាំមកហើយ។

មុនដំបូងលោកគ្រាន់តែអ្នកគួកជេដីធ្លីម្នាក់ប៉ុណ្ណោះ តែមកដល់បច្ចុប្បន្នលោកគឺជាអ្នកវិនិយោគលើបុរីមួយកន្លែង ក្នុងស្រុកកៀនស្វាយខេត្តកណ្ដាល។

តើលោកឧកញ៉ាមានយុទ្ធសាស្ត្រ និងអភិវឌ្ឍន៍ខ្លួនដោយរបៀបណា ក្នុងវិស័យអចលនទ្រព្យ?។

លោកឧកញ៉ាបានមានប្រសាសន៍ប្រាប់គេហទំព័រ Propertyarea.asia ដឹងក្នុងកិច្ចសម្ភាសន៍ពិសេសដឹងកាលពីថ្ងៃទី១៣ ឧសភាកន្លងមកថា កាលពី១៥ឬ១៦ឆ្នាំមុនលោកគឺជាអ្នគួកជេ នាំភ្ញៀវជួលអចលនទ្រព្យ ហើយអំឡុងកាលនោះសំបូរជនបរទេសជាអ្នកជួលអចលនទ្រព្យ ជាពិសេសមកពីខាងអឺរ៉ុប។

រហូតមកដល់ឆ្នាំ២០០៨ លោកបានអភិវឌ្ឍន៍ខ្លួនមួយកម្រិតទៀត គឺជាអ្នកវាយតម្លៃដីធ្លី និងអចលនទ្រព្យ និងនៅតែបន្តទិញលក់ជួលអចលនទ្រព្យដដែល។

លោកបណ្ឌិតគីម ហ៊ាង ប្រធាន KW Cambodia និងជាអ្នកអភិវឌ្ឍន៍បុរី KS Residents បានបន្តថា នៅពេលដែលលោកបានកម្រៃជើងសារ ពីការងារទាំងនោះ លោកក៏បានបែកគំនិតទិញដីទុក ហើយការងារទិញលក់ដីឡូត៍នោះ លោកចេះតាំងពីឆ្នាំ២០០៤ ឬ២០០៥ម្ល៉េះ ដូច្នេះការងាររបស់លោកគឺទិញលក់ខ្លួនឯងផង ជួយទិញលក់ឱ្យភ្ញៀវនិងជួលអចលនទ្រព្យផងដែរ។

រហូតមកដល់ឆ្នាំ ២០១៨ លោកសម្រេចទិញដី បានប្រមាណជាង៣ហិចតានៅស្រុកកៀនស្វាយ ខេត្តកណ្តាល សម្រាប់សម្រាកលំហែក្រុមគ្រួសារ តែចូលដល់ឆ្នាំ២០១៩ គឺមួយឆ្នាំក្រោយបន្ទាប់ពីទិញ តំបន់នោះក៏មានសក្ដានុពល ក្នុងការអភិវឌ្ឍជាលំនៅឋាន ហើយ ក៏បានទិញបន្ថែមទៀតសរុបជាង៦ហិចតា សម្រាប់សង់ជាបុរីដែលមានឈ្មោះថា KS Resident ។

លោកបន្ថែមថា គម្រោងអភិវឌ្ឍន៍គម្រោងបុរី KS Resident មានផ្ទះសរុបប្រមាណជាង៣០០ផ្ទះ សម្រាប់លក់ជូនប្រជាពលរដ្ឋ ដែលមានតម្រូវការលំនៅឋាន និងផ្ដោតលើអ្នកដែលមានស្រុកកំណើតព្រៃវែង ស្វាយរៀង និងខេត្តកណ្ដាល ព្រោះពួកគេអាចធ្វើការនៅភ្នំពេញ ហើយមកសម្រាកនៅក្នុងបុរីនៅពេលចេញពីធ្វើការ និងងាយស្រួលក្នុងការធ្វើដំណើរទៅលេងស្រុកកំណើតទៀតផងដែរ ។

លោកថា “ទីបំផុតអ្នកដែលទិញផ្ទះក្នុងបុរី របស់យើងគឺអត់មានអ្នកណាមកពីឆ្ងាយគឺអ្នកស្រុកភូមិ ឬអ្នកនៅតំបន់ជុំវិញនោះ ហើយយើងក៏ផ្ដល់ជូនតម្លៃសមរម្យ ជូអតិថិជនរបស់យើងផងដែរ” ។

លោកឧកញ៉ាបញ្ជាក់ថា ការអភិវឌ្ឍគម្រោងបុរី KS Resident គឺបណ្ដាលពីការជំរុញលើកទឹកចិត្តពីបុគ្គលិ កនិងក្រុមការងារ និងមានផ្នត់គំនិតមួយថា យើងជាអ្នកលក់បុរី លក់ខុនដូ និងលក់ដីធ្លីឱ្យគេបាន ចុះហេតុអ្វីដែលយើងមិនអាចអភិវឌ្ឍន៍ និងលក់របស់ខ្លួនឯងទៅភ្ញៀវ ឬអតិថិជនខ្លួនដែរទៅ? ខណៈដែលខ្លួនមានបុគ្គលិក និងភ្នាក់ងារអចលនទ្រព្យខ្លួនឯងស្រាប់ ។

ទីបំផុតលោកក៏សម្រេចអភិវឌ្ឍន៍គម្រោងបុរីនេះឡើង ដែលជាគម្រោងដំបូងរបស់លោកផងដែរ៕

ក្រុមហ៊ុនផលិតយន្តហោះ Boeing ទទួលបានការអនុម័តពីរដ្ឋបាលអាកាសចរណ៍សហព័ន្ធ FAA ឱ្យដោះស្រាយវិបត្តិ

ដោយៈសុខុម

អាមេរិក: ក្រុមហ៊ុនផលិតយន្តហោះយក្ស Boeing Co បានប្រកាសថា កាលពីថ្ងៃពុធ ទី១២ ឧសភាថា ខ្លួនបានទទួលការអនុម័ត ពីក្រុមនិយ័តករសហរដ្ឋអាមេរិកឱ្យដោះស្រាយបញ្ហាអគ្គិសនី ពេលចុះចត ដែលបានធ្វើឱ្យប៉ះពាល់ដល់យន្តហោះធុន 737 MAX ប្រមាណ១០០គ្រឿង។

យោងតាមសារព័ត៌មាន Reuters ចុះផ្សាយកាលពីថ្ងៃទី១៣ ឧសភា ឱ្យដឹងថា ការអនុម័តនេះ ជាជំហានត្រួសត្រាយផ្លូវសម្រាប់ឱ្យយន្តហោះ 737 MAX ទាំងនោះចូលបម្រើសេវា ដឹកអ្នកដំណើរឡើងវិញក្នុងពេលឆាប់ៗ បន្ទាប់ពីការហោះហើរត្រូវបានពន្យារពេលកាលពីដើមខែមេសា។

មន្ត្រីមួយរូបមកពីរដ្ឋបាលអាកាសចរណ៍សហព័ន្ធ (FAA) បញ្ជាក់ថា ស្ថាប័ន FAA ពិតជាបានអនុម័តលើសេចក្ដីជូនដំណឹង និងចេញសេចក្ដីណែនាំប្រាកដមែន ជុំវិញករណីនេះ។ ក្រុមហ៊ុនផលិតយន្តហោះយក្សរបស់សហរដ្ឋអាមេរិក Boeing បានផ្ញើសេចក្ដីជូនដំណឹងចំនួន២ ទៅបណ្ដាក្រុមហ៊ុនអាកាសចរណ៍ កាលពីថ្ងៃពុធ ទី១២ ខែឧសភា អំពីលើការពិនិត្យជួសជុលបញ្ហាអគ្គិសនីនេះ។

ក្រុមហ៊ុន Boeing បានប្រាប់ទីភ្នាក់ងារព័ត៌មាន Reuters ថា “បន្ទាប់ពីទទួលបានការអនុម័តចុងក្រោយពីស្ថាប័ន FAA យើងក៏បានចេញសេចក្ដីជូនដំណឹង អំពីការពិនិត្យជួសជុលយន្តហោះ ដែលមានបញ្ហាពាក់ព័ន្ធ។ យើងក៏កំពុងប្រឹងប្រែងបង្ហើយការងាររបស់យើងផងដែរ ខណៈយើងត្រៀមបន្តដំណើរការសេវាដឹកជញ្ជូនឡើងវិញ” ។

ការប្រកាសនេះជាដំណឹងដ៏ល្អ គួរឱ្យអបអរសាទរ សម្រាប់បណ្ដាក្រុមហ៊ុនអាកាសចរណ៍សហរដ្ឋអាមេរិក ដែលបាននិងកំពុងទន្ទឹងរង់ចាំយ៉ាងអន្ទះសារ ដើម្បីដាក់យន្តហោះរបស់ខ្លួន ឱ្យដំណើរការដឹកអ្នកដំណើរឡើងវិញ ឱ្យបានមុនចុងខែឧសភា ព្រោះវាជារដូវកាល ដែលតម្រូវការធ្វើដំណើរកើនឡើងខ្លាំង។

ក្រុមហ៊ុនអាកាសចរណ៍កំពូលទាំង៣ របស់សហរដ្ឋអាមេរិក ដែលដំណើរការយន្តហោះធុន 737 MAX រួមមានក្រុមហ៊ុន Southwest Airlines ក្រុមហ៊ុន American Airlines និងក្រុមហ៊ុន United Airlines បានដកយន្តហោះ៦០គ្រឿង ចេញពីប្រតិបត្តិការហោះហើររបស់ខ្លួន បន្ទាប់ពីទទួលបានការជូនដំណឹងនេះ ពីក្រុមហ៊ុន Boeing ។ ទោះជាយ៉ាងណា ក្រុមហ៊ុនទាំងនេះមិនបានឆ្លើយបំភ្លឺទេជុំវិញបញ្ហានេះ៕

ស្ថាប័ន IFC ត្រៀមបញ្ចេញឥណទាន៤០លានដុល្លារដល់ធនាគារហត្ថា

ដោយៈ ម៉ាណេត

ភ្នំពេញៈ សាជីវកម្មហិរញ្ញវត្ថុអន្តរជាតិ (IFC) ដែលជាសមាជិករបស់ធនាគារពិភពលោក ត្រៀមផ្តល់កម្ចី៤០លានដុល្លារអាមេរិកឱ្យធនាគារហត្ថា ដែលធនាគារនាំមុខគេមួយនៅកម្ពុជា ដើម្បីជំរុញដល់ការអភិវឌ្ឍន៍សហគ្រាសធនតូច និងមធ្យមនៅកម្ពុជា។

លោកឧកញ៉ាហួត អៀងតុង ប្រធានអគ្គនាយកធនាគារហត្ថា បានថ្លែងប្រាប់នៅថ្ងៃទី១៣ ខែឧសភា ឆ្នាំ២០២១នេះថា ធនាគារហត្ថាបានជជែកគ្នាជាមួយ IFC ដើម្បីស្នើសុំឥណទាន ហើយ IFC ក៏បានឯកភាពជាគោលការណ៍ដែរ ក្នុងការផ្តល់កម្ចី៤០លានដុល្លារនេះ។

លោកឧកញ៉ាបានថ្លែងថា “កម្ចី៤០លានដុល្លារនេះយើងហៅថាជា អនុបំណុល (Sub-Debt) ដែលដើមទុនប្រភេទទី២ របស់យើង ដែលយើងអាចមកប្រើប្រាស់សម្រាប់គណនាជាដើមទុន” ។ លោកបានឱ្យដឹងថា “យើងរំពឹងថានឹងទទួលបានឥណទាននេះក្នុងត្រីមាសទី២ ឬដើមត្រីមាសទី៣” ។

លោកឧកញ៉ាហួត អៀងតុងបានថ្លែងបន្តថា កម្ចី៤០លានដុល្លារនេះយើងយកមក ដើម្បីបម្រើ ដល់ការបញ្ចេញទុនឥណទានរបស់យើង ទៅឱ្យសហគ្រាសខ្នាតតូច និងមធ្យមនៅក្នុងប្រទេសកម្ពុជា ដើម្បីជំរុញឱ្យពួកគាត់មានដើមទុនគ្រប់គ្រាន់ នៅក្នុងការវិនិយោគលើជំនួញរបស់ពួកគាត់ជាបន្ត។

លោកឧកញ៉ាបានឱ្យដឹងទៀតថា ឥណទាននេះយើងទើបតែជជែកគ្នា ហើយ IFC នឹងចាប់ផ្តើមធ្វើការសិក្សា និងផ្តល់ឥណទានមកឱ្យយើង។ ធនាគារហត្ថា មានសមត្ថភាព និងគុណវុឌ្ឍិគ្រប់គ្រាន់ ក្នុងការទទួលបានឥណទានពី IFC។ IFC គឺស្ថាប័នអន្តរជាមួយ ដែលមានលក្ខខណ្ឌច្រើន ជាពិសេសលក្ខខណ្ឌ ដែលសមស្របទៅនឹងអភិបាលកិច្ចសាជីវកម្ម (Corporate Governance) ដូច្នេះទាល់តែយើងមានគុណវុឌ្ឍិល្អ ក្នុងការធ្វើឱ្យIFC ធ្វើការផ្តល់កម្ចីមកឱ្យយើង។

គិតត្រឹមដំណាច់ឆ្នាំ ២០២០ ធនាគារ ហត្ថា មានការិយាល័យសរុបចំនួន១៧៧ និងបណ្តាញអេធីអឹមចំនួន១៣៧ នៅទូទាំងប្រទេស។ លើសពីនេះ អតិថិជនបានមកបើកគណនីជាមួយធនាគារហត្ថា គឺជិត៥០ម៉ឺនគណនី ដោយក្នុងនេះ គណនីបញ្ញើសន្សំមានជិត ៣០ម៉ឺនគណនី និងគណនីឥណទានជិត ២០ម៉ឺនគណនី។

ជាមួយគ្នានេះដែរ សំពាធឥណទានរបស់ធនាគារនេះ បានកើនឡើងដល់ជាង១ ៣០០ លានដុល្លារអាមេរិក ស្មើនឹងកំណើនប្រមាណ២៦% បើធៀបនឹងឆ្នាំ២០១៩ និងចំណែកសំពាធប្រាក់បញ្ញើសន្សំ បានកើនឡើងដល់ជិត៨០០លានដុល្លារអាមេរិក ដែលមានកំណើនប្រមាណជាង៣២% បើធៀបនឹងឆ្នាំ២០១៩។ ចំណែកអតិថិជន ដែលបានចុះឈ្មោះប្រើប្រាស់សេវាកម្មធនាគារចល័ត បានកើនឡើងរហូតដល់១០៥% គឺកើនឡើងពីជាង៨០០០នាក់ ទៅដល់ជាង១៦,០០០នាក់ បន្ទាប់ពីស្ថាប័ននេះ បានដាក់ឲ្យប្រើប្រាស់ សេវាធនាគារចល័ត ដែលទើបបានធ្វើទំនើបកម្មរួចរាល់កាលពីចុងឆ្នាំ២០២០៕

ផ្នែកធំៗចំនួន៣នៃវិស័យអចលនទ្រព្យនៅកម្ពុជាបង្ហាញការរើបឡើងវិញ

ដោយៈ ម៉ាណេត

ភ្នំពេញៈ ការទិញលក់អចលនទ្រព្យ ពិសេសដីធ្លី លំនៅដ្ឋាន និងខុនដូចាប់ផ្តើមមានសកម្មភាពឡើងវិញជាបណ្តើរៗ ដែលបង្ហាញពីសញ្ញាកម្រើកវិញ នៃវិស័យអចលនទ្រព្យនៅកម្ពុជា។

ស្ថានភាពកំពុងងើបទៅរកភាពល្អប្រសើរបណ្តើរៗវិញនេះ បានកើតឡើងបន្ទាប់ពី រដ្ឋាភិបាលបានបញ្ចប់ការបិទខ្ទប់ ក្នុងភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាលហើយ ចាប់ពីថ្ងៃទី៦ ខែឧសភា ឆ្នាំ២០២១ និងបន្ធូរបន្ថយការធ្វើដំណើររបស់ប្រជាជន។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា បានថ្លែងប្រាប់ក្នុងសប្តាហ៍នេះថា វិនិយោគិនក្នុងវិស័យអចលនទ្រព្យ ចាប់ផ្តើមពិចារណា និងសិក្សាឡើងវិញបណ្តើរៗ និងទទួលយកព័ត៌មាន ដែលយើងផ្តល់ឱ្យពួកគាត់ ហើយយើងក៏ចាប់ផ្តើមធ្វើបច្ចុប្បន្នមួយចំនួនជូនវិនិយោគិនមួយចំនួន។

លោកបានថ្លែងថា “វិនិយោគិនភាគច្រើន សម្លឹងមើលលើវិស័យដីធ្លី និងផ្ទះ (លំនៅដ្ឋាន) បន្ទាប់ពីរដ្ឋាភិបាលចាប់ផ្តើមបន្ធូរបន្ថយ ការធ្វើដំណើររបស់ប្រជាជន” ។ លោកបានលើកឡើងថា “នេះជាសញ្ញាមួយល្អសម្រាប់វិស័យអចលនទ្រព្យ ដែលអ្នកវិនិយោគបង្កើនសកម្មភាពទិញលក់ និងវិនិយោគឡើងវិញ បន្ទាប់មានភាពស្ងប់ស្ងាត់ មួយរយៈពេលខ្លី” ។

បន្ទាប់ពីធ្វើបច្ចុប្បន្នភាពទីផ្សារអលនទ្រព្យ តម្លៃអចលនទ្រព្យមិនសូវមានសម្រាប់អតិថិជន ហើយតម្លៃអចលនទ្រព្យរក្សាភាពថ្លៃ និងនៅទ្រឹងដដែល។

ទាក់ទងនឹងវិស័យខុនដូ អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ ERA Cambodia លោកខន គង្គា មានប្រសាសន៍ថា បន្ទាប់ការបញ្ចប់ការបិទខ្ទប់ ការទិញលក់ខុនដូចាប់ផ្តើមមានសកម្មភាពឡើងវិញជាបណ្តើរៗហើយ។

លោកបានថ្លែងថា “បើទោះបីអំឡុងការបិទខ្ទប់ភូមសាស្ត្រភ្នំពេញ និងក្រុងតាខ្មៅ នៅតែមានអ្នកទិញ ឬវិនិយោគិនមួយៗ ធ្វើការកក់តាមអនឡាញ ប៉ុន្តែល្បឿននៃការកក់ឬទិញមិនលឿនដូចការបើកចំហរនោះទេ” ។ លោកថ្លែងបន្តថា “បន្ទាប់ការបញ្ចប់ការបិទខ្ទប់ ភ្ញៀវខ្ញុំផ្ទាល់តែម្តងចាប់ផ្តើមចេញមកចុះកុងត្រា និងបន្តកក់ជាបណ្តើរ” ។

លោកបានបន្តថា អ្នកដែលមានធនធានល្អ ឬលំហូរសាច់ប្រាក់វិជ្ជមានគួរវិនិយោគលើខុនដូនាពេលនេះ គឺពេលល្អសម្រាប់វិនិយោគលើខុនដូ។

លោកគង្គាបានបញ្ជាក់ថា “វាមិនមានឱកាសណាល្អជាងពេលនេះទេ ដោយសារតែអំឡុងពេលកូវីដ១៩ តម្លៃខុនដូនៅតែរក្សាតម្លៃដើម ដោយមិនការឡើងថ្លៃ និងការបង់ប្រាក់ក៏មានការបត់បែន ហើយនាពេលតម្លៃខុនដូឡើងថ្លៃ ក្រោយកូវីដ១៩ ដែលនឹងផ្តល់ផលចំណេញដល់អ្នកវិនិយោគ” ។

លោកចេ សុន (លោកដង្ខៅ ) ជាអ្នកអភិវឌ្ឍន៍ដីឡូត៍មួយរូបបានឱ្យដឹងថា ចាប់តាំងពីមានការរីករាលដាលនៃកូវីដ១៩ ក្នុងឆ្នាំ២០២១ និងឈានដល់ការបិទខ្ទប់រាជធានីភ្នំពេញ និងក្រុងតាខ្មៅមក សកម្មភាពពុះដីឡូត៏ និងការលក់មិនសូវមានដូចពីមុនឡើយ និងមានភាពស្ងប់ស្ងាត់។

លោកបានថ្លែងបន្តថា “ក្រោយពេលរដ្ឋាភិបាល ប្រកាសបើកដំណើរការឡើងវិញមានប្រជាពលរដ្ឋជាច្រើន ក៏បានចាប់ផ្ដើមស្វែងរកដីធ្លី សម្រាប់ទុកសង់ផ្ទះឬទិញទុកលក់ចំណេញនៅអនាគតឡើងវិញ ដែលធ្វើឱ្យសកម្មភាពនៃការពុះដីឡូត៏ និងការទិញលក់ចាប់ផ្ដើមកម្រើកជាងកាលពីមុនបន្តិច” ។

លោកចេ សុនបានឱ្យដឹងទៀតថា កាលពីពេលបិទខ្ទប់អ្នកដែលទិញដីឡូត៍ ភាគច្រើនជាពលករចំណាកស្រុក នៅក្រៅប្រទេសដូចជានៅកូរ៉េ នៅថៃជាដើម ហើយគេទិញដោយកក់លុយតាមធនាគារ ឬតាមវីងតាមភ្នាក់ងារវេរលុយជាដើម។ ប៉ុន្តែពេលបញ្ចប់ការបិទខ្ទប់ ពលរដ្ឋនៅក្នុងស្រុក ដូចជា នៅរាជធានីភ្នំពេញក៏ចាប់ផ្ដើមធ្វើដំណើរ និងទៅមើលទីតាំងគម្រោងអភិវឌ្ឍន៍ធ្វើឱ្យសកម្មភាពនៃការពុះ និងលក់ដីងើបបន្តិចឡើងវិញ យ៉ាងណាក៏ដោយក៏ វាមិនដូចនឹងមុពេលមានវិបត្តិ នៃព្រឹត្តិការណ២០កុម្ភៈ ២០២១នោះដែរ។

លោកបន្ថែមថា បើនិយាយជាទូទៅអ្នកអភិវឌ្ឍន៍ដ៏ឡូត៍មួយចំនួនធំ បានបាត់មុខបាត់មាត់ ដោយមិនឃើញចុះមកអភិវឌ្ឍគគ្រឹកគគ្រេង ដូចមុនទៀតឡើយ តែមានមួយចំនួនតូចនៅតបន្តសកម្មភាពរបស់ខ្លួន ទោះបីជាមានភ្ញៀវមកទិញតិចតួចជាងមុនក្ដី៕