ដោយ: គង់ លាងហួរ
អន្តរជាតិ: យោងតាមក្រុមហ៊ុនប្រឹក្សាយោបល់អចលនទ្រព្យ Colliers បានលើកឡើងថា ទីផ្សារអចលនទ្រព្យបដិសណ្ឋារកិច្ចនៅតំបន់អាស៊ីប៉ាស៊ីហ្វិក បានស្ទុះងើបឡើងវិញយ៉ាងឆាប់រហ័សក្នុងរយៈពេលប៉ុន្មានឆ្នាំថ្មីៗនេះ បន្ទាប់ពីជំងឺរាតត្បាត។

ទោះជាយ៉ាងណា សន្ទុះនៃកំណើនបាននិងកំពុងថយចុះនៅក្នុងឆ្នាំ២០២៥ និងឈានចូលដល់ដំណាក់កាលមួយដែលមានស្ថិរភាព។នេះបើយោងតាមក្រុមហ៊ុនប្រឹក្សាអចលនទ្រព្យ Colliers។

នៅក្នុងរបាយការណ៍ថ្មីរបស់ខ្លួន ក្រុមហ៊ុន Colliers បានគូសបញ្ជាក់ថា ទំហំនៃការវិនិយោគសណ្ឋាគារនៅក្នុងតំបន់អាសុីប៉ាសុីហ្វិកបានដាំក្បាលចុះ១៩ភាគរយមកនៅត្រឹមចំនួន២,១ពាន់លានដុល្លារអាមេរិកក្នុងរយៈពេល៣ខែដើមឆ្នាំ២០២៥ ធៀបនឹងរយៈពេលដូចគ្នាកាលពីឆ្នាំមុន។

ទោះជាយ៉ាងណា លំហូរវិនិយោគនៅតែបន្តហូរចូលទៅកាន់ទីផ្សារបដិសណ្ឋារកិច្ចរបស់ប្រទេសមួយចំនួនក្នុងតំបន់ ដូចជាប្រទេសជប៉ុន កូរ៉េខាងត្បូង និងអូស្ត្រាលី។ នេះបើយោងតាមរបាយការណ៍របស់ក្រុមហ៊ុន Colliers។

របាយការណ៍ដដែលបានបន្ថែមថា ប្រទេសសិង្ហបុរីក៏នៅតែបន្តជាប់ឈ្មោះជាគោលដៅដ៏សំខាន់សម្រាប់ការវិនិយោគសណ្ឋាគារក្នុងតំបន់អាសុីប៉ាសុីហ្វិកផងដែរ។

លោក Govinda Singh អ្នកជំនាញជាន់ខ្ពស់របស់ក្រុមហ៊ុន Colliers បានលើកឡើងថា “ការធ្លាក់ចុះនៃការវិនិយោគលើទីផ្សារបដិសណ្ឋារកិច្ចនៅត្រីមាសទី១ ពុំមែនជារឿងភ្ញាក់ផ្អើលនោះទេ។ ភាពមិនប្រាកដប្រជាភូមិសាស្ត្រនយោបាយអាចនាំឱ្យវិនិយោគិនមានការប្រុងប្រយ័ត្ន”។

លោករំពឹងថា សកម្មភាពវិនិយោគលើសណ្ឋាគារនៅក្នុងតំបន់អាសុីប៉ាសុីហ្វិកនឹងមានការកើនឡើងវិញចាប់ពីត្រីមាសទី២ ឆ្នាំ២០២៥ រហូតដល់ដំណាច់ឆ្នាំ ខណៈពេលដែលលក្ខខណ្ឌទីផ្សារមានស្ថិរភាព។

យោងតាមរបាយការណ៍របស់ក្រុមហ៊ុន Colliers ក៏បានគូសបញ្ជាក់ផងដែរថា បច្ចុប្បន្ននេះ បណ្តាប្រទេសមួយចំនួនក្នុងតំបន់ ដែលធ្លាប់ពឹងផ្អែកលើលំហូរភ្ញៀវទេសចរណ៍ចិន កំពុងព្យាយាមចាប់យកឱកាសពីមូលដ្ឋាននៃកំណើនភ្ញៀវទេសចរណ៍ឥណ្ឌា។

យោងតាមទិន្នន័យពីក្រុមហ៊ុនវិភាគទិន្នន័យអចលនទ្រព្យរបស់សហរដ្ឋអាមេរិក CoStar បានឱ្យដឹងថា តម្លៃបន្ទប់សណ្ឋាគារជាមធ្យមនៅតំបន់អាសុីប៉ាសុីហ្វិកបានកើនឡើង៣,៣ភាគរយ ដល់ចំនួន៩២ដុល្លារអាមេរិកក្នុងមួយយប់នៅក្នុងត្រីមាសទី១ ឆ្នាំ២០២៥។

ក្នុងចំណោមនោះ ប្រទេសថៃ និងប្រទេសជប៉ុនបាននាំមុខគេ ដោយតម្លៃបន្ទប់សណ្ឋាគារជាមធ្យមនៅប្រទេសទាំង២នេះបានហក់ឡើង១៤,៧ភាគរយ និង១១,៩ភាគរយដល់ចំនួន១៥៤ដុល្លារ និង១២៧ដុល្លាររៀងគ្នាក្នុងមួយយប់៕

ដោយ: គង់ លាងហួរ
អន្តរជាតិ: តម្លៃដីធ្លីនៅទីក្រុងឌូបៃរបស់ប្រទេសអេមីរ៉ាត់អារ៉ាប់រួមមានការប្រែប្រួលយ៉ាងខ្លាំងនៅទូទាំងតំបន់ផ្សេងៗគ្នា គិតនៅត្រឹមខែឧសភា ឆ្នាំ២០២៥នេះ ដោយរងឥទ្ធិពលពីកត្តានានាដូចជា ភូមិសាស្ត្រទីតាំង ស្ថានភាពការអភិវឌ្ឍន៍ និងតម្រូវការ។

តួយ៉ាង ដីនៅក្នុងតំបន់ Emirates Hills ដែលសម្បូរដោយសហគមន៍ផ្ទះវីឡាប្រណីតនៅក្នុងទីក្រុងឌូបៃ ដែលជាមជ្ឈមណ្ឌលហិរញ្ញវត្ថុយក្សលើពិភពលោកមានតម្លៃជាមធ្យមចន្លោះពី៦.២៦២ដុល្លារទៅ៧.៦២៣ដុល្លារអាមេរិកក្នុងមួយម៉ែត្រការ៉េ។

ចំណែក ដីនៅតំបន់កោះសិប្បនិម្មិត Palm Jumeirah ដ៏ល្បីល្បាញបំផុតរបស់ទីក្រុងឌូបៃមានតម្លៃជាមធ្យមចន្លោះពី៦.៨០៧ដុល្លារទៅ១០.៨៩០ដុល្លារអាមេរិកក្នុងមួយម៉ែត្រការ៉េ។តំបន់នេះមានតម្រូវការអចលនទ្រព្យប្រណីតខ្ពស់។កោះ Palm Jumeirah មានទិដ្ឋភាពឆ្នេរសមុទ្រដ៏ទាក់ទាញ និងមានអត្រាផលចំណេញត្រឡប់ពីការជួលអចលនទ្រព្យចន្លោះពី៦ភាគរយទៅ៨ភាគរយ។

ជាមួយគ្នានោះ ដីនៅក្នុងតំបន់ Downtown Dubai ដែលជាមជ្ឈមណ្ឌលទេសចរណ៍ដ៏រស់រវើករបស់ទីក្រុងឌូបៃ ដោយសារមានអគារខ្ពស់ជាងលើពិភពលោក Burj Khalifa មានតម្លៃជាមធ្យមចំនួន៧.៨៩៦ដុល្លារអាមេរិកក្នុងមួយម៉ែត្រការ៉េ។ តំបន់នេះប្រមូលផ្តុំដោយគម្រោងលំនៅដ្ឋានប្រណីត និងអគារពាណិជ្ជកម្មខ្ពស់ៗកប់ពពក។

ដីនៅតំបន់ Dubai Marina មានតម្លៃជាមធ្យមចន្លោះពី៤.៦២៨ដុល្លារទៅ៦.២៦២ដុល្លារអាមេរិកក្នុងមួយម៉ែត្រការ៉េ ខណៈដីនៅតំបន់ Dubai Hills Estate មានតម្លៃជាមធ្យមចន្លោះពី៣.២៦៧ដុល្លារទៅ៣.៨១២ដុល្លារអាមេរិកក្នុងមួយម៉ែត្រការ៉េ។

ចំណែកឯ ដីនៅលើកោះ Pearl Jumeirah មានតម្លៃជាមធ្យមចន្លោះពី៦.៨០៧ដុល្លារទៅ៨.១៦៨ដុល្លារអាមេរិកក្នុងមួយម៉ែត្រការ៉េ។ តំបន់សហគមន៍លំនៅដ្ឋានជាប់មាត់សមុទ្រនេះទាក់ទាញអ្នកដែលកំពុងស្វែងរកភាពឯកជនផ្តាច់មុខ និងភាពស្ងប់ស្ងាត់៕

ដោយ: គង់ លាងហួរ
អន្តរជាតិ: ទីផ្សារអចលនទ្រព្យរបស់ប្រទេសវៀតណាមត្រូវបានគេរំពឹងថា នឹងបន្តសម្រេចបានកំណើនខ្ពស់នៅឆ្នាំ២០២៥ បន្ទាប់ពីទីផ្សារបានចាប់ផ្តើមស្ទុះងើបឡើងវិញនៅឆ្នាំ២០២៤។ សញ្ញាវិជ្ជមាននេះត្រូវបានជំរុញដោយកត្តាសំខាន់ៗមួយចំនួន ដូចជា ការកែទម្រង់ច្បាប់ កំ៉ណើនសេដ្ឋកិច្ច ការវិនិយោគពីបរទេស និងហេដ្ឋារចនាសម្ព័ន្ធ។

ទីផ្សារអាផាតមុិនវៀតណាមត្រូវបានគេរំពឹងថា នឹងនាំមុខគេក្នុងការងើបឡើងវិញ ដោយផ្តោតលើគម្រោងដែលមានស្ថានភាពផ្លូវច្បាប់ច្បាស់លាស់ និងតម្លៃសមរម្យ។

ការបើកដំណើរការលក់អាផាតមុិនថ្មីនៅទីក្រុងហាណូយអាចកើនឡើងដល់ចន្លោះពី៤០.០០០យូនីតទៅ៤៥.០០០យូនីតក្នុងឆ្នាំ២០២៥នេះ លើសពីការបើកដំណើរការលក់អាផាតមុិនចំនួន៣០.១០០យូនីតកាលពីឆ្នាំ២០២៤។

ជាមួយគ្នានេះ បណ្តាអ្នកអភិវឌ្ឍន៍កំពុងពង្រីកការវិនិយោគទៅកាន់តំបន់ថ្នាក់ខេត្ត ដោយផ្តោតលើទីក្រុងរណប និងមជ្ឈមណ្ឌលឧស្សាហកម្មធំៗដូចជា ទីក្រុង Nghe An ទីក្រុង Thanh Hoa ទីក្រុង Quang Ninh ទីក្រុង Bac Ninh និងទីក្រុង Bac Giang។

ការ​សម្រេចចិត្តងាកទៅបោះទុនវិនិយោគនៅតាមបណ្តាខេត្តទាំង​នេះ​ ដោយ​សារ​តែ​កង្វះ​ដីធ្លី និង​ការ​កើន​ឡើង​នូវថ្លៃដើមលើការអភិវឌ្ឍន៍​នៅ​ក្នុង​តំបន់​កណ្តាល​ក្រុង។

គិតចាប់ពីត្រីមាសទី២ ដល់ត្រីមាសទី៤ នៃឆ្នាំ២០២៥នេះ វិស័យអចលនទ្រព្យវៀតណាមត្រូវបានគេរំពឹងថា នឹងមានសន្ទុះនៃការរីកចម្រើនខ្លាំង ដោយសារតែកំណើននៃការបោះទុនវិនិយោគដើម្បីអាចរកបានប្រាក់ចំណេញខ្ពស់ដូចជា ដីឡូតិ៍ និងគម្រោងផ្ទះវីឡាជាដើម។

តម្លៃអចលនទ្រព្យនៅក្នុងប្រទេសវៀតណាមបានហក់ឡើងចំនួន៥៩ភាគរយក្នុងរយៈពេល៥ឆ្នាំចុងក្រោយនេះ។ តួលេខនេះមានកម្រិតខ្ពស់ជាងបណ្តាប្រទេសដទៃផ្សេងទៀតដូចជា សហរដ្ឋអាមេរិក ដែលសម្រេចបានកំណើនចំនួន៥៤ភាគរយ អូស្ត្រាលីសម្រេចបានចំនួន៤៩ភាគរយ ជប៉ុនសម្រេចបានចំនួន៤១ភាគរយ និងសិង្ហបុរីសម្រេចបានចំនួន៣៧ភាគរយ។

នៅឆ្នាំ២០២៥នេះ តម្លៃអចលនទ្រព្យថ្មី និងតម្លៃអចលនទ្រព្យប្រភេទទី២ (Second-hand) នៅក្នុងប្រទេសវៀតណាមត្រូវបានគេរំពឹងថា នឹងកើនឡើង ដោយសារការកើនឡើងនៃការចំណាយថ្លៃដើមទុនវិនិយោគលើការអភិវឌ្ឍន៍គម្រោង៕

ដោយ: គង់ លាងហួរ
អន្តរជាតិ: គិតមកទល់ពេលនេះ អគារខ្ពស់ៗកប់ពពកជាច្រើននៅទូទាំងពិភពលោកបានឈានដល់ដំណាក់កាលជិតបញ្ចប់ការសាងសង់ ឬបាននិងកំពុងបន្តដំណើរការស្ថាបនាឡើងវិញនាពេលថ្មីៗនេះ។ ខាងក្រោមនេះ​ជា​ទិដ្ឋភាព​ទូទៅ​របស់គម្រោង​អគារកប់ពពក​មួយ​ចំនួន៖

ទី១: អគារ Jeddah Tower

អគារ Jeddah Tower ត្រូវបានគេរំពឹងថា នឹងមានកម្ពស់ជាង១.០០០ម៉ែត្រ។ អគារនេះស្ថិតនៅទីក្រុង Jeddah របស់ប្រទេសអារ៉ាប៊ីសាអូឌីត។ ការសាងសង់អគារ Jeddah Tower បានបន្តដំណើរការឡើងវិញនៅខែមករា ឆ្នាំនេះ បន្ទាប់ពីបានផ្អាកតាំងពីឆ្នាំ២០១៨។

គម្រោងអគារ Jeddah Tower ត្រូវបានរចនាឡើងដោយលោក Adrian Smith ដែលជាស្ថាបត្យករអាមេរិកដ៏ល្បីល្បាញ។ អគារនេះនឹងក្លាយជាអគារខ្ពស់ជាងគេបំផុតរបស់ពិភពលោកនៅពេលសាងសង់រួចរាល់នៅឆ្នាំ២០២៨ខាងមុខ។

ទី២: អគារ Merdeka 118

គម្រោងអគារ Merdeka 118 ស្ថិតនៅទីក្រុងគូឡាឡាំពួររបស់ប្រទេសម៉ាឡេសុីមានកម្ពស់៦៤៤ម៉ែត្រ។ គិតមកទល់ពេលបច្ចុប្បន្ន អគារនេះជិតបញ្ចប់ការសាងសង់រួចរាល់ជាស្ថាពរហើយ។អគារ Merdeka 118 នឹងក្លាយជាអគារខ្ពស់ជាងគេលំដាប់ទី២ នៅលើពិភពលោក បន្ទាប់ពីអគារ Burj Khalifa ដែលរួមមានអចលនទ្រព្យប្រើប្រាស់ចម្រុះ ដូចជាសណ្ឋាគារ និងលំនៅដ្ឋាន។

ទី៣: អគារ Tianfu Center

អគារ Tianfu Center ដែលស្ថិតនៅទីក្រុង Chengdu នៃប្រទេសចិន មានកម្ពស់៤៨៩ម៉ែត្រ។ បច្ចុប្បន្ន គម្រោងនេះកំពុងស្ថិតក្នុងដំណើរការសាងសង់ ដោយគ្រោងបញ្ចប់នៅឆ្នាំ២០២៧ខាងមុខ។

អគារ Tianfu Center ត្រូវបានរចនាដោយក្រុមហ៊ុនស្ថាបត្យកម្មអាមេរិក Kohn Pedersen Fox ដែលមានមូលដ្ឋាននៅទីក្រុងញូវយ៉ក។ អគារនេះនឹងក្លាយជាអគារខ្ពស់ជាងគេនៅទីក្រុង Chengdu នៅពេលសាងសង់រួចរាល់។

ទី៤: អគារ China International Silk Road Center

អគារនេះមានទីតាំងនៅទីក្រុង Xi’an របស់ប្រទេសចិន ដែលមានកម្ពស់៤៩៨ម៉ែត្រ។បច្ចុប្បន្ន គម្រោងអគារ China International Silk Road Center កំពុងស្ថិតក្នុងដំណើរការសាងសង់ ដោយគ្រោងបញ្ចប់នៅឆ្នាំ២០២៥នេះ។

អគារខ្ពស់កប់ពពកនេះត្រូវបានរចនាឡើងដោយក្រុមហ៊ុនស្ថាបត្យកម្មដ៏ល្បីល្បាញ Skidmore, Owings & Merrill របស់សហរដ្ឋអាមេរិក ដែលនឹងក្លាយជាអគារខ្ពស់ជាងគេបំផុតរបស់ទីក្រុង Xi’an ។

ទី៥: អគារ Fuyuan Zhongshan 108 IFC

អគារនេះមានទីតាំងនៅក្នុងទីក្រុង Zhongshan នៃប្រទេសចិន ដែលមានកម្ពស់៤៩៨ម៉ែត្រ។ បច្ចុប្បន្ន អគារនេះកំពុងស្ថិតក្រោមការសាងសង់ ដោយគ្រោងបញ្ចប់នៅឆ្នាំ២០២៩ខាងមុខ។ អគារ Fuyuan Zhongshan 108 IFC នឹងរួមមានទាំងបន្ទប់សណ្ឋាគារ និងការិយាល័យ៕

ដោយ: គង់ លាងហួរ
អន្តរជាតិ: តម្លៃផ្ទះនៅទីក្រុងហុងកុងរបស់ប្រទេសចិនបានបិទបញ្ចប់ការធ្លាក់ចុះរយៈពេល៤ខែ ដោយបានកើនឡើងនៅក្នុងខែមេសា ឆ្នាំ២០២៥ ដោយសារការធ្លាក់ចុះនៃអត្រាការប្រាក់នាពេលថ្មីៗនេះបានជួយជំរុញបង្កើនទំនុកចិត្តរបស់អ្នកទិញផ្ទះ។

យោងតាមទិន្នន័យពីនាយកដ្ឋានវាយតម្លៃ និងធ្វើចំណាត់ថ្នាក់របស់រដ្ឋបាលទីក្រុងហុងកុងបានបង្ហាញឱ្យដឹងថា តម្លៃផ្ទះនៅទីក្រុងមួយនេះបានកើនឡើង០,៤ភាគរយនៅក្នុងខែមេសា ធៀបនឹងខែមីនា បន្ទាប់ពីបានធ្លាក់ចុះ០,៣ភាគរយនៅក្នុងខែមីនា។

អាជ្ញាធរហុងកុងបាននិងកំពុងព្យាយាមជំរុញវិស័យអចលនទ្រព្យឱ្យងើបឡើងវិញ ដោយបានលុបចោលវិធានការទប់ស្កាត់ទាំងអស់លើការទិញអចលនទ្រព្យ និងបន្ធូរបន្ថយអត្រាការប្រាក់ដើម្បីជំរុញតម្រូវការលំនៅដ្ឋាននៅទីក្រុងហុងកុង។

ក្រុមអ្នកជំនាញអចលនទ្រព្យបានព្យាករណ៍ថា តម្លៃផ្ទះនៅទីក្រុងហុងកុងក្នុងឆ្នាំ២០២៥ អាចនឹងកើនឡើង ឬអាចធ្លាក់ចុះ៥ភាគរយ អាស្រ័យលើល្បឿនក្នុងការកាត់បន្ថយអត្រាការប្រាក់ផ្លូវការ និងស្ថានភាពពាណិជ្ជកម្មរវាងប្រទេសចិន និងសហរដ្ឋអាមេរិក។

លោក Eddie Kwok នាយកប្រតិបត្តិនៃក្រុមហ៊ុនប្រឹក្សាយោបល់អចលនទ្រព្យ CBRE ប្រចាំទីក្រុងហុងកុងបានលើកឡើងថា ប្រសិនបើអត្រាការប្រាក់បន្តធ្លាក់ចុះ នោះទីផ្សារអចលនទ្រព្យលំនៅដ្ឋានអាចនឹងមានការងើបឡើងវិញ ដោយសារអតិថិជនចំណាយតិចក្នុងការបង់អត្រាការប្រាក់លើកម្ចីទិញផ្ទះបើធៀបនឹងការជួល៕