តើឈរមូលដ្ឋានអ្វីខ្លះជម្រុញឲ្យសេដ្ឋកិច្ចចិនហក់ឡើងដល់ ៩ភាគរយនៅឆ្នាំនេះ ខណៈប្រទេសជាច្រើននៅមានបញ្ហា

ដោយៈស៊ីវ ម៉េង

ភ្នំពេញៈ អ្នកវិភាគ និងការព្យាករន៍របស់សេដ្ឋវិទូនានាបានរកឃើញថា ការកើនឡើងនៃផលទុនជាតិសរុបរបស់ប្រទេសចិនដ៏លឿន កំពុងធ្វើឲ្យមនុស្សជាច្រើនងឿងឆ្ងល់ ខណៈប្រទេសភាគច្រើន កំពុងជួបវិបត្តិនៅឡើយ។

អ្នកវិភាគបានពន្យល់ថា ការកើនឡើងនៃសេដ្ឋកិច្ច របស់មហាយក្សចិននៅឆ្នាំ២០២១នេះ ដោយសារកត្តាសំខាន់ៗជាច្រើនរួមមាន ទី៣ អំណាចនៃការទិញក្នុងស្រុក ដោយសារការងើបឡើងវិញនៃសេដ្ឋកិច្ចចិន មានរង្វង់៥ភាគរយនៅចុងត្រីមាសទី៤កាលពីឆ្នាំមុន ទី២ កំនើននៃការវិនិយោគពីបរទេសមកកាន់ប្រទេសចិន ទី៣ កំនើននៃការនាំចេញ ពិសេសទំហំពាណិជ្ជកម្មរបស់ចិន ជាមួយបណ្តាប្រទេស្ថិតក្នុងសហគមន៍គឺរ៉ុប បាន វ៉ាដាច់សហរដ្ឋអាមរិក។

ទី៤ ការកើនឡើងនូវកម្រិតជីវភាពររបស់ប្រជាជនចិន ពោលគឺជីវភាពរបស់ប្រជាជនចិនកាន់តែមានភាពល្អប្រសើរឡើង និងការដាក់ចេញគោលនយោបាយអាទិភាព ដោយពង្រឹង និងកាត់បន្ថយភាពក្រីក្រក្នុងចំណោមប្រជាជនចិន និងទី៥ ការគ្រប់គ្រងបានល្អបំផុតនៃជំងឺកូវីដ១៩ ។

មូលនិធិរូបិយវត្ថុអន្តរជាតិ (IMF) បានព្យាករណ៍ថា សេដ្ឋកិច្ចមហាយក្សចិននឹងកើនឡើង ក្នុងរង្វង់ជាង៨ភាគរយនៅឆ្នាំ២០២១នេះផងដែរ។

ជាមួយគ្នានឹងការកើនឡើង នូវឥទ្ឋិពលសេដ្ឋកិច្ចរបស់ចិននៅលើពិភពលោក សេដ្ឋវិទូនានាក៏បានព្យាករណ៍ថា សេដ្ឋកិច្ចចិន នឹងវ៉ាដាច់សហរដ្ឋអាមេរិកនៅឆ្នាំ២០២៨ខាងមុខនេះ។

អ្នកជំនាញសេដ្ឋកិច្ចមួយរូបមកពី Bank of America ដែលជាធនាគារវិនិយោគពហុជាតិសាសន៍ និងជាក្រុមហ៊ុនហិរញ្ញវត្ថុ ដ៏ធំរបស់សហរដ្ឋអាមេរិកបានលើកឡើងថា មហាយក្សចិន មានឱកាសដ៏ល្អ ក្នុងការបង្កើនទំហំសេដ្ឋកិច្ចរបស់ខ្លួនទ្វេដង និងវ៉ាឈ្នះសហរដ្ឋអាមេរិក ក្លាយជាសេដ្ឋកិច្ចធំបំផុតក្នុងពិភពលោក។

ខណៈប្រទេសចិន កំពុងព្យាយាមធ្វើយ៉ាងណា ឱ្យក្លាយខ្លួនជាប្រទេសជឿនលឿន ប្រធានាធិបតីចិន លោកស៊ី ជីនភីង បានលើកឡើងកាលពីខែវិច្ឆិកា ឆ្នាំ២០២០ ថា វាអាចទៅរួចក្នុងការបង្កើនទ្វេដង នូវផលិតផលក្នុងស្រុកសរុប (GDP) និងចំណូលជាមធ្យមក្នុងមនុស្សម្នាក់ៗរបស់ប្រទេសចិន នៅត្រឹមឆ្នាំ២០៣៥ ។

ការបង្កើនទំហំទ្វេដងនូវ GDP របស់ប្រទេសចិន តម្រូវឱ្យសេដ្ឋកិច្ចទទួលបានកំនើនប្រចាំឆ្នាំជាមធ្យម ៤.៧% សម្រាប់រយៈពេល ១៥ឆ្នាំខាងមុខ ដែលអ្នកសង្កេតការណ៍មួយចំនួនជឿថាពិតជាពិបាកសម្រេចបានណាស់។

ទោះជាយ៉ាងណា លោកស្រី Helen Qiao ប្រធានផ្នែកសិក្សាស្រាវជ្រាវអំពីសេដ្ឋកិច្ចអាស៊ី ប្រចាំស្ថាប័នសិក្សាស្រាវជ្រាវ BofA Global Research ដែលជាផ្នែកមួយរបស់ Bank of America បានលើកឡើងថា វិធានការកែទម្រង់មួយចំនួន នឹងជួយរុញច្រានប្រទេសចិនឱ្យទៅដល់ចំណុចនោះ៕

ការសាងសង់ព្រលានយន្ដហោះអន្តរជាតិសៀមរាបអង្គរថ្មី គ្រោងនឹងសម្រេច ៦៧ភាគរយនៅចុងឆ្នាំ២០២១នេះ

ដោយៈ រ៉ាណេត

សៀមរាបៈ ផ្អែកតាមផែនការនៃការសាងសង់ ព្រលានយន្ដហោះអន្តរជាតិសៀមរាបអង្គរថ្មី ដែលកំពុងសម្រុកការសាងសង់យ៉ាងសកម្ម នាពេលបច្ចុប្បន្ននេះគ្រោងនឹងសម្រេចឱ្យបាន ប្រមាណ៦៧ភាគរយនៅត្រឹមដំណាច់ឆ្នាំ២០២១ ។ នេះបើតាមការបង្ហើបឱ្យដឹងពីអ្នកជំនាញនៃក្រុមការងារចិន ដែលកំពុងប្រតិបត្តិការនៅការដ្ឋានសាងសង់នៅព្រឹកថ្ងៃទី១ ខែមីនា ឆ្នាំ២០២១នេះ។

អ្នកជំនាញ និងជាថ្នាក់ដឹកនាំផ្នែកការដ្ឋានបានបញ្ជាក់ថា សម្រាប់ឆ្នាំ២០២១នេះ លទ្ធផលនៃការសាងសង់ នឹងត្រូវមានការបែងចែកដាច់ដោយឡែកពីគ្នា ហើយមានផ្នែកខ្លះសម្រេចបានច្រើន ហើយផ្នែកខ្លះទៀតសម្រេចបានតិច ប៉ុន្តែស្របតាមផែនការដែលបានគ្រោងទុកទាំងអស់។

ការសាងសង់ស្ថានីយអ្នកដំណើរ គ្រោងនឹងសម្រេចឲ្យបាន ៧៨ភាគរយ ការកសាងតំបន់ហោះហើរ គ្រោងនឹងសម្រេចឲ្យបាន ៤៥ភាគរយ និងសំណង់ហេដ្ឋារចនាសម្ព័ន្ធទូទៅរបស់អាកាសយានដ្ឋាន គ្រោងនឹងសម្រេចឲ្យបាន ៥០ភាគរយ។

ចាប់តាំងពីដំណើរការការដ្ឋាន សាងសង់ស្ថានីយអ្នកដំណើរ កាលពីពាក់កណ្តាលខែមីនាឆ្នាំ២០២០ មកដល់ចុងឆ្នាំ២០២០ គឺសម្រេចបាន ១៥ភាគរយ។ ចំណែកការសាងសង់តំបន់ហោះហើរ ដែលចាប់ផ្តើមការដ្ឋាននាពាក់កណ្តាលខែតុលា មកដល់ចុងឆ្នាំ២០២០ដូចគ្នា សម្រេចបានប្រមាណ១០ភាគរយ។

ព្រលានយន្តហោះនេះ មានផ្លូវរត់ប្រវែង ៣,៦០០ម៉ែត្រ ទទឹង៤៥ម៉ែត្រ មាន៣៨ចំណតយន្តហោះ និងមានក្រឡាផ្ទៃស្ថានីយ៍ អ្នកដំណើរជាង៨ម៉ឺនម៉ែត្រក្រឡា ដែលអាចទទួលអ្នកដំណើរជាប្រចាំឆ្នាំប្រមាណជា ៧លាននាក់។

ព្រលានយន្ដហោះអន្តរជាតិសៀមរាបថ្មី គ្រោងវិនិយោគទឹកប្រាក់ប្រមាណ៩០០លានដុល្លារអាមេរិក។ ព្រលានយន្តហោះនេះ ទីតាំងស្ថិតនៅឃុំពពេល ស្រុកសូទ្រនិគម ខេត្ដសៀមរាប មានវិសាលភាពលើផ្ទៃដីទំហំប្រមាណ ៧០០ហិកតា បានចាប់ផ្តើមសាងសង់ពីថ្ងៃទី១៥ ខែមីនា ឆ្នាំ២០២០ និងគ្រោងបញ្ចប់នៅថ្ងៃទី១៤ ខែមីនា ឆ្នាំ២០២៣ ៕

ការពង្រីកផ្លូវជាតិលេខ៤៨ ជាបួនគន្លងរថយន្តនឹងចាប់់ផ្តើមនៅខែមិនានេះ

ដោយៈគង់ សូរិយា

ភ្នំពេញៈ អភិបាលខេត្តកោះកុង លោកស្រីមិថុនា ភូថង បានមានប្រសាសន៍ថា ការពង្រីកផ្លូវជាតិលេខ៤៨ ជាបួនគន្លង ក្រោមជំនួយរបស់សាធារណៈរដ្ឋកូរ៉េ នឹងចាប់ផ្តើមនៅខែមិនានេះ បើសិនជាគ្មានការប្រែប្រួលអ្វីទេនោះ។

លោកស្រីបានមានប្រសាសន៍ប្រាប់ស្ថានីយ៍ទូរទស្សន៍ ក្នុងស្រុកមួយកាលពីសប្តាហ៍មុនថា ក្រសួងសាធារណៈការ និងដឹកជញ្ជូនបានដេញថ្លៃក្រុមហ៊ុន ដើម្បីស្ថាបនាផ្លូវនេះរួចហើយ ដោយការពង្រីកផ្លូវនេះនឹងធ្វើនៅក្នុងខែមិនានេះ ប៉ុន្តែយ៉ាងណាក៏ដោយលោកស្រីមិនបញ្ជាក់ថា ក្រុមហ៊ុនណាជាអ្នកឈ្នះការដេញថ្លៃ សាងសង់និងពង្រីកផ្លូវដ៏សំខាន់នេះនៅឡើយទេ។

លោកស្រីបន្តថា “ការពង្រីកផ្លូវជាតិលេខ៤៨នេះ នឹងធ្វើឲ្យខេត្តកោះកុងកាន់តែរីកចម្រើន និងមានសក្តានុពលថែមទៀត ខណៈក្រុមហ៊ុនកាន់តែច្រើនបានមកវិនិយោគនៅក្នុងខេត្តមួយនេះ” ។ លោកស្រីបន្តថា “នៅឆ្នាំ២០២០កន្លងមក បណ្តាខេត្តនានាមានការវិនិយោគធ្លាក់ចុះ តែការវិនិយោគលើសេវាកម្មបដិសណ្ឋារកិច្ចមានការកើនឡើង” ។

ការពង្រីកផ្លូវជាតិលេខ៤៨ ត្រូវបានប្រកាសដោយសម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃកម្ពុជា កំឡុងពេលសម្តេចអញ្ជើញជាអធិបតីក្នុងពិធីបើកកម្មវិធីបុណ្យសមុទ្រកាលពីឆ្នាំ២០១៩ ដែលបានប្រារពធ្វើនៅទីរួមខេត្តកោះកុង។

លោកវ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនបានមានប្រសាសន៍ថា លោកមិនបានទទួលរបាយការណ៍ពីការពង្រីកផ្លូវនេះទេ ដោយលោកអះអាងថាមិនបានទទួលរបាយការណ៍នោះទេ ព្រោះលោកជាប់រវល់ការងារបណ្តុះបណ្តាលច្រើនជាង។

លោកសូរិយាបានរុញឲ្យសួរទៅកាន់ លោកសូ វិកទ័រ ដែលជាអ្នកទទួលបន្ទុកការងារស្ថាបនានិងពង្រីកផ្លូវនេះ៕

ព្រលានយន្តហោះខេត្តមណ្ឌលគិរី គ្រោងនឹងចំណាយប្រាក់ប្រមាណ ១០០លានដុល្លារអាមេរិក

ដោយៈគង់ សូរិយា

ភ្នំពេញៈ មន្ត្រីជាន់ខ្ពស់នៃរដ្ឋលេខាធិការដ្ឋាន អាកាសចរណ៍ស៊ីវិលបានបង្ហើបឲ្យដឹងថា ការសាងសង់អាកាសយានដ្ឋាន ខេត្តមណ្ឌលគិរី គ្រោងនឹងចំណាយទុនវិនិយោគប្រមាណ ១០០លានដុល្លារអាមេរិក។

លោកស៊ិន ចាន់សិរីវុត្ថា អ្នកនាំពាក្យនិងជាអនុរដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី១ មិនាកន្លងមកថា បច្ចុប្បន្នក្រុមការងារបច្ចេកទេស និងក្រុមហ៊ុន Power China Group កំពុងសិក្សារួមគ្នា មុនឈានដល់ការចុះ កិច្ចព្រមព្រៀងជាមួយរដ្ឋាភិបាល ដើម្បីអាចចាប់ផ្តើមសាងសង់គំរោងនេះនៅចុងឆ្នាំនេះ ឬដើមឆ្នាំ២០២២ខាងមុខ។

លោកបន្តថា “ផែនការនេះមិនមានការប្រែប្រួលនោះទេ ការសាងសង់នឹងដំណើរការតាមការគ្រោងទុក ដោយទុនវិនិយោគព្រលាននេះ អាចមានទំហំទឹកប្រាក់កើនដល់១០០លានដុល្លារ” ។

នៅពេលលើកឡើងពីភាពជោគជ័យ របស់អាកាសយានដ្ឋាននេះ លោកស៊ិន ចាន់សិរីវុត្ថា បានជំរុញឲ្យពិនិត្យមើលផែនការ អភិវឌ្ឍន៍របស់ក្រសួងទេសចរណ៍ ដែលគ្រោងប្រែក្លាយខេត្តនេះជាតំបន់កសិឧស្សាហកម្ម ផ្តល់សេវាកម្មផ្គត់ផ្គង់បន្លែ បង្កាទៅកាន់មូលដ្ឋានទេសចរណ៍ទូទាំងប្រទេស ក៏ដូចជា ការលើកកំពស់វិស័យអេកូទេសចរណ៍។

ក្រសួងទេសចរណ៍ បានដាក់ចេញនូវផែនការមេរបស់ខ្លួន ដោយគ្រោងប្រែក្លាយខេត្តមណ្ឌលគិរីជាតំបន់់សេដ្ឋកិច្ចពហុបំណង គ្រោងប្រែក្លាយតំបន់ជុំវិញព្រលានយន្តហោះជាតំបន់ឧស្សាហកម្ម និងគ្រោងប្រែក្លាយតំបន់ធម្មជាតិក្នុងខេត្ត ជាមូលដ្ឋានសម្រាប់ទាក់ទាញភ្ញៀវទេសចរណ៍លំហែរកាយកម្រិតខ្ពស់មួយ។

រដ្ឋាភិបាលកម្ពុជា ក្រោមការដឹកនាំរបស់សម្តេចតេជោហ៊ុន សែនបានអនុញ្ញាត្តឲ្យក្រុមហ៊ុន Power China Group វិនិយោគសាងសង់គំរោងនេះ តាមបែប BOT ហើយកាលពីពេលថ្មីៗនេះ សម្តេចតេជោបានបង្កើតគណកម្មការអន្តរក្រសួង ដើម្បីរៀបចំសហការជាមួយក្រុមហ៊ុនខាងលើ ក្នុងគោលដៅពន្លឿនការសាងសង់ព្រលានយន្តហោះនេះ៕

អ្នកជំនាញ៖ ទីផ្សារអចលនទ្រព្យកម្ពុជានឹងងើបឡើងវិញប្រមាណ ៧០ភាគរយនៅចុងឆ្នាំនេះ

ដោយៈ រ៉ាណេត

ភ្នំពេញៈ វិស័យអចលនទ្រព្យនៅក្នុងប្រទេកសម្ពុជា បានទទួលរងនូវផលប៉ះពាល់ពីការបញ្ជាទិញ និងវិនិយោគមកពីក្រៅប្រទេស ដែលបង្កឡើងដោយការរីករាលនៃជំងឺកូវីដ ១៩ រហូតមដល់បច្ចុប្បន្ន ប៉ុន្តែអ្នកជំនាញមើលឃើញថា វិស័យនេះនឹងងើបឡើងវិញ ប្រមាណពី៦០ ទៅ៧០ភាគរយនៅចុងឆ្នាំនេះ។

លោកស្រី Grace Rachny Fong អគ្គនាយិកាក្រុមហ៊ុន Century 21 Cambodia បានទទួលស្គាល់ថា វិស័យអលនទ្រព្យ ពិតជាទទួលរងនូវផលប៉ះពាល់ ពីជំងឺកូវីដ១៩ ដូចទៅនឹងវិស័ផ្សេងទៀត ប៉ុន្តែនៅចុងឆ្នាំនេះនឹងប្រសើរឡើងវិញ បន្ទាប់ពីកម្ពុជាបើកយុទ្ធនាការចាក់វ៉ាក់សាំងនៅទូទាំងប្រទេស និងប្រទេសមួយចំនួន នៅក្នុងតំបន់អាស៊ានក៏បានចាប់ផ្តើមចាក់វ៉ាក់សាំងប្រឆាំងនឹងជំងឺកូវីដ១៩ដែរ។

លោកស្រីបន្តថា “ខ្ញុំរំពឹងថានៅចុងឆ្នាំនេះ គឺនៅក្នុងខែ១១ ឬខែ១២ អ្នកធ្វើដំណើរនៅតាមបណ្តាប្រទេសជិតខាងរបស់យើងសឹង្ហបុរី មាឡេស៊ី និងប្រទេសជប៉ុន។ គាត់នឹងមានទំនុកចិត្តកាន់តែខ្លាំង ហើយធ្វើការហោះហើរពីប្រទេសគាត់ មកប្រទេសយើង ដោយសារប្រទេសទាំងសងខាងមានវ៉ាក់សាំងការពារ” ។

បើតាមលោកស្រី Grace Rachny Fong វិស័យអលនទ្រព្យនៅក្នុងប្រទេសកម្ពុជានឹងមានភាពល្អប្រសើរឡើងចន្លោះពី៦០ ទៅ៧០ ភាគរយនៅចុងឆ្នាំ២០២១ នេះ ព្រោះប្រទេសទាំងនៅកម្ពុជា និងតំបន់បានទទួលការចាក់វ៉ាក់ជំងឺកូវីដ១៩ ។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា វិស័យអចលនទ្រព្យនៅក្នុងប្រទេសកម្ពុជា បានជួបបញ្ហាប្រឈមទៅនឹងវិបត្តិនៃជំងឺកូវីដ១៩ ប៉ុន្តែភាប្រឈមនេះ មិនអាចរាំងខ្ទប់មិនឱ្យវិស័យនេះ មិនឲ្យមានការរីកចំរើនទេ។

លោកបន្តថា “បញ្ហាប្រឈមនេះ ត្រូវបានពិភពលោកដោះស្រាយ តាមរយៈការប្រើប្រាស់បច្ចេកវិទ្យាអនឡាញ ។ ជាមួយគ្នានេះ វិស័យអចលនទ្រព្យ ក៏បានពឹងពាក់បច្ចេកវិទ្យានេះ ក្នុងការទិញលក់វិស័យអលនទ្រព្យទាំង នៅក្នុងប្រទេសកម្ពុជា តំបន់អាស៊ាន និងពិភពលោកទាំងមូល” ។

លោកសុខនីមបានថ្លែងថា ជារួមយើងមើលឃើញថា ប្រទេសកម្ពុជា ជាប្រទេសសំណាងមួយ ដែលមានការគ្រប់គ្រងបានល្អលើជំងឺកូវីដ១៩ ពីសំណាក់រាជរដ្ឋាភិបាលកម្ពុជា ដែលមានសម្តេចជោហ៊ុន សែន បានដោះស្រាយទៅវិបត្តិនេះ ក្នុងរយៈពេល២ដងរួចមកហើយ។

ទោះជាយ៉ាង លោកច្រឹក សុខនីមថា នៅក្នុងវិបត្តិនេះ ក៏ជាឱកាសសម្រាប់ធ្វើការវិនិយោគលើវិស័យអចលទ្រព្យ បើទោះបីមិនមានវិនិយោគមកពីក្រៅប្រទេស ប៉ុន្តែ សម្រាប់វិនិយោគិននៅក្នុងស្រុក នៅតែបន្តចាប់យកឱកាសនេះ ដើម្បីធ្វើការវិនិយោគបន្ត ហើយវិស័យនេះ នៅតែបន្តឆ្ពោះទៅមុខ៕

អ្នកជំនាញៈ សកម្មភាពវិនិយោគលើវិស័យអចលនទ្រព្យគ្រប់ផ្នែកកំពុងជួយជម្រុញវិស័យនេះឆ្ពោះទៅមុខ

ដោយៈរ៉ាណេត

ភ្នំពេញៈ ទោះជាស្ថិតនៅក្នុងបរិបថ ដែលកំពុងប្រឆាំងជាមួយនឹងព្រឹត្តិការណ៍ផ្ទុះជំងឺកូវីដ១៩ ក្នុងសហគមន៍នាពេលបច្ចុប្បន្ន គេសង្កេតឃើញថាសកម្មភាពនៃការទិញលក់លំនៅដ្ឋានតម្លៃសមរម្យ ជាពិសេសគម្រោងដីឡូតិ៍នៅតែបន្តមាន ដែលជាចរន្តមួយជួយទ្រទ្រង់ និងជំរុញឱ្យទីផ្សារអចលនទ្រព្យនៅកម្ពុជានៅតែបន្តភាពរឹងមាំ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍នៅរសៀថ្ងៃទី១ ខែមីនា ឆ្នាំ២០២១ថា គ្រប់សកម្មភាពទិញលក់ជួលនៃផ្នែកណាមួយក្នុងទីផ្សារអចលនទ្រព្យ សុទ្ធតែជាចំណុចល្អ ដែលជួយធ្វើឱ្យវិស័យមួយនេះមានភាពរឹងមាំ ជាពិសេសចូលរួមជួយទ្រទ្រង់ទីផ្សារអចលនទ្រព្យ ដែលកំពុងប្រឈមនឹងវិបត្តិនាពេលបច្ចុប្បន្ន។

លោកបន្តថា “ទោះស្ថិតនៅក្នុងវិបត្តិនឹងជំងឺកូវីដ១៩ ក៏វិស័យអចលនទ្រព្យនៅក្នុងប្រទេសកម្ពុជា មិនការធ្លាក់ចុះមកនៅក្នុងកម្រិតសូន្យនោះទេ ពោលវាបាននឹងកំពុងមានដំណើរការទៅមុខ និងមានការគាំទ្រពីប្រជាពលរដ្ឋ”។លោកបន្ថែមថា “វិស័យអចលនទ្រព្យបានទទួលរងនូវផលប៉ះពាល់យ៉ាង ខ្លាំងចាប់តាំពីដើមឆ្នាំ២០២០នេះ(ការរីករាលដាលនៃជំងឺកូវីដ១៩) តាមរយៈការធ្លាក់ចុះនូវការទិញលក់ ប៉ុន្តែមិនធ្លាក់ថ្លៃ ហើយបច្ចុប្បន្ននេះវិនិយោគិន ក្នុងវិស័យនេះក្នុងស្រុកនៅតែបន្តសកម្មភាពដដែល”។

ជាមួយនឹងការលើកឡើងខាងលើនេះ លោកច្រឹក សុខនីម បានបញ្ជាក់ថា សម្រាប់វិស័យអចលនទ្រព្យនៅក្នុងប្រទេសកម្ពុជា នៅតែមានសកម្មភាព ដោយសារមានការគាំទ្រពីអតិថិជននៅក្នុងស្រុក ជាពិសេសដោយសារមានការគាំទ្រពីរាជរដ្ឋាភិបាល តាមរយៈគោលនយោបាយដីធ្លី និងមួយទៀត ការគាំទ្រពីធនគារនៅក្នុងស្រុក ដោយនៅតែបន្តផ្តល់កម្ចីនៅក្នុងវិស័យអចលនទ្រព្យ ហើយនេះគឺជារឿងល្អ ដែលធ្វើឱ្យវិស័យនេះនៅតែមានភាពល្អប្រសើរ បើទោះបីស្ថិតនៅក្នុងវិបត្តិយ៉ាងណាក៏ដោយ។

លោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងប្រាប់គេហទំព័រPropertyarea.asia កាលពីពេលថ្មីៗនេះថា ការចូលរួមទិញ និងវិនិយោគគ្រប់រូបភាព នៅក្នុងវិស័យអចលនទ្រព្យ ពីសំណាក់ប្រជាពលរដ្ឋ ដូចជា ទិញផ្ទះល្វែង ខុនដូ ទិញដីឡូតិ៍ និងដីធ្លីសម្រាប់បម្រើដល់ឧស្សាហកម្ម ក្នុងតម្លៃណាមួយនោះនឹងធ្វើឱ្យវិស័យនេះនៅតែឆ្ពោះទៅមុខ។

លោកបណ្ឌិតបន្តថា “ជាទូទៅយើងមើលឃើញថា តម្លៃអចលនទ្រព្យគ្រប់ប្រភេទនៅក្នុងដំណាក់កាលនេះ ហាក់មិនឡើងថ្លៃនោះទេ ឬមានអ្នកខ្លះដែលបន្ទាន់លុយអាចលក់ក្នុងតម្លៃមួយក្រោមទីផ្សារ”។លោកបន្តថា “ដូច្នេះកាលណាតម្លៃអចលនទ្រព្យមិនទាន់បានឡើង និងមិនទាន់មានសន្ទុះឡើងលឿន ដោយសារកត្តាបែបនេះ(កូវីដ១៩) វាក៏ជាឱកាសសម្រាប់អ្នករកស៊ីក្នុងវិស័យនេះ ដែលមានលុយគ្រប់គ្រាន់ទិញទុកលក់បន្តយកចំណេញ ក្រោយពេលដែលវិបត្តិត្រូវបានបញ្ចប់”។

លោកបន្តថា ក្រោយពេលបញ្ហាត្រូវបានបញ្ចប់ទាំងស្រុង លោកជឿជាក់ថា១០០ភាគរយ តម្លៃអចលនទ្រព្យនឹងឡើងថ្លៃខ្ពស់ ដូច្នេះការទិញលក់អចលនទ្រព្យ នៅក្នុងរដូវកាលនេះ គឺជាឱកាសចំណេញនៅថ្ងៃក្រោយ៕

ចំណេះដឹងអចលនទ្រព្យៈ មុនចេញធ្វើជំនួញវិស័យអចលនទ្រព្យ តើអ្នកត្រូវចេះវិជ្ជាគុនអ្វីខ្លះ?

ដោយៈលក្ខិណា

ភ្នំពេញៈ ក្នុងវិស័យអចលនទ្រព្យកម្ពុជាបច្ចុប្បន្ននេះ គេសង្កេតឃើញថា មានអ្នកកំពុងធ្វើជំនួញ ក្នុងវិស័យនេះកាន់តែច្រើនឡើងៗ ហើយក៏មានអ្នកទទួលបានជោគជ័យជាច្រើនផងដែរ ហើយក៏មានអ្នកជំនួញថ្មីៗបន្តបន្ទាប់ ចាប់ផ្ដើមធ្វើជំនួញក្នុងវិស័យអចលនទ្រព្យនេះដែរ។

ប៉ុន្តែការប្រឡូកក្នុងវិស័យនេះ មិនប្រាកដជោគជ័យគ្រប់គ្នានោះទេ ដូច្នេះមុនចេញធ្វើជំនួញវិស័យអចលនទ្រព្យគួរមានចំណេះដឹងអ្វីខ្លះ?។

យោងសារគេហទំព័រហិរញ្ញវត្ថុបានឱ្យដឹងថា មុនចេញនឹងរកស៊ីលើវិស័យអចលនទ្រព្យ អ្នកគួរតែយល់ដឹងនូវចំណុចមួយចំនួនសិនដូចជា

១ ចំណេះដឹងទីផ្សារក្នុងវិស័យអចលនទ្រព្យ

ចំណេះដឹងទីផ្សារ ក្នុងវិស័យអចលនទ្រព្យភាពខុសប្លែក ពីទីផ្សារផលិតកម្ម សេវាកម្ម ក្នុងវិស័យផ្សេងទៀត។ ចំណេះដឹងទីផ្សារអចលនទ្រព្យ គឺសំដៅលើការចេះជ្រើសរើសទីតាំងរបៀបរង្វាយតម្លៃអចលនទ្រព្យ និងគោលដៅនៃការបញ្ចុះទុន។ ការជ្រើសរើសទីតាំងពិតជាមានសារសំខាន់ខ្លាំង ព្រោះទាំងការទិញ ទុកជួល ឬលក់បើសិនជាគ្មានតម្រូវការនឹងត្រូវកប់ដើម។

របៀបរង្វាយតម្លៃអចលនទ្រព្យ ក៏ត្រូវមានបច្ចេកទេសខ្ពស់ បទពិសោធន៍ និងជំនាញ ។ អ្នកត្រូវដឹងពីតម្រូវការទីផ្សារ ស្ថានភាពសេដ្ឋកិច្ច កត្តារុញច្រើនឱ្យមានតម្រូវការនិងហាងឆេង ទើបការរង្វាយតម្លៃនោះមានប្រសិទ្ធភាព។

ចំណែកគោលដៅនៃការដាក់ទុនៈ មុននឹងសម្រេចចិត្តរកស៊ី ក្នុងវិស័យនេះ សាម៉ីខ្លួន ត្រូវដឹងថាខ្លួនចង់ធ្វើអ្វី ជាឈ្មួញកណ្ដាលជាភ្នាក់ងារ ឬជាអ្នកវិនិយោគ។

២ ច្បាប់ភូមិបាលនិងនីតិវិធី

មុនចេញរកស៊ី ក៏ត្រូវដឹងពីចំណុចនេះជាមុនសិន ព្រោះបើមិនបានយល់ដឹងពីនីតិវិធីនេះ អ្នករកស៊ីអាចពិបាកក្នុងការសុំសិទ្ធិទំនាក់ទំនង និងអាចជួបប្រទះនឹងវិវាទដីធ្លី ។ ការសុំសិទ្ធិ នឹងអាជ្ញាប័ណ្ណពាក់ព័ន្ធក៏សំខាន់ដែរ ទោះបីជាភ្នាក់ងាររបស់ឈ្មួញកណ្ដាលអចលនទ្រព្យ ក៏ត្រូវសុំអាជ្ញាប័ណ្ណទទួលស្គាល់ពីសមាគមអចលនទ្រព្យងដែរ ។

៣ ការគ្រប់គ្រងលំហូរសាច់ប្រាក់

សម្រាប់វិស័យអចលនទ្រព្យ ការរៀបចំប្រតិបត្តិការហិរញ្ញវត្ថុ ឱ្យបានត្រឹមត្រូវពិតសំខាន់ណាស់ ព្រោះអ្នករកស៊ីអចលនទ្រព្យ ត្រូវការសាច់ប្រាក់ច្រើន ក្នុងប្រតិបត្តិការនីមួយៗ។ ដូច្នេះកាលណាអ្នកអាចគ្រប់គ្រង និងរៀបចំហិរញ្ញវត្ថុរបស់ ការរកស៊ីបានល្អនោះវាធ្វើឱ្យអ្នកមានស្ថេរភាពក្នុងវិស័យនេះ។

ការបណ្ដាក់ទុនក្នុងវិស័យ ក្នុងវិស័យអចលនទ្រព្យគឺមានចំនួនច្រើន ដូច្នេះលំហូរសាច់ប្រាក់ ដែលត្រូវទូទាត់កម្ចី ឬការប្រាក់ត្រូវមានតុល្យភាពជាមួយនឹងចំណូល។

៤ ចេះជ្រើសរើសដៃគូសហការ

ការចាប់ដៃគូរសហការពិតជាមានលំបាក ដោយសារគ្រប់គ្នាអាចមើលឃើញភាពខុសគ្នាក្នុងការរកស៊ី ។ មុននឹងចេញរកស៊ីក្នុងវិស័យនេះ ត្រូវស្វែងយល់និងសិក្សាលម្អិត វាមិនអាស្រ័យទៅលើដើមទុនតែមួយនោះទេ ។

យ៉ាងណាចំណុចទាំង៤ខាងលើនេះ គ្រាន់តែជាចំណុចមួយចំនួនជាគ្រឹះសម្រាប់សហគ្រិនមុននឹងចេញធ្វើជំនួញ ក្នុងការវិនិយោគនិងដាក់ទុនក្នុងវិស័យនេះ ។ មានបុគ្គលជោគជ័យជាច្រើនទៀត ក៏បានយកទ្រឹស្តីផ្សេងមកអនុវត្តន៍ សម្រាប់ជំនួញរបស់ខ្លួនផងដែរ៕

ក្រុមហ៊ុនអាមេរិកដ៏ធំមួយទិញភាគហ៊ុនក្រុមហ៊ុនផលិតវ៉ាក់សាំងកូវីដ១៩ដែលកម្ពុជាទើបទទួលបានក្នុងតម្លៃ១ពាន់លានដុល្លារ

ដោយៈ ប៊ី

អន្តរជាតិៈ ក្រុមហ៊ុន AstraZeneca Plc បានលក់ភាគហ៊ុនរបស់ខ្លួននៅក្នុងក្រុមហ៊ុន Moderna Inc ក្នុងតម្លៃជាង១ពាន់លានដុល្លារអាមេរិក បន្ទាប់ពីភាគហ៊ុនរបស់ក្រុមហ៊ុនជីវបច្ចេកវិទ្យាអាមេរិក Modernaនេះ បានកើនឡើងខ្លាំង ដោយសារការគាំទ្រាំដោយការផលិតវ៉ាក់សាំងកូវីដ១៩។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១ ខែមីនា ឆ្នាំ២០២១។

ទោះបីជាយ៉ាងក៏ដោយ មិនច្បាស់ទេថា តើពេលណា និងរយៈពេលប៉ុន្មាន ដែលក្រុមហ៊ុន AstraZeneca នឹងលក់ភាគហ៊ុនរបស់ខ្លួនទាំងស្រុង ទៅឱ្យក្រុមហ៊ុន Moderna នោះទេ។

ក្រសួងសុខាភិបាលកម្ពុជា បានប្រកាសព័ត៌មានផ្លូវការកាលពីថ្ងៃទី២៨ ខែកុម្ភៈ ឆ្នាំ២០២១នេះថា កម្ពុជានឹងទទួលបានវ៉ាក់សាំងកូវីដ១៩ របស់ក្រុមហ៊ុនAstraZeneca ដែលផលិតនៅប្រទេសឥណ្ឌា ចំនួន៣២៤,០០០ដូស នៅថ្ងៃទី០២ ខែមីនា ឆ្នាំ២០២១ខាងមុខនេះ។

អង្គការសុខភាពពិភពលោក (WHO) បានអនុម័តឲ្យប្រើវ៉ាក់សាំងបង្ការជំងឺកូវីដ១៩របស់ក្រុមហ៊ុនអង់គ្លេស AstraZeneca នៅក្នុងករណីបន្ទាន់ហើយ។ នេះបើតាមការចេញផ្សាយ ដោយសារព័ត៌មាន CNA កាល ព្រឹកថ្ងៃអង្គារ ទី១៦ ខែកុម្ភៈ ឆ្នាំ២០២១។

ការអនុម័តខាងលើនេះ ត្រូវបានគេមើលឃើញថា នឹងបើកទូលាយកាន់តែខ្លាំង សម្រាប់ប្រទេសកំពុងអភិវឌ្ឍ ដើម្បីទទួលបានវ៉ាក់សាំងបង្ការកូវីដ១៩ ដែលមានតម្លៃសមរម្យ និងងាយស្រួលក្នុងការដឹកជញ្ជូន។

ជុំវិញការសម្រេចចិត្តនេះ ប្រធានអង្គការ WHO លោក ថេដ្រូស អាដាណម បានលើកឡើងថា “ឥឡូវនេះយើងមានអ្វីៗគ្រប់យ៉ាងនៅក្នុងដៃ ដើម្បីបង្កើនការផ្គត់ផ្គង់វ៉ាក់សាំង ប៉ុន្តែយើងត្រូវតែបង្កើនផលិតកម្មជាមុនសិន”។

លោកបានបន្តថា យើងនឹងបន្តអំពាវនាវ ឲ្យបណ្តាក្រុមហ៊ុនអភិវឌ្ឍវ៉ាក់សាំងជំងឺកូវីដ១៩ បញ្ជូនវ៉ាក់សាំងរបស់ពួកគេមកកាន់ WHO នៅអំឡុងពេលដូចគ្នាដែលពួកគេ ត្រូវបញ្ជូនវ៉ាក់សាំងទាំងនោះ ទៅកាន់ប្រទេសអ្នកមានៗដែរ។

វ៉ាក់សាំងបង្ការជំងឺកូវីដ១៩ ដែល WHO ទើបបានអនុម័តនេះ គឺជាផលិតផលរបស់ក្រុមហ៊ុនអង់គ្លេស AstraZenecaដែលបានប្រគល់សិទ្ធិផលិតបន្ត ទៅដល់ក្រុមហ៊ុនអ៊ែសខេបាយអូ (SKBio) នៃប្រទេសកូរ៉េខាងត្បូង និងវិទ្យាស្ថានស៊ឺរឹម (Serum) នៃប្រទេសឥណ្ឌា។

ការអនុម័តត្រូវបានធ្វើឡើង ក្រោយក្រុមជំនាញ WHO បានធ្វើការត្រួតពិនិត្យយ៉ាងដិតដល់ ចំពោះសុវត្ថិភាព ប្រសិទ្ធភាព និងហានិភ័យ។ នៅក្នុងត្រីមាសទី ១ នៃឆ្នាំ២០២១ អង្គការ WHO រំពឹងទទួលបានវ៉ាក់សាំងពីក្រុមហ៊ុននានាសរុប ៣០០លានដូស ដើម្បីផ្គត់ផ្គង់ទៅដល់ប្រទេសចំនួន ១៤៥ តាមរយៈកម្មវិធី COVAX៕

បណ្តាខេត្តជាប់តំបន់ឆ្នេរកំពុងពង្រីកមូលដ្ឋានទាក់ទាញទេសចរណ៍តាមផ្លូវទឹក

ដោយ:គង់ សូរិយា

ភ្នំពេញៈ បណ្តាខេត្តជាប់តំបន់ឆ្នេរកម្ពុជា ឬតំបន់K4 បាននិងកំពុងពង្រីកមូលដ្ឋានទេសចរណ៍របស់ខ្លួន ដើម្បីទាក់ទាញទេសចរណ៍តាមផ្លូវទឹក ជាមួយបណ្តាប្រទេសជិតខាង។

ខេត្តព្រះសីហនុ

នៅព្រឹកថ្ងៃនេះ ក្រសួងការបរទេសនិងសហប្រតិបត្តិការអន្តរជាតិ និងស្ថានទូតជប៉ុនបានចុះហត្ថលេខា ដើម្បីទទួលជំនួយជាង១១លានដុល្លារអាមេរិក ដើម្បីទទួលជំនួយពីភាគីជប៉ុន ដែលជំនួយនេះ នឹងផ្តោតលើការអភិវឌ្ឍនាវាទេសចរណ៍ នៅខេត្តដ៏ល្បីល្បាញ និងជាខេត្តដែលមានការរីកចម្រើនយ៉ាងលឿននេះ។

កំពង់ផែស្វ័យត្ន ខេត្តព្រះសីហនុ ក៏បានកែលំអរដើម្បីជួយលើកកំពស់ និងសម្រូលការចូលចតនាវាទេសចរណ៍ធំៗពីអន្តរជាតិផងដែរ។

ខេត្តកំពត

ក្រោមជំនួយពីធនាគារអភិវឌ្ឍន៍អាស៊ី ក្រសួងសាធារណៈការបាននិងកំពុងជម្រុញការសាងសង់កំពង់ផែ ដ៏ស្រស់ស្អាតដើម្បីទាក់ទាញកប៉ាល់តេសចរណ៍ពីប្រទេសវៀតណាម ប្រទេសថៃ ដើម្បីចូលចតផងដែរ។ កំពង់ផែដែលមានរាងដូចត្របកផ្កាឈូកនេះ បាននិងកំពុងសាងសង់ ដែលគ្រោងបញ្ចប់ក្នុងឆ្នាំនេះ។

KhmerKeyboard_NiDA_V1.0

ខេត្តកែប

ខេត្តតូចច្រឡឹងនេះ ក៏បាននិងកំពុងសាងសង់កំពង់ផែ ដែលមានរូបរាងដូចក្តាមថ្ម របស់ខ្លួនផងដែរ ដែលកំពង់ផែនេះ មានទីតាំងស្ថិតនៅក្បែរកំពង់ផែឆ្លង ទៅកាន់កោះទន្សាយសព្វថ្ងៃនេះ។

កំពង់ផែនេះបាននិងកំពុងសាងសង់ ដើម្បីជួយសម្រួលការតភ្ជាប់ជាមួយនឹងកំពង់ផែខេត្តកំពត ក៏ដូចជាលើកកំពស់បរិស្ថាន សោភ័ណភាព និងភាពប្រទាក់ក្រឡាគ្នាជាមួយនឹងកំពង់ផែនានាផងដែរ។

ខេត្តកោះកុង

បើតាមអភិបាលខេត្តកោះកុង លោកស្រីភូថង មិថុនាបានមានប្រសាសន៍ឲ្យដឹងថា ក្រសួងសាធារណៈការបានចុះសិក្សាពិនិត្យលទ្ឋភាព ដើម្បីសាងសង់កំពង់ផែទេសចរណ៍ថ្មីមួយ នៅក្រុងខេមរភូមិន្ទ ក្នុងទីរួមខេត្តកោះកុងផងដែរ។ ប៉ុន្តែទោះជាយ៉ាងណាលោកស្រីមិនបញ្ជាក់ឲ្យដឹងថា កំពង់ផែទេសចរណ៍ក្នុងខេត្តដែលធ្លាប់ដាច់ស្រយាលនេះ នឹងសាងសង់នាពេលណានោះទេ៕

អភិបាខេត្តកោះកុងៈព្រលានយន្តហោះតារាសាគរនឹងបើកដំណើរការជាផ្លូវការនៅចុងឆ្នាំនេះ

ដោយ:គង់ សូរិយា

ភ្នំពេញៈ ព្រលានយន្តហោះតារាសាគរ ខេត្តកោះកុងនឹងបើកដំណើរការនៅចុងត្រីមាសទី៤ឆ្នាំនេះ ដែលនឹងធ្វើឲ្យខេត្តនេះទាក់ទាញទេសចរណ៍ និងលំហូរទុនវិនិយោគកាន់តែច្រើនថែមទៀត។

អភិបាលខេត្តកោះកុង លោកស្រីមិថុនា ភូថងបានមានប្រសាសន៍ឲ្យដឹងកាលពីសប្តាហ៍មុនថា តាមអ្វីដែលក្រុមហ៊ុនអភិវឌ្ឍន៍ព្រលានយន្តហោះនេះ ផ្តល់ព៌តមានឲ្យយើងដឹង គឺព្រលាននេះនឹងដំណើរការនៅចុងត្រីមាសទី៤ឆ្នាំនេះ ប្រសិនជាគ្មានអ្វីប្រែប្រួលទេនោះ ព្រោះរហូតមកទល់ពេលនេះ ផ្លូវរត់ព្រលាននេះបានបញ្ចប់ការសាងសង់ហើយ នៅសល់តែបញ្ជរទទួលអ្នកដំណើរប៉ុណ្ណោះ ប៉ុន្តែរហូតមកទល់ពេលនេះការសាងសង់ស្ថានីយ៍ទទួលអ្នកដំណើរសម្រេចបានប្រមាណ៨០ភាគរយផងដែរ។

លោកស្រីបន្តថា “ខេត្តកោះកុងពីមុនមានភាពដាច់ស្រយាល ប៉ុន្តែនៅពេលព្រលានយន្តហោះនេះបើកដំណើរការ ខេត្តនេះលែងឆ្ងាយទៀតហើយ”។លោកស្រីបន្ថែមថា “ព្រលានយន្តហោះនេះ នឹងទាក់ទាញភ្ញៀវទេសចរណ៍ និងការវិនិយោគកាន់តែច្រើន ខណៈឆ្នាំមុន ខេត្តទទួលបានគំរោងវិនិយោគកើនឡើងទាំងផ្ទះសំណាក់ និងសណ្ឋាគារ”។

ជាមួយគ្នានេះ លោកស៊ិន ចាន់សិរីវុត្ថាអ្នកនាំពាក្យនិងជាអណុរដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី១ មិនានេះថា ព្រលានយន្តហោះនេះនឹងដំណើរការតាមការគ្រោងទុកពិតមែន ដោយបច្ចុប្បន្ននេះ ក្រុមការងារបច្ចេកទេសកំពុងរៀបចំតាមនិតិវិធី ដើម្បីដំណើរការព្រលានយន្តហោះនេះតាមការគ្រោងទុក។

លោកបន្តថា “ព្រលានយន្តហោះខ្នាត4Eនេះ មានទំហំសមល្មមមិនធំពេក មិនតូចពេក ដែលវានឹងបំរើឲ្យតំបន់វិស្សមកាលនៅតារាសាគរ ដែលមានផ្ទៃដីទំហំរហូតដល់៤៥០០០ហិកតា”។លោកបន្តថា “គំរោងនេះមានអ្វីៗទាំងអស់ សម្រាប់បំរើភ្ញៀវទេសចរ ណ៍នៅតំបន់នេះ”។

លោកស៊ិន ចាន់សិរីវុត្ថាបានបន្តទៀតថា ព្រលាននេះ មិនប្រកួតប្រជែងជាមួយព្រលានយន្តហោះក្រុងព្រះសីហនុនោះទេ តែវាបំរើឲ្យគម្រោងតារាសាគរច្រើនជាង ប៉ុន្តែវាក៏អាចទទួលការចុះចតរបស់ក្រុមហ៊ុនអាកាសចរណ៍ដទៃផងដែរ៕