បង្កើតឱកាសក្នុងពេលវិបត្តិដូចម្តេច សម្រាប់ការវិនិយោគអចលនទ្រព្យ?

ដោយៈ រ៉ាណេត

ភ្នំពេញៈ អ្នកជំនាញបាននិយាយថា ទីផ្សារអចលនទ្រព្យនៅពេលបច្ចុប្បន្នត្រូវបានអ្នកជំនាញទទួលស្គាល់ថា ពិតជាទទួលរងនូវផលប៉ះពាល់ពីវិបត្តិនៃជំងឺឆ្លង ហើយបានជះឥទ្ធិពលអាក្រក់បន្តទៅដល់បណ្តាភ្នាក់ងារដែលរកចំណូលពីទីផ្សារមួយនេះ។

យ៉ាងណាក៏ដោយ អ្នកជំនាញដែលធ្លាប់មានបទពិសោធន៍ច្រើនឆ្នាំ បានរំលឹកថាក្នុងដំណាក់កាលនេះ ភ្នាក់ងារគួរតែយកពេលដែលទីផ្សារកំពុងស្ងប់ស្ងាត់នេះ បង្កើនចំណេះដឹងបន្ថែមទៀត។

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា ឧកញ៉ាឃាង ពុទ្ធី បានមានប្រសាសន៍ឲ្យដឹងនៅពេលថ្មីៗនេះថា នៅក្នុងដំណាក់កាលនេះ មិនថាចំពោះទីផ្សារអចលនទ្រព្យនោះទេ ដែលរងនូវផលប៉ះពាល់ ទីផ្សារនៃវិស័យផ្សេងទៀតក៏ប៉ះពាល់ដូចគ្នា ទាស់ត្រង់ថាតិចឬច្រើនតែប៉ុណ្ណោះ។

លោកបន្តថា“សម្រាប់ទីផ្សារអចលនទ្រព្យ បានប៉ះពាល់តាំងពីដើមឆ្នាំ២០២០ ប៉ុន្តែវាកាន់តែធ្ងន់ធ្ងរ ប៉ុន្តែក្រោយពេលមានការរាតត្បាត នៅក្នុងសហគមន៍ដែលកាន់តែធ្វើឱ្យទីផ្សាររួមមានភាពស្ងប់ស្ងាត់”។ លោកបន្តថា “ភាពស្ងប់ស្ងាត់នេះ វាប៉ះពាល់ទាំងអ្នកវិនិយោគ ទាំងអស់អ្នកអភិវឌ្ឍន៍ ជាពិសេសធ្វើឱ្យបណ្តាភ្នាក់ងារភាគច្រើន ប៉ះពាល់ចំណូលដែលបានមកពីកម្រៃជើងសារ”។

លោកឧកញ៉ាឃាង ពុទ្ធី បានមានប្រសាសន៍បន្តទៀតថា ពួកគាត់ភាគច្រើនពិតជាប៉ះពាល់ចំណូលប្រាកដមែន ព្រោះចំណូលរបស់ពួកគាត់បានមកពីការលក់ និងការទទួលបានកម្រៃជើងសារ លុះនៅពេលទីផ្សារធ្លាក់ចុះ មានភាពស្ងប់ស្ងាត់ដូចបច្ចុប្បន្ននេះ ចំណូលពួកគាត់ក៏ត្រូវធ្លាក់ដែរ។ ប៉ុន្តែអ្វីដែលសំខាន់សម្រាប់ពួកគាត់ ដែលជាភ្នាក់ងារត្រូវធ្វើនៅពេលនេះ ត្រូវតែចេះយកពេលស្ងប់ស្ងាត់ទាំងនេះ ធ្វើឱ្យមានប្រយោជន៍ដោយការបង្កើនចំណេះដឹងបន្ថែម តាមរយៈការហាត់រៀនពីជំនាញនៃការលក់។ រៀនពីរបៀបនៃការផ្សព្វផ្សាយតាមបច្ចេកវិទ្យា រៀនភាសាបន្ថែមសម្រាប់ត្រៀមអនុវត្តន៍ លើទីផ្សារក្រោយពេលស្ថានការណ៍វិលត្រឡប់រកភាពល្អប្រសើរវិញ។

លោកបន្តថា “យើងកុំប្រើយុទ្ធសាស្ត្រកាប់បំពុងរង់ចាំទឹកភ្លៀង ប៉ុន្តែត្រូវកែប្រែកាលៈទេសៈប្រឈមនៅពេលនេះ ឱ្យក្លាយជាវេលាល្អសម្រាប់បង្កើនចំណេះដឹងបន្ថែម ដើម្បីអភិវឌ្ឍន៍ខ្លួនបន្ថែមទៀតទៅលើអាជីពរបស់ខ្លួន”។

ជាមួយគ្នានេះ លោក ម៉ាន់ ច័ន្ទឌី អគ្គនាយកក្រុមហ៊ុន PREMIUM Group បានមានប្រសាសន៍ថា ទោះជាមិនស្ថិតនៅក្នុងកាលទេសៈបែបនេះក៏ដោយ ក្នុងនាមជាភ្នាក់ងារអាជីពដែលអាចមានទីផ្សារច្រើន និងអាចទទួលបានភាគរយជោគជ័យខ្ពស់ គឺជាភ្នាក់ងារដែលមានចំណេះដឹងទូលំទូលាយ មានកាស្វែងយល់ច្រើនពីទីផ្សាររួម ជាពិសេសមានជំនាញផ្នែកទំនាក់ទំនងខ្ពស់”។

លោកថា “ការរៀនសូត្រ បង្កើនចំណេះដឹងគឺមិនមានដែនកំណត់នោះទេ ដូច្នេះគួរកុំទុកពេលទំនេរឱ្យកន្លងផុតទៅឱ្យសោះ តែត្រូវយកឱកាសនេះចាប់ជំនាញថ្មី បន្ថែមទៀត ចេះច្រើនពេលណា មានឱកាសចាប់បានចំណែកទីផ្សារបានច្រើនដូចគ្នា”៕

តើមន្រ្តីUN និងរដ្ឋបាលខេត្តព្រះសីហនុបានផ្តោតលើបញ្ហាអ្វីខ្លះដើម្បីប្រែក្លាយក្រុងព្រះសីហនុជាទីក្រុងស្អាត

ដោយ:គង់ សូរិយា

ភ្នំពេញៈ ក្រុមមន្រ្តីជាន់ខ្ពស់អង្គការសហប្រជាជាតិ និងអភិបាលខេត្តលោកគួច ចំរើនធ្លាប់បានពិភាក្សាគ្នា ដើម្បីប្រែក្លាយក្រុងព្រះសីហនុជាទីក្រុងស្អាត និងមានការអភិវឌ្ឍប្រកបដោយនិរន្តរភាព។

កាលពីដើមសប្តាហ៍នេះ ក្រុមមន្ត្រីអង្គការសហប្រជាជាតិប្រចាំកម្ពុជា បានបើកកិច្ចប្រជុំតាមប្រព័ន្ធអនឡាញ ជាមួយមន្ត្រីខេត្តព្រះសីហនុ ដើម្បីពិភាក្សាលើដំណើរការគម្រោង «ក្រុងព្រះសីហនុសម្រាប់ទាំងអស់គ្នា៖ លើកកម្ពស់ទីក្រុងស្អាត និរន្តរភាព និងបរិយាប័ន្ន» ដែលជាគម្រោងអនុវត្តដោយការិយាល័យ ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្ស និងអង្គការសហប្រជាជាតិផ្នែកទីជម្រក (UN-Habitat)។

លោកស្រីPauline Tamesis អ្នកសម្របសម្រួលប្រចាំប្រទេសកម្ពុជានៃអង្គការសហប្រជាជាតិបានថ្លែងថា គម្រោងនេះ កើតចេញពីកិច្ចប្រជុំមួយរវាងក្រុមការងារអង្គការសហប្រជាជាតិនៅកម្ពុជាជាមួយលោក គួច ចំរើន អភិបាលខេត្តព្រះសីហនុកាលពីខែវិច្ឆិកា ឆ្នាំ ២០១៩។ នៅក្នុងជំនួបនៅពេលនោះ ភាគីទាំង ២ បានពិភាក្សាលើបញ្ហាជាច្រើន រួមមាន ទាំងនគរូបនីយកម្ម កំណើនសេដ្ឋកិច្ច និងការអភិវឌ្ឍប្រកបដោយបរិយាប័ន្ន។

លោកស្រីបានថ្លែងថា “ដោយសារតែមានការអភិវឌ្ឍយ៉ាងលឿន នៅខេត្តមាត់សមុទ្រមួយនេះ ការយកចិត្តទុកដាក់គួរតែផ្ដោតទៅលើថា តើទីក្រុងនិងខេត្តនេះ អភិវឌ្ឍឲ្យទៅជាខេត្តដែលមានភាពវៃឆ្លាត ប្រកបដោយបរិយាប័ន្ន និងប្រកបដោយចីរភាពដោយរបៀបណា”។

គម្រោងនេះសហការនេះ បានចាប់ផ្ដើមពីខែសីហា ឆ្នាំ ២០២០ និងបញ្ចប់នៅខែកក្កដាឆ្នាំ ២០២១។ វាឈរនៅលើរបៀបវារៈការអភិវឌ្ឍប្រកបដោយចីរភាពឆ្នាំ ២០៣០ និងគោលដៅអភិវឌ្ឍន៍ប្រកបដោយចីរភាព។

លោកស្រីថ្លែងឲ្យដឹងទៀតថា “ការផ្សារភ្ជាប់គម្រោងទីក្រុងវៃឆ្លាត ទៅនឹងគោលដៅអភិវឌ្ឍន៍ប្រកបដោយចីរភាព មិនទាន់គ្រប់គ្រាន់ទេ”។ លោកស្រីបន្ថែមថា “តាមពិតទៅ គ្មានទីក្រុងណា ដែលត្រូវបានចាត់ទុកថា មានភាពវៃឆ្លាតទេ ប្រសិនបើទីក្រុងនោះបំភ្លេចចោលនូវផលប្រយោជន៍របស់ជនក្រីក្រ អ្នកដែលគេគិតថា មិនសំខាន់ ក្រុម និងសហគមន៍ដែលងាយរងគ្រោះ”។

លោកស្រីបន្តថា គោលគំនិតបង្កើតទីក្រុងវៃឆ្លាតនេះ គួរតែទទួលនូវធាតុចូលពីក្រុមអ្នកជំនាញ អង្គការសង្គមស៊ីវិល ក្រុមចលនាសង្គម និងតំណាងពលរដ្ឋ ដើម្បីធានាបានថា គម្រោងទីក្រុងវៃឆ្លាតនេះ គ្រប់ជ្រុងជ្រោយ និងមានតម្លៃសកល។

រដ្ឋាភិបាលកម្ពុជាបាននិងកំពុងរៀបចំ ខេត្តសៀមរាប បាត់ដំបង និងទីក្រុងភ្នំពេញ ដើម្បីដាក់បញ្ចូលក្នុងបណ្ដាញទីក្រុងវៃឆ្លាតអាស៊ាន ប៉ុន្តែខេត្តព្រះសីហនុ មិនត្រូវបានដាក់បញ្ចូលទេ។

អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យបានមានប្រសាសន៍ថា ការអភិវឌ្ឍខេត្តព្រះសីហនុ ឲ្យទៅជាទីក្រុងវៃឆ្លាត មានសារៈសំខាន់ហើយស្របទៅនឹងទស្សនវិស័យរបស់រាជរដ្ឋាភិបាល”។លោកបន្តថា “រដ្ឋបាលខេត្តបានបង្កើតក្រុមការងារមួយ ដើម្បីធ្វើកិច្ចការនេះ ដោយមានសមាជិកពីអាជ្ញាធរពាក់ព័ន្ធ ក្រុមការងារអង្គការសហប្រជាជាតិប្រចាំកម្ពុជា ដៃគូអភិវឌ្ឍន៍ អង្គការសង្គមស៊ីវិល និងភាគីពាក់ព័ន្ធមួយចំនួនទៀត”។

លោកបន្តថា ក្រុមការងារនេះ មានភារកិច្ចបង្កើតផែនការសកម្មភាព និងផែនការហិរញ្ញវត្ថុ បង្កើតយុទ្ធសាស្ត្រ និងការងារអាទិភាពសម្រាប់រយៈពេលខ្លី មធ្យម និងវែង ក្នុងចំណោមកិច្ចការជាច្រើនទៀត។ក្រុមការងារក៏មានភារកិច្ចរៀបចំឯកសារ ដើម្បីដាក់ស្នើបញ្ចូលទីក្រុងព្រះសីហនុ ទៅក្នុងបណ្ដាញទីក្រុងវៃឆ្លាតរបស់អាស៊ានផងដែរ៕

រដ្ឋាភិបាលកំពុងធ្វើពិពិធកម្មសេដ្ឋកិច្ចខេត្តសៀមរាប ដោយកាត់បន្ថយការពឹងផ្អែកវិស័យវិស័យទេសចរណ៍?

ដោយ:ស៊ីវ ម៉េង

សៀមរាបៈ រដ្ឋាភិបាលបាន និងកំពុងធ្វើពិពិធកម្មមូលដ្ឋានសេដ្ឋកិច្ច ខេត្តសៀមរាប ដើម្បីកាត់បន្ថយការពឹងផ្អែកលើវិស័យទេសចរណ៍ ដែលបានរងគ្រោះដោយជំងឺកូវីដ១៩យ៉ាងធ្ងន់ធ្ងរ។

វិបត្តិជំងឺកូវីដ១៩ បានផ្តល់នូវមេរៀនមួយ ដែលបានធ្វើឲ្យរដ្ឋាភិបាល និងវិស័យឯកជនចាំបាច់ត្រូវគិតគូរឡើងវិញ ពីការធ្វើឲ្យសេដ្ឋកិច្ចរបស់ខេត្តនេះបន្តរសរវើក ជាជាងពឹងផ្អែកតែវិស័យទេសចរណ៍ ដែលមានភាពផុយស្រួយដោយសារវិបត្តិនានា។

បច្ចុប្បន្នរដ្ឋាភិបាលបាននិងកំពុងកសាងផ្លូវចំនួន៣៨ខ្សែ កែលំអស្ទឹងសៀមរាប ដើម្បីលើកកំពស់សោភ័ណភាពខេត្តនេះ ដែលបបញ្ហានេះត្រូវបានគេបំភ្លេចរាប់ឆ្នាំមកហើយ។

ជាមួយនឹងផែនការដាក់ចេញរបស់រដ្ឋាភិបាល ក្រុមហ៊ុនវិនិយោគក្នុងស្រុកលំដាប់ជាតិ និងអន្តរជាតិជាច្រើនបាននិងកំពុងសម្លឹងឃើញសក្តានុពលនៅក្នុងខេត្តនេះ ដូចជាបុរីឡេងណាវ៉ាត្រា បុរីបាគង បុរីទេសចរណ៍ គំរោងAngkor Landmark និងការវិនិយោគរបស់ក្រុមហ៊ុនអន្តរជាតិជាច្រើនទៀត ដូចជា ក្រុមហ៊ុនយូណានរបស់ចិនបាន និងកំពុងសាងសង់ព្រលានយន្តហោះលំដាប់អន្តរជាតិ នៅក្នុងស្រុកសូទ្រនិគម ក្រុមហ៊ុនវិនិយោគកោះសង្សារ កំពុងរៀបចំផែនការអភិវឌ្ឍន៍នៅស្រុកបន្ទាយស្រី ក្រុមហ៊ុនNaga Corp កំពុងរៀបចំបោះទុនវិនិយោគ៣៥០លានដុល្លារ សាងសង់ផ្សារបណ្តែតទឹក សាងសង់រមណីយដ្ឋាន សាងសង់ទីក្រុងចិន (China Town)ជាដើម ក្រុមហ៊ុនជប៉ុនសាងសង់កន្រ្តកវិញដ៏ធំមួយ នៅក្បែរទីក្រុងសៀមរាប និងគំរោងវិនិយោគជាច្រើនទៀតរបស់ក្រុមហ៊ុនអន្តរជាតិនានា។

រដ្ឋាភិបាលតាមរយៈក្រសួងទេសចរណ៍ក៏បានរៀបចំផែនការមេ ដើម្បីលើកកំពស់វិស័យទេសចរណ៍ក្នុងខេត្តនេះឡើងវិញ តាមរយៈការបង្កើតផលិតផលទេសចរណ៍ថ្មីៗ ផ្តល់សេវាកម្មបដិសណ្ឋារកិច្ចកាន់តែល្អប្រសើរ និងធ្វើពិពិធកម្មផលិតផលទេសចរណ៍ ដើម្បីផ្តល់ផលប្រយោជន៍៍ដល់សហគមន៍ទេសចរណ៍ និងប្រជាពលរដ្ឋក្នុងខេត្តនេះ ដែលជាខេត្តមានប្រជាពលរដ្ឋក្រីក្រច្រើនជាងគេ ក្នុងចំណោមរាជធានីខេត្តទាំង២៥។

ក្រសួងទេសចរណ៍ក៏បានរៀបចំផែនការមេកសាងទីក្រុងថ្មីមួយ ដោយដាក់ឈ្មោះថា Grand Siem Reap City នៅក្បែរព្រលានយន្តហោះលំដាប់អន្តរជាតិខេត្តសៀមរាប ដែលអនុញ្ញាតឲ្យអ្នកវិនិយោគជាតិ អន្តរជាតិសាងសង់អាគារខ្ពស់ៗផងដែរ។

លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជា បានមានប្រសាសន៍ថា ជំងឺកូវីដ១៩បានផ្តល់មេរៀន និងឳកាសផងដែរសំរាប់ខេត្តសៀមរាប តាមរយៈការចាប់ផ្តើមកែលំអរ និងពង្រីកកសាងហេដ្ឋារចនាសម្ព័ន្ឋខេត្តនេះ ដែលមានការរៀបចំផ្លូវថ្មើជើង និងប្រព័ន្ឋហេដ្ឋារចនាសម្ព័ន្ឋសមស្រប ដើម្បីលើកកំពស់សោភ័ណភាពខេត្តផង និងទាក់ទាញទេសចរណ៍ផង ហើយបើគ្មានជំងឺកូវីដ១៩ ប្រហែលជាគំរោងនេះមិនលេចរូបរាងនោះទេ។

លោកបន្តថា “ការវិនិយោគលើហេដ្ឋារចនាសម្ព័ន្ឋ ជាការទាក់ទាញអ្នកវិនិយោគជាតិ អន្តរជាតិ ពិតជាការចូលរួមធ្វើពិពិធកម្មមូលដ្ឋានសេដ្ឋកិច្ចរបស់ខេត្ត ហើយយើងរំពឹងថាខេត្តនេះ នឹងទាក់ទាញវិនិយោគិនបានច្រើនថែមទៀត”។ លោកបន្តថា “បច្ចុប្បន្នមានគំរោងអភិវឌ្ឍន៍អចលនទ្រព្យក្នុងខេត្តច្រើន មានររោងចក្រ សហគ្រាសកើតថ្មីៗច្រើន ដែលជួយដល់សេដ្ឋកិច្ចមូលដ្ឋាន ហេតុនេះបើជំងឺកូវីដបញ្ចប់ កម្ពុជាក៏ដូចជាពិភពលោកបើកជើងហោះហើរឡើងវិញ ខេត្តសៀមរាបនឹងផ្តល់សក្តានុពលខ្លាំង ដល់វិស័យទេសចរណ៍ និងការវិនិយោគ”។

ទោះជាយ៉ាងណាលោកបណ្ឌិតហុង វណ្ណៈអ្នកស្រាវជ្រាវសេដ្ឋកិច្ចនៃរាជបណ្ឌិតសភាពកម្ពុជាបានមានប្រសាសន៍ថា ខេត្តសៀមរាបមានសក្តានុពលច្រើន ក្រៅពីវិស័យទេសចរណ៍គឺមានវិស័យកសិកម្ម សិប្បកម្មដែលត្រូវពង្រីក និងររៀបចំជាតំបន់កសិទេសចរណ៍ ប៉ុន្តែខេត្តនេះ នៅតែមិនអាចកាត់ផ្តាច់មូលដ្ឋាននៃការរីកចម្រើន និងមូលដ្ឋានសេដ្ឋកិច្ចចេញពីវិស័យទេសចរណ៍បាននៅឡើយទេ។

លោកបន្តថា “យើងឃើញមានការវិនិយោគលើវិស័យអចលនទ្រព្យ នៅក្នុងខេត្ត ប៉ុន្តែដំណើរការយឺតៗ ព្រោះវិស័យនេះរស់រវើក និងរីកចម្រើនបានទាល់តែវិស័យទេសចរណ៍មានភាពរីកចម្រើន ដែលធ្វើឲ្យប្រជាជនមានប្រាក់ចំណូលកើនឡើង ដើម្បីឲ្យពួកគេអាចចំណាយប្រាក់ទិញអចលនទ្រព្យនានា”៕

រដ្ឋាភិបាលសម្រេចអនុវត្តន៍វិធានការក្ដៅចំពោះអ្នកដែលមិនគោរពតាមការណែនាំរបស់ក្រសួងសុខាភិបាល

ដោយៈ រ៉ាណេត

ភ្នំពេញៈ រាជរដ្ឋាភិបាលសម្រេចដាក់ចេញ នូវវិធានការក្ដៅរឹតបន្ដឹងចំពោះបុគ្គលទាំងឡាយណា ដ៏ដូចជាទីតាំងដែលមិនសហការពាក់ព័ន្ធ ការចូលរួមទប់ស្កាត់ការរីករាលដាលនៃជំងឺកូវីដ១៩ ជាពិសេសព្រឹត្តិការណ៍២០កុម្ភៈ ដែលកំពុងគំរាមនៅក្នុងសហគមន៍យ៉ាងខ្លាំងក្លាយគួរឱ្យព្រួយបារម្ភនៅពេលនេះ ជាមួយនឹងច្បាប់ដែលបានចែងជាធរមាន។

តាមរយៈលិខិតជូនដំណឹងដែលចេញផ្សាយ ដោយទីស្ដីការគណៈរដ្ឋមន្ត្រីដែលទើបទទួលបាននៅរសៀលថ្ងៃទី២៦ ខែកុម្ភៈ ឆ្នាំ២០២១បានបញ្ជាក់ថា រាជរដ្ឋាភិបាល បានសម្រេចចាត់វិធានការយ៉ាងតឹងរ៉ឹង ចំពោះបុគ្គលមិនអនុវត្តន៍តាមវិធានរបស់ក្រសួងសុខាភិបាល ចំពោះការធ្វើចត្តាឡីស័ក។ បុគ្គលគេចវេសមិនព្រមចូលព្យាបាល ឬមិនសហការផ្ដល់ការសម្ភាសន៍ និងទីតាំងដែលមិនសហការផ្ដល់ព័ត៌មានការស្រាវជ្រាវ និងទប់ស្កាត់ការរីករាលដាលជំងឺកូវីដ-១៩ បន្ថែមពីលើអនុក្រឹត្យលេខ២៧ អនក្រ.បក។

នៅក្នុងក្នុងលិខិតដដែលនេះ បានកំណត់នូវចំណុចសំខាន់ៗចំនួន៣ដែលជាវិធានការរឹតបន្ដឹងបន្ថែមពីលើអ្វីដែលបានកំណត់ក្នុងច្បាប់រួមមាន ទី១ ចំពោះជនបរទេស ត្រូវបណ្ដេញចេញពីកម្ពុជា និងហាមចូលប្រទេសសារជាថ្មី ទី២ ចំពោះជនជាតិខ្មែរ ត្រូវចាត់វិធានការតាមផ្លូវច្បាប់ និងទី៣ ចំពោះទីតាំង ត្រូវដកហូតអាជ្ញាប័ណ្ណ និងបិទអាជីវកម្មក្នុងទីតាំង។

កាលពីពេលកន្លងមកថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចឲ្យបណ្តេញចេញពីកម្ពុជា និងលែងឲ្យត្រឡប់ចូលមកវិញ ចំពោះជនបរទេសទាំងឡាយណា ដែលគេចវេស និងមិនចូលរួមសហការក្នុងការធ្វើចត្តាឡីស័ក។

ការសម្រេចរបស់សម្តេចតេជោនាយករដ្ឋមន្ត្រី បានធ្វើឡើងតាមសំណើរបស់លោកឧត្តមសេនីយ៍ឯកឌី វិជ្ជា អគ្គស្នងការរងនរគបាលជាតិ និងជាអនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩។

សំណើចាត់វិធានការតឹងរឹងលើជនបរទេសនេះ បានកើតមានចំពេលកម្ពុជាកំពុង ផ្ទុះនូវការឆ្លងក្នុងសហគមន៍ធ្ងន់ធ្ងរ។ អ្នកដែលរកឃើញកើតមានជំងឺកូវីដ១៩ ក្នុងព្រឹត្តិការណ៍សហគមន៍ជាថ្មីនេះ ភាគច្រើនជាជនបរទេស៕

ពាក់កណ្តាលត្រីមាសទី១ឆ្នាំ២០២១នេះ ស្ថានភាពទីផ្សារអាផាតម៉ិននៅតែស្ថិតក្នុងសភាពទ្រឹង

ដោយៈ រ៉ាណេត

ភ្នំពេញៈ ចាប់តាំងពីដើមខែមករា ឆ្នាំ២០២១ដែលស្ថិតនៅក្នុងត្រីមាសទី១ ស្ថានភាពនៃទីផ្សារជួលអាផាតម៉ិន ហាក់មិនមានអ្វីប្រែប្រួលនោះទេ ជាពិសេសនៅក្នុងរាជធានីភ្នំពេញ ខណៈដែលវត្តមានរបស់ជនបរទេស ដែលជាអតិថិជនគោលដៅនៅមិនទាន់វិលចូលប្រទេសកម្ពុជាវិញនៅឡើយ។

អ្នកជំនាញនៅក្នុងវិស័យអចលនទ្រព្យកម្ពុជា លោកស្រីអាន សុធីតា នាយិកាប្រចាំប្រទេសក្រុមហ៊ុន CBRE Cambodia បានមានប្រសាសន៍នៅថ្ងៃចុងសប្ដាហ៍នេះថា គិតត្រឹមពាក់កណ្តាលត្រីមាសទី១ឆ្នាំ២០២១នេះ ស្ថានភាពនៃទីផ្សារអាផាតម៉ិន ជាពិសេសនៅក្នុងរាជធានីភ្នំពេញ ហាក់នៅមិនទាន់មានអ្វីប្រែប្រួល គួរឱ្យកត់សម្គាល់នោះទេ ពោលគឺនៅរក្សាស្ថានភាពដូចគ្នាទៅនឹងចុងឆ្នាំ២០២០។

លោកស្រីបន្តទៀតថា “ទីផ្សារអាផាតម៉ិនភាគច្រើន ជាតម្រូវការរបស់ជនបរទេសដែលពួកគាត់ជួសម្រាប់ស្នាក់នៅ ក្នុងកំឡុងពេលដែលពួកគាត់មកបំពេញការងារ នៅក្នុងប្រទេសកម្ពុជា ប៉ុន្តែដោយសារតែបញ្ហាកូវីដ១៩ ពួកគាត់ដែលបានចាក់ចេញទៅប្រទេសកំណើតរបស់ខ្លួនមួយចំនួនធំ កាលពីដើមឆ្នាំ២០២០នោះ នៅមិនទាន់បានវិលត្រឡប់មកកម្ពុជាវិញនោះទេ”។លោកស្រីបន្តថា “ដូច្នេះបច្ចុប្បន្នគឺមានតែអតិថិជនចាស់ ដែលជាជនជាតិខ្មែរ ឬជនបរទេសមួយចំនួនតូច ដែលមានបានចាកចេញទៅតែប៉ុណ្ណោះ”។

បន្ថែមពីនេះ ក៏មានអ្នកខ្លះដែលជួលអាផាតម៉ិនស្នាក់នៅជាប់កុងត្រា បានចាកចេញទៅជួលផ្ទះជាយក្រុង ដើម្បីស្នាក់នៅក្នុងរយៈពេលខ្លី ដោយសារតែបារម្ភពីការរាលដាល ព្រោះត្រូវប្រើជណ្ដើរយន្តរួមគ្នា ដូច្នេះមានតែជម្រើសជួលផ្ទះជាយក្រុងស្នាក់នៅដាច់ដោយឡែក។

ទោះជាយ៉ាងណាក៏ដោយ លោកស្រីរំពឹងថា នៅពាក់កណ្តាលឆ្នាំ ឬដើមត្រីមាសទី៣ទីផ្សារមួយនេះ អាចនឹងមានកំណើនឡើងវិញ បន្ទាប់ពីស្ថានភាពនៃការទប់ស្កាត់ការីករាលដាលមានភាពល្អប្រសើរទាំងនៅក្នុងតំបន់ ក៏ដូចជានៅក្នុងប្រទេសកម្ពុជាផងដែរ។

អគ្គនាយកក្រុមហ៊ុនភ្នាក់ងារអចលនទ្រព្យ Town City លោកវន ចាន់ថន បានមានប្រសាសន៍ថា ស្ថិតនៅក្នុងស្ថានភាពប្រឈម នឹងជំងឺចាប់តាំងពីពាក់កណ្តាលឆ្នាំ២០២០ សម្រាប់ទីផ្សារអាផាម៉ិន ក៏មិនសូវខុសពីផ្នែកដទៃទៀតនោះដែរ។ ការជួលអាផាតម៉ិនភាគច្រើន ត្រូវបានចុះកុងត្រាជួលក្នុងរយៈពេលយូរ ប៉ុន្តែអ្វីដែលសំខាន់គឺភាគច្រើនជាជនបរទេសច្រើនជាងអ្នកនៅក្នុងស្រុក អត្រាចំនួននៃការជួលអាចមានច្រើន។

ប៉ុន្តែចំពោះតម្លៃគឺធ្លាក់ចុះ ដោយសារតែម្ចាស់អគារ បានជួយសម្រួលទម្លាក់ចុះនូវតម្លៃក្នុងចន្លោះពី២០- ៣០ភាគរយទៅដល់អតិថិជនរបស់ខ្លួន ដែលជាអ្នកក្នុងស្រុកផ្ទាល់ ដោយឡែកសម្រាប់អតិថិជន ជាជនជាតិបរទេសនៅមិនទាន់ បានវិលចូលប្រទេសកម្ពុជាវិញនោះទេ។

លោកបានបន្តថា “សម្រាប់ដើមឆ្នាំ២០២១នេះ ក៏នៅតែមិនទាន់បានធូរស្រាលវិញនោះទេ ប៉ុន្តែខ្ញុំជឿថា មិនយូរទេ ទីផ្សារអាផាតម៉ិន នឹងងាកមករកភាពល្អប្រសើរវិញខណៈបណ្តាប្រទេសមួយចំនួន ចាប់ផ្តើមប្រើប្រាស់វ៉ាក់សាំង ជាពិសេសប្រទេសចិន ដែលមានប្រជាជនជាច្រើនចូលមករស់នៅ និងប្រកបការងារនៅក្នុងប្រទេសកម្ពុជា ដែលភាគច្រើនរស់នៅក្នុងអគារអាផាតម៉ិន ហើយនៅកម្ពុជាក៏ផ្តើមចាក់វ៉ាក់សាំងដែរ”។

លោកបន្តថា ព្រឹត្តិការណ៍២០កុម្ភៈ គ្រាន់តែជាព្រឹត្តិការណ៍សង្គម ដែលកើតមាន ប៉ុន្តែក្រោយពេលរួមគ្នាអនុវត្តន៍ វិធានការតាមការណែនាំរបស់រដ្ឋាភិបាល នឹងធូរស្រាលបន្តិចម្ដងវិញជាមិនខាន៕

ក្រុមហ៊ុនបណ្តាញសង្គមយក្សរបស់ចិន Tik Tokនឹងបើកការិយាល័យនៅកម្ពុជា

ដោយ:គង់ សូរិយា

ភ្នំពេញៈ ក្រុមហ៊ុនបណ្តាញសង្គមយក្សរបស់ចិន Tik Tokនឹងបើកការិយាល័យនៅទីក្រុងភ្នំពេញប្រទេសកម្ពុជានាពេលឆាប់ៗខាងមុខនេះ។

យោងតាមបុគ្គលិករបស់ក្រុមហ៊ុននេះបានឲ្យដឹងនាពេលមុននេះបន្តិចថា ក្រុមហ៊ុននេះនឹងបើកការិយាល័យនៅកម្ពុជា ដែលមានការិយាល័យនៅក្នុងខ័ណ្ឌទួលគោក រាជធានីភ្នំពេញ។

Tik Tok ជាបណ្តាញសង្គមមួយដែលមានការពេញនិយមទូទាំងពិភពលោក។ បណ្តាញសង្គមមួយនេះធ្លាប់ត្រូវបានទទួលការចរចាទិញពីសំណាក់ក្រុមហ៊ុនយក្សរបស់អាមេរិក។

ក្នុងរដ្ឋបាលអតីតប្រធានាធិបតីដូណាល់ ត្រាំ បណ្តាញសង្គមនេះ ត្រូវបានរដ្ឋាភិបាលអាមេរិកចោទថា ជាបណ្តាញសង្គមរបស់រដ្ឋាភិបាលចិន ដែលចូលលួចយកទិន្នន័យរបស់អ្នកប្រើប្រាស់អាមេរិក ប៉ុន្តែថ្នាក់ដឹកនាំក្រុមហ៊ុននេះបានបដិសេធ។
បណ្តាញសង្គម Tik Tok ជាកម្មសិទ្ឋិរបស់ក្រុមហ៊ុនByteDance ដែលជាក្រុមហ៊ុនបច្ចេកវិទ្យាអ៊ីនធឺណេតមួយ ត្រូវបានបង្កើតឡើងដោយលោក Zhang Yiming ក្នុងឆ្នាំ២០១២។ គិតត្រឹមខែមេសា ឆ្នាំ២០២០ ក្រុមហ៊ុននេះមានតម្លៃរហូតទៅ១០០ពាន់លានដុល្លារ។
ByteDance ជាក្រុមហ៊ុនបង្កើតកម្មវិធីចែករំលែកវីដេអូដ៏ល្បីឈ្មោះ TikTok ដែលជាបណ្តាញសង្គមដ៏ល្បីល្បាញ នៅលើពិភពលោក។ ByteDance ក៏បានទិញក្រុមហ៊ុនប្រព័ន្ធផ្សព្វផ្សាយបណ្តាញសង្គមMusical.ly ដែលមានមូលដ្ឋាននៅទីក្រុងស៊ាងហៃផងដែរ។
ទោះយ៉ាងណាTikTok គឺជាកម្មវិធីរបស់ចិន ដែលត្រូវបានគ្រប់គ្រងនៅខាងក្រៅប្រទេសចិនដោយក្រុមហ៊ុន ByteDance។ TikTok បានប្រឈមមុខនឹងការគំរាមកំហែងជាច្រើន ពីការហាមឃាត់ដោយសមាជិកសភាអាមេរិក ដោយសារតែការចោទប្រកាន់ថា កម្មវិធីនេះកំពុងចែករំលែកព័ត៌មានជាមួយរដ្ឋាភិបាលចិន។
បណ្តាញសង្គមនេះ បច្ចុប្បន្នមានចំនួនអ្នកប្រើប្រាស់រហូតដល់១០០០លាននាក់នៅទូទាំងពិភពលោក៕

ខេត្តព្រះសីហនុនឹងស្វាគមន៍ជើងហោះហើរឆ្លងទ្វីបលំដាប់ពិភពលោកនៅឆ្នាំ២០២២ខាងមុខនេះ

ដោយៈ ប៊ី

ព្រះសីហនុ ៖ ក្រុមហ៊ុនសាងសង់ផ្លូវរត់ព្រលានយន្ដហោះកងកេង ដែលជាផ្លូវរត់វែងជាងគេក្នុងប្រទេសកម្ពជា អះអាងថា គម្រោងសាងសង់នេះនឹងបញ្ចប់នៅដើមឆ្នាំ២០២២ ដែលអនុញ្ញាតឱ្យយន្ដហោះធំៗហោះចម្ងាយឆ្ងាយ រាប់ទាំងយន្ដហោះរបស់ប្រធានាធិបតីអាមេរិកអាចមកចុះចតនៅកម្ពុជាផងដែរ។

ផ្លូវរត់ព្រលានយន្ដហោះកងកេង ខេត្ដព្រះសីហនុ ដែលជាផ្លូវរត់វែងជាងគេក្នុងប្រទេសកម្ពជានោះ ត្រូវបានរាជរដ្ឋាភិបាលផ្ដល់សិទ្ធិឲ្យក្រុមហ៊ុនវ៉ាងស៊ីរបស់ប្រទេសបារាំងជាអ្នកសាងសង់។

ក្រុមហ៊ុនវ៉ាងស៊ីបានធានាថានឹងធ្វើឲ្យរួចរាល់នៅក្នុងរង្វង់ឆ្នាំ២០២១ ឬដើមឆ្នាំ២០២២ ដូច្នេះយន្ដហោះធំៗ ដែលមកពីឆ្ងាយរាប់ទាំងយន្ដហោះរបស់ប្រធានាធិបតីអាមេរិកក៏អាចមកចុះចតនៅប្រទេសកម្ពុជាបានដែរ។

លោកគួច ចំរើនអភិបាលខេត្តព្រះសីហនុមានប្រសាសន៍ថា ព្រលានយន្ដហោះកងកេង ខេត្តព្រះសីហនុ គឺជាព្រលានយន្ដហោះ ដែលមានប្រវែងរត់វែងជាងគេនៅក្នុងប្រទេសកម្ពុជា ហើយមកដល់ពេលនេះបានកសាងផ្លូវរត់ ផ្លូវចុះចតសម្រាប់យន្ដហោះ។

លោកបានឲ្យដឹងទៀតថា បើគ្មានការវាយប្រហារពីជំងឺកូវីដ-១៩នោះទេ សង្ឃឹមថាផ្លូវរត់ព្រលានយន្ដហោះកងកេងនឹងអាចរួចរាល់នៅក្នុងឆ្នាំ២០២២ ដែលជាការគាំទ្របន្ថែមទៀតសម្រាប់ការវិនិយោគ និងការអភិវឌ្ឍ នៅក្នុងខេត្តព្រះសីហនុ។

រាជរដ្ឋាភិបាល បានកំណត់ក្នុងផែនការរៀបចំដែនដី ខេត្តព្រះសីហនុក្នុងចក្ខុវិស័យឆ្នាំ២០៣០ គឺរៀបចំ និងអភិវឌ្ឍខេត្តព្រះសីហនុជាប៉ូលអភិវឌ្ឍន៍ជាតិប្រកបដោយចីរភាពនៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រ ដែលស្អាតបំផុតលើសកលលោក។

ជាពិសេស ជាតំបន់សេដ្ឋកិច្ចពិសេស គំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និងទីផ្សារសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើប ដែលមានសុខដុមនីយកម្ម ជាមួយនឹងបរិស្ថានរស់នៅល្អប្រសើរ៕

អាជ្ញាធរខេត្តកំពតពន្លឿនការស្ថាបនាហេដ្ឋារចនាសម្ព័ន្ធសំខាន់ៗរួមមានផ្លូវថ្នល់ និងសួនកម្សាន្តឱ្យរួចរាល់មុនបុណ្យចូលឆ្នាំខ្មែរ

ដោយ ៖ រ៉ាណេត

កំពត ៖ រដ្ឋបាលខេត្តកំពតបានជំរុញឱ្យក្រុមហ៊ុនទទួលម៉ៅការសាងសង់ និងស្ថាបនាផ្លូវថ្នល់ រួមជាមួយគម្រោងកែលម្អរសួនកម្សាន្តនានា ជាពិសេសស្ថិតនៅស្របនឹងព្រែកកំពតឱ្យបានលឿនតាមដែលអាចធ្វើទៅបាន ដែលយ៉ាងណាឱ្យរួចរាល់មុនពិធីបុណ្យចូលឆ្នាំខ្មែរខាងមុខនេះដើម្បីស្វាគមន៍ទេសចរជាតិ និងអន្តរជាតិ។

អភិបាលខេត្តកំពត លោកជាវ តាយ កាលពីរសៀលថ្ងៃទី២៥ ខែកុម្ភៈ ឆ្នាំ២០២១បានជំរុញដល់មន្ត្រីពាក់ព័ន្ធឱ្យជួយពន្លឿនក្នុងការស្ថាបនាផ្លូវបេតុងមួយខ្សែដែលស្ថិតក្នុងសង្កាត់កំពង់បាយ ក្រុងកំពត ខេត្តកំពត ដែលជាផ្លូវដ៏សំខាន់មួយឱ្យរួចនៅមុនចូលឆ្នាំខ្មែរ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាកាត់បន្ថយការកកស្ទះចរាចរណ៍ បន្ថែមពីលើគម្រោងកែលម្អសួននៅតាមព្រែកកំពត។

លោកជាវ តាយ បានលើកឡើងថា ផ្លូវមួយខ្សែនេះ អាចចាត់ទុកជាផ្លូវមួយមានសារៈសំខាន់ក្នុងការសម្រួល និងបញ្ចៀសការកកស្ទះចរាចរណ៍ ក៏ដូចជាការសម្រួលធ្វើឱ្យប្រសើរឡើងទាំងសណ្ដាប់ធ្នាប់ អនាម័យបរិស្ថានក្រុង សម្រាប់ប្រជាពលរដ្ឋរស់នៅតាមដងផ្លូវនេះ។ ផ្លូវមួយខ្សែនេះគឺ ជាផ្លូវលេខ៧០១ តភ្ជាប់បំបែកចេញពីផ្លូវជាតិលេខ៣ ភ្ជាប់ទៅផ្លូវបេតុង ជាយខាងជើងក្រុងកំពត ស្របនឹងផ្លូវរថភ្លើង មានប្រវែងប្រមាណជាង ៩០០ម៉ែត្រ ទទឹងមានទំហំ ១២ម៉ែត្រ ដែលគម្រោងសាងសង់ដោយចាក់បេតុងសសៃដែក មានកម្រាស់ ២តឹក មានលូអមសងខាងទំហំមាត់កាត់ ៨តឹក ជាគម្រោងថវិការបស់រដ្ឋបាលខេត្ត អនុវត្តគម្រោងដោយកងវិស្វកម្ម។ ដូចនេះ ជំនាញ អាជ្ញាធរមូលដ្ឋានពាក់ព័ន្ធ និងក្រុមហ៊ុនសាងសង់ ធ្វើយ៉ាងណាសហការគ្នាឱ្យបានល្អក្នុងដំណើរការស្ថាបនាគម្រោងផ្លូវមួយខ្សែនេះ និងប្រកបដោយលក្ខណៈបទដ្ឋានបច្ចេកទេសត្រឹមត្រូវ។ ក្រៅពីនេះត្រូវបង្កើនការជំរុញអនុវត្តន៍ឱ្យបានឆាប់ចប់មុនឱកាសបុណ្យចូលឆ្នាំប្រពៃណីជាតិខ្មែរ។

លោកជាវ តាយក៏បានក្រើនរម្លឹកដល់ចៅសង្កាត់ និងអភិបាលក្រុងកំពតផងដែរ ក្រៅពីការស្ថាបនាផ្លូវមួយខ្សែនេះ ត្រូវតែមានការសិក្សាលើគម្រោងផ្លូវនានាបន្ថែមទៀត ពិសេសត្រូវយកចិត្តទុកដាក់រៀបចំសណ្ដាប់ធ្នាប់ សោភ័ណភាព អនាម័យ លើដងផ្លូវក្នុងក្រុង រួមនឹងការយកចិត្តទុកដាក់ធ្វើការឈូសឆាយ ពង្រាបផ្លូវ សម្រួលដល់ការធ្វើដំណើរ និងការរស់នៅរបស់ប្រជាពលរដ្ឋតាមដងផ្លូវឱ្យមានលក្ខណៈល្អប្រសើរឡើងថែមទៀត។

ដោយឡែកគម្រោងស្ថាបនាសួនកម្សាន្តនៅព្រែកកំពតត្រូវបានលោកអភិបាលខេត្តបញ្ជាក់ថា “ការបង្កើតសួនច្បារថ្មី ប្រកបដោយសោភ័ណភាពមួយនេះឡើង គឺសំដៅទាក់ទាញភ្ញៀវទេសចរឱ្យមកកំសាន្ដលេងកាន់តែច្រើនឡើងថែមទៀត ខណៈដែលខេត្តកំពត គឺជាខេត្តគោលដៅទេសចរណ៍មួយក្នុងចំណោមខេត្តជាប់តំបន់មាត់សមុទ្រ”។

យ៉ាងណាក៏ដោយ លោកបានលើកឡើងថា ទោះបីជាប៉ុន្មានឆ្នាំចុងក្រោយនេះ មានភ្ញៀវទេសចរមកកំសាន្តកាន់តែកើនឡើងជាបន្តបន្ទាប់ក៏រដ្ឋបាលខេត្តកំពតនៅតែបន្តយកចិត្តទុកដាក់បន្ថែមទៀតក្នុងការអភិវឌ្ឍ និងការកែលម្អហេដ្ឋារចនាសម្ព័ន្ធនានាក្នុងក្រុងកំពត ពិសេសតាមដងផ្លូវ និងសួនច្បារសាធារណៈ ធ្វើយ៉ាងណាឱ្យក្រុងកំពតមានភាពទាក់ទាញ និងរក្សាបានតំណែងជាទីក្រុងទេសចរណ៍ស្អាតអាស៊ានបន្តទៀត៕

ការព្យាករ៖ តម្លៃអចលនទ្រព្យក្នុងប្រទេសវៀតណាម នឹងហក់ឡើង ១០ភាគរយក្នុងឆ្នាំ២០២១នេះ

ដោយៈសុខុម

ហាណូយ: យោងតាមការព្យាករថា តម្លៃអចលនទ្រព្យ នៅក្នុងប្រទេសវៀតណាម នឹងហក់ឡើងខ្ពស់រហូតដល់ទៅ១០% ក្នុងឆ្នាំ២០២១នេះបើធៀបនឹងឆ្នាំ២០២០ ។ នេះបើយោងតាមសារព័ត៌មាន The Star ចុះផ្សាយកាលពីពេលថ្មីៗនេះ។

លោក Nguyễn Văn Đính អគ្គលេខាធិការរងនៃសមាគមអចលនទ្រព្យវៀតណាម (Vietnam Real Estate Association (VNREA)) បានថ្លែងប្រាប់វេទិកាមួយកាលពីពេលថ្មីៗនេះថា ការឆ្លងរាតត្បាតវីរុសកូវីដ-១៩ បានជះផលប៉ះពាល់ខ្លាំង មកលើវិស័យអចលនទ្រព្យ បណ្ដាលឱ្យតម្រូវការក្នុងទីផ្សារដាំក្បាលចុះ។

កាលពីដើមឆ្នាំ២០២០ ទីផ្សារអចលនទ្រព្យបាននៅទ្រឹង ដោយសារការឆ្លងរាត ត្បាតវីរុសកូវីដ-១៩ ។ ជាការឆ្លើយតប រដ្ឋាភិបាលក្រុងហាណូយ បានចាត់វិធានការជាច្រើន ដើម្បីដោះស្រាយការលំបាក ដែលវិស័យមួយនេះជួបប្រទះ ដូចជា ការប្រកាសឱ្យប្រើប្រាស់លិខិតបទដ្ឋានគតិយុត្តិ សម្រាប់ការអភិវឌ្ឍនគម្រោងខុនដូ បែបសណ្ឋាគារ (Condotel) ជាដើម។

ទោះជាយ៉ាងណា ឧបសគ្គផ្លូវច្បាប់បានធ្វើឱ្យរាំងស្ទះដល់ការផ្ទត់ផ្គង់ ជាហេតុបង្កផលលំបាកទ្វេដងដល់ទីផ្សារ។

នៅក្នុងឆមាសទី២ នៃឆ្នាំ២០២០ ទោះបីជាផ្ទុះការឆ្លងរាតត្បាតវីរុសកូវីដ-១៩ ដល់ទៅ ២ រលកយ៉ាងណាក្ដី ក៏ទីផ្សារអចលនទ្រព្យវៀតណាម នៅតែទទួលបានកំណើនខ្ពស់គួរឱ្យកត់សម្គាល់ នៅពេលផ្ទះសម្បែងថ្មីៗចំនួន៦០.០០០ ផ្ទះត្រូវផ្គត់ផ្គង់ដល់ទីផ្សារ ដែលស្មើនឹង ៦៧,៥% បើធៀបនឹងឆ្នាំ២០១៩ ។

អគ្គលេខាធិការរង នៃសមាគមអចលនទ្រព្យវៀតណាម បានគូសបញ្ជាក់ថា “ឆ្នាំ២០២១ នឹងគ្មានហានិភ័យវិបត្តិ ឬពពុះអចលនទ្រព្យឡើយ ពោលគឺមានតែការរីកចម្រើន” ។ លោកបន្តថា “គម្រោងហេដ្ឋារចនាសម្ព័ន្ធនានា បូករួមជាមួយនឹងឱកាសពាណិជ្ជកម្មអំណោយផលល្អ នឹងក្លាយជាកម្លាំងចលករដ៏ទាក់ទាញ” ។

ការវិនិយោគក្នុងវិស័យអចលនទ្រព្យ នឹងបន្តរីកទៅដល់តំបន់ភ្នំនានា។ បន្ថែមពីលើនេះ អត្រាការប្រាក់ធនាគារ ដែលអាចរក្សាបានត្រឹមកម្រិតក្នុងឆ្នាំ២០២០ នឹងជួយជំរុញការវិនិយោគកាន់តែច្រើនផងដែរ។

កត្ថាចុងក្រោយ វិធានការនានាពីរដ្ឋាភិបាលក្នុងឆ្នាំ២០២១ នឹងជួយដោះស្រាយរាល់ការលំបាកសម្រាប់ទីផ្សារ។

លោក Nguyễn Thọ Tuyển ប្រធានក្រុមហ៊ុន BHS Group បានបញ្ចេញទស្សនៈវិជ្ជមានស្រដៀងគ្នានេះថា តម្លៃអចលនទ្រព្យនឹងហក់ឡើងក្នុងឆ្នាំ២០២១ ។

ចំណែកលោក Lê Hoàng Châu ប្រធានសមាគមអចលនទ្រព្យក្រុងហូជីមិញ (HCM City Real Estate Association (HoREA)) បានលើកឡើងថា ឧបសគ្គផ្លូវច្បាប់គួរតែត្រូវបានដោះស្រាយ សម្រាប់ការអភិវឌ្ឍអចលនទ្រព្យ ក្នុងប្រទេសវៀតណាម ព្រោះក្រុមហ៊ុនទាំងអស់ ចង់បានបរិយាកាសពាណិជ្ជកម្ម ដែលត្រឹមត្រូវ បើកចំហ និងអំណោយផលល្អ។

លោកបានបន្តថា “ឆ្នាំ២០២០ មានការកែប្រែជាច្រើន នៅក្នុងការតាក់តែងយន្តការច្បាប់ នៅពេលសេចក្ដីព្រាងច្បាប់ស្តីពីការវិនិយោគ និងច្បាប់ស្ដីពីការសាងសង់ត្រូវបានអនុម័ត ដោយដោះស្រាយការលំបាកបានជាច្រើន” ។ លោកបន្តថា “ខ្ញុំយល់ថា ទីផ្សារអចលនទ្រព្យក្នុងឆ្នាំ២០២១នឹងបន្តរីកចម្រើន ព្រោះប្រទេសវៀតណាម គ្រប់គ្រងការឆ្លងរាតត្បាតវីរុសកូវីដ-១៩បានហើយ។ សេដ្ឋកិច្ចរបស់វៀតណាម ក៏ទទួលបានកំណើនជាវិជ្ជមានផងដែរ” ។

ទោះជាយ៉ាងណា លោក Đặng Hùng Võ អតីតអនុរដ្ឋមន្ត្រីក្រសួងធនធានធម្មជាតិ និងបរិស្ថាន បានព្រមានថា ប្រសិនបើគ្រប់គ្រងមិនបានល្អទេនោះ វានឹងបង្កឱ្យមានវិបត្តិ ឬពពុះអចលនទ្រព្យនៅក្នុងទីផ្សារ។

លោកបានគូសបញ្ជាក់ថា “ក្នុងឆ្នាំ២០២១ ការធ្វើវិសោធនកម្មច្បាប់ ដើម្បីបំពេញចំណុចចន្លោះប្រហោង និងលុបបំបាត់វិធានត្រួតគ្នា គឺជាកិច្ចការសំខាន់បំផុតដែលយើងត្រូវធ្វើ” ៕

ក្រុមហ៊ុនដ៏ធំមួយរបស់កាណាដាប្រកាសបោះទីតាំងផលិតវត្ថុធាតុដើមនៅកម្ពុជា

ដោយៈ ម៉ាណេត

ភ្នំពេញៈ ក្រុមហ៊ុន AREV Cambodia Brands Inc ដែលក្រុមហ៊ុនបុត្រសម្ព័ន្ធរបស់ក្រុមហ៊ុនកាណាដា AREV Nanotec Brand បានចាប់ផ្តើមដំណាក់កាលដំបូង នៃប្រតិបត្តិការផលិតវត្ថុធាតុដើម ដើម្បីគាំទ្រដល់ការផលិតអាហារបំប៉នរបស់ខ្លួន នៅជិតរាជធានីភ្នំពេញ។ នេះបើយោងតាមសេចក្តីប្រកាសព័ត៌មាន របស់ក្រុមហ៊ុនកាលពីដើមសប្តាហ៍នេះ។

សេចក្តីប្រកាសដដែលបានឲ្យដឹងថា គំរោងនេះ នឹងប្រតិបត្តិការលើផ្ទៃដីទំហំ ២០ហិកតា ដែលជាមូលដ្ឋានគាំទ្រដល់ការអភិវឌ្ឍវត្ថុធាតុដើម សម្រាប់ការច្នៃប្រឌិតផលិតផលអាហារបំប៉នរបស់ខ្លួន ដែលមានលើទីផ្សារនៅក្នុងត្រីមាសទី៣ឆ្នាំនេះ។

ក្រុមហ៊ុនបានឱ្យដឹងថា សសៃផ្សិតដែលត្រូវហៅថា Mycelium គឺជាប្រភពនៃប្រូតេអ៊ីនប្រកបដោយនិរន្តរភាព ក្នុងការផលិតជាអាហារបំប៉នរបស់ខ្លួន។

ទោះបីជាយ៉ាងណាក៏ដោយ ក្រុមហ៊ុនមិនបញ្ជាក់ទីតាំងជាក់លាក់ថា តើទីតាំងប្រតិបត្តិការនេះស្ថិតកន្លែងណានោះតេ ហើយមិនបញ្ជាក់ពីទំហំទុនវិនិយោគផងដែរ។

លោក Mike Withrow នាយកប្រតិបត្តិ និងជាប្រធានក្រុមហ៊ុន AREV បាននិយាយនៅក្នុងសេចក្តីប្រកាសព័ត៌មាននេះថា“យើងបន្តកសាង និងធានានូវសង្វាក់ផ្គត់ផ្គង់គ្រឿងផ្សំរបស់យើង សម្រាប់ប្រើប្រាស់ក្នុងរូបមន្តរបស់យើង។

លោកបានថ្លែងបន្តថា “នេះពិតជាសំខាន់ណាស់ដើម្បីធានាថា យើងមានគ្រឿងផ្សំ ដែលមានគុណភាព និងអាចទទួលបាននូវវត្ថុធាតុដើម ដែលអាចទុកចិត្តបាន ដើម្បីទាញយកទៅក្នុងផលិតផលសំខាន់ៗ ដែលយើងកំពុងអភិវឌ្ឍ ដើម្បីដោះស្រាយកង្វះអាហារូបត្ថម្ភនៅក្នុងបរិបទនៃជំងឺរាតត្បាតរាត ដែលកំពុងកើនឡើងលើពិភពលោកបច្ចុប្បន្ន របស់យើង” ។

លោកបានឱ្យដឹងទៀតថា ការអភិវឌ្ឍរបស់យើង ជាមួយនឹងគំនិតផ្តួចផ្តើមកសិកម្មនៅភ្នំពេញ ដើម្បីដាំដុះ mycelium ដើម្បីធានាថាប្រភពវត្ថុធាតុដើម មិនស្ថិតក្រោមការផ្លាស់ប្តូរតម្លៃយ៉ាងខ្លាំង នៅលើទីផ្សារទំនិញអន្តរជាតិនោះទេ៕

1...2,0962,0972,098...3,314 Page 2,097 of 3,314