ដោយ ៖ រ៉ាណេត

ព្រះសីហនុ ៖ នៅក្នុងខេត្តព្រះសីហនុ មានសមត្ថភាពខ្ពស់ក្នុងការផលិតថាមពលអគ្គិសនីសរុបរហូតដល់ប្រមាណ១០០០មេហ្គាវាត់សម្រាប់ផ្គត់ផ្គង់តម្រូវការប្រើប្រាស់នៅទូទាំងខេត្ត និងចែកចាយបន្តទៅតាមបណ្តាខេត្តផ្សេងតាមរយៈអនុស្ថានីយ៍ និងខ្សែបញ្ជូនអគ្គិសនីតង់ស្យុងខ្ពស់។

លោក គួច ចំរើន អភិបាលខេត្តព្រះសីហនុ បានមានប្រសាសន៍នៅក្នុងកិច្ចប្រជុំស្រាយគន្លងខ្សែកាបកប់ដីតង់ស្យុងខ្ពស់ និងខ្សែបណ្តាញបញ្ជូនអាកាសតង់ស្យុងខ្ពស់នៅព្រឹកថ្ងៃទី១០ ខែសីហា ឆ្នាំ២០២០នេះថា បច្ចុប្បន្នខេត្តព្រះសីហនុ មានតម្រូវការប្រើប្រាស់អគ្គិសនីប្រមាណជាង ១០០មេហ្កាវ៉ាត់ តែខេត្តព្រះសីហនុ តែខេត្តផលិតផលថាមពលអគ្គិសនីបាន ១,០០០មេហ្កាវ៉ាត់។

លោកបន្តថា “ភ្លើងដែលនៅសល់ត្រូវបញ្ជូនតាមបណ្តាញខ្សែមេទៅខ្សែបណ្តាញខ្សែជាតិ ទោះបីការអភិវឌ្ឍផ្លូវ ៣៤ខ្សែក្នុងក្រុងព្រះសីហនុ មានផលប៉ះពាល់ដល់អគ្គិសនី យើងបានរួមគ្នាដោះស្រាយប្រកបដោយតម្លាភាព និងទាន់ពេលវេលា “។

លោកបន្តថា “រាជរដ្ឋាភិបាលផ្តល់ថវិកាសាងសង់ហេដ្ឋារចនាសម្ព័ន្ធផ្លូវ ៣៤ខ្សែ ក្នុងក្រុងព្រះសីហនុ ដោយមានការចូលសហការពីអគ្គិសនីកម្ពុជា ធ្វើឱ្យការសាងសង់ប្រព្រឹត្តទៅដោយរលូន ។ រាជរដ្ឋាភិបាលបានកំណត់អាទិភាពក្នុងការអភិវឌ្ឍប្រទេសគឺកត្តាធនធានមនុស្ស ផ្លូវ ទឹក និងភ្លើង ដើម្បីជាការឆ្លើយតបនឹងសេចក្តីត្រូវការនៃការអភិវឌ្ឍជំុរុញកំណើនសេដ្ឋកិច្ចជាតិ ម្យ៉ាងទៀតអគ្គិសនីក៍បានចូលរួមក្នុងការប្រកួតប្រជែងកំណើនសេដ្ឋកិច្ចស្របតាមគោលនយោបាយរបស់រាជរដ្ឋាភិបាលធ្វើឱ្យប្រជាពលរដ្ឋកម្ពុជា ៩០ភាគរយ មានអគ្គិសនីប្រើប្រាស់។ ខេត្តព្រះសីហនុ មានមោទនភាពជាខេត្តផលិតអគ្គិសនីចែកចាយទៅបណ្ដាញមេរបស់អគ្គិសនីកម្ពុជា និងបញ្ជូនទៅកាន់បណ្តាខេត្តមួយចំនួន។

រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា លោក កែវ រតនៈ បានមានប្រសាសន៍ថា ការអភិវឌ្ឍអគ្គិសនីធ្វើឱ្យភ្លើងចុះថ្លៃនៅទូទាំងប្រទេស។ ខេត្តព្រះសីហនុ មានការអភិវឌ្ឍហេដ្ឋារចនាសម្ព័ន្ធផ្លូវថ្នល់ និងអគារធំៗយ៉ាងគំហុកបរិមាណការប្រើប្រាស់អគ្គិសនីមានការកើនឡើង ចំណុចសំខាន់យើងត្រូវធ្វើការដោះស្រាយអគ្គិសនីបម្រើសេចក្តីត្រូវការរបស់ប្រជាពលរដ្ឋ ក៍ដូចជាអ្នកវិនិយោគ ។

ជាមួយគ្នានេះ លោកក៏បានស្នើសុំឱ្យអាជ្ញាធរខេត្តជួយសម្របសម្រួលក្នុងការតបណ្តាញគន្លងខ្សែកាបកប់ដីតង់ស្យុងខ្ពស់ ១១៥គីឡូវ៉ុល និងខ្សែបណ្ដាញបញ្ជូនអាកាសតង់ ស្យុងខ្ពស់ ១១៥គីឡូវ៉ុល នឹង ២៣០គីឡូវ៉ុល ក្នុងក្របខ័ណ្ឌគម្រោងសាងសង់អនុស្ថានីយ៍ និងខ្សែបណ្ដាញបញ្ជូនអគ្គិសនីតង់ស្យុងខ្ពស់ក្នុងក្រុងព្រះសីហនុ ដើម្បីធានាថាប្រជាជន និងក្រុមហ៊ុនវិនិយោគក្នុងខេត្តព្រះសីហនុ មានភ្លើងប្រើប្រាស់គ្រប់គ្រាន់តាមតម្រូវកានៅពេលខាងមុខ ៕

ដោយ ៖ ប៊ី

ភ្នំពេញ ៖ ការដឹកជញ្ចូនវ៉ាក់សាំងជំងឺកូវីដ១៩ (COVID-19) ជុំវិញពិភពលោកនឹងក្លាយជាបញ្ហាប្រឈមនៃការដឹកជញ្ជូនធំបំផុត មិនធ្លាប់មានក្នុងប្រវត្តិសាស្ត្រ។ នេះបើយោងតាមលើកឡើងរបស់សមាគមឧស្សាហកម្មអាកាសចរណ៍អន្តរជាតិ ដែលមានមូលដ្ឋាននៅប្រទេសស្វីស។

សមាគមដឹកអ្នកដំណើរតាមអាកាសអន្តរជាតិ (IATA) បានឱ្យដឹងថា យន្ដហោះប៊ូអ៊ីញប្រភេទ 747s ចំនួន ៨០០០ គ្រឿងនឹងត្រូវការជាចាំបាច់។
បច្ចុប្បន្ន ទោះមិនទាន់មានវ៉ាក់សាំង Covid-19 នៅឡើយក្តី ប៉ុន្តែសមាគម IATA បាននិងកំពុងធ្វើការរួចហើយជាមួយក្រុមហ៊ុនអាកាសចរណ៍ អាកាសយានដ្ឋាន អង្គភាពសុខភាពពិភពលោក និងក្រុមហ៊ុនផលិតថ្នាំពេទ្យជាច្រើន ស្តីពីផែនការដឹកជញ្ជួនវ៉ាក់សាំងតាមហោះហើរជាសកល។
កម្មវិធីចែកចាយវ៉ាក់សាំងនេះត្រូវបានសន្មតថានឹងចែកចាយមួយដូសសំរាប់មនុស្សម្នាក់ប៉ុណ្ណោះ ដែលត្រូវការ។

លោក Alexandre de Juniac ប្រធានប្រតិបត្តិរបស់សមាគម IATA មានថ្លែងថា “ការផ្តល់វ៉ាក់សាំង Covid-19 ប្រកបដោយសុវត្ថិភាពនឹងក្លាយជាបេសកកម្មប្រចាំសតវត្សរ៍ សម្រាប់ឧស្សាហកម្មដឹកជញ្ជួនតាមផ្លូវអាកាសពិភពលោក។
ការដឹកជញ្ជួនវ៉ាក់សាំងកាន់តែមានភាពស្មុគស្មាញច្រើន ខណៈពេលដែលក្រុមហ៊ុនអាកាសចរណ៍បានផ្លាស់ប្តូរពីការដឹកជញ្ជួនមនុស្សមកការរដឹកទំនិញ ដោយសារការធ្លាក់ចុះនៃអ្នកដំណើរ។

មិនមែនយន្តហោះទាំងអស់ ដែលសមស្របសម្រាប់ការដឹកជញ្ជួនវ៉ាក់សាំងទេ ព្រោះយន្តហោះត្រូវការកំរិតសីតុណ្ហភាពធម្មតាចន្លោះពី ២ ទៅ ៨ អង្សាសេសម្រាប់ដឹកជញ្ជូនវ៉ាក់សាំង។ វ៉ាក់សាំងខ្លះអាចត្រូវការសីតុណ្ហរហូតត្រជាក់កក ហើយយន្តហោះភាគច្រើនមិនមានសមត្ថភាព ដើម្បីឆ្លើយតបនឹងការដឹកជញ្ជួននេះទេ។

ប្រធានផ្នែកដឹកទំនិញនៃឧស្សាហកម្មនេះ លោក Glyn Hughes បានបន្ថែមថា “យើងដឹងពីដំណើរការនៃការដឹកជញ្ជួននេះយ៉ាងច្បាស់”។ អ្វីដែលយើងត្រូវធ្វើគឺបង្កើនទំហំដឹកជញ្ជួនទៅតាមទំហំដែលត្រូវការ”។
លោកបានបន្ថែមថា ការហោះហើរទៅកាន់តំបន់មួយចំនួននៃពិភពលោករួមទាំងតំបន់មួយចំនួននៃអាស៊ីអាគ្នេយ៍នឹងជាបញ្ហាសំខាន់ ព្រោះពួកគេខ្វះសមត្ថភាពផលិតវ៉ាក់សាំង៕ BBC

ដោយគង់ សូរិយា

ភ្នំពេញៈ អ្នកនាំពាក្យក្រសួងសាធារណៈការបានអះអាងថា បច្ចុប្បន្នអ្នកជំនាញកូរ៉េកំពុងសិក្សាលើលទ្ឋភាពសាងសង់ស្ពាន តភ្ជាប់រវាងតំបន់ជជ្រោយចង្វារ ទៅកាន់តំបន់ស្វាយជ្រុំ ក្នុងស្រុកល្វាឯមហើយ។

លោកវ៉ាស៊ីមសូរិយាអ្នកនាំពាក្យក្រសួងសាធារណៈការនិងដឹកជញ្ជូនបានមានប្រសាសន៍ឲ្យដឹងនាព្រឹកថ្ងៃទី១០កញ្ញានេះថាបច្ចុប្បន្នអ្នកជំនាញការមកពីទីភ្នាក់ងារកិច្ចសហប្រតិបត្តិការនៃសាធារណៈរដ្ឋកូរ៉េ(KOICA) បាននិងកំពុងសិក្សាពីលទ្ឋភាពសាងសង់ស្ពាននេះហើយ ប៉ុ​ន្តែលទ្ឋភាពសាងសង់នាពេលណា និងបញ្ចប់ការសិក្សានៅពេលណា កូរ៉េមិនទាន់បានដាក់របាយការណ៍ជូនក្រសួងនៅឡើយទេ។

លោកបន្តថា“យើងមិនទាន់ដឹងថា ការសិក្សានឹងបញ្ចប់នៅពេលណាទេ ហើយនឹងចាប់ផ្តើមសាងសង់នៅពេលណានោះដែរ”។លោកបន្តថា “ស្ពាននេះអាចមានប្រវែងវែងជាងស្ពានជ្រោយចង្វារសព្វថ្ងៃ”។

លោកវ៉ាស៊ីមសូរិយាបានបន្តឲ្យដឹងទៀតថាតាមធម្មតាសិក្សាតែងតែធ្វើនៅទីតាំងពីរឬបីដើម្បីមានជម្រើសច្រើនក្នុងការស្ថាបនាហេតុនេះយើងមិនទាន់ដឹងច្បាស់ថាស្ពាននេះនឹងតភ្ជាប់ចេញពីតំបន់ណានៅឡើយទេ។

ប្រមុខរដ្ឋាភិបាលកម្ពុជាសម្តេចតេជោហ៊ុនសែននាយករដ្ឋមន្រ្តីនៃកម្ពុជាធ្លាប់បានលើកសំណើរសុំជំនួយស្ពាននេះពីសមភាគីរបស់លោកគឺលោកប្រធានាធិបតីម៉ូនជេអ៊ីនប៉ុន្តែសំណើរខាងលើមិនទាន់សម្រេចបែបណាជាក់លាក់នៅឡើយទេ៕

ដោយៈ រ៉ាណេត

ស្វាយរៀងៈ គម្រោងបង្កើតតំបន់សេដ្ឋកិច្ចពិសេសថ្មីៗ នឹងត្រូវបង្ហាញរូបរាងនៅតំបន់ច្រកទ្វារអន្តរជាតិព្រំដែនថ្មីកម្ពុជា–វៀតណាមព្រៃវល្លិ៍បន្ទាប់ពីបើកឱ្យដំណើរការក្នុងពេលដ៏ខ្លីខាងមុខនេះដើម្បីបម្រើដល់វិស័យដឹកជញ្ជូននិងបង្កើនទំហំពាណិជ្ជកម្ម។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹងជញ្ជូន បានមានប្រសាសន៍ នៅក្នុងឱកាសចុះត្រួតពិនិត្យវឌ្ឍនភាព នៃការសាងសង់អគាររដ្ឋបាលច្រកទ្វារព្រំដែន កម្ពុជា –វៀតណាមព្រៃវល្លិ៍នាព្រឹកថ្ងៃទី១០ខែកញ្ញាឆ្នាំ២០២០នេះថាតាមរយៈការបើកឱ្យដំណើរច្រកទ្វារអន្តរជាតិព្រំដែនមួយនេះនឹងជួយសម្រួលដល់ការដឹកជញ្ជូនទំនិញចេញចូលប្រទេសទាំង២បានយ៉ាងល្អប្រសើរ។

លោកបញ្ជាក់ថា “បច្ចុប្បន្ននេះ អាគាររដ្ឋបាលនៃច្រកទ្វារព្រំដែនអន្តរជាតិ ដែលចំណាយថវិកាចំនួន៦លានដុល្លារ ក្រោមជំនួយកម្ចីពីធនាគារអភិវឌ្ឍន៍អាស៊ី បានប្រើប្រាស់ជាបណ្តោះអាសន្នរួចហើយ នៅឡើយតែថ្ងៃសម្ពោធជាផ្លូវការរួមគ្នាជាមួយនឹងច្រកទ្វារព្រំដែនព្រៃវល្លិ៍ ដែលនឹងគោរពអញ្ជើញវត្តមានរបស់សម្ដេចតេជោ ហ៊ុន សែន កាត់ខ្សែបូរណ៍”។

ក្នុងពេលជាមួយគ្នានេះលោករដ្ឋមន្ត្រីក្រសួងសាធារណការនិងដឹកជញ្ជូនក៏បានបញ្ជាក់ឱ្យដឹងផងដែរថាដោយសារតែនៅច្រកទ្វារព្រំដែនអន្តរជាតិបាវិតមានការកកស្ទះខ្លាំងលើការដឹកជញ្ជូនដូច្នេះទើបរដ្ឋាភិបាលបានសម្រេចបង្កើតច្រកទ្វារអន្តរជាតិថ្មីមួយនេះដើម្បីជួយលសម្រួលនិងបង្កភាពងាយស្រួល។ក្រោយការបើកដំណើរការច្រកទ្វារព្រំដែនមួយនេះនឹងមានវត្តមាននៃគម្រោងបង្កើតជាតំបន់សេដ្ឋកិច្ចពិសេសនៅទីនេះផងដែរដែលបម្រើការជាទីតាំងលើកដាក់ទំនិញផ្សេងៗហើយក៏អាចមានរោងចក្រសហគ្រាសនានាផងដែរ។

ការបើកច្រកព្រំដែនព្រៃវល្លិ៍ ដែលស្ថិតនៅខេត្តស្វាយរៀង មានព្រំប្រទល់ជាប់នឹងព្រំដែន Binh Hiep ខេត្ត Long An នៃប្រទេសវៀតណាម មួយនេះ សម្រាប់អនុញ្ញាតឱ្យរថយន្តដឹកទំនិញឆ្លងកាត់នេះ ក្រសួងសាធារណការ និងដឹកជញ្ជូនកម្ពុជាក៏នឹងសាងសង់បន្ថែមនូវចំណតរថយន្ត សម្រាប់រថយន្តដឹកជញ្ជូនទំនិញ ហើយតម្រូវឱ្យមន្ត្រីគយត្រូវបែងចែកវេនធ្វើការដោយគ្មានពេលសម្រាកថ្ងៃត្រង់ ដើម្បីអាចដំណើរការបែបបទយ៉ាងឆាប់រហ័ស និងបង្កលក្ខណៈងាយស្រួលដល់ការធ្វើចរាចរទំនិញ៕

ដោយ ៖ ប៊ី

ភ្នំពេញ ៖ ក្រសួងសាធារណការ និងដឹកជញ្ជូន ចុះហត្ថលេខាជាមួយនឹងទីភ្នាក់ងារសហប្រតិបត្តិការអន្តរជាតិជប៉ុន (JICA) ស្តីពីកិច្ចសហប្រតិបត្តិការបច្ចេកទេសសម្រាប់គម្រោង ធ្វើឱ្យប្រសើរឡើងប្រព័ន្ធភស្តុភារកម្មនៅកម្ពុជា(ដំណាក់កាលទី២)។ នេះបើយោងតាមការចេញផ្សាយរបស់ក្រសួងនៅថ្ងៃ១០ ខែកញ្ញា ឆ្នាំ២០២០។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញចុះហត្ថលេខាលើកំណត់ហេតុនៃកិច្ចប្រជុំរវាងក្រសួងសាធារណការ និងដឹកជញ្ជូន និងទីភ្នាក់ងារសហប្រតិបត្តិការអន្តរជាតិជប៉ុន (JICA) ថ្ងៃទី០៩ ខែកញ្ញា ឆ្នាំ២០២០ នៅទីស្តីការក្រសួង ស្តីពីកិច្ចសហប្រតិបត្តិការបច្ចេកទេសសម្រាប់គម្រោងធ្វើឱ្យប្រសើរឡើងប្រព័ន្ធភស្តុភារកម្មនៅកម្ពុជា(ដំណាក់កាលទី២)ដោយមានការចូលរួមពីថ្នាក់ដឹកនាំជាន់ខ្ពស់ក្រសួង និងគណៈប្រតិភូនៃទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា។

លោក ស៊ុន ចាន់ថុល បានលើកឡើងថា ការធ្វើទំនើបកម្មហេដ្ឋារចនាសម្ព័ន្ធដឹកជញ្ជូនទាំងផ្នែករឹង និងផ្នែកទន់ និងការធ្វើឱ្យប្រសើរឡើងច្រកទ្វារព្រំដែនអន្តរជាតិ ក៏ដូចជាការបើកច្រកទ្វារអន្តរជាតិថ្មីជាមួយប្រទេសជិតខាង គឺជាកម្លាំងចលករលើកកម្ពស់វិស័យភស្តុភារកម្មដែលអាចប្រកួតប្រជែងបានជាមួយប្រទេសក្នុងតំបន់។

ជាមួយគ្នានោះផងដែរ លោកទេសរដ្ឋមន្ត្រីបានធ្វើបច្ចុប្បន្នភាពអំពីស្ថានភាពច្រកទ្វារព្រំដែនស្ទឹងបត់-បានណងអៀង ដោយកម្ពុជាបានស្នើភាគីថៃដាក់ឱ្យដំណើរការបណ្ដោះអាសន្ន ពោលគឺបើកឱ្យរថយន្តដឹកទំនិញ(កុងទីន័រ) ចេញចូលតាមច្រកស្ទឹងបត់ ចំណែកការបំពេញបែបបទឯកសារត្រូវធ្វើនៅច្រកទ្វារព្រំដែនអន្តរជាតិប៉ោយប៉ែត។

ឆ្លៀតក្នុងឱកាសនោះ លោកទេសរដ្ឋមន្ត្រី បានគូសបញ្ជាក់អំពីកត្តាផ្សេងៗ ដែលចាំបាច់សម្រាប់ទ្រទ្រង់គម្រោងនេះ រួមមានបទដ្ឋានគតិយុត្តិ ប្រភពហិរញ្ញប្បទាន និងការចូលរួមពីវិស័យឯកជន ព្រមទាំងការបង្កើតនូវមជ្ឈមណ្ឌលទិន្នន័យភស្តុភារកម្ម ការប្រើប្រាស់កម្មវិធីព័ត៌មានវិទ្យាដើម្បីជួយសម្រួលដល់ដំណើរការឯកសារផងដែរ។

ជាមួយគ្នានេះ តំណាងទីភ្នាក់ងារសហប្រតិបត្តិអន្តរជាតិជប៉ុនបានបង្ហាញការគាំទ្រលើគម្រោងធ្វើឱ្យប្រសើរឡើងវិស័យភស្តុភារកម្ម និងដឹកជញ្ជូន ជាពិសេសការធ្វើឱ្យប្រសើរឡើងច្រកទ្វារព្រំដែនអន្តរជាតិនានាជាមួយប្រទេសជិតខាង ដើម្បីលើកកម្ពស់ឧត្ដមប្រយោជន៍សេដ្ឋកិច្ចជាតិ៕