មេដឹកនាំជុំវិញពិភពលោកផ្ញើសារសាទរទៅលោក Biden ខណៈសារមួយចំនួនទៀត ហាក់ដូចជាវាយប្រហាររដ្ឋបាល Trump

ដោយ ៖ ប៊ី

ភ្នំពេញ ៖ បន្ទាប់ពីប្រព័ន្ធផ្សព្វផ្សាយអាមេរិកប្រកាសថា លោក ចូ បៃដិន (Joe Biden) បានផ្ដួលលោកប្រធានាធិបតី ដូណាល់ ត្រាំ (Donald Trump) ដោយទទួលបានអង្គបោះឆ្នោត ឬអ្នកបោះឆ្នោតតំណាង២៩០ ទល់នឹង ២១៤ មេដឹកនាំពិភពលោកជាច្រើន បានផ្ញើសារអបអរសាទរជ័យជំនះរបស់លោក ចូ បៃដិន នៅក្នុងការបោះឆ្នោតប្រធានាធិបតីអាមេរិកជាបណ្ដើរៗហើយ ខណៈដែលលោក ត្រាំ នៅមិនបានទទួលស្គាល់ជ័យជំនះរបស់លោក បៃដិន ឡើយ ហើយថានឹងតវ៉ាតាមផ្លូវច្បាប់ជាបន្ត។

លោក ចច ដាប៊ែលយូ ប៊ូស (George W Bush) អតីតប្រធានាធិបតីអាមេរិកមកពីគណបក្សសាធារណរដ្ឋ បានផ្ញើសារអបអរសាទរដល់ប្រធានាធិបតីជាប់ឆ្នោត លោក ចូ បៃដិន ដោយហៅលោកថាជា “បុរសល្អម្នាក់” ដែលទទួលបានឱកាសដើម្បីដឹកនាំ និងស្វែងរកឯកភាពជាតិសម្រាប់ប្រទេស។ នេះបើតាមការចេញផ្សាយ ដោយសារព័ត៌មាន CNA នៅរសៀលថ្ងៃចន្ទ ទី៩ ខែវិច្ឆិកា ឆ្នាំ២០២០។

រដ្ឋមន្ត្រីការបរទេសកាណាដា លោក ហ្វ្រង់ស្វ័រ ហ្វីលីព សាំប៉ាញ (Francois-Philippe Champagne) បាននិយាយថា ជ័យជំនះរបស់លោកប្រធានាធិបតីអាមេរិកជាប់ឆ្នោត ចូ បៃដិន «គឺជាដំណឹងល្អ» សម្រាប់កាណាដា ដោយប្រទេសជាប់របងអាមេរិកមួយនេះរំពឹងថា នឹងមានការផ្ទេរអំណាចដោយរលូន ខណៈលោក ដូណាល់ ត្រាំ បានប្រកាសបដិសេធ និងសន្យាតវ៉ាជំទាស់លទ្ធផលបោះឆ្នោតតាមផ្លូវតុលាការ។

យោងតាមសារ Twitter របស់ប្រធានាធិបតីគុយប៉ា លោក មីហ្គែល ឌីយ៉ាស ខាណែល (Miguel Díaz-Canel) ដែលបានបង្ហោះនៅថ្ងៃអាទិត្យ ទី៨ ខែវិច្ឆិកា ឆ្នាំ២០២០ (ពេលវេលានៅទីក្រុងឡាហាវ៉ាន់) បានបង្ហាញពីគោលជំហររបស់ ប្រទេសដីកោះការីបៀនមួយនេះ ចំពោះការបោះឆ្នោតប្រធានាធិបតីនៅអាមេរិកយ៉ាងដូច្នេះថា “យើងទទួលស្គាល់ចំពោះការបោះឆ្នោតជ្រើសរើសប្រធានាធិបតីរបស់ពួកគេ។ ប្រជាជនអាមេរិកបានជ្រើសរើសគន្លងថ្មីមួយ ហើយយើងជឿជាក់លើលទ្ធភាព នៃទំនាក់ទំនងទ្វេភាគី ដែលមានលក្ខណៈស្ថាបនា និងចេះគោរពគ្នាទៅវិញទៅមក”។

ប្រធានាធិបតីអ៊ីរ៉ង់លោក Hassan Rouhani បាននិយាយនៅថ្ងៃអាទិត្យ ទី៨ ខែវិច្ឆិកានេះថា រដ្ឋបាលអាមេរិកដែលនឹងឡើងមកបន្ទាប់ គួរតែប្រើឱកាសនេះដើម្បីកែប្រែ និងទូទាត់ចំពោះកំហុសទាំងឡាយដែលប្រធានាធិបតី ដូណាល់ ត្រាំ បានសាងកន្លងមក។ នេះបើយោងតាមការចេញផ្សាយដោយសារព័ត៌មាន CNA ។

ទីភ្នាក់ងារសារព័ត៌មានអ៊ីរ៉ង់ បានស្រង់សំដីរបស់លោក Rouhani មកចុះផ្សាយយ៉ាងដូច្នេះថា គោលនយោបាយបំផ្លាញរបស់លោក ត្រាំ ត្រូវបានជំទាស់ដោយប្រជាជនអាមេរិក។ រដ្ឋបាលថ្មីរបស់អាមេរិក គួរតែប្រើប្រាស់ឱកាសនេះ ដើម្បីកែប្រែកំហុសមានកន្លងមក។

នៅព្រឹកថ្ងៃចន្ទ ទី៩ ខែវិច្ឆិកា ឆ្នាំ២០២០នេះ សារព័ត៌មានរដ្ឋចិន Global Times បានចេញផ្សាយ ដោយរំលេចចេញនូវក្តីសង្ឃឹម និងសុទិដ្ឋិនិយមចំពោះអនាគតរដ្ឋាភិបាលអាមេរិក ក្រោមការដឹកនាំរបស់លោក ចូ បៃដិន។ សញ្ញាវិជ្ជមានជាច្រើនដែលនឹងកើតឡើងនោះ គឺទៅលើវិស័យពាណិជ្ជកម្ម ដែលបានធ្លាក់ក្នុងសភាពខ្មៅងងឹតបំផុត នៅក្នុងរដ្ឋបាលដឹកនាំរបស់លោក ដូណាល់ ត្រាំ ហើយចិនក៏រំពឹងផងដែរថា រដ្ឋបាលទីក្រុងវ៉ាស៊ីនតោនក្រោមការដឹកនាំនៃបក្សប្រជាធិបតេយ្យ អាចនឹងឲ្យចិនស្រួលធ្វើការជាមួយផងដែរ៕

អ្នកជំនាញ ៖ អ្នកធ្វើជំនួញដីធ្លីបែបឆក់ឱកាសដោយមិនមានភាពស្មោះត្រង់នឹងជួបហានិភ័យខ្ពស់បំផុត

ដោយ ៖ រ៉ាណេត

ភ្នំពេញ ៖ មិនថាស្ថិតនៅក្នុងកាលទេសៈណា ទីផ្សារដីធ្លីនៅកម្ពុជា នៅតែមានប្រជាប្រិយភាពខ្ពស់ជាងគេសម្រាប់ការទិញ-លក់នៅក្នុងវិស័យអចលនទ្រព្យ។ ជាក់ស្ដែងនៅពេលបច្ចុប្បន្ន ទោះជាមានប្រឈមទៅនឹងវិបត្តិសាកលយ៉ាងណាក៏ដោយ ការទិញ-លក់ដីធ្លី នៅតែមានសកម្ម រហូតមានអ្នកខ្លះហ៊ានធ្វើការវិនិយោគដោយភាពប្រថុយប្រថាន និងឆក់ឱកាសដែលមិនមានស្មោះត្រង់ប្រឈមនឹងហានិភ័យខ្ពស់បំផុត។

អគ្គនាយកក្រុមហ៊ុនភ្នាក់ងារអចលនទ្រព្យ Century21 Advance Property លោក ឡុង គឹមសួគ៌ បានយល់ទទួលស្គាល់ថា ទីផ្សារនៃការទិញ-លក់ដីធ្លីនៅកម្ពុជា ពិតជាមានប្រជាប្រិយភាពខ្លាំងដោយសារតែមានតម្រូវការច្រើន ហើយអត្រានៃការទទួលបានប្រាក់ចំណេញពីការវិនិយោគស្ថិតនៅកម្រិតខ្ពស់។

លោក ឡុង គឹមសួគ៌ បានមានប្រសាសន៍បញ្ជាក់ថា “ការទិញដីសម្រាប់វិនិយោគសុទ្ធតែមានឱកាសចំណេញ ជាពិសេសដីដែលស្ថិតនៅទីតាំងល្អ ក្នុងតំបន់ដែលមានគម្រោងអភិវឌ្ឍន៍ ហើយកម្រិតនៃការទទួលបានប្រាក់ចំណេញតិច ឬច្រើនក៏អាស្រ័យទៅលើទំហំនៃការវិនិយោគ និងល្បឿននៃការអភិវឌ្ឍន៍នៅក្នុងតំបន់ផងដែរ”។

លោកបានបន្តថា “ដោយសារតែទីផ្សារដីធ្លីអាចផ្តល់នូវអត្រាចំណេញបានច្រើនជាងការវិនិយោគផ្នែកដទៃទៀត បច្ចុប្បន្នមានឈ្មួញមួយចំនួនប្រើយុទ្ធសាស្ត្រដើរទិញដីសម្រាប់វិនិយោគដោយការឆក់ឱកាស និងមិនមានភាពស្មោះត្រង់ដែលមានភាពប្រឈមខ្ពស់ ហើយបង្កឱ្យប៉ះពាល់ដល់ទីផ្សាររួម។ ការវិនិយោគដោយមិនមានភាពស្មោះត្រង់ ឬជាការវិនិយោគដោយឆក់ឱកាសនេះត្រូវបានបង្ហាញក្នុងរូបភាពដូចជា ពួកគាត់បានចុះទិញដីក្នុងតម្លៃចរចាណាមួយ ហើយធ្វើការកក់ប្រាក់មួយចំនួន ហើយនឹងត្រូវបង់បន្ថែមតាមកិច្ចសន្យាជាដំណាក់កាលទាំងដែលខ្លួនឯងមិនមានលុយគ្រប់គ្រាន់ ហើយខំប្រឹងរកអតិថិជនមកទិញបន្តដើម្បីទទួលបានចំណេញ”។

លោកថា “នៅពេលដល់ពេលវេលាកំណត់ត្រូវបង់តាមដំណាក់កាល នៅតែមិនទាន់រកអ្នកទិញបន្ត វាគឺជាហានិភ័យខ្ពស់បំផុត ដែលត្រូវបាត់បង់លុយកក់ ឬអាចខ្ចីលុយពីវិស័យឯកជន ដោយបង់អត្រាការប្រាក់ខ្ពស់ ដើម្បីបង់ជាតំណាក់កាល។ ក្នុងរូបភាពបែបនេះ គឺជាទង្វើមួយដែលមិនគួរអនុវត្តទេ ហើយប្រសិនបើពួកគាត់អាចលក់បន្តឱ្យអតិថិបានដូចបំណង ក៏ស្ថិតនៅក្នុងទង្វើមិនមានភាពស្មោះត្រង់ជាមួយម្ចាស់ដីដើម ដែលធ្វើឱ្យបាត់បង់នូវទំនុកចិត្ត ឬអន់ចិត្តជាមួយគ្នា”។

ជាមួយនឹងការលើកឡើងខាងលើនេះ លោក ឡុង គឹមសួគ៌ បានមានបញ្ជាក់ថា ប្រសិនសកម្មភាពនៃវិនិយោគបែបនេះមានកាន់តែច្រើន វានឹងបង្កើតឱ្យមានភាពរញ៉េរញ៉ៃ ប៉ះពាល់ដល់ទីផ្សាររួម ជាពិសេសបាត់បង់ទំនុកចិត្តពីអ្នកវិនិយោគជាដៃគូដែលប្រកាន់នូវក្រមសីលធម៌ និងភាពស្មោះត្រង់ជាមួយអតិថិជន៕

ប្រមុខការទូតចិន៖ ទំនាក់ទំនងចិន – អាស៊ាន គួរតែពង្រឹង សម្រាប់ស្ថិរភាពពាណិជ្ចកម្ម

ដោយ ហ្សូលី

ភ្នំពេញ៖ ប្រទេសចិននិងសមាគមអាស៊ានគួរតែពង្រឹងទំនុកចិត្តនិងសាមគ្គីភាពក្នុងការខិតខំរួមគ្នា ដើម្បីបញ្ចូលថាមពលវិជ្ជមានបន្ថែមទៀតទៅក្នុងស្ថិរភាពពាណិជ្ជកម្ម និងវិបុលភាពក្នុងតំបន់។ នេះបើតាមប្រសាសន៍របស់សមាជិកក្រុមប្រឹក្សារដ្ឋនិងជារដ្ឋមន្ត្រីការបរទេសចិនលោក វ៉ាង យី។

លោក វ៉ាង យី បាននិយាយថា ប្រទេសចិនមានឆន្ទៈបន្តធ្វើការជាមួយបណ្តាប្រទេសអាស៊ាន ដើម្បីប្រយុទ្ធប្រឆាំងនឹងជំងឺរាតត្បាត COVID-១៩ នៅពេលដែលលោកបានជួបជាមួយបេសកជនការទូតនៃប្រទេសអាស៊ាននៅទីក្រុងប៉េកាំង។

អ្នកការទូតចិនរូបនេះបានជំរុញឱ្យភាគីទាំងអស់ប្រកាន់ជំហររឹងមាំនូវពហុភាគីនិយម និងពាណិជ្ជកម្មសេរីដែលចុះហត្ថលេខាលើភាពជាដៃគូសេដ្ឋកិច្ចទូលំទូលាយក្នុងតំបន់តាមការគ្រោងទុក និងរួមគ្នាថែរក្សាសន្តិភាពនិងស្ថិរភាពនៅតំបន់សមុទ្រចិនខាងត្បូង។

ការពន្លឿនការរៀបចំនូវលំនាំអភិវឌ្ឍន៍ថ្មីគឺជានិន្នាការដែលជៀសមិនរួចនៃកំណើនសេដ្ឋកិច្ចរបស់ប្រទេសចិន។
ការធ្វើជាម្ចាស់ផ្ទះនៃពិព័រណ៍នាំចូលអន្ដរជាតិចិនលើកទី ៣ នៅឆ្នាំនេះ នឹងបង្ហាញនូវបំណងប្រាថ្នាដ៏ស្មោះត្រង់របស់ប្រទេសចិនក្នុងការចែករំលែកឱកាសទីផ្សាររបស់ខ្លួនជាមួយពិភពលោក និងការប្តេជ្ញាចិត្តក្នុងការបើកទូលាយ។

ទីផ្សារក្នុងស្រុករបស់ប្រទេសចិននឹងបន្តពង្រីកហើយ ផ្តល់ឱកាសកាន់តែច្រើនដល់ប្រទេសជាច្រើន រួមទាំងប្រទេសអាស៊ានសម្រាប់កំណើនសេដ្ឋកិច្ចរបស់ពួកគេ។ ទន្ទឹមនឹងនេះដែរ វាក៏ជួយដល់ការងើបឡើងវិញនៃសេដ្ឋកិច្ចពិភពលោកផងដែរ។

ប្រទេសអាស៊ានទាំង ១០ បានធ្វើអត្ថាធិប្បាយជាវិជ្ជមានលើការអភិវឌ្ឍនៃទំនាក់ទំនងអាស៊ាន-ចិនក្នុងវិស័យផ្សេងៗ បានសម្តែងនូវក្តីសង្ឃឹមក្នុងការតម្រឹមយុទ្ធសាស្ត្រអភិវឌ្ឍន៍ជាមួយចិនឱ្យកាន់តែប្រសើរ ការពិគ្រោះយោបល់ជាមុនលើក្រមប្រតិបត្តិនៅសមុទ្រចិនខាងត្បូង និងរួមគ្នាថែរក្សាសន្តិភាព ស្ថិរភាពក្នុងតំបន់៕ CGTN

JETRO ៖ ទំហំពាណិជ្ជកម្មទ្វេភាគីកម្ពុជា-ជប៉ុន កើនឡើងដល់ជាង ១៥០០លានដុល្លារ

ដោយ ៖ ហ្សូលី

ភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា និងជប៉ុនត្រូវបានកត់ត្រាក្នុងទឹកប្រាក់ចំនួន ១.៥៤៨ លានដុល្លារក្នុងរយៈពេល ៩ ខែដំបូងនៃឆ្នាំនេះ ពោលគឺធ្លាក់ចុះ ២៥ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ នេះបើតាមទិន្នន័យបានមកពីអង្គការជប៉ុន Jetro។

យោងតាមតួលេខពីអង្គការពាណិជ្ជកម្មក្រៅប្រទេសជប៉ុន (JETRO) បង្ហាញថា គិតចាប់តាំងពីខែមករាដល់ខែកញ្ញាឆ្នាំ២០២០ ប្រទេសកម្ពុជាបាននាំចេញផលិតផលមានតម្លៃ ១.២០៨ លានដុល្លារទៅជប៉ុន ដែលជាការធ្លាក់ចុះប្រចាំឆ្នាំ ៥,៦ ភាគរយ។

ទន្ទឹមនឹងនេះដែរប្រទេសកម្ពុជាបាននាំចូលទំនិញពីប្រទេសជប៉ុនចំនួន ៣៣៩ លានដុល្លារ ពោលគឺធ្លាក់ចុះ ១៤,៨ ភាគរយ។

យោងតាមក្រសួងពាណិជ្ជកម្ម ផលិតផលសក្តានុពលរបស់កម្ពុជាដែលនាំចេញទៅទីផ្សារជប៉ុនមានដូចជា សម្លៀកបំពាក់ ស្បែកជើង និងគ្រឿងអេឡិចត្រូនិក។

កាលពីឆ្នាំ ២០១៩ កន្លងទៅ ទំហំពាណិជ្ជកម្មទ្វេភាគីរវាងប្រទេសទាំងពីរបានកើនឡើងប្រមាណ ១៣ ភាគរយស្មើនឹងប្រមាណ ២,២៩២ លានដុល្លារអាមេរិក៕

លោកឧកញ៉ាបណ្ឌិត គីម ហ៊ាង ៖ បើរកស៊ីមិនស្គាល់ទីផ្សារច្បាស់ ហើយធ្វើតាមគ្នា ភាពបរាជ័យនឹងតម្រង់មកជាមិនខាន

ដោយ ៖ រ៉ាណេត

ភ្នំពេញ ៖ នៅក្នុងការធ្វើជំនួញ ឬប្រកបអាជីវកម្មអ្វីមួយចាំបាច់បំផុតគឺការចេះស្គាល់ពីទីផ្សារច្បាស់បន្ថែមពីលើជំនាញដែលខ្លួនមាន បើមិនដូច្នោះទេ ភាពបរាជ័យនឹងតម្រង់ទិសបាញ់មករកខ្លួនជាមិនខាន ជាពិសេសចំពោះអ្នកដែលចេញរកស៊ីទាំងប្រថុយប្រថានដែលធ្វើតាមគេ។ នេះបើតាមការអះអាងរបស់លោកឧកញ៉ាបណ្ឌិត គីម ហ៊ាង ប្រធាន KW Cambodia ។

ប្រធាន KW Cambodia លោកឧកញ៉ាបណ្ឌិត គីម ហ៊ាង បានមានប្រសាសន៍នៅព្រឹកថ្ងៃទី៩ ខែវិច្ឆិកា ឆ្នាំ២០២០នេះថា គ្រប់ការប្រកបអាជីវកម្មទាំងអស់គឺសុទ្ធតែមានគោលដៅយ៉ាងពិតប្រាកដ មានចំណេះដឹង និងជំនាញពាក់ព័ន្ធ ជាពិសេសត្រូវចេះមើល និងស្គាល់ពីទីផ្សារឱ្យបានច្បស់ទើបអាចជៀសផុតពីភាពបរាជ័យ។

លោកឧកញ៉ាបញ្ជាក់ថា “មិនថាជាការរកស៊ីនៅក្នុងទីផ្សារអចលនទ្រព្យ មិនថាចំណោះទីផ្សារបដិសណ្ឋារកិច្ច ឬអាជីវកម្មអ្វីផ្សេងនោះទេ សំខាន់បំផុតមុនពេលបោះទុនវិនិយោគចេញរកស៊ី ថាតើយើងបានស្គាល់ពីទីផ្សារច្បាស់លាស់ឬទេ ? មានគោលជំហរកម្រិតណា និងមានផែនការជាក់ច្បាស់គ្រប់គ្រាន់ហើយឬនៅ? អ្នកខ្លះថា អ្នកដែលអាចមានភាពជោគជ័យទៅលើអាជីវកម្មអ្វីមួយ ទាល់តែមានដើមទុនគ្រប់គ្រាន់ ជាពិសេសមានជំនាញច្បាស់។ ខ្ញុំថា ដើមទុនពិតជាសំខាន់ ប៉ុន្តែអ្វីដែលសំខាន់ខ្លាំងជាងនេះ គឺភាពវៃឆ្លាតចេះមើលពីតម្រូវការទីផ្សារ”។

លោកឧកញ៉ាបន្តថា “ខ្ញុំលើកឧទាហរណ៍ថា មនុស្សម្នាក់ដែលគាត់មានជំនាញផ្នែកចុងភៅ១០ឆ្នាំ គាត់ឈប់ធ្វើការឱ្យគេ ហើយមកបើករកស៊ីខ្លួឯង ភាគរយចំណេញគឺមានអត្រាខ្ពស់។ ដោយឡែក អ្នកដែលធ្លាប់ធ្វើការងារជាភ្នាក់ងារនៅក្នុងទីផ្សារអចលនទ្រព្យច្រើនឆ្នាំ មានបទពិសោធន៍ និងមានបណ្តាញច្រើននោះ នៅពេលដែលគាត់ចេញមកបើកក្រុមហ៊ុនដោយខ្លួនឯង គឺមានភាគរយជោគជ័យខ្ពស់។ ដូច្នេះការធ្វើអាជីវកម្ម ឬមុខជំនួញណាមួយដែលស្របនឹងជំនាញរបស់ខ្លួន គឺមានឱកាសចំណេញ។ ផ្ទុយទៅវិញ សម្រាប់អ្នកដែលមិនមានជំនាញ និងមិនចេះមើលពីទីផ្សារ ហើយចេះតែបើកតាមគេ ទាំងដែលខ្លួនមិនមានជំនាញផងនោះ ភាពបរាជ័យនឹងរត់មករកនៅក្នុងអត្រាខ្ពស់រហូតដល់ប្រមាណ៩០ភាគរយ”៕

បច្ចុប្បន្នភាព ៖ ទីផ្សារអចលនទ្រព្យនៅតែស្ថិតក្នុងភាពស្រពេចស្រពិល ដោយសារវិបត្តិជំងឺសកល

ដោយ ៖ ហ្សូលី

ភ្នំពេញ ៖ ស្ថានភាពអចលនទ្រព្យបច្ចុប្បន្នត្រូវបានអ្នកជំនាញជាច្រើនរូបសង្កេតឃើញថា នៅតែបន្តស្ថិតក្នុងភាពស្រពិចស្រពិលនៅឡើយ ខណៈថ្មីៗនេះរដ្ឋាភិបាលកម្ពុជាបានប្រកាសពីការបង្កើនភាពប្រុងប្រយ័ត្ន និងទប់ស្កាត់ការរីករាលដាលនៃវិបត្តិជំងឹសកលកូវីដ ១៩ សារជាថ្មី។

លោកស្រី ចេវ សុឃុន ប្រធានសមាគមអ្នកជំនាញអចលនទ្រព្យកម្ពុជា បានមានប្រសាសន៍ប្រាប់គេហទំព័រ Propertyarea.asia ថា វិបត្តិកូវីដ ១៩ គឺជាជំងឺពិភពលោក ក្នុងនោះវាក៏បានជះឥទ្ធិពលមកលើវិស័យពាក់ព័ន្ធមួយចំនួនរបស់កម្ពុជា ជាក់ស្តែងវិស័យអចលនទ្រព្យបានទទួលរងឥទ្ធិពលប៉ះពាល់មួយផ្នែកធំដែរ ដោយសារតែនៅក្នុងកំឡុងពេលកូវីដនេះ បានរាំងខ្ទប់បណ្តាអ្នកវិនិយោគអន្តរជាតិមិនអាចមកកាន់កម្ពុជា។

លោកស្រីបន្តថា វាមិនប៉ះពាល់ទាំងស្រុងទេ ប៉ុន្តែគ្រាន់តែប៉ះពាល់លើការអភិវឌ្ឍ ចរន្តនៃការទិញលក់ ដែលធ្វើឱ្យបញ្ហាជាប់គាំង។ ចំណែកឯប្រជាពលរដ្ឋកម្ពុជា ក៏ជួបបញ្ហាប្រឈមផងដែរ ព្រោះពួកគាត់មិនសូវមានលទ្ធភាពក្នុងការទិញ ឬលក់ដែរ ព្រោះម្នាក់ៗផ្តោតសំខាន់ថា តើធ្វើយ៉ាងណាឱ្យគាត់រួចចាកផុតពីវិបត្តិកំឡុងពេលនេះ។

ជាមួយគ្នាលោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងស្រដៀងគ្នាថា វិបត្តិកូវីដ ១៩ បានបណ្តាលឱ្យចរន្តទិញ-លក់ថមថយមួយចំនួនក្នុងវិស័យអចលនទ្រព្យ។ បច្ចុប្បន្ន វិនិយោគិន និងអតិថិជនច្រើនតែជាអ្នកក្នុងស្រុកច្រើន ហើយប្រសិនជាអ្នកវិនិយោគបរទេស ភាគច្រើនពួកគាត់មានដៃគូសហការជាអ្នករស់នៅក្នុងព្រះរាជាណាចក្រកម្ពុជា ហើយបន្តផ្តល់ព័ត៌មានដល់ដៃគូក្នុងស្រុក។

ប្រធានសមាគមរូបនេះបានបញ្ជាក់ថា ដោយឡែក អ្នកវិនិយោគដែលមានទំនាក់ទំនងល្អ ឬក៏មិនមានដៃគូនៅក្នុងកម្ពុជា គាត់មិនបានមកធ្វើការវិនិយោគនោះទេ ព្រោះតែគាត់បារម្ភពីសុវត្ថិភាពរបស់ខ្លួន ឬក៏បញ្ហាប្រឈាមនៃវិបត្តិកូវីដក្នុងតំបន់របស់ពួកគាត់ និងនៅក្នុងសកលលោកផងដែរ។

នៅដើមសប្ដាហ៍នេះ រាជរដ្ឋាភិបាលកម្ពុជា បានចេញសេចក្តីប្រកាសសារជាថ្មីពីការបិទសាលារៀនរដ្ឋ និងឯកជន តំបន់សាធារណៈមួយចំនួនដូចជា រោងភាពយន្ត សារមន្ទីរ ខារ៉ាអូខេ និងពហុកីឡដ្ឋានជាតិអូឡាំពិកជាបណ្តោះអាសន្ន ដើម្បីចូលរួមទប់ស្កាត់ការរីករាលដាលនៃជំងឺកូវីដ ១៩៕

ធនាគារពាណិជ្ជចិនដ៏ធំមួយទៀត ចូលមកកាន់ទីផ្សារកម្ពុជា

ដោយ ៖ រ៉ាណេត
ភ្នំពេញ ៖ ធនាគារពាណិជ្ជមកពីប្រទេសចិនដ៏ធំមួយទៀត បានមកបណ្តាក់ទិនវិនិយោគនៅក្នុងទីផ្សាររួមនៃប្រទេសកម្ពុជា និងប្រកាសធ្វើប្រតិបត្តិការជាផ្លូវការ ក្រោយពីទទួលបានការអនុញ្ញាតពីធនាគារជាតិនៃកម្ពុជា។

ក្រុមហ៊ុន យូណានជីងចេង ដែលមានមូលដ្ឋានក្នុងប្រទេសចិន បានបង្កើតធនាគារពាណិជ្ជ ដែលមានឈ្មោះថា ធនាគារ រួយលី ខេមបូឌា ម.ក និងបានប្រកាស
ដំណើរការជាផ្លូវការនៅកម្ពុជា កាលពីចុងសប្ដាហ៍កន្លងទៅនេះ ក្រោមវត្តមានរបស់ទេសាភិបាលធនាគារជាតិនៃកម្ពុជាផងដែរ។

យោងតាមសេចក្តីប្រកាសរបស់ក្រុមហ៊ុនយូណានជីងចេង ដែលជាក្រុមហ៊ុនមេរបស់ធនាគារ រួយលី នៅកម្ពុជា បានឱ្យដឹងថា ការបង្កើតធនាគារពាណិជ្ជរួយលី នៅកម្ពុជា ដើម្បីបន្តជំរុញផែនការសហប្រតិបត្តិការលើ គ្រោង ផ្លូវមួយ ខ្សែក្រវ៉ាត់មួយ របស់ប្រទេសចិន។

លោក Dong Le Cheng ស្ថាបនិកក្រុមហ៊ុន យូណានជីងចេង បានលើកឡើងថា កាលពីខែតុលា ឆ្នាំ២០១៨ ក្រុមហ៊ុនបានចាប់ផ្តើមវិនិយោគបង្កើតធនាគារ រួយ លី (ខេមបូឌា) ម.ក ហើយនៅថ្ងៃទី ៥ ខែធ្នូ ឆ្នាំដដែល ក្រុមហ៊ុនបានទទួលការយល់ព្រមជាគោលការណ៍ពីធនាគារជាតិនៃកម្ពុជា និងបានស្ថាបនាទីតាំងអាជីវកម្ម អភិវឌ្ឍន៍ប្រព័ន្ធគ្រប់គ្រងរបស់ធនាគារ ក៏ដូចជាទិញបរិក្ខារឧបករណ៍ ព្រមទាំងជ្រើសរើសបុគ្គលិក និងបណ្តុះបណ្តាលជាបន្តបន្ទាប់។

លោក បានបន្តទៀតថា នៅថ្ងៃទី ២០ ខែតុលា ឆ្នាំ ២០២០ ក្រុមហ៊ុនបានទទួលអាជ្ញាប័ណ្ណប្រតិបត្តិការធនាគារពាណិជ្ជកម្ម ដែលចេញដោយធនាគារជាតិនៃកម្ពុជា ហើយបានបើកដំណើរការជាផ្លូវការនៅថ្ងៃទី៧ ខែវិច្ឆិកា ដើម្បីផ្ដល់សេវាធនាគារដល់ប្រជាជនកម្ពុជា ក៏ដូចជាវិនិយោគិនដទៃទៀតដែលមានវត្តមានក្នុងប្រទេសកម្ពុជា។

បច្ចុប្បន្ននេះ ធនាគារ រួយ លី (ខេមបូឌា) ម.ក បានប្រើប្រាស់ប្រព័ន្ធគ្រប់គ្រង (Core System)ដែលមានភាពជឿនលឿនរបស់ប្រទេសចិន ដើម្បីផ្ដល់ភាពងាយស្រួល និងធានាសុវត្ថិភាពប្រតិបត្តិការជូនអតិថិជន។ ដើម្បីធានាសុវត្ថិភាពលើប្រព័ន្ធប្រតិបត្តិការរបស់ធនាគារ ក៏ដូចជាសុវត្ថិភាពទឹកប្រាក់ និងព័ត៌មានរបស់អតិថិជន ធនាគារបានជ្រើសគ្រឿងបរិក្ខារម៉ាកយីហោជួរមុខ ដូចជា Huawei, NSFOCUS និង360ជាដើម ហើយក្រុមការងារប្រកប ដោយវិជ្ជាជីវៈរបស់ធនាគារ នឹងផ្តល់ជូនសហគ្រាស និងបុគ្គលគ្រប់រូបនូវសេវាកម្មហិរញ្ញវត្ថុដែលមានគុណភាពល្អ ប្រសិទ្ធភាពខ្ពស់ និងទូលំទូលាយ៕

ចំណេះដឹង! តើ​អាករ​លើ​ការ​ស្នាក់​ត្រូវ​បានកំណត់​តាម​អត្រា​ប៉ុន្មាន​ភាគរយ?

ដោយ វឌ្ឍនៈ

ភ្នំពេញ៖ អារ​ករ​ស្នាក់នៅ (Accommodation Tax) គឺ​ត្រូវ​បានកំណត់ និង​ប្រមូល​លើ​ការ​ស្នាក់​នៅក្នុង​សណ្ឋាគារ ដែល​ជាប់ពន្ធ​ក្នុង​របប​ស្វ័យ​ប្រកាស សម្រាប់​គុណប្រយោជន៍​ថវិកា​ថ្នាក់ក្រោម​ជាតិ វៀរលែងតែ​សកម្មភាព ដូចជា៖ការប្រជុំ ឬ​សិក្ខាសាលា។

យោងតាម​ឯកសារ​របស់​អគ្គនាយក​ដ្ឋា​ន​ពន្ធដារ​កម្ពុជា បង្ហាញថា អាករ​លើ​ការ​ស្នាក់​ត្រូវបាន​កំណត់​តាម​អត្រា ២% លើ​ការ​ស្នាក់​នៅក្នុង​សណ្ឋាគារ ផ្ទះសំណាក់ ក្នុង​ព្រះរាជាណាចក្រ។ អ្នក​ជាប់ពន្ធ​ដែល​ធ្វើការ​ផ្គត់ផ្គង់​សេវា​ស្នាក់នៅ​ត្រូវ​ទទួលខុសត្រូវ​ក្នុងការ​បង់ប្រាក់​អាករ​នេះ​ជូន​រដ្ឋបាល​សារពើពន្ធ យ៉ាង​យឺត​បំផុត​ត្រឹម​ថ្ងៃទី២០ នៃ​ខែ​បន្ទាប់ពី​ខែ​ដែលមាន​ការផ្គត់ផ្គង់។

សម្រាប់​មូលដ្ឋាន​គិត​ជា​អាករ គឺជា​ថ្លៃ​បន្ទប់​ស្នាក់​នៅក្នុង​សណ្ឋាគារ ដោយ​រួមបញ្ចូល​ទាំង​ពន្ធ-អាករ និង​បន្ទុក​សេវាផ្សេងៗ (service charge) ប៉ុន្តែ​ត្រូវ​លើកលែង​អាករ​លើ​តម្លៃបន្ថែម និង​អាការ​ស្នាក់នៅ​ខ្លួនឯង៕

រដ្ឋាភិបាល​ទទួលយក​សំណើ​ចំនួន២៥ពី​វិស័យ​ឯកជន ដើម្បី​ជំរុញ​ការទាក់ទាញ​វិនិយោគិន​អន្តរជាតិ​បន្ថែមទៀត

ដោយ ៖ រ៉ា​ណេ​ត

ភ្នំពេញ ៖ រដ្ឋាភិបាល​តាមរយៈ​ក្រុមប្រឹក្សា​អភិវឌ្ឍន៍​កម្ពុជា បាន​ទទួលយក​សំណើ​ចំនួន ២៥ ចំណុចសំខាន់ៗពី​វិស័យ​ឯកជន ដែល​តំណាង​ដោយ​សភាពាណិជ្ជកម្ម​កម្ពុ​ជា ដើម្បី​ប្រមូល​ជា​ធាតុ​ចូល​បន្ថែម​ពិភាក្សា និង​រៀបចំ​សេចក្ដីព្រៀងច្បាប់​វិនិយោគ​ថ្មី​នៅ​កម្ពុជា ដើម្បី​ជំរុញ និង​ទ្រទ្រង់​លើ​គម្រោងវិនិយោគ​ទាំង​ក្នុងស្រុក និង​កៀរគរ​ក្រុមហ៊ុន​អន្តរជាតិ​បន្ថែមទៀត។

សភាពាណិជ្ជកម្ម​កម្ពុជា កាលពី​ថ្ងៃ​ចុង​សប្ដាហ៍​កន្លងទៅនេះ បាន​ចូលរួម​នៅក្នុង​វេទិការ​ជជែក និង​ពិភាក្សា​ទៅលើ​សេចក្ដីព្រៀងច្បាប់​វិនិយោគ​ថ្មី​នៅ​កម្ពុជា នៅ​ក្រុមប្រឹក្សា​អភិវឌ្ឍន៍​កម្ពុជា ដោយបាន​ដាក់សំណើ​ចំនួន២៥ចំណុច​នៅក្នុង​កិច្ចប្រជុំ ជាពិសេស​ផ្តោត​សំខាន់​ទៅលើ​ការពង្រីក​សិទ្ធិ​សម្រេច​របស់​អនុគណៈកម្មការ​វិនិយោគ​នៅតាម​បណ្តា​ខេត្ត​ក្រុង​ឱ្យ​កាន់តែ​ធំ​ទូលាយ។

អនុប្រធាន​សភាពាណិជ្ជកម្ម​កម្ពុជា លោក​ឧ​ញ៉ា លឹម ហេង បាន​មានប្រសាសន៍ថា នៅក្នុង​ចំណោម​សំណើ​ទាំង២៥ដែល​បានដាក់​ស្នើសុំ​ការសម្រេច​ពី​រាជរដ្ឋាភិបាល​នេះ សំណើ​ចំនួន១ ដែល​គិតថា មាន​សារសំខាន់ និង​បង្ក​ភាពងាយស្រួល​ដល់​បណ្តា​ធុរជន​នៅតាម​បណ្តា​ខេត្ត​ក្រុង​នានា គឺ​ការពង្រីក​សិទ្ធិ​សម្រេច​របស់​អនុគណកម្មការ​វិនិយោគ ឬ​ហៅថា CDC នៅតាម​បណ្តា​ខេត្ត។

លោក​ឧកញ៉ា​បន្តថា “ច្បាប់​វិនិយោគ​ចាស់​ដែល​បាន​បង្កើតឡើង​តាំងពី​ឆ្នាំ១៩៩៣ និង​នៅ​បន្ត​អនុវត្ត​ដល់ពេល​បច្ចុប្បន្ននេះ ការសម្រេច​របស់ CDC តាម​ខេត្ត​ទៅលើ​គម្រោង​វិនិយោគ​នានា​មាន​ទំហំ​ត្រឹមតែ២លាន​ដុល្លារ​ចុះក្រោម។ ទំហំ​នៃ​ការវិនិយោគ​នេះ បើ​កាលពីមុន​វា​ពិត​ជាធំ និង​ច្រើន​មែន ប៉ុន្តែ​សម្រាប់​បច្ចុប្បន្ននេះ ត្រឹម២លាន​ដុល្លារ​មិនមែនជា​ទំហំ​វិនិយោគ​ធំ​ទៀត​នោះទេ។ ដូច្នេះ​លទ្ធភាព​នៃ​ការសម្រេច​ទៅលើ​គម្រោង​វិនិយោគ​នៅតាម​បណ្តា​ខេត្ត​នេះ គួរតែមាន​ទំហំ១០លាន​ដុល្លារ​ចុះក្រោម ហើយ​រាល់​ការរៀបចំ​ឯកសារ​ពាក់​ព័ន្ធផ្សេងៗ ត្រូវតែ​អនុវត្ត​នៅ​ច្រកចេញចូល​តែមួយ ដែលជា​កា​រប​ង្កភាពងាយស្រួល​ដល់​ការវិនិយោគ ក៏ដូចជា​ជំរុញ និង​លើកទឹកចិត្ត​ដល់​ធុរជន​ទាំង​ក្នុងស្រុក និង​មកពី​ក្រៅប្រទេស​ផងដែរ” ។

អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍បន្តទៀតថា “យើងឆ្ងល់ថា ហេតុអ្វីបានជារោងចក្រ សហគ្រាស ផ្សេងៗភាគច្រើនមានតែនៅតំបន់ក្បែររាជធានីភ្នំពេញ? ហេតុផលគឺមកពីការសម្រេចទៅលើទំហំវិនិយោគនានាដែលមានតម្លៃចាប់ពី២លានដុល្លារឡើងទៅត្រូវស្ថិតនៅក្នុងការសម្រេចរបស់ក្រុមប្រឹក្សាអភិវឌ្ឍន៍កម្ពុជា ហើយទាំងការរត់ការឯកសារពាក់ព័ន្ធជាមួយក្រសួង ស្ថាប័នមួយចំនួនគឺត្រូវធ្វើនៅរាជធានីភ្នំពេញ ដូច្នេះហើយបានជាជំរុញឱ្យអ្នកវិនិយោគ ក៏ដូចជាក្រុមហ៊ុនទាំងនោះភាគច្រើនដាក់ទីតាំងនៅតំបន់ក្បែរ ឬជុំវិញរាជធានីភ្នំពេញ”។

លោក​ឧកញ៉ា​បញ្ជាក់ថា “គ្មាន​អ្នកណា​ចង់​ដឹក​វត្ថុធាតុដើម​ពី​ផែ​ខេត្ត​ព្រះសីហនុ​មកកាន់​ភ្នំពេញ​ដើម្បី​ផលិត ហើយ​ដឹកយក​ផលិត​សម្រេច​ទៅ​ផែ​ខេត្ត​ព្រះសីហនុ​វិញ​នោះទេ។ ដូច្នេះ​ប្រសិនបើ CDC ខេត្ត​អាចមាន​សិទ្ធិ​សម្រេច​ខ្ពស់ ហើយ​រាល់​ការរៀបចំ​ឯកសារ​រដ្ឋ​បាល​ពាក់ព័ន្ធ​ត្រូវបាន​ធ្វើឡើង​នៅ​ច្រកចេញចូល​តែមួយ ខ្ញុំ​ជឿថា ទាំង​រោងចក្រ សហគ្រាស ក៏ដូចជា​ក្រុមហ៊ុន​អភិវឌ្ឍន៍​នឹងមាន​រីកដុះដាលនៅតាម​បណ្តា​ខេត្ត​កាន់តែច្រើន ហើយ​អាច​កាត់បន្ថយ​ការ​ចំណាកស្រុក និង​ជួល​លើកកម្ពស់​កម្រិតជីវភាព​របស់​ប្រជាពលរដ្ឋ​តាមរយៈ​ការផ្តល់​ឱកាស​ការងារ​នៅក្នុង​មូលដ្ឋាន​ដែល​កំពុង​រស់នៅ​យ៉ាង​ប្រាកដ” ៕

រដ្ឋាភិបាល​កំពុង​សិក្សា​លម្អិត​បន្ថែមទៀត​លើ​គម្រោង​ផ្លូវ​ក្រវ៉ាត់​ក្រុង​ទី៤

ដោយ វឌ្ឃនៈ

ភ្នំពេញ៖ រដ្ឋាភិបាល​តាមរយៈ​ក្រសួង​សាធារណការ និង​ដឹកជញ្ជូន គ្រោង​នឹង​បន្ត​រៀបចំ​សិក្ខាសាលា​ពិភាក្សា​លើ​គម្រោង​សាងសង់​ផ្លូវ​ក្រវ៉ាត់​ក្រុង​ទី៤ បន្ថែមទៀត ដើម្បីឱ្យ​ភាគី​ពាក់ព័ន្ធ​យល់ដឹង​កាន់តែច្បាស់ និង​ហាមឃាត់​កុំឱ្យ​មានការ​រ​រំលោភបំពាន​ដី​ចំពោះ​គម្រោង​ដែល​ត្រូវ​សាងសង់។

លោក គង់ វិមាន អ្នកនាំពាក្យ​ក្រសួង​សាធារណការ និង​ដឹកជញ្ជូន បានឱ្យដឹង​កាលពីពេលថ្មីៗនេះ​ថា ក្រសួង​មិនមែន​ធ្វើ​សិក្ខាសាលា​តែម្តង​នោះទេ គឹ​នឹងមាន​ការរៀបចំ​បន្តទៀត​នាពេល​ខាងមុខនេះ ប៉ុន្តែ ក្រសួង​មិនទាន់​បានកំណត់​ថ្ងៃ​ជាក់​នៅឡើយ​ទេ។

លោក​បន្តថា សម្រាប់​គម្រោង​សាងសង់​ផ្លូវ​ក្រវ៉ាត់​ក្រុង​ទី៤នេះ ក្រសួង​និង​ភាគី​ពាក់ព័ន្ធ នឹង​បន្ត​ពិភាក្សាគ្នា​បន្ថែមទៀត តាមរយៈ​ការរៀបចំ​ឱ្យមាន​សិក្ខាសាលា នាពេល​ខាងមុខនេះ ហើយ​ការធ្វើសិក្ខាសាលា​កន្លងមក​នេះ មិនទាន់​សម្រេច​ជា​ផ្លូវការ​ទេ។

លោក​បន្ថែមទៀតថា កិច្ចការ​នេះ ទាមទា​ក្នុង​រយៈពេល​វែង​ទៅមុខទៀត និង​អាចធ្វើ​សិក្ខាសាលា​ជាច្រើន​សារ​ថែមទៀត ដើម្បី​ដំណើរ​ការឱ្យ​គម្រោង​មួយ​នេះ មាន​ប្រព្រឹត្ត​ទៅដោយ​រលូន។

ក្រសួង​សាធារណការ និង​ដឹកជញ្ជូន កាលពី​ខែតុលា​កន្លងមកនេះ បានរៀបចំ​សិក្ខាសាលា ពិគ្រោះ​យោបល់​ស្តីពី​ការជ្រើសរើស​ផ្លូវ​ក្រវាត់ក្រុង​ទី៤ យន្តការ​ការគ្រប់គ្រង និង​ការទប់ស្កាត់​ការទន្ទ្រាន​ដី​ចំណីផ្លូវ និង​តម្រូវការ​ហេ​ដ្ឋា​ន​រចនាសម្ព័ន្ធ នៃ​ប្រព័ន្ធ​ចម្រោះ​ទឹក​កខ្វក់ ដោយមាន​ការពិគ្រោះ​យោបល់ ជាមួយ​បណ្តា​ក្រសួង​ពាក់ព័ន្ធ  រដ្ឋបាល​ថ្នាក់ក្រោម​ជាតិ និង​ដៃគូ​អភិវឌ្ឍន៍​អំពី​ផលប៉ះពាល់​លើ អនុវត្ត​គម្រោង​នេះ និង​ដើម្បី​ប្រមូល​ធាតុ​ចូល​បន្ថែម​ឱ្យ​គ្រប់​ជ្រុងជ្រោយ សម្រាប់​ការអនុវត្ត​គម្រោង​ផ្លូវ​ក្រវាត់ក្រុង​ទី៤នេះ​មាន​ភាពរលូន និង​ប្រសិទ្ធភាព​ខ្ពស់។

លោក​លីម ស៊ី​ដេ​នី​ន រដ្ឋលេខាធិការ​ក្រសួង​សាធារណការ​និង​ដឹកជញ្ជូន​បញ្ជាក់​នៅក្នុង​សិក្ខាសាលា​ពិគ្រោះ​យោបល់​នោះ​ថា  គម្រោង​សាងសង់​ផ្លូវ​ក្រវាត់ក្រុង​ទី៤ ជា​ផ្លូវ​មួយ​មាន​សារៈសំខាន់ ដែល​នឹង​ចូលរួមចំណែក​កាត់បន្ថយ​ការកក់ស្ទះ​ចរាចរណ៍ និង​ជួយ​សម្រួល​ដល់​ការដឹកជញ្ជូន​ទំនិញ​របស់​បងប្អូន​ប្រជាពលរដ្ឋ ទៅកាន់​ផ្លូវជាតិផ្សេងៗ និង​ទៅកាន់​ព្រំដែន​ប្រទេស​វៀតណាម និង​ប្រទេស​ថៃ បាន​កាន់តែ​លឿន ចំណេញ​ពេលវេលា កាត់បន្ថយ​ការ​ចំណាយបាន​មួយកំរិត​ទៀត” ។

លោក​បន្តថា ផ្លូវ​ខ្សែ​ក្រវាត់ក្រុង​ទី៤ ដែល​ក្រសួង​បានឱ្យ​ក្រុមហ៊ុន​សាជីវកម្ម​ស្ពាន ថ្នល់​ចិន សិក្សា​តាំងពី​ឆ្នាំ២០១៨ បាន​សិក្សា​ចប់សព្វគ្រប់​នៅ​ឆ្នាំ២០២០ ដោយ​ផ្លូវ​នេះ​មាន​ប្រវែង១៩៥ គីឡូម៉ែត្រ ឆ្លងកាត់​ខេត្ត​ចំនួន៤ គឺ​ខេត្តកំពង់ស្ពឺ តាកែវ កណ្តាល និង​ខេត្តព្រៃវែង។

លោក​បន្ថែមថា ក្រៅពី​ការគ្រប់គ្រង និង​ការទប់ស្កាត់​ការទន្ទ្រាន​ដី​ចំណីផ្លូវ តាម​ដងផ្លូវ​ខុសច្បាប់  ឬ​ការទន្ទ្រាន  យក​ដី​ចំណីផ្លូវ​យកមក​គ្រប់គ្រង បានធ្វើ​ឲ្យ​មានការ​ខូចខាត​ដល់​ហេដ្ឋារចនាសម្ព័ន្ធ​ផ្លូវថ្នល់ បង្ក​ឱ្យ កកស្ទះ ដល់​ហេ​ដ្ឋា រចនាសម្ព័ន្ធ ប្រព័ន្ធ​លូបង្ហូរទឹក ប្រជាពលរដ្ឋ​នៅតាម​បណ្ដា​ទីប្រជុំជន ឬ​ទីក្រុង បានធ្វើឱ្យ​ពិបាក​ក្នុងការ​គ្រប់គ្រង​កាក់សំណល់ ការសម្អាត​បរិស្ថាន​ថែម​ទៀតផង។

លោក ច្រឹ​ក សុខ​នី​ម ប្រធាន​សមាគម​ភ្នាក់ងារ និង​វាយតម្លៃ​អចលនវត្ថុ​កម្ពុជា បានឱ្យដឹង​ដែរ​ថា​នៅពេលដែល​ចាប់ផ្តើម​សាងសង់​ផ្លូវ​ក្រវ៉ាត់​ក្រុង​ទី៤ នឹង​ទទួលបាន​ផល​រីកចំរើន​ទាំង​ផ្ទាល់ ឬក៏​ដោយ​ប្រយោល​ពី​តំបន់​ឆ្លងកាត់​ទាំងនោះ ។

លោក​បន្តថា ដី​ដែល​នៅក្បែរ​ហ្នឹង ដូចជា​នៅ​ពីក្រោយ​ដី​ដែល​ជាប់​ផ្លូវ​ហ្នឹង ឬ​ដី​ដែលមាន​ទំនាក់ទំនង​ជាមួយនឹង​ផ្លូវ​ក្រវ៉ាត់​ក្រុង អាច​នឹង កសាង ឬ​អភិវឌ្ឍន៍​នៅក្នុង​តំបន់​នេះ​ឱ្យមាន​ការរីកចំរើន ។ ទាំងនេះ គឹជា​ភាព​វិជ្ជមាន​នៃ​ការ​សាង​ផ្លូវ​ក្រវ៉ាត់​ក្រុង និង​ការ​សាង​ផ្លូវ​ដើម្បី​ធ្វើឱ្យ តំលៃ​អចលនទ្រព្យ មានកំណើត​ស្ថិតនៅក្នុង និង​អាច​ទទួលយកបាន។

លោក​ច្រឹ​ក សុខ​នី​ម​បញ្ជា​ក់ទៀ​ថា  “ជាពិសេស នៅពេល​ដែលមាន​ហេដ្ឋារចនាសម្ព័ន្ធ​ច្បាស់លាស់  តំបន់​នៅក្បែរ និង​ផ្លូវ​ក្រវ៉ាត់​ក្រុង​នេះ​អាច​នឹង​យកមក អភិវឌ្ឍន៍​ជា​បុរី លំនៅឋាន ផ្ទះ​លម្ហែកាយ ឬក៏​តំបន់​ពាណិជ្ជកម្ម តំបន់​ឧស្សា​កម្មផ្សេងៗទៀត ដែល​បំរើ​ដល់​ជំនួញ និង​អាជីវកម្ម​នានា​សម្រាប់​បំរើ​នៅក្នុង​ស្រុក និង​ធ្វើ​ការនាំ​ចេញទៅ​ក្រៅប្រទេស” ៕