ដោយៈ ម៉ាណា

    ព្រះសីហនុៈ ដំណើរការសាងសង់គម្រោង Peninsula Bay ដែលបានចាប់ផ្តើមពីឆ្នាំ២០២៤ ដល់ ឆ្នាំ២០២៥ បាននិងកំពុងវិវត្តន៍ជាវិជ្ជមាន ដោយនៅពេលបញ្ចប់រួចរាល់ទាំងស្រុង គំរោងនេះនឹងផ្តល់ឱកាសការងារដល់ប្រជាពលរដ្ឋ ប្រមាណ៥ពាន់នាក់ នៅពេលដំណើរការ។

គម្រោងប៉ាន់តាវផេនីសូលឡា តម្លៃ១,៥៧៤លានដុល្លារ គឺជាការវិនិយោគរបស់ក្រុមហ៊ុន Peninsula Bay Investment Co., Ltd ដំណាក់កាលទីមួយប្លុកតំបន់A និងប្លក់តំបន់B មានដូចជា៖ អគារខុនដូរ អគារពាណិជ្ជកម្ម ផ្សារទំនើប និងកន្លែងកម្សាន្តផ្សេងៗទៀត ដំណាក់កាលទីមួយ នឹងបញ្ចប់ការសាងសង់រួចរាល់ នៅចុងឆ្នាំ២០២៥ ខាងមុខនេះ។

ដោយឡែនដំណាក់កាលទីពីរ គម្រោងនិងធ្វើការបញ្ចប់ការសាងសង់នៅឆ្នាំ២០២៨ ពេលបញ្ចប់រួចរាល់ទាំងស្រុងគម្រោងនេះ នឹងលើកកម្ពស់សោភ័ណភាពក្រុងព្រះសីហនុ នៅចំណុចទីលានតេជោសន្តិភាព(ពយតាមូង) ឱ្យកាន់តែមានភាពទាក់ទាញស្រស់ស្អាតបន្ថែម​មួយកម្រិតទៀត។

គម្រោងប៉ាន់តាវផេនីសូលឡា បច្ចុប្បន្នក្រុមហ៊ុនPeninsula Bay Investment Co., Ltd បានវិនិយោគលើផ្ទៃដីសាងសង់ប្រមាណ ១៥.៨ហិកតា ដែលមានផ្ទៃអគាររហូតដល់៩០ម៉ឺនការ៉េ ដែលអាចផ្តល់ការងារជូនពលរដ្ឋប្រមាណ៥ពាន់នាក់ នៅពេលដំណើរការខាងមុខនេះ៕

ដោយៈ គង់ សូរិយា

    ភ្នំពេញៈ តំណាងវិនិយោគិនអ៊ឺរ៉ុប បានបង្ហាញនូវចំណាប់អារម្ម​ណ៍ជាវិជ្ជមាន ដែលទទួលបានការយកចិត្តទុកដាក់ ពីរាជរដ្ឋាភិបាលកម្ពុជា។

ការបង្ហាញនេះ ធ្វើឡើង ក្នុងពេលលោកឧបនាយករដ្ឋមន្រ្តីស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា រួមជាមួយលោក Igor Driesmans ឯកអគ្គរដ្ឋទូត គណៈប្រតិភូសហភាពអឺរ៉ុបប្រចាំកម្ពុជា បានអញ្ជើញដឹកនាំកិច្ចសន្ទនាលើកទី៣ រវាងរដ្ឋនិងវិស័យឯកជន កម្ពុជា-សហភាពអ៊ឺរ៉ុប ដោយមានការចូលរួមពី លោក Gabriele Faja ប្រធានសភាពាណិជ្ជកម្មអឺរ៉ុបនៅកម្ពុជា(EuroCham) លោក Stefan Messerer ឯកអគ្គរដ្ឋទូតសាធារណរដ្ឋសហព័ន្ធអាល្លឺម៉ង់ប្រចាំនៅកម្ពុជា, តំណាងក្រសួង-ស្ថាប័នពាក់ព័ន្ធ, តំណាងក្រុមប្រឹក្សាធុរកិច្ចសហភាពអ៊ឺរ៉ុប-អាស៊ាន (EU-ABC) វិស័យឯកជន និងមន្ត្រីជំនាញជាច្រើនរូបកាលពីថ្ងៃម្សិលម៉ិញ។

តាមរយៈវេទិកានៃកិច្ចសន្ទនានាព្រឹកនេះ តំណាងវិនិយោគិនអ៊ឺរ៉ុបបានបង្ហាញនូវចំណាប់អារម្មណ៍ជាវិជ្ជមាន ដែលទទួលបានការយកចិត្តទុកដាក់ពីរាជរដ្ឋាភិបាលកម្ពុជា ដោយមានក្រុមប្រឹក្សាអភិវឌ្ឍន៍កម្ពុជា និងក្រសួងស្ថាប័នពាក់ព័ន្ធទាំងអស់ជាសេនាធិការ។

ជាមួយគ្នានេះ ពួកគេក៏បានបង្ហាញនូវសុទិដ្ឋិនិយមខ្ពស់ ចំពោះការទទួលស្តាប់ពីបញ្ហាប្រឈម និងការពិភាក្សាផ្លាស់ប្តូរយោបល់ ពិសេ​សជាមួយនឹងបទពិសោធន៍ ដែលធ្លាប់ទទួលបានការឆ្លើយតប ក៏ដូចជាដំណោះស្រាយនានា បន្ទាប់ពីបានលើកឡើង នៅកិច្ចប្រជុំទាំង២លើកកន្លងមក។

កិច្ចសន្ទនាលើកទី៣ រវាងរដ្ឋនិងវិស័យឯកជន កម្ពុជា-សហភាពអឺរ៉ុប នាព្រឹកនេះ បានប្រព្រឹត្តទៅដោយរលូនតាមរបៀបវារៈ ដែលបានគ្រោងទុក ដោយបានលើកយកប្រធានបទ ជាអាទិភាពមកពិភាក្សាយ៉ាងផុសផុល ពាក់ព័ន្ធនឹងបរិយាកាសវិនិយោគ និងការធ្វើធុរកិច្ចនៅកម្ពុជា របស់វិនិយោគិនអឺរ៉ុប សំដៅបន្តពង្រឹងវឌ្ឍនភាពដែលសម្រេចបាននៅក្នុងកិច្ចប្រជុំពីរលើកកន្លងមក។

លោកឧត្តមឧបនាយករដ្ឋមន្ត្រី បានសម្តែងនូវការស្វាគមន៍ទៅកាន់ ឯកឧត្តមឯកអគ្គរដ្ឋទូតនៃគណៈប្រតិភូ សហភាពអឺរ៉ុបប្រចាំកម្ពុជា លោកប្រធាន EuroCham ឯកឧត្តមឯកអគ្គរដ្ឋទូតប្រទេសអាល្លឺម៉ង់ប្រចាំនៅកម្ពុជា តំណាងក្រសួងស្ថាប័ន តំណាងវិស័យឯកជនអឺរ៉ុប ដែលបានអញ្ជើញ ចូលរួមយ៉ាងកុះករនាឱកាសនេះ និងបានថ្លែងអំណរគុណទៅកាន់វិនិយោគិន មកពីសហភាពអឺរ៉ុបទាំងអស់ ដែលបានសម្រេចចិត្តដាក់ទុនវិនិយោគនៅកម្ពុជា និងពង្រីកប្រតិបត្តិការធុរកិច្ច ក៏ដូចជាទំហំវិនិយោគរបស់ខ្លួនជាបន្តបន្ទាប់៕

ដោយៈ គង់ សូរិយា

    ភ្នំពេញៈ រដ្ឋាភិបាលតាមរយៈក្រសួងរៀបចំដែនដី និងក្រសួងសាធារណការ និងដឹកជញ្ជូន បានបើកកិច្ចប្រជុំពាក់ព័ន្ធនឹងការរៀបចំផែនទី បណ្ដាញផ្លូវក្នុងវិស័យសាធារ​ណការ និងដឹកជញ្ជូននៃព្រះរាជាណាចក្រកម្ពុជា។

កិច្ចប្រជុំកាលពីព្រឹកថ្ងៃទី២២ តុលាដឹកនាំដោយសហប្រធាននៃកិច្ចប្រជុំរួមមាន លោកយិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន ទទួលបន្ទុកកិច្ចការបច្ចេកទេសក្រសួងសាធារណការ និងដឹកជញ្ជូន និងលោកសួន សូផា រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ លើកិច្ចការពាក់ព័ន្ធនឹងការរៀបចំផែនទី បណ្ដាញផ្លូវក្នុងវិស័យសាធារ​ណការ និងដឹកជញ្ជូន នៃព្រះរាជាណាចក្រកម្ពុជា ដោយមានការចូលរួមពីមន្រ្តីពាក់ព័ន្ឋ។

ក្នុងជំនួបពិភាក្សានេះ បានផ្លាស់ប្តូរយោបល់ និងសិក្សាស្វែងយល់ពីគ្នាទៅវិញទៅមក ជុំវិញការប្រើប្រាស់ប្រព័ន្ធទិន្នន័យ ភូមិសាស្ត្រគោល នៃព្រះរាជាណាចក្រកម្ពុជា រវាងក្រសួងសាធារណការ និងដឹកជញ្ជូន និងក្រសួងរៀបចំដែនដី នគរូបនីយកម្ម និងសំណង់ ដែលកំពុងប្រើប្រាស់ ដើម្បីអភិវឌ្ឍផែនទីជាតិមួយ ដែលមានទិន្នន័យគ្រប់ជ្រុងជ្រោយ និងត្រឹមត្រូវ។

កិច្ចពិភាក្សាបានបង្ហាញពីការយល់ព្រមរួមគ្នា ក្នុងការបន្តសហការយ៉ាងជិតស្និទ្ធ រវាងក្រសួងសាធារណការ និងដឹកជញ្ជូន និងក្រសួងរៀបចំដែនដី នគរូបនីយកម្ម និងសំណង់ ដើម្បីពង្រឹងការផ្ទៀងផ្ទាត់ទិន្នន័យ និងអភិវឌ្ឍប្រព័ន្ធផែនទីជាតិ សម្រាប់ប្រើប្រាស់រួមរវាងក្រសួ​ង-ស្ថាប័នពាក់ព័ន្ធ៕