ដោយៈ ម៉ាណា

    ភ្នំពេញៈ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនប្រធានកាកបាតក្រហមកម្ពុជា បានឧបត្ថម្ភថវិកា និងសម្ភារ ជួយសម្រាលការព្យាបាលប្រពន្ធ និងកូនរបស់វីរយុទ្ធជនជួរមុខ ទិសប្រាសាទតាក្របី ដែលកំពុងសង្គ្រោះបន្ទាន់នៅមន្ទីរពេទ្យ។

ការប្រកាសនេះ ធ្វើឡើងនៅទីស្នាក់ការកណ្តាលកាកបាទក្រហមកម្ពុជា នារសៀលថ្ងៃទី១៧ ខែតុលា ឆ្នាំ២០២៥ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយក្តីអាណិតអាសូរ បានចាត់ឱ្យលោកជំទាវ ពុំ ចន្ទីនី អគ្គលេខាធិការ និងសហការី អញ្ជើញសំណេះសំណាលសួរសុខទុក្ខ និងផ្តល់អំណោយមនុស្សធម៌រួមមាន ថវិកា និងសម្ភារមួយចំនួន ជួយសម្រាលក្នុងការព្យាបាលប្រពន្ធ និងកូនរបស់វីរយុទ្ធជនមួយរូប ឈរជើងនៅជួរមុខដែលកំពុងសង្គ្រោះបន្ទាន់ នៅមន្ទីរពេទ្យក្នុងរាជធានីភ្នំពេញ។

ឆ្លៀតក្នុងឱកាសនោះ លោកជំទាវអគ្គលេខាធិការ បានពាំនាំប្រ​សាសន៍ពីសម្តេចកិត្តិព្រឹទ្ធបណ្ឌិត ផ្តាំផ្ញើសាកសួរសុខទុក្ខដោយក្តីអាណិ​តអាសូរជាពន់ពេក ចំពោះក្មួយវីរយុទ្ធជនដែលខ្លួន កំពុងព្យាបាលជំងឺខ្លួនឯងផង ថែមទាំងពេលនេះកូន និងប្រពន្ធកំពុងសង្គ្រោះបន្ទាន់នៅមន្ទីរពេទ្យទៀត។

ជាមួយគ្នានេះលោកជំទាវ មានប្រសាសន៍លើកចិត្តឱ្យក្មួយ ដែលជាវីរយុទ្ធជន ដែលខ្លួនកំពុងព្យាបាលជំងឺខ្លួនឯងផងនេះ សូមកុំបាក់ទឹកចិត្តខិតខំសម្រាកព្យាបាលខ្លួនឯង និងមើលថែទាំប្រពន្ធកូនផង និងសូមឱ្យប្រពន្ធកូន ព្រមទាំងក្មួយបានឆាប់ជាសះស្បើយពីជំងឺ។

វីរយុទ្ធជនរូបនេះ កំពុងសម្រាកព្យាបាលខ្លួនពីជំងឺ ខណៈពេលកំពុងឈរជើងនៅជួរមុខប្រាសាទតាក្របី។ ហើយដោយឡែកប្រពន្ធទើបវះកាត់ និងសម្រាលកូនអាយុបាន១ថ្ងៃ ដែលមានជំងឺដក់ទឹកក្នុងថង់សួត និងកង្វះអុកស៊ីសែនខួរក្បាលកម្រិតធ្ងន់ធ្ងរ ហើយពេលនេះទារកកំពុងសង្គ្រោះបន្ទាន់ នៅមន្ទីរពេទ្យគន្ធបុប្ផាវត្តភ្នំ។ ចំណែកប្រពន្ធមានមុខរបរ ជាកម្មការិនី រោងចក្រ ដែលទើបវះកាត់រួចកំពុងសម្រាកព្យាបាលនៅពេទ្យព្រះកេតុមាលា៕

ដោយៈ ម៉ាណា

អន្តរជាតិៈ ការសិក្សាមួយបានបង្ហាញថា កម្ពុជាជាប់ជាប្រទេ​សមួយ ក្នុងចំណោមប្រទេសមួយចំនួន ដែលមានកម្រិត​ញ័ររញ្ជួយកម្រ។ ខណៈពេលដែលការរញ្ជួយដី គឺជាផ្នែកធម្មជាតិនៃជីវិតនៅក្នុងតំបន់ជាច្រើន ប្រទេសជាច្រើនជុំវិញពិភពលោក បានជួបប្រទះស្ទើរតែគ្មានទាំងអស់។

យោងតាមស្ថិតិរបស់Seasia ប្រទេសមួយចំនួនដូចជា បេឡារុស្ស ប្រេស៊ីល និងកម្ពុជា ស្ថិតក្នុងចំណោមប្រទេសដែលមានសកម្ម​ភាពរញ្ជួយដី ទាបបំផុតនៅទូទាំងពិភពលោក។ តំបន់ទាំងនេះស្ថិតនៅឆ្ងាយពីព្រំប្រទល់នៃបន្ទះtectonic សំខាន់ៗ ដែលធ្វើឱ្យពួកវាមានស្ថេរភាពភូមិសាស្ត្រ និងមានសុវត្ថិភាពយ៉ាងច្រើនពីការរញ្ជួយ។

គួរឱ្យចាប់អារម្មណ៍ ប្រទេសកម្ពុជាឈរនៅក្នុងចំណោមប្រទេសអាស៊ីអាគ្នេយ៍មួយចំនួននៅក្នុងបញ្ជី ដែលជាតំបន់ដែលគេស្គាល់ជាទូទៅ សម្រាប់ភាពងាយរងគ្រោះ ដោយសារការរញ្ជួយដីដោយសារតែរង្វង់ភ្លើងនៅប៉ាស៊ីហ្វិកជុំវិញ។

ការសិក្សាបានបង្ហាញថា ទីតាំងតែមួយគត់របស់កម្ពុជា ដែលស្ថិតនៅឆ្ងាយពីតំបន់ទំនាបសកម្ម ផ្តល់ឱ្យវានូវភាពស្ងប់ស្ងាត់ភូមិសាស្ត្រដ៏កម្រ បើប្រៀបធៀបទៅនឹងប្រទេសជិតខាង ដូចជាប្រទេសឥណ្ឌូនេស៊ី ឬហ្វីលីពីន។

ប្រទេសផ្សេងទៀត ដែលត្រូវបានកត់សម្គាល់ សម្រាប់ស្ថិរភាពរបស់ពួកគេរួមមាន អារ៉ាប៊ីសាអូឌីត នីហ្សេរីយ៉ា សហរដ្ឋអាមេរិក និងអ៊ុយរូហ្គាយ ដែលនីមួយៗទទួលបានអត្ថប្រយោជន៍ ពីចម្ងាយរបស់ពួកគេទៅខ្សែក្រវ៉ាត់រញ្ជួយដីសកម្ម។

ស្ថេរភាពនេះ មិនត្រឹមតែផ្តល់នូវសុវត្ថិភាពប៉ុណ្ណោះទេ ប៉ុន្តែថែមទាំងគាំទ្រដល់ការអភិវឌ្ឍន៍ហេដ្ឋារចនាសម្ព័ន្ធ និងទេសចរណ៍រយៈពេលវែងផងដែរ ដោយសារប្រជាពលរដ្ឋ និងភ្ញៀវទេសចរណ៍ទទួលបាននូវសន្តិភាពផ្លូវចិត្តនៅលើមូលដ្ឋានរឹងមាំ៕

ដោយៈ ចំណាន

    ភ្នំពេញៈ លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភាក្សាការងារជាមួយជាមួយគណៈប្រតិភូទីក្រុងអ៊ូស៊ី ខេត្តជាំងស៊ូ សាធារណរដ្ឋប្រជាមានិតចិន ដឹកនាំដោយលោក Du Xiaogang លេ​ខា​បក្សទីក្រុងអ៊ូស៊ី ដោយមានការចូលរួមពីលោកSun Wei អភិបាលរងទីក្រុងអ៊ូស៊ី និងលោកChen Jiangang ប្រធានក្រុមប្រឹក្សាភិបាលនៃក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ។

លោកអគ្គលេខាធិការបានមានមតិស្វាគមន៍ យ៉ាងកក់ក្តៅជូននិងលើកឡើងពីភាពល្អប្រសើរ នៃស្ថានភាពវិនិយោគនៅកម្ពុជា ដែលឆ្លុះបញ្ចាំង តាមរយៈកំណើនវិនិយោគដ៏គំហុកក្នុងឆ្នាំ២០២៤ និងកំណើនវិនិយោគក្នុងរយៈពេល៩ខែ នៃឆ្នាំ២០២៥ ការអភិវឌ្ឍតំបន់សេដ្ឋកិច្ចពិសេសនៅកម្ពុជា ពិសេសភាពរីកចម្រើន នៃតំបន់សេដ្ឋកិច្ចពិសេសក្រុងព្រះសីហនុ។

ជាមួយគ្នានេះ លោកអគ្គលេខាធិការ ក៏បានលើកឡើងពីសារៈសំខាន់នៃ “ច្រករបៀងឧស្សាហកម្ម និងបច្ចេកវិទ្យា” ក្នុងការជំរុញទាក់ទាញការវិនិយោគ ហើយម្យ៉ាងទៀត រាជរដ្ឋាភិបាលកម្ពុជាបាននិងកំពុងយកចិត្តទុកដាក់យ៉ាងខ្លាំង ក្នុងការធ្វើពិពិធកម្មទីផ្សារសម្រាប់ទំនិញនាំចេញពីកម្ពុជា និងដាក់ចេញនូវវិធានការថ្មីៗសំដៅសម្រួលដល់ការធ្វើធុរកិច្ចនិងវិនិយោគ។

លោកអគ្គលេខាធិការសង្ឃឹមយ៉ាងមុតមាំថា តាមរយៈជំនួបពិភា​ក្សាលើកនេះ ថ្នាក់ដឹកនាំរបស់ទីក្រុងអ៊ូស៊ី នឹងបន្តជំរុញវិនិយោគិនពីទីក្រុងអ៊ូស៊ី ជាពិសេសនាំយកនូវឧស្សាហកម្ម ដែលប្រើបច្ចេកវិទ្យាទំនើបមកកម្ពុជា។ មួយវិញទៀត លោកអគ្គលេខាធិការក៏បានស្នើសូមឱ្យភាគីចិន ជួយជំរុញឱ្យមានការវិនិយោគក្នុងការផលិតវត្ថុធាតុដើម ឬទំនិញពាក់កណ្តាល សម្រេចនៅកម្ពុជាឱ្យកាន់តែច្រើន ដើម្បីធានាស្ថិរភាពនៃខ្សែច្រវាក់ផ្គត់ផ្គង់ និងបានស្នើឱ្យមានការគិតគូរវិនិយោគបង្កើតតំបន់កែច្នៃកសិផលនៅកម្ពុជា ដើម្បីនាំទៅទីផ្សារចិន។

លោកDu Xiaogang បានថ្លែងអំណរគុណដល់រាជរដ្ឋាភិបាលកម្ពុជា ក៏ដូចជា ក្រសួងស្ថាប័នពាក់ព័ន្ធ អាជ្ញាធរមូលដ្ឋាន និងក្រុមប្រឹក្សាអភិវឌ្ឍន៍កម្ពុជា ដែលតែងតែបានផ្តល់ការគាំទ្រ ដល់កិច្ចដំណើរការនៃគម្រោងតំបន់សេដ្ឋកិច្ច ពិសេសក្រុងព្រះសីហនុ ដែលបានធ្វើឱ្យតំបន់សេដ្ឋកិច្ចពិសេសនេះ មានការរីកចម្រើនជាបន្តបន្ទាប់។

លោកបានឱ្យដឹងផងដែរថា ដំណើរទស្សនកិច្ចនៅកម្ពុជានាពេលនេះ គឺឆ្លើយតបនឹងស្មារតីនៃកិច្ចប្រជុំលើកទី៤ របស់គណៈកម្មាធិការសម្របសម្រួល តំបន់សេដ្ឋកិច្ចពិសេសក្រុងព្រះសីហនុ ដែលបានប្រព្រឹត្តទៅកាលពីខែកក្កដា ឆ្នាំ២០២៥កន្លងមក និងដើម្បីបន្តកិច្ចការមួយចំនួនដែលបានពិភាក្សាគ្នា ក្នុងកិច្ចប្រជុំនាពេលនោះ ជាពិសេស ការត្រៀមរៀបចំកិច្ចប្រជុំលើកទី៥ ដែលគ្រោងធ្វើនៅប្រទេសចិន។

លោកDu Xiaogang ក៏បានលើកឡើងពីកិច្ចខិតខំប្រឹងរបស់ថ្នាក់ដឹកនាំទីក្រុងអ៊ូស៊ី ក្នុងការឧបត្ថម្ភគាំទ្រឱ្យមានជើងហោះហើរត្រង់ និងការដឹកជញ្ជូនត្រង់រវាងក្រុងអ៊ូស៊ី និងខេត្តព្រះសីហនុ ដែលការណ៍នេះបានចូលរួមចំណែកជំរុញ ការអភិវឌ្ឍខេត្តព្រះសីហនុទាំងមូល ក៏ដូចជា តំបន់សេដ្ឋកិច្ចពិសេសក្រុងព្រះសីហនុ។

លោកបានបង្ហាញនូវការប្តេជ្ញា ក្នុងការបន្តជំរុញធ្វើឱ្យតំបន់សេដ្ឋកិច្ចពិសេសក្រុងព្រះសីហនុ កាន់តែមានការរីកចម្រើនមួយកម្រិតទៀតតាមរយៈការខិតខំជំរុញឱ្យវិនិយោគិនចិន មកបណ្តាក់ទុនវិនិយោគបន្ថែមទៀត ពិសេស ការវិនិយោគកែច្នៃកសិផលកម្ពុជា ដើម្បីនាំទៅទីផ្សារចិន៕

ដោយៈ Jessica

  ភ្នំពេញៈ សហស្ថាបនិកគេហទំព័រPropertyarea.asia &Cambodiafinancialtimes.com និងជាប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា (CEMEA)សូមផ្ញើសារលិខិតគោរ ពជូនពរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសដ៏មហានក្ខត្តឫក្ស នៃពិធីខួបកំណើតគម្រប់៤៨ឆ្នាំ ឈានចូល៤៩ឆ្នាំ ដែលនឹងប្រព្រឹត្តទៅនៅថ្ងៃចន្ទ ១៣រោច ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែតុលា ឆ្នាំ២០២៥ នាពេលខាងមុខនេះ។

សារលិខិតគោរពជូនពររបស់លោកយិន លាងគង់មានខ្លឹមសារថា សម្តេចមហាបវរធិបតី ជាទីគោរពដ៏ខ្ពង់ខ្ពស់បំផុត! ក្នុងឱកាសដ៏មហានក្ខត្តឫក្ស នៃពិធីខួបកំណើតគម្រប់៤៨ ឈានចូល៤៩ឆ្នាំ ដែលនឹងចូលមក ដល់នៅថ្ងៃចន្ទ ទី២០ ខែតុលា ឆ្នាំ២០២៥ នាពេលខាងមុខនេះ តាងនាមថ្នាក់ដឹកនាំ ក្នុងនាមថ្នាក់ដឹកនាំ សមាជិក សមាជិកាទាំងអស់ ខ្ញុំបាទ សូមគោរពជូនពរជ័យ សិរីសួស្តី សុភមង្គល បវរមហាប្រសើរគ្រប់ប្រការ ជូនចំពោះ សម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា និងសូម សម្តែងនូវការគោរពកោតសរសើរដោយស្មោះអស់ពីដួងចិត្ត ចំពោះស្នាដៃដ៏ឧត្តុង្គឧត្តមរបស់ សម្តេចធិបតី ដែលបានធ្វើពលិកម្មបូជាកម្លាំងកាយចិត្ត ប្រាជ្ញា និងស្មារតី ដើម្បីបុព្វហេតុជាតិ មាតុភូមិកម្ពុជា ការពារអធិបតេយ្យ បូរណភាពទឹកដី ការពារផលប្រយោជន៍ស្នូលរបស់ជាតិ និងបន្តដឹកនាំឧត្តមភាពនៃរាជរដ្ឋាភិបាលកម្ពុជា ប្រកបដោយទេពកោសល្យដ៏ប៉ិនប្រសប់ ដើម្បីឆ្ពោះទៅរកការអភិវឌ្ឍរុងរឿងលើគ្រប់វិស័យ ទទួលបានការលើកកម្ពស់កិត្យានុភាពជាតិ និងកិត្តិសព្ទល្បីរន្ទឺនៅលើឆាកអន្តរជាតិ។

ឆ្លៀតក្នុងឱកាសដ៏ឧត្តុង្គឧត្តមថ្លៃថ្លានេះ យើងខ្ញុំសូមឧទ្ទិសបួងសួ​ងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិទាំងអស់ក្នុងលោក សូមមេត្តាជួយតាមបីបាច់ថែរក្សា និងប្រទានពរជ័យសិរីមហាមង្គលជូន សម្តេចមហាបវរធិបតី និងលោកជំទាវបណ្ឌិត ព្រមទាំងបុត្រា បុត្រី ជាទីស្រឡាញ់ទាំងអស់ សូមប្រកបដោយព្រះពុទ្ធពរទាំងបួនប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។

សូម សម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា មេត្តាទទួលនូវការគោរពដ៏ខ្ពង់ខ្ពស់បំផុតពីខ្ញុំបាទ និងបុត្រី៕