រដ្ឋាភិបាលដាក់ចេញគម្រោងបែងចែកដីសម្រាប់ការអភិវឌ្ឍសង្គម និងសេដ្ឋកិច្ចជំហាន៣

ដោយវុត្ថា

ភ្នំពេញ៖ គម្រោងបែងចែកដីសម្រាប់ការអភិវឌ្ឍសង្គម និងសេដ្ឋកិច្ចជំហាន៣ (LASED-III) នឹងបន្តការគាំទ្រសម្បទានដីសង្គមកិច្ច នៅថ្នាក់ឃុំ របស់រាជរដ្ឋាភិបាលកម្ពុជា ដែលគម្រោងជំហានដំបូង និងជំហាន២ បាន និងកំពុងផ្តល់ជូនគ្រួសារក្រីក្រដែលគ្មានដីសង់លំនៅដ្ឋាន។ នេះ បើតាមក្រសួងសៀបចំដែនដីគនរូបនីយកម្ម និងសំណង់ បានឱ្យដឹងថានៅថ្ងៃទី ១១ ខែមេសា ឆ្នាំ ២០២០។

គម្រោងជំហាន៣ ក៏នឹងជួយគាំទ្រដល់សហគមន៍ជនជាតិដើមភាគតិច ដែលជាកម្មវិធីរបស់រារដ្ឋាភិបាលផងដែរ តាមរយៈ ការចុះបញ្ជីដីសហគមន៍ជនជាតិដើមភាគតិច (ICLT) និងការផ្តល់សម្បទានដីសង្គមកិច្ច (SLC) ជាមួយនឹងការអភិវឌ្ឍហេដ្ឋារចនាសម្ព័ន្ធសហគមន៍ និងពង្រីកមុខរបរចិញ្ចឹមជីវិត។ ក្រសួងរៀបចំដែនដី នគរូបនីយកម្មនិងសំណង់ (MLMUPC) គឺជាស្ថាប័នដឹកនាំការអនុវត្តគម្រោងមួយនេះ រីឯក្រសួងកសិកម្ម រុក្ខាប្រមាញ់ និងនេសាទ និងស្ថាប័នថ្នាក់ក្រោមជាតិក្នុងខេត្តគោលដៅ ជាភាគីអនុវត្តន៍។

គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន៣ នឹងគាំទ្រសកម្មភាពសម្រាប់សម្បទានដីសង្គមកិច្ច (SLC) នៅក្នុងទីតាំង ១៤ កន្លែងដែលមានស្រាប់ និងទីតាំងថ្មីប្រមាណ ១៥ កន្លែងផ្សេងទៀត ។ ដោយទ្បែក សម្រាប់សហគមន៍ជនជាតិដើមភាគតិច គឺសម្រាប់តែសហគមន៍ចំនួន ៣០ ដែលបានទទួលបណ្ណ័កម្មសិទ្ធិដីសហគមន៍រួចហើយ និងសហគមន៍ជនជាតិដើមភាគតិច ចំនួន ១៥ ផ្សេងទៀត បានដាក់ពាក្យសុំមកក្រសួងដែនដី ប៉ុន្តែមិនទាន់បានទទួលទទួលបណ្ណ័កម្មសិទ្ធិដីសហគមន៍នៅឡើយ។

LASED-III ជាគម្រោងថ្នាក់មូលដ្ឋាន នឹងជួយគាំទ្រដល់ការអនុវត្តសកម្មភាពនានា នៅក្នុងបណ្តាខេត្តជាច្រើនក្នុងប្រទេសកម្ពុជា ប៉ុន្តែគេរំពឹងថា ខេត្តទាំងឡាយដែលត្រូវផ្តល់សម្បទានដីសង្គមកិច្ចថ្មី (SLC) និងការចុះបញ្ជីដីសហគមន៍ជនជាតិដើមភាគតិច (ICLT) នឹងត្រូវគ្របដណ្តប់នៅក្នុងខេត្តភូមិភាគឦសាន្តចំនួន៦។ តំបន់ទាំងនោះជាខេត្តដែលមានដង់ស៊ីតេប្រជាជនទាប ក្នុងនោះមានជនជាតិដើមភាគតិចប្រហែល ១៤% ប៉ុន្តែ ៦០% នៅក្នុងខេត្តរតនគិរី និង ៤៦% នៅក្នុងខេត្តមណ្ឌលគីរី ដែលជាតំបន់ខ្ពង់រាបភូមិភាគឦសាន្ត៕

វិស័យទេសចរណ៍របស់កម្ពុជាអាចចំណាយរយៈពេលយូរក្នុងការងើបឡើងវិញពីវីរុស Covid-19

ដោយ ហ្សូលី

ភ្នំពេញៈ វិស័យទេសចរណ៍របស់ប្រទេសកម្ពុជា ជាឧស្សាហកម្មដែលងាយរងគ្រោះជាងគេ បើប្រៀបធៀបទៅនឹងវិស័យដទៃទៀត ដោយសារមេរោគរាតត្បាត Covid-19 ហើយវិស័យនេះទៀតសោតវិស័យនេះ ក៏ពិបាកនៅក្នុងការស្តារឡើងវិញ បើទោះបីជា Covid-19 បានបញ្ចប់។ នេះបើតាមប្រសាសន៍របស់លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា។

លោកស្រីបានថ្លែងប្រាប់សារព័ត៌មានក្នុងស្រុកថា សកម្មភាពទេសចរណ៍ នឹងមិនងាយត្រឡប់មកសភាពដើម ក្នុងរយៈពេលឆាប់ៗនេះទេ ព្រោះថាវិបត្តិមេរោគនេះគឺជាវិបត្តិសកលលោក ហើយវាក៏ពាក់ព័ន្ធជាមួយអារម្មណ៍របស់មនុស្ស ក្នុងការធ្វើដំណើរដែរ។ ប្រជាជនទាំងឡាយ ត្រូវការរយៈពេលនៅក្នុងការសន្សំលុយ ដែលពួកគេបានចំណាយអំឡុងវិបត្តិសេដ្ឋកិច្ចពិភពលោកនេះ។

លោកស្រីបន្តថា“យ៉ាងហោចណាស់កន្លះឆ្នាំទៅមួយឆ្នាំទៀត ទើបអ្នកទេសចរចាប់ផ្តើមវិស្សមកាលឡើងវិញ។ ទោះយ៉ាងណា ប្រទេសកម្ពុជាបានត្រៀមខ្លួន រួចជាស្រេចក្នុងការស្វាគមន៍ភ្ញៀវទេសចរបរទេស បន្ទាប់ពីស្ថានភាពត្រឡប់មករកភាពប្រក្រតីវិញ។

លើសពីនេះ លោកស្រីបញ្ជាក់ថា កម្ពុជាត្រូវការរៀបចំជាមុន នៅក្នុងការផ្តល់កញ្ចប់ទេសចរដ៏ទាក់ទាញ រួមជាមួយការផ្តល់ប្រូម៉ូសិន តម្លៃពិសេស និងផ្តល់ឱ្យនូវទស្សនីយភាពចម្រុះ រួមជាមួយទិសដៅអេកូទេសចរណ៍។

យោងតាមទិន្នន័យរបស់ក្រសួងទេសចរណ៍កម្ពុជាបានឱ្យដឹងថា កាលពីឆ្នាំមុន កម្ពុជាទទួលភ្ញៀវទេសចរបរទេសប្រមាណ ៦.៦លាននាក់ ដែលក្នុងនោះមានភ្ញៀវទេសចរចិនច្រើនជាងគេ។ នៅត្រឹមរយៈពេល២ខែ ឆ្នាំ ២០២០នេះ ប្រទេសកម្ពុជាស្វាគមន៍បានភ្ញៀវទេសចរបរទេសប្រមាណជាង៩សែននាក់។

ជំងឺ Covid-19 បានធ្វើឱ្យប៉ះពាល់ដល់បុគ្គលិក បម្រើការលើវិស័យទេសចរណ៍ប្រមាណ៦សែននាក់ ហើយក្នុងនោះមានប្រមាណ៣ម៉ឺននាក់ កំពុងគ្មានការងារធ្វើនៅពេលបច្ចុប្បន្ន៕

(Vietnam Plus)

សេដ្ឋកិច្ចវិទូ៖ សេដ្ឋកិច្ចនៅបស្ចិមប្រទេសមើលស្រាលចំពោះវិបត្តិជំងឺ Covid-19

ដោយ ប៊ី

អន្តរជាតិៈ អតីតប្រធានសេដ្ឋវិទូរបស់ IMF និយាយថា ជំងឺ Covid-19 នេះត្រូវបានមើលស្រាលជាងដោយសេដ្ឋកិច្ច នៅបស្ចិមប្រទេសបើប្រៀបធៀបនឹងទ្វីបអាស៊ី។

លោក Raghuram Rajan បាននិយាយថា សេដ្ឋកិច្ចលោកខាងលិច កំពុងប្រឈមនឹងការធ្លាក់ចុះនៃកំណើនសេដ្ឋកិច្ច ៦ភាគរយនៅឆ្នាំនេះ។

ការបិទអាជីវកម្មដែលកំពុងរីករាលដាល កំពុងមានឥទ្ធិពលហិរញ្ញវត្ថុយ៉ាងខ្លាំង នៅពេលដែលរដ្ឋាភិបាលរារាំងការរីករាលដាលនៃមេរោគ។

ការអត្ថាធិប្បាយរបស់លោកធ្វើឡើង នៅពេលដែល IMF ព្រមានដល់សេដ្ឋកិច្ចពិភពលោកប្រឈមមុខ នឹងវិបត្តិដ៏អាក្រក់បំផុត ចាប់តាំងពីការធ្លាក់ទឹកចិត្តនៅទសវត្សឆ្នាំ ១៩៣០ ។

លោក Rajan បានប្រាប់លោក Karishma Vaswani សំរាប់របាយការណ៍ធុរកិច្ចអាស៊ីរបស់ BBC ថា “ខ្ញុំគិតថានៅភាគខាងលិចមួយផ្នែក ដោយសារតែមិនមានបទពិសោធន៍ផ្ទាល់នៃការរីករាលដាលធ្ងន់ធ្ងរ វាត្រូវបានគេមើលស្រាល។ លោកបានបន្តថា “នេះជាអ្វីដែលកំពុងកើតឡើង នៅប្រទេសឆ្ងាយ វានឹងមិនធ្ងន់ធ្ងរទេនៅទីនេះ។

លោកបានថ្លែងថា វាងាយស្រួលណាស់ក្នុងការចង្អុលម្រាមដៃ បន្ទាប់ពីការពិត ប៉ុន្តែអ្វីដែលខ្ញុំកំពុងនិយាយគឺថា បណ្តាប្រទេសនៅអាស៊ីបូព៌ា ដែលមានបទពិសោធន៍នៃជំងឺរាតត្បាតពីមុន ដែលមិនបានកើនឡើងដល់កម្រិត នៃការរាតត្បាតដែលខ្ញុំគួរតែនិយាយនោះទេ ប៉ុន្តែរោគរាតត្បាតមុនពួកគេបានប្រកាន់ខ្ជាប់នូវសិទ្ធិនេះ ពីការទទួលបានជោគជ័យ។

លោក Rajan អតីតទេសាភិបាលធនាគារកណ្តាលឥណ្ឌា បានកោតសរសើរកូរ៉េខាងត្បូង និងសឹង្ហបូរីថាជាសេដ្ឋកិច្ចអាស៊ីពីរ ដែលបានដោះស្រាយការរីករាលដាលនៃជំងឺនេះ៕

កម្ពុជា និងជប៉ុនសម្រេចបានទំហំពាណិជ្ជកម្មទ្វេភាគីតម្លៃ ៣៦៦លានដុល្លារក្នុងរយៈពេលពីរខែដំបូងនៃឆ្នាំនេះ

ដោយ ប៊ី

ភ្នំពេញៈ ពាណិជ្ជកម្មទ្វេភាគីរវាងកម្ពុជា និងជប៉ុនមានតម្លៃ៣៦៦ លានដុល្លារក្នុងរយៈពេលពីរខែដំបូងនៃឆ្នាំនេះ កើនឡើង៣,៩ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។

របាយការណ៍ពីអង្គការពាណិជ្ជកម្មក្រៅប្រទេសជប៉ុន (JETRO) បានបង្ហាញថា ចាប់ពីខែមករាដល់ ខែកុម្ភៈឆ្នាំ២០២០ ប្រទេសកម្ពុជាបាននាំចេញទំនិញ មានតម្លៃ២៩៦ លានដុល្លារទៅជប៉ុន កើនឡើង២,៤ភាគរយ។

ជាមួយគ្នានេះដែរ ការនាំចូលរបស់កម្ពុជាពីប្រទេសជប៉ុន មានចំនួន៧០លានដុល្លារកើនឡើង១០,៨ ភាគរយ។

លោកស្រីជា គឹមថា អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍កាលពីពេលថ្មីៗនេះថា សកម្មភាពពាណិជ្ជកម្ម រវាងប្រទេសទាំងពីរនៅឆ្នាំនេះ នឹងមានច្រើន។

លោកស្រីបាននិយាយថា “កាលពីឆ្នាំមុនពាណិជ្ជកម្មទ្វេភាគី បានកើនលើស២ពាន់លានដុល្លារ ហើយសម្រាបឆ្នាំ២០២០ ប្រទេសទាំងពីរបានសន្យាថា នឹងសម្រេចឱ្យបានយ៉ាងហោចណាស់២ពាន់លានដុល្លារ។

លោកស្រីបានមានប្រសាសន៍ថា “មន្ត្រីប្តេជ្ញាពង្រីកពាណិជ្ជកម្ម និងការវិនិយោគរវាងប្រទេសទាំងពីរ និងបានព្រមព្រៀងជំរុញស្ថាប័នពាក់ព័ន្ធ ឱ្យធ្វើការយ៉ាងជិតស្និទ្ធជាមួយគ្នា ដើម្បីកែលំអបរិយាកាសវិនិយោគនៅកម្ពុជា ក្នុងការទាក់ទាញវិនិយោគិនជប៉ុនឱ្យកាន់តែច្រើន។

លោកស្រីគឹមថាបានថ្លែងថា មន្ត្រីកម្ពុជាបានទទួលស្គាល់តួនាទី ដ៏សកម្មរបស់ប្រទេសជប៉ុន ដែលកំពុងដើរតួនៅក្នុងការអភិវឌ្ឍសេដ្ឋកិច្ច សង្គមរបស់ប្រទេសកម្ពុជា និងបានថ្លែងអំណរគុណ ចំពោះការគាំទ្ររបស់ខ្លួន នៅក្នុងវិស័យមួយចំនួន។

លោកស្រីបានមានប្រសាសន៍ថា “ភាគីជប៉ុនបានបញ្ជាក់ជាថ្មី ពីការប្តេជ្ញាចិត្តរបស់ខ្លួនក្នុងការបន្តជួយដល់ប្រទេសកម្ពុជា ជាពិសេសនៅក្នុងវិស័យអាទិភាព ដូចជាផ្នែកភស្តុភារហេដ្ឋារចនាសម្ព័ន្ធ ឧស្សាហកម្ម និងការកសាងសមត្ថភាពមនុស្ស។

តួលេខពីក្រសួងពាណិជ្ជកម្មបានបង្ហាញថា ផលិតផលសក្តានុពលសម្រាប់ការនាំចេញពីកម្ពុជាទៅជប៉ុន ដូចជាសម្លៀកបំពាក់ ស្បែកជើង និងគ្រឿងអេឡិចត្រូនិច។

នៅឆ្នាំ២០១៩ ពាណិជ្ជកម្មទ្វេរភាគី រវាងប្រទេសទាំងពីរបានកើនឡើង ១៣ភាគរយពីមួយឆ្នាំមុនដល់២,២៩២លានដុល្លារអាមេរិក៕

កម្ពុជានៅតែទទួលបានគម្រោងវិនិយោគលើវិស័យអចលនទ្រព្យក្រោម ១លានដុល្លារ

ដោយ វុត្ថា

ភ្នំពេញ៖ អ្នកជំនាញបានលើកឡើងថា បើទោះបីកម្ពុជាកំពុងប្រយុទ្ធប្រឆាំងទៅនឹងជំងឺ Covid-19 ដែលកំពុងរីករាលដាលជាសកលនាពេលនេះ តែកម្ពុជានៅតែទទួលបានគម្រោងវិនិយោគក្នុងស្រុក លើវិស័យអចលនទ្រព្យក្រោម១លានដុល្លារអាមេរិក។

នាយិការប្រចាំប្រទេសក្រុមហ៊ុន CBRE Cambodia លោកស្រី អាន សុធីតាបានប្រាប់គេហទំព័រ propertyarea.asia កាលពីពេលថ្មីៗនេះថា បើមើលពីស្ថានភាពជាក់ស្តែងហាក់មានស្ថានភាពស្ងប់ស្ងាត់ តែយ៉ាងណាស្ថិតនៅក្នុងស្ថានភាពនេះ ក៏កម្ពុជានៅតែទទួលបានគម្រោងវិនិយោគ ក្នុងតម្លៃ១លានដុល្លារអាមេរិក តែមិនច្រើនោះទេ។

លោកស្រីបន្តថា “ការវិនិយោគនៅក្នុងស្រុកនៅតែមានមួយៗ ស្ថិតនៅក្នុងទំហំវិនិយោគ ដែលមានតម្លៃកន្លះលានដុល្លារអាមេរិក តែបើការវិនិយោគមកពីក្រៅស្រុកវិញ គឺមិនមាននោះទេ ដោយសារវិនិយោគិន មានការព្រួយបារម្ភពីការឆ្លងជំងឺ Covid-19 ដែលកំពុងមានការរីករាលជាសកល។ ម្យ៉ាទៀតគម្រោងវិយោគចាប់ ២ ទៅ៣លានដុល្លារអាមេរិក គឺមិនមាននោះទេ។

លោកស្រីអាន សុធីតាបន្ថែមទៀតថា គម្រោងវិនិយោគធំៗទាំងអស់ មកពីក្រៅប្រទេស ត្រូវបានពន្យាពេលរហូតមកដល់ពេលនេះ បើទោះបីកម្ពុជាមិនទាន់មានអ្នកឆ្លងជំងឺ Covid-19 មានចំនួនច្រើនយ៉ាងណាក្តី តែ សម្រាប់ស្ថានភាពនៅក្នុងពិភពលោកក៏ពុងជួបនូវវិបត្តិយ៉ាងធ្ងន់ធ្ងរ ទាំងសេដ្ឋកិច្ច និងវិនិយោគ។

លោកស្រីបន្តថា គម្រោងមួយៗក្រោម១លានដុល្លារអាមេរិក ដែលកម្ពុជាទទួលបាននៅពេលនេះ គម្រោងវិនិយោគលើវិស័យលំនៅដ្ឋាន ខុនដូ និងដីធ្លីជាដើម។ យ៉ាងណាលោកស្រីរំពឹងថា ក្រោយពីស្ថានភាពនៃជំងឺ Covid-19 ស្ងប់ស្ងាត់ និងធូរស្រាលឡើងវិញ គម្រោងវិនិយោគវិនិយោគជាច្រើននឹងចាប់ផ្តើមពុះគជ្រោលឡើងវិញ។

អ្នកនាំពាក្យក្រសួងក្រសួងរៀបចំដែនដី នគរូបនីយកម្ម និងសំណង់ លោកសេង ឡូត ធ្លាប់បានអះអាងដែរថា ក្នុងត្រីមាសទី១ ឆ្នាំ២០២០កន្លងកមកនេះ កម្ពុជានៅតែទទួលបានគម្រោងវិនិយោគ លើវិស័យសំណង់ និងអចលនទ្រព្យជាហូរហែរ បើទោះបីកពិភពលោកកំពុងទទួលរងនូវផលប៉ះពាល់ ដោយសារសារការរីករាលដាលជាសកលនៃជំងឺ Covid- 19 ។

លោកបន្តថា “យើងនិយាយទៅហាក់បីដូចជាគេមិនជឿ តែសំណើរនៅតែមានការកើនឡើង។ នេះបើពិនិត្យទៅលើការស្នើសុំសាងសង់ តែយើងមិនទាន់បានទៅពិនិត្យជាក់ស្តែងនៃសាងសង់ថាយ៉ាងម៉េចនៅឡើយទេ។ លោកបន្ថែមថា “គម្រោងដែលគេស្នើសុំសាងសង់ មានទាំងបុរី អគារខ្ពស់ លំនៅឋាន រោងចក្រ និងអាគារស្នាក់នៅរួមជាដើម ហើយបើពិនិត្យមើលជាក់ស្តែង មានកំណើនខ្ពស់ បើធៀបទៅនឹងឆ្នាំ២០១៩ តែខ្ញុំមិនចាំភាគរយទេ តែមានកំណើនខ្ពស់។

លោកសេង ឡូត បន្ថែមថា យើងមិនទាន់ដឹងថាទៅមុខទៀត វាយ៉ាងមិចនោះទេ តែយើងរង់់ចាំមើលទាំងអស់គ្នា។ តែលោកថាជារួមមិនថានៅតែស្រុកយើងនោះទេ នៅស្រុកគេក៏ទទួលរងនូវផលប៉ះពាល់អវិជ្ជមាន ពីបញ្ហាឆ្លងនៃជំងឺ Covid-19 នេះដែរ។ ចឹងទេ យើងរងចាំមើលស្ថានភាពនេះ ទាំងអស់គ្នាតទៅមុខទៀត។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បង្ហាញថា តម្លៃទំហំទុនវិនិយោគវិស័យសំណង់ ទូទាំងប្រទេសនៅឆ្នាំ២០១៩ មានតម្លៃសរុបប្រមាណជាង១១ពាន់លានដុល្លារអាមេរិក ដោយបានកើនឡើងជាង៧៨ភារគរយ ធៀបនឹងរយៈពេលដូចគ្នាឆ្នាំ២០១៨ ។

របាយការណ៍ដដែលបន្តថា ការកើនឡើងនៃទំហំវិនិយោគ ក៏ដូចជាគម្រោងវិនិយោគលើវិស័យសំណង់ក្នុងឆ្នាំ២០១៩ ដោយសារតែមានគម្រោងសាងសង់ជាច្រើន រួមមានអគារពាណិជ្ជកម្មចម្រុះ សណ្ឋាគារ រមណីយដ្ឋាន ក្លឹបកម្សាន្ដ គម្រោងសាងសង់ផ្សារទំនើប អគារការិយាល័យ សំណង់អគារស្នាក់នៅរួមខ្ពស់ៗ សំណង់លំនៅដ្ឋានជាលក្ខណៈបុរី សំណង់អគាររោងចក្រឧស្សាហកម្មកាត់ដេរ និងស្បែកជើង និងគម្រោងអភិវឌ្ឍន៍តំបន់សេដ្ឋកិច្ចពិសេស៕

ចំណេះដឹង! ដូចម្តេចដែលហៅថាគោលនយោបាយសារពើពន្ធ?

ដោយ វុត្ថា

ភ្នំពេញៈ គោលនយោបាយសារពើពន្ធ សំដៅលើការយកពន្ធ និងវិធីរកចំណូលផ្សេងៗទៀត និងចំណាយរបស់រដ្ឋ ដោយបែងចែកធនធានសេដ្ឋកិច្ច ក្នុងគោលបំណងជំរុញឲ្យមានកំណើនសេដ្ឋកិច្ចប្រកបដោយចីរភាពនិងសមធម៌។

យោងតាមឯកសាររបស់អគ្គនាយកដ្ឋានពន្ធដារបានឱ្យដឹងថា ដើម្បីលើកកម្ពស់ប្រសិទ្ធភាពគោលនយោបាយសារពើពន្ធរដ្ឋ ត្រូវអនុវត្តសកម្មភាពសំខាន់ៗដូចជា ១. ប្រសិទ្ធភាពនៃការគ្រប់គ្រង និងគៀងគរចំណូល។ ២ ការធ្វើវិចារណៈកម្មចំណាយ គឺបែងចែកចំណាយថវិការដ្ឋរវាងការប្រើប្រាស់ និងការវិនិយោគសាធារណៈឲ្យបានសមស្រប

គោលនយោបាយសារពើពន្ធរបស់ប្រទេសនីមួយៗ គួរតែមានគោលដៅជាគោលការណ៍ចំនួនបួនគឺ៖ (១) ការបែងចែកធនធាន (២) ស្ថេរភាពវូបនីយកម្ម (៣)កំណើន (៤) ការបែងចែកនៃប្រាក់ចំណូលនៃទ្រព្យសម្បត្តិឲ្យស្មើគ្នា។

តាមរយៈពន្ធ និងចំណាយសាធារណៈរដ្ឋាភិបាល បានដើតួនាទីសំខាន់ក្នុងការបែងចែក បណ្តាធនធាននៅក្នុងសេដ្ឋកិច្ច និងជំរុញខ្សែសង្វាក់ផលិតកម្មឲ្យកើនឬមិនកើនឡើង៕

កម្ពុជាអនុម័តគម្រោងវិនិយោគរោងចក្រចំនួន ៤ មានទុនជាង ១៣ លានដុល្លារ

ដោយវុត្ថា

ភ្នំពេញ៖ រដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគលើរោងចក្រចំនួន ៤ ដែលមានទុនវិនិយោគសរុបប្រមាណ ១៣,៩ លានដុល្លារអាមេរិក និងផ្តល់ឱកាសការងារជូនពលរដ្ឋកម្ពុជាច្រើនកន្លែង បើទោះបីកម្ពុជាកំពុងប្រយុទ្ធប្រឆាំងទៅនឹងជំងឺCovid-19 ក៏ដោយ។

យោងតាមក្រុមប្រឹក្សាអភិវឌ្ឍន៍កម្ពុជាបានឱ្យដឹងនៅថ្ងៃទី ១០ ខែមេសា ឆ្នាំ ២០២០ នេះ ឱ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១-“WORLD BEST FEATHER CO., LTD.” គម្រោងបង្កើតរោងចក្រផលិតសំឡីពីរោមសត្វ ដែលមានទីតាំងវិនិយោគស្ថិតនៅភូមិពោធិរោងលិច ឃុំកោងកាង ស្រុកពញាក្រែក ខេត្តត្បូងឃ្មុំ មានទុនវិនិយោគប្រមាណ ២,១លានដុល្លារអាមេរិក និងអាចបង្កើតការងារបានចំនួន ២៨១កន្លែង។

២-“HUA WU GARMENT (CAMBODIA) CO., LTD.”គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវព្រៃស ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣,១លានដុល្លារអាមេរិក និងអាចបង្កើតការងារបានចំនួន ១.២២០កន្លែង។

៣-“BAO HAO CHANG PACKING CO., LTD.” គម្រោងបង្កើតរោងចក្រផលិតកេសកាតុងនិងសម្ភារៈវេចខ្ចប់គ្រប់ប្រភេទ ដែលមានទីតាំងវិនិយោគស្ថិតនៅភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ មានទុនវិនិយោគប្រមាណ ៣,៥លានដុល្លារអាមេរិក និងអាចបង្កើតការងារបានចំនួន ១៦៦កន្លែង។

៤-“T.S SPORT (CAMBODIA) CO., LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិឯកភាព ឃុំខ្ចុំត្រាំង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៥,២លានដុល្លារអាមេរិក និងអាចបង្កើតការងារបានចំនួន ១.៦៤៨កន្លែង៕

លំនៅដ្ឋានប្រកបអាជីវកម្ម មានទីតាំងល្អ តម្លៃសមរម្យជាមួយនឹងប្រូម៉ូសិនមិនធ្លាប់មានក្នុងឱកាសចូលឆ្នាំខ្មែរ

ដោយ ហ្សូលី

ភ្នំពេញ៖ គេហដ្ឋានដែលមានទីតាំងសមប្រកបល្អ អាចប្រកបអាជីវកម្មនិងជំនួញបានគ្រប់ប្រភេទ អមជាមួយបរិយាកាសស្រស់ស្រាយ ស្ថិតនៅក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ គឺបុរីអូរ៉ូរ៉ា ស៊ីធី ដែលមានការផ្តល់ជូនប្រូម៉ូសិនពិសេសមិនធ្លាប់មានដល់អតិថិជនដែលមានបំណងចង់ជាវលំនៅដ្ឋានទាន់សម័យ។

នៅក្នុងឱកាសចូលឆ្នាំប្រពៃណីជាតិខ្មែរខាងមុខនេះ បុរីអូរ៉ូរ៉ាស៊ីធី Aurora City បានរៀបចំប្រូម៉ូសិនដ៏ពិសេសមិនធ្លាប់មានពីមុនមកជូនដល់អតិថិជន ដោយគ្រាន់តែលោកអ្នកជាវគេហដ្ឋានប្រកបអាជីវកម្មទាំងនៅគម្រោងក្រាំងធ្នង់ និងគម្រោងផ្លូវជាតិលេខ ៥១ ដោយធ្វើការបង់ផ្តាច់ នោះអតិថិជននឹងទទួលបានការបញ្ចុះតម្លៃយ៉ាងច្រើនសន្ធឹកសន្ធាប់ចំនួន ៩ភាគរយ ភ្លាមៗ។

លើសពីនេះ សម្រាប់អតិថិជន ៥ រូបដំបូង ដែលមកជាវលំនៅដ្ឋានប្រណិតបានមុនគេនៅគម្រោងក្រាំងធ្នង់ បុរីអូរ៉ូរ៉ាស៊ីធឺ នឹងមានការផ្តល់ជូនសម្ភារៈទំនើបដូចជា ម៉ាស៊ីនត្រជាក់ចំនួន ៤គ្រឿង ទូរទឹកកកចំនួន ១ គ្រឿង និង ម៉ាស៊ីនបោកខោអាវចំនួន ១ គ្រឿងផងដែរ។ នេះគឺជាឱកាសពិសេសដែលលោកអ្នកមានបំណងចង់ជាវគេហដ្ឋានសម្រាប់រស់នៅបានផង ប្រកបអាជីវកម្មបានផង និងកាន់តែពិសេសនោះទទួលបានអត្ថប្រយោជន៍ការបញ្ចុះតម្លៃមហាសាល។

បុរីអូរ៉ូរ៉ាស៊ីធី គម្រោងក្រាំងធ្នង់មានបណ្តាញផ្លូវជាច្រើន ងាយស្រួល ចេញចូលក្រុង មានផ្សារទំនើបជាច្រើននៅព័ទ្ធជុំវិញដូចជា ផ្សារទំនើប AEON2 ផ្សារទំនើប GLOBAL ផ្សារជីពម៉ុង ផ្សារMAKRO ផ្សារCentury Plaza ជាដើម។ មិនត្រឹមតែមានទីតាំងល្អមួយមុខប៉ុណ្ណោះទេ គុណភាពសំណង់រឹងមាំ សាងសង់តាមស្តង់ដាលក្ខណៈបច្ចេកទេសសំណង់ រួមជាមួយរចនាបថបែបប្រទេសអូស្រ្តាលី សាកសមសម្រាប់មនុស្សសម័យថ្មី។

រីឯបុរីអូរ៉ូរ៉ាស៊ីធី គម្រោងឧត្តុង្គ ផ្លូវជាតិលេខ ៥១វិញ មានទីតាំងស្ថិតនៅបណ្តោយផ្លូវជាតិលេខ ៥១ ហ៊ុមព័ទ្ធទៅដោយរោងចក្រ សហគ្រាស និងមានគម្រោងអភិវឌ្ឍជាច្រើននៅជុំវិញតំបន់។
ទន្ទឹមនេះ លោកអ្នកអាចទិញសម្រាប់វិនិយោគ ទុកទទួលបានផលចំណេញច្រើននៅថ្ងៃក្រោយបានផងដែរ ព្រោះបុរីអូរ៉ូរ៉ាស៊ីធី មានទីតាំងមានសក្តានុពលខ្ពស់ គុណភាពសំណង់រឹងមាំ និងរចនាបថទាន់សម័យ។

បុរី អូរ៉ូរ៉ាស៊ីធី បានរៀបចំប័ណ្ណកម្មសិទ្ធគ្រប់ផ្ទះទាំងអស់ ដែលនេះជាការយកចិត្តទុកដាក់និងផ្តល់ទំនុកចិត្តដល់អតិថិជន។ គ្រប់លំនៅដ្ឋាននៅក្នុងគម្រោងអូរ៉ូរ៉ាស៊ីធី ក្រាំងធ្នង់ មានកម្ពស់៣ជាន់កន្លះ ទំហំចាប់ពី៤,៥ ម៉ែត្រ x ១៤ ម៉ែត្រ, ៤,៥ ម៉ែត្រx១៦ ម៉ែត្រ, ៤,៥ ម៉ែត្រ x ១៨ ម៉ែត្រ, ៥,៥ ម៉ែត្រ x ១៦ម៉ែត្រ ដោយផ្ទះនីមួយៗ មានបន្ទប់គេង ចំនួន៤ បន្ទប់ទទួលភ្ញៀវចំនួន១ បន្ទប់ទឹកចំនួន៥ និងទីកន្លែងអង្គុយទទួលទានអាហារលក្ខណៈគ្រួសារនៅជាន់លំហរ ដ៏ទូលាយមួយទៀត។

លោកអ្នកអាចអញ្ជើញមកទស្សនាការដ្ឋានផ្ទាល់ដែលមានទីតាំងដូចបានជម្រាបជូនខាងលើ និងទំនាក់ទំនងដើម្បីសាកសួរព័ត៌មានបន្ថែមតាមរយៈលេខទូរសព្ទ៖ 012 222 016/ 017 222 069/ 017 222 099៕

កម្ពុជាកំពុងសិក្សាពីលទ្ធភាពប្រើកម្មវិធីប្រព័ន្ធទូរស័ព្ទ ស្វែងរក និងកំណត់រោគសញ្ញាជំងឺ Covid-19

ដោយ ៖ រ៉ាណេត

ភ្នំពេញ ៖ មន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍ បានជួបពិភាក្សាការងារជាមួយប្រតិបត្តិករ អំពីការប្រើប្រាស់កម្មវិធីស្វែងរក និងកំណត់រោគសញ្ញាជំងឺ Covid-19 តាមប្រព័ន្ធទូរស័ព្ទដៃនៅកម្ពុជា។

រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត នៅថ្ងៃទី១០ ខែមេសា ឆ្នាំ២០២០ នេះ នៅទីស្តីការក្រសួងបានទទួលជួបពិភាក្សាការងារជាមួយប្រតិបត្តិករទូរស័ព្ទទាំងអស់នៅកម្ពុជា ដើម្បីពិភាក្សា និងដាក់ឱ្យអនុវត្តកម្មវិធីស្វែងរក និងកំណត់រោគសញ្ញាជំងឺ covid-19 តាមប្រព័ន្ធទូរស័ព្ទ និងជំរុញថ្នាក់ដឹកនាំប្រតិបត្តិករទូរស័ព្ទទាំងអស់ឱ្យចូលរួម។

លោករដ្ឋមន្ត្រី បានលើកឡើងថា ដោយមានកិច្ចសហការរវាងក្រសួងសុខាភិបាល និងប្រតិបត្តិករទូរស័ព្ទ ក្រសួងប្រៃសណីយ៍ និងទូរគមនាគមន៍ បង្កើតកម្មវិធីគ្រប់គ្រងការហៅចូលទូរស័ព្ទទាន់ហេតុការណ៍អំពីជំងឺ Covid-19 ដើម្បីបំពេញតួនាទីបន្ថែមឱ្យទូរស័ព្ទទាន់ហេតុការណ៍លេខ ១១៥ ក្នុងករណីមានចំនួនការហៅចូលច្រើនក្នុងពេលតែមួយលើសបរិមាណដែលអាចទទួលការហៅចូលបាន។ កម្មវិធីនេះនឹងប្រើសារសម្លេងដើម្បីធ្វើការឆ្លើយតបដោយស្វ័យប្រវត្តិ និងអន្តរកម្ម (Interactive Conversation) ទៅតាមស្ថានភាពសុខភាពរបស់អ្នកទូរស័ព្ទចូលថា “អាចជាករណីសង្ស័យអ្នកមានផ្ទុកមេរោគ Covid-19” ឬទេ ទៅតាមរោគសញ្ញាដែលកំណត់ដោយក្រសួងសុខាភិបាល និងអង្គការសុខភាពពិភពលោក។

លោកបានបន្តឱ្យដឹងទៀតថា ក្នុងករណីអ្នកទូរស័ព្ទចូលមានករណីសង្ស័យថាអាចផ្ទុកមេរោគ Covid-19 បុគ្គលិកក្រសួងសុខាភិបាលនឹងធ្វើការទាក់ទងទៅវិញដើម្បីស្វែងយល់បន្ថែមឈានទៅចាត់វិធានការបានទាន់ពេលវេលា។ នៅជំហានបន្ទាប់ ក្រសួងប្រៃសណីយ៍និងទូរគមនាគមន៍ ដាក់ចេញឱ្យប្រើប្រាស់ដោយឥតគិតថ្លៃនូវកម្មវិធីផ្តល់ព័ត៌មានទាន់ហេតុការណ៍ (Camalert) និងកម្មវិធីឆ្លើយតបវៃឆ្លាតដោយស្វ័យប្រវត្តិតាមប្រភេទសំណួរ (Chatbot) ផងដែរ។

នេះគឺជា គំនិតច្នៃប្រឌិតថ្មីមួយទៀតរបស់មន្ត្រីក្រសួង ក្រោមកិច្ចចូលរួមសហការពីសំណាក់បណ្តាប្រតិបត្តិករទាំងអស់ដែលតែងចូលរួមយ៉ាងសកម្មជាមួយរាជរដ្ឋាភិបាលក្នុងការប្រយុទ្ធប្រឆាំងនឹងជំងឺ Covid-19 នៅកម្ពុជា៕

មន្ត្រីជាន់ខ្ពស់ចិន អះអាងថា ចិនបានត្រៀមខ្លួនរួចជាស្រេចដើម្បីជួយដល់កម្ពុជា

ដោយ ៖ រ៉ាណេត

ភ្នំពេញ ៖ មន្ត្រីជាន់ខ្ពស់នៃមហាមិត្តចិនបានអះអាងថា រដ្ឋាភិបាលនៃប្រទេសចិនបានខ្លួនបានត្រៀមរួចជាស្រេច ក្នុងការបន្តជួយដល់រាជរដ្ឋាភិបាលកម្ពុជាតាមតម្រូវការ ដើម្បីប្រយុទ្ធប្រឆាំងនឹងជំងឺ Covid-19 រហូតដល់ជំងឺមួយនេះអាចត្រូវទប់ស្កាត់បានដោយជោគជ័យទាំងស្រុង។

តាមគេហទំព័រផ្លូវការណ៍របស់ស្ថានទូតចិនប្រចាំនៅកម្ពុជា លោក Zhao Lijian អ្នកនាំពាក្យក្រសួងការបរទេសចិនបានបញ្ជាក់យ៉ាងដូច្នេះថា បច្ចុប្បន្ននេះ រដ្ឋាភិបាលចិន បានត្រៀមខ្លួនជាស្រេចដើម្បីបន្តផ្តល់ការគាំទ្រ និងជំនួយជាអតិបរិមាដល់មិត្តកម្ពុជា ប្រសិនបើមានតម្រូវការកើតឡើង ដើម្បីទាំងអស់គ្នាទទួលបានជ័យជម្នះ ក្នុងការប្រយុទ្ធប្រឆាំងនឹង Covid-19 ក្នុងពេលឆាប់ៗនេះ។

អ្នកនាំពាក្យរូបនេះ ក៏បានបញ្ជាក់ផងដែរថា ក្រុមគ្រូពេទ្យពេទ្យជំនាញចិន ដែលទើបបញ្ចប់បេសកកម្មការងារនៅកម្ពុជា ក្នុងការប្រយុទ្ធប្រឆាំងនឹងជំងឺ Covid-19 និងទើបតែបានត្រឡប់ទៅកាន់ប្រទេសចិន កាលពីដើមសប្ដាហ៍កន្លងទៅនេះដុទ្ធតែត្រូវបានរៀបចំឡើងដោយគណៈកម្មការសុខភាពជាតិ (The National Health Commission) រួមមានទាំង អ្នកជំនាញដែលត្រូវបានជ្រើសរើស ដោយគណៈកម្មការសុខាភិបាល នៃតំបន់ស្វយ័តក្វាងស៉ី (The health commission of Guangxi Zhuang Autonomous Region) ក្រោមការយកចិត្តទុកដាក់ពីរដ្ឋាភិបាលចិន។

លោកបានបន្តថា នៅកម្ពុជាក្រុមអ្នកជំនាញទាំងអស់នេះបានធ្វើការប្រយុទ្ធប្រឆាំងនឹងមេរោគនេះ Covid-19 រាល់ថ្ងៃ។ ពួកគេបានធ្វើទស្សនកិច្ចនៅមន្ទីរពេទ្យ សហគមន៍ អាកាសយានដ្ឋាន សណ្ឋាគារ និងសួនឧស្សាហកម្ម ហើយក៏បានផ្តល់យោបល់ដល់ភាគីកម្ពុជា និងចែករំលែកបទពិសោធន៍របស់ពួកគេ ក្នុងការធ្វើរោគវិនិច្ឆ័យ និងព្យាបាលជំងឺ។ ក្រៅពីនេះអ្នកជំនាញចិន ក៏បានផ្តល់ការណែនាំ និងជំនួយផ្នែកវេជ្ជសាស្ត្រ ដល់ពលរដ្ឋចិននៅកម្ពុជាផងដែរ។

ជាមួយនឹងការយកចិត្តទុកដាក់លើការផ្តល់ជំនួយរបស់រដ្ឋាភិបាលចិនមកកាន់កម្ពុជា កាលពីថ្ងៃទី៩ ខែមេសា ឆ្នាំ២០២០ ម្សិលមិញនេះ មន្ត្រីតំណាងប្រទេសទាំងពិរក៏បានពិភាក្សា និងចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងចិន និងកម្ពុជា ជាគំនិតផ្តួចផ្តើមជាក់ស្ដែងដ៏ចម្បងនៃកុងសុងស៊ីរបស់ថ្នាក់ដឹកនាំទាំងពីរប្រទេស វាមានសារសំខាន់ណាស់ក្នុងការបង្កើតទំនាក់ទំនងពាណិជ្ជកម្មទាំងពីរប្រទេសឲ្យកាន់តែស៊ីជម្រៅ អភិវឌ្ឍន៍ទំនាក់ទំនងកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយរវាងប្រទេសទាំងពីរ និងជួយជំរុញកិច្ចកសាងសហគមន៍ជោគវាសនារួមរវាងចិន និងកម្ពុជា៕