តម្លៃប្រេងចាប់ផ្តើមហក់ឡើងវិញ ខណៈផ្សារហ៊ុននៅអាស៊ីបានដាំក្បាលចុះ

ដោយ ប៊ី

ហុងកុងៈ ការឡើងថ្លៃប្រេងបានគាំទ្រដល់ផ្សារហ៊ុន ដែលរងផលប៉ះពាល់ការជួញដូរនៅអាស៊ីកាលពីថ្ងៃ អង្គារគឺ១ថ្ងៃ បន្ទាប់ទីផ្សារភាគហ៊ុនពិភពលោក បានរងផលប៉ះពាល់ខ្លាំងបំផុតក្នុងរយៈពេលជាង១ទសវត្សរ៍មកនេះ។

ផ្សារហ៊ុនពិភពលោកដូចជាផ្សារហ៊ុន Dow John នៅ Wall Street បានធ្លាក់ចុះជាង ២០០០ ពិន្ទុដែលធ្វើឱផ្អាកការជួញដូរជាបន្ទាន់។

តម្លៃប្រេងបានហក់ឡើងប្រហែល៦ភាគរយ បានឱ្យមានភាពធូរស្បើយខ្លះបានត្រឡប់មកវិញកាលពីថ្ងៃអង្គារកន្លងមកនេះ បន្ទាប់ពីការធ្លាក់ចុះ៣ភាគរយ ដែលរឿងអាក្រក់បំផុត ចាប់តាំងពីសង្គ្រាមនៅឈូងសមុទ្រពែរ្ស៍ក្នុងឆ្នាំ ១៩៩១។

ទោះបីយ៉ាងក៏ដោយ ផ្សារភាគហ៊ុនកាន់តែស្ងប់ស្ងាត់នៅទូទាំងអាស៊ី ហើយបន្តប្រែប្រួលខ្លះៗរហូតដល់ពេលព្រឹកថ្ងៃអង្គារ។

ទីផ្សារហ៊ុនហុងកុងបានកើនឡើង០,៣ភាគរយ ផ្សារហ៊ុននៅទីក្រុងស៊ីដនីកើន ១,២ ភាគរយ ហើយទីផ្សារហ៊ុននៅសិង្ហបុរីកើនឡើង១,៤ ភាគរយ និងផ្សារហ៊ុននៅហ្សាការតាកើនឡើង២,៤ភាគរយ។ ប៉ុន្តែផ្សារហ៊ុននៅទីក្រុងតូក្យូ បានបិទបញ្ចប់ជាមួយការធ្លាក់ចុះ១,៥ភាគរយ ទីក្រុងតៃប៉ិធ្លាក់ចុះ ១ ភាគរយ សេអ៊ូលធ្លាក់ចុះ ០,៣ ភាគរយ ទីក្រុង Wellington ធ្លាក់ចុះ ១,៣ ភាគរយ និងផ្សារហ៊ុនម៉ានីលបាត់បង់០,៧ ភាគរយ។

លោក Stephen Innes នៃក្រុមហ៊ុន AxiCorp បានព្រមានថា “ភាពស្លន់ស្លោនៅមិនទាន់បញ្ឈប់បាននៅឡើយទេ ដោយមានភ័ស្តុតាងច្បាស់ដែលថា ក្តីបារម្ភអំពីប្រេងឥន្ធនៈក្នុងប្រវត្តិសាស្ត្រកំពុងតែកើតឡើង”។លោកបានថ្លែងថា “ភាពទន់ខ្សោយខ្លាំងក្នុងទីផ្សារថាមពល កំពុងធ្លាក់ចុះយ៉ាងរហ័សនៅក្នុងការធ្លាក់ចុះ កាន់តែរីកធំនៅក្នុងទីផ្សារទំនិញ ឥណទានការប្រាក់ខ្ពស់ និងភាគហ៊ុន”។

លោកបន្ថែមថា ការឆ្លើយតបសារពើពន្ធកំពុងតែកែសម្រួលទាំងស្រុង មិនថារដ្ឋាភិបាលអាចឆ្លើយតបបានលឿនឬអត់នោះទេ អ្វីដែលពួកគេត្រូវធ្វើគឺកាត់បន្ថយការផលិត។

ការសង្ស័យកំពុងកើនឡើងដែរ ដែលថាធនាគារកណ្តាលអាមេរិក នឹងកាត់បន្ថយអត្រាការប្រាក់ជាថ្មីម្តងទៀត ដោយបានកាត់បន្ថយអត្រាប្រាក់កម្ចីកាលពីសប្តាហ៍មុន ខណៈធនាគារកណ្តាលអឺរ៉ុប គ្រោងជួបប្រជុំនៅសប្តាហ៍នេះ។ (AFP)៕

ចិនបង្ហាញអារម្មណ៍សោកសៅនិងមោទនភាពនៃការប្រយុទ្ធប្រឆាំងជំងឺCOVID-19

ដោយវុត្ថា

ភ្នំពេញ៖ ស្ថានទូតចិនប្រចាំនៅកម្ពុជា បានង្ហាញនូវអារម្មណ៍កថា នៃកម្រងរូបភាពស្តីអំពីការប្រយុទ្ធប្រឆាំង នឹងស្ថានភាពជម្ងឺរលាកសួត ដោយវីរុសកូរ៉ូណាប្រភេទថ្មី(COVID-19) ខណៈមកដល់ពេលនេះសម្រេចបានយ៉ាងត្រចះត្រចង់។

ស្ថានទូតបានសរសេរនៅថ្ងៃទី ១១ ខែមីនា នេះថា ផ្តើមឆ្នាំ២០២០ ជម្ងឺរលាកសួតដោយវីរុសកូរ៉ូណាប្រភេទថ្មី(COVID-19) ត្រូវបានផ្ទុះឡើងក្នុងទីក្រុងអ៊ូហាន់ នៃខេត្តហ៊ូប៉ី ប្រទេសចិន និងត្រូវបានរីករាលដាលយ៉ាងឆាប់រហ័សនៅក្នុងប្រទេសចិន ហើយរដ្ឋាភិបាលចិនបានយកចិត្តទុកដាក់ខ្ពស់ចំពោះបញ្ហានេះ។

ប្រធានាធិបតីចិន លោកXi Jinping បានអញ្ជើញដឹកនាំ និងចាត់ចែងដោយផ្ទាល់ និងលោកLi Keqiang នាយករដ្ឋមន្ត្រីចិនបានអញ្ជើញ ទៅដល់ទីក្រុងវូហានប្រទេសចិន ដើម្បីណែនាំអំពីរបៀបនៃការទប់ទល់ស្ថានភាពជម្ងឺវីរុស ក្រុមណែនាំនៃមជ្ឈិមបក្សកុម្មុយនីស្តចិន បានចូលរួមប្រយុទ្ធប្រឆាំងសកម្មភាពជួរមុខរយៈពេលវែង កម្លាំងជំរុញចូលរួម និងសម្ភារៈជាច្រើនទូទាំងប្រទេសចិន បានដឹកបញ្ជូន និងមានវត្តមាននៅក្នុងខេត្តហ៊ូប៉ី និងក្នុងទីក្រុងវូហាន ប្រទេសចិន។

យើងទាំងអស់គ្នាចំណាយពេលតែ១០ថ្ងៃប៉ុណ្ណោះ បានសាងសង់រួចជាស្ថានពរនូវមន្ទីរពេទ្យHUOSHENSHAN ដែលអាចផ្ទុកគ្រែបានចំនួន១០០០គ្រែ ហើយយើងចំណាយពេលតែ១២ថ្ងៃប៉ុណ្ណោះ បានសាងសង់រួចជាស្ថានពរនូវមន្ទីរពេទ្យLEISHENSHAN ដែលអាចផ្ទុកគ្រែបានចំនួន១៥០០គ្រែ Mobile Cabin Hospitals និងមន្ទីរពេទ្យកែច្នៃជាច្រើន ត្រូវបានបង្កើតពេញទូទាំងទីក្រុងវូហាន ប្រទេសចិន ហើយយើងតែងតែកែលម្អនូវសម្ទុះនៃល្បឿនចិន បានបង្កើតអច្ឆរិយៈនៃចិន និងបានបង្ហាញអំពីលក្ខណៈពិសេសនៃចិន។

អ្នកជំនាញពីជម្ងឺវីរុស គ្រូពេទ្យ និងមន្រ្តីយោធាជាច្រើនបានចូលរួម ក្នុងកិច្ចប្រយុទ្ធប្រឆាំងជួរមុខដោយមិនខ្លាចគ្រោះថ្នាក់ និងពោរពេញទៅដោយភាពអង់អាច និងក្លាហាន។ ពួកគេបានក្លាយជា“អ្នកជម្នះដ៏ស្រស់ស្អាត” ក្នុងអំឡុងពេលប្រយុទ្ធប្រឆាំងនឹងជម្ងឺវីរុសនេះ។ ពួកគេបានយកញើសឈាម ទឹកភ្នែក ថែមទាំងអាយុជីវិតរបស់ពួកគេផ្ទាល់ ដើម្បីចូលរួមកិច្ចការប្រយុទ្ធប្រឆាំង នឹងវីរុសដ៏សែនរំជួលចិត្តមួយនេះ។ បច្ចុប្បន្ននេះ ទម្រង់នៃការទប់ស្កាត់នឹងជម្ងឺវីរុសនេះ ត្រូវបានវិវឌ្ឍន៍ខ្លួនទៅកាន់ស្ថានភាពល្អប្រសើរ។

ភាគីចិនប្រកាន់ភ្ជាប់នូវគំនិតសហគមន៍ជោគវាសនារួម គោលការណ៍ចម្បងនៃការបើកចំហ តម្លាភាព និងទំនួលខុសត្រូវ ផ្សព្វផ្សាយយ៉ាងទូលាយស្តីអំពីដំណឹងនៃជម្ងឺវីរុសCOVID-19 ចែករំលែកលំដាប់នៃសែនរបស់វីរុស សហការយ៉ាងស្អិតរមួតជាមួយអង្គការសុខភាពពិភពលោក និងផ្តល់ជាជំនួយ និងជាភាពងាយស្រួល ជូនដល់ប្រជាពលរដ្ឋបរទេស ដែលកំពុងស្នាក់អាស្រ័យនៅក្នុងប្រទេសចិន។

ខណៈពេលនៃការទប់ស្កាត់ជម្ងឺវីរុសCOVID-19ក្នុងប្រទេសចិន ចិនក៏បានផ្តល់Detection reagent និងសម្ភារៈទប់ស្កាត់ជូនដល់ប្រទេសដទៃទៀត យើងក៏បានចែករំលែកអំពីរបៀបនៃការព្យាបាល និងបានបញ្ជូនអ្នកជំនាញស្ម័គ្រចិត្តទៅផងដែរ។

ចាប់តាំងពីមានការផ្ទុះឡើងនូវជម្ងឺCOVID-19នេះមក ខ្សែរាជវង្សានុវង្ស រាជរដ្ឋាភិបាលកម្ពុជាបានសួរសុខទុក្ខ និងគាំទ្រដល់ភាគីចិន ជាពិសេសនាថ្ងៃទី៥ ខែកុម្ភៈ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានបំពេញទស្សនកិច្ចជាបន្ទាន់នៅក្នុងប្រទេសចិន សម្តេចតេជោជាថ្នាក់ដឹកនាំបរទេសដំបូងគេ ដែលបានបំពេញទស្សនកិច្ចនៅក្នុងប្រទេសចិន ខណៈពេលដែលចិនកំពុងតែផ្ទុះយ៉ាងខ្លាំង នូវជម្ងឺវីរុសមួយនេះ។

សម្តេចតេជោបានយកសកម្មភាពជាក់ស្តែង មកបង្ហាញឲ្យឃើញពីអត្ថន័យចម្បងនៃសហគមន៍ជោគវាសនារួមដែល“ដកដង្ហើមរួមគ្នា រួមសុខទុក្ខជាមួយគ្នា”។

ក្រៅពីនេះ គ្រប់ស្ថាប័នសង្គមក្នុងប្រទេសកម្ពុជា បានចូលរួមផ្តល់ជំនួយជាថវិកានិងសម្ភារៈសប្បុរសធម៌ ជូនដល់ភាគីចិន នេះបានបញ្ជាក់ឲ្យឃើញពីមនោសញ្ចេតនាមិត្តភាពដ៏សែនជ្រាលជ្រៅបំផុត រវាងប្រជាជនទាំងពីរប្រទេស។ អាណិកជនចិន បងប្អូនសែស្រឡាយចិន និងក្រុមហ៊ុនសហគ្រាសចិន ដែលនៅក្នុងប្រទេសកម្ពុជា បានព្រួយបារម្ភអំពីស្ថានភាពប្រយុទ្ធប្រឆាំង នឹងជម្ងឺវីរុសនៅក្នុងប្រទេសចិន។ ពួកគេបានផ្ដល់ជាជំនួយថវិកា និងសម្ភារៈ ជូនដល់ប្រទេសចិនក្នុងកិច្ចប្រយុទ្ធប្រឆាំងលើកនេះ។

ក្នុងឱកាសនេះ យើងក៏បានជ្រើសរើសរូបភាពខ្លះៗ ដែលទាក់ទងជាមួយនឹងការប្រយុទ្ធប្រឆាំងនឹងជម្ងឺវីរុសCOVID-19 មកបង្ហាញជូនអ្នកទាំងអស់គ្នាឲ្យបានជ្រាប៕

គម្រោងបណ្ណាល័យប្រាសាក់ ចូលរួមបណ្តុះបញ្ញា ការស្រាវជ្រាវ និងនវានុវត្តន៍របស់សិស្សានុសិស្ស

ក្រៅពីផ្តល់ដំណោះស្រាយសេវាហិរញ្ញវត្ថុដែលផ្តល់នូវភាពរីកចម្រើន ប្រាសាក់ បានផ្តល់អគារនិងសម្ភារៈបរិក្ខារបណ្ណាល័យជូនដល់សិស្សានុសិស្ស ដើម្បីជាស្ពានក្នុងការបណ្តុះបញ្ញា ការស្រាវជ្រាវ និងនវានុវត្តន៍ សម្រាប់ពេលបច្ចុប្បន្ន និងអនាគតនៃអាជីពការងារ និងមុខរបររបស់ពួកគេ។

លោក សាយ សូនី នាយកប្រតិបត្តិរបស់ប្រាសាក់ បានឱ្យដឹងថា ប្រាសាក់ បានដាក់ចេញសកម្មភាពជាយុទ្ធសាស្រ្តលើការកសាងសមត្ថភាពសិស្សានុសិស្សនៅសាលារៀនតាមទីជនបទ ជាមួយក្រសួងអប់រំ យុវជន និងកីឡា តាមរយៈការសាងសង់អគារបណ្ណាល័យ បំពាក់សម្ភារៈបរិក្ខារ និងសៀវភៅ ព្រមទាំងការបណ្ដុះបណ្ដាលបណ្ណារក្ស។ មកដល់ពេលនេះ ប្រាសាក់ ផ្តល់អគារបណ្ណាល័យ 41 ខ្នង នៅតាមខេត្តចំនួន 13 ទូទាំងកម្ពុជា។

នាឱកាសទិវាជាតិអំណាន ថ្ងៃទី១១ មីនា នេះ លោក ក៏សូមឱ្យអគារបណ្ណាល័យដ៏ស្រស់ស្អាត ធំទូលាយ និងមានបរិយាកាសល្អទាំងនេះ ក្លាយជាឃ្លាំងទ្រព្យក្នុងការកសាងបញ្ញា ជាទីតាំងសម្រាប់សិក្សាស្រាវជ្រាវនិងនវានុវត្តន៍ និងចូលរួមចំណែកបណ្ដុះទម្លាប់អានរបស់សិស្សតាំងពីបឋមវ័យ។

ប្រាសាក់ នៅតែបន្តកិច្ចខិតខំប្រឹងប្រែងក្នុងការអនុវត្តគម្រោងបណ្ណាល័យនេះនៅសាលារៀននានាទូទាំង 25 ខេត្តរាជធានី ដើម្បីចូលរួមលើកកម្ពស់ធនធានមនុស្ស និងអភិវឌ្ឍសង្គមជាតិ។

អំពីប្រាសាក់ និងគម្រោងបណ្ណាល័យប្រាសាក់

ប្រាសាក់ ជាគ្រឹះស្ថានមីក្រូហិរញ្ញវត្ថុលំដាប់ទីមួយក្នុងវិស័យមីក្រូហិរញ្ញវត្ថុ និងជាស្ថាប័នមួយក្នុងចំណោមធនាគារធំៗទាំង 5 នៅកម្ពុជា ដោយផ្តល់សេវាហិរញ្ញវត្ថុជូនដល់អតិថិជន រួមមាន៖ សេវាឥណទាន ប្រាក់បញ្ញើសន្សំ ទូទាត់វិក្កយបត្រទឹក ទូទាត់វិក្កយបត្រភ្លើង សេវាហិរញ្ញវត្ថុឌីជីថល ផ្ទេរប្រាក់ ដកប្រាក់តាមម៉ាស៊ីនអេធីអឹមប្រាសាក់ទោះជាគ្មានប័ណ្ណអេធីអឹម ប្តូរប្រាក់ ទិញកាតទូរស័ព្ឬ បើកប្រាក់បៀវត្ស សេវាទូទាត់រហ័ស អេធីអឹម សេវាធនាគារចល័ត ម៉ាស៊ីនឆូតកាត ម៉ាស៊ីនដាក់ប្រាក់ សេវាខេមបូឌានស៊ែរស្វ៊ីច (CSS) សេវាទូទាត់ប្រព័ន្ធបាគង និងសេវាហិរញ្ញវត្ថុដទៃផ្សេងៗទៀត ជាមួយនឹងបណ្តាញការិយាល័យជិត 200 ទីតាំង ព្រមទាំងបុគ្គលិកជាង 9,000 នាក់។

តើការផ្តល់សេវាកម្មប្រឹក្សា វាយតម្លៃមានសារៈសំខាន់ដូចម្តេចសំរាប់វិស័យអចលនទ្រព្យ

ដោយគង់ សូរិយា

ភ្នំពេញៈ សេវាកម្មប្រឹក្សាយោបល់លើការទិញលក់ វាយតម្លៃ និងប្រឹក្សាលើវិនិយោគពិតជាមានសារៈសំខាន់ណាស់ ដែលអ្នកវិនិយោគជាតិ អន្តរជាតិតែងតែផ្តោតជាសំខាន់។

ដោយមើលឃើញសារៈសំខាន់ជាសក្តានុពល ក្រុមហ៊ុនCPA Property Co, Ltdបាននិងកំពុងផ្តោតលើសេវាកម្មនេះ ដោយក្រុមហ៊ុនមានបុគ្គលិកជំនាញដែលទទួលបានការបណ្តុះបណ្តាលពីមជ្ឈដ្ឋានជាតិ និងអន្តរជាតិ ដើម្បីផ្តល់សេវាកម្មប្រកបដោយទំនុកចិត្ត ស្មោះត្រង់ រួសរាយ រាក់ទាក់ដល់អតិថិជន ដែលត្រូវការសេវាកម្មនេះ។

នាយកប្រតិបត្តិក្រុមហ៊ុនCPA Property Co, Ltdលោកសន សំរេចភារៈបានមានប្រសាសន៍ឲ្យដឹងនាព្រឹកថ្ងៃទី១១ មិនានេះថា ដោយឆ្លងកាត់បទពិសោធន៍លើការងារនេះរយៈពេលប្រមាណ១០ឆ្នាំ និងធ្លាប់ទទួលបានការបណ្តុះបណ្តាលពីក្នុង និងក្រៅប្រទេស ការបំពេញសេវាកម្មដល់អតិថិជនជាចំណូចស្នូល ដែលក្រុមហ៊ុនយកចិត្តទុកដាក់បំផុត ពិសេសសេវាកម្មប្រកបដោយភាពស្មោះត្រង់ យកចិត្តទុកដាក់លើអតិថិេជន បំពេញការងារជូនអតិថិជន ដូចជាធ្វើការងារឲ្យខ្លួនឯង ជាអ្វីដែលCPA Propety Co, Ltdផ្តោតជាសំខាន់។

លោកបន្តថា “យើងនៅឈរជាមួយអតិថិជន បំពេញតម្រូវការជូនអតិថិជនទាំងជាតិនិងអន្តរជាតិ ជាមួយក្រុមការងារដែលមានជំនាញផ្តល់សេវាកម្ម មានបទពិសោធន៍ងារងារយូរឆ្នាំ ហើយអ្វីដែលយើងអាចផ្តល់ជូនអតិថិជន គឺផ្តល់ជូនជាកញ្ចប់”។លោកបន្តថា “ឈរលើមូលដ្ឋានវិជ្ជាជីវៈ និងភាពស្មោះត្រង់ដែលជាគុណតម្លៃរបស់យើង ក្រុមហ៊ុនក៏ផ្តល់សេវាកម្មប្រឹក្សាយោបល់ទាក់ទង នឹងការវិនិយោគលើវិស័យអចលនទ្រព្យ ប្រកបដោយភាពកក់ក្តៅផងដែរ”។

លោកសន សំរេចភារៈបានបន្តថា លើសពីនេះក្រុមហ៊ុនក៏ផ្តល់សេវាកម្មរត់ការលើការផ្ទេរ ការទិញលក់អចលនទ្រព្យជូនអតិថិជន ពិសេសការផ្តល់សេវាកម្មប្រឹក្សាតាមផ្លូវច្បាប់ជូនអតិថិជនផងដែរ។

CPA Groupជាក្រុមហ៊ុនពហុវិស័យ ដោយយើងមានក្រុមហ៊ុនShow Up Real estateជាក្រុមហ៊ុនជំនាញផ្នែកលក់គំរោងអចលនទ្រព្យដូចជាផ្ទះល្វែង ដីឡូត៍ បុរី ខុនដូ ជាមួយនឹងបុគ្គលិកជាង២០០នាក់។ ក្រុមហ៊ុនCPA Cafeeដែលជាហាងកាហ្វេ ផ្តោតលើរសជាតិកាហ្វេធម្មជាតិ មិនមានជាតិគីមី និងមានសេវាកម្មផ្តល់ការប្រឹក្សាយោបល់ទាក់ទងនឹងការចាប់ផផ្តើមជំនួញ សេវាកម្មប្រឹក្សាទាក់ទងនឹងការវិនិយោគ(បើកឆាប់ៗនេះ) និងមានបន្ទប់VIPសំរាប់ជួលប្រជុំផងដែរ។ និងក្រុមហ៊ុនដេញថ្លៃអចលនទ្រព្យCambodia Property Auctionដែលជាក្រុមហ៊ុនដេញថ្លៃអចលនទ្រព្យដំបូងគេនៅកម្ពុជា ដែលនឹងបើកដំណើរការនៅពេលឆាប់ៗនេះ។

ក្រុមហ៊ុនCPA Groupមានទីតាំងស្ថិតនៅលើបណ្តោយផ្លូវ២៧១ (ចម្ងាយប្រមាណ២០០ម៉ែត្រគិតពីច្រកចូលវត្តសន្សំកុសល ឆ្ពោះមកក្បាលថ្នល់) ស្ថិតក្នុងសង្កាត់បឹងទំពុនទី២ ខ័ណ្ឌមានជ័យ រាជធានីភ្នំពេញ។

អតិថិជន ដែលមានបំណងទទួលសេវាកម្មប្រកបដោយភាពជឿជាក់ និងអាចទុកចិត្តបានសូមទំនាក់ទំនងលេខទូរស័ព្ទ 012/ 015/ 068 79 68 79៕

ឥស្សរជន អ្នកជំនួញនិងតារាល្បីរបស់ចិនអរគុណចំពោះរដ្ឋាភិបាលកម្ពុជាចំពោះមិត្តភាព និងភាពជាបងប្អូន

ដោយៈ រ៉ាណេត

ភ្នំពេញៈ សមាជិកនៃគណៈប្រតិភូសមាគមការទូតសាធារណៈចិន បានបង្ហាញពីកិច្ចថ្លែងអំណរគុណចំពោះរាជរដ្ឋាភិបាលកម្ពុជា ដែលតែងបង្ហាញពីកិច្ចស្វាគមន៍ និងផ្តល់នូវភាពកក់ក្ដៅ ក្នុងនាមជាប្រទេសមហាមិត្តដ៏ជិតស្និទ្ធ និងជាបងប្អូនដែនថែប ដែលរួមសុខរួមទុក្ខជាមួយគ្នាក្នុងគ្រាមានអាសន្ន។

តាមរយៈវីដេអូរខ្លីប ដែលបង្ហាញដោយស្ថានទូតចិនប្រចាំនៅកម្ពុជា កាលពីថ្ងៃទី១១ ខែមីនា ឆ្នាំ២០២០ បានបញ្ជាក់ថា ទាំងរដ្ឋាភិបាលចិន ក៏ដូចជាប្រជាពលរដ្ឋចិនបានលើកឡើងពីសន្តានចិត្តដ៏ទូលាយ ប្រកបដោយភាពកក់ក្ដៅ មិនរើសអើង និងបោះបង់ជនចិននៅពេលកើតមានវិបត្តិ និងអាសន្នធំកាលពីពេលក្នលងទោនេះ ដែលក្នុងនោះ សូម្បីព្រះមហាក្សត្រខ្មែរដ៏ខ្ពង់ខ្ពស់ ក៏ផ្តល់នូព្រះរាជហឫទ័យ ប្រកបដោយកាយវិការគួរឱ្យគោរពជាទីបំផុត។

លោក Hu Zhengyue អនុប្រធានសមាគមសាធារណៈការបរទេសចិន បានបង្ហាញការគោរពយ៉ាងជ្រាលជ្រៅបំផុត ចំពោះទឹកព្រះទ័យរបស់ព្រះមហាក្សត្រ ព្រះមហាក្សត្រី និងសម្តេចតេជោនាយករដ្ឋមន្ត្រី។

លោកបញ្ជាក់ថា “ប្រជាពលរដ្ឋចិន ក៏មិនអាចបំភ្លេចបាននោះឡើយ។ យើងទាំងអស់គ្នាពិតជាមានមោទនភាពជាខ្លាំង ដែលមានមិត្តភក្តិដ៏មហិមាដូចអ្នកទាំងអស់គ្នា។ សូមថ្លែងអំណរព្រះគុណ និងអរគុណដោយស្មោះ និងជ្រាលជ្រៅបំផុត”។

លោក Ding Yi តន្ត្រីករដ៏ល្បីក្នុងប្រទេសចិន បានលើកឡើងថា “មានតែក្នុងកាលៈទេសៈនៃការលំបាក ទើបស្គាល់ពីមិត្តភក្តិដ៏ពិតប្រាកដ។ ប្រជាជនកម្ពុជា បានគាំទ្រដល់ប្រជាជនចិន ក្នុងពេលដ៏លំបាកនេះ។ នេះបានធ្វើឱ្យប្រជាពលរដ្ឋចិន មានក្តីរំភើបពេកក្រៃ”។

សហគ្រិនដ៏ល្បីឈ្មោះនៅក្នុងប្រទេសចិន លោកYe Qing បានលើកឡើងថា “ត្បិតតែការបំពេញទស្សនកិច្ចរបស់សម្តេចតេជោ មានរយៈពេលខ្លីក៏ពិតមែន តែបានបង្កប់នូវអត្ថន័យមិត្តភាពប្រៀបដូចបងប្អូន ដ៏សែនជ្រាលជ្រៅបំផុត។ មិត្តភាពចិន និងកម្ពុជា ប្រៀបដូចក្នុងគ្រួសារតែមួយ។ សូមជូនពរមិត្តភាពចិន និងកម្ពុជា ឋិតថេរជាអមតៈ”។

ដោយឡែក អតីតឯកអគ្គរដ្ឋទូតចិនប្រចាំនៅកម្ពុជា លោកស្រី Zhang Jinfeng បានគូសបញ្ជាក់ថា “កម្ពុជា គឺជាមិត្តសំឡាញ់ពិតប្រាកដរបស់ប្រទេសចិន។ ខ្ញុំរំភើបចិត្តស្ទើររាល់ថ្ងៃ ដោយសារខ្ញុំក៏ដូចជាមិត្តចិន គឺយើងបានឮបានឃើញអ្វីៗ ដែលព្រះករុណាព្រះមហាក្សត្រ ព្រះករុណាព្រះមហាវីរក្សត្រី និងសម្តេចតេជោនាយករដ្ឋមន្ត្រី ហ៊ុន សែន ជាទីគោរពតំណាងឱ្យប្រជាជនកម្ពុជា ខំប្រឹងប្រែងធ្វើ និងជូនប្រជាជនចិនក្នុងការតស៊ូទប់ទល់នឹងមេរោគហ្នឹង”។

លោកស្រីបន្ថែមថា “នេះ គឺសរឱ្យឃើញថាកម្ពុជា ជាបងប្អូនដែក។នេះមិត្តចិន និងខ្មែរសម្រេចថាអ៊ីចឹង តែខ្ញុំចង់ថែមមួយឃ្លាទៀត មិនគ្រាន់តែដែកទេ គឺថែប”។ លោកស្រីបន្ថែមថា “ខ្ញុំជឿជាក់ថា មេរោគហ្នឹងពិតជាសាហាវ តែការតស៊ូគង់តែនឹងឈ្នះ។ ខ្ញុំជឿជាក់ថា មិត្តភាពចិន និងកម្ពុជា ដែលបានទទួលបានការសាកល្បងម្តងទៀតនៅក្នុងការតស៊ូលើកនេះ ពិតជាឋិតថេរជានិច្ចកាល”៕

https://www.facebook.com/ChineseEmbassyCambodia/videos/1052585881790358/

ក្រុមហ៊ុនZ1 Data Co., LTDចុះកិច្ចព្រមព្រៀងជាមួយក្រុមហ៊ុនអាមេរិកដើម្បីវិភាគទិន្នន័យក្នុងវិស័យអចលនទ្រព្យ

ដោយគង់ សូរិយា

ភ្នំពេញៈ ក្រុមហ៊ុន Z1 Data Co., LTD (Cambodia) ដែលជាក្រុមហ៊ុនឯកទេសខាងប្រើប្រាស់បញ្ញាសុប្បនិម្មិត Artificial Intelligence (AI) ដើម្បីស្រាវជ្រាវ និងវិភាគទិន្នន័យក្នុងវិស័យអចលនទ្រព្យ បានចុះអនុស្សារណៈយោគយល់គ្នា ជាមួយក្រុមហ៊ុន The DevMasters ដែលមានមូលដ្ឋាននៅសហរដ្ឋអាមេរិក ដើម្បីសហការអភិវឌ្ឍន៍ប្រព័ន្ធផ្ទុកទិន្នន័យដ៏ធំមួយ សម្រាប់ពាណិជ្ជកម្មក្នុងវិស័យអចលនទ្រព្យ។

ក្រុមហ៊ុនThe DevMasters ជាក្រុមហ៊ុនមានឯកទេសខាងប្រឹក្សា និងបណ្តុះបណ្តាលការប្រើប្រាស់បញ្ញាសុប្បនិម្មិត Artificial Intelligence (AI) ដើម្បីវិភាគទិន្នន័យ ដែលបានជួយក្រុមហ៊ុនជាច្រើន ក្នុងការអភិវឌ្ឍន៍កម្មវិធីទិន្នន័យពាណិជ្ជកម្ម ឲ្យឆ្លើយតបនឹងតម្រូវការទីផ្សារជាក់ស្តែង។

អនុស្សារណៈយោគយល់នេះ ត្រូវបានចុះហត្ថលេខាដោយលោក ហ៊ឹម សីហាដៃគូ និងជានាយកក្រុមហ៊ុន Z1 Data Co., LTD (Cambodia) និងលោក Arshad Khan ដែលជានាយកប្រតិបត្តិនៃក្រុមហ៊ុន The DevMasters។

លោក ហ៊ឹម សីហា ដៃគូ និងជានាយក ក្រុមហ៊ុន Z1 Data Co., LTD (Cambodia) បានលើកឡើងបន្ទាប់ពីពិធីចុះហត្ថលេខា នាព្រឹកថ្ងៃទី១១ មិនានេះថា វិស័យអចលនទ្រព្យកម្ពុជាមានការរីកចម្រើនយ៉ាងខ្លាំង ដោយមានក្រុមហ៊ុនអភិវឌ្ឍន៍អចលនទ្រព្យជាច្រើនបានបង្កើតគម្រោងលំនៅឋាន និងគម្រោងពាណិជ្ជកម្មដោយភាពសម្បូរបែប។ កត្តានេះ តម្រូវឲ្យមានការអភិវឌ្ឍន៍ប្រព័ន្ធផ្ទុកទិន្នន័យដ៏ធំ និងមានគុណភាពមួយ ដើម្បីពង្រឹងទំនុកចិត្តវិនិយោគិន និងដើម្បីងាយស្រួលវិភាគពីនិន្នាការអភិវឌ្ឍន៍កន្លងមក និងការព្យាករណ៍សម្រាប់ថ្ងៃអនាគត។

លោកបន្តថា “បញ្ញាសុប្បនិម្មិត Artificial Intelligence (AI) ជួយពន្លឿនប្រតិបត្តិការវិស័យអចលនទ្រព្យ តាមរយៈការកាត់បន្ថយពេលវេលា ដែលតែងតែធ្វើដោយដៃកន្លងមក ហើយបញ្ញាសុប្បនិម្មិត ក៏បានជួយបង្កើនប្រសិទ្ធភាព សម្រាប់ដំណើរការទិញលក់ និងប្រតិបត្តិការទីផ្សារអចលនទ្រព្យផងដែរ”។

លោកហ៊ឹម សីហា បានបន្តថា កិច្ចសហការរវាងក្រុមហ៊ុន Z1 Data Co., LTD (Cambodia) និងក្រុមហ៊ុន The Dev Masters ពីអាមេរិកនេះ គឺជាការវិវត្តន៍យ៉ាងសំខាន់សម្រាប់វិស័យអចលនទ្រព្យកម្ពុជា ដោយសារថាការអភិវឌ្ឍន៍ប្រព័ន្ធបច្ចេកវិទ្យា ដើម្បីធ្វើការវិភាគ និងព្យាករទិន្នន័យអចលនទ្រព្យដោយប្រើប្រាស់ Artificial Intelligence (AI) នឹងរួមចំណែកបង្កើនទំនុកចិត្តដល់វិនិយោគិន និងលំហូរទុនវិនិយោគក្នុងវិស័យនេះ។

កម្មវិធីជាច្រើននៅក្នុងវិស័យអចលនទ្រព្យ សុទ្ធសឹងតែអាចប្រើប្រាស់ បញ្ញាសុប្បនិម្មិត Artificial Intelligence (AI) ដើម្បីពង្រឹងប្រសិទ្ធភាព និងកាត់បន្ថយពេលវេលា ដែលកម្មវិធីទាំងនោះ ឧទាហរណ៍ដូចជា ការស្វែងរកតម្លៃបច្ចុប្បន្ន និងការព្យាករណ៍ពីតម្លៃនាថ្ងៃខាងមុខ ការធ្វើស្វ័យប្រវត្តកម្មនៃឯកសារនានា ការព្យាករពីតម្លៃអចលនទ្រព្យនាពេលខាងមុខ និងមុខងារប្រើប្រាស់ជាច្រើនទៀត។

យោងតាមលោក ហ៊ឹម សីហា ការអភិវឌ្ឍន៍ប្រព័ន្ធទិន្នន័យដោយប្រើប្រាស់បញ្ញាសុប្បនិម្មិត ដែលមានគុណភាព នឹងផ្តល់ប្រយោជន៍ដល់ប្រតិបត្តករ ក្នុងទីផ្សារអចលនទ្រព្យ ម្ចាស់ទ្រព្យ ភ្នាក់ងារទិញលក់ និង រដ្ឋាភិបាល។

អំពី Z1 Data Co., LTD (Cambodia)

ក្រុមហ៊ុន Z1 Data Co., LTD (Cambodia) គឺជាក្រុមហ៊ុនក្នុងស្រុក ដែលមានឯកទេសខាងស្រាវជ្រាវ និងវិភាគទិន្នន័យក្នុងវិស័យអចលនទ្រព្យ ដោយប្រើប្រាស់បញ្ញាសុប្បនិម្មិត។ ក្រុមហ៊ុននេះ បានអភិវឌ្ឍន៍ខ្លួនចេញពីនាយកដ្ឋានសិក្សាស្រាវជ្រាវរបស់ក្រុហ៊ុនអចលនទ្រព្យឈានមុខគេមួយនៅកម្ពុជា គឺក្រុមហ៊ុន VTrust Appraisal Co., Ltd.។

អំពី The Dev Masters

TheDevMasters គឺជាក្រុមហ៊ុនបុត្រសម្ព័ន្ធរបស់ GBCS LLC ដែលជាក្រុមហ៊ុនប្រឹក្សាផ្នែកទិន្នន័យ ដោយប្រើប្រាស់បញ្ញាសុប្បនិម្មិត Artificial Intelligence (AI)។ មានមូលដ្ឋាននៅសហរដ្ឋអាមេរិក TheDevMasters បានបង្កើតឡើងនៅឆ្នាំ២០១២ ដែលកាលពីមុនត្រូវបានស្គាល់ថា Codecamp5។ TheDevMasters ផ្តល់ការបណ្តុះបណ្តាល និងការពិសោធន៍ពីវិទ្យាសាស្រ្តទិន្នន័យ Machine Learning និងវគ្គបណ្តុះបណ្តាលនានាដែលមានកម្មវិធីឆ្លើយតបនឹងតម្រូវការទីផ្សារជាក់ស្តែង៕

ចិននឹងផ្តល់សម្ភារៈទប់ស្កាត់មេរោគCOVID 19តាមអាកាសយានដ្ឋាន និងក្នុង យន្តហោះដល់កម្ពុជា

ដោយវុត្ថា

ភ្នំពេញៈ រដ្ឋាភិបាលចិន តាមរយៈស្ថានទូតរបស់ខ្លួនប្រចាំនៅកម្ពុជា នឹងផ្តល់ជំនួយជាសម្ភារៈ និងចែករំលែកបទពិសោន៏ ការបង្កា និងត្រូតពិនិត្យ រកមេរោគ COVID 19 តាមអាកាសយានដ្ឋាន និងក្នុងយន្តហោះរបស់កម្ពុជា ខណៈកម្ពុជាបាននឹងកំពុងយកចិត្តទុកដាក់ទប់ស្កាត់ការរីករាលដាលនូវជំងឺមួយនេះ ដែលកំពុងរីករាលដាលពាសពេញពិភពលោក។

លោកស្រី Zuo Wenxing អនុប្រធានស្ថានបេសកកម្ម និងជាភារធារីនយោបាយស្ថានទូតចិនប្រចាំនៅកម្ពុជា នៅក្នុងជំនួបជាមួយលោក ម៉ៅ ហាវណ្ណាល់ រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរស៊ីវិលនាថ្ងៃទី ១១ ខែមីនា ឆ្នាំ ២០២០ នេះ បានយល់ព្រម និងពិនិត្យលទ្ធភាពក្នុហការជួយរដ្ឋលេខាធិការដ្ឋានអាកាសចរស៊ីវិល លើការផ្តល់សម្ភារៈ សម្រាប់ទប់ស្កាត់មេរោគកូវិត១៩ តាមផ្លូវអាកាស និងត្រៀមការចែកបទពិសោធន៏ល្អ ដែលប្រទេសចិនមានលើការប្រយុទ្ធប្រឆាំង ការរាលដាល់មេរោគកូវិត១៩ ។

លោកស្រីបន្តថា “ប្រទេសចិនទទួលបានភាពជោគជ័យនូវការទប់ស្កាត់ ការផ្ទុះមេរោគនៅខេត្ត ហូបី ជាពិសេសក្រុង Wuhan និងទូទាំងប្រទេសចិន ប្រកបដោយប្រសិទ្ធិភាព ដោយមានការធ្លាក់ចុះនៃការឆ្លងស្ទើតែកម្រិតសូន្យ”។ លោកស្រីបន្ថែមថា “ប្រទេសចិនបានគ្រប់គ្រងស្ថានការរាលដាលទាំងស្រុង ខណៈជំងឺនេះបានរីករាលដាលនៅក្រៅប្រទេសចិន ជាពិសេស នៅអឺរ៉ុប ប្រទេសអ៉ីតលី កូរ៉ខាងត្បូង ប្រទេសអ៉ីរ៉ង និងប្រទេសជប៉ុន”។

លោកនាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្រ្តី បានមានប្រសាសន៏ អំពីកិច្ចសហការជិតស្និតរវាងប្រទេសចិន និងកម្ពុជា មានកិច្ចសហការយ៉ាងជិតស្និតជាយូរមកហើយ និងកម្ពុជាគាំទ្រនយោបាយចិនតែមួយ ព្រមទាំងការពង្រឹងកិច្ចសហប្រតិបត្តិការគ្រប់វិស័យ រួមទាំងវិស័យអាកាសចរផងដែរ។

លោកបន្តថា ជាពិសេសថ្មីៗនេះ ប្រទេសចិនបានបញ្ជូននូវវត្ថុធាតុដើម សំរាប់វិស័យវាយណភណ្ឌ័ចំនួន៧កប៉ាល់ធំៗមកកម្ពុជា សម្រាប់បម្រើចង្វាក់ផលិតកម្មរោងចក្រកាត់ដេរនៅកម្ពុជា និងបានគាំទ្រនូវជំហរកម្ពុជា ដែលមិនប្តូរអធិបតេយ្យជាតិ ជាមួយការដក EBA របស់សហគមន៏អឺរ៉ុប។ ជាមួយគ្នានេះ លោករដ្ឋមន្រ្តី បានធ្វើការកោតសរសើរប្រទេសចិន ដែលបានធ្វើការទប់ស្កាត់ការរីកដាល់នៃការឆ្លង កូវិត១៩ ប្រកបដោយជោគជ័យ។

ចំពោះវិធានការ ការបង្កា និងត្រូតពិនិត្យ រកមេរោគ កូវិត១៩ (COVID 19) តាមអាកាសយានដ្ឋាន និងយន្តហោះលោករដ្ឋមន្ត្រីរូបនេះបន្តថា រដ្ឋលេខាធិការដ្ឋានអាកាសចរស៊ីវិល បានធ្វើការយ៉ាងយកចិត្តទុកដាក់ និងបានឱ្យក្រុមហ៊ុនអាកាសយានដ្ឋាន និងក្រុមហ៊ុនអាកាសចរណ៍ទាំងអស់ធ្វើការសំអាត អនាម័យជាប្រចាំ ដើម្បីទប់ស្កាត់ការីកដាលនៃមេរោគកូវិត១៩ ។

លោករដ្ឋមន្ត្រីបន្ថែមថា ជាពិសេសនាពេលនេះ មន្ត្រីចត្តាឡីសក្ត័ របស់ក្រសួងសុខាភិបាល បានធ្វើការវាស់កំដៅអ្នកដំណើរទាំងអស់ ទាំងចេញ និងចូលប្រទេសកម្ពុជា៕

ចំណតយានយន្តក្រោមដីនៅមុខស្ថានទូតអាមេរិកបានបញ្ចប់ការសាងសង់

ដោយ ហ្សូលី

ភ្នំពេញៈ ចំណតយានយន្តក្រោមដី ដែលមានទីតាំងនៅខាងមុខស្ថាតទូតអាមេរិក ត្រូវបានបញ្ចប់ការសាងសង់ជាងស្ថាពរ កាលពីថ្ងៃទី១០ ខែមីនា ឆ្នាំ ២០២០ម្សិលមិញនេះ។

ចំណតយានយន្តក្រោមដី ស្ថិតនៅតំបន់សំខាន់ៗចំនួន៣ ដូចជា ជិតវត្តភ្នំ ជិតក្រសួងសេដ្ឋកិច្ច និងហិរញ្ញវត្ថុ និងជិតស្ថានទូតអាមេរិក។ ចំណតនេះមានជាង៣៤០ចំណត និងមានកំពស់២ជាន់ ដែលមានបំពាក់នូវឧបករណ៍ទំនើបៗជាច្រើនដូចជា ប្រព័ន្ធកាមេរ៉ាសុវត្ថិភាព ប្រព័ន្ធសេមស័រសំរាប់ចំណតឡាន ប្រព័ន្ធអគ្គីភ័យ ជណ្តើរយន្តជនពិការ។

មិនតែប៉ុណ្ណោះ ក៏មានជាប្រព័ន្ធប្រកាសអាសន្ន ផ្លាក់សញ្ញាLEDសំរាប់សំគាល់ទីតាំងចតនិងគំនូសសញ្ញា ប៉ុស៌្តសន្តិសុខត្រួតពិនិត្យ បន្ទប់ទឹកទូទៅ និងបន្ទប់ទឹកជនពិការ ប្រព័ន្ធបឺតផ្សែងរថយន្ត និងងពេលផ្សែងពេលមានអគ្គីភ័យ រួមទាំងប្រព័ន្ធបូមទឹកទំនើបកម្ម។

ចំណតយានយន្តនេះស្ថាបនាឡើង ក្នុងគោលបំណងដើម្បីបញ្ចៀសបញ្ហាកកស្ទះ និងកាត់បន្ថយគ្រោះថ្នាក់ចរាចរណ៍ និងជាការសហការរួមគ្នារវាងក្រសួងសេដ្ឋកិច្ច និងហិរញ្ញវត្ថុ អ្នកវិនិយោគឯកជន និងសាលារាជធានីភ្នំពេញ។

អាជ្ញាធររាជធានីភ្នំពេញ បានសាងសង់រួចរាល់នូវចំណតក្រោមដី ដែលស្ថិតនៅក្រោមសួនច្បារផ្សារចាស់ នៅមុខស្ថានីយរថភ្លើង ចន្លោះពីអគារខ្ពស់វឌ្ឍនៈ និងអគារកាណាឌីយ៉ា៕

ក្រុមហ៊ុនSinohydroផ្តល់ថវិកាចំនួន៨០ម៉ឺនដុល្លារសាងសង់ទំនប់បង្ហៀរទឹក នៅព្រែកកំពង់បាយ

ដោយវុត្ថា

ភ្នំពេញៈ ដើម្បីរួមចំណែកអភិវឌ្ឍវិស័យទឹកស្អាតនៅកម្ពុជា និងកិច្ចការពារបរិស្ថាន និងសង្គម ក្រុមហ៊ុនវារីអគ្គិសនីកំចាយSinohydro Kamchay Hydroelectric Project Co.,LTD បានផ្តល់ជំនួយសាងសង់ទំនប់បង្ហៀរទឹក នៅព្រែកកំពង់បាយ ស្ថិតនៅក្នុងស្រុកទឹកឈូ តំបន់វារីអគ្គិសនីខេត្តកំពត ក្នុងទឹកប្រាក់ចំនួន៨០ម៉ឺនដុល្លារអាមេរិក។

លោក Wang Tiefeng នាយកគ្រប់គ្រងទូទៅនៃក្រុមហ៊ុនSinohydro Kamchay Hydroelectric Project Co.,LTD នៅក្នុងធីចុះហត្ថលេខាលើអនុស្សរណៈយោគយល់គ្នារវាងក្រសួងឧស្សាហកម្មនិងសិប្បកម្ម និងក្រុមហ៊ុនវារីអគ្គិសនីកំចាយ Sinohydro កាលពីពេលថ្មីៗនេះ ឱ្យដឹងថា ការផ្តល់ជំនួយនេះ គឺជាក្នុងកិច្ចសហប្រតិបត្តិការដ៏រឹងមាំរវាងកម្ពុជា-ចិន ហើយបច្ចុប្បន្ន ដៃគូទាំងពីរបានក្លាយជាមិត្តដែកថែបជាប្រវត្តិសាស្ត្រ តាមរយៈការរិតចំណងមិត្តភាពរវាងថ្នាក់ដឹកនាំ នៃប្រទេសទាំងពីរ ធ្វើឲ្យការអនុវត្តគម្រាងអភិវឌ្ឍន៌នានា រវាងកម្ពុជា-ចិន ត្រូវធ្វើឡើងជាបន្តបន្ទាប់ ។

លោកទេសរដ្ឋមន្រ្តីចម ប្រសិទ្ធ រដ្ឋមន្ត្រីក្រសួងឧស្សាហកម្មនិងសិប្បកម្ម បានលើកឡើងពីសារ:សំខាន់ នៃមិត្តភាពដ៏ជ្រាលជ្រៅរវាងកម្ពុជា-ចិន និងផលប្រយោជន៍នៃការបង្កើតទំនប់បង្ហៀរទឹកនៅស្រុកកំពង់បាយ ស្រុកទឹកឈូ ដែលជាការយកចិត្តទុកដាក់ដ៏ខ្ពង់ខ្ពស់ របស់ប្រមុខរាជរដ្ឋាភិបាលដើម្បី ទាញប្រភពធុនធានទឹកពីទំនប់វារីអគ្គិសនីកំចាយ ខេត្តកំពត ដែលហូរធ្លាក់ចូលសមុទ្រតាមព្រែកកំពង់បាយ ប្រមាណ១.៧៧០លានម៉ែត្រត្រីគុណ (មួយពាន់ប្រាំពីររយចិតសិបលានម៉ែតត្រីគុណ) ក្នុងមួយឆ្នាំ ស្របពេលដែលតម្រូវការទាញទឹកចូល រោងចក្រផលិតទឹកស្អាតស្ថិតក្នុងសមត្ថភាពត្រឹម៦ ម៉ឺន ម៉ែត្រត្រីគុណ ក្នុងមួយថ្ងៃស្មើនឹង២២លានម៉ែត្រត្រីគុណក្នុងមួយឆ្នាំ។

លោមទេសរដ្ឋមន្រ្តីរំពឹងថា ក្រុមហ៊ុនវារីអគ្គិសនីកំចាយ នឹងអនុវត្តការងារនេះ បានឆាប់រហ័ស ប្រកបដោយគុណភាព សុវត្ថភាព សម្រាប់បម្រើផលប្រយោជន៍ដល់វិស័យទឹកស្អាតខេត្តកំពត ដែលកំពុងមានតម្រូវការកើនឡើង ។ បន្ទាប់ពីទំនប់បង្ហៀរទី១ អនុវត្តដោយក្រុមហ៊ុនវារីអគ្គិសនី Sinohydro ត្រូវបានសាងសង់រួច ការសាងសង់ទំនប់បង្ហៀរទី២នៅផ្នែកខាងក្រោម នឹងត្រូវពិនិត្យលទ្ធភាពបន្តទៀត ដែលត្រូវប្រើប្រាស់ដោយថវិការបស់រាជរដ្ឋាភិបាលកម្ពុជា ដើម្បីប្រើប្រាស់ឲ្យអស់លទ្ធភាព និងសក្តានុពលនៃប្រភពធុនធានទឹកដែលមាន ដោយឈរលើកិច្ចការពារបរិស្ថាន និងផលប៉:ពាល់សង្គមខ្ពស់ ៕

សមាគមពាក់ព័ន្ធវិស័យអចលនទ្រព្យធំៗគាំទ្រវិធានការរបស់រដ្ឋាភិបាល ក្នុងការទប់វិបត្តិCovid-19

ដោយៈ រ៉ាណេត

ភ្នំពេញៈ បន្ទាប់ពីរាជរដ្ឋាភិបាលកម្ពុជាបានដាក់ចេញនូវវិធានការបន្ទាន់ និងចេញសេចក្ដីអំពាវនាវពាក់ព័ន្ធ ទៅនឹងការស្នើដល់បណ្តាគ្រឹះស្ថានហិរញ្ញវត្ថុ ធនាគារឯកជន ក៏ដូចជាក្រុមហ៊ុនអភិវឌ្ឍន៍លំនៅដ្ឋាន ក្នុងការពិចារណាពន្យាពេលបង់ប្រាក់ និងបញ្ចុះតម្លៃថ្លៃផ្ទះជូនដល់បណ្តាកម្មករ និងបុគ្គលិកដែលប្រឈម នឹងការព្យួរការងារកាលពីពេលថ្មីៗនេះ មានសមាគមពាក់ព័ន្ធក្នុងវិស័យអចលនទ្រព្យធំៗជាច្រើន បានបង្ហាញពីការគាំទ្រការដាក់ចេញគោលនយោបាយរបស់ប្រមុខរដ្ឋាភិបាល។

សមាគមធំៗដែលបង្ហាញពីឆន្ទៈក្នុងការចូលរួម និងគាំទ្រទៅនឹងវិធានការបន្ទាន់ ក៏ដូចជាការអំពាវនាវរបស់រាជរដ្ឋាភិបាលកម្ពុជា រួមមានដូចជាសមាគមធនាគារ និងមីក្រូហិរញ្ញវត្ថុនៅកម្ពុជា សមាគមអ្នកអភិវឌ្ឍន៍លំនៅឋានកម្ពុជា សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ដែលទើបចេញសេចក្ដីប្រកាសបង្ហាញពីការគាំទ្រកាលពីល្ងាចថ្ងៃទី១០ ខែមីនា ឆ្នាំ២០២០ម្សិលមិញនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ថា ប្រធានសមាគម និងថ្នាក់ដឹកនាំ ព្រមទាំងសមាជិក-សមាជិកា នៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ( CVEA ) សូមធ្វើការគាំទ្រនូវសេចក្តីអំពាវនាវរបស់រដ្ឋាភិបាល ដើម្បីរួមចំណែកដោះស្រាយផលប៉ះពាល់អវិជ្ជមានដែលបានកើតឡើងដោយសារការរីករាលដាលនៃមេរោគ COVID-19 មកលើសង្គម និងសេដ្ឋកិច្ចកម្ពុជា ជាពិសេសបង្កឱ្យកម្មករ និងនិយោជិតមួយចំនួនបានបាត់បង់ចំណូល ហើយនាំឱ្យមានការប៉ះពាល់ដល់ការបង់ថ្លៃទិញលំនៅឋាន ។

សមាគមសូមចូលរួមចំណែកចំនួន២ចំណុច ដូចជាទី១ផ្ដល់ការប្រឹក្សា និងបង្កភាពងាយស្រួលដល់អតិថិជនទូទៅ ដើម្បីទទួលបានសេវាបង់ប្រាក់ចំពោះការទិញ-លក់ លំនៅឋានរបស់កម្មករ-និយោជិត និងម្ចាស់គម្រោងឱ្យមានភាពបត់បែន និងទន់ភ្លន់ចំពោះកម្មករ-និយោជិតណាដែលរងការផលប៉ះពាល់។ ទី២ ផ្ដល់ជូនសេវាប្រឹក្សាយោបល់ដោយមិនគិតថ្លៃ ខណៈដែលរាជរដ្ឋាភិបាលកម្ពុជា បានសម្រេចផ្ដល់ជូនការលើកលែងពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលទ្រព្យ (លំនៅឋានគ្រប់ប្រភេទ) ដែលមានតម្លៃស្មើ ឬទាបជាង៧០,០០០ (ប្រាំពីរម៉ឺន) ដុល្លារអាមេរិច ក្នុងរយៈពេល១ឆ្នាំ។

ជាមួយគ្នានេះ លោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា កាលពីព្រឹកថ្ងៃទី១០ខែមីនា ឆ្នាំ២០២០នេះ បានចេញសារលិខិតគាំទ្រនូវសេចក្តីអំពាវនាវ របស់ក្រសួងសេដ្ឋកិច្ច និងហិរញ្ញវត្ថុទៅលើការស្នើសុំក្រុមហ៊ុនអភិវឌ្ឍន៍ និងលក់លំនៅឋាននានាក្នុងបញ្ចុះតម្លៃជូនបងប្អូនកម្មករ ដែលកំពុងប្រឈមនឹងការព្យួរការងារកាត់បន្ថយដល់ប្រាក់ចំណូលប្រចាំខែ។ សមាគមក៏បានប្រកាសនូវវិធានការចំនួន៣ចំណុច ដើម្បីចូលរួមជាមួយរាជរដ្ឋាភិបាល ក្នុងការដោះស្រាយផលប៉ះពាល់អវិជ្ជមាន ដែលបានកើតឡើងដោយសារការរីករាលដាលនៃមេរោគ Covid-19 មកលើសង្គម និងសេដ្ឋកិច្ចកម្ពុជា ។

វិធានការចំនួន៣ ដែលសមាគមអ្នកអភិវឌ្ឍន៍លំនៅដ្ឋានកម្ពុជា បានដាក់ចេញរួមមាន ទី១ លើកទឹកចិត្តអតិថិជនទូទៅទាំងអស់ ដោយបញ្ចុះតម្លៃលំនៅឋានពិសេសជូនរហូតដល់ ៧ភាគរយ ទៅតាមគម្រោងនីមួយៗរបស់ក្រុមហ៊ុន ដែលជា សមាជិកសមាគមអ្នកអភិវឌ្ឍន៍លំនៅឋានកម្ពុជា ។ ទី ២-លើកទឹកចិត្តដល់អតិថិជនទូទៅ ដែលទិញផ្ទះចាប់ពីខែមីនា ឆ្នាំ២០២០ នេះតទៅ ដោយធ្វើការបង់ផ្តាច់ទាំងស្រុងជាមួយក្រុមហ៊ុន ដែលជាសមាជិកសមាគមអ្នកអភិវឌ្ឍន៍លំនៅឋានកម្ពុជា អាចនឹងបញ្ចុះតម្លៃលំនៅឋានពិសេសជូនរហូតដល់ ៧ភាគរយ បន្ថែមទៀតទៅតាមគម្រោងនីមួយៗ។ ទី-៣- ក្រុមហ៊ុនជាសមាជិកសមាគម នឹងផ្តល់ភាពទន់ភ្លន់អំពីលក្ខខណ្ឌនៃការបង់ប្រាក់ ចំពោះការទិញលំនៅឋានរបស់កម្មករ – និយោជិត ដែលទទួលរងផលប៉ះពាល់ បាត់បង់ចំណូលនៅក្នុងរយៈពេលនៃវិបត្តិនេះ ។

ដោយឡែក សមាគមធនាគារ និងមីក្រូហិរញ្ញវត្ថុនៅកម្ពុជា ក៏បានធ្វើការគាំទ្រនូវវិធានការរបស់រដ្ឋាភិបាល ជាមួយនឹងការលើកទឹកចិត្តដល់សមាជិកសមាគម ឱ្យបន្តផ្តល់ឥណទានដល់វិស័យអាទិភាព ជាពិសេសចំពោះអាជីវកម្ម ផ្នែកសណ្ឋាគារ ផ្ទះសំណាក់ ទេសចរណ៍ សំណង់ វាយនភណ្ឌកាត់ដេរ និងផលិតស្បែកជើង ដើម្បីធានានិរន្តរភាព អាជីវកម្មទាំងនោះ ។ ជាមួយគ្នានេះ ក៏បានអំពាវនាវដល់សមាជិកសមាគមគប្បីរក្សាភាពទន់ភ្លន់ និងពិនិត្យ តាមលទ្ធភាពជាក់ស្តែង ក្នុងការដោះស្រាយបំណុល យឺតយ៉ាវ ដែលបណ្តាលមកពីផលប៉ះពាល់នៃវីរុស Covid-19 ។

សមាជិកសមាគម ត្រូវបន្តតាមដាន និងដាក់ចេញវិធានការ ការពារការរីករាលដាលនៃវីរុស Covid-19 ទៅលើបុគ្គលិក និងអតិថិជន ដើម្បីធានាឱ្យបាននិរន្តរភាពប្រតិបត្តិការ របស់គ្រឹះស្ថានធនាគារនិងហិរញ្ញវត្ថុជាប្រក្រតី ។

សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក៏សូមយកឱកាសនេះ អំពាវនាវដល់សមាជិកទាំងអស់រួមមាន ធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុ គ្រឹះស្ថានឥណទានជនបទ និងក្រុមហ៊ុនភតិសន្យាហិរញ្ញវត្ថុ ចូលរួមអនុវត្តនូវវិធានការ ការពារទាំងនេះ ដើម្បីកាត់បន្ថយផលប៉ះពាល់ជាយថាហេតុ ក៏ដូចជាជំរុញកំណើនសេដ្ឋកិច្ចជាតិបន្ថែមទៀត។

បន្ថែមលើវិធានការការពារខាងលើ សមាជិកសមាគមទាំងពីរ ក៏បាននឹងកំពុងចូល រួមជាមួយរាជរដ្ឋាភិបាលកម្ពុជា ក្នុងគម្រោងសហហិរញ្ញប្បទានទ្រទ្រង់ សហគ្រាសធុនតូចនិងមធ្យម តាមរយៈ ក្រសួងសេដ្ឋកិច្ច និងហិរញ្ញវត្ថុ។

គម្រោងនេះនឹងផ្តល់ទុន ក្នុងអត្រាការប្រាក់សមរម្យ ដល់សហគ្រាសធនតូចនិងមធ្យម នៅកម្ពុជាលើវិស័យអាទិភាពហើយ ដែលគ្រោងនឹងចាប់ដំណើរការ ក្នុងពេលឆាប់ៗ ខាងមុខនេះ៕

1...2,4932,4942,495...3,250 Page 2,494 of 3,250