ដោយ ៖ ប៊ី

ភ្នំពេញៈ ក្រសួងប្រៃសណីយ៍ និងទូរគមនាគមន៍បានអះអាងថា ក្របខណ្ឌគោលនយោបាយរដ្ឋាភិបាលឌីជីថល ដែលខ្លួនបាននឹងកំពុងសហការ ជាមួយអន្តរក្រសួងគ្រោងនឹងបញ្ចប់នៅខែមិថុនា ឆ្នាំ២០២០ ខាងមុខនេះ។ នេះបើយោងតាមរដ្ឋមន្ត្រីក្រសួងប្រៃសណីយ៍ និងទូរគមនាគមន៍។

ការថ្លែងយ៉ាងដូច្នេះរបស់លោករដ្ឋមន្ត្រី ត្រាំ អ៊ឹវតឹក ធ្វើឡើងក្នុងឱកាសដែលលោករដ្ឋមន្ត្រី បានអនុញ្ញាតឲ្យលោក MIKAMI Masahiro ឯកអគ្គរដ្ឋទូតជប៉ុន ប្រចាំនៅកម្ពុជា ចូលជួបសម្តែងការគួរសម នៅទីស្តីការក្រសួង នៅថ្ងៃទី២១ ខែមករា ឆ្នាំ២០២០។

លោករដ្ឋមន្ត្រីបានជម្រាបជូនលោកឯកអគ្គរដ្ឋទូតជប៉ុន អំពីការងារជាអាទិភាពរបស់រាជរដ្ឋាភិបាលកម្ពុជា ក្នុងការត្រៀមខ្លួនទាញយកផលប្រយោជន៍ពីបដិវត្តន៍ឧស្សា​ហកម្មជំនាន់ទី៤ សម្រាប់ការអភិវឌ្ឍសេដ្ឋកិច្ចសង្គម ដើម្បីសម្រេចនូវចក្ខុវិស័យរបស់រាជរដ្ឋាភិបាល។

រដ្ឋាភិបាលឌីជីថល គឺជាការប្រើប្រាស់មធ្យោបាយអេឡិកត្រូនិក ដើម្បីគ្រប់គ្រងប្រព័ន្ធការងារ និងមូលដ្ឋាននៃការផ្តល់សេវាឲ្យមានតម្លាភាព មានភាពងាយស្រួល លឿន និងផ្សារភ្ជាប់ទំនាក់ទំនង ជាមួយប្រជាពលរដ្ឋ និងអាជីវកម្មកាន់តែប្រសើរ ព្រមទាំងបង្កើ​នប្រសិទ្ធភាពការងាររាជរដ្ឋាភិបាល តាមរយៈការបង្កើតនិងប្រើប្រាស់រចនាសម្ព័ន្ធឌីជីថលរួម វេទិកាឌីជីថលរួម សេវាកម្មឌីជីថលរួម ដោយឈរលើយន្តការ «បង្កើតម្តងប្រើបានគ្រប់កន្លែង» និងកម្មវិធីពង្រឹងសមត្ថភាពដល់គ្រប់ភាគីពាក់ព័ន្ធ។

លោករដ្ឋមន្ត្រីបន្តថា “ការងារសំខាន់ៗដែលបាននិងកំពុងយកចិត្តទុកដាក់ រួមការរៀបចំក្របខណ្ឌគោលនយោបាយរដ្ឋាភិបាលឌីជីល គោលនយោបាយសេដ្ឋកិច្ចឌីជីថល ការការពារសន្តិសុខព័ត៌មានវិទ្យា ពាណិជ្ជកម្មអេឡិចត្រូនិក ការកសាងបទដ្ឋានគតិយុត្តគាំទ្រជាដើម”។

លោករដ្ឋមន្ត្រីបានបញ្ជាក់ថា ក្រសួងប្រៃសណីយ៍ និងទូរគមនាគមន៍ បាននិងកំពុងធ្វើការជាមួយ អន្តរក្រសួងលើការរៀបចំក្របខណ្ឌ គោលនយោបាយរដ្ឋាភិបាលឌីជីថល ដែលគ្រោងនឹងបញ្ចប់ នៅខែមិថុនាឆ្នាំ២០២០ខាងមុខ។ ចេញពីក្របខណ្ឌគោលនយោ​បាយរដ្ឋាភិបាលឌីជីថលនេះ យើងនឹងរៀបចំនូវផែនការមេ និងផែនការវិនិយោគបន្តទៀត។

ទាក់ទងនឹងពាណិជ្ជកម្មអេឡិចត្រូនិក ដែលកំពុងរីកចម្រើនក្នុងប្រទេសកម្ពុជា និងពិភពលោក លោករដ្ឋមន្ត្រី ក៏បានលើកឡើងនូវការខិតខំប្រឹងប្រែងរបស់ក្រសួង ក្នុងការអភិវឌ្ឍប្រព័ន្ធដឹកជញ្ជូនប្រៃសណីយ៍ ដើម្បីជួយគាំទ្រដល់វិស័យនេះ ក៏ដូចជាការបង្កើតនូវហត្ថលេខាឌីជីថល ដែលនឹងដើរតួសំខាន់នៅក្នុងពាណិជ្ជអេឡិកត្រូនិកផងដែរ។

ក្នុងឱកាសនោះដែរ លោករដ្ឋមន្ត្រី ត្រាំ អ៊ឹវតឹក បានស្នើដល់ឯកអគ្គរដ្ឋទូតជប៉ុន ក្នុងបន្តជួយគាំទ្រដល់ការអភិវឌ្ឍធនធានមនុស្ស ការបណ្តុះបណ្តាលមន្ត្រីរាជការក្រសួង ក៏ដូចជាការគាំទ្រផ្នែកបច្ចេកទេស ដល់ការកសាងគោលនយោបាយ និងបទដ្ឋានគតិយុត្តទាក់ទងនឹងវិស័យប្រៃសណីយ៍ផងដែរ៕

ដោយៈ រ៉ាណេត

ភ្នំពេញៈ នៅក្នុងរយៈពេល១២ខែនៃឆ្នាំ២០១៩កន្លងទៅនេះ លទ្ធផលនៃការប្រមូ​លពន្ធ-អាករគ្រប់ប្រភេទរបស់អគ្គនាយកដ្ឋានពន្ធដារ បានសម្រេចបានជិត៣០០០លានដុល្លារសហរដ្ឋអាមេរិក។

នៅឆ្នាំ២០១៩ ចំណូលពន្ធ-អាករដែលអគ្គនាយកដ្ឋានពន្ធដារប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញ) មានចំនួន១១,២៧៧.៣២ ប៊ីលានរៀល (ប្រមាណ២៨១៩.៣៣ លានដុល្លារ) ធៀបនឹងផែនការប្រចាំឆ្នាំ២០១៩ ឃើញថាលទ្ធផលទទួលបានលើសផែនការប្រមាណ២៣.២០% ត្រូវជាប្រមាណ២,១២៣.៦៩ ប៊ីលានរៀល ស្មើនឹងប្រមាណ៥៣០.៩២លានដុល្លារអាមេរិក។

ទំហំទឹកប្រាក់ដែលទទួលបាននៅក្នុងឆ្នាំ២០១៩ខាងលើនេះ បើប្រៀបធៀបនឹង    រយៈពេលដូចគ្នានៃឆ្នាំ២០១៨ ឃើញថាចំណូលពន្ធ-អាករសម្រាប់រយៈពេល១២ខែ ឆ្នាំ២០១៩ កើនឡើងចំនួន២៤៨៥.៩២ប៊ីលានរៀល (ប្រមាណជា ៦២១.៤៨លានដុល្លារអាមេរិក)ស្មើនឹង២៨.២៨%។ នេះបើផ្អែកតាមការប្រកាសក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែធ្នូ និងប្រចាំឆ្នាំ២០១៩ ព្រមទាំងទិសដៅសម្រាប់អនុវត្តបន្ត របស់អគ្គនាយកដ្ឋានពន្ធដារ នៅថ្ងៃទី២១ ខែមករា ឆ្នាំ២០២០ នៅសាលាជាតិពន្ធដារ។

លោកគង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារបានបញ្ជាក់ឲ្យដឹងថា លទ្ធផលនៃការគ្រប់គ្រងប្រមូល ចំណូលសម្រាប់ឆ្នាំ២០១៩ គឺពិតជាឆ្លុះបញ្ចាំង និងមិនអាចកាត់ផ្តាច់បានពីគុណតម្លៃនៃសន្តិភាព ជាកត្តាចម្បងញ៉ាំងឱ្យមានការវិនិយោគ និងកំណើនសេដ្ឋកិច្ចជាតិជាបន្តបន្ទាប់ ដែលជាសមិទ្ធផលមិនអាចកាត់ថ្លៃ បានក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

លោកគង់ វិបុល បានបន្ថែមថា ក្នុងឆ្នាំ២០១៩ អគ្គនាយកដ្ឋានពន្ធដារ បានដាក់ឱ្យអនុវត្តនូវប្រព័ន្ធអនឡាញ សម្រាប់ការស្នើសុំការបង្វិលសង និងការប្រើប្រាស់ឥណទានអាករលើតម្លៃបន្ថែម តាមប្រព័ន្ធអនឡាញ សម្រាប់គ្រប់គ្រងអាករលើតម្លៃបន្ថែមរបស់អគ្គនាយកដ្ឋានពន្ធដារ(E-VAT Refund) បានបង្កើនប្រសិទ្ធិភាព នៃការគ្រប់គ្រងប្រមូលអាករលើតម្លៃបន្ថែម និងទប់ស្កាត់ការគេចវេះកេងបន្លំប្រាក់ពន្ធ ដែលជាលទ្ធផលក្នុងរយៈពេល១២ខែ ឆ្នាំ២០១៩ ចំណូលអាករលើតម្លៃបន្ថែមកើនឡើង ៣១.០៥% ប្រៀបធៀបនឹងរយៈពេលដូចគ្នាឆ្នាំ២០១៨ ហើយតាមរយៈវិធានការ E-VAT រួមជាមួយវិធានការពន្ធដារសំខាន់ៗផ្សេងៗទៀត បានជំរុញកំណើនពន្ធលើប្រាក់ចំណូលប្រមាណ ២៨.៤៧%, អាករពិសេស៣០.៧២%, ពន្ធប្រថាប់ត្រា៤៣.៧៣%, ពន្ធលើប្រាក់បៀរវត្ស១៨.២១% និងពន្ធលើឈ្នួលដី និងផ្ទះ៦៨.២០% ប្រៀបធៀបនឹងរយៈពេលដូចគ្នាក្នុងឆ្នាំ២០១៨៕

ដោយ Donald Lee

ភ្នំពេញៈ សេដ្ឋកិច្ចពិភពលោកនឹងមានការស្ទុះងើបឡើងវិញ បន្ទាប់ពីបានធ្លាក់ចុះនៅចុងឆ្នាំ២០១៩ ដោយសារភាពតានតឹងនៃសង្គ្រាមពាណិជ្ជកម្មរវាងអាមេរិក និងចិន និងកំណើនផលិតផល ក្នុងស្រុកសរុបធ្លាក់ចុះនៅទូទាំងពិភពលោក។ នេះបើយោងតាមរបាយការណ៍របស់មូលនិធិរូបិយវត្ថុអន្តរជាតិ (IMF)។

ស្ថាបន័នផ្តល់ប្រាក់ក ម្ចីដែលមានមូលដ្ឋាននៅអាមេរិកនេះ បានឱ្យដឹងនៅក្នុងចក្ខុវិស័យសេដ្ឋកិច្ចពិភពលោកថ្មីរបស់ខ្លួនថា “នៅផ្នែកវិជ្ជមាន ស្ថានភាពទីផ្សារត្រូវបានជំរុញដោយសញ្ញាបណ្តោះអាសន្ន ដែលសកម្មភាពផលិតកម្ម និងពាណិជ្ជកម្មពិភពលោកកំពុងថមថយ។ ការផ្លាស់ប្តូរដ៏ធំទូលាយមួយ ឆ្ពោះទៅរកគោលនយោបាយរូបិយវត្ថុ ការផ្តល់ព័ត៌មានមិនប្រាកដប្រជាស្តីពី ការចរចាពាណិជ្ជកម្មរវាងអាមេរិក និងចិន និងការថយចុះនូវការភ័យខ្លាចអំពីបញ្ហានេះ”។

ទោះយ៉ាងណាIMF បានទម្លាក់ការព្យាករណ៍កំណើន សេដ្ឋកិច្ចពិភពលោករបស់ខ្លួនបន្តិច ដោយសារតែការតស៊ូរបស់ឥណ្ឌាជាមួយនឹងឱនភាពថវិកា និងការធ្លាក់ចុះនៃការវិនិយោគ។

IMFបានព្យាករថា សេដ្ឋកិច្ចពិភពលោកនឹងកើនឡើងពី២,៩ភាគរយ ក្នុងឆ្នាំ ២០១៩ ដល់៣,៣ ភាគរយនៅឆ្នាំ២០២០ និង៣,៤ ភាគរយសម្រាប់ឆ្នាំ ២០២១។

ប្រធានIMF លោកស្រី Kristalina Georgievaបានថ្លែងនៅក្នុងសន្និសីទសារព័ត៌មាននៅទីក្រុងដាវ៉ូសថា “បន្ទាប់ពីការធ្លាក់ចុះរួមក្នុងឆ្នាំ២០១៩ យើងរំពឹងថា កំណើនសេដ្ឋកិច្ចសកលនឹងកើនឡើងនៅឆ្នាំនេះ និងឆ្នាំក្រោយ” ។

ឧបនាយករដ្ឋមន្ត្រីចិនលោក Liu He និងប្រធានាធិបតីអាមេរិក Donald Trump បានចុះហត្ថលេខា លើកិច្ចព្រមព្រៀងពាណិជ្ជកម្មរវាងអាមេរិក និងចិននៅថ្ងៃពុធ កន្លងមកនេះ ដោយបញ្ចប់ការកើនឡើងនូវសង្គ្រាមពាណិជ្ជកម្ម ដែលមានរយៈពេលជិត២២ ខែដែលបានគំរាមកំហែងដល់សេដ្ឋកិច្ចសកល៕

ដោយស៊ីវ ម៉េង

ភ្នំពេញៈ តើអ្នកមានបំណងវិនិយោគលើដីធ្លីដែរឬទេ? មានប្រាក់ច្រើនកម្រិតណា​? គេហទំព័រPropertyarea.asia បាននាំយកចំណេះដឹងពីអ្នកជំនាញ ដើម្បីធ្វើជាមូល ដ្ឋានយកមកគិតពិចារណា និងវិភាគថាគួរវិនិយោគដីធ្លីនៅទីណា កន្លែងណាដែលទទួលបានប្រាក់ចំណេញច្រើននិងឆាប់រហ័ស។

ទិញដីក្នុងគោលបំណងអ្វី?

តើអ្នកមានបំណងទិញដី ដើម្បីទុកលក់យកប្រាក់ចំណេញ ឬទុកសាងសង់សំណង់នានា? លោកឧកញ៉ាបណ្ឌិតគីម ហ៊ាងអគ្គនាយកក្រុមហ៊ុនKhmer Real Estate និងKW Cambodiaបានមានប្រសាសន៍ឲ្យដឹងថា ប្រសិនជាលោក អ្នកចង់ទិញដីដើម្បីសាងសង់ខុនដូ សាងសង់អាគារការិយាល័យ ឬសម្រាប់សាងសង់សណ្ឋាគារ សូមទិញដីនៅក្នុងខ័ណ្ឌចំការមន។

ប្រសិនជាចង់ទិញដីទុកលក់យកប្រាក់ចំណេញ រយៈពេលបីឆ្នាំខាងមុខ គួរទិញ​​​នៅតំបន់ទួលគោក និងតំបន់ភ្នំពេញថ្មី ប៉ុន្តែបើទិញដីដែលមានចម្ងាយពី៧ទៅ១០គីឡូ​ម៉ែត្រពីទីក្រុង ពួកគេត្រូវរង់ចាំដល់៧ឆ្នាំទើបចំណេញបាន។ បើទិញចម្ងាយប្រមាណ៣០គីឡូម៉ែត្រពីទីក្រុង គឺពួកគេអាចទទួលបានផលចំណេញនៅរយៈពេល១០ឆ្នាំក្រោយ។

ការទិញដីធ្លីជាការវិនិយោគត្រឹមត្រូវ និងមិនត្រឹមត្រូវ
លោកឧកញ៉ាគីម ហ៊ាងបានថ្លែងថា ការវិនិយោគដីធ្លី ជាការវិនិយោគដ៏ត្រឹមត្រូវ ប្រ​សិនជាលោក អ្នកសល់លុយដោយខ្លួនឯង មិនដឹងយកទៅវិនិយោគអ្វី ប៉ុន្តែប្រសិនជា​យកលុយបង្វិល ឬយកលុយពីធនាគារដើម្បីទិញដីវិនិយោគ អ្នកជំនាញរូបនេះបាន​និយាយថា “កុំអី” ព្រោះអ្នកខ្លះគិតថា ការប្រាក់ធនាគារ១ឆ្នាំ៨ភាគរយ ហើយដីឡើងថ្លៃ២០ភាគរយក្នុងមួយឆ្នាំ គឺអាចខ្ចីឥណទានពីធនាគារយកមកទិញបាន ប៉ុន្តែវាជា​ការយល់ច្រឡំ ព្រោះដីមិនងាយលក់ភ្លាមៗនោះទេ និងអាចមានភាពជាប់គាំងរយៈពេលពីរឬបីឆ្នាំ ពោលគឺត្រូវការពេលវេលា។

តំបន់ណាចំណេញលឿនជាងគេ

ការទិញដីដែលទទួលបានផលចំណេញលឿនជាងគេ គឺទិញនៅក្នុងខ័ណ្ឌសែន​សុខ ដង្កោ និងខ័ណ្ឌពោធិសែនជ័យ ពិសេសតំបន់ទួលគោក និងភ្នំពេញថ្មី ដោយសារ​តំបន់នេះដីនឹងឡើងថ្លៃទ្វេរដងនៅរយៈពេលពីរ ឬបីឆ្នាំខាងមុខនេះ។

ការវិនិយោគដីធ្លីមិនសុទ្ឋជាជម្រើសល្អ

ការវិនិយោគលើវិស័យដីធ្លី មិនសុទ្ឋតែជាជម្រើសល្អនោះទេ ព្រោះក្នុងវិស័យ​សំណ​ង់ និងអចលនទ្រព្យមានវិស័យផ្សេងៗទៀត ដែលអាចប្រមូលប្រាក់បានលឿនជាងវិស័យដីធ្លី។

លោកឧកញ៉ាបណ្ឌិតគីម ហ៊ាងបានថ្លែងថា ប្រសិនជាអ្នកមានអាយុ៥០ឆ្នាំ ជាពេលដល់អាយុជិតចូល​និវត្តន៍ មិនគួរវិនិយោគលើវិស័យដីធ្លីនោះទេ គឺគួរទិញខុនដូ ទិញដីសាងសង់ផ្ទះជួល ឬទិញ​ផ្ទះល្វែងសម្រាប់ជួល ដែលអាចបានប្រាក់ភ្លាមៗត្រលប់មកវិញ។

ផ្ទុយទៅវិញប្រ​សិនជាលោក អ្នកមានអាយុចន្លោះពី៣០ទៅ៤០ឆ្នាំ គួរវិនិយោគលើវិស័យដីធ្លី ព្រោះ​ទិញដីមានផលចំណេញខ្ពស់ និងជាវ័យដែលលោក អ្នកកំពុងរកលុយបានច្រើន។

តើមានលុយអ្នកប៉ុន្មាន?

តើលោក អ្នកមានប្រាក់ប៉ុន្មាន មានស្ថានភាពជីវិតយ៉ាងដូចម្តេច? ព្រោះការ​សម្រេចចិត្តក្នុងលក្ខខ័ណ្ឌនេះ មានសារៈសំខាន់ មុនធ្វើការវិនិយោគក្នុងវិស័យនេះ។

ការវិនិយោគលើវិស័យអ្វីមួយ ក៏គួរមានលក្ខខ័ណ្ឌជាក់លាក់ទាក់ទងនឹង ចំនួនទុនវិនិយោគ លក្ខខ័ណ្ឌការងារ លក្ខខ័ណ្ឌជីវិតជាដើម ដោយលោកបានថ្លែងថា ប្រសិនជាអ្នកទើបរៀបការ ហើយសល់លុយ១០ម៉ឺនដុល្លារ គួរទិញផ្ទះសម្រាប់ស្នាក់នៅសិន ប្រសិនជាមានផ្ទះ ហើយសល់លុយគួរទិញដីទុក ហើយប្រសិនជាមានផ្ទះ​ស្នាក់នៅ និងមានដីរួចហើយ គួរទិញខុនដូ ព្រោះខុនដូជាវិស័យថ្មីមួយ ដែលកំពុងមានការពេញ​និយម និងបង្ហាញពីភាពស៊ីវិល័យ៕