រដ្ឋាភិបាលអាមេរិកបង្កើតកងទ័ពយោធាអវកាសជាប្រវត្តិសាស្ត្រ

ដោយ Donald Lee

ភ្នំពេញ៖ ប្រធានាធិបតីអាមេរិក Donald Trump មើលឃើញសមរភូមិបន្ទាប់ដែលត្រូវឆ្លងកាត់ព្រំដែននៃផែនដី និងទៅអវកាស ខណៈលោកបានចុះហត្ថលេខាលើច្បាប់ស្តីពីការអនុញ្ញាតការពារជាតិជាប្រវត្តិសាស្ត្រដែលនឹងបង្កើតសេវាកម្មយោធាមួយដែលមានឈ្មោះថាកងទ័ពអវកាសអាមេរិក។

នៅក្នុងពិធីចុះហត្ថលេខានៅឯមូលដ្ឋានទ័ពអាកាសមួយនៅអាមេរិកកាលពីថ្ងៃ សុក្រ លោក Trump បាននិយាយថា “នឹងក្លាយជារឿងរ៉ាវជាច្រើនដែលកើតឡើងនៅក្នុងអវកាស។ ពីព្រោះអវកាសគឺជាដែនប្រយុទ្ធសង្គ្រាមថ្មីបំផុតរបស់ពិភពលោក”។

លោក បានថ្លែងថា “ដោយមានការគំរាមកំហែងយ៉ាងធ្ងន់ធ្ងរដល់សន្តិសុខជាតិរបស់យើង ឧត្តមភាពរបស់អាមេរិកក្នុងអវកាសពិតជាមានសារៈសំខាន់ណាស់។ ហើយយើងកំពុងនាំមុខគេ ប៉ុន្តែយើងមិននាំមុខដោយគ្រប់គ្រាន់នោះទេ ប៉ុន្តែក្នុងពេលដ៏ខ្លីខាងមុខនេះ យើងនឹងនាំមុខដោយកម្លាំងទ័ពអាកាសនឹងជួយ។ យើងរារាំងការឈ្លានពាន និងត្រួតត្រាទីខ្ពស់បំផុត”។

ក្រសួងការពារជាតិអាមេរិកបានថ្លែងនៅថ្ងៃ សុក្រ កន្លងមកនេះថា សមាជិកចំនួន ១៦,០០០ នាក់នៃកងទ័ពអាកាសអាមេរិកនឹងត្រូវផ្លាស់ទៅកាន់ទីអវកាសយោធាថ្មី។

លោក John Raymond មេបញ្ជាការនៃបញ្ជាការអវកាសអាមេរិក និងបញ្ជាការអវកាសកងទ័ពអាកាស បាននិយាយថា “យើងចង់បង្កើតសេវាកម្មនេះឱ្យមានភាពទន់ភ្លន់ និងរហ័សរហួន យើងនឹងពឹងផ្អែកយ៉ាងខ្លាំងលើមុខងារគាំទ្រពីកងទ័ពអាកាស”។ រដ្ឋាភិបាលអាមេរិកបានបញ្ជាក់ថា សេវាកម្មថ្មីនឹងផ្តោតលើបច្ចេកវិទ្យាជាជាងកម្លាំងពលកម្ម។

លោក Barbara Barrett រដ្ឋមន្ត្រីកងទ័ពអាកាស បាននិយាយទៅកាន់អ្នកកាសែតថា “កម្លាំងអវកាសនឹងមិនត្រូវបានវាស់វែងដោយចំនួនមនុស្សដែលមិនដូចកងម៉ារីនដែលពិតជាសេវាកម្មដែលពឹងផ្អែកលើកម្លាំងពលកម្មនោះទេ។ កម្លាំងអវកាសត្រូវបានវាស់វែងដោយបច្ចេកវិទ្យា និងសមត្ថភាព”។

ក្រសួងការពារជាតិអាមេរិកបានស្នើសុំថវិកាចំនួន ៧២,៤ លានដុល្លារ ប៉ុន្តែសមាជិកសភាបានអនុញ្ញាតថវិកាចំនួន ៤០ លានដុល្លារតែប៉ុណ្ណោះ។

លោក Barrett បានមានប្រសាសន៍ថា “យើងនឹងធ្វើការអភិវឌ្ឍទៅតាមអ្វីដែលថវិកាបានផ្តល់។ បាទ វាមិនលើសពីការស្នើសុំទេ ប៉ុន្តែយើងនឹងធ្វើការជាមួយចំនួនទឹកប្រាក់ដែលត្រូវបានអនុម័ត”។

ក្រសួងការពារជាតិអាមេរិកបានសង្កត់ធ្ងន់លើការចុះហត្ថលេខាជាប្រវត្តិសាស្ត្រកាលពីថ្ងៃ សុក្រ ដែលនឹងផ្លាស់ប្តូរទៅជាធម្មជាតិនៃសង្គ្រាម។ រដ្ឋមន្រ្តីក្រសួងការពារជាតិលោក Mark Esper បាននិយាយថា “ការបង្កើតកងកម្លាំងអវកាសអាមេរិកគឺជាព្រឹត្តិការណ៍ប្រវត្តិសាស្ត្រ និងជាការចាំបាច់ជាយុទ្ធសាស្ត្រសម្រាប់ប្រជាជាតិរបស់យើង។

លំហអាកាសបានក្លាយជាសារៈសំខាន់យ៉ាងខ្លាំងចំពោះមាគ៌ានៃជីវិត សេដ្ឋកិច្ច និងសន្តិសុខជាតិរបស់យើងដែលយើងត្រូវតែត្រៀមជាប្រទេសមួយដើម្បីការពារវាពីសកម្មភាពអរិភាព”៕

ទេសចរជាង ៩០ម៉ឺននាក់ បានចូលកម្សាន្តក្នុងពិធីបុណ្យសមុទ្រនៅខេត្តកំពត

ដោយ ៖ រ៉ាណេត

កំពត ៖ រដ្ឋមន្ត្រីក្រសួងទេសចរណ៍ បានថ្លែងឱ្យដឹងថា នាអំឡុងពេលពិធីបុណ្យសមុទ្រនៅខេត្តកំពតនេះ មានភ្ញៀវទេសចរ និងប្រជាពលរដ្ឋចូលរួមទស្សនាកម្សាន្តប្រមាណ ៩០ម៉ឺននាក់ ខណៈបញ្ហាសន្តិសុខ សណ្ដាប់ធ្នាប់ សុវត្ថិភាព ការរៀបចំកម្មវិធី ឬព្រឹត្តិការណ៍កម្សាន្តនានានោះ ក៏បានប្រព្រឹត្តទៅប្រកបដោយភាពសប្បាយរីករាយ និងជោគជ័យបំផុត។

លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា ថ្ងៃទី១នៃពិធីបុណ្យមានប្រជាពលរដ្ឋ និងភ្ញៀវទេសចរមកទស្សនាប្រមាណ ២០ម៉ឺននាក់ ថ្ងៃទី២ នៃពិធីបុណ្យ ថ្ងៃដែលសម្ដេចតេជោ ហ៊ុន សែន នាយករដ្ឋមន្ត្រីអញ្ជើញជាអធិបតីក្នុងពិធីបើកជាផ្លូវការ មានប្រជាពលរដ្ឋ និងភ្ញៀវទេសចរចូលរួមប្រមាណ ៤០ម៉ឺននាក់ និងថ្ងៃទី៣មានប្រមាណ ៣០ម៉ឺននាក់ សរុបគឺមានចំនួនប្រមាណ ៩០ម៉ឺននាក់។

លោកបានបន្តទៀតថា នៅក្នុងចំណោមទេសចរទាំងអស់នោះ មាន ភ្ញៀវទៅទស្សនាតាមរមណីយដ្ឋាននានាក្នុងខេត្តកំពតមានប្រមាណ ៤ម៉ឺននាក់ ដោយមានភ្ញៀវទេសចរអន្តរជាតិប្រមាណ ៦,០០០នាក់ ពោលគឺលើសការរំពឹងទុកទៅទៀត។ កាលពីបុណ្យសមុទ្រនៅខេត្តកំពតជុំទី១ មានភ្ញៀវចូលទស្សនាកម្សាន្តតែ ៣៥ម៉ឺនប៉ុណ្ណោះ។

ថ្លែងនាពិធីបិទព្រឹត្តិការណ៍បុណ្យសមុទ្រលើកទី៨ ជុំទី២ នារាត្រីថ្ងៃទី២២ ខែធ្នូ ឆ្នាំ២០១៩ លោក ថោង ខុន បានគោរពថ្លែងអរគុណជូនចំពោះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានផ្តល់អនុសាសន៍ដ៏មានតម្លៃដល់ប្រជាពលរដ្ឋ និងមន្ត្រីរាជការទាំងអស់គ្នា នាពិធីបើកព្រឹត្តិការណ៍បុណ្យសមុទ្រជាផ្លូវការ។

ជាមួយគ្នានោះ លោកក៏បានប្តេជ្ញាអនុវត្តន៍តាមអនុសាសន៍របស់សម្ដេចតេជោនាយករដ្ឋមន្ត្រី ក្នុងការគ្រប់គ្រងអភិវឌ្ឍន៍តំបន់ឆ្នរឱ្យប្រកបដោយនិរន្តរភាព ដើម្បីទាក់ទាញភ្ញៀវទេសចរ និងអ្នកវិនិយោគមកកាន់កម្ពុជាបន្ថែម។

លោក ថោង ខុន បានមានប្រសាសន៍បញ្ជាក់ថា “បុណ្យសមុទ្រលើកទី៨ ជុំទី២នេះ យើងបានឃើញប្រត្យក្សអំពីស្មារតីរួមគិត រួមធ្វើ រួមទទួលខុសត្រូវរបស់គ្រប់ផ្នែកគ្រប់ថ្នាក់ ទាំងប្រជាពលរដ្ឋ ទាំងសាធារណៈ និងឯកជន។

ក្រោមម្លប់នៃសុខសន្តិភាព ស្ថិរភាពនយោបាយ ដែលបានមកពីការដឹកនាំរបស់សម្តេចតេជោ ហ៊ុន សែន និងការខិតខំចូលរួមពីគ្រប់ផ្នែកពាក់ព័ន្ធ រួមទាំងប្រជាពលរដ្ឋផងនោះ ទឹកដីកម្ពុជានឹងកាន់តែមានការអភិវឌ្ឍជឿនលឿនឆាប់រហ័ស ជីវភាពរស់នៅកាន់តែបានរីកចម្រីកឥតឈប់ឈរ”៕

រដ្ឋាភិបាល-វិស័យឯកជន ប្តេជ្ញាបង្កើនល្បឿនដល់ការអភិវឌ្ឍសង្គម-សេដ្ឋកិច្ចប្រកបដោយចីរភាព

ដោយ វុត្ថា

ភ្នំពេញ៖ រដ្ឋាភិបាល-វិស័យឯកជន បានប្តេជ្ញាចិត្តរក្នុងការជំរុញវិស័យការងារ និងបណ្តុះបណ្តាលវិជ្ជាជីវៈប្រកបដោយប្រសិទ្ធភាព និងប្រសិទ្ធផលខ្ពស់ ក្នុងគោលដៅរួមចំណែក បង្កើនល្បឿនដល់ការអភិវឌ្ឍសង្គម-សេដ្ឋកិច្ចប្រកបដោយចីរភាព។

លោកអ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ថ្លែងក្នុងពិធីបើកវេទិកាសំណេះសំណាលប្រចាំឆ្នាំ រវាងតំណាងរាជរដ្ឋាភិបាល និងវិស័យឯកជន ក្រោមប្រធានបទ វឌ្ឍនភាពនៃការអនុវត្តកាតព្វកិច្ចច្បាប់ស្តីពីការងារ និងច្បាប់ស្តីពីរបបសន្តិសុខសង្គម នាព្រឹក ថ្ងៃទី២៣ ខែធ្នូ ឆ្នាំ២០១៩នេះ ឲ្យដឹងថា ការបង្កើនកិច្ចសហប្រតិបត្តិការយ៉ាងជិតស្និត តាមរយៈការអនុវត្តយន្តការត្រីភាគី និងកិច្ចសន្ទនាសង្គមដែលយើងបានអនុវត្ត ប្រកបដោយប្រសិទ្ធភាពដែលជាមូលដ្ឋានគ្រឹះ នៅក្នុងការធានាបាននូវភាពសុខដុមផ្នែកទំនាក់ទំនងវិជ្ជាជីវៈ ដែលធ្វើឱ្យមានការថយចុះនូវវិវាទការងារបានប្រសើរជាងមុនច្រើន។

លោក បន្ត ថាការបន្តចូលរួមអនុវត្តយ៉ាងសកម្ម ក្នុងការគាំទ្រដល់កម្មវិធីកំណែទម្រង់របស់រាជរដ្ឋាភិបាល យុទ្ធសាស្ត្រចតុកោណ គោលនយោបាយនានា ដូចជាគោលនយោបាយជាតិស្តីពីមុខរបរ និងការងារ គោលនយោបាយជាតិស្តីពីអប់រំបណ្តុះបណ្តាលបច្ចេកទេស និងវិជ្ជាជីវៈ គោលនយោបាយជាតិអភិវឌ្ឍវិស័យឧស្សាហកម្ម និងក្របខណ្ឌគោលនយោបាយជាតិគាំពារសង្គម។

លោករដ្ឋមន្ត្រីបន្ថែមថា ទន្ទឹមនឹងនេះ ការចូលរួមអនុវត្តប្រកបដោយស្មារតីទទួលខុសត្រូវ នូវកាតព្វកិច្ចនានាដែលបានចែងក្នុងច្បាប់ស្តីពីការងារ ច្បាប់ស្តីពីសហជីព ច្បាប់ស្តីពីរបបសន្តិសុខសង្គម ច្បាប់ស្តីពីប្រាក់ឈ្នួលអប្បបរមា រួមទាំងបទដ្ឋានគតិយុត្តិនានា ពាក់ព័ន្ធនឹងវិស័យការងារផងដែរ។

បន្ថែមពីនេះសមាគមសហព័ន្ធនិយោជកកម្ពុជា (CAFEBA) ក៍ជាដៃគូរដ៏សំខាន់ផងដែរ ដែលបានចូលរួម ធ្វើឱ្យក្រសួងអាចសម្រេចបានដោយជោគជ័យ នូវការអនុវត្តផែនការយុទ្ធសាស្រ្តអភិវឌ្ឍន៍ វិស័យការងារ និងបណ្តុះបណ្តាលវិជ្ជាជីវៈ ព្រមទាំងកម្មវិធីការងារសមរម្យសម្រាប់ប្រទេសកម្ពុជា និងគម្រោងនានាផងដែរ។

លោក បញ្ជាក់ ថា ក្រសួងការងារ និងបណ្តុះបណ្តាលវិជ្ជាជីវៈ បានត្រៀមខ្លួនរួចជាស្រេចក្នុងការបន្តកិច្ចសហការជាមួយ CAFEBA សំដៅលើកកម្ពស់ភាពប្រកួតប្រជែងកម្ពុជា នៅលើឆាកអន្តរជាតិ ដើម្បីរួមចំណែកជាមួយរាជរដ្ឋាភិបាល ក្នុងការសម្រេចឱ្យបាននូវចក្ខុវិស័យកម្ពុជាឆ្នាំ២០៣០ ដែលជាប្រទេសមានចំណូលមធ្យមកម្រិតខ្ពស់ និង ឆ្នាំ២០៥០ ជាប្រទេសមានចំណូលខ្ពស់។

ស្ថិតក្នុងបរិបទដែលវិស័យឯកជន កាន់តែប្រឈមកាន់តែខ្លាំងទៅនឹង លទ្ធភាពប្រកួតប្រជែងជាមួយប្រទេសនាំចេញនានា យើងបានធ្វើការយ៉ាងជិតស្និតជាមួយគ្នាស្វែងរកដំណោះស្រាយរួមគ្នា ដើម្បីធានាថា វិស័យឯកជន នៅតែអាចបន្តធានាបាននូវឧត្តមភាពប្រកួតប្រជែង សមាជិកទាំងអស់របស់ CAFEBA អាចរក្សាបានដំណើរផលិតកម្ម អាជីវកម្មរបស់ខ្លួនប្រកបដោយចីរភាព។

ដូចដែលអ្វីដែល សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានសម្រេចនៅក្នុង វេទិការាជរដ្ឋាភិបាល-វិស័យឯកជន លើកទី១៨ កាលពីថ្ងៃទី២៩ ខែមីនា ឆ្នាំ២០១៩ សម្តេចតេជោនាយករដ្ឋមន្រ្តី បានដាក់ចេញនូវវិធានការកែទម្រង់មុតស្រួចជាកញ្ចប់ សំដៅពង្រឹងភាពប្រកួតប្រជែង និងជំរុញធ្វើពិពិធកម្មសេដ្ឋកិច្ចកាន់តែមានភាពល្អប្រសើរជាលំដាប់។

លោកឧកញ៉ា វ៉ាន់ ស៊ូអៀង ប្រធានសមាគមសហព័ន្ធនិយោជកកម្ពុជា (CAFEBA) បានវាយតម្លៃខ្ពស់ចំពោះលទ្ធផលការងារ ដែលយើងរួមគ្នាបំពេញប្រកបដោយភាពជោគជ័យ ក្នុងរយៈពេលកន្លងមក ដែលចូលរួមអភិវឌ្ឍសេដ្ឋកិច្ចជាតិព្រមទាំងធានាបាននូវការបន្តរក្សាបាននូវកំណើនសេដ្ឋកិច្ចជាមធ្យមជាង ៧% រយៈពេលពីរទស្សវត្តន៍កន្លងមកនេះ៕

ថៃគ្រោងនឹងផ្តល់កម្ចីជាង ២៨១ លានដុល្លារដល់កម្ពុជា មីយ៉ាន់ម៉ា និងឡាវដើម្បីសាងសង់ផ្លូវឆ្លងដែនថ្មីចំនួន ៤

ដោយ ប៊ី

ភ្នំពេញ៖ ថៃគ្រោងនឹងផ្តល់ប្រាក់កម្ចីចំនួន ៨.៥ ពាន់លានបាត(ប្រមាណ ២៨១ លានដុល្លារ) នៅឆ្នាំក្រោយដល់ប្រទេសមីយ៉ាន់ម៉ា ឡាវ និងកម្ពុជាដើម្បីសាងសង់ផ្លូវឆ្លងដែនថ្មីចំនួន ៤ ក្រោមគំនិតផ្តួចផ្តើមតភ្ជាប់អាស៊ាន។ គណៈរដ្ឋមន្រ្តីថៃនឹងត្រូវបានស្នើសុំឱ្យផ្តល់ការអនុម័តសម្រាប់ការអភិវឌ្ឍហេដ្ឋារចនាសម្ព័ន្ធ។

ក្រុមអ្នកសង្កេតការណ៍ និយាយថា សេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់មីយ៉ាន់ម៉ា និងកម្ពុជាមិនមានបន្ទុកបំណុលដ៏ច្រើននោះទេ ហើយគួរតែសមនឹងគំនិតផ្តួចផ្តើមនេះ។លោក Perames Vudthitornetiraks ប្រធានទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាងបានមានប្រសាសន៍ថា “អត្រាការប្រាក់សម្រាប់គម្រោងនីមួយៗត្រូវបានរក្សាថេរត្រឹមតែ ០.១% ប៉ុណ្ណោះ។ លោកបានបន្ថែមថា ទីក្រុងបាងកកចង់ឱ្យគម្រោងនេះជួយជំរុញអនុតំបន់មេគង្គ។

នៅប្រទេសមីយ៉ាន់ម៉ា ផ្លូវ ១៣៨ គីឡូម៉ែត្រដែលមានតម្លៃ ៤ ពាន់លានបាតនឹងត្រូវសាងសង់ដើម្បីតភ្ជាប់តំបន់សេដ្ឋកិច្ចពិសេស Dawei ជាមួយតំបន់ Namphu Ron នៅតំបន់ Kanchanaburi ។

លោក Perames បានមានប្រសាសន៍ថា “រដ្ឋាភិបាលមីយ៉ាន់ម៉ាយកចិត្តទុកដាក់លើការអភិវឌ្ឍផ្លូវនេះ”។ រដ្ឋធានី Nay Pyi Taw របស់មីយ៉ាន់ម៉ា សង្ឃឹមថានឹងប្រើប្រាស់ផ្លូវនេះជាការតភ្ជាប់រវាងប្រទេសថៃ និងបណ្តាប្រទេសនៅជុំវិញតំបន់បេងហ្គាល់ក្រោមឈូងសមុទ្របេងហ្គាល់បច្ចេកទេសសហប្រតិបត្តិការពហុវិស័យបច្ចេកទេស និងសេដ្ឋកិច្ចឬហៅកាត់ថា BIMSTEC តាមរយៈកំពង់ផែសមុទ្រ Dawei។

ទីក្រុងបាងកកក៏មើលឃើញផងដែរនូវតំបន់ Kanchanaburi ដែលជាច្រកសំខាន់មួយទៅកាន់ប្រទេសមីយ៉ាន់ម៉ា។

បច្ចុប្បន្នវាកំពុងសាងសង់ផ្លូវ ៩៦ គីឡូម៉ែត្រថ្មីតភ្ជាប់ពីស្រុកបាងយ៉ៃនៃណុនប៊ូរីទៅខេត្តភាគខាងលិចរបស់ខ្លួន។ប្រាក់កម្ចីមួយទៀតនឹងត្រូវផ្តល់ ១,២ ពាន់លានបាតសម្រាប់កម្ពុជាដើម្បីសាងសង់ផ្លូវប្រវែង ១៣១ គីឡូម៉ែត្រពីប្រទេសថៃមកកម្ពុជា។

ផ្លូវនេះនឹងឆ្លងកាត់តំបន់សំខាន់ៗនៅកម្ពុជា រួមមានស្រុកអន្លង់វែង និងខេត្តសៀមរាប។រដ្ឋាភិបាលថៃក៏គ្រោងនឹងផ្តល់ហិរញ្ញប្បទានដល់ការកសាងស្ពានមិត្តភាពថៃ និងឡាវ ទី៥ ភ្ជាប់ពីប៊ួនកានខេត្តភាគឥសាន្តនៃប្រទេសថៃ និងខេត្ត Bolikhamsai ក្នុងប្រទេសឡាវ។

ថវិកាប្រមាណ ១,៣ ពាន់លានបាតនឹងត្រូវចំណាយដើម្បីសាងសង់ផ្នែកស្ពាននៅខាងឡាវ។ គម្រោងផ្លូវមួយទៀតនៅប្រទេសឡាវគឺការសាងសង់ ២ ពាន់លានបាតលើផ្លូវប្រវែង ១៤៧ គីឡូម៉ែត្រដែលនឹងចាប់ផ្តើមនៅ Nakhon Phanom រត់ឆ្លងកាត់ទីក្រុង Thakhek និងបន្តទៅរដ្ឋធានីហាណូយរបស់វៀតណាម៕

រដ្ឋាភិបាលផ្តល់ដីសម្បទានសង្គមកិច្ចជាង ១៤ម៉ឺនហិកតា ជូនប្រជាពលរដ្ឋជាង៨ម៉ឺនគ្រួសារ

ដោយ វុត្ថា

ភ្នំពេញ៖ រដ្ឋាភិបាល បានបញ្ជាក់ថានៅឆ្នាំ២០១៩ នេះ កម្មវិធីសម្បទានដីសង្គមកិច្ចបានផ្តល់ដីសរុបចំនួន ១៤៤ ៨៨៩,៥១ ហិកតា ជូនប្រជាពលរដ្ឋសរុប៨០ ៨៦២គ្រួសារ ដើម្បីឆ្លើយតបទៅនឹងប្រយោជន៍សង្គម សំដៅលើកកម្ពស់កម្រិតជីវភាព និងសេចក្ដីថ្លៃថ្នូររបស់ប្រជាពលរដ្ឋទូទៅ។

តាមរយៈរបាយការណ៍របស់ក្រសួងរៀបចំនរូបនីយកម្ម និងសំណង់ ដែលគេហទំព័ត propertyarea.asia ទទួលបាននៅថ្ងៃទី ២៣ ខែធ្នូ ឆ្នាំ២០១៩ នេះ ឲ្យដឹងថាសម្បទានដីសង្គមកិច្ច គឺជាការផ្ដល់ដីឯកជនរបស់រដ្ឋ ដែលបានចុះបញ្ជីរួចហើយ ដល់ជនក្រីក្រដែលគ្មានដី ឬ ខ្វះខាតដីសម្រាប់សាងសង់លំនៅឋាន ឬ ធ្វើកសិកម្មជាលក្ខណៈគ្រួសារ ដែលអាចបង្កើតឱកាសការងារ និងទទួលបានប្រាក់ចំណូល។

របាយការណ៍ដដែលបន្តថា ក្នុងនីតិកាលទី៦ នៃរដ្ឋសភា រាជរដ្ឋាភិបាលកម្ពុជាផ្ដោតការយកចិត្តទុកដាក់កនៅតែដាក់ចេញនូវកម្មវិធីនយោបាយបែងចែក និងប្រើប្រាស់ដីរដ្ឋសម្រាប់គោលបំណងឯកជន និងសាធារណៈ ប្រកបដោយតម្លាភាព និងសមធម៌ ឆ្លើយតបទៅនឹងតម្រូវការរបស់ប្រជាពលរដ្ឋទូទៅ ជាពិសេសប្រជាជនក្រីក្រ យុទ្ធជនពិការ គ្រួសារយុទ្ធជនពលី អតីតកងកម្លាំងប្រដាប់អាវុធ គ្រួសារដែលត្រូវផ្លាស់ប្ដូរទីលំនៅដែលបណ្ដាលមកពីការអភិវឌ្ឍហេដ្ឋារចនាសម្ព័ន្ធសាធារណៈ សម្រាប់ការតាំងលំនៅឋានថ្មី គ្រួសារដែលរងគ្រោះដោយគ្រោះធម្មជាតិ គ្រួសារដែលធ្វើមាតុភូមិនិវត្ត និងគ្រួសារដែលគ្មានដី ខ្វះដី ហើយត្រូវការដីពិតប្រាកដតាមរយៈកម្មវិធីសម្បទានដីសង្គមកិច្ច និងការធ្វើប្រទានកម្ម ដោយធានាឱ្យបាននូវសមធម៌ ស្ថិរភាពសង្គម សន្ដិសុខស្បៀង និងការសម្រួលដល់ការវិនិយោគ។

នៅឆ្នាំ២០១៩ រាជរដ្ឋាភិបាល តាមរយៈកម្មវិធីសម្បទានដីសង្គមកិច្ចនៃក្រសួងរៀបចំដែនដដី នគរូបនីយកម្ម និងសំណង់ សម្រេចលទ្ធផលបាន៖

១/. សម្បទានដីសង្គមកិច្ចជូនអតីតកងកម្លាំងប្រដាប់អាវុធ និងគ្រួសារ ៖ អនុវត្តក្នុងខេត្តគោលដៅចំនួន ១២ រួមមានខេត្តកំពង់ស្ពឺ ខេត្តក្រចេះ ខេត្តបាត់ដំបង ខេត្តកំពត ខេត្តកំពង់ឆ្នាំង ខេត្តពោធិ៍សាត់ ខេត្តសៀមរាប ខេត្តព្រះសីហនុ ខេត្តស្ទឹងត្រែង ខេត្តរតនគិរី ខេត្តកោះកុង និងខេត្តស្វាយរៀង ៤ ៦៤៤,២៣ហិកតា ជូនគ្រួសារអតីតយុទ្ធជនចំនួន៣ ៥០៤គ្រួសារ សាងសង់ផ្ទះជូនបានចំនួន ១ ៦៨០ខ្នង ក្នុងនោះផ្ទះសង់អំពីឈើផុតពីដីប្រក់ស័ង្កសីចំនួន៨៥០ខ្នង និងសាងសង់ផ្ទះថ្មពីឥដ្ឋផ្ទាល់ដីប្រក់ស័ង្កសីចំនួន៨៣០ខ្នង ជាមួយនឹងការគាំទ្រផ្នែកហេដ្ឋារចនាសម្ព័ន្ធរូបវន្ត រួមមានសាលារៀន ផ្លូវ អណ្តូងទឹក និងស្រះទឹក។

២/. សម្បទានដីសង្គមកិច្ចជូនប្រជាពលរដ្ឋក្រីក្រស៊ីវិលទូទៅ ៖ សម្រេចផ្តល់ដីជូនតាមរយៈថវិកាពិសេសរបស់រាជរដ្ឋាភិបាល ការធ្វើប្រទានកម្មដីរដ្ឋ និយ័តកម្មដីរដ្ឋ និងសារាចរលេខ០៣ និងតាមសំណើរបស់ខេត្តសម្រេចចែកដីសរុបទំហំ១១១ ៦១៦,២៨ហិកតា សើ្មនឹង៥៨ ១២៩គ្រួសារ និងប្រទានកម្មដីតាមរយៈការអនុវត្តនយោបាយចាស់ សកម្មភាពថ្មីលើវិស័យដីធ្លីទំហំជាង១លាន២សែនហិកតា ស្មើនឹងជាង៧១ម៉ឺនក្បាលដី ដល់ប្រជាពលរដ្ឋប្រមាណ៤សែនគ្រួសារ។

៣/. ការអភិវឌ្ឍតាមបណ្តោយព្រំដែន ៖ សម្រេចផ្តល់ដីសម្បទានសង្គមកិច្ចទំហំដី១២ ៥១៥ហិកតា ជូន១៤ ២១៩គ្រួសារ និងសាងសង់ផ្ទះបានចំនួន៥ ៥៥៦ខ្នង ក្នុងខេត្តព្រះវិហារ ខេត្តឧត្តរមានជ័យ ខេត្តស្វាយរៀង និងខេត្តស្ទឹងត្រែង។

៤/. គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) ៖ បានផ្តល់ដី សរុបទំហំ១៦ ១១៤ហិកតា លើមុខសញ្ញាទទួលដីសរុប៥ ០១០គ្រួសារ បានផ្តល់សម្ភារៈសម្រាប់សាងសង់ផ្ទះជូនប្រជាពលរដ្ឋ៥ ០១០គ្រួសារ និងបានផ្តល់វិញ្ញាបនបត្រសម្គាល់ម្ចាស់អចលនវត្ថុ ៥ ៤៨១បណ្ណ ក្នុងនោះដីឯកជនចំនួន៥ ០៤០បណ្ណ ស្មើនឹង៣ ០០៦គ្រួសារ និងដីសាធារណៈចំនួន៤៤១បណ្ណ។

ជារួមគិតពីពេលចាប់ផ្តើមរហូតដល់ខែវិច្ឆិកា ឆ្នាំ២០១៩ កម្មវិធីសម្បទានដីសង្គមកិច្ចគ្រប់ប្រភេទ សម្រេចផ្តល់ដីសរុបទំហំ ១៤៤ ៨៨៩,៥១ ហិកតា ជូនប្រជាពលរដ្ឋសរុប៨០ ៨៦២គ្រួសារ និងសាងសង់ផ្ទះជូនប្រជាពលរដ្ឋសរុបចំនួន ៧ ២៣៦ ខ្នង និងសម្រេចផ្តល់ដីសរុបទំហំជាង១លាន២សែនហិកតា ស្មើនឹងជាង ៧១ម៉ឺនក្បាលដី ជូនគ្រួសារទទួលដីប្រមាណ៤សែនគ្រួសារ តាមរយៈការអនុវត្តនយោបាយចាស់សកម្មភាពថ្មីលើវិស័យដីធ្លី៕

រដ្ឋសភា បើកកិច្ចប្រជុំដើម្បីអនុម័តគម្រោងវិនិយោគថាមពលអគ្គិសនី ដើរដោយពន្លឺព្រះអាទិត្យចំនួន៤

ដោយ ៖ រ៉ាណេត

ភ្នំពេញ ៖ រដ្ឋសភានៃព្រះរាជាណាចក្រកម្ពុជា បានបន្តសម័យប្រជុំរដ្ឋសភាលើកទី៣ នីតិកាលទី៦ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដើម្បីសិក្សា និងអនុម័តទៅលើក្រុមហ៊ុនគ្រប់គ្រងគម្រោងសាងសង់ស្ថានីយផលិតអគ្គិសនី ដើរដោយថាមពលពន្លឺព្រះអាទិត្យ ចំនួន៤ ស្ថិតនៅខេត្តផ្សេងគ្នា។

សម័យប្រជុំរដ្ឋសភានៅត្រឹមព្រឹកថ្ងៃទី២៣ ខែធ្នូ ឆ្នាំ២០១៩នេះ បានលើកយករបៀបវារៈចំនួន ៧ មកពិភាក្សា និងអនុម័ត ដោយក្នុងនោះមានគម្រោងសាងសង់ស្ថានីយផលិតអគ្គិសនីចំនួន៤ដែរ រួមមាន ដូចជា៖

១- សេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុន ហ្រ្គីន សឺស្តែនណេប៊ល វេនឈ័រ (ខេមបូឌា) ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព២០មេហ្គាវ៉ាត់ នៅខេត្តស្វាយរៀង។

២- សេចក្តីព្រាងច្បាប់ស្តីពី ការអនុម័តយល់ព្រមលើការ ធានា ទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន រ៉ាយ ផៅវ័រ សឹបផ្លាយ ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព ៣០មេហ្គាវ៉ាត់ នៅខេត្តបន្ទាយមានជ័យ។

៣- សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន រ៉ាយសិន អេនើជី (ខេមបូឌា) បាត់ដំបង ឯ.ក សម្រាប់គម្រោង សាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព ៦០មេហ្គាវ៉ាត់ នៅខេត្តបាត់ដំបង។

៤- សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្នេថេក អ៊ីនហ្វីនីត ឯ.ក សម្រាប់គម្រោងសាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព ៣០មេហ្គាវ៉ាត់ នៅខេត្តពោធិ៍សាត់។

ក្រៅពីនេះនៅមាន សេចក្ដីព្រាងច្បាប់ចំនួន៣ផ្សេងទៀត រួមមាន ៖

១- សេចក្តីព្រាងច្បាប់ស្តីពី ការអនុម័តយល់ព្រមឱ្យព្រះរាជាណាចក្រកម្ពុជាចូលជាសមាជិកនៃកិច្ចព្រមព្រៀងសម្រាប់អនុវត្តបទបញ្ញត្តិនៃអនុសញ្ញា សហប្រជាជាតិស្តីពី ច្បាប់សមុទ្រ ចុះថ្ងៃទី១០ ខែធ្នូ ឆ្នាំ១៩៨២ ទាក់ទងនឹងការគ្រប់គ្រង និងការអភិរក្សផល ស្តុកត្រី ផ្លាស់ទីមធ្យម និងផលស្តុកត្រីផ្លាស់ទីឆ្ងាយ។

២- សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់ របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ធីអេសប៊ីភី សេកុង ផៅវ័រ អ៊ែន មីនើរ៉ល ខមភេនី លីមីធីត នៃសាធារណរដ្ឋប្រជាធិបតេយ្យប្រជាមានិតឡាវ។

៣- សេចក្តីព្រាងច្បាប់ស្តីពី ការអនុម័តយល់ព្រមលើការធានា ទូទាត់ របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន សេកុង សឺមម័ល ផៅវ័រ ផ្លេន ខមភេនី លីមីធីត នៃសាធារណរដ្ឋប្រជាធិបតេយ្យប្រជាមានិតឡាវ។

ក្រសួងសាធារណៈការបើកវគ្គបណ្តុះបណ្តាលជំនាញត្រួតពិនិត្យផ្លូវល្បឿនលឿន

ដោយនៅ ស៊ីវុត្ថា

ភ្នំពេញ: ក្រសួងសាធារណការនិងដឹកជញ្ជូន ក្រោមកិច្ចសហការរបស់ក្រុមហ៊ុន CRBC និងក្រសួងដឹកជញ្ជូននៃប្រទេសចិន បានបើកវគ្គបណ្តុះបណ្តាលស្តីពី “Professional Highway Training Program”។

យោងតាមការផ្សព្វផ្សាយរបស់ក្រសួង កាលពីកន្លងទៅថ្មីៗនេះអោយដឹងថា វគ្គបណ្តុះបណ្តាលនេះ ត្រូវបានធ្វើឡើងក្នុងគោលបំណងចែករំលែកចំណេះដឹង និងបទពិសោធន៍របស់អ្នកជំនាញ មកពីវិទ្យាស្ថានស្រាវជ្រាវផ្លូវ Highway របស់ក្រសួងដឹកជញ្ជូនចិន ពាក់ព័ន្ធនឹងការធ្វើអោយប្រសើរឡើង ហេដ្ឋារចនាសម្ព័ន្ធផ្លូវ-ថ្នល់ តាមរយៈការធ្វើអធិការកិច្ចផ្លូវ-ថ្នល់ ការវាយតម្លៃស្តង់ដារគុណភាព និងសុវត្ថិភាពចរាចរណ៍ផ្លូវ-ថ្នល់ ព្រមទាំងការធានាបាននូវការគ្រប់គ្រងសុវត្ថិភាព ក្នុងដំណាក់កាលសាងសង់។

រដ្ឋាភិបាលបាននឹងកំពុងអនុវត្តន៍ គម្រោងផ្លូវល្បឿនលឿននភ្នំពេញ-ខេត្តព្រះសីហនុដែលសាងសង់ ដោយក្រុមហ៊ុនសាជីវកម្មស្ពាន និងថ្នល់ចិន (CRBC) ដែលននឹងក្លាយទៅជាបណ្តាញហេដ្ឋារចនាសម្ព័ន្ធដ៏សំខាន់សម្រាប់កម្ពុជា។

ជាមួយគ្នានេះក្រុមហ៊ុនចិន China Railway Corporation បានទទួលសិទ្ធពីក្រសួងក៏កំពុងសិក្សា លើគម្រោងសាងសង់ផ្លូវល្បឿនលឿន ភ្នំពេញ-បាវិត ដើម្បីសិក្សាលម្អិតដាក់ជូនរដ្ឋាភិបាលពិនិត្យ និងឈានទៅរកការចរចាកិច្ចព្រមព្រៀង សម្បទានអនុវត្តន៍គម្រោងផ្លូវល្បឿននេះ។

ក្រសួងសាធារណការ និងដឹកជញ្ជូនឲ្យដឹងថា ក្រុមហ៊ុនចិនដែលទទួលបានការអនុញ្ញាត មានរយៈពេល១៨ខែ សិក្សាលម្អិតលើគម្រោងផ្លូវល្បឿនលឿន។

ក្រៅពីនេះក្រសួងក៏បាន នឹងកំពុងអនុវត្តនូវគម្រោងហេដ្ឋរចនាសម្ព័ន្ធនានា នៅទូទាំងប្រទេស ដើម្បីតភ្ជាប់សសៃឈាមសេដ្ឋកិច្ច ឲ្យកាន់តែមានភាពរស់រវើក និងភាពងាយស្រួលក្នុងការដឹកជញ្ជូន៕

KH Land ផ្តល់រង្វាន់ចិញ្ចៀនពេជ្រ និងខ្សែកមាសដល់អតិថិជនប្រកបដោយភ័ព្វសំណាង

ដោយៈ រ៉ាណេត

ភ្នំពេញៈ ជាព្រឹត្តិការណ៍ដែលមិនធ្លាប់មាន សម្រាប់ក្រុមហ៊ុន KH Land Co., Ltd ចែករង្វានចិញ្ចៀនពេជ្រ និងខ្សែកមាស មានម្លៃជូនដល់បណ្តាអតិថិជនរបស់ខ្លួនជាមួយនឹងគម្រោង «ទីក្រុងថ្មីដីមាស សំរោងលើ»។

នៅថ្ងៃសៅរ៍ ទី២៨ និង ថ្ងៃអាទិត្យទី២៩ ខែធ្នូ ឆ្នាំ២០១៩ ខាងមុខនេះ ក្រុមហ៊ុន ខេអេច លែន ( KH Land ) នឹងរៀបចំកម្មវិធី “ការតាំងបង្ហាញពីសក្ដានុពលនៃគម្រោងក្រុងថ្មី ដីមាសសំរោងលើ” ដើម្បីឱ្យអតិថិជនចាស់ អតិថិជនថ្មី និងដៃគូរសហការណ៍ទាំងអស់បានយល់ឱ្យកាន់តែច្បាស់ពីផែនការអភិវឌ្ឍន៍គម្រោង ព្រមទាំងសិក្សាស្វែងយល់ពីការរីកចំរើននៅក្នុងតំបន់នេះ នាពេលអនាគតដ៏ខ្លី ហើយក៏មានការចាប់ឆ្នោតផ្សងសំណាងយក ចិញ្ជៀនពេជ្រ ខ្សែកមាស នឹងខ្សែដៃមាស សំរាប់អតិថិជនដែលបានទិញដី ផ្ទះ រឺគម្រោងអាជីវកម្មនៅលើគម្រោងក្រុងថ្មីដីមាសសំរោងលើផងដែរ។

ទាំងអតិថិជនចាស់ ទាំងអតិថិជនថ្មី និងដៃគូសហការទាំងអស់ សុទ្ធតែបានដឹងពីគម្រោងកូនកាត់ “ក្រុងថ្មី ដីមាសសំរោងលើ” រួចមកហើយថា គម្រោងមួយនេះមានការអភិវឌ្ឍន៍ផ្ទះលែ្វង៤០ខ្នង រីសតមានទំហំ៣ហិកតា ដែលមាន១០០ បន្ទប់សម្រាប់ស្នាក់លំហែរ សួនលំហែជុំវិញបឹងធម្មជាតិ និងគម្រោងអាជីវកម្មធំៗទាំង៨នៅចំកណ្ដាលគម្រោងរួមមាន ហាងកាហ្វេ Arabitia ផាប់ ម៉ាត ភោជនីយដ្ឋាន ហ្វាម៉ាស៊ី ហាងសម្លៀកបំពាក់ សាឡន និងហាងទំនិញផងដែរ។

ទីតាំង ភូមិត្រពាំងទន្លាប់ ឃុំសំរោងលើ ស្រុកអង្គស្នួល ខេត្តកណ្ដាល។

អគ្គនាយកក្រុមហ៊ុន KH Land Co., Ltd លោក ថុន បូរ៉ា បានមានប្រសាសន៍ប្រាប់ឱ្យដឹងថា ការទិញដីឡូតិ៍ គឺជាជម្រើសដ៏ល្អបំផុត សម្រាប់អ្នកដែលមានចំណូលទាប និងក្រោមមធ្យម ដែលមានបំណងប្រាថ្នាចង់បានដី ដែលជាទ្រព្យរយៈពេលវែងធ្វើជាកម្មសិទ្ធិរបស់ខ្លួន។

លោកបន្តថា “ជាមួយនឹងការលក់គម្រោងដីឡូតិ៍នេះ ក្រុមហ៊ុនបានផ្តល់ជម្រើសល្អៗជាច្រើនចំពោះអតិថិជន ដោយគាត់អាចសម្រេចចិត្តទិញដោយការបង់ប្រាក់ផ្តាច់ ឬអាចប្រើវិធីសាសត្របង់រំលស់ នៅក្នុងរយៈពេល២៤ខែដោយគ្មានការប្រាក់”។ លោកបានបន្តទៀតថា “ក្រុមហ៊ុនមានចក្ខុវិស័យវែងឆ្ងាយ នៅក្នុងវិស័យអចលនទ្រព្យកម្ពុជា ជាមួយនឹងការមើល ឃើញជាក់ស្ដែងពីកំណើន និងភាពល្អប្រសើរនៃសេដ្ឋកិច្ចក្នុងតំបន់ រួមជាមួយនឹងសន្ទុះនៃការអភិវឌ្ឍរបស់សង្គមជាតិទាំងមូល”។

លោក ថុន បូរ៉ា បានមានប្រសាសន៍បញ្ជាក់ទៀតថា មុនពេលចាប់ផ្តើមគម្រោងនេះ ក្រុមហ៊ុនបានធ្វើការសិក្សាយ៉ាងច្បាស់ និងស៊ីជម្រៅនៅក្នុងការជ្រើសរើសទីតាំងសម្រាប់ការអភិវឌ្ឍគម្រោង ដែលរួមមានកក្តាប្រជាសាស្ត្រ មានសក្ដានុពលលើផ្នែកសេដ្ឋកិច្ច ដែលស្ថិតនៅក្នុងគម្រោងអភិវឌ្ឍរបស់រដ្ឋាភិបាល ក៏ដូចជា វិស័យឯកជនផងដែរទៅលើការបង្កើតនូវប្រព័ន្ធហេដ្ឋារចនាសម្ព័ន្ធផងដែរ។

ជាក់ស្ដែដូចជាគម្រោងដីឡូតិ៍ទី៥ ដែលស្ថិតនៅភូមិសាស្ត្រខាងលើនេះ គឺជាតំបន់មួយដែលងាយស្រួលក្នុងការអភិវឌ្ឍ ព្រោះស្ថិតនៅមិនឆ្ងាយពីរាជធានីភ្នំពេញ ជិតតំបន់អភិវឌ្ឍផ្លូវក្រវ៉ាត់ក្រុង ដែលជាផ្លូវសេដ្ឋកិច្ចដ៏សំខាន់»។

លោកថុន បូរ៉ាបានបន្តទៀតថា ក្រុមហ៊ុនក៏បានផ្តល់នូវទំនុកចិត្តដល់អតិថិជនផងដែរ ដោយសារក្រុមហ៊ុន KH Land Co., Ltd មានការចុះបញ្ជីយ៉ាងត្រឹមត្រូវនៅក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ ព្រមទាំងទទួលបានលិខិតអនុញ្ញាតវិនិយោគអភិវឌ្ឍន៍ដីឡូតិ៍ជាច្រើនគម្រោងរួចមកហើយ នៅលើផ្ទៃដីរាប់សិបហិកតា។

ដើម្បីចុះឈ្មោះចូលរួមកម្មវិធី “ការតាំងបង្ហាញពីសក្ដានុពលនៃគម្រោងក្រុងថ្មី ដីមាសសំរោងលើ” សូមទំនាក់ទំនងមកកាន់លេខទូរស័ព្ទ៖

Smart: 086 / 087 647 168

Cellcard: 061 / 089 647 168

Metfone: 060 / 090 647 168

តាមរយៈ Link ខាងក្រោម៖

https://forms.gle/wkXAwz3S4GeMumuH8៕

កម្ពុជាទទួលបានអ្នកដំណើរតាមផ្លូវអាកាសជិត១១លាននាក់ក្នុងរយៈពេល១១ខែឆ្នាំនេះ

ដោយ ប៊ី

ភ្នំពេញៈ ចំនួនអ្នកដំណើរនៅព្រលានយន្តហោះកម្ពុជា បានកើនឡើង១២ភាគរយក្នុងរយៈពេល១១ខែដំបូងនៃឆ្នាំនេះ ដោយសារតែមានផ្លូវអាកាសថ្មី និងក្រុមហ៊ុនអាកាសចរណ៍ថ្មីៗកំពុងត្រូវបានដាក់ឱ្យដំណើរការ។

យោងតាមតួលេខពីក្រុមហ៊ុន កម្ពុជា អ៊ែរផត ដែលគ្រប់គ្រងព្រលានយន្តហោះអន្តរជាតិចំនួន៣នៅកម្ពុជារួមមានព្រលានយន្តហោះអន្តរជាតិភ្នំពេញ ព្រលានយន្តហោះអន្តរជាតិខេត្តព្រះសីហនុ និងព្រលានយន្តហោះអន្តរជាតិខេត្តសៀមរាបបានបង្ហាញថា ចាប់ពីខែ មករាដល់ខែ វិច្ឆិកា អ្នកដំណើរមានចំនួន១០,៦លាននាក់។

អាកាសយានដ្ឋានភ្នំពេញ និងក្រុងព្រះសីហនុ មានការកើនឡើងនូវចរាចរណ៍ច្រើនជាងគេ ខណៈអាកាសយានដ្ឋានសៀមរាប ជួបការធ្លាក់ចុះចរាចរណ៍យន្តហោះ។

អាកាសយានដ្ឋានភ្នំពេញ បានដឹកអ្នកដំណើរចំនួន៥,៥ លាននាក់កើនឡើង១២ ភាគរយ ហើយអាកាសយានដ្ឋានក្រុងព្រះសីហនុ ទទួលបានកំណត់ត្រាខ្ពស់ដោយមានកំណើន១៧៧ភាគរយ ស្មើនឹងចំនួនអ្នកដំណើរចំនួន១,៥លាននាក់។

ផ្ទុយទៅវិញ អាកាសយានដ្ឋានខេត្តសៀមរាបឃើញថា ចរាចរណ៍អ្នកដំណើរធ្លាក់ចុះ១១ភាគរយ ដោយមានចំនួនអ្នកធ្វើដំណើរស្មើនឹង៣,៥លាននាក់។

លោកខែក ណូរីនដា ប្រធានផ្នែកទំនាក់ទំនង និងទីផ្សារក្រុមហ៊ុនកម្ពុជា អ៊ែរផត ត្រូវបានរាយការណ៍ថា “សម្រាប់អាកាសយានដ្ឋានភ្នំពេញ ការរីកចម្រើនត្រូវបានជំរុញដោយក្រុមហ៊ុនអាកាសចរណ៍ថ្មី និងផ្លូវហោះហើរ”។

លោកបន្តថា “សម្រាប់ក្រុងព្រះសីហនុ ក្រុមហ៊ុនអាកាសចរណ៍ និងផ្លូវហោះហើរថ្មីគឺជាក្បាលម៉ាស៊ីន នៃកំណើនចំនួនអ្នកធ្វើដំណើរ។ លើសពីនេះទៀត ក្រុមហ៊ុនអាកាសចរណ៍ក្នុងស្រុក បានប្តូរសេវាកម្មរបស់ពួកគេពីខេត្តសៀមរាប ទៅកាន់់ក្រុងព្រះសីហនុ”។

សម្រាប់ខេត្តសៀមរាបក្រុមហ៊ុនអាកាសចរណ៍មួយចំនួន បានឈប់ហោះហើរនៅទីនោះ។ ឧទាហរណ៍ ក្រុមហ៊ុនអាកាសចរណ៍ម៉ាឡេស៊ី និងក្រុមហ៊ុនអាកាសចរណ៍ក្នុងស្រុកបានប្តូរជើងហោះហើររបស់ពួកគេ ទៅកាន់ក្រុងព្រះសីហនុ។

យោងតាមក្រសួងទេសចរណ៍ កម្ពុជាទទួលបានទេសចរបរទេសចំនួន៥,២ លាននាក់ចាប់ពីខែ មករាដល់ខែតុលា ឆ្នាំនេះកើនឡើង៩,៧ ភាគរយ។ ក្នុងចំណោមនោះមាន ៣,៧លាននាក់ បានឆ្លងកាត់ព្រលានយន្តហោះ កើនឡើង១២ភាគរយក្នុងរយៈពេលនេះ។

បច្ចុប្បន្ននេះ កម្ពុជាមានក្រុមហ៊ុនអាកាសចរណ៍ក្នុងស្រុកចំនួន៥ និងក្រុមហ៊ុនអាកាសចរណ៍អន្តរជាតិចំនួន៤៤៕

ការសាងសង់ផ្លូវជាតិលេខ៣ ភ្នំពេញ-កំពត សម្រេចបានប្រមាណ៦១%ហើយ

ដោយ វុត្ថា

ភ្នំពេញ: លោកទេសរដ្ឋមន្រ្តី ស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា លទ្ធផលក្នុងការសាងសង់ផ្លូវជាតិលេខ៣ (ភ្នំពេញ-កំពត) សម្រេចបានប្រមាណ៦១%ហើយ។

លោកស៊ុន ចាន់ថុលបានមានប្រសាសន៍បែបនេះ នៅ ក្នុងការចុះត្រួតពិនិត្យស្ថានភាពផ្លូវជាតិលេខ៤១ និងផ្លូវជាតិលេខ៣ (ភ្នំពេញ-កំពត-វាលរេញ) ដែលកំពុងជួសជុល និងសាងសង់ពង្រីក ដើម្បីសម្រួលដល់ការធ្វើចរាចរណ៍ក្នុងពិធីបុណ្យសមុទ្រ ពិធីប្រណាំងកង់អន្តរជាតិ និងការប្រកបមុខរបរចិញ្ចឹមជីវិតប្រចាំថ្ងៃ របស់ប្រជាពលរដ្ឋ កាលចុងសប្តាហ៍កន្លងមកនេះ។

ដោយឡែកកំណាត់ផ្លូវជាតិលេខ៣នេះដដែល ពីរង្វង់មូលជុំគិរីដល់ទីរួមខេត្តកំពត គឺសម្រេចបាន៨៥%ហើយ។

លោកស៊ុន ចាន់ថុលបានបញ្ជាក់ថា ផ្លូវជាតិលេខ៣ (ភ្នំពេញ-កំពត) មានប្រវែង ១៣៤,៨២៦គីឡូម៉ែត្រ បានបើកការដ្ឋានសាងសង់នៅថ្ងៃទី១៧ ខែតុលា ឆ្នាំ២០១៨ និងគ្រោងបញ្ចប់នៅថ្ងៃទី១៦ ខែតុលា ឆ្នាំ២០២២ ដោយប្រើរយៈពេល៤៨ខែ សាងសង់ដោយក្រុមហ៊ុន China Road and Bridge Corporation និងត្រួតពិនិត្យបច្ចេកទេសដោយក្រុមហ៊ុន Guangzhou Wanan Construction Supervision Co., Ltd។

ចំណែកឯ កំណាត់ផ្លូវជាតិលេខ៣ (កំពត-វាលរេញ) លោកទេសរដ្ឋមន្ត្រីបានពិនិត្យឃើញថា ក្រុមហ៊ុនត្រួតពិនិត្យបច្ចេកទេស បានបណ្ដោយឱ្យក្រុមហ៊ុនសាងសង់ស្ថាបនាខុសពីបទដ្ឋានបច្ចេកទេស ដូចជាយកគ្រួសថ្មធំៗមកអ៊ុតជាមួយបេតុងកៅស៊ូជាដើម។

ទោះជាយ៉ាងនេះក្ដី ជាបណ្ដោះអាសន្ន លោកទេសរដ្ឋមន្ត្រីទុកពេលឱ្យចំនួន១០ថ្ងៃ ដើម្បីកែលម្អផ្លូវនេះឱ្យបានល្អឡើងវិញ ដោយប្រើកម្លាំងបន្ថែមពីនាយកដ្ឋានពាក់ព័ន្ធដើម្បីស្វាគមន៍ពិធីបុណ្យសមុទ្រនៅខេត្តកំពត ចាប់ពីថ្ងៃទី២ ដល់ថ្ងៃទី២២ ខែធ្នូ ឆ្នាំ២០១៩ និងពិធីប្រណាំងកង់អន្តរជាតិ ដែលនឹងប្រព្រឹត្តទៅនៅថ្ងៃទី៦ ខែមករា ឆ្នាំ២០២០ ខាងមុខនេះ។

លោកទេសរដ្ឋមន្ត្រីបានបន្តថា បន្ទាប់ពីនោះ ក្រសួងនឹងមានវិធានការបន្តបន្ទាប់ទៀត ឬអាចជួសជុលឡើងវិញទាំងស្រុងតែម្ដងដោយក្រុមហ៊ុនផ្សេង។

លោកថា “រដ្ឋាភិបាល គឺទទួលយកតែផ្លូវមានគុណភាពរឹងមាំ ជាប់បានយូរតែប៉ុណ្ណោះ។ ដូចនេះក្រុមហ៊ុនសាងសង់ ត្រូវអនុវត្តតាមបទដ្ឋានបច្ចេកទេសឱ្យបានម៉ឺងម៉ាត់បំផុត បើមិនចង់បញ្ចប់កិច្ចសន្យាមុនពេលកំណត់”។

លោទេសរដ្ឋមន្ដ្រី បានសំណូមពរឱ្យបងប្អូនប្រជាពលរដ្ឋ មានការយោគយល់អត់ធ្មត់អធ្យាស្រ័យ ចំពោះការរំខាននានាខណៈពេលកំពុងសាងសង់ ប៉ុន្តែត្រូវផ្ដោតលើសុវត្ថិភាពជាចម្បង កុំដឹកទំនិញលើសទម្ងន់កម្រិតកំណត់ និងរួមគ្នាថែរក្សាទ្រព្យសម្បត្តិរបស់យើងឱ្យបានជាប់គង់វង្សយូរអង្វែង ដើម្បីកុំឱ្យខាតបង់ថវិកាជាតិច្រើន៕