ដំណើរកម្សាន្ត Property Area តម្លៃនៃការចងចាំមួយ

ដោយ វល័ក្ខ

កំពត៖ ក្រុមការងារគេហទំព័រ Property Area បានមកកាន់ខេត្តកំពត និងកែប នាចុងសប្ដាហ៍នេះដែលជាដំណើរកម្សាន្តលើកដំបូងមកកាន់តំបន់ឆ្នេរដ៏ស្រស់ស្អាតរបស់កម្ពុជា។

ដំណើរកម្សាន្តនេះមានគោលដៅពង្រឹងនូវចំណងមិត្តភាព សាមគ្គីភាព និងវេញត្របាញ់គ្នាជាធ្លុងមួយ។ តាមរយៈដំណើរកម្សាន្តនេះ យើងបានចែករំលែកនូវភាពសប្បាយរីករាយ ចែករំលែកនូវបទពិសោធន៍ពីគ្នាទៅវិញ ទៅមក ដើម្បីធ្វើយ៉ាងណាឱ្យការងាររបស់យើងកាន់តែមានភាពរីកចម្រើន និងទទួលបានការគាំទ្រច្រើនថែមទៀតពីមិត្តអ្នកអាន។

គេហទំព័រ Property Area ដែលបានដំណើរការរយៈពេល២ឆ្នាំកន្លងមកនេះ ទទួលបានការគាំទ្រយ៉ាងលើសលប់ ពីមិត្តអ្នកអានជាតិ និងអន្តរជាតិ ដោយមួយថ្ងៃមានអ្នកចូលអានចន្លោះពី១៥០០០ ទៅ៣០០០០នាក់ ដោយសារ Property Area ផ្ដោតលើព័ត៌មានប្រកបដោយក្រមសីលធម៌វិជ្ជាជីវៈ ផ្ដោតលើព័ត៌មានពិត ឥតលម្អៀង ដើម្បីផ្ដល់ជូនអ្នកអាននូវបណ្ដុំព័ត៌មានដែលអាចទុកចិត្តបាន។

ដោយសារមូលដ្ឋានព័ត៌មានរបស់យើងឈរលើមូលដ្ឋានពិតឥតលម្អៀង និងក្រមសីលធម៌វិជ្ជាជីវៈនេះហើយ យើងបានទទួលការគាំទ្រពីក្រសួងរៀបចំដែនដី នគរូបនីយកម្ម និងសំណង់ ដើម្បីផ្សព្វផ្សាយពីឯកសារបទដ្ឋានគតិយុត្តិ ច្បាប់ ពាក់ព័ន្ធរបស់ក្រសួង។

ថ្នាក់ដឹកនាំ និងក្រុមការងារគេហទំព័រ Property Area សូមថ្លែងអំណរគុណដល់លោកឧកញ៉ា នួន រិទ្ធី អគ្គនាយកក្រុមហ៊ុន KFA លោកឧកញ៉ាបណ្ឌិតគីម ហ៊ាង អគ្គនាយក KW Cambodia លោកស្រី តាំង ហួរ អគ្គនាយិកាក្រុមហ៊ុន Amatak Property Services ថ្នាក់ដឹកនាំក្រុមហ៊ុន Century21 Cambodia លោកធួន ស៊ីណាន នាយកគ្រប់គ្រងមជ្ឈមណ្ឌលពាណិជ្ជកម្ម និងពិរព័ណ B2B Park និងក្រុមថ្នាក់ដឹកនាំក្រុមហ៊ុនអចលនទ្រព្យ Greentee Realty Co, Ltd ដែលបានឧបត្ថម្ភក្នុងដំណើរកម្សាន្តដ៏សប្បាយរីករាយ និងបង្កើតតម្លៃនៃការចងចាំមួយសម្រាប់ទាំងអស់គ្នា៕

អ្នកជំនាញជំរុញឱ្យភ្នាក់ងារណែនាំភ្ញៀវវិនិយោគនៅខេត្តក្រុងចំនួន ៦នៅកម្ពុជា

ដោយ វុត្ថា

ភ្នំពេញ៖ អ្នកជំនាញអចលនទ្រព្យ លោក ច្រឹក សុខនីម បានជំរុញឱ្យភ្នាក់ងារអចលនទ្រព្យទាំងអស់ណែនាំភ្ញៀវដែលមកទាក់ទងខ្លួនអោយទៅវិនិយោគចំពោះខេត្តក្រុងចំនួន ៦ ដែលខេត្តក្រុងទាំងនោះមានលក្ខណៈវិនិយោគខុសគ្នាយ៉ាងណាក្តី តែមានសក្តានុពលខ្ពស់។

ខេត្តក្រុងទាំងនោះរួមមាន៖

១) ខេត្តព្រះសីហនុ

ខេត្តព្រះសីហនុបាននឹងកំពុងមានសក្តានុពលខ្ពស់លើការវិនិយោគវិស័យអចលនទ្រព្យ ខណៈបច្ចុប្បន្ននេះ រដ្ឋាភិបាលបាននឹងកំពុងរៀបចំហេដ្ឋារចនាសម្ព័ន្ធយ៉ាងល្អប្រសើរ រួមជាមួយនឹង ក៏បាននឹងកំពុងសាងសង់ប្រព័ន្ធផ្លូវហាយវ៉េ ដែលនឹងបង្កមានភាពកាន់តែងាយស្រួល ទាំងការធ្វើដំណើរ និងដឹកជញ្ជូន។

ម្យ៉ាងទៀត ក៏មានផ្លូវរថភ្លើង និងការពង្រីកអាកាសយានដ្ឋានអន្តរជាតិ ដែលជាកត្តាធំបំផុតក្នុងការវិយោគលើវិស័យផ្សេង ៗ ហើយអ្នកដែលមានដីនៅខេត្តនេះ នឹងទទួលបានផលច្រើន ។ បន្ថែមពីនេះ គឺជាខេត្តកំរូដែលទាក់ទាញការវិនិយោគបរទេសយ៉ាងច្រើន ជាពិសេសមកពីប្រទេសចិន ។

២) ខេត្តកំពត

ប្រពលរដ្ឋខ្មែរភាគច្រើនបានបង្វែទិសដៅទៅលេងខេត្តកំពតកាន់តែច្រើន ព្រោះខេត្តមួយនេះ មានសមុទ្រស្រសបំព្រងនិងជាពិសេសមានកន្លែងមើលអំពិលអំពែក ។ ហើយក្នុងមួយរយៈចុងក្រោយនេះ ខេត្តកំពតបាននឹងកំពុងទាក់ទាញអ្នកវិនិយោគជាតិ និងអន្តរជាតិយ៉ាងច្រើន ដែលចូលទៅវិនិយោគនៅក្នុងខេត្តមួយនេះ ។

ប្រការនេះ បានធ្វើឱ្យខេត្តមួយនេះទាក់ទាញលើវិនិយោគលើវិស័យអចលនទ្រព្យ ដែលទាមទាឱ្យភ្នាក់ងារទាំងអស់ជួយណែនាំឱ្យអ្នកវិនិយោគទៅវិយោគនៅក្នុងខេត្តនេះ។

៣) ខេត្តសៀមរាប

បើទោះខេត្តសៀមរាបបណ្តុំទៅដោយបិតិកភណ្ឌវប្បធម៌ និងតំបន់អភិរក្សច្រើនយ៉ាងណាក្តី ក៏មានតំបន់ខ្លះនៅតែមានអាចវិនិយោគលើវិស័យវិស័យអចលនទ្រព្យបានផងដែរ ដែលអាចសាងសង់សណ្ឋាគារផ្ទះសំណាក់បាន។ បើចង់ឱ្យមានទេសចរណ៍ចូលទៅលេងកាន់តែច្រើន ត្រូវតែមានសណ្ឋាគារសំរាប់ស្នាក់នៅ ច្រើនផងដែរ មិនមែនមានភ្ញៀវច្រើនហើយ គ្មានកន្លែងគ្រប់គ្រាន់ឱ្យពួកគេស្នាក់នៅនោះទេ ។

៤) ខេត្តកំពង់ស្ពឺ

ភាគច្រើនមនុស្សមួយតែងមើលរំលង ចំពោះខេត្តកំពង់ស្ពឺ ដោយមិនដឹងថា ខេត្តមួយនេះមានសក្តានុពលខ្ពស់លើវិស័យអចលនទ្រព្យចំពោះខេត្តមួយនេះ ។ ចំពោះដីធ្លីមានតម្លៃធូថ្លៃដែលអាចទិញទុកសម្រាប់ធ្វើការវិនិយោគបន្ត ហើយបន្តមានការថ្លៃនិងចំណេញខ្ពស់ ដែលទាមទាឱ្យភា្នក់ងារទាំងអស់ណែនាំ អ្នកវិនិយោគ និងកែឆ្នៃឱ្យទៅជារបស់ផ្សេងៗ។

៥) ខេត្តកណ្តាល

ការវិនិយោគអចលនទ្រព្យនៅក្នុងខេត្តកណ្តាលធ្វើឱ្យឆាប់ទទួលបានផលចំណេញ ព្រោះខេត្តមួយនេះ មានសក្តានុពល និងហុំព័ន្ធជាប់ភ្នំពេញ ជាពិសេសនៅតាមបណ្តោយផ្លូវជាតិលេខ ៦ ផ្លូវជាតិលេខ ៥ និង កន្លែងផ្សេង ។ បន្ថែមពីនេះ គឺមានគម្រោងបុរី និងផ្ទះល្វែងជាច្រើនបាននឹងកំពុងវិនិយោគនៅខេត្តកណ្តាលនេះ។

៦) ទីក្រុងភ្នំពេញ

ទីក្រុងភ្នំពេញ គឺជាមជ្ឈមណ្ឌលវប្បធម៌ សេដ្ឋកិច្ច និងនយោបាយនៃប្រទេសកម្ពុជា ហើយវិស័យអចលនទ្រព្យមានការរីកចំរើន និងធ្វើការវិនិយោគ ជាពិសេស តំបន់ខាងលិច ឈាងខាងជើងដែលមានការអភិវឌ្ឍន៍យ៉ាងលឿន រាប់ចាប់ពីតំបន់កប់ស្រូវតទៅ៕

ក្រុមហ៊ុន Century21 Cambodia នឹងបើកការិយាល័យ ៣៨ បន្ថែម ដើម្បីឆ្លើយតបនឹងតម្រូវការសេវាអចលនទ្រព្យនៅតាមបណ្តាខេត្ត

ដោយ ប៊ី

ភ្នំពេញ៖ ដើម្បីឆ្លើយតបនឹងកំណើនតម្រូវការសេវាអចលនទ្រព្យនៅតាមបណ្តាខេត្ត ក្រុមហ៊ុន Century21 Cambodia គ្រោងពង្រីកប្រតិបត្តិការរបស់ខ្លួនឲ្យបានគ្របដណ្តប់នៅទូទាំងប្រទេសកម្ពុជាចាប់ពីដើមឆ្នាំ ២០២០ នេះតទៅ ដោយបើកការិយាល័យថ្មី ៣៨ បន្ថែម។

ការិយាល័យថ្មីទាំង ៣៨ នេះនឹងដំណើរការក្រោមឈ្មោះ Century21 Zillion Holding ដែលជាក្រុមហ៊ុនថ្មីមួយក្នុងចំណោមក្រុមហ៊ុនទាំង ២៣ នៅកម្ពុជាដែលបានទទួលសិទ្ធធ្វើអាជីវកម្មលើម៉ាកយីហោក្រុមហ៊ុន Century21 នៅកម្ពុជា។ ខុសប្លែកពីក្រុមហ៊ុនរួមគ្រួសារ Century21 ផ្សេងទៀតបន្តិច ប្រតិបត្តិការរបស់ ក្រុមហ៊ុន Century21 Zillion Holding នឹងផ្តោតសំខាន់តែលើទីផ្សារដីធ្លីប៉ុណ្ណោះរួមមានការទិញ លក់ និងជួល។

លោកស្រី ហ្គ្រែស រចនីហ្វុង អគ្គនាយិកាក្រុមហ៊ុន Century21 Cambodia បានលើកឡើងថា ក្នុងចំណោមការិយាល័យថ្មីទាំង ៣៨ មានការិយាល័យ ១៤ នឹងដាក់ទីតាំងនៅខណ្ឌទាំង ១៤ នៅក្នុងរាជធានីភ្នំពេញ (ខណ្ឌមួយ ការិយាល័យថ្មីមួយ) ខណៈការិយាល័យ ២៤ ទៀតនឹងបើកនៅតាមខេត្តទាំង ២៤ នៅកម្ពុជា។

ស្របពេលការិយាល័យថ្មីនេះ គ្រោងចាប់ផ្តើមដំណើការនៅដើមឆ្នាំ ២០២០ ខាងមុខ លោកស្រី រចនីហ្វុង បានបញ្ជាក់ថា ក្រុមហ៊ុនកំពុងស្វែងរកទីតាំងដែលមានសក្តានុពលដើម្បីបើកដំណើរការការិយាល័យទាំង ៣៨ នេះ។

លោកស្រីបញ្ជាក់ថា “សម្រាប់បងប្អូន ម្ចាស់អចលនទ្រព្យដែលមានទីតាំងល្អៗនៅតាមបណ្តាខេត្ត ខណ្ឌទាំងអស់ សូមទាក់ទងមកក្រុមកាងាររបស់ Century21 Cambodia ដើម្បីឲ្យយើងបានដឹង និងពិនិត្យទីតាំងនោះដើម្បីជួលបើកការិយាល័យឲ្យចំទីកន្លែងសម្រាប់ភាពងាយស្រួលដល់អតិថិជន។

យើងនៅមានសក្តានុពលច្រើនណាស់ក្នុងការពង្រីកការិយាល័យ Century21 នៅប្រទេសកម្ពុជា ស្របពេលបណ្តាខេត្តជាច្រើនកំពុងមានកំណើនទិញលក់ដីធ្លីទាំងសម្រាប់យកចំណេញ និងសម្រាប់អភិវឌ្ឍន៍គម្រោងផ្សេងៗ”។

លោកស្រី ហ្គ្រែស រចនីហ្វុងបញ្ជាក់ថា “យើងរំពឹងថា ការិយាល័យថ្មីរបស់យើងទាំង ៣៨ នឹងជួយបំពេញចន្លោះដែលធ្លាប់ខ្វះខាតកន្លងមក ហើយនឹងរួមចំណែកជំរុញការអភិវឌ្ឍន៍ទីផ្សារអចលនទ្រព្យប្រកបដោយនិរន្តរភាព”។

ក្រុមហ៊ុន Century21 Zillion Holding គឺជាក្រុមហ៊ុនដែលបង្កើតឡើងដោយមានការសហការវិនិយោគដោយភាគទុនិកពីម្ចាស់ Franchise របស់សមាជិកគ្រួសារ Century21 ដែលមានស្រាប់ ដោយសារភាគទុនិកបានស្គាល់ច្បាស់ពីសក្តានុពលនៃយីហោក្រុមហ៊ុន Century21 និងជឿជាក់លើដំណើរការវិជ្ជមាននៃវិស័យអចលនទ្រព្យកម្ពុជា។

គិតមកទល់ពេលនេះ ក្រុមហ៊ុន Century21 Zillion Holding បានរៀបចំនីតិវិធីសំខាន់ៗដើម្បីអនុវត្តន៍គម្រោងនេះស្ទើររួចរាល់អស់ហើយ។ ក្រុមហ៊ុនបានចុះបញ្ជីស្របច្បាប់ និង មានអជ្ញាប័ណ្ណត្រឹមត្រូវពីបណ្តាក្រសួងពាក់ព័ន្ធ ហើយទន្ទឹមនេះ ក្រុមហ៊ុនក៏មានធនធានមនុស្សគ្រប់គ្រាន់ដោយបានជ្រើសរើសប្រធានសាខាប្រចាំការិយាល័យនីមួយៗរួចជាស្រេច។

ធនធានមនុស្សសម្រាប់ការិយាល័យថ្មីទាំង ៣៨ ត្រូវបានជ្រើសរើសដោយយកចិត្តទុកដាក់ ហើយត្រូវបានក្រុមហ៊ុនផ្តល់វគ្គបណ្តុះបណ្តាលយ៉ាងត្រឹមត្រូវដោយមានគ្រូបណ្តុះបណ្តាលជាអ្នកជំនាញក្នុងវិស័យអចលនទ្រព្យទាំងក្នុង និងក្រៅប្រទេស។

យោងតាមលោកស្រី ហ្គ្រែស រចនីហ្វុង វិស័យអចលនទ្រព្យកម្ពុជាបានទទួលលទ្ធផលគួរជាទីពេញចិត្តសម្រាប់ឆ្នាំ ២០១៩ ដោយសារទីផ្សារសំណង់លំនៅដ្ឋាន ទីផ្សារអគារការិយាល័យ និង សំណង់សម្រាប់វិស័យពាណិជ្ជកម្មផ្សេងៗបានបន្តលូតលាស់យ៉ាងរឹងមាំ។

កំណើនគម្រោងទាំងនេះ បានផ្តល់ផលវិជ្ជមានយ៉ាងខ្លាំងដល់ទីផ្សារដីធ្លី ដែលបានធ្វើឲ្យតម្លៃ និងប្រតិបត្តិការទិញលក់មានការកើនឡើង។

លោកស្រីថ្លែងថា “តម្រូវការទិញលក់អចលនទ្រព្យនឹងនៅតែល្អសម្រាប់ឆ្នាំ ២០២០ ខាងមុខ ហើយទី ផ្សារដីធ្លីនៅតាមបណ្តាខេត្តទាំងអស់ ជាពិសេសខេត្តសំខាន់ៗដូចជា កំពត កែប ព្រះសីហនុ កំពង់ចាម សៀមរាប បាត់ដំបង និងខេត្តកោះកុងជាដើមនឹងមានសកម្មភាពទិញលក់ដីធ្លីកាន់តែរស់រវើក”។

លោកស្រីបន្ថែមថា “យើងឃើញមានវិនិយោគិនក្រៅប្រទេសដូចជាមកពី សិង្ហបុរី និង ជប៉ុន ជាដើមបន្ថែមលើវិនិយោគិនដែលមានស្រាប់ដូចជាចិន ហើយពួកគេបានចាប់ផ្តើមមកអភិវឌ្ឍខុនដូ និង គម្រោងអចលនទ្រព្យផ្សេងទៀតនៅកម្ពុជា ដែលជាសញ្ញាល្អមែនទែនសម្រាប់ទីផ្សារអចលនទ្រព្យនារយៈពេលយូរទៅមុខទៀត”៕

អ្នកជំនាញ៖ ការិយាល័យបែបសហកម្មសិទ្ធិនឹងមានប្រជាប្រិយភាពនាពេលដ៏ខ្លីខាងមុខ

ដោយ ប៊ី

ភ្នំពេញ៖ អ្នកជំនាញក្នុងវិស័យអចលនទ្រព្យមួយរូប បានអះអាងថា ការិយាល័យជួលបែបកន្លែងធ្វើការរួម ឬបែបសហកម្មសិទ្ធិ (co-working space) នឹងមានប្រជាប្រិយភាពនាពេលខាងមុខដ៏ខ្លី ខណៈក្រុមហ៊ុនតូចៗដែលជួលផ្ទះល្វែងសម្រាប់ធ្វើជាការិយាល័យមានការវិវត្តន៍ទៅជួលក្នុងអាគារការិយាល័យច្រើន។

លោក Ken Lo អគ្គនាយកក្រុមហ៊ុន Century21 Imperial Realtyបានថ្លែងនៅថ្ងៃទី ១៩ ខែធ្នូ ឆ្នាំ ២០១៩ នេះ ថា រយៈបីឆ្នាំកន្លងមកនេះ គេឃើញមានក្រុមហ៊ុនតូចៗដែលជួលផ្ទះល្វែងក្នុងតម្លៃ ៥០០ ឬ ៨០០ ដុល្លារ ឥឡូវឃើញគាត់មានការវិវត្តន៍ទៅជួលក្នុងអាគារការិយាល័យច្រើន ស្របពេលរយៈពេល ៣ ឆ្នាំចុងក្រោយនេះ អាគារខ្ពស់ចាប់រីកស្គុះស្គាយច្រើន ជាពិសេសក្នុងតំបន់សក្កានុពល ឬតំបន់ CBD (ខណ្ឌពាណិជ្ជកម្មកណ្តាល ឬតំបន់ទីប្រជុំ)។

លោក បានថ្លែងថា “ក្នុងរយៈ៣ ឬ៥ឆ្នាំខាងមុខទៀត ក្រុមហ៊ុនឯកជនដែលជួលផ្ទះល្វែងតម្លៃចន្លោះពី ៥០០ ទៅ ១០០០ ដុល្លារ គឺគាត់នឹងវិវត្តន៍ខ្លួនទៅជួលក្នុងអាគារការិយាល័យ ឬពេលក៏គាត់ (ក្រុមហ៊ុន) មានលទ្ធភាពអត់គ្រប់គ្រាន់ ឬមានបុគ្គលិកតិច គាត់ក៏អាចជួលនៅអាគារការិយាបានដែរ ព្រោះយើងមានការិយាល័យបែបចែករំលែក (co-working space) ដែលមានសម្បូរបែបផងដែរ”។

លោក បានបន្តថា “អាគារដែលមាន co-working space នឹងប្រជាប្រិយភាពរយៈពេលខ្លីខាងមុខនេះ ព្រោះវាអាចជួលលើកមុខមាត់ក្រុមហ៊ុនរបស់គាត់បានមួយកម្រិតផងដែរ”។ នៅពេលដែលជាភ្នាក់ងារអចលនទ្រព្យ ក្រុមហ៊ុនបរទេសធំឈានចូលមកទីផ្សារនៅកម្ពុជា និងក្រុមហ៊ុនទាំងនេះនឹងរកកន្លែងការិយាល័យជួល និងចង់ដឹងថាតើក្រុមហ៊ុនគាត់គួរតែទៅទីតាំង ឬអាគារមួយណាដែលល្អ។

តែយើងត្រូវសិក្សាពីលក្ខខណ្ឌ និងអាជីវកម្មរបស់គាត់ ដូច្នេះយើងអាចណែនាំគាត់ទៅរកកន្លែងមួយដែលសក្តសមសម្រាប់គាត់។

លោក Ken Lo បានថ្លែងថា “ខ្ញុំមានជំនាញខាងវិស័យ Commercial real estate ដែលរួមវិស័យការិយាល័យ ហើយការិយាល័យត្រូវបានបែងចែកជាកម្រិត A B និងC។

ជាទូទៅការិយាល័យកម្រិត C មានតម្លៃចន្លោះ ១០ ឬក្រោម១០ ដុល្លារក្នុងមួយម៉ែត្រការ៉េ កម្រិតBមានតម្លៃចន្លោះពី ១០ ទៅ ២០ ដុល្លារ និងកម្រិតAដែលតម្លៃខ្ពស់ជាងគឺចាប់ពី ២៥ រហូត ៤០ ដុល្លារ”។

អាគារកម្រិត A មានដូចជា អាគារ Exchange Square អាគារវឌ្ឍនៈ និងអាគារ Royal One ដែលគ្រោងនឹងចូលទីផ្សារនាពេលខាងមុខ។

បច្ចុប្បន្នមានតំបន់ ២ ទៅ៣ ដែលមានសក្កានុពលខ្លាំងជាងគេ ហើយតំបន់មានសក្កានុពលខ្លាំងជាងគេគឺតំបន់បឹងកេងកង១ កោះពេជ្រ និងតំបន់ផ្លូវភ្លោះកាណាឌីយ៉ាដែលតំបន់មជ្ឈមណ្ឌលហិរញ្ញវត្ថុ។ តំបន់ផ្សេងទៀតដែលជាតំបន់ពាណិជ្ជកម្ម និងលំនៅឋានខណ្ឌចំការមន បឹងកេងកង និងកោះពេជ្រមានអាគារច្រើនជាងគេ៕

ក្រសួងបរិស្ថានបានផ្តល់ដីព្រៃទំហំ ៤ម៉ឺន៥ពាន់ហិកតា ដល់ជនជាតិដើមភាគតិចរស់នៅក្នុងខេត្តមណ្ឌលគិរី

ដោយ វុត្ថា

មណ្ឌលគិរី៖ តំបន់ធនធានធម្មជាតិជីវចម្រុះនៅខេត្តមណ្ឌលគិរី ដែលមានផ្ទៃដីទំហំរាប់សិនហិកតា ស្ថិតក្នុងដែនជម្រកចំនួន៣ ក្រោមការគ្រប់គ្រងរបស់ក្រសួងបរិស្ថាន គឺដែនជម្រកសត្វព្រៃស្រែពក ដែនជម្រកសត្វព្រៃភ្នំព្រេច និងដែនជម្រកសត្វព្រៃកែវសីមា ត្រូវបានចុះកិច្ចព្រមព្រៀងប្រគល់ទៅឲ្យជនជាតិដើមភាគតិចរស់នៅក្នុងខេត្តមណ្ឌលគិរី។

ក្រសួងបរិស្ថាន បានបញ្ជាក់ថា ពួកគាត់គឺជាម្ចាស់ទឹកដី អាចជួយការពារថែរក្សា និងអាស្រ័យផលពីធម្មជាតិតាមប្រពៃណីដូនតា ថែមទាំងមានការជួយជ្រោមជ្រែងពីអាជ្ញាធរខេត្តមណ្ឌលគិរី មន្ទីរបរិស្ថាន និងអង្គការ WWF អង្គការ WCS ដោយគាំទ្រផ្ដល់ ទាំងផ្នែកសម្ភារៈបច្ចេកទេស ព្រមទាំងថវិកាផងដែរ។

ពិធីចុះកិច្ចព្រមព្រៀងសហគមន៍តំបន់ការពារធម្មជាតិទាំង ១២សហគមន៍ នៃដែនជម្រកសត្វព្រៃ ស្រែពក ភ្នំព្រេច និងកែវសីមា ជាមួយអគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន ដែលប្រព្រឹត្តទៅនៅភូមិអញ្ជ័រ ឃុំសុខសាន្ត ស្រុកកោះញែក នៅថ្ងៃទី១៩ ខែធ្នូ ឆ្នាំ២០១៩ ការប្រគល់ដីតំបន់ការពារលើផ្ទៃដីទំហំ ៤៥,០០០ហិកតា ជូនដល់សហគមន៍ទាំង១២ ដែលមានចំនួន២,៤៩៣គ្រួសារ ស្មើនឹង១២,៨០៤នាក់ ស្មើនឹង១៥% នៃចំនួនប្រជាជនក្នុងខេត្តមណ្ឌលគិរី ដែលទទួលបានផលប្រយោជន៍ដោយផ្ទាល់ និងប្រយោល ពីសហគមន៍តំបន់ការពារធម្មជាតិ៕

អ្នកជំនាញបង្ហាញតំបន់២ ដែលវិនិយោគអចលនទ្រព្យទទួលបានផលចំណេញ

ដោយ វុត្ថា

ភ្នំពេញ៖ អ្នកជំនាញអចលនទ្រព្យបានលើកឡើងថា ការវិនិយោគលើវិស័យអចលនទ្រព្យណាមួយត្រូវទាមទាឱ្យមាន ចំណេះដឹង និងការសិក្សាឱ្យបានស៊ីជម្រៅទៅលើទីតាំង ព្រមទាំងថវិកាដែលត្រូវវិនិយោគ អោយច្បាស់លាស់ ទើបការវិនិយោគនោះទទួលបានផលចំណេញ ។

លោក កាង សុធី អគ្គនាយក Century21 Land Station និងជាអ្នកជំនាញអចលនទ្រព្យ បានប្រាប់ទីតាំងចំនួន២ គឺខេត្តកំពង់ស្ពឺ និងទីតាំងផ្លូវជាតិលេខ ៦ A ម្តុំស្រុកមុខកំពូល គឺជាទីតាំងដែលកំពុងមានសក្តានុពលលើការវិនិយោគវិស័យអចលនទ្រព្យបច្ចុប្បន្នទទួលបានផលចំណេញ។

លោកពន្យល់ថា ទីតាំងខេត្តកំពង់ស្ពឺ គឺជាទីតាំងដែលមានសក្តានុពលខ្ពស់ ព្រោះជាខេត្តដែលនៅជាប់រាជធានីភ្នំពេញ និងមានផ្លូវសេដ្ឋកិច្ចទី ១ របស់កម្ពុជា ហើយអ្នកវិនិយោគជាច្រើនបាននឹងកំពុងងាកទៅរកខេត្តមួយនេះ ដោយសារតែកន្លងមករដ្ឋាភិបាលបានសម្រេចឱ្យរោងចក្រ សហគ្រាស និង ការសាងសង់អគារផ្សេងៗទៅបោះទីតាំងនៅតាមជាយក្រុង ដើម្បីបង្កមានភាពងាយស្រួលក្នុងការដឹកជញ្ជូលចេញចូល។

លោកបន្តថា ម្យ៉ាងទៀត ខេត្តកំពុងមានមនុស្សរស់នៅច្រើនស្រាប់ ហើយដីធ្លីមានភាពអំណោយផលព្រោះស្ថានដីគឺមានខ្ពង់រាបស្រាប់ ជាពិសេសខេត្តនេះ មានផ្លូវល្បឿនលឿននឹងបញ្ចប់នៅក្នុងឆ្នាំ ២០២២ ឆ្លងកាត់ខេត្តនេះ ដែលជួយឱ្យវិស័យអចលនទ្រព្យកាន់តែមានភាពទាក់ទាញ។

សម្រាប់នៅតាមផ្លូវជាតិលេខ ៦ A ម្តុំស្រុកមុខកំពូល លោក កាង សុធី ពន្យល់ថា បច្ចុប្បន្ន តំបន់នេះ គេបាននឹងកំពុងសាងសង់ស្តាតមរតកតេជោ និងមានគម្រោងបុរីធំៗជាច្រើន ដែលបង្កឱ្យមានភាពអំណោយផលច្រើនលើការវិនិយោគអចលនទ្រព្យ ។

លោកបនត្ថា ជាពិសេសតំបន់នេះ នៅប្រប់មាត់ទន្លេអមសងខាង និងមានស្ពានឆ្លងកាត់ច្រើន ដែលបង្កឱ្យមានភាពងាយស្រួលដល់ការធ្វើចរាចរណ៍ទៅមក ។ លោកបន្ថែមថា ផ្លូវជាតិលេខ ៦ A គឺមានសក្តានុពលខ្ពស់ណាស់ដោយសារ មនុស្សស្ទើតែកន្លះប្រទេសធ្វើដំណើរឆ្លងកាត់ ដែលជួយឱ្យការវិនិយោគអចលនទ្រព្យកាន់តែល្អ ។ តែត្រូវសួរខ្លួនឯងថា ត្រូវវិនិយោគក្នុងរយៈពេលវែង ឬ ក្នុងរយៈពេលខ្លី ។

លោកបញ្ជាក់ថា បើវិនិយោគក្នុងរយៈពេលខ្លី គឺត្រូវប្រើដើមទុនច្រើនដោយយ៉ាងហោចណាស់ មានដើមទុនប្រមាណ ១០ ម៉ឺនដុល្លារ តែបើវិនិយោគក្នុងរយៈពេលវែង យើងត្រូវប្រមូលថវិកាសហការគ្នាវិយោគលើធនាគារដី (Land Banking) នោះទើបទទួលបានផលចំណេញខ្ពស់៕

ការព្យាករណ៍៖ សេដ្ឋកិច្ចហ្វីលីពីននឹងហក់ឡើងសម្រាប់រយៈមធ្យមខាងមុខ

ដោយ Donald Lee

ភ្នំពេញ៖ រដ្ឋលេខាធិការផែនការសេដ្ឋកិច្ចសង្គមបាននិយាយកាលពីថ្ងៃ ពុធ ថា សេដ្ឋកិច្ចហ្វីលីពីននឹងបន្តកើនឡើងដល់ ៧,៥ ភាគរយរហូតដល់ឆ្នាំ ២០២២ ទោះបីមានការធ្លាក់ចុះនៃកំណើនសេដ្ឋកិច្ចពិភពលោកក៏ដោយ។

រដ្ឋលេខាធិការផែនការសេដ្ឋកិច្ចរបស់ហ្វីលីពីនលោក Ernesto Pernia មានប្រសាសន៍ថា “កំណើនផលិតផលសរុបក្នុងស្រុករបស់យើងត្រូវបានព្យាករថានឹងមានចន្លោះពី ៦ ទៅ ៦,៥ ភាគរយសម្រាប់ឆ្នាំ ២០១៩ និងពី ៦,៥ ទៅ ៧,៥ ភាគរយនៅឆ្នាំ ២០២០ ដល់ ២០២២”។

សេដ្ឋកិច្ចហ្វីលីពីនបានបន្តរីកចម្រើននៅឆ្នាំនេះ ហើយនៅតែជាប្រទេសមួយដែលមានសេដ្ឋកិច្ចរីកចម្រើនខ្លាំងបំផុតនៅអាស៊ី ខណៈប្រទេសដែលពឹងផ្អែកលើពាណិជ្ជកម្មដទៃទៀតនៅក្នុងតំបន់នេះរងផលប៉ះពាល់យ៉ាងខ្លាំងដោយសារសង្គ្រាមពាណិជ្ជកម្មរវាងអាមេរិកនិងចិន។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មរវាងអាមេរិកនិងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុនជាមួយតំបន់អាស៊ី។

លោក Pernia ក៏បាននិយាយផងដែរថា ការស្ទុះងើបឡើងនៃសេដ្ឋកិច្ចបានកាត់បន្ថយចំនួនប្រជាជនក្នុងភាពក្រីក្រយ៉ាងខ្លាំង។ នៅឆ្នាំ ២០១៥ ប្រជាជន ២៣,៥ លាននាក់ត្រូវបានរាយការណ៍ថាកំពុងរស់នៅក្នុងភាពក្រីក្រ។ ប៉ុន្តែនៅឆ្នាំ ២០១៨ ចំនួននេះបានថយចុះយ៉ាងខ្លាំងដល់ ១៧,៦ លាននាក់នៅឆ្នាំ ២០១៨។ លោក Pernia មានប្រសាសន៍ថា “នេះមានន័យថា យើងបានធ្វើឱ្យប្រជាជនហ្វីលីពីនចំនួន ៥,៩ លាននាក់ចេញពីភាពក្រីក្រនៅចន្លោះឆ្នាំ ២០១៥ និង ២០១៨”។

សេដ្ឋកិច្ចរបស់ហ្វីលីពីនស្ថិតនៅលើផ្លូវក្លាយប្រទេសសេដ្ឋកិច្ចធំទី ២ ក្នុងអាស៊ាន។ នេះបើយោងតាមការព្យាករណ៍សេដ្ឋកិច្ចអាស៊ីថ្មីដែលបានចេញផ្សាយកាលពីដើមខែនេះ។

មជ្ឈមណ្ឌលស្រាវជ្រាវសេដ្ឋកិច្ចជប៉ុន (JCER) បានបញ្ជាក់ថា ការផ្លាស់ប្តូរឌីជីថលនៃសេដ្ឋកិច្ចអាស៊ាននឹងជំរុញកំណើនផលិតផលសរុបក្នុងស្រុករបស់ហ្វីលីពីន។ របាយការណ៍របស់ JCER បាននិយាយថា ហ្វីលីពីនត្រូវបានគេរំពឹងថានឹងក្លាយជាប្រទេសអាស៊ានមានសេដ្ឋកិច្ចធំជាងគេទី ២ បន្ទាប់ពីឥណ្ឌូនេស៊ីទាក់ទងនឹងទំហំសេដ្ឋកិច្ច៕

កម្ពុជា-វៀតណាមកំពុងរិះរកវិធីដោះស្រាយការកកស្ទះចរាចរណ៍ទំនិញតាមរថយន្តនៅព្រំដែនអន្តរជាតិបាវិត

ដោយ វុត្ថា

ភ្នំពេញ៖ រដ្ឋាភិបាលកម្ពុជា និងវៀតណាមបាននឹងកំពុងរិះរកមធ្យោបាយដោះស្រាយ ការកកស្ទះចរាចរណ៍ទំនិញតាមរថយន្តនៅព្រំដែនអន្តរជាតិបាវិត ខណៈបច្ចុប្បន្ននេះមានកង់តឺនើរាប់រយគ្រឿងដែលដឹកទំនិញចេញ-ចូលនៃប្រទេសទាំងពីកំពុងមានការកកស្ទះយ៉ាងខ្លំាង។

លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងកម្មវិធីការចុះត្រួតពិនិត្យផ្ទាល់ច្រកសេដ្ឋកិច្ចបាវិត ជាមួយ លោក NGUYEN VAN THE រដ្ឋមន្ត្រី ដឹកជញ្ជូនវៀតណាមនៅថ្ងៃទី ១៩ ខែធ្នូ ឆ្នាំ ២០១៩ នេះថា ក្រោយចុះត្រួតពនិត្យនេះ ក្នុងដំណាក់កាលទី១ លោករដ្ឋមន្ត្រីនិងទៅប្រជុំជាមួយភាគីវៀតណាមនៅក្នុងប្រទេសវៀតណាមដើម្បីស្តាប់យោបល់ខាងភាគីវៀតណាម ដើម្បីដាក់ជូនទៅសម្តេចតេជោ ។

លោករដ្ឋមន្ត្រីបន្តថា ខាងភាគីវៀតណាមមានដីប្រមាណ ៥០ ហិកតាដើម្បីជាកន្លែងត្រួតពិនិត្យរួមគ្នាក្នុងការដោះស្រាយកកស្ទះរថយន្តដឹកទំនិញនេះស្របតាមប្រទេសនៅក្នុងមហាអនុតំបន់ទន្លេមេគង្គ និង អាស៊ានទាំងមូលផងដែរ ដើម្បីបង្កភាពងាយស្រួលក្នុងដឹកទំនិញចេញចូលនៃប្រទេសទាំងពីរ។

លោកបន្ថែមថា ខាងភាគីវៀតណាមចង់ស្នើសុំក្រុមហ៊ុនពិគ្រោះយោបល់អោយគូសប្លង់នៅលើដី ៥០ ហិកតា នេះ ឱ្យយើងត្រួតពិនិត្យ និងសម្រេច នៅពេលយើងបានគំរូប្លង់ហើយ យើងនឹងប្រជុំពិភាក្សាផ្ទៃក្នុងគ្រប់ក្រសួងស្ថាប័នពាក់ព័ន្ធ ដើម្បីដាក់របាយការណ៍ជូនសម្តេចតេជោ ហ៊ុន សែនសម្រេច ដើម្បីពិនិត្យ និងសម្រេច ជាចុងក្រោយ ព្រោះវាពាក់ព័ន្ធច្រើនទៅនឹងអធិតេយ្យភាព និងគយជាដើម។

លោកបន្តថា តែជាគោលការណ៍នៃអាស៊ាន គឺ គយវៀតណាមអាចធ្វើការនៅលើទឹកដីកម្ពុជា រីឯគយកម្ពុជាក៏អាចធ្វើការនៅលើទឹកដីវៀណាមបានផងដែរ ដើម្បីបង្កភាពងាយស្រួលក្នុងការដឹកទំនិញឆ្លងកាត់នៅតាមព្រំដែននៃប្រទេសមហាអនុតំបន់ទន្លេមេគង្គនេះ។

លោកទេសរដ្ឋមន្ត្រីបញ្ជាក់ថា បច្ចុប្បន្ននេះ មានរថយន្តដឹកទំនិញ មានរថយន្តដែលមានឯកសារគ្រប់គ្រាន់ និងមិនគ្រប់គ្រាន់ និងមានកុងតើនឺដែលឆ្លងកាត់ច្រកព្រំដែនបាវិតចំនួនប្រមាណ ៣៥០ ទៅ ៤០០ កុងតឺនើ ដែលធ្វើឱ្យមានកកស្ទះបន្តកន្ទុយគ្នា ដោយពេលខ្លះជាប់រ៉ាប់ម៉ោង៕

Yi Fang Taiwan Fruit Tea ហាងតែ ផែ្លឈើ ដែលមានសាខាជាង១៥០០ ទីតាំងលើសាកលលោក បានឈានចូលទីផ្សារកម្ពុជាហើយ

ដោយ ៖ រ៉ាណេត

ភ្នំពេញ ៖ ហាងតែផ្លែឈើ ដែលផ្តោតសំខាន់ទៅលើការថែទាំ និងបំប៉នសុខភាពដ៏ល្បីឈ្មោះរបស់តៃវ៉ាន់ មានសាខាច្រើនជាង ១ ៥០០ ទីតាំងនៅលើសាកលលោក Yi Fang Taiwan Fruit Tea បានបង្ហាញវត្តមាន នៅលើទីផ្សារកម្ពុជា ជាលើកដំបូង។

ជាមួយនឹងការបង្ហាញវត្តមានជាលើកដំបូងនៅលើទីផ្សារកម្ពុជា ដោយការបើកលក់សាកល្បងកាលពីថ្ងៃទី១៨ ខែធ្នូ ឆ្នាំ២០១៩ ម្សិលមិញនេះ ស្ថិតនៅខាងក្រោយអគារពាណិជ្ជកម្មកាណាឌីយ៉ា សង្កាត់វត្តភ្នំ ខណ្ឌដូនពេញ រាជធានីភ្នំពេញ Yi Fang Taiwan Fruit Tea ដែលជាហាងលក់ភេសជ្ជៈប្រភេទតែផ្លែឈើ រូបមន្តស្ករម្នាស់ ដែលមានអាយុកាលជាង១០០ឆ្នាំ និងល្បីឈ្មោះបំផុតប្រចាំនៅតៃវ៉ាន់ ត្រូវបានទទួលការសាទរ និងគាំទ្រពីសំណាក់បណ្តាអតិថិជនជាតិ និងអន្តរជាតិយ៉ាងលើសលប់បំផុត។

នាយកគ្រប់គ្រងទូទៅ ហាងលក់ភេជ្ជៈប្រភេទតែផ្លែឈើ ដែលមានប្រយោជន៍ចំពោះសុខភាព Yi Fang Taiwan Fruit Tea លោក លី តិចស៊្រុន បានមានប្រសាសន៍ប្រាប់ថា Yi Fang Taiwan Fruit Tea ត្រូវបានទិញ Franchise និងនាំចូលមកកាន់ទីផ្សារកម្ពុជាដោយក្រុមហ៊ុន Highland Food & Beverage Co.,Ltd ដែលជាក្រុមហ៊ុនក្នុងស្រុក។

លោកបន្តទៀតថា “ក្រុមហ៊ុនលក់ភេសជ្ជៈប្រភេទតែផ្លែឈើមួយនេះទើបតែបង្កើតឡើងកាលពី៣ឆ្នាំមុនតែប៉ុណ្ណោះ ប៉ុន្តែមានភាពលេចធ្លោ និងល្បីល្បាញយ៉ាងខ្លាំង ដោយបានពង្រីកសាខាច្រើនជាង ១៥០០ទីតាំងនៅតាមបណ្តាប្រទេសនានាលើសាកលលោក ដូចជា សហរដ្ឋអាមេរិក ចក្រភពអង់គ្លេស កាណាដា អូស្ត្រាលី ហុងកុង ថៃ វៀយណាម និងប្រទេសដទៃទៀត ខណៈដែលកម្ពុជាទើបតែចាប់ផ្តើមបង្ហាញវត្តមាន”។

លោក លី តិចស្រ៊ុន បានមានប្រសាសន៍បន្តទៀតថា “ភាពល្បីល្បាញរបស់ ភេសជ្ជៈ តែផ្លែឈើ រូបមន្តដើមពីតៃវ៉ាន់មួយនេះ គឺដោយសារតែមានលក្ខណៈពិសេសជាងគេជាច្រើន ដោយក្រៅពីប្រើស្ករម្នាស់ដែលជារូបមន្តដើមមានអាយុកាលជាង ១០០ឆ្នាំនោះ គឺគ្រប់សារធាតុនៃគ្រឿងផ្សំទាំងអស់ដូចជាផ្លែឈើ ស្កររម្ងាស់ ទឹកដោះគោ សុទ្ធតែប្រាកដថាមានលក្ខណៈធម្មជាតិដែលមានគុណភាពកម្រិតស្តង់ដារ និងគ្មានសារធាតុគីមី ហើយផ្តោតសំខាន់ទៅលើការប្រើប្រាស់ផលិតផលក្នុងស្រុក លើកលែងតែ តែ ត្រូវបាននាំយកមកពីតៃវ៉ាន់ផ្ទាល់។

លក្ខណៈពិសេសមួយទៀតរបស់ Yi Fang Taiwan Fruit Tea គឺគ្រប់ប្រភេទ និងគ្រប់រសជាតិទាំងអស់គឺ មិនត្រូវបានប្រើសារធាតុស្ករផ្អែម ដែលអាចប៉ះពាល់ដល់សុខភាពនោះទេ ពោលគឺអាចទទួលទានបានគ្រប់វ័យ មិនបណ្តាលឱ្យឡើងទម្ងន់ ឡើងជាតិស្ករ ឬប្រតិកម្មចំណីអាហារនោះទេ ដែលសូម្បីតែអ្នកជម្ងឺក៏អាចទទួលទានបាន ហើយថែមទាំងអាចជួយថែទាំ និងបំប៉នសុខភាពបានទៀតផង”។

ពាក់ព័ន្ធទៅនឹងការប្រកួតប្រជែងនៅលើទីផ្សារ លោក លី តិច ស្រ៊ុន បានលើកឡើងថា បច្ចុប្បន្នសម្រាប់មុខជំនួញប្រភេទនេះគឺមានការលូតលាស់ច្រើន ប៉ុន្តែលោកនៅតែមានទំនុកចិត្តខ្ពស់ក្នុងការចាប់យកអតិថិជនគោលដៅ។ លោកបានបញ្ជាក់ថា “ដោយសារតែកំណើនសេដ្ឋកិច្ចកម្ពុជានៅតែអាចរក្សាបានអត្រាខ្ពស់ បានជំរុញឱ្យចំណូលរបស់ប្រជាពលរដ្ឋមានភាពល្អប្រសើរ។

នៅពេលដែលមនុស្សមានចំណូលសមរម្យ ពួកគេនឹងគិតទៅលើបញ្ហាសុខភាពជាចម្បង ជាពិសេសចំណីអាហារទាំងឡាយណាដែលមានគុណភាព និងល្អប្រសើរចំពោះសុខភាព ដូច្នេះសម្រាប់ Yi Fang Taiwan Fruit Tea ហាក់មិនមានក្ដីបារម្ភនោះទេ ហើយនៅថ្ងៃខាងមុខនេះ ខ្ញុំនឹងពង្រីកសាខាឱ្យបានទូលាយបន្ថែមទៀត បន្ទាប់ពីបើកសម្ពោធជាផ្លូវការណ៍នៅដើមឆ្នាំ២០២០ឆាប់ៗខាងមុខនេះ”៕

ក្រុមហ៊ុនជប៉ុនដ៏ធំមួយនឹងផ្លាស់ប្តូរការផលិតម៉ាស៊ីនវីដេអូហ្គេមពីចិនមកកម្ពុជា

ដោយ ប៊ី

ភ្នំពេញ៖ អ្នកនាំពាក្យក្រុមហ៊ុនផលិតឧបករណ៍អេឡិចត្រូនិចជប៉ុននេះនឹងផ្លាស់ប្តូរផ្នែកនៃការផលិតម៉ាស៊ីនវីដេអូហ្គេមរបស់ខ្លួនមកប្រទេសកម្ពុជាពីប្រទេសចិន ដោយសារលទ្ធផលនៃជម្លោះពាណិជ្ជកម្មរវាងអាមេរិក និងចិននៅតែមានភាពមិនប្រាកដប្រជា។

ក្រុមហ៊ុនអ្នកផ្គត់ផ្គង់អោយក្រុមហ៊ុនវីដេអូហ្គេមយក្សដ៏ធំមួយរបស់ជប៉ុនមួយនេះ បានកើតឡើង បន្ទាប់ពីអាមេរិកបានលុបចោលការដាក់ទណ្ឌកម្មពន្ធដែលបានគ្រោងទុកនៅលើវីដេអូហ្គេមក្នុងចំណោមផលិតផលផ្សេងទៀតត្រូវបានដឹកជញ្ជូនពីចិន។

ក្រុមហ៊ុននេះ នឹងធ្វើឱ្យការធ្វើឱ្យប្រសើរឡើងដល់រោងចក្ររបស់ខ្លួនដែលមានទីតាំងស្ថិតនៅក្នុងតំបន់សេដ្ឋកិច្ចពិសេសក្នុងរាជធានីភ្នំពេញដែលគ្រោងនឹងមានការផ្គុំឧបករណ៍ហ្គេមវីដេអូសម្រាប់នាំចេញជាមួយនឹងពេញសមត្ថភាពចាប់ពីឆ្នាំ ២០២០។

អ្នកនាំពាក្យបាននិយាយថា ផលិតកម្មបានចាប់ផ្តើមបានផ្នែកមួយចំនួនហើយ ខណៈពេលអ្នកនាំពាក្យរូបនេះបានបដិសេធមិនបង្ហាញពីចំនួនទឹកប្រាក់នៃការវិនិយោគ ឬសមត្ថភាពផលិតកម្មដែលបានគ្រោងទុក។ លោកបាននិយាយថា ពួកគេគ្រោងនឹងបង្កើនផលិតកម្មនៅកម្ពុជាជារួម ដែលបច្ចុប្បន្នពួកគេផលិតផលិតផលដូចជាគ្រាប់បាដាង (ball bearings) និងអំពូល LED និងបង្កើនចំនួនកម្មករពីពី ៧០០០ នាក់រហូតដល់ ២០ ០០០ នាក់នៅពីរបីឆ្នាំខាងមុខ។

ក្រុមហ៊ុននេះ បានបង្ហាញនៅក្នុងខែ កក្កដា ថានឹងមាននូវផែនការរបស់ខ្លួនក្នុងការផ្លាស់ប្តូរផ្នែកខ្លះនៃផលិតកម្មវីដេអូហ្គេមដោយប្តូរពីចិនទៅវៀតណាម។

ក្រុមហ៊ុន បានឱ្យដឹងនៅក្នុងសេចក្តីថ្លែងការណ៍រួមចេញផ្សាយកាលពីខែ មិថុនា ថា ការសម្រេចចិត្តផ្លាស់ប្តូរផលិតកម្មវីដេអូហ្គេមដ៏មានប្រជាប្រិយភាពនេះត្រូវបានធ្វើឡើងដើម្បីចៀសវាងភាពមិនប្រាកដប្រជានាពេលអនាគត បន្ទាប់ពីការប្រឆាំងនឹងពន្ធរបស់អាមេរិក៕