សាខាពន្ធដារខេត្តព្រះសីហនុ ប្រមូលពន្ធលើមធ្យោបាយដឹកជញ្ជូនបានជិត ២លានដុល្លារ

ដោយៈ រ៉ាណេត

ព្រះសីហនុៈ នៅក្នុងឆ្នាំ២០១៩នេះ សម្រាប់ការប្រមូលពន្ធទៅលើមធ្យោបាយដឹកជញ្ជូនគ្រប់ប្រភេទនៅទូទាំងខេត្តព្រះសីហនុ មានចំនួនប្រមាណជិត២លានដុល្លារអាមេរិក ខណៈចំនួនយានយន្តសរុបជាង១៣០០០គ្រឿង។

ប្រធានសាខាពន្ធដារខេត្តព្រះសីហនុ លោកសន ស៊ីផល បានមានប្រសាសន៍ឱ្យដឹង នៅថ្ងៃទី១៧ ខែធ្នូ ឆ្នាំ២០១៩នេះថា ការប្រមូលពន្ធលើមធ្យោបាយដឹកជញ្ជូនគ្រប់ប្រភេទប្រចាំឆ្នាំ ២០១៩ គឺចាប់ពីខែមិថុនា រហូតដល់ថ្ងៃទី៣០ ខែវិច្ឆិកា ឆ្នាំ២០១៩ សាខាពន្ធដារខេត្តព្រះសីហនុ ប្រមូលពន្ធលើមធ្យោបាយដឹកជញ្ជូនបានចំនួន ១៣,០៦៩គ្រឿង និងបា្រក់ពន្ធមានចំនួន ៧, ០៦៩,៥៣០០០០រៀល ស្មើនឹងជិត២លានដុល្លារ។ បើប្រៀបធៀបរយៈពេលដូចគ្នាឆ្នាំ២០១៨ មានការកើនឡើងរថយន្ត១២៥៨គ្រឿង ស្មើនឹង ១០,៦៥ ភាគរយ និងប្រាក់ពន្ធកើនឡើង១,៤០២, ៣៩០,០០០រៀល ស្មើ ២៤.៧៤ភាគរយ។

ចាប់ពីខែមករា ឆ្នាំ២០២០ ខាងមុខ មន្ត្រីសាខាពន្ធដារនឹងសហការជាមួយសមត្ថកិច្ចពាក់ព័ន្ធ ចុះត្រួតពិនិត្យលើមធ្យោ បាយដឹកជញ្ជូនគ្រប់ប្រភេទ ដែលធ្វើចរាចរណ៍លើដងផ្លូវសាធារណៈក្នុងខេត្តព្រះសីហនុ ដើម្បីប្រមូលថវិកាជូនជាតិ។ ឆ្នាំ២០១៨ ក្រោយពេលបិទបញ្ចប់ការបង់ពន្ធលើមធ្យាបាយដឹក ជញ្ជូនរួចមក មន្ត្រីសាខាពន្ធដា សហការជាមួយសមត្ថកិច្ច ចុះត្រួតពិនិត្យ រកឃើញយានយន្ត គ្រប់ប្រភេទបានជាង២០០គ្រឿង ដែលមិនបានចូលមកបង់ពន្ធ និងធ្វើការផាកពិន័យបានចំនួនជាង១០០លានរៀល។

លោក សន ស៊ីផល បន្តថា ដោយសារបច្ចុប្បន្នប្រជាពលរដ្ឋមានការយល់ដឹងកាន់តែច្រើនអំពីកាតព្វកិច្ចបង់ពន្ធគ្រប់ប្រភេទ ពួកគាត់បាននាំគ្នាចូលមកបង់ពន្ធនៅតាមសាខាពន្ធដារ និងតាមធនាគារ ដែលបានធ្វើកិច្ចសហប្រតិបត្តិការជាមួយ អគ្គនាយកដ្ឋានពន្ធដា មានដូចជា ធនាគារអេស៊ីលីដា ធនាគាសាធារណ: ធនាគារកាណាឌីយ៉ា ធនាគាវឌ្ឍនៈ និងធនាគារ ANZ ។

កាលពីឆ្នាំ២០១៨ សាខាពន្ធដារខេត្តព្រះសីហនុ ប្រមូលពន្ធលើមធ្យោបាយដឹកជញ្ជូនគ្រប់ប្រភេទបានចំនួន១១,៨១១គ្រឿង និងប្រាក់ពន្ធចំនួន ៥៦៦៧, ១៥០,០០០រៀល៕

ក្រសួងសាធារណការសហការជាមួយធនាគារ ADB ផ្តោតលើកិច្ចព្រមព្រៀងឆ្លងកាត់ព្រំដែន

ដោយៈ រ៉ាណេត

ភ្នំពេញៈ ក្រសួងសាធារណការ និងដឹកជញ្ជូន បានសហការជាមួយធនាគារអភិវឌ្ឍន៍ អាស៊ី (ADB) រៀបចំកិច្ចប្រជុំអនុគណៈកម្មាធិការគយ ; (CBTA) ជាលើកទី២ស្ដីពីកិច្ចព្រមព្រៀងឆ្លង់កាត់ព្រំដែនបណ្តោះអាសន្ន ដោយមានការចូលរួមពីមន្ត្រីជាន់ខ្ពស់មកពីបណ្តាប្រទេសក្នុងមហាអនុតំបន់មេគង្គ ដើម្បីគ្រប់គ្រងក្រុមហ៊ុនប្រតិបត្តិការដឹកជញ្ជូនឆ្លងកាត់ព្រំដែន។

សមាជិកនៅក្នុងមហាអនុតំបន់មេគង្គ ដែលរួមមានប្រទេសកម្ពុជា ថៃ ឡាវ វៀតណាម មីយ៉ាន់ម៉ា និងប្រទេសចិន រួមជាមួយនឹងវត្តមានរបស់លោកស្រី Ms. Kanya S, Sasradipoera អ្នកជំនាញការពាណិជ្ជកម្មជាន់ខ្ពស់ របស់ធនាគារអភិវឌ្ឍអាស៊ី បានចូលរួមនៅក្នុងកិច្ចប្រជុំអនុគណៈកម្មាធិការគយ (CBTA) ជាលើកទី២ ស្ដីពីកិច្ចព្រមព្រៀងឆ្លង់កាត់ព្រំដែនបណ្តោះអាសន្ន (Second Customs Subcommittee Meeting on Interim Transit Arrangement Under Cross-Border Transport Facilitation Agreement (CBTA) ដែលបានធ្វើឡើងនៅសណ្ឋាគារសុខាភ្នំពេញ កាលពីថ្ងៃទី១៧ ខែធ្នូ ឆ្នាំ២០១៩ ។

លោក នួន ច័ន្ទរិទ្ធ អគ្គនាយករងនៃអគ្គនាយកដ្ឋានគយ និងរដ្ឋាករកម្ពុជាបានលើកឡើងថា កិច្ចប្រជុំបណ្តាប្រទេសក្នុងមហាអនុតំបន់មេគង្គ គឺធ្វើឡើងក្នុងគោលបំណងពិភាក្សាស្វែងរកដំណោះស្រាយផ្នែកបច្ចេកទេស ក្នុងការគ្រប់គ្រងយានយន្តចេញ-ចូល ការគ្រប់គ្រង ក្រុមហ៊ុនប្រតិបត្តិការដឹកជញ្ជូនឆ្លងកាត់ព្រំដែន និងនីតិវិធីត្រួតពិនិត្យរបស់សមត្ថកិច្ចគយ ស្របតាមបទដ្ឋានគតិយុត្តពាក់ព័ន្ធនៃបណ្តាប្រទេសទាំងនេះ។

លោកបន្តទៀតថា “កិច្ចការទាំងអស់នេះ គឺធ្វើឡើងដើម្បីសំដៅដល់ការសម្រួល និងបង្កើនបរិមាណទំនិញនាំចេញ នាំចូលបន្ថែមទៀត នៅក្នុងបណ្ដាប្រទេសនៃមហាអនុតំបន់មេគង្គ”។

កាលពីពេលថ្មីៗកន្លងទៅនេះ រាជរដ្ឋាភិបាលកម្ពុជាបានលុបចោល ភ្នាក់ងារកម្ពុជានាវាចរ(កាំសាប) និងបានផ្អាកមិនឱ្យមានមន្ត្រីអគ្គនាយកដ្ឋានកម្ពុជា ត្រួតពិនិត្យទំនិញអាហរ័ណ នីហរ័ណ និងបង្ក្រាបការក្លែងបន្លំ (កាំកុងត្រូល) នៅតាមច្រកព្រំដែនសំខាន់ៗ ដើម្បីសម្រួលដល់នីតិវិធីនៃការធ្វើចរាចរណ៍ ទំនិញឆ្លងកាត់ព្រំដែនឱ្យមានលក្ខណៈសាមញ្ញ មានប្រសិទ្ធភាព តម្លាភាព ចំណាយតិច និងចំណេញពេលវេលា៕

ក្រុមហ៊ុនOCICគ្រោងប្រកាសបង្ហាញពីផែនការអភិវឌ្ឍន៍ថ្មីរបស់់ទីក្រុងកោះនរានៅចុងត្រីមាសទី១ឆ្នាំ២០២០

ដោយគង់ សូរិយា

ភ្នំពេញៈ ក្រុមហ៊ុន OCIC គ្រោងប្រកាស ពីផែនការលំអិតនៃការអភិវឌ្ឍន៍ទីក្រុងកោះនរានាខែមិនាខាងមុខនេះ ប្រសិនគ្មានការប្រែប្រួលអ្វីទេនោះ។ នេះបើតាមការឲ្យដឹងពីលោកទូច សំណាងអគ្គនាយករងក្រុមហ៊ុននេះ។

លោកបានមានប្រសាសន៍ឲ្យដឹងតាមទូរស័ព្ទ នាព្រលប់ថ្ងៃទី១៧ ធ្នូខាងមុខនេះថា បើតាមគំរោងការប្រកាសនេះ នឹងធ្វើឡើងនាខែមិនាខាងមុខនេះ ដែលការប្រកាសនេះ នឹងបង្ហាញពីទស្សនទាន នៃការអភិវឌ្ឍចម្រុះរបស់ទីក្រុងថ្មីមួយនេះ។

ទោះជាយ៉ាងណាលោមិនទាន់បញ្ជាក់ឲ្យដឹង ពីផែនការលំអិតនៃការអភិវឌ្ឍរបស់ទីក្រុងថ្មីនេះនោះទេ។

បច្ចុប្បន្នក្រុមហ៊ុន OCIC កំពុងចាក់បំពេញខ្សាច់ និងថ្ម លើទឹកដីដែលធ្លាប់ជាកោះ ហើយបាក់ដោយទឹកជំនន់កាលពីទសវត្សរ៍កន្លងមក ដែលការរៀបចំហេដ្ឋារចនាសម្ព័ន្ឋទីក្រុងថ្មីនេះ គ្រោងចំណាយប្រាក់រហូតដល់២០០០លានដុល្លារអាមេរិក។

លោកទូច សំណាងបានមានប្រសាសន៍ឲ្យដឹងផងដែរថា ជាមួយនឹងផែនការរៀបចំហេដ្ឋារចនាសម្ព័ន្ឋថ្មីនេះ ក្រុមហ៊ុនក៏កំពុងសិក្សាពីការសាងសង់ស្ពាន ក្នុងជម្រើសចំនួនពីរផងដែរ ដោយជម្រើសទី១ សាងសង់ស្ពាននៅលើទន្លេដែលតភ្ជាប់ពីទីក្រុងកោះពេជ្រ ទៅកាន់ទីក្រុងកោះនរា ដោយគ្រោងចំណាយប្រាក់ប្រមាណ៦០លានដុល្លារ និងជម្រើសទី២ គឺគំរោងសាងសង់ស្ពានក្រោមទន្លេ ដែលគ្រោងចំណាយទឹកប្រាក់២០០លានដុល្លារអាមេរិក។

គំរោងស្ពានទាំងពីរនេះ នឹងត្រូវជ្រើសរើសមួយក្នុងចំណោមពីរ ហើយស្ពានទាំងពីរនេះមានប្រវែងប្រមាណ១០០០ម៉ែត្រ។

ទីក្រុងកោះនរា ដែលស្ថិតក្នុងសង្កាត់់និរោធ ខ័ណ្ឌច្បារអំពៅ នឹងមានប្រវែងសរុប ៣,៥គីឡូម៉ែត្រ និងលយចូលទន្លេប្រវែងប្រមាណ៣៥០ម៉ែត្រ។

ទីក្រុងថ្មីនេះស្ថិតនៅភាគខាងកើត ឈៀងខាងជើងនៃទីក្រុងកោះពេជ្របច្ចុប្បន្ននេះ ដែលកាលពីដើមឡើយតំបន់នេះជាកោះ ប៉ុន្តែត្រូវបាក់ស្រុតចដោយសារទឹកជំនន់ទន្លេមេគង្គ៕

ចាកចេញពីអាជីពផ្នែកថែរក្សាសម្ផស្ស លោកស្រីតាំង ហួរបានវិវត្តន៍ខ្លួនក្លាយជាអ្នកដឹកនាំក្រុមហ៊ុនអចលនទ្រព្យដ៏ឆ្នើមមួយរូប

ដោយ ប៊ី

ភ្នំពេញៈ ឆាកជីវិតមនុស្សពិតជាត្រូវបត់បែនវែងឆ្ងាយ សម្របតាមពេលវេលា កាលៈទេសៈ ដើម្បីស្វែងរកអាជីពមួយដែលខ្លួនឯងចូលចិត្ត ហើយផ្តោតលើការពង្រឹងឆន្ទៈ ជាមួយការប្តេជ្ញាចិត្ត ដើម្បីឈានទៅទទួលបានជោគជ័យក្នុងពេលអនាគត។

លោកស្រីតាំង ហួរបានឆ្លងកាត់បទពិសោធន៍ជូរចត់ជាច្រើន ក្នុងឆាកជីវិត ហើយបានប្តូរអាជីពជាបន្តបន្ទាប់ រហូតក្លាយជានាយិកកាក្រុមហ៊ុនអចលនទ្រព្យ ដ៏ល្បីឈ្មោះ និងជោគជ័យនាពេលបច្ចុប្បន្ន។

ជាមួយនឹងភាពមមាញឹកការងារប្រចាំថ្ងៃ លើការងារក្នុងវិស័យអចលនទ្រព្យ លោកស្រីបានចំណាយពេលវេលាដ៏មានតម្លៃ ដើម្បីផ្តល់កិច្ចសម្ភាសន៍ដោយបានរាប់រៀបពីការងារប្រចាំថ្ងៃ និងបទពិសោធន៍ជោគជ័យរបស់លោកស្រី។

ស្ថិតក្នុងសម្លៀកបំពាក់ផ្លូវការជាអ្នកដឹកនាំក្រុមហ៊ុន ជាមួយស្នាមញញឹមរួសរាយរាក់ទាក់ លោកស្រី តាំង ហួរ អគ្គនាយិកាក្រុមហ៊ុន AMATAK PROPERTY SERVICE Co, Ltd បានប្រែក្លាយពីថៅកែហាងឈ្មោះថា Amatak Beauty Spa កាលពីឆ្នាំ2007 ដែលលោកស្រីបានចំណាយពេលអស់រយៈពេល7ឆ្នាំ ហើយក៏បានចាប់ផ្តើមបើកក្រុមហ៊ុនភ្នាក់អចលនទ្យថែមទៀត បន្ទាប់ពីឃើញឱកាស និងស្រឡាញ់វិស័យអចលនទ្រព្យ។

មើលឃើញឱកាស និងចាប់យកឱកាស ពិសេសជាការងារដែលលោកស្រីចូលចិត្ត លោកស្រីតាំង ហួរបាន ចាប់យកអាជីពជាភ្នាក់ងារអចលនវត្ថុ រហូតដល់បង្កើតបានក្រុមហ៊ុនភ្នាក់ងារអចលនទ្រព្យ Amatak Property Service Co, Ltdដែលមានឈ្មោះបោះសម្លេងរហូតដល់សព្វថ្ងៃនេះ។

ធ្លាប់តែជាស្ត្រីមេផ្ទះ និងធ្វើកិច្ចការងារផ្ទះ

ដំបូងឡើយ ពេលប្រឡូកក្នុងវិស័យនេះ លោកស្រីបានចាប់ផ្តើមទិញផ្ទះចាស់ៗ ហើយជុសជុលយកចំណេញកាលពី២០ឆ្នាំមុន។ នោះជាការងារដែលលោកស្រីបានឆ្លៀតពេលទំនេរក្រៅកិច្ចការងារក្នុងផ្ទះ។

រហូតមកឆ្នាំ២០១៤ លោកស្រីបានចាប់ផ្តើមឈានជើងចូល ក្នុងវិស័យអចលនទ្រព្យ បន្ទាប់មកលោកស្រីចាប់ផ្ដើមយល់ថា លោកស្រីស្រឡាញ់វិស័យអចលនទ្រព្យ និងចូលចិត្តដើរចេញខាងក្រៅច្រើន ដោយយល់ថាមានឱកាសច្រើន ដើម្បីធ្វើការទំនាក់ទំនងក្នុងវិស័យអចលនទ្រព្យដូចជាដើរការងារដីធ្លី និងទិញផ្ទះ។

លោកស្រីបានថ្លែងថា “ខ្ញុំចូលចិត្តដើរច្រើន ដើរហាលវាល ហាលថ្ងៃ គឺបងចូលអីចឹង…វិស័យនេះ តម្រូវការដើរជួបអតិថិជនច្រើន ដើរមើលផ្ទះ មើលដីច្រើន។ នេះគឺអ្វីដែលខ្ញុំចូលចិត្ត”។

ជាមួយនឹងទឹកចិត្តស្រលាញ់ លោកស្រីបានបើកក្រុមហ៊ុននេះ ក្នុងឆ្នាំ២០១៥ ជាលទ្ឋផល ក្រុមហ៊ុនភ្នាក់ងារអចលនទ្រព្យរបស់លោកស្រី បានទទួលជោគជ័យ និងគាំទ្រពីអតិថិជនជាតិ និងអន្តរជាតិជាប្រចាំ។

ពេលបើកដំណើរការដំបូងក្រុមហ៊ុន AMATAK Property Service Co, Ltd មានបុគ្គលិកតែម្នាក់ ឬ២នាក់ប៉ុណ្ណោះ តែរហូតមកដល់បច្ចុប្បន្ន ក្រុមហ៊ុនមានបុគ្គលរហូតទៅជិត២០នាក់ និងគ្រោងពង្រីកបន្ថែមទៀតនាពេលអនាគត។

ច្បាស់ណាស់នាពេលខាងមុខដ៏ខ្លីខាងមុខ លោកស្រីគ្រោងពង្រីកការិល័យរបស់ខ្លួន ដោយសារភាពជោគជ័យ ដែលលោកស្រីទទួលបាននាពេលបច្ចុប្បន្ន និងទទួលបានគាំទ្រច្រើនពីអតិថិជន។

ក្នុងភាពជាក្រុមហ៊ុនផ្តល់សេវាកម្ម លើវិស័យនេះភាពស្មោះត្រង់ពិតជាមានសារៈសំខាន់ និងជាកូនសោគន្លឹះ ដើម្បីទទួលបានការទុកចិត្តពីអតិថិជន និងផ្តល់ផលចំណេញដល់អតិថិជន។

លោកស្រីតាំង ហួរបានមានប្រសាសន៍ថា ក្នុងនាមជាភ្នាកងារអចលនទ្រព្យមួយ ក្រុមហ៊ុនតែងតែជ្រើសរើសផ្ទះ ឬទីតាំងអចលនទ្រព្យល្អៗសម្រាប់អតិថិជន ហើយដែលជាការផ្តល់ប្រយោជន៍ដល់អ្នកទិញ និងអ្នកលក់ទាំងសងខាង។

លោកស្រីតាំង ហួរបានថ្លែងថា “រហូតមកដល់នេះ យើងទទួលបានអតិថិជនច្រើន ដោយសារយើងបានជួយច្រើនទាំងអ្នកលក់ និងអ្នកទិញ និងភាពស្មោះត្រង់ ព្រមទាំងក្រមសីលធ៌មរបស់យើង”។

ជាមួយនឹងការខិតខំប្រឹងប្រែង ព្យាយាមពុះពារឥតនឿយហត់លើការងារ ពិសេសការពង្រឹងសមត្ថភាពជាប្រចាំ ជាលទ្ឋផលកាលពីរាត្រីថ្ងៃទី១២ខែធ្នូ ឆ្នាំ២០១៩ លោកស្រីតាំង ហួរ បានទទួលពានផ្នែកលក់ចំនួនពីរ នៅឯមហាព្រឹត្តិការណ៍ផ្តល់ពានរង្វាន់អចលនទ្រព្យកម្ពុជា ដែលបានរៀបចំជាលើកទី២ របស់ក្រសួងសេដ្ឋកិច្ច និងហិរញ្ញវត្ថុ និងសហការជាមួយក្រុមហ៊ុនគេហទំព័រ Realestate.com.kh។

លោកស្រីថ្លែងដោយស្នាមញញឹម ប្រកបដោយភាពជឿជាក់ថា “ក្រុមហ៊ុនរបស់យើងផ្តោតលើលក់ ទិញ និងជួល។ យើងចូលរួមក្នុងព្រឹត្តិការណ៍ពានរង្វាន់នេះ ហើយក្រុមហ៊ុន Amatak ទទួលបានពានរង្វាន់ Agent Of Choice ហើយខ្ញុំផ្ទាល់ក៏ទទួលបានពានផងដែរ ក្នុងនាមជាភា្នក់ងារលក់ឆ្នើមមួយរូប”។

លោកស្រីបានលើកឡើងថា ការទទួលបានពាននេះ គឺអាស្រ័យលើការបោះឆ្នោត ហើយការទទួលបានពាននេះ ធ្វើអោយអតិថិជនរបស់ក្រុមហ៊ុន និងលោកស្រីកាន់តែមានទំនុកចិត្ត ហើយលោកស្រីនឹងបន្តខំប្រឹងប្រែង ដើម្បីជួយជំរុញវិស័យនេះ ឲ្យកាន់តែមានភាពរីកចម្រើនបន្តទៀត។

អ្នកប្រឡូកក្នុងវិស័យអចលនទ្រព្យ ភាគច្រើនគេឃើញមានតែបរុស ដែលប្រកបរបរទទួលទាន និងដឹកនាំក្នុងវិស័យនេះ ខណៈពុំសូវមានស្ត្រីជាមេដឹកនាំក្នុងវិស័យនេះនោះទេ។

ប៉ុន្តែលោកស្រីតាំង ហួរ បានជំរុញដល់ស្ត្រី ដែលមានបំណងចង់ប្រឡូកចូលវិស័យអចលនទ្រព្យ សូមកុំរាថយ ដោយធ្វើអ្វីដែលខ្លួនចង់ធ្វើ ហើយលោកស្រីលើកឡើងថា “គ្មានភាពជោគជ័យឯណា បានមកដោយងាយទេ”៕

ទីផ្សារអាស៊ីហក់ឡើងជាថ្មីបន្ទាប់ពីសង្គ្រាមពាណិជ្ជកម្មដ៏ងងឹតបានបញ្ចប់

ដោយ Donald Lee

ភ្នំពេញៈ ទីផ្សាអាស៊ីបានហក់ឡើងខ្លាំងនៅថ្ងៃអង្គារនេះ ដោយសារព័ត៌មាននៃការបញ្ឈប់សង្គ្រាមពាណិជ្ជកម្មរវាងអាមេរិក និងចិនដែលបានឆ្លុះបញ្ចាំងតាមរយៈទីផ្សារ និងវិនិយោគិននៅក្នុងតំបន់ដែលពឹងផ្អែកលើពាណិជ្ជកម្ម។

ទីផ្សារអាស៊ីពីក្រុមហ៊ុន Hang Seng របស់ហុងហុង ទៅក្រុមហ៊ុន Kospi របស់កូរ៉េខាងត្បូង បានកើនឡើងប្រហែល០.៥ ភាគរយកាលពីព្រឹកថ្ងៃអង្គារនេះ។

ប្រធានាធិបតីអាមេរិកលោក Donald Trump បានបញ្ជាក់ក្នុងសុន្ទរកថា របស់លោកលើកិច្ចព្រមព្រៀងពាណិជ្ជកម្ម ដំណាក់កាលទី១ កាលពីចុងសប្តាហ៍មុនដោយនិយាយថា កិច្ចព្រមព្រៀងដំណាក់កាលទី១បានបញ្ចប់ហើយ និងរង់ចាំការអនុវត្តពេញលេញដោយមានការបកប្រែជាភាសាផ្សេងៗត្រឹមត្រូវ។

នៅក្នុងសន្និសីទកាសែតមួយកាលពីថ្ងៃច័ន្ទ លោកTrump បាននិយាយថា “ខ្ញុំបាននិយាយថា ធ្វើឱ្យប្រាកដថា អ្នកមានអ្នកបកប្រែត្រឹមត្រូវ ពីព្រោះអ្នកអាចបាត់បង់ច្រើនជាមួយនឹងការបកប្រែមិនល្អ។ ដូច្នេះយើងកំពុងធ្វើឱ្យបានសម្រេច”។

ក្រសួងការបរទេសចិនក៏បានអះអាងថា កិច្ចព្រមព្រៀងនេះ ជិតបញ្ចប់ហើយ ក្រៅពីព័ត៌មានលម្អិតមួយចំនួន។

អ្នកនាំពាក្យក្រសួងលោក Geng Shuang បាននិយាយទៅកាន់អ្នកសារព័ត៌មានថា “ចិន និងអាមេរិកនៅតែត្រូវការបញ្ចប់នីតិវិធីចាំបាច់មួយចំនួន”។

លើសពីនេះទៀត ទីក្រុងប៉េកាំង បានព្យួរពន្ធលើការនាំចូលរថយន្ត និងកសិកម្មរបស់អាមេរិក ដែលត្រូវបានកំណត់ចូលជាធរមានកាលពីថ្ងៃអាទិត្យ។

យោងតាមគណៈកម្មការពន្ធគយ របស់ក្រុមប្រឹក្សារដ្ឋចិនបានឱ្យដឹងថា ទីក្រុងប៉េកាំងបានផ្អាកការយកពន្ធលើរថយន្ត គ្រឿងបន្លាស់រថយន្ត និងពោតរបស់អាមេរិក។

កិច្ចព្រមព្រៀងពាណិជ្ជកម្មដំណាក់កាលទី១ រវាងអាមេរិក និងចិនបានបញ្ចប់សង្គ្រាមពាណិជ្ជកម្មដ៏ថ្លៃបំផុតមួយក្នុងប្រវត្តិសាស្រ្ត ហើយបាននាំមកនូវសញ្ញាដំបូងនៃការថយចុះ នៃសង្រ្គាមពាណិជ្ជកម្មរយៈពេល១៧ខែ រវាងប្រទេសដែលមានសេដ្ឋកិច្ចធំជាងគេទាំងពីរនៅលើពិភពលោក។

ផលប៉ះពាល់នៃសង្រ្គាមពាណិជ្ជកម្មរវាងអាមេរិក និងចិនបណ្តាលឱ្យមានការធ្លាក់ចុះកំណើនសេដ្ឋកិច្ចពិភពលោក និងការត្រៀមឡើងវិញនូវខ្សែសង្វាក់តម្លៃ ពិភពលោកនៅក្នុងតំបន់អាស៊ីប៉ាស៊ីហ្វិក។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ច ពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏ធំកាលពី១០ឆ្នាំមុន។

ជាមួយគ្នានេះ លោក Trump បានបញ្ជាក់ថា ការចរចារដំណាក់កាលទី២ កំពុងដំណើរការហើយ។

លោក Trump បានសរសេរលើបណ្តាញសង្គម Twitter ថា “យើងបានព្រមព្រៀងលើដំណាក់កាលដ៏ធំធេងមួយ។ យើងនឹងចាប់ផ្តើមការចរចារលើកិច្ចព្រមព្រៀងដំណាក់កាលទី២ ភ្លាមៗជាជាងការរង់ចាំរហូតដល់ការបោះឆ្នោតឆ្នាំ២០២០។ នេះគឺជាកិច្ចព្រមព្រៀងដ៏អស្ចារ្យសម្រាប់ទាំងអស់គ្នា។ សូមអរគុណ!”៕

រដ្ឋបាលរាជធានីភ្នំពេញប្រកាសជួសជុលផ្សារអូរឬស្សីឡើងវិញ

ដោយ វុត្ថា

ភ្នំពេញ៖ រដ្ឋបាលរាជធានីភ្នំពេញប្រកាសជួសជុលជាន់ឡៅតឿផ្សារអូរឬស្សីឡើងវិញ ដើម្បីការពារសុវត្ថិភាពប្រជាពលដ្ឋ បន្ទាប់ពីមានការប្រេះស្រាំ។

យោងតាមសេចក្ដីជូនដំណឹង ចេញផ្សាយនៅថ្ងៃទី១៧ ខែធ្នូ ឆ្នាំ២០១៩នេះ ឱ្យដឹងថា សំណង់អគារផ្សារអូរប្ញស្សី ដែលមានរយៈពេលយូរឆ្នាំមកហើយនោះ នៅមានលក្ខណៈរឹងមាំនៅឡើយ។

លើកលែងតែសំណង់ឡៅតឿ ដែលមានសភាពបែកប្រេះស្រាំដោយអន្លើ ហើយប្រសិនបើទុកយូរបន្តទៀត អាចបង្កគ្រោះថ្នាក់ដល់ប្រជាពលរដ្ឋ ជាពិសេសអាជីវករលក់ដូរក្នុងផ្សារ អតិថិជន និងខូចខាតទ្រព្យសម្បត្តិរបស់ប្រជាពលរដ្ឋ។

សេចក្តីជូនដំណឹងដដែលនេះ រដ្ឋបាលរាជធានីភ្នំពេញ បានស្នើអាជីវករ ដែលកំពុងលក់ដូរនៅលើឡៅតឿ ក្រោមឡៅតឿ និងជុំវិញបរិវេណទីតាំងនេះទាំងអស់ ផ្ទេរការលក់ដូរជាបណ្តោះអាសន្នក្នុងរយៈពេលខ្លី ទៅទីតាំងថ្មីនៅក្រៅផ្សារ ដើម្បីរក្សាសន្តិសុខ សុវត្ថិភាព និងចៀសវាងរាល់ហានិភ័យ ដែលកើតមានឡើងជាយថាហេតុ។

រដ្ឋបាលរាជធានីភ្នំពេញ បានបញ្ជាក់ថា ការផ្ទេរការលក់ដូរជាបណ្តោះអាសន្ននេះ ដើម្បីបង្កលក្ខណៈឱ្យក្រុមការងារបច្ចេកទេសសំណង់ ធ្វើការជួសជុលឡើងវិញជាបន្ទាន់ និងឆាប់រួចរាល់ ដើម្បីឱ្យអាជីវករ បានត្រឡប់ចូលមកលក់ដូរ នៅកន្លែងដើមវិញប្រកបដោយសុវត្ថិភាព និងសោភណភាព។

រដ្ឋបាលរាជធានីភ្នំពេញ មានក្តីសង្ឃឹមទុកជាមុនថា សាធារណជន និងអាជីវករ នៅក្នុងផ្សារអូរឫស្សីទាំងអស់ បានយល់ពីស្ថានភាពជាក់ស្តែងនេះ និងសហការចូលរួមអនុវត្តឱ្យមានប្រសិទ្ធភាពខ្ពស់៕

ក្រុមហ៊ុនអកាសចរណ៍នៅកម្ពុជាបានកើនឡើងជិតដល់ចំនួនជិត៥០ហើយ

ដោយ វុត្ថា

ភ្នំពេញៈ លោកនាយឧត្តមសេនីយ៍ម៉ៅ ហាវណ្ណាល់ រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរស៊ីវិលបានឱ្យដឹងថា កម្ពុជាបច្ចុប្បន្ននេះ មានក្រុមហ៊ុនអាកាសចរជាតិ និងអន្តរជាតិជិត៥០បាននិងកំពុងប្រតិបត្តិការ នៅក្នុងប្រទេសកម្ពុជា។

លោកនាយឧត្តមសេនីយ៍ ម៉ៅ ហាវណ្ណាល់ នៅក្នុងជំនួបពិភាក្សាការងារជាមួយលោក Sengdaove KATTIGNASACK អគ្គនាយកក្រសួងដឹកជញ្ចូនប្រទេសឡាវ នៅថ្ងៃទី ១៧ ខែធ្នូ ឆ្នាំ ២០១៩ នេះឱ្យដឹងថា នាឆ្នាំ១៩៩៣ មានតែក្រុមហ៊ុនអាកាសចរណ៏អន្តរជាតិមួយគត់ហោះមកប្រទេសកម្ពុជា និងមានអាកាសយានដ្ឋានអន្តរជាតិ ដែលមានចំណតយន្តហោះអាចចតបានតែ១០យន្តហោះប៉ុណ្ណោះ។ ប៉ុន្តែឥឡូវនេះ មានក្រុមហ៊ុនអាកាសចរអន្តរជាតិ ហោះមកកម្ពុជា ចំនួន ៤៤ ក្រុមហ៊ុន បូកនឹងក្រុមហ៊ុនអាកាសចរក្នុងស្រុកចំនួន៥ទៀត។

ដោយឡែកចំណតយន្តហោះ ដែលអាចចតបានយន្តហោះ បានកើនដល់ចំនួន៤០ ដែលក្នុងនោះយន្តហោះប្រភេទធំអាចចតបានចំនួន១០យន្តហោះ និងគិតត្រឹមចុងខែវិច្ឆិកានេះ កម្ពុជាបានទទួលអ្នក១០,៥លាននាក់។

លោក Sengdaove KATTIGNASACK អគ្គនាយក ក្រសួងដឹកជញ្ចូនប្រទេសឡាវ បានវាយតម្លៃខ្ពស់ និងកោតសរសើរចំពោះការរីកចម្រើន វិស័យអាកាសចរស៊ីវិលនៅកម្ពុជា និងស្វែងរកនូវទំនាក់ទំនងរវាងស្ថាប័ទាំង២ ឱ្យកាន់តែជិតស្និតថែមទៀត។

វិស័យអាកាសចរស៊ីវិលកម្ពុជា ក្នុងរយៈពេលប៉ុន្មានឆ្នាំចុងក្រោយនេះ មានការរីកចម្រើនគួរឲ្យកត់សម្គាល់ និងបានចូលរួមចំណែកយ៉ាងសំខាន់ ដល់ការអភិវឌ្ឍនៃវិស័យនេះ ជាពិសេសការដឹកជញ្ជូន និងទេសចរណ៍ និងសេដ្ឋកិច្ចរបស់ប្រទេស។ ស្របពេលដែលចំនួនភ្ញៀវទេសចរចូលមកកម្ពុជា និងពីកម្ពុជាទៅកាន់បរទេសមានកំណើនជាលំដាប់នោះ ការវិនិយោគលើវិស័យអាកាសចរណ៍របស់សហគ្រិនក្នុងស្រុក ក៏កាន់តែមានចំនួនកើនឡើងជាបន្តបន្ទាប់ផងដែរ៕

គម្រោងដីឡូតិ៍ចំការដូងក្រអូបទំហំធំបែបរមណីយដ្ឋានស្ថិតនៅតាមផ្លូវជាតិលេខ៥កំពុងទាក់ទាញការចាប់អារម្មណ៍

ដោយៈ រ៉ាណេត

កំពង់ឆ្នាំងៈ គម្រោងដីឡូតិ៍ចំការដូងក្រអូប ស្ថិតនៅតំបន់ដីទួលមានជីវជាតិល្អ អំណោយផលដល់ដំណាំគ្រប់ប្រភេទ ដែលជាតំបន់មានសក្ដានុពលដ៏ទាក់ទាញ លក់ក្នុងតម្លៃសមរម្យ បានចាប់ផ្តើមប្រកាសលក់ជាផ្លូវការហើយ ជាមួយការផ្តល់ជាកញ្ចប់យ៉ាងពិសេសដល់អតិថិជន ចំណេញបានទាំងលុយ ចំណេញបានទាំងផលដំណាំនិងមានរមណីយដ្ឋានលំហែរកំសាន្ត។

គម្រោងដីឡូតិ៍ចំការដូងក្រអូប ដែលរៀបចំអភិវឌ្ឍដោយក្រុមហ៊ុន Hin Ruos Real Estate Co,Ltd មានទំហំសរុបជិត៣០ហិកតា ស្ថិតនៅភូមិស្ពានដែក ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំ ដែលមានចម្ងាយប្រមាណ៤៩ គីឡូម៉ែត្រពីរាជធានីភ្នំពេញ និងមានផ្សារចំនួន៤ស្ថិតនៅក្បែរ ដូចជា ផ្សារឧត្ដុង្គ ផ្សារត្រាច ផ្សារលង្វែក និងផ្សារសាលាលេខ៥ ដែលស្ថិតនៅជិតព្រលានយន្តហោះឧត្ដុង្គ ចុះពីផ្លូវជាតិលេខ៥ ចម្ងាយប្រមាណ៥គីឡូម៉ែត្រ ដែលគ្រោងនឹងចាក់កៅស៊ូនៅឆ្នាំ២០២០ខាងមុខនេះ ហើយនៅទល់មុខ គឺជាទីតាំងគម្រោងបង្កើតតំបន់សេដ្ឋកិច្ចពិសេស។

លោក ហ៊ិន រស់ អគ្គនាយកក្រុមហ៊ុន HIN RUOS Real Estate Co,.Ltd បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៧ ធ្នូនេះថា ដីឡូតិ៍នៅក្នុងគម្រោងចំការដូងក្រអូបនេះ មានទំហំ៤០x៤០ម៉ែត្រ លក់ក្នុងម្លៃត្រឹម១៧,០០០ ដុល្លារ ដោយនៅក្នុងបរិវេណដីមានដាំដំណាំដូងក្រអូបចំនួន៨០ដើម រួមនឹងដំណាំផ្សេងៗទៀត។

ក្រុមហ៊ុនក៏ថែមទាំងផ្តល់ជូននូវកញ្ចុះទំហំ៤ម៉ែត្រចំនួនមួយ សម្រាប់អង្គុយជួបជុំគ្នា ព្រមទាំងការរៀបចំបោះបង្គោលព្រំ រៀបរបងឥដ្ឋ ព័ទ្ធលួសជុំវិញព្រុំដី មានទ្វារដែកធំ ហើយក្រុមហ៊ុននឹងផ្តល់សេវាថែទាំដំណាំ ដោយក្នុងដីឡូត៍និមួយៗមានការផ្តល់ជូននូវដំណាំ ស្វាយ និងខ្នុរ ព្រមទាំងផ្តល់ការថែរទាំ និងមានសន្តិសុខជួយមើលថែរទាំរយៈពេល២ឆ្នាំដោយមិនគិតថ្លៃ។

ដោយឡែកហេដ្ឋារចនាសម្ព័ន្ធ នៅក្នុងគម្រោងដីឡូតិ៍ចំការដូងក្រអូប ត្រូវបានស្ថាបនាសាងសង់លក្ខណៈស្ដង់ដា ដូចជា គម្រោងសំណង់បុរីយ៉ាងដូច្នោះ ដោយគម្រោងប្រភេទនេះ មិនទាន់មានក្រុមហ៊ុនពុះដីឡូតិ៍ណាមួយបានធ្វើនៅឡើយនោះទេ។

ផ្លូវធំៗត្រូវបានសង់ចំនួន៤ខ្សែ ដោយមួយខ្សែៗជាប្រភេទផ្លូវភ្លោះ ភ្ជាប់ជាមួយផ្លូវរដ្ឋទំហំ១៥ម៉ែត្រ ដោយមានទទឹង១២ ម៉ែត្រ និងមានសួនច្បារទំហំទទឹង១ម៉ែត្រ ជាទ្រូងកណ្តាល មានដាំលម្អដោយដើមក្ងោក រួមជាមួយនឹងការបំពាក់អំពូលសូឡាផងដែរ។ កាន់តែពិសេសជាងនេះទៅទៀត ខាងផ្នែកក្រោយគម្រោងមានស្ទឹង និងព្រែក ដែលនឹងមានគម្រោងអភិវឌ្ឍជាតំបន់ទេសចណ៍ធម្មជាតិ (Resort) ដូចជាកន្លែងជិះទូកកម្សាន្ត កន្លែងស្ទូចត្រី និងធ្វើផ្ទះទឹកលំហែរកាយជាដើម។

នេះគឺជាគម្រោងទី២ហើយ បន្ទាប់ពីគម្រោងទី១ ត្រូវបានទទួលជោគជ័យរួចទៅហើយ។

លោកហ៊ិន រស់ បានមានប្រសាសន៍ថា ហេតុផលដែលលោកសម្រេចពុះដីឡូតិ៍ដែលមានទំហំ ៤០ x៤០ ម៉ែត្រ ក្នុងមួយឡូតិ៍ គឺដោយសារតែលោកកត់សម្គាល់ឃើញថា ប្រភេទដីឡូតិ៍ ដែលស្ថិតនៅក្នុងគម្រោងរបស់លោក គឺមានទំហំដីសមល្មមក្នុងការដាំដំណាំ ដើម្បីអាស្រ័យផលតាមបែបធម្មជាតិយ៉ាងប្រសើរ ហើយវាក៏ជាការផ្តល់ផលចំណេញ ដល់អតិថិជនដែលមានគម្រោងបង្កើតជាឧទ្យានចំការហូបផ្លែ និងងាយស្រួលក្នុងវិនិយោគបន្តយកចំណេញក្នុងពេលដ៏ខ្លី ខុសប្លែកពីគម្រោងពុះដីឡូតិ៍របស់ក្រុមហ៊ុនដទៃ ដែលមានទំហំក្បាលដីតូច បណ្តោយខ្លី និងមិនមានការរៀបចំហេដ្ឋារចនាសម្ព័ន្ធដូចនេះឡើយ។

លោកបានមានប្រសាសន៍បន្តទៀតថា សម្រាប់អ្នកដែលមិនមានលទ្ធភាពទិញដីឡូតិ៍ នៅក្នុងគម្រោងចំការដូងក្រអូបទាំងស្រុង ក៏អាចសហការជាមួយមិត្តភ័ក្ដ ឬញាតិមិត្ត ដើម្បីទិញ ដោយសារតែដីឡូតិ៍នៅក្នុងគម្រោងមួយនេះ មានទំហំធំរហូតដល់៤០ x៤០ ម៉ែត្រ ស្មើនឹង ១៦០០ ម៉ែត្រការ៉េ ងាយស្រួលបែងចែកទៅតាមលទ្ធភាពបានយ៉ាងងាយស្រួល។ គ្រប់អតិថិជនទាំងអស់នឹងទទួលបានការរៀបចំឯកសារ រត់ការកាត់ប្លង់ បង់ពន្ធប្រថាប់ត្រា ដែលជាការចំណាយរបស់ក្រុមហ៊ុនផ្ទាល់ ដើម្បីបង្កើនទំនុកចិត្តកាន់តែខ្ពស់។

ទាំងអស់អសនេះគឺជាការផ្តល់ជូនយ៉ាងពិសេស ដោយក្រុមហ៊ុន HIN RUOS Real Estate Co,.Ltd សម្រាប់អតិថិជនដែលប្រាថ្នា ចង់បានដីចំការដំណាំផ្ទាល់ខ្លួន ក៏ដូចជាសម្រាប់ក្រុមគ្រួសារផងដែរ។ រួសរាន់ឡើង ដីឡូតិ៍ដែលមានទីតាំងល្អ និងពោរពេញទៅដោយសក្ដានុពល ចំនួនមានកំណត់។

សម្រាប់ព័ត៌មានបន្ថែមសូមទាក់ទង តាមរយៈទូរស័ព្ទលេខ ៖ ០១៥ ៧៨០ ៨៨៨ / ០៧៧ ៣៣៣ ៧៤៤៕

ក្រុមហ៊ុន Smart Axiata បោះទុនវិនិយោគចំនួន១,៤០០លានដុល្លារលើគម្រោងជាច្រើននៅកម្ពុជា

ដោយ វុត្ថា

ភ្នំពេញៈ ក្រុមហ៊ុន Smart Axiata បានបោះទុកវិនិយោគនៅកម្ពុជា អស់ប្រមាណ ១,៤០០លានដុល្លារអាមេរិកហើយ ហើយក្រុមហ៊ុនកំពុងមានគម្រោងវិនិយោគបង្កើតបន្ថែមទៀត គឺការវិនិយោគលើបច្ចេកវិទ្យាថ្មី ទំនើប រួមទាំងប្រព័ន្ធល្បឿនលឿន 5G ផងដែរ។

លោក TAN SRI JAMALUDIN IBRAHIM ប្រធានក្រុមហ៊ុន Axiata Group Berhad នៅក្នុងជំនួបជាមួយសម្តេចតេជោហ៊ុន សែន នាយករដ្ឋមន្ត្រីនៃកម្ពុជានៅថ្ងៃទី ១៧ ខែធ្នូ ឆ្នាំ ២០១៩ នេះបានឲ្យដឹងថា ការវិនិយោគរបស់ក្រុមហ៊ុន Smart Axiata គឺមិនត្រឹមតែដើម្បីរកផលចំណេញនោះទេ ប៉ុន្តែគឺមានគោលដៅចូលរួមចំណែកក្នុងការអភិវឌ្ឍសេដ្ឋកិច្ចកម្ពុជា ក៏ដូចជាសង្គមជាតិកម្ពុជាផងដែរ។

លោកបន្តថា “បច្ចុប្បនេះ ក្រុមហ៊ុន Smart បានចូលរួមចំណែកយ៉ាងច្រើន ក្នុងកិច្ចការសង្គមដូចជាលើ វិស័យអប់រំ វិស័យសុខាភិបាលក៏ដូចជាវិស័យបរិស្ថាន និងកីឡាផងដែរ”។ លោកបន្តថា “ក្រុមហ៊ុននឹងបន្តពង្រីកវិសាលភាពរបស់ក្រុមហ៊ុនបន្តទៀត ដែលនឹងគ្របដណ្ដប់ទៅតាមទីជនបទនៅទូទាំងប្រទេស”។

សម្តេចតេជោហ៊ុន សែន នាយកដ្ឋមន្ត្រីកម្ពុជា បានថ្លែងអំណរគុណ ចំពោះលោក TAN SRI និងក្រុមហ៊ុន Smart ដែលបានចូលរួមចំណែក ក្នុងការអភិវឌ្ឍន៍កម្ពុជាតាមកម្មវិធីមនុស្សធម៍នានរបស់ក្រុមហ៊ុន។ ទន្ទឹមនឹងនេះសម្តេចតេជោ បានសុំអោយក្រុមហ៊ុនពិចារណាពង្រីកវិសាលភាពរបស់ក្រុមហ៊ុន ឲ្យគ្របដណ្ដប់ទៅលើទីជនបទអោយបានច្រើនទូលំទូលាយ ជាពិសេស សម្ដេចតេជោបានស្នើសុំឲ្យក្រុមហ៊ុនពិចារណា ក្នុងការជួយផ្តើ់នូវសេវា Internet ដល់សាលារៀន រួមទាំងសាកលវិទ្យាល័យ និងវិទ្យាល័យ ព្រមទាំងនៅតាមបណ្ណាល័យជាដើម និងមន្ទីរពេទ្យដើម្បីធ្វើយ៉ាងណាឲ្យគ្រូបង្រៀន និស្សិត និងសិស្សានុសិស្ស មានឱកាសប្រើប្រាស់បច្ចេកវិទ្យាតាមInternet ដើម្បីបង្កើនការសិក្សាស្រាវជ្រាវពង្រីកចំណេះវិជ្ជា ដើម្បីពង្រឹងគុណភាព និងសមត្ថភាពធនធានមនុស្សអោយកាន់តែរីកចម្រើន។

សម្តេចតេជោបានស្នើសុំឲ្យក្រុមហ៊ុន Smart Axiata ពិចារណាពិនិត្យមើលប្រព័ន្ធស្មាតនៅក្រៅប្រទេស (Roaming) ផងដែរ គឺធ្វើយ៉ាងណាឲ្យប្រព័ន្ធស្មាត អាចដំណើរការទៅបានទាំងការហៅចេញចូល និងប្រព័ន្ឋ Internet អោយបានល្អនៅក្រៅប្រទេសអោយបានច្រើន។ ព្រោះពេលសម្តេចតេជោ អញ្ជើញទៅបេសកកម្មក្រៅប្រទេស គឺប្រព័ន្ឋស្មាតមិនសូវមាន Roaming ដែលលំបាកប្រើប្រាស់។

សម្តេចតេជោ ហ៊ុន សែន នាយករដ្ឋមន្ត្រី បានកោតសរសើរប្រព័ន្ធស្មាតដែលជាប្រព័ន្ធដ៏ល្អមួយ ដែលមានល្បឿនលឿនជឿទុកចិត្តបាន។ តាមរយៈការពង្រីកវិសាលភាពថែមទៀតទាំងនៅក្នុងស្រុក និងក្រៅស្រុកគឺនឹងធ្វើអោយកាន់តែពេញនិយម ពីប្រជាពល រដ្ធ និងយុវជន សិស្សានុសិស្សជាមិនខាន ព្រោះសព្វថ្ងៃនេះ ក្រុមហ៊ុន Smart Axiata កំពុងមានសក្ដានុពលឈានខ្លាំងផ្នែកវិស័យ Telecommunication ដែលទាក់ទាញបានជំនឿជឿជាក់យ៉ាងខ្លាំងពីប្រជាពលរដ្ឋកម្ពុជា៕

ក្រុមហ៊ុនប្រេងនិងឧស្ម័ននៅអារ៉ាប់រួមធំមួយស្វែងរកឱកាសវិនិយោគក្នុងវិស័យប្រេងនៅកម្ពុជា

ដោយ ប៊ី

ភ្នំពេញៈ មន្ត្រីជាន់ខ្ពស់ក្រសួងរ៉ែ និងថាមពលបានថ្លែងថា ក្រុមហ៊ុន Mubadala Petroleum ដែលជាក្រុមហ៊ុនប្រេង និងឧស្ម័នធំជាងគេនៅអារ៉ាប់រួម កំពុងស្វែងរកឱកាសវិនិយោគនៅក្នុងវិស័យប្រេងនៅកម្ពុជា។

នៅក្នុងកិច្ចប្រជុំមួយកាលពីសប្តាស៍មុនមួយលោក ម៉េង សក្តិធារ៉ា រដ្ឋលេខាធិការ និងជាអ្នកនាំពាក្យក្រសួងរ៉ែ និងថាមពល លោក Mazin al-Lamki អគ្គនាយកក្រុមហ៊ុន Mubadala Petroleum បានបង្ហាញចំណាប់អារម្មណ៍ ក្នុងការវិនិយោគក្នុងវិស័យប្រេងនៅកម្ពុជា។

លោក ជៀប សួរ អគ្គនាយកនៃអគ្គនាយកដ្ឋានប្រេងកាត ក្រសួងរ៉ែនិងថាមពល ត្រូវបានរាយការណ៍ថា ក្រសួងបានស្វាគមន៍ចំពោះការចូលរួមរបស់ខ្លួន នៅក្នុងប្លុកប្រេងនៅសមុទ្រ និងដីគោកដោយមានជំនាញ និងបទពិសោធន៍របស់ក្រុមហ៊ុន។

ក្រុមហ៊ុននេះ បានចូលរួមនៅក្នុងឱកាសវិនិយោគរបស់កម្ពុជា រួមមានការរុករក និងផលិតកម្ម ក៏ដូចជាការបង្កើតរោងចក្រចម្រាញ់ប្រេងផងដែរ។

លោកជៀប សួរបានថ្លែងថា “យើងបានជូនដំណឹង ដល់ក្រុមហ៊ុនអំពីឱកាសវិនិយោគនៅកម្ពុជា។ ចំពោះការរុករកប្រេងកាត យើងមានប្លុកនៅឯនាយសមុទ្រចំនួន៤ និងប្លុកប្រេងលើដីគោកចំនួន ១៨ទៀតដែលគ្មានការគ្រប់គ្រង។ យើងកំពុងបង្កើតក្រុមការងារដើម្បីពិភាក្សាបន្ថែមទៀត អំពីឱកាសវិនិយោគនាពេលអនាគត”។

លោកបន្តថា កម្ពុជាបានបែងចែកតំបន់ ដែលមានប្លុកសមុទ្រចំនួន៦ និងតំបន់នៅលើដីចំនួន១៩ សម្រាប់រកឃើញប្រេងកាត។

ក្រុមហ៊ុន KrisEnergy ដែលមានមូលដ្ឋាននៅសឹង្ហបូរី បច្ចុប្បន្នកំពុងអភិវឌ្ឍន៍ប្លុកអណ្តូងប្រេងអប្សារាក្នុងឈូងសមុទ្រថៃក្នុងដែនទឹកកម្ពុជា។

ក្រសួងរំពឹងថានឹងចុះកិច្ចព្រមព្រៀងប្រេងជាមួយក្រុមហ៊ុន Cambodian Resources Energy Development Co អំពីអណ្តូងប្រេងនៅប្លុក D ។ ក្រសួងក៏កំពុងចរចាកិច្ចព្រមព្រៀងប្រេង ជាមួយក្រុមហ៊ុនកាណាដា EnerCam Co សម្រាប់ការរកឃើញនៅលើដីគោកប្លុក VIII។

លោកបន្តថា “ប្លុកAកំពុងឆ្ពោះទៅរកផលិតកម្ម ហើយយើងគ្រោងនឹងចុះហត្ថលេខាលើកិច្ចព្រមព្រៀងរុករកប្រេងនៅប្លុកចំនួន៤ នៅសមុទ្រនឹងបើកចំហសម្រាប់វិនិយោគិនថ្មីដូចជាក្រុមហ៊ុន Mubadala។

ដោយមើលឃើញពីសក្តានុពល នៃធនធានប្រេងនិងរ៉ែនៅកម្ពុជា លោក Mazin បាននិយាយថា ក្រុមហ៊ុនបានចាប់ អារម្មណ៍ ក្នុងការវិនិយោគក្នុងវិស័យប្រេងនៅកម្ពុជា។ យើងនឹងធ្វើការសិក្សា ឱ្យបានឆាប់តាមដែលអាចធ្វើទៅបាន ពីព្រោះមានតម្រូវការចាំបាច់សម្រាប់ការវិនិយោគក្នុងវិស័យប្រេង និងឧស្ម័នរបស់ប្រទេសកម្ពុជា។

ក្រុមហ៊ុន Mubadala ជាក្រុមហ៊ុនប្រេងនិ ងឧស្ម័នគ្រប់គ្រងដោយរដ្ឋាភិបាលអាប៊ូដាប៊ីត្រូវបានបង្កើតឡើងក្នុងឆ្នាំ ២០១២ ។ បច្ចុប្បន្ននេះប្រតិបត្តិការនៅក្នុងប្រទេសចំនួន ១០ នៅមជ្ឈិមបូព៌ា អាហ្វ្រិកខាងជើង និងអាស៊ីអាគ្នេយ៍។

សម្តេចតេជោ ហ៊ុន សែន បានបញ្ជាក់ជាថ្មីកាលពីដើមសប្តា៍នេះថា នៅពាក់កណ្តាលឆ្នាំក្រោយ ប្រទេសកម្ពុជានឹងទាញយកដំណក់ប្រេងលើកដំបូងចេញពីប្លុក A នៃអណ្តូងប្រេងអប្សរា៕