ដោយ ៖ ប៊ី
គូឡាឡាំពួ ៖ មហាសេដ្ឋីអាកាសចរណ៍ដែលមានទ្រព្យសម្បត្តិពាន់លានដុល្លារ លោក Tony Fernandes កំពុងយកចិត្តទុកដាក់យ៉ាងខ្លាំងក្នុងការបើកសាខាក្រុមហ៊ុនសម្ព័ន្ធអាកាសចរណ៍ AirAsia នៅកម្ពុជា បន្ទាប់មកនៅចិន និងនៅមីយ៉ាន់ម៉ា។
លោក Fernandes នាយកប្រតិបត្តិ និងជាសហស្ថាបនិកក្រុមហ៊ុន AirAsia Group បានប្រាប់សារព័ត៌មាន Nikkei Asian Review ក្នុងបទសម្ភាសន៍មួយថា លោកកំពុងយកចិត្តទុកដាក់ក្នុងការយកកម្ពុជាជាដៃគូអាជីវកម្ម។ លោក បន្ថែមថា “ខ្ញុំចូលចិត្តកម្ពុជា ចិន និងមីយ៉ាន់ម៉ា បន្ទាប់ពីការប៉ុនប៉ងលើកទី៣ ដើម្បីបង្កើតសម្ព័ន្ធភាពនៅវៀតណាមបានបរាជ័យកាលពីដើមឆ្នាំនេះ”។
លោក Fernandes បាននិយាយថា លោកបានផ្លាស់ប្តូរការយកចិត្តទុកដាក់ទៅផ្នែកផ្សេងទៀតនៃតំបន់នេះ។លោក Fernandes អាយុ ៥៥ ឆ្នាំជាអតីតនាយកប្រតិបត្តិឧស្សាហកម្មតន្ត្រីនៅអង់គ្លេសដែលបានណែនាំក្រុមហ៊ុនអាកាសចរណ៍កម្រិតមធ្យមទៅកាន់តំបន់អាស៊ី បាននិយាយថា “ខ្ញុំមិនមានគម្រោងអ្វីទេនៅវៀតណាមសម្រាប់ពេលនេះ បន្ទាប់ពីព្យាយាម ៣ ដង។
យើងមិនអាចរកដៃគូត្រឹមត្រូវ ហើយឥឡូវនេះខ្ញុំគិតថា មានក្រុមហ៊ុនអាកាសចរណ៍ច្រើនពេកនៅទីនោះ។ ពេលវេលានឹងមកដល់ហើយ”។ច្បាប់កម្ពុជាមិនរឹតត្បិតកម្មសិទ្ធិបរទេសក្នុងឧស្សាហកម្មអាកាសចរណ៍ក្នុងស្រុកទេ ប៉ុន្តែក្រុមហ៊ុនអាកាសចរណ៍ថ្មីត្រូវទាមទារឱ្យមានវិនិយោគរហូតដល់ ៣០ លានដុល្លារនៅក្នុងប្រទេសនេះក្នុងអំឡុងពេល ៣ ឆ្នាំដំបូងដោយមិនរាប់បញ្ចូលយន្តហោះ។
ប្រជាប្រិយភាពដែលកំពុងកើនឡើងរបស់ប្រទេសនេះជាគោលដៅទេសចរណ៍បានទាក់ទាញក្រុមហ៊ុនអាកាសចរណ៍ដែលគាំទ្រដោយចិនជាច្រើនរួចទៅហើយ ដោយមានក្រុមហ៊ុនអាកាសចរណ៍ចំនួន ៦ គ្រោងនឹងបញ្ចូលគ្នា។នៅខាងក្រៅរាជធានីភ្នំពេញ អាកាសយានដ្ឋានអន្តរជាតិសៀមរាបរបស់ប្រទេសកម្ពុជាគឺមួយក្នុងចំណោមអាកាសយានដ្ឋានអន្តរជាតិមមាញឹកបំផុតនៅអាស៊ីអាគ្នេយ៍។
កាលពីឆ្នាំមុនមានអ្នកដំណើរចំនួន ៤.៥ លាននាក់ ដោយសារចំណាប់អារម្មណ៍អន្តរជាតិដែលមានការចាប់អារម្មណ៍យ៉ាងខ្លាំងទៅលើប្រាសាទអង្គរវត្តដែលជាវិមានសាសនាធំជាងគេនៅលើពិភពលោក។បច្ចុប្បន្នក្រុមហ៊ុនអាកាសចរណ៍ AirAsia Group បានចុះបញ្ជីក្រុមហ៊ុនអាកាសចរណ៍ដែលជាដៃគូនៅក្នុងប្រទេសឥណ្ឌូនេស៊ី និងថៃដោយមានផែនការឲ្យក្រុមហ៊ុនសម្ព័ន្ធហ្វីលីពីនចូលក្នុងផ្សារហ៊ុនជាសាធារណៈនៅឆ្នាំក្រោយ។
ភាគហ៊ុនរបស់ក្រុមហ៊ុនបានបិទក្នុងតម្លៃ ១,៨២ រីងហ្គីតកាលពីថ្ងៃ ពុធ ពោល ធ្លាក់ចុះពី ៣,២៩ រីងហ្គីតកាលពីខែ កុម្ភៈ ដែលផ្តល់ឱ្យក្រុមហ៊ុននូវមូលធនប័ត្រចំនួន ៦,០៨ ពាន់លានរីងហ្គីដ (១,៤៦ ពាន់លានដុល្លារ)។
លោក Fernandes បាននិយាយថា “ពេលខ្លះវាងាយស្រួលក្នុងការទទួលបានដៃគូដែលអាចជឿទុកចិត្តបាន ប៉ុន្តែយើងត្រូវតែធ្វើឱ្យប្រាកដថា អាកាសយានដ្ឋានអាចទទួលយកកំណើនរបស់យើង ហើយថា តើយើងអាចផ្តល់សំណើពិសេសដល់ទីផ្សារនេះបានទេ។ វាមិនមែនតែងតែអំពីអាជ្ញាប័ណ្ណនោះទេ”។
ក្នុងរយៈពេលវែង លោក Fernandes បាននិយាយថា លោកចង់ឱ្យក្រុមហ៊ុន AirAsia បង្កើតក្រុមហ៊ុនអាកាសចរណ៍មួយនៅចិនដែលលោកចាត់ទុកជាសេដ្ឋកិច្ចដែលងាយស្រួលសម្រាប់ការវិនិយោគបរទេស។ ទីផ្សារនេះមានសារៈសំខាន់ណាស់សម្រាប់ក្រុមហ៊ុនអាកាសចរណ៍ AirAsia ដោយក្រុមនេះបានកត់ត្រាស្ទើតែ ២០ ភាគរយនៃការលក់ប្រចាំឆ្នាំរបស់ខ្លួនពីទិសដៅរបស់ចិន។
លោក Fernandes បានមានប្រសាសន៍ថា “យើងត្រូវតែធ្វើឱ្យប្រាកដថា យើងអាចពាក់ព័ន្ធនៅក្នុងទីផ្សារដ៏ធំបែបនេះ”។ខណៈពេលដែលគាត់ផ្តោតលើការពង្រីកឱកាស លោក Fernandes ក៏កំពុងជំរុញផែនការធ្វើឱ្យក្រុមហ៊ុនអាកាសចរណ៍របស់លោកក្លាយជាក្រុមហ៊ុនដឹកនាំបច្ចេកវិទ្យាតាមរយៈការវិនិយោគប្រចាំឆ្នាំ ១០០លានរីងហ្គីត។ លោកបាននិយាយថា ក្រុមហ៊ុន AirAsia នឹងក្លាយជាក្រុមហ៊ុនអាកាសចរណ៍ឌីជីថលនៅត្រីមាសទីមួយនៃឆ្នាំក្រោយ៕
អានបន្ថែម៖ ក្រុមហ៊ុន Bangkok Airways នឹងចាប់ផ្តើមហោះត្រង់មកកាន់ខេត្តព្រះសីហនុ នៅដើមឆ្នាំ២០២០
