CEO Master Club នឹងរៀបចំមហាព្រឹត្តិការណ៍ដ៏ធំដែលមានម្ចាស់អាជីវកម្មចូលរួម ១០០០នាក់

ដោយ វុត្ថា

ភ្នំពេញៈ CEO Master Club នឹងរៀបចំកម្មវិធី “រាត្រីស្រមោលសជួបជុំម្ចាស់អាជីវកម្មកម្ពុជា CEO Award 2019” នឹងនឹងប្រព្រឹត្តិទៅនៅថ្ងៃទី២៦ ខែតុលាឆ្នាំ ២០១៩ ខាងមុខនេះ នៅសណ្ឋាគារសុខាភ្នំពេញ។

លោក អោម សេងបូរ៉ា ស្ថាបនិក និងជាប្រធានក្រុមប្រឹក្សាភិបាលនៃ CEO Master Club បានឱ្យដឹងនៅថ្ងៃទី២៤ ខែតុលា ឆ្នាំ ២០១៩ នេះ បានឱ្យដឹងថា កម្មវិធីនេះ មានសមាជិកគ្រួសារ CEO Master Club និងម្ចាស់អាជីវកម្មកម្ពុជា ចូលរួមប្រមាណ ១០០០នាក់ចូលរួម។

លោកបន្តថា ព្រឹត្តិការណ៍ដ៏ធំនេះ ក៏មានការអញ្ជើញផ្តល់កិត្តិយសជាអធិបតីពីឯកឧត្តមសេនីយ៍ឯក ហ៊ុន ម៉ាណែត ក្នុងកម្មវិធី“រាត្រីសមោលសជួបជុំម្ចាស់អាជីវកម្មកម្ពុជា CEO Award 2019” នេះផងដែរ។

ស្ថាបនិក CEO Master Club រូបនេះបានបញ្ជាក់ថា មកដល់ពេល CEO Master Club បានរៀបចំកម្មវិធីរាត្រីសមោលសជួបជុំម្ចាស់អាជីវកម្មកម្ពុជានេះ អស់រយៈពេល៦ឆ្នាំមកហើយចាប់តាំងពីឆ្នាំ២០១៤ ដើម្បីជំរុញលើកទឹកចិត្តដល់កិច្ចខិតខំប្រឹងប្រែងរបស់សមាជិកគ្រួសារ CEO Master Club និងម្ចាស់អាជីវកម្មកម្ពុជា ដែលមានម្ចាស់អាជីវកម្មប្រមាណ១០០០នាក់ចូលរួមជារៀងរាល់ឆ្នាំ។

យោងតាមសេចក្តីជូនដំណឹងរបស់ CEO Master Club បានឱ្យដឹងថា កម្មវិធីរាត្រីស្រមោលសជួបជុំម្ចាស់អាជីវកម្មកម្ពុជា CEO Master Award 2019 រៀបចំឡើងក្នុងគោលបំណង ដូចខាងក្រោម ទី១ លើកកម្ពស់សហគ្រិនភាពនៅកម្ពុជាឱ្យកាន់តែខ្លាំងក្លា ពង្រីកទំនាក់ទំនងធុរកិច្ច ដោះដូរពាណិជ្ជកម្មក្នុងចំណោមសហគ្រិនកម្ពុជា ឱ្យកាន់តែទូលំទូលាយ លើកទឹក ចិត្តសហគ្រិន ដែលបានខិតខំប្រឹងប្រែងកសាងសមត្ថភាពរបស់ខ្លួនជាមួយ CEO Master Club ក្នុងការគ្រប់គ្រងអាជីវកម្មរបស់ខ្លួន តាមរយៈការផ្តល់ជូន Master CEO Award ។

ទី២ ទទួលស្គាល់ស្នាដៃសហគ្រិនឆ្នើមរបស់ CEO Master Club ដែលបានបង្ហាញពីលទ្ធផល នៃការរីកចំរើនអាជីវកម្មរបស់ខ្លួនគ្រប់គ្រងអាជីវកម្ម តាមរយៈការផ្តល់ជូន Outstanding CEO Award។

CEO Master Club គឺជាស្ថាប័នប្រមូលផ្តុំ និងបណ្តុះបណ្តាលម្ចាស់អាជីវកម្មខ្នាតតូច និងមធ្យមនៅកម្ពុជា ឱ្យក្លាយទៅ ជាអគ្គនាយក ដែលមានលក្ខណៈអាជីពនិងមានសមត្ថភាពខ្ពស់ ក្នុងការដឹកនាំគ្រប់គ្រងចាត់ចែងស្ថាប័នអាជីវកម្មរបស់ខ្លួន ពីតូចទៅធំ ពីលក្ខណៈគ្រួសារទៅស្តង់ដារ ៕

OCIC គ្រោងចំណាយប្រាក់់ជាង ២០០០លានដុល្លារលើការរៀបចំហេដ្ឋារចនាសម្ព័ន្ធទីក្រុងថ្មីស្ថិតនៅទល់មុខកោះពេជ្រ

ដោយគង់ សូរិយា

ភ្នំពេញៈ ក្រុមហ៊ុន OCIC គ្រោងចំណាយប្រាក់ ២០០០លានដុល្លារ ក្នុងការរៀបចំហេដ្ឋារចនាសម្ព័ន្ឋថ្មីទីក្រុងកោះនរា ដែលមានទីតាំងនៅទល់មុខនឹងទីក្រុងកោះពេជ្រ ស្របនឹងដងទន្លេមេគង្គក្រោម។

លោកទូច សំណាង អគ្គនាយករងក្រុមហ៊ុន OCIC បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៤ តុលានេះថា បច្ចុប្បន្នក្រុមហ៊ុនបាន និងកំពុងចាប់ផ្តើមចាក់ដីបំពេញ ដើម្បីកសាងទីក្រុងថ្មី ដែលមានឈ្មោះ “ទីក្រុងកោះនរា” ហើយ ដែលគំរោងនេះមានផ្ទៃដីជាង១០០ហិកតា និងគ្រោងចំណាយពេលសាងសង់រយៈពេលបីឆ្នាំ។

លោកបន្តថា “ការរៀបចំហេដ្ឋារចនាសម្ព័ន្ឋទីក្រុងថ្មីនេះ នឹងចំណាយទឹកប្រាក់ជាង២០០០លានដុល្លារអាមេរិក”។លោកបន្តថា “គំរោងនេះ នឹងមានការសាងសង់ហេដ្ឋារចនាសម្ព័ន្ឋតភ្ជាប់រវាងទីក្រុងកោះពេជ្រ និងទីក្រុងកោះនរានាពេលអនាគត ប៉ុន្តែគំរោងលំអិតកំពុងសិក្សានៅឡើយ”។

គំរោងទីក្រុងកោះនរា ស្ថិតនៅក្នុងសង្កាត់កោះនរា ស្ថិតក្នុងខ័ណ្ឌច្បារអំពៅ រាជធានីភ្នំពេញ។

លោកទូច សំណាងបានឲ្យដឹងទៀតថា ទីក្រុងថ្មីនេះនឹងមានបណ្តោយប្រវែង៣,៥គីឡូម៉ែត្រ និងចេញពីច្រាំងចូលទន្លេប្រវែង៣០០ម៉ែត្រ ហើយទីតាំងគំរោងនេះស្ថិតនៅទល់មុខ បញ្ឈិតភាគខាងត្បូងទីក្រុងកោះពេជ្របច្ចុប្បន្ននេះ។ លោកបន្តថា គំរោងនេះនឹងរៀបចំផែនការអភិវឌ្ឍស្រដៀងគ្នានឹងទីក្រុងកោះពេជ្របច្ចុប្បន្ននេះ ប៉ុន្តែផែនការលំអិតនិងការចំណាយលើការសាងសង់អាគារនានា មិនទាន់ត្រូវបានគិតគូរនៅឡើយទេ។

លោកបន្តថា “ទីក្រុងថ្មីនេះ នឹងលេចរូបរាងនៅដើមឆ្នាំ២០២៣ខាងមុខនេះហើយ ខណៈបច្ចុប្បន្នក្រុមហ៊ុនកំពុងចាក់ថ្មចូលទន្លេ ដើម្បីបង្កើតនូវកោះសប្បនិម្មិតថ្មីមួយ”។លោកបន្តថា “ការពិតតំបន់នេះកាលពីចុងទសវត្សរ៍ទី៩០ គឺជាដីកោះ តែដោយសារជំនន់ទន្លេមេគង្គ បានធ្វើឲ្យដីកោះនៅទីតាំងនេះបាក់ចូលទន្លេ”។

ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា លោកច្រឹក សុខនីមបានថ្លែងស្វាគមន៍គំរោងដ៏គួរឲ្យចាប់អារម្មណ៍នេះ ដោយលោកបានមានប្រសាសន៍ថា ផ្អែកលើកត្តតាខសុខសន្តិភាព ស្ថេរភាពនយោបាយ និងការរីកចម្រើនសេដ្ឋកិច្ចរបស់កម្ពុជា ការកសាងទីក្រុងថ្មីបែបនេះនឹងជួយជំរុញកំនើនសេដ្ឋកិច្ចបន្ថែមទៀត។

លោកបន្តថា “វាមិនត្រឹមតែជាការជួយរួមចំណែកលើការអភិវឌ្ឍនោះទេ ប៉ុន្តែគំរោងនេះក៏នឹងរួមចំណែកផ្តល់ទំនុកចិត្ត ដល់ការវិនិយោគលើវិស័យអចលនទ្រព្យកម្រិតជាតិ និងអន្តរជាតិបន្ថែមទៀត”៕

IMF៖ សេដ្ឋកិច្ចអាស៊ីប្រឈមនឹងការធ្លាក់ចុះកំណើនសេដ្ឋកិច្ចបន្ថែមទៀតនៅឆ្នាំ ២០២០

ដោយ Donald Lee

ភ្នំពេញ៖ សេដ្ឋកិច្ចអាស៊ីនឹងប្រឈមនឹងការថយចុះកំណើនផលិតផលសរុបក្នុងស្រុកបន្ថែមទៀត។ នេះបើយោងតាមទិន្នន័យថ្មីដែលចេញផ្សាយដោយមូលនិធិរូបិយវត្ថុអន្តរជាតិ (IMF)។

ហុងកុង និងកូរ៉េខាងត្បូងនឹងរងផលប៉ះពាល់ខ្លាំងបំផុតនៅឆ្នាំ ២០២០។ នេះបើយោងតាមរបាយការណ៍ចក្ខុវិស័យសេដ្ឋកិច្ចក្នុងតំបន់ដែលចេញផ្សាយក្នុងសប្តាហ៍នេះ។

ចលាចលនយោបាយនៅហុងកុងឆ្នាំនេះបានធ្វើឱ្យសេដ្ឋកិច្ចធ្លាក់ចុះ។ IMF រំពឹងថា អត្រាកំណើនផលិតផលក្នុងស្រុកសរុបរបស់តំបន់នេះនឹងធ្លាក់ចុះប្រហែល ០.៣ ភាគរយក្នុងឆ្នាំនេះ ហើយបានព្យាករណ៍ថានឹងមានកំណើន ១,៥ ភាគរយនៅឆ្នាំ ២០២០ ដែលជាការធ្លាក់ចុះយ៉ាងខ្លាំងពីការប៉ាន់ស្មានកំណើន ២,៩ ភាគរយរបស់ខ្លួន។

ទីក្រុងហុងកុងបានបង្កប់នូវការតវ៉ាដែលបានធ្វើឱ្យទីក្រុងមានភាពច្របូកច្របល់ និងប្រទេសចិនបានបញ្ជាក់ថា ខ្លួននឹងបញ្ជូនទាហានប៉ារ៉ាចូលទៅក្នុងតំបន់នេះដើម្បីបង្ការភាពវឹកវរ។

របាយការណ៍សេដ្ឋកិច្ចរបស់ទីភ្នាក់ងារ Bloomberg បាន ឲ្យដឹងថា “តម្លៃទីផ្សារមូលបត្រជាង ៦០០ ពាន់លានដុល្លារត្រូវបានលុបចោលតាំងពីដើមខែ កក្កដា ហើយអ្នកវិភាគកំពុងសម្តែងក្តីបារម្ភថា តម្លៃអចលនទ្រព្យអាចធ្លាក់ចុះផងដែរ។

អត្រាកំណើនរបស់កូរ៉េខាងត្បូងអាចនឹងបញ្ចប់ត្រឹម ២ ភាគរយក្នុងឆ្នាំនេះ និង ២,២ ភាគរយនៅឆ្នាំ ២០២០ ។ វាមានការធ្លាក់ចុះ ០,៦ ភាគរយពីការប៉ាន់ស្មានពីមុន។
សេដ្ឋកិច្ចកូរ៉េខាងត្បូងបានព្យាយាមធ្វើឱ្យប្រសើរឡើងវិញចាប់តាំងពីដើមឆ្នាំនេះ។ អត្រាគ្មានការងារធ្វើបានឈានដល់កំរិតខ្ពស់ក្នុងរយៈពេល ៩ ឆ្នាំ ហើយផលិតផលក្នុងស្រុកសរុបរបស់ខ្លួនបានធ្លាក់ចុះយ៉ាងខ្លាំងចាប់តាំងពីមានវិបត្តិសេដ្ឋកិច្ចពិភពលោកក្នុងឆ្នាំ ២០០៨ ។

ការធ្លាក់ចុះគឺជាលទ្ធផលនៃការធ្លាក់ចុះសេដ្ឋកិច្ចចិនដែលជាការធ្លាក់ចុះនៃវិស័យបច្ចេកវិទ្យា និងការធ្លាក់ចុះជាទូទៅនៃសេដ្ឋកិច្ចពិភពលោក ដោយសារតែភាពតានតឹងពាណិជ្ជកម្មពិភពលោក។

របាយការណ៍របស់ IMF បានឱ្យដឹងថា “ហានិភ័យនៅក្នុងតំបន់ រួមមានការធ្លាក់ចុះយឺតជាងការរំពឹងទុកនៅចិន ភាពតានតឹងក្នុងតំបន់ដូចជាទំនាក់ទំនងទ្វេភាគីរវាងជប៉ុន និងកូរ៉េ ការកើនឡើងហានិភ័យភូមិសាស្ត្រនយោបាយ”។

សេដ្ឋកិច្ចសឹង្ហបូរីរួចផុតពីការធ្លាក់ចូលក្នុងវិបត្តិសេដ្ឋកិច្ចដោយកើនឡើង ០,៦ ភាគរយនៅក្នុងត្រីមាសទី ៣។ នេះបើយោងតាមទិន្នន័យរបស់ក្រសួងពាណិជ្ជកម្មសឹង្ហបូរីដែលបានចេញផ្សាយក្នុងខែនេះ។

មូលនិធិរូបិយវត្ថុអន្តរជាតិបានកែការព្យាករណ៍ឆ្នាំ ២០១៩ របស់សឹង្ហបូរីដែលមានកំណើនផលិតផលក្នុងស្រុកសរុប ០,៥ ភាគរយ និងអត្រាកំណើន ១ ភាគរយសម្រាប់ឆ្នាំ ២០២០ ។

សេដ្ឋកិច្ចសឹង្ហបូរីបានធ្លាក់ចុះមកត្រឹម ២,៧ ភាគរយនៅក្នុងត្រីមាសទី ២ នៃឆ្នាំនេះ ដោយសារតែជម្លោះពាណិជ្ជកម្មរវាងអាមេរិកនិងចិន។ នៅក្នុងការប្រៀបធៀបពីមួយឆ្នាំទៅមួយឆ្នាំផលិតផលក្នុងស្រុកសរុបរបស់សឹង្ហបូរីបានកើនឡើងត្រឹមតែ ០.១ ភាគរយប៉ុណ្ណោះ៕

ផ្សារទំនើប FURI TIMES SQUARE នៅក្រុងព្រះសីហនុនឹងចាប់បើកដំណើរការនៅថ្ងៃស្អែកនេះ

ផ្សារទំនើប Furi Times Square ប្រកាសផ្តល់ឱកាសការងារជាច្រើនរយកន្លែង

ដោយៈ រ៉ាណេត

ព្រះសីហនុៈ នៅត្រឹមព្រឹកថ្ងៃទី២៥ ខែតុលា ឆ្នាំ២០១៩ ស្អែកនេះ ផ្សារទំនើបដ៏ធំលើកដំបូងគេ ប្រចាំនៅក្នុងក្រុងព្រះសីហនុ FURI Times Square នឹងចាប់ផ្តើមបើកដំណើរការហើយ ជាមួយនឹងការនាំមកជូននូវបទពិសោធន៍ថ្មី នៃការទិញ លក់ ទំនិញគ្រប់ប្រភេទបែបស៊ីវិល័យ និងសម្បូរបែបបំផុត។

នាយិកាគ្រប់គ្រងទីផ្សារ និងការលក់ផ្សារទំនើប FURI Times Square កញ្ញា លីម សុខាដាវីន បានប្រាប់ឱ្យដឹងថា នៅត្រឹមព្រឹកថ្ងៃទី២៥ ខែតុលា ឆ្នាំ២០១៩ស្អែកនេះ ផ្សារទំនើបបែបស៊ីវិល័យមួយនេះ នឹងចាប់បើកទ្វារដំណើរការលក់លើកដំបូង ដើម្បីជាការឆ្លើយតបទៅនឹងតម្រូវការរបស់អតិថិជននៅក្នុងក្រុងព្រះសីហនុ។

កញ្ញាបានបន្តទៀតថា “ការបើកទ្វារដំណើរនៅថ្ងៃស្អែកនេះ គ្រាន់តែជាការបើកជំហានដំបូង ដែលស្របទៅនឹងឱកាសនៃថ្ងៃឈប់សម្រាករបស់មន្ត្រីរាជការ និងសាធារណៈជនទូទាំងប្រទេសនៃពិធីបុណ្យអ៊ុទូក បណ្តែតប្រទីបអកអំបុក និងសំពះព្រះខែ ដោយឡែកពិធីបើកសម្ពោធជាផ្លូវការណ៍តែម្ដង គឺនៅដំណាច់ឆ្នាំ២០១៩ឆាប់ៗខាងមុខនេះ”។

កញ្ញាលីម សុខាដាវីន បានបន្តឱ្យដឹងថែមទៀតថា “ជាមួយនឹងកិច្ចដំណើរការសាកល្បងនេះ ផ្សារទំនើប FURI Times Square បាននាំមកជូនអតិថិជននូវបណ្តាផលិតផល មុខទំនិញចំរុះយ៉ាងសម្បូរបែប ដែលសុទ្ធតែជាម៉ាកយីហោល្បីៗ លំដាប់សាកលលោក ដូចជា ក្រុមហ៊ុន KFC , ក្រុមហ៊ុន Starbucks, ក្រុមហ៊ុន Amazone Café , ក្រុមហ៊ុន KOI , ក្រុមហ៊ុន Dakasi Tea, ក្រុមហ៊ុនលក់សម្លៀកបំពាក់ LEVI’s , ក្រុមហ៊ុន NIKE , ក្រុមហ៊ុន Samsonite, ក្រុមហ៊ុននាឡិកាដ៏ល្បីឈ្មោះ G-Shock, ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងបរិក្ខាប្រើប្រាស់ប្រចាំថ្ងៃ និងគ្រឿងសំអាងផងដែរ ”។

កញ្ញាបានបន្តទៀតថា “ផ្សារទំនើបនេះ នឹងចាប់បើកទ្វារបម្រើអតិថិជនចាប់ពីម៉ោង៩ព្រឹក រហូតដល់ម៉ោង១១យប់ ដែលក្រៅពីមានលក់នូវមុខទំនិញ និងអាហារយ៉ាងសម្បូរបែប ក៏មានទីកន្លែងកម្សាន្តសម្រាប់កុមារ និងយុវវ័យផងដែរ ជាពិសេសមានរោងកុនបែបទំនើបនៅជាន់ខាងលើ រួមជាមួយនឹង Sky Bar ដែលរៀបចំនៅជាន់ខាងលើលំហរអាកាសនៅពេលរាត្រីផងដែរ”។

សូមរីករាយ និងស្វាគមន៍ នៃការមកដល់ផ្សារទំនើបដ៏ទាន់សម័យ និងស៊ីវិល័យលើកដំបូងគេបង្អស់នៅក្រុងព្រះសីហនុទាំងអស់គ្នា …..៕

លោកម៉ាង ស៊ីណេត ដឹកនាំកិច្ចជុំបង្កើតគណៈកម្មការរៀបចំពិធីអុំទូកផ្កាចារនៅអាងទឹកព្រៃនប់

ដោយ វុត្ថា

ខេត្តព្រះសីហនុ៖ លោក ម៉ាង ស៊ីណេត អភិបាលរងខេត្តព្រះសីហនុបានបើកកិច្ចប្រជុំបង្កើតគណៈកម្មការរៀបចំពិធីបុណ្យអុំទូកផ្កាចារ នៅអាងទឹកព្រៃនប់ ឃុំព្រៃនប់ ស្រុកព្រៃនប់ ខេត្តព្រះសីហនុ រយៈពេល២ថ្ងៃ ចាប់ពីថ្ងៃទី២ ដល់ថ្ងៃទី៣ ខែវិច្ឆិកា ឆ្នាំ២០១៩ ។

លោក ម៉ាង ស៊ីណេត ថ្លែងនៅក្នុងពិធីបើកកិច្ចប្រជុំដែលមានការចូលរួមពីលោកអភិបាល អភិបាលរងក្រុង ស្រុក និងមន្ទីរ អង្គភាពពាក់ព័ន្ធនានានៅសាលាខេត្តព្រះសីហនុ នាព្រឹកថ្ងៃទី២៤ ខែតុលា ឆ្នាំ២០១៩ បានគូសបញ្ជាក់ថា ដើម្បីឲ្យពិធីអុំទូកផ្កាចារសម្រេចបានតាមផែនការ ត្រូវបំផុសដល់មូលដ្ឋានដែលមានទូកឲ្យចូលរួមប្រឡងប្រណាំងឲ្យបានច្រើន។

លោកបន្តថា ការប្រណាំងទូកនេះ គឺដើម្បីបង្កើតបរិយាកាសសប្បាយរីករាយអធិកអធ័មចលនាដល់មន្ទីរអង្គភាពនានាជុំវិញខេត្ត និងអង្គភាពបោះទីតាំងក្នុងខេត្តព្រះសីហនុ រដ្ឋបាលក្រុង ស្រុក ឃុំ សង្កាត់ រោងចក្រ សហគ្រាស ក្រុមហ៊ុន ចូលរួមជួយឧបត្ថម្ភជាសម្ភារៈ និងថវិកាដល់ទូកនីមួយៗដើម្បីរក្សាបាននូវសន្តិសុខសណ្ដាប់ធ្នាប់ របៀបរៀបរយក្នុងបរិវេណ នៃពិធីប្រណាំងទូកផ្កាចារ ។

លោអភិបាលរងខេត្តព្រះសីហនុរូបនេះ បានកំណត់ច្បាស់ថា ឆ្នាំនេះគណៈកម្មការនឹងរៀបចំអោយបានធំជាងមុន ដោយមានៈ តន្ត្រីសម័យ ល្បែងប្រជាប្រិយ៏ បង្ហោះគោម បាញ់កាំជ្រួច និងមានកម្មវិធីសប្បាយៗជាច្រើទៀត ។

ទូកទាំងអស់មានការចូលរួមមកពីតាមបណ្តាក្រុង ស្រុកទាំង៥ ក្នុងខេត្តព្រះសីហនុ ។ លោកក៏បានជំរុញឱ្យមានការផ្សព្វផ្សាយតាមគ្រប់រូបភាព ដើម្បីឱ្យប្រជាពលរដ្ឋ ភ្ញៀវជាតិ អន្តរជាតិចូលរួមក្នុងពិធីនេះឱ្យបានច្រើនកុះករ ។

ជារៀងរាល់ឆ្នាំរដ្ឋបាលខេត្តព្រះសីហនុ តែងតែបានរៀបចំពីធីប្រណាំងទូកផ្កាចារ នៅអាងទឹកព្រៃនប់ ឃុំព្រៃនប់ ស្រុកព្រៃនប ខេត្តព្រះសីហនុ ដើម្បីបង្កើតបរិយាកាសសប្បាយរីករាយជូនបងប្អូនប្រជាពលរដ្ឋ ៕

កូរ៉េខាងត្បូងជាមួយអាស៊ាននឹងជំរុញវិស័យទេសចរណ៍ដែលជាសក្តានុពលសេដ្ឋកិច្ចនៅអាស៊ីអាគ្នេយ៍

ដោយ Donald Lee

ភ្នំពេញៈ រដ្ឋមន្រ្តីរដ្ឋកូរ៉េខាងត្បូង និងអាស៊ានរួមទាំងកម្ពុជាបានចាប់ផ្តើមពិភាក្សាយ៉ាងខ្លាំងស្តីពីវិធីជំរុញ សក្តានុពលទេសចរណ៍រវាងប្រទេសមួយ ក្នុងចំណោមប្រទេសមានសេដ្ឋកិច្ចធំជាងគេនៅអាស៊ី និងតំបន់ដែលមានប្រជាជនជិត ៧០០លាននាក់ និងផលិតផលក្នុងស្រុកសរុបកើនឡើងដល់៣ទ្រីលានដុល្លារ។

ក្រសួងវប្បធម៌ កីឡា និងទេសចរណ៍កូរ៉េខាងត្បូង បានថ្លែងនៅក្នុងសេចក្តីប្រកាសព័ត៌មានមួយថា តាមរយៈកិច្ចប្រជុំរដ្ឋមន្ត្រីវប្បធម៌នេះ យើងរំពឹងថានឹងបង្កើតសន្ទុះមួយសម្រាប់ការអភិវឌ្ឍយ៉ាងខ្លាំង នៅក្នុងកិច្ចសហប្រតិបត្តិការ និងផ្លាស់ប្តូរវប្បធម៌កូរ៉េ និងអាស៊ាន។

រដ្ឋមន្រ្តីសង្ឃឹមថា “នឹងបង្កើតគម្រោងរួមគ្នារយៈពេលវែង រវាងរដ្ឋជាសមាជិកទាំងអស់”។

ក្រសួងនឹងស្នើឱ្យមានគម្រោងសហប្រតិបត្តិការចម្រុះ និងជាក់ស្តែងដើម្បីពង្រីកការផ្លាស់ប្តូរវប្បធម៌កូរ៉េ និងអាស៊ានដែលជាផ្នែកមួយនៃការងារ នៃគោលនយោបាយថ្មីខាងត្បូង។

គោលនយោបាយថ្មីខាងត្បូង ដែលជាគំនិតផ្តួចផ្តើមបង្កើតឡើង ដោយប្រធានាធិបតី Moon Jae-in មានគោលបំណងជំរុញ ទំនាក់ទំនងរវាងកូរ៉េខាងត្បូង និងអាស៊ាន និងបង្កើនទំនាក់ទំនងពាណិជ្ជកម្ម និងវិនិយោគ។

ប្រទេសកូរ៉េបានផ្តោតការយកចិត្តទុកដាក់ភាគច្រើន លើគំនិតផ្តួចផ្តើមរបស់ខ្លួននៅកម្ពុជា។ ទំហំពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូងបានឈានដល់៨៥ លានដុល្លារក្នុងរយៈពេល៤ខែដំបូងនៃឆ្នាំ ២០១៩។ ការនាំចេញរបស់កម្ពុជាទៅកូរ៉េខាងត្បូងមានតម្លៃ២១,៦លានដុល្លារ កើន៤,៣៨ភាគរយ បើប្រៀបនឹងរយៈពេលដូចគ្នាកាលពីឆ្នាំមុន។

កូរ៉េខាងត្បូងបានឈរនៅលំដាប់ទី២ ក្នុងការវិនិយោគផ្ទាល់ពីបរទេសនៅកម្ពុជា។ រហូតមកដល់ពេលនេះ រដ្ឋាភិបាលកម្ពុជាបានអនុម័តគម្រោងវិនិយោគ របស់កូរ៉េចំនួន ២១២ គម្រោងដែលមានទឹកប្រាក់ចំនួន៤,៥៦ពាន់លានដុល្លារ។ ក្រុមហ៊ុនកូរ៉េខាងត្បូងជិត៣០០បានធ្វើប្រតិបត្តិការនៅកម្ពុជា ដោយផ្តល់ការងារដល់មនុស្សរាប់ពាន់នាក់។

ពាណិជ្ជកម្មទ្វេភាគីរបស់កូរ៉េខាងត្បូង និងអាស៊ាននឹងឈានដល់ទំហំទឹកប្រាក់ ២០០ពាន់លានដុល្លារនៅឆ្នាំ២០២០។ គោលដៅដើមនៃការឈានដល់២០០ពាន់លានដុល្លារ នៅក្នុងពាណិជ្ជកម្មទ្វេភាគីត្រូវបានផ្តួចផ្តើមឡើងក្នុងឆ្នាំ២០១៤។

ប្រទេសកូរ៉េខាងត្បូង បានកត់ត្រាអតិរេកពាណិជ្ជកម្មយ៉ាងច្រើន ដែលមានចំនួន ៩៣,៤ពាន់លានដុល្លារជាមួយអាស៊ានកាលពីឆ្នាំមុន។

ការនាំចេញភាគច្រើនទៅកាន់អាស៊ីអាគ្នេយ៍ គឺបន្ទះឈីបកុំព្យួទ័រ និងវាយនភ័ណ្ឌ។ នេះយោងតាមរបាយការណ៍របស់ធនាគារកូរ៉េ។

ទំហំពាណិជ្ជកម្មសរុបរវាងកូរ៉េ និងតំបន់អាស៊ាន បានកើនឡើងដល់១៦០ពាន់លានដុល្លារក្នុងឆ្នាំ២០១៧ គឺកើនឡើងទ្វេដង បើប្រៀបធៀបនឹងឆ្នាំមុនមួយទៀត ហើយគ្រោងនឹងឈានដល់ ទំហំទឹកប្រាក់២០០ពាន់លានដុល្លារនៅចុងឆ្នាំ២០២០៕

រដ្ឋាភិបាលបានកែសម្រួលប្លង់មេអភិវឌ្ឍន៍តំបន់តារាសាគរខេត្តកោះកុង

ដោយ វុត្ថា

ភ្នំពេញៈ រដ្ឋាភិបាលបានបើកកិច្ចប្រជុំអន្តរក្រសួង ពិនិត្យពិភាក្សាលើសំណើសុំកែសម្រួលប្លង់មេអភិវឌ្ឍន៍តំបន់ទេសចរណ៍ ស្ថិតស្រុកគីរីសាគរ និងស្រុកបុទុមសាគរ ខេត្តកោះកុង របស់ក្រុមហ៊ុន Union development Group Co.,Ltd។

កិច្ចប្រជុំអន្តរក្រសួងបានពិនិត្យពិភាក្សា លើការកែសម្រួលគម្រោងប្លង់មេអភិវឌ្ឍន៍តារាសាគរ ខេត្តកោះកុង ត្រូវបានធ្វើឡើងកាលពីពេលថ្មីៗនេះ ដែលដឹកនាំដោយ សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា។

យោងតាមគេហទំព័ត៌របស់ក្រុមហ៊ុន Union development Group Co.,Ltd ដែលបានចុះផ្សាយកាលពីកន្លងមកនេះបានឱ្យដឹងថា ប្លង់មេនៃតំបន់ពិសោធន៍ការអភិវឌ្ឍ វិនិយោគចម្រុះកម្ពុជា-ចិន ឬតំបន់វិស្សមកាលទេសចរណ៍តារាសាគរកម្ពុជា ត្រូវបានបែង ចែកជា៧ផ្នែក ត្រូវបានកំណត់ជា ”អន្តរប្រតិបត្តិការ” ក្នុងវេទិការសហប្រតិបត្តិការវិនិយោគ និងជាយុទ្ធសាស្រ្តរវាងចិន-កម្ពុជា។

គេហទំព័រនេះបានបន្តថា “ប្រទេសកម្ពុជាគឺជាគន្លឹះដ៏សំខាន់ នៅអាស៊ីអាគ្នេយ៍សម្រាប់ប្រទេសចិន ក្នុងការតភ្ជាប់ទៅអឺរ៉ុប អាស៊ីនិងអាហ្រ្វិកក្នុងយុទ្ធសាស្រ្ត”ផ្លូវមួយខ្សែក្រវ៉ាត់មួយ” ជាមូលដ្ឋានឧស្សាហកម្មដ៏សំខាន់ សម្រាប់យុទ្ធសាស្រ្ត”ចាកចេញ” នៃក្រុមហ៊ុនចិនទៅកាន់ អាស៊ីអាគ្នេយ៍”។

វេទិកាសហប្រតិបត្តិការវិនិយោគ និងជាយុទ្ធសាស្រ្តរវាងចិន-កម្ពុជា ក៏បានក្លាយទៅជាវេទិកាយុទ្ធសាស្រ្តដ៏សំខាន់ សម្រាប់ប្រទេសចិន ក្នុងការនាំចេញនូវសមត្ថភាពផលិតកម្មនិង សេវាគ្រប់គ្រងបច្ចេកទេសទៅកាន់តំបន់អាស៊ីអាគ្នេយ៍។ ជាគំរូដ៏ល្អសម្រាប់យន្តការកិច្ចសហប្រតិបត្តិការចិន – អាស៊ាន ដើម្បីកសាងទំនាក់ទំនងជាយុទ្ធសាស្រ្តគ្នានឹងគ្នា។ គម្រោងនេះ ក្លាយ ជាតំបន់ស្នូលនៅក្នុងច្រករបៀងសេដ្ឋកិច្ចក្នុងប្រទេស កម្ពុជា។

គេហទំព័រដដែលបញ្ជាក់ថា “គម្រោងនឹងអភិវឌ្ឍន៍ដំណាក់កាលដំបូង ស្ថិតនៅលើផ្ទៃដី៦៨០០ហិកតា ដែលស្ថិតនៅកែងនៃដីដែលមានរាងជាអក្សរ L។ ថ្ងៃអនាគតនឹងក្លាយជាចំណុចកណ្តាលនៃទីក្រុង ដែលធ្វើឲផ្នែកទាំងសងខាងនៃទីក្រុងមានការអភិវឌ្ឍន៍។ នឹងក្លាយជាទីក្រុងចម្រុះសម្រាប់ការរស់នៅ ទេសចរណ៍ ពិព័រណ៍ពាណិជ្ជកម្មនិងឧស្សាហកម្ម”។

ក្រុមហ៊ុន UNION Development Group Co., Ltd. Cambodia បានបោះទុនវិនិយោគទឹកប្រាក់១,២០០លានដុល្លារ ដើម្បីបើកការដ្ឋានសាងសង់ «ក្រុងវិស្សមកាលទេសចរណ៍» កាលពីដើមឆ្នាំ២០១៩ ដើម្បីរួមចំណែកលើកកម្ពស់វិស័យទេសចរណ៍ សេដ្ឋកិច្ច និងពាណិជ្ជកម្ម នៅក្នុងប្រទេសកម្ពុជា។

គម្រោង «ក្រុងវិស្សមកាលទេសចរណ៍» ត្រូវបានសាងសង់លើផ្ទៃដីសរុបចំនួន ១,២០០ហិកតា ដែលប្រមូលផ្តុំដោយហេដ្ឋារចនាសម្ព័ន្ធចម្រុះ ដូចជា សណ្ឋាគារលំដាប់ផ្កាយ៥ ខុនដូទំនើប បឹងកាឡូ ការិយាល័យធ្វើការ មជ្ឈមណ្ឌលពាណិជ្ជកម្ម និងសួនកម្សាន្តខ្នាតអន្តរជាតិ។

ក្រុមហ៊ុន UNION Development Group Co., Ltd បានចុះកិច្ចសន្យាជាមួយរាជរដ្ឋាភិបាលកម្ពុជា នៅថ្ងៃទី៩ ខែឧសភា ឆ្នាំ២០០៨ ដើម្បីធ្វើការអភិវឌ្ឍគម្រោងតារាសាគរ លើផ្ទៃដីសរុបទំហំ៣៦,០០០ហិចតា៕

នាយករដ្ឋមន្ត្រី៖ ជប៉ុននឹងបន្តការគាំទ្រយ៉ាងពេញទំហឹងដល់ការអភិវឌ្ឍរបស់កម្ពុជា

ដោយ ប៊ី

តូក្យូ៖ លោក Shinzo Abe នាយករដ្ឋមន្រ្តីនៃប្រទេសជប៉ុន បានទូលថ្វាយព្រះមហាក្សត្រខ្មែរ ព្រះករុណា ព្រះបាទសម្តេច ព្រះបរមនាថនរោត្តម សីហមុនីថា ជប៉ុនបន្តគាំទ្រយ៉ាងពេញទំហឹង ចំពោះការអភិវឌ្ឍរបស់កម្ពុជា ហើយឈរនៅជាមួយកម្ពុជាជានិច្ច។

ការបញ្ជាក់របស់លោកនាយករដ្ឋមន្ត្រីជប៉ុន បានធ្វើឡើងក្នុងពេលអញ្ជើញចូលគាល់ និងជួបសវនាការជាមួយព្រះមហាក្សត្រខ្មែរ នៅរសៀលថ្ងៃទី២២ ខែតុលា ឆ្នាំ២០១៩កន្លងទៅនេះ ក្នុងពេលព្រះអង្គកំពុងគង់ប្រថាប់ បំពេញព្រះរាជកិច្ចក្នុងប្រទេសជប៉ុន។

លោក Shinzo Abe បានលើកឡើងថា “ព្រះករុណាព្រះបរមររនកោដ្ឋ ព្រះអង្គមិនត្រឹមតែបាននាំមកជូនកម្ពុជា នូវសន្តិភាព និងការអភិវឌ្ឍន៍តែប៉ុណ្ណោះទេ ប៉ុន្តែ ព្រះអង្គ បានបង្កើតឡើងនូវទំនាក់ទំនងសាមគ្គីភាព រវាងប្រទេសយើងទាំងពីរកម្ពុជា-ជប៉ុន”។

បន្ថែមពីលើនេះ លោកបានបន្តថា ប្រទេសជប៉ុននិងកម្ពុជា មានការអភិវឌ្ឍន៍គួរឲ្យកត់សម្គាល់ ក្នុងនាមជាដៃគូរយុទ្ធសាស្រ្តចាប់តាំងពីឆ្នាំ២០១៣ ហើយប្រទេសជប៉ុន តែងតែឈរនៅជាមួយប្រទេសកម្ពុជា លើការអភិវឌ្ឍន៍ប្រជាធិបតេយ្យ។

លោកបានឱ្យដឹងទៀតថា “ប្រទេសជប៉ុន និងបន្តគាំទ្រយ៉ាងពេញទំហឹងចំពោះការអភិវឌ្ឍន៍របស់ប្រទេសជាតិ ក្រោមការឯកភាពរបស់ប្រជាជន”។ លោកបន្តថា “ប្រទេសជប៉ុន ក៏បានគាំទ្រដល់ការអភិរក្សប្រាសាទអង្គរ អស់រយៈពេលជាច្រើនឆ្នាំ ហើយនឹងបន្តគាំទ្រការផ្លាស់ប្តូរលើវិស័យវប្បធម៌ និងពង្រឹងទំនាក់ទំនងទ្វេភាគីឲ្យកាន់តែរីកចម្រើន”។

ដូចគ្នានេះដែរ ព្រះអង្គ ក៏បានសម្តែងការកោតសរសើរយ៉ាងជ្រាលជ្រៅ ចំពោះការគាំទ្ររបស់ប្រទេសជប៉ុន សម្រាប់ការអភិវឌ្ឍប្រទេសកម្ពុជា ក្នុងរយៈពេលជាច្រើនឆ្នាំកន្លងមក និងបានអបអរសាទរចំពោះចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ដែលកំពុងឈានទៅមុខពីមួយឆ្នាំទៅមួយឆ្នាំ៕

មជ្ឈមណ្ឌលពាណិជ្ជកម្មលំដាប់ពិភពលោកកំពស់ ៦៩ជាន់ បានចាប់ផ្តើមសាងសង់នៅទីក្រុងកោះពេជ្រ

ដោយ ស៊ីវ ម៉េង

ភ្នំពេញៈ គំរោងមជ្ឈមណ្ឌលពាណិជ្ជកម្មលំដាប់ពិភពលោក ដែលមានកំពស់រហូតដល់ ៦៩ជាន់ ស្ថិតនៅទីក្រុងកោះពេជ្រ បានបង្ហាញរូបរាងអាគារស្ថាបត្យតកម្មដ៏អស្ចារ្យរបស់ខ្លួនហើយ។

បច្ចុប្បន្នក្រុមការងារផ្នែកវិស្វកម្មបាន និងកំពុងចាប់ផ្តើមសកម្មភាពសាងសង់ជាមួយនឹងគ្រឿងចក្រមួយចំនួន ខណៈការព័ទ្ឋរបងបានបញ្ចប់ ហើយមានការដាក់ភ្លើងបំភ្លឺនៅពេលរាត្រីផងដែរ។ គំរោងនេះមានឈ្មោះ Wonder Prime One។

មជ្ឈមណ្ឌលពាណិជ្ជកម្មដ៏ខ្ពស់នេះ នឹងប្រើប្រាស់ចម្រុះដូចជា សណ្ឋាគារ អាផាតម៉ិនប្រណីត ការិយាល័យជាដើម។ មជ្ឈមណ្ឌលពាណិជ្ជកម្មកប់ពពកនេះមានកំពស់រហូតដល់ ២៧៦ម៉ែត្រ។

គំរោងនេះ ត្រូវបានវិនិយោគដោយក្រុមហ៊ុន Wonder Capital Group មកពីទីក្រុងហុងកុង។

អគ្គនាយករងក្រុមហ៊ុន OCIC ដែលកំពុងគ្រប់គ្រងទីក្រុងកោះពេជ្រ លោកទូច សំណាងបានមានប្រសាសន៍ឲ្យដឹងកាលពីពេលថ្មីៗនេះថា មជ្ឈមណ្ឌលពាណិជ្ជកម្មនេះបានបញ្ចប់ការខួងគ្រឹះរួចហើយ និងគ្រោងប្រកាសបើកសម្ភោធនៅខែកក្កដានេះ។ លោកបន្តថា ក្រុមហ៊ុននេះបានទិញដីនៅទីក្រុងកោះពេជ្រ ដើម្បីសាងសង់អាគារនេះ តែយ៉ាងណាលោកមិនបញ្ចេញឲ្យដឹងពីទំហំទឹកប្រាក់នោះទេ។

លោកបានបន្តថា បច្ចុប្បន្នផ្ទៃដីទីក្រុងកោះពេជ្រ ទើបប្រើប្រាស់អស់ប្រមាណ៥០ភាគរយប៉ុណ្ណោះ ហើយបើគិតពីផ្ទៃក្រឡាសំណង់់ ទើបសម្រេចបាន២៥ភាគរយ ឬ១ភាគ៤នៃផែនការនៅឡើយ។

នាយិកាក្រុមហ៊ុន Century21 Cambodia អ្នកនាង Grace Rachny Fong បានមានប្រសាសន៍ឲ្យដឹងថា តំបន់កោះពេជ្រ និងតំបន់ជុំវិញបាននិងកំពុងក្លាយជា Hub business លំដាប់អន្តរជាតិជាបណ្តើរៗហើយ ដោយតំបន់នេះនឹងមានមជ្ឈមណ្ឌលពាណិជ្ជកម្មកប់ពពកធំៗជាច្រើនទៀតនឹងសាងសង់ឡើង៕

កម្ពុជា-អាមេរិកសន្យាបន្តពង្រីក និងពង្រឹងនូវទំនាក់ទំនងកិច្ចសហប្រតិបត្តិការឱ្យកាន់តែល្អ

ដោយ វុត្ថា

ភ្នំពេញ៖ ប្រទេសកម្ពុជា នឹងសហរដ្ឋអាមេរិក បានសន្យាពង្រីក និងពង្រឹងទំនាក់ទំនងលើកិច្ចសហប្រតិបត្តិការលើគ្រប់វិស័យបន្ថែមទៀត ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅក្នុងជំនួបពិភាក្សាការងារជាមួយលោក W.Patrick Murphy ឯកអគ្គរដ្ឋទូតថ្មីសហរដ្ឋអាមេរិកប្រចាំនៅកម្ពុជា កាលពីល្ងាចថ្ងៃទី ២៣ ខែតុលា ឆ្នាំ ២០១៩ ម្សិលមិញនេះឱ្យដឹងថា អ្វីដែលជាការបន្តធ្វើរវាងកម្ពុជា-អាមេរិកនោះគឺការបន្តពង្រីក និងពង្រឹងនូវទំនាក់ទំនង ក៏ដូចជាកិច្ចសហប្រតិបត្តិការរវាងប្រទេសយើងទាំងពីរបន្ថែមទៀត។

សម្តេចបន្តថា ដោយសារកន្លងមកកម្ពុជា និងសហរដ្ឋអាមេរិកមានការសហការគ្នាលើគ្រប់វិស័យ ពិសេសកន្លងមកយើងមានចំណុចដែលបានឯកភាពគ្នាច្រើន ហើយយើងនឹងបន្តពេលវេលា ដើម្បីធ្វើការសហការគ្នាជាបន្តបន្ទាប់ទៀត។

កម្ពុជានិងអាមេរិកក៏មានកិច្ចសហប្រតិបត្តិការលើវិស័យជាច្រើនផងដែរមានទាំងវិស័យអប់រំវិស័យសុខាភិបាលជាដើម ហើយយើងនឹងបន្តធ្វើការងារលើវិស័យសំខាន់ៗនេះជាបន្តទៀត ។ សម្ដេចតេជោម ក៏បានជំរុញដល់ឯកអគ្គរដ្ឋទូតអាមេរិកផងដែរទាក់ទងទៅនឹងការបង្កើនកិច្ចសហប្រតិបត្តិការកម្រិតអន្តរជាតិ ជាពិសេសក្នុងក្របខ័ណ្ឌអង្គការសហប្រជាជាតិ និងក្នុងក្របខណ្ឌអាស៊ាន និងសហរដ្ឋអាមេរិកផងដែរ។

សម្តេចបន្តថា កម្ពុជានឹងធ្វើជាប្រធានអាស៊ាននៅឆ្នាំ២០២២ ដូច្នេះសម្តេចចង់ឃើញអាមេរិក និងអាស៊ានមានការសហការគ្នា។ ទាក់ទងទៅនឹងទំនាក់ទំនងនេះផងដែរ នៅឆ្នាំក្រោយនេះគឺជាខួបទី៧០ នៃទំនាក់ទំនងរវាងប្រទេសយើងទាំងពីរ ដូច្នេះកម្ពុជា និងទូតអាមេរិក នឹងសហការគ្នាក្នុងការធ្វើកម្មវិធីមួយចំនួននៅខួបនៃទំនាក់ទំនងនេះ។

លោក W.Patrick Murphy អគ្គរដ្ឋទូតសហរដ្ឋអាមេរិក បានថ្លែងអំណរគុណចំពោះសម្ដេចតេជោនាយករដ្ឋមន្ត្រី ដែលបានអនុញ្ញាតឲ្យឯកឧត្តម បានចូលជួបសំដែងការគួរសមនិងពិភាក្សាការងារនៅពេលនេះ។

ដូច្នេះតាមរយៈជំនួបនេះ គឺជាលើកដំបូងរបស់លោកឯកអគ្គរដ្ឋទូតអាមេរិកថ្មី ក្នុងការជួបសំដែងការគួរសមនិងពិភាក្សាការងារដោយផ្តោតសំខាន់ទៅលើការបន្តពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឲ្យកាន់តែមានភាពល្អប្រសើរឡើងបន្ថែមទៀត៕