ផ្លូវ ២៤ខ្សែ នៅក្រុងព្រះសីហនុចាប់ផ្តើមស្ថាបនាឡើងវិញបណ្តើរៗហើយ

ដោយ វុត្ថា

ភ្នំពេញ៖ រដ្ឋាភិបាលតាមរយៈអាជ្ញាធរខេត្តព្រះសីហនុបានចាប់ផ្តើមស្ថាបនាឡើងវិញនូវគម្រោងផ្លូវ ២៤ខ្សែនៅក្នុងក្រុង ដើម្បីជួយសម្រួលចរាចរណ៍ និងភាពកកស្ទះ ក៏ដូចជាសោភ័ណភាពក្រុងកាន់តែល្អប្រសើរ។

លោក គួច ចំរើន អភិបាលនៃគណៈអភិបាលខេត្តព្រះសីហនុកាលពីថ្ងៃទី២១ ម្សិលមិញនេះ បានដឹកនាំមន្ត្រីជំនាញចុះពិនិត្យផ្លូវ ៣ខ្សែ ដែលស្ថិតនៅក្នុងគម្រោង ២៤ខ្សែ ក្នុងនោះបន្តទៅពិនិត្យតូបនៅចុងអូរឈើទាល និងផ្តល់ឱ្យអាជីវករសាងសង់តូបរបស់ពួកគាត់ទៅតាមលក្ខណៈស្តង់ដា ដែលធ្វើឱ្យមានសោភ័ណភាពកាន់តែល្អ ដើម្បីឱ្យទាក់ទាញភ្ញៀវទេសចរណ៍ជាតិ និងអន្តរជាតិមកកំសាន្តនៅខេត្តព្រះសីហនុឱ្យបានច្រើន។

របាយការណ៍របស់រដ្ឋាភិបាលបានឱ្យដឹងថា មានផ្លូវចំនួន២៤ខ្សែ នឹងត្រូវជួសជុលស្ថាបនាឱ្យកាន់តែបានល្អឡើងវិញ ក្នុងនោះកម្លាំងក្រុមការងារស្ថាបនា ក៏បានចុះធ្វើសកម្មភាព ក្រោមកិច្ចសហការពីអជ្ញាធរពាក់ព័ន្ធ រួមមាន៖

១- កងវិស្វកម្ម សម្តេចតេជោ ហ៊ុន សែន សៀមរាប ស្ថាបនាផ្លូវមហាវិថីជំទាវម៉ៅ ប្រវែង ៩.៣៦៥ម ចំនួន ០១ខ្សែ។

២- កងវិស្វកម្ម លេខ ១៧៨ ស្ពានថ្នល់ ស្ថាបនាវិថីឯករាជ្យ ប្រវែង ៥.៣៦៥ម ចំនួន ០១ខ្សែ។

៣- ក្រុមហ៊ុន ហេង សម្បត្តិ ស្ថាបនាមហាវិថីឆ្នេររាម, វិថីអូរត្រេះ, វិថីពូទ្បូវៃ, វិថី២ធ្នូ, វិថី២៨ មិថុនា ប្រវែងសរុប ២៣.៣៦០ម ចំនួន ០៥ខ្សែ។

៤- ក្រុមហ៊ុនរ៉ូយ៉ាល់មេគង្គ ស្ថាបនាមហាវិថីរាម លេខ ៤៥ និងវិថីមិត្តភាពកម្ពុជា-រុស្សី លេខ ៧០៥ ប្រវែងសរុប ១១.៦០៣ម ចំនួន ០២ខ្សែ។

៥- ក្រុមហ៊ុន សារជីវកម្ម ពិស្ណុការ ស្ថាបនាខ្សែផ្លូវលេខ ៤, ៦, ១២, ៧.១៧, ១៨. ១៩, ២០, ១១ ប្រវែងសរុប ១២.៥៧២ម. ចំនួន ០៩ខ្សែ។

៦- ក្រុមហ៊ុន SCE ស្ថាបនាវិថីចំណោតអូរត្រាវ លេខ ៤៩ ប្រវែងសរុប ៦.៥០៦ម ចំនួន ១ខ្សែ៧- ក្រុមហ៊ុន VT ស្ថាបនាផ្លូវលេខ ១១៥, ១៣៥, ១០២, ១២៦, ៥០២ ប្រវែងសរុប ៥.៥៦២ម ចំនួន ០៥ ខ្សែ។

គម្រោងស្ថាបនាផ្លូវ ក្នុងក្រុងព្រះសីហនុនេះ នឹងប្រើរយៈពេល ៨ខែ ដើម្បីស្ថាបនាជួសជុលឲ្យរួចរាល់ជាស្ថាពរ ក្រោមថវិការបស់សម្តេចតេជោ ហ៊ុន សែនដែលបានទំលាក់ឱ្យស្ថាបនាឡើងវិញចំនួនជាង ១០០ លានដុល្លារអាមេរិក៕

កម្ពុជាបាននិងកំពុងវិនិយោគទុន ២៤លានដុល្លារនៅមីយ៉ាន់ម៉ា

ដោយ ប៊ី

ភ្នំពេញៈ កម្ពុជាបាននិងកំពុងក្លាយជាប្រទេស វិនិយោគផ្ទាល់ពីបរទេសជាមួយទុនវិនិយោគ ២៤ លានដុល្លារនៅមីយ៉ាន់ម៉ា។

កម្ពុជាស្ថិតក្នុងបណ្តាប្រទេសអាស៊ានចំនួន៨ទៀត បានបោះវិនិយោគផ្ទាល់បរទេស (FDI) ដែលមានទឹកដល់ ៣៨.១៥ពាន់លានដុល្លារ ស្មើនឹង៤៦,៦ភាគរយនៃ FDI សរុបនៅមីយ៉ាន់ម៉ាពីឆ្នាំ១៩៨៨ និង១៩៨៩ ដល់ថ្ងៃទី៣០ ខែកញ្ញា ឆ្នាំនេះ។ នេះបើយោងតាមតួលេខ ដែលចេញផ្សាយដោយនាយកវិនិយោគ និងរដ្ឋបាលក្រុមហ៊ុន (DICA)។

ក្នុងអំឡុងពេលខាងលើនេះ ប្រទេសចំនួន៥០ បាននិងកំពុងធ្វើការវិនិយោគលើគម្រោងចំនួន១,៨៣៧ ដែលមានទឹកប្រាក់ចំនួន៨១,៨៧៤ ពាន់លានដុល្លារអាមេរិក។ នេះបើយោងតាមការចុះផ្សាយរបស់សារព័ត៌មាន Eleven Myanmar កាលពីម្សិលមិញ។

បណ្តាប្រទេសអាស៊ានធំៗចំនួន៩ ដែលបានវិនិយោគនៅមីយ៉ាន់ម៉ា រួមមាន សឹង្ហបូរី ថៃ វៀតណាម ម៉ាឡេស៊ី ឥណ្ឌូនេស៊ី ហ្វីលីពីន ព្រុយណេ កម្ពុជានិងឡាវ។

សឹង្ហបូរីឈរកំពូលតារាង នៃវិនិយោគិនបរទេសកំពូលៗចំនួន៥០ ដោយមានទំហំទឹកប្រាក់វិនិយោគសរុបជាង២២ពាន់លានដុល្លារ។ ថៃឈរនៅលេខ៣ដោយមានទឹកប្រាក់ជាង១១ពាន់លានដុល្លារ។ វៀតណាមជាប់ចំណាត់ថ្នាក់លេខ៧ ជាមួយទឹកប្រាក់ជាង២ពាន់លានដុល្លារ។ ម៉ាឡេស៊ីឈរនៅចំណាត់ថ្នាក់ទី ៨ ដែលមានទឹកប្រាក់ប្រមាណ ២ពាន់លានដុល្លារ។

ឥណ្ឌូណេស៊ីជាប់ចំណាត់ថ្នាក់ទី១៤ ជាមួយទឹកប្រាក់ជាង២៧០លានដុល្លារ ហ្វីលីពីនហ្វីលីពីនជាប់ចំណាត់ថ្នាក់លេខ១៧ ជាមួយទឹកប្រាក់ប្រមាណ១៥០លានដុល្លារ ប្រ៊ុយណេជាប់ចំណាត់ថ្នាក់លេខ២០ ជាមួយទឹកប្រាក់ជាង១១០ លានដុល្លារ កម្ពុជាឈរចំណាត់ថ្នាក់ទី៣០ ជាមួយនឹងទុន២៤ លានដុល្លារ និងឡាវឈរលេខ៤៨ ជាមួយនឹងតិចជាងមួយលានដុល្លារ។

វេទិកា Malaysia-Myanmar Connect 2019 ដែលធ្វើឡើងនៅទីក្រុងរ៉ង់ហ្គូនកាលពីថ្ងៃទី៣០ ខែសីហា បានបង្ហាញថា អាជីវកម្មកំពូលៗចំនួន៥ មកពីប្រទេសម៉ាឡេស៊ី គ្រោងនឹងធ្វើការវិនិយោគនៅក្នុងមីយ៉ាន់ម៉ានៅឆ្នាំក្រោយ។

ក្នុងអំឡុងពេល៣១ឆ្នាំ វិស័យចំនួន១១ ដែលមើលឃើញការហូរចូលយ៉ាងច្រើននៃការវិនិយោគផ្ទាល់ពីបរទេសគឺវិស័យប្រេង និងឧស្ម័នថាមពល ផលិតកម្ម ការដឹកជញ្ជូន និងការទំនាក់ទំនង អចលនទ្រព្យ លំនៅដ្ឋាន សណ្ឋាគារ និងទេសចរណ៍ រ៉ែ ចិញ្ចឹមសត្វ និងជលផលកសិកម្ម និងឧស្សាហកម្ម៕

OCIC នឹងរៀបចំឲ្យមានផ្លូវថ្មើជើងព័ទ្ធជុំវិញទីក្រុងកោះពេជ្រ

ដោយ គង់ សូរិយា

ភ្នំពេញៈ ក្រុមហ៊ុន OCIC នឹងរៀបចំប្រព័ន្ឋផ្លូវថ្មើជើងព័ទ្ធជុំវិញទីក្រុងកោះពេជ្រ ដែលជាទីក្រុងរណបតំបូងគេ និងមានការរីកចម្រើនលឿនជាងគេនៅកណ្តាល រាជធានីភ្នំពេញ។

អគ្គនាយករងក្រុមហ៊ុន OCIC លោកទូច សំណាងបានមានប្រសាសន៍ឲ្យដឹងកាលពីពេលថ្មីៗនេះថា តាមផែនការមេរបស់គំរោងអភិវឌ្ឍន៍នេះ ក្រុមហ៊ុននឹងរៀបចំផ្លូវថ្មើជើងព័ទ្ឋជុំវិញកោះនេះនាពេលអនាគត ខណៈសកម្មភាពអភិវឌ្ឍន៍នៅលើកោះនេះ ទើបសម្រេចបាន៥០ភាគរយនៃផែនការ ប៉ុន្តែផ្ទៃក្រឡាសំណង់ទើបសម្រេចបាន២៥ភាគរយនៃគំរោងទាំងមូលប៉ុណ្ណោះ។

លោកបន្តថា “នាពេលអនាគតអាគារខ្ពស់ៗជាច្រើន នឹងសាងសង់នៅលើទីក្រុងនេះ ហើយវត្តមានសាលពិព៌ណ និងអាពាហ៍ពិពាហ៍នឹងរើចេញពីទីក្រុងនេះ ឆ្ពោះទៅកាន់ទីក្រុងរណបជ្រោយចង្វារ”។ លោកបន្តថា “បច្ចុប្បន្នផ្នែកទីផ្សារកំពុងសិក្សាពីលទ្ឋភាពនៃការចាកចេញនូវសាលពិព៌ណនេះ ហើយជំនួសវិញដោយអាគារខ្ពស់ៗ និងមជ្ឈមណ្ឌលពាណិជ្ជកម្មចម្រុះ”។

លោកស្រី Grace Rachny Fong នាយិកាក្រុមហ៊ុន Century21 Cambodia បានមាមប្រសាសន៍ថា តំបន់កោះពេជ្រ និងតំបន់ជុំវិញនេះនឹងមានភាពរីកចម្រើន ហើយវានឹងក្លាយជា Hub Bussiness លំដាប់អន្តរជាតិមួយនៅទីក្រុងភ្នំពេញ ដោយសារបច្ចុប្បន្នមានក្រុមហ៊ុនវិនិយោគអន្តរជាតិជាច្រើនកំពុងចាប់អារម្មណ៍ និងវិនិយោគសាងសង់អាគារខ្ពស់ៗនៅតំបន់នេះ។

លោកស្រីបន្តថា “នាពេលអនាគត តំបន់នេះ នឹងពោរពេញដោយអាគារខ្ពស់ៗ និងមជ្ឈមណ្ឌលពាណិជ្ជកម្មចម្រុះ ដែលនឹងធ្វើឲ្យតំបន់នេះកាន់តែមានភាពរសរវើក និងប្រកបដោយភាពស៊ីវិល័យ”៕

IMF៖ សេដ្ឋកិច្ចសកលនឹងស្ទុះងើបឡើងវិញនៅឆ្នាំ២០២០ ខណៈសេដ្ឋកិច្ចចិននឹងធ្លាក់ចុះក្រោម៦ភាគរយ

ដោយ Donald Lee

ភ្នំពេញៈ មូលនិធិរូបិយវត្ថុអន្តរជាតិ (IMF) បានចេញផ្សាយការព្យាករណ៍កំណើនសេដ្ឋកិច្ចសកល ដែលបានបង្កើនការពង្រីកផលិតផល ក្នុងស្រុកសរុបរបស់ពិភពលោកនៅឆ្នាំ២០២០ ដល់៣,៤ភាគរយ ខណៈអត្រាកំណើនផលិតផល ក្នុងស្រុកសរុបរបស់ប្រទេសចិនត្រូវបានរំពឹងថា នឹងធ្លាក់ចុះក្រោម៦ភាគរយជាលើកដំបូង ចាប់តាំងពីឆ្នាំ ១៩៩០។

របាយការណ៍ទស្សនវិស័យសេដ្ឋកិច្ចពិភពលោករបស់ IMF បានបញ្ជាក់ថា សង្គ្រាមពាណិជ្ជកម្មរវាងអាមេរិក និងចិន បានធ្វើឱ្យកំណើនសេដ្ឋកិច្ចពិភពលោកធ្លាក់ចុះ នៅឆ្នាំនេះ ដោយសារតែភាពមិនច្បាស់លាស់ ដែលសង្រ្គាមពាណិជ្ជកម្មបានបង្កើតឡើង នៅក្នុងទីផ្សារពិភពលោក។

ក្នុងពេលជាមួយគ្នានេះដែរ សេដ្ឋកិច្ចចិនដែលមានភាពចាស់ទុំ ត្រូវបានគេព្យាករថានឹងធ្លាក់ចុះក្រោម ៦ភាគរយ។ នេះបើយោងតាមរបាយការណ៍របស់ IMF។

ទីក្រុងប៉េកាំងបានធ្វើសកម្មភាពយ៉ាងខ្លាំង ក្នុងការពង្រឹងសេដ្ឋកិច្ចរបស់ខ្លួនតាម យៈការជំរុញការងារ និងការវិនិយោគនៅក្នុងគម្រោងហេដ្ឋារចនាសម្ព័ន្ធ។

ទីក្រុងប៉េកាំងបានបន្ថែមការងារថ្មីជិត១១លានកន្លែង នៅក្នុងរយៈពេល៣ត្រីមាសដំបូងនៃឆ្នាំ២០១៩។ នេះបើយោងតាមរបាយការណ៍នៅក្នុងកាសែត People’s Daily របស់ចិន។

របាយការណ៍បានឱ្យដឹងថា “ភាពមិនប្រាកដប្រជាខាងក្រៅកាន់តែច្រើន ការខិតខំកាន់តែច្រើនគួរតែត្រូវធ្វើដើម្បីពង្រឹងស្ថានភាពផ្ទៃក្នុង ។ ការអនុវត្តវិធានការជាបន្តបន្ទាប់ដើម្បីធ្វើកំណែទម្រង់ស៊ីជម្រៅ និងបើកទូលាយដល់ពិភពខាងក្រៅ គឺជាការធានាដ៏មានឥទ្ធិពដើម្បីធ្វើឱ្យមានភាពជាក់លាក់”៕

ចំណេះដឹង! តើទំនិញប្រភេទអ្វីនាំចូលតាមរបបអាគារលក់ទំនិញរួចពន្ធ?

ដោយ វុត្ថា

ភ្នំពេញៈ ស្ទើរតែគ្រប់ទំនិញសព្វសារពើទាំងអស់ ដែលនាំចូលមកចែកចាយនៅលើទៅទីផ្សារសេរីនៅទូទាំងប្រទេសកម្ពុជា ភាគច្រើនសុទ្ធតែត្រូវបានគិតបញ្ចូលថ្លៃបង់ពន្ធ ប៉ុន្តែក៏មានប្រភេទទំនិញមួយភាគតូច ត្រូវបានអគ្គនាយកដ្ឋានគយលើកលែងមិបគិតពន្ធនោះទេ។

យោងតាមកឯកសាររបស់អគ្គនាយករដ្ឋាន និងរដ្ឋករកម្ពុជាបានឱ្យដឹងពីការលើកលែងពន្ធលើប្រភេទទំនិញទាំងនេះ ត្រូវបានអនុលោមតាម លិខិតលេខ ០០៥ សហវ ចុះថ្ងៃទី២ ខែមីនា ឆ្នាំ២០០០ស្តីពី ការកែសំរួលបែបបទគ្រប់គ្រង ការនាំចូលទំនិញតាមរបប អាគារលក់ទំនិញរួចពន្ធ Duty Free Shop លិខិតលេខ ១០០៦ គរ ចុះថ្ងៃទី២១ ខែធ្នូ ឆ្នាំ២០០៤ ស្តីពី បែបបទគ្រប់គ្រងការនាំចូលទំនិញ តាមរបបអាគារលក់ទំនិញរួចពន្ធ Duty Free Shop បែបបទនៃការនាំចូលត្រូវមានលិខិតអនុញ្ញាតនាំចូល ដែលចេញដោយអគ្គនាយកដ្ឋានរដ្ឋាករ រាល់ពេលនាំចូលត្រូវមានឃ្លាំងសម្រាប់ស្តុក និងអាគារលក់ទំនិញរួចពន្ធ ដើម្បីដំណើរការអាជីវកម្មស្របតាម កិច្ចសន្យាការបំពេញបែបបទនាំចូល ការបង់កម្រៃ Duty Free ត្រូវធ្វើនៅមាត់ច្រកនាំចូលតាមបណ្តា ការិយាល័យសាខាគយនិងរដ្ឋាករពាក់ព័ន្ធតាមច្បាប់និងនីតិវិធីជាធរមាន។

ឯកសារដដែលបន្តថា ការធ្វើចរាចរទំនិញរួចពន្ធ រាល់ការដឹកជញ្ជូនចរាចរទំនិញរួចពន្ធ គ្រប់ប្រភេទឆ្លងកាត់ផ្ទៃក្នុងប្រទេស ត្រូវអមភ្ជាប់ជាមួយនូវលិខិត អនុញ្ញាតដឹកជញ្ជូនដែលចេញដោយ (អគរ) ហើយក្នុងករណី ដែលអាជ្ញារធរគយមានសមត្ថកិច្ចយល់ថា ចាំបាច់ មន្រ្តីគយនិងរដ្ឋាករយ៉ាងតិចពីររូប អមឃ្លាំមើលទំនិញទាំងនោះ រហូតដល់គោលដៅអាជីវកម្ម ស្របច្បាប់នានា។

កាតព្វកិច្ចរបស់អាជីវករអាជីវករលក់ទំនិញរួចពន្ធទាំងអស់ ត្រូវគោរពនិងអនុវត្តឲ្យបានល្អ និងទាន់ពេលវេលាតាមខ្លឹមសារ នៃសេចក្តីជូនដំណឹងលេខ០០៥សហវ ខាងលើត្រូវបង្កការងាយស្រួល និងការសហការខ្ពស់ជាប្រចាំ ជាមួយមន្រ្តីមានសមត្ថកិច្ចគ្រប់ផ្នែកផ្ញើរបាយការណ៍ជាប្រចាំតាមគំរូ ដែលណែនាំដោយ(អគរ)ឲ្យបានទៀងទាត់មកនាយកដ្ឋានរដ្ឋាករកត់ត្រាឲ្យបានច្បាស់លាស់ លើវិក្កយបត្រលក់ចេញនូវយថា ប្រភេទ បរិមាណទំនិញ ព្រមទាំងអត្តសញ្ញាណអតិថិជនដែលបានទិញប្រចាំថ្ងៃនីមួយៗ៕

តំបន់ផ្លូវ ៦០ម៉ែត្រទាក់ទាញការវិនិយោគលើសាលពិព័រណ៍រថយន្ត

ដោយ វុត្ថា

ភ្នំពេញៈ ក្រុមហ៊ុន STAR AUTO (CAMBODIA) CO.,LTD គ្រោងសាងសង់អគារតាំងលក់រថយន្ត លក់គ្រឿង បន្លាស់ និងសេវាកម្មថែទាំរថយន្តនៅលើផ្ទៃដីទំហំ ៨.០០០ម៉ែត្រការ៉េ ស្ថិតនៅតាមបណ្តោយផ្លូវសម្តេចតេជោហ៊ុនសែន (ផ្លូវ៦០ម៉ែត្រ) ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

យោងតាមកិច្ចប្រជុំអន្តរក្រសួងដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) នៅថ្ងៃទី២១ ខែតុលា ឆ្នាំ ២០១៩នេះ បានគាំទ្រទាំងស្រុងលើគម្រោងអគារតាំងលក់រថយន្ត លក់គ្រឿងបន្លាស់ និងសេវាកម្មថែទាំរថយន្ត ដោយខាងក្រុមហ៊ុន ត្រូវយកចិត្តទុកដាក់ក្នុងការគ្រប់គ្រងសំណល់រឹង/រាវ និងសំរាមឱ្យបានត្រឹមត្រូវ។

មហាវិថី សម្តេច ហ៊ុន សែន ឬផ្លូវ៦០ម៉ែត្រ ជាតំបន់មួយដែលកំពុងមានកំណើនវិនិយោគខ្លាំងក្លា បើធៀបនឹងតំបន់ដទៃទៀត នៅក្នុងរាជធានីភ្នំពេញ។ បច្ចុប្បន្ន តំបន់នេះមានភាពទាក់ទាញ និងមានសក្តានុពលខ្លាំង សម្រាប់វិស័យអចលនទ្រព្យ ស្របពេលជាមួយនឹងគម្រោងផែនការអភិវឌ្ឍន៍ ទីក្រុងរបស់សាលាក្រុងភ្នំពេញនៅឆ្នាំ២០៣៥។

ផ្លូវ៦០ម៉ែត្រ មានទទឹង៦០ម៉ែត្រ និងបណ្តោយជិត១០គីឡូម៉ែត្រ ដែលជាផ្លូវតភ្ជាប់ដ៏សំខាន់មួយនៅក្នុងរាជធានីភ្នំពេញ បានភ្ជាប់គ្នារវាងផ្លូវលេខ២៧១ ភាគខាងជើង ជាមួយផ្លូវជាតិលេខ២ភាគខាងត្បូង។

តំបន់មហាវិថីសម្ដេចតេជោឬផ្លូវ៦០ម៉ែត្រ កំពុងទាក់ទាញគម្រោងវិនិយោគធំៗចូលទៅក្នុងតំបន់នេះយ៉ាងច្រើន ដូចជា គម្រោងបុរី លំនៅឋាន អគារការិយាល័យ និង អគារពាណិជ្ជកម្មជាដើម ដែលនឹងប្រែក្លាយតំបន់នេះ ទៅជាតំបន់អភិវឌ្ឍ៍មួយដ៏សំខាន់ ហើយក្នុងរយៈពេល៥ឆ្នាំខាងមុខ នឹងក្លាយជាតំបន់ដ៏ពេញនិយមសម្រាប់ការរស់នៅ និងការធ្វើពាណិជ្ជកម្មរបស់ទីក្រុងភ្នំពេញ៕

អ្នកធុរកិច្ចថៃ-កម្ពុជាចំនួន២២រូប ស្វែងរកឱកាសវិនិយោគរួមគ្នានៅកម្ពុជា

ដោយ វុត្ថា

ភ្នំពេញៈ គណៈប្រតិភូក្រុមប្រឹក្សាធុរកិច្ចថៃ កម្ពុជាចំនួន២២រូប ដឹកនាំដោយលោក Idsara Amornkitbamrung ប្រធាននាយកដ្ឋានវិនិយោគក្នុងតំបន់ នៃក្រុមប្រឹក្សាវិនិយោគ នៃប្រទេសថៃ ដើម្បីសិក្សាស្វែងយល់ពីការវិនិយោគ សេដ្ឋកិច្ច-ពាណិជ្ជកម្ម ការនាំចេញ-នាំចូលផលិតផល និងរៀបចំកិច្ចជំនួបពាណិជ្ជកម្មរវាងពាណិជ្ជករកម្ពុជា-ថ្ងៃ។

រដ្ឋលេខាធិការប្រចាំការនៃក្រសួងពាណិជ្ជកម្មលោកកឹម ស៊ីថន នៅថ្ងៃទី២១ ខែតុលា ឆ្នាំ២០១៩បានប្រាប់ក្រុមអ្នកធុរកិច្ចថៃអំពីកាលានុវត្តភាព សក្តានុពលវិនិយោគ វឌ្ឍនភាពនៃកំណើនសេដ្ឋកិច្ចជាតិ គោលនយោបាយពាណិជ្ជកម្ម និងកិច្ចប្រឹងប្រែងរបស់ក្រសួងពាណិជ្ជកម្ម ក្នុងការលើកស្ទួយបរិយាកាសធុរកិច្ច វិនិយោគ និងកិច្ចសម្រួលពាណិជ្ជកម្ម នៅក្នុងប្រទេសកម្ពុជា។

លោកក៏បានផ្តល់យោបល់ដល់គណៈប្រតិភូថៃ ដែលមានចំណាប់អារម្មណ៍វិនិយោគនៅកម្ពុជា លើវិស័យកសិកម្មឧស្សាហកម្ម សណ្ឋាគារ ទេសចរណ៍ ហេដ្ឋារចនាសម្ព័ន្ធ វារីអគ្គិសនី និងបច្ចេកវិទ្យា (IT) ដែលផ្តល់ឱកាសដល់ពាណិជ្ជករថៃ មកវិនិយោគលើវិស័យទាំងនេះ។

លោក Idsara Amornkitbamrung ប្រធាននាយកដ្ឋានវិនិយោគក្នុងតំបន់ នៃក្រុមប្រឹក្សាវិនិយោគ នៃប្រទេសថៃបានថ្លែងអំណរគុណ ចំពោះក្រសួងពាណិជ្ជកម្ម ដែលផ្តល់ពេលវេលាដ៏មានតម្លៃចូលរួមផ្តល់ការណែនាំ និងជម្រាបផ្តល់អំពីព័ត៌មានសំខាន់ៗមួយចំនួនធំ ចែកជូនដល់ពាណិជ្ជករថៃទាំង២២រូប ដែលមានគោលបំណង និងមានចំណាប់អារម្មណ៍មកវិនិយោគ ធ្វើពាណិជ្ជកម្មនាំចេញ-នាំចូលផលិតផលនៅប្រទេសកម្ពុជា។

បើកតាមការឱ្យដឹងពីលោកកឹម ស៊ីថនថា ទំហំពាណិជ្ជកម្មរវាងកម្ពុជា-ថៃ ដែលមានតម្លៃជាង៣ពាន់លានដុល្លារអាមេរិក គិតត្រឹមឆ្នាំ២០១៨ និងដើមឆ្នាំ២០១៩នេះមានទំហំទឹកប្រាក់ជាង២ពាន់លានដុល្លារអាមេរិក៕

ចិនក្លាយជាមហាអំណាច Internet ដ៏សំខាន់នៅក្នុងពិភពលោក

ដោយ Donald Lee

ភ្នំពេញៈ ចិនបានក្លាយជាមហាអំណាច Internet ដ៏សំខាន់នៅលើពិភពលោកក្នុងរយៈពេល២៥ឆ្នាំ ចាប់តាំងពីប្រទេសនេះបានបង្កើតបណ្តាញ Internet ជាលើកដំបូងក្នុងឆ្នាំ១៩៩៤។

ក្រុមហ៊ុន Internet ធំៗភាគច្រើន គឺមានមូលដ្ឋាននៅចិន ដែលមានគេហទំព័រពាណិជ្ជកម្មតាមអនឡាញ JD និង Alibaba នាំមុខគេនៅចិន។

នៅក្នុងសុន្ទរកថាមួយនៅអាមេរិក កាលពីសប្តាហ៍មុនលោក Mark Zuckerberg ស្ថាបនិក Facebook បានមានប្រសាសន៍ថា “កាលពីមួយទសវត្សរ៍មុនវេទិកា Internet សំខាន់ៗទាំងអស់គឺអាមេរិក។ សព្វថ្ងៃនេះក្នុងចំណោម៦នាក់ ក្នុងចំណោម១០ក្រុមហ៊ុនគឹមកពីចិន”។

សេដ្ឋកិច្ចឌីជីថលចិន កំពុងក្លាយជាកត្តាជំរុញដ៏សំខាន់មួយ នៃសេដ្ឋកិច្ចរបស់ខ្លួន ខណៈវិស័យផ្សេងទៀត កំពុងរងឥទ្ធិពលពីសង្គ្រាមពាណិជ្ជកម្មរវាងអាមេរិក និងចិន និងការធ្លាក់ចុះនៃសេដ្ឋកិច្ចពិភពលោក។

យោងតាមរបាយការណ៍អភិវឌ្ឍន៍ Internet របស់ប្រទេសចិនឆ្នាំ២០១៩បានបង្ហាញថា ការប្រើប្រាស់ Internet នៅចិនកំពុងឈានដល់ចំនួន១ពាន់លាននាក់ ហើយត្រូវបានគិតជាទឹកប្រាក់ចំនួន៤,៤២ ទ្រីលានដុល្លារនៅឆ្នាំ ២០១៨ ដែលស្មើនឹង៣៥ភាគរយនៃផលិតផលក្នុងស្រុកសរុបរបស់ចិន។

របាយការណ៍ពីស៊ីនហួរ ដែលគ្រប់គ្រងដោយរដ្ឋបានឱ្យដឹងថា “ចំពេលភាពមិនប្រាកដប្រជា នៃកំណើនសេដ្ឋកិច្ចសកល ការធ្វើឌីជីថលបានក្លាយជាកត្តាជំរុញសេដ្ឋកិច្ចដ៏សំខាន់”។

ក្រុមហ៊ុម Internet ដ៏ធំរបស់អាមេរិកដូចជា Facebook និងTwitter ដែលហាមឃាត់មិនឱ្យធ្វើប្រតិបត្តិការ នៅក្នុងប្រទេសចិនបានរិះគន់យ៉ាងខ្លាំង ចំពោះជំហរផ្តាច់ការរបស់ក្រុងប៉េកាំង ក្នុងការគ្រប់គ្រង Internet និងកំណត់សេរី ក្នុងការបញ្ចេញមតិនៅលើវេទិកាប្រព័ន្ធផ្សព្វផ្សាយសង្គម។

លោក Zuckerberg បានមានប្រសាសន៍ថា “ចិនកំពុងធ្វើ Internet របស់ខ្លួនដោយផ្តោតលើតម្លៃខុសគ្នាខ្លាំង ហើយឥឡូវនេះកំពុងនាំចេញ ចក្ខុវិស័យរបស់ពួកគេលើ Internet ទៅប្រទេសដទៃទៀត”។

ស្ថាបនិកហ្វេសប៊ុករូបនេះ បានសម្តែងការសោកស្តាយ ចំពោះនិន្នាការបច្ចុប្បន្ននៅជុំវិញពិភពលោក ដែលកម្រិត និងការឃ្លាំមើលការបញ្ចេញមតិ ដោយសេរី ដែលបង្កើតដោយទីក្រុងប៉េកាំង និងការចេញឆ្ងាយពីតម្លៃអាមេរិក។

លោក Zuckerberg មានប្រសាសន៍ថា “រហូតមកដល់ពេលបច្ចុប្បន្ននេះ Internet ស្ទើរតែគ្រប់ប្រទេសទាំងអស់នៅខាងក្រៅចិន ត្រូវបានកំណត់ដោយអាមេរិកជាមួយនឹងតម្លៃនៃការបញ្ចេញមតិដោយសេរី”។លោកបន្តថា “មិនមានការធានាថាតម្លៃទាំងនេះនឹងការជោគជ័យនោះទេ”។

លោក Zuckerberg បានបន្ថែមថា ការដាក់កម្រិតលើការបញ្ចេញមតិរបស់ចិននៅលើវេទិកាសង្គម គឺជាហេតុផលចម្បងដែលហ្វេសប៊ុក និងសេវាកម្មផ្សេងទៀតរបស់ខ្លួនមិនមានវត្តមាននៅចិន។

លោក Zuckerberg បានឱ្យដឹងថា “វាជាហេតុផលមួយ ដែលយើងមិនធ្វើប្រតិបត្តិការហ្វេសប៊ុក Instagram ឬសេវាកម្មផ្សេងទៀតរបស់យើងនៅចិន។ ខ្ញុំចង់បានសេវាកម្មរបស់យើងមាននៅចិន ពីព្រោះខ្ញុំជឿជាក់ក្នុងការភ្ជាប់ពិភពលោកទាំងមូល ហើយខ្ញុំគិតថា យើងអាចជួយបង្កើតសង្គមបើកចំហមួយ”។

លោកបានបន្ថែមថា “ខ្ញុំបានខិតខំធ្វើឱ្យវាកើតឡើង។ ប៉ុន្តែយើងមិនអាចទទួលបានការយល់ស្រប លើអ្វីដែលវាត្រូវការសម្រាប់យើង ដើម្បីប្រតិបត្តិការនៅទីនោះ ហើយពួកគេមិនដែលអនុញ្ញាតឱ្យពួកយើងធ្វើទេ”៕

រដ្ឋាភិបាលកំពុងប្រែក្លាយក្រុងចំនួន៨ទៅជាទីក្រុងអភិវឌ្ឍន៍ប្រកបដោយនិរន្តរភាព

photo_2019-09-10_12-05-50 — រូបថត៖ Property Area

ដោយ វុត្ថា

ភ្នំពេញៈ ក្រុមប្រឹក្សាជាតិអភិវឌ្ឍន៍ដោយចីរភាព កំពុងដាក់ចេញផែនការប្រែក្លាយក្រុងចំនួន៨ទីតាំង ឱ្យក្លាយជាទីក្រុងនិរន្តរភាពនៅត្រឹមឆ្នាំ២០៣០ខាងមុខ ដើម្បីធានាបានផាសុខភាព ការរស់នៅរបស់ប្រជាពលរដ្ឋ រួមទាំងធានាបាននូវការថែរក្សាបរិស្ថានផងដែរ។

ប្រធាននាយកដ្ឋានសេដ្ឋកិច្ចបៃតង នៃក្រុមប្រឹក្សាជាតិអភិវឌ្ឍន៍ នៃក្រសួងបរិស្ថានលោកតាំង ម៉េងអៀង បានមានប្រសាសន៍នៅក្នុងសិក្ខាសាលាត្រួតពិនិត្យលទ្ធផលការងារអភិវឌ្ឍន៍ដោយចីរភាពឆ្នាំ ២០១៩ និងទិសដៅការងារឆ្នាំ ២០២០ នាថ្ងៃទី ២១ ខែតុលាឆ្នាំ ២០១៩ នេះបានឱ្យដឹងថា ថ្មីៗនេះរដ្ឋាភិបាលបានដាក់ឱ្យប្រើប្រាស់ ផែនការអភិវឌ្ឍទីក្រុងនិរន្តរភាពសម្រាប់រាជធានីភ្នំពេញ២០១៨–២០៣០។

លោកបន្តថា “ផែនការអភិវឌ្ឍទីក្រុងចំនួន៧ទីតាំងផ្សេងទៀត អាចនឹងប្រកាសឱ្យប្រើប្រាស់នៅចុងឆ្នាំ២០១៩ រឺដើមឆ្នាំ២០២០ខាងមុខនេះ ដើម្បីផ្ដល់ផាសុខភាព និងភាពងាយស្រួលក្នុងការរស់នៅដល់ប្រជាពលរដ្ឋ ដោយប្រែក្លាយទីក្រុងទាំង៨ឱ្យក្លាយជាទីក្រុងនិរន្តរភាព នៅត្រឹមឆ្នាំ ២០៣០”។

លោកបន្ថែមថា ក្រុងចំនួន៧ ផ្សេងទៀត ដែលក្រុមប្រឹក្សាជាតិអភិវឌ្ឍន៍ដោយចីរភាព នឹងប្រែក្លាយឱ្យទៅជាទីក្រុងនិរន្តភាពសុទ្ធជាទីតាំងប៉ូលសេដ្ឋកិច្ច និងប៉ូលទេសចរណ៍ ដោយក្នុងនោះ រួមមាន ក្រុងសៀមរាប ក្រុងកែប ក្រុងព្រះសីហនុ ក្រុងកំពង់ចាម ក្រុងបាវិត ក្រុងសួង និងក្រុងបាត់ដំបង។

លោកតាំង ម៉េងអៀង បញ្ជាក់ទៀតថា ជុំវិញការងាររៀបចំ ទីក្រុងនិរន្តរភាពនេះ ជាការងារអន្តរក្រសួង ដោយមានក្រុមប្រឹក្សាជាតិអភិវឌ្ឍន៍ ប្រកបដោយចីរភាពជាអ្នកសម្របសម្រួលរួម មានការចូលរួមពីក្រសួង បរិស្ថាន ក្រសួងរៀបចំដែនដី ក្រសួងមួយចំនួនផ្សេងទៀត ទាក់ទងការដឹកជញ្ជូន ការរៀបចំប្រព័ន្ធលូ រួមទាំង មន្ត្រីថ្នាក់មូលដ្ឋាន។

លោកទិន ពន្លក អគ្គលេខាធិការនៃក្រុមប្រឹក្សាជាតិ អភិវឌ្ឍន៍ដោយចីរភាពបានឱ្យដឹងដែរថា ក្រឹមប្រឹក្សាអភិវឌ្ឍន៍ប្រកប ដោយនិរន្តរភាព បានបញ្ចប់ការសិក្សា និងប្រកាសដាក់ឱ្យប្រើប្រាស់នូវ ផែនការអភិវឌ្ឍន៍ទីក្រុងនិរន្តរភាព សម្រាប់រាជធានីភ្នំពេញ២០១៨-២០៣០ សំណើគោលនយោបាយសារពើពន្ធសម្រាប់យានយន្ត របាយការណ៍ស្តីពីដំណោះស្រាយផលប៉ះពាល់ ពីការប្រែប្រួលអាកាសធាតុ លើកំណើនសេដ្ឋកិច្ចក្នុប្រទេសកម្ពុជា។ របាយការណ៍ស្តីពីការកាត់បន្ថយហានិភ័យវិនិយោគ ក្នុងវិស័យថាមពលកកើតឡើងវិញនៅប្រទេសកម្ពុជា របាយការណ៍ជាតិលើកទី៦ ក្រោមអនុសញ្ញាសហប្រជាជាតិស្តីពីជីវៈចម្រុះ ។

លោកបន្ថែមថា អគ្គលេខាធិការដ្ឋាន កំពុងបន្តការសិក្សាស្រាវជ្រាវសំខាន់ៗ មួយចំនួនទៀត ទាក់ទងនឹងប្រសិទ្ធភាពថាមពលក្នុងវិស័យកាត់ដេរ ប្រសិទ្ធភាពសេដ្ឋកិច្ចនៃថាមពលពន្លឺព្រះអាទិត្យ ការទាញយកឥន្ធនៈពីសំណល់រឹង ការគ្រប់គ្រងសំណល់រាវបែបវិមជ្ឈការ ស្តង់ដាអគារបៃតង កម្មវិធីយានយន្តអគ្គិសនី បច្ចេកវិទ្យានុយក្លេអ៊ែរ ការទូទាត់សេវាកម្មប្រព័ន្ធអេកូឡូស៊ី។ល។ ៕

ឡាវគ្រោងសាងសង់ខ្សែផ្លូវដែកតភ្ជាក់ទៅកាន់បណ្តាប្រទេសក្នុងតំបន់់អាស៊ាននៅ២០២១

ដោយ វុត្ថា

ភ្នំពេញៈ រដ្ឋាភិបាលឡាវបានចាប់ផ្តើមឱ្យក្រុមហ៊ុនរបស់ខ្លួន Pero Trade សិក្សាអំពីលទ្ធភាពសាងសង់ផ្លូវដែក តភ្ជាប់ទៅកាន់ប្រទេសនៅក្នុងតំបន់អាស៊ាន ដោយចាប់ផ្តើមតភ្ជាប់ជាតំបូងជាមួយប្រទេសវៀតណាម។

ក្រសួងផែនការនិងវិនិយោគឡាវ កាលពីពេលថ្មីៗនេះបានចុះហត្ថលេខាលើអនុស្សារណៈយោគយល់ (MOU) ជាមួយក្រុមហ៊ុន Petro Trade ដើម្បីបញ្ចប់ការសិក្សានូវគម្រោងរចនាប្លង់ផ្លូវដែកនេះ។

យោងតាមខ្លឹមសារនៃអនុស្សារណៈយោគយល់ (MOU) បានឱ្យដឹងថា ផ្លូវដែកនេះ រត់ចេញពីស្រុក Thakhaet នៃខេត្តKhammuan របស់ប្រទេសឡាវ ទៅកាន់ព្រំដែនប្រទេសវៀតណាម ដើម្បីតភ្ជាប់ជាមួយកំពង់ផែ Vung Ang ដែលស្ថិតនៅក្នុងខេត្ត Ha Tinh ភាគកណ្តាលនៃប្រទេសវៀតណាម។

MOU ដដែលបន្តថា ផ្លូវដែកនេះ នឹងតភ្ជាប់ប្រទេសឡាវ ទៅកាន់ប្រទេសនៅក្នុងតំបន់អាស៊ាន នឹងជួលដល់ការអភិវឌ្ឍន៍ហេដ្ឋារចនាសម្ព័ន្ធ និងសម្របសម្រួលដល់ការវិនិយោគ ពាណិជ្ជកម្ម និងកសិកម្ម ដែលផ្តល់សក្តានុពលដល់ប្រទេសឡាវ ដើម្បីក្លាយជាប្រទេសឧស្សាហកម្មទំនើប។

លោក Chanthone Sithinxay ប្រធានក្រុមហ៊ុន Petro Trade បានឱ្យដឹងថា ផ្លូវដែកនេះមានចម្ងាយពី២៤០គីឡូម៉ែត្រ ទៅ២៧០គីឡូម៉ែត្រ ដែលក្នុងនោះមានប្រវែង ១៥០ម៉ែត្រគីឡូម៉ែត្រ ស្ថិតនៅខាងភាគីឡាវ និង១២០ គីឡូម៉ែត្រផ្សេងទៀត ស្ថិតនៅខាងភាគីវៀតណាម។

លោកបន្តថា បន្ទាប់ពីទទួលបានការអនុញ្ញាតពីរដ្ឋាភិបាលវៀតណាម ក្រុមហ៊ុននឹងបន្តការស្ទង់មតិ និងសិក្សាបន្តពីព្រំដែនវៀតណាមដល់កំពង់ផែ Vung Ang ដែលត្រូវពេលប្រមាណ១២ខែក្នុងការបញ្ចប់ការសិក្សា និងរចនាប្លង់។ ក្រោយពីមានការអនុញ្ញាតពីរដ្ឋាភិបាលនៃប្រទេសទាំងពីរ ក្រុមហ៊ុននឹងចាប់ផ្តើមសាងសង់ផ្លូវដែកនេះ នៅក្នុងឆ្នាំ ២០២១ និងបញ្ចប់នៅឆ្នាំ២០២៤។

លោកបានបញ្ជាក់ថា ខ្សែផ្លូវដែកនេះ នឹងក្លាយជាផ្លូវដែកអន្តរជាតិ ដើម្បីដឹកជញ្ជូនទំនិញ និងអ្នកដំណើរដែលមានល្បឿន ៩០គីឡូម៉ែត្រ ទៅ១២០គីឡូម៉ែត្រក្នុងមួយម៉ោង ដោយប្រើបច្ចេកវិទ្យាពីប្រទេសឥណ្ឌូនេស៊ី។ តែយ៉ាងណាក៏ដោយ លោកទាន់បានប្រាប់ពីតម្លៃវិនិយោគ លើគម្រោងវិនិយោគលើផ្លូវដែកនេះនៅឡើយទេ ហើយលោកនឹងបង្ហាញទំហំថវិកាទាំងមូលនៅពេលបញ្ចប់ការសិក្សាជាផ្លូវការ៕