ដោយ: គង់ លាងហួរ
អន្តរជាតិ: ការលក់លំនៅដ្ឋាននៅក្នុងប្រទេសសិង្ហបុរីនៅខែមករា ឆ្នាំ២០២៥ បានសម្រេចអត្រានៃការលក់ដាច់បំផុតមិនធ្លាប់មានក្នុងរយៈពេល៤ឆ្នាំកន្លងមកនេះ ខណៈទីផ្សារកំពុងឃ្លាំមើលវិធានការរបស់រដ្ឋាភិបាលសិង្ហបុរីក្នុងការទប់ស្កាត់តម្លៃផ្ទះមិនឱ្យហក់ឡើងកប់ពពក។

យោងតាមទិន្នន័យពីអាជ្ញាធរអភិវឌ្ឍន៍ទីក្រុង(URA) បានឱ្យដឹងថា បណ្តាក្រុមហ៊ុនអភិវឌ្ឍន៍អចលនទ្រព្យឯកជននៅក្នុងប្រទេសសិង្ហបុរីបានលក់ចេញលំនៅដ្ឋានចំនួន១.០៨៣យូនីតនៅក្នុងខែមករា ឆ្នាំ២០២៥។

ចំនួននេះមានការកើនឡើងជាង៣ដងបើធៀបនឹងលំនៅដ្ឋានចំនួន៣០៤យូនីត ដែលបានលក់ដាច់កាលពីខែមករា ឆ្នាំ២០២៤។ ស្ថានភាពនៃការលក់ផ្ទះនៅសិង្ហបុរីនាដើមឆ្នាំ២០២៥នេះ ជាស្ថានភាពល្អបំផុតមិនធ្លាប់មានគិតចាប់តាំងពីឆ្នាំ២០២១មក។

ការស្ទុះងើបឡើងវិញនៃតម្រូវការលំនៅដ្ឋានក្នុងរយៈពេលប៉ុន្មានខែថ្មីៗនេះបានជំរុញឱ្យមានការរំពឹងទុកថា រដ្ឋាភិបាលសិង្ហបុរីនឹងអាចដាក់ចេញនូវចំណាត់ការបន្ថែមទៀតដើម្បីទប់ស្កាត់តម្លៃផ្ទះមិនឱ្យហក់ឡើងថ្លៃខ្ពស់កប់ពពក។

នៅខែមករា គម្រោងលំនៅដ្ឋានថ្មី ដែលមានឈ្មោះថា“Orie” ស្ថិតនៅភាគខាងជើងនៃទីក្រុងសិង្ហបុរីបានបើកសម្ពោធ ដោយលក់ផ្ទះបានប្រមាណ៨៨ភាគរយនៃចំនួនផ្ទះសរុបចំនួន៧៧៧យូនីត។

ការលក់លំនៅដ្ឋាននៅសិង្ហបុរីត្រូវបានគេរំពឹងថា នឹងបន្តកើនឡើង ខណៈគម្រោងធំៗជាច្រើនទៀតគ្រោងបើកសម្ពោធនៅខែកុម្ភៈនេះ រួមទាំងគម្រោងដ៏ធំមួយស្ថិតនៅភាគខាងកើតនៃទីក្រុងសិង្ហបុរី ដែលមានលំនៅដ្ឋានចំនួន១.១៩៣យូនីត។

ការណ៍នេះបានជំរុញឱ្យក្រុមអ្នកវិភាគនៅស្ថាប័នហិរញ្ញវត្ថុធំៗដូចជា ធនាគារ Barclays plc ធនាគារ Citigroup និងធនាគារ Morgan Stanley ធ្វើការព្យាករណ៍អំពីលទ្ធភាពនៃការដាក់ចេញវិធានការថ្មី។

ទីក្រុងសិង្ហបុរីបានដាក់ចេញវិធានការជាច្រើនជាបន្តបន្ទាប់ ដើម្បីធ្វើយ៉ាងណាកុំឱ្យតម្លៃផ្ទះហក់ឡើងខ្ពស់ពេកក្នុងរយៈពេលប៉ុន្មានឆ្នាំចុងក្រោយនេះ រួមទាំងការដំឡើងពន្ធប្រថាប់ត្រាលើអ្នកទិញផ្ទះនៅសិង្ហបុរីជាជនបរទេសដល់ចំនួន៦០ភាគរយក្នុងឆ្នាំ២០២៣។

លោក Desmond Lee រដ្ឋមន្ត្រីក្រសួងអភិវឌ្ឍន៍ជាតិបានថ្លែងប្រាប់បណ្តាអ្នកអភិវឌ្ឍន៍អចលនទ្រព្យឯកជនក្នុងខែកុម្ភៈនេះថា “ទីផ្សារអចលនទ្រព្យបានបង្ហាញសញ្ញានៃស្ថិរភាព ដោយសារការចាក់បញ្ចូលការផ្គត់ផ្គង់។ហេតុនេះ រដ្ឋាភិបាល​នឹងមិន​ញញើត​ដៃឡើយក្នុង​ការ​ចាត់​វិធានការ​​បន្ថែម​ទៀត​ ប្រសិន​បើ​ចាំបាច់”៕ប្រភព: Bloomberg៕

ដោយ: គង់ លាងហួរ
ភ្នំពេញ: យោងតាមក្រុមហ៊ុនប្រឹក្សាផ្នែកអចលនទ្រព្យ Knight Frank បានឱ្យដឹងថា ការផ្គត់ផ្គង់ការិយាល័យថ្មីនៅរាជធានីភ្នំពេញបានកើនឡើងតិចតួច ដែលការណ៍នេះបានជំរុញឱ្យម្ចាស់អគារការិយាល័យនានាខិតខំរក្សាអ្នកជួល ដែលមានស្រាប់ និងផ្តល់ការលើកទឹកចិត្តដើម្បីទាក់ទាញអ្នកជួលថ្មី។

ក្រុមហ៊ុន Knight Frank ព្យាករណ៍ថា ក្នុងរយៈពេល៣ឆ្នាំខាងមុខ ការផ្គត់ផ្គង់ការិយាល័យនៅរាជធានីភ្នំពេញនឹងកើនឡើងដល់ចំនួន១.៥៥៧.០៩៨ម៉ែត្រការ៉េ ហក់ឡើង៥៣ភាគរយបើធៀបនឹងទំហំផ្ទៃក្រឡាការិយាល័យដែលមានស្រាប់ចំនួន១.០១៥.៣៨០ម៉ែត្រការ៉េ។

ស្របពេលមានការកើនឡើងនៃការជួល និងការថយចុះនៃការផ្គត់ផ្គង់ថ្មីក្នុងអំឡុងឆមាសទី២ ឆ្នាំ២០២៤ អត្រាគ្របដណ្តប់ការជួលការិយាល័យជាមធ្យមនៅរាជធានីភ្នំពេញបានកើនឡើង២ភាគរយដល់ចំនួន៦១,៤ភាគរយបើប្រៀបធៀបនឹងឆមាសទី២ ក្នុងឆ្នាំ២០២៣។

ប៉ុន្តែ តម្លៃជួលការិយាល័យជាមធ្យមនៅរាជធានីភ្នំពេញបានធ្លាក់ចុះនៅឆមាសទី២ ឆ្នាំមុន។ តួយ៉ាង ការជួលការិយាល័យកម្រិត A មានតម្លៃជាមធ្យមចាប់ពី១៥ដុល្លារដល់២៥ដុល្លារក្នុងមួយម៉ែត្រការ៉េក្នុងមួយខែ។

ចំណែក ការជួលការិយាល័យកម្រិត B មានតម្លៃជាមធ្យមចាប់ពី១០ដុល្លារ ដល់១៧ដុល្លារក្នុងមួយម៉ែត្រការ៉េក្នុងមួយខែ ខណៈការជួលការិយាល័យកម្រិត C វិញមានតម្លៃជាមធ្យមចាប់ពី៦ដុល្លារក្នុងមួយម៉ែត្រការ៉េក្នុងមួយខែ។

អគារការិយាល័យកម្រិត A នឹងគ្របដណ្តប់ចំណែកភាគច្រើននៃការផ្គត់ផ្គង់ការិយាល័យសរុបនៅក្នុងឆ្នាំ២០២៨ខាងមុខ ជាមួយកំណត់ស្តង់ដារថ្មី ដោយផ្តោតលើតំបន់រួម(common spaces) គ្រឿងបរិក្ខារ ការរចនាបែបទំនើប និងទីតាំងចំកណ្តាលទីក្រុង។

ក្រុមហ៊ុន Knight Frank លើកឡើងថា ប្រសិនបើគម្រោងនានាបន្តដំណើរការទៅមុខ ដោយគ្មានអ្វីប្រែប្រួល នោះចំនួនការិយាល័យកម្រិត A នឹងគ្របដណ្តប់ចំណែក៨៨ភាគរយនៃទំហំការិយាល័យថ្មីសរុបនៅរាជធានីភ្នំពេញរវាងឆ្នាំ២០២៥ និងឆ្នាំ២០២៨ ខណៈដែលចំណែក១២ភាគរយទៀតជាការិយាល័យកម្រិតB។

ចំពោះឆ្នាំ២០២៥នេះ ក្រុមហ៊ុនប្រឹក្សាផ្នែកអចលនទ្រព្យ Knight Frank រំពឹងថា ការិយាល័យថ្មីចំនួន១៥៨.៤០៦ម៉ែត្រការ៉េនឹងត្រូវបានចាក់បញ្ចូលទៅកាន់ទីផ្សារ។យ៉ាងណាមិញ Knight Frank មិនបានកត់សម្គាល់ឃើញមានគម្រោងការិយាល័យថ្មីកម្រិត C ណាមួយនៅក្នុងរាជធានីភ្នំពេញនោះឡើយ។

ខណៈកំណើនសេដ្ឋកិច្ចរបស់កម្ពុជាត្រូវបានព្យាករណ៍ថា នឹងបន្តរក្សាបានសន្ទុះវិជ្ជមាននៅឆ្នាំ២០២៥ តម្រូវការការិយាល័យនៅរាជធានីភ្នំពេញនឹងបង្ហាញសញ្ញាវិជ្ជមាន។

យ៉ាងណាមិញ ក្រុមហ៊ុន Knight Frank បានលើកទឹកចិត្តឱ្យម្ចាស់អគារការិយាល័យ(Landlord) កំណត់លក្ខខណ្ឌនៃការចរចាលើតម្លៃជួលប្រកបដោយភាពអាចបត់បែនបានដើម្បីរក្សាអ្នកជួលដែលមានស្រាប់។

ជាលទ្ធផល ក្រុមហ៊ុន Knight Frank ព្យាករណ៍ថា តម្លៃជួលការិយាល័យនឹងអាចបន្តធ្លាក់ចុះ ព្រោះទីផ្សារការិយាល័យនាពេលបច្ចុប្បន្ននៅតែជាទីផ្សាររបស់អ្នកជួល ដែលមានន័យថា អតិថិជនមានប្រៀបខ្ពស់ក្នុងការចរចា៕ប្រភព: Knight Frank៕

ដោយ: គង់ លាងហួរ
អន្តរជាតិ: យោងតាមកាសែត Vnexpress បានឱ្យដឹងថា រដ្ឋធានីហាណូយ និងទីក្រុងហូជីមិញរបស់ប្រទេសវៀតណាមស្ថិតនៅលំដាប់កំពូល ដោយវ៉ាដាច់ទាំងប្រទេសសិង្ហបុរីទាក់ទងទៅនឹងគម្លាតរវាងតម្លៃផ្ទះ និងប្រាក់ចំណូលជាមធ្យមរបស់កម្មករ។

ក្រុមហ៊ុនប្រឹក្សាអចលនទ្រព្យ CBRE បានចេញផ្សាយនូវរបាយការណ៍មួយកាលពីពេលថ្មីៗនេះអំពីគម្លាតរវាងតម្លៃលំនៅដ្ឋាន និងប្រាក់ចំណូលជាមធ្យមសម្រាប់ប្រជាជនម្នាក់ៗរស់នៅតាមបណ្តាទីក្រុងធំៗនៅក្នុងទ្វីបអាស៊ី។

យោងតាមក្រុមហ៊ុន CBRE បានឱ្យដឹងថា ទីក្រុងធំៗចំនួន២នៅប្រទេសវៀតណាម រួមមាន រដ្ឋធានីហាណូយ និងទីក្រុងហូជីមិញ ស្ថិតក្នុងចំណោមទីក្រុងដែលមានភាពខុសគ្នាខ្លាំងរវាងតម្លៃផ្ទះ និងប្រាក់ចំណូលជាមធ្យមសម្រាប់មនុស្សម្នាក់។ ការណ៍នេះមានន័យថា ប្រជាជននៅក្នុងទីក្រុងទាំងពីរពិបាកទិញផ្ទះ ដោយសារកង្វះលទ្ធភាពហិរញ្ញវត្ថុ។

ក្រុមហ៊ុន ​​CBRE បានគូសបញ្ជាក់ថា បច្ចុប្បន្ន អាផាតមុិននៅក្នុងទីក្រុងហាណូយមានតម្លៃ២.៦០០ដុល្លារក្នុងមួយម៉ែត្រការ៉េ ខណៈប្រាក់ចំណូលជាមធ្យមសម្រាប់មនុស្សម្នាក់មានទំហំប្រមាណ៦.៣០០ដុល្លារក្នុងមួយឆ្នាំ ដែលធ្វើឱ្យផលធៀបរវាងប្រាក់ចំណូល និងតម្លៃលំនៅដ្ឋានស្ថិតក្នុងរង្វង់២​,៤ដង។

ដោយឡែក អាផាតមុិននៅទីក្រុងហូជីមិញមានតម្លៃចំនួន២.៨០០ដុល្លារក្នុងមួយម៉ែត្រការ៉េ ស្របពេលប្រាក់ចំណូលជាមធ្យមសម្រាប់មនុស្សម្នាក់មានទំហំប្រហែល៧.៥០០ដុល្លារក្នុងមួយឆ្នាំ ដែលធ្វើឱ្យផលធៀបរវាងប្រាក់ចំណូល និងតម្លៃលំនៅដ្ឋានស្ថិតក្នុងរង្វង់២,៧ដង។

ចំណែក ផលធៀបរវាងប្រាក់ចំណូល និងតម្លៃលំនៅដ្ឋាននៅទីក្រុងហុងកុង ស្ថិតក្នុងរង្វង់១,៧ដង ខណៈផលធៀបរវាងប្រាក់ចំណូល និងតម្លៃលំនៅដ្ឋាននៅទីក្រុងសេអ៊ូលរបស់ប្រទេសកូរ៉េខាងត្បូងស្ថិតក្នុងរង្វង់២,៣ដង ហើយផលធៀបរវាងប្រាក់ចំណូល និងតម្លៃលំនៅដ្ឋាននៅទីក្រុងម៉ានីលរបស់ប្រទេសហ្វីលីពីនក៏ស្ថិតក្នុងរង្វង់២,៣ដងផងដែរ។

ក្រុមហ៊ុន ​​CBRE បានអះអាងថា លំនៅដ្ឋាននៅទីក្រុងធំៗទាំង២របស់ប្រទេសវៀតណាមនាពេលបច្ចុប្បន្នមានតម្លៃស្មើទៅនឹងប្រទេសជាច្រើននៅក្នុងតំបន់។ ប៉ុន្តែប្រាក់ចំណូលជាមធ្យមរបស់កម្មករវៀតណាមមានកម្រិតទាបជាងបណ្តាប្រទេសជិតខាង។

ជាក់ស្តែង អាផាតមុិននៅទីក្រុងគូឡាឡាំពួរនៃប្រទេសម៉ាឡេស៊ីមានតម្លៃជាមធ្យមស្មើនឹងអាផាតមុិននៅទីក្រុងហាណូយក្នុងរង្វង់ប្រមាណ២.៦០០ដុល្លារក្នុងមួយម៉ែត្រការ៉េ។ ប៉ុន្តែប្រាក់ចំណូលជាមធ្យមសម្រាប់មនុស្សម្នាក់នៅទីក្រុងគូឡាឡាំពួរមានចំនួន២៨.០០០ដុល្លារ ដែលខ្ពស់ជាងទីក្រុងហាណូយចំនួន៤ដង៕ប្រភព: Vnexpress៕

ដោយ: គង់ លាងហួរ
អន្តរជាតិ: យោងតាមកាសែត South China Morning Post បានរាយការណ៍ឱ្យដឹងថា រដ្ឋបាលរបស់តំបន់មូលដ្ឋានមួយចំនួននៅក្នុងប្រទេសចិនកំពុងពន្លឿនការទិញដីទំនេរ ឬដីមិនបានប្រើប្រាស់ពីអ្នកអភិវឌ្ឍន៍។

ប៉ុន្តែ ក្រុមអ្នកវិភាគបានជំរុញឱ្យទីក្រុងជាច្រើនទៀតចូលរួមអនុវត្តន៍វិធីសាស្ត្រនេះ ដើម្បីជួយសង្គ្រោះទីផ្សារអចលនទ្រព្យចិន ដែលបានដាំក្បាលចុះ។

កាលពីសប្តាហ៍មុន រដ្ឋបាលក្រុងមួយចំនួននៅខេត្តក្វាងទុង ភាគខាងត្បូងនៃប្រទេសចិនបានបង្ហាញផែនការទិញដីទំនេរពីអ្នកអភិវឌ្ឍន៍ ក្នុងទំហំទឹកប្រាក់សរុបជាង៣៥ពាន់លានយ័ន (ប្រហែល៤,៨ពាន់លានដុល្លារ) តាមរយៈការបោះផ្សាយលក់សញ្ញាបណ្ណពិសេស។

នេះជាចំណាត់ការលើកដំបូងរបស់រដ្ឋបាលមូលដ្ឋាន គិតចាប់តាំងពីអាជ្ញាធរចិនបានប្រកាសអំពីគម្រោងដោះស្រាយការផ្គត់ផ្គង់ដីលំនៅដ្ឋានលើសតម្រូវការនៅក្នុងខែតុលា ឆ្នាំ២០២៤។

យោងតាមទិន្នន័យពីស្ថាប័ន China Index Academy បានបង្ហាញឱ្យដឹងថា “ផែនការខាងលើនេះ រួមមាន ការទិញដីចំនួនជាង១៦០ឡូតិ៍ក្នុងទំហំផ្ទៃក្រឡាសរុបចំនួន៦,៨លានម៉ែត្រការ៉េ។ ដីទាំងនោះអាចមានតម្លៃ៥.១៤៧យ័ន(ប្រហែល៧០៩,៥ដុល្លារ)ក្នុងមួយម៉ែត្រការ៉េ”។

ដីទំនេរ ឬដីមិនបានប្រើប្រាស់ភាគច្រើនត្រូវបានលក់ឡាយឡុងទៅឱ្យរដ្ឋបាលមូលដ្ឋានរបស់ប្រទេសចិនក្នុងទំហំទឹកប្រាក់ទាបជាងតម្លៃហាងឆេង ដែលអ្នកអភិវឌ្ឍន៍បានទិញកាលពីមុន។នេះបើយោងតាមស្ថាប័ន ​​​​China Index Academy។

លោក Yan Yuejin អនុប្រធានវិទ្យាស្ថានស្រាវជ្រាវអចលនទ្រព្យចិន E-House China Real Estate ដែលមានមូលដ្ឋាននៅទីក្រុងសៀងហៃបានអះអាងថា “ការទិញដីទំនេរបានចាប់ផ្តើមជាផ្លូវការ តាមរយៈការលក់មូលបត្របំណុលពិសេសរបស់រដ្ឋបាលក្នុងតំបន់មូលដ្ឋាននៅឆ្នាំ២០២៥។យើងរំពឹងថា ទីក្រុងជាច្រើនទៀតនឹងចូលរួមអនុវត្តន៍វិធានការនេះ”។

លោកបានបន្ថែមថា “គំនិតផ្តួចផ្តើមនេះនឹងជួយជំរុញឱ្យមានតុល្យភាពរវាងការផ្គត់ផ្គង់ និងតម្រូវការនៅក្នុងទីផ្សារដីធ្លី ក៏ដូចជាផ្តល់លំហូរសាច់ប្រាក់សម្រាប់អ្នកអភិវឌ្ឍន៍ កាត់បន្ថយបន្ទុកហិរញ្ញវត្ថុរបស់អ្នកអភិវឌ្ឍន៍ និងធ្វើឱ្យប្រតិបត្តិការអាជីវកម្មរបស់ពួកគេមានស្ថិរភាព”៕ប្រភព: SCMP៕