ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃព្រហស្បតិ៍នេះ ខណៈផែនការពន្ធរបស់ប្រធានាធិបតីអាមេរិកលោក ដូ ណាល់ត្រាំ បានជំរុញឱ្យមានការភ័យខ្លាចចំពោះការកើនឡើងនៃអតិផរណា និងសង្រ្គាមពាណិជ្ជកម្មសកលដ៏ធំមួយ។

តួយ៉ាង តម្លៃមាស Spot Gold បានងើបឡើង០,៣២ភាគរយដល់២.៩៤២ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៨៣ភាគរយដល់២៩៦០,៤០ដុល្លារក្នុងមួយអោនគិតត្រឹមម៉ោង១០:៤០នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៨ភាគរយ ដែលធនាគារកណ្តាលអាមេរិក (Fed) នឹងបន្តរក្សាទុកអត្រាការប្រាក់របស់ខ្លួនឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៩ ខែមីនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះដល់១០៧,០២នៅព្រឹកថ្ងៃព្រហស្បតិ៍នេះ បន្ទាប់ពីបានបិទការជួញដូរត្រឹម១០៧,១៧ពិន្ទុកាលពីថ្ងៃពុធម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,៨៤ភាគរយដល់៣៣,៣២ដុល្លារក្នុងមួយអោន ខណៈតម្លៃផ្លាទីនបានងើបឡើង០,៥៩ភាគរយដល់៩៩២ដុល្លារក្នុងមួយអោន ហើយតម្លៃ palladium បានងើបឡើង០,៣៥ភាគរយដល់៩៩៤ដុល្លារក្នុងមួយអោនគិតត្រឹមម៉ោង១០:៤៣នាទីព្រឹក៕

ដោយ: គង់ លាងហួរ
អន្តរជាតិ: បណ្តាក្រុមហ៊ុនអាកាសចរណ៍ធំៗលើពិភពលោក ដូចជាក្រុមហ៊ុន Airbus ក្រុមហ៊ុន Rolls-Royce ក្រុមហ៊ុន Collins Aerospace និងក្រុមហ៊ុន Pratt & Whitney កំពុងស្វែងរកប្រភពផ្គត់ផ្គង់គ្រឿងបន្លាស់បន្ថែមពីប្រទេសឥណ្ឌា។

ការណ៍នេះបានរួមចំណែកដល់ភាពរីកចម្រើននៃទីផ្សារអវកាសក្នុងប្រទេសឥណ្ឌា និងជួយបង្កើនសមត្ថភាពផលិតកម្មរបស់បណ្តាក្រុមហ៊ុនឥណ្ឌាក្នុងស្រុក ដើម្បីបំពេញតម្រូវការរបស់បណ្តាក្រុមហ៊ុនផលិតយន្តហោះលោកខាងលិច។

ក្រុមហ៊ុនឥណ្ឌា HiCal Technologies ដែលមានមូលដ្ឋាននៅទីក្រុង Bengaluru ស្ថិតក្នុងចំណោមបណ្តាក្រុមហ៊ុនឥណ្ឌាផ្សេងទៀត ដែលទទួលបានអត្ថប្រយោជន៍ពីនិន្នាការខាងលើ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន Reuters។

លោក Yashas Jaiveer Shashikiran នាយកគ្រប់គ្រងក្រុមហ៊ុន HiCal Technologies បានលើកឡើងថា ក្រុមហ៊ុន HiCal Technologies ជាអ្នកផ្គត់ផ្គង់គ្រឿងបន្លាស់ដល់ក្រុមហ៊ុនផលិតយន្តហោះសហរដ្ឋអាមេរិក Boeing និងបណ្តាក្រុមហ៊ុនផលិតយន្តហោះធំៗផ្សេងទៀត។

លោកបន្តថា ក្រុមហ៊ុន HiCal Technologies គ្រោងនឹងបង្កើនគោលដៅប្រាក់ចំណូលពីទីផ្សារអវកាសរបស់ខ្លួនក្នុងរយៈពេល៣ឆ្នាំខាងមុខ ឱ្យមានការកើនឡើងទ្វេរដងដល់ទំហំទឹកប្រាក់៥ពាន់លានរូពី(ប្រហែល៥៧,៥៧លានដុល្លារអាមេរិក)។

នាយកគ្រប់គ្រងក្រុមហ៊ុនឥណ្ឌារូបនេះ បានមានប្រសាសន៍ឱ្យដឹងបន្តថា លោកបានចំណាយពេលប្រមាណ២០ឆ្នាំនៅក្នុងក្រុមហ៊ុននេះ ដើម្បីឈានដល់ចំណុចដូចពេលបច្ចុប្បន្ន។ លោកបង្ហាញសុទិដ្ឋិនិយមថា ក្រុមហ៊ុននឹងសម្រេចបានអត្រាកំណើនប្រាក់ចំណូលចន្លោះពី៣០ភាគរយ ទៅ៤០ភាគរយជារៀងរាល់ឆ្នាំ៕ប្រភព: Reuters៕

ដោយ: គង់ លាងហួរ
អន្តរជាតិ: ក្រុមហ៊ុនដឹកជញ្ជូនខ្នាតយក្ស CNC Line បានចាប់ផ្តើមបើកដំណើរការសេវាកម្មកប៉ាល់ពាណិជ្ជកម្មខ្នាតតូចថ្មីដើម្បីតភ្ជាប់ដោយផ្ទាល់រវាងតំបន់ភាគខាងត្បូងប្រទេសចិន និងប្រទេសកម្ពុជា។

ការបើកដំណើរការនូវសេវាកម្មថ្មីនេះត្រូវបានគេរំពឹងថា នឹងជួយពន្លឿនការដឹកជញ្ជូនកាន់តែមានប្រសិទ្ធភាពជាងមុន និងអាចជឿទុកចិត្តបានសម្រាប់ក្រុមហ៊ុននាំចេញ ដែលកំពុងបំពេញប្រតិបត្តិការអាជីវកម្មរបស់ខ្លួនក្នុងតំបន់នេះ។

ក្រុមហ៊ុន CNC Line បានលើកឡើងអំពីអត្ថប្រយោជន៍នៃការផ្តល់សេវាកម្មថ្មីនេះ ដែលរួមមានដូចជាការពង្រឹងការតភ្ជាប់ដោយផ្ទាល់រវាងតំបន់ភាគខាងត្បូងប្រទេសចិន និងប្រទេសកម្ពុជា និងកាត់បន្ថយពេលវេលាដឹកជញ្ជូនទៅកាន់ខេត្តព្រះសីហនុ។

នេះជាការបើកដំណើរការសេវាកម្មដឹកជញ្ជូនទំនិញដោយផ្ទាល់ដំបូងបង្អស់របស់ក្រុមហ៊ុន CNC Line រវាងខេត្ត Yantian នៅភាគខាងត្បូងនៃប្រទេសចិន និងខេត្តព្រះសីហនុរបស់កម្ពុជា ដោយផ្តល់ជូននូវជម្រើសថ្មី និងគួរឱ្យទុកចិត្តសម្រាប់ក្រុមហ៊ុននាំចេញ។

សេវាកម្មនេះនឹងជួយធ្វើឱ្យប្រសើរឡើងនូវប្រសិទ្ធភាពនៃខ្សែសង្វាក់ផ្គត់ផ្គង់ តាមរយៈកាត់បន្ថយពេលវេលា និងថ្លៃដើមនៃការដឹកជញ្ជូនទំនិញដោយផ្ទាល់រវាងប្រទេសចិន និងកម្ពុជា។

ចំនួនកុងតឺន័រ ដែលបានឆ្លងកាត់កំពង់ផែស្វយ័តក្រុងព្រះសីហនុបានកើនឡើងដល់កម្រិតខ្ពស់បំផុតចំនួន ១លាន TEUs នៅចុងឆ្នាំ២០២៤ ហក់ឡើងជាង២៩ភាគរយបើប្រៀបធៀបនឹងឆ្នាំ២០២៣។

កំពង់ផែស្វយ័តក្រុងព្រះសីហនុ ជាកំពង់ផែសមុទ្រទឹកជ្រៅដំបូងបង្អស់របស់កម្ពុជា។ កំពង់ផែនេះបាននិងកំពុងដើរតួនាទីយ៉ាងសំខាន់ក្នុងការចូលរួមចំណែកក្នុងការអភិវឌ្ឍន៍ប្រទេសកម្ពុជា តាមរយៈការទទួលបានប្រាក់ចំណូលពីការកើនឡើងនៃបរិមាណទំនិញ និងកុងតឺន័រឆ្លងកាត់៕ប្រភព: CNC Line៕

ដោយៈ គង់ សូរិយា

    ភ្នំពេញៈ លោកឧបនាយករដ្ឋមន្រ្តីស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជាបាន ស្តាប់បទបង្ហាញអំពីវឌ្ឍនភាពនៃគម្រោងសិក្សាស្រាវជ្រាអំពី “ការបង្កើតកិច្ចសហការសេដ្ឋកិច្ចរួមគ្នា កម្ពុជា-ជប៉ុន តាមរយៈការពង្រីកធុរកិច្ចជប៉ុននៅកម្ពុជា ប្រកបដោយនិរន្តរភាព” និង “គោលនយោបាយតំបន់សេដ្ឋកិច្ចពិសេស និងសួនឧស្សាហកម្មបៃតង សម្រាប់កំណើនផលិតភាព និងការធ្វើពិពិធកម្មសេដ្ឋកិច្ចនៅកម្ពុជា”។

បទបង្ហាញនេះបានធ្វើឡើងកាលពីថ្ងៃទី១៩ កុម្ភៈ ឆ្នាំ២០២៥ ក្នុងពេលលោកបានអនុញ្ញាតជូន គណៈប្រតិភូជប៉ុនរួមមាន លោកសាស្រ្តាចារ្យ WATANABE Tetsuya ប្រធានវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (Economic Research Institute for ASEAN and East Asia – ERIA) រួមជាមួយ លោក FUJIOKA Ryosuke ទីប្រឹក្សារដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្ម នៃប្រទេសជប៉ុន(METI) និងជាអគ្គលេខាធិការនៃគណៈកម្មាធិការ សម្រាប់កិច្ចសហប្រតិបត្តិការសេដ្ឋកិច្ច និងឧស្សា​ហកម្ម រវាងរដ្ឋមន្ត្រីសេដ្ឋកិច្ចអាស៊ាន ជាមួយក្រសួងសេដ្ឋកិច្ច ពាណិជ្ជកម្ម និងឧស្សាហកម្ម នៃប្រទេសជប៉ុន (AMEICC) ព្រមទាំងសហការី ចូលជួបសម្តែងការគួរសម និងពិភាក្សាការងារ។

ជំនួបនាព្រឹកនេះ ត្រូវបានរៀបចំឡើងក្នុងគោលបំណង ដើម្បីធ្វើបទបង្ហាញជូន លោកឧបនាយករដ្ឋមន្ត្រី និងថ្នាក់ដឹកនាំ ក.អ.ក. អំពីវឌ្ឍនភាពនៃគម្រោងសិក្សាស្រាវជ្រាអំពី “ការបង្កើតកិច្ចសហការសេដ្ឋកិច្ចរួមគ្នា កម្ពុជា-ជប៉ុន តាមរយៈការពង្រីកធុរកិច្ចជប៉ុននៅកម្ពុជាប្រកបដោយនិរន្តរភាព”  ដែលធ្វើឡើងដោយMETI និងគម្រោងសិក្សាស្រាវជ្រាវអំពី “គោលនយោបាយតំបន់សេដ្ឋកិច្ចពិសេស និងសួនឧស្សា​ហកម្មបៃតងសម្រាប់កំណើនផលិតភាព និងការធ្វើពិពិធកម្មសេដ្ឋកិច្ចនៅកម្ពុជា” ដែលសិក្សាដោយ ERIA។

របាយការណ៍ចុងក្រោយ នៃការសិក្សាគម្រោងស្រាវជ្រាវរបស់​METI នឹងត្រូវយកទៅបង្ហាញនៅក្នុងវេទិកាពិភាក្សារវាងរដ្ឋ និងវិស័យឯកជនកម្ពុជា-ជប៉ុន នាពេលខាងមុខ៕

ដោយ: គង់ លាងហួរ
អន្តរជាតិ: នាយករដ្ឋមន្ត្រីថៃលោកស្រី Paetongtarn Shinawatra បានបញ្ជាឱ្យបណ្តាក្រសួងពាក់ព័ន្ធនានាពន្លឿនការស្ថាបនាផ្លូវដែកល្បឿនលឿន ខណៈប្រទេសចិនបានផ្តល់អាទិភាពដល់គម្រោងនេះ ដើម្បីកាត់បន្ថយថ្លៃដើមនៃការដឹកជញ្ជូន។

លោកស្រីបានលើកឡើងពីវឌ្ឍនភាពនៃគម្រោងផ្លូវរថភ្លើងល្បឿនលឿន និងគម្រោង Land Bridge ដោយកត់សម្គាល់ថា គម្រោងដំណាក់កាលទី១ និងដំណាក់កាលទី២ នៃប្រព័ន្ធរថភ្លើងល្បឿនលឿនកំពុងស្ថិតក្រោមដំណើរការសាងសង់នៅឡើយ។

នៅពេលគម្រោងទាំងមូលត្រូវបានសាងសង់រួចរាល់ ប្រទេសចិន ប្រទេសឡាវ និងថៃ នឹងអាចដឹកជញ្ជូនទំនិញកាន់តែមានប្រសិទ្ធភាព កាត់បន្ថយការចំណាយ ព្រមទាំងបង្កើតឱកាសសម្រាប់សហគ្រាសធុនតូច និងមធ្យមថៃ រួមទាំងកសិករផងដែរ។

លោកស្រី Paetongtarn Shinawatra បានគូសបញ្ជាក់ថា ប្រទេសចិនបានចាត់ទុកគំនិតផ្តួចផ្តើមនេះជាអាទិភាព ហើយភាគីចិនបានជំរុញឱ្យប្រទេសថៃពន្លឿនវឌ្ឍនភាពលើគម្រោងផ្លូវដែកល្បឿនលឿនរបស់ខ្លួន។

ប្រទេសចិនក៏បានបង្ហាញពីចំណាប់អារម្មណ៍យ៉ាងខ្លាំងចំពោះគម្រោងខ្នាតយក្ស Land Bridge របស់រដ្ឋាភិបាលថៃ រួមមានការសាងសង់កំពង់ផែទឹកជ្រៅនៅខេត្ត Chumphon និងខេត្ត Ranong និងការស្ថាបនាផ្លូវដែកដើម្បីតភ្ជាប់កំពង់ផែក្នុងខេត្តទាំង២។

ប្រសិន​បើ​គម្រោង​នេះ​សម្រេច​បានជោគជ័យ នោះការ​បង្កើន​ការ​តភ្ជាប់​នឹងផ្តល់​អត្ថប្រយោជន៍​ដល់ប្រទេស​ចិន និង​ប្រទេស​ជិត​ខាងផ្សេងទៀត។

ប្រទេសចិនក៏បានស្នើសុំធ្វើការសិក្សាលទ្ធភាពនៃគម្រោង Land Bridge ដោយទទួលស្គាល់ពីគុណសម្បត្តិ និងសក្តានុពលនៃគម្រោងតម្លៃរាប់ពាន់លានដុល្លារនេះ។ក្នុងន័យនេះ រដ្ឋាភិបាល​ថៃ​បាន​ចាត់​ឱ្យក្រុម​ការងារស្រាវជ្រាវ​ផ្តល់​ព័ត៌មាន​លម្អិត​បន្ថែមដល់ទីក្រុងប៉េកាំង និង​បញ្ចុះបញ្ចូល​អ្នក​វិនិយោគ​ចិនឱ្យចូលមកបណ្តាក់ទុន។

លោកស្រី Paetongtarn បានបញ្ជាក់ទៀតថា គម្រោង Land Bridge នឹងកាត់បន្ថយពេលវេលានៃការនាំចេញបានចំនួន៤ថ្ងៃ និងកាត់បន្ថយថ្លៃដើមអាជីវកម្មចំនួន១៥% ដោយសន្សំសំចៃប្រេងឥន្ធនៈ និងជួយឱ្យអ្នកប្រើប្រាស់ទទួលបានផលិតផលក្នុងតម្លៃកាន់តែសមរម្យ។

លោកស្រីបានបន្ថែមថា “គម្រោងនេះនឹងដើរស្របតាមគំនិតផ្តួចផ្តើមថាមពលបៃតងដើម្បីបង្កើននិរន្តរភាព។ លើសពីនេះ ប្រទេសថៃមានគោលបំណងប្រែក្លាយខ្លួនជាមជ្ឈមណ្ឌលដឹកជញ្ជូនក្នុងតំបន់ ព្រមទាំងបង្កើតការងារ និងជំរុញឱកាសពាណិជ្ជកម្ម”៕ប្រភព: The Nation៕

ដោយៈ គង់ សូរិយា

    មណ្ឌលគិរីៈ ក្រុមហ៊ុនចិនធំមួយ បានស្នើសុំកាត់ឆ្វៀលដីទំហំ៦៨២៣ហិកតា នៅខេត្តមណ្ឌលគិរី ដើម្បីវិនិយោគសាងសង់ស្ថានីយ៍អគ្គិសនីដើរដោយថាមពលខ្យល់។

គំរោងនេះ ស្ថិតនៅភូមិសាស្ត្រភូមិពូឡះ និងភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី​។

កិច្ចប្រជុំនេះធ្វើឡើង ក្រោមអធិបតីភាព​ លោក​ជាក់​ ម៉េងហ៊ាង​ អភិបាលរង​ នៃគណៈអភិបាលខេត្ត​ លោកសេន​ ណាស៊ី​ អនុរដ្ឋលេខាធិការ​ ក្រុមការងារក្រសួងរៀបចំដែនដី​ នគរូបនីយកម្ម​ និងសំណង់​ ដោយមានអញ្ជើញចូលរួមពីសំណាក់​ លោកនាយករង​ រដ្ឋបាលសាលាខេត្ត​ លោក​ លោកស្រី​ប្រធាន​ អនុប្រធានមន្ទីរ​ អង្គភាព​ ពាក់ព័ន្ធ​ អភិបាលរង​ស្រុក​ តំណាងក្រុមហ៊ុន បេជើងហ្វេងហ្នឹងអ៊ុនហ្វីតនីត វិន អេនើជី ឯ.ក​ និងមន្ត្រីជំនាញពាក់ព័ន្ធ​ កិច្ចប្រជុំនេះប្រព្រឹត្តទៅនៅ​សាលប្រជុំ​ សែនមនោរម្យ​ អគាររដ្ឋបាលសាលាខេត្ត​។

ព័ត៌មាននេះ ត្រូវបានលើកឡើងកាលពីសប្តាហ៍មុន ក្នុងកិច្ចប្រជុំដែលមានការចូលរួមផងដែរពីលោក​ ណាំ​ វុត្ថា​ អនុប្រធាន​មន្ទីរ​រៀបចំដែនដី​ នគរូបនីយកម្ម​ សំណង់​ និងសុរិយោដី​ ខេត្តមណ្ឌលគិរី​ និងក្រុមការងារ​ ដើម្បីចុះពិនិត្យសិក្សាលើករណី ឈ្មោះប៊ូ សុភក្តិ ហ៊ឹម ឧត្តម និងឈ្មោះ រឹម យ៉ូសែប តំណាងក្រុមហ៊ុនបេជើង ហ្វេងហ្នឹងអ៊ុនហ្វីតនីត វិន អេនើជី ឯ.ក ស្នើសុំកាត់ឆ្វៀលដីទំហំ៦៨២៣ហិកតា សម្រាប់គម្រោងវិនិយោគផលិតថាមពលអគ្គិសនី ដើរដោយកម្លាំងខ្យល់អនុភា​ព១៥០មេហ្គាវ៉ាត់ និងគម្រោងអភិវឌ្ឍន៍កសិកទេសចរណ៍៕​

ដោយៈ គង់ សូរិយា

    ភ្នំពេញៈ លោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងសហការី តាមរយៈអ្នកឧកញ៉ាបណ្ឌិតពុង ឃាវសែ ប្រធានក្រុមប្រឹក្សាភិបាលធនាគារ កាណាឌីយ៉ា ភីអិលស៊ី  បានទទួលជួបពិភា​​​ក្សាការងារជាមួយ គណៈប្រតិភូក្រុមហ៊ុនចិនចំនួន១៨ មកពីទីក្រុងនីងប៉  ខេត្តចឺជាំង សាធារណរដ្ឋប្រជាមានិតចិន។

គណប្រតិភូនេះ ដឹកនាំដោយលោកស្រី លូ ចឺឈីង (Lu Zhiqiong)  អគ្គនាយកធនាគារនីងប៉  ដែលក្រុមហ៊ុនទាំងនោះមានកម្មវត្ថុអាជីវកម្ម ក្នុងវិស័យមួយចំនួនដូចជាការកែច្នៃកៅស៊ូ ផលិតសម្ភារៈបរិក្ខារពេទ្យ សម្ភារៈឆ្លាតវៃប្រើប្រាស់ក្នុងផ្ទះ សម្លៀកបំពាក់ និងធនាគារ ។ល។

លោកអគ្គលេខាធិការបានមានមតិស្វាគមន៍ ចំពោះគណៈប្រតិភូដែលបានចំណាយពេលវេលាដ៏មានតម្លៃ មកធ្វើទស្សនកិច្ចសិក្សាផ្ទាល់នៅកម្ពុជា។ លោកបានវាយតម្លៃខ្ពស់ ចំពោះការវិនិយោគរបស់ចិននៅក្នុងប្រទេសកម្ពុជាហើយក៏បានលើកទ្បើង ពីសក្តានុពលក្នុងវិស័យឧស្សាហកម្ម កម្មន្តសាល ការកែច្នៃផលិតផល ការបង្កើតតំបន់សេដ្ឋកិច្ចពិសេស និងវិស័យកសិកម្ម និងកសិ-ឧស្សាហកម្ម ជាពិសេសកម្ពុជាមានដំណាំយុទ្ធសាស្ត្រជាច្រើន រួមមានស្រូវ ដំទ្បូងមី និងស្វាយចន្ទីជាដើម ដែលទាមទារឱ្យមានការ វិនិយោគកែច្នៃក្នុងស្រុកដើម្បីបង្កើតតម្លៃបន្ថែម។

លោកជា វុទ្ឋីបានជំរុញឱ្យវិនិយោគិនធ្វើការគិតគូរ ក្នុងការបង្កើតខ្សែចង្វាក់ផលិតកម្មក្នុងវិស័យ កសិកម្ម ជាពិសេសការកែច្នៃស្វាយចន្ទីដែលជាគំនិតផ្តួចផ្តើមរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាផងដែរ។ ទន្ទឹមនឹងនេះ លោកអគ្គលេខាធិការក៏បានជម្រាបជូនគណៈប្រតិភូ ពីស្ថានភាពវិនិយោគនៅកម្ពុជា ច្បាប់ និងបទប្បញ្ញត្តិពាក់ព័ន្ធនឹងការ វិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន ព្រមទាំងការលើកទឹកចិត្តនានា។

ជាការឆ្លើយតប លោកស្រី លូ ចឺឈីង បានថ្លែងអំណរគុណដល់ឯកឧត្តមអគ្គលេខាធិការ ដែលបានឆ្លៀតពេលមមាញឹកទទួលជួបគណៈប្រតិភូ និងបានជម្រាបជូនយ៉ាងក្បោះក្បាយ ពីបរិយាកាសវិនិយោគនៅកម្ពុជា។

លោកស្រីសង្ឃឹមថាតាមរយៈជំនួបលើកនេះ នឹងធ្វើឲ្យក្រុមហ៊ុនមានចំណាប់អារម្មណ៍កាន់តែខ្លាំង ក្នុងការគិតគូរមកបណ្តាក់ទុនវិនិយោគនៅកម្ពុជា៕