ក្រុមហ៊ុន CEO Master Club Investment PLC បើកសម្ពោធហើយ

September 9, 2019

ដោយ ៖ រ៉ាណេត

ភ្នំពេញ ៖ នៅក្នុងគោលដៅជំរុញ និងលើកកម្ពស់វិស័យអាជីវកម្ម ជាពិសេស លើកទឹកចិត្តដល់បណ្តាសហគ្រិនទាំងអស់នៅកម្ពុជា ក្រុមហ៊ុន CEO Master Club Investment PLC បានចាប់ផ្តើមសម្ពោធបើកដំណើរការជាផ្លូវការណ៍ក្រោមការទទួលស្គាល់ និងគាំទ្រយ៉ាងពេញទំហឹងពីសំណាក់គណៈកម្មការមូលប័ត្រកម្ពុជា។

ប្រធានក្រុមប្រឹក្សាភិបាលនៃក្រុមហ៊ុន CEO Master Club Investment PLC លោក អោម សេងបូរ៉ា បានមានប្រសាសន៍នៅក្នុងឱកាសពិធីបើកសម្ពោធដំណើរជាការផ្លូវកាលពីល្ងាចថ្ងៃទី៩ ខែកញ្ញា ឆ្នាំ២០១៩នេះថា ក្រុមហ៊ុន CEO Master Club Investment PLC បង្កើតឡើងដើម្បីអាចទទួលបាន និងបែងចែកប្រយោជន៍ជាច្រើនដល់បណ្តាសហគ្រិននានាដែលកំពុងតែធ្វើការវិនិយោគដោយផ្ទាល់នៅកម្ពុជា ក៏ដូចជាជំរុញកំណើនសេដ្ឋកិច្ចកម្ពុជាផងដែរ។

លោកបានបន្តទៀតថា “នៅកម្ពុជានាពេលបច្ចុប្បន្ននេះ មានសហគ្រិនជាច្រើនដែលពោរពេញទៅដោយសក្ដានុពល ហើយក្រុមហ៊ុននឹងធ្វើការជាសហគ្រិនទាំងអស់នេះ”។

លោកបានបន្តទៀតថា “ជាក់ស្ដែងពេលនេះ សហគ្រិនជាច្រើនដែលកំពុងតែមានសក្ដានុពល គឺកំពុងតែទទួលបានចំណេញ ហើយមានឱកាសក្នុងការពង្រីកខ្លួន ប៉ុន្តែទាស់ត្រង់ថា មានបញ្ហាមួយគឺដើមទុន។ ដូច្នេះ តើពួកគាត់គួរធ្វើយ៉ាងណាដើម្បីទទួលបានដើមទុនមកពង្រីកអាជីវកម្មរបស់ពួកគាត់។

តាមរយៈ CEO Master Club Investment PLC ពួកគាត់នឹងអាចទទួលបានទុនបន្ថែមប្រកបដោយភាពរឹងមាំ”។ លោកបានបន្តទៀតថា “កាលពីមុនពួកគាត់ចង់បានទុន ពួកគាត់អាចស្វែងរកដើមទន់ពីសាច់ញាតិ មិត្តភ័ក្ដិ ឫចងការពីធនាគារជាដើម ប៉ុន្តែពេលនេះ ពួកគាត់អាចមានជម្រើសល្អជាងពេលមុនក្រោយពេលពួកគាត់ដែលជាសហគ្រិនចូលរួមជាមួយក្រុមហ៊ុន CEO Master Club Investment PLC ”។

លោក អោម សេងបូរ៉ា បានបន្តទៀតថា “CEO Master Club Investment PLC ចង់ឃើញកម្ពុជា គឺជាប្រទេសមួយដែលមានភាពជឿនលឿន និងមានបានយ៉ាងឆាប់រហ័ស”។ លោកបន្តថា “កាលពីមុនបណ្តាអ្នកវិនិយោគ និងអភិវឌ្ឍន៍ធំៗនៅលើពិភពលោកនិយាយថា កម្ពុជាអាចដើរយឺតជាងប្រទេសថៃរហូតដល់៥០ឆ្នាំ។ ដើរយឺតជាងប្រទេសវៀតណាមជាង ៣០ឆ្នាំ ។ យឺតជាងសាំងហ្គាពួររហូតដល់ ១០០ឆ្នាំ”។

គ្រប់បណ្តាប្រទេសទាំងអស់ដែលមានភាពរឹងមាំ និងក្លាយជាប្រទេសមហាអំណាច គឺសុទ្ធតែមានភាពខ្លាំងខាងផ្នែកសេដ្ឋកិច្ច និងការដឹកនាំប្រកបដោយស្ថិរភាពផ្នែកនយោបាយ និងសន្តិសុខទាំងអស់។ កម្ពុជាបានឆ្លងកាត់នូវបញ្ហាជាច្រើនរាប់មិនអស់ ដូចជាបញ្ហាសង្គ្រាមជាដើម ដែលជាហេតុធ្វើឱ្យមានភាពខ្វះបទពិសោធន៍ និងការជំរុញផ្នែកវិនិយោគអាជីវកម្ម ដែលតម្រូវឱ្យមានការខិតខំសិក្សាបន្ថែមពីបណ្តាប្រទេសនានាដែលមានភាពចាស់ទុំផ្នែកមុខជំនួញ និងសេដ្ឋកិច្ចជាចាំបាច់។

ប្រធានក្រុមប្រឹក្សាភិបាលនៃក្រុមហ៊ុន CEO Master Club Investment PLC បានបញ្ជាក់ថា “នៅកម្ពុជា ភាគច្រើនមុខជំនួញនានាជាលក្ខណៈគ្រួសារនៅឡើយ ស្ទើរតែប្រៀបបានទៅនឹងទាសករអាជីវកម្ម ដែលវាមិនទាន់មានលក្ខណៈស្ដង់ដារនៅឡើយនោះទេ”។

លោកបានបន្តទៀតថា “តាមរយៈក្រុមហ៊ុន CEO Master Club Investment PLC ខ្ញុំនឹងយកបទពិសោធន៍របស់ខ្ញុំដែលមានការទទួលស្គាល់យ៉ាងទូលាយជាសកល មកចែករំលែក និងជួយជ្រោមជ្រែង ពង្រឹង និងពង្រីកអាជីវកម្មលក្ខណៈគ្រួសាររបស់សហគ្រិនជាសមាជិក ឱ្យមានការវិវត្តន៍ទៅជាលក្ខណៈស្ដង់ដារអន្តរជាតិយ៉ាងប្រាកដ”។

លោកបានបញ្ជាក់ទៀតថា “សហគ្រិនភាពនៅកម្ពុជា បានចូលរួមចំណែកយ៉ាងច្រើននៅក្នុងសង្គម ដែលក្រៅពីអាចទទួលបានចំណេញលើអាជីវកម្ម ថែមទាំងអាចជួយចូលរួមដល់សង្គមជាតិទាំងមូល ដូចជាការផ្តល់ឱកាសការងារ ការបណ្តុះចំណេះដឹង និងជំនាញបន្ថែមដល់បុគ្គលិក ជាពិសេសចូលរួមជួយបង្កើនចំណូលដល់សេដ្ឋកិច្ចជាតិតាមរយៈការបង់ពន្ធលើប្រាក់ចំណូល” ៕

ផ្លូវថ្នល់ចំនួន ៤៦ខ្សែ នៅខេត្តចំនួន១១ កំពុងជួបភាពលិចលង់ និងប្រឈមការខូចខាត

September 9, 2019

0

ដោយ ៖ រ៉ាណេត

ភ្នំពេញ ៖ ឥទ្ធិពលនៃគ្រោះជំនន់ទឹកភ្លៀង និងទឹកទន្លេមេគង្គ បានធ្វើឱ្យហេដ្ឋារចនាសម្ព័ន្ធនៅតាមបណ្តាខេត្តក្រុងនានាស្ទើរទូទាំងប្រទេស ជួបនឹងភាពខូចខាតជាច្រើន ដែលក្នុងនោះ ខេត្ត ក្រុង ចំនួន១១ កំពុងតែប្រឈម និងទាមទារឱ្យមានការស្ដារ និងជួសជុលឡើងវិញជាចាំបាច់។

គិតត្រឹមចុងសប្ដាហ៍កន្លងទៅនេះ ស្ថិតិរបស់ក្រសួងសាធារណៈការ និងដឹកជញ្ជូនបានបង្ហាញថា ខេត្ត / ក្រុងចំនួន ១១ នៅទូទាំងប្រទេសកម្ពុជា កំពុងតែជួបភាពលិចលង់ និងធ្វើឱ្យបណ្តាញហេដ្ឋារចនាសម្ព័ន្ធមួយចំនួនមានការខូចខាត ដែលតម្រូវឱ្យមានការជួសជុល និងស្ដារឡើងវិញជាចាំបាច់បន្ទាប់ចប់រដូវកាលទឹកតម្លើងនេះ។

ទេសរដ្ឋមន្ត្រី និងជារដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ បានមានប្រសាសន៍ថា គិតត្រឹមចុងសប្ដាហ៍កន្លងទៅនេះ មាន ខេត្ត / ក្រុង ចំនួន១១ហើយ ដែលកំពុងតែជួបបញ្ហាលិខលង់ និងខូចខាតផ្លូថ្នល់។

ខេត្ត /ក្រុងទាំង១១ ដែលកំពុងមានការខូចខាតហេដ្ឋារចនាសម្ព័ន្ធ រួមមានដូចជាផ្លូវថ្នល់ និងស្ពាន ដោយសារតែជំនន់ទឹកភ្លៀង និងទឹកទន្លេខាងលើនេះមានដូចជា ខេត្តមណ្ឌលគីរី ខេត្តរតនៈគីរី ខេត្តក្រចេះ ខេត្តស្ទឹងត្រែង ខេត្តព្រះវិហារ ខេត្តកំពង់ឆ្នាំង ខេត្តត្បូងឃ្មុំ ខេត្តកំពង់ស្ពឺ ខេត្តកំពត ខេត្តកែប និងខេត្តកោះកុង។

លោក ស៊ុន ចាន់ថុល បានមានប្រសាសន៍ថា “ភាពប្រឈមនៃខេត្តទាំង១១ដូចបានរៀបរាប់ខាងលើនេះ មានបណ្តាញផ្លូវសរុបចំនួន៤៦ខ្សែ ត្រូវបានលិច និងខូចខាត ដែលមានប្រវែងសរុបប្រមាណជាង៦០គីឡូម៉ែត្រ”។

លោកបានបន្តទៀតថា “បច្ចុប្បន្ននេះ ក្រុមការងារជំនាញបានចុះធ្វើសកម្មភាពអន្តរាគមន៍នៅតាមបណ្តាខេត្តក្រុងមួយចំនួន ដើម្បីទប់ស្កាត់កុំឱ្យរីករាយដាលកាន់តែធ្ងន់ធ្ងរ”។

លោកបានបន្តទៀតថា “ជាជំហាន និងការចង្អុលបង្ហាញពីសំណាក់ប្រមុខរាជរដ្ឋាភិបាល ពេលនេះក្រុងអ្នកជំនាញបានធ្វើការស្រោចស្រង់ និងស្ដារប្រព័ន្ធលូ ប្រឡាយ និងសាងសង់ប្រពន្ធរំដោះទឹកភ្លៀង និងកខ្វក់ ក្នុងខេត្ត និងក្រុងព្រះសីហនុ ក្រោមការផ្តល់ថវិកាពីរដ្ឋាភិបាលចំនួន ១០០លានដុល្លារ រួមជាមួយថវិកាបដិភាគរបស់វិស័យឯកជនចំនួន៤០០លានដុល្លារ”។

នៅក្នុងឱកាសចុះត្រួតពិនិត្យសកម្មភាពសាងសង់ និងស្តារផ្លូវជាតិលេខ៣ និងផ្លូវ៣៣ រដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ថុល បានបញ្ជាក់ឱ្យដឹងថា ភ្ជាប់ទៅនឹងគ្រោះទឹកជំនន់ដែលកំពុងបង្កឱ្យមានការខូចខាតផ្លូវ និងបណ្តាញហេដ្ឋារចនាសម្ព័ន្ធទៅតាមបណ្តាខេត្តទាំង១១ខាងលើនេះ រដ្ឋាភិបាល បានត្រៀមឧបករណ៍ គ្រឿងចក្រ រួមជាមួយថវិកាបម្រុងរួលរាល់សម្រាប់ស្ដារ និងជួលជុលឱ្យមានភាពល្អប្រសើរឡើងវិញបន្ទាប់ពីរដូវទឹកតម្លើងនេះត្រូវបានបញ្ចប់ទាំងស្រុង។

លោកទេសរដ្ឋមន្ត្រី ក៏បានបញ្ជាក់ផងដែរថា បើទោះជារដ្ឋាភិបាលបានជំរុញ និងខិតខំកសាង និងស្ដារផ្លូវថ្នល់ឱ្យល្អយ៉ាងណាក៏ដោយ ក៏ចាំបាច់ត្រូវតែមានការចូលរួមពីសំណាក់ប្រជាពលរដ្ឋ និងអ្នកប្រើប្រាស់ផ្លូវថ្នល់ទាំងអស់គ្នាក្នុងការថែរក្សាជាសម្បត្តិរួមផងដែរ។

លោកបន្តទៀតថា ផ្លូវថ្នល់ដែលអាចប្រើជាប្រយោជន៍ក្នុងរយៈពេលពេលយូរ និងមានគុណភាពល្អ ត្រូវពឹងផ្អែកទៅលើ៤ចំណុច ទី១ ការសាងសង់ត្រូវបានប្រាកដថាធ្វើឡើងស្របតាមបច្ចេកទេស ទី២ ចៀសវាងការជញ្ជូនលើសទម្ងន់ ទី៣ មានការចូលរួមក្នុងការថែរក្សាឱ្យបានល្អ ហើយទី៤ ការពារកុំឱ្យមានទឹកហូរកាត់ ដោយត្រូវបានមានប្រឡាយនៅអមទាំងសង់ខាងជាដើម ៕

អាសន្ន៖ អ្នកបើកយន្តហោះឱ្យ British Airways ធ្វើកូដកម្មដោយផ្អាករាល់ជើងហោះហើររយៈពេលពីរថ្ងៃ

September 9, 2019

0

ដោយ Donald Lee

ភ្នំពេញ៖ ក្រុមហ៊ុនអាកាសចរណ៍ឈានមុខគេរបស់ក្រុមហ៊ុន British Airways (BA) បានផ្អាកការហោះហើរទាំងអស់ចាប់ពីថ្ងៃទី ៩ ដល់ថ្ងៃទី ១០ ខែ កញ្ញានេះ ខណៈសមាគមអ្នកបើកយន្តហោះឱ្យក្រុមហ៊ុន BA បានជ្រើសរើសធ្វើកូដកម្មជុំវិញជម្លោះប្រាក់ឈ្នួល។

សេចក្តីប្រកាសព័ត៌មានរបស់ក្រុមហ៊ុន BA បានឱ្យថា “យើងយល់ពីសកម្មភាពធ្វើកូដកម្មរបស់សមាគម BALPA ដែលធ្វើឱ្យអ្នកមានខកចិត្ត និងរំខាន។

បន្ទាប់ពីជាច្រើនខែនៃការព្យាយាមដោះស្រាយវិវាទប្រាក់ខែ យើងមានការសោកស្តាយយ៉ាងខ្លាំងចំពោះអ្វីដែលបានកើតឡើង”។

សកម្មភាពធ្វើកូដកម្មដែលមិនធ្លាប់មានពីមុនដោយសមាគមអ្នកបើកយន្តហោះអាកាសចរណ៍អង់គ្លេស (BALPA) បានធ្វើឱ្យមានការភ្ញាក់ផ្អើលសូម្បីតែក្រុមហ៊ុន BA នៅពេលដែលពួកគេបានចេញព័ត៌មានថ្មីៗនៅលើគេហទំព័ររបស់ខ្លួនដល់អ្នកដំណើរ និងបានស្តីបន្ទោសយ៉ាងខ្លាំងដល់សមាគមអ្នកបើកយន្តហោះ។

សេចក្តីថ្លែងការណ៍របស់ក្រុមហ៊ុន BA ដែលចេញផ្សាយកាលពីថ្ងៃ ច័ន្ទ បានឱ្យដឹងថា “ជាអកុសល ដោយគ្មានព័ត៌មានលម្អិតពីសមាគម BALPA ដែលអាកាសយានិកនឹងធ្វើកូដកម្ម យើងគ្មានវិធីដឹងថាតើមានមនុស្សប៉ុន្មាននាក់នឹងមកធ្វើការ ឬយន្តហោះណាមួយដែលពួកគេមានសមត្ថភាពហោះហើរ ដូច្នេះយើងគ្មានជម្រើសអ្វីក្រៅពីលុបចោលជើងហោះហើររបស់យើងជិត ១០០ភាគរយនោះទេ”។

យោងតាមសេចក្តីប្រកាសរបស់សមាគម BALPA អ្នកបើកយន្តហោះក្រុមហ៊ុន BA បានបោះឆ្នោតដើម្បីធ្វើបាតុកម្មកាលពីខែ កក្កដា ជាមួយនឹងការរាប់សន្លឹកឆ្នោតចំនួន ៩៣ ភាគរយក្នុងការគាំទ្រសកម្មភាពនេះ។

លោក Brian Strutton អគ្គលេខាធិការសមាគមខាងលើ មានប្រសាសន៍ថា “យើងមិនចង់មានភាពរអាក់រអួលដល់អតិថិជនរបស់យើងដែលជាមូលហេតុដែលយើងបានព្យាយាមដោះស្រាយបញ្ហានេះតាមរយៈការចរចារដែលចាប់ផ្តើមពីខែ វិច្ឆិកា ឆ្នាំមុន តែក្រុមហ៊ុន BA ជាអ្នកអូសបន្លាយមកដល់ពេលនេះ”។

អ្នកបើកយន្តហោះក្រុមហ៊ុន BA បានចោទប្រកាន់រដ្ឋបាលក្រុមហ៊ុន BA ពីកលល្បិចសម្លុត និងចរចាប្រាក់ឈ្នួលអយុត្តិធម៌។

ការចេញផ្សាយដោយសមាគមកាលពីថ្ងៃអាទិត្យ បានឱ្យដឹងថា “អ្នកបើកយន្តហោះដែលកាត់បន្ថយការប្រាក់ខែក្នុងប៉ុន្មានឆ្នាំបន្ទាប់ពីវិបត្តិហិរញ្ញវត្ថុដើម្បីជួយក្រុមហ៊ុន បាននិយាយថា អ្នកគ្រប់គ្រងបានខកខានពេលវេលាម្តង ហើយម្តងទៀតដើម្បីស្តាប់បុគ្គលិករបស់ពួកគេ ហើយហាក់ដូចជាបានកំណត់ឱ្យអ្នកបើកបរយន្តហោះធ្វើកូដកម្ម”។

សមាគមនេះបានស្តីបន្ទោសទៅលើរដ្ឋបាលដែលពួកគេជឿថាបានផ្តល់ប្រាក់ឈ្នួលអយុត្តិធម៌ ហើយមិនចរចាដោយស្មោះត្រង់។

លោក Strutton មានប្រសាសន៍ថា “មេដឹកនាំក្រុមហ៊ុនដែលខ្លួនគេទទួលបានប្រាក់ខែច្រើន ហើយមានកញ្ចប់អត្ថប្រយោជន៍ជាច្រើននឹងមិនព្រមស្តាប់ទេ ហើយកំពុងបដិសេធក្នុងការចរចា និងដាក់ប្រាក់ចំណេញមុនតម្រូវការអ្នកដំណើរ និងបុគ្គលិក”៕

អាសន្ន៖ ផ្ទះជិតមួយលានខ្នងគ្មានថាមពលអគ្គិសនីប្រើ ដោយសារព្យុះទីហ្វុងវាយប្រហារប្រទេសជប៉ុន

September 9, 2019

0

ដោយ Donald Lee

តូក្យូ៖ ព្យុះឈ្មោះ Faxai បានបោកបក់ចូលក្រុងតូក្យូនៅថ្ងៃច័ន្ទនេះ បណ្តាលឱ្យដាច់ចរន្តអគ្គិសនី និងប៉ះពាល់ដល់លំនៅដ្ឋានជិតមួយលានខ្នង បិទទ្វារកន្លែងដឹកជញ្ជូនសាធារណៈស្ទើរតែទាំងអស់ និងផ្អាកប្រតិបត្តិការនៅតាមរោងចក្រធំៗជុំវិញទីក្រុង។

ទូរទស្សន៍ NHK ដែលជាទូរទស្សន៍ជាតិរបស់ជប៉ុនបានប្រកាសថា ព្យុះ Faxai គឺជាព្យុះខ្លាំងបំផុតដែលវាយប្រហារទីក្រុងនេះដែលមិនធ្លាប់មានក្នុងរយៈពេល ១០ ឆ្នាំ។ ព្យុះបានបោកបក់ចូលទីក្រុងតូក្យូនៅព្រឹកព្រលឹមថ្ងៃច័ន្ទ ហើយបន្ទាប់មកបានរសាត់ទៅសមុទ្រវិញ។

យោងតាម NHK ផ្ទះជិតមួយលានខ្នងត្រូវបានទុកចោលដោយគ្មានថាមពល ហើយជើងហោះហើរ ១៦០ ជើងត្រូវបានលុបចោល។រោងចក្រផលិតកម្មក៏ត្រូវបានបិទទ្វារផងដែរនៅថ្ងៃ ច័ន្ទនេះ។

រោងចក្រ Nissan ចំនួន ២ និងរោងចក្រ Sony PlayStation ត្រូវបានបង្ខំឲ្យផ្អាកផលិតកម្មដោយសារការដាច់ចរន្តអគ្គិសនី៕

រដ្ឋាភិបាលគ្រោងទិញថាមពលអគ្គិសនីពីប្រទេសឡាវ ចំនួន ២៤០០ មេហ្កាវ៉ាត់

September 9, 2019

0

ដោយ វុត្ថា

ភ្នំពេញ៖ គណៈរដ្ឋមន្ត្រី នឹងចាប់ផ្តើមប្រជុំពិភាក្សាលើគម្រោងទិញថាមពលអគ្គិសនីផលិតដោយធ្យូងថ្ម ២៤០០ មេហ្កាវ៉ាត់ពីប្រទេសឡាវនៅថ្ងៃទី១១ ខែកញ្ញា ឆ្នាំ២០១៩នេះ ក្រោមអធិបតីភាពរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនសកម្ពុជា។

លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាប បានឱ្យដឹងនៅថ្ងៃទី ៩ ខែកញ្ញា ឆ្នាំ ២០១៩ នេះថា ក្រៅពីពិភាក្សាទិញថាមពលអគ្គិសនីផលិតដោយធ្យូងថ្ម ២៤០០ មេហ្កាវ៉ាត់ពីប្រទេសឡាវ គណៈរដ្ឋមន្ត្រី ក៏នឹងពិភាក្សា និងឆ្លងលើរបៀបវារៈដូចជាសំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តយល់ព្រមពីស្ថាប័ននីតិប្បញ្ញត្តិលើ៖ កិច្ចព្រមព្រៀងអាស៊ានស្តីពីពាណិជ្ជកម្មតាមប្រព័ន្ធអេឡិចត្រូនិក និង កិច្ចព្រមព្រៀងស្តីពីការបង្កើតក្របខណ្ឌសម្ព័ន្ធភាពថាមពលព្រះអាទិត្យអន្តរជាតិផងដែរ ។

រដ្ឋមន្ត្រីក្រសួងពាណិជ្ជកម្ម ប៉ាន សូរស័ក្តិ កាលពីកន្លងទៅថ្មីៗនេះ បានស្នើប្រទេសឡាវ ជួយសម្របសម្រួល និងពន្លឿនការបញ្ជូនអគ្គិសនីមកកាន់ប្រទេសកម្ពុជា ដោយអនុលោមតាមកិច្ចព្រមព្រៀងទិញ-លក់អគ្គីសនី ដែលរដ្ឋាភិបាលនៃប្រទេសទាំងពីរបានចុះហត្ថលេខា កាលពីកំឡុងខែមីនា ឆ្នាំ២០១៩ ដើម្បីធានាស្ថិរភាពការប្រើប្រាស់វិស័យថាមពល នៅក្នុងប្រទេសកម្ពុជា។

លោកបន្តថា ប្រទេសឡាវ បានឯកភាពជួយបំពេញតម្រូវការប្រើប្រាស់ថាមពលអគ្គីសនីនៅក្នុងប្រទេស ខណៈដែលកម្ពុជាកំពុងសម្រុកសាងសង់រោងចក្រអគ្គិសនី ដើរដោយធ្យូងថ្ម ៧០០មេហ្កាវ៉ាត់ នៅខេត្តព្រះសីហនុ និងរោងចក្រដើរដោយពន្លឺព្រះអាទិត្យ ២៤០មេហ្កាវ៉ាត់ នៅខេត្តកំពង់ស្ពឺ កំពង់ឆ្នាំង និងពោធិ៍សាត់ ដើម្បីដាក់ឱ្យដំណើរការជាបន្តបន្ទាប់នៅក្នុងឆ្នាំនេះ និងឆ្នាំក្រោយ។

លោករដ្ឋមន្ត្រីបញ្ជាក់ទៀតថា ក្រៅពីគម្រោងខាងលើ កម្ពុជាក៏បានទិញម៉ាស៊ីនភ្លើងធំៗចំនួនពីរ ពីប្រទេសហ្វាំងឡង់ និងអាល្លឺម៉ង់ ដើម្បីបង្ការមិនឱ្យមានបញ្ហាកង្វះអគ្គិសនីកើតឡើងឆ្នាំក្រោយ ហើយនៅថ្ងៃអនាគត បើសិនជាយើងមានថាមពលប្រើប្រាស់គ្រប់គ្រាន់ លើសពីតម្រូវការ យើងនឹងលក់ថាមពលអគ្គិសនី ដែលសល់ពីការប្រើប្រាស់ក្នុងស្រុក ទៅកាន់ប្រទេសសមាជិកអាស៊ានផងដែរ៕

សណ្ឋាគារទំនើបតម្លៃ ៥លានដុល្លារបើកសម្ភោធជាលើកដំបូងនៅខេត្តកំពង់ធំ

September 9, 2019

0

ដោយ នៅ ស៊ីវុត្ថា

ភ្នំពេញៈ សណ្ឋាគារប្រណីតមួយតម្លៃ៥លានដុល្លារ បានបើកសម្ភោធជាលើកដំបូងក្នុងទីក្រុងស្ទឹងសែន នៅខេត្តកំពង់ធំ ដែលមានការចូលរួមជាអធិបតីពីលោកបណ្ឌិតថោង ខុនរដ្ឋមន្រ្តីក្រសួងទេសចរណ៍។

សណ្ឋាគានេះបានដំណើរការសាងសង់រយៈពេល៥ឆ្នាំ រហូតលេចចេញជារូបរាងនាថ្ងៃនេះ ដែលនេះជាផលិតផលទេសចរណ៍ និងសមិទ្ធផលថ្មីមួយទៀតនៃវិស័យទេសចរណ៍សម្រាប់ខេត្តកំពង់ធំ ហើយដែលនឹងជួយលើកកម្ពស់គុណភាពផលិតផល និងសេវាកម្មស្នាក់នៅ ម្ហូបអាហារ កីឡា និងសុខភាពនៅខេត្តកំពង់ធំ និងជាការតភ្ជាប់កញ្ចប់ខ្សែទស្សនកិច្ចជាមួយប្រាសាទសំបូរព្រៃគុក និងតំបន់គោលដៅទេសចរណ៍ផ្សេងៗទៀតរបស់ខត្តកំពង់ធំ។

សណ្ឋាគារនេះមាន៨៧បន្ទប់ មានបុគ្គលិកបម្រើការ៧៩នាក់ ជាជនជាតិខ្មែរទាំងអស់ មានបន្ទប់ប្រជុំ៣ មានសេវាកម្មម្ហូបអាហារបែបខ្មែរ ចិន អឺរ៉ុប ជប៉ុន មានក្លឹបហាត់ប្រាណ អាងហែលទឹក កន្លែងស្ទីម សោណា ម៉ាស្សា មាន Sky Bar នៅជាន់ខាងលើ និងប្រើប្រាស់ផលិតផលក្នុងស្រុក។ ជាងនេះទៀត សណ្ឋាគារនេះបាននិងកំពុងស្នើសុំចំណាត់ថ្នាក់ផ្កាយបួនពីក្រសួងទេសចរណ៍។

លោកថោង ខុន រដ្ឋមន្ត្រីក្រសួងទេសចរណ៍នៅក្នុងពិធីសម្ពោធជាផ្លូវការសណ្ឋាគារកំពង់ធំរ៉ូយ៉ាល់ នាថ្ងៃទី៩ ខែកញ្ញា ឆ្នាំ ២០១៩ នេះ បានអបអរសាទរសមិទ្ធផលថ្មីដ៏អស្ចារ្យនេះ និងបានផ្តល់អនុសាសន៍ និងសំណូមពរ៣ចំនុច ដូចជាទី១ សូមស្នើអោយម្ចាស់ និងអ្នកគ្រប់គ្រងសណ្ឋាគារ យកចិត្តទុកដាក់ជាសំខាន់ចំពោះគុណភាពសេវាកម្ម និងគុណវុឌ្ឍរបស់បុគ្គលិក។ រាល់សេវាកម្មដែលផ្តល់ជូនភ្ញៀវទេសចរ ត្រូវតែជាសេវាកម្មដែលមានគុណភាពស្របតាមបទដ្ឋាន និងការណែនាំរបស់ក្រសួងទេសចរណ៍ និងសូមយកចិត្តទុកដាក់ចំពោះការបណ្តុះបណ្តាលជំនាញ ដល់បុគ្គលិកគ្រប់ថ្នាក់ ទាំងHard Skill និង Soft Skill។

ទន្ទឹមនឹងនេះ មន្ទីរទេសចរណ៍ខេត្តកំពង់ធំ ត្រូវបង្កលក្ខណៈឱ្យដល់គ្រប់បុគ្គលិកទាំងអស់ក្នុងវិស័យទេសចរណ៍ ចូលរួមវគ្គបណ្តុះបណ្តាលឡើងវិញ (refreshment) ឱ្យបានទៀងទាត់ និងជាប់ជាប្រចាំ។

ទី២ស្នើដល់រដ្ឋបាលខេត្តកំពង់ធំពន្លឿន ការងារអភិវឌ្ឍគោលដៅទេសចរណ៍ដែលមានសក្តានុពល ដូចជា ហេដ្ឋារចនាសម្ព័ន្ធ ពង្រឹងយន្តការគ្រប់គ្រង សណ្តាប់ធ្នាប់។ និងស្នើឱ្យមន្ទីរទេសចរណ៍ដែលជាសេនាធិការជំនាញ ផ្តល់ការបណ្តុះបណ្តាលឱ្យបានជាប្រចាំដល់មូលដ្ឋាន អាជីវកម្មទេសចរណ៍នៅក្នុងគោលដៅទាំងនោះ។ នៅពេលដែលយើងមានគោលដៅទេសចរណ៍ច្រើនក្នុងខេត្ត ភ្ញៀវទេសចរនឹងស្នាក់នៅកាន់តែយូរនៅក្នុងខេត្ត (រយៈពេលនៃ ការស្នាក់នៅនឹងអាចកើនពី១យប់ ទៅ២យប់ឬ៣យប់) ពេលនោះតម្រូវការបន្ទប់ស្នាក់នៅ នឹងកើនឡើងដល់១៣០០បន្ទប់ ដើម្បីឆ្លើយតបទៅនឹងកំណើនទេសចរណ៍។

ទី៣ ស្នើដល់ម្ចាស់ និងអ្នកគ្រប់គ្រងសណ្ឋាគារកំពង់ធំរ៉ូយ៉ាល់ ចូលរួមគាំទ្រដល់ផលិតផលក្នុងស្រុក ពិសេស គឺផលិតផលសហគមន៍ក្នុងខេត្តកំពងធំតែម្តង ទាំងការប្រើប្រាស់សម្រាប់គោលបំណងតុបតែងលម្អ ការផ្គត់ផ្គង់សម្ភារៈក្នុងបន្ទប់ស្នាក់នៅ និងភោជនីយដ្ឋាន៕

ពោធិ៍សែនជ័យជាប់កំណត់ត្រាជាខណ្ឌដែលផ្គត់ផ្គង់លំនៅដ្ឋានច្រើនជាងគេនៅក្នុងរាជធានីភ្នំពេញ

September 9, 2019

0

ដោយ៖ រ៉ាណេត

ភ្នំពេញៈ នៅក្នុងចំណោមខណ្ឌទាំង១៤ ក្នុងរាជធានីភ្នំពេញ ពោធិ៍សែនជ័យ បានជាប់នៅក្នុងកំណត់ត្រាជាខណ្ឌ ដែលមានការផ្គត់ផ្គង់ចំនួនលំនៅដ្ឋានគ្រប់ប្រភេទច្រើនជាងគេ និងមានកំណើនជាប្រចាំឆ្នាំប្រមាណ៦ភាគរយក្នុងមួយឆ្នាំ ជាមួយនឹងការព្យាករណ៍ថា រហូតដល់ឆ្នាំ២០៣០ការផ្គត់ផ្គង់លំនៅដ្ឋាននៅ ក្នុងខណ្ឌមួយនេះនឹងកើនឡើងប្រមាណ
៧៧,០០០ខ្នង។

យោងតាមរបាយការណ៍ ដែលសិក្សាដោយក្រុមហ៊ុនវាយតម្លៃអចលនទ្រព្យ V-Trust កាលពីពេលថ្មីៗនេះបានបង្ហាញថា នៅក្នុងរាជធានីភ្នំពេញមានខណ្ឌចំនួន១៤ ប៉ុន្តែចំពោះខណ្ឌ ដែលមានសកម្មភាពយ៉ាងសកម្ម នៅក្នុងការអភិវឌ្ឍវិស័យលំនៅដ្ឋានមានត្រឹមតែចំនួន៧ខណ្ឌតែប៉ុណ្ណោះ រួមមាន ខណ្ឌោធិ៍សែនជ័យ ខណ្ឌដង្កោ ខណ្ឌជ្រោយចង្វារ ខណ្ឌឫស្សីកែវ ខណ្ឌសែនសុខ ខណ្ឌច្បារអំពៅ និងខណ្ឌមានជ័យ។

នៅក្នុងរបាយការណ៍ដដែលនេះបានឱ្យដឹងទៀតថា ខណ្ឌទាំង៧នេះនៅតែបន្តកំណើនកើនឡើងនូវចំនួនផ្គត់ផ្គង់លំនៅដ្ឋាន រហូតដល់១០ឆ្នាំទៅមុខទៀត ខណៈដែលតម្រូវការនៅមានភាពទូលំទូលាយច្រើន។ នៅក្នុងនោះខណ្ឌពោធិ៍សែនជ័យ ខណ្ឌដង្កោ ខណ្ឌជ្រោយចង្វារ នឹងមានកំណើនប្រមាណ៤ដងនៅឆ្នាំ២០៣០ បើធៀបនឹងចំនួនពេលបច្ចុប្បន្ន ហើយខណ្ឌឫស្សីកែវ ខណ្ឌសែនសុខ ខណ្ឌច្បារអំពៅ នឹងមានកំណើន៣ដង ដោយឡែកចំពោះខណ្ឌមានជ័យ នឹងមានកំណើនត្រឹមតែ២ដងតែប៉ុណ្ណោះ។

អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានទទួលស្គាល់ទៅនឹងការសិក្សាខាងលើ ដោយលោកបានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៩ ខែកញ្ញា ឆ្នាំ២០១៩នេះថា ការកើនឡើងនូវចំនួនលំនៅដ្ឋានគឺនៅក្នុងចំណោមខណ្ឌ ដែលស្ថិតនៅវាអាស្រ័យទៅនឹងតម្រូវការ និងការផ្គត់ផ្គង់ ដោយឡែកចំពោះខណ្ឌពោធិ៍សែនជ័យ ដែលស្ថិតនៅតំបន់ជាយក្រុងគឺនៅមានតម្លៃធូថ្លៃនៅឡើយ និងមានភាពទូលាយច្រើន ដែលអនុគ្រោះដល់ការអភិវឌ្ឍលំនៅដ្ឋានកម្រិតមធ្យម។

លោកឧកញ៉ាបានបន្តទៀតថា “ភាគច្រើនលំនៅដ្ឋានដែលត្រូវបានអភិវឌ្ឍនៅក្នុងខណ្ឌមួយនេះជាមិនប្រភេទលំនៅដ្ឋានកម្រិតមធ្យម និងក្រោមមធ្យម ប៉ុន្តែហាក់មិនសូវអនុគ្រោះដល់វិស័យពាណិជ្ជកម្មខ្នាតមធ្យម ដូចជា ខណ្ឌសែនសុខនោះទេ”។

លោកបានបន្តទៀតថា “នៅក្នុងពេលដ៏ខ្លីខាងមុខនេះ ស្ទើតែគ្រប់បណ្តាខណ្ឌទាំងអស់ដែលចំណុះឱ្យរាជធានីភ្នំពេញ នឹងមានភាពល្អប្រសើរ និងរីកចម្រើនដូចគ្នា ដោយសារតែបច្ចុប្បន្ននេះរាជរដ្ឋាភិបាលកម្ពុជា បានពង្រីកនិងពង្រឹងការអភិវឌ្ឍយ៉ាងទូលំទូលាយ ដូចជាហេដ្ឋារច នាសម្ព័ន្ធផ្លូវថ្នល់ បណ្តាញអគ្គិសនី ប្រព័ន្ធទឹកស្អាត រួមជាមួយនឹងការបង្កើតតំបន់កម្សា ន្តសាធារណៈស្ទើរគ្រប់កន្លែងទាំងអស់”។

នៅក្នុងរបាយការណ៍បានបញ្ជាក់ថា ចំនួនលំនៅដ្ឋានដែលបានសាងសង់រួចរាល់ត្រឹមឆ្នាំ២០១៨ ខណ្ឌពោធិ៍សែនជ័យមានចំនួន៤៥,០០០ខ្នង ស្មើនឹងកំណើន៦ភាគរយក្នុងមួយឆ្នាំ ខណ្ឌសែនសុខមានចំនួន២៣០០០ខ្នង ស្មើនឹងកំនើន១០ភាគរយក្នុងមួយឆ្នាំ ខណ្ឌដង្កោមានចំនួន ២១០០០ខ្នង ស្មើនឹងកំនើន១២ភាគរយ ខណ្ឌច្បារអំពៅមានចំនួន ១៤៥០០ខ្នង ស្មើនឹងកំនើន១០ភាគរយ ខណ្ឌមានជ័យមានចំនួន១២០០០ខ្នងស្មើនឹងកំនើន៩ភាគរយ និងខណ្ឌជ្រោយចង្វារមានចំនួន ៦៥០០ខ្នង ស្មើនឹងកំនើន១២ភាគរយក្នុងមួយឆ្នាំ៕

វៀតណាមនឹងសង់ផ្លូវល្បឿនលឿនតម្លៃ ១,៣ ពាន់លានដុល្លារភ្ជាប់ជាមួយកម្ពុជាដើម្បីតភ្ជាប់បណ្តាញភ័ស្តុភារកម្ម

September 9, 2019

0

ដោយ Donald Lee

វៀតណាមៈ រដ្ឋាភិបាលប្រទេសវៀតណាម បានប្រកាសផែនការសាងសង់គម្រោងផ្លូវល្បឿនលឿនតម្លៃ ១,៣ពាន់លានដុល្លារ នៅតំបន់ដីសណ្ដមេគង្គដែលនឹងភ្ជាប់បណ្តាញផ្លូវធំៗជាមួយកម្ពុជាដូចជាផ្លូវជាតិលេខ២។

គម្រោងដ៏ធំនេះ នឹងត្រូវអភិវឌ្ឍដោយក្រុមហ៊ុនសាជីវកម្ម Cuu Long របស់រដ្ឋាភិបាលវៀតណាម សម្រាប់ការអភិវឌ្ឍការវិនិយោគ និងការគ្រប់គ្រងគម្រោងហេដ្ឋារចនាសម្ព័ន្ធ។ វានឹងភ្ជាប់តំបន់ចូវដុកទៅទីក្រុង Soc Trang ព្រំដែនវៀតណាម-កម្ពុជាដែលមានផ្នែកខ្លះស្របទៅនឹងទន្លេបាសាក់ និងតាមបណ្តោយផ្លូវជាតិលេខ៩១របស់វៀតណាម។

ដំណាក់កាលដំបូងនៃគម្រោងប្រវែង១៥៥ គីឡូម៉ែត្រនឹងចាប់ផ្តើមសាងសង់នៅឆ្នាំ ២០២៣ ហើយរំពឹងថានឹងបញ្ចប់ក្នុងរយៈពេល៣ឆ្នាំ។ ផ្លូវល្បឿនលឿននេះនឹងមានល្បឿនកំណត់១២០ គីឡូម៉ែត្រក្នុងមួយម៉ោង។

គម្រោងដ៏ធំនេះ នឹងធ្វើឱ្យប្រសើរឡើងនូវទំនាក់ទំនងដឹកជញ្ចូនជាមួយកម្ពុជា និងភ្ជាប់ទៅនឹងផ្លូវធំៗរបស់កម្ពុជាដូចជាផ្លូវជាតិលេខ២។

គម្រោងនេះ នឹងរួមបញ្ចូលការសាងសង់ស្ពានចំនួន១៣០ និងផ្លូវប្រសព្វចំនួន៥០ ដែលនឹងតភ្ជាប់ទៅផ្លូវធំៗ នៅតំបន់ដីសណ្ដមេគង្គ៕

ក្រុមអ្នកតវ៉ាហុងកុងស្នើសុំអាមេរិកជួយទប់ទល់នឹងទីក្រុងប៉េកាំង ខណៈចិនព្រមានថានឹងបំបែករាល់ចលនាអបគមន៍

September 9, 2019

0

ដោយ Donald Lee

ហុងកុង៖ ទីក្រុងហុងកុងបានធ្លាក់ចូលទៅក្នុងភាពវឹកវរម្តងទៀត បន្ទាប់ពីការតវ៉ាដ៏ហិង្សាមួយកាលពីចុងសប្តាហ៍ ដែលធ្វើឱ្យមើលទៅដូចជាតំបន់សង្គ្រាម ខណៈរដ្ឋាភិបាលទីក្រុងប៉េកាំងបានគំរាមបំបែកសកម្មណាមួយ ដែលកំពុងរំខានដល់ការបំបែកខ្លួនពីចិន។

ហ្គាសបង្ហូរទឹកភ្នែកពីប៉ូលីស និងភ្លើងឆេះនៅតាមដងផ្លូវដោយបាតុករបានធ្វើបាតុកម្ម បានផ្ទុះឡើងនៅចុងសប្តាហ៍ នៃការប៉ះទង្គិចគ្នាដោយហិង្សារវាងប៉ូលីស និងក្រុមបាតុករហុងកុង។

ភាពវឹកវរបានផ្ទុះឡើងភ្លាមៗ បន្ទាប់ពីក្រុមអ្នកតវ៉ាបានដង្ហែក្បួនទៅកាន់ស្ថានកុងស៊ុលអាមេរិក ដោយស្រែកពាក្យស្លោកដែលគាំទ្រលទ្ធិប្រជាធិបតេយ្យថា តស៊ូដើម្បីសេរីភាព ក្រោកឈរជាមួយហុងកុង និងទបទល់ជាមួយនឹងទីក្រុងប៉េកាំង ដោះលែងហុងកុង។

រដ្ឋាភិបាលចិន បានផ្តល់ការត្រួតពិនិត្យការខូចខាតយ៉ាងឆាប់រហ័ស តាមរយៈអង្គភាពសារព័ត៌មានរដ្ឋរបស់ខ្លួនគឺកាសែតចិន Chinese Daily ។

វិចារណកថាមួយនៅថ្ងៃ ច័ន្ទបានឱ្យដឹងថា អំពើហឹង្សានៅចុងសប្តាហ៍ ជាលទ្ធផលនៃកម្លាំងខាងក្រៅរៀបចំនយោបាយនៅក្នុងទឹកដី ហើយថា ចលនាណាមួយដើម្បីលើកកម្ពស់ការធ្វើអបគមន៍នឹងត្រូវកំទេច។

វិចារណកថារបស់កាសែតចិនបានសរសេរថា “ហុងកុងគឺជាផ្នែកមួយមិនអាចកាត់ផ្តាច់បានពីចិនទេ ហើយនោះគឺជាបន្ទាត់សំខាន់ ដែលគ្មាននរណាម្នាក់គួរប្រឈម មិនមែនក្រុមបាតុករ មិនមែនកងកំលាំងបរទេសដែលលេងល្បែងកខ្វក់របស់ពួកគេឡើយ”៕

តើប្លុកសេដ្ឋកិច្ចថ្មីដែលមានតម្លៃ ១០,៣ ទ្រីលានដុល្លារនឹងជួយលើកកំពស់សេដ្ឋកិច្ចសាកលយ៉ាងដូចម្តេច?

September 9, 2019

0

ដោយ ម៉ាណេត

បាងកកៈ ងាកចេញពីសហរដ្ឋអាមេរិក ប្រទេសចិនបាននិងកំពុងចាប់ដៃជាមួយអាស៊ាន និងបណ្តាប្រទេសចំនួន៦ទៀត ដើម្បីបង្កើតប្លុកសេដ្ឋកិច្ចថ្មីមួយនៅក្នុងពិភពលោក ដែលមានទំហំពាណិជ្ជកម្មតម្លៃ ១០,៣ទ្រីលានដុល្លារ ជាគោលនយោបាយកាត់បន្ថយការពឹងផ្អែកសហរដ្ឋអាមេរិក។

រដ្ឋមន្រ្តីក្រសួងពាណិជ្ជកម្ម និងពាណិជ្ជកម្មមកពីប្រទេសជាសមាជិកអាស៊ានទាំង ១០ និងដៃគូពាណិជ្ជកម្មចំនួន៦ បានអះអាងពីការប្តេជ្ញាចិត្តរបស់ខ្លួនក្នុងការពន្លឿនការបញ្ចប់ការចរចាភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នៅចុងឆ្នាំនេះ។

លោក Jurin Laksanawisit ឧបនាយករដ្ឋមន្រ្តី និងជារដ្ឋមន្រ្តីក្រសួងពាណិជ្ជកម្មបានប្រាប់កាសែតបាងកកប៉ុស្តិ៍ថា រដ្ឋមន្រ្តីមកពី១៦ ប្រទេសបានឯកភាពលើកិច្ចពិភាក្សាដែលគួរតែត្រូវបានបញ្ចប់ក្នុងពេលឆាប់ៗនេះ ហើយលទ្ធផលនៃការចរចាដែលបានប្រកាសនៅក្នុងកិច្ចប្រជុំកំពូលអាស៊ានដែលនឹងប្រព្រឹត្តទៅនៅខែ វិច្ឆិកា។

លោក Jurin បានប្រាប់សន្និសីទសារព័ត៌មាននៅថ្ងៃច័ន្ទ បន្ទាប់ពីការធ្វើជាប្រធាននៃកិច្ចប្រជុំថ្នាក់រដ្ឋមន្រ្តី RCEP លើកទី៧នៅទីក្រុងបាងកកថា ការចុះហត្ថលេខាលើកិច្ចព្រមព្រៀង RCEP ត្រូវបានរំពឹងថានឹងធ្វើឡើងនៅឆ្នាំ២០២០។លោក Jurin ឱ្យដឹងថា គណៈកម្មាធិការចរចាពាណិជ្ជកម្ម (RCEP-TNC) នឹងតាមដានការជជែកនៅឯកិច្ចប្រជុំនៅដាណាង ប្រទេសវៀតណាមនៅថ្ងៃទី១៩-២៧ ខែកញ្ញា។

លោកបានមានប្រសាសន៍ថា “បណ្តាប្រទេសអាស៊ាន និងដៃគូសន្ទនារបស់ពួកគេបានឯកភាពគ្នាថា មានភាពបត់បែននៅក្នុងវិស័យផ្សេងៗគ្នា រួមមានការចូលទៅកាន់ទីផ្សារសេវាកម្ម និងការវិនិយោគ ដូច្នេះកិច្ចពិភាក្សាអាចត្រូវបានបញ្ចប់”។

លោកបានបន្ថែមថា “ដោយមើលឃើញពីស្ថានភាពពាណិជ្ជកម្មសកល និងភាពមិនប្រាកដប្រជានៅពេលបង្កើតឡើងរួច កិច្ចព្រមព្រៀង RCEP នឹងជម្រុញពាណិជ្ជកម្ម និងការវិនិយោគ និងជំរុញការអភិវឌ្ឍសេដ្ឋកិច្ចប្រកបដោយចីរភាព សម្រាប់ប្រទេសទាំង ១៦”។

នៅពេលត្រូវបានសួរអំពីការពិភាក្សាបន្តនៅដាណាង លោក Jurin បានឆ្លើយថា អ្នកចរចាត្រូវបានជូនដំណឹងថា រដ្ឋាភិបាលចង់អោយការចរចាបញ្ចប់។ លោកបាននិយាយថា “ដូច្នេះ ពួកគេនឹងត្រូវបានជម្រុញឱ្យមានភាពបត់បែន”។

កាលពីថ្ងៃសុក្រសប្តាហ៍មុន លោកនាយករដ្ឋមន្រ្តី Prayut Chan-o-cha ក៏បាននិយាយផងដែរថា អាស៊ាន និងដៃគូសន្ទនារបស់ខ្លួនគួរតែបញ្ចប់កិច្ចចរចាស្តីពី RCEP ដែលរយៈពេលយូរនៅខែ វិច្ឆិកានេះ។

គំនិតផ្តួចផ្តើម RCEP ត្រូវបានបង្កើតឡើងក្នុងខែ វិច្ឆិកា ឆ្នាំ២០១២ ក្នុងគោលបំណងបង្កើតកិច្ចសហប្រតិបត្តិការសេដ្ឋកិច្ចស៊ីជម្រៅ ក្នុងចំណោមប្រទេសអាស៊ានទាំង១០ និងដៃគូចំនួន៦របស់ខ្លួនគឺចិន ជប៉ុន កូរ៉េខាងត្បូង អូស្ត្រាលី ឥណ្ឌា និងញូវហ្សេឡែន។

;បច្ចុប្បន្ននេះអ្នកចរចាមកពីប្រទេស ដែលចូលរួមទាំងអស់បានបញ្ចប់ការពិភាក្សាលើមាត្រាចំនួន៧ ពីមាត្រា២០ ដែលរួមមានការសម្របសម្រួលគយ និងពាណិជ្ជកម្ម លទ្ធកម្មរបស់រដ្ឋ កិច្ចសហប្រតិបត្តិការសេដ្ឋកិច្ច និងបច្ចេកទេស និងសហគ្រាសធុនតូចនិងមធ្យម។

មាត្រា១៣ ដែលនៅសល់ទាក់ទងនឹងបញ្ហាជាច្រើន ពីពាណិជ្ជកម្មតាមអេឡិចត្រូនិចរហូតដល់ការប្រកួតប្រជែង សិទ្ធិកម្មសិទ្ធិបញ្ញា ទូរគមនាគមន៍ និងការពង្រីកទីផ្សារសម្រាប់ទំនិញសេវាកម្ម និងការវិនិយោគ។

ការចរចាបានអូសបន្លាយអស់រយៈពេលជិត៧ឆ្នាំ តាមរយៈកិច្ចពិភាក្សាជាច្រើនជុំ។ កិច្ចពិភាក្សានេះត្រូវបានរារាំង ដោយកង្វះកិច្ចព្រមព្រៀងពាណិជ្ជកម្មសេរីរវាងដៃគូមួយចំនួនដូចជាចិន-ជប៉ុន ឥណ្ឌា-ចិន និងឥណ្ឌា-អូស្ត្រាលី-ញូរហ្សេលឡែន។

នៅពេលដែល RCEP ត្រូវបានបញ្ចប់ប្រទេសទាំង១៦ នឹងបង្កើតជាប្លុកពាណិជ្ជកម្មក្នុងតំបន់ដ៏ធំមួយ ដែលមានប្រជាជនប្រមាណ៣.៥៦ពាន់លាននាក់ ហើយស្មើនឹងប្រមាណ១ ភាគ៣នៃផលិតផលក្នុងស្រុកសរុបរបស់ពិភពលោក។

ទំហំពាណិជ្ជកម្មរួមគ្នារវាងប្រទេសហត្ថលេខី នឹងលើសពី១០,៣ ទ្រីលានដុល្លារអាមេរិក ស្មើនឹង២៩ភាគរយនៃពាណិជ្ជកម្មពិភពលោក។

ជាមួយគ្នានេះដែរ លោកស្រី Oramon Sapthaweetham អគ្គនាយកនៃនាយកដ្ឋានចរចាពាណិជ្ជកម្មថៃបាននិយាយថា កិច្ចប្រជុំលើកទី៥១ នៃរដ្ឋមន្រ្តីសេដ្ឋកិច្ចអាស៊ាន (AEM) បានទទួលស្គាល់បញ្ហាចំនួន៤ដែលត្រូវបានជំរុញទៅមុខ រួមទាំងការជំរុញសម្រាប់ការពង្រីកពាណិជ្ជកម្ម នៅក្នុងតំបន់អាស៊ានដល់ ១,១៨ទ្រីលានដុល្លារនៅឆ្នាំ២០២៥ ក្រោមបដិវត្តឧស្សាហកម្មទី៤។

លោកស្រីបាននិយាយថា កិច្ចប្រជុំនេះក៏បានតាមដានលើបញ្ហាសេដ្ឋកិច្ចចំនួន ១៣ ដែលស្នើឡើងដោយប្រទេសថៃក្នុងនាមជាប្រធានអាស៊ាន និងគ្រប់គ្រងដើម្បីឈានដល់កិច្ចព្រមព្រៀងលើបញ្ហាចំនួន៧។

លោកស្រីបន្តថា បញ្ហាដែលនៅសេសសល់ រួមមានការពង្រីកប្រព័ន្ធច្រកចេញចូលតែមួយអាស៊ាន ដើម្បីបញ្ចូលប្រទេសអាស៊ានទាំង១០ និងផែនការសកម្មភាពក្រោមវេទិកាឌីជីថលនេះត្រូវបានរំពឹងថានឹងត្រូវបញ្ចប់ មុនពេលអាណត្តិរបស់ប្រទេសថៃជាប្រធានអាស៊ានបញ្ចប់។

ដោយឡែកសម្រាប់ប្រព័ន្ធច្រកចេញចូលតែមួយអាស៊ាន ឥឡូវនេះប្រទេសប្រ៊ុយណេ និងកម្ពុជាបានភ្ជាប់ទៅនឹងប្រព័ន្ធនេះ ដែលធ្វើឱ្យចំនួនសមាជិកអាស៊ានសរុបផ្លាស់ប្តូរវិញ្ញាបនប័ត្រប្រភពដើមឌីអេឡិចត្រូនិចដល់ទៅ៧ប្រទេស។

ប្រទេសមីយ៉ាន់ម៉ា ឡាវ និងហ្វីលីពីនត្រូវរំពឹងថានឹងចូលរួមនៅចុងឆ្នាំនេះ៕