ដោយ ៖ រ៉ាណេត
ភ្នំពេញ៖ ក្រសួងរៀបចំដែនដីនគរូបនីយកម្ម និងសំណង់ បានបង្ហាញឱ្យដឹងថា គិតត្រឹមខែកក្កដាឆ្នាំ២០១៩ វិស័យសំណង់នៅកម្ពុជាទទួលបានទុនវិនិយោគជាង១ ១៧៣លានដុល្លារ ដែលធ្វើឱ្យវិស័យនេះកាន់តែខ្លំាងក្លា ដើម្បីជួយរក្សាកំណើនសេដ្ឋកិច្ចជាតិ។
នៅក្នុងរបាយការណ៍បានបង្ហាញថា នៅក្នុងរយៈពេល៧ខែឆ្នាំ២០១៩ នេះ វិស័យសំណង់នៅកម្ពុជាមានគម្រោងសរុបចំនួន ៥២៥ គម្រោងដែលគិតជាទឹកប្រាក់មានទុនវិនិយោគចំនួន ១ ១៧៣ ៧០៣ ៨៧៣ ដុល្លារ។
របាយការណ៍បូកសរុបការងារប្រចាំខែកក្កដាឆ្នាំ២០១៩ និងទិសដៅបន្តរបស់ក្រសួងដែនដីនគរូបនីយកម្ម និងសំណង់បានអះអាងថា បើធៀបនឹងរយៈពេលដូចគ្នាកាលពីខែកក្កដាឆ្នាំ២០១៨ វិស័យមានគម្រោងត្រឹមតែ ៣៣០គម្រោងប៉ុណ្ណោះ ដែលមានតម្លៃប៉ាន់ស្មានទុនវិនិយោគសរុបប្រមាណជាង ៨៤៣លានដុល្លារមានការកើនឡើងជាង ៣៩ ភាគរយ។
គម្រោងសំណង់ដែលស្ថិតក្រោមសមត្ថកិច្ចក្រសួង មានចំនួនសរុបចំនួន ៤៤ គម្រោង ដែលមានតម្លៃប៉ាន់ស្មានទុនវិនិយោគប្រមាណជាង ១០៤៤ លានដុល្លារ ខណៈកាលពីឆ្នាំ២០១៨មានចំនួនតែ ៤១គម្រោង ដែលមានទុនវិនិយោគប្រមាណជាង ៨០៦ លានដុល្លារ គឺមានការកើនឡើងជាង ២៩ភាគរយ។
ចំណែកគម្រោងសំណង់ស្ថិតក្រោមសមត្ថកិច្ចរដ្ឋបាលរាជធានី ខេត្តវិញ មានចំនួនសរុបចំនួន ៤៨១ គម្រោង ដែលមានតម្លៃទុនវិនិយោគប្រមាណជាង ១២៩ លានដុល្លារ ខណៈកាលពីឆ្នាំ២០១៨ មានចំនួន ២៨៩គម្រោង មានទុនវិនិយោគប្រមាណជាង ៣៦ដុល្លារ គឺមានការកើនឡើងជាង ២៥១ ភាគរយ។
របាយការណ៍ដដែលបានបង្ហាញទៀតថា សម្រាប់វិស័យសំណង់អាគារ សំណង់លំនៅដ្ឋាននៅទូទំាងប្រទេសគិតត្រឹមខែកក្កដានេះមានចំនួនសរុប៤៣៨គម្រោង ដែលមានទុនវិយោគ ជាង ៤៧៣ ដុល្លារ ស្មើនិង ៨០១ខ្នង។
ដោយឡែក គម្រោងអគាខ្ពស់ៗចាប់ពីកម្ពស់៥ជាន់ឡើងនៅទូទាំងប្រទេសក្នុងខែកក្កដា ឆ្នាំ២០១៩ មាននចំនួន ៦៩ អាគារ ក្នុងនោះកម្ពស់ចាប់ពី ៥ជាន់ ទៅដល់កម្ពស់៩ជាន់មាន ៣៤អគារ ពីកម្ពស់១០ជាន់ទៅ កម្ពស់១៩ជាន់មានចំនួន២៤អគារ ពីកម្ពស់ ៣០ជាន់ទៅ ៣៩ជាន់មានចំនួន ៧អគារពីកម្ពស់ ៤០ជាន់ឡើងទៅ មានចំនួន១អគារ។
សម្រាប់ខេត្តព្រះសីហនុ មានគម្រោងអគាខ្ពស់ៗចាប់ពីកម្ពស់៥ជាន់ឡើងទៅក្នុងខែ កក្កដាឆ្នាំ២០១៩ មានចំនួន៤៣ អគារ៕
