ក្រុមហ៊ុន Vienna Hotel ដ៏ល្បីរបស់ចិនឈានជើងចូលទីផ្សារកម្ពុជា

July 29, 2019

ដោយ ម៉ាណេត

ភ្នំពេញៈ ក្រុមហ៊ុន Vienna Hotel Co., Ltd ដែលបានបង្កើតឡើងក្នុងឆ្នាំ១៩៩៣ បានឈានជើងចូលទីផ្សារកម្ពុជានិងស្វែងរកដៃគូសហការវិនិយោគ ដើម្បីទទួលបានជោគជ័យលើទីផ្សាររួមក្នុងវិស័យបដិសណ្ឋារកិច្ចនៅកម្ពុជា។

Vienna Hotel Co, Ltd ជាសណ្ឋាគារនាំមុខគេមួយដេលមានខ្សែសង្វាក់អាជីវកម្មខ្នាតកណ្តាលរបស់ប្រទេសចិន។ ក្រុមហ៊ុនទទួលបានម៉ាកយីហោលំដាប់លេខ១ របស់សណ្ឋាគារចិនរយៈពេលប្រាំពីរឆ្នាំជាប់គ្នា (ពីឆ្នាំ ២០១៣-២០១៩ ក្នុងការអភិវឌ្ឍន៍ខ្សែសង្វាក់សណ្ឋាគារ និងរបាយការណ៍វិនិយោគទុន)។

ដោយប្រកាន់ខ្ជាប់នូវតម្លៃស្នូលនៃ “ការគេងលក់ស្កប់ស្កល់ សុខភាពដ៏អស្ចារ្យ” យើងប្តេជ្ញាផ្តល់ជូនអតិថិជន នូវផលិតផលដែលមានតម្លៃខ្ពស់ និងមានផាសុកភាពខ្ពស់ និងបទពិសោធន៍ នៃការស្នាក់នៅដ៏ល្អដែលបង្កើតបានជា “អាហារដែលមានផាសុខភាព និងមានសុខភាពល្អ មានគុណភាព ប្រណីតសុវត្ថិភាព និងការការពារបរិស្ថានសិល្បៈ តន្រ្តី ប្រព័ន្ធសុខាភិបាល និងដំណេកមានតំលៃចំនួន៦ គឺស្ថិតនៅលំដាប់ជួរមុខនៃឧស្សាហកម្មទាក់ទងនឹងគំរូនៃការគ្រប់គ្រង ភាពប៉ិនប្រសប់ ការបង្កើតយីហោ ការពង្រីក និងការអភិវឌ្ឍន៍ និងការគ្រប់គ្រងដើមទុន។

បច្ចុប្បន្ន ក្រុមហ៊ុន Vienna Hotel Co មាន៨យីហោធំៗ កិច្ចសហប្រតិបត្តិការជាយុទ្ធសាស្រ្តជាមួយយីហោធំៗទាំង៣ របស់ក្រុមហ៊ុនសណ្ឋាគារ French Louvre Hotel Group ហើយក៏កំពុងបង្កើតថ្មី និងបញ្ចូលយីហោថ្មីចំនួន៦ផងដែរ។

គិតត្រឹមខែមីនា ឆ្នាំ ២០១៩ ក្រុមហ៊ុន Vienna Hotel Limited មានវត្តមាននៅទីក្រុងចំនួន៣២៦ នៅទូទាំងប្រទេសចិន ដែលប្រតិបត្តិការអាជីវកម្មច្រើនជាង២,៥០០ កន្លែង (កំពុងសាងសង់) មានបន្ទប់ប្រភេទWan ជាង៣៣បន្ទប់ មានកំណត់ត្រាសុវត្ថិភាពនៃគ្រោះថ្នាក់ក្រោមសូន្យ ហើយឥឡូវនេះជារៀងរាល់ឆ្នាំ ដើម្បីបន្ថែមល្បឿនក្នុងការបង្កើតសាខាពី៨០០-១,០០០ និងអាចច្រើនជាងនេះ។

ការអភិវឌ្ឍជំពូកថ្មី

នៅឆ្នាំ ២០១៦ ក្រុមហុនសណ្ឋាគារ Vienna Hotel Co., Ltd បានឈានចូលដំណាក់កាលថ្មី នៃការអភិវឌ្ឍន៍ស្របតាមនិន្នាការ នៃសម្ព័ន្ធភាពឧស្សាហកម្មសណ្ឋាគារលំដាប់ពិភពលោក និងឈានដល់កិច្ចសហប្រតិបត្តិការជាយុទ្ធសាស្ត្រ ជាមួយក្រុមហ៊ុន Jinjiang International Group។

គុណសម្បត្តិគឺបំពេញបន្ថែម។ បន្ទាប់ពីកិច្ចសហប្រតិបត្តិការនេះ ចំនួនសមាជិកដែលបានចុះឈ្មោះសរុបនៃ Vienna Hotel Co., Ltd និង Jinjiang International Group មានចំនួនលើសពី ១,៦ពាន់លាន។ ក្រុមហ៊ុន Jinjiang International Group គឺជាក្រុមហ៊ុន ផ្នែកទេសចរណ៍សណ្ឋាគារដ៏ធំជាងគេបង្អស់នៅក្នុងប្រទេសចិន និងជាប់ចំណាត់ថ្នាក់ ក្នុងចំណោមក្រុមហ៊ុនសណ្ឋាគារលំដាប់ពិភពលោកទាំង៣។

ក្រុមហ៊ុនសណ្ឋាគារ Vienna Hotel Co., Ltd នឹងឈរនៅលើស្មារបស់ក្រុមហ៊ុនយក្ស និងប្រកួតប្រជែងជាមួយនឹងដៃគូប្រកួតប្រជែងជាសកល ដើម្បីដឹងពីសកលភាវូបនីយកម្មនៃយីហោសណ្ឋាគារចិនមួយជំហានម្តងៗ។

ប្រវត្តិក្រុមហ៊ុន Jin jiang Group

ក្រុមហ៊ុន Jin Jiang International (Group) Co., Ltd (ហៅកាត់ថា Jinjiang International Group) គឺជាក្រុមហ៊ុនសហគ្រាសទេសចរណ៍ដ៏ធំបំផុត នៅក្នុងប្រទេសចិន។ ក្រុមហ៊ុននេះមានដើមទុនចុះបញ្ជីចំនួន២ពាន់លានយ័ន និងមានបុគ្គលិកជាង៥ម៉ឺននាក់។

ក្រុមហ៊ុន Jinjiang International Group បានបង្កើនការបណ្តាក់ទុនរួមគ្នាយ៉ាងទូលំទូលាយ ជាមួយក្រុមសហគ្រាស ដែលមានកេរ្តិ៍ឈ្មោះល្បីៗនៅលើពិភពលោកជាង ២០ក្រុមហ៊ុន ដូចជា ក្រុមហ៊ុន Marriott ក្រុមហ៊ុន Hilton ក្រុមហ៊ុន Intercontinental ក្រុមហ៊ុន Fairmont ក្រុមហ៊ុន Accor និងសណ្ឋាគារល្បីឈ្មោះលើពិភពលោក ដូចជា ក្រុមហ៊ុនMitsui ក្រុមហ៊ុន HRG និងក្រុមហ៊ុន Les Roches ៕

អ្នកវិនិយោគឆ្លាតវៃប្រើរូបមន្តអ្វីដើម្បីឲ្យការវិនិយោគរបស់ខ្លួនបានទទួលជោគជ័យ?

July 29, 2019

0

ដោយ គង់ សូរិយា

ភ្នំពេញៈ ការវិនិយោគមិនមែនជារឿងប្រថុយប្រថាននោះទេ ព្រោះការវិនិយោគបែបប្រថុយប្រថាន ត្រូវប្រឈមនឹងហានិភ័យខ្ពស់ ប៉ុន្តែអ្នកវិនិយោគឆ្លាតវៃពួកគេតែងតែអនុវត្តន៍រូបមន្តពិសេសមួយ។

អគ្គនាយកក្រុមហ៊ុន Premium Housing Co, Ltd លោក ម៉ាន់ ចាន់ឌី បានមានប្រសាសន៍ឲ្យដឹងថា ការវិនិយោគអចលនទ្រព្យឆ្លាតវៃ ទាមទារឲ្យអ្នកវិនិយោគមានភាពអត់ធ្មត់ ដើម្បីរកបានតម្លៃអចលនទ្រព្យទាបជាងទីផ្សារ។ អចលនទ្រព្យខ្លះ ត្រូវការចំណាយពេល១ឆ្នាំ ឬច្រើនជាងនេះ ដើម្បីទិញបានតម្លៃទាប ឬនៅរក្សាតម្លៃដដែល។

លោកបន្តថា “អ្នកភូមិ អ្នកជិតខាង និងមេភូមិដែលស្ថិតនៅក្បែរទីតាំងអចលនទ្រព្យ ដែលយើងចង់ទិញ គឺជាប្រភពព៌តមានច្បាស់លាស់ជាងគេ ដើម្បីដឹងពីតម្លៃអចលនទ្រព្យនោះ និងដឹងពីម្ចាស់អចលនទ្រព្យនោះជាប់បំណុលឬយ៉ាងណា”។លោកបន្តថា “ម្ចាស់អចលនទ្រព្យតែងតែចង់បានតម្លៃថ្លៃ ហើយអ្នកទិញតែងតែចង់បានតម្លៃទាបជាងទីផ្សារ ហេតុនេះអ្នកវិនិយោគឬអ្នកទិញត្រូវការការចចារ ដើម្បីទទួលបានតម្លៃល្អ”។

លោកម៉ាន់ ចាន់ឌីបានបន្តថា អ្នកវិនិយោគដែលឈ្លាសវៃ ឬមហាសេដ្ឋីអចលនទ្រព្យ តែងតែប្រើប្រាស់រូបមន្តដោយប្រមូលព៌តមាន ពីអចលលនទ្រព្យ១០០ទីតាំង ហើយ ពួកគេជ្រើសរើសយក៣០មកពិចារណា ចុងក្រោយពួកគេជ្រើសរើសយកបី និងចុងក្រោយសម្រេចជ្រើសរើសយកតែ១ ជាអចលនទ្រព្យដែលមានតម្លៃល្អឬទាបជាងទីផ្សារ៕

ចំណេះដឹងច្បាប់! តើកិច្ចសន្យាបែបណាទើបជាកិច្ចសន្យាត្រឹមត្រូវតាមច្បាប់?

July 29, 2019

0

ដោយ វុត្ថា

ភ្នំពេញៈ ជាទូទៅ កិច្ចសន្យាគឺជាច្បាប់របស់គូភាគី ដែលបានសន្យាគ្នាទៅវិញទៅមក ឬជាកាសន្យារបស់ភាគីម្ចាងទៅភាគីម្ខាងទៀត ក្នុងគោលបំណងជាការផ្លាស់ប្តូរប្រយោជន៍ទៅវិញទៅមក។

ដើម្បីធ្វើកិច្ចសន្យាមួយ ទៅជាកិច្ចសន្យា ដែលមានសុពលភាពអាចអនុវត្តបានឬជាកិច្ចសន្យា ដែលជាគោលការណ៍ទទួលស្គាល់ដោយច្បាប់ ភាគីនីមួយៗនាំអោយកិច្ចសន្យាត្រូវតែគោរពនូវលក្ខខណ្ឌចំបងៗដូចជា៖

១) ឆន្ទៈរបស់គូភាគី

កិច្ចសន្យា ឬការសន្យាណាក៏ដោយ ក៏ត្រូវតែធ្វើឡើងដោយឆន្ទះរបស់គូភាគី ពោលគឺត្រូវតែធ្វើឡើងដោយស្ម័គ្រចិត្ត គ្មានការបង្ខិតបង្ខំពីសំណាក់ភាគីនៃកិច្ចសន្យា ឬជនទីបីដែលពាក់ព័ន្ធនឹងផលប្រយោជន៍ក្នុងកិច្ចសន្យានោះទេ។ ម្យ៉ាងទៀតច្បាប់ក៏មិនអាចយកជាការបានដែរ នៅពេលដែលភាគីណាម្នាក់ ចុះកិច្ចសន្យាដោយកាលៈទេសៈ ឬស្ថានភាពសេដ្ឋកិច្ចណាមួយមកបង្ខំ។

២) កម្មវត្ថុនៃកិច្ចសន្យា

ដើម្បីធ្វើកិច្ចសន្យាមួយបាន លុះត្រាតែកិច្ចសន្យានោះធ្វើឡើងដោយមានកម្មវត្ថុច្បាស់លាស់ និងជាកម្មវត្ថុដែលស្ថិតក្នុងពាណិជ្ជកម្ម ពោលគឺជាកម្មវត្ថុដែលច្បាប់អនុញ្ញាតអោយមានការរកស៊ី ជួញដូរបានក្នុងទីផ្សារ។ ភាគីមិនអាចចុះកិច្ចសន្យា ទិញគ្រឿងញៀន កិច្ចសន្យាផ្នាល់បាល់ ប្រដាល់ ឬជលមាន់ គឺជាកិច្ចសន្យាដែលមានកម្មវត្ថុក្រៅកិច្ចសន្យា ពោលគឺវាត្រូវបានហាមឃាត់ដោយច្បាប់។

៣) សមត្ថភាពរបស់គូភាគី

បុគ្គលដែលជាអ្នកធ្វើកិច្ចសន្យា គឺត្រូវតែជាបុគ្គលមានសមត្ថភាពដែលទទួលស្គាល់ដោយច្បាប់ ពោលគឺជាភាគីឬបុគ្គលដែលជាមនុស្សមានស្មារតីត្រឹមត្រូវ មនុស្សដែលមានអាយុចាប់ពី១៨ឆ្នាំឡើងទៅ និងជាបុគ្គលដែលត្រូវបានអនុញ្ញាតដោយច្បាប់ថាពិតជាមានសមត្ថភាពក្នុងការចុះកិច្ចសន្យាបាន។ ក្នុងករណីនេះ មនុស្សដែលមានវិប្បល្លាស់ស្មារតី និងមនុស្សចាស់ជរាវង្វេងម្តងម្កាល គឺមិនអាចចាតុទុកថាជាមនុស្សដែលមានសមត្ថភាពដើម្បីចុះកិច្ចសន្យាបានទេ។

សរុបសេចក្តីមក កិច្ចសន្យាប្រភេទណាក៏ដោយ គឺត្រូវតែគោរពគោលការទាំងបីនេះ ពីព្រោះវាគឺជាគោលការណ៍គ្រឹះដែលគ្រប់ភាគី នៃកិច្ចសន្យាត្រូវតែមានជាដាច់ខាតនៅពេលដែលចុះកិច្ចសន្យា៕

សមាគម CVEA រៀបចំវេទិកាស្ដីពី “ការវិនិយោគលើវិស័យអចលនទ្រព្យប្រកបដោយប្រសិទ្ធភាព និងបានចំណេញខ្ពស់”

July 28, 2019

0

ដោយ ៖ រ៉ាណេត

ភ្នំពេញ ៖ ជាការចូលរួមលើកកម្ពស់ និងជំរុញវិស័យអចលនទ្រព្យនៅកម្ពុជាឱ្យកាន់តែមានភាពរឹងមាំ និងប្រកបដោយប្រសិទ្ធភាពខ្ពស់ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា CVEA បានរៀបចំបង្កើតវេទិការមួយស្ដី “ការវិនិយោគលើវិស័យអចលនទ្រព្យប្រកបដោយប្រសិទ្ធភាព និងទទួលបានប្រាក់ចំណេញខ្ពស់” ក្រោមការចូលរួមពីសំណាក់អ្នកពាក់ព័ន្ធក្នុងវិស័យរួមគ្នាប្រមាណ ៣០០នាក់ ។

វេទិការស្ដីពី “ការវិនិយោគលើវិស័យអចលនទ្រព្យប្រកបដោយប្រសិទ្ធភាព និងទទួលបានប្រាក់ចំណេញខ្ពស់” ដែលរៀបចំឡើងដោយសមាគមអ្នកវាយតម្លៃ និងភ្នាក់ងារអចលវត្ថុកម្ពុជា បានប្រារព្វកាលពីរសៀលថ្ងៃទី២៧ ខែកក្កដា ឆ្នាំ២០១៩ នៅសណ្ឋាគារ កាំបូឌីយ៉ាណា រាជធានីភ្នំពេញ ។

នៅក្នុងកម្មវិធីនេះ មានអ្នកជំនាញ និងទទួលបានជោគជ័យក្នុងវិស័យអចលនទ្រព្យចំនួន៤រូបជាវាលគ្មិន រួមមានលោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា, លោក ម៉ាន់ ច័ន្ទឌី អគ្គនាយកក្រុមហ៊ុន Premium Housing Real Estate Co.,Ltd , លោក សន សៀប អគ្គនាយកក្រុមហ៊ុន Key Real Estate o.,Ltd , លោក ព្រាប កុល នាយកប្រតិបត្តិអង្គការតម្លាភាពកម្ពុជា និងលោក យិន លាងគង់ ស្ថាបនិក និងជាអគ្គនាយកគេហទំព័រ www.propertyarea.asia ដែលជាអ្នកសម្របសម្រួលពិសេសនៅក្នុងវគ្គពិភាក្សាស៊ីជម្រៅទៅលើប្រធានបទខាងលើនេះ។ រាល់សមាសភាពដែលចូលរួមទាំងអស់ សុទ្ធតែបានសិក្សាស្វែងយល់ពីគន្លឹះក្នុងការវាយតម្លៃអចលនទ្រព្យ និងការសម្រេចចិត្តមុនពេលរវិនិយោគ ដើម្បីអាចជៀសផុតពីហានិភ័យ ប៉ុន្តែអាចទទួលបានចំណេញខ្ពស់ ក្រោមការបង្ហាញពីសំណាក់អ្នកជំនាញដែលជាវាលគ្មិនទាំង៤រូបខាងលើនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់ឱ្យដឹងថា តាមរយៈវេទិការមួយនេះ ទោះបីជាមិនបានផ្តល់នូវចំណេះដឹងពាក់ព័ន្ធវិស័យអចលនទ្រព្យឱ្យបានទូលាយទាំងអស់ក៏ពិតមែន ប៉ុន្តែវាគឺជាការចែករំលែកនូវបទពិសោធន៍ដែលបណ្តាអ្នកជំនាញ និងធ្លាប់ទទួលបានជោគជ័យនៅក្នុងវិស័យមួយនេះ ដើម្បីចូលរួមពង្រឹងគុណភាពក្នុងការចេះវាយតម្លៃអចលនទ្រព្យ និងការសម្រេចចិត្តមុនពេលវិនិយោគ។

លោកបានបន្តទៀតថា “កក្តាដែលសំខាន់នៅក្នុងវេទិការ គឺបានផ្តល់ឱកាសឱ្យបណ្តាសិក្ខាកាមដែលបានចូលរួម សាកសួរសំណួរ ដែលជាចម្ងល់របស់ខ្លួនពាក់ព័ន្ធទៅនឹងវិស័យអចលនទ្រព្យ ដើម្បីទទួលបានព័ត៌មានបន្ថែម ក៏ដូចជាចំណេះដឹងបន្ថែមសម្រាប់អនុវត្តនៅក្នុងកិច្ចការងាររបស់ខ្លួនដែលកំពុងអនុវត្ត”៕

សន្ទុះនៃតម្លៃជួលអចលនទ្រព្យនៅក្រុងព្រះសីហនុ កើនឡើង ៥ដងនៃតម្លៃទីផ្សារ

July 27, 2019

0

ដោយ ៖ រ៉ាណេត

ព្រះសីហនុ ៖ នៅក្នុងបរិបថនៃការអភិវឌ្ឍយ៉ាងគំហុករបស់ខេត្តព្រះសីហនុ ជាពិសេសនៅទីប្រជុំកណ្តាលក្រុងតែម្ដង ដែលធ្វើឱ្យកត្តាប្រជាសាស្ត្រ និងបណ្តាអ្នកវិនិយោគជាតិ-អន្តរជាតិ ជាពិសេស ជនជាតិចិនសម្រុកពូនផ្តុំចូលទៅប្រកបជំនួញយ៉ាងច្រើន រហូតធ្វើឱ្យការផ្គត់ផ្គង់ផ្នែកវិស័យអចលនទ្រព្យមិនគ្រប់តម្រូវការ និងមានលម្លៃជួលខ្ពស់ហួសការស្មាន។

ក្រុងព្រះសីហនុនៅពេលបច្ចុប្បន្ននេះបានអភិវឌ្ឍក្លាយជាប៉ូលសេដ្ឋកិច្ចពិសេសយ៉ាងពេញលេញ ក្នុងនាមជាមជ្ឈមណ្ឌលពាណិជ្ជកម្មចំរុះ ក្រោមការចូលបណ្តាក់ទុនវិនិយោគលើគ្រប់វិស័យ ជាពិសេសវិស័យសំណង់ និងអចលនទ្រព្យតែម្ដង។

ជាមូយនឹងការអភិវឌ្ឍយ៉ាងគំហុកនេះ កំណើនប្រជាសាស្ត្រចូលទៅកាន់ខេត្តមួយនេះក៏មានយ៉ាងគំហុកផងដែររហូតការផ្គត់ផ្គង់ផ្នែកអចលនទ្រព្យមិនគ្រប់តាមតម្រូវការ។

នាយិកាប្រចាំប្រទេសក្រុមហ៊ុនអន្តរជាតិ CBRE Cambodia លោកស្រី អាន សុធីតា បានមានប្រសាសន៍តាមទូរស័ព្ទកាលពីថ្ងៃទី២៦ ខែកក្កដា ឆ្នាំ២០១៩នេះថា នៅក្នុងខេត្តព្រះសីហនុ ជាពិសេសនៅក្នុងក្រុងគឺកំពុងតែជួបភាពកង្វះក្នុងការផ្គត់ផ្គង់ផ្នែកអចលនទ្រព្យ។

លោកស្រីបានបន្តទៀតថា “ទីផ្សារជួលអចលនទ្រព្យនៅក្នុងក្រុងព្រះសីហនុគឺមានការកើនឡើងខ្លាំងយ៉ាងគំហុកត្រឹមរយៈប្រមាណជិត២ឆ្នាំចុងក្រោយនេះ រហូតធ្វើឱ្យតម្លៃជួលនៅទីតាំងខ្លះកើនឡើងខ្លាំងស្ទើរតែ ៣-៥ដង បើធៀបជាមួយតម្លៃនៅក្នុងរាជធានីភ្នំពេញ”។

លោកស្រីបានបន្តទៀតថា “សម្រាប់ទីតាំងជួលនៅក្នុងអគារពាណិជ្ជកម្មមួយចំនួនមានតម្លៃក្នុងរង្វង់៥០ដុល្លារក្នុងមួយម៉ែត្រ ខណៈដែលតម្លៃដីជួលទំនេរសម្រាប់អភិវឌ្ឍអគារផ្សេងៗមានតម្លៃក្នុងរង្វង់ ២៥-៣០ ដុល្លារក្នុងមួយម៉ែត្រការ៉េ”។

លោកស្រីបានបញ្ជាក់ទៀតថា “សម្រាប់ផ្ទះល្វែងដែលស្ថិតនៅផ្លូវធំ និងបណ្តុំទីប្រជុំងាយស្រួលក្នុងការធ្វើអាជីវកម្មផ្សេងៗស្ថិតនៅក្នុងរង្វង់ ៥០០០ដុល្លារក្នុងមួយខែ ស្របពេលដែលតម្លៃជួលផ្ទះប្រភេទនេះនៅលើទីផ្សារស្ថិតនៅក្នុងរង្វង់ប្រមាណ ១៥០០-២០០០ ដុល្លារតែប៉ុណ្ណោះ”។

ជាមួយនឹងតម្រូវការខ្ពស់ ដែលធ្វើឱ្យតម្លៃនៃការជួលមានកំណើនខ្លាំងទាំងអស់នេះ ត្រូវបានលោកស្រីធ្វើការព្យាករណ៍ថា នឹងស្រកចុះវិញនៅត្រឹមរយៈពេលប្រមាណជា៥ឆ្នាំខាងមុខនេះ នៅពេលដែលកំណើននៃការផ្គត់ផ្គង់មានការកើនឡើង។

លោក ប៊ុន មករា នាយកទីផ្សារ ភ្នាក់ងារអចលនទ្រព្យ ព្រះសីហនុ បានទទួលស្គាល់នូវការលើកឡើងខាងលើពាក់ព័ន្ធទៅនឹងតម្លៃនៃការជួល ប៉ុន្តែវាក៏អាស្រ័យទៅតាមទីតាំងផងដែរ។

លោកបានបន្តទៀតថា “បច្ចុប្បន្ននេះ សម្រាប់តម្លៃទីផ្សារនៃការជួលដីនៅក្នុងក្រុងព្រះសីហនុ ដែលភាគច្រើនជាតម្រូវការរបស់ជនជាតិចិនគឺមានច្រើន”។

លោកបានបន្តថា “ គ្រាន់តែដីទំនេរដែលមានទំហំត្រឹម ១៥ X ២៥ ម៉ែត្រ ត្រូវបានដាក់ជួលក្នុងតម្លៃ ៥០០០ដុល្លារក្នុងមួយខែ ហើយដីដែលមានទំហំតូច ១០ X ២៥ ម៉ែត្រ ត្រូវបានដាក់ជួលក្នុងតម្លៃ ៣៥០០ ដុល្លារក្នុងមួយខែ”។

លោកបានបន្តទៀតថា “ដីដែលអាចសាងសង់ជាកាស៊ីណូ ឬជាភោជនីយដ្ឋាន មានទំហំ ២០X ៣០ ម៉ែត្រ ដែលនៅលើផ្លូវធំគឺជួលក្នុងតម្លៃ ២០,០០០ ដុល្លារក្នុងមួយខែដោយមានកុងត្រារហូត១៥ឆ្នាំ”។

លោកបានបន្តទៀតថា “ចំពោះផ្ទះល្វែងដែលអាចប្រកបអាជីវកម្មបាន ត្រូវបានដាក់ជួលក្នុងតម្លៃក្នុងចន្លោះចាប់ពី ២៥០០-៣០០០ ដុល្លារក្នុងមួយខែ (មិនស្ថិតនៅផ្លូវធំ) ឬផ្ទះ៣ល្វែងជាប់គ្នាមានកម្ពស់២ជាន់ (Eo . E1) តម្លៃជួលចាប់ពី ១២០០០ដុល្លារក្នុងមួយខែ”។

យ៉ាងណាក៏ដោយ លោកក៏បានបង្ហើបប្រាប់ឱ្យដឹងផងដែរថា នៅត្រឹមមួយរយៈពេលខ្លីកន្លងទៅនេះ សកម្មភាពនៃតម្រូវការជួលហាក់មិនសូវមានភាពពុះកញ្ជ្រោលដូចកាលពីចុងឆ្នាំ២០១៨ និងដើមឆ្នាំ២០១៩នោះទេ ពិសេសជានៅក្នុងសង្កាត់លេខ៤ ដែលធ្លាប់កើតមានព្រឹត្តិការណ៍រលំបាក់អគារកម្ពស់៧ជាន់តែម្ដង ៕

បេឡារុសគ្រោងបង្កើតរោងចក្រដំឡើងរថយន្តក្រុង និងផលិតសម្បកកង់យានយន្តនៅកម្ពុជា

July 27, 2019

0

ដោយ ប៊ី

សៀមរាប៖ បេឡារុសគ្រោងនឹងបង្កើតរោងចក្រដំឡើងរថយន្តក្រុង និងផលិតសម្បកកង់យានយន្តដើម្បីផ្គត់ផ្គង់នៅទីផ្សារកម្ពុជា និងក្នុងតំបន់ បន្ទាប់កម្ពុជា-បេឡារុស បានបើកកិច្ចប្រជុំលើកទី៣ នៃគណៈកម្មាធិការចម្រុះស្តីពីកិច្ច សហប្រតិបត្តិការពាណិជ្ជកម្ម និងសេដ្ឋកិច្ច នៅព្រឹកថ្ងៃទី២៦ ខែកក្កដា ឆ្នាំ២០១៩។

នៅក្នុងកិច្ច ប្រជុំនេះ ប្រទេសទាំងពីរបានឯកភាពគ្នាជាច្រើនចំណុចលើការនាំចេញ និងនំាចូលផ្នែកវិស័យ ពាណិជ្ជកម្មនិងសេដ្ឋកិច្ច ជាពិសេសគ្រោងបង្កើតរោងចក្រដំឡើងរថយន្ដ និងសម្បកយានយន្ដ និងនាំចេញផ្នែកនាំចេញផ្នែកវិស័យកសិកម្មផងដែរ។

លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្មកម្ពុជា បានមានប្រសាសន៍ថា “ភាគីកម្ពុជាក៏បានលើកទឹកចិត្តឱ្យភាគីបេឡារុសជំរុញការ នាំចេញផលិតផលកសិកម្មកម្ពុជាទៅកាន់ ទីផ្សារបេឡារុស និងពិនិត្យលទ្ធភាពបង្កើត រោងចក្រដំឡើងរថយន្តក្រុង និងផលិតសម្បកកង់យានយន្ត ដើម្បីផ្គត់ផ្គង់នៅទីផ្សារកម្ពុជា និងក្នុងតំបន់”។

លោកស្រី បានបន្ថែមថា ប្រទេសទាំងពីរបានឯកភាពគ្នានូវចំណុចមួយចំនួនគឺ៖ ទី១.លើកិច្ចសហប្រតិបត្តិការពាណិជ្ជកម្ម និងសេដ្ឋកិច្ច រួមមានការផ្គត់ផ្គង់គ្រឿងម៉ាស៊ីន សម្បកកង់ ផលិតផលវាយណភ័ណ្ឌ ឧស្សាហកម្មធុនស្រាល ពីបេឡារុសមកកម្ពុជា និងការផ្គត់ផ្គង់កៅស៊ូធម្មជាតិ ផលិតផលកសិកម្ម និងអាហារសមុទ្រពីកម្ពុជា ទៅបេឡារុស។

លោកស្រី បានឲ្យដឹងថា ទី២. ការផ្គត់ផ្គង់ឱសថ និងគ្រឿងបរិក្ខារមកកម្ពុជា, ៣. វិស័យ វិទ្យាសាស្ត្រ និងបច្ចេកវិទ្យាព័ត៌មានវិទ្យា, ៤. វិស័យអប់រំ និងវប្បធម៌, ៥. វិស័យទេសចរណ៍ និង៦. កិច្ចសហប្រតិបត្តិការរវាងរាជធានីភ្នំពេញ និងទីក្រុងមីនស្កផងដែរ។

លោកស្រីបានបន្ដថា កិច្ចសហប្រតិបត្តិការពាណិជ្ជកម្ម និងសេដ្ឋកិច្ច រវាងព្រះរាជាណាចក្រកម្ពុជា និងសាធារណរដ្ឋបេឡារុស គឺជាមូលដ្ឋាន មួយដ៏សំខាន់ក្នុងការគាំទ្រ និងសម្រួលដល់ប្រតិបត្តិការពាណិជ្ជកម្ម ទំនាក់ទំនងវិស័យឯកជន និងធុរកិច្ចនានា៕

លោកជា ចាន់តូ៖ កត្តាខាងក្នុង និងខាងក្រៅជំរុញសេដ្ឋកិច្ចកម្ពុជានៅតែសម្រេចបានវឌ្ឍនភាពល្អប្រសើរ

July 27, 2019

0

ដោយ វុត្ថា

ភ្នំពេញ៖ ទេសាភិបាលធនាគារជាតិកម្ពុជា បានឱ្យដឹងថា សេដ្ឋកិច្ចកម្ពុជាបន្តមានវឌ្ឍនភាពល្អប្រសើរ ដែលទទួលបានភាពអំណោយផលទាំងពីកត្តាខាងក្រៅនិងខាងក្នុង ខណៈអ្នកជំនាញថាសេដ្ឋកិច្ចកម្ពុជាអះអាងថា នៅតែមានភាពស្រពិចស្រពិលជុំវិញភាពមិនច្បាស់លាសការដកអនុគ្រោះពន្ធ (EBA) និងការចំណាយថ្លៃដើមនៅតែមានកំរិតខ្ពស់។

លោកជា ចាន់តូ ទេសាភិបាលកម្ពុជា នៅក្នុងសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០១៩នៅថ្ងៃទី ២៨ ខែកក្កដា ឆ្នាំ ២០១៩ នេះ បានពន្យល់ថា កត្តាគាំទ្រខាងក្រៅរួមមាន កំណើនតម្រូវការចំពោះផលិតផលនាំចេញរបស់កម្ពុជា លំហូរចូលនៃវិនិយោគទុនបរទេស និងកំណើនក្នុងវិស័យទេសចរណ៍។

កត្តាខាងក្នុងគឺស្ថិរភាពដ៏រឹងមាំនៃសុខសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ចនិងហិរញ្ញវត្ថុ ភាពអំណោយផលនៃបរិយាកាសវិនិយោគនិងធុរកិច្ច ការធ្វើពិពិធកម្មមូលដ្ឋានកំណើន និងការកែទម្រង់ស៊ីជម្រៅរបស់រាជរដ្ឋាភិបាល។

លោកបន្តទៀថា អតិផរណាមានកម្រិតទាប អត្រាប្តូរប្រាក់មានស្ថិរភាពល្អប្រសើរ ហើយទុនបម្រុងអន្តរជាតិត្រូវបានគរពូនឱ្យកើនឡើងខ្ពស់ ដែលបានចូលរួមពង្រឹងស្ថិរភាពម៉ាក្រូសេដ្ឋកិច្ចនិងហិរញ្ញវត្ថុ។

លើសពីនេះ វិស័យធនាគារនិងហិរញ្ញវត្ថុកម្ពុជាបានបន្តដើរតួនាទីយ៉ាងសកម្មក្នុងការជំរុញកំណើនសេដ្ឋកិច្ច កាត់បន្ថយភាពក្រីក្រនិងវិសមភាព។

បច្ចុប្បន្ន សេវាហិរញ្ញវត្ថុបានពង្រីកវិសាលភាពទូទាំងប្រទេស ហើយបានផ្តល់ឱកាសដល់ប្រជាជនកាន់តែច្រើនក្នុងការពង្រីកសកម្មភាពសេដ្ឋកិច្ចសម្រាប់លើកស្ទួយជីវភាពរស់នៅឱ្យកាន់តែប្រសើរ។

លោក ង៉ែត ជូ អ្នកវិភាគសេដ្ឋកិច្ចកម្ពុជាបានឱ្យដឹងថា សេដ្ឋកិច្ចកម្ពុជានៅតែមានភាពស្រពិចស្រពិល ខណៈបញ្ហាការចំណាយថ្លៃដើមធ្វើអាជីវកម្មនៅក្នុងប្រទេសនៅមានកម្រិតខ្ពស់ រួមជាមួយនឹងការគំរាមដកប្រព័ន្ធអនុគ្រោះពន្ធ EBA ពីសហភាពអឺរ៉ុប។

លោកបន្តថា “បើយើងពិនិត្យជាក់ស្តែងនៃភាពខ្លាំងនៅខាងក្នុង គឹហិរញ្ញវត្ថុចាក់ចូលនៅក្នុងវិស័យអចលនទ្រព្យនៅដំណើរការធម្មតា អត់មានភាពប្រែប្រួល និងទាក់ទងជាមួយនឹងខាងក្រៅហ្នឹង (បញ្ហាEBA) ក៏មិនទាន់ចូលជាធរមាន ដូច្នេះ អ្វីៗតែធម្មតា”។

លោកបន្ថែមថា “ហើយទៅមុខទៀត នឹងមានការប្រែប្រួលនៅពេលដែលមានវិធានការជាក់ស្តែងរបស់សហភាពអឺរ៉ុប និងវិវត្តន៍ដំណើរការទៅមុខទៀតរបស់ប្រព័ន្ធវិស័យហិរញ្ញវត្ថុ ព្រោះវិស័យហិរញ្ញវត្ថុបានចាក់ចូលទៅក្នុងវិស័យអចលនវត្ថុច្រើន ហើយបើវិស័យអចលនទ្រព្យនៅមានសុខភាពល្អ និងវិស័យហិរញ្ញវត្ថុនៅមានដំណើរការល្អ នឹងមិនមានបញ្ហាដល់សេដ្ឋកិច្ចកម្ពុជានោះទេ៕

ទីប្រឹក្សាសេដ្ឋកិច្ចអាមេរិក មិនសូវមានសុទិដ្ឋិនិយមលើកិច្ចព្រមព្រៀងពាណិជ្ជកម្មអាមេរិកចិន

July 27, 2019

0

ដោយ Donald Lee

ភ្នំពេញ៖ ប្រធានក្រុមប្រឹក្សាសេដ្ឋកិច្ចជាតិសហរដ្ឋអាមេរិកផ្តល់យោបល់ដល់ប្រធានាធិបតីអាមេរិកលើបញ្ហាសេដ្ឋកិច្ចថា កុំរំពឹងទុកខ្លាំងពេកលើកិច្ចព្រមព្រៀងពាណិជ្ជកម្មជាមួយចិន នៅពេលដែលភាគីទាំងពីរបានជួបគ្នានៅក្នុងប្រទេសចិនកាលពីថ្ងៃ ច័ន្ទ ខាងមុខនេះ។

មន្ត្រីជាន់ខ្ពស់អាមេរិកនឹងជួបជាមួយឧបនាយករដ្ឋមន្រ្តីចិនលោក Liu He នៅទីក្រុងសៀងហៃនៅថ្ងៃចន្ទ ដើម្បីទទួលបានព័ត៌មានលម្អិតនៃកិច្ចព្រមព្រៀងពាណិជ្ជកម្មថ្មី បន្ទាប់ពីការចរចាកាលពីខែ ឧសភា បានបរាជ័យ។

លោក Larry Kudlow ប្រធានទីប្រឹក្សាសេដ្ឋកិច្ចអាមេរិក បានថ្លែងទៅកាន់ទូរទស្សន៍អាមេរិក CNN ថា “ខ្ញុំមិនរំពឹងថានឹងមានកិច្ចព្រមព្រៀងធំដុំណាមួយទេ”។

សេដ្ឋកិច្ចអាមេរិកមានអត្រាកំណើនយឺតបំផុតក្នុងរយៈពេលជាងពីរឆ្នាំ ខណៈការចរចាពាណិជ្ជកម្មជាមួយ ចិនបានជួបបរាជ័យនៅក្នុងរយៈពេលប៉ុន្មានខែចុងក្រោយនេះ។

ក្រុមអ្នកជំនាញ ជឿជាក់ថា អត្រាកំណើនសេដ្ឋកិច្ចរបស់សហរដ្ឋអាមេរិកនឹងធ្លាក់ចុះមកនៅត្រឹម ២,៥ ភាគរយនៅឆ្នាំនេះ។ សេដ្ឋកិច្ចអាមេរិកបានកើនឡើងជិត ៣ ភាគរយកាលពីឆ្នាំមុន។

លោក Ryan Sweet សេដ្ឋវិទូជាន់ខ្ពស់នៅ Moody’s Analytics បានប្រាប់រ៉យទ័រថា “ប្រសិនបើយើងទទួលបានការធ្លាក់ចុះសេដ្ឋកិច្ចនៅឆ្នាំក្រោយ វានឹងកើតឡើងដោយសារតែយើងបានធ្វើឱ្យមានភាពតានតឹងផ្នែកពាណិជ្ជកម្ម”។

ភាពតានតឹងផ្នែកនយោបាយក៏មានកម្រិតខ្ពស់ផងដែរ ខណៈដែលមន្រ្តីរដ្ឋាភិបាលចិនបានចង្អុលបង្ហាញថា អាមេរិកអាចពាក់ព័ន្ធនឹងភាពចលាចលនៅហុងកុង។

រដ្ឋមន្ត្រីការបរទេសចិនលោក Wang Yi បាននិយាយថា “ ដៃខ្មៅ” របស់លោកខាងលិចគឺនៅពីក្រោយការតវ៉ាដ៏ធំដែលបានផ្ទុះឡើងនៅហុងកុងក្នុងឆ្នាំនេះ។

អ្នកនាំពាក្យក្រសួងការបរទេសចិនលោកស្រី Hua Chunying បានស្តីបន្ទោសអាមេរិកដោយផ្ទាល់ថាបានបង្កភាពវឹកវរនៅក្នុងសន្និសីទសារព័ត៌មានមួយនៅទីក្រុងប៉េកាំងកាលពីថ្ងៃអង្គារ។

លោកហួបានមានប្រសាសន៍ថា “មានសញ្ញានៃកងកម្លាំងបរទេស នៅពីក្រោយការតវ៉ារបស់ហុងកុង”។

លោកស្រី បានបន្ថែមទៀតថា “ខ្ញុំឆ្ងល់ថា តើមន្រ្តីអាមេរិកទាំងនេះអាចឆ្លើយតបទៅពិភពលោកដោយស្មោះត្រង់នូវតួនាទីដែលអាមេរិកបានដើរតួនៅក្នុងព្រឹត្តិការណ៍ថ្មីៗនៅហុងកុង”៕

ខេ អេច លែន យកចិត្តទុកដាក់ខ្ពស់បំផុតលើការកសាងក្រុមការងារប្រកបដោយវិជ្ជាជីវៈ និងរួមចំណែកក្នុងកិច្ចការសង្គម

July 27, 2019

0

ដោយ៖ គង់ សូរិយា

ភ្នំពេញ៖ ការធ្វើការងារជាក្រុមប្រកបដោយវិជ្ជាជីវៈ និងផ្តល់គុណតម្លៃដល់គ្នាទៅវិញទៅមកបាននិងកំពុងក្លាយជាប្រព័ន្ធការងារជាប្រចាំ នៃក្រុមហ៊ុន ខេ អេច លែន (KH LAND CO.,LTD) ដែលផ្តោតលើការលក់និងការប្រឹក្សាយោបល់ផ្សេងៗលើអចលនទ្រព្យ។

ជាក់ស្តែងក្នុងដំណើរកំសាន្តទៅកាន់ខេត្តមណ្ឌលគិរីកាលពីពេលថ្មីៗនេះ ក្រុមការងារ KH LAND ប្រមាណជិត១០០នាក់ បានធ្វើសកម្មភាពរួមគ្នាជាច្រើន រួមមាន៖ សកម្មភាពកីឡា លេងហ្គេម កំសាន្ត ដាំដើមឈើក្នុងសាលារៀន ដើម្បីលើក កម្ពស់បរិស្ថាននាទឹកដីដ៏សែនមនោរម្យ នៃខេត្តមណ្ឌលគិរី។

កញ្ញា យ៉ុង សុភ័ក្រ្ត អនុប្រធានផ្នែកលក់នៃក្រុមហ៊ុន KH LAND បានមានប្រសាសន៍ឲ្យដឹងនាព្រឹកថ្ងៃទី២៦ កក្កដានេះថា ការរៀបចំដំណើរកំសាន្តនេះ ធ្វើឡើងក្នុងគោលដៅបង្កើតភាពស្និទ្ធស្នាល ការស្រលាញ់គ្នាក្នុងនាមជាអ្នកធ្វើការងារជាក្រុម ការងាររួមគ្នា និងការស្រលាញ់ធម្មជាតិ។

កញ្ញាបន្តថា ជាលទ្ធផលនៃដំណើរកំសាន្តនេះ យើងឃើញបុគ្គលិកមានភាពស្និទ្ធស្នាលគ្នា ស្រលាញ់គ្នា ចេះសហការសាមគ្គីគ្នា បើកចិត្តទូលាយ ដើម្បីធ្វើយ៉ាងណាឲ្យរីកចម្រើនដល់ខ្លួនឯង ក្រុមហ៊ុន និងដល់សង្គមជាតិទាំងមូល។

កញ្ញាបន្តថា “យើងបានដាំដើម KH LAND ក្នុងបេះដូង ហើយយើងចាត់ទុក KH LAND ជាផ្ទះទី២របស់យើង ព្រោះក្រុមហ៊ុនបានផ្តល់នូវបរិយាកាសការងារ និងការដឹកនាំដ៏ល្អប្រសើរ”។

ជាមួយគ្នានេះ លោក ពៀង សុក្រឹត ប្រធានគ្រប់គ្រងផ្នែកលក់នៃក្រុមហ៊ុន KH LAND បានមានប្រសាសន៍ឲ្យដឹងផងដែរថា ក្រុមហ៊ុន KH LAND តែងតែរៀបចំដំណើរកំសាន្តបែបនេះជារៀងរាល់ឆ្នាំ ហើយពេលយើងបានធ្វើដំណើរទៅទស្សនកិច្ច នៅខេត្តមណ្ឌលគិរី យើងបានលេងហ្គេម Team Work និងដាំដើមឈើនៅក្នុងសាលារៀនមួយផងដែរ។

លោកបន្តថា “តាមរយៈដំណើរកំសាន្តនេះ បុគ្គលិកក្រុមហ៊ុនទាំងអស់បានយល់ពីចក្ចុវិស័យ បេសកកម្មរបស់ក្រុមហ៊ុនចង់បានអ្វី ហើយយើងត្រូវធ្វើអ្វីដើម្បីសម្រេចបានទស្សនវិស័យរួមគ្នា”។

ចំពោះទស្សនវិស័យចំពោះមុខ ក្រុមហ៊ុន KH LAND ដែលបច្ចុប្បន្នកំពុងទទួលសិទ្ធិលក់លើគម្រោងដីឡូតិ៍ និងផ្ទះល្វែង ប៉ុន្តែមហិច្ឆតារបស់ក្រុមហ៊ុននេះនាពេលអនាគត នឹងដើរតួនាទីជាអន្តរការីជាមួយអ្នកវិនិយោគដទៃទៀត ដើម្បីសាងសង់បុរី ខុនដូ និងមជ្ឈមណ្ឌលពាណិជ្ជកម្មធំៗជាច្រើនទៀត។

ក្រុមហ៊ុន KH LAND ទទួលបានការរីកចម្រើនយ៉ាងឆាប់រហ័ស ហើយចំនួនបុគ្គលិកបានកើនឡើងជាបន្តបន្ទាប់។ កញ្ញា យ៉ុង សុភ័ក្រ្ត បានមានប្រសាសន៍ឲ្យដឹងថា យុទ្ធសាស្រ្តរបស់ក្រុមហ៊ុនគឺផ្តោតលើទស្សនវិស័យឈ្នះ ឈ្នះបួន ដូចជា៖ អតិថិជនឈ្នះ ក្រុមហ៊ុនភ្នាក់ងារលក់ឈ្នះ បុគ្គលិកឈ្នះ និងក្រុមហ៊ុនឈ្នះ ដែលជាទស្សនវិស័យ និងយុទ្ធសាស្រ្តពង្រឹងដំណើរឆ្ពោះទៅមុខរបស់ក្រុមហ៊ុន។

រហូតមកទល់ពេលនេះ ក្រុមហ៊ុនKH LAND ទទួលបានជោគជ័យលើគម្រោងធំៗចំនួន៥រួចមកហើយ និងគ្រោងពង្រីកគម្រោងទី៦បន្ថែមទៀតនាពេលអនាគតឆាប់ៗនេះ៕

ទីតាំងគ្រោងសាងសង់ព្រលានយន្តហោះខេត្តមណ្ឌលគិរីត្រូវបានបំពាន

July 27, 2019

0

ដោយ វុត្ថា

មណ្ឌលគិរី៖ លោក ស្វាយ សំអ៊ាង អភិបាលខេត្តមណ្ឌលគិរី ដឹកនាំកងកម្លាំងចម្រុះ ចុះដកបង្គោលរបងថ្មអនាធិបតេយ្យរាប់រយបង្គោល ដែលជនខិលខូចបោះព័ទ្ឋរំលោភយកដី គម្រោងសាងសង់ព្រលានយន្តហោះ ដែលមានទីតាំងនៅភូមិពូហ្សាម ឃុំសែនមនោរម្យ ស្រុកអូររាំង។

នៅក្នុងប្រតិបត្តិការនេះត្រូវបានធ្វើឡើងតកាលពីថ្ងៃទី ២៦ ខែកក្កដា ឆ្នាំ២០១៩ នេះ លោក ស្វាយ សំអ៊ាង អភិបាលខេត្ត បានឲ្យដឹងថា សកម្មភាពដែលអាជ្ញាធរបានចុះធ្វើនេះ គឺដើម្បីការពារដីបម្រុងទុករបស់រដ្ឋសម្រាប់ធ្វើការសាងសង់ព្រលានយន្តហោះនាពេលខាងមុខ។

អភិបាលខេត្ត បន្តថា ដោយមើលឃើញមានសកម្មភាពបោះបង្គោលកំណត់ព្រំដីយកជាកម្មសិទ្ឋផ្ទាល់ខ្លួន លើដីព្រលានទើបលោកសម្រេចដឹកនាំមន្ត្រីជំនាញបរិស្ថាន នគរបាល និងអាវុធហត្ថ ចុះដកបង្គោលរបងថ្មទាំងនោះ យកទៅរក្សាទុកប៉ុណ្ណោះអាសន្ននៅអធិការដ្ឋាននគរបាលស្រុកអូររាំង ដើម្បីស្រាវជ្រាវបន្តទៅតាមនិតីវិធី។

លោក ស្វាយ សំអ៊ាង បានបញ្ជាក់ថា មិនត្រឹមតែដីទីតាំងព្រលានហោះនេះទេ ដែលអាជ្ញាធរចុះអនុវត្តន៍ការពារដីទុកជាសម្បត្តិសាធារណៈ សូម្បីដីចំការស្រល់ ដែលកំពុងរងការទន្ទ្រានពីជនមួយក្តាប់តូច ក៏លោកដាក់បញ្ជាឲ្យមន្ត្រីជំនាញ នឹងពាក់ព័ន្ឋទាំងអស់ចុះត្រួតពិនិត្យ និងរឹបអូសទុកជាសម្បិត្តរដ្ឋវិញ។

លោក អភិបាលខេត្តមណ្ឌលគិរីរូបនេះបានថ្លែងថា «គម្រោងសាងសង់ប្រលានយន្តហោះនេះ គឺអាកាសចរណ៍ស៊ីវិលសហការជាមួយអាជ្ញាធរខេត្ត ដើម្បីរៀបចំទីតាំងដីទុកសម្រាប់កសាងព្រលានយន្តហោះ ដែលមានផ្ទៃដីទំហំប្រមាណជា៩០០ហិចតា ស្ថិតនៅភូមិពូហ្សាម ឃុំសែនមនោរម្យ ស្រុកអូររាំង។

ក្នុងគោលដៅពង្រីកសក្តានុពលសេដ្ឋកិច្ច ទៅកាន់ភូមិភាគឦសាន្ត សម្តេចតេជោហ៊ុន សែន នាយករដ្ឋមន្ត្រីនៃប្រទេសកម្ពុជាកាលពីកន្លងទៅថ្មីៗនេះ បានប្រកាសពីគម្រោងសាងសង់ព្រលានយន្តហោះនៅទិសឦសានប្រទេសកម្ពុជា ដើម្បីឆ្លើយតបទៅនឹងកំណើនសេដ្ឋកិច្ច និងវិនិយោគរបស់ប្រទេសកម្ពុជា។

សម្តេចបន្តថា “ការសាងសងព្រលានយន្តហោះនៅទិសឦសាននេះ គឺដើម្បីឆ្លើយតបទៅហ្នឹងកំណើនប្រាក់ចំណូល របស់ពលរដ្ឋកម្ពុជាមានកំណើនខ្ពស់ មានលទ្ធភាពធ្វើដំណើរតាមយន្តហោះ”។

បើតាមសម្តេចតេជោបានបង្ហើបឱ្យដឹងថា ព្រលានយន្តហោះនឹងត្រូវសាងសង់នៅ ចន្លោះខេត្តរតនគីរី និងមណ្ឌលគិរី ហើយធ្វើឱ្យតំបន់ជាប៉ូលសេដ្ឋកិច្ចនៅប៉ែទិសឦសាននៃប្រទេសកម្ពុជា មានទាំងកសិឧស្សាហកម្ម កសិទេសចរណ៍ និងផ្នែកដទៃទៀតនៅទិសនោះ ដើម្បីជំរុញប្រទេសកម្ពុជា ដែលមានចំណូលមធ្យមកម្រិតទាប ទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅក្នុងឆ្នាំ២០៣០៕