CDC អនុម័តគម្រោងវិនិយោគ៤ មានទឹកប្រាក់ប្រមាណ ២០លានដុល្លារនៅកម្ពុជា

July 27, 2019

ដោយ វុត្ថា

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន ៤ លើការបង្កើតរោងចក្រ ដែលមានទឹកប្រាក់ប្រមាណ ២០,២លានដុល្លារអាមេរិក នៅប្រទេសកម្ពុជា។

យោងតាមរបាយការណ៍ដែលទទួលបានពីក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃ២៧ ខែកក្កដា ឆ្នាំ ២០១៩ នេះ បានឱ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- “KPNL CO., LTD.” គម្រោងបង្កើតរោងចក្រផលិតថង់ក្រណាត់គ្រប់ប្រភេទ ដែលមានទីតាំងវិនិយោគស្ថិតនៅដីឡូតិ៍លេខ១៤២ ភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៩លានដុល្លារអាមេរិក និងអាចបង្កើតការងារបានចំនួន ២៤៨កន្លែង។

២- “XINYAO UNION (CAMBODIA) GARMENT CO., LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ២ ភូមិត្រកៀត ឃុំត្រពាំងសាប ស្រុកបាទី ខេត្តតាកែវ មានទុនវិនិយោគប្រមាណ ៣,៥លានដុល្លារអាមេរិក និងអាចបង្កើតការងារបានចំនួន ២.០២៣កន្លែង។

៣- “XING BANG PAPER INDUSTRIAL (CAMBODIA) CO., LTD.” គម្រោងបង្កើតរោងចក្រកែច្នៃក្រដាស ផលិតកេសកាតុង និងថង់ក្រដាស ដែលមានទីតាំងវិនិយោគស្ថិតនៅភូមិក្រាំងទ្រា ឃុំព្រៃនិព្វាន្ត គងពិសី ខេត្តកំពង់ស្ពឹ មានទុនវិនិយោគប្រមាណ ៣,៨លានដុល្លារអាមេរិក និងអាចបង្កើតការងារបានចំនួន ១៨២ កន្លែង។

៤- “KHMER FRESH MILK CO.,LTD.” គម្រោងបង្កើតកសិដ្ឋានចិញ្ចឹមគោយកទឹកដោះ និងរោងចក្រកែច្នៃដែលមានទីតាំងវិនិយោគស្ថិតនៅភូមិឧកាសាំង ឃុំកណ្តឹង ស្រុកបាទី ខេត្តតាកែវ មានទុនវិនិយោគ ១០លានដុល្លារអាមេរិក និងអាចបង្កើតការងារបានចំនួន ៣៧កន្លែង៕

តើពាក្យម៉ាក្រូសេដ្ឋកិច្ច និងមីក្រូសេដ្ឋកិច្ចមានន័យដូចម្តេច?

July 27, 2019

0

ប្រែសម្រួលដោយ ប៊ី

ភ្នំពេញៈ នៅក្នុងសម្រង់ពាក្យទាក់ទងនឹងសេដ្ឋកិច្ច មានពាក្យមួយចំនួនដែលប្រជាពលរដ្ឋខ្មែរភាគច្រើនមិនបានយល់ ឬយល់តែមិនយល់ស៊ីជម្រៅនោះទេ ហេតុនេះគេហទំព័រព៌តមានអចលនទ្រព្យ និងសេដ្ឋកិច្ចឈានមុខគេសូមលើកយកពាក្យមួយចំនួនមកពន្យល់។

តើពាក្យម៉ាក្រូសេដ្ឋកិច្ច និងមីក្រូសេដ្ឋកិច្ច ក្នុងន័យសេដ្ឋកិច្ចមាននិយមន័យនិងភាពទូលំទូលាយបែបណា?

ម៉ាក្រូសេដ្ឋកិច្ចៈ គឺជាការសិក្សាដែលផ្តោតទៅលើសេដ្ឋកិច្ចរបស់ប្រទេសទាំងមូល ខុសពី មីក្រូសេដ្ឋកិច្ច ផ្តោតសំខាន់ទៅលើបុគ្គល គ្រួសារ រឹក្រុមហ៊ុននីមួយៗ។ អ្នកម៉ាក្រូសេកិច្ចគេសិក្សាអំពីផលទុនជាតិសរុប (GDP) អត្រាអ្នកគ្មានការងារធ្វើ (Unemployment rate) ដើម្បីអោយយល់ពីសេដ្ឋកិច្ចជាតិជារួម។

អ្នកម៉ាក្រូសេកិច្ចបានបង្កើតម៉ូដែល (Model) សំរាប់ពន្យល់ពីអំពីចំណូលជាតិ (National income) ផលិតផល(Output) ការចំណាយ (Consumption) អត្រាអ្នកគ្មានការងារធ្វើ (Unemployment rate) អតិផរណា(Inflation) ការសន្សំ (Saving) ការវិនិយោគ (Investment) ពាណិជ្ជកម្មអន្តរជាតិ (International Trade) និង ហិរញ្ញវត្ថុអន្តរជាតិ (International Finance)។

ម៉ាក្រូសេកិច្ចគឺជាជំនាញសិក្សាធំទូលាយទាក់ទងទៅនឹងសេដ្ឋកិច្ច។ គោលបំណងនៃការសិក្សាសំខាន់របស់ម៉ាក្រូសេកិច្ចមាន២។

ទីម១ គឺចង់យល់ពីមូលហេតុ (Causes) និងផលវិបាក (Consequences) នៃបំរែបំរួលចំណូលជាតិក្នុងរយៈពេលខ្លី (Short-run fluctuations or business cycle)។

ទី២គឺ ចង់យល់អំពីកត្តាដែលកំនត់ ពីការរីកចំរើនសេដ្ឋកិច្ចជាតិ រយៈពេលវែង (Long-run economic growth)។

ម៉ូដែលម៉ាក្រូសេកិច្ច ត្រូវបានប្រើដោយរដ្ឋាភិបាល និងសហគ្រាសធំៗសំរាប់ជួយក្នុងការវាយតំលៃ និងដើម្បីអភិវឌ្ឍន៍គោលនយោបាយសេដ្ឋកិច្ច (Economic Policy) និងយុទ្ធសាស្ត្រក្រុមហ៊ុន (Business Strategy)។

មីក្រូសេដ្ឋកិច្ចៈ ជាសំខាន់ផ្តោតទៅលើសកម្មភាពរបស់បុគ្គល ដូចជាសហគ្រាស (Firms) អ្នកប្រើប្រាស់ (Consumers) និងការសិក្សាអំពីទង្វើពួកគេ ទាក់ទងក្នុងការកំនត់តំលៃ (Prices) និងចំនួនផលិតផល (Quantities) នៅលើទីផ្សារ (Markets) អ្វីមួយ៕

អាសន្ន៖ សហរដ្ឋអាមេរិកអាចនឹងជួបវិបត្តិសេដ្ឋកិច្ចនៅឆ្នាំក្រោយ

July 27, 2019

0

ដោយ Donald lee

ភ្នំពេញៈ វិនិយោគិនបានភ្ញាក់ផ្អើល ដោយរដ្ឋាភិបាលអាមេរិកបានបង្ហាញពីកំណើនសេដ្ឋកិច្ចយឺតយ៉ាវនៅក្នុងត្រីមាសទី២ ដោយសារតែការនាំចេញធ្លាក់ចុះ ដែលជាផលវិបាកនៃសង្គ្រាមពាណិជ្ជកម្មអាមេរិក-ចិន។

សេដ្ឋកិច្ចអាមេរិកមានអត្រាកំណើនយឺតបំផុត ក្នុងរយៈពេលជាងពីរឆ្នាំ ខណៈការចរចាពាណិជ្ជកម្មជាមួយ ចិនបានជួបបរាជ័យនៅក្នុងរយៈពេលប៉ុន្មានខែចុងក្រោយនេះ។

មន្ត្រីជាន់ខ្ពស់អាមេរិក នឹងជួបជាមួយលោក Liu He អនុមន្រ្តីចិននៅសៀងហៃនៅសប្តាហ៍ក្រោយ ដើម្បីស្វែងរកព័ត៌មានលម្អិត នៃកិច្ចព្រមព្រៀងពាណិជ្ជកម្មថ្មីមួយ បន្ទាប់ពីការចរចានៅខែឧសភា បានបរាជ័យ។

លោក Ryan Sweet សេដ្ឋវិទូជាន់ខ្ពស់នៅ Moody’s Analytics បានប្រាប់រ៉យទ័រថា “ប្រសិនបើយើងទទួលបានការធ្លាក់ចុះសេដ្ឋកិច្ចនៅឆ្នាំក្រោយ វានឹងកើតឡើងដោយសារតែយើងបានធ្វើឱ្យមានភាពតានតឹងផ្នែកពាណិជ្ជកម្ម”។

ក្រុមអ្នកជំនាញជឿជាក់ថា អត្រាកំណើនសេដ្ឋកិច្ចរបស់សហរដ្ឋអាមេរិក នឹងធ្លាក់ចុះមកនៅត្រឹម ២,៥ភាគរយនៅឆ្នាំនេះ។ សេដ្ឋកិច្ចអាមេរិកបានកើនឡើងជិត ៣ភាគរយកាលពីឆ្នាំមុន។

ការសង្កត់ធ្ងន់លើការពន្លឿនកិច្ចព្រមព្រៀងពាណិជ្ជកម្ម រវាងប្រទេសមហាអំណាចសេដ្ឋកិច្ចធំបំផុតនៅលើពិភពលោកកើតមានឡើង នៅពេលដែលជម្លោះពន្ធដារបានធ្វើឱ្យមានអស្ថិរភាពសេដ្ឋកិច្ចពិភពលោក។

របាយការណ៍សេដ្ឋកិច្ច Bloomberg ដែលបានចេញផ្សាយកាលពីខែមុន បានប៉ាន់ស្មានថា ការខាតបង់សង្រ្គាមពាណិជ្ជកម្មរវាងអាមេរិក និងចិនអាចនឹងមានទំហំទឹកប្រាក់ដល់ទៅ១,២ ពាន់ពាន់លានដុល្លារ ដែលអាចប៉ះពាល់ផលិតផលសរុបក្នុងស្រុកលើពិភពលោក និងសេដ្ឋកិច្ចពិភពលោកមានភាពយឺតយ៉ាវ ដែលមិនធ្លាប់មានចាប់តាំងពីវិបត្តិហិរញ្ញវត្ថុឆ្នាំ២០០៨៕

ចំណេះដឹង! តើពន្ធលើអចលនទ្រព្យត្រូវមានការលើកលែងឫទេ?

July 27, 2019

0

ដោយ នៅ វឌ្ឍនា

ភ្នំពេញ៖ រដ្ឋាភិបាលកម្ពុជាបានចាប់ផ្តើមយកពន្ឋ លើអចលនទ្រព្យបានចាប់ផ្តើមជាច្រើនឆ្នាំមកហើយ ដើម្បីបង្កើនចំណូលជាតិ ប៉ុន្តែតើពន្ឋលើអចលនទ្រព្យមានការលើកលែងដែរឬទេ វាជាចម្ងល់មួយ។

ចំលើយគឺមានដូចតទៅនេះ តាមប្រកាសលេខ ៤៩៣ សហវ.ប្រក ចុះថ្ងៃទី ១៩ ខែកក្កដាឆ្នាំ២០១១ ពន្ធលើអចលនទ្រព្យនេះ ត្រូវបានលើកលែងដូចខាងក្រោម៖

ក- អចលនទ្រព្យដែលជាដីធ្លីកសិកម្ម។ ក្នុងករណីចំណែកណាមួយ នៃដីធ្លីកសិកម្មត្រូវបានយកមកសាងសង់ផ្ទះ អគារ ឬសំណង់ផ្សេងៗ ដែលមិនបម្រើផ្ទាល់ និងជាអចិន្ត្រៃយ៍ដល់សកម្មភាពកសិកម្ម។ ចំណែកដីនោះ មិនត្រូវបានលើកលែងពន្ធនេះទេ។

ខ- អចលនទ្រព្យដែលជាកម្មសិទ្ធរបស់រាជរដ្ឋាភិបាល ឬស្ថាប័នរាជរដ្ឋាភិបាល ។ ក្នុងករណីអចលនទ្រព្យ ដែលបានកត់ត្រាជាទ្រព្យសកម្ម របស់សហគ្រាសសាធារណៈ ឬក្រុមហ៊ុនចម្រុះរដ្ឋ អចលនទ្រព្យនោះមិនត្រូវបានលើកលែងពន្ធនេះទេ។

គ- អចលនទ្រព្យដែលជាកម្មសិទ្ធិរបស់សហគមន៍ ឬបុគ្គលណាមួយដែល៖ a-ត្រូវបានរៀបចំឡើង និងដំណើរការសម្រាប់គោលដៅសុទ្ធសាធខាងសាសនា និងសប្បុរសធម៌ b-គ្មានចំណែកណាមួយនៃអចលនទ្រព្យ ឬប្រាក់ចំណូលត្រូវបានប្រើប្រាស់ជាប្រយោជន៍ឯកជន។

ការលើកលែងពន្ធនេះមិនរាប់បញ្ចូលលើអចលនទ្រព្យមួយចំនួន

– អចលនទ្រព្យដែលត្រូវបានជួល ឬផ្តល់ឱ្យបណ្តោះអាសន្ន សម្រាប់គោលដៅសុទ្ធសាធខាង សាសនា និងសប្បុរសធម៌។

– អចលនទ្រព្យជាកម្មសិទ្ធិរបស់អង្គការសានា ឬអង្គការសប្បុរសធម៌ ដែលបានជួលឬផ្តល់ជាបណ្តោះអាសន្នឱ្យទៅសហគមន៍ ឬបុគ្គលណាមួយ ដែលប្រើប្រាស់អចលនទ្រព្យនោះក្រៅពីគោលដៅសាសនា និងសប្បុរសធម៌។

ឃ- អចលនទ្រព្យជាកម្មសិទ្ធិរបស់៖ -បេសកម្មការទូត ឬកុងស៊ុលបរទេស – អង្គការអន្តជាតិ និងទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលនានា ដែលទទួលស្គាល់ដោយរាជរដ្ឋាភិបាល។

ង- អចលនទ្រព្យដែលជាហេដ្ឋារចនាសម្ព័ន្ធ រួមមាន ផ្លូវ ស្ពាន ប្រព័ន្ធផលិតទឹកស្អាត ឬ ផលិតអគ្គិសនី ព្រលានយន្តហោះ កំពង់ផែ ស្ថានីយអយស្ម័យយាន រួមបញ្ចូលទាំងអគារ និងការិយាល័យ ដែលបម្រើផ្ទាល់ដល់សម្មភាព នៃហេដ្ឋារចនាសម្ព័ន្ធទាំងនេះ។

ច- ផ្ទះ អគារ និងសំណង់ ផ្សេងៗ ដែលសាងសង់លើដីធ្លីកសិកម្ម ដែលបម្រើផ្ទាល់និងជាអចិន្ត្រៃ ដល់សកម្មភាពកសិកម្ម។

ឆ- អចលនទ្រព្យដែលទទួលរងនូវការខូចខាតធ្ងន់ធ្ងរ ដោយករណីប្រធានសក្តិ ដែលជាបាតុភូត ឬជាព្រឹត្តការណ៍កើតឡើងដោយមិនដឹងជាមុន មិនអាចប៉ាន់ស្មានជាមុនបាន និងមិនអាចជំនះបាន ដូចជាគ្រោះធម្មជាតិ (ទឹកជំនន់ ខ្យល់ព្យុះ រញ្ជួយដី) សង្គ្រាម កុប្បកម្ម អគ្គិភ័យ ឬ គ្រោះមហន្តរាយ ជាយថាហេតុ។

ជ-ផ្ទះអគារ និងសំណង់ដែលកំពុងត្រូវបានសាង់សង់តិចជាង ៨០% (ប៉ែតសិបភាគរយ) និងមិនទានបានប្រើប្រាស់។

ឈ- អចលនទ្រព្យដែលស្ថិតក្នុងតំបន់សេដ្ឋកិច្ចពិសេស ដែលបម្រើសផ្ទាល់ដល់សកម្មភាពផលិតកម្ម៕

តើការទិញខុនដូទុកជួលអាចជះឥទ្ធិពលអ្វីខ្លះដល់អ្នកវិនិយោគ?

July 27, 2019

0

ដោយៈ រ៉ាណេត

ភ្នំពេញៈ ទីផ្សារខុនដូបានចាប់់ផ្តើមប្រែប្រួល ខណៈប្រជាពលរដ្ឋខ្មែរចាប់ផ្តើមទិញរស់នៅ និងជនបរទេសពិសេសជនជាតិចិនបានទិញ ដើម្បីវិនិយោគកាន់តែច្រើន ប៉ុន្តែសំណួរសួថាតើទីផ្សារខុនដូ នឹងជះឥទ្ឋិពលដូចម្តេចដល់ការវិវត្តនៃសេដ្ឋកិច្ចសង្គម។

សំណង់អគារខុនដូមួយចំនួន ជាពិសេសនៅក្នុងក្រុងភ្នំពេញ ត្រូវបានគេមើលឃើញថា កំពុងតែមានសកម្មភាពប្រើប្រាស់គួរឱ្យកត់សម្គាល់ ដែលផ្ទុយពីសំណង់ខុនដូដែលស្ថិតនៅតំបន់មួយចំនួនទៀត មានភាពលំបាកក្នុងការរកទីផ្សារ ខណៈដែលអ្នកវិនិយោគមួយចំនួនបានទិញទុកលក់បន្តយកចំណេញ និងក្នុងគោលបំណងដាក់ជួលបន្ត។

នាយកក្រុមហ៊ុនអចលនទ្រព្យ TOWN CITY Real Estate លោកវ៉ន ចាន់ថន បានមានប្រសាសប្រាប់តាមទូរស័ព្ទកាលពីថ្ងៃទី២៦ ខែកក្កដា ឆ្នាំ២០១៩នេះថា ទីផ្សារខុនដូនៅពេលបច្ចុប្បន្ននេះគឺមានទីផ្សារ និងតម្រូវការជាងឆ្នាំកន្លងទៅ។ លោកបានបន្តទៀតថា បច្ចុប្បន្ននេះខុនដូមានតម្រូវការច្រើន ជាគំរោងមានតម្លៃមធ្យម និងស្ថិតនៅក្នុងទីប្រជុំជនក្រុង។

លោកបន្តទៀតថា “ពីមុនអ្នកដែលរស់នៅខុនដូភាគច្រើនជាជនជាតិបរទេស ប៉ុន្តែឥឡូវក៏មានជនជាតិខ្មែររស់នៅដែរ ហើយមានជនបរទេសខ្លះគាត់ទិញទុកជួលបន្តឱ្យអតិថិជនជាជនជាតិខ្មែរក៏មានដែរ”។ លោកបន្តថា “នៅក្នុងក្រុងមានការពេញនិយមច្រើន ដែលស្ទើរតែរកខុនដូជួលគ្មានផង ខុសប្លែកពីខុនដូមួយចំនួនទៀត ដែលស្ថិតនៅឆ្ងាយពីក្រុង មានន័យថា ខុនដូមានទីផ្សារ ឬគ្មានទីផ្សារ សំខាន់បំផុតគឺស្ថិតនៅលើទីតាំង”។

លោកចាន់ថនបានបញ្ជាក់ថា ខុនដូដែលពិបាករកទីផ្សារ ដោយសារតែយូនីតមានទំហំតូចជាង៧០ម៉ែត្រការ៉េ ប៉ុន្តែបើយូនីតមានទំហំទូលាយ បន្ទប់គេងចំនួន១ អាចមានតម្លៃក្នុងរង្វង់ ៨០០-១០០០ដុល្លារក្នុងមួយខែ ប៉ុន្តែបើមានបន្ទប់ចំនួន២អាចមានតម្លៃក្នុងរង្វង់១៥០០-១៨០០ដុល្លារក្នុងមួយខែ។

នៅដំណាច់ឆ្នាំ២០១៩នេះ ត្រូវបានគេរំពឹងថា នឹងកើនឡើងរហូតដល់ប្រមាណ ៣១,១០០យូនីត ខណៈបច្ចុប្បន្នមានចំនួន១៦,៦៥៨យូនីត កំពុងដាក់នៅក្នុងទីផ្សារ។ចំនួននេះមានការកើនឡើងរហូដល់១០ដង បើប្រៀបធៀបកាលពីឆ្នាំ២០១៦។

នាយិកាប្រចាំប្រទេសក្រុមហ៊ុន CBRE Cambodia លោកស្រីអាន សុធីតា បានមានប្រសាសន៍ប្រាប់តាមទូរស័ព្ទនៅថ្ងៃជាមួយគ្នានេះផងដែរថា “តាមដែលខ្ញុំកត់សម្គាល់ ភាគច្រើអ្នកទិញទុកជួលភាគច្រើនគឺមានតែជនបរទេស ប៉ុន្តែបើជនជាតិខ្មែរគឺទិញដើម្បីរស់នៅ”។លោកស្រីបន្តថា “និយាយពីការជួល ភាគច្រើនគឺគេជ្រើសរើសយកសេវាអាផាតមិន បើទោះជាតម្លៃនៃការជួលមានកម្រិតខ្ពស់ជាងខុនដូក៏ដោយ”។

លោកស្រីបានបញ្ជាក់ថា ការជួលអាផាតមិនថ្លៃបន្តិចមែន ប៉ុន្តែវាមានសេវាបម្រើពេញលេញ ទាំងផ្នែកសន្ដិសុខ អនាម័យ ចំណតយានយន្ត សេវាអ៊ីនធើណែត និងសេវាជាច្រើនទៀត ដែលផ្ទុយពីការរស់នៅក្នុងខុនដូ តម្រូវចំណាយបន្ថែមទៅលើសេវាទាំងអស់នេះ៕

រដ្ឋាភិបាលនឹងវិនិយោគទឹកប្រាក់រាប់ពាន់លានដុល្លារលើហេដ្ឋារចនាសម្ព័ន្ធធំៗចំនួន៧ក្នុងរយៈពេល៣ ទៅ៥ឆ្នាំខាងមុខ

July 26, 2019

0

ដោយ វុត្ថា

ភ្នំពេញៈ រដ្ឋាភិបាលកម្ពុជាបានដាក់ផែនការអភិវឌ្ឍន៍ហេដ្ឋារចនាសម្ព័ន្ធធំៗចំនួន៧ ដោយគ្រោងចំណាយទឹកប្រាក់រាប់ពាន់លានដុល្លារក្នុងរយៈពេល៣ឆ្នាំ ទៅ៥ឆ្នាំខាងមុខនេះ ដើម្បីជំរុញល្បឿនសេដ្ឋកិច្ចកម្ពុជា ពិសេសដោះស្រាយបញ្ហាប្រឈមលើវិស័យដឹកជញ្ជូន។

គេហទំព័រ propertyarea.asia ដែលជាគេហទំព័រព័ត៌មានអចលនទ្រព្យឈានមុខគេនៅកម្ពុជា នឹងយកគម្រោងទាំងអស់នេះមកចុះផ្សាយ ដែលប្រកាសដោយរដ្ឋាភិបាលកម្ពុជានាពេលកន្លងមកនេះ រួមមាន៖

១) ស្ពានឆ្លងកាត់ទន្លេមេគងខេត្តក្រចេះ

ស្ពាននេះត្រូវបានអ្នកជំនាញរបស់ក្រសួងសាធារណៈការ និងដឹកជញ្ជូន រួមជាមួយក្រុមហ៊ុនសាសង់ស្ពានរបស់ចិនបានសិក្សា៣ ទីតាំងសម្រាប់សាងសង់ស្ពានឆ្លងកាត់ទន្លេមេគង់នៅខេត្តក្រចេះរួចហើយ ដែលគ្រោងនឹងសាងសង់នៅឆ្នាំ២០២១ ខាងមុនេះ។ស្ពាននេះមានប្រវែងសរុប១៧៦១ម៉ែត្រ ដែលទទួលប្រាក់កម្ចីសម្បទានពីរដ្ឋាភិបាលចិន។

២) គម្រោងសាងសង់ផ្លូវជាតិលេខ១០

គម្រោងសាងសង់ផ្លូវជាតិលេខ១០ ដែលតភ្ជាប់ពីស្រុកសំឡូតខេត្តបាត់ដំបង ទៅកាន់ខេត្តកោះកុង នឹងត្រូវសម្ពោធបើករដ្ឋានដោយសម្តេចតេជោហ៊ុន សែននាពេលឆាប់ៗខាងមុខនេះ។ គំរោងសាងសង់ផ្លូវជាតិដ៏សំខាន់នេះ គ្រោងចំណាយថវិកាប្រមាណ១៨៣លានដុល្លារអាមេរិក សម្រាប់សាងសង់ផ្លូវជាតិលេខ១០ឡើងវិញ និងមានប្រវែងប្រមាណ ១៩៣គីឡូម៉ែត្រតភ្ជាប់ពីសំឡូត ស្រុកវាលវែង ខេត្តពោធិសាត់ ឆ្ពោះទៅកាន់ខេត្តកោះកុងនាពេលខាងមុខនេះ។

៣) គម្រោងសាងសង់ផ្លូវហាយវ៉េភ្នំពេញ-បាវិត

រដ្ឋាភិបាលបានប្រកាសថា នឹងសាងសង់ផ្លូវល្បឿនលឿនភ្នំពេញ បាវិត នាពេលខាងមុខនេះ ខណៈផ្លូវមួយនេះ បាននឹងកំពុងសិក្សា។

លោក វ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនធ្លាប់បានឲ្យដឹងកន្លងមកថា គំរោងសាងសង់ផ្លូវល្បឿនលឿននេះ សិក្សាដោយអ្នកជំនាញអង្គការ JICA រួចហើយ ដោយចំណាយថវិកាសរុប ៣៨០០លានដុល្លារ ដែលជាការចំណាយដ៏ធំធេងមួយ។

អ្នកនាំពាក្យក្រសួងសាធារណៈការរូបនេះបានបន្តថា “ផ្លូវល្បឿនលឿនភ្នំពេញ បាវិត ដែលសិក្សាចំណាយអស់ច្រើនកន្លងមក ដោយសារផ្លូវនេះត្រូវធ្វើស្ពានប្រវែងជា១០គីឡូម៉ែត្រ នៅតំបន់ស្រុកល្វាឯម ដោយសារផ្លូវនេះគ្រោងធ្វើនៅផ្នែកខាងឆ្វេងទន្លេមេគង្គ”។

លោកបន្តថា “ផ្លូវនេះនឹងឆ្លងកាត់រាជធានីភ្នំពេញ ខេត្តកណ្តាល ខេត្តព្រៃវែងមុនតភ្ជាប់ទៅកាន់ក្រុងបាវិត ខេត្តស្វាយរៀង”។

៤) គម្រោងសាងសង់ស្ពានស្វាយជ្រុំ-អរិយក្សត្រ

គម្រោងសាងសង់ស្ពានថ្មី ឆ្លងទន្លេមេគង្គ តភ្ជាប់ទៅស្វាយជ្រុំ-អរិយក្សត្រ ទទួលបានភ្លើងខៀវ ពីភាគីកូរ៉េ ក្នុងការជួយសាងសង់ស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គដែលបានស្នើឡើងដោយរដ្ឋាភិបាលកម្ពុជាំ។

បច្ចុប្បន្ន គម្រោងស្ពាននេះកំពុងស្ថិតក្រោមការសិក្សា និងកំពុងរកប្រភពថវិកា ហើយរដ្ឋាភិបាល នឹងធ្វើជូនប្រជាពលរដ្ឋជាដាច់ខាត។

៥) គម្រោងសាងសង់ផ្លូវជាតិលេខ២

គម្រោងការសាងសង់ផ្លូវជាតិលេខ២ ពីរង្វង់មូលតាខ្មៅ ទៅរង្វង់មូលអូរចំបក់ និងផ្លូវជាតិលេខ២២ ពីរង្វង់មូលអូរចំបក់ទៅកាន់ផ្សារអង្គតាសោម ប្រវែងសរុប៧២,១៧គីឡូម៉ែត្រ សាងសង់ដោយក្រុម Hanshin Engineering and Construction Co., Ltd ត្រួតពិនិត្យលក្ខណៈបច្ចេកទេស ដោយក្រុមហ៊ុនទីប្រឹក្សាបច្ចេកទេស Joint Venture of Dasan Consultants Co., Ltd, ក្រុមហ៊ុន Dong II Engineering Consultants Co., Ltd, និងក្រុមហ៊ុន Seoyoung Engineering Co., Ltd ដោយប្រើប្រាស់ថវិកាជាង ៤៥លានដុល្លារអាមេរិក ក្រោមគម្រោងឥណទានសម្បទានពីរដ្ឋាភិបាលកូរ៉េ ចំណាយរយៈពេល ៣០ខែ និងគ្រោងបើកការដ្ឋានសាងសង់នៅចុងឆ្នាំ២០១៩នេះ។

៦) គម្រោងសាងសង់ផ្លូវល្បឿនលឿន ផ្លូវរថភ្លើងល្បឿងលឿនពីភ្នំពេញសៀមរាប

រដ្ឋាភិបាលបានដាក់ផែនការការសិក្សាលើការអភិវឌ្ឍ និងពង្រីកប្រព័ន្ធហេដ្ឋារចនាសម្ព័ន្ធនានា ដូចជាការសាងសង់ផ្លូវល្បឿនលឿន ផ្លូវរថភ្លើងល្បឿងលឿន ការពង្រីកផ្លូវថ្នល់ ការសាងសង់ព្រលានយន្តហោះអន្តរជាតិថ្មី ដែលធំជាងមុន ដើម្បីតភ្ជាប់ខេត្តសៀមរាបជាមួយរាជធានីភ្នំពេញ និងតាមបណ្តាខេត្តសំខាន់នានា។

៧) គម្រោងសាងសង់ផ្លូវរថភ្លើងលើអាកាសដោយស្វ័យប្រវត្តិ (AGT) នៅភ្នំពេញ

រដ្ឋាភិបាលតាមរយៈក្រសួងសាធារណៈការ និងដឹកជញ្ជូនបាននឹងកំពុងពន្លឿនការសិក្សាគម្រោងផ្លូវរថភ្លើងរត់លើអាកាស និងក្រោមដីនៅក្នុងរាជធានីភ្នំពេញ ដើម្បីកាត់បន្ថយការកកស្ទះចរាចរណ៍ និងកាត់បន្ថយការចំណាយរបស់ប្រជាពលរដ្ឋ។

ក្រសួងសាធារណការ និងដឹកជញ្ជូនគ្រោងសាងសង់ផ្លូវរថភ្លើង លើអាកាសដោយស្វ័យប្រវត្តិ (AGT) ចំនួន ៤ ខ្សែរត់ក្នុងរាជធានីភ្នំពេញ ដែលអង្គការ JICA ក៏សិក្សាផងដែរ។ ខ្សែរត់ភ្លើងទាំងនេះមានប្រវែងប្រហែល១៨ គីឡូម៉ែត្រ ដែលរត់លើផ្លូវមួយចំនួនដូចជា មហាវិថីហ្សាលឌឺហ្គោល មហាវិថីព្រះមុនីរ៉េត ផ្លូវលេខ២១៧ ផ្លូវវេងស្រេងឆ្ពោះទៅព្រលានយន្តហោះ និងមួយខ្សែទៀតបែកខ្នែងទៅផ្លូវជាតិលេខ៤ និងកប់ស្រូវ។

ជាមួយគ្នានេះក្រសួងសាធារណៈការ និងដឹកជញ្ជូន ក៏បានផ្តល់ឱ្យក្រុមហ៊ុនសាជីវកម្មសាងសង់ផ្លូវដែកចិន (CRCC) ធ្វើការសិក្សាផ្លូវរថភ្លើងលើអាកាសដឹកអ្នកដំណើរធុនស្រាល (Monorail) និងរថភ្លើងក្រោមដី (Subway) នៅរាជធានីភ្នំពេញផងដែរ៕

ផ្សារទំនើបដំបូងគេនៅក្រុងព្រះសីហនុ FURI TIMES SQAURE គ្រោងបើកដំណើរការសាកល្បងនៅចុងខែតុលាខាងមុខនេះ

July 26, 2019

0

ដោយៈ រ៉ាណេត

ភ្នំពេញៈ ផ្សារទំនើបដ៏ធំទីមួយ និងលើកដំបូងគេនៅក្នុងក្រុងព្រះសីហនុ FURI TIMES SQUARE Mall ដែលប្រមូលផ្តុំទៅដោយហាងលក់ទំនិញម៉ាកល្បីៗ គ្រោងនឹងចាប់បើកដំណើរការសាកល្បង នៅត្រឹមដំណាច់ខែតុលា ឆ្នាំ២០១៩ ឆាប់ៗ ខាងមុខនេះ។

នៅក្នុងកិច្ចជំនួបពិភាក្សាការងារបង្ហាញ ពីលទ្ធផលនៃការសាងសង់ តុបតែងលម្អ ដើម្បីឈានទៅរកការសម្រេចប្រកាសសម្ពោធ បើកដំណើរការលក់ជាផ្លូវការ ត្រូវបានធ្វើឡើងនៅការិយាល័យកណ្តាលក្រុមហ៊ុន FURI COPORATION ដែលមានទីតាំងនៅរាជធានីភ្នំពេញ កាលពីរសៀលថ្ងៃទី២៦ ខែកក្កដា ឆ្នាំ២០១៩នេះ។

សមាជិកពាក់ព័ន្ធដែលបានចូលរួមនៅក្នុងកម្មវិធីជំនួបខាងលើនេះ រួមមានអគ្គនាយកក្រុមហ៊ុន FURI COPORATION ដែលជាអ្នកវិនិយោគ និងអភិវឌ្ឍ គណៈគ្រប់គ្រងគម្រោងផ្សារទំនើប FURI TIMES SQUARE Mall , នាយកគ្រប់គ្រងផ្នែកទីផ្សារ និងការលក់គម្រោងផ្សារទំនើប FURI TIMES SQUARE Mall អ្នកតំណាងក្រុមហ៊ុនសាងសង់ តំណាងក្រុមហ៊ុនរចនាម៉ូដ និងតុបតែង (Design) អ្នកតំណាងគុណភាពសំណង់ រួមជាមួយនឹងបណ្តាអ្នកតំណាងហាងទំនិញនានា ដែលជួលទីតាំងលក់រាយនៅក្នុងផ្សារទំនើប FURI TIMES SQUARE Mall សរុបជិត៣០នាក់។

នាយកគ្រប់គ្រងផ្នែកទីផ្សារ និងលក់ កញ្ញា លឹម សុខាដាវីន បានឱ្យដឹងថា ពេលនេះដំណើរការសាងសង់ផ្សារទំនើប FURI TIMES SQUARE Mall បានសម្រេចជាង៩០ភាគរយហើយ ពោលគឺនៅសល់តែការត្រៀមបញ្ចប់ការតុបតែងលម្អ (Design) ហាងលក់ទំនិញនានា ដែលជាអតិថិជនទីតាំងលក់រាយនៅក្នុងផ្សារ និងការសម្អាតតែប៉ុណ្ណោះ។

កញ្ញាបានបន្តទៀតថា “ចំពោះការជួលទីតាំងលក់រាយ នៅក្នុងផ្សារទំនើបរបស់យើងគឺបានសម្រេចយ៉ាងជោគជ័យ ដែលរហូតមកដល់ពេលនេះ ទីតាំងទំនេរ គឺនៅសល់ត្រឹមតែជាង១០ភាគរយ ទីតាំងសរុបតែប៉ុណ្ណោះ”។ កញ្ញាបានបញ្ជាក់ថា “ផ្អែកតាមលទ្ធផលនៃការសាងសង់ តាមគម្រោងនៅត្រឹមចុងខែតុលា ឆ្នាំ២០១៩ឆាប់ៗខាងមុខនេះ យើងនឹងផ្តើមបើកដំណើរការលក់សាកល្បងជាជំហានដំបូង ហើយនឹងគ្រោងកាត់ខ្សែបូណ៌សម្ពោធបើកដំណើរការជាផ្លូវការនៅពេលបន្ទាប់”។

គម្រោងផ្សារទំនើប Furi Times Square Mall ដែលមានទីកន្លែងលក់រាយនិងកន្លែងកំសាន្តចំនួន ៦,០០០ម៉ែត្រការ៉េ ត្រូវបានជ្រើសរើសនៅក្នុងប្រភេទរចនាស្ថាបត្យកម្មល្អបំផុតនៅឯពិធីពានរង្វាន់អចលនទ្រព្យកម្ពុជា។ ផ្សារទំនើប FURI TIMES SQUAREMall មានកំពស់ ៥ជាន់នេះ ស្ថិតនៅលើផ្លូវឯករាជ្យ ស្ថិតក្នុងសង្កាត់មិត្តភាព ខ័ណ្ឌមិត្តភាព ក្រុងព្រះសីហនុ៕

ក្រុមហ៊ុនចិនគ្រោងវិនិយោគលើវិស័យអចលនទ្រព្យដ៏ធំសម្បើមនៅប្រទេសឥណ្ឌូនេស៊ី

July 26, 2019

0

ដោយ Donald Lee

ហ្សាការតាៈ យោងតាមរបាយការណ៍មួយ ដែលចេញផ្សាយនៅទីក្រុងហ្សាការតាបានឱ្យដឹងថា ប្រតិបត្តិករជាច្រើនមកពីក្រុមហ៊ុនអភិវឌ្ឍន៍ អចលនទ្រព្យចិនជាច្រើនបានជួបជាមួយរដ្ឋមន្រ្តីក្រសួងកិច្ចការ សម្របសម្រួលឥណ្ឌូនេស៊ី លោកLuhut Pandjaitan កាលពីថ្ងៃអង្គារ។

លោក Luhut បាននិយាយថា “ពួកគេចង់វិនិយោគ ដូច្នេះពួកគេបានមកទីនេះ” ។ នាយកប្រតិបត្តិទាំងនោះ បានបញ្ជាក់ពីគោលបំណងរបស់ខ្លួន ក្នុងការវិនិយោគលើវិស័យអចលនទ្រព្យ ដែលកំពុងតែរីកលូតលាស់ នៅទីក្រុងហ្សាការតា ប្រទេសឥណ្ឌូនេស៊ីក្នុងអំឡុងពេលកិច្ចប្រជុំនេះ។

អ្នកអភិវឌ្ឍន៍ដ៏សំខាន់មួយ ដែលមាននៅក្នុងក្រុមនាយកប្រតិបត្តិទាំងនោះ គឺក្រុមហ៊ុន China Fortune Land Developer( CFLD) ។ ក្រុមហ៊ុន CFLD គឺជាអ្នកអភិវឌ្ឍន៍ដ៏ធំមួយនៅក្នុងប្រទេសចិនដីគោក ដែលមានចំណូលជាង
៥,៥ ពាន់លានដុល្លារក្នុងមួយឆ្នាំ។

ក្រុមហ៊ុន CFLD បាន និងកំពុងវិនិយោគ នៅក្នុងវិស័យអចលនទ្រព្យនៅឥណ្ឌូនេស៊ីដែលមានទឹកប្រាក់ចំនួន ១,៣៥ ពាន់លានដុល្លារ។ ក្រុមហ៊ុននេះបានចាប់ផ្តើមគម្រោងរួចហើយនៅតំបន់ Tangerang ទីក្រុងហ្សាការតា និង Java នៅប៉ែកខាងលិចនៅទីក្រុង។

រដ្ឋាភិបាលឥណ្ឌូនេស៊ីបាន និងកំពុងធ្វើការទាក់ទាញវិនិយោគទុន ដោយផ្ទាល់ពីបរទេស។ យោងតាមក្រុមប្រឹក្សាសម្របសម្រួលការវិនិយោគ របស់ឥណ្ឌូនេស៊ី (BKPM) បានឱ្យដឹងថា សឹង្ហបូរីជាវិនិយោគិនធំបំផុតនៅក្នុងប្រទេស ដែលមានការវិនិយោគចំនួន ១,៧ ពាន់លានដុល្លារ។ ប្រទេសចិនជាប់ចំណាត់ថ្នាក់ទី២ នៅក្នុងការវិនិយោគ ១,២ពាន់លានដុល្លារ បន្ទាប់មកប្រទេសជប៉ុនមានចំនួន ១,១ពាន់លានដុល្លារ ម៉ាឡេស៊ីមាន ៧០០លានដុល្លារ និងហុងកុង ៦០០លានដុល្លារ៕

ភាពជាអ្នកដឹកនាំឆ្នើមទាក់ទាញម្ចាស់អាជីវកម្ម ៥០០នាក់ចូលរួមជាមួយគ្រូបង្វឹកលំដាប់ពិភពលោក

July 26, 2019

0

ដោយ គង់ សូរិយា

ភ្នំពេញៈ ស៊ីអ៊ីអូ ម៉ាស្ទ័រក្លឹប នៃវិទ្យាស្ថានស៊ីអ៊ីអូ បានរៀបចំ “កម្មវិធីសង្គមប្រចាំឆ្នាំ ២០១៩ ស្តីពី ភាពជាអ្នកដឹកនាំឆ្នើម” នៅមជ្ឈមណ្ឌលសហប្រតិបត្តិការ កម្ពុជា-ជប៉ុន (CJCC) ដែលមានម្ចាស់អាជីវកម្មកម្ពុជាប្រមាណ ៥០០នាក់ចូលរួមជាមួយនឹងគ្រូបង្វឹកលំដាប់ពិភពលោក។

ថវិកាប្រមូលបាននឹងប្រគល់ជូនដល់អង្គការ Raven’s Hope International ទាំងអស់ ដើម្បីយកទៅជួយដល់ការពង្រឹងសមត្ថភាពស្រ្តីខ្មែរអាយុ១៨-៣០ឆ្នាំដែលមានជីវភាពខ្វះខាត និងមានបញ្ហាគ្រួសារ។

កម្មវិធីជួយដល់សង្គមប្រចាំឆ្នាំនេះ មានការអញ្ជើញចូលរួមពីវាគ្មិនជាតិនិងអន្តរជាតិល្បីៗ ដែលមានជំនាញ និងបទពិសោធន៍ក្នុងការដឹកនាំ និងគ្រប់គ្រង ០២រូប រួមមាន៖ លោក អោម សេងបូរ៉ា ស្ថាបនិក ស៊ីអ៊ីអូ ម៉ាស្ទ័រក្លឹប នៃ វិទ្យាស្ថានស៊ីអ៊ីអូ និង លោកស្រី Karen Robinson អ្នកជំនាញភាពជាដឹកនាំ ក្រុម John Maxwell (Leadership Expert with John Maxwell Team) មកពីសហរដ្ឋអាមេរិក។

ការបើកវគ្គបំពាក់បំប៉នពិសេសប្រចាំឆ្នាំនេះ ធ្វើឡើងគោលបំណងចំនួនពីរ ដែលទីមួយ ជួយបង្វឹកបុគ្គលិករបស់បងប្អូនសមាជិកគ្រួសារ CEO Master Club ឲ្យក្លាយជាបុគ្គលិកឆ្នើម ក្លាយជាបុគ្គលិកទ្រព្យ ក្លាយជាបុគ្គលិកដែលស្រលាញ់ការងារ ស្រលាញ់ដឹងគុណថៅកែ ដឹងគុណក្រុមហ៊ុន ក្លាយជាបុគ្គលិកមានសមត្ថភាព អត្តចរិកល្អ មានវិន័យ ផ្នត់គំនិតវិជ្ជាមាន ក្លាយជាបុគ្គលិកមានគុណតម្លៃ មានភាពស្មោះត្រង់ អាចឡើងតំណែងបានលឿន និងមានការទទួលខុសត្រូវខ្ពស់។ និងទីពីរ ជួយដល់ស្រ្តីវ័យក្មេងដែលជួបការលំបាកនៅអង្គការ Raven’s Hope International នៅប្រទេសកម្ពុជានិងនៅសហរដ្ឋអាមេរិក។

ស្ថាបនិករបស់ CEO Master Club នៃ វិទ្យាស្ថានស៊ីអ៊ីអូ លោក អោម សេងបូរ៉ា បានមានប្រសាសន៍ថា “បើយើងទាំងអស់គ្នាចង់ឱ្យកម្ពុជា ក្លាយជាប្រទេសអ្នកមានបានឆាប់រហ័ស ដាច់ខាតត្រូវតែជួយកសាងសមត្ថភាព និងជ្រោមជ្រែងសហគ្រិននៅក្នុងស្រុកឱ្យមានភាពរឹងមាំ”។ លោកបន្តថា “នៅពេលសហគ្រិនរឹងមាំ សហគ្រិនយើងអាចធ្វើរឿងសំខាន់ៗដូចជា ទី១ បានបង្កើតផលិត ផលសេវាកម្មឆ្លើយតបតាមតម្រូវការរបស់សង្គមជាតិ ទី២ បង្កើតការងារ និងប្រាក់ចំណូលជូនប្រជាពលរដ្ឋបានច្រើន ទី៣ ចូលរួមចំណែកកសាងគុណភាពធនធានមនុស្សបានច្រើន។

ទី៤.ចូលរួមបង្កើនចំណូលពន្ធជូនរដ្ឋបានច្រើន ដែលទាំងនេះបានចូលរួមចំណែកជាមួយរាជរដ្ឋាភិបាល ក្នុងការជម្រុញឱ្យសេដ្ឋកិច្ចជាតិ មានការរីកចម្រើនបានឆាប់រហ័ស និងរឹងមាំយូរអង្វែង”។

CEO Master Club ជាស្ថាប័នប្រមូលផ្ដុំ និងបង្វឹកម្ចាស់អាជីវកម្មខ្នាតតូច និងមធ្យមនៅកម្ពុជាឱ្យក្លាយទៅជាអគ្គនាយក ដែលមានលក្ខណៈអាជីព និងមានសមត្ថភាពខ្ពស់ក្នុងការដឹកនាំគ្រប់គ្រងចាត់ចែងស្ថាប័ន អាជីវកម្មរបស់ខ្លួនពីតូចទៅធំ ពីលក្ខណៈគ្រួសារទៅស្តង់ដារ ពង្រីកបណ្តាញការលក់កាន់តែទូលាយ លើកកេរ្តិ៍ឈ្មោះអាជីវកម្មរបស់ខ្លួនបានកាន់តែខ្លាំង ដើម្បីចូលរួមចំណែកអភិវឌ្ឍសេដ្ឋកិច្ចក្នុងស្រុកឱ្យមានភាពរឹងមាំ។

គិតត្រឹមខែកក្កដានេះ CEO Master Club កើនសមាជិកសរុបចំនួន៨៧៥នាក់ ដែលកំពុងបើកដំណើរការអាជីវកម្មជាង១,០០០ ក្រុមហ៊ុន និងចូលរួមបង្កើតការងារជូនប្រជាពលរដ្ឋចំនួនជាង ៣០,០០០នាក់៕

កម្ពុជា-ម៉ាឡេស៊ីបង្កើនកិច្ចសហប្រតិបត្តិការដឹកជញ្ជូនផ្លូវគោក និងផ្លូវអាកាស

July 26, 2019

0

ដោយ វុត្ថា

ភ្នំពេញ៖ កម្ពុជា-ម៉ាឡេស៊ី បានព្រមព្រៀងឯកភាពគ្នា ពង្រីកកិច្ចសហប្រតិបត្តិការបន្ថែមទៀតលើវិស័យដឹកជញ្ជូនសំខាន់ពីរ ទីមួយវិស័យអាកាសចរណ៍ស៊ីវិល និងទី២ វិស័យដឹកជញ្ជូនឆ្លងកាត់តាមកំពង់ផែស្វយ័តក្រុងព្រះសីហនុ ខណៈវិស័យដឹកជញ្ជូនៃប្រទេសទាំងពីរនៅមានកម្រិត។

លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានឱ្យដឹងនៅថ្ងៃទី ២៦ ខែកក្កដា ឆ្នាំ ២០១៩ នេះបានជំរុញឱ្យភាគីម៉ាឡេស៊ីពិភាក្សាដោយផ្ទាល់អាកាសចរណ៍ស៊ីវិលកម្ពុជា និងឯកអគ្គរាជទូតម៉ាឡេស៊ីនឹងដឹកនាំគណប្រតិភូចុះទៅខេត្តព្រះសីហនុ ដើម្បីសិក្សាស្វែងយល់ដោយផ្ទាល់ និងសហការគ្នាបន្ថែមទៀតលើវិស័យនេះ។

លោក Eldeen Husaini Mohd Hashim ឯកអគ្គរាជទូតម៉ាឡេស៊ីប្រចាំនៅកម្ពុជាសន្យាថា នឹងជំរុញឱ្យវិនិយោគិន និងក្រុមហ៊ុនធំៗនៅម៉ាឡេស៊ី ដែលមានសមត្ថភាពកសាងផ្លូវថ្នល់ ពិសេសក្រុមហ៊ុនដែលកសាងផ្លូវថ្នល់ផ្អែកលើគោលការណ៍កសាង ប្រតិបត្តិ ផ្ទេរ (BOT) មកធ្វើការសិក្សាស្វែងយល់ និងអភិវឌ្ឍហេដ្ឋារចនាសម្ព័ន្ធផ្លូវថ្នល់ និងការដឹកជញ្ជូននៅកម្ពុជា។

លោកទេសរដ្ឋមន្រ្តីបានសម្តែងនូវអំណរគុណយ៉ាងជ្រាលជ្រៅដល់ភាគីម៉ាឡេស៊ី ដែលកន្លងបានជួយឧបត្ថម្ភកំណល់រថភ្លើងប្រើប្រាស់ហើយ កម្ពុជានឹងស្នើសុំកំណល់រថភ្លើងបន្ថែមទៀត ដើម្បីកសាងផ្លូវដែកកម្ពុជាឱ្យមានសន្ទុះរីកចម្រើនទៅមុខ។

បន្ថែមពីនេះ លោកទេសរដ្ឋមន្រ្តីបានសម្តែងនូវការស្វាគមន៍ប្រទេសម៉ាឡេស៊ីធ្វើកិច្ចសហប្រតិបត្តិការជាមួយប្រទេសកម្ពុជាអភិវឌ្ឍកំពង់ផែស្វយ័តក្រុងព្រះសីហនុ និងកំពង់ផែនៅប្រទេសម៉ាឡេស៊ី និងការជំរុញឱ្យក្រុមហ៊ុនវិនិយោគិនម៉ាឡេស៊ីចូលមក វិនិយោគនៅកម្ពុជា ដើម្បីអភិវឌ្ឍហេដ្ឋារចនាសម្ព័ន្ធនៅកម្ពុជា។

ទំហំពាណិជ្ជកម្មរវាងប្រទេសកម្ពុជា និងម៉ាឡេស៊ី បានកើនដល់ ៤៧៤លានដុល្លារសហរដ្ឋអាមេរិក នៅឆ្នាំ២០១៨ ខណៈឆ្នាំ២០១៧ មានប្រមាណតែ ៤១១លានដុល្លារសហរដ្ឋអាមេរិក។

ជាមួយគ្នានេះ ភាគីទាំងពីរបានផ្ដោតការយកចិត្តទុកដាក់ជាសំខាន់ទៅលើការជំរុញពាណិជ្ជកម្ម និង វិនិយោគ ការភ្ជាប់ទំនាក់ទំនងរវាងវិស័យឯកជន ការពង្រឹងទំនាក់ទំនងផ្នែកដឹកជញ្ជូន និងភស្តុភារ ការផ្លាស់ប្ដូរទស្សនកិច្ចរវាងភាគីទាំងពីរ ដើម្បីបង្កបរិយាកាសវិនិយោគល្អប្រសើរ និងផ្ដល់ទំនុកចិត្តកាន់តែខ្ពស់ដល់ពាណិជ្ជករ និងវិនិយោគិនបរទេស ជាពិសេសវិនិយោគិនមកពីប្រទេសម៉ាឡេស៊ី៕