រដ្ឋាភិបាលគ្រោងជួលជុលផ្លូវ ២២ខ្សែដើម្បីលើកកំពស់សោភ័ណភាពក្នុងក្រុងព្រះសីហនុ

July 10, 2019

ដោយ វុត្ថា

ព្រះសីហនុៈ រដ្ឋាភិបាលកម្ពុជាតាមរយៈក្រសួងសាធារណៈការ និងដឹកជញ្ជូន ព្រមទាំងអាជ្ញាធរខេត្តបើកកិច្ចប្រជុំស្តីពី គម្រោងវឌ្ឍនភាពជួសជុលផ្លូវ២២ខ្សែ ក្នុងក្រុងព្រះសីហនុ ដើម្បីលើកមុខមាត់ខេត្តព្រះសីហនុ។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន និងលោក គួច ចំរើន អភិបាល នៃគណៈអភិបាលខេត្តព្រះសីហនុបានបង្ហាញ នៃវឌ្ឍនភាពគម្រោង កែលម្អផ្លូវ ២២ខ្សែ ក្នុងក្រុងព្រះសីហនុ ក្នុងនោះបង្ហាញ ឱ្យឃើញរួមមាន១. គម្រោងអនុវត្តប្រើប្រាស់ថវិកាក្រសួងសាធារណការ និងដឹកជញ្ជូន។ ២.ផែនការគម្រោងអភិវឌ្ឍន៍តំបន់ឆ្នេរទេសចរណ៍នាគរាជ។ ៣.ផែនការស្តាបនាផ្លូវក្នុងតំបន់អភិវឌ្ឍន៍ក្នុងកំពង់ផែឧកញ៉ាម៉ុង។ ៤.គម្រោងរៀបចំហេដ្ឋារចនាសម្ព័ន្ធនានា ជាការងារអទិភាព ដើម្បីត្រៀមរៀបចំកិច្ចប្រជុំកំពូលអាស៊ានឆ្នាំ២០២២។

ក្រសួងនឹងប្រើប្រាស់ថវិកាជាតិជួសជុលផ្លូវចំនួន៣កំណាត់ ។ ក្រសួងក៏មានគម្រោងប្រើប្រាស់ឥណទានថវិការបស់រដ្ឋបាលថ្នាក់ក្រោមជាតិ ជួសជុលផ្លូវក្នុងក្រុងចំនួន១២ខ្សែ ក្នុងនោះមានផ្លូវចំនួន៦ខ្សែ គ្រោងនឹងប្រើប្រាស់ថវិកា ដែលបានមកពីសំណង់បណ្តាក្រុមហ៊ុន ឬវិនិយោគដែលធ្វើឱ្យផ្លូវខូចខាតក្នុងក្រុងព្រះសីហនុ ដោយសារការដឹកជញ្ជូនសំភារៈផ្សេងៗបំរើការ ក្នុងការសាងសង់អាគារប្រកបអាជីវកម្មធំៗតាមផ្លូវ ផ្វើឱ្យខូចខាតផ្លូវក្នុងខេត្ត។

កំពង់ផែស្វយ័តក្រុងព្រះសីហនុ ក៏មានគម្រោងប្រើប្រាស់ថវិកាផ្ទាល់របស់កំពង់ផែទទួលបន្ទុក (Overlay) ផ្លូវលេខ៧០០ ។ សរុបជារួមគម្រោងផ្លូវដែលត្រូវជួសជុលទាំង១២ខ្សែ មានផ្លូវលេខ ១០០ , ៨១៤ , ៨១៨ , ១០៣ ,១៤៣ ,៧០១ ,១០៨៣ ,២០៩ ,៨២៣ ,៨២៧ ,៨២១ , ៨២៥ ដែលមានតម្រូវការថវិកា ២៥.២៨៨លានរៀល។

ដោយឡែកគម្រោងឥណទានថ្នាក់ក្រោមជាតិ ក្នុងការជួសជុលផ្លូវទាំង១២ខ្សែក្នុងក្រុង បានបើកដំណើរការការដ្ឋានជួលជុលផ្លូវចំនួន៦ខ្សែរួចមកហើយ រីឯ៦ខ្សែផ្សេងទៀត រដ្ឋបាលខេត្តកំពុងមានការខ្វះខាតថវិកា រង់ចាំប្រើប្រាស់គម្រោងថវិកាក្នុងឆ្នាំ២០២០។

លោក គួច ចំរើនបានថ្លែងអំណរគុណដល់លោកទេសរដ្ឋមន្ត្រី ស៊ុន ចាន់ថុល ដែលបានជួយពន្លឿនគម្រោងប្រើប្រាស់ឥណទានថ្នាក់ក្រោមជាតិ ក្នុងការជួសជុលកំណាត់ផ្លូវ ១២ខ្សែ ក្នុងក្រុងព្រះសីហនុឡើងវិញ ដើម្បីជួយសម្រួលចរាចរណ៍ប្រជាពលរដ្ឋ និងភ្ញៀវទេសចរ និងកែលម្អសោភ័ណភាព និងបរិស្ថាន។

លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន បានជម្រុញឱ្យក្រុមការងារជំនាញ ពិនិត្យមើលលទ្ធភាព ក្នុងការកៀរគរ ឬខ្ចីប្រភពថវិកាផ្សេងៗ ដើម្បីយកមកស្ថាបនា ជួសជុលកំណាត់ផ្លូវ៦ខ្សែ ដែលខ្វះប្រភពថវិកាដែលជាឥណទានថវិកាថ្នាក់ក្រោមជាតិ និងកែលម្អផ្លូវផ្សេងៗទៀតក្នុងក្រុងព្រះសីហនុ ដើម្បីត្រៀមរៀបចំព្រឹត្តិការសំខាន់ៗនៅពេលខាងមុខមានដូចជា បុណ្យសមុទ្រនៅឆ្នាំ២០២០ និងរៀបចំកិច្ចប្រជុំកំពូលអាស៊ាននៅឆ្នាំ២០២២ខាងមុខ៕

ខេត្តកំពតកាន់តែមានសក្ដានុពលក្រោយការចាប់ផ្តើមអនុវត្តតាមប្លង់គោលអភិវឌ្ឍន៍

July 10, 2019

0

ដោយៈ រ៉ាណេត

កំពតៈ រាជរដ្ឋាភិបាលបានសម្រេចអនុញ្ញាតដាក់ឱ្យប្រើប្រាស់ និងអនុវត្តតាមប្លង់គោលជាស្ថាពរសំរាប់ខេត្តកំពត ដើម្បីធ្វើជាផែនទីចង្អុលផ្លូវ (Road Map) នៃផែនការអភិវឌ្ឍន៍ ដែលកាន់តែធ្វើឱ្យខេត្តមួយនេះ កាន់តែមានភាពទាក់ទាញលើការវិនិយោគរួម។

យោងតាមលិខិត ដែលមានការចុះហត្ថលេខារបស់អភិបាលខេត្តកំពតកាលពីពេលថ្មីៗនេះបានឲ្យដឹងថា សមិទ្ឋិផលជាប្រវត្តិសាស្ត្រ នៃប្លង់គោលប្រើប្រាស់ដីធ្លីក្នុងខេត្ត និងក្រុងកំពត ត្រូវបានក្រសួងរៀបចំដែនដី នគរូបនីយកម្ម និងសំណង់ ដាក់ឱ្យប្រើប្រាស់ជាផ្លូវការ ដោយសេចក្តីសម្រេចលេខ០០៣ សសរ ចុះថ្ងៃទី៥ កក្កដា ឆ្នាំ២០១៨ ដើម្បីជួយគាំទ្រ និងជំរុញដល់ការអភិវឌ្ឍសេដ្ឋកិច្ច សង្គម បរិស្ថាន និងកិច្ចធានាធនធានធម្មជាតិប្រកបដោយប្រសិទ្ធភាព និរន្តរភាពសម្រាប់គ្រប់សម័យកាល។

លិខិតដដែលបានជំរុញឱ្យអាជ្ញាធរមូលដ្ឋាន ត្រូវអនុវត្តន៍ដោយសហការជាមួយមន្ទីររៀបចំដែនដី នគរូបនីយកម្ម និងសំណង់ និងអង្គភាពពាក់ព័ន្ឋលើចំណុចសំខាន់ៗរួមមាន ទី១ ធ្វើការផ្សព្វផ្សាយអំពីប្លង់គោលប្រើប្រាស់ដីធ្លីខេត្តកំពត ដល់មហាជន និងអ្នកពាក់ព័ន្ធឱ្យបានទូលំទូលាយ ទី២ លើកគំរោងនិងរៀបចំផែនការអភិវឌ្ឍនានា ដោយយោងលើប្លង់គោលប្រើប្រាស់ដីធ្លីក្រុងជាគោលគ្រឹះ ។ ទី៣ ទប់ស្កាត់រាល់ការសាងសង់ និងអភិវឌ្ឍន៍ដី ដែលមិនគោរពតាមច្បាប់ និងផ្ទុយពីខ្លឹមសារប្លង់គោលប្រើប្រាស់ដីដែលបានកំណត់។

ទី៤ បន្តកសាងផែនការប្រើប្រាស់ដីនៅតាមគ្រប់ឃុំ សង្កាត់ និងធ្វើការតាមដាន ត្រួតពិនិត្យ សិក្សា កែសម្រួល និងវាយតម្លៃប្រសិទ្ឋភាពនៃការអនុវត្តប្លង់គោលប្រើប្រាស់ដីខេត្តកំពត និងទី៥ ត្រូវធ្វើបច្ចុប្បន្នភាពប្លង់គោលប្រើប្រាស់ដីក្នុងខេត្តកំពតក្នុងរយៈពេល៥ឆ្នាំម្តង តាមករណីចាំបាច់នៃការអភិវឌ្ឍសេដ្ឋកិច្ចសង្គម។

នៅក្នុងប្លងគោលសំដៅដល់ការអភិវឌ្ឍខេត្ត ចាប់់ពីឆ្នាំ២០១៩ ដល់ឆ្នាំ២០៣០ បានបញ្ជាក់យ៉ាងច្បាស់ថា នៅក្នុងខេត្តកំពត ជាពិសេសតំបន់ទីរួមខេត្តតែម្ដង ក្រៅពីមានការកសាងហេដ្ឋារចនាសម្ព័ន្ធនានា ដូចជា ពង្រីកផ្លូវថ្នល់បន្ថែម មានការដាក់បំភ្លឺអគ្គិសនីនៅតាមដងផ្លូវ និងសួនច្បារនោះ ថែមទាំងមានការសាងសង់ស្ពានបន្ថែមចំនួន៣កន្លែង ឆ្លងកាត់ព្រែកកំពត។ លើសពីនេះ នៅមានការអភិវឌ្ឍផ្សាររាត្រី និងការកសាងផ្លូវក្រវ៉ាត់ក្រុងថ្មី ដោយភ្ជាប់ជាមួយផ្លូវវាងក្រុងដែលមានស្រាប់។

លោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម បានមានប្រសាសន៍ថា ប្លង់គោលអភិវឌ្ឍន៍និមួយៗ ពិតជាមានសារៈសំខាន់ណាស់ ព្រោះប្លង់គោលបានកំណត់និយាមការណ៍ទំហំផ្លូវ ដើម្បីកំណត់ពីផែនការប្រើប្រាស់ដីធ្លី នៅក្នុងមូលដ្ឋានណាមួយមានភាពសមស្រប និងដើម្បីជំរុញការប្រើប្រាស់ដី និងការអភិវឌ្ឍប្រកបដោយនិរន្តរភាព។ លោកបន្តថា ប្លង់គោលបានកំណត់តំបន់អភិវឌ្ឍន៍ផ្សេងៗគ្នា ដូចជា តំបន់សម្រាប់អភិវឌ្ឍន៍វិស័យឧស្សាហកម្ម តំបន់អភិវឌ្ឍន៍មជ្ឈមណ្ឌលពាណិជ្ជកម្ម តំបន់ធ្វើកសិកម្ម និងតំបន់ទេសចរណ៍ជាដើម។

លោកបន្តថា“ប្លង់គោលអាចអនុវត្តន៍បាន ក៏ទាមទារឱ្យមានការចូលរួមពីប្រជាពលរដ្ឋ និងអាជ្ញាធរមូលដ្ឋាន ដើម្បីធ្វើឱ្យការងារនេះមានប្រសិទ្ធភាព និងទទួលបានជោគជ័យ”។

លោកជាវ តាយអភិបាលខេត្តកំពតបានមានប្រសាសន៍ឱ្យដឹងតាមទូរស័ព្ទកាលពីពេលថ្មីៗនេះថា បច្ចុប្បន្នមានក្រុមហ៊ុនចិន កូរ៉េ តៃវ៉ាន់ ជប៉ុន និងក្រុមហ៊ុនបរទេសជាច្រើនទៀត បានចូលមកស្វែងរកឱកាសវិនិយោគនៅក្នុងខេត្តកំពត ប៉ុន្តែគម្រោងណាមួយជាក់លាក់មិនទាន់បានចាប់ផ្តើមនៅឡើយទេ។ លោកបន្តថា ពួកគេកំពុងសិក្សានិងស្វែងយល់ពីសក្តានុពលរបស់ខេត្ត ដែលកំពុងមានសក្តានុពលជាច្រើន ដែលបាននិងកំពុងទាក់ទាញអ្នកវិនិយោគជាតិ អន្តរជាតិ។

លោកបានបញ្ជាក់ថា “ខ្ញុំគិតថានៅចុងឆ្នាំនេះ ឬដើមឆ្នាំ២០២០ខាងមុខ វិស័យសំណង់ និងអចលនទ្រព្យនឹងរីកចម្រើនខ្លាំងនៅក្នុងខេត្តនេះ ដោយសារខេត្តកំពតមានសក្តានុពលជាច្រើន”។ លោកបន្តថា “ខេត្តកំពតមានសក្តានុពលជាច្រើន ដោយមានកំពង់ផែទឹកជ្រៅ មានតំបន់សេដ្ឋកិច្ចពិសេស ធនធានធម្មជាតិ កំពង់ផែទេសចរណ៍ និងរមណីយដ្ឋានធម្មជាតិជាច្រើន សម្រាប់បម្រើវិស័យទេសចរណ៍”។

អគ្គនាយកក្រុមហ៊ុនអចលនទ្រព្យ R Investment Group លោកឧកញ៉ា តេង រិទ្ធី បានមានប្រសាសន៍ថា “ខេត្តកំពតពេលនេះ បានចាប់ផ្តើមមានការផ្លាស់ប្ដូរមុខមាត់ជាបណ្ដើរៗហើយ”៕

លោកវង្សី វិស្សុត៖ កម្ពុជាចង់បានការវិនិយោគកាន់តែច្រើនពីអាមេរិក

July 10, 2019

0

អត្ថបទៈ ម៉ៃ វីរៈ

ភ្នំពេញៈ មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាចង់បានការវិនិយោគបន្ថែមកាន់តែច្រើនពីអាម៉េរិក ដើម្បីធ្វើពិពិធកម្មបង្កើតការងារ និងបង្កើនតម្លៃបន្ថែមនៅក្នុងសេដ្ឋកិច្ចកម្ពុជា ក៏ដូចជាដើម្បីតភ្ជាប់កម្ពុជា ទៅកាន់ខ្សែសង្វាក់ផលិតកម្មនៅក្នុងតំបន់ និងពិភពលោក ជាពិសេសគឺការផ្ទេរនូវចំណេះដឹង ផ្នែកបច្ចេកវិទ្យា នវានុវត្តន៍ និងសហគ្រិនភាពជាដើម។

លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុកាលពីដើមសប្តាហ៍នេះ បានជួបជាមួយគណៈប្រតិភូក្រុមប្រឹក្សារធុរកិច្ចអាមេរ៉េរិច-អាស៊ាន (US-ASEAN Business Council) ដែលដឹកនាំដោយលោក Alexander Feldman និងលោក Michael W. Wichalak។ លោកបានបន្តទៀតថា រាជរដ្ឋាភិបាលកម្ពុជា នឹងបន្តជំរុញកំណើនសេដ្ឋកិច្ច ប្រកបដោយបរិយាប័ន្នសម្រាប់ប្រជាជន និងប្រទេសជាតិទាំងមូលដោយជំរុញបង្កើនពិពិធកម្ម និងភាពប្រកួតប្រជែងសេដ្ឋកិច្ចដោយបានលើឡើងវិធានការអន្តរាគមន៍ធំៗចំនួន៤ ដូចជា ទី១ វិធានការស្រូបយកការប៉ះទង្គិចផលវិបាក ពីវិបត្តិណាមួយជាយថាហេតុ។

ទី២.វិធានការដោះស្រាយបញ្ហារចនាសម្ព័ន្ធ ក្នុងនោះមានការបង្កើនភាពប្រកួតប្រជែងតាមរយៈ ការកាត់បន្ថយថ្លៃដើម ជាពិសេសការផ្តោតលើហេដ្ឋារចនាសម្ព័ន្ធ និងវិស័យអគ្គិសនី, ការធ្វើពិពិធកម្មរចនាសម្ព័ន្ធសេដ្ឋកិច្ច និងការធ្វើពិពិធកម្មទំនិញ និងទីផ្សារទី៣.វិធានការរក្សាស្ថេរភាពម៉ាក្រូសេដ្ឋកិច្ច ដែលមានទាំងគោលនយោបាយសារពើពន្ធនិងគោលនយោបាយរូបិយវត្ថុ និងទី៤.បង្កើនប្រសិទ្ធភាពក្នុងវិស័យសាធារណៈ ដើម្បីកសាងរដ្ឋបាលសាធារណៈមួយ ដែលកាន់តែស្អាតស្អំ, ឆ្លាតវៃ និងខ្លាំងពូកែមានសមត្ថភាពខ្ពស់។

ដោយឡែកក្នុងជំនួបជាមួយរវាងលោក Alexander Feldman និងលោក សុខ ចិន្ដាសោភា រដ្ឋមន្ដ្រីប្រតិភូអមនាយរដ្ឋមន្ដ្រី និងជាអគ្គលេខាធិការក្រុមប្រឹក្សាអភិវឌ្ឈន៍កម្ពុជា ភាគីទាំងពីរក៏បានលើកឡើងពីការរៀបចំសេចក្តីព្រាងច្បាប់ស្តីពីការវិនិយោគ និងច្បាប់់តំបន់សេដ្ឋកិច្ចពិសេស ដែលនឹងអាចផ្តល់នូវការលើកទឹកចិត្តដល់សកម្មភាព ដែលយកចិត្តទុកដាក់ដល់សុខុមាលភាពនិយោជិត និងការទទួលខុសត្រូវសង្គម ដែលក្រុមហ៊ុនវិនិយោគអាមេរិកមួយចំនួនបានធ្វើនាពេលកន្លងមក។

លោក Alexander Feldman ប្រធានគណៈប្រតិភូបានអបអរសាទរចំពោះការបញ្ចប់ការតាក់តែងសេចក្តីព្រាងច្បាប់ទាំងពីរខាងលើ និងបានសន្យាថានឹងជំរុញឱ្យមានគម្រោងវិនិយោគបន្ថែមទៀតរបស់អាមេរិកមកកម្ពុជា៕

តើសេដ្ឋកិច្ចចិនកំពុងជួបផលវិបាកយ៉ាងដូចម្តេចក្រោយភាពតានតឹងនៃសង្រ្គាមពាណិជ្ជកម្ម

July 10, 2019

0

ដោយ Donald Lee

ភ្នំពេញៈ ខណៈការផ្អាកសង្រ្គាមពាណិជ្ជកម្មបណ្តោះអាសន្ន រវាងអាមេរិក និងចិនអ្នកវិភាគសេដ្ឋកិច្ចនិយាយថាទិន្នន័យថ្មីបង្ហាញថា សេដ្ឋកិច្ចចិនកំពុងដើរឆ្ពោះទៅរកការធ្លាក់ចុះដែលនឹងមានផលប៉ះពាល់ដល់សេដ្ឋកិច្ចពិភពលោក។

ខួបនៃជម្លោះពាណិជ្ជកម្មបានបង្ហាញលទ្ធផលនៅលើតារាងពិន្ទុមួយ ដែលសេដ្ឋកិច្ចចិនបានឈានដល់កំពូលលើអាមេរិក។ ខណៈពេលដែលការនាំចេញរបស់ចិនទៅកាន់សហរដ្ឋអាមេរិកបានធ្លាក់ចុះ១៤ភាគរយ ដែលស្មើនឹងទំហំទឹកប្រាក់១៨ពាន់លានដុល្លារ អាមេរិកសេដ្ឋកិច្ចអាមេរិកមានការលំបាកបំផុត ដោយការខាតបង់កើនឡើង៣៨ ភាគរយជាមួយតម្លៃ២៣ពាន់លានដុល្លារ។

លើសពីនេះ តួលេខត្រីមាសដំបូងបានរកឃើញការនាំចេញខ្ពស់ ពីប្រទេសចិនជាមួយនឹងអត្រាកំណើន៦,៤ភាគរយគួរឲ្យភ្ញាក់ផ្អើល។

ប៉ុន្តែក្រុមអ្នកវិភាគសេដ្ឋកិច្ច នៅឯក្រុមហ៊ុនឈ្មួញជើងសាធំបំផុតរបស់ជប៉ុន Normura បាននិយាយថា អត្រាកំណើនត្រីមាសទី១ ជាការយល់ច្រឡំ ពីព្រោះក្រុមហ៊ុនចិន បានរក្សាទុកទំនិញធំៗជាច្រើន នៅក្នុងរយៈពេល៣ខែដំបូងនៃឆ្នាំនេះ ដើម្បីជៀសវាងការបង់ពន្ធខ្ពស់ជាងមុន ដោយសារជម្លោះពាណិជ្ជកម្ម។

អ្នកវិភាគបានព្យាករណ៍ថា តួលេខមានការធ្លាក់ចុះនៅត្រីមាសទីពីរ ខណៈដែលឈ្មួញកណ្តាលជប៉ុនជឿថា អាមេរិកនឹងដំឡើងពន្ធលើទំនិញ ដែលនៅសល់ពីចិនដីគោក។

របាយការណ៍សេដ្ឋកិច្ច Bloomberg ដែលបានចេញផ្សាយកាលពីខែមុនបានប៉ាន់ស្មានថា ផលប៉ះពាល់ពីសង្រ្គាមពាណិជ្ជកម្មរវាងអាមេរិក និងចិន អាចឈានដល់១,២ ពាន់ពាន់លានដុល្លារ ដល់ផលិតផលសរុបក្នុងស្រុកលើពិភពលោក និងសេដ្ឋកិច្ចពិភពលោកបានប្រឈមនឹងកំនើនយឺតយ៉ាវ ដែលមិនធ្លាប់មានចាប់តាំងពីវិបត្តិហិរញ្ញវត្ថុឆ្នាំ២០០៨។

ប្រសិនបើការព្យាករណ៍ការព្យាករណ៍ពិតប្រាកដ នោះផលិតផលក្នុងស្រុកសរុបរបស់ប្រទេសចិនត្រូវបានគេរំពឹងថា នឹងថយចុះជាងពាក់កណ្តាល ហើយនឹងបញ្ចប់នៅអត្រាកំណើននៃផលិតផលសរុបក្នុងស្រុក៥,៨ភាគរយ ឆ្នាំ២០២០ខាងមុខ។ នៅពេលចាប់ផ្តើមធ្លាក់ចុះវិនិយោគទុនក្នុងវិស័យផលិតកម្ម នឹងកាត់បន្ថយការរឹតបន្តឹងសេដ្ឋកិច្ច ដែលកំពុងតែជួបបញ្ហា។ នេះបើយោងតាមក្រុមហ៊ុន Nomura។

វិស័យផលិតកម្មគឺជាសសរស្តម្ភដ៏ចម្បង នៃសេដ្ឋកិច្ចរបស់ប្រទេសចិន ប៉ុន្តែក្រុមហ៊ុនជាច្រើន កំពុងផ្លាស់ប្តូរទីតាំងវិនិយោគខ្លួន ទៅកាន់បណ្តាប្រទេសអាស៊ាន ដូចជា ប្រទេសកម្ពុជា ដើម្បីបង្កើនប្រាក់ចំណេញ និងជៀសវាងពន្ធគយ។

ឧទាហរណ៍ ការផលិតកង់រាប់លាននៅកម្ពុជា នឹងចាប់ផ្តើមនៅឆ្នាំនេះ ដោយសារក្រុមហ៊ុនផលិតពីប្រទេសចិន កំពុងធ្វើការវិនិយោគមកកាន់កម្ពុជា ដើម្បីទាញយកផលប្រយោជន៍ពីហេដ្ឋារចនាសម្ព័ន្ធផ្នែកផលិតកម្ម និងកិច្ចព្រមព្រៀងពាណិជ្ជកម្មសេរីជាមួយអាមេរិក។

ក្រុមហ៊ុនផលិតកង់ដូចជា Shanghai General Sports គ្រោងនឹងបើករោងចក្រថ្មីនៅភ្នំពេញ ខណៈក្រុមហ៊ុនផលិតកង់ធំៗពីររបស់ចិនឈ្មោះ Evergrand Bicycle និង XDS Bicycle បានចុះបញ្ជីក្រុមហ៊ុនរបស់ខ្លួននៅឆ្នាំនេះ។ នេះបើតាមក្រសួងពាណិជ្ជកម្ម។ កាលពីឆ្នាំមុនរោងចក្រកម្ពុជាបានផលិតកង់ជិត ១,៤ លានគ្រឿងមានតម្លៃ ២៨៧ លានដុល្លារ។

ក្រុមហ៊ុនផលិតកង់ធំបំផុតមួយរបស់ពិភពលោកក្រុមហ៊ុន Giant Manufacturing Co. បានធ្វើការគណនាថាទំនាក់ទំនងពាណិជ្ជកម្មអាមេរិក និងចិន នឹងដួលរលំ ហើយក្រុមហ៊ុនបានចាប់ផ្តើមផ្លាស់ប្តូររោងចក្រផលិតចេញពីប្រទេសចិន។

លោកស្រី Bonnie Tu ប្រធានក្រុមហ៊ុន Giant បានថ្លែងទៅកាន់ទីភ្នាក់ងារព័ត៌មាន Bloomberg ថា “កាលពីឆ្នាំមុន ខ្ញុំបានកត់សម្គាល់ឃើញថា សម័យកាលនៃការផលិតនៅប្រទេសចិន និងការផ្គត់ផ្គង់នៅទូទាំងពិភពលោកបានបញ្ចប់”។

លោកស្រី Tu បាននិយាយថា “នៅពេលលោក Trump ប្រកាសផែនការពន្ធចំនួន ២៥ភាគរយ យើងគិតថាវាជារឿងយ៉ាងធ្ងន់ធ្ងរមួយ។ យើងបានចាប់ផ្តើមផ្លាស់ប្តូរទីតាំងវិនិយោគ”៕

តម្លៃសម្ភារៈសំណង់ហក់ឡើងជាថ្មីស្របពេលទុនវិនិយោគក្នុងវិស័យនេះកើនឡើង

July 10, 2019

0

ដោយ ប៊ី

ភ្នំពេញៈ សម្ភារៈសំណង់បានហក់ឡើងជាថ្មី ស្របពេលការវិនិយោគក្នុងវិស័យនេះ កើនឡើងជិត៧០ភាគរយ នៃការវិនិយោគក្នុងវិស័យសំណង់នៅក្នុងឆ្នាំនេះ ដែលធ្វើឲ្យតម្រូវការផ្គត់ផ្គង់សម្ភារសំណង់បន្ថែម។

យោងតាមក្រុមហ៊ុនស៊ីម៉ងត៍ជីបម៉ុង (Chip Mong Insee Cement Corporation) បានឲ្យដឹងថា តម្រូវការស៊ីម៉ងត៍ត្រូវបានគេរំពឹងថា នឹងកើនឡើងរហូតដល់៩លានតោននៅឆ្នាំនេះ ពោលគឺកើនឡើងជិត៩០ភាគរយ បើប្រៀបធៀបទៅនឹងឆ្នាំមុន។តម្លៃសម្ភារៈសំណង់បានកើនឡើង១០ភាគរយ ធៀបរយៈពេលដូចគ្នាកាលពីឆ្នាំមុន។

វិស័យសំណង់ដែលកំពុងរីកចម្រើននៅកម្ពុជា ក៏កំពុងបង្កើនការនាំចូលវត្ថុធាតុដែកសំណង់ពីបណ្តាប្រទេសនានាដូចជា ប្រទេសវៀតណាម។

ក្រុមហ៊ុនផលិតដែក Hoa Phat Group ដែលមានមូលដ្ឋាននៅវៀតណាមបានរាយការណ៍ថា ការលក់ដែកបានកើនឡើង២៨,៦៨ភាគរយ ដោយកម្ពុជាជាអ្នកទិញភាគច្រើន។ ការនាំចេញរបស់ក្រុមហ៊ុនផលិតដែកថែប ប្រទេសវៀតណាមបានកើនឡើងដល់ ២៤៦ភាគរយពីឆ្នាំមុន។ ប្រទេសកម្ពុជាបានទិញដែកថែបជិត ៤៥,៤៣០តោន ពីក្រុមហ៊ុននេះនៅក្នុងរយៈពេលបីខែដំបូងនៃឆ្នាំនេះ។

ក្រុមហ៊ុន Hoa Phat បានឲ្យដឹងក្នុងរបាយការណ៍ត្រីមាសទី១ឆ្នាំនេះថា “ការនាំចេញដែកបានច្រើនជាង ៧៧,០០០តោន ក្នុងនោះ៥៩ភាគរយត្រូវបានដឹកជញ្ជូនទៅប្រទេសកម្ពុជា”។

លើសពីនេះទៀត ក្រុមហ៊ុនផលិតដែកថែបចិន Baowu កំពុងវិភាគពីផែនការផ្លាស់ប្តូរទីតាំងផលិតកម្ម ដែលមានកែច្នៃដែលមានសមត្ថភាពផលិត១,៥តោន និងម៉ាស៊ីនបម្លែងពីរ ដើម្បីបង្វែរជាតិដែកទៅជាដែកថែបទៅប្រទេសកម្ពុជា ហើយបានដាក់ជំនួសហេដ្ឋារចនាសម្ព័ន្ធដែកថែបសម្រាប់ផ្គត់ផ្គង់ក្នុងស្រុក។ ការផ្លាស់ប្តូរទីតាំងនឹងក្លាយជាការដឹកជញ្ជូនដ៏ធំមួយ។

គ្រឿងបរិក្ខារនឹងត្រូវបានដឹកជញ្ជូនចេញពីរោងចក្របិទទ្វារមួយ នៅតំបន់ Aksu ភាគខាងជើងឆៀងខាងលិចប្រទេសចិនដែលមានចំងាយ២,៤៨០ម៉ាយពីរាជធានីភ្នំពេញ៕

ក្រុងប៉ោយប៉ែតចងចំណងមេត្រីភាពជាមួយក្រុងសេអ៊ូលសាធារណរដ្ឋកូរ៉េ

July 10, 2019

0

ដោយនៅ ស៊ីវុត្ថា

បន្ទាយមានជ័យៈ ក្រុងប៉ោយប៉ែតបានចងចំណងមេត្រីភាពជាមួយខ័ណ្ឌចុងណូហ្គូ នៃក្រុងសេអ៊ូល សាធារណៈរដ្ឋកូរ៉េ តាមរយៈកិច្ចប្រជុំទ្វេរភាគីស្តីពី ចំណងមេត្រីភាពរវាងរដ្ឋបាលក្រុងប៉ោយប៉ែត ខេត្តបន្ទាយមានជ័យ ព្រះរាជាណាចក្រកម្ពុជា និងប្រតិភូខណ្ឌចុងណូហ្គូ ក្រុងសេអ៊ូល សាធារណរដ្ឋកូរ៉េ។

កិច្ចប្រជុំនេះបានធ្វើឡើងនៅសាលាក្រុងប៉ោយប៉ែត កាលពីដើមសប្តាហ៍នេះ ដោយភាគីកម្ពុជាដឹកនាំដោយលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ខេត្តបន្ទាយមានជ័យ និងប្រតិភូភាគីសាធារណរដ្ឋកូរ៉េ ដឹកនាំដោយលោក គីម យ៉ុងជុង អភិបាល នៃគណៈអភិបាលខណ្ឌចុងណូហ្គូ ក្រុងសេអ៊ូល។

រដ្ឋបាលក្រុងប៉ោយប៉ែត និងប្រតិភូរដ្ឋបាលខណ្ឌចុងណូហ្គូ បានប្រជុំផ្លាស់ប្តូរបទពិសោធន៍ និងធ្វើបទបង្ហាញពីសក្តានុពលនៃក្រុង និងខណ្ឌទាំងពីរទៅវិញទៅមក និងបានផ្តួចផ្តើមគំនិតនឹងឈានទៅចុះអនុស្សរណៈយោគយល់គ្នា ក្រោយពីទទួលបានគោលការអនុញ្ញាតពីរាជរដ្ឋាភិបាល។

គណៈប្រតិភូខណ្ឌចុងណូហ្គូ ក្រុងសេអ៊ូល សាធារណរដ្ឋកូរ៉េ បានកោតសរសើរខ្ពស់ចំពោះការរីកចម្រើនរបស់ក្រុងប៉ោយប៉ែត ដែលបានអភិវឌ្ឍយ៉ាងឆាប់រហ័ស និងជាគោលដៅចំណាប់អារម្មណ៍នៃអ្នកវិនិយោគមកពីគ្រប់មជ្ឈដ្ឋាន។

កិច្ចប្រជុំទ្វេភាគីនេះ ផ្តោតសំខាន់ទៅលើគោលដៅសំខាន់ៗចំនួន៦ចំណុច ដូចជាទី១ បង្កើនទំនាក់ទំនងជាមិត្តភាពជិតស្និទ្ធ ដោយផ្អែកទៅលើការគោរព និងផ្តល់ផលប្រយោជន៍ទៅវិញទៅមក ដើម្បីជំរុញកិច្ចសហប្រតិបត្តិការរវាងក្រុងប៉ោយប៉ែត និងខណ្ឌចុងណូហ្គូ។ ទី ២-លើកកម្ពស់ការយល់ដឹងពីគ្នា និងប្រជាពលរដ្ឋ ព្រមទាំងគាំទ្រសកម្មភាពផ្លាស់ប្តូរនៅក្នុងវិស័យដែលមានចំណាប់អារម្មណ៍រួមគ្នា ដូចជាៈ សេដ្ឋកិច្ច វប្បធម៌ សិល្បៈ កីឡា និងការអប់រំ។ ទី ៣-បង្កើនបរិយាកាសជាមិត្តភាព ដើម្បីលើកកម្ពស់កិច្ចសហប្រតិបត្តិការលើវិស័យផ្សេងៗទៀត តាមរយៈការផ្លាស់ប្តូរព័ត៌មានចំណេះដឹងដើម្បីបម្រើផលប្រយោជន៍ និងការអភិវឌ្ឍន៍នៃក្រុង និងខណ្ឌទាំងពីរ។ទី៤-លើកទឹកចិត្តដល់ការិយាល័យ អង្គភាពពាក់ព័ន្ធ ដើម្បីលើកកម្ពស់កិច្ចសហការនៅក្នុងតំបន់ដែលបានឯកភាពគ្នា តាមរយៈកិច្ចព្រមព្រាងដាច់ដោយឡែកពីគ្នា នៅក្នុងទម្រង់អនុស្សារណៈ នៃការយោគយល់គ្នានៅពេលចាំបាច់។

ទី ៥-ធ្វើទស្សនកិច្ចគ្នាទៅវិញទៅមក ក្នុងការផ្លាស់ប្តូរទស្សនៈ បទពិសោធន៍ ដែលជាកិច្ចការមានប្រយោជន៍រួមគ្នា ដើម្បីលើកកម្ពស់មិត្តភាព និងគាំទ្រយ៉ាងសកម្មដល់ដំណើរទស្សនកិច្ចរបស់គណៈប្រតិភូមិនមែនរដ្ឋាភិបាល ពាណិជ្ជករ និងប្រជាជនក្នុងតំបន់វប្បធម៌។ និងទី៦ ៦-ខ្លឹមសារទាំងអស់ខាងលើនេះ គឺសម្រាប់បញ្ជាក់ពីឆន្ទៈនៃការធ្វើទំនាក់ទំនងរវាងក្រុងប៉ោយប៉ែត និងខណ្ឌចុងណូហ្គូ។ អនុស្សារណៈនៃការយោគយល់គ្នានឹងត្រូវបង្កើត ដើម្បីចុះហត្ថលេខានៅខណ្ឌចុងណូហ្គូ ក្រុងសេអ៊ូល សាធារណរដ្ឋកូរ៉េ បន្ទាប់ពីទទួលបានការយល់ព្រមពី រាជរដ្ឋាភិបាល នៃព្រះរាជាណាចក្រកម្ពុជា៕

អ្នកវិនិយោគសឹង្ហបុរីកំពុងបង្ហាញឥទ្ធិពលនៅសង្កាត់ពាណិជ្ជកម្មនៃរាជធានីភ្នំពេញ

July 10, 2019

1

ដោយៈ រ៉ាណេត

ភ្នំពេញៈ អ្នកវិនិយោគសឹង្ហបុរីបានចាប់់ដៃជាមួយអ្នកវិនិយោគក្នុងស្រុក បានបង្ហាញភាពលេចត្រដែត នៃមជ្ឈមណ្ឌលពាណិជ្ជកម្មរបស់ខ្លួន ដែលស្ថិតនៅតំបន់ពាណិជ្ជកម្មកណ្តាលក្រុងភ្នំពេញ នៃសង្កាត់ទន្លេបាសាក់ ខ័ណ្ឌចំការមនក្រុងភ្នំពេញ។

វត្តមាននៃអគារពាណិជ្ជកម្មលំដាប់ពិភពលោក នៅក្បែរទីក្រុងកោះពេជ្រនេះ គឺមជ្ឈមណ្ឌលពាណិជ្ជកម្ម លំដាប់ពិភពលោក The Bridge កំពស់៤៥ជាន់ (ទុនវិនិយោគ៣០០លានដុល្លារ) និងអគារ The Peak កំពស់៥៥ជាន់ (ទុនវិនិយោគ៥០០លានដុល្លារ) ដែលបណ្តុំដោយអាគារលំនៅដ្ឋាន ការិយាល័យ សណ្ឋាគារលំដាប់ពិភពលោក Shangri-La និងផ្សារទំនើបស្តង់ដាអន្តរជាតិ។ មជ្ឈមណ្ឌលពាណិជ្ជកម្មនេះ វិនិយោគដោយក្រុមហ៊ុន The World Bridge Land របស់អ្នកឧកញ៉ា សៀ ឫទ្ធី និងក្រុមហ៊ុនលំដាប់ពោភពលោកមកពីប្រទេសសិង្ហបុរី Oxley-Holding(Cambodia) Co.,Ltd។

នាយិកាក្រុមហ៊ុនអចលនទ្រព្យ Century21 Cambodia លោកស្រី Grace Rachny Fong បានមានប្រសាសន៍ឲ្យដឹងនាព្រឹកថ្ងៃទី១០ ខែកក្កដា ឆ្នាំ២០១៩នេះថា សង្កាត់ទន្លេបាសាក ជាតំបន់មានប្រជាប្រិយភាព និងមានសក្ដានុពលខ្លាំង ស័ក្ដិសមទៅនឹងវត្តមានអគារពាណិជ្ជកម្មធំៗប្រចាំទីក្នុងរាជធានីភ្នំពេញ។ លោកស្រីបន្តថា សម្រាប់វត្តមានអគារសហពាណិជ្ជកម្ម លំដាប់ពិភពលោកដូចជា The Bridge, The PeAk បានជួយបង្កើននូវសោភ័ណភាព និងភាពទាក់ទាញយ៉ាងខ្លាំងនៅក្នុងតំបន់ ដែលជាវាការជួយបង្កើនទំនុកចិត្តកាន់តែខ្ពស់ទៅដល់បណ្តាអ្នកវិនិយោគធំ និងបណ្តាក្រមហ៊ុនអន្តរជាតិនានានៅលើសាកលលោក។

លោកស្រីបានបន្តទៀតថា “វត្តមាននៃអគារដ៏ធំស្គឹមស្គៃទាំង២នេះ ថែមទាំងបានជួយបង្កើនចំណូលសេដ្ឋកិច្ចជាតិយ៉ាងសំខាន់ ដែលក្រៅពីការផ្តល់ចំណូលដល់ជាតិ តាមរយៈការបង់ពន្ធ ថែមទាំងបានចូលរួមផ្តល់នូនបទពិសោធន៍ និងចំណេះដឹងផ្នែកវិស័យពាណិជ្ជកម្ម ក៏ដូចជាការផ្តល់ការងារដល់ប្រជាពលរដ្ឋក្នុងស្រុកជាច្រើនកន្លែងផងដែរ”។

លោកឧកញ៉ា សៀ ឫទ្ធី អគ្គនាយកក្រុមហ៊ុន The World Bridge Land បានមានប្រសាសន៍ឲ្យដឹងនៅថ្ងៃដដែលនេះ ដោយបង្ហាញពីភាពមោទនចំពោះកិច្ចសហការជាដៃគូជាមួយក្រុមហ៊ុនដ៏ធំលំដាប់ពិភពលោក ដែលមានជំនាញខ្ពស់មកពីប្រទេសសិង្ហបុរី។

លោកឧកញ៉ាបន្តថា “ការដែលគេសម្រេចចិត្តចូលមកកាន់កម្ពុជា មិនមែនជាការប្រថុយប្រថាននោះទេ ពួកគេបានសិក្សាយ៉ាងលម្អិត និងជឿជាក់យ៉ាងប្រាកដលើទីផ្សារទើបគេចូលមក”។ លោកឧញ៉ាបន្ថែមថា “វត្តមានរបស់អគារ The Peak ដែលកំពុងតែបន្តសកម្មភាពសាងសង់យ៉ាងមមាញឹក ដើម្បីបញ្ចប់គម្រោងក្នុងពេលដ៏ខ្លីខាងមុខនេះ វានឹងជួយបង្កើនភាពទាក់ទាញ អ្នកវិនិយោគអន្តរជាតិកាន់តែច្រើនមកកាន់កម្ពុជា”។

លោកឧកញ៉ាសៀ រិទ្ឋីបានបន្តទៀតថា “នៅក្នុងអគារពាណិជ្ជកម្មមួយនេះ ក្រៅពីមានសណ្ឋាគារលំដាប់ផ្កាយ៥ ដែលល្បីឈ្មោះនៅលើសាកលលោក ក៏មានវត្តមានផ្សារទំនើប Capital Mall ដែលមានចំនួន៥ជាន់ផងដែរ”។ លោកឧកញ៉ាបន្តថា “មូលហេតុដែលខ្ញុំ ចាប់ដៃសហការជាមួយក្រុមហ៊ុនមកពីប្រទេសសិង្ហុបុរី ក៏ព្រោះតែក្រុមហ៊ុនមួយនេះមានភាពជំនាញច្បាស់លាស់ ក្នុងវិស័យសាងសង់អគារពាណិជ្ជកម្មធំនៅលើពិភពលោក”។

លោកឧកញ៉ាបញ្ជាក់ទៀtថា “មិនយូរទៀតទេ អគាមួយនេះនឹងចូលខ្លួនមកបម្រើវិស័យពាណិជ្ជកម្មបែបទំនើបនៅកម្ពុជា បន្ថែមពីលើអគារពាណិជ្ជកម្មលំដាប់ពិភពលោក The Bridge មួយទៀត ដែលកាន់តែធ្វើឱ្យតំបន់ទន្លេបាសាក់មានភាពលេចធ្លោ”៕

រយៈពេល៦ខែដើមឆ្នាំនេះ ខុនដូចំនួន ៥,៨៥៣យូនីតបានដាក់លក់លើទីផ្សារ

July 10, 2019

0

ដោយ វុត្ថា

ភ្នំពេញៈ វិស័យខុនដូដែលមាន កំពុងដាក់ចូលទីផ្សារនៅក្នុងរយៈពេល៦ខែដើមឆ្នាំនេះមានរហូតដល់ចំនួន៥៨៥៣យូនីត ស្មើកើនឡើង៥៥.៥ភាគរយ ធៀបរយៈពេលដូចគ្នាកាលពីឆ្នាំមុន។

យោងតាមរបាយការណ៍ ដែលទើបចេញផ្សាយដោយក្រុមហ៊ុន CBRE Cambodia ដែលបានចេញផ្សាយនាព្រឹកថ្ងៃទី១០ កក្កដានេះបានឲ្យដឹងថា ត្រីមាសទី២នេះមានខុនដូចំនួន៥គម្រោង ដែលត្រូវបានបញ្ចប់ទាំងស្រុង មានទាំងអគាប្រភេទចម្រុះ និងតម្លៃសមរម្យដូចជាOne Park Axis Residents, Vista Condo និង Diamond Twin ជាដើម ធ្វើឱ្យចំនួនខុនកើនឡើត ១៣៩៣យូនីត ពោលកើនឡើប្រមាណ ២៧.៧ភាគរយ។

លោកស្រីអាន សុធីតា នាយិកា CBRE ប្រចាំនៅកម្ពុជាបានឱ្យដឹងនៅក្នុងសម្ពោធរបាយការណ៍នេះថា បច្ចុប្បន្ននេះទីផ្សារខុនដូ ដែលមានតម្លៃមធ្យមបានងាកមរកប្រជាពលរដ្ឋខ្មែរវិញ ដូច្នេះហើយបានជាអ្នកវិនិយោគភាគច្រើនផ្តោតផលនៅក្នុងស្រុក។ លោកស្រីបន្តថា “ទន្ទឹមនឹងគ្នានោះយើងឃើញគម្រោងចំនួន២ទៅ៣ ដែលទទួលបានជោគជ័យ ដូចជាគម្រោង Urban Village និងកម្រោងផ្សេងៗទៀត។

អ្នកនាងបន្តថា “បើខុនដូមានតម្លៃសមរម្យ ប្រជាជនខ្មែរយើងមានទំនោរទៅរកទិញខុនដូដោយសារតែ ការរស់នៅក្នុងខុនដូមានភាពងាយស្រួល និងកណ្តាលក្រុង”។

លោកស្រីអាន សុធីតាបានបន្ថែមថា ឧទាហរណ៍ខុនដូក្នុងមួយយូនីតតម្លៃប្រហែល ៧ម៉ឺនដុល្លារ ពួកគាត់អាចទិញនៅក្នុងក្រុងបាន តែមិនអាចយកតម្លៃនេះទិញផ្ទះនៅក្នុងក្រុងទិញមិនបាននោះទេ។ ចឹងបើទៅនៅផ្ទះ ពួកគាត់អាចទៅរស់នៅឆ្ងាយ ប្រមាណជាង ៧ ទៅ១០គីឡូម៉ែត្រពីទីក្រុង។ ចឹងតម្លៃនេះ អាចយកទៅទិញខុនដូអាចរស់នៅក្នុងកណ្តាលក្រុង យ៉ាងហោតណាស់ប្រមាណជា២គីឡូម៉ែត្រពីកណ្តាលក្រុង ហើយមានភាពងាយស្រួលក្នុងការចេញចូល ព្រោះតែបច្ចុប្បន្នចរាចរណ៍មានការកកស្ទះផងដែរ។

លោកស្រីបញ្ជាក់ទៀតថា ម្យ៉ាងទៀតធនាគារក៏មានការផ្តល់កម្ចី ទៅឱ្យអ្នកទិញខុនដូ ដែលខុសពីលើកមុន ដែលមិនមានធនាគារឬអ្នកអភិវឌ្ឍន៍ណា ផ្តល់កម្ចីទៅលើការអភិវឌ្ឍន៍ខុនដូនោះទេដោយសារតែ ពួកគេគិតថាមានហានីភ័យខ្ពស់”។

ប្រជាពលរដ្ឋកម្ពុជាក្នុងរយៈពេលប៉ុន្មានឆ្នាំចុងក្រោយនេះ ហាក់មានការចាប់អារមណ៍លើការទិញខុនដូរសម្រាប់រស់នៅ និងដាក់ជួលផងដែរ ដែលជំរុញឱ្យអ្នកអភិវឌ្ឍន៍បែកមកអភិវឌ្ឍន៍ខុនដូតម្លៃសមរម្យ ដើម្បីចាប់យកទីផ្សារក្នុងស្រុក ដែលខុសកាលពីលើកមុន៕

រដ្ឋមន្រ្តីសាធារណៈការអះអាងថា រដ្ឋាភិបាលកំពុងអនុវត្តន៍គំរោងហេដ្ឋារចនាសម្ព័ន្ឋធំៗចំនួន៦

July 10, 2019

0

ដោយ វុត្ថា

ភ្នំពេញៈ ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនបានអះអាងថា រដ្ឋាភិបាលបាន និងកំពុងអនុវត្តន៍គំរោងហេដ្ឋារចនាសម្ព័ន្ឋធំៗចំនួន៦ ដើម្បីឆ្លើយតបការរីកចម្រើននៃសេដ្ឋកិច្ចសង្គមកម្ពុជា។

លោកទេសរដ្ឋមន្រ្តីស៊ុន ចាន់ថុល បានមានប្រសាសន៍ក្នុងការចាប់ផ្តើមពង្រីកហេដ្ឋារចនសម្ព័ន្ធដឹកជញ្ជូន នៅក្នុងក្រុងព្រះសីហនុឱ្យមានគុណភាព និងប្រសិទ្ធិភាពកាលពីថ្ងៃទី៩ កក្កដាកន្លងមកថា រដ្ឋាភិបាលកម្ពុជាបាននិងកំពុងអនុវត្តន៍ និងគម្រោងដែលនឹងត្រូវអនុវត្តរបស់ក្រសួងសាធារណការ និងដឹកជញ្ជូនទាក់ទងនឹងហេដ្ឋារចនាសម្ព័ន្ធដឹកជញ្ជូនសំខាន់ៗមួយចំនួន ដូចជា ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៨ ស្ពាននិងកំពង់ផែ ដោយលើកកម្ពស់គុណភាព និងពង្រីកបន្ថែមឱ្យសមស្របតាមការរីកចម្រើន លើវិស័យដឹកជញ្ជូនរបស់ប្រទេសជាតិ។

លោកបន្តថា ទន្ទឹមនឹងការងារសាងសង់ ក្រសួងសាធារណការ និងដឹកជញ្ជូន មានតួនាទីផ្ដល់សេវាសាធារណៈ ជូនបងប្អូនប្រជាពលរដ្ឋឱ្យបានលឿន ប្រសិទ្ធភាព និងតម្លាភាព ធ្វើយ៉ាងណាបង្ខិតសេវាសាធារណៈឱ្យជិតប្រជាពលរដ្ឋ តាមរយៈការចុះបញ្ជីយានយន្ត ការប្រឡងយកបណ្ណបើកបរ និងការត្រួតពិនិត្យលក្ខណៈបច្ចេកទេសយានយន្តតាមប្រព័ន្ធអនឡាញ និងកម្មវិធីថែទាំផ្លូវ ROAD CARE Mobile App ជាដើម។

ទាក់ទងនឹងគំរោងហេដ្ឋារចនាសម្ព័ន្ឋនៅខេត្តព្រះសីហនុ លោកស៊ុន ចាន់ថុលបានឱ្យដឹងថា ការស្ដារហេដ្ឋារចនាសម្ព័ន្ធដឹកជញ្ជូនឡើងវិញ ជាពិសេសហេដ្ឋារចនាសម្ព័ន្ធដឹកជញ្ជូន នៅខេត្តព្រះសីហនុ គឺជាការចាំបាច់ ព្រោះថាផ្លូវជាសរសៃឈាមសេដ្ឋកិច្ចជាតិ ដូចនេះយើងត្រូវពង្រឹង និងពង្រីកការកសាងហេដ្ឋារចនាសម្ព័ន្ធ ដោយប្រកាន់ភ្ជាប់នូវចក្ខុវិស័យ គឺធ្វើផ្លូវឱ្យបានមាំ។

លោកទេសរដ្ឋមន្ត្រីថា “យើងត្រូវពង្រឹង និងពង្រីកការកសាង និងស្តារហេដ្ឋារចនាសម្ព័ន្ធដឹកជញ្ជូន ដែលជាសរសៃឈាមសេដ្ឋកិច្ចជាតិ ប្រកបដោយគុណភាព”។

លោកគួច ចំរើន អភិបាលខេត្តព្រះសីហនុ បានឱ្យដឹងដែរថា កិច្ចប្រជុំរវាងក្រសួងសាធារណការ និងដឹកជញ្ជូនក្នុងត្រួតពិនត្យបញ្ហាប្រឈម និងដំណោះស្រាយនានាពាក់ព័ន្ធប្រព័ន្ធលូមេរំដោះទឹកភ្លៀង ប្រព័ន្ធលូមេរំដោះទឹកកខ្វក់ និងការស្ថាបនាផ្លូវដែលមានការខូចខាតទូទាំងខេត្តព្រះសីហនុទាំងមូល។

លោកបន្តថា “ដើម្បីឲ្យគម្រោងការណ៍ទាំងអស់ខាងលើនេះ ទទួលបានប្រសិទ្ឋភាពខ្ពស់ សូមបងប្អូនប្រជាពលរដ្ឋក្នុងខេត្តព្រះសីហនុទាំងអស់ ចូលរួមសហការប្រកបដោយឆន្ទះខ្ពស់”៕

ក្រសួងទេសចរណ៍កម្ពុជា៖ អាស៊ានបានអនុម័តផែនការបង្កើតការងារនិងជំនាញដល់យុវជនក្នុងតំបន់របស់ខ្លួន

July 10, 2019

0

ដោយ ម៉ាណេត

សៀមរាបៈ គណៈកម្មការត្រួតពិនិត្យអ្នកជំនាញទេសចរណ៍អាស៊ាន (ATPMC) បានឯកភាពធ្វើវិសោធនកម្មលើមាត្រាមួយចំនួន ដើម្បីផ្ដល់ការបណ្តុះបណ្តាល និងទទួលស្គាល់អ្នកជំនាញក្នុងផ្នែកផ្សេងៗទៀត ក្រៅពីផ្នែកសណ្ឋាគារ និងធ្វើដំណើរក្នុងក្របខណ្ឌកិច្ចព្រមព្រៀងទទួលស្គាល់គ្នាទៅវិញទៅមក លើអ្នកជំនាញទេសចរណ៍អាស៊ាន (MRA)។

ការឯកភាពគ្នានេះ ត្រូវបានធ្វើឡើងក្នុងឱកាសដែលគណៈកម្មការត្រួតពិនិត្យអ្នកជំនាញទេសចរណ៍អាស៊ាន (ATPMC) ជួបប្រជុំពិសេសនៅខេត្តសៀមរាប នាថ្ងៃទី៩ ខែកក្កដា ឆ្នាំ២០១៩។

កន្លងមក ប្រទេសសមាជិកអាស៊ាន បានខិតខំបណ្តុះបណ្តាលយុវជនតាមស្តង់ដារួមអាស៊ាន លើមុខជំនាញចំនួន៣២ នៃសេវាកម្មសណ្ឋាគារ និងធ្វើដំណើរ ដោយអាស៊ានបានបណ្តុះបណ្តាលគ្រូ និងអ្នកវាយតម្លៃបង្គោលអាស៊ាន ដាក់ចុះអនុវត្តកម្មវិធីសិក្សារួមអាស៊ានជាដើម។

កម្ពុជាដែលត្រូវបានទទួលស្គាល់ដោយអាស៊ានថា មានភាពនាំមុខគេក្នុងការអនុវត្តស្តង់ដាបណ្តុះបណ្តាលខាងលើនោះ បានបណ្តុះបណ្តាលគ្រូបង្គោលជាង៦០០នាក់ មានសិស្សនិស្សិតឆ្លងកាត់ការបណ្តុះបណ្តាល តាមកម្មវិធីអាស៊ានពេញលេញប្រមាណ ៤,០០០នាក់ ហើយសាលាបណ្តុះបណ្តាលវិជ្ជាជីវៈទេសចរណ៍ភាគច្រើន បានអនុវត្តកម្មវិធីអាស៊ាននេះ។

កិច្ចប្រជុំពិសេសនៅខេត្តសៀមរាប នាពេលនេះ បានពិភាក្សាឯកភាពបន្ថែមលើជំនាញម៉ាស្សា និងជំនាញផ្នែករៀបចំព្រឹត្តិការណ៍ (MICE) ទៅក្នុងកិច្ចព្រមព្រៀង MRA នេះនៅពេលអនាគត ហើយកម្ពុជាទទួលបន្ទុករៀបចំស្តង់ដាបណ្តុះបណ្តាលម៉ាស្សា។

កិច្ចព្រមព្រៀង MRA មានគោលបំណងសម្រួលបម្លាស់ទីការងារ នៃអ្នកជំនាញអាស៊ាន (បច្ចុប្បន្នមាន ៣២ជំនាញ)នៅក្នុងបណ្តាប្រទេសអាស៊ាន តាមច្បាប់នៃប្រទេសសមាជិកនីមួយៗ និងស្របតាមយន្តការអាស៊ាន។ យុវជនដែលអាចមានឱកាសបម្លាស់ទី លុះត្រាតែឆ្លងកាត់ការបណ្តុះបណ្តាល តាមស្តង់ដាកម្មវិធីអាស៊ាន ឬមានការទទួលស្គាល់ដោយអាស៊ាន៕