ក្រុមហ៊ុនទូរគមនាគមន៍វៀតណាមគ្រោងនឹងសាកល្បងបច្ចេកវិទ្យា 5G នៅកម្ពុជាក្នុងខែកក្កដានេះ

July 11, 2019

ដោយ ម៉ាណេត

វៀតណាមៈ ក្រុមហ៊ុន Viettel វៀតណាម និងក្រុមហ៊ុនទូរគមនាគមន៍កម្ពុជាបានចុះហត្ថលេខាលើកិច្ចព្រមព្រៀងមួយ ដើម្បីអនុវត្តការសាកល្បងបច្ចេកវិទ្យា5G នៅក្នុងរាជធានីភ្នំពេញក្នុងខែនេះ។ នេះបើយោងតាមសារព័ត៌មាន VN Express ដែលមានមូលដ្ឋាននៅវៀតណាមនេះផ្សាយកាលពីម្សិលមិញនេះ។

លោក Nhong Dinthon អគ្គនាយករងរបស់ក្រុមហ៊ុនបាននិយាយថា ក្រុមហ៊ុន Viettel Cambodia ឬMetfone បានចុះហត្ថលេខាលើកិច្ចព្រមព្រៀងមួយ ដើម្បីសាកល្បងបច្ចេកវិទ្យាជាមួយក្រុមហ៊ុនទូរគមនាគមន៍កម្ពុជា ដែលជាក្រុមហ៊ុនរដ្ឋ ហើយកំពុងធ្វើការយ៉ាងឆាប់រហ័ស ដើម្បីដំឡើងឧបករណ៍បញ្ជូនទិន្នន័យ5G ដើម្បីចាប់ផ្តើមការសាកល្បងក្នុងខែនេះ។

នៅក្នុងពិធីចុះហត្ថលេខានៅថ្ងៃអង្គារ ភាគីទាំងពីរក៏បានសន្យាថា នឹងចែករំលែកហេដ្ឋារចនាសម្ព័ន្ធបច្ចេកវិទ្យាព័ត៌មានរបស់ខ្លួន វិនិយោគលើវិស័យអេឡិចត្រូនិក សុខភាពអេឡិចត្រូនិក ការអប់រំអេឡិចត្រូនិច កសិកម្មអេឡិចត្រូនិច ទីក្រុងឆ្លាត និងInternet ជាដើម។

កាលពីឆ្នាំមុន ក្រុមហ៊ុនមិត្តហ្វូនបានក្លាយជាប្រតិបត្តិករដំបូង គេនៅកម្ពុជាក្នុងការផ្តល់សេវា 4.5G LTE ។ វាក៏បានតំឡើងស្ថានីយ៍ផ្សាយ 4G ចំនួន១០០នៅទន្លេសាប ដែលត្រូវបានគេចាត់ទុកថា ជាតំបន់មួយដែលមានល្បឿន Internet យឺត។

កិច្ចព្រមព្រៀងរបស់ក្រុមហ៊ុន Viettel ដើម្បីសាកល្បងសេវា 5G នៅកម្ពុជាបានមកដល់ពេលមួយខែ ក្រោយពីក្រុមហ៊ុននេះបានប្រើប្រាស់បច្ចេកវិទ្យា 5G ជាលើកដំបូងនៅវៀតណាម។ ក្រុមហ៊ុនមានអាជ្ញាប័ណ្ណពីក្រសួងព័ត៌មាន និងគមនាគមន៍របស់វៀតណាមដើម្បីសាកល្បងសេវាកម្ម 5G របស់ខ្លួនរហូតដល់ថ្ងៃទី ២១ ខែមករាឆ្នាំ ២០២០។

បច្ចេកវិទ្យា 5G ជាបច្ចេកវិទ្យាជាជំនាន់ចុងក្រោយនៃការភ្ជាប់ Internet ចល័ត ហើយផ្តល់ល្បឿនលឿន និងការភ្ជាប់ដែលអាចជឿជាក់បានលើស្មាតហ្វូន និងឧបករណ៍ផ្សេងទៀត បើប្រៀបធៀបទៅនឹងបច្ចេកវិទ្យា 3G និង 4G ដែលមានស្រាប់។

កាលពីពេលថ្មីៗនេះ ក្រុមហ៊ុន Smart Axiata ដែលជាប្រតិបត្តិករទូរគមនាគមន៍ចល័តឈានមុនគេក្នុងប្រទេសកម្ពុជា បានរៀបចំធ្វើតេស្តបង្ហាញជាលក្ខណៈសាកល្បងផ្លូវការដោយផ្ទាល់លើបច្ចេកវិទ្យា 5G ដំបូងបង្អស់នៅកម្ពុជា។ ការបង្ហាញជាលក្ខណៈសាកល្បងនេះមានឈ្មោះថា “ជម្រុញការអភិវឌ្ឍកម្ពុជាសម្រាប់អនាគត នៃការតភ្ជាប់និងការរស់នៅបែបឌីជីថល”៕

រដ្ឋាភិបាលនឹងលើកយកសេចក្តីព្រាងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកមកពិភាក្សានៅថ្ងៃស្អែកនេះ

July 11, 2019

0

ដោយ វុត្ថា

ភ្នំពេញ៖ រដ្ឋាភិបាលនឹងបើកកិច្ចប្រជុំពិភាក្សាសេចក្តីព្រាងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក នៅថ្ងៃទី ១២ ខែកក្កដា ឆ្នាំ ២០១៩ ខាងមុខនេះ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ខណៈពេលដែលបច្ចេកវិទ្យាមួយនេះកាន់តែមានការរីកចម្រើន ហើយការប្រើប្រាស់ប្រព័ន្ធអ៉ីនធើណេត កាន់តែមានការីកលូតលាស់គ្របដណ្តប់ស្ទើរពេញផ្ទៃប្រទេស។

ជាមួយគ្នាននោះ ប្រតិបត្តិការអាជីវកម្មតាមអនឡាញដូចជា ការទិញទំនិញ លក់ទំនិញ ការកក់សេវាកម្ម ការជួញដូរទំនិញ និងសេវាកម្មនានា ក៏មានសន្ទុះកើនឡើងខ្លាំងផងដែរ ក្នុងប៉ុន្មានឆ្នាំចុងក្រោយនេះ។ក្នុងប្រទេសកម្ពុជា ការធ្វើពាណិជ្ជកម្មតាមប្រព័ន្ធអេឡិចត្រូនិក ឬហៅថា E-Commerce សំដៅលើសកម្មភាពទិញលក់ទំនិញ កក់សេវាកម្ម និងទូទាត់កម្រៃតាមរយៈប្រព័ន្ធអ៉ីនធើណេត ដែលអាចនាំមកនូវកាលានុវត្តភាពអាជីវកម្មថ្មីៗយ៉ាងច្រើន សម្រាប់សហគ្រិនវ័យក្មេងនៅក្នុងប្រទេស ដើម្បីចូលរួមពង្រីកកំណើនសេដ្ឋកិច្ចជាតិ។

យ៉ាងណាក៏ដោយពាណិជ្ជកម្មប្រភេទនេះ ចាំបាច់តម្រូវឲ្យមានច្បាប់ សម្រាប់គ្រប់គ្រងរាល់ប្រតិបត្តិការជួញដូរ ដើម្បីធានាបានសុក្រឹតភាព និងសុវត្ថិភាពដល់គ្រប់ភាគីពាក់ព័ន្ធ។

ដោយមើលឃើញពីសារៈសំខាន់នេះ ក្រសួងពាណិជ្ជកម្ម ដែលទទួលបានថវិកាឧបត្ថម្ភពីកម្មវិធីគាំទ្រកិច្ចអភិវឌ្ឍពាណិជ្ជកម្ម (TDSP) ផ្តល់ដោយម្ចាស់ជំនួយពហុភាគី គ្រប់គ្រងដោយធនាគារពិភពលោក បានផ្តួចផ្តើមរៀបចំសេចក្តីព្រាងច្បាប់ស្តីពី «ការធ្វើពាណិជ្ជកម្មតាមប្រព័ន្ធអេឡិចត្រូនិច» ដើម្បីជួយសម្រួល និងគ្រប់គ្រងរាល់ការធ្វើប្រតិបត្តិការពាណិជ្ជកម្មតាមប្រព័ន្ធអ៉ីនធើណេតសម្រាប់ពាណិជ្ជករ និងសាធារណជនទូទៅ។

ច្បាប់ E-Commerce នេះមាន ១២ជំពូក និងចែកចេញជា ៩០មាត្រា ដែលមានដាក់បញ្ចូលលំអិតនូវបទប្បញត្តិផ្សេងៗ ទៅក្នុងកិច្ចព្រមព្រៀង និងការប្រើប្រាស់ហត្ថលេខាតាមអនឡាញឲ្យស្របទៅនឹងស្តង់ដាអន្តរជាតិ ដើម្បីគ្រប់គ្រង និងការការពារអ្នកប្រើប្រាស់ ដែលធ្វើប្រតិបត្តិការចំណាយ និងទិញទំនិញតាមប្រព័ន្ធអ៉ីនធើណេត។

ក្រសួងពាណិជ្ជកម្មបានពិភាក្សាជាមួយស្ថាប័ន និងភាគីពាក់ព័ន្ធសំខាន់ៗ ដូចជាក្រសួងប្រៃសណីយ៍ និងទូរគមនាគមន៍, ក្រសួងយុត្តិធម៌, ធនាគារជាតិ, ក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី ដែលបានធ្វើការសិក្សាស៊ីជម្រៅអំពីគំរូច្បាប់ E-Commerce អន្តរជាតិ សំដៅធ្វើឲ្យប្រសើរឡើងនូវចំណេះដឹង និងការប្រើប្រាស់ពាក្យបច្ចេកទេសទាំងឡាយ ដែលមាននៅក្នុងច្បាប់ថ្មីមួយនេះ មុនពេលធ្វើការបញ្ជូនឲ្យរដ្ឋសភាជាតិ ពិនិត្យ និងអនុម័ត៕

ប្រធាន CVEA ៖ បើធ្វើការបានប្រាក់ខែតិចគួរសាកល្បងចាប់អាជីពភ្នាក់ងារលក់អចលនទ្រព្យ

July 11, 2019

0

ដោយៈ រ៉ាណេត

ភ្នំពេញៈ យុវជនភាគច្រើនក្រោយពេលបញ្ចប់ការសិក្សាថ្នាក់ឧត្តមសិក្សា ឬចប់មហាវិទ្យាល័យ តែងប្រាថ្នាការងារល្អមានប្រាក់ខែច្រើន និងអង្គុយនៅក្នុងក្រុមហ៊ុនដ៏ធំដែលល្បីឈ្មោះ។ ទាំងនេះវាគ្រាន់តែជាក្ដីប្រាថ្នា និងការចង់បានតែប៉ុណ្ណោះ ប៉ុន្តែធាតុពិតជាក់ស្ដែង ហាក់មិនបានសម្រេចនោះឡើយ។

អ្នកជំនាញនៅក្នុងវិស័យអចលនទ្រព្យកម្ពុជាបានលើកឡើងថា ការបម្រើការងារផ្នែកវិស័យអចលនទ្រព្យក្នុងនាមជាភ្នាក់ងារ គេមិនសូវជារំពឹងទៅលើប្រាក់ខែនោះទេ ប៉ុន្តែបើចង់ទទួលបានចំណូលច្រើន ត្រូវតែពង្រឹងសមត្ថភាពក្នុងការលក់ ទើបអាចទទួលបានកម្រៃជើងសារច្រើន។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុន Century 21 Mekong លោក ច្រឹក សុខនីម បានមានប្រសាសន៍ប្រាប់ថា ជាផ្នត់គំនិតទូទៅ ចំពោះការចូលបម្រើការងារនៅក្នុងក្រុមហ៊ុនមួយ គឺគេតែងគិតទៅលើប្រាក់ខែ ប៉ុន្តែចំពោះការងារនៅក្នុងវិស័យអចលនទ្រព្យ មានភាពខុសគ្នាពីការងារទូទៅ ដោយសារតែនៅក្នុងការបំពេញភារកិច្ច ជាភ្នាក់ងារអាចទទួលបានកម្រៃជើងសារ តបទៅនឹងលទ្ធផលរបស់ពួកគេ។

លោកបានបន្តទៀតថា “ការបំពេញតួនាទីជាភ្នាក់ងារលក់អចលនវត្ថុ ប្រៀបបានទៅនឹងការធ្វើជំនួញផ្ទាល់ខ្លួនយ៉ាងដូច្នោះ”។ លោកបន្តទៀតថា “អ្វីដែលជាភាពល្អប្រសើរ គឺពួកគាត់មានក្រុមហ៊ុនស្រាប់រួចទៅហើយ គ្រាន់តែគាត់ខំប្រឹងលើតួនាទី ដើម្បីទទួលបានចំណូលជាការស្រេច”។

លោកបន្ថែមថា “បើបុគ្គលិកផ្នែកនេះខំប្រឹងកាន់តែខ្លាំង ចំណូលដែលទទួលបានកាន់តែច្រើន”។លោកបន្តទៀតថា “តាមពិតការទន្ទឹងរង់ចាំទទួលចំណូលពីប្រាក់ខែ វាប្រៀបបានទៅនឹងការដាក់សម្ពាធ និងបិទឱកាសរបស់ខ្លួនយ៉ាងដូច្នោះ។

លោកសុខនីមបានបន្តថា ភាពជាក់ស្ដែងនៅក្នុងវិស័យអចលនទ្រព្យ ការងារជាភ្នាក់ងារលក់ អាចមានលទ្ធភាពទទួលបានប្រយោជន៍ និងចំណូលច្រើនជាងប្រាក់ខែដោយឥតកំណត់។ ទាំងអស់នេះមិនមែនមានន័យថា លើកទឹកចិត្ត និងជំរុញឱ្យបោះបង់ការងារដែលខ្លួនកំពុងតែធ្វើដោយក្ដីស្រឡាញ់ទាំងស្រុងនោះទេ ប៉ុន្តែវាគ្រាន់ជាចំណុចដែលត្រូវពិចារណា៕

មហាសេដ្ឋីអង់គ្លេសមួយរូបទិញខុនដូតម្លៃ ៥៤លានដុល្លារជាតម្លៃកំណត់ត្រាខ្ពស់បំផុតនៅសឹង្ហបូរី

July 11, 2019

0

ដោយ Donald Lee

សឹង្ហបូរី: លោក James Dyson ស្ថាបនិកក្រុមហ៊ុន Dyson Ltd បានទិញខុនដូតម្លៃ ៥៤,២លានដុល្លារ ដែលតម្លៃមួយខ្ពស់បំផុតនៅប្រទេសសឹង្ហបូរី។

យោងតាមកំណត់ត្រារបស់សឹង្ហបូរី លោក Dyson ជាស្ថាបនិកក្រុមហ៊ុនបច្ចេកវិទ្យា Dyson Ltd បានបញ្ជាទិញខុននេះ ដែលមានកុងត្រាធ្វើជាម្ចាស់កម្មសិទ្ធិរយៈពេល៩៩ ឆ្នាំ នៅថ្ងៃទី២០ ខែមិថុនាកន្លងមកនេះ។

ប្រតិបត្តិការបញ្ជាទិញនេះ បានបំបែកឯតទគ្គកម្មអចលនទ្រព្យ សម្រាប់ការទិញយូនីតខុនដូថ្លៃបំផុតនៅសឹង្ហបូរី ដែលប្រហែលពាក់កណ្តាលនៃតម្លៃស្នើសុំ១០០លានដុល្លារ។

យូនីតខុនដូនេះស្ថិតនៅជាន់ទី៦២ ដល់ជាន់ទី៦៤ នៃមជ្ឈមណ្ឌល Tanjong Pagar ដែលមានតម្លៃ ៣,២ពាន់លានដុល្លារ ជាអាគារអភិវឌ្ឍចម្រុះមានកម្ពស់២៩០ ម៉ែត្រនៅតំបន់ពាណិជ្ជកម្មកណ្តាលរបស់ប្រទេសសឹង្ហបូរី។

លោក Dyson ដែលជាជនជាតិអង់គ្លេស បានគ្រោងធ្វើការបញ្ជាទិញនេះ បន្ទាប់ពីក្រុមហ៊ុនរបស់លោកបានប្រកាសផែនការ បើករោងចក្រផលិតរថយន្តអគ្គិសនីថ្មីនៅប្រទេសសឹង្ហបូរី ហើយបានផ្លាស់ប្តូរការិយាល័យកណ្តាលនៅចក្រភពអង់គ្លេស ទៅកាន់ប្រទេសសឹង្ហបូរី។

អ្នកនាំពាក្យក្រុមហ៊ុននេះ បានប្រាប់កាសែត The Business Times ថា“ដោយសារតែការសម្រេចចិត្តរកទីស្នាក់ការនៅសឹង្ហបូរី និងការផ្តោតលើអាជីវកម្មរបស់ក្រុមហ៊ុននៅក្នុងតំបន់នោះ។

ពិតណាស់ James Dyson បានទិញអចលនទ្រព្យនៅទីនោះ (សឹង្ហបូរី)។

ខណៈដែលទីផ្សារអចលនទ្រព្យសឹង្ហបូរី ហាក់ប្រទះបញ្ហាកាលពីពីរបីឆ្នាំមុន អាជ្ញាធរបានបន្ថែមការរឹតត្បិតលើអ្នកអភិវឌ្ឍន៍អចលនទ្រព្យ និងអ្នកទិញ។ ឥលូវជនបរទេសត្រូវតែបង់ពន្ធអចលនទ្រព្យចំនួន២០ភាគរយ ដើម្បីទិញអលចនទ្រព្យចាប់តាំងពីច្បាប់ថ្មីត្រូវបានអនុវត្តកាលពីឆ្នាំមុន ហើយស្មើនឹងប្រាក់ប្រហែល១០លានដុល្លារ សម្រាប់ការទិញខុនដូរបស់លោក Dyson៕

ខេត្តកែបគ្រោងបង្កើត “វិថីលក់ម្ហូបអាហារ” ដើម្បីទាក់ទាញភ្ញៀវទេសចរណ៍

July 11, 2019

0

ដោយ វុត្ថា

ខេត្តកែបៈ អាជ្ញាធរខេត្តកែបគ្រោងនឹងរៀបចំបង្កើត “វិថីលក់ម្ហូបអាហារ” ថ្មីមួយទៀត ដើម្បីទាក់ទាញភ្ញៀវទេសចរណ៍បន្ថែម ក្នុងការស្នាក់នៅឱ្យបានយូរ។

អភិបាលរងខេត្តកែបលោកស្រីអ៊ុល ភីរុណបានឱ្យដឹងនៅក្នុងកិច្ចប្រជុំពិភាក្សាលើការរៀបចំគម្រោងនេះ នៅថ្ងៃទី ១០ ខែកក្កដា ឆ្នាំ ២០១៩កន្លងមកថា កត្តាសន្តិភាព និងការអភិវឌ្ឍហេដ្ឋារចនាសម្ព័ន្ធ ការកែលម្អសោភណភាព ការគ្រប់គ្រងសន្តិសុខ សណ្តាប់ធ្នាប់ទីក្រុង គួបផ្សំនិងសក្តានុពលរបស់ខេត្តកែប បានធ្វើឲ្យខេត្តមានភាពល្បីល្បាញកាន់តែខ្លាំងឡើង និងទទួលបានកំណើភ្ញៀវទេសចរពីមួយឆ្នាំទៅមួយឆ្នាំ រួមចំណែកកាត់បន្ថយភាពក្រីក្ររបស់ប្រជាពលរដ្ឋ ឆ្លើយយតបនឹងយុទ្ធសាស្រ្តចតុកោណរបស់រាជរដ្ឋាភិបាល។

លោកស្រីបន្តថា “ការរៀបចំឲ្យមាន”វិថីលក់ម្ហូបអាហារ”ក៏នឹងអាចទាក់ទាញភ្ញៀវទេសចរមកសម្រាកលម្ហែកម្សាន្ត នៅខេត្តកែបកាន់តែច្រើន និងចំណាយពេលស្នាក់នៅយូរថ្ងៃ”។

លោកស្រីបន្ថែមថា ការរៀបចំ ” វិថីលក់ម្ហូបអាហារ ” នឹងត្រូវជ្រើរើសដាក់ជូនអភិបាលខេត្ត ពិនិត្យសម្រេច និងមានគោលការណ៍បន្ត ដើម្បីដាក់បញ្ចូលក្នុងស្តង់ដាទីក្រុងស្អាត និងត្រៀមចូលរួមចលនាប្រឡងប្រណាំង ទីក្រុងស្អាតលើកទី៣ ឆ្នាំ២០២១-២០២៣៕

មជ្ឈមណ្ឌលពាណិជ្ជកម្មលំដាប់ពិភពលោក Royal One គ្រោងនឹងចាប់ផ្តើមសាងសង់ឡើងវិញនៅចុងឆ្នាំនេះ

July 11, 2019

0

ដោយ វុត្ថា

ភ្នំពេញៈ មជ្ឈមណ្ឌលពាណិជ្ជកម្មលំដាប់ពិភពលោក Royal One របស់អ្នកឧកញ៉ាគិត ម៉េងប្រធានក្រុមប្រឹក្សាភិបាល បាននឹងកំពុងស្វែងរកក្រុមហ៊ុនសាងសង់អន្តរជាតិសាងសង់អគារភ្លោះពាណិជ្ជកម្ម Royal One កំពស់ ៦៨ជាន់ ហើយគ្រោងនឹងចាប់ផ្តើមសាងសង់ជាផ្លូវការនៅខែធ្នូឆ្នាំ២០១៩ ខាងមុខនេះ។

អ្នកនាង តាំង សុជាតិ បុគ្គលិកផ្នែកទីផ្សារ និងលក់របស់ក្រុមហ៊ុន OTK Royal Co., Ltd ដែលជាបុត្រសម្ព័ន្ឋរបស់ក្រុមហ៊ុន Royal Group បានឱ្យនៅថ្ងៃទី១០ ខែកក្កដា ឆ្នាំ ២០១៩កន្លងមកថា បន្ទាប់ពីសម្ពោធបុកគ្រឹះសាងសង់ រហូតមកដល់ពេលនេះក្រុមហ៊ុនមិនទាន់រកបាននូវក្រុមហ៊ុនសាងសង់នូវអគារនេះនៅឡើយទេ ដូច្នេះហើយបានជាការរដ្ឋាននៃអគារនេះ គ្មានគ្រឿងចក្រសាងសង់ ដោយសារតែក្រុមហ៊ុនដែលមានស្តង់ដារ និងមានបទពិសោធក្នុងការសាងសង់អគារខ្ពស់កប់ពពកបែបនេះ។

អ្នកនាងបន្តថា “រហូតមកដល់ពេលនេះ មានក្រុមហ៊ុនអន្តរជាតិប្រហែល៤ ទៅ៥ ក្រុមហ៊ុនដែលបានដាក់ពាក្យដេញថ្លៃក្នុងការសាងសងអគារនេះ”។ អ្នកនាងបន្ថែមថា “ក្រុមហ៊ុននឹងធ្វើការការជ្រើសរើសក្រុមហ៊ុនមួយ ក្នុងចំណោមក្នុងក្រុមហ៊ុនទាំងនោះ ដើម្បីឱ្យសាងសង់ជាផ្លូវការនៅចុងឆ្នាំនេះ ពោលគឹខែធ្នូខាងមុខ ដោយមិនបង្អង់យូនោះទេ”។

អ្នកនាងតាំង សុជាតិ បានបន្ថែមថា រហូតមកដល់ពេលក្រុមហ៊ុនបានលក់គម្រោងបានប្រហែល១៥ភាគរយហើយ ទៅលើបន្ទប់ការិយាល័យ ដោយសារតែទីផ្សារការិយាល័យមានភាពទាក់ទាញជាង តែសម្រាប់អាផាតមិនមិនទាន់លក់អស់នៅឡើយទេ។ នៅពេលនេះ ក្រុមហ៊ុនមានការិយាលកល់នៅក្នុងទីក្រុងតៃវាន់ និងនៅកម្ពុជាដោយក្នុងនោះលក់ទៅអោយទីផ្សារជប៉ុន និងកូរ៉េ តែមិនទាក់ដាក់លក់ទៅក្នុងទីផ្សារចិននៅឡើយទេ តែបើដាក់លក់នៅទៅទីផ្សារចិន គឺមិនដល់មួយឆ្នាំទេ នឹងលក់អស់ហើយ ព្រោះទីផ្សារចិនមានទំហំធំជាងបណ្តាប្រទេសនានា។

បច្ចុប្បន្នអគាររបស់ក្រុមហ៊ុន Royal Group នេះ កំពុងហុំព័ទ្ធដោយរបងដែលបង្ហាញពីទ្រង់ទ្រាយនៃអាគារ និងចាក់សោបិតជិត ព្រមទាំងគ្មានគ្រឿងចក្រសំណង់សាងសង់ផ្សេងៗនៅក្នុងនៃអគារ។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន Royal Group និងជាប្រធានសភាពាណិជ្ជកម្មកម្ពុជា បានសហការរួមគ្នាជាមួយវិនិយោគិនចិនបោះទុនទឹកប្រាក់ចំនួន២៣០លានដុល្លារ សាងសង់អគារភ្លោះពាណិជ្ជកម្មកំពស់៦៨ជាន់ និងបានប្រកាសបុកគ្រឹះសាងសង់ជាផ្លូវការនៅថ្ងៃទី១៤ ខែកុម្ភៈ ឆ្នាំ២០១៩កន្លងទៅនេះ។

អគារភ្លោះពាណិជ្ជកម្មកំពស់ ៦៨ជាន់ មានឈ្មោះថា Royal One ដែលមានទីតាំងស្ថិតនៅលើមហាវិថីសហព័ន្ធរុស្ស៊ី និងមហាវិថីមន្នីវង្ស ព្រមទាំងស្ថិតនៅក្នុងតំបន់ពាណិជ្ជកម្ម និងប្រជុំដោយអគារខ្ពស់ៗដូចជា អគារកាណាឌីយ៉ា អគារវឌ្ឍនៈថៅវើរ រួមទាំងអគារ Exchange Square ជាដើម។

មជ្ឈមណ្ឌលពាណិជ្ជកម្ម Royal One នឹងប្រើប្រាស់នូវសេវាកម្មចម្រុះដូចជា ខុនដូ, ផ្សារទំនើប សណ្ឋាគារ ក្លឹបកំសាន្ត ក្លឹបហាត់ប្រាណ ភោជនីយដ្ឋាន និងមជ្ឍមណ្ឌលកំសាន្តផ្សេងៗជាដើម។ លោកឧកញ៉ា គិត ធាង ជាប្រធានក្រុមហ៊ុន Royal One និងជាអនុប្រធានសម្ព័ន្ធ Royal Group។

អគារភ្លោះពាណិជ្ជកម្ម Royal One មានកំពស់រហូតដល់៦៨ជាន់ ក្នុងនោះ៦ជាន់ក្រោមដី និង៦២ជាន់លើអាកាសស្មើនឹងកំពស់២៣០ម៉ែត្រ។ គំរោងនេះសាងសង់លើផ្ទៃដីទំហំ ៤,០៣៦ម៉ែត្រការ៉េ និងប្រើប្រាស់រយៈពេលសាងសងចំនួន៥ឆ្នាំ។ក្រុមហ៊ុន Royal Group ធ្លាប់បានបង្ហាញភាពជឿជាក់ថា វត្តមានអគារភ្លោះដ៏ប្រណិតនេះនឹងចូលរួមចំណែកនៃមោទនភាពជាតិរបស់កម្ពុជា ដែលបង្ហាញឲ្យឃើញពីសមត្ថភាព និងភាពរីកចម្រើនរបស់មាតុប្រទេស និងផ្សព្វផ្សាយលើឆាកអន្ដរជាតិ៕

វៀតណាមពន្លឿនផ្លូវល្បឿនលឿនពីហូជីម៉ិញមកកាន់ព្រំដែនបាវិតដើម្បីតភ្ជាប់ជាមួយគំរោងផ្លូវល្បឿនលឿននាពេលខាងមុខ

July 11, 2019

0

ដោយ Donald Lee

ហូជីមិញៈ រដ្ឋាភិបាលវៀតណាមកំពុងពន្លឿនការសាងសង់ ផ្លូវល្បឿនលឿនតភ្ជាប់ជាមួយក្រុងបាវិត ជាប់ព្រំប្រទល់ប្រទេសវៀតណាម ដែលគំរោងនេះនឹងតភ្ជាប់ជាមួយផ្លូវល្បឿនលឿនពីភ្នំពេញ ទៅកាន់ទីក្រុងបាវិតនាពេលអនាគត។

អាជ្ញាធរ វៀតណាមក៏បានអនុម័តផ្សារទំនើប និងអភិវឌ្ឍន៍ស្ថានីយសេវាកម្មតាមបណ្តោយផ្លូវហាយវេ ហូជីមិញ-ម៉ុកបាយផងដែរ។

គំរោងផ្លូវល្បឿនលឿននេះ នឹងចែកចេញជាបីដំណាក់កាល ដោយគម្រោងដំណាក់កាលទី១ នៃគម្រោងផ្លូវទីក្រុងហូជីមិញ ម៉ុកបាយនឹងផ្តោតលើផ្លូវ៣៣គីឡូម៉ែត្រពីទីក្រុងហូជីមិញ ទៅខេត្តតៃនីង វៀតណាម។ បន្ទាប់ពីការបញ្ចប់ការសាងសង់ផ្លូវដែលអាចបើកបរ ក្នុងល្បឿនរហូតដល់១២០គីឡូម៉ែត្រក្នុងមួយម៉ោង។ គំរោងផ្លូវល្បឿនលឿន ដំណាក់កាលទី២នឹងមានប្រវែង២០,៥គីឡូម៉ែត្រពីតាយនីងទៅម៉ុកបាយ ដែលអាចបង្កើនល្បឿនបើកបររហូតដល់៨០គីឡូម៉ែត្រក្នុងមួយម៉ោង។ និងដំណាក់កាលទីបី នឹងរួមបញ្ចូលការពង្រីកទទឹងផ្លូវហាយវេពីផ្លូវ៦គន្លង ទៅ៨គន្លង។

គម្រោងពង្រីកហេដ្ឋារចនាសម្ព័ន្ធនៅផ្លូវជាតិលេខ១ សម្រាប់គម្រោងផ្លូវល្បឿនលឿនភ្នំពេញ-បាវិតនឹងពង្រីកចាប់ពីគីឡូម៉ែត្រ១៥៩ ដល់គីឡូម៉ែត្រលេខ១៦៤និងពង្រីកទទឹងផ្លូវ ដើម្បីសម្រួលរថយន្ដកុងតឺន័រពីភ្នំពេញ ទៅទីក្រុងហូជីមិញតាមរយៈទីក្រុងបាវិត។ ផ្លូវល្បឿនលឿនភ្នំពេញ បាវិតមានប្រវែងប្រមាណ១៦០គីឡូម៉ែត្រ។

ក្រុងបាវិត ដែលជាទីក្រុងព្រំដែនរវាងកម្ពុជា និងវៀតណាម នឹងក្លាយទៅជាមជ្ឈមណ្ឌលពាណិជ្ជកម្មឆ្លងកាត់ និងមជ្ឈមណ្ឌលពាណិជ្ជកម្មដ៏សំខាន់ បន្ទាប់ពីគម្រោងហេដ្ឋារចនាសម្ព័ន្ធកម្ពុជា និងវៀតណាមបានបញ្ចប់។

វិស័យឯកជនរួមជាមួយវិនិយោគិនបរទេស មកពីប្រទេសចិន ជប៉ុន និងកូរ៉េ បានវិនិយោគរួចទៅហើយ នៅក្នុងតំបន់សេដ្ឋកិច្ចពិសេសនៅទីក្រុងបាវិត ដែលមានការគាំទ្រដោយការធ្វើឲ្យភាពប្រសើរឡើងនៃហេដ្ឋារចនាសម្ព័ន្ធ។

ក្រៅពីវិស័យឧស្សាហកម្ម វិស័យលក់រាយបានវិនិយោគយ៉ាងច្រើន នៅមជ្ឈមណ្ឌលផ្សារទំនើប និងស្ថានីយ៍សេវាកម្ម។

វិស័យអចលនទ្រព្យនៅកម្ពុជាក៏ទទួលបានការចាប់អារម្មណ៍ ហើយបានចាប់ផ្តើមការសាងសង់ និងអភិវឌ្ឍទីក្រុងរណប ដែលមានឈ្មោះថាទីក្រុងរណប ហេង ហេង និងទីក្រុងរណប Empire World។

ដោយមានការវិនិយោគជាមួយកាស៊ីណូ សណ្ឋាគារ និងការអភិវឌ្ឍរមណីយដ្ឋាននៅតំបន់នោះ អ្នកវិភាគរំពឹងថា វិស័យអចលនទ្រព្យនឹងរីកចំរើននាពេលអនាគត។

អនុប្រធានក្រុមប្រឹក្សាភិបាក សមាគមអ្នកជំនាញអចលនទ្រព្យកម្ពុជាលោកយិន លាងគង់បានមានប្រសាសន៍ថា “ការវិនិយោគនៅក្នុងទីក្រុងបាវិតនឹងកើនឡើង ខណៈដែលក្រុមអ្នកវិភាគ អចលនទ្រព្យបានកំណត់រួចមកហើយថា វាជាមជ្ឈមណ្ឌលសេដ្ឋកិច្ចនាពេលអនាគត ដោយសារទីតាំងស្ថិតនៅកណ្តាលរបស់ខ្លួន រវាងប្រទេសទាំងពីរដែលមានសេដ្ឋកិច្ចលូតលាស់លឿនបំផុតលើពិភពលោក”។

លោកបន្តថា “ក្រុមបាវិតត្រូវបានរៀបចំហេដ្ឋារចនាសម្ព័ន្ឋយ៉ាងល្អ និងមានទីតាំងភូមិសាស្រ្តដ៏មានអំណោយផល ក្នុងការដឹកជញ្ជូនឆ្លងកាត់ព្រំដែន ទៅកាន់កំពង់ផែទឹកជ្រៅរបស់វៀតណាម”។លោកបន្តថា “ដោយមើលឃើញនូវលក្ខខ័ណ្ឌអំណោយផលនេះហើយ ទើបរដ្ឋាភិបាលកម្ពុជាបានដាក់ក្រុងបាវិត ជាទីក្រុងមួយក្នុងចំណោមទីក្រុង២ទៀត ដើម្បីប្រែក្លាយតំបន់នេះជាតំបន់់ឧស្សាហកម្មពិសេស ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥”។

ជាក់ស្តែងបច្ចុប្បន្នក្រុងបាវិតមានតំបន់សេដ្ឋកិច្ចពិសេសចំនួន១០ និងបានផ្តល់ការងារដល់កម្មករ និយោជិតរាប់ម៉ឺននាក់។

ក្នុងអំឡុងពេលពិធីបើកការដ្ឋានផ្លូវល្បឿនលឿនភ្នំពេញ ព្រះសីហនុក្នុងឆ្នាំនេះ សម្តេចតេជោនាយករដ្ឋមន្រ្តីហ៊ុន សែន បានមានប្រសាសន៍ថា ផែនការកសាងហេដ្ឋារចនាសម្ព័ន្ធកម្ពុជា និងវៀតណាមនឹងពន្លឿនកំណើនសេដ្ឋកិច្ចរបស់កម្ពុជា។

សម្តេចតេជោនាយករដ្ឋមន្ត្រី បានបន្ថែមថា “វានឹងជួយបង្កើនសមាហរណកម្មផ្ទៃក្នុងរបស់ប្រទេសកម្ពុជា និងបង្កើនល្បឿនកំណើនសេដ្ឋកិច្ចរបស់ប្រទេស”៕

ចំណេះដឹង! តើអ្វីជាការលក់ឡាយឡុងអចលនវត្ថុតាមផ្លូវតុលាការ?

July 11, 2019

0

ដោយ វុត្ថា

ភ្នំពេញៈ ការលក់ឡាយឡុងអចលនទ្រព្យតាមផ្លូវតុលាការ សំដៅដល់ស្ថានភាពមួយដែលតុលាការចាត់ចែងលក់ដោយបង្ខំនូវអចលនវត្ថុ ដែលជាកម្មសិទ្ធិរបស់កូនបំណុលនៃការអនុវត្ត(អ្នកចាញ់) ទៅឱ្យសាធារណៈជន ដែលមានបំណងចង់ទិញអចលនវត្ថុនោះ មកធ្វើជាកម្មសិទ្ធិករ ហើយកប្រាក់ដែលបានមក ការលក់ទៅចែកចំណែកឱ្យទៅម្ចាស់បំណុល់នៃការអនុវត្ត(អ្នកឈ្នះក្តី) និងម្ចាស់បំណុលដែលមានសិទ្ធិទទួលចំណែក។

ឧទាហរណ៍ លោកវិចិត្រ ឱ្យលោកម៉ារ៉ាខ្ចីប្រាក់ចំនួន១០ម៉ឺនដុល្លារអាមេរិក ហើយលោក ម៉ារ៉ាសន្យាថា នឹងសងវិញក្នុងអំឡុងពេល៦ខែ ប៉ុន្តែលុះដល់ពេលកំណត់ លោកម៉ារ៉ា មិនបានសងប្រាក់ទៅលោកវិចិត្រវិញទេ។

លោកវិចិត្រក៏បានប្តឹងទៅតុលាការ ដើម្បីឱ្យចេញសាលក្រមឱ្យលោកម៉ារ៉ា សងប្រាក់មកខ្លួនវិញ។ ក្រោយមកតុលាការបានទទួលពាក្យបណ្តឹង និងចាត់ការតាមនីតិវិធីរហូតចេញសាលក្រមតាមការទាមទាររបស់លោកវិចិត្រ។

លោកវិចិត្រដាក់ពាក្យសុំអនុវត្តសាលក្រមនេះ ដោយសុំលក់ដោយបង្ខំនូវអលចនវត្ថុជាដី និងផ្ទះរបស់លោកម៉ារ៉ា មកតុលាការ។ ជាលទ្ធផលតុលាការចាត់ការនីតិវិធី ដោយរឹបអូសអចលនវត្ថុនេះ ហើយដាក់ការលក់ដោយការផ្សាយជាសាធារណៈ ទើបមានលោកបូរ៉ា ចូលខ្លួនមកដេញថ្លៃទិញយកក្នុងតម្លៃ១៥ម៉ឺនដុល្លារអាមេរិក ។ ករណីនេះ លោក បូរ៉ា ត្រូវបានគេទទួលស្គាល់ថាជាម្ចាស់សិទ្ធិលើអចលនវត្ថុនេះ៕

កម្ពុជាទទួលបានភ្ញៀវទេសចរជនជាតិចិនជាង ១លាននាក់ក្នុងរយៈពេល ៥ខែដំបូងក្នុងឆ្នាំនេះ

July 10, 2019

0

ដោយ ប៊ី

ភ្នំពេញ៖ ភ្ញៀវទេសចរចិនជាង១,១លាននាក់ បានមកទស្សនាកម្ពុជាក្នុងរយៈពេល ៥ ខែដំបូងនៃឆ្នាំនេះ កើនឡើង៤០ភាគរយធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់ក្រសួងទេសចរណ៍កម្ពុជាដែលបានចេញនៅថ្ងៃនេះ។

របាយការណ៍នេះបានបន្តឲ្យដឹងថា ប្រទេសចិននៅតែជាប្រភពភ្ញៀវទេសចរណ៍បរទេសច្រើនជាងគេនៅកម្ពុជា ដែលមានចំនួន៣៨ភាគរយ នៃចំនួនភ្ញៀវបរទេសសរុបមកកម្ពុជាក្នុងអំឡុងខែមករាដល់ខែឧសភាឆ្នាំនេះ។

លោក ថោង ខុន រដ្ឋមន្ត្រីទេសចរណ៍កម្ពុជាបានមានប្រសាសន៍ថា ចិនគឺជាទីផ្សារដ៏ធំមួយសម្រាប់វិស័យទេសចរណ៍កម្ពុជា។លោកបានបន្តថា “យើងសង្ឃឹមថានឹងទាក់ទាញអ្នកទេសចរចិនប្រហែល២,៦លាននាក់ក្នុងឆ្នាំ២០១៩ និងចំនួន៣លាននាក់នៅឆ្នាំ ២០២០ ហើយកើនដល់ចំនួន៥លាននាក់នៅឆ្នាំ ២០២៥ និងរហូតដល់៨លាននាក់នៅឆ្នាំ ២០៣០”។

យោងតាមរបាយការណ៍នេះបានឲ្យដឹងថា ភ្ញៀវទេសចរអន្តរជាតិចំនួន២,៨៩ លាននាក់ បានធ្វើដំណើរមកកាន់ប្រទេសកម្ពុជា ក្នុងរយៈពេលប្រាំខែដំបូងនៃឆ្នាំនេះគឺកើនឡើង ១១,៤ ភាគរយធៀបនឹងរយៈពេលដូចគ្នាកាលពីឆ្នាំមុន។

វិស័យទេសចរណ៍គឺជាផ្នែកមួយ ក្នុងចំណោមវិស័យបួនដែលគាំទ្រសេដ្ឋកិច្ចកម្ពុជា។

កាលពីឆ្នាំមុន កម្ពុជាទទួលបានភ្ញៀវទេសចរបរទេសចំនួន៦,២លាននាក់ ក្នុងនោះភ្ញៀវទេសចរជនជាតិចិនចំនួន២លាននាក់ផង ហើយកម្ពុជាទទួលបានប្រាក់ចំណូលសរុបចំនួន៤,៣៥ពាន់លានដុល្លារអាមេរិក ពីវិស័យទេសចរណ៍។

លោករដ្ឋមន្ត្រីបានបន្ថែមថា វិស័យទេសចរណ៍បានរួមចំណែក១២,៧ ភាគរយដល់ ផលិតផលក្នុងស្រុកសរុបកម្ពុជា។

ប្រទេសកម្ពុជាមានភាពល្បីល្បាញ ខាងបេតិកភណ្ឌពិភពលោកបីគឺប្រាសាទអង្គរវត្ត ប្រាសាទព្រះវិហារ និងតំបន់ប្រាសាទសម្បូរព្រៃគុក។ ក្រៅពីនេះកម្ពុជាមានឆ្នេរខ្សាច់ស្រស់ស្អាតនៅខេត្តចំនួនបួននៅភាគនិរតី ខេត្តកោះកុង ព្រះសីហនុ កំពត និងកែប៕

ប្រភព៖ Xinhua

កម្ពុជាស្នើសមាជិកអាស៊ានខំប្រឹងបង្កើតផលិតផលទេសចរណ៍ថ្មីៗ និងពង្រីកការហោះហើរត្រង់

July 10, 2019

0

ដោយនៅ វឌ្ឈនា

សៀមរាបៈ រដ្ឋមន្ត្រីក្រសួងទេសចរណ៍កម្ពុជា លោកថោង ខុនបានស្នើដល់ប្រទេសជាសមាជិកអាស៊ានទាំងអស់ ត្រូវខិតខំបង្កើតផលិតផលទេសចរណ៍ថ្មីៗ និងពង្រីការហោះហើរត្រង់បន្ថែម ឱ្យបានច្រើនតាមដែលអាចធ្វើទៅបាន ដើម្បីទាក់ទាញភ្ញៀវទេសចរឱ្យបានកាន់តែច្រើន ព្រមទាំងត្រូវដោះស្រាយបញ្ហាប្រឈមនានាមួយចំនួនទៀត។

រដ្ឋមន្ត្រីក្រសួងទេសចរណ៍ បានថ្លែងក្នុងពិធីបើកកិច្ចប្រជុំកម្រិតអគ្គនាយកទេសចរណ៍អាស៊ានលើកទី៥០ (ASEAN NTOs) ជាផ្លូវការ ខេត្តសៀមរាបនៅថ្ងៃទី ១០ ខែកក្កដា ឆ្នាំ ២០១៩ នេះ បានជំរុញដល់គ្រប់ភាគីពាក់ព័ន្ធនៅកម្ពុជា ឱ្យចូលរួមជំរុញនូវកិច្ចសហប្រតិបត្តិការ ក្នុងការអភិវឌ្ឍវិស័យទេសចរណ៍ជាតិនោះឡើយ ដោយលោកតែងតែលើកទឹកចិត្តឱ្យមានការបង្កើតផលិតផលទេសចរណ៍ថ្មីៗ និងទាក់ទាញការតភ្ជាប់ការហោះហើរត្រង់ពីបណ្ដាប្រទេសគោលដៅនានាជារឿយៗ។

លោករដ្ឋមន្ត្រីថោង ខុន បានលើកឡើងពីបញ្ហាប្រឈមមួយចំនួនដែលប្រទេសជាសមាជិកអាស៊ាន ត្រូវមានកិច្ចសហប្រតិបត្តិការដោះស្រាយរួមគ្នា ក្នុងនោះត្រូវជំរុញការធ្វើដំណើរទស្សនាកម្សាន្តផ្ទៃក្នុងអាស៊ាន ឱ្យបានផុសផុលឡើង សំដៅធ្វើយ៉ាងណាឱ្យទទួលបានកំណើនជាមធ្យម ៤%ក្នុងមួយឆ្នាំ និងជំរុញឱ្យទេសចរអាចធ្វើដំណើរទស្សនាកម្សាន្តបានដោយខ្លួនឯង ពិសេសដំណើរកម្សាន្តឆ្លងប្រទេស។

លោករដ្ឋមន្រ្តីបានជំរុញឱ្យអង្គប្រជុំ ASEAN NTOs រួមគ្នាពិភាក្សាពីចំណុចដ៏សំខាន់មួយនេះសំដៅធ្វើយ៉ាងសម្រេចឱ្យបាននូវ «ស្ដង់ដាទេសចរណ៍ម្ហូបអាហារអាស៊ាន» នេះឱ្យបាន។

ដោយសារតែនៅតំបន់អាស៊ាន សម្បូរទៅដោយធនធានធម្មជាតិ វប្បធម៌រូបិយ-អរូបិយ ដែលអំណោយផលដល់ការអភិវឌ្ឍវិស័យទេសចរណ៍ក្នុងតំបន់ ឱ្យក្លាយទៅជាផលិតផលដ៏ល្អឯក និងផ្ដល់នូវការចងចាំដ៏ជក់ចិត្តដល់ទេសចរ ដែលចាំបាច់ប្រទេសសមាជិកអាស៊ាន ត្រូវធ្វើយ៉ាងណាបង្កើតផលិតផលទេសចរណ៍ថ្មីៗឱ្យបានច្រើន ដើម្បីទាក់ទាញទេសចរឱ្យមកទស្សនាកើនឡើងកាន់តែច្រើនថែមទៀត។

យោងតាមរបាយការណ៍របស់អង្គការទេសចរណ៍ពិភពលោកបានបង្ហាញថា ពេញមួយឆ្នាំ២០១៨តំបន់អាស៊ានទាំងមូល ទទួលបានភ្ញៀវទេសចរប្រមាណ១៣៥លាននាក់ កើនឡើង ៧.៦%។

លោកទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាននៃក្រសួងទេសចរណ៍បានថ្លែងថា កិច្ចប្រជុំASEAN NTOs នេះផ្ដោតសំខាន់លើការអភិវឌ្ឍទេសចរណ៍ក្នុងតំបន់អាស៊ាន ក្នុងនោះមានការត្រួតពិនិត្យលទ្ធផលការងារ ដែលបានអនុវត្តតាំងពីឆ្នាំ២០១៦ និងដាក់ចេញទិសដៅការងារបន្តរហូតទៅដល់ឆ្នាំ២០២៥។

ក្រៅពីនោះ មានការជំរុញកិច្ចសហប្រតិបត្តិការ ក្នុងក្របខណ្ឌអាស៊ាន និងគម្រោងអភិវឌ្ឍន៍នានា ដែលចូលរួមដល់ការអភិវឌ្ឍក្នុងតំបន់អាស៊ានទាំងមូល ក៏ដូចជាវិស័យទេសចរណ៍កម្ពុជា តាមរយៈការផ្លាស់ប្ដូរបទពិសោធន៍ និងការអនុវត្តស្តង់ដាគុណភាពអាស៊ានរួម និងការបណ្ដុះបណ្ដាលធនធានមនុស្ស ស្របតាមកម្មវិធីបណ្ដុះបណ្ដាលស្ដង់ដាអាស៊ាន។

កិច្ចប្រជុំ ASEAN NTOs ខាងលើមានរយៈពេល៣ថ្ងៃ ចាប់ពីថ្ងៃទី១០-១២ ខែកក្កដា ឆ្នាំ២០១៩។ ក្រៅពីកិច្ចប្រជុំ ASEAN NTOs អាស៊ាននេះក៏មានកិច្ចប្រជុំ ASEAN NTOs បូក៣ ដែលមានប្រទេសចិន ជប៉ុន និងកូរ៉េខាងត្បូង ហើយនឹងមានកិច្ចប្រជុំក្នុងក្របខណ្ឌមជ្ឈមណ្ឌលអាស៊ាន-ចិន មជ្ឈមណ្ឌលអាស៊ាន-ជប៉ុន និងមជ្ឈមណ្ឌលអាស៊ាន-កូរ៉េខាងត្បូង ព្រមទាំងមានកិច្ចប្រជុំជាមួយដៃគូសន្ទនាផ្សេងទៀតផងដែរ៕