ក្រុមហ៊ុន Cambodia Airway គ្រោងពង្រីកការតភ្ជាប់ជើងហោះហើរទៅកាន់ពិភពលោក

July 10, 2019

ដោយ ម៉ៃ វីរៈ

ភ្នំពេញៈ ក្រុមហ៊ុនអាកាសចរណ៍ ខេមបូឌាអ៊ែរវ៉េ (Cambodia Airway) គ្រោងបង្កើតជើងហោះហើរត្រង់ ទៅកាន់ទៅទីក្រុងវិនចូវ ប្រទេសចិន ស្របពេលចំនួនភ្ញៀវទេសចរជនជាតិចិនជាច្រើនធ្វើដំណើរមកកាន់ប្រទេសកម្ពុជា។

ប្រធានផ្នែកទីផ្សារនៃក្រុមហ៊ុន ខេមបូឌា អ៊ែរវ៉េ កញ្ញាសុខ រ៉ាវីបានឱ្យដឹងនាថ្ងៃទី៩ កក្កដានេះថា ក្រុមហ៊ុនដាក់សំណើរទៅកាន់រាជរដ្ឋាភិបាលរួចអស់ហើយ នៅពេលទទួលបានការអនុម័ត ក្រុមហ៊ុនអាចចាប់ផ្ដើមបើកការហោះហើរនៅក្នុងអំឡុងពេលខែកក្តដា។កញ្ញាបន្តថា ក្រៅពីពង្រីកជើងហោះហើរទៅចិន ខេមបូឌា អ៊ែរវ៉េ ក៏គ្រោងបង្កើនគ្រោងជើង ហោះហើរត្រង់ទៅអូស្រ្តាលី រុស្ស៊ីសិង្ហបុរី និងវៀតណាមផងដែរ។

ប្រធានសមាគមន៍ទីភ្នាក់ងារទេសចរកម្ពុជាលោកស្រីឆាយ ស៊ីវលីន បានថ្លែងថា វាជាការល្អ ប្រសិនបើជាយើងអាចបង្កើតជើងហោះហើរ ទៅកាន់គោដៅផ្សេងៗ រឺក៏ប្រទេសផ្សេងៗឲ្យបានកាន់តែច្រើន ព្រោះវាក៏អាចជួយស្រូបទាញ់ភ្ញៀវទេសចរណ៍ ចូលមកកាន់កម្ពុជាបានកាន់តែច្រើនថែមទៀត។ លោកស្រីបន្តថា ក្នុងវិស័យទេសចរណ៍ដំបូងបំផុតគឺបង្កើតជើងហោះហើរអោយបានកាន់តែច្រើន ដែលកន្លងមកការស្រូបទាញភ្ញៀវទេសចរមកកាន់កម្ពុជាយើងចាញ់គេ គឺដោយសារជើងហោះហើរត្រង់មកកាន់ប្រទេសយើងនៅមានតិច។

លោកស្រីបនម្តថា “យើងមានតែជើងហោះហើរជិតៗប្រទេសយើង អត់មានហោះទៅឆ្ងាយ ដូចនេះហើយបានជាភ្ញៀវទេសចរណ៍ ដែលចូលមកទស្សនាកម្ពុជាភាគច្រើនសុតតែភ្ញៀវសល់ពីគេ”។

ចំណែកលោក ជា អូន រដ្ឋលេខាធិការនៃរដ្ឋលេខាធិការដ្ឋានអាកាសចរស៊ីវិល និងជាអ្នកនាំពាក្យបានថ្លែងថា វាជាការល្អ ហើយរាល់ថ្ងៃខាងអាកាសចរស៊ីវិញ បានខិតខំប្រឹងប្រែងទាក់ទាញ់អ្នកវិនិយោគ ដើម្បីបង្កើនជើងហោះហើរមកកម្ពុជា ឲ្យកាន់តែច្រើន ដើម្បីបង្កើតក្នុងការទាក់ភ្ញៀវទេសចមកកាន់ប្រទេសយើងបន្ថែមទៀត៕

ទំហំពាណិជ្ជកម្មទ្វេភាគីម៉ាឡេស៊ី និងចិនកើនឡើងដល់ ១០០ពាន់លានដុល្លារ

July 10, 2019

0

ដោយ Donald Lee

គួឡាឡាំពួៈ ទំហំពាណិជ្ជកម្មរួមរវាងប្រទេសម៉ាឡេស៊ី និងចិនមានទំហំដល់១០០ពាន់លានដុល្លារ ខណៈរដ្ឋាភិបាលក្រុងប៉េកាំងបាន និងកំពុងបន្តជំរុញវិនិយោគទុនដោយផ្ទាល់ពីបរទេសរបស់ខ្លួនដ៏ធំសម្បើម ចូលទៅបណ្តាប្រទេសនៅអាស៊ីអាគ្នេយ៍។

ឯកអគ្គរដ្ឋទូតចិនប្រចាំប្រទេសម៉ាឡេស៊ី លោក Bai Tian បានថ្លែងក្នុងវេទិកាមួយនៅម៉ាឡេស៊ីកាលពីម្សិលមិញថា “ប្រទេសម៉ាឡេស៊ី ស្ថិតក្នុងចំណោមប្រទេសដំបូងគេដែលគាំទ្រដល់គម្រោងខ្សែក្រវ៉ាត់មួយ ផ្លូវមួយ (BRI) ហើយក៏ជាផ្នែកមួយដែលមានការប្រមូលផលដំបូងបំផុតផងដែរ”។

លោកបានបន្ថែមថា ក្រោមកិច្ចសហប្រតិបត្តិការ តាមរយៈគម្រោងខ្សែក្រវ៉ាត់មួយផ្លូវមួយ កិច្ចសហប្រតិបត្តិការរវាងចិន និងម៉ាឡេស៊ីក្នុងវិស័យផ្សេងៗបានកើនឡើង។

ប្រទេសចិនបានបញ្ចេញការវិនិយោគទុន ដោយផ្ទាល់ពីបរទេស (FDI) ដ៏ធំនៅក្នុងវិស័យផលិតកម្មរបស់ប្រទេសម៉ាឡេស៊ី ដែលបង្កើនលំហូរទុនវិនិយោគដល់៤ដងក្នុងរយៈពេល៥ឆ្នាំកន្លងមកនេះ។

ក្នុងឆ្នាំ២០១៨ ក្រុមហ៊ុនចិនបានវិនិយោគលើគម្រោងផលិតកម្ម នៅប្រទេសម៉ាឡេស៊ីចំនួន៤២២គម្រោង និងបង្កើតការងារចំនួន៧៣,០០០ កន្លែង។

គម្រោងខ្សែក្រវ៉ាត់មួយ ផ្លូវមួយរបស់ប្រទេសចិន មានគោលដៅគ្របដណ្តប់លើបណ្តាប្រទេសចំនួន១២៤។ ពាណិជ្ជកម្មរួមរវាងប្រទេសចិន និងបណ្តាប្រទេសក្នុងគម្រោងខ្សែក្រវ៉ាត់មួយ ផ្លូវមួយបានឈានដល់ទឹកប្រាក់ជាង៦ពាន់ពាន់លានដុល្លារ៕

ចំណេះដឹង! តើពន្ធ និងអាករលើទំនិញនាំចូលនាំចេញត្រូវគណនាដូចម្តេច?

July 10, 2019

0

ដោយ វុត្ថា

ភ្នំពេញៈ ការគណនាគិតពន្ឋលើការនាំចេញ ឬនាំចូលទំនិញស្ថិតនៅក្រោមបទដ្ឋានច្បាស់លាស់មួយ ដែលរដ្ឋាភិបាលបាននិងកំពុងដាក់ចេញនូវក្របខ័ណ្ឌច្បាប់ និងបទដ្ឋានគតិយុត្តិនានា។

ពន្ធ និងអាករលើទំនិញនាំចូល នាំចេញ ត្រូវបានគណនាតាមវិធីសាស្ត្រដូចខាងក្រោម៖

ក. ចំពោះទំនិញទូទៅ

ការគណនាប្រាក់ពន្ធ អាករ ត្រូវគណនាតាមលំដាប់លំដោយ ជាដំបូងត្រូវគណនាពន្ធនាំចូល អាករពិសេស (បើមាន) និងអាករលើតម្លៃបន្ថែម។

• ពន្ធនាំចូល = តម្លៃគិតពន្ធគយ x អត្រាពន្ធនាំចូល

• អាករពិសេស = (តម្លៃគិតពន្ធគយ + ពន្ធនាំចូល) x អត្រាអាករពិសេស

• អាករលើតម្លៃបន្ថែម = (តម្លៃគិតពន្ធគយ + ពន្ធនាំចូល) x ១០% (ចំពោះទំនិញទូទៅមិនជាប់អាករពិសេស) ឬ = (តម្លៃគិតពន្ធគយ + ពន្ធនាំចូល + អាករពិសេស) x ១០% (ចំពោះទំនិញទូទៅ)។

ប្រាក់ពន្ធ និងអាករសរុប = ពន្ធនាំចូល + អាករលើតម្លៃបន្ថែម (ចំពោះទំនិញទូទៅមិនជាប់អាករពិសេស)

ឬ = ពន្ធនាំចូល + អាករពិសេស + អាករលើតម្លៃបន្ថែម (ចំពោះទំនិញទូទៅជាប់អាករពិសេស)

ឧទាហរណ៍ៈ ក្រុមហ៊ុន A នាំចូលស្រាបៀរចំនួន 20 កេស ដែលមានតម្លៃគិតពន្ធគយស្មើ 4លានរៀល។ តើប្រាក់ពន្ធ និងអាករសរុបដែលត្រូវបង់ស្មើប៉ុន្មាន ?

ចម្លើយៈ ការនាំចូលស្រាបៀរ ត្រូវជាប់ពន្ធនាំចូលតាមអត្រា 35% អាករពិសេស 25% និងអាករលើតម្លៃបន្ថែម

10% ។ ការគណនាប្រាក់ពន្ធ និងអាករ មានដូចខាងក្រោម៖

• ពន្ធនាំចូល = 4,000,000 x 35% = 1,400,000រៀល

• អាករពិសេស = (4,000,000 + 1,400,000) x 25% = 1,350,000រៀល

• អាករលើតម្លៃបន្ថែម = (4,000,000 + 1,400,000 + 1,350,000) x 10%= 675,000 រៀល

ដូចនេះ ប្រាក់ពន្ធ និងអាករសរុបដែលត្រូវបង់ = 1,400,000 + 1,350,000 + 675,000 = 3,425,000 រៀល។

ខ. ចំពោះប្រេងសាំងឬម៉ាស៊ូត

ការគណនាប្រាក់ពន្ធ អាករ ត្រូវគណនាតាមលំដាប់លំដោយ ជាដំបូងត្រូវគណនាពន្ធនាំចូល អាករបន្ថែម អាករពិសេស និងអាករលើតម្លៃបន្ថែម។

• ពន្ធនាំចូល = តម្លៃគិតពន្ធគយ x អត្រាពន្ធនាំចូល

• អាករបន្ថែម = បរិមាណ (ចំនួនលីត្រ) x 0.02$ x អត្រាប្តូរប្រាក់ (ចំពោះប្រេងសាំង)

ឬ = បរិមាណ (ចំនួនលីត្រ) x 0.04$ x អត្រាប្តូរប្រាក់ (ចំពោះប្រេងម៉ាស៊ូត)

• អាករពិសេស = (តម្លៃគិតពន្ធគយ + ពន្ធនាំចូល + អាករបន្ថែម) x អត្រាអាករពិសេស

• អាករលើតម្លៃបន្ថែម = (តម្លៃគិតពន្ធគយ + ពន្ធនាំចូល + អាករបន្ថែម + អាករពិសេស) x ១០%

ប្រាក់ពន្ធ និងអាករសរុប = ពន្ធនាំចូល + អាករបន្ថែម + អាករពិសេស + អាករលើតម្លៃបន្ថែម

ឧទាហរណ៍ៈ ក្រុមហ៊ុន B នាំចូលប្រេងសាំង 100 លីត្រ ដែលមានតម្លៃគិតពន្ធគយស្មើ 250,000រៀល។ តើប្រាក់ពន្ធ និងអាករសរុបដែលត្រូវបង់ស្មើប៉ុន្មាន ? ដោយដឹងថា អត្រាប្តូរប្រាក់ 1$ = 4,000 រៀល។

ចម្លើយៈ ការនាំចូលប្រេងសាំង ត្រូវជាប់ពន្ធនាំចូលតាមអត្រា 35% អាករបន្ថែម 0.02$ ក្នុង 1លីត្រ អាករពិសេស

33.33% និងអាករលើតម្លៃបន្ថែម 10% ។ ការគណនាប្រាក់ពន្ធ និងអាករ មានដូចខាងក្រោម៖

• ពន្ធនាំចូល = 250,000 x 35% = 87,500រៀល

• អាករបន្ថែម = 100 x 0.02 x 4000 = 8,000 រៀល

• អាករពិសេស = (250,000 + 87,500 + 8,000) x 33.33% = 115,155.15 រៀល

• អាករលើតម្លៃបន្ថែម = (250,000 + 87,500 + 8,000 + 115,155.15) x 10% = 46,065.52 រៀល

ដូចនេះ ប្រាក់ពន្ធ និងអាករសរុបដែលត្រូវបង់ = 87,500 + 8,000 + 115,155.15 + 46,065.52 = 256,721 រៀល៕

សភាពាណិជ្ជកម្មកម្ពុជាលើកទឹកចិត្តធុរជនវៀតណាមឲ្យវិនិយោគលើវិស័យកសិកម្ម និងទេសចរណ៍

July 10, 2019

0

ដោយ វុត្ថា

ភ្នំពេញៈ មន្រ្តីជាន់ខ្ពស់សភាពាណិជ្ជកម្មកម្ពុជាបានជំរុញ និងលើកទឹកចិត្តដល់ធុរជននៃប្រទេសវៀតណាម ឱ្យមានការវិយោគលើវិស័យកសិកម្ម និងទេសចរណ៍ នៅក្នុងប្រទេសកម្ពុជា ដោយសារតែបរិយាកាសធុរកិច្ច នៅក្នុងប្រទេសកម្ពុជាផ្តល់នូវអំណោយផលក្នុងការវិនិយោគ។

លោកឧកញ្ញ៉ា លឹម ហេង អនុប្រធានសភាពាណិជ្ជកម្មកម្ពុជា នៅក្នុងជំនួបជាមួយសភាពាណិជ្ជកម្ម និងលោកស្រី Nguyen Thi Thuong Linh អនុប្រធានសាខាសភាពាណិជ្ជកម្ម និងឧស្សាហកម្មវៀតណាមនៅខេត្តកាន់ថូ (Can Tho)នៅថ្ងៃទី ៩ ខែកក្កដា ឆ្នាំ ២០១៩ នេះ ដោយលោកឧកញ៉ាបានលើកទឹកចិត្ត ពាណិជ្ជករវៀតណាមមកវិនិយោគនៅកម្ពុជា ឲ្យបានកាន់តែច្រើនឡើង ពិសេសលើវិស័យវិស័យកសិកម្ម និងទេសចរណ៍។

លោកឧកញ៉ាបន្តទៀតថា “សេដ្ឋកិច្ចនៅប្រទេសកម្ពុជា ពិតជាមានការរីកចម្រើនយ៉ាងគួរឲ្យកត់សម្គាល់ និងបរិយាកាសធុរកិច្ចនៅប្រទេសកម្ពុជា ពិតជាអំណោយផលសម្រាប់ការវិនិយោគ”។លោកបន្តថា “សភាពាណិជ្ជកម្មកម្ពុជា និងរីករាយក្នុងការសហការ ក៏ដូចជារៀបចំកម្មវិធីពាណិជ្ជកម្មផ្សេងៗ ដើម្បីជាប្រយោជន៍ដល់ប្រទេសទាំងពីរ”។

លោកស្រី Nguyen Thi Thuong Linh អនុប្រធានសាខាសភាពាណិជ្ជកម្ម និងឧស្សាហកម្មវៀតណាមនៅខេត្តកាន់ថូ (Can Tho) បានឱ្យដឹងថា សភាពាណិជ្ជកម្ម និងឧស្សាហកម្មវៀតណាមនៅខេត្តកាន់ថូ (VCCI Can Tho) គឺជាអង្គភាពដែលតំណាងឲ្យសហគមន៍សហគ្រិនទាំង១៣ខេត្ត ក្នុងតំបន់ដីសណ្តរទន្លេមេគង្គ។ សកម្មភាពសំខាន់ពីររបស់ VCCI Can Tho គឺដើម្បីធ្វើឲ្យបរិយាកាសធុរកិច្ច របស់ប្រទេសវៀតណាម ជាពិសេសតំបន់ដីសណ្តរមេគង្គ អំណោយផលសម្រាប់ការធ្វើពាណិជ្ជកម្ម និងផ្តល់លក្ខខណ្ឌល្អដល់ពាណិជ្ជកម្មក្នុងស្រុក មានភាពងាយស្រួល ក្នុងការវិនិយោគក្រៅប្រទេស។

ក្នុងកិច្ចប្រជុំនេះ មានការចូលរួមពីពាណិជ្ជករវៀតណាមចំនួន២៥ក្រុមហ៊ុន ដែលក្នុងនោះជាក្រុមហ៊ុនកសិកម្ម និងទេសចរណ៍។ គោលបំណងនៃកិច្ចប្រជុំនេះ គឺដើម្បីសិក្សាស្វែងយល់ពីបរិយាកាសធុរកិច្ច ចាប់ដែគូពាណិជ្ជកម្ម និងឱកាសវិនិយោគនៅប្រទេសកម្ពុជា ជាពិសេសលើវិស័យកសិកម្ម និងទេសចរណ៍។

យោងតាមរបាយការណ៍ ពីគយវៀតណាម ដែលបានចេញផ្សាយថ្មីៗនេះបានឱ្យដឹងថា ក្នុងរយៈពេល៥ខែដំបូង ឆ្នាំ២០១៩នេះ កម្ពុជា-វៀតណាម សម្រេចបានទំហំពាណិជ្ជកម្មជាង ២.៣០០ លានដុល្លារអាមេរិក កើមឡើងប្រមាណ៣០០លានដុល្លារអាមេរិក ធៀបរយៈពេលដូចគ្នាកាលពីឆ្នាំមុន។

ប្រមុខដឹកនាំកម្ពុជា និងវៀតណាមធ្លាប់បានសន្យាពង្រីក ទំហំពាណិជ្ជកម្មទ្វេភាគីឱ្យដល់៥ពាន់លានដុល្លារអាមេរិក នៅឆ្នាំ២០២០ខាងមុខ។ ប្រទេសទាំងពីរបានខិតខំប្រឹងប្រែងយ៉ាងខ្លាំង ដើម្បីបង្កើនសកម្មភាពសេដ្ឋកិច្ច ការផ្លាស់ប្តូរពាណិជ្ជកម្ម ក៏ដូចជាការវិនិយោគទុន៕

ដំណឹងល្អ! ការសាងសង់ស្ពានអាកាសក្បាលថ្នល់បន្ថែមខ្សែទី១ នឹងបញ្ចប់នៅត្រឹមចុងឆ្នាំនេះ

July 10, 2019

0

ដោយ រ៉ាណេត

ភ្នំពេញៈ មន្ត្រីមន្ទីរសាធារណៈការ និងដឹកជញ្ជូន រាជធានីភ្នំពេញបានបង្ហើបឱ្យដឹងថា បើមិនមានការប្រែប្រួលនោះទេ តាមគម្រោងសាងសង់ខ្នែងស្ពានក្បាលថ្នល់ខ្សែទី១ ភ្ជាប់ទៅមហាវិថីព្រះមុនីវង្ស នឹងត្រូវបញ្ចប់ការសាងសង់នៅត្រឹមចុងខែធ្នូ ឆ្នាំ២០១៩ ខាងមុខនេះ។

ជាការសម្រួលដល់ការធ្វើដំណើរ និងកាត់បន្ថយការការកកស្ទះចរាចរណ៍នៅត្រង់ចំណុចគល់ស្ពាន និងលើស្ពានអាកាសក្បាលថ្នល់ ក៏ដូចជា តំបន់ច្បារអំពៅ រដ្ឋបាលសាលារាជធានីភ្នំពេញ តាមរយៈមន្ទីរសាធារណៈការ និងដឹកជញ្ជូន រាជធានីភ្នំពេញ បាន និងកំពុងសាងសង់ស្ពានអាកាសថ្មីបន្ថែម ពីលើស្ពានដែលមានស្រាប់ ដោយភ្ជាប់ជាមួយចំណុចផ្លូវប្រសព្វផ្លូវ៦០ម៉ែត្រ ផ្លូវព្រះមុនីវង្ស និងផ្លូវ២៧១ ជាប់ព្រំប្រទល់ខណ្ឌមានជ័យ និងខណ្ឌចំការមន ។

ជាជំហានដំបូងពេលនេះអ្នកជំនាញបាន និងកំពុងកសាងស្ពានខ្សែទី១បន្ថែមដោយភ្ជាប់ជាមួយស្ពានក្បាលថ្នល់ចាស់ ទៅនឹងមហាវិថីព្រះមុនីវង្ស ដូចជាសកម្មភាពដែលកំពុងធ្វើនៅក្នុងការដ្ឋានដែលបានបង្ហាញនៅក្នុងរូបនេះស្រាប់។

តាមគម្រោង ការសាងសង់ខ្នែងស្ពានខ្សែទី១នេះ នឹងត្រូវបញ្ចប់នៅត្រឹមចុងខែធ្នូ ឆ្នាំ២០១៩ខាងនេះ ហើយនឹងឈានចូលដល់ជំហ៊ាន នៃការសាងសង់ខ្នែងស្ពានទី២ ជាបន្តទៀត ។ នេះជាព័ត៌មានបឋមដែលគេហទំព័រ Propertyarea.asia ទើបនឹងទទួលបាន ៕

ប្រមុខរដ្ឋាភិបាលចាប់ផ្តើមរៀបចំផែនការដើម្បីបង្កើតកន្លែងចតយានយន្តសាធារណៈនៅក្រុងភ្នំពេញ

July 9, 2019

0

ដោយៈ រ៉ាណេត

ភ្នំពេញៈ រដ្ឋាភិបាលចាប់ផ្តើមជំរុញឲ្យសមត្ថកិច្ចថ្នាក់ជាតិ និងថ្នាក់ក្រោមជាតិ ពិសេសរដ្ឋបាលរាជធានីភ្នំពេញ បង្កើតឲ្យមានទីកន្លែងសំរាប់ចតយានយន្តសាធារណៈនៅក្រុងភ្នំពេញ ខណៈការកកស្ទះចរាចរណ៍និងការចតយានយន្តបាន និងកំពុងក្លាយជាបញ្ហាក្តៅគគុកនៃបញ្ហាសុខមាលភាពរបស់ប្រជាពលរដ្ឋ។

ប្រមុខរាជរដ្ឋាភិបាលកម្ពុជា សម្តេចតេជោហ៊ុន សែន បានមានប្រសាសន៍កាលពីពេលថ្មីៗនេះ ដោយបានជំរុញឱ្យអជ្ញាធរពាក់ព័ន្ធ រួមមានក្រសួងរៀបចំដែនដីនគរូបនីយកម្ម និងសំណង់ រួមជាមួយនឹងរដ្ឋបាលសាលារាជធានីភ្នំពេញ បង្កើតក្រុមជំនាញសិក្សា និងពន្លឿនការកសាងទីចំណតយានយន្តសាធារណៈ នៅតាមទីប្រជុំជននានាឱ្យបានលឿនបំផុត ដើម្បីដោះស្រាយបញ្ហាដែលកំពុងកើតមាន។

សម្តេចតេជោបានបន្តថា បច្ចុប្បន្ននេះ ភ្នំពេញមានបញ្ហាដែលកំពុងប្រឈមយ៉ាងខ្លាំងពាក់ព័ន្ធ ទៅនឹងបញ្ហាខ្វះចំណតរថយន្តសាធារណៈ ហើយបានបញ្ជាឱ្យលោកឧបនាយករដ្ឋមន្រ្តី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រួមជាមួយលោក ឃួង ស្រេង អភិបាលរាជធានីភ្នំពេញ ចុះពិនិត្យទីតាំងសាងសង់ចំណតរថយន្តសាធារណៈឱ្យបានលឿន។

សម្ដេចបានមានប្រសាសន៍ថា “សម័យមុនបើមានកង់មួយគ្រឿង គឺស្មើនឹងមានម៉ូតូមួយគ្រឿង បើមានម៉ូតូមួយគ្រឿងគឺស្មើនឹងឡានមួយគ្រឿងដែរ ហើយមកដល់ពេលនេះ គឺឡាន ម៉ូតូរាប់លានគ្រឿងយ៉ាងនេះ អ៊ីចឹងឈឺក្បាលណាស់សព្វថ្ងៃនេះ សម្រាប់គ្រោះថ្នាក់ចរាចរណ៍ អ៊ីចឹងវិធានការរបស់រដ្ឋ ត្រូវយកចិត្តទុកដាក់លើវិធានការនេះ”។ សម្ដេចបានមានប្រសាសន៍ទៀតថា “ឥឡូវខ្ញុំបានឱ្យឯកឧត្តមជា សុផារ៉ា និងឯកឧត្តម ឃួង ស្រេង ចុះពិនិត្យថា តើកន្លែងណា ដែលអាចធ្វើចំណតរថយន្តបាន?”។

សម្ដេចតេជោបានបញ្ជាក់ទៀតថា សួនច្បារមួយចំនួនអាចប្រើប្រាស់ផ្នែកខាងក្រោមដីនោះធ្វើជាន់ខាងក្រោមហ្នឹង ដាក់ចំណតរថយន្តទៅ។ បើមិនអ៊ីចឹងទេ ចិញ្ចើមផ្លូវរបស់យើងចតសុទ្ធតែរថយន្ត ភ្នំពេញ បើសិនរថយន្តចេញតែ៥០ភាគរយគឺកកស្ទះទាំងអស់ ទៅណាមិនរួចទេ គឺគាំងភ្នំពេញ”។

យោងតាមរបាយការណ៍របស់ក្រសួងសាធារណៈការ និងដឹកជញ្ជូនបានបង្ហាញថាបច្ចុប្បន្នយានយន្តដែលបានចុះបញ្ជីរួច បានកើឡើងរហូតដល់ជាង៥លានគ្រឿង ដែលគិតជាមធ្យម កំណើនពី១ ឆ្នាំទៅ១ឆ្នាំ មានចន្លោះចាប់ពី៣០-៤០ ម៉ឺនគ្រឿង ក្នុងនោះភាគច្រើនគឺម៉ូតូ ហើយចំណែករថយន្តតូចធំកំពុងតែជួបបញ្ហាប្រឈមកង្វះទីចំណត។

លោកសាស្ត្រាចារ្យទួស សាភឿន អគ្គលេខាធិការរងគណៈកម្មកាស្ថាបត្យកកម្ពុជា-អាស៊ាន ធ្លាប់បានមានប្រសាសន៍ឱ្យដឹងកាលពីពេលកន្លងទៅថ្មីៗនេះថា នៅក្នុងគម្រោងសាងសង់អគារនីមួយៗ គេតែងតែបានគិតទៅលើទីចំណតយានយន្ត ដែលជាចំណុចសំខាន់មួយ ក្នុងចំណោមចំណុចសំខាន់ជាច្រើនទៀតនៅក្នុងតួអគារ។ លោកបន្តទៀតថា “មិនថាចំពោះតែខុនដូ អាផាតមិន មជ្ឈមណ្ឌលពាណិជ្ជកម្ម ឬជាអគារសម្រាប់បម្រើវិស័យការិយាល័យនោះទេ ទីចំណតសម្រាប់យានយន្តគ្រប់ ជាចាំបាច់បំផុតដែលត្រូវយកចិត្តទុកដាក់។

លោកសាស្រ្តាចារ្យបន្តទៀតថា “ជាទូទៅទីចំណត គេតែងសាងសង់ប្រមាណជា៦០-៧០ភាគរយ ធៀបទៅនឹងចំនួនយូនីតសរុប ដោយមានច្រកចេញ-ចូលទូលាយងាយស្រួលបត់ និងមានសុវត្ថិភាពខ្ពស់”។ លោកបន្តថា “ជួនកាលគេអាចសាងសង់នៅជាន់ក្រោយដី ឬជាន់ផ្ទាល់ដីឡើងលើជាដើម ដែលវាអាស្រ័យទៅតាមគម្រោងប្លង់មេ។ ជាទូទៅសម្រាប់ទីចំណតរថយន្តមួយគ្រឿង គេត្រូវការទំហំចាប់ពី ៣០-៣៥ ម៉ែត្រការ៉េ ប៉ុន្តែបើផ្ទៃអគាររបស់អាផាតម៉ិន ឬអគារការិយាល័យគេត្រូវគិតចន្លោះពី៤០-៥០ម៉ែត្រការ៉េ”។

កាលពីដើមខែកក្កដានេះសភាពាណិជ្ជកម្មអឺរ៉ុបបានជំរុញឲ្យរដ្ឋាភិបាលគួរអនុម័តបទបញ្ជាសម្រាប់កន្លែងចតរថយន្តឯកជនក្នុងខុនដូដើម្បីធ្វើឲ្យវិស័យអចលនទ្រព្យឆ្លើយតបនឹងស្តង់ដារអន្តរជាតិ។

បទប្បញ្ញត្តិនាពេលបច្ចុប្បន្នសម្រាប់អគារខុនដូដែលជាអាគារសហកម្មសិទ្ធិបានបញ្ជាក់ថាតំបន់ចតរថយន្តនៃការអភិវឌ្ឍខុនដូត្រូវតែចែករំលែកក្នុងចំណោមម្ចាស់ខុនដូ។

យោងតាមអនុក្រឹត្យលេខ១២៦ស្តីពីការគ្រប់គ្រងនិងប្រើប្រាស់អគារសហកម្មសិទ្ធិក្រោមការគ្រប់គ្រងរបស់ក្រសួងរៀបចំដែនដីនគរូបនីយកម្មនិងសំណង់ចំណតរថយន្តត្រូវបានគេចាត់ទុកថាជាចំណតរួមរបស់អ្នករស់នៅក្នុងអគារប៉ុន្តែផ្ទុយពីស្ដង់ដារអន្ដរជាតិដែលម្ចាស់ខុនដូត្រូវបានផ្តល់កន្លែងចតឡានឯកជនក្នុងអាគរសហកម្មសិទ្ធ។

របាយការណ៍ដែលបានចេញផ្សាយដោយ EuroCham នៅសប្តាហ៍នេះបានឲ្យដឹងថា “នេះជាការមិនប្រក្រតីព្រោះជាធម្មតានៅក្នុងការអភិវឌ្ឍខុនដូនៅទូទាំងពិភពលោកនៅពេលអ្នកទិញទិញខុនដូយូនីតឯកជនកន្លែងចតរថយន្តដែលបានបម្រុងទុកត្រូវបានរួមបញ្ចូលក្នុងការលក់សម្រាប់ការប្រើប្រាស់ផ្តាច់មុខរបស់ពួកគេ”។

របាយការណ៍ដដែលបានបង្ហាញថា “នេះធានាថាអ្នកជួលអាចតែងតែចតយានយន្តរបស់ពួកគេនៅក្នុងបរិវេណនៃខុនដូរបស់ពួកគេបើមិនដូច្នេះទេសេវាអាគារអាចធ្វើឲ្យពិបាកដល់ម្ចាស់សហកម្មសិទ្ធិករនៅក្នុងការចតផ្ទាល់របស់ពួកគេ”។

ខណៈតំបន់ខុនដូនៅភ្នំពេញរីកចម្រើនបទប្បញ្ញត្តិប្រើប្រាស់ជាទូទៅនឹងងាយទទួលរងការរំលោភបំពានពីម្ចាស់កម្មសិទ្ធិនៅក្នុងការអភិវឌ្ឍហើយអាចបង្កឱ្យមានការប៉ះទង្គិចខណៈរថយន្តជាច្រើនត្រូវបានហូរចូលក្នុងភ្នំពេញ។

របាយការណ៍បន្ថែមថា “ប្រព័ន្ធប្រើប្រាស់ជាទូទៅសម្រាប់ការចតឡាននៅក្នុងខុនដូអាចទុកជាការរំលោភបំពានដោយសហកម្មសិទ្ធិករដទៃទៀតដែលអាចទាញយកប្រយោជន៍ពីភាពស្មោះត្រង់នៃភាពសាមញ្ញនេះដែលអាចបង្កើនភាពមិនពេញចិត្តរបស់សហម្ចាស់ផ្សេងទៀតនិងអាចនាំឲ្យមានបរិយាកាសអរិភាពសម្រាប់អ្នកជួលទាំងអស់”។

ទីបំផុតការកើតឡើងនៃជម្លោះទាក់ទងនឹងការចតនៅក្នុងការអភិវឌ្ឍអាចមានផលប៉ះពាល់អវិជ្ជមានទៅលើការលក់ខុនដូ។របាយការណ៍បន្តថា“បញ្ហានេះគឺជាក់ស្តែងសម្រាប់ភ្នំពេញដែលប្រជាពលរដ្ឋកំពុងប្រឈមនឹងការកើតឡើងនៃការកកស្ទះចរាចរដែលអាចនឹងកាន់ខ្លាំងទៅៗខណៈពេលដែលចំនួនប្រជាជននិងភាពសម្បូរបែបរបស់រាជធានីភ្នំពេញនៅតែបន្តកើនឡើង”៕

អាជ្ញាធរខេត្តសៀបរាបចាប់ផ្តើមរៀបចំផែនការមេដើម្បីពង្រីកសក្តានុពលលើវិស័យទេសចរណ៍

July 9, 2019

0

ដោយ វុត្ថា

ភ្នំពេញៈ អាជ្ញាធរខេត្តសៀមរាប បានចាប់ផ្តើមពិភាក្សាជាមួយអ្នកជំនាញអន្តរជាតិលើកិច្ចដំណើរការ នៃគម្រោងរៀបចំផែនការមេសម្រាប់ការអភិវឌ្ឍ វិស័យទេសចរណ៍នៅក្នុងខេត្តសៀមរាប និងតំបន់ជុំវិញ។

លោកពៅ ពិសិដ្ឋ អភិបាលរងខេត្ត និងជាអនុប្រធានគណះកម្មការគ្រប់គ្រង និងអភិវឌ្ឍន៍ទេសចរណ៍ ខេត្តសៀមរាបកាលពីថ្ងៃទី៨ ខែកក្កដា ម្សិលមិញនេះ បានបើកកិច្ច ជាមួយអ្នកជំនាញ មកពីអាជ្ញាធរអប្សរា និងលោកសាស្ត្រាចារ្យ Jacques Ruffee អ្នកជំនាញអភិវឌ្ឍន៍ទេសចរណ៍ និងលោក Coccossis Chalarampos អ្នកជំនាញជាន់ខ្ពស់ ជំនាញយុទ្ធសាស្ត្រ និងរៀបចំទេសចរណ៍ ដើម្បីរៀបចំផែនការមេនេះ។

លោកបានឱ្យដឹងថា ការរៀបចំផែនការមេ សម្រាប់អភិវឌ្ឍន៍វិស័យទេសចរណ៍ក្នុងខេត្តសៀមរាប ធ្វើឡើងដើម្បីសិក្សាស្វែងយល់ពីស្ថានភាព នៃការអភិវឌ្ឈវិស័យទេសចរណ៍ក្នុងខេត្តសៀមរាប និងតំបន់ជុំវិញខេត្ត។ សិក្សាស្វែងយល់អំពីគម្រោងអភិវឌ្ឍន៍ក្រុង និងខេត្តសៀមរាប គម្រោងរៀបចំនិងអភិវឌ្ឍន៍តំបន់ជនបទ ការអភិវឌ្ឍប្រព័ន្ធហេដ្ឋារចនាសម្ព័ន្ធ និងដឹងជញ្ជូន និងផ្លូវថ្នល់។ ការវិភាគចំណុចខ្លាំងចំណុចខ្សោយ បញ្ហាប្រឈម របស់ក្រុងសៀមរាប និងវិភាគអំពីស្ថានភាពនៃការមកដល់នៃភ្ញៀវទេសចរណ៍ នៅតាមតំបន់គោលដៅទេសចរណ៍នីមួយៗ។

ខេត្តសៀមរាប ជាប៉ូលសេដ្ឋកិច្ចដ៏សំខាន់របស់ប្រទេសកម្ពុជា ដោយផ្អែកលើសក្តានុពល នៃវិស័យទេសចរណ៍ ព្រោះតែភាពសម្បូរបែបនៃសម្បតិ្តវប្បធម៌ រមណីយដ្ឋានប្រវត្តិសាស្ត្រធម្មជាតិ ជាពិសេសប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក ព្រមទាំងកេរ្តិ៍មរតក វប្បធម៌ដ៏សម្បូរបែបផ្សេងៗទៀត ដែលធ្វើឱ្យភ្ញៀវទេសចរមកទស្សនា ខេត្តសៀមរាប មានការកើនឡើងជាលំដាប់។

ប្រធានមន្ទីរទេសចរនៅខេត្តសៀមរាប លោកង៉ូវ សេងកាក់ធ្លាប់បានឱ្យដឹងថា ខេត្តសៀមរាបត្រូវបានចាត់ទុកជាប៉ូលទេសចរណ៍ទី១ នៃប្រទេស ហើយជាតំបន់ឧស្យាហកម្មគ្មានផ្សែង។ តាមការសង្កេតនូវសន្ទុះសេដ្ឋកិច្ចរបស់ខេត្ត ក្នុង រយៈពេល១០ឆ្នាំចុងក្រោយឃើញមានកំណើនប្រកបដោយសក្តានុពល ដែលបានរួមចំណែកធ្វើឲឲ្យជីវភាពរស់នៅកាន់តែប្រសើរ និងសេវាកម្មផ្សេងៗកាន់តែមានប្រសិទ្ធភាព និងសកម្មភាពផុសផុលទ្វេឡើងជារៀងរាល់ឆ្នាំ៕

ក្រុមហ៊ុនអចលនទ្រព្យយក្ស R&F ចូលរួមវិនិយោគក្នុងឧស្សាហកម្មរថយន្តអគ្គិសនី

July 9, 2019

1

photo_2019-07-09_15-38-38 — រូបភាព Bloomberg

ដោយ Donald Lee

ភ្នំពេញៈ ក្រុមហ៊ុនអចលនទ្រព្យដ៏ធំរបស់ចិន និងជាក្រុមហ៊ុនអភិវឌ្ឍន៍ដ៏ធំនៅកម្ពុជា R&F Group នឹងបង្កើតភាពជាដៃគូជាមួយក្រុមហ៊ុនផលិតរថយន្តអគ្គីសនី (EV) ដើម្បីពង្រីកទំហំវិនិយោគរបស់ខ្លួន ខណៈរដ្ឋាភិបាលចិនបានបន្ថែមការរឹតត្បិតលើវិស័យអចលនទ្រព្យ ដើម្បីបន្ធូរបន្ថយស្ថានភាពទីផ្សារ។

ជាលទ្ធផលនៃកំណើនយឺត ក្នុងវិស័យអចលនទ្រព្យរបស់ប្រទេសចិន អ្នកអភិវឌ្ឍន៍ R&F បានទិញភាគហ៊ុននៅក្នុងក្រុមហ៊ុនផលិតរថយន្ត EV Hawtai Motor។ អ្នកផលិតរថយន្តអគ្គីសនី បានផលិតរថយន្តអេឡិចត្រូនិក៨ប្រភេទផ្សេងគ្នារួចទៅ ហើយប៉ុន្តែត្រូវការដើមទុនបន្ថែមទៀត ដើម្បីបន្តប្រកួតប្រជែងជាមួយក្រុមហ៊ុនដទៃទៀត។

ការរីកចម្រើនរបស់ក្រុមហ៊ុន R&F ទៅក្នុងឧស្សាហកម្មរថយន្តអេឡិចត្រូនិក ក្នុងអំឡុងនៅពេលដែលអាជីវកម្មស្នូលរបស់ខ្លួនកំពុងធ្លាក់ចុះ។

កាលពីឆ្នាំមុនក្រុមហ៊ុន R&F បានបង្កើតចំណូលបានពីការលក់១៩ពាន់លានដុល្លារកើនឡើង៦០ភាគរយធៀបនឹងឆ្នាំមុនមួយទៀត។ ប៉ុន្តែនៅឆ្នាំ២០១៩ ការលក់បានធ្លាក់ចុះនៅក្នុងពាក់កណ្តាលឆ្នាំនេះ សើ្មនឹង ៨,៧ពាន់លានដុល្លារ ដែលជាការធ្លាក់ចុះយ៉ាងខ្លាំងនៃអត្រាកំណើននៃអាជីវកម្មរបស់ខ្លួន។

ក្រុមហ៊ុន R&F Groupមានតម្លៃ៥៣ពាន់លានដុល្លារ និងជាក្រុមហ៊ុនអចលនទ្រព្យមួយ ក្នុងចំណោមក្រុមហ៊ុនអចលនទ្រព្យធំជាងគេនៅប្រទេសចិន។ ក្រុមហ៊ុនបាននិងកំពុ ងវាយលុកយ៉ាងខ្លាំងនៅក្នុងវិស័យអចលនទ្រព្យនៅកម្ពុជា។ ក្នុងចំណោមខុនដូ២,០០០ យូនីត ដែលបានដាក់លក់នៅត្រីមាសចុងក្រោយនៃឆ្នាំ២០១៨ ពោលគឺពាក់កណ្តាលនៃចំនួនខុនដូយូនីត ជាកម្មសិទ្ធិរបស់ក្រុមហ៊ុន R&F រួមមាន R&F Glory (៤៤០ យូនីត) និងទីក្រុង R&F (៧៩២ យូនីត)។ការអភិវឌ្ឍថ្មីនេះ ត្រូវបានផ្តួចផ្តើមឡើងបន្ទាប់ពីគម្រោងភ្នំពេញ R&F និងគម្រោង Prosperous R &F ទទួលបានជោគជ័យយ៉ាងខ្លាំង។

រដ្ឋាភិបាលចិនបានបន្ថែមបទបញ្ជា យ៉ាងតឹងតែងលើទីផ្សារអចលនទ្រព្យដីគោកដើម្បីបន្ធូរបន្ថយដល់អត្រាកំណើនដែលមានភាពផុយស្រួយ។ អ្នកអភិវឌ្ឍន៍ជាច្រើនដូចជា R&;Fបានទទួលបានផលចំណេញច្រើន ក្នុងរយៈពេល២០ឆ្នាំមុន ក្នុងអំឡុងពេលដែលក្រុមអ្នកវិភាគចាត់ទុកថា ជាយុគមាសនៃវិស័យអចលនទ្រព្យរបស់ប្រទេសចិន។

ក្រុមហ៊ុន R&F កំពុងដើរតាមគំនិតនាំមុខនៃអ្នកអភិវឌ្ឍដទៃទៀត ដែលបានពង្រីកអាជីវកម្មរបស់ខ្លួន ទៅក្នុងវិស័យដែលត្រូវបានគាំទ្រដោយទីក្រុងប៉េកាំង។ រដ្ឋាភិបាលចិនបានផ្តល់ការឧបត្ថម្ភធនជាង៧,០០០ដុល្លារ ទៅឲ្យអ្នកទិញរថយន្ត EV ដើម្បីជំរុញឧស្សាហកម្មផលិតកម្មអេឡិចត្រូនិច ដែលរីកចំរើននៅលើទឹកចិនដីគោក និងដើម្បីកាត់បន្ថយការពឹងផ្អែកលើឥន្ធនៈ៕

កម្ពុជា និងប្រទេសបីទៀតនឹងភ្ជាប់បណ្តាញច្រកចេញចូលតែមួយដើម្បីសម្រួលការធ្វើពាណិជ្ជកម្ម

July 9, 2019

0

ប្រែសម្រួលដោយ ប៊ី

បាងកកៈ នាយកដ្ឋានគយថៃ មានបំណងភ្ជាប់បណ្តាញច្រកចេញចូលតែមួយជាមួយប្រទេសបីទៀតនៅឆ្នាំនេះ ដោយពង្រីកប្រព័ន្ធផ្លាស់ប្តូរអេឡិចត្រូនិក នៃទិន្នន័យទាក់ទងនឹងពាណិជ្ជកម្ម។

អគ្គនាយកលោក Krisada Chinavicharana និយាយថា ប្រទេសបីបន្ថែមទៀតគឺមីយ៉ាន់ម៉ា កម្ពុជា និងហ្វីលីពីន។លោកបានបន្ថែមថា ប្រទេសកម្ពុជាបានចាប់ផ្តើមដំណើរការសាកល្បងបណ្តាញច្រកចេញចូលតែមួយនេះ ជាមួយប្រទេសថៃ នៅដើមខែ កក្កដានេះ។

នាយកដ្ឋានគយក៏កំពុងអភិវឌ្ឍប្រព័ន្ធផ្លាស់ប្តូរអេឡិចត្រូនិច នៃច្រកចេញចូលតែមួយនេះសម្រាប់ប្រទេសចិន និងកូរ៉េខាងត្បូង ដើម្បីបន្ធូរបន្ថយរបាំងពាណិជ្ជកម្មជាមួយប្រទេសទាំងនេះ។

លោក Krisada បាននិយាយថា ច្រកចេញចូលតែមួយនេះ ត្រូវបានរំពឹងថានឹងធ្វើឲ្យប្រសើរឡើងនូវពិន្ទុរបស់ប្រទេសថៃ នៅក្នុងរបាយការណ៍ធុរកិច្ចរបស់ធនាគារពិភពលោក។លោបានបន្តថា ច្រកចេញចូលតែមួយនេះ គឺធ្វើឡើងដើម្បីជួយកាត់បន្ថយការដឹកជញ្ជូនរបស់ថៃពី ១៣,៨ភាគរយ ទៅ១២ភាគរយ នៅឆ្នាំ២០២១។

ទំហំនៃការដាក់ស្នើទិន្នន័យពាណិជ្ជកម្ម តាមរយៈច្រកចេញចូលតែមួយនេះ បានកើនឡើងពី ៧៨,៨លាននៅក្នុងឆ្នាំ ២០១៦ ដល់១០៣លានដុល្លារ នៃការស្នើទិន្នន័យពាណិជ្ជកម្មនៅក្នុងឆ្នាំ ២០១៧ និង ១២៣លានលានដុល្លារនៅក្នុងឆ្នាំ ២០១៨។

សម្រាប់ប្រាំខែដំបូងនៃឆ្នាំនេះ មាន៥១លានប្រតិបត្តិការទិន្នន័យពាណិជ្ជកម្មត្រូវបានធ្វើឡើងតាមរយៈច្រកចេញចូលតែមួយនេះ។

នាយកដ្ឋានគយបានចូលរួមជាមួយភ្នាក់ងាររដ្ឋាភិបាល និងសហគ្រាសរដ្ឋចំនួន ៣៦ធនាគារពាណិជ្ជចំនួន១៧ និងប្រតិបត្តិករចំនួន ៩,៩០០ ដើម្បីភ្ជាប់ទិន្នន័យពាណិជ្ជកម្មតាមអេឡិចត្រូនិច តាមរយៈច្រកចេញចូលតែមួយនេះ ដើម្បីជួយសម្រួលដល់អ្នកនាំចេញ អ្នកនាំចូល និងភ័ស្តុភារស្របតាមគោលនយោបាយថៃ។

ចាប់ពីថ្ងៃទី១ ខែតុលា ឆ្នាំ២០១៨ ដល់ថ្ងៃទី៤ ខែកក្កដាឆ្នាំ ២០១៩ នាយកដ្ឋានបានប្រមូលប្រាក់ចំនួន៨៣,២ពាន់លានបាត ពោលគឺកើនឡើង៦៨៤លានបាត ធៀបនឹងឆ្នាំមុន និងលើសពីគោលដៅ៦,៥ ពាន់លានបាត។

ប្រាក់ចំណូលដែលកើនឡើងនេះ អាចដោយសារតែមានការកើនឡើង២០ភាគរយនៃពន្ធដែលពាក់ព័ន្ធនឹងរថយន្ត។

លោក Krisada បានឲ្យដឹងថា “ដោយសារតែការប្រមូលពន្ធច្រើនជាងមុន នាយកដ្ឋានគយបានប៉ាន់ប្រមាណថា ប្រាក់ចំណូលនឹងអាចទទួលបានប្រមាណស្មើនឹង១០៨ ពាន់លានបាតដែលដូចទៅនឹងឆ្នាំ២០១៨”៕

ប្រភព៖ កាសែតបាងកកប៉ុស្តិ៍

បារំាងគ្រោងបង្កើតក្រុមហ៊ុនថែរទាំ និងជួសជុលយន្តហោះនៅកម្ពុជា

July 9, 2019

0

ដោយ វុត្ថា

ភ្នំពេញៈ បារាំងបានបង្ហាញមហិច្ឆិតារបស់ខ្លួន ដោយគ្រោងបង្កើតក្រុមហ៊ុនថែរទាំនិងជួសជុលយន្តហោះនៅកម្ពុជា ដើម្បីឆ្លើយតបទៅនឹងការកើនឡើងក្រុមហ៊ុនយន្តហោះ និងវិស័យអាកាសចរណ៍នៅកម្ពុជា ពីបណ្តាប្រទេសនានានៅជុំវិញពិភពលោក។

នៅក្នុងកិច្ចប្រជុំជាមួយលោកឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកអគ្គលេខាធិការដ្ឋានអាកាសចរណ៍ស៊ីវិល និងលោកស្រី Nguyen Binh Eva ឯកអគ្គរដ្ឋទូតសាធារណរដ្ឋបារាំងប្រចាំកម្ពុជា និងលោក Mr. Philippe BAUDRY ប្រធានកិច្ចការសេដ្ឋកិច្ចប្រចាំប្រទេសកម្ពុជា និងឡាវបានពិភាក្សាការងារចំនួន៥ ដែលផ្តោតលើកិច្ចពិភាក្សាសំខាន់ៗចំនួន៥ ដូចជាទី១ ភាគីបារាំងមានំណង ពង្រឹងលើការងារសុវត្ថិភាព និងសន្តិសុខអាកាសអាកាសចរ។ ទី២ ភាគីបារាំងនឹងផ្តល់ការសិក្សាអាកាសចរស៊ីវិលនៅកម្ពុជា។

ទី៣-ពង្រឹងកិច្ចសហប្រតិបត្តិការទ្វេភាគី រវាងរដ្ឋលេខាធិការដ្ឋានអាកាសចរស៊ីវិល និងអាជ្ញាធរអាកាសចរស៊ីវិលបារាំង។ ៤-ភាគីបារាំងមានបំណងបង្កើតក្រុមហ៊ុន ថែរទាំ និងជួសជុលយន្តហោះនៅកម្ពុជា និង៥-បើកសាលាបណ្តុះបណ្តាលវិស័យអាកាសចរស៊ីវិល។

លើសពីនេះទៅទៀត លោកស្រី Nguyen Binh Eva ឯកអគ្គរដ្ឋទូតក៏បានអបអរសាទរ ចំពោះរដ្ឋលេខាធិការដ្ឋានអាកាសចរស៊ីវិល ដែលមានការផ្តល់អាហារូបករណ៏ ពីប្រទេសបារាំង បានបញ្ជូនមន្ត្រី និងបានបញ្ចប់ការសិក្សាលើជំនាញឯកទេសគ្រប់គ្រងដឹកជញ្ជួនផ្លូវអាកាស កម្រិតក្រោយបរិញ្ញាបត្រ័ជាន់ខ្ពស់១រូប នៅសាលាអាកាសចរណ៍ជាតិ ENAC ប្រទេសបារាំង ក្នុងឆ្នាំ២០១២-២០១៣ និង២រូប ទើបបញ្ចប់ការសិក្សាក្នុងខែកក្កដា ឆ្នាំ២០១៩ នេះ នៅសាលាអាកាសចរក្រុងហុងកុង ដែលមានកិច្ចសហប្រតិបត្តិការជាមួយ ENAC។

លោកនាយឧត្តមសេនីយ៍បណ្ឌិត ម៉ៅ ហាវណ្ណាល់ បានគូសបញ្ជាក់ផងដែរពីកិច្ចសហប្រតិបត្តិល្អ រវាងរដ្ឋលេខាធិការដ្ឋានអាកាសចរស៊ីវិល និងអាជ្ញាធរអាកាសចរស៊ីវិលបារាំង និងបានថ្លែងអំណរគុណដល់ប្រទេសបារាំង ដែលបានជួយដល់ការបណ្តុះបណ្តាលធនធានមនុស្ស លើវិស័យអាកាសចរស៊ីវិលនៅកម្ពុជា និងសំដែងនូវការគាំទ្រទាំងអស់ លើកិច្ចសហប្រតិបត្តិការទាំង៥ចំនុច ដែលបានពិភាក្សាខាងលើ សំដៅអភិវឌ្ឍវិស័យអាកាសចរឱ្យកាន់តែរីកចម្រើនថែមទៀត៕