ដោយនៅ វឌ្ឈនា
សៀមរាបៈ មន្រ្តីជាន់ខ្ពស់ក្រសួងទេសចរណ៍ នៃបណ្ដាប្រទេសក្នុងតំបន់អាស៊ាន បានរួមគ្នាដាក់ចេញនូវផែនការជំរុញ ការអភិវឌ្ឍវិស័យទេសចរណ៍អាស៊ាន ស្របតាមផែនការរបស់ខ្លួន។
ក្នុងកិច្ចប្រជុំលើកទី៦ នៃក្រុមការងារទីផ្សារទេសចរណ៍អាស៊ាន នៅខេត្តសៀមរាប នាថ្ងៃទី៨ ខែកក្កដា ឆ្នាំ២០១៩នេះលោកថោង រដ្ឋសក្តិ អគ្គនាយកនៃអគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួង ទេសចរណ៍កម្ពុជាបានឱ្យដឹងថា មន្រ្តីជាន់ខ្ពស់អាស៊ានបានពិភាក្សា អំពីកិច្ចសហការទេសចរណ៍ក្នុងតំបន់ ដើម្បីជំរុញទេសចរណ៍អាស៊ាន ស្របតាមចក្ខុវិស័យអភិវឌ្ឍទេសចរណ៍អាស៊ាន ជាគោលដៅគុណភាពកម្រិតពិភពលោកប្រកបដោយចីរភាព និងបរិយាប័ន្ន ស្របតាមផែនការយុទ្ធសាស្រ្តអភិវឌ្ឍន៍ទេសចរណ៍អាស៊ាន ឆ្នាំ២០១៧-២០២០។
ប្រទេសសមាជិកអាស៊ានបានផ្តោតជាចម្បង លើការផ្សព្វផ្សាយតាមប្រព័ន្ធអនឡាញ បណ្តាញសង្គម កិច្ចសហការរួមគ្នាលើការរៀបចំព្រឹតិ្តការណ៍ទេសចរណ៍ផ្សេងៗ ព្រមទាំងកិច្ចសហប្រតិបត្តិការ ជាមួយដៃគូសំខាន់ៗក្នុងវិស័យហិរញ្ញវត្ថុ និងក្រុមហ៊ុនអាកាសចរណ៍ជាដើម។
កិច្ចប្រជុំក៏បានពិភាក្សាអំពីការផ្សព្វផ្សាយកញ្ចប់ ខ្សែទស្សនកិច្ចបែបវប្បធម៌ បេតិកភណ្ឌ ម្ហូបអាហារ ធម្មជាតិជាដើម នៅក្នុងគេហទំព័រផ្សព្វផ្សាយទេសចរណ៍អាស៊ាន។
នៅឆ្នាំ២០១៨កន្លងទៅ តំបន់អាស៊ានបានទទួលទេសចរអន្តរជាតិប្រមាណ ១៣០លាននាក់ ក្នុងកំណើន ៨.៤% ក្នុងនោះទេសចរផ្ទៃក្នុងអាស៊ាន (Intra-ASEAN Travelers) ប្រមាណ ៤០%៕
