ក្រុមហ៊ុនលំដាប់យក្សចិនមួយមានបំណងវិនិយោគលើវិស័យជាច្រើនក្នុងខេត្តកណ្តាល

July 2, 2019

ដោយនៅ វឌ្ឈនា

ខេត្តកណ្តាលៈ ក្រុមហ៊ុន Zhejiang Epoch Investment Co .Ltd ដែលជាក្រុមហ៊ុនដ៏ធំរបស់មហាយក្សសេដ្ឋកិច្ចចិន បានប្រកាសពីគោលបំណងរបស់ខ្លួន ក្នុងការវិនិយោគលើវិស័យសំខាន់សំខាន់ៗជាច្រើននៅក្នុងខេត្តកណ្តាល ខណៈខេត្តជាប់ភ្នំពេញមួយនេះកំពុងមានសក្តានុពលសេដ្ឋកិច្ចខ្ពស់។

លោក សុង សូសេង អគ្គនាយកក្រុមហ៊ុន Zhejiang Epoch Investment Co .Ltd បានឱ្យដឹងនៅក្នុងជំនួបជាមួយលោក ម៉ៅ ភិរុណ អភិបាលខេត្តកណ្ដាល កាលពីពេលថ្មីៗនេះថា ក្រុមហ៊ុនគ្រោងនឹងវិនិយោគលើវិស័យជាច្រើនក្នុងខេត្តកណ្តាល រួមមមាន គំរោង វិនិយោគលើវិសយ័ថាមពលអគ្គិសនីដើរដោយសំរាម មានអនុភាព ៥០មេហ្គាវ៉ាត់ ចំនួន១ទីតាំង និងថាមពលអគ្គិនីដើរដោយធ្យូងចំនួន២តាំង។ គំរោងសាងសង់សួនឧស្សាហកម្មខ្នាតធំជំហ៊ានទី១ ចំនួន១០០រោងចក្រ ដោយប្រើប្រាស់បច្ចកវិទ្យាទំនើប និងសិក្សាលើផលិតផលកសិកម្មដូចជា ត្រី ស្រូវ ម្ទេស និងផ្លែឈើជាដើម សំរាប់ការនាំចេញទៅខេត្តស៊ីជាំង។

រដ្ឋបាលខេត្តកណ្តាល និងគណៈប្រតិភូក្រុមហ៊ុនចិន ខេត្តស៊ីជាំង ក៏បានពិភាក្សាលើការងារទំនាក់ទំនងទ្វេភាគីវរវាងខេត្តស៊ីជាំង និងខេត្តកណ្តាលផងដែរ ដើម្បីឈានទៅរកការចុះកិច្ចព្រមព្រៀង MOU ខេត្តកណ្ដាល និងខេត្តស៊ីជាំង បន្ទាប់ពីមានការឯកភាពពីរដ្ឋាភិបាលនៃប្រទេសទាំងពីរ។

លោក ម៉ៅ ភិរុណអភិបាលខេត្តកណ្ដាលបានឱ្យដឹងដឹងដែរថា ខេត្តកណ្ដាលមានសក្ដានុពលដូចជា វិស័យកសិកម្ម ឧស្សាហកម្ម និងទេសចរណ៍ ជាវិស័យគោលក្នុងការអភិវឌ្ឍសេដ្ឋកិច្ចខេត្ត។ ខេត្តកណ្តាលមានភូមិសាស្ត្រល្អ ហ៊ុំព័ទ្ធជុំវិញរាជធានីភ្នំពេញ មានរោងចក្រសហគ្រាសជាង៤៧០ ក្នុងនោះមានរោងចក្រកាត់ដេសំលៀកបំពាក់ និងដេរស្បែកជើងចំនួន ១៨៣ រោងចក្រ មានកម្មករជាង ១៦ម៉ឺននាក់ រកចំនូលបាន៣៧លាន$ក្នុង១ខែៗ ហើយជារៀងរាល់ឆ្នាំខេត្តកណ្តាលសល់ស្បៀងគិតជាអង្កជាង ៥ម៉ឺនតោនសម្រាប់ការនាំចេញ។

លោកបន្តថា ប្រព័ន្ធហេដ្ឋារចនាសម្ព័ន្ធក្នុងខេត្តកណ្ដាល មានភ្ជាប់ជាមួយផ្លូវជាតិធំៗសំខាន់ៗជាច្រើនសម្រាប់តភ្ជាប់ទៅកាន់បណ្ដាខេត្តនានា ដូចជាផ្លូវជាតិលេខ ១ លេខ ២ លេខ ៣ លេខ ៤ លេខ ៥ លេខ ៦ លេខ ៨ លេខ ១១ លេខ ២១ និងលេខ ៥១។ ខេត្តកណ្ដាលក៏មានស្ពានធំៗឆ្លងទន្លេផងដែរ នៅមានដូចជាស្ពានអ្នកលឿង ស្ពានព្រែកតាមាក់ ស្ពានព្រែកក្តាម ស្ពានកោះធំ ស្ពានព្រែកសំរោង នឹងមានស្ពានកោះអន្លង់ចិនដែលនឹងកសាងនៅពេលខាងមុខនេះ។

ជាពិសេសខេត្តកណ្ដាលឆាប់ៗខាងមុខនេះ ព្រលានយន្តហោះកម្រិតអន្តរជាតិ១កន្លែង ដែលបានចំណាយទឹកប្រាក់លើការវិនិយោគ ប្រមាណ១៥០០លានដុល្លារលើទំហំផ្ទៃដីជាង២៧០០ហិកតា។ ដូចនេះ ខេត្តកណ្ដាលជាខេត្តមួយ ដែលមានសក្តានុពលល្អ សម្រាប់ក្រុមហ៊ុននានា ចូលមកវិនិយោគនាថ្ងៃខាងមុខ។ នេះបើតាមអភិបាលខេត្តកណ្តាលដដែល៕

គណៈកម្មការមូលបត្រកម្ពុជាចុះ MOU ជាមួយគណៈកម្មការគ្រប់គ្រងមូលបត្រចិន

July 1, 2019

0

ដោយ វុត្ថា

ភ្នំពេញ៖ គណៈកម្មការមូលបត្រកម្ពុជាបានចុះអនុស្សរណៈនៃការយោគយល់គ្នា (MOU) ជាមួយគណៈកម្មការគ្រប់គ្រងមូលបត្រចិនដើម្បីផ្លាស់ប្តូរគ្នានូវព័ត៌មានបទប្បញ្ញត្តិ និងបច្ចេកទេសក្នុងក្របខ័ណ្ឌទីផ្សារមូលបត្រ កិច្ចសន្យាអនាគត។

យោងតាមសេចក្តីប្រកាសព័ត៌មានរបស់គណៈកម្មការមូលបត្រកម្ពុជាចេញផ្សាយនៅថ្ងៃទី ១ ខែកក្កដា ឆ្នាំ ២ឥ១៩ នេះបានឱ្យដឹងថា លោកស៊ូ សុជាតិ អគ្គនាយក នៃគណៈកម្មការមូលបត្រកម្ពុជា ប្រធានគណៈកម្មការមូលបត្រកម្ពុជា បានដឹកនាំគណៈប្រតិភូទៅចុះហត្ថលេខាលើអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការគ្រប់គ្រងមូលបត្រ ជាមួយគណៈកម្មការគ្រប់គ្រងមូលបត្រចិន នៅទីស្តីការគណៈ-កម្មការគ្រប់គ្រងមូលបត្រចិន ទីក្រុងប៉េកាំង ប្រទេសចិន។

សេចក្តីប្រកាសព័ត៌មានដដែលពន្យល់ថា អនុស្សរណៈនេះត្រូវបានរៀបចំឡើងក្នុងគោល-បំណងបង្កើននូវកិច្ចសហប្រតិបត្តិការរវាងនិយ័តករទាំងពីរ ដោយបង្កើនការយោគយល់គ្នាទៅវិញទៅមក និងការផ្លាស់ប្តូរគ្នានូវព័ត៌មានបទប្បញ្ញត្តិ និងបច្ចេកទេសក្នុងក្របខ័ណ្ឌទីផ្សារមូលបត្រ កិច្ចសន្យាអនាគត និងផលិតផលវិនិយោគពាក់ព័ន្ធដែលមានប្រតិបត្តិការនៅក្រោមការគ្រប់គ្រង និងការត្រួតពិនិត្យរបស់និយ័តករនីមួយៗ។

ក្នុងន័យនេះ ថ្នាក់ដឹកនាំនៃនិយ័តករទាំងពីរក៏បានពិភាក្សាអំពីទិសដៅបន្តលើយន្តការនៃការផ្លាស់ប្តូរ និងចែករំលែកព័ត៌មាន ស្របតាមអនុស្សរណៈនៃការយោគយល់ យន្តការពង្រឹងការអនុវត្តច្បាប់ដើម្បីការពារទីផ្សារ និងអតិថិជន និងលទ្ធភាពក្នុងការផ្តល់ជំនួយបច្ចេកទេសសម្រាប់ការកសាង សមត្ថភាព៕

រដ្ឋសភា អនុម័តគម្រោងវារីអគ្គិសនីតម្លៃជាង ២០០លានដុល្លារនៅខេត្តពោធិ៍សាត់

July 1, 2019

0

ដោយ ដាវិន

ភ្នំពេញ៖ រដ្ឋសភានៃប្រទេសកម្ពុជាបានសម្រេចអនុម័តយល់ព្រមអនុញ្ញាតឲ្យក្រុមហ៊ុនអេសភីអេចភី (ខេមបូឌា) បោះទុនវិនិយោគប្រមាណជាង ២០០លានដុល្លារលើគម្រោងសាងសង់វារីអគ្គសិនីខេត្តពោធិ៍សាត់មួយកន្លែង ទំហំ៨០មេហ្គាវ៉ាត់ ដែលនឹងដាក់ឲ្យដំណើរការនៅឆ្នាំ២០២៣ ខាងមុខ។

លោក ជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុ និងសាវនកម្មនៃររដ្ឋសភា នៅក្នុងសម័យប្រជុំរដ្ឋសភាលើកទី២ នីតិកាលទី៦ នៅថ្ងៃទី១ ខែកក្ដដា ២០១៩នេះបានឱ្យដឹងថា រាជរដ្ឋាភិបាលបានសម្រេចឲ្យក្រុមហ៊ុនអេសភីអេចភី (ខេមបូឌា) ឯ.ក មានឈ្មោះដើមKTC Cable Co.Ltd សិក្សាអភិវឌ្ឍន៍គម្រោងវារីអគ្គិសនីស្ទឹងពោធិ៍សាត់១ កំលាំងអនុភាព៨០មេហ្គាវ៉ាត់ ស្ថិតនៅក្នុងសាស្ត្រឃុំប្រមោយ ស្រុកវាលវែង ខេត្តពោធិ៍សាត់។

លោកបន្តថា ការវិនិយោគទុនសាងសង់គម្រោងវារីអគ្គិសនីស្ទឺងពោធិ៍សាត់១ ត្រូវចំណាយថវិកាសរុប ២៣១.១០ លានដុល្លាអាមេរិក ក្នុងរយៈពេលសម្បទាន៣៩ឆ្នាំ ដោយរយៈពេលសាងសង់៤ឆ្នាំ និង៣៥ឆ្នាំសម្រាប់ធ្វើអាជីវកម្ម។

រដ្ឋាភិបាលកាលពីកន្លងទៅថ្មីៗនេះបានអនុម័តឲ្យក្រុមហ៊ុន SPHP (Cambodia) Co., Ltd ធ្វើការវិនិយោគលើគម្រោងសាងសង់ស្ថានីយវារីអគ្គិសនី ១ កន្លែងនៅតាមស្ទឹងពោធិ៍សាត់ ស្រុកវាលវែង ខេត្តពោធិ៍សាត់ ក្រោមរូបភាពសាងសង់ដំណើរការផ្ទេរ (BOT) ដោយចំណាយទុនវិនិយោគ ២៣១,១០ លានដុល្លារ សម្រាប់រយៈពេលសម្បទាន៣៩ ឆ្នាំ។

គម្រោងនេះមានទំហំ ៨០ មេហ្គាវ៉ាត់ នឹងត្រូវដាក់ឲ្យដំណើរការនៅក្នុងឆ្នាំ ២០២៣។លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា កាលពីម្សិលមិញបានថ្លែងថា ការពង្រីកការវិនិយោគលើវិស័យថាមពលនេះអាចនិយាយថា ជារបត់ថ្មីមួយរបស់កម្ពុជាក្នុងការឈានឆ្ពោះទៅរកការពង្រឹងសន្តិសុខថាមពល ដើម្បីឆ្លើយតបនឹងកំណើននៃការប្រើប្រាស់ថាមពលដ៏ច្រើនពេលបច្ចុប្បន្ន។

លោកថា ”យើងកំពុងរៀបចំពង្រឹងខ្លួនឯងដើម្បីធានាសន្តិសុខថាមពលដោយខ្លួនឯង ដោយមិនពឹងពាក់ទាំងស្រុងទៅលើថាមពលដែលទទួលបានពីប្រទេសជិតខាង។យោងតាមរបាយការណ៍ប្រចាំឆ្នាំ ២០១៨ របស់អាជ្ញាធរអគ្គិសនីកម្ពុជាបានឱ្យដឹងកម្ពុជាគ្រោងនឹងបង្កើនការផ្គត់ផ្គង់ថាមពលអគ្គិសនីដល់ ២ ៨៧០ មេហ្គាវ៉ាត់នៅឆ្នាំ ២០១៩ ដែលកើនឡើងពី ២ ៦៥០,២៦ មេហ្គាវ៉ាត់ ក្នុងឆ្នាំ ២០១៨៕

ផ្សារទំនើបដំបូងគេនៅក្រុងព្រះសីហនុត្រៀបើកដំណើរការជាមួយនឹងក្រុមហ៊ុនល្បីៗជាច្រើន

July 1, 2019

0

ដោយ ស៊ីវ ម៉េង

ព្រះសីហនុ៖ ផ្សារទំនើបដំបូងគេ FURI TIME SQUARE តម្លៃជិត ១០លានដុល្លារអាមេរិកនៅក្រុងព្រះសីហនុ នឹងបើកដំណើរការនៅកំឡុងចុងខែកញ្ញាខាងមុខនេះ ជាមួយនឹងវត្តមានហាងកាហ្វេ និងផលិតផលល្បីៗជាច្រើននឹងបង្ហាញខ្លួននៅលើផ្សារទំនើបនេះផងដែរ។

នាយកផ្នែកទីផ្សារនៃក្រុមហ៊ុន FURI Real Estate កញ្ញាលឹម សុខាដាវីនបានមានប្រសាសន៍ឲ្យដឹងកាលពីពេលថ្មីៗនេះថា តាមរយៈការជួបជុំជាមួយអតិថិជនកាលពីពេលថ្មីៗនេះ ក្រុមហ៊ុនបានទទួលបានយោបល់ល្អ និងមានការកោតសរសើរពីអតិថិជនអ្នកជួលផ្សារទំនើបនេះ ដោយសារផ្សារនេះផ្តោតលើការរៀបចំប្រព័ន្ឋនៃការលក់ទូលាយល្អ មានទីធ្លាសាធារណៈធំទូលាយ ការឌីសាញមានភាពទាក់ទាញ និងទីតាំងនៃគម្រោងនេះល្អ។

ផ្សារទំនើបកំពស់៥ជាន់នេះ ស្ថិតនៅលើផ្លូវឯករាជ្យ ស្ថិតក្នុងសង្កាត់មិត្តភាព ខ័ណ្ឌមិត្តភាព ក្រុងព្រះសីហនុ។

កញ្ញាដាវីនបានបន្តថា “ការទទួលបានការសរសើរពីអតិថិជន អ្នកជួលទីតាំងលក់រាយក្នុងគំរោងនេះ ដោយសារការវិនិយោគរបស់អ្នកវិនិយោគផ្សារទំនើបនេះ ផ្តោតលើការវិនិយោគរយៈពេលវែងជាជាងរកផលចំណេញ”។ កញ្ញាបន្ថែមថា“រហូតមកទល់ពេលនេះហាងអាហារ និងផលិតផលល្បីឈ្មោះជាង២០ក្រុមហ៊ុន បានចុះកុងត្រាលក់នៅផ្សារនេះ ហើយផលិតផលល្បីៗជាច្រើនទៀតកំពុងដំណើរការនិតិវិធី”។

ផ្សារទំនើប FURI TIME SQUARE ក៏មានការវិនិយោគលើ Sky Bar ទំនើបជាងគេ នៅក្នុងក្រុងព្រះសីហនុ ដោយគ្រាន់តែ Sky Bar នេះវិនិយោគអស់ទឹកប្រាក់ជាង១លានដុល្លារអាមេរិក។

កញ្ញាលឹម សុខាដាវីនបានបន្តថា ជាមួយនឹងភាពអំណោយផលនៃទីតាំង កំនើនប្រជាសាស្រ្ត និងកំណើននៃការវិនិយោគនៅខេត្តព្រះសីហនុ បានធ្វើឲ្យគំរោងនេះសម្រេចបានជោគជ័យលើសការរំពឹងទុក ដោយពេលបើកដំណើរការសាកល្បងនៅចុងខែកញ្ញាខាងមុខនេះ ទីតាំងលក់ទំនិញ និងសេវាកម្មប្រមាណ ៨០ភាគរយនឹងបើកដំណើរការ រួមទាំងរោងភាពយន្តផងដែរ។កាលពីពេលថ្មីៗនេះ ផ្សារទំនើបនេះបានទទួលពានរង្វាន់ជាផ្សារដែលមានការឌីសាញដ៏ទាក់ទាញបំផុតពីកម្មវិធីCambodia Property Award ដែលបានប្រារពឡើងនៅរាជធានីភ្នំពេញ។

អតិថិជនអាចទាក់ទងតាមទូរស័ព្ទលេខ០១១ ២៩៩ ៩៧៥សម្រាប់ការជួលស្តង់លក់បន្ថែមនៅផ្សារទំនើបដំបូងគេនេះ៕

ការផ្គត់ផ្គង់អគារការិយាល័យនៅក្នុងទីក្រុងបាងកកនៅតែដំណើការល្អនៅក្នុងឆ្នាំនេះ

July 1, 2019

0

ដោយ វុត្ថា

បាងកកៈ ការផ្គត់ផ្គង់ការិយាល័យមានចំនួនសរុប ៨.៩៥លានម៉ែត្រការ៉េ នៅបំណាច់ត្រីមាសទី១ នៃឆ្នាំ២០១៩កន្លងមកនេះ កើនឡើងប្រមាណ ១.៩ភាគរយពីមួយឆ្នាំទៅមួយឆ្នាំ ខណៈតម្រូវការមានការកើនឡើងផងដែរ។

យោងតាមរបាយការណ៍របស់ក្រុមហ៊ុន CBRE ប្រចាំប្រទេសថៃបានឲ្យដឹងថា អគារការិយាល័យ ដែលបានសាងសង់បញ្ចប់រួចហើយមានផ្ទៃក្រឡាសំណង់ ៧៨,០០០ ម៉ែត្រការ៉េដែលមានរួម អគារ True Digital Park អគារ SM Siam និងអគារ Ladprao Hills។

ការផ្គត់ផ្គង់ការិយាល័យ បានបន្តកើនឡើងនៅក្នុងត្រីមាសទី១ ឆ្នាំ ២០១៩ ដោយមានគម្រោងចំនួន៦ បាននឹងកំពុងដំណើរការនៅលើទំហំដីមួយលានម៉ែត្រក្រឡា កើនឡើងពី0.៨៧លានម៉ែត្រក្រឡា។ ការិយាល័យថ្មីនេះនឹងត្រូវបញ្ចប់នៅចន្លោះឆ្នាំ ២០១៩ និង ២០២២។

ជាមួយគ្នានេះទំហំផ្ទៃក្រឡាសំណង់សរុបប្រមាណ៦ភាគរយ ដែលបានកំពុងសាងសង់នៅទីក្រុងបាងកក ជាប្រភេទការិយាល័យប្រភេទ A រួមមាន Tower Mitrtown, អគារ PARQ , អគារ Vanissa, អគារ Unicorn, អគារ O-NES Tower,អគារ EmSphere, អគារ One City Center, និង អគារ One Bangkok។

របាយការណ៍ដដែលបានឲ្យដឹងទៀតថា បន្ថែមពីនេះ ការិយាល័យដែលគ្រោងសាងសង់នៅលើទំហំប្រមាណ១,២លានម៉ែត្រ គ្រោងនឹងសាងសង់នាពេលខាងមុខនេះ ដែលត្រូវបានក្រុមហ៊ុន CBRE រំពឹងថានឹងចាប់ផ្តើមសងសង់ ហើយនឹងកើនឡើងនៃការផ្គត់ផ្គង់ការិយាល័យនាពេលអនាគត លើពីការរំពឹងទុកនៅក្នុងឆ្នាំ ២០២១។

អាគារការិយាល័យខ្លះ ស្ថិតនៅក្នុងដំណើរការសាងសង់ ដែលភាគច្រើននឹងបញ្ចប់នៅក្នុងឆ្នាំ២០២១ ដែលរួមមាអគារ Mitrtown Office និង អគារ PARQ ស្ថិតនៅក្នុងការសាងសង់ដំណាក់កាលទី២។

លោកស្រី Roongrat Veeraparkkaroon ប្រធានផ្នែកប្រឹក្សាយោបល់ និងប្រតិបត្តការសេវាការិយាល័យបានឱ្យដឹងថា ក្រុមអ្នកជួលដែលត្រូវការការិយាល័យ ក្នុងអំឡុងពេលនេះ នឹងត្រូវមានគម្រោងកក់ទុកមុន ដោយសារការកំណត់នូវជម្រើសនៃការជួល។

ក្រុមហ៊ុន CBRE បានព្យាករណ៍ថា ការផ្គត់ផ្គង់ការិយាល័យនៅក្នុងទីក្រុងបាងកកប្រទេសថៃនឹងកើនឡើងដល់១០លានម៉ែត្រការ៉េ នៅក្នុងឆ្នាំ២០២២ខាងមុខ៕

ក្រុមហ៊ុនចិនធំមួយគ្រោងវិនិយោគទឹកប្រាក់ ៣៣០លានដុល្លារលើគំរោងអភិវឌ្ឍន៍លំនៅដ្ឋានក្នុងខេត្តពោធិ៍សាត់

July 1, 2019

0

ដោយ Donald Lee

ភ្នំពេញៈ ក្រុមហ៊ុនវិនិយោគចិនធំមួយគ្រោងនឹងអភិវឌ្ឍទីក្រុង នៅជិតព្រំដែនកម្ពុជាថៃក្នុងតម្លៃទឹកប្រាក់ជាង៣៣០លានដុល្លារស្ថិតនៅស្រុកវាលវែង ក្នុងខេត្តពោធិសាត់ ភូមិភាគពាយ័ព្យនៃប្រទេស។

គំរោងអភិវឌ្ឍន៍នេះរួមមានបន្ទប់ខុនដូចំនួនជាង១ម៉ឺនយូនីត លំនៅដ្ឋាន និងមជ្ឈមណ្ឌលពាណិជ្ជកម្មផងដែរ។ ការអភិវឌ្ឍនៅតំបន់នេះធ្វើឡើងស្របពេល ប្រជាជនចិនរាប់ពាន់នាក់បានធ្វើផ្លាស់ប្តូរលំនៅដ្ឋានទៅកាន់តំបន់នេះ។

លោក Wiman Singphan អនុប្រធានសមាគមពាណិជ្ជកម្មតាមព្រំដែនកម្ពុជា និងខេត្តត្រាតបានឱ្យដឹងថា គម្រោងនេះនឹងស្ថិតនៅនឹងច្រកព្រំដែនកម្ពុជា ថៃថ្មី ហើយការសាងសង់ផ្លូវធំ ដែលតភ្ជាប់ពីប្រទេសថៃទៅកាន់ខេត្តបាត់ដំបង ភ្ជាប់ជាមួយខេត្តពោធិ៍សាត់ និងកោះកុងបានចាប់ផ្តើមរួចហើយ ហើយសកម្មភាពពាណិជ្ជកម្មសំខាន់ៗត្រូវបានគេរំពឹងថា នឹងបង្កើតការរីកចំរើននៃអចលនទ្រព្យនៅក្នុងចំណុចឆ្លងកាត់នេះ។

លោកបន្តថា “គម្រោងនេះត្រូវបានផ្តួចផ្តើមឡើងកាលពី៦ឆ្នាំមុន ដោយឧកញ៉ា ទ្រី ភាព ដែលបានចូលរួមជាមួយពាណិជ្ជករចិនជាច្រើននាក់ ដើម្បីអភិវឌ្ឍន៍ទីតាំងខាងលើនេះ ប៉ុន្តែគំនិតផ្តួចផ្តើមនេះមិនបានលេចចេញជារូបរាងទេ”។លោកបានបន្តថា “អ្នកវិនិយោគចិន បច្ចុប្បន្នបានបង្កើតភាពជាដៃគូជាមួយអ្នកវិនិយោគ ដ៏មានឥទ្ធិពលមួយរូបនៅភ្នំពេញ ហើយបានកាន់កាប់គម្រោងនេះ និងកំពុងផ្តល់ហិរញ្ញប្បទានដល់គម្រោងនេះ”។

គម្រោងនេះ ត្រូវបានគេរំពឹងថានឹងបញ្ចប់ក្នុងរយៈពេលពី ៣ ទៅ៥ឆ្នាំ ហើយនឹងត្រូវបានរៀបចំឡើង នៅក្នុងដំណាក់កាលជាច្រើននៃការអភិវឌ្ឍន៍។

លោក Singphan បាននិយាយថា “គម្រោងនធនឹងត្រូវបានសាងសង់ឡើងជា៥ ដំណាក់កាល និងដំណាក់កាលដំបូងប្រហែល ៨០ភាគរយ ស្មើនឹង ១,០០០យូនីតត្រូវបានបញ្ចប់ការសាងសង់ ដោយរួមមានសណ្ឋាគារប្រណីតលំដាប់ផ្កាយប្រាំ ភោជនីយដ្ឋាន កាស៊ីណូខ្ពស់ និងសេវាកម្មសាធារណៈផ្សេងៗទៀត”។

កាលពីខែ មេសា រដ្ឋមន្រ្តីក្រសួងការពារជាតិកម្ពុជា លោក ទៀ បាញ់ បានដឹកនាំគណៈប្រតិភូជាន់ខ្ពស់របស់រដ្ឋាភិបាល និងអ្នកវិនិយោគឯកជន ហើយបានធ្វើការស្ទង់មតិតំបន់សម្រាប់ការអភិវឌ្ឍ និងបានសំដៅដល់តំបន់នេះថាជាតំបន់ “ភ្នំ ៤០០” ឬ Hill 400៕

វិធានការណ៍ក្តៅ៖ រដ្ឋាភិបាលកោះហៅក្រុមអ្នករកស៊ីក្នុងវិស័យសំណង់មកប្រជុំនៅដើមខែនេះ

July 1, 2019

0

ដោយ វុត្ថា

ភ្នំពេញ៖ រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ បានកោះហៅក្រុមអ្នករកស៊ីក្នុងវិស័យសំណង់ នៅក្នុងប្រទេសកម្ពុជាមកប្រជុំ និងពិភាក្សាការងារផ្សេងនៅដើមសប្តាហ៍នេះ បន្ទាប់ពីមានករណីបាក់ស្រុតអគារកំពស់៧ជាន់បណ្តាលឱ្យស្លាប់ និងរងរបួលពលរដ្ឋខ្មែរជាច្រើនកាលពីចុងខែកន្លងមកនេះ។

នៅក្នុងលិខិតអញ្ជើញរបស់ក្រសួងរៀបចំដែនដី នគរូបនីយកម្ម និងសំណង់ ចេញផ្សាយនៅថ្ងៃទី១ កក្កដានេះ បានអញ្ជើញលោកឧកញ៉ា លោកជំទាវ លោក លោកស្រី ប្រធានក្រុមហ៊ុនប្រកបអាជីវកម្មសាងសង់ ប្រធានក្រុមជាងសំណង់ ប្រធានក្រុមហ៊ុនប្រកបអាជីវកម្មសិក្សាគម្រោងប្លង់ និងរូបវ័ន្តបុគ្គលសិក្សាគម្រោងប្លង់មកចូលរួមបកិច្ចប្រជុំស្ដីពីការសិក្សាគម្រោងប្លង់ និងការសាងសង់អគារ នៅថ្ងៃទី ៤ ខែកក្កដា ឆ្នាំ២០១៩ខាងមុននេះ ក្រោមអធិបតីភាព លោកជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។

លោក ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងនៅក្នុងកិច្ចប្រជុំស្តីពីបញ្ហាសំណង់នៅខេត្តព្រះសីហនុ កាលពីថ្ងៃទី ២៥ ខែមិថុនាកន្លងមកនេះ បន្ទាប់ពីបាក់ស្រុកអគារកំពស់៧ ជាន់បានបញ្ជាឱ្យអជ្ញាធរ និងមន្ត្រីពាក់ព័ន្ធទាំងអស់ត្រូវដាក់ពាក្យបណ្តឹងទៅតុលា ឬព្រះរាអាជ្ញាបន្ទាន់ ដើម្បីដោះស្រាយតាផ្លូវច្បាប់ បន្ទាប់ពីពិនិត្យឃើញការដ្ឋានសំណង់ណាមួយ ដែលសាងសង់គ្មានច្បាប់អនុញ្ញាត។

លោកឧបនាយករដ្ឋមន្ត្រី ជា សុផារ៉ា រាល់សំណង់ដែលគ្មានច្បាប់ ចាប់ពីពេលនេះទៅអាជ្ញាធរត្រូវដាក់ ពាក្យបណ្តឹងទៅព្រះរាជអាជ្ញា ដើម្បីដោះស្រាយតាមច្បាប់។ នៅចំពោះមុខនេះ យើងនឹងបង្កើតគណៈកម្មការដើម្បីចុះត្រួតពិនិត្យ រាល់សំណង់ទាំងអស់។

លោករដ្ឋមន្ត្រី បានអំពាវនាវឲ្យវិនិយោគិនទាំងមានការនឹងនរចិត្ត ព្រោះគណៈកម្មការចុះទៅ មិនមែនបំភ័យបំភិត ដុតឲ្យខ្លោច រោលឱ្យឆៅនោះទេ។ តែវាគឺជាការគាំទ្រឲ្យបងប្អូនអនុវត្តតាមបទដ្ឋានបច្ចេកទេសត្រឹមត្រូវ ធានាបរិមាណ និងគុណភាព កុំមានការ មន្ទិលសង្ស័យនិង ភិតភ័យ។ លោកបន្ថែមថា “មុននឹងចាប់ផ្តើមសាងសង់ ត្រូវមានច្បាប់អនុញ្ញាត លិខិតបើកការដ្ឋាន ជាដើម”។

លោកឧបនាយករដ្ឋមន្ត្រី បានដាក់បញ្ជាឱ្យមន្ត្រីចុះត្រួតពិនិត្យការដ្ឋានសំណង់ទាំងអស់ និងដាក់ពាក្យប្តឹងទៅតុលានាពេលនេះ បន្ទាប់បន្ទាប់ពីមានឧប្បទ្ទវហេតុបាក់រលំអាគារកំពស់៧ជាន់នៅកណ្តាលក្រុងព្រះសីហនុ បណ្តាលអោយមានមនុស្សស្លាប់ និងរបួសចំនួន ៥៤នាក់ កាលពីរាត្រីទាបភ្លឺថ្ងៃទី២២មិថុនា ២០១៩កន្លងទៅថ្មីៗនេះ។

បើតាមលោកឧបនាយករដ្ឋមន្ត្រីបញ្ជាក់ថា គណៈកម្មការចំនួន៨នឹងចុះត្រួតពិនិត្យគុណភាពនិងលក្ខណៈ បច្ចេកទេសនៃសំណង់ទាំងអស់ ដែលបាននឹងកំពុងសាងសង់នៅលើទឹកដីក្រុងព្រះសីហនុ៕

តោះទៅទស្សនាភូមិអ្នកនេសាទ “ក្តាត” និងទទួលទានគ្រឿងសមុទ្រស្រស់ៗ

July 1, 2019

0

ដោយ ម៉ៃ វីរៈ

កំពតៈ ឪខេត្តកំពត កំពូលដួងចិត្ត នឹងឃើញបទចម្រៀងនេះ ធ្វើឲ្យយើងនឹកដល់ទឹកដីកំពត ដ៏មនោរម្យ ដែលមានសមុទ្រស្ងប់ស្ងាត់ ទឹកថ្លាយង់ និងទេសភាពដ៏ស្រស់ត្រកាលនាជើងភ្នំបូកគោ។

ការស្រូបយកខ្យល់អាកាសពីសមុទ្រ ពិតជាធ្វើឲ្យយើងបាត់អស់ទុក្ខកង្វល់ ហើយបើបានទៅភ្លក់រសជាតិគ្រឿងសមុទ្រស្រស់ៗ ធនធានធម្មជាតិនៃសមុទ្រខ្មែរ ពិតជាមិនអាចឲ្យយើងភ្លេចភូមិក្តាត ដែលជាភូមិអ្នកនេសាទ ស្ថិតនៅជើងភ្នំបូកគោឡើយ។

ដែនដីទេសចរណ៍ដែ លមានស្ថាបត្យកម្មដ៏ប្រណិតជាច្រើនកន្លែង ដែលបន្សល់ទុកដោយអាណានិគមនិយមបារាំង កំពុងទាក់ទាញភ្ញៀវទេសចរណ៍ចម្រុះជនជាតិសាស៍ឱ្យមកកម្សាន្ត ស្វែងយល់ពីទេសចរណ៍បែបធម្មជាតិ និងប្រវត្តិសាស្ត្រនៅខេត្តមួយនេះ។

កំពតមិនត្រឹមជាកន្លែងកំសាន្ដបែបធម្មជាតិតែប៉ុន្នោះទេ តែអ្វីដែលពិសេសជាងនេះទៅទៀតនោះ គ្រឿងសមុទ្រស្រស់ៗយ៉ាងសំបូរបែបនិងមានរសជាតិឆ្ងាញ់។ បើនិយាយពីគ្រឿសមុទ្រយើង នឹងនឹកដល់ភូមិមួយដែលនៅភាគខាងលិចនៃខេត្តកំពត នោះគឺ ភូមិក្ដាត ស្ថិតនៅស្របតាមផ្លូវជាតិលេខ៣។

ភូមិអ្នកនេសាទនេះ ស្ថិតនៅស្រុកទឹកឈូរ មានចំងាយប្រហែល២២គីឡូម៉ែត្រពីទីរួមខេត្តកំពត ដោយធ្វើដំណើរតាមផ្លូវជាតិលេខ៣ បើលោកអ្នកធ្វើដំណើរមកកាន់តំបន់មួយនេះយើង និងបានទស្សនានូវទេសភាពផ្លែកៗនៅអមសមខាងផ្លូវ។

ពេលលោកអ្នកដំណើរមកភូមិនេះ នឹងបានឃើញទីប្រជុំជនតូចមួយដែលអ្នកភូមិបានប្រមូលផ្ដុំគ្នាដាក់លក់គ្រឿងសមុទ្រស្រស់ៗ ទើបតែនិងលើកចេញពីទូកនេសាទថ្មីៗដាក់នៅអមសមខាងផ្លូវ។

លោកជា មករា ជាភ្ញៀវទេសចរម្នាក់ក្នុងចំណោមភ្ញៀវច្រើន ដែលកំពុងឈរទិញគ្រឿងសមុទ្របាននិយាយប្រាប់ថា “ខ្ញុំតែងតែនាំក្រុមគ្រួសារមកទិញគ្រឿងសមុទ្រនៅទីនេះ ដោយសារតែវាស្រស់ល្អ ហើយតំលៃសមរម្យ និងម្យ៉ាងទៀតនៅទីនេះមានខ្យល់អាកាសបរិសុទ្ធនិងបានមើលទេសភាពភ្នំបូកគោ”។

ប្រជាជនរស់នៅភូមិក្ដាតជាង ៩០ភាគរយ ប្រកបរបរនេសាទលើផ្ទៃសមុទ្រ ជារបរមួយដែលបានលើកកំពស់ជីវភាពរបស់ពួកគាត់បានយ៉ាងល្អប្រសើរ៕

សញ្ញាវិជ្ជមាន៖ ប្រធានាធិបតីអាមេរិកផ្អាកពាណិជ្ជកម្មសង្គ្រាមបន្ទាប់ពីជួបមេដឹកនាំចិននៅកិច្ចប្រជុំកំពូល G20

July 1, 2019

0

ដោយ Donald Lee

ភ្នំពេញៈ លោកប្រធានាធិបតីអាមេរិក Donald Trump បាននិយាយថា លោកនឹងមិនបន្ថែមពន្ធបន្ថែមលើទំនិញដែលនៅសល់ពីប្រទេសចិន បន្ទាប់ពីជួបជាមួយប្រធានាធិបតីចិន លោក ស៊ី ជីនពីងនៅកិច្ចប្រជុំ G20 នៅក្នុងប្រទេសជប៉ុនកាលពីចុងសប្តាហ៍។

ពន្ធតម្លៃបន្ថែមលើទំនិញ ដែលមានតម្លៃប្រហែល៣០០ពាន់លានដុល្លារពីប្រទេសចិនទៅអាមេរិក បានគំរាមកំហែងដល់សេដ្ឋកិច្ចពិភពលោក ដែលអាចធ្វើឲ្យមានភាពផុយស្រួយ។ នេះបើយោងតាមអ្នកវិភាគមួយចំនួន ដែលបានលើកឡើងពាក់ព័ន្ធនឹងសេដ្ឋកិច្ចពិភពលោក។

លោក Trump បានថ្លែងទៅកាន់អ្នកយកព័ត៌មាននៅកូរ៉េខាងត្បូង បន្ទាប់ពីកិច្ចប្រជុំកំពូល G20 នៅប្រទេសជប៉ុនថា “យើងទទួលបានជ័យជំនះធំ ពីព្រោះយើងបានបង្កើតសេដ្ឋកិច្ចដែលមិនមានលំដាប់លេខពីរ”។

មេដឹកនាំពិភពលោក និងក្រុមអ្នកវិភាគបានចង្អុលបង្ហាញ អំពីការទស្សន៍ទាយសេដ្ឋកិច្ចថា ការកើតឡើងបន្ថែមទៀតនៅក្នុងសង្រ្គាមពាណិជ្ជកម្មអាម៉េរិក ចិននឹងនាំឲ្យមានការធ្លាក់ចុះសេដ្ឋកិច្ចជាសកលលោក ដែលមានអត្រាដែលមិនអាចប៉ាន់ប្រមាណបាន ចាប់តាំងពីវិបត្តិហិរញ្ញវត្ថុដ៏ធំមួយកាលពីមួយទសវត្សរ៍កន្លងមក។

របាយការណ៍សេដ្ឋកិច្ចរបស់ទីភ្នាក់ងារព័ត៌មាន Bloomberg ដែលបានចេញផ្សាយនៅសប្តាហ៍នេះបានប៉ាន់ស្មានថា តម្លៃការខូចខាតពីពាណិជ្ជកម្មអាមេរិក និងចិនអាចនឹងមានទំហំដល់១,២ពាន់ពាន់លានដុល្លារ ដល់ផលិតផលសរុបក្នុងស្រុកពិភពលោក និងនឹងធ្វើឲ្យសេដ្ឋកិច្ចពិភពលោកយឺតយ៉ាវ ដូចវិបត្តិហិរញ្ញវត្ថុសកលកាលពីឆ្នាំ ២០០៨។

លោកប្រធានាធិបតីអាមេរិកTrump មិនត្រឹមតែនិយាយថា លោកផ្អាកពន្ធគយបន្ថែមទៀតទេ ប៉ុន្តែថែមទាំងអនុញ្ញាតឲ្យធ្វើពាណិជ្ជកម្ម នៅក្នុងកម្រិតតិចតួចជាមួយក្រុមហ៊ុនបច្ចេកវិទ្យាដ៏ធំរបស់ចិន Huawei ផងដែរ។

ការផ្លាស់ប្តូរនេះ នឹងអនុញ្ញាតឲ្យលក់ផលិតផលប្រើប្រាស់របស់ក្រុមហ៊ុន Huawei ប៉ុន្តែនៅតែដាក់កម្រិតលើបច្ចេកវិទ្យា5G។ មេដឹកនាំចិនបានអនុញ្ញាតឲ្យមានការបញ្ជាទិញផលិតផលកសិកម្មអាមេរិកបន្ថែមទៀត៕

សេវារថភ្លើងប្រចាំថ្ងៃថ្មីរវាងទីក្រុងបាងកក និងភ្នំពេញចាប់ផ្តើមដំណើរការផ្លូវការនៅថ្ងៃនេះ

July 1, 2019

0

ដោយ ម៉ាណេត

បាងកកៈ សេវារថភ្លើងប្រចាំថ្ងៃថ្មីរវាងបាងកក និងស្ថានីយព្រំដែនបានក្លងលឹកនៅខេត្តសាកែងនឹងចាប់ផ្តើមដំណើរការនៅថ្ងៃទី១ ខែកក្កដា នេះ។ នេះបើយោងតាមក្រុមហ៊ុនផ្លូវដែករដ្ឋរបស់ប្រទេសថៃចេញផ្សាយនៅថ្ងៃនេះ។

លោក Worawut Mala អ្នកគ្រប់គ្រងស្តីទីនៃក្រុមហ៊ុនផ្លូវដែករដ្ឋរបស់ប្រទេសថៃ បានកាសែតបាងកកប៉ុសិ៍តនៅថ្ងៃនេះថា នឹងមានការដាក់ឲ្យដំណើររថភ្លើងចំនួន៤ដងក្នុងមួយថ្ងៃ។

រថភ្លើងដឹកអ្នកដំណើរធម្មតាលេខ២៧៥ នឹងចាប់ផ្តើមចេញដំណើរពីទីក្រុងបាងកកទៅតំបន់ Aranyaprathet និង Klong Luk នៅម៉ោង ៥និង៥៥នាទី ហើយមកដល់ស្ថានីយនៅម៉ោង១១ព្រឹក។

រថភ្លើងដឹកអ្នកដំណើរធម្មតាលេខ ២៧៩ នឹងធ្វើប្រតិបត្តិការនៅលើផ្លូវតែមួយដោយចាកចេញពីទីក្រុងបាងកកនៅម៉ោង១ និង៥នាទីទៅដល់ព្រំដែននៅម៉ោង ៥ និង ២៧ល្ងាច។

ជាមួយនឹងការដឹកអ្នកដំណើរត្រឡប់មកវិញ រថភ្លើងដឹកអ្នកដំណើរធម្មតាលេខ ២៨០នឹងចាកចេញពីស្ថានីយ៍កក្លុងលឹក (ផ្សាររុងក្លឺ) នៅម៉ោង៦និង៥៨ នាទីព្រឹក ហើយមកដល់ក្រុងបាងកកនាម៉ោង១២ និង៥នាទីយប់ ហើយរថភ្លើងដឹកអ្នកដំណើរធម្មតាលេខ២៧៦ នឹងចាកចេញពីស្ថានីយព្រំដែននៅម៉ោង ១ និង៥៣ រសៀលមកដល់បាងកកនៅម៉ោង៧និង៤០នាទីយប់។

លោក Worawut បានថ្លែងថា កាលពីដើមខែមេសា មេដឹកនាំថៃ និងកម្ពុជាបានចុះហត្ថលេខាលើកិច្ចព្រមព្រៀងរួមគ្នា ក្នុងការដំណើរការសេវារថភ្លើងដែលតភ្ជាប់ប្រទេសទាំងពីរ។

ក្រុមហ៊ុនផ្លូវដែករដ្ឋរបស់ប្រទេសថៃ បានផ្តល់កក្បាលរថភ្លើងដែលប្រើម៉ាស៊ូតចំនួន៤គ្រឿង និងបានបើកស្ថានីយព្រំដែនបានក្លុងលឹកនៅថ្ងៃទី២២ ខែមេសា។

លោកបានព្យាករណ៍ថា “សេវាកម្មថ្មីនេះ នឹងអាចជួយសម្រួលដល់ការធ្វើដំណើររបស់ភ្ញៀវទេសចរថៃ និងបរទេសដែលចង់ឆ្លងកាត់ព្រំដែន”។

មន្ត្រីផ្លូវដែកម្នាក់បាននិយាយថា ថ្លៃសំបុត្រធ្វើដំណើរពេញរវាងទីក្រុងបាងកក និងស្ថានីយបានក្លុងលឹក នឹងមានតម្លៃ៤៩បាត (ប្រហែលជា ៦,០០០ រៀល) ក្នុងការធ្វើដំណើរមួយជើង។

សេវាដឹកជញ្ជូនរវាងប្រទេសទាំងពីរ ត្រូវបានបញ្ចប់កាលពី៤៥ឆ្នាំមុន អំឡុងសង្រ្គាមដែលកើតចេញពីសង្គ្រាមស៊ីវិលនៅកម្ពុជា៕