វិស័យលក់រាយថៃផ្លាស់ប្តូរទៅរកការធ្វើជំនួញបែបឌីជីថល

June 13, 2019

ប្រែសម្រួលដោយម៉ា ណេត

បាងកក៖ វិស័យលក់រាយរបស់ប្រទេស (ផ្តោតលើការលក់តូបក្នុងផ្សារទំនើប) កំពុងស្ថិតក្នុងដំណាក់កាល នៃការផ្លាស់ប្តូរទៅរកបច្ចេកវិទ្យាដ៏សំខាន់ បំផុតនៅក្នុងប្រវត្តិសាស្ត្រ ហើយប្រតិបត្តិករត្រូវតែសម្របខ្លួនឲ្យទាន់នឹងសភាពនៃការផ្លាស់ប្តូរនេះ។

កាសែតបាងកកប៉ុស្តិ៍ បានចុះផ្សាយថា ស្ថានភាពភាពលក់រាយ និងឥរិយាបថផ្លាស់ប្តូររបស់អ្នកប្រើប្រាស់បាននាំមកនូវការលេចឡើងនៃទម្រង់លក់រាយថ្មី និងការទទួលយកបច្ចេកវិទ្យាថ្មីៗ។ អ្នកលក់ដូរតាមបែបប្រពៃណីត្រូវបានបង្ខំឲ្យមានការវិវឌ្ឍ និងវិនិយោគលើការផ្លាស់ប្តូរយុគសម័យឌីជីថល។

ការផ្គត់ផ្គង់ដែលកំពុងរីកចម្រើននៅបាងកក នឹងដាក់សម្ពាធបន្ថែមទៀតទៅលើមជ្ឈមណ្ឌលចាស់ៗ ដើម្បីឲ្យមានកែលម្អ និងធ្វើឲ្យប្រសើរឡើង ដើម្បីរក្សាបាននូវការប្រកួតប្រជែង។ គិតត្រឹមត្រីមាសទី១ ឆ្នាំ ២០១៩ ការផ្គត់ផ្គង់ការលក់រាយសរុបនៅទីក្រុងបាងកកមានចំនួន៧,៨លានម៉ែត្រការ៉េ កើនឡើង៣,៧០ភាគរយ ធៀបនឹងឆ្នាំមុនបើយោងតាមក្រុមហ៊ុន CBRE Thailand។

ការផ្គត់ផ្គង់លក់រាយថ្មីសរុបទាំងអស់ឆ្នាំ២០១៩ នឹងកើនឡើងចំនួន១ភាគ៣ បើធៀបនឹងឆ្នាំមុន។ ហើយនៅចុងឆ្នាំ ២០២១ ការផ្គត់ផ្គង់លក់រាយសរុបទំនងជានឹងលើសពី ៨លានម៉ែត្រការ៉េដែលភាគច្រើន នៃការកើនឡើងនៃការអភិវឌ្ឍចម្រុះនៃទីប្រជុំជន។

ដើម្បីបន្តរក្សាជំនួញរបស់ខ្លួន អ្នកលក់រាយធំៗកំពុងវិនិយោគ ក្នុងទម្រង់លក់រាយថ្មីដូចជា នៅក្នុងការអភិវឌ្ឍចម្រុះ និងផ្សារទំនើបដើម្បីពង្រីកផលប័ត្ររបស់ពួកគេ។ ទោះជាយ៉ាងណាក៏ដោយ អ្នកលក់រាយតូចៗដែលមិនអាចកែច្នៃ និងធ្វើឲ្យឡើងនៃការវិនិយោគរបស់ខ្លួនបាន និងកំពុងជួបផលលំបាកក្នុងការប្រជែងក្នុងទីផ្សារ។

ពាណិជ្ជកម្មអេឡិចត្រូនិចកំពុងមានឥទ្ធិពលយ៉ាងខ្លាំងទៅលើអាកប្បកិរិយារបស់អ្នកប្រើប្រាស់។ ផលប៉ះពាល់កំពុងកើនឡើង ព្រោះវាផ្តល់ឲ្យអតិថិជននូវជម្រើស និងភាពងាយស្រួលដែលផ្សារទំនើបមិនអាចបំពេញបាន។

យោងតាមទីភ្នាក់ងារអភិវឌ្ឍន៍អេឡិចត្រូនិចថៃ (ETDA) បានឲ្យដឹងថា តម្លៃនៃការធ្វើពាណិជ្ជកម្មអេឡិចត្រូនិចថៃបានកើនឡើង១៤ភាគរយ ក្នុងឆ្នាំ២០១៨ ប្រហែល ៣,២ ពាន់ពាន់លានបាត ហើយកំណើននេះត្រូវបានគេរំពឹងថា នឹងកើនឡើងដល់២០ភាគរយនៅឆ្នាំនេះ។ ការលក់រាយផ្ទាល់បានកើនឡើងតែ ៣ ទៅ៤ ភាគរយពីមួយឆ្នាំទៅមួយឆ្នាំ។

យោងតាមក្រសួងសេដ្ឋកិច្ចឌីជីថលឲ្យដឹងថា សេដ្ឋកិច្ចឌីជីថលរបស់ប្រទេសថៃនឹងដើរតួយ៉ាងសំខាន់ នៅក្នុងឧស្សាហកម្មទាំងអស់ ហើយត្រូវបានគេរំពឹងថានឹងឈានដល់២៥ភាគរយ នៃផលិតផលក្នុងស្រុកសរុបនៅត្រឹមឆ្នាំ២០២៧ ។ ធនាគារធំបំផុតទាំងបួនរបស់ប្រទេសនេះ បានបោះបង់ចោលនូវថ្លៃសេវាប្រតិបតិ្តការឌីជីថល ចាប់តាំងពីខែមេសាឆ្នាំមុនដើម្បីចាប់អតិថិជន៕

ជប៉ុនចាប់ផ្តើមពង្រីកឥទ្ធិពលទៅកាន់ពិភពលោកដោយក្លាយវិនិយោគនាំមុខគេ

June 13, 2019

0

ដោយ ដូណាល់ លី

ភ្នំពេញៈ ប្រទេសជប៉ុនបាននិងកំពុងចាប់ផ្តើមគ្របដណ្តប់អំណាចសេដ្ឋកិច្ចនៅលើពិភពលោក ដោយអ្នកវិនិយោគរបស់ប្រទេសនេះ បានក្លាយជាវិនិយោគិនឈានមុខគេទី១របស់ពិភពលោក។

នេះយោងតាមរបាយការណ៍វិនិយោគ របស់អង្គការសហប្រជាជាតិដែលបានចេញផ្សាយកាលពីម្សិលមិញបានឲ្យដឹងថា តាមរបាយការណ៍វិនិយោគពិភពលោករបស់អង្គការសហប្រជាជាតិឆ្នាំ២០១នេះ ជប៉ុនបានដឹកនាំប្រទេសទាំងអស់ នៅក្នុងការវិនិយោគខាងក្រៅ បន្ទាប់មកដោយប្រទេសចិន និងបារាំង។

ការវិនិយោគផ្ទាល់ពីបរទេសរបស់ជប៉ុន បានឈានដល់ជាង ១៤៣ពាន់លានដុល្លារនៅក្នុងឆ្នាំ២០១៨ ខណៈពេលដែលប្រទេសចិន បានឈានដល់ប្រមាណ ១៣០ពាន់លានដុល្លារ។

យោងតាមរបាយការណ៍របស់ធនាគារជាតិនៃកម្ពុជាបានឱ្យដឹងថា ការវិនិយោគផ្ទាល់ពីបរទេសនៅកម្ពុជាបានកើនឡើងជាង៣,១ពាន់លានដុល្លារក្នុងឆ្នាំ២០១៨។ តាមការត្រួតពិនិត្យហិរញ្ញវត្ថុស្ថិរភាពធនាគារជាតិនៃកម្ពុជាបានបង្ហាញថា ប្រទេសចិនមានចំនួន៤១,៣ភាគរយនៃការវិនិយោគផ្ទាល់ពីបរទេសទាំងអស់កាលពីឆ្នាំមុន។ ចំណាត់ថ្នាក់ទី ២ គឺកូរ៉េខាងត្បូងមាន ៨,១ ភាគរយ ខណៈពេលដែលការវិនិយោគរបស់ជប៉ុនកើនឡើង៦,៤ភាគរយ។

ធនាគារជាតិនៃកម្ពុជាបានឲ្យដឹងថា ការវិនិយោគទុនដោយផ្ទាល់ពីបរទេសភាគច្រើន បានធ្វើនៅក្នុងវិស័យសំណង់ និងរោងចក្រ៕

តើអាគារពាណិជ្ជកម្មពិភពលោកថ្មីនៅអាមេរិកមានសភាពដូចម្តេចក្រោយពេលអាគារចាស់ត្រូវបុកដួលរលំដោយភេវរករ

June 13, 2019

0

ដោយ : វុត្ថា

ភ្នំពេញ: ក្រោយការដួលរំលំនៃការបើកយន្តហោះបុក អាគារមជ្ឈមណ្ឌលពាណិជ្ជកម្មពិភពលោក នៅទីក្រុង New York កាលពីថ្ងៃទី១១ កញ្ញា ឆ្នាំ២០០១ វត្តមានអាគារមជ្ឈមណ្ឌលពាណិជ្ជកម្មពិភពលោកទី១ថ្មី នៅទីក្រុងនេះបានលេចឡើងក្នុងរូបភាពយ៉ាងដូចម្តេច ។

តើអាគារពាណិជ្ជកម្មពិភពលោកថ្មី ដែលមានឈ្មោះថាOne World Trade Center ដែលបានប្តូរឈ្មោះមកពីFreedom Tower ត្រូវបានសាងសង់ក្នុងទស្សនស្ថាបត្យកម្មយ៉ាងដូចម្តេច? គេហទំព័រPropertyarea.asia សូមនាំលោកអ្នកទៅស្វែងយល់ពីអាគារដ៏អស្ចារ្យមួយនេះដូចតទៅ។

មជ្ឈមណ្ឌលពាណិជ្ជកម្មពិភពលោកទី១ ,1WTC ឬអាគារសេរីភាព គឺជាអគារដ៏សំខាន់ បន្ទាប់ពីបានសាងសង់ឡើងវិញ ជំនួសអគារមជ្ឈមណ្ឌលពាណិជ្ជកម្មពិភពលោក (World Trade Center) នៅក្នុងតំបន់Lower Manhattan ក្នុងបុរីញូវយ៉ក សហរដ្ឋអាមេរិក។ វាជាអគារខ្ពស់ជាងគេបំផុតនៅអឌ្ឍគោលខាងលិច និងជាអគារខ្ពស់លំដាប់ទី៦ នៅលើពិភពលោក។

រចនាសម្ព័ន្ធនៃអគារនេះ មានទម្រង់ដូចគ្នាទៅនឹងអគារNorth Tower ដែលជាមជ្ឈមណ្ឌលពាណិជ្ជកម្មពិភពលោកដើម ដែលត្រូវបានបំផ្លាញនៅក្នុងការវាយប្រហារភេរវកម្មកាលពីថ្ងៃទី១១ ខែកញ្ញា ឆ្នាំ២០០១។

ស្ថាបត្យករគូរប្លង់អគារនេះ គឺលោក David Childs ដែលជាម្ចាស់ក្រុមហ៊ុន Skidmore Owings & Merrill (SOM) លោក David Childs ក៏បានរចនាគូរប្លងស្ថាប ត្យកម្មអគារ Burj Khalifa និងអគារWillis ផងដែរ។

អគារនេះបានក្លាយជាអគារខ្ពស់បំផុត នៅទីក្រុងញូវយ៉កនៅថ្ងៃទី៣០ ខែមេសា ឆ្នាំ២០១២ ដោយវ៉ាដាច់អគារខ្ពស់ជាងរបស់អង់គ្លេស (Empire State Building)។ អគារនេះបានសាងសង់បញ្ចប់នូវរចនាសម្ពន្ធនៅថ្ងៃទី៣០ ខែសីហាឆ្នាំ២០១២ ហើយកំពូលរបស់វាបញ្ចប់នៅថ្ងៃទី១០ ខែឧសភាឆ្នាំ២០១៣។
អាគារកប់ពពកនេះត្រូវបានដំឡើងកំពស់ ដែលធ្វើឱ្យអគារនេះរួមទាំងកំពស់របស់វាឡើងដល់កម្ពស់សរុប541 ម៉ែត្រឬ១៧៧៦ហ្វីត។

អគារមជ្ឈមណ្ឌលពាណិជ្ជកម្មពិភពលោក ដ៏មានឥទ្ធិពលនេះបានបើកដំណើរការជាផ្លូវការនៅថ្ងៃទី៣ ខែវិច្ឆិកា ឆ្នាំ ២០១៤។
នៅថ្ងៃទី២៦ខែមីនា ឆ្នាំ២០០៩ អាជ្ញាធរកំពង់ផែញូវយ៉ក និងញ៉ូវជឺស៊ី (PANYNJ)បានបញ្ជាក់ថាអាគារដ៏ខ្ពស់នេះនឹងដាក់ឈ្មោះជាផ្លូវការរបស់ខ្លួនគឺ “មជ្ឈមណ្ឌលពាណិជ្ជកម្មពិភពលោកមួយ” “One World Trade Center”ជាជាងឈ្មោះ “អគារសេរីភាព” “Freedom Tower”។

មជ្ឈមណ្ឌលពាណិជ្ជកម្មពិភពលោកថ្មីនេះ មានកំពស់១០៤ជាន់ ជាអគារស្តង់ដារខ្ពស់បំផុតរាប់ទាំងកំពូល ប៉ុន្ដែតាមពិតអគារនេះមានត្រឹមតែ៩៤ជាន់ប៉ុណ្ណោះ។

អគារមជ្ឈមណ្ឌលពាណិជ្ជកម្មពិភពលោកថ្មីនេះ នឹងរួមបញ្ចូលអគារការិយាល័យអាគារខ្ពស់ចំនួនប្រាំនៅតាមបណ្តោយផ្លូវ Greenwich Street ព្រមទាំងមានសារមន្ទីរជាតិអនុស្សាវរីយ៍ទី ១១កញ្ញា (National September 11 Memorial & Museum) ដែលស្ថិតនៅភាគខាងត្បូងនៃ អាគារOne World Trade Center ។

ការសាងសង់អគារថ្មីនេះ ជាផ្នែកមួយនៃកិច្ចខិតខំប្រឹងប្រែងដើម្បីរំលឹក និងកសាងឡើងវិញ បន្ទាប់ពីការបំផ្លិចបំផ្លាញនៃមជ្ឈមណ្ឌលពាណិជ្ជកម្មពិភពលោកដើម៕

រដ្ឋាភិបាលអនុញ្ញាតឱ្យរោចក្រផលិតស្ករគ្រាប់ និងនំគ្រប់ប្រភេទដំណើរការស្ថិត នៅស្រុកកណ្តាលស្ទឹង

June 13, 2019

0

ដោយៈ រ៉ាណេត

កណ្តាលៈ រដ្ឋាភិបាលបានអនុញ្ញាត្តឲ្យរោងចក្រផលិតស្ករគ្រាប់ និងនំគ្រប់ប្រភេទរបស់ក្រុមហ៊ុន អេស.ស៊ី ហ្វូដ មានទីតាំងស្ថិតនៅស្រុកកណ្តាលស្ទឹង ខេត្តកណ្តាលចាប់ផ្តើមសាងសង់។

បន្ទាប់ពីទទួលបានសិទ្ធិអនុញ្ញាត្ត តបតាមការស្នើសុំរបស់ក្រុមប្រឹក្សាអភិវឌ្ឍកម្ពុជា (CDC) និងឆ្លងកាត់កិច្ចពិភាក្សាស្ដីពី ផលប៉ះពាល់របស់អន្តរក្រសួង គម្រោងបង្កើតរោងចក្រផលិតស្ករគ្រាប់ និងនំគ្រប់ប្រភេទ ត្រូវបានកិច្ចប្រជុំអន្តរក្រសួង ដែលដឹកនាំដោយ លោក នេត្រ ភក្រា្ត រដ្ឋលេខាធិការក្រសួងបរិស្ថាន ធ្វើកាពិនិត្យនិងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) រួចរាល់ហើយ ក្រោមការសិក្សាលម្អិត និងរៀបចំរបាយការណ៍វាយតម្លៃហេតុប៉ះពាល់បរិស្ថាន ដោយក្រុមហ៊ុនទីប្រឹក្សា អ៊ី &អេ ខនសាល់ធេន។

ជាមួយនឹងការទទួលបានកិច្ចគាំទ្រពីសំណាក់អន្តរក្រសួង ក្រុមហ៊ុន អេស ស៊ី ហ្វូដ ដែលវិនិយោគលើគម្រោងបង្កើតរោងចក្រផលិតស្ករ និងនំគ្រប់ប្រភេទខាងលើនេះ ក៏ត្រូវតែគោរព និងអនុវត្តតាមគោលការណ៍៧ចំណុច ដូចជា ទី១. សូមគាំទ្រលើគម្រោងវិនិយោគរបស់ក្រុមហ៊ុន អេស.ស៊ី ហ្វ៊ូដ ។

ទី២.ក្រុមហ៊ុនត្រូវគ្រប់ គ្រងសំណល់រឹង-រាវ ឱ្យបានត្រឹមត្រូវ ដើម្បីចៀសវាងការប៉ះពាល់ដល់ប្រឡាយទឹក និងការរស់នៅរបស់ប្រជាពលរដ្ឋ។

ទី៣. ក្រុមហ៊ុនត្រូវគ្រប់គ្រងប្រេងខ្លាញ់ដែលប្រើប្រាស់រួច ត្រូវសហការជាមួយក្រុមហ៊ុនប្រមូលទិញត្រឹមត្រូវ ។

ទី៤.ក្រុមហ៊ុនត្រូវរៀបចំធុងសំរាមសម្រាប់អាជីករលក់ដូរមុខរោងចក្រ និងក្រុមហ៊ុនត្រូវសហការជាមួយអាជ្ញាធរមន្ទីរបរិស្ថានអប់រំដល់អាជីករលក់ដូរអំពីការគ្រប់គ្រង់សំរាម។

ទី៥.ក្រុមហ៊ុនត្រូវមានជម្រើសទីតាំងឡចំហាយនៅទីកន្លែងសុវត្ថិភាព ឆ្ងាយពីលំនៅឋានរបស់ប្រជាពលរដ្ឋ។

ទី៦.លើកទឹកចិត្តឱ្យក្រុមហ៊ុនប្រើប្រាស់វត្ថុធាតុដើមដែលមាននៅក្នុងស្រុក (ម្សៅដំឡូងមី ស្ករស ប្រេងដូង ជាដើម) និងទី៧. ក្រុមហ៊ុនត្រូវទទួលយកមតិយោបល់របស់អង្គប្រជុំដើម្បីបញ្ចូលមតិគ្រប់ភាគីពាក់ព័ន្ធ។ គម្រោងបង្កើតរោងចក្រ ផលិតស្ករគ្រាប់ និងនំគ្រប់ប្រភេទ ស្ថិតលើផ្ទៃដីទំហំ ៦៥.១៤៩ ម៉ែត្រក្រឡា ដែលមានទីតាំងស្ថិតនៅក្នុងភូមិសាស្រ្តភូមិប្រឡាយ ឃុំបឹងខ្យាង ស្រុកកណ្តាលស្ទឹង ខេត្តកណ្តាល៕

រដ្ឋាករទឹកស្វយ័តរាជធានីភ្នំពេញ នឹងសាងសង់រោងចក្រទឹកស្អាតចំនួន៣បន្ថែម

June 13, 2019

0

ដោយ ៖ រ៉ាណេត

ភ្នំពេញ ៖ ជាការសម្រួល និងបង្កើនការផ្គត់ផ្គង់ដល់តម្រូវការនៃការប្រើប្រាស់ទឹកស្អាតរបស់ប្រជាពលរដ្ឋទូទាំងរាជធានីភ្នំពេញ រដ្ឋាករទឹកស្វយ័តបានសម្រេចសាងសង់រោងចក្រផលិតទឹកស្អាតចំនួន៣បន្ថែមទៀត ដែលនឹងចាប់អនុវត្តគម្រោងនៅត្រឹមខែតុលា ឆ្នាំ២០១៩ខាងមុខនេះ ។

រោងចក្រប្រព្រឹត្តិកម្មទឹកស្អាតចំនួន៣ ដែលស្ថិតនៅក្នុងគម្រោងប្លង់មេរបស់រដ្ឋាករទឹកស្វយ័តរាជធានីភ្នំពេញដែលគ្រោងនឹងដំណើរការសាងសង់ខាងលើនេះ មានទីតាំងស្ថិតនៅក្នុងសង្កាត់បាក់ខែងចំនួន ២ គម្រោង និង ១ គម្រោងទៀតមានទីតាំងស្ថិតនៅក្នុងក្រុងតាខ្មៅ ដោយរោងចក្រទាំង ៣ នេះ អាចមានលទ្ធភាពផលិតទឹកស្អាតបានរហូតដល់ទៅប្រមាណ ៤២០,០០០ម៉ែត្រគូបក្នុងមួយថ្ងៃ។

អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុ សុថា បានមានប្រសាសន៍ថា ពេលនេះក្រុមមន្ត្រីជំនាញកំពុងតែធ្វើការសិក្សាយ៉ាងលម្អិតដើម្បីធ្វើយ៉ាងណាជម្រុញដំណើរការសាងសង់ឱ្យទាន់ទៅតាមគម្រោងផែនការដែលបានកំណត់ ។

លោកបានមានប្រសាសន៍ទៀតថា ៖ “ការសាងសង់រោងចក្រប្រព្រឹត្តិកម្មទឹកស្អាតទាំងនេះគឺដើម្បីដោះស្រាយបញ្ហាដែលកំពុងប្រឈម និងបំពេញទៅតាមតម្រូវការប្រើប្រាស់ជាក់ស្ដែងរបស់បងប្អូនប្រជាពលរដ្ឋ ជាពិសេសនៅក្នុងរាជធានីភ្នំពេញ”។

លោកបានមានប្រសាសន៍ទៀតថា ៖ “បច្ចុប្បន្ននេះយើងមានរោងចក្ររដ្ឋាករទឹកស្អាតរាជធានីភ្នំពេញ រោងចក្រផលិតទឹកស្អាតនៅក្នុងសង្កាត់ជ្រោយចង្វារ រោងចក្រទឹកស្អាតក្នុងខណ្ឌចំការមន និងរោងចក្រផលិតទឹកស្អាតនៅក្នុងសង្កាត់និរោធន៍ ខណ្ឌច្បារអំពៅ”។

លោកបានបន្តទៀតថា ៖ “ដោយសារតែតម្រូវការនៃការប្រើប្រាស់ទឹកស្អាតនៅក្នុងរាជធានីភ្នំពេញបានកើនឡើងយ៉ាងគំហុក រោងចក្រផលិតទឹកស្អាតទាំង៤ទីតាំងខាងលើនេះ មិនអាចមានលទ្ធភាពផ្គត់ផ្គង់គ្រប់គ្រាន់នោះទេ ដែលតម្រូវឱ្យមានការសង់រោងចក្របន្ថែមទៀត” ។

នៅក្នុងដំណើរការនៃការសាងសង់រោងចក្រប្រព្រឹត្តិកម្មទឹកស្អាតទាំង៣ខាងលើនេះ ត្រូវបានបែងចែកចេញជាដំណាក់កាល។ នៅក្នុងគម្រោងប្លង់មេរបស់រដ្ឋាករទឹកស្វយ័តរាជធានីភ្នំពេញ ជាជំហានដំបូងរោងចក្រស្ថិតនៅក្នុងសង្កាត់បាក់ខែងនឹងត្រូវចាប់ផ្តើមសាងសង់នៅត្រឹមខែតុលា ឆ្នាំ២០១៩ខាងមុខ និងគ្រោងបញ្ចប់នៅត្រឹមឆ្នាំ២០២២ ជាមួយនឹងលទ្ធភាពអាចផលិតទឹកស្អាតបានចំនួន១៩៥,០០០ម៉ែត្រគូបក្នុងមួយថ្ងៃ។

ជំហានទី២ ដែលស្ថិតនៅទីតាំងដដែលនេះ នឹងគ្រោងសាងសង់នៅឆ្នាំ២០២២ ហើយបញ្ចប់ការសាងសង់នៅត្រឹមឆ្នាំ២០១៤ ដែលមានលទ្ធភាពផលិតទឹកស្អាតបានចំនួន ១៩៥,០០០ម៉ែត្រគូបក្នុងមួយថ្ងៃដូចគ្នា។ ដោយឡែកចំពោះរោងចក្រផលិតទឹកស្អាតដែលស្ថិតនៅក្រុងតាខ្មៅ នឹងត្រូវសាងសង់នៅត្រឹមឆ្នាំ២០២២ ហើយបញ្ចប់នៅត្រឹមឆ្នាំ២០២៤ដូចគ្នា ប៉ុន្តែមានលទ្ធភាពអាចផលិតទឹកស្អាតបានចំនួន ៣០,០០០ម៉ែត្រគូបក្នុងមួយថ្ងៃ។

យ៉ាងណាក៏ដោយ ជាមួយនឹងគម្រោងនៃការសាងសង់រោងចក្រផលិតទឹកស្អាតទាំង៣ខាងលើនេះ ក្រៅពីអាចផ្គត់ផ្គង់ទៅតាមតម្រូវការប្រើប្រាស់គ្រប់គ្រាន់ គឺអាចនឹងមានការបញ្ចុះតម្លៃបានមួយកម្រិតទៀតផងដែរ ខណៈដែលពេលបច្ចុប្បន្នតម្លៃទឹកស្អាតហាក់នៅមានកម្រិតខ្ពស់នៅឡើយ ៕

ស្ថានីយ៍ប្រព្រឹត្តិកម្មទឹកកខ្វក់តម្លៃ៦៤លានដុល្លារនៅក្រុងតាខ្មៅចាប់ផ្តើមដំណើរការសាងសង់

June 13, 2019

0

ដោយ គង់ សូរិយា

ភ្នំពេញៈ ស្ថានីយ៍ប្រព្រឹត្តិកម្មទឹកកខ្វក់តម្លៃ៦៤លានដុល្លារអាមេរិក ដែលជាហិរញ្ញប្បទានឥណទានរបស់ធនាគារនីហរ័ណ អហរ័ណនៅក្រុងតាខ្មៅ ខេត្តកណ្តាលបានចាប់ផ្តើមដំណើរការសាងសង់ហើយ។

លោកស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានដឹកនាំក្រុមការងារក្រសួងចុះពិនិត្យវឌ្ឍនភាព នៃការសាងសង់ស្ថានីយប្រព្រឹត្តិកម្មទឹកកខ្វក់ ស្ថានីយបូមទឹកកខ្វក់ ការតបណ្ដាញលូ និងការស្ដារគំរោងនេះកាលពីថ្ងៃទី១២ មិថុនាកន្លងមកនេះ។

ការស្ថាបនាស្ថានីយប្រព្រឹត្តិកម្មទឹកកខ្វក់ ស្ថានីយបូមទឹក ការតបណ្ដាញលូពីផ្ទះប្រជាពលរដ្ឋ និងការស្ដារស្ទឹងនេះ ធ្វើឡើងក្រោមគម្រោងកម្ចីឥណទានសម្បទានរបស់ធនាគារនីហរ័ណ អាហរ័ណកូរ៉េ នូវទឹកប្រាក់ប្រមាណ៦៤លានដុល្លារអាមេរិក ក្នុងគោលបំណងដើម្បីរក្សាបាននូវសុខុមាលភាពរបស់ប្រជាពលរដ្ឋ អនាម័យល្អ បរិស្ថានស្រស់បំព្រង ការពារទឹកជំនន់ និងការទាក់ទាញភ្ញៀវទេសចរ ក៏ដូចជាវិនិយោគិនជាតិ និងអន្តរជាតិ។

អាងប្រព្រឹត្តិកម្មទឹកកខ្វក់នេះ មានសមត្ថភាពចម្រោះទឹកកខ្វក់បានចំណុះ៧៦០០ម៣/ថ្ងៃ ចំណែកឯស្ថានីយបូមទឹកកខ្វក់ទាំង១០ ទីតាំងមានសមត្ថភាពបូមបាន២៩៩៥២ម៣/ថ្ងៃ។

លោកទេសរដ្ឋមន្ត្រីស៊ុន ចាន់ថុលបានគូសបញ្ជាក់ថា កំណើនសេដ្ឋកិច្ចរបស់កម្ពុជាប្រចាំឆ្នាំ ប្រកបដោយស្ថេរភាព និងរឹងមាំ បានធ្វើឱ្យប្រជាពលរដ្ឋមានជីវភាពធូរធា ដែលជាកត្តាជំរុញឱ្យតម្រូវការប្រើប្រាស់ទឹក ក៏ដូចសម្ភារៈផ្សេងៗមានការកើនឡើង ព្រមទាំងធ្វើឱ្យមានការហូរចូលនូវវិនិយោគចម្រុះរួមមាន ការសាងសង់អគារខុនដូ រមណីយដ្ឋាន និងអគារពាណិជ្ជកម្ម ព្រមទាំងរោងចក្រកាត់ដេរជាច្រើន នៅក្រុងតាខ្មៅ ខេត្តកណ្ដាល ដែលធ្វើឱ្យបរិមាណទឹកកខ្វក់មានការកើនឡើងផងដែរ៕

ខ្លីៗសម្រាប់អ្នកចង់ទិញដីទុកលក់បន្តយកចំណេញ

June 13, 2019

0

Photo-Bong-Hour - Copy — នាយិកាក្រុមហ៊ុនអចលនទ្រព្យ AMATAK Property Service និងជាអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកស្រីតាំង ហួរ។ រូបថត៖ សហការី

ដោយៈ រ៉ាណេត

ភ្នំពេញៈ បច្ចុប្បន្ននេះមានមនុស្សជាច្រើន បានងាកមកចាប់អារម្មណ៍ជាមួយនឹងវិស័យអចលនទ្រព្យ ជាពិសេសការទិញដីទុកលក់បន្តយកចំណេញ មិនថាតែចំពោះប្រភេទដីឡូតិ៍ ប្រភេទដីភូមិ ស្ទើរគ្រប់សណ្ឋាន។ ប៉ុន្តែក្នុងចំណោមអ្នកទាំងនោះ អ្នកខ្លះក៏ជោគជ័យដូចការគ្រោងទុក ហើយអ្នកខ្លះទៀតក៏បរាជ័យ។

អ្នកជំនាញនៅក្នុងវិស័យអចលនទ្រព្យ ដែលមានបទពិសោធន៍ខ្ពស់ក្នុងការទិញ លក់ និងជួលអ្នកចលនទ្រព្យគ្រប់ប្រភេទបានប្រាប់ឱ្យដឹងថា ការទិញ-លក់អចលនទ្រព្យ ដើម្បីទទួលបានជោគជ័យ និងអាចលក់ដាច់បានឆាប់រហ័ស មិនមែនជារឿងងាយស្រួលនោះឡើយ ប្រសិនជាអ្នកគ្មានចំណេះដឹង និងជំនាញច្បាស់លាស់។

;អគ្គនាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ថា មុនពេលទិញដី ឬរកដីសម្រាប់អតិថិជន យើងត្រូវសិក្សាលើចំណុចសំខាន់ៗមួយចំនួន ដើម្បីធ្វើជាបង្អែកកុំឱ្យជួបការខាតបង់។ លោកស្រីបានប្រាប់ឱ្យដឹងទៀតថា ចំណុចទាំងអស់នោះរួមមាន ទី១ ត្រូវសិក្សាពីចំណង់ចំណូលចិត្តរបស់ភ្ញៀវ ថាតើភ្ញៀវត្រូវការដីបែបណា? ទី២ ត្រូវសិក្សាពីមូលធនរបស់ភ្ញៀវថាមានទឹកប្រាក់ប៉ុន្មានពិតប្រាកដ ទី៣ តើភ្ញៀវត្រូវការដីប្រភេទណា ជាដីសាងសង់លំនៅដ្ឋាន ដីសម្រាប់សាងសង់ខុនដូ ឬមជ្ឈមណ្ឌលពាណិជ្ជកម្ម? ទី៤ ត្រូវរកភាពជាអ្នកតំណាង ឬធ្វើជាតំណាងអ្នកទិញឬលក់ផ្តាច់មុខជូនអតិថិជន ឬអ្នកទិញ។

លោកស្រីតាំង ហួរ បានបន្ថែមថា តាមធម្មតាអ្នកទិញតែងតែចង់បានអចលនទ្រព្យ ឬទំនិញមានតម្លៃទាបជាងទីផ្សារ ប៉ុន្តែទោះជាយ៉ាងណាយើង ដែលជាអ្នកទិញក៏ត្រូវមានជំនាញក្នុងការនិយាយអន្ទងចិត្តម្ចាស់អចលនទ្រព្យ ឬម្ចាស់ដីឱ្យគាំទ្រនូវការចរចារបស់យើងដែរ។ លោកស្រីបន្តថា ពេលខ្លះយើងធ្វើជាអ្នកលក់ ឬភ្នាក់ងារអចលនវត្ថុ ត្រូវមានចិត្តធ្ងន់ និងអត់ធ្មត់ដូចព្រះអញ្ចឹង ហើយធ្វើសំខាន់ដើម្បីធ្វើការងារឲ្យបានជោគជ័យ យើងក៏ត្រូវមានការរៀបចំឯកសារលិខិតស្នាមជាច្រើន ដើម្បីចងចិត្តម្ចាស់ដីឬម្ចាស់អចលនទ្រព្យនានាជាមុន ដើម្បីកុំឲ្យពួកគេផ្លាស់ប្តូរចិត្តត្រលប់ជាមិនលក់វិញ។

លោកស្រីបានបន្តថា “ម្ចាស់អចលនទ្រព្យមួយចំនួនតូច ងាយប្រែក្រឡាស់ណាស់ ដូច្នេះបើយើងដឹងច្បាស់ថា ដីដែលយើងចង់ទិញនោះមានស្ថានភាពល្អ និងមានតម្លៃទាបជាងទីផ្សារ ដែលអាចមានឱកាសចំណេញបានច្រើន នៅពេលលក់ចេញវិញ គឺត្រូវតែមានការសម្រេចចិត្តភ្លាមៗ ជៀសវាងបង្អូសពេលវេលានាំឱ្យច្បាស់ដី មានភាពធុញទ្រាន់ ហើយផ្អាកការលក់វិញ”៕

តើការវិនិយោគអចលនទ្រព្យបែបណាដើម្បីកុំឲ្យវាក្លាយជាបំណុល

June 13, 2019

0

ដោយ គង់ សូរិយា

ភ្នំពេញៈ ការវិនិយោគលើវិស័យអចលនទ្រព្យ អាចជួបនូវហានិភ័យជាច្រើន ប្រសិនជាការវិនិយោគនោះមិនមានគោលដៅ និងចំណេះដឹងច្បាស់លាស់ ហេតុនេះតើអចលនទ្រព្យបែបណាជាទ្រព្យ និងអចលនទ្រព្យបែបណាជាបំណុល?។

ប្រធានសមាគមអ្នកជំនាញអចលនទ្រព្យកម្ពុជាលោកជឃាង ពុទ្ឋីបានមានប្រសាសន៍ឲ្យដឹងថា ការវិនិយោគអចលនទ្រព្យដែលមិនត្រឹមត្រូវ នឹងធ្វើឲ្យយើងក្លាយជាអ្នកក្រលឿន និងជាប់គុននឹងបំណុល ហេតុនេះយើងគួរស៊ូជាមួយការធ្វើអ្នកមានយឺតៗ ជាជាងធ្វើអ្នកក្រឆាប់រហ័ស។

លោកបន្តថា “ការវិនិយោគអចលនទ្រព្យ ដែលទទួលបានផលត្រលប់មកវិញចាប់ពី០,៧ភាគរយឡើងក្នុងមួយខែ អចលនទ្រព្យនោះជាទ្រព្យ ប៉ុន្តែបើការទាញលុយត្រលប់់ពីការវិនិយោគបានក្រោម០,៧ភាគរយក្នុងមួយខែ វានឹងជាបំណុល”។

ឧទាហរណ៍បើទិញផ្ទះឬខុនដូតម្លៃ២០ម៉ឺនដុល្លារអាមេរិក បើសិនជាអាចជួលបានក្នុងតម្លៃ ១៤០០ដុល្លារក្នុងមួយខែ វាជាការវិនិយោគត្រឹមត្រូវ ឬមិនមែនជាទ្រព្យបំណល។

លោកឃាង ពុទ្ឋីបានបន្តថា ហេតុនេះការសិក្សាព៌តមានឲ្យបានច្បាស់លាស់ និងគ្រប់ជ្រុងជ្រោយ ពិតជាមានសារៈសំខាន់ណាស់ មុននឹងចាប់ផ្តើមវិនិយោគដោយលុយខ្លួនឯង ឬប្រើប្រាស់លុយរបស់ធនាគារនានា។លោកបន្តថា បើសិនជាធនាគារនៅកម្ពុជាមានអត្រាការប្រាក់ត្រឹម៣ទៅ៤ភាគរយក្នុងមួយឆ្នាំ ហើយស្ថានភាពអចលនទ្រព្យបែបនេះ វានឹងរួមចំណែកច្រើនណាស់ដល់ការអភិវឌ្ឍប្រទេសរបស់យើង។

លោកបន្តថា “នៅពេលធនាគារធំៗចូលមកកាន់តែច្រើន នឹងធ្វើឲ្យការប្រកួតប្រជែងកើនឡើង ហើយអត្រាការប្រាក់នឹងធ្លាក់ចុះ ប៉ុន្តែស្ថានភាពអត្រាការប្រាក់បច្ចុប្បន្នយើងមិនអាចយកប្រាក់ពីធនាគារទាំងស្រុង ដោយគ្មានចរន្តលំហូរសាច់ប្រាក់ច្បាស់លាស់យកមកប្រើប្រាស់បានឡើយ៕

កំណើនស្ថាប័នហិរញ្ញវត្ថុកំពុងរួមចំណែកដល់ការអភិវឌ្ឍសេដ្ឋកិច្ចជាតិ

June 13, 2019

0

ដោយ ម៉ាណេត

ភ្នំពេញៈ កំណើននៃការវិនិយោគក្នុងវិស័យធនាគារ និងស្ថាប័នមីក្រូហិរញ្ញវត្ថុនៅកម្ពុជាជាមួយនឹងការពង្រីកទីផ្សារហិរញ្ញវត្ថុ ដែលឲ្យមានប្រកួតប្រជែងនៅក្នុងទីផ្សារនឹងធ្វើឲ្យសេដ្ឋកិច្ចជាតិកាន់តែមានការរីកចំរើនបន្ថែម ខណៈការប្រកួតប្រជែងនេះបាន និងកំពុងធ្វើឲ្យប្រជាជនពលរដ្ឋមានភាពងាយស្រួល ក្នុងការទទួលបានសេវាហិរញ្ញវត្ថុ។

លោកបណ្ឌិតប៊ុន មុន្នី អនុប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១២ មិថុនាកន្លងមកបានឲ្យដឹងថា វិស័យវត្ថុមានការរីកចំរើន ហើយការចូលមករបស់ចំណូលថ្មី នឹងចូលរួមបន្ថែមក្នុងការអភិវឌ្ឍន៍សេដ្ឋកិច្ច។

លោកបានឲ្យដឹងថា “វារឿងល្អមួយសម្រាប់អ្នកវិនិយោគទុន ចូលមកនៅក្នុងប្រទេសជាតិរបស់យើងធ្វើឲ្យមានការរីកចំរើន និងមានការផ្លាស់ប្តូរជាបន្តបន្ទាប់ ហើយចំពោះការចូលមករបស់អ្នកចំណូលថ្មី ដូចជាមកពី តៃវ៉ាន់ និងកូរ៉េ ជារឿងមួយសម្រាប់ទីផ្សារហិរញ្ញវត្ថុនៅកម្ពុជាយើង”។លោកបន្តថា “ទោះបីជាយើងឃើញមានការប្រកួតប្រជែងកាន់តែខ្លាំងដែលជារឿងមួយ ចូលដល់ក្នុងរបត់មួយជាមួយការផ្លាស់ប្តូរ ដែលយើងគិតថា ទីផ្សារស្រុកខ្មែរយើងមានការអភិវឌ្ឍន៍មកដល់ចំណុចនេះ ហើយប្រជាពលរដ្ឋយើងមានជម្រើសច្រើនក្នុងជ្រើសរើសយកធនាគារ ឬគ្រឹះស្ថានមីក្រូហិរញ្ញវត្ថុ ដើម្បីធ្វើការខ្ចីលុយ និងធ្វើការរកស៊ីជាមួយគ្នា”។

លោកបណ្ឌិតបានបន្ថែមថា ប្រជាពលរដ្ឋអាចមានជម្រើសច្រើន ហើយកត្តាមួយដែលល្អគឺថា បើទោះបីមានអ្នកប្រកួតប្រជែងច្រើន ប៉ុន្តែវានឹងមានការផ្លាស់ប្តូរ សេដ្ឋកិច្ចយើងនឹងមានការវិវត្តន៍ឈានឡើងបន្តបន្ទាប់ទៀត។

លោកឲ្យដឹងទៀតថា “ទោះជាយ៉ាងណានៅតែមានការភន់ច្រឡំថា ពីមុនអត់ការជំពាក់លុយគេ ប៉ុន្តែសព្វថ្ងៃយើងជំពាក់លុយគេ។ សួរថាតើការជំពាក់លុយមានន័យថាយ៉ាងម៉េច? ខ្ញុំចង់ប្រាប់ថា ធនគារ និងគ្រឹះស្ថានហិរញ្ញវត្ថុមើលពីស្ថានភាពអ្នកខ្ចីខ្លាំងណាស់ ដូច្នេះវាមិនមានហានិភ័យអីនោះទេ វាលែងតែហានិភ័យកើតឡើងជាយថាហេតុ ហើយប្រាក់កម្ចីទាំងអស់នោះឯងដែលធ្វើឲ្យមានជីវភាពផ្លាស់ប្តូរ”។

ក្រុមហ៊ុនហិរញ្ញវត្ថុធំៗមកពីកូរ៉េខាងត្បូង តៃវ៉ាន់ ចិន កាណាដា និងបារាំងជាដើម បាន និងកំពុងពង្រីកវត្តមានរបស់ខ្លួននៅកម្ពុជា ដោយផ្តល់សេវាហិរញ្ញវត្ថុខុសៗគ្នាដល់អតិថិជន។

លោក Askhat Azhikhanov នាយកប្រតិបត្តិធនាគារ ABA បានថ្លែងក្នុងរបាយការណ៍ហិរញ្ញវត្ថុប្រចាំឆ្នាំរបស់ខ្លួនកាលពីពេលថ្មីៗនេះថា ;; យើងនឹងបន្តបើកសាខាជាច្រើនទៀត ដើម្បីបង្កើនមូលដ្ឋានអតិថិជនរបស់យើង និងបម្រើសេវាជូនដល់អតិថិជនកាន់តែច្រើនថែមទៀត។

លោកបន្ថែមថា “យើងមានផែនការបោះទីតាំងក្នុងខេត្តថ្មីៗចំនួនពីរទៀត ព្រមទាំងពង្រឹងតំណែងរបស់យើង នៅតាមតំបន់ដែលយើងមានប្រតិបត្តិ ការប្រកបដោយភាពជោគជ័យរួចហើយ”។

លោក Shin Chang Moo ប្រធានក្រុមហ៊ុន PPCBank បានមានប្រសាសន៍ថា “សក្ដានុពលនៃវិស័យធនាគារ និងសេដ្ឋកិច្ចរបស់កម្ពុជា គឺមានភាពទាក់ទាញចំពោះក្រុមហ៊ុនហិរញ្ញវត្ថុកូរ៉េ”។លោកបន្តថា “កម្ពុជានៅមានកន្លែងជាច្រើន ដើម្បីរីកចម្រើននៅក្នុងវិស័យនេះ ហើយក្រុមហ៊ុនកូរ៉េមិនចាំបាច់ប្រកួតប្រជែង ជាមួយធនាគារផ្សេងទៀតទេ”។

លោកបន្ថែមថា “យើងអាចចូលរួមក្នុងទីផ្សារដើម្បីរីកលូតលាស់ទាំងអស់គ្នា”។

ក្រុមហ៊ុន JB Financial Group Co Ltd មានមូលដ្ឋាននៅទីខេត្ត Jeonju ប្រទេសកូរ៉េខាងត្បូង និងជាខេត្តតូចមួយនៅក្នុងតំបន់ភាគខាងត្បូង នៃប្រទេសកូរ៉េខាងត្បូង។

លោក Shin Chang Moo បានឱ្យដឹងថា ក្រុមហ៊ុនបានបង្កើតវត្តមាននៅកម្ពុជា ដោយសារគ្មានឱកាសក្នុងពង្រីកខ្លួន នៅក្នុងវិស័យហិរញ្ញវត្ថុនៅប្រទេសខ្លួន ដែលមានអ្នកប្រកួតប្រជែងច្រើននៅទីនោះ។លោកពន្យល់ថា ក្រុមហ៊ុន JB Financial Group មានមូលដ្ឋានទីតាំតូចបំផុងមួយនៅក្នុងប្រទេសកូរ៉េ។ ពួកគេគឺតូចជាងដៃគូប្រកួតប្រជែងរបស់ពួកគេ ដូច្នេះពួកគេចង់ស្វែងរកលទ្ធភាពពង្រីកទីផ្សារថ្មី។

ទំហំឥណទានលក្ខណៈបុគ្គល បានកើនឡើងដល់៦.៧០ពាន់ដុលា្លរកើនឡើង៧.៤៥ ភាគរយក្នុងត្រីមាសទី១ឆ្នាំ២០១៩នេះ ប្រៀបធៀបទៅនឹងត្រីមាសដូចគ្នាកាលពីឆ្នាំមុន។ នេះបើយោងតាមទិន្នន័យចុងក្រោយរបស់ការិយាល័យឥណទានកម្ពុជា។

ការស្នើសុំឥណទានលក្ខណៈបុគ្គល បានបង្ហាញអំពីបំណងរបស់អ្នកប្រើប្រាស់ក្នុងការទទួលបានឥណទាន ក្នុងលក្ខណៈជាហិរញ្ញវត្ថុផ្ទាល់ខ្លួន ប័ណ្ណឥណទាន និងកម្ចីអចលនទ្រព្យ៕

សភាពាណិជ្ជកម្មពិភាក្សាពីការកាត់បន្ថយក្រដាសស្នាមក្នុងនាមជាប្រទេសអភិវឌ្ឍន៍តិចតួច

June 12, 2019

0

ដោយ នៅ វឌ្ឈនា

ភ្នំពេញៈ សភាពាណិជ្ជកម្ពុជា សហការជាមួយ UN ESCSAP ដើម្បីពិភាក្សាស្តីពីការសម្របសម្រួលពាណិជ្ជកម្ម តាមរយៈការកាត់បន្ថយក្រដាសស្នាម ក្នុងនាមជាប្រទេសអភិវឌ្ឍន៍តិចតួច។

កិច្ចប្រជុំពិភាក្សាពិភាក្សាការងារស្តីពី “ការសម្រួលពាណិជ្ជកម្មឆ្លងព្រំដែនដោយមិនចាំបាច់ប្រើប្រាស់ក្រដាសស្នាមក្នុងប្រទេសអភិវឌ្ឍន៍តិចតួច” “Facilitation Cross-Border Paperless Trade in LDCs for Regional Integration and Sustainable Development (Phase ១)។

លោកឧកញ៉ាលឹម ហេង អនុប្រធានសភាពាណិជ្ជកម្មកម្ពុជាបានទទួលជួបពិភាក្សាការងារជាមួយនិងមន្រ្តីបេសកកម្ម UN-ESCAP ស្តីពី “ការសម្រួលពាណិជ្ជកម្មឆ្លងព្រំដែនដោយមិនចាំបាច់ប្រើប្រាស់ក្រដាសស្នាមក្នុ ងប្រទេសអភិវឌ្ឍន៍តិចតួច” “Facilitation Cross-Border Paperless Trade in LDCs for Regional Integration and Sustainable Development (Phase 1)” ដែលគម្រោងនេះត្រូវបានផ្តួចផ្តើមដោយ UN-ESCAP និង EIF។ គម្រោងនេះ ក៏បាននឹងកំពុងអនុវត្តនៅបណ្តាប្រទេសមួយចំនួនទៀតរួមមាន ប្រទេស Nepal ប្រទេស Bangladesh និងប្រទេស Timor-Leste។

លោកបន្តថា ដើម្បីធ្វើអោយការផ្តួចផ្តើមនៃការអនុវត្តគម្រោងចាប់ផ្តើម UN-ESCAP បានចាត់តាំងមន្រ្តីបេសកកម្មរបស់ខ្លួន ដើម្បីចុះសិក្សាវាយតម្លៃសម្រាប់ការត្រៀមខ្លួនរបស់ប្រទេសកម្ពុជាទាក់ទងកិច្ចការផ្លូវច្បាប់ និងបច្ចេកទេសដែលមានស្រាប់ក្នុងការធ្វើពាណិជ្ជកម្មឆ្លងព្រំដែនដោយមិនចាំបាច់ប្រើប្រាស់ក្រដាសស្នាម។ លោកឧកញ៉ា បានឆ្លើយតប នឹងគាំទ្រគម្រោងសិក្សានេះ ហើយបានផ្តល់ធាតុចូល និងចែករំលែកអនុសាសន៍សំខាន់ៗតំណាងផ្នែកឯកជន ដែលពាក់ព័ន្ធនឹងគម្រោងនេះផងដែ។

លោកបន្តទៀតថា “ការបំពេញបែបបទឯកសារក្រដាសស្នាមច្រើន ដំណាក់ការ វាជាឧបសគ្គ និងជាផលលំបាកមួយសម្រាប់ក្រុមហ៊ុនតូចៗ ជាពិសេសអាចប៉ះពាល់ដល់វិស័យពាណិជ្ជកម្ម នៃប្រទេសដែលកំពុងតែមានការអភិវឌ្ឍតិចតួច”។ លោកឧកញ៉ាបន្តទៀតថា “នៅពេលដែលលុបបំបាត់នូវគោលការបំពេញក្រដាសស្នាមច្រើន ទម្រង់ច្រើនតំណាក់កាល វានឹងកាត់បន្ថយពេលវេលា និងចូលរួមសម្រួលដល់ការធ្វើពាណិជ្ជកម្ម ក៏ដូចជាជួយលើកទឹកចិត្តដល់បណ្តាអ្នកវិនិយោគផងដែរ”៕