ដោយ រ៉ាណេត
កំពង់ឆ្នាំង៖ កំពង់ឆ្នាំង ជាខេត្តមួយដែលស្ថិតនៅភាគកណ្តាល នៃប្រទេសកម្ពុជា និងមានចម្ងាយ៩១គីឡូម៉ែត្រពីរាជធានីភ្នំពេញ ខេត្តនេះមានខេត្តចំនួន៤នៅហ៊ុំព័ទជុំវិញ ខាងកើតជាប់ខេត្តកំពង់ចាម ខាងជើងជាប់ខេត្តកំពង់ធំ ខាងលិចជាប់ខេត្តពោធិ៍សាត់ ហើយខាងត្បូងមានព្រំប្រទល់ជាប់ខេត្តកំពង់ស្ពឺ និងមានកេរ្តិ៍ឈ្មោះល្បីល្បាញតាមរយៈសិប្បកម្មស្មូន ក្អម ថូ និងឆ្នាំងដី ដោយដៃយ៉ាងល្អវិចិត្រ។
ខេត្តដែលជាប់ជាមួយសាវតារឿងព្រេងភ្នំនាងកង្រីនេះ មានផ្ទៃដី៥៥២,១០០ហិកតា និងមានក្រុងចំនួន១ ស្រុកចំនួន៧ ឃុំចំនួន៦៩ និង៥៦៥ភូមិ។ នៅក្នុងខេត្តកំពង់ឆ្នាំង ក្រៅពីមានភាពល្បីល្បាញផ្សារភ្ជាប់ប្រវត្តិសាស្ត្រនៃបន្ទាយលង្វែក ស្ថិតនៅក្នុងស្រុកកំពង់ត្រឡាច ដែលជាអតីតរាជធានីរបស់ខ្មែរកាលពីសតវត្សរ៍ទី១៥នោះ ខេត្តមួយនេះក៏មានតំបន់ទេសចរណ៍កម្សន្តជាច្រើនកន្លែង ដែលក្នុងនោះរួមមានតំបន់ប្រាសាទបុរាណចំនួន១១ តំបន់ភ្នំចំនួន១១ ទីប្រជុំជនផ្សារចំនួន១៥ និងវត្តអារាមចំនួន២៩។
តំបន់ដែលទាក់ទាញភ្ញៀវទេសចរច្រើនជាងគេ គឺតំបន់ភូមិបណ្ដែតទឹកចំនួន២ ស្ថិតនៅលើផ្ទៃទន្លេសាបដ៏ធំល្វឹងល្វើយ ដែលបច្ចុប្បន្នគ្រប់គ្រងដោយ លោកឈួរ ចាន់ឌឿន ជាអភិបាលនៃគណៈអភិបាលខេត្តនាពេលបច្ចុប្បន្ននេះ។ ជាមួយនឹងភាពល្បីល្បាញ ខេត្តកំពង់ឆ្នាំងក៏មានបទចម្រៀងជាច្រើនបទ ដែលត្រូវបានអ្នកនិពន្ធតាក់តែងឡើង ដើម្បីបង្អួតពីសម្រស់ដ៏ត្រកាលនៃតំបន់នានា ដែលក្នុងនោះរួមមានដូចជាបទ កំពង់ឆ្នាំងដែលខ្ញុំស្រមៃ កំពង់ឆ្នាំងជាស្រុកកំណើត ចំប៉ាផ្សារលើ រំដួលលង្វែក ផ្នូរនាងកង្រី ពង្រស្វាយជ្រុំ បុប្ផាកំពង់ហាវ ភ្នំក្រាំងដីមាស។ល។
ចំពោះស្ថានភាពសេដ្ឋកិច្ចនៅក្នុងខេត្តទាំងមូលវិញ ភាគច្រើន ប្រជាជនប្រមាណជាង៨៥% ប្រកបមុខរបរជាកសិករបង្កបង្កើនផលលើវិស័យកសិកម្ម ប្រមាណជាង៧% ជាពាណិជ្ជករ ជាង៦% ជាអ្នកនេសាទ និងប្រមាណ១% ជាមន្ត្រីរាជការ។
ដោយឡែកសម្រាប់ឆ្នាំ២០១៩នេះ ភាពទាក់ទាញរបស់ខេត្តកំពង់ឆ្នាំង ត្រូវបានក្រសួងទេសចរណ៍ សម្រេចជ្រើសយកធ្វើជាទីតាំងប្រារព្ធបុណ្យទន្លេលើកទី៥ ដែលមានរយៈពេល៣ថ្ងៃ ចាប់ពីថ្ងៃទី១៥-១៦-១៧ ក្រោមប្រធានបទ «ទន្លេផ្សារភ្ជាប់សន្តិភាព ប្រជាជន និងទេសចរណ៍» ដោយមានការចូលរួមពីសំណាក់សម្ដេច អគ្គមហាសេនាបតី តេជោ ហ៊ុន សែន និងសម្ដេច គតិព្រឹទ្ធបណ្ឌិត ប៊ុន រ៉ានី ហ៊ុន សែន រួមជាមួយនឹងបណ្តាថ្នាក់ដឹកនាំជាន់ខ្ពស់ជាច្រើនរូបទៀត។
ការបង្កើតឱ្យមានពិធីបុណ្យទន្លេនេះ ធ្វើឡើងក្នុងគោលបំណងផ្សព្វផ្សាយ និងលើកកម្ពស់នៃការយល់ដឹងសាធារណៈ អំពីភាពស្អាត និងបៃតង ការថែរក្សាបរិស្ថានទន្លេ បរិស្ថានទីក្រុង សណ្តាប់ធ្នាប់ល្អ លើកកម្ពស់គុណភាពផលិតផល និងសេវាទេសចរណ៍ឱ្យបានល្អ ដើម្បីធ្វើយ៉ាងណាអូសទាញភ្ញៀវទេសចរជាតិ-អន្តរជាតិ ឱ្យមកកម្សាន្តនៅក្នុងខេត្តកំពង់ឆ្នាំងកាន់តែច្រើន។
លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង ក៏បានបញ្ជាក់ពីការយកចិត្តទុកដាក់ខ្ពស់ទៅលើការរៀបចំមហាព្រឹត្តិការណ៍ បុណ្យទន្លេប្រចាំឆ្នាំ២០១៩ នេះផងដែរ ដែលធ្វើយ៉ាងណាឱ្យពិធីមួយនេះមានដំណើរការប្រកបដោយភាពរលូន និងមានភាពទាក់ទាញបំផុត។
ដោយឡែក លោក ឈួរ ចាន់ឌឿន អភិបាលនៃគណៈអភិបាលខេត្តកំពង់ឆ្នាំង ក៏បានបង្ហាញពីមោទនភាពរបស់ខេត្តកំពង់ឆ្នាំង ដែលបានក្លាយជាម្ចាស់ផ្ទះក្នុងការរៀបចំបុណ្យទន្លេប្រចាំឆ្នាំ២០១៩លើកទី៥ផងដែរ។ ជាការត្រៀមខ្លួនស្វាគមន៍ពិធីដ៏ធំប្រចាំឆ្នាំ និងជាលើកដំបូងរបស់ខ្លួនគណៈគ្រប់គ្រងខេត្ត និងគណៈអភិបាលខេត្ត បានរួមសហការជាមួយមន្ទីរទេសចរណ៍រៀបចំសណ្ដាប់ធ្នាប់ តុបតែងលម្អក្រុងទាំងមូលដែលជាទីកន្លែងប្រារព្ធពិធី រួមមានការលម្អសួនច្បារតាមដងវិថីនានា ការរៀបចំលម្អដោយពន្លឺភ្លើងពណ៌នាពេលរាត្រី ជាពិសេសការតុបតែងរៀបចំជាខ្លោងទ្វារនៅច្រកចូលក្រុង ក្នុងរូបភាពជាឆ្នាំងដីយ៉ាងស្រស់ស្អាត និងគួរជាទីទាក់ទាញ ក្រោមការប្រឹក្សាផ្តល់យោបល់ពីសំណាក់ក្រុមហ៊ុន អ្នកជំនាញផ្នែករៀបចំមហាព្រឹត្តិការណ៍នានា មីឌៀ អែកហ្សិន (Media Action) ។
បន្ថែមពីនេះ ក៏មានការបែងចែកទីតាំងផ្សេងៗទៀតជាច្រើន ដូចជា ទីតាំងសម្រាប់ការដាក់តាំងបង្ហាញផលិតផល និងទំនិញផ្សេងៗ ដែលបង្ហាញពីសក្ដានុពលក្នុងស្រុក(ភូមិមួយផលិតផលមួយ) ដែលជាប្រភេទកសិផល ក៏ដូចជាផលិតផលសិប្បកម្មដែលធ្វើឡើងដោយដៃជាដើម ហើយក៏មានទីតាំងសម្រាប់ការប្រគំតន្ត្រី រាំរបាំ ការបង្ហាញម៉ូដបែបបុរាណ-ទាន់សម័យ និងទីតាំងសម្រាប់លេងល្បែងប្រជាប្រិយខ្មែរ ដែលគ្រប់បណ្តាភ្ញៀវទេសចរជាតិ - អន្តរជាតិ សុទ្ធតែអាចចូលរួមកម្សាន្ដបានទាំងអស់។
រដ្ឋមន្រ្តីក្រសួងទេសចរណ៍ លោកថោង ខុនបានមានប្រសាសន៍ថា ពិធីបុណ្យទន្លេនៅខេត្តកំពង់ឆ្នាំង ដែលនឹងចាប់ផ្តើមពីថ្ងៃទី១៥ដល់១៧មិនាខាងមុខនេះ រំពឹងថានឹងមានមនុស្សចូលរួមប្រមាណ៥០ម៉ឺននាក់ ក្រោមអធិតបីភាពសម្តេចតេជោហ៊ុន សែននិងសម្តេចកិត្តិព្រឹទ្ឋបណ្ឌិតប៊ុន រ៉ានី ហ៊ុន សែន៕
ចរន្តនៃការទិញលក់វិស័យអចលនទ្រព្យ នៅក្នុងខេត្តព្រះសីហនុត្រូវបានគេដឹងឮមានភាពុះកញ្រ្ជោលជាខ្លាំង ក្រោយពីមានការសម្រុកចូលមកវិនិយោគយ៉ាហគំហុកពីសំណាក់អ្នកវិនិយោគជនជាតិចិន។ ប៉ុន្តែអ្វីដែលជាការគួរឱ្យគត់សម្គាល់នោះគឺនៅត្រឹមមួយរយៈពេលខ្លីនៃដើមឆ្នាំ២០១៩នេះ សកម្មភាពនៃការទិញលក់ ឬជួលអចលនទ្រព្យហាក់មានភាពនៅទ្រឹងមិនមានអ្វីប្រែប្រួលនោះឡើយ។ 
