ដោយ នៅ វឌ្ឈនា
ទីក្រុងម៉ូស្គូ៖ មន្រ្តីជាន់ខ្ពស់ក្រសួងទេសចរណ៍បានអះអាងថា កម្ពុជានឹងទទួលបានភ្ញៀវទេសចរណ៍ពីអឺរ៉ុបបន្ថែមទៀតមកទស្សនាកម្ពុជា ក្រោយពេលកម្ពុជាចូលរួមពិព័រណ៍ទេសចរណ៍អន្តរជាតិ «26th Moscow International Travel & Tourism Exhibition (MITT 2019)» នៅទីក្រុងមូស្គូ សហព័ន្ធរុស្ស៊ី។
អនុរដ្ឋលេខាធិការក្រសួងទេសចរណ៍លោក គុជ បញ្ញាសាតំណាងលោកថោង ខុន នាថ្ងៃទី១២ ខែមីនា ឆ្នាំ២០១៩ បានដឹកនាំមន្ត្រីក្រសួង និងក្រុមហ៊ុនឯកជនចំនួន៣ក្រុមហ៊ុនចូលរួមក្នុងព្រឹត្តិការណ៍ពិព័រណ៍ទេសចរណ៍អន្តរជាតិ «26th Moscow International Travel & Tourism Exhibition (MITT 2019)» នៅទីក្រុងមូស្គូ សហព័ន្ធរុស្ស៊ី ដែលប្រព្រឹត្តទៅចាប់ពីថ្ងៃទី១២-១៤ ខែមីនា។
ព្រឹត្តិការណ៍ពិព័រណ៍ទេសចរណ៍អន្តរជាតិនេះ ក៏មានការចូលរួមពី៥៤ប្រទេស និង៥២តំបន់ នៃសហព័ន្ធរុស្ស៊ី ដូចជា មជ្ឈុមបូព៌ា អាស៊ី អាមេរិក អាហ្វ្រិក អឺរ៉ុប មេឌីទែរ៉ាណេ បណ្តាប្រទេសនៃអតីតសហភាពសូវៀត (CIS) និងក្រុមហ៊ុនទេសចរណ៍រុស្ស៊ី ព្រមទាំងផ្នែកឯកជនពាក់ព័ន្ធវិស័យទេសចរណ៍រហូតដល់ទៅ១៨០០ក្រុមហ៊ុន និងមានអ្នកទិញដ៏មានសក្តានុពល ព្រមទាំងមានអ្នកជំនាញមកពីស្ថាប័នទេសចរណ៍ជាតិនានា ធ្វើបទបង្ហាញស្តីពីវឌ្ឍនភាពនៃវិស័យទេសចរណ៍ជុំវិញពិភពលោក និន្នាការនៃការធ្វើដំណើរថ្មី ការបង្កើនប្រសិទ្ធភាពនៃមជ្ឈមណ្ឌលព័ត៌មានទេសចរណ៍ និងយុទ្ធសាស្ត្រផ្សព្វផ្សាយទាក់ទាញទេសចររុស្ស៊ី។
ក្នុងឱកាសនេះដែរ លោកគុជ បញ្ញាសា ត្រូវបានអញ្ជើញកិត្តិយសក្នុងការផ្តល់បទសម្ភាសន៍ ជាមួយបណ្តាញផ្សព្វផ្សាយនានារបស់សហព័ន្ធរុស្ស៊ីស្តីពី ការអភិវឌ្ឍទេសចរណ៍ប្រកបដោយនិរន្តរភាពរបស់កម្ពុជា។
MITT 2019 គឺជាព្រឹត្តិការណ៍ពិព័រណ៍ទេសចរណ៍លំដាប់ទី៥ នៃពិភពលោក ដែលជាឱកាសសម្រាប់កម្ពុជាក្នុងការជំរុញយុទ្ធនាការផ្សព្វផ្សាយទេសចរណ៍ “កម្ពុជា ព្រះរាជាណាចក្រអច្ឆរិយៈ ផ្តល់ភាពកក់ក្តៅ” និងផ្សព្វផ្សាយវេទិកាទេសចរណ៍អាស៊ាន (ATF 2021) ដែលកម្ពុជានឹងទទួលធ្វើជាម្ចាស់ផ្ទះ ព្រមទាំងទាក់ទាញប្រតិបត្តិករទេសចរណ៍ វិនិយោគគិន និងភ្ញៀវទេសចរពីទីផ្សារអឺរ៉ុប ជាពិសេសទេសចររុស្ស៊ី មកទស្សនា និងវិនិយោគនៅកម្ពុជាឱ្យកាន់តែច្រើនឡើងថែមទៀត។
កាលពីឆ្នាំ២០១៨កន្លងទៅ កម្ពុជាទទួលបានភ្ញៀវទេសចរពីអ៊ឺរ៉ុបប្រមាណ៨២០,០០០នាក់ ស្មើនឹង១៣ភាគរយនៃចំនួនទេសចរសរុបដែលមកទស្សនាកម្ពុជា។ តាមរយៈព្រឹត្តិការណ៍ MITT 2019 ដែលជាទីផ្សារទេសចរណ៍អាទិភាពទើបងើបឡើងថ្មី កម្ពុជាសង្ឃឹមថានឹងទទួលបានទេសចរមកពីទីផ្សារអឺរ៉ុបកាន់តែច្រើនថែមទៀត។
ជាមួយគ្នានេះ លោកស្រីឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ឲ្យដឹងកាលពីពេលថ្មីៗនេះថា សមាគមបាននិងកំពុងធ្វើការជាមួយសមគមទេសចរណ៍ និងប្រតិបត្តិករទេសចរណ៍ នៅតាមបណ្តាប្រទេសនានានៅអឺរ៉ុប និងក្នុងតំបន់ ដើម្បីទាក់ទាញភ្ញៀវទេសចរណ៍អឺរ៉ុប មកទស្សនាកម្ពុជាកាន់តែច្រើនថែមទៀត។ ពិសេសយើងក៏នឹងអញ្ជើញអ្នកសារព៌តមានមកពីអឺរ៉ុប ដើម្បីជួយផ្សព្វផ្សាយពីសក្តានុពល និងផលិតផលទេសចរណ៍ថ្មីៗពីកម្ពុជាទៅកាន់អឺរ៉ុប និងពិភពលោក។
លោកស្រីបន្តថា “កម្ពុជាមានសក្តានុពលទេសចរណ៍ដ៏សម្បូរបែប ប៉ុន្តែបញ្ហាប្រឈមរបស់យើង គឺបច្ចុប្បន្នយើងពឹងផ្អែកប្រទេសជិតខាងច្រើន ដោយសារយើងមិនមានជើងហោះហើរត្រង់ពីអឺរ៉ុប”។ លោកស្រីបន្ថែមថា “ហេតុនេះទើបយើងសុំពឹងប្រតិបត្តិករទេសចរណ៍នៅប្រទេសជិតខាងយើង ដើម្បីឲ្យគេដាក់បញ្ចូលខ្សែទស្សនកិច្ចមកកម្ពុជា នៅក្នុងកញ្ចប់ទេសចរណ៍របស់ពួកគេ”៕
អភិបាលរងនៃគណៈអភិបាលខេត្តបាត់ដំបង លោក សឿម ប៊ុនរិទ្ធិ បានដឹកនាំកិច្ចពិភាក្សាអំពីរបាយការណ៍ស្តីពី លទ្ធផលនៃពិភាក្សាជាមួយមន្ទីរជំនាញពាក់ព័ន្ធមួយចំនួន ដើម្បីរកការឯកភាពរួមលើការកំណត់ព្រំប្រទល់ភ្នំប្រាំពីរ នៅស្រុកភ្នំព្រឹក តំបន់ភ្នំទាក់ទ្រាំង និងតំបន់ភ្នំគិរីយង់ ស្រុករតនៈមណ្ឌល ខេត្តបាត់ដំបង ដើម្បីដាក់ស្នើសុំបង្កើតជាតំបន់បេតិកភណ្ឌធម្មជាតិ។
កិច្ចពិភាក្សានេះ មានការអញ្ជើញចូលរួមពីលោក ប៊ិ សេងលៀង អនុប្រធាននាយកដ្ឋានបេតិកភណ្ឌនៃក្រសួងបរិស្ថាន មន្ទីរវប្បធម៌ និងវិចិត្រសិល្បៈខេត្ត មន្ទីរទេសចរណ៍ខេត្ត លោកអភិបាលស្រុករតនមណ្ឌល លោកអភិបាលស្រុកភ្នំព្រឹក និងអស់លោក លោកស្រីពាក់ព័ន្ធមួយចំនួន៕
