ដោយ រ៉ាណេត
ភ្នំពេញៈ វត្តមានអាគារកប់ពពកនៅជុំវិញ និងកំពុងលូតលាស់ជារៀងរាល់ថ្ងៃនៅទីក្រុងកោះពេជ្រ តំបន់នេះបាននិងកំពុងដើរតាមលំអានប្រទេសរីកចម្រើននានា ដែលអនាគតតំបន់នេះ នឹងក្លាយជាមជ្ឈមណ្ឌលពាណិជ្ជកម្មលំដាប់អន្តរជាតិ នាពេលអនាគតឆាប់ៗខាងមុខនេះ។
សហស្ថាបនិក និងជានាយកប្រតិបត្តិនៃក្រុមហ៊ុន Advance Real Estate លោក ប៉ូ អ៊ាវគង់ បានមានប្រសាសន៍តាមទូរស័ព្ទកាលពីល្ងាចថ្ងៃទី៩ ខែឧសភា កន្លងមកថា ;ភាពជាក់ស្ដែងនៃការអភិវឌ្ឍនៅលើតំបន់កោះពេជ្រ នាពេលបច្ចុប្បន្ននេះ គឺស្ថានភាពនៃការប្រើប្រាស់ដីនៅតំបន់ស្ទើរប្រើប្រាស់អស់ទៅហើយ។ ដោយឡែកតំបន់ជុំវិញកោះពេជ្រ ក៏មិនសូវមានដីទំនេរធំៗដែរ ដែលសូម្បីតែដីអតីតប៊ូលឌីង ក៏មានគម្រោងអភិវឌ្ឍសាងសង់ជាមណ្ឌលកម្សាន្ត ណាហ្គា៣រួចបាត់ទៅហើយ។
លោកបានបន្តថា “គម្រោងភាគច្រើននៅតំបន់នេះ អាចនឹងបញ្ចប់ការសាងសង់ទាំងស្រុងនៅត្រឹម៣ឆ្នាំទៀតតែប៉ុណ្ណោះ ហើយរហូតដល់៥ឆ្នាំខាងមុខទៀត តំបន់នេះនឹងប្រែរូបរាងទៅជាបណ្តុំអគារមជ្ឈមណ្ឌលពាណិជ្ជកម្មទំនើប លេចធ្លោរជាងបណ្តាប្រទេសមួយចំនួនដែលមានទំហំសេដ្ឋកិច្ច និងកម្រិតប្រជាជនប្រហាក់ប្រហែលជាមួយនឹងប្រទេសយើង”។ លោកបានបញ្ជាក់ថា “បើទោះជាបែបនេះក្ដី ប៉ុន្តែវានៅមិនទាន់អាចប្រៀបប្រដូច ឬស្មើទៅនឹងប្រទេសជឿនលឿនដូចជា ប្រទេសសិង្ហបុរី ក៏ដូចជាហុងកុងនោះទេ ដោយសារតែកម្រិត និងទំហំនៃការវិនិយោគ និងកម្រិតមុខជំនួញរបស់ប្រទេសយើងនៅមិនទាន់ស្មើនឹងបណ្តាប្រទេសទាំងនេះនៅឡើយ”។
លោកបន្តថា “វាត្រូវការរយៈពេលយូរជាងនេះបន្តិចទៀត ដែលអាចរយៈពេលចាប់ ៧-១០ ឆ្នាំទៀត ទើបអាចឈានដល់កម្រិតអន្តរជាតិជាសាកលបាន”។
អគ្គនាយករងក្រុមហ៊ុន OCIC លោក ទូច សំណាង បានមានប្រសាសន៍ប្រសាសន៍ឲ្យដឹងផងដែរថា គម្រោងអភិវឌ្ឍតំបន់កោះពេជ្រឱ្យក្លាយទៅជាមជ្ឈមណ្ឌលពាណិជ្ជកម្ម និងកម្សាន្តលំដាប់អន្តរជាតិ ជាអ្វីដែលក្រុមហ៊ុនបានរៀបចំគម្រោងតាំងពី១៥ឆ្នាំមុនមកម៉្លេះ ដោយសារតែការមើលឃើញពីភាពល្អប្រសើរ និងអំណោយផលល្អនៃទីតាំង និងផ្នែកភូមិសាស្រ្ត។
លោកបានបន្តថា “ទីក្រុងកោះពេជ្រ មានកក្តាភូមិសាស្ត្រល្អច្រើនទាក់ទងនឹងទេសភាពដ៏ស្រស់ស្អាតដែលស្ថិតនៅជាប់ទន្លេ និងមានភាពងាយស្រួលក្នុងតភ្ជាប់ទៅកាន់តំបន់ដទៃទៀត ជាពិសេសមណ្ឌលពាណិជ្ជកម្មដែលនៅកណ្តាលក្រុងភ្នំពេញ”។ លោកបន្តថា បច្ចុប្បន្ននេះ ការអភិវឌ្ឍលើវិស័យសំណង់នៅទីនេះ ទើបតែបានប្រមាណជាង២០ភាគរយនៃគម្រោងតែប៉ុណ្ណោះ ខណៈដែលផ្ទៃដីត្រូវបានប្រើប្រាស់អស់៥០ភាគរយរួចទៅហើយ”។
លោកបន្តថា “មានក្រុមហ៊ុនមួយចំនួនទៀត ត្រៀមសាងសង់អាគារខ្ពស់ៗនៅក្នុងទីក្រុងកោះពេជ្រ ហើយអាគារកំពស់់ ៦៩ ជាន់មួយនឹងប្រកាសសាងសង់នាពេលឆាប់ៗខាងមុខនេះ”។លោកបន្តថា “បច្ចុប្បន្នក្រុមហ៊ុនបាននិងកំ ពុងរៀបចំតំបន់ថ្មើជើងបីកន្លែងរួចហើយនៅទីក្រុងនេះ និងពង្រីកបន្ថែមនាពេលអនាគត តែយើងមិនអាចបដិសេធមិនឲ្យយានយន្តចូល ដោយមានតែថ្មើរជើងនោះទេ”។
នាយិកាក្រុមហ៊ុនអចលនទ្រព្យអន្តរជាតិ Century 21 Cambodia លោកស្រី Grace Rachny Fong ; បានមានប្រសាសន៍ថា តំបន់ខាងលើនេះគឺពិតជាស័ក្ដិសមទៅបំផុត ក្នុងនាមជាបណ្តុំនៃមជ្ឈមណ្ឌលពាណិជ្ជកម្មអន្តរជាតិ ហើយវាក៏ជាការបង្ហាញឱ្យឃើញពីការរីកចម្រើនលើវិស័យសំណង់នៅកម្ពុជាផងដែរ។
លោកស្រីបន្តទៀតថា “វាមិនត្រឹមតែមានតែអគារត្រឹមតែប៉ុន្មាននាពេលបច្ចុប្បន្ននេះទេ តែវានៅមានគម្រោងធំៗជាច្រើនទៀត ដែលបាននិងកំពុងតែត្រៀមធ្វើការសាសងសង់នៅក្នុងពេលដ៏ខ្លីឆាប់ៗខាងមុខនេះ ដែលភាគច្រើនជាការវិនិយោគពីសំណាក់ក្រុមហ៊ុនចិន”។
ទីប្រឹក្សាសមាគមភ្នាក់ងារទេសចរណ៍កម្ពុជា លោក ហូ វណ្ឌី បានមានប្រសាសន៍ឲ្យដឹងផងដែរថា បើមើលពីសកម្មភាព និងហេដ្ឋរចនាសម្ព័ន្ធនៃការសាងសង់នាពេលបច្ចុប្បន្ននេះ តំបន់នេះអាចប្រែក្លាយជាមជ្ឈមណ្ឌលពាណិជ្ជកម្មកម្រិតអន្តរជាតិ ជាពិសេសតំបន់ទស្សនាកម្សាន្តដោយថ្មើរជើងសំរាប់ដើរកំសាន្តថ្មីមួយនៅក្រុងភ្នំពេញ»។លោកបានបន្តទៀតថា អគារខ្ពស់ខ្ពស់ៗ គួរតែមានកន្លែងសម្រាប់អង្គុយលំហែរ និងទស្សនាទិដ្ឋភាពទីក្រុង ដែលអាចមើលទៅទិសខាងកើតឃើញផ្ទៃទន្លៃ និងទេសភាពបៃតងនៃស្រែចម្ការរបស់ប្រជាពលរដ្ឋ ហើយខាងមើលមកទិសខាងលិចឃើញទិដ្ឋភាពទីក្រុងដែលពោរពេញទៅដោយសំណង់អគារពាណិជ្ជកម្មធំៗជាច្រើន។
លោកបន្តថា ទោះជាយ៉ាងណាទាំងអាជ្ញាធរ និងអ្នកអភិវឌ្ឍន៍គួរតែមានការរៀបចំរបៀបរបប និងសណ្តាប់ធ្នាប់ឱ្យបានល្អ ដើម្បីទាក់ទាញភ្ញៀវទេសចរអន្តរជាតិឱ្យច្រើន ជាពិសេស រដ្ឋាភិបាលក៏គួរតែមានការរៀបចំតំបន់ចំណតយានយន្តឱ្យបានល្អ។ លោកបន្តថា តំបន់កោះពេជ្រ ក៏គួរតែមានការរៀបចំតុបតែងលម្អរបន្ថែមទៀត ឱ្យកាន់តែមានភាពទាក់ទាញដើម្បីអូសទាញការចាប់អារម្មណ៍កាន់តែខ្លាំង”៕
