ដោយ : វុត្ថា

ភ្នំពេញ ៖ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ បានជំរុញសហរដ្ឋអាមេរិក ឱ្យមកបង្កើនការបណ្តាក់ទុនវិនិយោគថែមទៀតនៅកម្ពុជា ដោយសាររាជរដ្ឋាភិបាលកម្ពុជាប្រកាន់ខ្ជាប់គោលនយោបាយវិនិយោគបើកទូលាយ និងគាំទ្រធុរកិច្ច។

ការលើកឡើងរបស់លោកត្រូវបានធ្វើឡើងនៅក្នុងឱកាសជួបពិភាក្សាការងារជាមួយ លោក ម៉ាក ក្លាក (Mark Clark) ឧបការីរងស្ដីទីក្រសួងការបរទេសអាមេរិក នៅទីស្តីការក្រសួងពាណិជ្ជកម្ម។

ជាមួយគ្នានេះ រដ្ឋមន្ត្រី ក្រសួងពាណិជ្ជកម្ម ក៏បានសម្ដែងនូវអំណរគុណចំពោះសហរដ្ឋអាមេរិក ដែលបានផ្ដល់ការអនុគ្រោះពន្ធគយដល់ប្រទេសកម្ពុជា ជាពិសេសការលើកលែងពន្ធ (GSP) លើផលិតផលកាបូប ដាក់សម្ភារៈធ្វើដំណើរ ដោយតាមរយៈការលើកលែងពន្ធនេះ បានធ្វើឲ្យកម្ពុជាក្លាយជាប្រទេសនាំមុខគេលើផលិតកម្មនេះ (ផលិតផលកាបូប ដាក់សម្ភារៈធ្វើដំណើរ)។

លោក ម៉ាក ក្លាក បានវាយតម្លៃខ្ពស់ចំពោះកិច្ចការងារលើកស្ទួយធុរកិច្ច របស់រាជរដ្ឋាភិបាលកម្ពុជា ជាមួយសហរដ្ឋអាមេរិក។ លោកបានស្នើសុំឲ្យភាគីទាំងពីរបន្តកិច្ចសហប្រតិបត្តិការជិតស្និទ្ធជាមួយគ្នា ជាពិសេសតាមរយៈការជួបប្រចាំឆ្នាំ ក្រោមកិច្ចព្រមព្រៀងក្របខ័ណ្ឌពាណិជ្ជកម្ម និងវិនិយោគ (TIFA) ដើម្បីដោះស្រាយបញ្ហាទាំងឡាយ ដែលនៅសេសសល់ សំដៅពង្រឹងទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ៕

ដោយវុត្ថា

ព្រះសីហនុ៖​ ប្រធានមន្ទីរទេសចរណ៍ខេត្តសៀមរាប បានអះអាងថា ខេត្តព្រះសីហនុ នឹងទទួលបានភ្ញៀវទេសចរណ៍មកលេងកម្សាន្តច្រើន ខណៈឆ្នាំនេះខេត្តមានរៀបចំស ង្ក្រានសមុទ្រនៅខេត្តនេះ។

លោកតាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ ឲ្យដឹងនារសៀ​លថ្ងៃទី៧ មិនាកន្លងមកថា នៅឆ្នាំ២០១៩នេះ ជាពិសេសសម្រាប់ឱកាសបុណ្យចូលឆ្នាំថ្មីប្រពៃណីជាតិនាខែមេសាខាងមុខនេះ។លោកបន្តថា នឹងមានភ្ញៀវទេសចរជាតិ និងអន្តជាតិច្រើនមកទស្សនាកម្សាន្តនៅខេត្តជាប់មាត់សមុទ្រនេះ ព្រោះខេត្តព្រះសីហនុ នឹងមានរៀបចំសង្រ្កានសមុទ្រ នៅអំឡុងពេលបុណ្យចូលឆ្នាំថ្មីប្រពៃណីខាងមុខ ដែលមានទាំងល្បែងកម្សាន្តប្រជាប្រិយជាច្រើន ដូចជា ល្បែងប្រពៃណីបោះឈូង បោះអង្គុញ ទាញព្រ័ត រាំកម្សាន្ត បណ្តែតគោមទឹក និងបង្ហោះគោមជាដើម និងកីឡាប្រជាប្រិយផ្សេងៗ ហើយក្រុមអ្នករៀបចំកម្មវិធី ក៏មានត្រៀមរៀបចំការសម្តែងសិល្បៈត្រុដិ និងសិល្បៈសហសម័យជាច្រើនទម្រង់ និងជាពិសេសការត្រៀមរៀបចំឲ្យមានកន្លែងបាញ់ទឹកផងដែរ”។

លោកបន្ថែមថា“ការបើកឲ្យមានវេទិកាប្រជុំពិភាក្សា ទាក់ទងនឹងវិស័យទេសចរណ៍ថ្ងៃនេះ វាគឺវេទិការជួបប្រជុំរវាងផ្នែករដ្ឋ វិស័យឯកជន និងដើម្បីរកដំណោះស្រាយ និងលើកកម្ពស់គុណភាពសេវាកម្មរបស់យើង ដើម្បីត្រៀមរៀបចំទទួលភ្ញៀវទេសចរណ៍ដែលកើនឡើងជាប្រចាំឆ្នាំថែមទៀត”។លោកបន្តថា “យើងត្រៀមខ្លួនសម្រាប់ទទួលកម្មវិធីសង្ក្រានសមុទ្រដែលនឹងប្រារព្ធធ្វើនៅលើទឹកដីខេត្តព្រះសីហនុនៅឱកាសទិវាបុណ្យចូលឆ្នាំប្រពៃណីនាខែមេសា ខាងមុខនេះ”។

លោកស្រីហៀក ហ៊ឹមុល្លី អភិបាលរងខត្តព្រះសីហនុបានថ្លែងថា ខេត្តព្រះសីហនុ មាន​សក្តានុពលសេដ្ឋកិច្ចធំធេង និងធម្មជាតិ ឆ្នេរសមុទ្រ កោះដ៏ស្រស់ស្អាត និងល្បីល្បា​ញ ដែលជំរុញឲ្យវិស័យទេសចរណ៍មានការរីកចម្រើនគួរឲ្យមោទនៈ ក៏ដូចជាកំណើនភ្ញៀវទេសចរណ៍មកកម្សាន្តនៅខេត្តព្រះសីហនុ មានការកើនឡើងជាប្រចាំ។

ខេត្តព្រះសីហនុ ទទួលបានភ្ញៀវទេសចរជាង២លាននាក់កាលពីឆ្នាំ២០១៨ ទន្ទឹមនឹងមានសក្តានុពលខ្ពស់ផ្នែកសេដ្ឋកិច្ច ខេត្តព្រះសីហនុក៏មានសក្តានុពលច្រើនសម្រាប់វិស័យទេសចរណ៍យ៉ាងសម្បើមដែរ។

យោងតាមស្ថិតិរបស់មន្ទីរទេសចរណ៍ខេត្ត គឺខេត្តនេះមានបន្ទប់សម្រាប់ជួលស្នាក់នៅចំនួនជាង១ម៉ឺនបន្ទប់ ហើយកាលពីឆ្នាំ២០១៨ ខេត្តនះទទួលបានភ្ញៀវទេសចរដែលបានមកទស្សនាកម្សាន្តសរុបចំនួន២.០៤៧.៧៧៤នាក់ គឺកើនឡើងចំនួន២,៦៣%ធៀ​បទៅនឹងឆ្នាំមុនបន្ទាប់។

ខេត្តព្រះសីហនុ លាតសន្ធឹងនៅលើឆ្នេរសមុទ្រប្រវែង១៧៥គីឡូម៉ែត្រ ដែលនៅជាប់មាត់សមុទ្រ ប្រកបដោយឆ្នេរស្រស់ស្អាតល្បីទូទាំងពិភពលោក ដោយសារមានឆ្នេរខ្សាច់ល្អពីធម្មជាតិមានពណ៌សក្បុសជាច្រើនកន្លែង មានកោះតូច-ធំចំនួន៣២កោះ មានឧទ្យានជាតិ និងរមណីយដ្ឋានជ្រោះទឹកធ្លាក់ធម្មជាតិជាច្រើនអន្លើ៕

ដោយវុត្ថា

ភ្នំពេញ៖​ ក្រុមហ៊ុនវាយនភណ្ឌYue Qun របស់ប្រទេសចិនបានសម្រេចចិត្តបោះទុន១៥០លានដុល្លារ ដើម្បីសាងសង់រោងចក្រកាត់ដេរនៅតំបន់សេដ្ឋកិច្ចពិសេសភ្នំពេញ។

ពិធីបញ្ចុះបឋមសិលាគម្រោងក្រុមហ៊ុនវាយនភណ្ឌYue Qun ត្រូវបានធ្វើឡើងកាលពីពេលថ្មីៗនេះដោយ ឯកអគ្គរដ្ឋទូតចិនប្រចាំកម្ពុជា លោកWang Wentianនិងលោកឧត្តមសេនីយ៍ឯក ហ៊ុន ម៉ាណែត មេបញ្ជាការរងកងយោធពលខេមរភូមិន្ទ មេបញ្ជា​ការកងទ័ពជើងគោក រួមជាមួយនឹងម្ចាស់ក្រុមហ៊ុន។

រោងចក្រមួយនេះ គឺគម្រោងវិនិយោគរបស់ Ning Bo Shen Zhou គ្រុបគ្រោងនឹងផ្ដល់កន្លែងការងារចំនួន១៧,០០០កន្លែង ហើយនឹងក្លាយជាសហគ្រាសវាយនភណ្ឌដែលធំជាងគេនៅប្រទេសកម្ពុជា។

តំបន់សេដ្ឋកិច្ចពិសេសភ្នំពេញ ជាតំបន់សេដ្ឋកិច្ចគំរូមួយដែលបាននិងកំពុងទាក់ទាញការវិនិយោគពីបរទេស ពិសេសក្រុមហ៊ុនជប៉ុនធំៗជាច្រើនបាននិងកំពុងវិនិយោគនៅ​តំបន់នេះ៕

​ដោយវុត្ថា

​ភ្នំពេញ៖​ ក្រុមប្រឹក្សាអភិវឌ្ឍន៍កម្ពុជា បានអនុម័តគំរោងវិនិយោគតម្លៃ៧៧,២លានដុល្លារអាមេរិក តាមសំណើរសុំពីក្រុមហ៊ុនឯកជនចំនួន៥ ដែលវិនិយោគលើវិស័យចម្រុះនៅកម្ពុជា។

យោងតាមសេចក្តីប្រកាសព៌តមានរបស់ក្រុមប្រឹក្សាអភិវឌ្ឍន៍កម្ពុជា ដែលទើបទទួ​ល​បានកាលពីល្ងាចថ្ងៃទី៧ មិនាកន្លងមកនេះបានឲ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនចំនួន៥ដូចជា ទី១ ក្រុមហ៊ុន “RENS MEDCARE (CAMBODIA) CO.,LTD.”: គម្រោងបង្កើតរោងចក្ររោងចក្រផលិតសម្ភារៈបរិក្ខាពេទ្យ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេ​សក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៥,១លានដុល្លារអាមេរិក និងអាចបង្កើតការងារបានចំនួន៤៨៧កន្លែង។

ទី២ ក្រុមហ៊ុន“HUAYUE INTERNATIONAL PACKING TECHNOLOGY CO.,LTD.”: គម្រោងបង្កើតរោងចក្រផលិតផលផ្លាស្ទិក មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជីខេត្តព្រះសីហនុ មានទុនវិនិយោគប្រមា​ណ២៣,៦លានដុល្លារអាមេរិក និងអាចបង្កើតការងារបានចំនួន ៤៧៦កន្លែង។ ទី៣ ក្រុមហ៊ុន “ ZHEJIANG HOME POINT FURNITURE CO., LTD”: គម្រោងបង្កើតរោងចក្រផលិតគ្រឿងសង្ហារឹម មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ មានទុនវិនិយោគប្រមាណ ៣២,៧លានដុល្លារអាមេរិក និងអាចបង្កើតការងារបានចំនួន៥២៣កន្លែង។

ទី៤ ក្រុមហ៊ុន“ TOMSON MERCHANDISE CO., LTD”: គម្រោងបង្កើតរោងចក្រផលិតអំពូលភ្លើងលម្អ ធ្នើរលម្អជាលោហធាតុ និងសម្ភារៈបរិក្ខារលម្អសួន មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀង ហ្គីហ្គា រីសស៍ ខេត្តស្វាយរៀង មានទុនវិនិយោគចំនួន៥លានដុល្លារអាមេរិក និងអាចបង្កើតការងារបានចំនួន១.៥០៤កន្លែង។ និងទី៥ក្រុមហ៊ុន “ HAWMAO (CAMBODIA) CO.,LTD.”: គម្រោងបង្កើតរោងចក្រផលិតក្រដាស មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង មានទុនវិនិយោគប្រមាណ ១០,៨លានដុល្លារអាមេរិក និងអាចបង្កើតការងារបានចំនួន២០៥កន្លែង៕