កំណើនតម្រូវការលំនៅដ្ឋាននៅក្រុងប៉ោយប៉ែតកើនលើសពីការរំពឹងទុក ធ្វើឲ្យតម្លៃជួលអចលនទ្រព្យកើនយ៉ាងគំហុក

May 6, 2019

ដោយៈ រ៉ាណេត

ប៉ោយប៉ែតៈ ក្រុងប៉ោយប៉ែតនាពេលបច្ចុប្បន្ននេះ ត្រូវបានអ្នកជំនាញ ក៏ដូចជាអ្នកវិនិយោគលើវិស័យលំនៅដ្ឋានអះអាងថា កំពុងតែជួបវិបត្តិកង្វះការផ្គត់ផ្គង់បន្ទប់ស្នាក់នៅជាខ្លាំង ខណៈដែលលំហូរនៃចំនួនអ្នកវិនិយោគ និងអ្នកទៅបម្រើការងារមានការកើនឡើងយ៉ាងគំហុក។

ប្រធានក្រុមប្រឹក្សាភិបាលនៃក្រុមហ៊ុន Fourth Stars Plus Four ដែលមានការវិនិយោគទៅលើវិស័យលំនៅដ្ឋាន និងគម្រោងសាងសង់សំណង់ជាច្រើននៅក្រុងប៉ោយប៉ែត ខេត្តបន្ទាយមានជ័យ បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី៦ ខែឧសភា ឆ្នាំ២០១៩ ថា បច្ចុប្បន្ននៅក្រុងប៉ោយប៉ែត កំពុងតែមានតម្រូវខ្ពស់លើផ្នែកស្នាក់នៅ ជាពិសេសផ្នែកបន្ទប់ជួលតែម្ដង ដោយសារតែកំណើននៃនួនអ្នកចំណូលថ្មីមានការកើនឡើងយ៉ាងកំហុក ទាំងចំនួនអ្នកវិនិយោគ ក៏ដូចជាអ្នកលក់កម្លាំងពលកម្ម។

លោកបានបន្តទៀតថា“ដោយសារតែក្រុងប៉ោយប៉ែត ចាប់ផ្តើមមានកំណើនវិនិយោគពីសំណាក់ជនបរទេស ជាពិសេស ជនជាតិចិនតែម្ដង បានធ្វើឱ្យមានតម្រូវការងារខ្ពស់លើការជួលការិយាល័យ និងបន្ទប់ស្នាក់នៅផងដែរ”។ លោកបន្តថា “អ្នកវិនិយោគលើវិស័យអចលនទ្រព្យភាគច្រើន បានងាកមកធ្វើការអភិវឌ្ឍលំនៅដ្ឋានគ្រប់ប្រភេទ ដែលចំពោះតែប្រភេទបុរី បានកើនឡើងរហូតដល់ជាង២០គម្រោង មិនទាន់រាប់បញ្ចូលគម្រោងសាងសង់លំនៅដ្ឋាន និងបណ្តុំបន្ទប់ជួលដែលមានទ្រង់ទ្រាយនៅឡើយ”។

លោកសួង សុខហ៊ាងបានបន្តទៀតថា ពេលនេះបើនិយាយពីទីផ្សារនៃតម្លៃដីគឺហាក់មិនសូវមានសកម្មភាពនោះទេ ប៉ុន្តែអ្វីដែលគួរឱ្យចាប់អារម្មណ៍ខ្លាំងនោះ គឺការកើនឡើងនូវតម្លៃជួលបន្ទប់ស្នាក់នៅតែ ដោយបន្ទប់ស្នាក់នៅខ្នាតមធ្យមមានតម្លៃចាប់ពី២០០-២៥០ដុល្លារក្នុងមួយខែ ខណៈដែលបន្ទប់ប្រភេទនេះ ដូចគ្នាកាលពីឆ្នាំកន្លងទៅមានតម្លៃត្រឹម១០០-១៥០ដុល្លារក្នុងមួយខែតែប៉ុណ្ណោះ។ លោកបានអះអាងថា ពាក់ព័ន្ធទៅនឹងតម្លៃនៃការជួលនេះ នៅឆ្នាំបន្ទាប់អាចនឹងនៅតែបន្តឡើងថ្លៃបន្តិចទៀត។

នាយកប្រតិបត្តិ និងជាស្ថាបនិកក្រុមហ៊ុន Advance Real Estate លោក ប៉ូ អ៊ាវគង់ បានមានប្រសាសន៍ថា ប៉ោយប៉ែតបច្ចុប្បន្ន មានភាពស្រដៀងគ្នាទៅនឹងក្រុងព្រះសីហនុកាលពីប្រមាណ៣ឆ្នាំមុន ខណៈដែលលំហូរនៃការវិនិយោគ ជាពិសេសលើវិស័យសំណង់ពីសំណាក់ជនជាតិចិនមានការកើនឡើងយ៉ាងគំហុក។ លោកបន្តថា លំហូរចូលនៃចំនួនវិនិយោគ ក៏ដូចជាអ្នកចំណូលថ្មី ពីសំណាក់បណ្តាកម្លាំងការងារ គឺវាទាមទារនូវតម្រូវការកន្លែងស្នាក់នៅ ហើយវាច្បាស់ជាកើតមានភាពកង្វះខាតលើការផ្គត់ផ្គង់ ដោយសារតែយើងមិនបានត្រៀមទុកជាមុន។

លោករំពឹងថា “ខ្ញុំយល់ថាភាពខ្វះខាតទាំងនេះ នឹងកាត់បន្ថយបន្តិចម្ដងៗ បន្ទាប់ពីបណ្តាអ្នកអភិវឌ្ឍន៍ ចាប់ផ្តើមពង្រីកបន្ថែមនូវទំហំការវិនិយោគរបស់ខ្លួន នៅត្រឹមរយៈពេល ២-៣ឆ្នាំបន្ទាប់”៕

គំរោងផ្លូវក្រោមដីនៅតាមផ្លូវជាតិលេខ៥ គ្រោងសាងសង់នៅចុងឆ្នាំនេះ

May 6, 2019

0

ដោយគង់ សូរិយា

ភ្នំពេញៈ គំរោងសាងសង់ផ្លូវក្រោមដីនៅក្រោមផ្លូវជាតិលេខ៥ តំបន់ឃ្លាំងសាំងសូគីម៉ិចបានដីសាញបញ្ចប់ហើយ និងគ្រោងសាងសង់នៅចុងឆ្នាំ២០១៩នេះ ប្រសិនជាគ្មានអ្វីប្រែប្រួលទេនោះ។

អគ្គនាយកក្រុមហ៊ុន OCIC លោក ទូច សំណាង បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៦ ឧសភានេះថា គំរោងនេះបានឌីសាញបញ្ចប់ហើយ និងគ្រោងដាក់ឆ្លងជាមួយមន្រ្តីរដ្ឋបាលរាជធានីភ្នំពេញនាពេលខាងមុខ ដើម្បីពិនិត្យនិងសម្រេច ដើម្បីឈានទៅដោះស្រាយផលប៉ះពាល់ជាមួយប្រជាពលរដ្ឋ។

លោកបន្តថា “ទំហំនៃផលប៉ះពាល់របស់គំរោងនេះធំណាស់ ហេតុនេះយើងនឹងដោះស្រាយផលប៉ះពាល់ ហេតុនេះបើសិនជាដោះស្រាយផលប៉ះពាល់មិនបានជោគជ័យគំរោងនេះអាចផ្លាស់ប្តូរផងដែរ”។ លោកបន្តថា “ទោះជាយ៉ាងណាយើងមានសុទិដ្ឋិនិយមថា ប្រជាពលរដ្ឋនឹងចូលរួមសហការជាមួយក្រុមហ៊ុន ដើម្បីផលប្រយោជន៍សាធារណៈ”។

គំរោងសាងសង់ផ្លូវក្រោមដីនៅចំណុចឃ្លាំងសាំងសូគីម៉ិចនេះ មានប្រវែងប្រមាណ៥០០ម៉ែត្រ ដែលអូសក្រោមផ្លូវជាតិលេខ៥រហូតដល់ម្តុំស្ថានីយ៍ទូរទស្សន៍ស៊ីធីអ៊ិន។

អ្នកនាំពាក្យរដ្ឋបាលរាជធានីភ្នំពេញ បានបដិសេធមិនអត្ថាធិប្បាយ ដោយសារលោកជាប់រវល់ប្រជុំ៕

ធនាគារពិភពលោកអះអាងថា សេដ្ឋកិច្ចកម្ពុជាបន្តមានកំនើនយ៉ាងរ៉ឹងមាំ

May 6, 2019

0

ប្រភព ធនាគារពិភពលោក

ភ្នំពេញ៖ ធនាគារពិភពលោកបានព្យាករណ៍ថា សេដ្ឋកិច្ចកម្ពុជានឹងបន្តរក្សាបានកំនើនយ៉ាងរ៉ឹងមាំបន្តទៀត ដោយមានការជំរុញមួយផ្នែកធំពីការកើនយ៉ាងរហ័សនៃការនាំចេញ និងការបន្តលូតលាស់នៃវិស័យសំណង់ ។ ធនាគារពិភពលោក (World Bank) កាលពីព្រឹកមិញនេះ។

យោងតាមរបាយការណ៍របស់ធនាគារនេះបានបញ្ជាក់ថា ប្រទេសកម្ពុជាសម្រេចបានកំណើនសេដ្ឋកិច្ច ៧,៥ ភាគរយនៅក្នុងឆ្នាំ២០១៨ ដែលជាអត្រាកំណើនល្អជាងការរំពឹងទុកទៅទៀត ។ ធនាគារពិភពលោកបញ្ជាក់ថា ការនាំចេញរបស់ផលិតផលសម្លៀកបំពាក់ ស្បែកជើង និងមុខទំនិញធ្វើដំណើរ ដែលទាំងអស់នេះ មានជាងពីរភាគបី នៃមុខទំនិញនាំចេញសរុប ជាកំណត់ត្រាកំណើនខ្ពស់ ប្រាំឆ្នាំជាប់គ្នា ហើយដោយវាកើនបាន១៧.៦ភាគរយ ក្នុងឆ្នាំ២០១៨ ប្រៀបធៀបជាមួយ៨.៣ភាគរយក្នុងឆ្នាំ២០១៧។

កាលពីពេលថ្មីៗនេះ ធនាគារពិភពលោកបានព្យាករណ៍សេដ្ឋកិច្ចកម្ពុជាឆ្នាំនេះ នឹងរំពឹងសម្រេចបានកំនើន៦,៨ភាគរយ។

របាយការណ៍ដដែលបានបន្តថា វិស័យសំណង់ អចលនទ្រព្យ និងទេសចរណ៍សរុបគ្នាមកមានចំណែក៦០ភាគរយ នៃចំនួនគម្រោងវិនិយោគទាំងអស់ ដែលត្រូវបានអនុម័តរួចក្នុងឆ្នាំ២០១៨។ ការផលិតសម្ភារផ្គត់ផ្គង់ការសាងសង់ ដែកគ្រឿងសង្ហារឹម និងផលិតផលថ្នាំស្មីក ក៏មានការកើនឡើងយ៉ាងលឿនដែរ ដើម្បីគាំទ្រដល់ការលូតលាស់របស់វិស័យសំណង់។

ទោះជាយ៉ាងក៏ដោយ ធនាគារពិភពលោកថា ប៉ុន្តែភាពមិនប្រាកដប្រជា ដែលបន្តមានបានបង្កហានិភ័យខ្លាំងឡើងដែរ។ បច្ចុប្បន្ននេះ ទីផ្សារសហភាពអឺរ៉ុប (រួមទាំងចក្រភពអង់គ្លេសផង) ស្រូបយកជាងមួយភាគបីនៃទំហំ នៃការនាំចេញសរុបរបស់កម្ពុជា ជាពិសេសផលិតផលសម្លៀកបំពាក់ ស្បែកជើង និងទោចក្រយាន។

លោកស្រី អ៊ីហ្គូណា ដូប្រាចា នាយកគ្រប់គ្រងធនាគារពិភពលោក សម្រាប់ប្រទេសកម្ពុជា មានប្រសាសន៍ថា “ការធ្វើឲ្យប្រសើរឡើង ដល់បរិយាកាសវិនិយោគ និងការកាត់បន្ថយថ្លៃចំណាយ ក្នុងការធ្វើធុរកិច្ច ព្រមទាំងការកសាងជំនាញសម្រាប់សេដ្ឋកិច្ចនាពេលអនាគត សុទ្ធតែជាអាទិភាពគន្លឹះ សម្រាប់រក្សាកំនើនខ្លាំង ក្នុងរយៈពេលមធ្យម”។ លោកស្រីបន្តថា “ភ័ស្តុតាងនានាបានរំលេចឲ្យឃើញថា ការវិនិយោគទៅលើលើប្រជាជន មានសារៈសំខាន់ណាស់ ដើម្បីជំរុញឲ្យមានវឌ្ឍនភាពសេដ្ឋកិច្ច និងការអភិវឌ្ឍប្រកបដោយចីរភាព។ ការវិនិយោគទៅលើ ប្រជាជន និងការកែលម្អគុណភាព នៃមូលធនមនុស្សរបស់កម្ពុជា គួរតែបន្តនៅជាស្នូលនៃសេចក្តីប្រាថ្នារបស់កម្ពុជា ក្នុងការឈានទៅសម្រេចគោលដៅ ជាសេដ្ឋកិច្ចមានចំណូលមធ្យមខ្ពស់ត្រឹមឆ្នាំ២០៣០”។

របាយការណ៍បានអំពាវនាវផងដែរ ឲ្យមានការបំពេញភាពខ្វះខាតផ្នែកជំនាញ និងការវិនិយោគលើមូលធនមនុស្ស ដើម្បីផ្តល់ជាគ្រឹះសម្រាប់កំនើនសេដ្ឋកិច្ចរបស់កម្ពុជាយូរអង្វែង។ ការបង្កើនទំហំ និងប្រសិទ្ធផលនៃការវិនិយោគទាំងនេះ ពីសំណាក់បុគ្គលផ្ទាល់ និងវិស័យសាធារណៈ និងឯកជន អាចជួយធានាឲ្យកុមារកម្ពុជា មានចំណុចចាប់ផ្តើមល្អឆ្ពោះទៅអនាគត ដោយផ្តល់ដល់ពួកគេនូវមូលដ្ឋានគ្រឹះ ដែលពួកគេត្រូវការចាំបាច់ដើម្បីទាញយកផលអតិបរមាពីការអប់រំសិក្សា ហើយអភិវឌ្ឍជំនាញឲ្យបានច្រើនពេញមួយជីវិតរបស់ខ្លួន៕

អ្នកអភិវឌ្ឍន៍ម៉ាឡេស៊ីស្នើឲ្យរដ្ឋាភិបាលពិនិត្យឡើងវិញលើច្បាប់ហាមឃាត់បរទេសមិនឲ្យទិញអចលនទ្រព្យ

May 6, 2019

0

ដោយ វុត្ថា

ប្រទេសម៉ាឡេស៊ីៈ ក្រុមអ្នកអភិវឌ្ឍន៍ និងសមាគមអភិវឌ្ឍន៍លំនៅដ្ឋាន និងអចលនទ្រព្យនៃរដ្ឋJohor នៃប្រទេសម៉ាឡេស៊ី បានអំពាវនាវដល់រដ្ឋាភិបាលនៃប្រទេសខ្លួនគិតគូ ពិនិត្យច្បាប់ហាមប្រាមមិនអោយជនបរទេស ទិញអចលនទ្រព្យនៅក្នុងប្រទេសម៉ាឡេស៊ីឡើងវិញ។

លោក Chong Yoon On ប្រធានសមាគមអភិវឌ្ឍន៍លំនៅដ្ឋាននិងអចលនទ្រព្យនៃរដ្ឋ Johor បានប្រាប់កាសែតក្នុងស្រុកកាលពីពេលថ្មីៗនេះថា ការអំពាវនាវឲ្យរដ្ឋាភិបាលពិនិត្យឡើងវិញនេះ គឺដើម្បីជំរុញឲ្យការលក់អចលនទ្រព្យ នៅក្នុងប្រទេសមានសន្ទុះឡើងវិញ បន្ទាប់ពីច្បាប់នេះត្រូវបានដាក់ឲ្យអនុវត្តកាលពីឆ្នាំ២០១៤ កន្លងមកនេះដោយជនបរទេសមិនអាចទិញអចលនទ្រព្យបាន ដែលមានតម្លៃតិចជាង៣២ម៉ឺនដុល្លារអាមេរិក។

លោកបន្តថា “រដ្ឋាភិបាលគួរតែពិនិត្យឡើងវិញ នូវច្បាប់នេះដោយកាត់បន្ថយមកនៅ ១៦ម៉ឺនដុល្លារជាងវិញ សម្រាប់អចលនទ្រព្យដែលជាប្រភេទលំនៅដ្ឋាន”។លោកបានធានាដល់ពលរដ្ឋក្នុងស្រុកថា “ការពិនិត្យច្បាប់ឡើងវិញនេះ គឺដើម្បីផ្តល់លទ្ធភាពដល់ជនបរទេសអាចទិញអចលនទ្រព្យក្នុងប្រទេសបាន ហើយអចលនទ្រព្យទាំងនោះនឹងបាត់បង់ទៅណាឡើយ វានៅតែស្ថិតនៅក្នុងប្រទេសដដែលដោយមិនបាច់មានការព្រួយបារម្ភពីការយកទៅប្រទេសរបស់គេនោះទេ”។

លោកបន្តថា រដ្ឋ Johor ជាតំបន់ដែលមានសក្តានុពលខ្ពស់ សម្រាប់អចលនទ្រព្យប្រភេទលំនៅដ្ឋាន ព្រោះជាតំបន់នៅជាប់ប្រទេសសឹង្ហបុរី ; ហើយរដ្ឋាភិបាលនឹងទទួលបានផលចំណេញច្រើនពីជនជាតិសឹង្ហបុរី ក្នុងការទិញអចលនទ្រព្យក្នុងរដ្ឋJohor ដើម្បីរស់នៅ ហើយពួកគេនឹងចំណាយលុយទៅលើចំណីអាហារ សម្ភារៈ និងវត្ថុចាំបាច់ច្រើន ដែលផ្តល់ផលប្រយោជន៍ច្រើនដល់សេដ្ឋកិច្ចដល់ប្រជាពលរដ្ឋក្នុងស្រុក។

យោងតាមរបាយការណ៍របស់នាយដ្ឋានសេវាអចលនទ្រព្យ និងការវតម្លៃបានលើកឡើងថា អចលនទ្រព្យដែលជាប្រភេទលំនៅដ្ឋានបានលក់ មិនចេញមានចំនួនកើនឡើង៣០ភាគរយ ពោលគឺមាន៣២,៣១៣យូនីត ដែលជាពិសេសកើនឡើងខ្លាំងនៅក្រុងកូឡាឡាំពួ និង Perak។

របាយការណ៍បន្តថា រដ្ឋធំៗជាច្រើន កំពុងប្រឈមនឹងការលក់អចលនទ្រព្យមិនចេញ គឺនៅក្រុង Kuala Lumpur រដ្ឋJohor និង រដ្ឋPenang ពោលមាន ៦.៨ភាគរយ ៧.៨ភាគរយ និង៣ភាគរយ៕

មជ្ឈមណ្ឌលពាណិជ្ជកម្មកំពស់កប់ពពកតម្លៃ ២០០លានដុល្លារបង្ហាញខ្លួននៅ តំបន់កោះនរា

May 6, 2019

0

ដោយៈ រ៉ាណេត

ភ្នំពេញៈ មជ្ឈមណ្ឌលពាណិជ្ជកម្មចំរុះ និងលំនៅដ្ឋានដ៏ទំនើប ទាន់សម័យ កម្ពស់៣៨ជាន់ មានតម្លៃទុនរហូត២០០លានដុល្លារសហរដ្ឋអាមេរិក នឹងផុសឡើងនៅតំបន់បឹងស្នោរ ក្បែរកោះនរា ក្រុងភ្នំពេញនាពេលខាងមុខនេះ។

អាគារពាណិជ្ជកម្មចំរុះ One Central Tower ដែលមានកម្ពស់៣៨ជាន់មានចំនួន៥អាគារ សាងសង់នៅលើផ្ទៃដី២៤,០០០ម៉ែត្រការ៉េ។

ប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃក្រុមហ៊ុន B.I.C Group លោក យឹម លក្ខណ៍ បានមានប្រសាសន៍ក្នុងពិធីបើកការដ្ឋានសាងសង់មជ្ឈមណ្ឌលពាណិជ្ជកម្មនេះនាព្រឹកថ្ងៃទី៦ ឧសភានេះថា ការរៀបចំពិធីបញ្ចុះបឋមសិលានៅព្រឹកនេះ គឺជាការចាប់ផ្តើមសាងសង់នូវគម្រោងអចលនទ្រព្យដំបូងបង្អស់របស់ B.I.C Group នៅក្នុងរាជធានីភ្នំពេញ។ សម្រាប់ការសាងសង់ One Central ដែលមានរយៈពេល2ឆ្នាំកន្លះ។ នេះគឺជាជំហានដំបូងនៃការអភិវឌ្ឍជាច្រើន ដើម្បីអភិវឌ្ឍតំបន់បឹងស្នោ ឲ្យទៅជាតំបន់សេដ្ឋកិច្ចលូតលាស់ថ្មីមួយទៀតដែលផ្តល់នូវការរស់នៅ ការងារ និងការកម្សាន្ត ដ៏ទំនើបសម្បូរបែបលំដាប់ពិភពលោក។

លោកបន្តថា “One Central គឺជាការរួមបញ្ចូលគ្នានូវការិយាល័យពាណិជ្ជកម្ម មជ្ឈមណ្ឌលផ្សារទំនើប មន្ទីរពេទ្យ អគារស្នាក់នៅ និងជាតំបន់ធម្មជាតិបៃតង”។

One Central Tower មានចំនួន៥អាគារ ដែលក្នុងនោះ អាគារចំនួន៤ នឹងដើរតួជាមជ្ឈមណ្ឌលពាណិជ្ជកម្មចំរុះ រួមមានអាគារការិយាល័យ ផ្សារទំនើប មន្ទីរពេទ្យទំនើប ភោជនីយដ្ឋានជាដើម ដោយមានកម្ពស់២២ជាន់ ដោយឡែកអាគារចំនួ១ទៀត ជាប្រភេទលំនៅដ្ឋានសហកម្មសិទ្ធិដ៏ទាន់សម័យដែលមានកម្ពស់រហូតដល់៣៨ជាន់។

លោកយឹម លក្ខណ៍ បានមានប្រសាសន៍បញ្ជាក់ទៀតថា “យើងចង់ប្រែក្លាយតំបន់នេះជាផ្នែកមួយនៃការអភិវឌ្ឍទីក្រុង ដែលអាចបង្កើតតំបន់សេដ្ឋកិច្ចថ្មីលំដាប់ពិភពលោក ជាមួយនឹងការទាក់ទាញការវិនិយោគធំៗលើការរស់នៅ និងការធ្វើពាណិជ្ជកម្មធំៗ”។ លោកបន្តថា “ចាប់តាំងពីដំណាក់កាលដំបូងនៃការរៀបចំផែនការ ក្រុមហ៊ុនបានផ្តោតការយកចិត្តទុកដាក់យ៉ាងខ្លាំងនូវការធានាមួយដែលត្រូវតែអភិវឌ្ឍតំបន់នេះ ឱ្យក្លាយជាតំបន់សេដ្ឋកិច្ចដ៏មានសក្តានុពលខ្លាំងក្លា រួមជាមួយការផ្តល់នូវបរិស្ថានរស់នៅល្អបំផុត ដល់ប្រជាពលរដ្ឋ”។

ប្រធានសមាគមអ្នកវាយតម្លៃ និងភ្នាក់អចលនវត្ថុកម្ពុជា(CVEA) លោកច្រឹក សុខនីម បានបង្ហាញពីការសាទរចំពោះវត្តមានថ្មី នៃអគារពាណិជ្ជកម្មចំរុះមួយនេះ ដោយលោកបានមានប្រសាសន៍ថា វាជារឿងល្អចំពោះការអភិវឌ្ឍន៍ និងភាពរីកចម្រើនលើវិស័យសំណង់ទំនើបៗ។

បច្ចុប្បន្ននេះ ចំពោះតំបន់បឹងស្នោរ បាននិងកំពុងតែមានភាពទាក់ទាញខ្លាំង ដោយសារតែវានៅមិនឆ្ងាយពីក្រុង ហើយមានលំហូរនៃចំនួនប្រជាសាស្ត្រ ដែលកម្រិតជីវភាពមធ្យម និងលើមធ្យមចូលទៅរស់នៅទីនេះច្រើន ជាពិសេសជាបណ្តុំនៃបុរី សំណង់លំនៅដ្ឋានច្រើន ហើយមិនលើសពីរយៈពេល៣ទៅ៤ឆ្នាំទៀតនោះទេ តំបន់បឹងស្នោរ នឹងកាន់តែមានភាពទាក់ទាញខ្លាំងជាងនេះទៀត៕

ទីផ្សារខុនដូតំលៃសមរម្យកំពុងមានការឈានមុខ ខណៈអ្នកអភិវឌ្ឍន៍កំពុងផ្តោតលើតម្រូវការនេះ

May 6, 2019

0

ដោយ ដន

ភ្នំពេញ: ខណៈពេលដែលវិនិយោគិន មានការព្រួយបារម្ភអំពីការផ្គត់ផ្គង់លើសតម្រូវការនៃគម្រោងខុនដូខ្ពស់ៗទំនើប អ្នកអភិវឌ្ឍន៍បច្ចុប្បន្ននេះកំពុងផ្តោតលើវិស័យខុនដូ ដែលមានតំលៃសមរម្យ ដើម្បីទាក់ទាញអ្នកទិញក្នុងស្រុក។

គម្រោងខុនដូថ្មីៗចំនួនប្រាំ បានបើកដំណើរការនៅឆ្នាំនេះ ក្នុងនោះគំរោងចំនួន៤ត្រូវបានចាត់ថ្នាក់កដែលជាខុនដូមានតំលៃសមរម្យ។ គម្រោងធំបំផុត ដែលបានបើកដំណើរការនៅត្រីមាសទី១នេះ គឺគម្រោងខុនដូភ្នំពេញស្តារ ដែលនឹងចាក់បញ្ចូលខុនដូយូនីតថ្មីចំនួន៤៤៨បន្ថែម ដែលមានតំលៃសមរម្យសម្រាប់វិស័យនេះ។

គម្រោងខុនដូចំនួនជាងពាក់កណ្តាល ដែលបានបើកដំណើរការនៅឆ្នាំនេះគឺស្ថិតនៅខណ្ឌ សែនសុខដែល មានតម្លៃសមរម្យបានទាក់ទាញចំណាប់អារម្មណ៍ និងតម្រូវការពីអ្នកទិញ និងអ្នកវិនិយោគក្នុងស្រុក។

ខុនដូយូនីតដែលរួចរាល់សម្រាប់ ការចូលស្នាក់នៅត្រូវបានគេរំពឹងថានឹងកើនឡើង១២០ភាគរយនៅចុងឆ្នាំនេះ។ ក្នុងឆ្នាំ ២០១៨ មានចំនួន១៤,១៧៣ យូនីតបានចាក់បញ្ចូល ក្នុងការផ្គត់ផ្គង់ក្នុងទីផ្សារខុនដូច ខណៈនៅចុងឆ្នាំ២០១៩នេះ ការផ្គត់ផ្គង់នឹងកើនឡើងដល់៣០,១១២ យូនីត។

អ្នកអភិវឌ្ឍន៍កំពុងផ្លាស់ប្តូរទៅចាប់យកវិស័យខុនដូ ដែលមានតំលៃសមរម្យដើម្បីបំពេញតម្រូវការទីផ្សារក្នុងស្រុក ហើយកំណើនប្រជាជនវ័យក្មេងដែលកំពុងកើនឡើងកំពុងចាប់អារម្មណ៍ ក្នុងការទិញលំនៅឋានដែលនៅក្បែរសាលារៀន ផ្សារទំនើប និងមានសេវាកម្មចំរុះនៅក្បែរនោះ។

លោកស្រី Grace Rachny Fong អគ្គនាយកប្រតិបត្តិក្រុមហ៊ុន Century 21 Cambodia បានមានប្រសាសន៍ថា “ទីផ្សារក្នុងស្រុកកំពុងចាប់ផ្តើមបង្ហាញសក្តានុពលកាន់តែច្រើន។ តំបន់សែនសុខដែលមានAEON2 និងសាលារៀននិងជាទីតាំងល្អសម្រាប់គ្រួសារ ក្នុងស្រុកវ័យក្មេងមានចាប់អារម្មណ៍ខ្លាំងសម្រាប់ការវិនិយោគ ដោយអ្នកអភិវឌ្ឍន៍ខុនដូដែលមានតំលៃសមរម្យ”។

លោកស្រីបន្តថា “អ្នកវិនិយោគក្នុងស្រុក កំពុងវិនិយោគនៅក្នុងខុនដូនៅទីនេះសម្រាប់កូនៗរបស់ពួកគាត់ដែលកំពុងធ្វើការ ឬសិក្សានៅបរទេស។ ពួកគាត់រំពឹងថា ពួកគេនឹងវិលត្រលប់មកប្រទេសវិញ និងចាប់ផ្ដើមគ្រួសារនៅក្បែរទីប្រជុំជនដែលជាទម្លាប់រស់នៅរបស់ពួកគេ ដោយសារមានទម្លាប់រស់នៅជាច្រើនឆ្នាំនៅបរទេស”៕

អ្នកជំនាញថា កម្ពុជាត្រូវរឹតបន្តឹង និងបង្កើតច្បាប់បន្ថែមដើម្បីទទួលភ្ញៀវទេសចរណ៍ចិន

May 6, 2019

0

ដោយ ម៉ាណេត

ភ្នំពេញ៖ ខណៈកម្ពុជាគ្រោងយកទេសចរណ៍ចិនឲ្យបាន៥លាននាក់នៅឆ្នាំ២០២៥ ខាងមុខនេះ អ្នកជំនាញថា កម្ពុជាត្រូវការរឹតបន្តឹងច្បាប់ និងបង្កើតច្បាប់បន្ថែមដើម្បីបង្កភាពងាយស្រួលដល់ភ្ញៀវទេសចរណ៍ក្នុងការមកទស្សនា។

ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានថ្លែងថា ខណៈពេលនេះ កម្ពុជាចាំបាច់បង្កើតច្បាប់បន្ថែមក្នុងការគ្រប់គ្រង ព្រោះករណីអត់ដែលកើតមានឡើងនៅកម្ពុជា ហើយមុននឹងបង្កើតច្បាប់យើងត្រៀមខ្លួនរួចរាល់ហើយឫនៅ មិនមែនបង្កើតច្បាប់មកចោលនោះទេ។

លោកថ្លែងថា “យើងឃើញស្រាប់ហើយ ច្បាប់ទេសចរណ៍ត្រូវបានបង្កើតឡើង៥ ឬ៦ ឆ្នាំមកហើយ តែរហូតមកដល់សព្វ ថ្ងៃសម្រាប់ការអនុវត្តន៍នៅមានកម្រិត។ វាត្រូវកើតឡើងពីឆន្ទៈរបស់មនុស្ស គឺមានតែច្បាប់ទេដែលបង្កើតចេញជាឆន្ទៈ និងមានតែរឹតបន្តឹងច្បាប់ទេ”។

លោក បន្តថា “យើងត្រូវដឹងថា ថ្វីត្បិតតែយើងមានច្បាប់ស្ទើតែគ្រប់ច្រកល្ហកដូចប្រទេសអភិវឌ្ឍន៍ដ៏ទៃក៏ពិតមែន ប៉ុន្តែការអនុវត្ដន៍ច្បាប់យើងនៅមានកម្រិតមែនទែន”។ លោក ទៀតថា “ឲ្យដឹងភ្ញៀវមកប៉ុន្មានក៏មកចុះ និងមកកាន់តែច្រើនកាន់តែល្អ ដូចជាអ្នកវិនិយោគចឹង មកពីណាក៏មកចុះឲ្យតែអ្នកនោះជា ប៉ុន្តែរឿងតែមួយគត់ តើប្រទេសជាម្ចាស់មានច្បាប់ និងក្រិតក្រមរបស់ខ្លូនហើយឬនៅ? យើងត្រូវពង្រឹងច្បាប់ និងចំណុចណាខ្វះខាតត្រូវបង្កើតបន្ថែម ហើយយើងត្រូវមើលប្រទេសចិនគេមានប្រជាជនរាប់ពានលាននាក់ គេគ្រប់គ្រងបាន។ អ្វីដែលយើងខ្វះខាតគឺការអនុវត្តន៍ច្បាប់”។

សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជាបានមានប្រសាសន៍ថា កម្ពុជាគ្រោងយកទេសចរណ៍ចិនឲ្យបាន៥លាននាក់នៅឆ្នាំ២០២៥ខាងមុខនេះ។

សម្តេចបានមានប្រសាសន៍ ក្នុងពិធីបើកការដ្ឋានសាងសង់ផ្លូវក្រវ៉ាត់ក្រុងទី៣នាព្រឹកថ្ងៃទី១៤ មករានេះថា នៅឆ្នាំ ២០១៨ កន្លងមកនេះ កម្ពុជាទទួលបានភ្ញៀវទេសចរណ៍ អន្តរជាតិចំនួន៦,២លាននាក់ ក្នុងនោះភ្ញៀវទេសចរណ៍ចិនបានកើនពី១,២កាលពីឆ្នាំ២០១៧ ទៅ១,៦លាននាក់នៅឆ្នាំ២០១៨កន្លងមកនេះ។

សម្តេចបានបន្តថា ក្នុងពេលដំណើរទស្សនកិច្ចរបស់អតីតប្រធានាធិបតីហូ ជីនតាវមកកម្ពុជា សម្តេចបានស្នើសុំឲ្យទេសចរណ៍ចិនមកទស្សនាកម្ពុជា០,០១ភាគរយ ប៉ុន្តែនៅក្នុងដំណើរទស្សនកិច្ចរបស់សម្តេចទៅកាន់ប្រទេសចិននាចុងសប្តាហ៍នេះ សម្តេចនឹងពិភាក្សាពីបញ្ហានេះជាមួយមេដឹកនាំចិន ដោយសុំឲ្យភ្ញៀវទេសចរណ៍ចិនមកទស្សនាកម្ពុជា០,០៥ភាគរយ នៃចំនួនប្រជាជនចិនប្រមាណ១៣០០លាននាក់។

សម្តេចតេជោហ៊ុន សែនបានបន្តថា បច្ចុប្បន្នវិស័យអាកាសចរណ៍ចិនបានហោះត្រង់មកកម្ពុជាកាន់តែកើនឡើង កាន់តែច្រើននាពេលបច្ចុប្បន្ននេះ ហើយសម្តេចបានស្នើសុំឲ្យក្រុមហ៊ុនចិន ដែលកំពុងវិនិយោគគំរោងតារាសាគរនៅខេត្តកោះកុង សាងសង់ព្រលានយន្តហោះអាចទទួលអ្នកដំណើរឲ្យបាន៣លាននាក់ និងទទួលទានអង្ករកម្ពុជា។

ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានមានប្រសាសន៍ថា យុទ្ឋសាស្រ្តរបស់ប្រមុខរដ្ឋាភិបាលបែបនេះ សុបិននឹងក្លាយជាការពិត ដោយសារទំនាក់ទំនងកាទូត ពាណិជ្ជកម្ម ពិសេសការប្រកាន់គោលនយោបាយចិនតែមួយ និងការដាក់ចេញយុទ្ឋសាស្រ្តគ្រប់ជ្រុងជ្រោយ នៃមេដឹកនាំរបស់ប្រទេសទាំងពីរកម្ពុជានឹងសម្រេចបាននូវគោលដៅនេះ ព្រោះបើគិតពីដើមឆ្នាំ២០១៩នេះដល់ឆ្នាំ២០២៥ យើងសល់ពេល៧ឆ្នាំទៀត។

លោកបន្តថា “ជាមួយនឹងកំនើនទេសចរណ៍បែបនេះ អ្វីយើងគួរធ្វើគឺត្រូវរៀបចំខ្លួនបែបណា ដើម្បីទទួលបានភ្ញៀវក្នុងចំនួនច្រើនបែបនេះ ព្រោះយើងមិនចង់បានតែចំនួនមនុស្សទេ តែយើងក៏ត្រូវពង្រឹង និងផ្តល់សេវាកម្មប្រកបដោយគុណភាពផងដែរ”៕

រដ្ឋមន្ត្រីទេសចរណ៍ថា ស្រែអំបិលជាគោលដៅទេសចរណ៍ដ៏ទាក់ទាញមួយសម្រាប់ទស្សនា

May 6, 2019

0

ដោយ វុត្ថា

កំពត៖ រដ្ឋមន្ត្រីក្រសួងទេសចរណ៍ លោក ថោង ខុន បានអះអាងថា ស្រែអំបិលនៅក្នុងខេត្តកំពត ខេត្តកែបអាចជាគោលដៅទេសចរណ៍ថ្មីមួយសម្រាប់ទស្សនា ស្វែងយល់និង អប់រំឱ្យមានការយល់ដឹង ពីជីវភាពកសិករ និងការផលិតអំបិល។

យោងតាមការចុះផ្សាយតាមរយៈហ្វេសបុកផ្លូវការរបស់ក្រសួងទេសចរណ៍នៅថ្ងៃទី ៦ ខែឧសភា នេះថា រដូវនេះជារដូវប្រមូលផល អំបិលពី ស្រែអំបិល(ខេត្តកែប ខេត្ត កំពត) គួរនាំគ្នាលើកស្ទួយនិងប្រើប្រាស់អំបិលរបស់ជាតិ ( អំបិលក្នុងស្រុកយើង ដែលមានតាំងពីដើមរៀងមក) ហើយជាអំបិលដែលសម្បូរដោយជាតិ Iode ដែលអាចជួយកាត់បន្ថយបានច្រើនដល់ជំងឺពក “ក”។

មិនគ្រាន់តែជាតំបន់វិនិយោគទុនប៉ុណ្ណោះទេ កសិដ្ឋានស្រែអំបិលខេត្តកំពត និងក្រុងកែប បានក្លាយជាកន្លែងទេសចរណ៍មួយសម្រាប់អ្នកដែលមានចំណាប់អារម្មណ៍ និងចង់ស្វែងយល់បន្ថែមពីការធ្វើអំបិល។ មិនតែប៉ុណ្ណោះ តំបន់នេះពិតជាល្អ និងស្រស់សម្រាប់ការថតរូប និងវីដេអូ ជាពិសេសនៅពេលព្រឹកព្រលឹមថ្ងៃរះ និងពេលសូរិយារៀបអស់ស្តង្គត់។

លោក ធួន ស៊ីណា ប្រធានសមាគមន៍ PATA បានឱ្យដឹងដែរថា ពិតណាស់ ស្រែអំបិលនៅក្នុងខេត្តកំពត ខេត្តកែប គឺជាគោលដៅទេសចរណ៍ដ៏សំខាន់ តែក៏មានការព្រួយបារម្ភខ្លាំងណាស់ដែរក្រោយមកមានការលេចលឺរឿងការរំលាយសហគមន៍ស្រែបិល ហើយពួកគេលក់ដីនៅតំបន់នោះយកទៅអភិវឌ្ឍន៍អ្វីផ្សេង វានឹងប៉ពាល់ខ្លាំងដល់ការផលិតអំបិលតំបន់ដែលជាកេរ្តិ៍ខ្មែរយើង ព្រោះដំលៃដីនាពេលបច្ចុបប្បន្នកាន់តែឡើងថ្លៃ ។

លោកបន្តថា “បើរដ្ឋមានវិធីសាស្រ្តណាមួយជួយពួកគេក្នុងការទប់ស្កាត់ក្នុងការរក្សាស្រែអំបិលទាំងនេះបាន គឺជារឿងល្អបំផុតសម្រាប់ប្រទេសកម្ពុជា ព្រោះវាជាគោលដៅទេសចរណ៍ថ្មី ហើយក៏អាចរក្សាអត្តសញ្ញាណរបស់យើងបានដែរ”។

លោកបានផ្តល់យោបល់ដល់រដ្ឋាភិបាលគួរតែមានការផ្តល់ជំនួយណាមួយដើម្បីជួយសម្រួលដល់កសិករស្រែអំបិលទាំងនោះឱ្យមានលទ្ធភាពផលិតអំបិល បើមិនចឹងទេ គឺមិនអាចទប់ជាប់នៃការទន្រ្ទានចូលទៅទិញដីនៅទីនោះ បើកសិករអាចលក់ដីយកលុយទៅប្រកបមុខរបរផ្សេង វានឹងបាត់បង់នូវអត្តសញ្ញាណស្រែអំបិលនៅក្នុងខេត្តនេះហើយ”។

លោក ជាវ តាយ អភិបាលខេត្តកំពតកាលពីកន្លងមកនេះបានមានប្រសាសន៍ថា ការទទួលផលអំបិលរបស់សហគមន៍អ្នកផលិត អំបិលកំពត-កែបនៅពេលបច្ចុប្បន្នពឹងផ្អែកទាំងស្រុងលើកត្តាធម្មជាតិ។

ប្រសិនបើមានក្រុមអ្នកបច្ចេកទេសជំនាញផ្នែកខាងអំបិលរ៉ែ រដ្ឋបាលខេត្តកំពតស្វាគមន៍និងសហការ ដើម្បីទាញយកអំបិលមកប្រើប្រាស់ជំនួសឱ្យការបូមទឹកសមុទ្រហាលជាច្រើនថ្ងៃនោះ។

លោកបន្តថា ឆ្នាំ២០១៨ កន្លងមក អំបិលដែលផលិតបានមានបរិមាណតិចតួចបំផុត គឺប្រហែលពីបីពាន់ទៅបួនពាន់តោនប៉ុណ្ណោះ ព្រោះតែធាតុអាកាសមិនអំណោយផល។ អំបិលដែលនៅសេសសល់ពីឆ្នាំមុនៗប្រមាណមួយសែនតោននោះ គឺបានប្រើប្រាស់អស់ទាំងស្រុង រហូតមានការនាំចូលមកពីប្រទេសប្រទេសក្រៅ ព្រោះក្នុងមួយឆ្នាំៗត្រូវការប្រើប្រាស់មួយសែនតោនសម្រាប់ទូទាំងប្រទេស។

ដូច្នេះ បើសិនជាផលិតមិនបានមួយសែនតោននោះការផ្គត់ផ្គង់អំបិលមិនគ្រប់តាមតម្រូវការឡើយ។ ប៉ុន្តែក្នុងករណីធាតុអាកាសល្អ ជាមួយនឹងចំនួនស្រែអំបិលដែលមាននៅខេត្តកំពត និងខេត្តកែប ជាងបួនពាន់ហិកតា គឺអាចផលិតបានពីមួយសែនប្រាំម៉ឺនតោនទៅមួយសែនប្រាំមួយម៉ឺនតោន៕

រដ្ឋាភិបាលជប៉ុនលើកទឹកចិត្តជនជាតិរបស់ខ្លួនឱ្យមកវិនិយោគនៅកម្ពុជា

May 6, 2019

0

ដោយ រ៉ាណេត

ភ្នំពេញ៖ មន្ត្រីជាន់ខ្ពស់របស់រាជរដ្ឋាភិបាលជប៉ុនបានសន្យានឹងព្យាយាមជំរុញ និងលើកទឹកចិត្តជនជាតិជប៉ុនឱ្យមកទេសចរណ៍ ជាពិសេសបង្កើតកិច្ចសហការជាដៃគូវិនិយោគនៅក្នុងប្រទេសកម្ពុជា ឱ្យកាន់តែច្រើនតាមដែលអាចធ្វើទៅបាន ខណៈដែលកម្ពុជាគឺជាគោលដៅវិនិយោគទីមួយរបស់ជប៉ុន ជាមួយនឹងក្ដីសង្ឃឹមខ្ពស់ក្នុងការទទួលបានឱកាសចំណេញច្រើនត្រឡប់ទៅវិញ។

មន្រ្តីជាន់់ខ្ពស់រដ្ឋាភិបាលជប៉ុនបានអះអាងថា កម្ពុជាជាប្រទេសដែលមានឱកាសវិនិយោគដ៏ទាក់ទាញប្រកបដោយក្តីសង្ឃឹម ហើយជប៉ុនប្តេជ្ញានឹងជំរុញលំហូរទេសចរ និងអ្នកវិនិយោគមកកាន់កម្ពុជាឱ្យកាន់តែច្រើនបន្ថែមទៀត។ ការប្រកាសជំហររបស់រាជរដ្ឋាភិបាលជប៉ុនបែបនេះ ត្រូវបានធ្វើឡើងនៅក្នុងមហោស្រពកម្ពុជាឆ្នាំ២០១៩ (Cambodia Festival 2019) ប្រទេសជប៉ុន កាលពីចុងសប្ដាហ៍កន្លងទៅនេះ នៅសួន Yoyogi ទីក្រុងតូក្យូ ក្រោមកិច្ចសហការរៀបចំពីក្រសួងទេសចរណ៍កម្ពុជា ក្រសួងវប្បធម៌ វិចិត្រសិល្បៈ ក្រសួងពាណិជ្ជកម្ម និងស្ថានឯកអគ្គរាជទូតកម្ពុជាប្រចាំប្រទេសជប៉ុន។

លោក Kenji YAMADA អនុរដ្ឋមន្ត្រីនៃក្រសួងការបរទេសជប៉ុន បានថ្លែងកោតសរសើរពីការអភិវឌ្ឍរបស់កម្ពុជា ក្រោមពន្លឺនៃសុខសន្តិភាព និងលទ្ធិប្រជាធិបតេយ្យ និងជាប្រទេសដែលមានឱកាសវិនិយោគដ៏ទាក់ទាញ និងសម្បូរដោយកម្លាំងពលកម្មវ័យក្មេង ប្រកបដោយសក្តានុពល និងប្រកបដោយក្តីសង្ឃឹម ហើយជាមួយនឹងកិច្ចសហប្រតិបត្តិការល្អដ៏យូរលង់រវាងប្រទេសទាំងពីរ ជប៉ុនប្តេជ្ញាជំរុញលំហូរទេសចរ និងអ្នកវិនិយោគមកកាន់កម្ពុជាបន្ថែមទៀតផងដែរ។

គិតត្រឹមដើមឆ្នាំ២០១៩ ក្រុមហ៊ុនជប៉ុន តូច-ធំ បាននិងកំពុងធ្វើប្រតិបត្តិការជំនួញ និងការវិនិយោគនៅកម្ពុជាប្រមាណជាង២០០០ក្រុមហ៊ុន ដែលមានទំហំវិនិយោគប្រមាណ២,៥ពាន់លានដុល្លារសហរដ្ឋអាមេរិក នៅក្នុងក្របខណ្ឌនៃការវិនិយោគផ្ទាល់ពីជប៉ុន។

អ្នកវិភាគសេដ្ឋកិច្ចកម្ពុជា និងជាអ្នកវិនិយោគក្នុងវិស័យអចលនទ្រព្យលោក ង៉ែត ជូ បានមានប្រសាសន៍ប្រាប់តាមទូរស័ព្ទថា ជាទូទៅ ជនជាតិជប៉ុនត្រូវបានគេទទួលស្គាល់ជាជាតិជាសាសន៍មួយដែលមានភាពទៀងត្រង់ និងមានការវិភាគ សិក្សាយ៉ាងស៊ីជម្រៅ ច្បាស់លាស់មុនពេលសម្រេចចិត្តវិនិយោគ ឬសហការធ្វើជំនួញជាមួយប្រទេសណាមួយ។ នៅក្នុងន័យនេះ វាជារឿងល្អសម្រាប់ការបង្ហាញវត្តមានកាន់តែច្រើន របស់អ្នកវិនិយោគជប៉ុននៅកម្ពុជា បានន័យថាពួកគេមានទំនុកចិត្តខ្ពស់ជាមួយកម្ពុជា»។

យ៉ាងណាក៏ដោយ បើទោះជាចំនួនក្រុមហ៊ុនជប៉ុន ដែលកំពុងតែមានសកម្មភាពយ៉ាងច្រើននៅកម្ពុជានាពេលបច្ចុប្បន្ននេះក៏ដោយ ប៉ុន្តែលោកបានបង្ហើបថា វានៅតែមិនទាន់គ្រប់គ្រាន់នៅឡើយ ព្រោះភាគច្រើនក្រុមហ៊ុនដែលកំពុងដំណើរការវិនិយោគ ស្ថិតនៅក្នុងទ្រង់ទ្រាយជាឧស្សាហកម្មកម្រិតស្រាលនៅឡើយ ដែលហាក់មិនទាន់ឃើញមានការវិនិយោគក្នុងគម្រោងធំដុំនៅឡើយ ក្រៅតែពីផ្សារទំនើប AEON និងគម្រោងអភិវឌ្ឍវិស័យអចលនទ្រព្យមួយចំនួនតូចតែប៉ុណ្ណោះ។

ឆ្នាំ២០១៩នេះ គឺជាខួបលើកទី៦៦ នៃទំនាក់ទំនងការទូតរវាងប្រទេសទាំងពីរ កម្ពុជា-ជប៉ុន ហើយបច្ចុប្បន្នជប៉ុន មិនត្រឹមតែមានស្ថានទូតនៅរាជធានីភ្នំពេញប៉ុណ្ណោះទេ តែក៏មានស្ថានកុងសុលនៅខេត្តសៀមរាបផងដែរ។

កាលពីឆ្នាំ២០១៨ កន្លងទៅ កម្ពុជាទទួលបានភ្ញៀវទេសចរអន្តរជាតិជាង៦.២ លាននាក់ ក្នុងកំណើន១០.៧ ភាគរយ ក្នុងនោះទេសចរជប៉ុនមានចំនួនជាង២១ ម៉ឺននាក់ ក្នុងកំណើន ៣.៥ ភាគរយ។ គិតក្នុងរយៈពេល២ខែ ដើមឆ្នាំ ២០១៩ នេះ កម្ពុជាទទួលបានទេសចរអន្តរជាតិជាង១.២លាននាក់ ក្នុងនោះទេសចរជប៉ុនជិត៤ម៉ឺននាក់ ក្នុងកំណើន ៣.១ ភាគរយ។ ទេសចរជប៉ុនតែងស្ថិតក្នុងចំណោមប្រភព ទីផ្សារទេសចរណ៍ធំៗទាំង១០របស់កម្ពុជា។ ក្នុងឆ្នាំ២០១៩នេះ កម្ពុជារំពឹងថានឹងទទួលបានទេសចរជប៉ុនប្រមាណជាង២៣ម៉ឺននាក់ផងដែរ៕

ខេត្តបាត់ដំបងជាប់ជាទីក្រុងគោលដៅទេសចរណ៍លេខ១៣ ក្នុងតំបន់អាស៊ីអាគ្នេយ៍

May 6, 2019

0

ដោយ វុត្ថា

ភ្នំពេញ៖ ប្រធានមន្ទីរទេសចរណ៍ខេត្តបាត់ដំបងបានឱ្យដឹងថា ថ្មីៗនេះខេត្តបាត់ដំបង បានជាប់ជាទីក្រុងគោលដៅទេសចរណ៍លេខ១៣ ក្នុងចំណោមបណ្តាទីក្រុងទាំង៩៣នៅតំបន់អាស៊ីអាគ្នេយ៍ វាយតម្លៃដោយស្ថាប័នផ្សព្វផ្សាយទេសចរណ៍អន្តរជាតិរបស់អាល្លឺម៉ង់មួយឈ្មោះថា YouDiscover ។

ជាមួយគ្នានេះក្រុងសៀមរាប ជាគោលដៅទេសចរណ៍ទាក់ទាញបំផុតឈរលេខ១ ទីក្រុងបាងកក ឈរលេខ២ ទីក្រុងសិង្ហបុរីឈរ លេខ៣ និង រាជធានីភ្នំពេញឈរនៅលំដាប់លេខ៤។

លោក អ៊ុច អ៊ំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានឱ្យដឹងកាលពីកន្លងមកនេះថា ជាមួយមោទនភាពនេះ ដោយសារការយកចិត្តទុកដាក់របស់ លោកអភិបាលខេត្ត និងស្ថាប័នជំនាញ នានាបានជួយជំរុញឱ្យខេត្តបាត់ដំបង ក្លាយជាខេត្ត មួយដែលគួរជាទីកក់ក្តៅបំផុតសម្រាប់ប្រជាពលរដ្ឋ និងភ្ញៀវទេសចរណ៍។

លោកបន្តថា រដ្ឋបាលខេត្តសហការ យ៉ាងស្អិតរមួតជាមួយអង្គភាព និងមន្ទីរពាក់ព័ន្ធទូទាំងខេត្ត បានខិតខំអភិវឌ្ឍ និងជួសជុលហេដ្ឋារចនាសម្ព័ន្ធ ឆ្ពោះទៅកាន់គោលដៅទេសចរណ៍ នានាព្រមទាំងបានរៀបចំ និងបង្កើតនូវព្រឹត្តិការណ៍ទេសចរណ៍ជាច្រើន ដើម្បីទាក់ទាញភ្ញៀវទេសចរណ៍ជាតិ និងអន្តរជាតិមកកម្សាន្តសប្បាយក្នុងខេត្ត ដែលបានរួមចំណែកយ៉ាងសំខាន់ ក្នុងការលើកកម្ពស់សេដ្ឋកិច្ចរបស់ប្រជាពលរដ្ឋ ក្នុងខេត្តបាត់ដំបងទាំងមូល ។

មិនតែប៉ុណ្ណោះ រដ្ឋបាលខេត្តបានយកចិត្តទុកដាក់យ៉ាងខ្លាំង ចំពោះការរៀបចំថែរក្សា អនាម័យ បរិស្ថាន ការគ្រប់គ្រងកាកសំណល់ ការបញ្រ្ជាបការយល់ ដឹងដល់ប្រជពលរដ្ឋឱ្យចូលរួម ធ្វើការដាំដុះដើមឈើបង្កើននូវតំបន់បៃតង កត្តាសន្តិសុខ សណ្តាប់ធ្នាប់ ហេដ្ឋារចនាសម្ព័ន្ធ និងសម្បទាទ្រទ្រង់វិស័យទេសចរណ៍។

ជាក់ស្តែងកន្លងមកនេះ ក្រុងបាត់ដំបងបានទទួលសមិទ្ធផលសំខាន់ៗ ដូចជា ជាប់ជ័យលាភីទីក្រុងស្អាតលើកទី១ និងលើកទី២ ផ្ការំដួល៣ទង ចំណាត់ថ្នាក់លេខ១ជាប់ជ័យលាភីឡាប៊ិល ទីក្រុងស្អាតអាស៊ានលើកទី១ (២០១៨-២០២០) ជាប់ជ័យលាភីនិរន្តរភាពទីក្រុងអាស៊ានក្នុងឆ្នាំ២០១៤ ជាខេត្តដែលមានភ្ញៀវទេសចរណ៍មកកម្សាន្តសប្បាយច្រើនជាងគេ នៅកម្ពុជាក្នុងឱកាសចូលឆ្នាំខ្មែរឆ្នាំ២០១៩។ ជាប់ជាទីក្រុងគោលដៅទាក់ទាញទេសចរណ៍ឈរលើលំដាប់លេខ១៣ ក្នុងចំណោមបណ្តាទីក្រុងទាំង៩៣ នៅតំបន់អាស៊ីអាគ្នេយ៍ (វាយតម្លៃដោយ ស្ថាប័នផ្សព្វផ្សាយទេសចរណ៍អន្តរជាតិ របស់អាល្លឺម៉ងមួយ មានឈ្មោះថា YOU DICOVER) និងពានរង្វាន់ជាច្រើនទៀត។

លោកប្រធានមន្ទីរបានបន្តថា ;មិនតែប៉ុណ្ណោះប្រតិបត្តិករទេសចរណ៍ ទូទាំងខេត្តបាត់ដំបង តែងចូលរួមក្នុងចលនាប្រឡងប្រណាំងសំខាន់ៗជាច្រើន និងទទួលបានលទ្ធផលជោគជ័យមានដូចជា ស្តង់ដាសណ្ឋាគារបៃតង ពានរង្វាន់សម្តេចតេជោនាយករដ្ឋមន្រ្តី រង្វាន់ធុរកិច្ចបៃតងក្នុងវិស័យទេសចរណ៍ រមណីយដ្ឋានទេសចរណ៍គំរូសហគមន៍ទេសចរណ៍ គំរូមេដាយនារីឆ្នើមក្នុងវិស័យទេសចរណ៍ មេដាយអ្នកជំនាញឆ្នើមក្នុងឧស្សាហកម្មទេសចរណ៍ជាដើម ដែលជាសញ្ញាមួយបង្ហាញថា ខេត្តបាត់ដំបងផ្តល់សេវាកម្មក្នុងកម្រិតស្តង់ដាដ៏ប្រសើរ និងត្រូវបានទទួលស្គាល់លំដាប់អន្តរជាតិ ។ កក្តាទាំងនេះហើយ បានជំរុញកំណើនភ្ញៀវទេសចរណ៍ជាតិ និងអន្តរជាតិឱ្យមកកម្សាន្តក្នុងខេត្តបាត់ដំបងមានការកើនឡើងពីមួយឆ្នាំទៅមួយឆ្នាំ។

ព្រមជាមួយគ្នានេះ ក្រុងបាត់ដំបងកំពុងនឹងត្រៀមខ្លួន បញ្ចូលជាទីក្រុងបេតិកភណ្ឌរបស់អង្គការយូណេស្កូនាពេលខាងមុខនេះដែរ ដែលជាកាតាលីករមួយយ៉ាងសំខាន់ក្នុងការជំរុញកំណើនទេសចរណ៍យ៉ាងច្រើន នាពេលខាងមុខបន្តទៀត៕