ដោយ វុត្ថា
សៀមរាប៖ សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានអះអាងថា របត់នៃពាណិជ្ជកម្មអន្តរជាតិ និងបញ្ហាប្រឈមដែលបង្ករឡើងដោយប្រទេសមហាអណាចធំៗនៅលើពិភពលោក ដែលបាននិងកំពុងអូសទាញប្រទេសសមាជិកអាស៊ាន និងប្រទេសគាំទ្ររបបពាណិជ្ជកម្មសេរីក្នុងទិសដៅផ្សេងគ្នា ។
សម្តេចតេជោគថ្លែងនៅក្នុងពិធីបើកកិច្ចប្រជុំ 7th RCEP ISSL-MM ដែលរៀបចំឡើងនៅសៀមរាប ថ្ងៃទី ២ ខែមីនានេះ ថា ប៉ុន្តែទោះជាយ៉ាងនេះក្តី កម្ពុជា និងសមាជិកអាស៊ានទាំងអស់នៅតែអាចបន្តធ្វើការជាមួយគ្នាដើម្បីស្វែងរកមូលដ្ឋាន ទិដៅ និងអត្ថប្រយោជន៍រួម។
សម្តេចបន្តថា កត្តាប្រែប្រួលនៃភូមិសាស្ត្រនយោបាយ និងប៉ូលសេដ្ឋកិច្ចពិភពលោក ព្រមទាំងសារៈសំខាន់នៃការបង្កើតតំបន់ពាណិជ្ជកម្មសេរី RCEP ដើម្បីប្រែក្លាយសេដ្ឋកិច្ចក្នុងតំបន់អាស៊ី ឱ្យទៅជាប៉ូលសេដ្ឋកិច្ចស្នូល សំដៅជួយទប់ស្កាត់គោលនយោបាយគាំពារនិយម និងការរីករាលដាលនៃសង្គ្រាមពាណិជ្ជកម្ម។
សម្តេចបន្ថែមថា “កម្ពុជា និងប្រទេសសមាជិកអាស៊ានទាំងអស់ប្តេចជ្ញាចិត្តយ៉ាងមោះមុត ក្នុងការគាមទ្រគោលនយោបាយពហុភាគីដែលមានភាពបើកចំហ ដែលជាមូលដ្ឋានក្នុងការរក្សាកំណើន និងការអភិវកឌ្ឍសេដ្ឋកិច្ចក្នុងតំបន់ និងសកល ជាច្រើនទស្សវត្សរ៍ កន្លងមកហើយ បើមិនដូច្នោះ ពិភពលោក នឹងមានភាពច្របូកច្របល់ អាចបណ្តាលឱ្យមានសង្គ្រាមសេដ្ឋកិច្ចក្នុងកាលៈទេសៈណាមួយ។
សម្តេចតេជោបានថ្លែងអំណរគុណដល់ថ្នាក់ដឹកនាំប្រទេសចូលរួមទាំងអស់ដែលបានប្រឹងប្រែងជំរុញកិច្ចចរចានាពេលកន្លងមក ដើម្បីឈានទៅបង្កើតតំបន់ពាណិជ្ជកម្មសេរីដ៏ធំបំផុត នៅក្នុងតំបន់អាស៊ីនាពេលអនាគតដ៏ខ្លីខាងមុខ ដែលនឹងក្លាយជាមូលដ្ឋានគ្រឹះដ៏រឹងមុំាមួយ សម្រាប់វិបុលភាពសេដ្ឋកិច្ចពិភពលោក។
អន្តរកិច្ចថ្នាក់រដ្ឋមន្ត្រីលើកទី៧ ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (7th RCEP ISSL MM)
ធ្វើឡើងនាពេលនេះ គឺដើម្បីបន្តការចរចា និងដោះស្រាយ បញ្ហាសេសសល់នានាបន្ទាប់ពីកិច្ចប្រជុំគណៈកម្មការចរចាពាណិជ្ជកម្ម លើកទី ២៥ និងកិច្ចប្រជុំពាក់ព័ន្ធ ដែលបានធ្វើឡើងកាលពីថ្ងៃទី ១៩ ដល់ ២៨ ខែកុម្ភៈ ឆ្នាំ ២០១៩ នៅកោះបាលី ប្រទេសឥណ្ឌូនេស៊ី សំដៅឈានទៅបញ្ចប់ការចរចាកិច្ចព្រមព្រៀង RCEP ទាំងស្រុកនៅក្នុង ២០១៩ តាមអាណត្តិដែលបានផ្តល់ឱ្យដោយថ្នាក់ដឹកនាមប្រទេសចរចា RCEP ទាំង ១៦ នៅអំឡុងកិច្ចប្រជុំកំពូល RCEP លើកទី ២ កាលពីថ្ងៃទី ១៤ ខែវិច្ឆិកា ឆ្នាំ ២០១៨ នៅប្រទេសសឹង្ហបុរី៕
