ស្វែងយល់ពីអាស៊ាន៖ ទីផ្សារអលចនទ្រព្យនៅប្រទេសចំនួន៥ ក្នុងតំបន់អាស៊ានកំពុងមានសន្ទុះរីកចម្រើន

April 18, 2019

ដោយ នៅ ស៊ីវុត្ថា

អាស៊ាន៖ ទីផ្សារអលចនទ្រព្យនៅទូទាំងតំបន់អាស៊ាន ចាប់តាំងពីដើមឆ្នាំ ២០១៩ រហូតមកដល់ពេលបច្ចុប្បន្ននេះ នៅតែបន្តមានសន្ទុះរីកចម្រើន ជាមួយនឹងគោលនយោបាយល្អរបស់រដ្ឋាភិបាលប្រទេសនិមួយៗ កំណែទម្រង់ពន្ធដារ និងការចំណាយទៅលើតម្រូវការហេដ្ឋារសម្ព័ន្ធកើនឡើង។

យោងតាមការចុះផ្សាយរបស់សារព័ត៌មាន The Business Times ចុះផ្សាយនៅថ្ងៃទី ១៨ ខែមេសា នេះ បានឲ្យដឹងថា ក្រុមអ្នកវិនិយោគមកពីគ្រប់ផ្នែកបានចាប់អារម្មណ៍វិនិយោគលើការិយាល័យលំនៅដ្ឋាន មជ្ឈមណ្ឌលពាណិជ្ជកម្ម និង ឃ្លាំងស្តុកទំនិញ។

ខាងក្រោមនេះគឺជាចំណុចខ្លះៗ នៃការរីកចម្រើនទីផ្សារអលចនទ្រព្យនៅក្នុងប្រទេសក្នុងតំបន់អាស៊ាន។

ប្រទេសសឹង្ហបុរី

ទីផ្សារអលនទ្រព្យពាណិជ្ជកម្មនៅក្នុងប្រទេសសឹង្ហបុរី បាននៅតែរក្សាបានការចាប់អារម្មណ៍ពីអ្នកវិនិយោគិន និងអ្នកអភិវឌ្ឍន៍ ជាមួយនឹកមណើនការជួលការរិយាល័យធ្វើការ។ ចំនួនភ្ញៀវទេសចរណ៍កើនឡើងបានធ្វើឲ្យបន្ទប់ និងការសាងសង់សណ្ឋាគារកើនឡើង។ ជាមួយគ្នានោះលំនៅដ្ឋានសម្រាប់ស្នាក់នៅក៏ត្រូវបានគេរំពឹងថា នឹងកើនឡើង ក្នុងត្រីមាសទី២ខាងមុខនេះ ខណៈអ្នកអភិវឌ្ឍន៍បានត្រៀមសម្ពោធអគារថ្មីៗជាច្រើនផ្សេងទៀត។

ប្រទេសវៀតណាម

ទីផ្សារអលនទ្រព្យរបស់ប្រទេសវៀតណាម បានទទួលលំហូរទុនវិនិយោគផ្ទាល់ពីបរទេស(FDI) ចំនួន២.៥៩ ពាន់លានដុល្លារអាមេរិកក្នុងរយៈពេល២ខែនៃឆ្នាំ ២០១៩ នេះ កើនឡើង ១០ ភាគរយបើធៀបនឹងរយៈពេលដូចគ្នា។

ប្រទេសឥណ្ឌូនេស៊ី

ការវិនិយោគលើអចលនទ្រព្យរបស់ប្រទេសឥណ្ឌូនេស៊ី ទំនងជារក្សាកំនើនដដែល ដោយសារតែមានការបោះឆ្នោតជ្រើសរើសប្រធានាធិបតី និងការចូលឆ្នាំឥស្លាម ។ ក្រុមអ្នកវិនិយោគអាចរំពឹងថា នឹងកើនឡើងលើវិស័យឡូជីស្ទីក និងលំនៅដ្ឋាន រួមជាមួយនឹងអគារការិយាល័យធ្វើការ។

ប្រទេសថៃ

សម្រាប់ទីផ្សារអលនទ្រព្យនៅក្នុងប្រទេសថៃវិញ នៅតែរក្សាបានស្ថេរភាបខ្ពស់សម្រាប់អ្នកវិនិយោគិន បើទោះបីមានការបោះឆ្នោតជ្រើសរើស នាយករដ្ឋមន្ត្រីនៅក្នុងឆ្នាំ នេះក្តី។ ចំនួនគម្រោងសំណង់ពាណិជ្ជកម្មជាច្រើនបាន និងកំពុងដំណើរការទៅមុខយ៉ាងរលូននៅក្នុងទីក្រុងបាងកក និង មានអ្នកវិនិយោគិនជាច្រើនបាងនឹងកំពុងផ្តោតលើការចុះហត្ថលេខា និងបោះទុនបន្ថែម ដើម្បីវិនិយោគលើគម្រោងជាច្រើនទីកន្លែងផ្សេងទៀត។

ប្រទេសកម្ពុជា

ប្រទេសកម្ពុជានៅតែមានសញ្ញារីកចម្រើនយ៉ាងរ៉ឹងមាំ នៃវិស័យនេះ ដោយសារតែការរីកចម្រើនសេដ្ឋកិច្ច និងគាំទ្រដោយគោលនយោបាយ ព្រមទាំងកំណែទម្រង់ថ្មីៗរបស់រដ្ឋាភិបាល។

នាយករដ្ឋមន្រ្តីកម្ពុជា សម្តេចតេជោហ៊ុន សែនបានប្រកាសកាលពីពេលថ្មីៗនេះថា ការវិនិយោគក្នុងវិស័យសំណង់កើនឡើងជាង៧០០ភាគរយ ក្នុងរយៈពេលបីខែដើមឆ្នាំនេះ ប៉ុន្តែទោះជាយ៉ាងណាប្រមុខរដ្ឋាភិបាល មិនបានបង្ហាញពីទំហំទុនវិនិយោគ និងចំនួនគំរោងសរុបនោះទេ៕

កំណើននៃការផ្គត់ផ្គង់ផ្សារទំនើបនៅកម្ពុជាហក់ឡើងខ្ពស់ជាងប្រទេសវៀតណាម

April 18, 2019

0

ដោយ រ៉ាណេត

ភ្នំពេញ៖ ជាមួយនឹងគម្រោងនៃផ្សារទំនើប ដែលគ្រោងបើកដំណើរការចំនួន៩ បន្ថែមទៀតនៅត្រឹមដំណាច់ឆ្នាំ២០១៩នេះ បានធ្វើឲ្យការផ្គត់ផ្គង់ផ្សារទំនើបនៅកម្ពុជាកើនខ្ពស់ជាងប្រទេសវៀតណាម ដែលនៅជិតខាងកម្ពុជា។

នាយិកាប្រចាំប្រទេសនៃក្រុមហ៊ុន CBRE CAMBODIA អ្នកនាង អាន សុធីតា បានប្រាប់ឱ្យដឹងតាមរយៈទូរស័ព្ទ កាលពីព្រឹកថ្ងៃទី១៨ ខែមេសានេះថា នៅត្រឹមដំណាច់ឆ្នាំ២០១៩នេះ បើមិនមានអ្វីប្រែប្រួលនោះទេ ផ្សារទំនើបចំនួន៩ទៀតនឹងបង្ហាញវត្តមានដាក់ឱ្យដំណើរការជាផ្លូវការ ដែលក្នុងនោះរួមមាន Phnom Penh Mega Mall, The Olympia Mall, Chip Mong Baktouk CC, WB Arena, The Park, The Point, Noro Mall, The Bridge, និង Midtown-mall ស្មើនឹងប្រមាណ៦៥,០០០ ម៉ែត្រការ៉េបន្ថែមទៀតដាក់ចូលទៅក្នុងទៅផ្សារ ដែលវានឹងធ្វើឱ្យមានបរិយាកាសសង្គម កាន់តែមានភាពស៊ីវិល័យ ទាន់សម័យ និងផ្តល់ភាពស្រួលដល់ប្រជាជនក្នុងតំបន់ ហើយក៏ជាការចូលរួមចំណែកលើកកម្ពស់លើផ្នែកហេដ្ឋារចនាសម្ព័ន្ធផងដែរ។

អ្នកនាងបន្តថា “នៅកម្ពុជា ទីផ្សារទំនើបត្រូវបានគេផ្តោតសំខាន់ នៅក្នុងរាជធានីភ្នំពេញជាសំខាន់ ខណៈឆ្នាំ ២០១៨ ការផ្គត់ផ្គង់ផ្សារទំនើបនៅក្នុងរាជធានីភ្នំពេញមានចំនួន ៣២៩,០០០ម៉ែត្រការ៉េ ហើយនៅក្នុងឆ្នាំ២០១៩ នឹងបន្ថែមទំហំនៃការផ្គត់ផ្គង់ចំនួនប្រមាណជាង៦៥,០០០ម៉ែត្រការ៉េបន្ថែមទៀត មកលើទីផ្សារមួយនេះ ដែលធ្វើឲ្យការផ្គត់ផ្គង់ផ្សារទំនើបសរុបកើនដល់៣៩៤,០០០ម៉ែត្រការរ៉េ”។

អ្នកនាងអាន សុធីតាបានបន្តថា ចំនួនផ្សារទំនើបខាងលើនេះ បើធ្វើការប្រៀបធៀបជាមួយប្រទេសជិតខាងរវាងការផ្គត់ផ្គង់ និងតម្រូវការរបស់ប្រជាពលរដ្ឋក្នុងតំបន់ គឺរាជធានីភ្នំពេញ មានអត្រា០,១៤ ខ្ពស់ជាងទីក្រុងហូជីមិញ ដែលមានអត្រា ០,១១ ហើយទាបជាងទីក្រុងបាងកក ដែលមានអត្រា០,៤ (ចំនួននេះគណនារវាងចំនួនកំណើនការផ្គត់ផ្គង់ និងតម្រូវការចំនួនប្រជាជនក្នុងតំបន់)។

ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានបង្ហាញពីក្ដីសាទរ ជាមួយវត្តមាននៃផ្សារទំនើបទាំងនេះ ដោយលោកបានមានប្រសាសន៍ថា បើទោះជាផ្សារទំនើបចំនួន៩ ដូចបានរៀបរាប់ខាងលើនេះពិតជាដំណើរមែន ក៏វានៅតែមិនទាន់គ្រប់គ្រាន់នៅឡើយនោះទេ ដែលវាទាមទារឱ្យមានបណ្តាអ្នកវិនិយោគ ចូលមកបង្កើតផ្សារទំនើបដូចនេះបន្ថែមទៀត ដើម្បីឱ្យសមស្របទៅតាមតម្រូវការនៃការប្រើប្រាស់ក្នុងស្រុក។

លោកបន្តថា បច្ចុប្បន្ននៅក្នុងប្រទេសកម្ពុជា ពិសេសនៅក្នុងរាជធានីភ្នំពេញ ភាគច្រើន នៅមានភាពពេញនិយមជាមួយផ្សារប្រពៃណី ដូចជាផ្សារដើមគរ ផ្សារអូរឫស្សី ផ្សារច្បារអំពៅ ក៏ដូចជាផ្សារថ្មីជាដើម ក៏ព្រោះតែផ្សារទំនើបនៅមិនទាន់អាចបំពេញនូវតម្រូវការបានទាំងស្រុង។

លោកបានបន្តទៀតថា “វត្តមាននៃកំណើនផ្សារទំនើប នឹងចូលរួមចំណែកយ៉ាងធំក្នុងការជួយលើកស្ទួយវិស័យសេដ្ឋកិច្ច វិស័យពាណិជ្ជកម្ម ក៏ដូចជាសុខុមាលភាពរបស់ប្រជាជនផងដែរ”។ លោកបន្តថា “នៅពេលមានផ្សារទំនើបកាន់តែច្រើន ទីក្រុងកាន់តែរីកធំ ហើយអាជីវករ ឬពាណិជ្ជករ ដែលធ្លាប់តែប្រកបតាមបែបប្រពៃណីនោះ នឹងងាកចូលទៅប្រកបរបរនៅក្នុងផ្សារទំនើបវិញ”។

ហេតុផលដោយសារ តែនៅពេលដែលផ្សារទំនើបមានកាន់តែច្រើន នោះទីតាំងជួលនឹងមានភាពទូលាយ ហើយតម្លៃក៏មានកម្រិតទាបក្រោមការប្រកួតប្រជែង និងកាន់តែផ្តល់លទ្ធភាពដល់បណ្តាអាជីវករ ដែលមានបំណង់ចង់ប្រកអាជីវកម្មនៅក្នុងផ្សារទំនើប។ ធម្មតា នៅពេលប្រទេសមួយកាន់តែរីកចម្រើន មានការអភិវឌ្ឍន៍ ប្រជាពលរដ្ឋកាន់តែមានលទ្ធភាពខ្ពស់ នោះគឺសុទ្ធតែត្រូវការផ្សារទំនើបនេះទាំងអស់។

លោក ង៉ែត ជូ អ្នកវិភាគសេដ្ឋកិច្ច និងអចលនទ្រព្យកម្ពុជា បានថ្លែងថា វាជាការល្អប្រសើរ ដែលមានអ្នកវិនិយោគងាកមកចាប់អារម្មណ៍នៅលើទីផ្សារកម្ពុជា ដែលវាបានបង្ហាញថា កម្ពុជាមានកំណើនសេដ្ឋកិច្ច មានសេ្ថរភាពនយោយ និងសន្តិសុខល្អ ហើយក៏មានផលចំណេញចំពោះប្រជាជនកម្ពុជាផងដែរ តាមរយៈការផ្តល់ភាពងាយស្រួលក្នុងការជ្រើសរើសប្រភេទទីផ្សារ ដែលស្របទៅនឹងកម្រិតជីវភាពរបស់ខ្លួន ជាពិសេសផ្តល់កន្លែងការងារជាច្រើនកន្លែង សម្រាប់ប្រជាជនក្នុងស្រុកផងដែរ ប៉ុន្តែវាក៏មានចំណុចដែលគួរព្រួយបារម្ភផងដែរ។

លោកបានបញ្ជាក់ថា “នៅពេលមានការសម្រុកចូលមកវិនិយោគ លើវិស័យតែមួយ វាអាចនឹងមានបញ្ហាកើតឡើង ដោយសារតែទំហំទីផ្សារមានភាពទូលាយ ហើយតម្រូវការមានភាពចង្អៀតនៅឡើយ”។

លោក ង៉ែត ជូ បានបន្តថា ជាក់ស្ដែងនៅពេលបច្ចុប្បន្ននេះ ចំណូលប្រជាពលរដ្ឋកម្ពុជានៅមានកម្រិត ដូច្នេះអ្នកដែលមានលទ្ធភាពចំណាយទិញទំនិញ នៅតាមផ្សារទំនើបមានចំនួនតិចនៅឡើយ ហើយនៅតាមផ្សារទំនើបនាពេលបច្ចុប្បន្ននេះ អ្នកទៅកំសាន្តភាគច្រើន ជាអ្នកនិយមដើរមើលកម្សាន្តតែប៉ុណ្ណោះ ដែលវាជាហានិភ័យចំពោះអ្នកវិនិយោគក្នុងអំឡុងពេល៣-៥ ឆ្នាំ ប៉ុន្តែក្រោយពីនេះ អាចមានភាពល្អប្រសើរឡើងវិញ ទម្រាំអតិថិជនមានទំនុកចិត្ត និងស្គាល់ពីប្រភេទទំនិញ ដែលបានផ្គត់ផ្គង់ចូលទីផ្សារ៕

ក្រុមហ៊ុនបុរីធំៗជាច្រើនកំពុងចាប់អារម្មណ៍វិនិយោគនៅតំបន់ជុំវិញរមណីយដ្ឋានភ្នំប្រសិទ្ឋ

April 18, 2019

0

ដោយ គង់ សូរិយា

ភ្នំពេញ៖ ក្រុមហ៊ុនវិនិយោគបុរីធំៗក្នុងស្រុក បាននិងកំពុងសម្លឹងឆ្ពោះទៅវិនិយោគលំនៅដ្ឋាននៅតំបន់ភ្នំប្រសិទ្ឋ និងតំបន់ជុំវិញនោះ ដោយសារការរីកចម្រើនហេដ្ឋារចនាសម្ព័ន្ឋ និងកំណើនប្រជាពលរដ្ឋ។

អគ្គនាយកបុរីវិមានភ្នំពេញ លោកឧកញ៉ា លី ហួរ បានមានប្រសាសន៍ឲ្យដឹងកាលពីចុងសប្តាហ៍មុនថា លោកបាននិងកំពុងរៀបចំគំរោងវិនិយោគនៅតំបន់ភ្នំប្រសិទ្ឋ និងតំបន់ជុំវិញនោះរួចហើយ ដោយគំរោងនេះនឹងចាប់ផ្តើមនៅរយៈពេលពីរ ឬបីឆ្នាំខាងមុខនេះ។លោកបន្តថា យើងមានដីរួចហើយសំរាប់អភិវឌ្ឍន៍នៅតំបន់នោះ ហេតុនេះគំរោងនេះនឹងចាប់ផ្តើមនៅមិនយូរនោះទេ។

លោកបន្តថា “ជាមួយនឹងការរីកចម្រើននៅតាមបណ្តោយផ្លូវជាតិលេខ៥ និងតំបន់ជុំវិញនោះ ការវិនិយោគបុរីលំនៅដ្ឋាននានានឹងកើនឡើងខ្ពស់នៅតំបន់ភ្នំប្រសិទ្ឋ និងតំបន់ជុំវិញនោះ”។

ទោះជាយ៉ាងណាលោកឧកញ៉ា មិនទាន់បញ្ជាក់ពីទំហំទូនវិនិយោគ និងទំហំគំរោងនោះនៅឡើយទេ។

តំបន់ភ្នំប្រសិទ្ឋ និងតំបន់ជុំវិញនោះ កំពុងទទួលការចាប់អារម្មណ៍ពីអ្នកវិនិយោគជាច្រើនហើយ ដោយបច្ចុប្បន្នមានគំរោងលំនៅដ្ឋានផ្ទះល្វែងជាច្រើន បាននិងកំពុងចាប់ផ្តើមសាងសង់។ជាមួយគ្នានេះ មានបុរីធំៗជាច្រើនទៀត បាននិងកំពុងរៀបចំខ្លួនឆ្ពោះទៅតំបន់ភ្នំប្រសិទ្ឋ និងតំបន់ជំវិញនោះ ដោយសារការសាយភាយនៃការរីកចម្រើន ចេញពីទីក្រុង ពិសេសតម្លៃដីនៅក្នុងទីក្រុងមានកំនើនខ្ពស់ ដែលពិបាកក្នុងការយកមកសាងសង់លំនៅដ្ឋានសំរាប់លក់។

អនុប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកយិន លាងគង់បានមានប្រសាសន៍ថា នាពេលអនាគតឆាប់ៗខាងមុខនេះ តំបន់ភ្នំប្រសិទ្ឋនិងតំបន់ជុំវិញនោះនឹងមានការរីកចម្រើនលឿន ដោយសារតំបន់នេះមានទីតាំងកៀកនឹងតំបន់ពាណិជ្ជកម្មរបស់ក្រុង ដោយគេចំណាយពេលត្រឹម១៥នាទីប៉ុណ្ណោះអាចធ្វើដំណើរមកដល់ផ្សារទំនើប EAON MALL2 និងផ្សារទំនើបនានានៅតំបន់នេះ។ លោកបន្តថា ការរីកចម្រើននៃទីក្រុង ធ្វើឲ្យប្រជាជនមានអារម្មណ៍ស្មុគស្មាញច្រើន ហេតុនេះប្រជាជនត្រូវការរកទីតាំងស្ងប់ស្ងាត់ មានទេសភាពស្អាត និងខ្យល់អាកាសបរិសុទ្ឋ ហេតុនេះតំបន់រមណីយដ្ឋានភ្នំប្រសិទ្ឋ និងភ្នំរាប ជាកន្លែងស័ក្តិសមបំផុត។

លោកបន្តថា “តំបន់នេះនឹងមានការរីកចម្រើនលឿន ដោយសារមានសណ្ឋានដីល្អប្រសើរ មានលក្ខខ័ណ្ឌអាកាសធាតុអំណោយផល និងទីតាំងនៅកៀកនឹងទីក្រុង ព្រមទាំងមានហេដ្ឋារចនាសម្ព័ន្ឋខ្វាត់ខ្វែង តភ្ជាប់ទៅកាន់បណ្តាផ្លូវជាតិសំខាន់ៗដទៃទៀត”។លោកបន្តថា “ខ្ញុំជឿថារយៈពេល៣ទៅ៥ឆ្នាំខាងមុខ តំបន់ភ្នំប្រសិទ្ឋនិងតាមបណ្តោយផ្លូវជាតិលេខ៥ នឹងមានការរីកចម្រើនលឿន ហើយឥទ្ឋិពលនៃការរីកចម្រើននេះ នឹងធ្វើឲ្យរាជធានីភ្នំពេញ តភ្ជាប់ជាមួយទីរួមស្រុកឧត្តុងជាស្វ័យប្រវត្តិ”៕

ខេត្តកំពង់ស្ពឺនឹងមានរោងចក្រផលិតសម្ភារៈសម្រាប់កុមារតម្លៃ ២,៩លានដុល្លារ

April 18, 2019

0

CDC អនុម័តគម្រោងវិនិយោគ — អគារ CDC មើលពីលើលំហ។ រូបថត៖ សហការី

ដោយ នៅ ស៊ីវុត្ថា

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) អនុម័តឲ្យក្រុមហ៊ុន SUPERIOR INFLATABLES (CAMBODIA) CO.,LTD.មានទុន ២,៩លានដុល្លារបង្កើតរោងចក្រផលិតសម្ភារៈសម្រាប់ក្មេងលេងគ្រប់ប្រភេទនៅខេត្តកំពង់ស្ពឺ។

យោងតាមការចុះផ្សាយរបស់គេហទំព័រហ្វេសបុកផ្លូវការរបស់ CDC កាលពីថ្ងៃទី ១៧ ខែមេសា ឆ្នាំ ២០១៩ ម្សិលមិញនេះថា តាមសំណើសុំវិនិយោគលើគម្រោងបង្កើតរោងចក្រផលិតសម្ភារៈសម្រាប់ក្មេងលេងគ្រប់ប្រភេទ របស់ក្រុមហ៊ុន “SUPERIOR INFLATABLES (CAMBODIA) CO.,LTD.” គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ “វិញ្ញាបនប័ត្រចុះបញ្ជីជាស្ថាពរ” ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅភូមិព្រៃខ្វាវ ឃុំរការកោះ ស្រុកគងពិសី ខេត្តកំពង់ស្ពឺ និងអាចបង្កើតការងារបានចំនួន ២៤១កន្លែង។

លោក វ៉ី សំណាង អភិបាលខេត្តកំពង់ស្ពឺធ្លាប់បានប្រាប់គេហទំព័រ propertyaea.asia កន្លងមកថា នាពេលបច្ចុប្បន្ននេះ ខេត្តកំពង់ស្ពឺ បាននិងកំពុងពង្រីកវិសាលភាពផ្នែកសេដ្ឋកិច្ច បានកាន់តែប្រសើរជាងមុន ពោលគឺមានការរីកចម្រើនយ៉ាងខ្លាំងទៅលើការវិនិយោគក្នុងរូបភាពជារោងចក្រ សហគ្រាសធំៗ ជាច្រើនទីតាំង។

លោកបានសម្ដែងការសាទរផងដែរថា ជាមួយនឹងកំណើននៃចំនួនរោងចក្រ សហគ្រាស ក៏ដូចជាសិប្បកម្មនានា ដែលកំពុងមានសកម្មភាពនាពេលបច្ចុ ប្បន្ននេះ វាពិតជាមានសារសំខាន់បំផុត ក្នុងការចូលរួមចំណែកលើកកម្ពស់សេដ្ឋកិច្ចជាតិ ក៏ដូចជាផ្តល់ចំណូលដល់ប្រជាពលរដ្ឋក្នុងតំបន់ និងអ្នកចំណាកស្រុកមកពីតាមបណ្តាខេត្តផ្សេងៗផងដែរ ។

ជាមួយគ្នានេះ លោក វ៉ី សំណាង ថា ក្នុងនាមលោកជាអជ្ញាធរ និងជាអភិបាលនៅក្នុងខេត្តកំពង់ស្ពឺ លោកបានបង្ហាញពីកិច្ចស្វាគមន៍យ៉ាងកក់ក្ដៅ ចំពោះបណ្តាអ្នកវិនិយោគគ្រប់ជាតិសាសន៍ទាំងអស់ ដែលមានបំណងមកបណ្តាក់ទុន ដោយដាក់ទីតាំងនៅក្នុងខេត្តកំពង់ស្ពឺ យ៉ាងរីករាយ ជាមួយនឹងការយកចិត្តទុកដាក់ ក្នុងការចូលរួមចំណែកសម្រួល ផ្តល់សេវាសាធារណៈងាយស្រួលផងដែរ៕

ចំណេះដឹងជាមូលដ្ឋានដែលត្រូវដឹងមុនសម្រេចចិត្តវិនិយោគលើវិស័យអចលនទ្រព្យ

April 17, 2019

0

ដោយ គង់ សូរិយា

ភ្នំពេញ៖ ការវិនិយោគដែលគ្មានចំណេះដឹង អាចធ្វើឲ្យអ្នកវិនិយោគមិនត្រឹមតែមិនទទួលបានចំណេញនោះទេ តែទទួលបានរឿងរ៉ាវ ដែលខាតទាំងថវិកានិងពេលវេលា។ហេតុនេះអ្នកវិនិយោគគួរសិក្សាចំណុចសំខាន់ៗទាំងអស់នេះ។

ព៌តមានត្រឹមត្រូវ

ការទទួលបានព៌តមានត្រឹមត្រូវមានសារៈសំខាន់ណាស់ ដើម្បីយើងអាចវិភាគពិចារណាឲ្យបានម៉ត់ចត់ និងគ្រប់ជ្រុងជ្រោយមុនសម្រេចចិត្តបោះទុនវិនិយោគ ព្រោះបច្ចុប្បន្នមានព៌តមានច្រើនណាស់ ដែលជាព៌តមានបំពុលនិងប្រាសចាកក្រមសីលធ៌មវិជ្ជាជីវៈ។

ការទទួលបានព៌តមានមិនត្រឹមត្រូវ នឹងធ្វើឲ្យការវិនិយោគរបស់លោកអ្នកមានហានិភ័យ និងទទួលបានផលអាក្រក់ត្រលប់ទៅវិញ។ ជួនកាលប្រជាជនទទួលបានព៌តមាន ដែលជាដំណឹង គឺដំណឹងជាប្រភេទព៌តមានមិនច្បាស់លាស់ និងមិនគ្រប់ ជ្រុងជ្រោយ ប៉ុន្តែបើជាអ្នកសារព៌តមាន ពួកគេនឹងជាអ្នកនាំសារដ៏សំខាន់ ជាអ្នកនាំពាក្យដ៏សំខាន់។ យ៉ាងណាក៏ដោយអ្នកសារព៌តមានមួយចំនួនសរសេរបំភ្លៃ និងថ្នូរនឹងផលប្រយោជន៍អ្វីមួយ។

ផ្ទុយទៅវិញគេហទំព័រ Propertyarea.asia ជាស្ថាប័នព៌តមានដែលមានអ្នកសារព៌តមានមានបទពិសោធន៍យូរឆ្នាំ និងគោរពនូវតម្លៃព៌តមាន និងមានវិជ្ជាជីវៈច្បាស់លាស់ ព្រមទាំងបដិសេធនូវការទិញព៌តមានជាថ្នូរនឹងផលប្រយោជន៍ដាច់ខាត។

ចំណេះដឹងផ្នែកច្បាប់ 

ចំណេះដឹងផ្នែកច្បាប់ ក៏ជាកត្តាសំខាន់មិនអាចខ្វះបាន ព្រោះការទិញលក់អចលនទ្រព្យ ត្រូវប្រើប្រាស់នូវមូលដ្ឋានច្បាប់ជាធរមាន។ វាពិតជាមានការងារជាច្រើនដែលត្រូវស្វែងយល់ទាក់ទងនឹងប័ណ្ណកម្មសិទ្ឋអចលនទ្រព្យ។
ក្នុងទិដ្ឋភាពច្បាប់មានភាពស្មុគស្មាញ និងរឿងរ៉ាវជាច្រើន ដែលយើងត្រូវតែប្រុងប្រយ័ត្ន ហើយដើម្បីបញ្ចៀសពីបញ្ហាផ្នែកច្បាប់ អ្នកវិនិយោគអាចពិគ្រោះជាមួយក្រុមហ៊ុនអចលនទ្រព្យមានវិជ្ជាជីវៈត្រឹមត្រូវ ឬពិគ្រោះជាមួយមេធាវីជាដើម។

ទីតាំងភូមិសាស្រ្ត

ទីតាំងភូមិសាស្រ្តជារឿងមិនអាចមើលរំលងបានឡើយ ព្រោះទីតាំងភូមិសាស្រ្តជាអ្នកកំណត់នូវតម្លៃអចលនទ្រព្យកើនឡើង ឬនៅទ្រឹងឬលក់មិនចេញបាន ហេតុនេះអ្នកវិនិយោគគួរសិក្សាឲ្យបានច្បាស់លាស់នូវទីតាំងភូមិសាស្រ្ត ឲ្យបានត្រឹមត្រូវនិងជាក់លាក់ដូចជា តំបន់ដែលលោក អ្នកចង់វិនិយោគ គួរជាតំបន់មានមនុស្សរស់នៅច្រើន ជាតំបន់ស្ថិតក្នុងផែនការ អភិវឌ្ឍរបស់រដ្ឋាភិបាល ជាតំបន់ដែលរដ្ឋាភិបាលសាងសង់ផ្លូវនាពេលអនាគត ជាតំបន់ដែលមានផ្លូវធំ ជាតំបន់មិនជាប់នឹងផ្នូរសាកសពជាដើម។

លំហូរសាច់ប្រាក់

អ្នកគ្មានទុនគ្រប់គ្រាន់ និងមានលំហូរសាច់ប្រាក់ឬប្រភពចំណូលមិនច្បាស់លាស់ មិនគួរខ្ចីឥណទានរបស់ធនាគារ ដើម្បីយកទៅវិនិយោគនោះទេ ប៉ុន្តែពួកគេអាចប្រើប្រាស់កម្ចីធនាគារបាន ដើម្បីយកទៅវិនិយោគ បើសិនជាខ្ចីត្រឹម ៣០ ទៅ ៤០ ភាគរយ នៃតម្លៃអចលនទ្រព្យដែលខ្លួនបានទិញ ហើយលំហូរសាច់ប្រាក់មានភាពទៀតទាត់ និងអាចទប់ទល់នឹងវិបត្តិឬភាព ជាប់គាំងអចលនទ្រព្យនៅពេលណាមួយបាន។

វិធីសាស្រ្តដោះស្រាយ

នៅពេលមានបញ្ហា ដំណោះស្រាយប្រាកដជាមាន ដែលអ្នកវិនិយោគត្រូវតែចាំពាក្យនេះ ហើយពិតជាមានដំណោះស្រាយក្នុងរយៈពេលណាមួយបាន ព្រោះការលក់អចលនទ្រព្យ មិនមែនជាការលក់ត្រីឬបន្លែនៅលើទីផ្សារបានភ្លាមៗនោះទេ។ ហេតុនេះទើបអ្នកវិនិយោគដែលមិនសូវមានចំណេះដឹង ត្រូវតែពិគ្រោះជាមួយអ្នកជំនាញជាមុនសិន មុនសម្រេចចិត្តវិនិយោគ ដោយសារអចលនទ្រព្យខ្លះ ពេលវិនិយោគរួចត្រូវជាប់គាំងក្នុងរយៈពេលណាមួយឬដោយសារវិបត្តិសេដ្ឋកិច្ច និងហិរញ្ញវត្ថុសាកល។

ហេតុនេះទើបការសិក្សាលំហូរសាច់ប្រាក់ ដែលយើងនិយាយខាងលើជារឿងដែលមិនអាចខ្វះនិងមើលរំលងបាន។

គ្មានការផ្សងព្រេង

ការទិញអចលនទ្រព្យ មិនមែនជាការផ្សងព្រេងនោះទេ អ្នកវិនិយោគត្រូវតែចាំថាវាមិនមានការផ្សងព្រេងនោះទេ ហេតុនេះការប្រមូលព៌តមានឲ្យបានច្បាស់លាស់ គ្រប់ជ្រុងជ្រោយ សិក្សាទិដ្ឋភាពច្បាប់ សិក្សាលំហូរសាច់ប្រាក់បានច្បាស់លាស់រួច សិក្សាពីទីតាំងភូមិសាស្រ្តបានច្បាស់លាស់ មុនសម្រេចចិត្តវិនិយោគ អ្នកនឹងក្លាយជាអ្នកវិនិយោគឆ្លាតវៃ និងប្រាសចាកហានិភ័យមិនខាន។

ដោយសារអចលនទ្រព្យជាវត្ថុមានតម្លៃខ្ពស់ ទិញស្រួល និងលក់ចេញមិនស្រួល ទើបត្រូវសិក្សាពីមូលដ្ឋានទាំង៥ខាងលើដោយខានមិនបាន៕

ហេតុផល ៥យ៉ាង ដែលជំរុញឱ្យតម្លៃដីកាន់តែឡើងថ្លៃ

April 17, 2019

0

ដោយ រ៉ាណេត

ភ្នំពេញ៖ សំណួរសួរថា តើមានហេតុផលអ្វី ដែលចេះតែធ្វើឱ្យតម្លៃដីចេះតែបន្តឡើងថ្លៃជាបន្តបន្ទាប់នៅកម្ពុជា ? ជាការឆ្លើយតបទៅនឹងចម្ងល់មួយនេះ អ្នកជំនាញដែលមានបទពិសោធន៍ និងទទួលបានភាពជោគជ័យនៅលើមុខជំនួញផ្នែកអចលនទ្រព្យបានបង្ហើបពីមូលហេតុដែលនាំឱ្យមានការកើនឡើងនូវតម្លៃដីធ្លីដូចខាងក្រោម។

លោកបណ្ឌិត គីម ហ៊ាង នាយកក្រុមហ៊ុនអចលនទ្រព្យ Khmer Real Estate Co,. td បានមានប្រសាសន៍ឱ្យដឹងតាមទូរស័ព្ទកាលពីពេលកន្លងទៅនេះថា មានមូលហេតុ និងកត្តាសំខាន់ៗចំនួន៥ ដែលធ្វើឱ្យដីធ្លីឡើងថ្លៃ។

ទី១) កត្តានយោបាយៈ គឺសុខសន្តិភាព និងស្ថិរភាពនយោបាយជាផ្នែកមួយ ដែលធ្វើឱ្យតម្លៃដីធ្លីកើនឡើង ព្រោះបើសិនជាប្រទេសយើងគ្មានសន្តិភាព និងស្ថិរភាពនយោបាយ ក៏មិនមានអ្នកវិនិយោគចូលមកដែរ ហើយដីក៏មិនឡើងថ្លៃដែរ។

ទី២) កត្តាសេដ្ឋកិច្ចៈ សេដ្ឋកិច្ចពិតជាមានសារៈសំខាន់ ព្រោះបើសេដ្ឋកិច្ចមិនកើនឡើង ប្រជាពលរដ្ឋក៏មិនមានប្រាក់ចំណូលកើនឡើងដែរ ហើយអ្នកវិនិយោគបើពួកគេ មិនអាចរកផលចំណេញបាន ពួកគេក៏មិនមកវិនិយោគផងដែរ។

ទី៣) កត្តាពាណិជ្ជកម្ម និងសេដ្ឋកិច្ចមូលដ្ឋានៈ តាមធម្មតាពេលតំបន់ណាមួយគ្មានសកម្មភាពពាណិជ្ជកម្មសេដ្ឋកិច្ច និងការអភិវឌ្ឍទេ ដីធ្លីក៏មិនឡើងថ្លៃនោះទេ។

ផ្ទុយទៅវិញ បើសិនជាតំបន់ណាមួយនោះមានសកម្មភាពសេដ្ឋកិច្ច ពាណិជ្ជកម្មផុសផុល តម្លៃដីធ្លីនឹងកើនឡើងជាស្វ័យប្រវត្តិមិនខាន។

ទី៤) កត្តាប្រជាសាស្រ្តៈ ធម្មតាតម្លៃដីធ្លីមិនកើនឡើងនៅទីវាលរហោស្ថាន ដែលស្ងប់ស្ងាត់ និងគ្មានមនុស្សរស់នៅច្រើននោះទេ បើទោះជាកើនឡើង ក៏មិនកើនឡើងខ្លាំងដែរ ព្រោះថាទីណាមានមនុស្សច្រើន សកម្មភាពសេដ្ឋកិច្ចនិងពាណិជ្ជកម្មនឹងកើនមាននៅតំបន់នោះ ហើយពេលណាសកម្មភាពពាណិជ្ជកម្មកើនឡើង តម្លៃដីធ្លីក៏កើនឡើងផងដែរ។

ទី៥) កត្តាហេដ្ឋារចនាសម្ព័ន្ឋៈ ជាការពិតហេដ្ឋារចនាសម្ព័ន្ឋជាផ្នែកមួយសំខាន់ និងគាំទ្រដល់កំណើនសេដ្ឋកិច្ច ពាណិជ្ជកម្ម ព្រោះតំបន់ណាមួយមិនមានហេដ្ឋារចនាសម្ព័ន្ឋច្បាស់លាស់ ដីធ្លីនិងសកម្មភាពពាណិជ្ជកម្មនឹងមិនមានភាពប្រសើរនោះទេ។ ជាក់ស្តែងផ្លូវជាតិលេខ៦អា ផ្លូវជាតិលេខ១ ផ្លូវជាតិលេខ៣ ក្រោយពេលរដ្ឋាភិបាលប្រកាសពង្រីកសកម្មភាណនៃការអភិវឌ្ឍន៍បានកើនឡើង ហើយតម្លៃដីធ្លីក៏បានកើនខ្ពស់លើសការរំពឹងទុកផងដែរ។ នេះជាការបញ្ជាក់ឱ្យដឹងពីសំណាក់ លោកបណ្ឌិត គីម ហ៊ាង កាលពីពេលកន្លងទៅ៕

មហាយក្សចិនចាប់ផ្តើមផ្តល់ពន្លឺដល់ទ្វីបអាហ្រ្វិកជាមួយវត្តមានអាគារកប់ពពក

April 17, 2019

0

ដោយ វុត្ថា

ភ្នំពេញ៖ មហាយក្សចិនបាននិងកំពុងចាប់ផ្តើមផ្តល់ពន្លឺនិងកិត្យានុភាពដល់ទ្វីបអា ហ្រ្វិក តាមរយៈការសាងសង់អាគារកប់ពពកនៅក្នុងប្រទេសអាហ្រ្វិកខាងត្បូង ជាប្រទេសដែលមានការរីកចម្រើនជាងគេក្នុងទ្វីបមួយនេះ។

កាលពីពេលថ្មីនេះ ក្រុមហ៊ុនរបស់ចិនបានចុះហត្ថលេខាបោះទុនវិនិយោគ សាងសង់អគារខ្ពស់កប់ពពកកំពស់៣២០ម៉ែត្រ ដែលមានឈ្មោះថា Pinnacle Towers ក្នុងប្រទេសតំបន់អាហ្វ្រិក ស្របតាមគោលនយោបាយខ្សែក្រវ៉ាត់មួយ ផ្លូវមួយរបស់ប្រធានាធិបតីស៊ី ជីងភីង។

ក្រុមហ៊ុន China State Construction Engineering Corporation (CSCEC) ដែលជាក្រុមហ៊ុនរបស់រដ្ឋាភិបាលចិនដ៏ធំ បានឈ្នះការដេញថ្លៃក្នុងសាងសង់អគារខ្ពស់កប់ពពកនេះ ក្នុងទីក្រុងNairobi ប្រទេសកេនយ៉ា ក្នុងចំណោមក្រុមហ៊ុអភិវឌ្ឍន៍អចលនទ្រព្យល្បីៗចំនួន១០នៅលើពិភពលោក។ នេះបើតាមការចុះផ្សារដោយ Global Construction Review។

អគារនេះ គឺជាអគារខ្ពស់កប់កពពក់មួយ ក្នុងចំណោមអគារផ្សេងទៀតក្នុងប្រទេសអាហ្វ្រិក ដែលខ្ពស់ជាងអគារ Carlton Centre ដែលមានកំពស់ត្រឹមតែ២២៣ ម៉ែត្រស្ថិតនៅក្នុងទីក្រុង Johannesburg និង អគារ Britam Tower ដែលមានកំពស់២០០ម៉ែត្រ ស្ថិតនៅក្នុងទីក្រុង Nairobi ។

ការសាងសង់អគារ Pinnacle Towers ដ៏ខ្ពស់នេះ គ្រោងនឹងបញ្ចប់សាងសងរបស់ខ្លួននៅក្នុងឆ្នាំ ២០២១។

អគារ Pinnacle Towers សាងសង់ឡើងសម្រាប់ជាមជ្ឈមណ្ឌលពាណិជ្ជកម្មចម្រុះរួមមាន ជាការិយាល័យ សណ្ឋាគារ អាផាតម៉ិនទំនើប២០០យូនីត ផ្សារទំនើប និងជាកន្លែងទស្សនាទេសភាពប្រទេស Kenya។

លោក ប្រធានាធិបតីប្រទេស Kenya លោក Uhuru Kenyatta បានថ្លែងនៅក្នុងពិធីបញ្ចុះបថមសិលា សាងសង់អាគារកប់ពពកនេះកាលពីពេលថ្មីនេះថា ការសាងសងស់អគារនេះ ដោយសារគេមានជំនឿចិត្ត លើកគោលនយោបាយកំណែទំម្រង់របស់ប្រទេស Kenya ដើម្បីទាក់ទាញ និងប្រកួតប្រជែងវិស័យទេសចរណ៍ និងជាមូលដ្ឋានគ្រឹះសម្រាប់ទាក់ទាញវិនិយោគិន៕

អ្នកជំនាញ បង្ហាញពីគន្លឹះដែលធ្វើឱ្យប្រភពចំណូលរឹងមាំ

April 17, 2019

0

ដោយ ៖ រ៉ាណេត

ភ្នំពេញ ៖ ជាទូទៅគេតែងសង្កេតឃើញមានមនុស្សជាច្រើនលើកឡើងថា ការរំពឹងចំណូលតែមួយមុខពីការទទួលបានពីការស៊ីឈ្នួលធ្វើការ ដោយទទួលបានតែប្រាក់ខែគឺវាមិនទាន់គ្រប់គ្រាន់សម្រាប់ជីវភាពនៅឡើយនោះទេ ហើយវាក៏ជាការប្រឈមទៅនឹងហានិភ័យខ្ពស់ផងដែរ ដែលប្រការនេះ ស្របទៅនឹងការលើកឡើងរបស់អ្នកជំនាញ ជាមួយនឹងការផ្តល់ជាគំនិត និងយោបល់ឱ្យងាកទៅបង្កើតអាជីវកម្មផ្ទាល់ខ្លួនដើម្បីអាចទទួលបានប្រភពចំណូលដ៏រឹងមាំ។

តាមការសិក្សាស្រាវជ្រាវពីបុគ្គលដែលដែលមានទ្រព្យសម្បត្តិស្តុកស្តម្ភចំនួន ២៣៣ នាក់ ឃើញថាពួកគេជិតចំនួន ២ ភាគ៣ (៦៥%) មានចំណូលចំនួន៣ប្រភព។ វាជាការសមហេតុផលម្យ៉ាងដែរ ព្រោះបើប្រភពចំណូលណា ១មានបញ្ហា នោះក៏មិនបង្ករហានិភ័យធ្ងន់ធ្ងរនោះដែរ។ លទ្ធផលនៃការស្រាវជ្រាវក៏បានបង្ហាញដែរថា ដើម្បីបង្កើតប្រភពចំណូលច្រើន គឺពួកគេធ្វើនូវទង្វើរច្រំដែលៗ ពោលគឺ: “សន្សំ រៀន វិនិយោគ និងបន្តវិនិយោគនូវផលចំណេញបានមកពីការវិនិយោគនានា”។

លោក ង៉ែត ជូ បានលើកឡើងថា «តើអ្នកបង្កើតអាជីវកម្មដើម្បីអ្វី ? អាជីវកម្មបង្កើតថ្មីជាច្រើនដែលជោគជ័យនាពេលបច្ចុប្បន្ន គឺបង្កើតឡើងដោយគោលបំណងដ៏វិសេសវិសាលក្នុងការដោះស្រាយបញ្ហាសង្គម ។ នេះបើតាមសម្តីលោក Mark Lim នាយកគ្រប់គ្រងផ្នែកបច្ចេកវិទ្យាព័ត៌មាននៃក្រុមហ៊ុនវិនិយោគរបស់សឹង្ហបុរី Temasek។ ជារឿយៗប្អូនៗយុវជនតែងប្រាប់ខ្ញុំថា គាត់បង្កើតអាជីវកម្មព្រោះខ្ជិលធ្វើការឱ្យគេ ចង់ក្លាយជាអ្នកមាន ឬចង់បង្កើតស្នាដៃដោយខ្លួនឯង។ល។ ខ្ញុំសូមផ្តល់យោបល់ថា គោលបំណងទាំងនេះ ពិបាកនឹងធ្វើឱ្យជោគជ័យណាស់ ព្រោះមិនបានចូលរួមដោះស្រាយបញ្ហារបស់សង្គមនោះទេ។

លោក ង៉ែត ជូ បានផ្តល់ជាគន្លឹះផងដែរថា ៖ «ប្រសិនបើអ្នកចង់ដើរចេញពីជីវិតរស់នៅដោយរំពឹងតែទៅលើប្រាក់ខែ អ្នកត្រូវតែពិចារណាទៅចំណុចសំខាន់ៗចំនួន៦ ៖ លោកបានបញ្ជាក់ថា ៖ «ចំណុចសំខាន់ៗ៦យ៉ាង ដែលអ្នកគួរដឹងប្រសិន បើចង់ចាកចេញពីជីវិតរស់នៅដោយសារប្រាក់ខែរួមមានដូចជា ៖ ទី១- ស្គាល់ពីភាពខុសគ្នារវាងទ្រព្យ និងបំណុល រួចផ្តោតលើការសន្សំទ្រព្យ។ ទី២ - ពង្រឹងចំណេះដឹងហិរញ្ញវត្ថុតាមរយៈការអាន ការប្រឹក្សាយោបល់ជាមួយអ្នកមានបទពិសោធន៍ និងការអនុវត្តផ្ទាល់។ ទី៣- បង្កើតប្រភពចំណូលអោយបានយ៉ាងតិច២ឬ៣ប្រភព។ ទី៤- មានជំនាញក្នុងការលក់បើទោះអ្នកមិនមែនជាបុគ្គលិកផ្នែកលក់ក៏ដោយ។ ទី៥- បង្កើតឬស្វែងរកឱកាសអោយបានច្រើន ប៉ុន្តែត្រូវចេះជ្រើសរើស និងផ្តោតលើឱកាសដែលសមស្របនឹងលក្ខណៈសម្បត្តិរបស់អ្នក។ ទី៦- ភាពភ័យខ្លាច និងការសង្ស័យជាឧបសគ្គដែលយើងត្រូវជំនះ»។

ដូច្នេះ ចំពោះអ្នកដែលមានបំណងចង់ចាកចេញពីជីវិតជាអ្នកស៊ីប្រាក់ខែជាថ្នូរនឹងការបំពេញការងារឱ្យគេ ហើយងាកមកបង្កើតអាជីវកម្មជាកម្មសិទ្ធិផ្ទាល់ខ្លួន ហើយអាចជៀសផុតពីហានិភ័យបាន គួរធ្វើការពិចារណាទៅលើចំណុចសំខាន់ៗទាំង៦ ដែលអ្នកជំនាញបានលើកឡើងខាងនេះ ៕

ប្រជាជនកម្ពុជាចំណាយប្រាក់ប្រមាណ ៥០០លានដុល្លារដើរកំសាន្តក្នុងពិធីបុណ្យចូលឆ្នាំប្រពៃណីជាតិ

April 17, 2019

0

ដោយ គង់ សូរិយា

ភ្នំពេញ៖ ស្របពេលប្រជាពលរដ្ឋដើរកំសាន្តច្រើន ក្នុងឳកាសពិធីបុណ្យចូលឆ្នាំប្រពៃណីជាតិខ្មែរ ដែលបានចាប់ផ្តើមពីថ្ងៃទី១៤ដល់១៦ មេសាកន្លងមកនេះ រដ្ឋមន្រ្តីទេសចរណ៍កម្ពុជាបានអះអាងថា ប្រជាជនកម្ពុជាចំណាយប្រាក់ប្រមាណ ៥០០លានដុល្លារអាមេរិក។

លោកបណ្ឌិត ថោង ខុន រដ្ឋមន្រ្តីក្រសួងទេសចរណ៍បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១៧ មេសានេះថា ក្នុងរយៈពេលបីថ្ងៃនេះប្រជាពលរដ្ឋកម្ពុជា បានធ្វើដំណើរកំសាន្តនៅតាមបណ្តាខេត្តនានា ពិសេសបណ្តាខេត្តរៀបចំសង្រ្កានចំនួន៤,៧លាននាក់ ប៉ុន្តែចំនួននេះមិនទាន់រាប់នៅតាមវត្តអារ៉ាម និងការកំសាន្តនៅតាមផ្ទះឬតាមរមណីយដ្ឋានឬក្រោមដើមឈើនៅឡើយទេ។ បើគិតទាំងប្រជាជនកំសាន្តនៅតាមវត្តអារ៉ាម និងតាមផ្ទះ គឺមានប្រជាជនកម្ពុជាប្រមាណ៧លាននាក់ បានចូលរួមអបអរសាទរពិធីបុណ្យនេះ។

លោកបន្តថា “បើគិតជាមធ្យមប្រជាជនម្នាក់ចំណាយ ១០០ដុល្លារ គឺការចំណាយសំរាប់បុណ្យនេះមាន៤៧០លានដុល្លារ ហើយចំនួននេះមិនគិតពីការចំណាយសំរាប់អ្នកកំសាន្តនៅតាមវត្តអារ៉ាម និងតាមលំនៅដ្ឋាននៅឡើយ។លោកបន្តថា “ការរៀបចំបុណ្យចូលឆ្នាំប្រពៃណីជាតិឆ្នាំនេះ មានលក្ខណៈពិសេសដោយខេត្តនិមួយៗមានរៀបចំតំបន់ត្រជាក់ ដែលអាជ្ញាធរខេត្តបានរៀបចំសង្រ្កាននិងមានការបាញ់ទឹករាំកំសាន្ត”។

លោករដ្ឋមន្រ្តីបានបន្តថា “ការរៀបចំកំសាន្តនេះមានភាពទាក់ទាញ និងអាចប្រកួតប្រជែងជាមួយប្រទេសជិតខាងយើង ហើយអ្វីពិសេសគឺយុវជនបានភ្ជាប់សកម្មភាពជាមួយវប្បធ៌ម យុវជនជាសរសរទ្រូង”។

លោកថោង ខុនបានបន្តថា ប្រជាជនមានភាពសប្បាយរីករាយណាស់ ពួកគេពេញចិត្តនឹងសន្តិភាព និងការដឹកនាំរបស់សម្តេចតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ហើយការរៀបចំឆ្នាំនេះ អាចយកមកធ្វើជាមូលដ្ឋានសំរាប់ឆ្នាំក្រោយឲ្យកាន់តែល្អប្រសើរថែមទៀត”៕

មជ្ឈមណ្ឌលពាណិជ្ជកម្មធំមួយតម្លៃជាង ២០០លានដុល្លារនឹងរំលេចខ្លួនលើមហាវិថី សម្តេច តេជោ

April 17, 2019

0

ដោយ ៖ គង់ សូរិយា
ភ្នំពេញៈ មជ្ឈមណ្ឌលពាណិជ្ជកម្មធំមួយតម្លៃជាង២០០លានដុល្លារអាមេរិក បានទទួលការអនុម័តយល់ព្រមពីក្រសួងរៀបចំដែនដីនគរូបនីយកម្ម និងសំណង់រួចហើយ ដែលគំរោងនេះនឹងរំលេចខ្លួនលើមហាវិថីសម្តេចតេជោ ហ៊ុន សែន។

យោងតាមឯកសាររបស់ក្រសួងដែនដីបានឲ្យដឹង កាលពីថ្ងៃទី១៣មេសាកន្លងមកថា គំរោងនេះជាការវិនិយោគរបស់ក្រុមហ៊ុន GoodRee Development Limited ដែលតំណាងដោយលោក តាន់ គឹមលាន។គំរោងដ៏ធំនេះមានអាគារចំនួនបី ដែលមានកំពស់១៩ជាន់ អាគារ២១ជាន់ និងអាគារកំពស់២៥ជាន់។ ឯកសារដដែលបានឲ្យដឹងថា មជ្ឈមណ្ឌលពាណិជ្ជកម្មនេះរួមមាន ផ្សារទំនើប អាគារការិយាល័យ ខុនដូ និងសេវាកម្មជាច្រើនទៀត។
គំរោងនេះ វិនិយោគក្នុងទឹកប្រាក់រហូតដល់២២៧លានដុល្លារអាមេរិក នៅលើតំបន់ដែលកំពុងមានការរីកចម្រើនយ៉ាងលឿននេះ។
បច្ចុប្បន្នតំបន់ភាគខាងត្បូងរាជធានីភ្នំពេញ ពិសេសតំបន់ស្ថិតនៅស្របតាមបណ្តោយផ្លូវ៦០ម៉ែត្រ ឬមហាវិថីសម្តេច តេជោ នេះ មានគំរោងលំនៅដ្ឋាន និងមជ្ឈមណ្ឌលពាណិជ្ជកម្មជាច្រើន ដូចជា បុរី ប៉េង ហួត បុរី Woodland បុរីរបស់ក្រុមហ៊ុន ជីព ម៉ុង និងគំរោងអភិវឌ្ឍន៍ជាច្រើនទៀតដូចជា R&F ដែលមានអាគារលំនៅដ្ឋានសហកម្មសិទ្ធិរហូតដល់២០អាគារ និងគំរោងអភិវឌ្ឍន៍ជាច្រើនទៀត៕