ក្រុមហ៊ុនចិនគ្រោងសាងសង់រោងចក្រផលិតសម្ភារសិក្សា និងកីឡានៅកម្ពុជា

April 10, 2019

ដោយ នៅ ស៊ីវុត្ថា

ភ្នំពេញ៖ ក្រុមហ៊ុនចិនមកពីខេត្តសានស៊ីបានមានបំណងក្នុងការវិនិយោគបង្កើតរោងចក្រផលិតសម្ភារសិក្សា និងកីឡានៅកម្ពុជា ដើម្បីផ្គត់ផ្គង់តម្រូវការទីផ្សារក្នុងស្រុក ជាពិសេសវិស័យអប់រំជាតិ និងនាំចេញទៅកាន់ទីផ្សារអន្តរជាតិសំខាន់ៗ ដែលជាដៃគូពាណិជ្ជកម្មរបស់កម្ពុជា។

លោក ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជា នៅក្នុងជំនួបជាមួយ លោក Wang Liping ប្រធានក្រុមហ៊ុន GuangBo Group Co., Ltd កាលពីទី៩ ខែមេសា ឆ្នាំ២០១៩ម្សិលមិញនេះ បានសម្តែងការគាំទ្រចំពោះក្រុមហ៊ុនចិនមួយនេះដែលមានគម្រោងវិនិយោគបង្កើតរោងចក្រផលិតសម្ភារសិក្សា និងកីឡានៅក្នុងប្រទេសកម្ពុជា ព្រោះប្រទេសកម្ពុជាជាទីតាំងភូមិសាស្ត្រមានសក្តានុពលសេដ្ឋកិច្ច គោលនយោបាយគាំពារវិនិយោគ គោលនយោបាយអភិវឌ្ឍន៍ឧស្សាហកម្ម គម្រោង Plus One នៅតាមតំបន់សេដ្ឋកិច្ចពិសេស និងការលើកទឹកចិត្តផ្សេងៗរបស់រាជរដ្ឋាភិបាល ចំពោះវិនិយោគិនបរទេស។

លោក ប៉ាន សូរស័ក្តិ បន្តថា «កម្ពុជាមានតំបន់សេដ្ឋកិច្ចពិសេសចំនួន ១៩កំពុងធ្វើប្រតិបត្តិការ សម្រាប់ផ្តល់ឱ្យវិនិយោគិនបើករោងចក្រ ដើម្បីទទួលបានការលើកលែងពន្ធលើប្រាក់ចំណេញ ៩ឆ្នាំ អាចគ្រប់គ្រងភាគហ៊ុន ១០០% ហើយអាចនាំចេញផលិតផលទៅកាន់ទីផ្សារក្នុងតំបន់ (អាស៊ាន) សហរដ្ឋអាមេរិក និងសហគមន៍អឺរ៉ុប នៅក្រោមកម្មវិធីអនុគ្រោះពន្ធថែមទៀត»។

លោករដ្ឋមន្ត្រីបន្ថែមថា រាជរដ្ឋាភិបាលបាននិងកំពុងខិតខំប្រឹងប្រែងក្នុងការលើកកម្ពស់បរិយាកាសធុរកិច្ច និងវិនិយោគ តាមរយៈការកាត់បន្ថយសកម្មភាពការិយាធិបតេយ្យ ការសាងហេដ្ឋារចនាសម្ព័ន្ធរូបវន្ត (ផ្លូវគមនាគមន៍ ព្រលានយន្តហោះ កំពង់ផែអន្តរជាតិ និងតំបន់សេដ្ឋកិច្ចពិសេស) ការបណ្តុះបណ្តាលធនធានមនុស្ស ការចងក្រង និងធ្វើវិសោធនកម្មច្បាប់ថ្មីៗ សំដៅគាំទ្រការអភិវឌ្ឍវិស័យឯកជន និងពង្រឹងឧត្តមភាពប្រកួតប្រជែងរបស់កម្ពុជា។

លោក Wang Liping ប្រធានក្រុមហ៊ុន GuangBo Group Co., Ltd និងសហការី បានថ្លែងអំណរគុណលោក រដ្ឋមន្ត្រី ប៉ាន សូរស័ក្តិ ដែលបានគាំទ្រគម្រោងវិនិយោគខាងលើ និងបានចែករំលែកនូវព័ត៌មានសំខាន់ៗ ទាក់ទងឱកាសវិនិយោគនៅក្នុងប្រទេសកម្ពុជា។

លោក Wang Liping ក៏បានសន្យាពិនិត្យលទ្ធភាពពង្រីកការវិនិយោគមកកម្ពុជា នៅក្នុងពេលឆាប់ៗខាងមុខ ដើម្បីតភ្ជាប់ទំនាក់ទំនងពាណិជ្ជកម្មប្រទេសទាំងពីរ នៅក្រោមក្របខណ្ឌខ្សែក្រវ៉ាត់១ និងផ្លូវ១ សំដៅរួមចំណែកបង្កើតឱកាសការងារ និងប្រាក់ចំណូលជូនប្រជាពលរដ្ឋខ្មែរ ព្រមទាំងចូលរួមអភិវឌ្ឍន៍កំណើនសេដ្ឋកិច្ច ជាមួយរាជរដ្ឋាភិបាលកម្ពុជា៕

ដំណឹងល្អ! ផ្សារទំនើបចំនួន៩ទៀត ត្រៀមខ្លួនឈានជើងចូលទីផ្សារនាពេលខាងមុខ

April 10, 2019

1

ដោយ រ៉ាណេត

ភ្នំពេញ៖ បើមិនការប្រែប្រួលនោះទេ នៅត្រឹមដើមឆ្នាំ២០២០ខាងមុខនេះ ផ្សារទំនើបធំៗចំនួន៩ទៀត នឹងត្រៀមខ្លួនចូលមកដំណើរការនៅលើទីផ្សារ បន្ទាប់ពីគម្រោងសាសង់ត្រូវបានបញ្ចប់នៅត្រឹមដំណាច់ឆ្នាំ២០១៩។

វត្តមានរបស់ផ្សារទំនើបចំនួន៩ ដែលរួមមានដូចជា៖ ផ្សារទំនើប Phnom Penh Mega Mall, The Olympia Mall, Chip Mong Baktouk CC, WB Arena, The Park, The Point, Noro Mall, The Bridge, និង Midtown-mall នឹងធ្វើឱ្យមានបរិយាកាសសង្គមកាន់តែមានភាពស៊ីវិល័យ ទាន់សម័យ និងផ្តល់ភាពស្រួលដល់ប្រជាជនក្នុងតំបន់ ហើយក៏ជាការចូលរួមលើកកម្ពស់ លើផ្នែកហេដ្ឋារចនាសម្ព័ន្ធ និងសង្គមផងដែរ។

អ្នកស្រាវជ្រាវផ្នែកអចលនទ្រព្យជាន់ខ្ពស់ប្រចាំក្រុមហ៊ុន CBRE Cambodia កញ្ញា គឹម គិនកេសា បានប្រាប់តាមទូរស័ព្ទកាលពីល្ងាចថ្ងៃទី៩ មេសាកន្លងមកថា សម្រាប់ឆ្នាំ២០១៩ ទំហំនៃផ្ទៃក្រឡាសម្រាប់ដាក់លក់រាយ នៅក្នុងបណ្តាផ្សារទំនើបនៅកម្ពុជា មានកំណើនរហូតដល់ចំនួន៣៤៨,០០០ ម៉ែត្រការ៉េ ខណៈដែលកាលពីឆ្នាំ២០១៨ ផ្ទៃក្រឡាសម្រាប់ទីតាំង លក់រាយមានចំនួនត្រឹមតែ២៨២,០០០ ម៉ែត្រការ៉េតែប៉ុណ្ណោះ។

កញ្ញាបន្តថា “ការកើនឡើងផ្សារទំនើបយ៉ាងច្រើននៅឆ្នាំ២០១៩នេះ មួយភាគធំគឺជាផ្នែកដែលបន្សល់ ពីគម្រោងចាស់ដែលមិនទាន់បញ្ចប់រួចរាល់កាលពីឆ្នាំ២០១៨”។

យោងតាមរបាយការណ៍របស់ CBRE បានឲ្យដឹងផងដែរថា នៅឆ្នាំ២០១៨កន្លងមកនេះ កំណើននៃចំនួនម៉ាកផលិតផលថ្មីបានកើនឡើង តាមរយៈទីផ្សារទំនើបរហូតដល់៦៥ម៉ាក ខណៈឆ្នាំ២០១៧ ដែលមានត្រឹម២៩ម៉ាក។ ផលិតផលល្បីៗដែលនាំចូល ភាគច្រើនជាប្រភេទចំណីអាហារ និងភេសជ្ជៈ និងត្រូវបាននាំចូលមកពីតំបន់អាស៊ីប៉ាស៊ីហ្វិក ហើយមួយចំណែកតូចត្រូវបាននាំចូលមកពីប៉ែកអឺរ៉ុប ដូចជាសម្ភារៈប្រើប្រាស់ និងសម្លៀកបំពាក់ជាដើម។

ប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានបង្ហាញពីក្ដីសាទរ ជាមួយវត្តមាននៃផ្សារទំនើបទាំងនេះ ដោយលោកបានមានប្រសាសន៍ថា បើទោះជាផ្សារទំនើបចំនួន៩ ដូចបានរៀបរាប់ខាងលើនេះពិតជាដំណើរមែន ក៏វានៅតែមិនទាន់គ្រប់គ្រាន់នៅឡើយនោះទេ ដែលវាទាមទារឱ្យមានបណ្តាអ្នកវិនិយោគ ចូលមកបង្កើតផ្សារទំនើបដូចនេះបន្ថែមទៀត ដើម្បីឱ្យសមស្របទៅតាមតម្រូវការ។ លោកបន្តថា បច្ចុប្បន្ននៅក្នុងប្រទេសកម្ពុជា ពិសេសនៅក្នុងរាជធានីភ្នំពេញ ភាគច្រើនគឺនៅមានភាពពេញនិយមជាមួយផ្សារប្រពៃណី ដូចជាផ្សារដើមគរ ផ្សារអូរឫស្សី ផ្សារច្បារអំពៅ ក៏ដូចជាផ្សារថ្មីជាដើម ក៏ព្រោះតែផ្សារទំនើបនៅមិនទាន់អាចបំពេញនូវតម្រូវការបានទាំងស្រុង។

លោកបានបន្តទៀតថា “វត្តមាននៃកំណើនផ្សារទំនើប នឹងចូលរួមចំណែកយ៉ាងធំក្នុងការជួយលើកស្ទួយវិស័យសេដ្ឋកិច្ច វិស័យពាណិជ្ជកម្ម ក៏ដូចជាសុខុមាលភាពរបស់ប្រជាជនផងដែរ”។ លោកបន្តថា “នៅពេលមានផ្សារទំនើបកាន់តែច្រើន ទីក្រុងកាន់តែរីកធំ ហើយអាជីវករ ឬពាណិជ្ជករ ដែលធ្លាប់តែប្រកបតាមបែបប្រពៃណីនោះ នឹងងាកចូលទៅប្រកបរបរនៅក្នុងផ្សារទំនើបវិញ”។

ហេតុផលដោយសារ តែនៅពេលដែលផ្សារទំនើបមានកាន់តែច្រើន នោះទីតាំងជួលនឹងមានភាពទូលាយ ហើយតម្លៃក៏មានកម្រិតទាបក្រោមការប្រកួតប្រជែង និងកាន់តែផ្តល់លទ្ធភាពដល់បណ្តាអាជីវករ ដែលមានបំណង់ចង់ប្រកអាជីវកម្មនៅក្នុងផ្សារទំនើប។ ធម្មតា នៅពេលប្រទេសមួយកាន់តែរីកចម្រើន មានការអភិវឌ្ឍន៍ ប្រជាពលរដ្ឋកាន់តែមានលទ្ធភាពខ្ពស់ នោះគឺសុទ្ធតែត្រូវការផ្សារទំនើបនេះទាំងអស់៕

តើប្រធានាធិបតីអាមេរិក Donald Trump មានទ្រព្យសម្បត្តិអ្វីខ្លះជាមួយទឹកប្រាក់រហូតដល់ ៣០០០លានដុល្លារ

April 10, 2019

0

ដោយ វល័ក្ខ

ភ្នំពេញ៖ មុនពេលក្លាយជាប្រធានាធិបតីអាមេរិកទី៤៥ លោក Donald J.Trump មិនសូវមានគេស្គាល់និងចាប់អារម្មណ៍ណាស់ណាទេ ព្រោះលោកមានឋានៈត្រឹមតែជាអ្នកជំនួញ និងជាមហាសេដ្ឋីមួយរូប ដែលមានលុយខ្ទង់ពាន់លានដុល្លារអាមេរិក ប៉ុន្តែទ្រព្យសម្បត្តិដែលលោកមាន មិនត្រូវបានមហាជនទូទៅដឹងលម្អិតឡើយ ដោយមនុស្សភាគច្រើនដឹងត្រឹមតែថា លោកមានអចលទ្រព្យជាច្រើននៅក្នុងទីក្រុងញូវយ៉ក។

ខាងក្រោមនេះគេហទំព័រអចលនទ្រព្យ និងសេដ្ឋកិច្ច Propertyarea.asia បានលើកយកទ្រព្យសម្បត្តិរបស់លោក Donald Trump មួយៗមកលម្អិតជូនប្រិយមិត្តអ្នកអានបានសិក្សាស្វែងយល់។

១) អចលនទ្រព្យនៅក្នុងទីក្រុងញូវយ៉ក

អចលនទ្រព្យនៅក្នុងទីក្រុងញូវយ៉ករបស់លោក Donald Trump តាមការបញ្ជាក់របស់ទស្សនាវដ្ដី Forbes បានឱ្យដឹងថា សរុបជាលុយមានចំនួន១.៤៧ពាន់លានដុល្លារអាមេរិក ដែលតួលេខនេះគិតត្រឹមខែកុម្ភៈ ឆ្នាំ២០១៩។

អចលនទ្រព្យនៅក្នុងទីក្រុងញូវយ៉ករបស់លោក Donald Trump រួមមាន៖

១.១ អគារ 1290 Avenue of the Americas

ជាអគារពាណិជ្ជកម្មដ៏ខ្ពស់មួយនៅក្នុងទីក្រុងញូវយ៉ក ដោយមានភាគហ៊ុនរបស់លោកDonald Trump ចំនួន៣០% ដែលបច្ចុប្បន្នវាត្រូវបានគេដឹងថា មានតម្លៃ២.៤ពាន់លានដុល្លារអាមេរិក ដូច្នេះ Donald Trump មានចំណែក៤៤៦លានដុល្លារអាមេរិក។

១.២ អគារ 40 Wall Street (Trump Building)

ជាអគារមួយដែលត្រូវបានសាងសង់ឡើងនៅឆ្នាំ១៩២៩ និងបញ្ចប់ការសាងសង់នៅឆ្នាំ១៩៣០ ជាទីស្នាក់ការកណ្ដាលរបស់ក្រុមហ៊ុន The Manhattan Company ប៉ុន្តែបច្ចុប្បន្នវាជាកម្មសិទ្ធិ១០០% របស់លោកDonald Trump ហើយវាក៏ត្រូវបានគេស្គាល់ថា ជាអគារ Trump Building ផងដែរចាប់តាំងពីចុងឆ្នាំ ១៩៩៥។ អគារនេះ បើតាមការវាយតម្លៃគឺគិតជាលុយស្មើនឹង៤៨៤លានដុល្លារអាមេរិក។

១.៣ អគារ Trump Tower

ជាអគារពាណិជ្ជកម្មមួយ ដែលភាគច្រើនត្រូវបានគេជួលសម្រាប់ បើកហាងលក់ទំនិញអនឡាញ និងក្រុមហ៊ុនអចលនទ្រព្យ។ អគារនេះមានតម្លៃ ៣១៨លានដុល្លារអាមេរិក ហើយវាគឺជាលោក Donald Trump តែម្នាក់គត់។

១.៤ អគារ 6 E. 57th Street (Nike Town)

ជាអគារលក់ផលិតផលនិងសម្ភារៈម៉ាក Nike ដ៏ធំនៅក្នុងទីក្រុងញូវយ៉ក ប៉ុន្តែប្រភភពព័ត៌មានចុងក្រោយបានបញ្ជាក់ថា ក្រុមហ៊ុនNike បានបោះបង់ចោលអគារនេះកាលពីឆ្នាំមុន ដោយឡែកលោកDonald Trum នៅតែជាបន្តជួលទៅឱ្យក្រុមហ៊ុនផ្សេង ដែលតាមកិច្ចព្រមព្រៀង គឺមានក្រុមហ៊ុនធំមួយបានបោះលុយយ៉ាងច្រើនសន្ធឹក សម្រាប់ជួលអគារនេះ។ បើតាមការឱ្យដឹង អគារនេះគិតជាទឹកប្រាក់ស្មើនឹង១៩១លានដុល្លារអាមេរិក និងជារបស់លោក Donald Trump តែម្នាក់គត់។

១.៥ អគារ Trump Park Avenue

ជាអតីតសណ្ឋគារកប់ពពក ប៉ុន្តែបច្ចុប្បន្នបានក្លាយជាលំនៅដ្ឋានខុនដូ និងជាកម្មសិទ្ធិផ្ដាច់មុខរបស់លោក Donald Trump បន្ទាប់ពីទិញក្នុងតម្លៃ១១៥លានដុល្លារអាមេរិក កាលពីឆ្នាំ២០០២។ ទីភ្នាក់ងារវាយតម្លៃអចលនទ្រព្យ នៅក្នុងទីក្រុងញូវយ៉ក បានឱ្យដឹងថា អគារនេះមានតម្លៃ១៧៥លានដុល្លារអាមេរិក។

១.៦ អគារ Trump Parc / Trump Parc East

ជាអគារលំនៅដ្ឋាន ដែលអមដោយអគារពីរបូកបញ្ចូលគ្នា ដោយមួយមានកម្ពស់ ៣៨ជាន់ ជាអគារខុនដូ និងមួយទៀតជាអគារផ្ទះល្វែង និងខុនដូកម្ពស់១៤ជាន់។ ដើមឡើយ អគារនេះសណ្ឋាគារ ដែលមានឈ្មោះថា Barbizon Plaza Hotel ប៉ុន្តែត្រូវបានលោក Donald Trump ទិញកាលពីឆ្នាំ១៩៨១ ដោយកាលនោះDonald Trump បានទិញទាំងផ្ទះ ដែលនៅជាប់សណ្ឋាគារនេះទៀតផង ដើម្បីជួសជុល និងរៀបចំជាខុនដូ ដែលមាន៣៤០យូនីត។ បច្ចុប្បន្ននេះ អគារ Trump Parc មានតម្លៃ៤៥លានដុល្លារអាមេរិក។

១.៧ អគារ Trump Plaza

ជាសណ្ឋាគារ និងកាស៊ីណូ ដែលចាប់ផ្ដើមដំណើរការនៅឆ្នាំ១៩៨៤ និងបានបិទវិញនៅឆ្នាំ ២០១៤។ អគារនេះ មានភាគហ៊ុនមួយចំណែកជារបស់ Donald Trump ប៉ុន្តែក្រោយពីបើកដំណើរការបានមួយរយៈ ប្រាក់ចំណូលដែលទទួលបានគឺតិចតូចបំផុត។ ចំណែកពន្ធវិញគឺច្រើន ដែលបង្ខំចិត្តឱ្យ Donald Trump ទិញភាគហ៊ុនផ្ដាច់ពីដៃគូសហការក្នុងតម្លៃ៧០លានដុល្លារអាមេរិក។ ក្រោយមកទៀត លោក Donald Trump បានទិញផ្ទះ និងអគារមួយចំនួនទៀត នៅក្បែរនោះ ដើមពង្រីកសណ្ឋាគារនិងកាស៊ីណូ ដោយចំណាយលុយច្រើនសន្ធឹក ប៉ុន្តែជំនួញមួយនេះ ហាក់មិនជោគជ័យទាល់តែសោះ។ រហូតដល់ឆ្នាំ ២០១៤ លោកDonald Trump បានសម្រេចចិត្តបិទអគារ Trump Plaza ជាផ្លូវការ ហើយវាក៏ជាកាស៊ីណូទី៤ ដែលបានបិទទ្វានៅក្នុងទីក្រុងអាត្លង់ទិច។

ងាកត្រឡប់មកវិញ តើអគារនេះបច្ចុប្បន្នមានតម្លៃប៉ុន្មានដែរ? តាមការចុះផ្សាយរបស់ទស្សនាវដ្ដី Forbes គឺមានតម្លៃ៤០លានដុល្លារអាមេរិក។

១.៨ អគារ Trump World Tower

ជាអគារលំនៅដ្ឋានមួយ ដែលចាប់ផ្ដើមសាង់សង់នៅឆ្នាំ១៩៩៩ និងបញ្ចប់ការសាងសង់នៅឆ្នាំ២០០១ ដោយចំណាយថវិកា៣០០លានដុល្លារអាមេរិក មានកំពស់៧២ជាន់ និងមានផ្ទៃដី៨៩,៨០០ម៉ែត្រការ៉ែ ដោយក្នុងនោះលោក Donald Trump គឺជាម្ចាស់ ១០០%។ ត្បិតតែអគារនេះចំណាយលុយក្នុងការសាងសង់៣០០លានដុល្លារអាមេរិក ក្ដី ប៉ុន្តែគិតត្រឹមពេលនេះទស្សនាវដ្ដី Forbes បានចេញផ្សាយថា វាមានតម្លៃត្រឹមតែ២៦លានដុល្លារអាមេរិកប៉ុណ្ណោះ។

១.៩ អគារ Trump International Hotel &; Tower New York

អគារនេះចាប់ផ្ដើមសាងសង់ឡើងនៅឆ្នាំ១៩៦៨ និងបញ្ចប់ការសាងសង់នៅឆ្នាំ ១៩៧០ ជាសណ្ឋគារដ៏ទំនើបមួយ ប៉ុន្តែចាប់ពីឆ្នាំ១៩៩៤ ដែលលោកDonald Trump បានចូលលូកដៃ និងជាម្ចាស់ភាគហ៊ុនមក លោកបានប្រែក្លាយសណ្ឋាគារនេះទៅជាលំ នៅដ្ឋានខុនដូ។ បច្ចុប្បន្ន Trump International Hotel &; Tower New York គឺជារបស់លោក Donald Trump តែម្នាក់គត់ ហើយអគារមួយនេះគិតជាលុយស្មើនឹង២០លានដុល្លារអាមេរិក។

២) អចលនទ្រព្យផ្សេងៗ ដែលស្ថិតនៅក្រៅពីទីក្រុងញូវយ៉ក

ពិតជាដូចអ្វីដែលគេបាននិយាយមែន លោក Donald Trump គឺជាមហាសេដ្ឋីអចលនទ្រព្យ និងជាបុគ្គលដែលជោគជ័យលើវិស័យនេះ។ ទ្រព្យសម្បត្តិដែលជាអចលនទ្រព្យរបស់លោក ដែលមាននៅតាមតំបន់ផ្សេងៗ ក្រៅពីទីក្រុងញូវយ៉ក គិតជាលុយមានរហូតដល់៦៣០លានដុល្លារអាមេរិក។

អចលនទ្រព្យក្រៅពីទីក្រុងញូវយ៉ករបស់លោក Donald Trump រួមមាន៖

២.១ អគារ 555 California Street

555 California Street ពីមុនជាអគាររបស់ធនាគារBank of America Center ដែលមាន៥២ជាន់ ស្ថិតនៅក្នុងទីក្រុងសាន់ហ្វ្រាន់ស៊ីស្កូ ហើយក៏ជាអគារខ្ពស់ជាងគេលំដាប់ទី៤នៅក្នុងទីក្រុងនេះផងដែរ។ នៅឆ្នាំ២០០៧ លោក Donald Trump បានទិញភាគហ៊ុនរបស់អគារនេះចំនួន៣០%។ តាមការវាយតម្លៃរបស់ Forbes បានបញ្ជាក់ថា អគារនេះមានតម្លៃ២.១ពាន់លានដុល្លារអាមេរិក ដូច្នេះលោកDonald Trump មានចំណែក៤៥២លានដុល្លារអាមេរិក។

២.២ អគារ Trump International Hotel Las Vegas

ជាសណ្ឋគារ និងខុនដូប្រណិត មានកម្ពស់៦៤ជាន់ ដែលត្រូវបានចាប់ផ្ដើមសាងសង់នៅឆ្នាំ២០០៥ និងបញ្ចប់ការសាងសង់ ព្រមទាំងដាក់ដំណើរការនៅឆ្នាំ ២០០៨ ដោយចំណាយលុយ៥០០លានដុល្លារអាមេរិក សម្រាប់ថ្លៃសាងសង់។ តាមប្រភពច្បាស់ការណ៍មួយបានឱ្យដឹងថា ពីដំបូងលោក Donald Trump មានភាគហ៊ុនត្រឹមតែ៥០% ប៉ុណ្ណោះ ប៉ុន្តែពេលនេះ លោកDonald Trump មានភាគហ៊ុន១០០% ហើយអគារនេះផងដែរ បើគិតជាលុយមានតម្លៃ ៦៨លានដុល្លារអាមេរិក។

២.៣ អគារ Trump International Hotel Washington

ជាសណ្ឋគារលំដាប់លេខ១ នៅក្នុងទីក្រុងវ៉ាស៊ីនតោន ដែលនៅជិតសេតវិមានអាមេរិក។ ដំបូងឡើយអគារនេះ ជាការិយាល័យប្រៃសណីយ៍ ប៉ុន្តែនៅអំឡុងឆ្នាំ ២០១២-២០១៣ រដ្ឋបាលសេវាកម្មទូទៅរបស់អាមេរិក បានជ្រើសរើសយកក្រុមហ៊ុនរបស់លោក Donald Trump ក្នុងការជួសជុលនិងកែលម្អអគារនេះឡើងវិញ ដោយក្រុមហ៊ុនរបស់លោក Donald Trump បានដាក់ចេញថ្លៃ២០០លានដុល្លារអាមេរិក ដើម្បីបានយកមកជួសជុល។

អគារដ៏ចំណាស់នេះ បានប្រែក្លាយទៅជាសណ្ឋគារដ៏ប្រណិតមួយ ដោយមាន ២៥០បន្ទប់ មានកន្លែងប្រជុំ ស្បា ភោជ្ជនីដ្ឋាន និងសារមន្ទីរ។ ក្រោយពីជួសជុលរួម រដ្ឋបាលសេវាកម្មទូទៅរបស់អាមេរិក បានចុះកិច្ចព្រមព្រៀងជួលឱ្យ លោកDonald Trump ក្នុងតម្លៃ៣លានដុល្លារក្នុង១ឆ្នាំ។ អគារទាំងមូលនេះជារបស់រដ្ឋភិបាលអាមេរិក ដែលមានតម្លៃ២៣៨លានដុល្លារអាមេរិក។ ចំណែកសណ្ឋគារទាំងមូលនេះ មានភាគហ៊ុនរបស់លោ ក Donald Trump ចំនួន ៧៧.៥% ដូច្នេះ Donald Trump ទទួលបានត្រឹមតែ៥៣លានដុល្លារអាមេរិកប៉ុណ្ណោះ។

២.៤ វីឡា Trump Winery

ជាវីឡាដែលមានទេសភាពធម្មជាតិដ៏ស្រស់ស្អាត មានទឹក ភ្នំ ជាពិសេសវាគឺជាចម្ការទំពាំងបាយជូរធំជាងគេនៅក្នុងរដ្ឋVirginia។ កន្លែងមួយនេះ ត្រូវបានគេពេញនិយមសម្រាប់រៀបចំព្រឹត្តិការណ៍ផ្សេងៗ ដូចជាអាពាហ៍ពិពាហ៍ ព្រឹត្តិការណ៍ភ្លក្សរសជាតិស្រាទំពាំងបាយជូរថ្មី ជាដើម។ លោក Donald Trump បានទិញកន្លែងមួយនេះ ក្នុងមានជាម្ចាស់ ១០០% នៅក្នុងខែមេសា ឆ្នាំ ២០១១ និងដាក់ឱ្យដំណើរការឡើងវិញនៅខែតុលា ឆ្នាំ២០១១ ហើយគិតត្រឹមពេលនេះវាមានតម្លៃ៣៤លានដុល្លារអាមេរិក។

២.៥ ដីមួយកន្លែងនៅក្នុងរដ្ឋកាលីហ្វញ៉ា

គេមិនដឹងថា លោក Donald Trump ចង់ធ្វើអ្វីនោះទេ សម្រាប់ដីវាលមួយកន្លែងនៅក្បែរទីលានវាយកូនគោលរបស់អាមេរិក ទោះបីជាយ៉ាងក៏ដោយ ដីនេះត្រូវបានគេវាយតម្លៃថា មានតម្លៃស្មើនឹង១៨លានដុល្លារអាមេរិក ហើយវាគឺជារបស់លោក Donald Trump តែម្នាក់ឯង។

២.៦ អគារ Trump International Hotel &; Tower Chicago

ជាសណ្ឋគារលំដាប់ល្អប្រណិតបំផុត និងជាអគារខ្ពស់កប់ពពកនៅក្នុងមួយនៅក្នុងទីក្រុងឈីកាហ្គោ។ កាលពីឆ្នាំ ២០០១ លោក Donald Trump ប្រកាសថា នឹងប្រែក្លាយអគារនេះ ឱ្យខ្ពស់ជាងគេបំផុតនៅក្នុងពិភពលោក ប៉ុន្តែក្រោយកើតមានហេតុការណ៍វាយប្រហារអគារភ្លោះ ឬអគារពាណិជ្ជកម្មអាមេរិក នៅថ្ងៃទី១១ ខែកក្កដា គម្រោងមួយនេះត្រូវបានលុបចោល ប៉ុន្តែបច្ចុប្បន្នវាគឺជាអគារខ្ពស់ជាងគេ លំដាប់ទី៤នៅសហរដ្ឋអាមេរិក។ អគារនេះមានតម្លៃ ១០០លានដុល្លារអាមេរិក និងជារបស់លោកDonald Trump។

៣) ទីលាន និងក្លឹបវាយកូនគោលរបស់លោក Donald Trump

ពិតជាកំពូលមហាសេដ្ឋីដែលមានគំនិតវិនិយោគមែន ក្រៅពីរកស៊ីក្នុងវិស័យអចលនទ្រព្យហើយ លោក Donald Trumpនៅចាប់អារម្មណ៍ និងវិនិយោគក្នុងវីស័យកីឡាទៀត ដោយបច្ចុប្បន្នលោកមានទីលាន និងក្លឹបវាយកូនគោលចំនួន៤កន្លែង ដែលគិតជាទឹកលុយស្មើនឹង៥៥០លានដុល្លារអាមេរិក។

៤. ស្លាកសញ្ញាអាជីវកម្ម

ឈ្មោះរបស់លោក Donald Trump ត្រូវបានគេហ៊ានឱ្យតម្លៃរហូតដល់ទៅជាង ១៧០លានដុល្លារអាមេរិក ដែលក្នុងនោះមានដូចជាTrump Tower, Trump Hotel ជាដើម។

៥. សាច់ប្រាក់ និង ទ្រព្យសម្បត្តិផ្ទាល់ខ្លួន

មហាសេដ្ឋីរូបនេះ ត្រូវបានទស្សនាវដ្ដី Forbes ចេញផ្សាយថា មានសាច់ប្រាក់ និង ទ្រព្យសម្បត្តិផ្ទាល់ខ្លួនប្រមាណជា៣១០លានដុល្លារអាមេរិក។

៥.១ សាច់ប្រាក់សុទ្ធ

របាយការណ៍ជាសាធារណៈមួយបានបង្ហាញថា លោកDonald Trump បានចំណាយលុយប្រមាណ៦៦លានដុល្លារអាមេរិក ក្នុងយុទ្ធនាការឃោសនាបោះឆ្នោតប្រធានាធិបតីសហរដ្ឋអាមេរិក ហើយបើតាមការឱ្យពីForbes គិតត្រឹមពេលនេះDonald Trump មានលុយជាសាច់ប្រាក់សុទ្ធ១៤០លានដុល្លារអាមេរិក។

៥.២ អគារ Trump Tower Penthouse

អគារមួយនេះអាចនិយាយបានថាជាផ្ទះ ជាកន្លែងស្នាក់នៅ និងជាការិយាល័យរបស់លោក Donald Trump។ បច្ចុប្បន្ន អគារនេះមានវាមានតម្លៃ៥៧លានដុល្លារអាមេរិក។

៥.៣ យន្តហោះធ្វើដំណើរផ្ទាល់ខ្លួន

Trump Force One ពីដំបូងគឺជាយន្តហោះផ្ទាល់ខ្លួនរបស់លោក Donald Trump ប៉ុន្តែត្រូវបានប្ដូរឈ្មោះ ក្រោយពេលលោកឡើងកាន់តំណែង ជាប្រធានាធិបតីសហរដ្ឋអាមេរិក ដែលវាគឺជាយន្តហោះ Boeing 757 និងមានតម្លៃ៣២លានដុល្លារអាមេរិក។

៥.៤ ផ្ទះវីឡា

ផ្ទះវីឡាចំនួន ៣ នៅតំបន់ Palm Beach ក្បែរក្លឹបវាយកូនគោលឯកជន Mar-a-Lago។ ផ្ទះវីឡាទាំង៣នេះ គិតជាទឹកប្រាក់មានចំនួន ៣៦លានដុល្លារអាមេរិក។

៥.៥ ផ្ទះឯកជន នៅឯជនបទ (Seven Springs)

ផ្ទះមួយនេះមានតម្លៃ៣០លានដុល្លារអាមេរិក ដែលត្រូវលោក Donald Trump រស់នៅក្រោយពេលលោករៀបការរួច ហើយក៏ជាកន្លែងកំណើតនៃកូនស្រីដំបូងរបស់លោកគឺ Ivanka។

៥.៦ ភូមិគ្រឹះនៅលើដីកោះ បែរមុខទៅសមុទ្រ

ជាភូមិគ្រឹះដ៏ស្រស់ស្អាត និងទាក់ទាញមួយ ត្រូវបានលោក Donald Trump ទិញពីអ្នកជំនួញឥណ្ឌា ដែលជាមិត្តភ័ក្តិរបស់លោក។ ចំពោះតម្លៃនៃការទិញនោះមិនត្រូវបានបង្ហាញឱ្យដឹងឡើយ ប៉ុន្តែកាលពីឆ្នាំ ២០១៧ ភូមិគ្រឹះនេះត្រូវបានគេវាយតម្លៃថា មានតម្លៃស្មើនឹង២៨លានដុល្លារអាមេរិក តែមកដល់ពេលនេះគឺវាមានតម្លៃត្រឹមតែ ១៥លានដុល្លារអាមេរិកប៉ុណ្ណោះ។

៥.៧ ផ្ទះនៅតំបន់ Beverly Hills

មិនត្រូវបានគេដឹងព័ត៌មានលម្អិត ទាក់ទងនឹងផ្ទះនេះឡើយ ប៉ុន្តែបើតាមការវាយតម្លៃរបស់ Forbes គឺវាមានតម្លៃ១៣លានដុល្លារអាមេរិក។

៥.៨ ផ្ទះវីឡាពីរជាប់គ្នា

ជាផ្ទះវីឡាដែលមានទីតាំងនៅតំបន់ Sterling ក្បែរក្លឹបវាយកូនគោលរបស់លោក Donald Trump។ វាមានតម្លៃ ១.៥លានដុល្លារអាមេរិក។

ទាំងនេះគឺជាព័ត៌មានលម្អិតទាក់ទង នឹងទ្រព្យសម្បត្តិរបស់លោក Donald Trump ដែលត្រូវបានចេញផ្សាយដោយទស្សនាវដ្ដី Forbes ដោយក្នុងនោះបានបញ្ជាក់ថា លោកមានទ្រព្យសម្បត្តិ គិតជាទឹកប្រាក់មានចំនួន៣.១ពាន់លានដុល្លារអាមេរិក៕

ចំណេះដឹង! តើកម្មសិទ្ឋបញ្ហាមានផលប្រយោជន៍ដូចម្តេច និងគ្របដណ្តប់លើផ្នែកអ្វីខ្លះ?

April 10, 2019

0

ដោយនៅ ស៊ីវុត្ថា

ភ្នំពេញ៖ កំណើនសេដ្ឋកិច្ចដែលរួមចំណែកដោយចំណេះដឹង កម្មសិទ្ធិបញ្ញា គឺជាការពិចារណា ដ៏សំខាន់ក្នុងការសម្រេចចិត្តផ្នែកពាណិជ្ជកម្ម។

ផលិតផល ម៉ាក និងការច្នៃប្រឌិតថ្មីៗ ជាច្រើន មានវត្តមាននៅលើទីផ្សារជារៀងរាល់ថ្ងៃ ដែលជាលទ្ធផលនៃការបន្តការច្នៃប្រឌិតនិងបង្កើតថ្មីរបស់មនុស្សជាតិ។ សហគ្រាសធុនតូចនិងធុនមធ្យម (SMEs) ជាកំលាំងចលករនៅពីក្រោយការបង្កើតថ្មីនេះ។

ការបង្កើតថ្មី និងការច្នៃប្រឌិត ជួនកាលមិនត្រូវបានធ្វើអាជីវកម្មឱ្យបានពេញលេញនោះទេ ដោយសារសហគ្រាសធុនតូច និងធុនមធ្យមភាគច្រើន មិនទាន់យល់ច្បាស់អំពីប្រព័ន្ធកម្មសិទ្ធិបញ្ញា ឬផលប្រយោជន៍នៃការការពារកម្មសិទ្ធិបញ្ញា ចំពោះតក្តកម្ម ម៉ាក និងគំនូរឧស្សាហកម្មរបស់ខ្លួន។

ប្រសិនបើកម្មសិទ្ធិបញ្ញាទាំងនោះ មិនត្រូវបានការពារដោយច្បាប់នោះទេ តក្កកម្ម នឹងបាត់បង់ទៅគូប្រកួតប្រជែងធំៗ ដែលមានភាពប្រកួតប្រជែងក្នុងការធ្វើអាជីវកម្មលើផលិតផល ឬសេវាក្នុងតម្លៃទាប ដែលធ្វើឱ្យតក្តករឬម្ចាស់ដើម មិនទទួលបានអត្ថប្រយោជន៍ ឬតម្លៃតបស្នងពីការបង្កើតថ្មីរបស់ខ្លួននោះទេ។

កិច្ចការពារកម្មសិទ្ធិបញ្ញាសមស្របរបស់ក្រុមហ៊ុន ជាជំហានដ៏សំខាន់ក្នុងការកំណត់អំពីការរំលោភបំពាន និងការប្រែក្លាយគំនិតទៅជាទ្រព្យអាជីវកម្ម ដែលមានតម្លៃ។ ការទាញយកផលប្រយោជន៍ពេញលេញ ពីប្រព័ន្ធការពារកម្មសិទ្ធិបញ្ញា អាចធ្វើឱ្យក្រុមហ៊ុន ទទួលបានចំណូលពីការបង្កើតថ្មី និងការច្នៃប្រឌិតរបស់ខ្លួន ដែលជាការលើកទឹកចិត្តនិងបង្កើនមូលធនដល់ការស្រាវជ្រាវ និងការអភិវឌ្ឍ។

មានផលិតផលឬសេវាថ្មីៗជាច្រើន ដែលការពារក្រោមប្រភេទផ្សេងៗគ្នានៃកម្មសិទ្ធិបញ្ញា។ សហគ្រាស តែងតែជូបប្រទះបញ្ហាប្រឈម ក្នុងការទាញយកតម្លៃនៃកម្មសិទិ្ធបញ្ញារបស់ខ្លួន និងប្រើប្រាស់កម្មសិទ្ធិបញ្ញា ឱ្យមានប្រសិទ្ធិភាពក្នុងយុទ្ធសាស្ត្រអាជីវកម្មរបស់ខ្លួន។

ក្រុមហ៊ុនដែលចំណាយធនធាន និងពេលវេលាក្នុងការការពារទ្រព្យកម្មសិទ្ធិបញ្ញារបស់ខ្លួន អាចបង្កើនការប្រកួតប្រជែងរបស់ខ្លួន និងជួយលើផ្នែកជាច្រើនដូចជា។

• បង្ការគូប្រកួតប្រជែងពីការចម្លង ឬធ្វើត្រាប់តាមផលិតផលរបស់ខ្លួន។
• ជៀសវាងលើការចំណាយថវិកាខ្ចះខ្ចាយលើការស្រាវជ្រាវ និងការផ្សព្វផ្សាយនៅទីផ្សារ។
• បង្កើតអត្តសញ្ញាណសហគ្រាសតាមរយៈម៉ាក។
• ក្នុងការផ្តល់អាជ្ញាប័ណ្ណ ឬការផ្ទេរសិទ្ធិ ផ្សេងៗនៃកម្មសិទ្ធិបញ្ញា។
• បង្កើតតម្លៃទីផ្សាររបស់ខ្លួន។
• ទទួលបានមូលធន និងហិរញ្ញប្បទាន។
• អាចពង្រីកទៅកាន់ទីផ្សារថ្មីៗ។

កម្មសិទ្ធិបញ្ញា (IP) សំដៅទៅលើការបង្កើតដោយគំនិតបញ្ញា ដូចជា តក្កកម្ម ស្នាដៃអក្សរសាស្រ្តនិងសិល្បៈ និមិត្តិសញ្ញា រូបភាព និងគំនូរដែលត្រូវបានប្រើប្រាស់ នៅក្នុងពាណិជ្ជកម្ម។កម្មសិទ្ធិបញ្ញា ត្រូវបានបែងចែកជាពីរប្រភេទ គឺកម្មសិទ្ធិឧស្សាហកម្ម សិទ្ធិអ្នកនិពន្ធនិងសិទ្ធិប្រហាក់ប្រហែល។

កម្មសិទ្ធិឧស្សាហកម្ម រួមមាន ប្រកាសនីយបត្រតក្កកម្ម ម៉ាក គំនូរឧស្សាហកម្ម និងម៉ាកសម្គាល់ភូមិសាស្ដ្រទំនិញ។ល។ ចំណែកឯសិទ្ធិអ្នកនិពន្ធ រួមមានស្នាដៃ អក្សរសាស្ត្រ និងសិល្បៈទំាងឡាយ ដូចជា រឿងប្រលោមលោក កំណាព្យ និងល្ខោន ភាពយន្ត ស្នាដៃតន្ត្រី គំនូរ រូបថត ចម្លាក់ និងស្ថាបត្យកម្មជាដើម។ សិទិ្ធប្រហាក់ប្រហែល គឺសំដៅទៅលើសិទ្ធិរបស់អ្នកសម្តែង ផលិតករហ្វូណូក្រាម និងអង្គភាពទូរផ្សាយ៕

ទីក្រុង Jakarta គ្រោងចំណាយទឹកប្រាក់ ៤០០០លានដុល្លារសាងសង់ផ្លូវរត់ភ្លើង ល្បឿនមធ្យម

April 10, 2019

0

ដោយ នៅ ស៊ីវុត្ថា

ឥណ្ឌូនេស៊ី៖ ទីក្រុង Jakarta ប្រទេសឥណ្ឌូនេស៊ី នឹងចាប់ផ្តើមសិក្សាគម្រោងសាងសង់ផ្លូវរត់ភ្លើងល្បឿនមធ្យម នៅខែមិថុនាឆ្នាំ២០១៩ខាងមុខ បន្ទាប់ពីត្រូវបាសិក្សាបុរេលទ្ធភាពម្តងរួចកាលពីឆ្នាំមុន។

រដ្ឋបាលក្រុងJakarta បានផ្តល់គម្រោងសិក្សាផ្លូវរត់ភ្លើងមួយនេះ ទៅឲ្យទីភ្នាក់ងារសហប្រតិបត្តិការអន្តរជាតិជប៉ុន(JICA) ដែលជាអ្នកអនុវត្តដោយផ្ទាល់។

លោក Shinichi Yamanaka តំណាង JICA ប្រចាំនៅឥណ្ឌូនេស៊ី បានឲ្យដឹងកាលពីពេលថ្មីៗនេះថា ការសិក្សាលើគម្រោងមួយនេះ នឹងត្រូវចំណាយពេល ១ឆ្នាំកន្លះ ពោលនឹងបញ្ចប់ជាស្ថាពរនៅក្នុងឆ្នាំ២០២០ ខាងមុខនេះ។

លោកបន្តថា ការសម្រេចរបស់ JICA នឹងក្លាយជាការវិនិយោគតិចឬច្រើន អាស្រ័យអាស្រ័យលើលទ្ធផលនៃលទ្ធភាពការសិក្សា។ គម្រោង Jakarta-Surabaya នឹងត្រូវបានគេកំណត់ដោយចំណាយទឹកប្រាក់ប្រហែល៦០ទ្រីលានរូពី (លុយឥណ្ឌូនេស៊ី) ដែលស្មើនឹង៤០០០លានដុល្លារអាមេរិកជាង ប៉ុន្តែយ៉ាងណាក៏ដោយ ចំនួននេះនឹងមានការប្រែប្រួលអាស្រ័យ លើលទ្ធផលនៃការសិក្សាចុងក្រោ។

ថ្វីបើតួលេខវិនិយោគត្រូវបានកំណត់ក៏ដោយ ក៏រដ្ឋាភិបាលឥណ្ឌូណេស៊ីបានកំណត់ទិសដៅ គម្រោងសាងសង់ផ្លូវរថភ្លើងល្បឿនមធ្យមនេះ ឲ្យសម្រេចតាមផែនការតាមការកំណត់ជាក់លាក់។តាមការគ្រោងទុក គម្រោងសាងសង់ផ្លូវល្បឿនមធ្យមនេះ អាចរត់បាន៧២០គីឡូម៉ែត្រក្នុងរយៈពេល៥.៥ម៉ោង ឬ១៦០គីឡូម៉ែត្រក្នុងមួយម៉ោង៕

ប្រធានសមាគម CVEA ប្រាប់វិធីសាស្រ្តចំនួន៦ មុនចូលវិនិយោគក្នុងវិស័យអចលនទ្រព្យ

April 9, 2019

0

ដោយ គង់ សូរិយា

ភ្នំពេញ៖ ការវិនិយោគលលវិស័យអចលនទ្រព្យ អាចមានហានិភ័យនិងឱកាសចំណេញខ្ពស់ ប្រសិនជាយើងវិនិយោគបានត្រឹមត្រូវ និងប្រឹក្សាជាមួយអ្នកជំនាញជាមុន។ ហេតុនេះការវិនិយោគដែលត្រឹមត្រូវ មិនមែនជាការវិនិយោគបែបផ្សងព្រេងនោះទេ។

ប៉ុន្តែសំណួរសួរថា តើអ្នកចង់រកស៊ីក្នុងវិស័យនេះ ត្រូវមានចំណេះដឹង និងជំនាញអ្វីខ្លះ ទើបអាចទទួលបានជោគជ័យក្នុងវិស័យនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា CVEA លោក ច្រឹក សុខនីម បានចូលរួមចែករំលែកបទពិសោធន៍ និងចំណេះដឹងក្នុងវិស័យនេះ ដោយលោកបានថ្លែងថា “ដើម្បីរកស៊ីក្នុងវិស័យនេះបានជោគជ័យលុះត្រាតែមានចំណេះដឹង ជំនាញ បទពិសោធន៍ និងការចេះប្រើធនធានមនុស្ស បន្ថែមពីលើធនធានថវិកាលើការត្រៀមវិនិយោគ”។

អ្វីជាចំណេះដឹង?

ចំណេះដឹង ជាការសំដៅលើការចេះ ប្រមូលព័ត៌មានយ៉ាងដូចម្តេចឲ្យបានគ្រប់ជ្រុងជ្រោយ និងត្រូវពង្រាយកំលាំងយ៉ាងម៉េចឲ្យបានគ្រប់កន្លែង ដើម្បីអាចទទួលបានព័ត៌មានបើកផ្លូវ និងព័ត៌មានពាក់ព័ន្ឋក្នុងវិស័យដែលយើងត្រូវផ្តល់សេវាកម្ម ឬវិនិយោគ។

ស្គាល់ខ្លួនឯង

យើងក៏ត្រូវយល់ដឹងពីខ្លួនឯងឲ្យបានច្បាស់ថា ខ្លួនយើងជាអ្នកណា មានជំនាញបែបណា និងចង់វិនិយោគលើវិស័យអ្វី? ឧទាហរណ៍ថា ចង់វិនិយោគលើដី យើងត្រូវដឹងថាដីកន្លែងណាល្អ និងងាយចំណេញប្រាក់។ ប្រសិនជាមានលុយតិច ហើយចង់វិនិយោគ យើងត្រូវវិនិយោគលើអចលនទ្រព្យណា ដែលមានចំណូលរៀងរាល់ខែ គឺអាចទិញផ្ទះ ឬទិញខុនដូសម្រាប់ជួល អាចបានចំណូលប្រចាំខែ ប៉ុន្តែប្រសិនជាទិញដីអាចកប់ដើម មិនមានប្រាក់បង្វិល ព្រោះការទិញដីមិនត្រូវកន្លែងអាចកប់ដើម មិនមានទុនបង្វិល ហើយប្រសិនជាជំពាក់ប្រាក់ធនាគារ និងគ្មានទុនបង្វិល ដែលអាចប្រឈមមុខនឹងធនាគាររឹបអូសទ្រព្យសម្បត្តិ។

ប្រឹក្សាយោបល់

ប្រសិនបើដឹងថាខ្លួនមិនសូវចេះ និងមិនមានជំនាញ ដូច្នេះគួរតែត្រូវធ្វើការប្រឹក្សាយោបល់ជាមួយអ្នកជំនាញអចលនទ្រព្យ ដែលមានជំនាញ និងបទពិសោធន៍ជាមុន ដើម្បីផ្តល់តំបូន្មានថា តើគួរធ្វើយ៉ាងម៉េច រៀបចំយ៉ាងម៉េច ដើម្បីឲ្យការបំពេញការងារ ឬការវិនិយោគក្នុងវិស័យនេះ មានភាពល្អប្រសើរ និងបញ្ចៀសបាននូវហានិភ័យ។ អ្នកត្រូវចេះប្រមូលព័ត៌មាន និងផ្តល់ការប្រឹក្សាជាមួយអ្នកជំនាញអចលនទ្រព្យ ដើម្បីយកព័ត៌មានគ្រប់ជ្រុងជ្រោយ មុនធ្វើការសម្រេចចិត្តថា តើការសម្រេចចិត្តរបស់យើងមានភាពត្រឹមត្រូវ ឬយ៉ាងណា។

កសាងទំនុកចិត្ត

ធ្វើជាក្រុមហ៊ុនអចលនទ្រព្យ អ្វីដែលសំខាន់បំផុត និងមុនដំបូងគេ គឺត្រូវកសាងកេរ្ត៍ឈ្មោះ ព្រោះកេរ្ត៍ឈ្មោះជារឿងចាំបាច់សម្រាប់ជោគជ័យរយៈពេលវែង។ នៅក្នុងក្រុមហ៊ុនមួយ មុនចេញទៅធ្វើការ បុគ្គលិកត្រូវតែទទួលបានការបណ្តុះបណ្តាលជាមុនសិន ដូចជា ជំនាញក្នុងការនិយាយ ជំនាញក្នុងការទំនាក់ទំនងភ្ញៀវ ជំនាញក្នុងការដោះស្រាយបញ្ហារបស់អតិថិជន និងជំនាញក្នុងការទិញ លក់ ជួល ដោយជោគជ័យ។ ដូច្នេះដើម្បីធ្វើឲ្យភ្នាក់ងារអចលនទ្រព្យ មានចំណេះ ជំនាញ និងបទពិសោធន៍ដែលអាចធ្វើការបានក្នុងវិស័យនេះ គឺត្រូវការការបណ្តុះបណ្តាល និងពង្រីកភ្នាក់ងារឲ្យបានច្រើន ដើម្បីពង្រីកវិសាលភាពការងារឲ្យបានទូលំទូលាយ។

ត្រូវមានឯកទេសអ្វីមួយជាក់លាក់

វិស័យអចលនទ្រព្យមានផ្នែកជាច្រើនខុសៗគ្នា ហេតុនេះយើងជាភ្នាក់ងារអចលនទ្រព្យ ឬចង់វិនិយោគក្នុងវិស័យនេះ ត្រូវមានជំនាញអ្វីមួយជាក់លាក់ ទើបយើងអាចធ្វើបានតាមគោលដៅរបស់យើង ទទួលបានប្រាក់ចំណេញ និងបញ្ចៀសបាននូវហានិភ័យចំពោះមុខ។

បញ្ហាប្រឈម

នៅក្នុងវិស័យអ្វីមួយក៏ដោយតែងតែមានហានិភ័យ ដូច្នេះភ្នាក់ងារ គឺប្រឈមនឹងហានិភ័យច្រើន ហេតុនេះដើម្បីបញ្ចៀសហានិភ័យ និងការបាត់បង់ទំនុកចិត្ត គឺត្រូវតែមានបណ្តុះបណ្តាលដល់បុគ្គលិកដែលមានតួនាទីជាភ្នាក់ងារទៅលើក្រមសីលធ៌ម ដូចជាការផ្តល់ព័ត៌មានដោយស្មោះត្រង់ អាចជឿជាក់បាន និងមិនបំប៉ោងតម្លៃ។ ស៊ូចំណេញតិច តែបានរយៈពេលយូរ ដើម្បីសន្សំក្រេឌីត ចៀសវាងចំណេញច្រើន ប៉ុន្តែត្រឹមរយៈពេលខ្លីត្រូវបាត់បង់ទៅវិញ ជាពិសេសត្រូវបង្កើនទំនុកចិត្តឲ្យអតិថិជនឲ្យមានជំនឿជឿជាក់លើសេវាកម្មរបស់ក្រុមហ៊ុនជាចាំបាច់។

ទាំងអស់នេះគឺជាអ្វីដែលលោកអ្នកគួរតែត្រៀម និងរៀបចំឱ្យរួចជាស្រេចមុនពេលបោះជំហ៊ានឈានចូលប្រឡូកនៅក្នុងវិស័យអចលនទ្រព្យ៕

តម្រូវការទីតាំងលក់រាយនៅតាមផ្សារទំនើបមានកំណើនខ្ពស់

April 9, 2019

0

ដោយ រ៉ាណេត

ភ្នំពេញ៖ បើទោះជាគម្រោងផ្សារទំនើបធំៗត្រូវបានបង្ហាញ ប៉ុន្តែតម្រូវការនៃការជួលទីតាំងលក់រាយ នៅតាមផ្សារទំនើបនៅតែបន្តភាពរឹងម៉ាំដដែល និងមិនទាន់សញ្ញាបង្ហាញពីការធ្លាក់ចុះនោះឡើយ។

យោងតាមការសិក្សារបស់ក្រុមហ៊ុន CBRE Cambodia ដែលបានសិក្សាពីតម្រូវការប្រើប្រាស់ទីតាំងលក់រាយ តាមផ្សារទំនើបនានាក្នុងដំណាច់ត្រីមាសទី១ ឆ្នាំ២០១៩នេះបានឲ្យដឹងនៅព្រឹកថ្ងៃទី៩ ខែមេសានេះ បានឱ្យថា នៅត្រឹមដើមឆ្នាំ ២០១៩នេះ តម្រូវការនៃការជួលទីតាំងលក់រាយនៅតាមផ្សារទំនើប នៅតែមានសញ្ញាវិជ្ជមាននៅឡើយ។ ជាមួយនឹងការប្រកាសដែលបង្ហាញពីលទ្ធផល នៃការស្រាវជ្រាវប្រចាំត្រីមាសទី១នេះ ក៏បានលើកឡើងផងដែរថា បច្ចុប្បន្នចំពោះបណ្តាងទំនិញ បែបទំនើបមួយចំនួនដែលធ្លាប់តែតាំងនៅតាមដងផ្លូវមួយចំនួន កាលពីប៉ុន្មានឆ្នាំមុននោះហាក់លែងមានទៀតហើយ។

ការសិក្សាដដែលបានរកឃើញថា ដោយសារម្ចាស់អាជីវកម្ម ក៏ដូចជាពាណិជ្ជករមួយចំនួន បានដឹងពីភាពងាយស្រួលក្នុងការជួលទីតាំងលក់រាយ នៅតាមផ្សារទំនើបស្របពេលដែលមនុស្សជាច្រើន ចាប់ផ្តើមផ្លាស់ប្ដូរនិន្នាការពីការរស់នៅបែបសាមញ្ញ និងតាមទម្លាប់ទៅជាបែបទាន់សម័យព ស៊ីវិល័យនៃសង្គមនាពេលបច្ចុប្បន្ននេះ។ ជាក់ស្ដែងដូចជា ទំហំនៃផ្សារទំនើបជាតិ អន្តរជាតិដែលមិនទាន់បានប្រើប្រាស់ស្ថិតក្នុងភាពទំនេរនៅសល់ប្រមាណ១០ភាគរយប៉ុណ្ណោះ។ នេះគឺជាសញ្ញាវិជ្ជមានមួយ ដែលបញ្ជាក់ថា ទីផ្សារ និងតម្រូវការនៃការជួលទីតាំងលក់រាយ នៅតាមផ្សារទំនើបនៅតែមានភាពរឹងម៉ាំដដែល បើទោះជាផ្សារទំំនើបធំមួយចំនួនទៀត បានត្រៀមខ្លួនរួចជាស្រេចក្នុងការឈានជើងចូលមកក្នុងពេលដ៏ខ្លីឆាប់ៗខាងមុខនេះ។

កញ្ញា គឹម គិនកេសា អ្នកស្រាវជ្រាវផ្នែកអចលនទ្រព្យជាន់ខ្ពស់ ក្រុមហ៊ុន CBRE Cambodia បានមានប្រសាសន៍ឱ្យដឹងថា ហេតុផលដែលធ្វើឱ្យមានតម្រូវការខ្ពស់ក៏ព្រោះតែស្ថានភាពសេដ្ឋកិច្ច និងការរស់នៅរបស់ប្រជាជន ក្នុងស្រុកមានភាពល្អប្រសើរជាងមុន មានចំណូល និងចំណាយកើនឡើង ដែលជាហេតុធ្វើឱ្យកើតមានសង្វាក់ពាណិជ្ជកម្ម ដើម្បីផ្គត់ផ្គង់ឱ្យស្របទៅនឹងតម្រូវការជាក់ស្ដែង។

កញ្ញាបន្តថា “អ្នកវិនិយោគដែលដើរតួជាអ្នកផ្គត់ផ្គង់ក្នុងវិស័យនេះ មានទាំងអ្នកក្នុងស្រុក និងអ្នកក្រៅស្រុកផងដែរ រហូត ដល់មានការនាំចូលនូវម៉ាកផលិតផលថ្មីៗ ចំនួន៦៥ប្រភេទនៅត្រឹមដំណាច់ឆ្នាំ២០១៨”។ កញ្ញាបន្តថា “ផលិតផលដែលតម្រូវដាក់លក់នៅទីតាំងលក់រាយតាមផ្សារទំនើបភាគច្រើនជាប្រភេទចំណីអាហារ និងភេសជ្ជៈ ដែលនាំចូលមកពីប៉ែកអាស៊ីប៉ាស៊ីហ្វិក”៕

ការសិក្សាថ្មី៖ សែនសុខជាប់ចំណាត់ថ្នាក់ជាខណ្ឌដែលមានចំនួនបុរីច្រើនជាងគេ

April 9, 2019

0

ដោយ រ៉ាណេត

ភ្នំពេញ៖ ខណ្ឌសែនសុខ ត្រូវបានអ្នកជំនាញផ្នែកខាងស្រាវជ្រាវអចលនទ្រព្យអះអាងថា គឺជាខណ្ឌមួយក្នុងចំណោមខណ្ឌទាំង១៤ នៅក្នុងរាជធានីភ្នំពេញ ដែលមានគម្រោង និងសំណង់បុរីលំនៅដ្ឋានច្រើនជាងគេ ខណៈដែលខណ្ឌឫស្សីកែវ ឈរនៅលំដាប់លេខរៀងបន្ទាប់។

យោងតាមការសិក្សារបស់ក្រុមហ៊ុន CBRE Cambodia ដែលបានបង្ហាញក្នុងរបាយការណ៍របស់ខ្លួននាព្រឹកថ្ងៃទី៩ មេសានេះថា ស្របពេលដែលវិស័យសំណង់នៅកម្ពុជាកំពុងមានការអភិវឌ្ឍ និងកើនឡើងឥតឈប់ឈរ ជាពិសេសវិស័យលំនៅដ្ឋានតែម្ដងគេសង្កេតឃើញខណ្ឌសែនសុខ ដែលស្ថិតនៅប៉ែកខាងជើងឈៀងខាងលិចនៃរាជធានីភ្នំពេញ បាននិងកំពុងដើរតួឈានមុខគេលើផ្នែកសំណង់បុរី។

អ្នកស្រាវជ្រាវផ្នែកអចលនទ្រព្យជាន់ខ្ពស់ប្រចាំនៅក្រុមហ៊ុន CBRE Cambodia កញ្ញាគឹម គិនកេសាបានមានប្រសាសន៍ឱ្យថា ដោយសារតែតម្លៃអចលនទ្រព្យនៅកណ្តាលរាជធានីភ្នំពេញមានការកើនឡើងខ្ពស់ បានជម្រុញឱ្យក្រុមហ៊ុនអភិវឌ្ឍលំនៅដ្ឋានជាច្រើនងាកទៅចាប់អារម្មណ៍នៅតាមតំបន់ជាយក្រុង ជាក់ស្ដែងដូចជានៅក្នុងខណ្ឌសែនសុខជាដើម ដែលមានគម្រោងបុរីជាច្រើនកំពុងតាំងនៅទីនេះ។ កញ្ញាបានបន្តថា ចំនួនបុរីនៅក្នុងខណ្ឌសែនសុខ គឺមានរហូតដល់៤៥គម្រោង ដោយនៅក្នុងគម្រោងបុរីទាំងនោះ មានការសាងសង់លំនៅដ្ឋានច្រើនប្រភេទ ច្រើនជម្រើស ដែលលក់ក្នុងតម្លៃផ្សេងៗពីគ្នាអាស្រ័យទៅតាមទីតាំងប្រភេទផ្ទះ និងទំហំ។

កញ្ញាបន្តថា “ភាគច្រើនលំនៅដ្ឋាន ដែលទទួលបានការសាទរពីអតិថិជន គឺប្រភេទផ្ទះល្វែង និងវីឡាកូនកាត់ ព្រោះលំនៅដ្ឋានប្រភេទនេះមានតម្លៃសមរម្យ ស្របទៅនឹងកម្រិតជីវភាពរបស់ប្រជាជន”។ កញ្ញាបន្តថា បន្ទាប់ពីខណ្ឌសែនសុខ ដែលមានរហូតដល់ ៤៥ គម្រោងនោះ ខណ្ឌឫស្សីកែវឈរនៅលំដាប់ទី២ ដែលមានចំនួនបុរី៣១ គម្រោង ហើយខណ្ឌពោធិ៍សែនជ័យ ស្ថិតនៅលំដាប់ទី៣។

នាយកក្រុមហ៊ុន R Investment Group លោកឧកញ៉ាតេង រិទ្ធី បានមានប្រសាសន៍ថាខណ្ឌសែនសុខ មានសក្ដានុពលល្អ និងសមស្របទៅនឹងសំណង់លំនៅដ្ឋានងាយស្រួលរស់នៅ ហើយផ្ទៃដីនៅក្នុងខណ្ឌនេះនៅមានវិសាលភាពធំទូលាយ និងមានតម្លៃទាបអាចផ្តល់ឱកាសដល់អ្នកអភិវឌ្ឍន៍។ បន្ថែមពីនេះ អ្វីដែលជម្រុញឱ្យមានគម្រោងបុរី គម្រោងលំនៅដ្ឋានឆ្ពោះទៅកាន់ខណ្ឌមួយនេះ ព្រោះមនុស្សជាច្រើនចាប់ផ្តើមចាប់អារម្មណ៍ចូលទៅរស់នៅទីនេះ រួមជាមួយនឹងគម្រោងវិនិយោគធំៗជាច្រើន ដូចជា ផ្សារទំនើប AEON 2 , ផ្សារ Makro ជាដើម។

លោកបន្តថា “នៅថ្ងៃអនាគតក៏នឹងមានគម្រោងផ្សារទំនើបផ្សេងៗទៀត ចូលទៅកាន់ខណ្ឌមួយនេះ ដែលខ័ណ្ឌនេះនឹងអាចមានភាពរីកចម្រលន លំនាំដូចគ្នាខណ្ឌទួលគោកនាពេលបច្ចុប្បន្ន”៕

ភ្នំគូលែននឹងក្លាយទៅជាតំបន់ទេសចរណ៍វប្បធម៌ធម្មជាតិដ៏ទាក់ទាញថ្មីដែលមានស្ដង់ដាត្រឹមត្រូវ

April 9, 2019

0

ដោយ វុត្ថា

សៀមរាប៖ ក្រសួងទេសចរណ៍មានគម្រោង ជំរុញការរៀបចំតំបន់ភ្នំគូលែនទៅជា «តំបន់ទេសចរណ៍វប្បធម៌ ប្រវត្តិសាស្ត្រ និងធម្មជាតិ» រួមទាំង «ទេសចរណ៍ផ្សងបែបផ្សងព្រេង» ដ៏ទាក់ទាញថ្មីមួយទៀតនៅខេត្តសៀមរាប-អង្គរ ដើម្បីបំពេញតម្រូវការជូនភ្ញៀវទេសចរជាតិ-អន្តរជាតិ និងដើម្បីចូលរួមអនុវត្តនូវយុទ្ធសាស្ត្ររបស់រាជរដ្ឋាភិបាល ដែលតែងតែជំរុញឱ្យមានការបង្កើតផលិតផលទេសចរណ៍ថ្មីៗបន្ថែម។

រដ្ឋមន្រ្តីក្រសួងទេសចរណ៍លោកថោង ខុនបានមានប្រសាសន៍ក្នុងកិច្ចប្រជុំជាមួយមន្រ្តីពាក់ព័ន្ឋនាព្រឹកថ្ងៃទី៩ មេសានេះថា ជាពិតណាស់ តំបន់ភ្នំគូលែននៃខេត្តសៀមរាប មានសក្ដានុពលផ្នែកវប្បធម៌ប្រវត្តិសាស្ត្រ និងធម្មជាតិរួចទៅហើយ ហើយក៏មានភ្ញៀវទេសចរទៅទស្សនាកម្សាន្តជាច្រើនផងដែរ ប៉ុន្តែមិនទាន់មានការរៀបចំទៅតាមស្ដង់ដាជាតិ និងអន្តរជាតិនៅឡើយ។

លោកបន្តថា នៅទីនោះសម្បូរទៅដោយព្រៃភ្នំក្រំថ្ម បែបធម្មជាតិ មានប្រាង្គប្រាសាទ ចម្លាក់សិលា និងបុរាណដ្ឋានដ៏ច្រើន មានស្ទឹងប្រវត្តិសាស្ត្រ មានពយភ្នំដែលកើតឡើងពីធម្មជាតិ ទេសភាពនៅលើគិរីបុព្វតាក៏រឹតតែស្រស់ត្រកាល ថែមទាំងនៅមិនឆ្ងាយពីតំបន់អង្គរ និងទីប្រជុំជនសៀមរាបប៉ុន្មានឡើយ ហេតុនេះហើយបានជារាជរដ្ឋាភិបាល ដែលមានក្រសួងទេសចរណ៍ជាសេនាធិការ មានបំណងចង់ប្រែក្លាយតំបន់ប្រវត្តិសាស្ត្រមួយនេះ ទៅជាផលិតផលទេសចរណ៍ថ្មីមួយទៀត ពិសេសគឺចង់រៀបចំបន្ថែមឱ្យមានប្រភេទទេសចរណ៍ផ្សេងទៀត ដូចជា ដំណើរទេសចរណ៍បែបផ្សងព្រេង ដូចនៅតំបន់ភ្នំឱរ៉ាល់ សហគមន៍ទេសចរណ៍អារ៉ែង ភ្នំបូកគោជាដើម។

លោករដ្ឋមន្ត្រីថោង ខុន បានដាក់ចេញនូវផែនការមួយចំនួនឱ្យគណៈកម្មការអន្តរក្រសួងដើម្បីសិក្សារៀបចំផែនការមេ សម្រាប់ការអភិវឌ្ឍវិស័យទេសចរណ៍នៅខេត្តសៀមរាប» រួមគ្នាអនុវត្តឱ្យបាន ដោយលោកបានជំរុញឱ្យក្រសួងទេសចរណ៍ ក្រសួងបរិស្ថាន ក្រសួងពាក់ព័ន្ធ រដ្ឋបាលខេត្តសៀមរាប អាជ្ញាធរជាតិអប្សរា និងមន្ទីរពាក់ព័ន្ធផ្សេងទៀត រួមគ្នាជំរុញការគ្រប់គ្រង និងអភិវឌ្ឍន៍តំបន់ទេសចរណ៍ថ្មីនៅលើភ្នំគូលែននេះ ឱ្យបានសម្រេចជោគជ័យឆាប់រហ័ស។

គណៈកម្មការអន្តរក្រសួងនេះ ក៏បានឯកភាពគ្នារៀបចំផែនការមេអភិវឌ្ឍន៍នៅគោលដៅទេសចរដ៏ធំៗចម្បង សម្រាប់ឆ្នាំ២០២០-២០៤០ផងដែរ ក្នុងនោះមានគម្រោងអភិវឌ្ឍន៍រយៈពេលខ្លី៥ឆ្នាំ(២០១៨-២០២៣) ផែនការជំរុញការរៀបចំកសាងហេដ្ឋរចនាសម្ព័ន្ធរឹងនៅទីក្រុងសៀមរាប ដែលមានជាអាទិ៍៖ ការជួសជុលផ្លូវក្នុងខេត្ត ផ្លូវក្រវាត់ជុំវិញក្រុង ការផ្គត់ផ្គង់ទឹកស្អាត អគ្គិសនី ការគ្រប់គ្រងសំណល់រឹង-រាវ សណ្តាប់ធ្នាប់អនាម័យក្នុងទីក្រុង។

ព្រមជាមួយនោះ អង្គប្រជុំក៏បានឯកគ្នាប្រគល់ភារកិច្ចជូន លោកអភិបាលខេត្តសៀមរាប ដើម្បីដឹកនាំអង្គប្រជុំសម្របសម្រូលមួយ ដើម្បីប្រែក្លាយសហគមន៍នេសាទជ្រាវទៅជាសហគមន៍តាមស្តង់ដាជាតិ និងអាស៊ានដ៏ទាក់ទាញ ឱ្យបានឆាប់រហ័សផងដែរ។

លោក ថោង ខុន ក៏បានជំរុញឱ្យមានការពង្រឹងគុណភាពសេវាកម្មទេសចរណ៍ និងធនធានមនុស្សក្នុងវិស័យទេសចរណ៍ ដោយត្រូវពង្រឹងគុណភាពសាលាបណ្តុះបណ្តាលជំនាញវិជ្ជាជីវៈទេសចរណ៍ ការបណ្តុះបណ្តាលផ្ទៃក្នុង និងជំរុញការអនុវត្តស្តង់ដាអាស៊ានក្នុងវិស័យទេសចរណ៍ ដោយក្នុងនោះរាជរដ្ឋាភិបាលបានបង្កើតឲ្យមាន «គណៈកម្មការជាតិផ្នែកជំនាញទេសចរណ៍» ដោយមានក្រសួងទេសចរណ៍ជាប្រធាន ហើយសព្វថ្ងៃកម្ពុជាបានដាក់ឲ្យអនុវត្តនូវកម្មវិធីបណ្តុះបណ្តាលអាស៊ាន លើ៣២មុខជំនាញ។

លើសពីនេះលោកថោង ខុនបន្តណែនាំឱ្យកាត់បន្ថយការធ្លុះធ្លាយ នៃវិស័យទេសចរណ៍ (Tourism Leakage) ដែលកើតចេញពីការនាំចូលបន្លែ ផ្លែឈើ និងសាច់ពីបរទេស ដោយត្រូវជំរុញការអភិវឌ្ឍខ្សែក្រវាត់បៃតង ជុំវិញក្រុងសៀមរាប ដោយជំរុញសកម្មភាពដាំបន្លែ ផ្លែឈើ និងចិញ្ចឹមសត្វជាលក្ខណៈធម្មជាតិ ដើម្បីផ្គត់ផ្គង់តម្រូវការភ្ញៀវទេសចរ។ម្យ៉ាងទៀត ការត្រៀមលក្ខណៈសម្បត្តិទទួលភ្ញៀវទេសចរអន្តរជាតិដើម្បីធានាផលប្រយោជន៍អតិបរមាពិសេស ការត្រៀមលក្ខណះទទួលទេសចរចិនដែលនឹងមានកំណើន យ៉ាងច្រើនជារៀងរាល់ឆ្នាំ ដោយត្រូវអនុវត្តន៍អោយបានល្អ តាមសៀវភៅស្តីពី «China Ready» និងយុទ្ធសាស្រ្តទីផ្សារដោយឡែកសម្រាប់ភ្ញៀវទេសចរចិន។

កិច្ចប្រជុំនៃគណៈកម្មការអន្តរក្រសួង ដើម្បីសិក្សារៀបចំផែនការមេសម្រាប់ការអភិវឌ្ឍវិស័យទេសចរណ៍នៅខេត្តសៀមរាបនេះ នឹងបន្តនៅពេល៣ខែខាងមុខទៀត ដើម្បីត្រួតពិនិត្យលើលទ្ធផលដែលសម្រេចបាន និងដើម្បីដាក់ទិសដៅអនុវត្តបន្ត៕

រដ្ឋាភិបាលចាប់ផ្តើមសិក្សាជ្រើសរើសប្រព័ន្ធរថភ្លើងទំនើបដើម្បីសាងសង់នៅក្នុងទីក្រុងភ្នំពេញ

April 9, 2019

0

ដោយ នៅ វឌ្ឍនា

ភ្នំពេញ៖ រដ្ឋាភិបាលតាមរយៈក្រសួងសាធារណៈការ និងដឹកជញ្ជូនបាននិងកំពុងសិក្សាជ្រើសរើសសាងសង់ ប្រព័ន្ធផ្លូវរត់ភ្លើងទំនើបក្នុងរាជធានីភ្នំពេញ ដើម្បីសម្រួលដល់ការកាត់បន្ថយការកកស្ទះចរាចរណ៍។

លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន នៅក្នុងកិច្ចប្រជុំត្រួតពិនិត្យលទ្ធផ លការងារសុវត្ថិភាពចរាចរណ៍ផ្លូវគោក ប្រចាំត្រីមាសទី១ ឆ្នាំ២០១៩ នា ថ្ងៃទី៩ ខែមេសា ឆ្នាំ២០១៩បានមានប្រសាសន៍ថា ប្រព័ន្ធផ្លូវរត់ភ្លើង AGG រត់នៅលើអាកាសបានសិក្សារួចហើយ តែមានក្រុមហ៊ុនផ្សេងទៀតនឹងមកសិក្សាប្រពន្ធផ្លូវរត់ភ្លើង Monorail Way ដែលមិនសូវមានសម្លេងលឺទេ ព្រោះវាប្រើកង់កៅស៊ូមិនដូចរថភ្លើងសព្វថ្ងៃ ហើយមានតម្លៃថោកជាងប្រពន្ធផ្លូវរត់ភ្លើង AGG។

លោករដ្ឋមន្ត្រីបន្តថា ប្រព័ន្ធផ្លូវរត់ភ្លើងនៅក្រោមដីមានតម្លៃថ្លៃ តែវាល្អជាង Monorail Way ដែលអាចជួយសម្រួលដល់ការដឹកជញ្ជូន ហើយសម្រាប់រាជធានីភ្នំពេញយើងកំពុងសិក្សាជម្រើសណាមួយដែល្អ សម្រាប់សាងសង់នាពេលខាងមុខនេះ។

រាជនីភ្នំពេញក្នុងរយៈពេលប៉ុន្មានឆ្នាំកន្លងមក មានកំណើនរថយន្តកើនឡើងច្រើនគួរឲ្យកត់សម្គាល់ដោយសារជីវភាពពលរដ្ឋសមរម្យ មានលទ្ធភាពក្នុងការទិញរថយន្ត និងសេដ្ឋកិច្ចមានការរីចកម្រើន បានធ្វើមានការកកស្ទះចរាចរណ៍កើនឡើងនៅលើដងផ្លូវ។

កន្លងមកទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានសិក្សាលើការកសាងបណ្តាញរថភ្លើងលើអាកាស (Sky Train) ចំនួនបីខ្សែរួមហើយ។ ជាមួយគ្នានេះកាលពីពេលថ្មីៗនេះ ក្រុមហ៊ុនកសាងបណ្តាញផ្លូវរថភ្លើងល្បឿនលឿនរបស់ចិនក៏បានសន្យាជួយសាងសង់ប្រព័ន្ឋផ្លូវរថភ្លើងទំនើបនៅទីក្រុងភ្នំពេញ តបតាមសំណើរសុំរបស់លោកទេសរដ្ឋមន្រ្តីស៊ុន ចាន់ថុលផងដែរ៕